ငါ့လိုလူကို အထင်သေးလိုက်တာပဲ

"ကောင်းပြီ… ကောင်းပြီ… ကောင်းပြီ… အခုချက်ချင်း တစ်ယောက်ယောက်ကို ပြင်ဆင်ခိုင်းလိုက်ပါ့မယ်”

ကျိုးမင်ယီ အလွန် ဝမ်းသာနေ၏။

သူ ရှန်မို့ စွမ်းဆောင်ရည်အပေါ် အလွန်အမင်း ယုံကြည်ချက်ရှိသည်။ ရှန်မိုကိုယ်တိုင် ထိုမျှလောက် ယုံကြည်မှုရှိနေမှ၍ သူလည်း သံသယဖြစ်နေစရာ မလိုတော့ပေ။

"ကျင့်ကြံသူရှန်... ဒါကတော့ မြေမီးတောက်ဓားကျမ်းပါ… အခုတော့ အနားယူမယ့်နေရာကို လိုက်ပို့ပေးပါ့မယ်"

"ဆေးဖော်စပ်တဲ့ကိစ္စကတော့ မလောပါဘူး… မနက်ဖြန်မှ လုပ်ကြတာပေါ့"

ကျိုးမင်ယီ ပျော်ရွှင်စွာ ပြောလိုက်သည်။

"ဒါလည်း အဆင်ပြေပါတယ်"

ရှန်မို ခပ်သာသာ ခေါင်းငြိမ့်ပြ၏။

ကျိုးမင်ယီ ရှန်မို့ကို ထျန်းဟီကုန်သည်ကြီးများ အသင်းဝန်းအတွင်းသို့ လမ်းပြခေါ်ဆောင်သွားသည်။ နောက်ဆုံးတွင် တိတ်ဆိတ်အေးချမ်းသော အိမ်ရာဝန်းတစ်ခုသို့ ရောက်ရှိလာ၏။ ထိုဝန်းအတွင်း၌ ရေကန်လေးတစ်ခု ရှိပြီး ရွှေငါးများ အေးအေးလူလူ ကူးခတ်နေကြသည်။ ပတ်ဝန်းကျင်တစ်ခုလုံးတွင် စိမ်းလန်းစိုပြည်သော ဝါးပင်များလည်း ဝန်းရံလျက် ရှိ၏။

ပြင်ပလောက၏ ဆူညံလှုပ်ရှားမှုများအားလုံးကို ဤနေရာ၌ ပိတ်ဆို့ထားသည့်အလား ထင်ရသည်။ ဤနေရာတွင် ရပ်နေရခြင်းမှာ ကျင်းနိုင်ငံ၏ စည်ကားလှသော မြို့တော်အလယ်တွင် ရောက်နေခြင်းထက် တောတောင်နက်ကြီးထဲ ရောက်နေသကဲ့သို့ ခံစားရလေ၏။

"ဒီနေရာလေးက မဆိုးဘူးပဲ"

ရှန်မို သဘောကျသွားသည်။

ကျိုးမင်ယီ အားရပါးရ ရယ်မောမိ၏။

"ဒါဆိုရင်တော့ ကျင့်ကြံသူရှန်... ဒီမှာပဲ အနားယူလိုက်ပါဦး… စိတ်ချနော်… ကျွန်တော့်အမိန့်မရှိဘဲ ဘယ်သူမှ လာပြီး မနှောင့်ယှက်စေရပါဘူး"

"ကောင်းပါပြီ"

ကျိုးမင်ယီ ထွက်သွားပြီးနောက် ရှန်မို အိမ်ရာဝန်းကို သေချာစွာ စစ်ဆေးကြည့်သည်။ အန္တရာယ်ရှိသည့် လက္ခဏာလည်း မရှိသလို သူ့ကို ချောင်းကြည့်ရန် စီစဉ်ထားသည့် အဆောင်အင်းများလည်း မတွေ့ရပေ။ ထိုအခါမှသာ ရှန်မို စိတ်အေးသွားပြီး တင်ပျဉ်ခွေ ထိုင်ကာ မြေမီးတောက်ဓားကျမ်းကို ထုတ်ယူလိုက်သည်။ ၎င်းမှာ ရှေးဟောင်း ပေစာလိပ်တစ်ခုကဲ့သို့ လိပ်ထား၏။

