ဘာလို့ လူသားတွေမှာ နတ်ဘုရားနန်းတော်အဆင့် မရှိတာလဲ

ရှန်မို ခပ်တိုးတိုး ရယ်မောလိုက်သော်လည်း ဘာမှမပြောပေ။ ထို့နောက် (၂) ယောက်လုံး တိတ်ဆိတ်သွားကြ၏။

ခေတ္တကြာသော် ကျီဖျင်မှ စကားစလာသည်။

“ကောင်လေး... ကုမင်သာ ကျင့်ကြံမှုက ထွက်လာရင် သူ့ရဲ့အစွမ်းက သေချာပေါက် ပိုတိုးတက်လာမှာ… အဲဒီကျရင် မင်း သူ့ကို ဘယ်လိုရင်ဆိုင်ဖို့ စဉ်းစားထားလဲ"

ရှန်မို ပြုံးလိုက်ပြီး

"ရိုးရိုးလေးပါပဲ ကျွန်တော်က သူ့ထက် ပိုအစွမ်းထက်နေရင် ရပြီလေ"

ကျီဖျင် ခဏတာ မှင်တက်သွားပြီးမှ ရယ်မောလိုက်၏။

"တကယ် ရိုးရှင်းတာပဲ… ဒါပေမဲ့ ဒါက အဲ့လောက်တော့ မလွယ်လောက်ဘူးထင်လို့ ငါစိုးရိမ်မိတယ်… ပြီးတော့..."

သူ ရှန်မို့ကို သေချာ အကဲခတ်ကြည့်ရင်း ဆက်ပြောသည်။

"မင်းက စိတ်ဝိညာဉ်စွမ်းအင်နဲ့ သွေးစွမ်းအင် နှစ်မျိုးလုံးကို ကျင့်ကြံတာပဲ… ဧကန္တ… မင်း တကယ်ပဲ ကုမင်ကို ကျော်တက်နိုင်လိမ့်မယ် ထင်တယ်"

ရှန်မို ကျီဖျင်တစ်ယောက် သူ့စိတ်ဝိညာဉ်နှင့် သွေးစွမ်းအင် နှစ်မျိုးတွဲကျင့်ကြံမှုကို မြင်သွားသည့်အတွက် မအံ့ဩမိပေ။ ကျီဖျင်မှာ ဓားအရှင်သခင်ဖြစ်ပြီး နတ်ဘုရားပြောင်းလဲခြင်းအဆင့် အထွတ်အထိပ်သို့ ရောက်နေသူ မဟုတ်ပါလား။ ဤမျှကိုပင် သူ မခွဲခြားနိုင်ပါက သူ့နာမည်လည်း အလကားသာ ဖြစ်ပေလိမ့်မည်။

"ငါလည်း ငယ်စဉ်ကတော့ ရည်မှန်းချက်ကြီးခဲ့ဖူးတယ်… သွေးစွမ်းအင်ကျင့်စဉ်တွေကိုပါ ကျင့်ခဲ့ပေမဲ့ နောက်ပိုင်းကျမှ ငါနဲ့မကိုက်ညီဘူးဆိုတာ သိခဲ့ရတာ… ငါ့ရဲ့ သွေးစွမ်းအင်အဆင့်က ငါ့ရဲ့ စိတ်ဝိညာဉ်ရေးကျင့်စဉ်ကိုတောင် အနှောင့်အယှက် ဖြစ်လာစေခဲ့တယ်လေ… နောက်ဆုံးတော့ အဲဒီကျင့်စဉ်တွေကို စွန့်လွှတ်ပြီး စိတ်ဝိညာဉ်စွမ်းအင်တစ်ခုတည်းကိုပဲ အာရုံစိုက်ခဲ့ရတယ်"

