ဉာဏ်အလင်း နယ်ပယ် သစ်ပင် ထူထောင်ခြင်း၊ လမ်းစဉ် အားလုံး၏ မူလအစ (၂)

~ပေ သုံးထောင်..

ပေ တစ်သောင်း..

...

အရွက်များသည် ကျောက်တုံးကြီးများ ပမာ၊ အမြစ်များသည် နဂါးများ ရစ်ခွေနေသကဲ့သို့ ဖြစ်လာပြီး၊ ဉာဏ်အလင်း လက်ဖက်ပင်ကြီးသည် ရှေးဟောင်း တောင်တန်းကြီး တစ်ခု အဖြစ် ပြောင်းလဲသွားသကဲ့သို့ ရှိ၏။ ယုံကြည်နိုင်စရာ မရှိလောက်အောင် ကြီးမားလာပြီး၊ အချိန်တိုင်းတွင် အံ့အားသင့်ဖွယ် နှုန်းဖြင့် ကြီးထွားနေ၏။

အင်မော်တယ် ဂိုဏ်း တပည့် အားလုံး အံ့အားသင့်နေကြရသည်။

ဉာဏ်အလင်း လက်ဖက်ပင်ကြီးသည် အင်မော်တယ် ဂိုဏ်း တည်နေရာနှင့် တဖြည်းဖြည်း ဝေးကွာသွားသော်လည်း၊ ပိုမို ထင်ရှား ပြတ်သားလာသည်ကို တွေ့မြင်နေရသည်။

အစိမ်းရောင် အလင်းတန်းများ အတွင်း၌ ပါဝင်သော အကန့်အသတ်မဲ့ သက်စောင့်စွမ်းအားများသည် ကမ္ဘာလောကကို လင်းလက်စေ၏။

ဉာဏ်အလင်း လက်ဖက်ပင်ကြီးသည် ဟင်းလင်းပြင်တွင် တွဲလွဲခိုနေသော အစိမ်းရောင် နေမင်းကြီး တစ်စင်း အဖြစ် ပြောင်းလဲသွားသကဲ့သို့ ရှိသည်။

ထိုအချိန်၌...

အစစ်အမှန်သိုင်း ကမ္ဘာ့ သက်ရှိ အားလုံး ထိတ်လန့်သွားကြ၏။ ကောင်းကင်ယံတွင် ရုတ်တရက် ပေါ်ထွက်လာသော အစိမ်းရောင် နေမင်းကြီးကို မြင်လိုက်ရသောအခါ၊ သူတို့၏ နှလုံးသားထဲတွင် ရိုသေလေးစားမှုများ ဖြစ်ပေါ်လာကြရသည်။

ယခင်က ကြားလိုက်ရသော ဝေါခနဲ မြည်သံများနှင့် ဆက်စပ် တွေးတောမိလိုက်ကြပြီး၊

အလိုအလျောက် ဦးညွှတ် ကိုးကွယ်လိုက်ကြ၏။

ထိုအခိုက်အတန့်၌၊ စွမ်းအားရှင် တစ်ဦးပြီး တစ်ဦး မျက်လုံးများ ပွင့်လာကြ၏။

ခရမ်းရောင် နန်းတော် နယ်ပယ် စစ်မှန်သူများနှင့် မှော်စွမ်းအင် နယ်ပယ် ကျင့်ကြံသူများသည် ကောင်းကင်သို့ ပျံတက်သွားကြ၏။

သူတို့၏ ထူးခြားသော မျက်လုံးများဖြင့် ကြည့်လိုက်ရာ၊ အစိမ်းရောင် နေမင်းကြီး ဆိုသည်မှာ အမှန်တကယ်ပင် ကြီးမားလှသော ဧရာမ သစ်ပင်ကြီး တစ်ပင် ဖြစ်ပြီး၊ ကြွယ်ဝသော သက်စောင့်စွမ်းအားများကို ထုတ်လွှတ်ကာ ကမ္ဘာလောကကို သန့်စင်ပေးနေကြောင်း သိရှိလိုက်ကြရသည်။