စာလိပ်ကို မဖြန့်ရသေးခင်မှာပင် ပြင်းထန်လှသော မီးလျှံများ အတွင်းထဲတွင် တိုးဝှေ့နေသည်ကို ခံစားရနိုင်သည်။ အကယ်၍ ဖြန့်လိုက်ပြီး စိတ်ဝိညာဉ်စွမ်းအင် ထည့်သွင်းလိုက်သည်နှင့် အနားသို့ လာသမျှ ရန်သူကို ခုတ်ပိုင်းနိုင်သည့် အစွမ်းထက် မီးဓာတ်ပါသော ဓားစွမ်းအင်များကို ထုတ်လွှတ်ပေးမည်ဖြစ်သည်။

ဤမြေမီးတောက်ဓားကျမ်း တစ်ခုတည်းကပင် ထိပ်တန်း မြေအဆင့် ဝိညာဉ်လက်နက်နှင့် ညီမျှနေသောကြောင့် နတ်ဘုရားပြောင်းလဲအဆင့် ကျင့်ကြံသူများပင် တပ်မက်ချင်စရာ ဖြစ်နေ၏။ အမှန်စင်စစ် ကောင်းကင်အဆင့် ဝိညာဉ်လက်နက်များမှာ လိုချင်ရုံနှင့် ရနိုင်သော အရာများ မဟုတ်ပေ။ ထို့ကြောင့် နတ်ဘုရားအသွင်ပြောင်းလဲခြင်းအဆင့် ကျင့်ကြံသူ အများစုအတွက် ထိပ်တန်း မြေအဆင့် ဝိညာဉ်လက်နက်ဆိုသည်မှာပင် တစ်သက်တာ လိုက်လံရှာဖွေရသည့် အမြင့်ဆုံး ပန်းတိုင် ဖြစ်နေ၏။

ရှန်မို နှင်းခဲဓားကျမ်းကိုလည်း ထုတ်ယူလိုက်သည်။ ဓားကျမ်းနှစ်စောင် အချင်းချင်း ထိတွေ့လိုက်သည်နှင့် တစ်ဦးနှင့်တစ်ဦး ပြန်လည်ဆုံတွေ့ရသော ညီအစ်ကိုများကဲ့သို့ပင် ချက်ချင်း ပြင်းထန်စွာ ရိုက်ခတ်သွားကြသည်။

ဝုန်း!

တစ်ခဏအတွင်းမှာပင် ဓားစွမ်းအင်များ လျှံထွက်လာပြီး တောက်ပသော အလင်းတန်းများ ပေါက်ကွဲထွက်လာ၏။ ရှန်မို မျက်မှောင်အနည်းငယ် ကြုတ်လိုက်ပြီး သူ့စိတ်ဝိညာဉ်စွမ်းအင်ကို အလျင်အမြန် ထုတ်လွှတ်ကာ ဓားစွမ်းအင်နှင့် အလင်းတန်းများ အပြင်သို့ မပေါက်ကြားစေရန် ပတ်ဝန်းကျင်ကို ပိတ်ဆို့လိုက်သည်။

ထိုထူးဆန်းသော ဖြစ်စဉ်မှာ နာရီဝက်ခန့် ကြာမြင့်ပြီးနောက်မှ တဖြည်းဖြည်း ငြိမ်သက်သွား၏။ ယခု ရှန်မို၏ ရှေ့တွင် ရှိနေသည်မှာ အလွန်ပင် ရှေးကျပြီး လေးလံလှသော ဓားကျမ်းတစ်စောင် ဖြစ်သည်။ သူ လက်ကို ဆန့်ထုတ်ကာ ဖြည်းဖြည်းချင်း ဖြန့်ကြည့်လိုက်သည်။

သူ ပိုဖြန့်လေလေ၊ စိတ်ကူး၍မရနိုင်လောက်အောင် အစွမ်းထက်လှသော ရှေးဟောင်းဓားကြီးတစ်စင်း အတွင်းထဲတွင် ပိတ်လှောင်ထားသည့်အလား ခံစားရလေလေပင်။ စာလိပ်ကို အပြည့်အဝ ဖြန့်လိုက်သည်နှင့် ဓားစွမ်းအင်များ ပေါက်ကွဲထွက်လာပြီး နတ်ဘုရားများနှင့် မိစ္ဆာများကိုပါ သုတ်သင်နိုင်ပေလိမ့်မည်။

ဒါဟာ ကောင်းကင်အဆင့် စိတ်ဝိညာဉ်လက်နက်တစ်ခုပဲ!