ကျီဖျင် သက်ပြင်းချမိ၏။

သူ့မျက်လုံးများတွင် ငယ်စဉ်က ရည်မှန်းချက်ကြီးခဲ့ပုံနှင့် အဆင်အခြင်မဲ့ခဲ့ပုံများကို ပြန်လည်အမှတ်ရနေသည့် လွမ်းဆွတ်မှုများ ရှိနေလေသည်။

"ငါ့ဆီမှာ တစ်ခုတော့ရှိတယ်… ဒါက ကျိဝူဆီက လက်ဆောင်ပဲ"

ကျီဖျင် သူ့ဝတ်ရုံအတွင်းမှ သွေးနီရောင် သလင်းကျောက်တစ်ခုကို ထုတ်ယူလိုက်သည်။

"ငါလည်း အိုပါပြီလေ… ဒီလို ရတနာမျိုးကို ဖြုန်းတီးပစ်ဖို့ မလိုတော့ဘူး"

သူ ထိုသွေးနီရောင်သလင်းကျောက်ကို ရှန်မို့ဘက်သို့ တွန်းပေးလိုက်၏။

ရှန်မို အနည်းငယ် အံ့ဩသွားမိသည်။

ကျိဝူ ဆိုသည်မှာ လက်ရှိ ဧကရာဇ်ကျင်း မဟုတ်ပါလား။ တစ်ချက်ကြည့်လိုက်ရုံနှင့် ရှန်မို၏ မျက်လုံးများ ဝင်းလက်သွားသည်။

မကြာသေးမီက အခွင့်အရေးတစ်ခုတွင် ဤရတနာကို မြင်တွေ့ခဲ့ရသော်လည်း ယခု ကိုယ်တိုင်မြင်ရသည့်အခါတွင်တော့ ၎င်းမှ ထွက်ပေါ်နေသည့် ပြင်းထန်သော သွေးစွမ်းအင်များကို ခံစားနေရဆဲပင်။

ကျီဖျင် ပြုံးလျက်

"ဒါက ချင်းလွမ်း သွေးအနှစ်ပဲ… သူ အသက်ရှင်စဉ်က အဆင့် ၇ အထိ ရောက်ခဲ့တာလေ… လူသားတွေရဲ့ နတ်ဘုရားနန်းတော်အဆင့်နဲ့ ညီမျှတယ်… ချင်းလွမ်းဆိုတာ ဖီးနစ်ငှက်ရဲ့ မျိုးဆက်ပဲ… ဒါပေမဲ့ ဒီလောကမှာ ချင်းလွမ်းတွေ အကုန် မျိုးတုံးသွားကြပြီ… ဒီ ချင်းလွမ်းသွေးအနှစ်က မင်းရဲ့ သွေးစွမ်းအင်ကျင့်စဉ်ကို နောက်တစ်ဆင့်တက်ဖို့ လုံလောက်လိမ့်မယ်"

ရှန်မို ချက်ချင်း လက်မခံသေးဘဲ ကျီဖျင်ကို ကြည့်ကာ

"စီနီယာ… စီနီယာ့ရဲ့ တောင်းဆိုချက်က ဘာလဲ"

ကျီဖျင် ရယ်မောလျက်

"မင်းက တကယ်ကို ထက်မြက်တာပဲ"