အကြည့်တိုင်းတွင် အံ့ဩမှုများ ပြည့်နှက်နေ၏။

အစစ်အမှန် နက်ရှိုင်းခြင်း တောင် ပေါ်တွင်၊ စစ်မှန်သူ ပိုင်ရှန်သည် ကောင်းကင်ကို အံ့အားသင့်စွာ မော့ကြည့်နေမိ၏။

"ဟာ... ဒီမောင်နင်ချီ... ထွက်လာတာနဲ့ အကြီးကြီး လုပ်ပြတော့တာပဲ"

စစ်မှန်သူ ပိုင်ရှန် မှတ်မိလိုက်သည်။ ထို ဧရာမ သစ်ပင်ကြီးသည် တာအိုရှာဖွေခြင်း ကျောင်းတော် ထဲမှ ဉာဏ်အလင်း လက်ဖက်ပင် ဖြစ်ကြောင်း ထင်ရှားလှသော်လည်း၊ ယခုအခါ ဤမျှ ခမ်းနားသော ပုံသဏ္ဌာန် အဖြစ် ပြောင်းလဲသွားခဲ့တော့၏။

အကန့်အသတ်မဲ့ နယ်ပယ် စွမ်းအားများ စုစည်းလာပြီး၊ ဝိညာဉ်စွမ်းအင်များသည် ဒီရေလှိုင်းများ အဖြစ် ပြောင်းလဲသွားသည်။

ဉာဏ်အလင်း လက်ဖက်ပင်ကြီးသည် တစ်ခါမှ မကြုံဖူးသော အရည်အသွေးပိုင်းဆိုင်ရာ အပြောင်းအလဲကို ကြုံတွေ့နေရသည်။ နင်ချီ၏ နှစ် ၂၀ ကြာ တံခါးပိတ် ကျင့်ကြံမှု ရလဒ်များသည် ဤနေရာတွင် ပေါ်ထွက်လာခြင်း ဖြစ်သည်။ ထူးဆန်းသော ဓမ္မ နည်းလမ်း အမျိုးမျိုးသည် သစ်ပင်ကြီး၏ ခန္ဓာကိုယ်ကို အာဟာရ ပေးစွမ်းနေပြီး၊ အချိန်တိုင်းတွင် ပိုမို ကြီးထွား ပြောင်းလဲစေ၏။

မည်သည့် အချိန်ကမှန်း မသိလိုက်ဘဲ...၊

အစိမ်းရောင် နေမင်းကြီးသည် ကမ္ဘာ့ အလင်းရောင် အားလုံးကို လွှမ်းမိုးသွားပြီး၊ တစ်ခုတည်းသော ဖြစ်တည်မှု အဖြစ် ကျန်ရှိနေတော့သည်။

ဧရာမ သစ်ပင်ကြီးသည် ကောင်းကင်သို့ ထိုးတက်နေပြီး၊ ဟင်းလင်းပြင် တစ်ခုလုံးကို ပြည့်နှက်တော့မလို နေရာယူထား၏။

ဤအချိန်တွင်...၊

သာမန် လူသားများပင်လျှင် အစိမ်းရောင် နေမင်းကြီး၏ ပုံသဏ္ဌာန် အစစ်အမှန်ကို မြင်တွေ့နေကြရပြီ ဖြစ်သည်။

ပိတ်သိပ်နေသော အမြစ်များသည် နဂါးများ ရစ်ခွေနေသကဲ့သို့ ဟင်းလင်းပြင်တွင် အမြစ်တွယ်နေပြီး၊ အရွက်များသည် တောင်တန်းများ ပမာ၊ ပင်စည်သည် ကောင်းကင်ထောက်တိုင်ကြီး ပမာ ရှိ၏။ မျဉ်းကြောင်းတိုင်းတွင် တာအို အငွေ့အသက်များ ပါဝင်နေပြီး၊ ကျင့်ကြံသူ အသီးသီးသည် အတွင်း၌ ပါဝင်သော အဆုံးစွန် အမှန်တရားများကို နားလည်သဘောပေါက်ရန် ပြင်းပြစွာ ဆန္ဒရှိနေကြသည်။