နှိုင်းယှဉ်စရာမရှိသော စွမ်းအား!

သူ့ အရှိန်အဝါမှာ လွှမ်းမိုးချုပ်ကိုင်ထားသည်။

ရှန်မို အံ့ဩနေမိ၏။

"ကောင်းကင်လောင်ကျွမ်းခြင်းခန်းမရဲ့ အစွမ်းအထက်ဆုံး ရတနာဆိုတာ မဆန်းပါဘူး… အဲဒီတုန်းက ရှောင်ဖန်ဟာ ဒီ ကောင်းကင်ဓားကျမ်းကို အားကိုးပြီး ကျင်းနိုင်ငံကို စိုးမိုးခဲ့တာပဲ"

"အခု မြေမီးတောက်ဓားကျမ်းနဲ့ နှင်းခဲဓားကျမ်းတွေ ငါ့လက်ထဲ ရောက်နေပြီဆိုတော့ ကောင်းကင်လောင်ကျွမ်းခြင်း ဓားကျမ်းတစ်ခုပဲ ကျန်တော့တယ်”

သူ့မျက်လုံးများထဲတွင် စူးရှသော အရိပ်အယောင်တစ်ခု ဖြတ်ပြေးသွားသည်။ အသစ်ဖြစ်ပေါ်လာသော ဤဓားကျမ်းမှာ ယခုအခါ သူ့လက်နက်များထဲတွင် အစွမ်းအထက်ဆုံး ဝိညာဉ်လက်နက် ဖြစ်လာလေပြီ။

…

ထျန်းဟီကုန်သည်ကြီးများအသင်း အပြင်ဘက်ရှိ စားသောက်ဆိုင်တစ်ခုတွင်။

ပိုင်ထျန်းယွမ်သည် စားသောက်ဆိုင်၏ အမြင့်ဆုံးအခန်း၌ ထိုင်နေသည်။ သူ ပြတင်းပေါက်ကို မှီလျက် ထျန်းဟီကုန်သည်ကြီးများအသင်း၏ အဝင်ဝကို လှမ်းမြင်နေရ၏။ သူ့အရှေ့ရှိ စားပွဲပေါ်တွင် ကောင်းနိုးရာရာ စားစရာများဖြင့် ပြည့်နှက်နေသော်လည်း သူကတော့ စားချင်စိတ် မရှိလှပေ။

မကြာမီတွင် ဆွဲဆောင်မှုရှိသော အမျိုးသမီးတစ်ဦး သူ့ဆီသို့ ချဉ်းကပ်လာတော့သည်။ သူသည် ထျန်းဟီကုန်သည်ကြီးများအသင်းတွင် ပိုင်ထျန်းယွမ်ကို ဧည့်ခံခဲ့သည့် ထျန်းဟီဂိုဏ်းမှ အမျိုးသမီးကျင့်ကြံသူပင်။

"ဆေးဆရာပိုင်... ရှင့်အတွက် အရေးကြီးတဲ့ သတင်းတစ်ခု ရှိတယ်"

ထိုအမျိုးသမီးက မျက်လုံးများ အရောင်တောက်လျက် ပြောလိုက်သည်။

ပိုင်ထျန်းယွမ်က ပေါ့ပေါ့ပါးပါး ပြုံးလျက်

"ပြောပါ… မင်းရဲ့သတင်းကသာ တကယ်အရေးကြီးမယ်ဆိုရင် မင်းလိုချင်တာ မှန်သမျှ ပေးနိုင်ပါတယ်"