ထို့နောက် သူ၏ လေသံမှာ တည်ကြည်သွား၏။

"ဆယ်စုနှစ်များစွာတိုင်အောင် ငါဟာ ကိုးပြည်နယ်ရဲ့ ဂိုဏ်းကြီးရှစ်ဂိုဏ်းကို လှည့်လည်သွားလာခဲ့ပြီး ဒေသတစ်ခုစီရဲ့ ထူးချွန်တဲ့ ပါရမီရှင်တွေကို တိတ်တဆိတ် စောင့်ကြည့်ခဲ့တယ်… တချို့က ပြိုင်ဘက်ကင်း ပါရမီရှိပေမဲ့ ထောင်လွှားပြီး ရည်မှန်းချက် လွန်ကဲကြတယ်… တချို့က နှစ်ပေါင်းများစွာ မှေးမှိန်နေခဲ့ပြီးမှ ဆယ်စုနှစ်တွေ ကြာပြီးနောက် အကြီးအကျယ် ပွင့်လန်းလာကြတယ်… တချို့က ထူးခြားတဲ့ စွမ်းရည်ရှိပေမဲ့ ကိုယ်ကျင့်တရား မရှိကြဘူး… ရေတွက်လို့မရတဲ့ ပါရမီရှင်တွေထဲမှာ မင်းက အမြန်ဆုံး ကြီးထွားလာသူပဲ… မင်းမှာ ကံကောင်းမှုတွေရှိတယ်… အခွင့်အရေးတွေ ဝိုင်းနေတယ်… ပြတ်သားတဲ့ စိတ်ဓာတ်လည်း ရှိတယ်… ထူးဆန်းတာတွေ မဖြစ်ခဲ့ရင် မင်းရဲ့ စိတ်ဝိညာဉ်ကျင့်စဉ်က သေချာပေါက် နတ်ဘုရားပြောင်းလဲခြင်းအဆင့် အထွတ်အထိပ်ကို ရောက်မှာဖြစ်သလို၊ သွေးစွမ်းအင်ကျင့်စဉ်ကလည်း ရွှေထိပ်ဦးဘုရင် အဆင့်ကို တက်လှမ်းနိုင်လိမ့်မယ်"

ကျီဖျင်မှ တည်ကြည်စွာဖြင့်

"မင်းရဲ့ စွမ်းအားတွေ ကမ္ဘာကို တုန်လှုပ်စေမယ့်နေ့ ရောက်လာတဲ့အခါ မင်းအနေနဲ့ တော်ဝင်မျိုးနွယ်စုရဲ့ သွေးမျိုးဆက်ကို အမြစ်ပြတ် မသုတ်သင်ဖို့ ငါမျှော်လင့်ပါတယ်… ဘာပဲဖြစ်ဖြစ် ငါ့မျိုးရိုးက ကျီ ဖြစ်နေတာကိုး… ငါ့ရဲ့ ကျီ မျိုးဆက် ပြတ်တောက်သွားမှာကိုတော့ ငါမလိုလားဘူး"

ရှန်မို အနည်းငယ် အံ့သြသွားသည်။ ကျီဖျင်၏ အမြော်အမြင်မှာ အတော်ဝေးဝေးအထိ ရောက်နေသည်။ သူ ရှန်မို၏ ခွင့်လွှတ်မှုကို ကြိုတင်ရယူရန် ဤ ချင်းလွမ်းသွေးအနှစ်သာရကို အသုံးပြုနေခြင်း ဖြစ်၏။ ထို့ပြင် တောင်းဆိုချက်မှာလည်း အတော်လေး လျှော့ပေါ့ပေးထားသည်။ သူ ရှန်မို့ကို နန်းတော်အတွက် အလုပ်အကျွေးပြုရန် သို့မဟုတ် တော်ဝင်မိသားစုအပေါ် သစ္စာစောင့်သိရန် တောင်းဆိုနေခြင်းမဟုတ်။ နောင်တစ်ချိန်တွင် ကျီ မျိုးဆက်ကို အမြစ်ပြတ် မသုတ်သင်ရန်သာ မျှော်လင့်ခဲ့ခြင်းပင်။

ရှန်မို ချက်ချင်း သဘောမတူဘဲ တိတ်ဆိတ်နေသည်။ ခေတ္တကြာသော် ကျီဖျင်မှ သက်ပြင်းချကာ ထပ်ပြောသည်။