ကြွယ်ဝသော သက်စောင့်စွမ်းအားများသည် ကောင်းကင်နှင့် မြေကြီး အကြား ပြည့်နှက်နေပြီး၊ နူးညံ့သော အစိမ်းရောင် အလင်းတန်းများသည် ကမ္ဘာလောကကို လင်းလက်စေကာ၊ လူများကို ရုပ်ပိုင်းဆိုင်ရာနှင့် စိတ်ပိုင်းဆိုင်ရာ လန်းဆန်းစေ၏။

ဤမြင်ကွင်းသည် လူတိုင်း၏ စိတ်အာရုံထဲတွင် ထာဝရ စွဲထင်ကျန်ရစ်နေမည့် မြင်ကွင်း ဖြစ်ပေသည်။

"နယ်မြေ အရှင်သခင်"

မရေမတွက်နိုင်သော သက်ရှိများ ဦးညွှတ် ကိုးကွယ်လိုက်ကြ၏။

နယ်မြေ အရှင်သခင် မှလွဲ၍ မည်သူက ဤမျှ ကြီးကျယ်ခမ်းနားသော လုပ်ရပ်ကို လုပ်ဆောင်နိုင်မည်နည်း။

နယ်မြေ အရှင်သခင်၏ ရည်ရွယ်ချက်ကို မသိရသော်လည်း၊ သက်ရှိ အားလုံးသည် သူ၏ အမည်နာမကို ရွတ်ဆိုကာ ရိုသေလေးစားမှု ပြသနေကြ၏။

နင်ချီသည် ဧရာမ သစ်ပင်ကြီးပေါ်တွင် ထိုင်လျက် မျက်လုံးများကို ဖြည်းညှင်းစွာ ဖွင့်လိုက်၏။

သူ၏ မျက်လုံးများတွင် ကျေနပ်အားရမှု အရိပ်အယောင်များ ပါဝင်နေသည်။

နှစ်ပေါင်း ၂၀ လုံးလုံး၊ သူသည် မေးခွန်း တစ်ခုတည်းကိုသာ စဉ်းစားနေခဲ့သည်။ သက်ရှိ အားလုံး၏ ဉာဏ်ပညာကို မည်သို့ စုစည်းရမည်နည်း။

သူသည် နည်းလမ်းပေါင်းစုံကို ကြံဆခဲ့သည်။

ကမ္ဘာအနှံ့ အခင်းအကျင်းများ ရေးဆွဲခြင်း၊ သက်ရှိ အားလုံး၏ ဆန္ဒစွမ်းအားကို အခြေခံခြင်း၊ သို့မဟုတ် အရာအားလုံးကို ထိန်းချုပ်ရန် အခြေခံ နက်ရှိုင်းသော ကျင့်စဉ် တစ်ခု ဖန်တီးခြင်း စသည်ဖြင့် စဉ်းစားခဲ့သော်လည်း၊ မည်သည့်အရာကမျှ သူ့ကို ကျေနပ်မှု မပေးနိုင်ခဲ့ပေ။

တစ်နေ့တွင်...

သူ အိပ်မက်မက်ခဲသော်လည်း အိပ်မက် မက်ခဲ့၏။

ကောင်းကင်ထိုး နတ်ဘုရား သစ်ပင်ကြီး တစ်ပင်ကို မြင်မက်ခဲ့ပြီး၊ အရွက်များသည် ကမ္ဘာများကဲ့သို့ ဖြစ်နေသည်ကို တွေ့လိုက်ရရာ၊ စိတ်ကူး ဉာဏ်ပွင့်သွားခဲ့သည်။