မိန်းကလေး၏ မျက်လုံးများထဲတွင် လောဘရိပ်များ ဖြတ်ပြေးသွားပြီး အလျင်အမြန် ပြောပြ၏။

"ဥက္ကဋ္ဌကျိုးက ဂိုဒေါင်ထဲက မြေမီးတောက်ဓားကျမ်းကို ထုတ်ပြီး အခုလေးတင် အသင်းကို ရောက်လာတဲ့ လူငယ်တစ်ယောက်ကို ပေးလိုက်ပါတယ်”

ပိုင်ထျန်းယွမ်မျက်နှာ ချက်ချင်း ပျက်သွား၏။

"ဘာ… အဲဒါ ဘယ်သူလဲ"

အမျိုးသမီးမှ ခေါင်းယမ်းပြကာ

"ဥက္ကဋ္ဌကျိုးကတော့ အဲ့လူငယ်က ထျန်းဟီဂိုဏ်းရဲ့ ဂုဏ်သရေရှိ ဧည့်သည်တော်တစ်ယောက်တဲ့… သူ့ကို ကျင့်ကြံသူရှန်လို့တော့ ခေါ်တယ်… အဲဒီထက် ပိုပြီးတော့တော့ ကျွန်မ မသိပါဘူး"

ပိုင်ထျန်းယွမ်က ထိုနာမည်ကို ခပ်တိုးတိုး ရေရွတ်မိသည်။

"ကျင့်ကြံသူရှန်… နတ်ဘုရားအသွင်ပြောင်းလဲခြင်းအဆင့် ကျင့်ကြံသူတစ်ယောက် ဖြစ်ပုံရတယ်"

"ကောင်းပြီ… မင်းရဲ့ သတင်းက အဖိုးတန်ပါတယ်" ပိုင်ထျန်းယွမ် လက်ကို ဝှေ့ယမ်းလိုက်ပြီး အဆင့်မြင့် စိတ်ဝိညာဉ်ကျောက်တုံး နှစ်တုံး ပစ်ပေးလိုက်သည်။ "ဒါက မင်းအတွက် ဆုလာဘ်ပဲ"

"ထျန်းဟီကုန်သည်ကြီးများအသင်းထဲမှာပဲ ဆက်ပြီး စောင့်ကြည့်နေပါ… ကျင့်ကြံသူရှန် မည်သူမည်ဝါဖြစ်ကြောင်းကို စုံစမ်းပါ… မင်းသာ အောင်မြင်မယ်ဆိုရင် ငါ မင်းကို ကြီးကြီးမားမား ဆုချမယ်"

အမျိုးသမီး၏ မျက်လုံးများမှာ စိတ်လှုပ်ရှားမှုကြောင့် ဝင်းလက်သွားသည်။ သူသည် အမြုတေအဆင့် ကျင့်ကြံသူတစ်ဦးသာ ဖြစ်ပြီး တစ်သက်တာတွင် အဆင့်မြင့် စိတ်ဝိညာဉ်ကျောက်တုံးကို မြင်ပင် မမြင်ဖူးခဲ့ချေ။ ယခုမူ ပိုင်ထျန်းယွမ်မှ သူ့အတွက် နှစ်တုံးပင် အမှတ်မထင် ပေးလိုက်၏။ ထိုရတနာများဖြင့် မရေမတွက်နိုင်သော ဆေးလုံးများကို ဝယ်ယူနိုင်သလို သူ့ စိတ်ဝိညာဉ်လက်နက်အားလုံးကိုလည်း အဆင့်မြင့်သည့်အရာများဖြင့် အစားထိုးရန် လုံလောက်လှသည်။

"ဟုတ်ကဲ့… ဟုတ်ကဲ့ပါ… ကျွန်မ သေချာ စောင့်ကြည့်နေပြီး သတင်းရတာနဲ့ အမြန်ဆုံး လာပြောပါ့မယ်”

ထိုအမျိုးသမီး စိတ်လှုပ်ရှားစွာ ပြောလိုက်သည်။ ပိုင်ထျန်းယွမ်က လက်ယမ်းပြလိုက်သောအခါ သူ အလျင်အမြန် ထွက်သွားတော့သည်။