"ဒီလဲလှယ်မှုရဲ့ အစိတ်အပိုင်းတစ်ခုအနေနဲ့ ငါ မင်းကို တခြားအရာတစ်ခုလည်း ပေးနိုင်ပါသေးတယ်… ဒီကိစ္စက ပိုတောင် အရေးကြီးသေးတယ်… ဒါက ဒီလောကရဲ့ ကြီးမားတဲ့ လျှို့ဝှက်ချက်တစ်ခုပဲ"

ရှန်မိုက စဉ်းစားလိုက်သည်။

"စီနီယာ… ကျွန်တော့်ကို အဓိက စကားလုံးလေးတွေ အရင်ပြောပါ… အဲဒါကို ကြည့်ပြီးမှ ကျွန်တော် ထပ်ကြားချင် မကြားချင် ဆုံးဖြတ်ပါရစေ"

ကျီဖျင် မရယ်ဘဲ မနေနိုင်တော့ပေ။

"ကောင်းပါပြီ"

သူ့မျက်နှာ တည်ကြည်သွားသည်။

"ငါ စကားတစ်ခွန်းပဲ ပြောမယ်"

သူက စကားလုံး တစ်လုံးချင်းစီကို အလေးအနက်ဖြင့် ရွတ်လိုက်သည်။

"နတ်ဆိုး ပင်လယ်"

ရှန်မို၏ ရင်ထဲ တုန်လှုပ်သွား၏။

"ကောင်းပါပြီ… စီနီယာ့ရဲ့ ကမ်းလှမ်းချက်ကို ကျွန်တော် လက်ခံပါတယ်"

ကျီဖျင် အသက်ကို ဝဝရှူလိုက်ပြီး စိတ်သက်သာရာ ရကာ ပြုံးလိုက်သည်။ သူ၏ အချိန်များ ကုန်ဆုံးတော့မည်။ သူ့သက်တမ်းမှာ ကုန်ဆုံးခါနီးနေပြီ ဖြစ်ကြောင်း သူသိနေ၏။ ရှန်မို၏ အလားအလာမှာ အကန့်အသတ်မရှိကြောင်းလည်း သူသိသည်။ နောင်တွင် ရှန်မိုမှာ သူ့လို ပုဂ္ဂိုလ်မျိုး သို့မဟုတ် သူ့ထက် သာလွန်သူ ဖြစ်လာလိမ့်မည်။ ချင်းလွမ်းသွေးအနှစ်နှင့် သတင်းအချက်အလက် တစ်ခုကို ရှန်မို၏ ကတိနှင့် လဲလှယ်ခြင်းအား အရှုံးဟု မသတ်မှတ်ပေ။

ကျီဖျင် ဖြည်းဖြည်းချင်း ပြောပြသည်။

"လူသားတွေမှာ ဘာလို့ နတ်ဘုရားနန်းတော်အဆင့် ကျင့်ကြံသူတွေ မရှိတာလဲ နတ်ဆိုးတွေမှာလည်း ဘာလို့ ဘုရင်အဆင့်ထက်မြင့်တဲ့ မိစ္ဆာအရှင်သခင်တွေ မရှိတာလဲဆိုတာ မင်းသိလား"

ရှန်မို၏ မျက်ခုံးများ လှုပ်ရှားသွား၏။ ဤမေးခွန်းမှာ သူ့ စိတ်ထဲတွင် ရှေးယခင်တည်းက ရှိနေခဲ့ခြင်း ဖြစ်သည်။ နတ်ဘုရားနန်းတော်အဆင့် ရှိနေသည်မှာ ရှင်းလင်းသော်လည်း ကျင်းနိုင်ငံတစ်ဝှမ်းနှင့် တိုက်ကြီးတစ်ခုလုံးတွင် ထိုအဆင့်ရှိသူ တစ်ဦးမှ မရှိပေ။ ၎င်းမှာ အလွန် ထူးဆန်းလွန်းလှ၏။ မိစ္ဆာနိုင်ငံတော်တွင်လည်း ထိုနည်းအတိုင်းပင်။ နတ်ဘုရားနန်းတော်အဆင့်နှင့် နတ်ဘုရားပြောင်းလဲခြင်း အဆင့်ကြားတွင် မမြင်ရသော စည်းတစ်ခု ရှိနေသကဲ့သို့ပင်။