နောက်ဆုံးတွင် သူသည် လက်ရှိ ဓမ္မ နည်းလမ်းကို ဖန်တီးနိုင်ခဲ့ပြီး၊ "လမ်းစဉ် အားလုံး၏ မူလအစ" ဟု အမည်ပေးခဲ့ကာ၊ ၎င်း၏ အရေးကြီးသော ကြားခံမှာ ဉာဏ်အလင်း လက်ဖက်ပင် ဖြစ်၏။

ပထမ အဆင့်မှာ ဉာဏ်အလင်း လက်ဖက်ပင်ကို "ဉာဏ်အလင်း နယ်ပယ် သစ်ပင်" အဖြစ် ပြောင်းလဲရန် ဖြစ်သည်။

နင်ချီသည် မူလက "ကမ္ဘာ့ သစ်ပင်" ဟု အမည်ပေးရန် ရည်ရွယ်ခဲ့သော်လည်း၊ နက်ရှိုင်းသော တားမြစ်ချက် တစ်ခု ရှိနေသဖြင့်၊ နောက်ဆုံးတွင် "ဉာဏ်အလင်း နယ်ပယ် သစ်ပင်" ဟု အမည်ပေးလိုက်ခြင်း ဖြစ်သည်။

ထိုအချိန်၌...၊

နယ်ပယ် သစ်ပင်ကြီး တည်ထောင်ပြီးစီးသွားပြီ ဖြစ်ရာ၊ နေရာတိုင်းတွင် ရှိနေပြီး အစစ်အမှန်သိုင်း ကမ္ဘာ တစ်ခုလုံးကို ပြည့်နှက်တော့မလို ဖြစ်နေ၏။ ထိတွေ့၍ ရနိုင်သော ဖိအားများသည် မရေမတွက်နိုင်သော သက်ရှိများကို အံ့အားသင့်စေပြီး အသက်ရှူရပ်မတတ် ဖြစ်စေသည်။

လူအများ မမြင်နိုင်သော နေရာတွင်မူ နယ်ပယ် သစ်ပင်ကြီးသည် နယ်မြေများ ပင်လယ် ၏ ဝိညာဉ်စွမ်းအင်များနှင့် ချိတ်ဆက်လိုက်ပြီး၊ ကမ္ဘာ့အပြင်ဘက်မှ ဝိညာဉ်စွမ်းအင်များကို စုပ်ယူလိုက်၏။ ဒါက ယခင်ကထက် များစွာ ပိုမို ထိရောက်မှု ရှိလှပေသည်။

သို့သော် ဝိညာဉ်စွမ်းအင် သန့်စင်မှုမှာမူ သိပ်မမြန်ဆန်လှချေ။

နင်ချီ ဖြည်းညှင်းစွာ မတ်တတ်ရပ်လိုက်သည်။

လှိမ့်ဝင်နေသော နယ်ပယ် စွမ်းအားများ စုစည်းလာပြီး၊ မမြင်နိုင်သော ဓားတစ်စင်း အဖြစ် ပြောင်းလဲသွား၏။

နင်ချီသည် ဓားကို ကိုင်ဆွဲ၍ မိမိကိုယ်ကို ခုတ်ပိုင်းလိုက်၏။ သူ၏ မျက်နှာ အနည်းငယ် ဖြူဖျော့သွားပြီး၊ အလင်းရောင် အလုံးကြီး တစ်ခု သူ၏ ခန္ဓာကိုယ်ထဲမှ ထွက်ပေါ်လာသည်။ ဒါက သူ၏ အသိစိတ်နှင့် ဝိညာဉ်၏ တစ်စိတ်တစ်ပိုင်း ဖြစ်ပြီး၊ သူ၏ ဉာဏ်အလင်းရောင် ပါဝင်နေ၏။

နင်ချီ.. အနည်းငယ် ပြုံးလိုက်ပြီး၊ ဤ အလင်းလုံးကြီးကို ဉာဏ်အလင်း နယ်ပယ် သစ်ပင်ထဲသို့ ဖြည်းညှင်းစွာ ဖိထည့်လိုက်သည်။