ပိုင်ထျန်းယွမ် အမူအရာမှာ ပိုမို အေးစက်လာသည်။ စည်ကားနေသော ထျန်းဟီကုန်သည်ကြီးများအသင်း၏ အဝင်ဝကို စိုက်ကြည့်၍

"ငါ့ကို ပေးမယ့်အစား တခြားတစ်ယောက်ကို ပေးလိုက်တယ်ပေါ့"

"ကျိုးမင်ယီ... မင်းဟာ ပါရမီရှင် ဆေးဆရာတစ်ယောက်ရဲ့ စွမ်းအားကို အထင်သေးခဲ့တာပဲ”

ရှပ်… ရှပ်…

ထိုအချိန်တွင် ခြေသံများ နီးကပ်လာသည်။ ပိုင်ထျန်းယွမ် မော့ကြည့်လိုက်သောအခါ ခပ်ကြပ်ကြပ် အနက်ရောင် ဝတ်စုံကို ဝတ်ဆင်ထားသည့် သွယ်လျသော ခန္ဓာကိုယ်နှင့် အမျိုးသမီးတစ်ဦး သူ့ထံသို့ ကျော့ရှင်းစွာ လမ်းလျှောက်လာသည်ကို မြင်လိုက်ရသည်။

သူ၏ အကြည့်များမှာ ချက်ချင်းပင် နူးညံ့သွားသည်။

“ကျီယီ… ရောက်လာပြီလား"

သူ ပြောပြောဆိုဆိုနှင့် ရှည်လျားသော ကျောက်စိမ်းသေတ္တာတစ်လုံးကို တွန်းပေးလိုက်သည်။

"ဒါက မင်းအတွက် ငါ့ရဲ့ လက်ဆောင်ပါ"

အနက်ရောင်ဝတ်စုံနှင့် အမျိုးသမီးသည် သူ့အရှေ့တွင် ဝင်ထိုင်လိုက်၏။ သူ့ မျက်နှာအောက်ပိုင်းကို ပါးလွှာသော ပိတ်စဖြင့် ဖုံးအုပ်ထားသော်လည်း လှပသော မျက်ခုံးတန်းများနှင့် နှာတံလေးမှာ အတုမရှိ လှပသူတစ်ဦး ဖြစ်ကြောင်း သိသာစေသည်။ ပိုင်ထျန်းယွမ်ကို မြင်သော်လည်း နွေးထွေးသော အမူအရာ မပြဘဲ ခပ်သာသာ ခေါင်းငြိမ့်ပြ၍ ကျောက်စိမ်းသေတ္တာကို ယူလိုက်၏။

သေတ္တာကို ဖွင့်ကြည့်လိုက်သောအခါ အတွင်းထဲတွင် ရှေးဟောင်း စာလိပ်တစ်ခုကို တွေ့လိုက်ရသည်။ သူ မျက်မှောင်အနည်းငယ် ကြုတ်လိုက်ပြီး ကြည်လင်လှသော အသံဖြင့်

"ဒါ မြေမီးတောက်ဓားကျမ်း မဟုတ်ဘူး"

ပိုင်ထျန်းယွမ်မှ အလျင်အမြန် ရှင်းပြလိုက်သည်။

"ဒါက ငါ အထူးတလည် ရယူထားတဲ့ ဓားကျမ်းတစ်ခုပါ… ဒါကလည်း မီးဓာတ်ပါတဲ့ ဓားစွမ်းအင်တွေကို ထုတ်လွှတ်ပေးတာပဲ… မြေမီးတောက်ဓားကျမ်းနဲ့ သိပ်ပြီး မကွာခြားပါဘူး"

အမျိုးသမီးမှ ကျောက်စိမ်းသေတ္တာကို ပိတ်လိုက်ပြီး ပြန်တွန်းပေးလိုက်၏။

"ငါ ပြောပြီးသားပဲ… မြေမီးတောက်ဓားကျမ်းကို လိုချင်တာလို့"