ရှန်မို အားလပ်ချိန်များတွင် စာအုပ်အမျိုးမျိုးကို ဖတ်လေ့ရှိသည်။ သူ၏ လက်ရှိကျင့်ကြံမှုအရ တစ်ချက်ကြည့်ရုံဖြင့် စာကြောင်းဆယ်ကြောင်း၊ စိတ်ပါလျှင် ရာနှင့်ချီ၍ ဖတ်နိုင်သည်။ သို့သော် စာအုပ်ပေါင်းများစွာ ဖတ်ခဲ့သော်လည်း ဤလျှို့ဝှက်ချက်နှင့် ပတ်သက်သည့် မှတ်တမ်းကို သူ တစ်ခါမှ မတွေ့ခဲ့ဖူးပေ။ နတ်ဘုရားနန်းတော်အဆင့်သို့ ရောက်သွားသည့် ကျင့်ကြံသူအားလုံး၊ ထိုအဆင့်ကို ကျော်လွန်သွားသည့် မိစ္ဆာဘုရင်များအားလုံးသည် ထိုအဆင့်သို့ ရောက်သည်နှင့် ပျောက်ကွယ်သွားကြ၏။ သူတို့ တည်ရှိခဲ့သည့် အစအနလေးပင် မကျန်တော့ပေ။

ကျီဖျင် အသံကိုမြှင့်၍

"အဲဒါ နတ်ဆိုး ပင်လယ်ကြောင့်ပဲ… နတ်ဆိုးတွေက လူသားတွေရော၊ မိစ္ဆာသတ္တဝါတွေရောရဲ့ ဘုံရန်သူတွေပဲ။ နတ်ဘုရားနန်းတော်အဆင့်ကို တက်လှမ်းနိုင်တဲ့ ဘယ်လူသားမဆို၊ မိစ္ဆာအရှင်သခင်အဆင့်ကို ရောက်သွားတဲ့ ဘယ်သတ္တဝါမဆို ကောင်းကင်တာအိုရဲ့ အလိုတော်အရ ချက်ချင်းဆင့်ခေါ်ခံရပြီး နတ်ဆိုးတွေကို သွားရောက်နှိမ်နင်းဖို့ နတ်ဆိုးပင်လယ်ကို ပို့ဆောင်ခြင်း ခံရတယ်"

ရှန်မို မျက်လုံးပြူးသွား၏။

"ဒါက အမှန်တရားပေါ့!"

“ဒေသတွင်း ဂိုဏ်းတစ်ခုမှာ ခြေတည်ဝိညာဉ် ကျင့်ကြံသူတစ်ဦး ပေါ်လာရင် ပုံမှန်အားဖြင့် သူတို့ရဲ့ ဂိုဏ်းက ဆင့်ခေါ်ပြီး ဂိုဏ်းထဲဝင်ဖို့ တောင်းဆိုတတ်ကြတယ်… ဒါပေမဲ့ အဲဒါက မဖြစ်မနေ မဟုတ်ဘူး… ဂိုဏ်းတွေရဲ့ အပြင်ဘက်မှာ လွတ်လပ်စွာ နေထိုင်နေကြတဲ့ ခြေတည်ဝိညာဉ် ကျင့်ကြံသူတွေ အများကြီးရှိသေးတယ်… ဒါပေမဲ့ ကောင်းကင်တာအိုရဲ့ ဆင့်ခေါ်မှုကတော့ အဲဒီလို မဟုတ်ဘူး"