ဤအရာသည် နယ်ပယ် သစ်ပင်ကြီး၏ ဆန္ဒ ဖြစ်လာမည် ဖြစ်ပြီး၊ သက်ရှိ အားလုံးကို စနစ်တကျ လမ်းညွှန်ပေးပေလိမ့်မည်။

တစ်ခဏချင်းမှာပင်...၊ အကန့်အသတ်မဲ့ အစိမ်းရောင် အလင်းတန်းများ ပေါက်ကွဲထွက်လာပြီး၊ ချက်ချင်း ပြန်လည် ထိန်းချုပ်လိုက်၏။

ယခင်ကတည်းက ကြီးမားနေသော နယ်ပယ် သစ်ပင်ကြီးသည် ပိုမို ကျယ်ပြန့်လာပြီး၊ ယုံကြည်နိုင်စရာ မရှိလောက်အောင် အသွင်ပြောင်းလဲမှုများ ဖြစ်ပေါ်လာ၏။ နဂါးနှင့်တူသော အမြစ်များသည် မြေကြီးဆီသို့ ဆန့်တန်းလာပြီး၊ ကမ္ဘာကြီးထဲသို့ အမှန်တကယ် အမြစ်တွယ်တော့မည့်အလား ဖြစ်နေသည်ကို သိုင်းကမ္ဘာ့ သက်ရှိများ ထိတ်လန့်တကြား တွေ့မြင်လိုက်ကြရသည်။

သက်ရှိ ကုဋေပေါင်းများစွာ ရင်ထိတ်ပျာသွားကြ၏။ ဤကဲ့သို့သော နတ်ဘုရား သစ်ပင်ကြီးကို ခုခံရန် သူတို့တွင် အင်အား မရှိကြပေ။

ကံကောင်းထောက်မစွာပင်...၊ နောက်ထပ် အပြောင်းအလဲ တစ်ခု ဖြစ်ပေါ်လာပြန်သည်။

ခမ်းနားထည်ဝါသော နတ်ဘုရား သစ်ပင်ကြီးသည် တဖြည်းဖြည်း မမြင်နိုင်သော အခြေအနေသို့ ပြောင်းလဲသွား၏။ သက်ရှိ အားလုံးသည် မြေကြီးထဲသို့ အမြစ်တွယ်နေသည်ကို မြင်နေရသော်လည်း၊ ထိတွေ့၍ မရနိုင်ကြပေ။ ခရမ်းရောင် နန်းတော် နယ်ပယ် စစ်မှန်သူများ ပင်လျှင် ထိတွေ့၍ မရနိုင်ဘဲ၊ နယ်ပယ် သစ်ပင်ကြီးသည် ကမ္ဘာကြီးနှင့် လုံးဝ ပေါင်းစပ်သွားပြီး၊ တစ်သားတည်း ဖြစ်သွားသကဲ့သို့၊ နေရာတိုင်းတွင် ရှိနေသော်လည်း မမြင်နိုင်သော အခြေအနေသို့ ရောက်ရှိသွားသည်။

သူတို့ ပြန်ကြည့်လိုက်သောအခါ၊ ကောင်းကင်ပြာပြာနှင့် နေမင်းကြီးကိုသာ ရှင်းလင်းစွာ မြင်တွေ့ရပြီး၊ ကောင်းကင်ထိုး ဧရာမ သစ်ပင်ကြီးကို ရှာမတွေ့တော့ချေ။

သို့သော် ကမ္ဘာကြီးသည် သူတို့ သတိမထားမိလိုက်သော နည်းလမ်းဖြင့် သိမ်မွေ့စွာ ပြောင်းလဲသွားခဲ့တော့၏။