ပိုင်ထျန်းယွမ်မှာ အခက်တွေ့သွားဟန်ဖြင့်

"အရိပ်ခန်းမဆိုတာ လုံကျောက်ပြည်နယ်မှာ အကြီးဆုံးဂိုဏ်းပဲ… မင်း ဘာမဆို ရနိုင်သားပဲ… ဘာလို့ ဒီမပြည့်စုံတဲ့ ထိပ်တန်း မြေအဆင့် ဝိညာဉ်လက်နက်တစ်ခုကိုမှ အတင်းလိုချင်နေရတာလဲ"

အမျိုးသမီးက ဂရုမစိုက်သလို ပြန်ဖြေသည်။

"ရှင်ပဲ ကျွန်မကို မြေမီးတောက်ဓားကျမ်း ရအောင်ယူပေးမယ်လို့ ကတိပေးခဲ့တာလေ… ဘာဖြစ်လို့လဲ… အကြီးအကဲ ချင်းမုရဲ့ တပည့်ရင်း ဖြစ်ပါလျက်နဲ့ ထိပ်တန်း မြေအဆင့် ဝိညာဉ်လက်နက် တစ်ခုတောင် မရနိုင်ဘူးလား"

ပိုင်ထျန်းယွမ်သည် ဒေါသကြောင့် မျက်နှာတစ်ခုလုံး နီမြန်းလာသည်။

"ကျီယီ... ငါ မလုပ်နိုင်တာ မဟုတ်ဘူး… ကျိုးမင်ယီက ငါ ဘာပဲပေးပေး အလျှော့မပေးတာ… သူက ငါ့ကို လေးလံသောရေ အအေးလွန်ကဲဆေးလုံးရဲ့ ဆေးဖော်နည်းနဲ့ လဲပေးဖို့ အတင်းပြောနေတာလေ..."

အမျိုးသမီး ဆက်၍ နားမထောင်တော့ဘဲ ထိုင်ရာမှ ထလိုက်ပြီး ထွက်သွားရန် ပြင်လိုက်သည်။

"ရှင် မြေမီးတောက်ဓားကျမ်း မရနိုင်ဘူးဆိုရင် ကျွန်မကို လာပြီး မနှောင့်ယှက်ပါနဲ့တော့… ကျွန်မဘာသာပဲ ရအောင်ယူမယ်"

ပိုင်ထျန်းယွမ် အလျင်အမြန် တား၍

"ကျီယီ... ငါပြောတာ နားထောင်ပါဦး… ငါ့ဆီမှာ မြေမီးတောက်ဓားကျမ်းမရှိပေမဲ့ သတင်းတစ်ခုတော့ ရထားတယ်… ကျိုးမင်ယီက အဲဒီဓားကျမ်းကို နတ်ဘုရားအသွင်ပြောင်းလဲခြင်းအဆင့် ကျင့်ကြံသူတစ်ယောက်ကို ပေးလိုက်ပြီ… သူ့ကို ကျင့်ကြံသူရှန်လို့ ခေါ်တယ်… အဲဒီ ကျင့်ကြံသူရှန်က အခု ထျန်းဟီကုန်သည်ကြီးများအသင်းထဲက ဆိတ်ငြိမ်တဲ့ အိမ်ရာဝန်းတစ်ခုမှာ တည်းခိုနေတယ်"

အမျိုးသမီး၏ မျက်လုံးများထဲတွင် စူးရှသော အရိပ်အယောင်တစ်ခု ပေါ်လာ၏။

"ဒီသတင်းကတော့ နည်းနည်း အသုံးဝင်သားပဲ"

ပိုင်ထျန်းယွမ် ပြုံးလျက်

"ကျီယီ... အနည်းဆုံးတော့ ငါ မင်းကို ဒီကိစ္စမှာ ကူညီပေးနိုင်ခဲ့တာပဲ"

အမျိုးသမီးက ခေါင်းငြိမ့်ပြ၍

"မဆိုးပါဘူး… အချိန်ရရင် ပြန်တွေ့ကြတာပေါ့"

ထို့နောက် သူ တုံ့ဆိုင်းမနေတော့ဘဲ ထွက်ခွာသွားတော့သည်။ ပိုင်ထျန်းယွမ်မှာ ပါရမီရှင် ဆေးဆရာတစ်ယောက် ဖြစ်နေသည်အား အနည်းငယ်မျှပင် ဂရုမစိုက်ပေ။