ကျီဖျင်မှ ဆက်၍

"ဘယ်သူမဆို ငြင်းဆန်မယ်ဆိုရင် ချက်ချင်း အဖျက်ဆီးခံရတယ်… အကြောင်းပြချက်မရှိ၊ ညှိနှိုင်းလို့မရဘူး… ပိုပြီး ကြောက်စရာကောင်းတာက သတ်ဖြတ်ခံရရင်တောင်မှ အဲဒီဆင့်ခေါ်မှုက အသက်ဝင်နေသေးတာပဲ"

ရှန်မို လန့်သွား၏။

"သေပြီးရင်တောင် ဘယ်လိုလုပ် ဆင့်ခေါ်ခံရတာလဲ"

ကျိဖျင်က ခါးသီးစွာ ရယ်မောလိုက်သည်။

"နတ်ဘုရားနန်းတော်အဆင့် ကျင့်ကြံသူတစ်ယောက်ဟာ ရုပ်ပိုင်းဆိုင်ရာအရ သေဆုံးသွားရင်တောင် သူတို့ရဲ့ မူလဝိညာဉ်က ရှိနေသေးတယ်လေ… အဲဒီဆင့်ခေါ်မှုက သူတို့ရဲ့ မူလဝိညာဉ်ကို ယူသွားပြီး နတ်ဆိုး ပင်လယ်မှာ ခန္ဓာကိုယ်အသစ် ပြန်တည်ဆောက်ပေးလိမ့်မယ်… မိစ္ဆာအရှင်သခင်တွေကတော့ အသတ်ခံရရင်တောင် သွေးတစ်စက်ကနေ ပြန်ရှင်သန်နိုင်တယ်… သူတို့ကို နတ်ဆိုး ပင်လယ်ကို ပို့လိုက်ရုံပဲ… အဲဒီမှာ အစွမ်းထက်တဲ့ အင်အားတွေနဲ့ ပြန်လည်ရှင်သန်လာကြတယ်"

ရှန်မို၏ ကျောရိုးတစ်လျှောက် အေးစိမ့်သွား၏။ သေဆုံးခြင်းကတောင် ကောင်းကင်တာအို၏ အလိုတော်မှ မလွတ်မြောက်နိုင်ပါလား။

"စီနီယာက ဒါကို ဘယ်လိုသိတာလဲ"

ရှန်မိုက ပြန်မေးလိုက်သည်။

ကျီဖျင် သူ၏ နားထင်ကို ပုတ်ပြလိုက်ပြီး

“ငါတို့ ကျီ တော်ဝင်မိသားစုက ဒီအသိပညာကို မျိုးဆက်တစ်ခုပြီးတစ်ခု စိတ်ထဲမှာ မှတ်သားပြီး လက်ဆင့်ကမ်းလာခဲ့တာ… ဒီအမှတ်သညာကို မျိုးဆက်တစ်ခုချင်းစီရဲ့ အစွမ်းအထက်ဆုံး ကျင့်ကြံသူကိုပဲ လွှဲအပ်ပေးလေ့ရှိတယ်… ဘာစာသား မှတ်တမ်းမှ ထားရှိခွင့်မရှိဘူး… ဘာလို့လဲဆိုတော့ ဒါကို ချရေးလို့ မရနိုင်လို့ပဲ"

ကျီဖျင် အသံကိုနှိမ့်ပြီး

"မိစ္ဆာသတ္တဝါတွေဆိုတာ နတ်ဆိုးတွေရဲ့ တားမြစ်ထားတဲ့ စမ်းသပ်မှုတွေကနေ ထွက်ပေါ်လာတဲ့ ဘေးထွက်ပစ္စည်းတွေပဲ… ဒါကြောင့် သူတို့က လူသားတွေထက်စာရင် နတ်ဆိုးတွေနဲ့ ပိုနီးစပ်ကြတယ်"

ရှန်မိုက အလေးအနက် ခေါင်းငြိမ့်လိုက်၏။

"နားလည်ပါပြီ… ကျေးဇူးတင်ပါတယ် စီနီယာ"