သက်ရှိများ အံ့အားသင့်နေစဉ်...၊

ခမ်းနားသော တာအို အသံတော်သည် သက်ရှိတိုင်း၏ စိတ်အာရုံထဲတွင် ပဲ့တင်ထပ်သွား၏။

"ဒီနေ့... 'ဉာဏ်အလင်း နယ်ပယ် သစ်ပင်' ကို တည်ထောင်လိုက်ပြီ... ဒီနေ့က စပြီး... အစစ်အမှန်သိုင်း ကမ္ဘာ့ သက်ရှိ အားလုံးဟာ နယ်ပယ် သစ်ပင်ကြီးရဲ့ စွမ်းအားကို အသုံးပြုပြီး ဉာဏ်အလင်း ပွင့်အောင် ကျင့်ကြံနိုင်ပါပြီ"

“ဂျုန်း ..ဂျုန်း.. ဂျုန်း”

ထိုစကားလုံးများ အမှန်တရား ဖြစ်လာသည်နှင့်...၊ ကောင်းကင် မိုးကြိုးများ မြည်ဟိန်းလာ၏။

ယခင်က ဝေဝါးနေသော ဆက်နွယ်မှု တစ်ခုသည် ချက်ချင်း ရှင်းလင်းသွားသည်ကို သက်ရှိ အားလုံး ခံစားလိုက်ကြရသည်။

ကမ္ဘာလောက အတွင်း၌ ကြီးမားသော ဖြစ်တည်မှု တစ်ခု အခြေချ နေထိုင်လာကြောင်း ချက်ချင်း အာရုံခံမိလိုက်ကြပြီး၊ ၎င်းသည် စောစောက မြင်တွေ့ခဲ့ရသော နတ်ဘုရား သစ်ပင်ကြီးမှလွဲ၍ အခြား ဘာဖြစ်နိုင်မည်နည်း။

သို့သော် ယခု အချိန်၌...၊ သူတို့သည် ဉာဏ်အလင်း နယ်ပယ် သစ်ပင်၏ အံ့ဖွယ် အကျိုးကျေးဇူးများကို ရှင်းလင်းစွာ သိမြင်လိုက်ကြ၏။

နယ်ပယ် သစ်ပင်ကြီး တည်ရှိရာ နေရာကို အာရုံစိုက်ပြီး ဆက်သွယ်မှု ပြုလုပ်လိုက်သည်နှင့်၊ အံ့ဖွယ် စွမ်းအား တစ်ခုကို ရရှိနိုင်ကြောင်း တွေ့ရှိလိုက်ကြရသည်။ ထို့ကြောင့် သူတို့၏ စိတ်အာရုံများသည် လျင်မြန်လာပြီး၊ ဉာဏ်အလင်းများ များစွာ တိုးတက်လာကာ၊ ပုံမှန်အားဖြင့် ဒုက္ခပေးနေသော ပြဿနာ များစွာသည် အလွယ်တကူ ဖြေရှင်းသွားကြ၏။

ကျင့်ကြံသူများ အားလုံး ဝမ်းသာအားရ ဖြစ်သွားကြသည်။

ဤ အခြေအနေသည် နတ်ဘုရား အကူအညီ ရလိုက်သကဲ့သို့ ဖြစ်ပြီး၊ ဉာဏ်အလင်း တိုးပွားစေသော ဝိညာဉ် ဆေးလုံးများနှင့် ရတနာ ဆေးဝါးများကို ဆက်တိုက် စားသုံးနေရသကဲ့သို့ ဖြစ်သော်လည်း၊ အကျိုးသက်ရောက်မှုမှာမူ ပိုမို ကောင်းမွန်၏။

ထို့အပြင်...၊ သူတို့၏ နက်ရှိုင်းသော ကျင့်စဉ်များကို လှည့်ပတ်ပြီး ဝိညာဉ်စွမ်းအင် သန့်စင်သောအခါ၊ အရှိန်သည် ယခင်ကထက် များစွာ ပိုမို လျင်မြန်လာကြောင်း တွေ့ရှိလိုက်ကြရသည်။

ယခင်ကနှင့် နှိုင်းယှဉ်လျှင်၊ ကျင့်ကြံခြင်း အခက်အခဲသည် ဆယ်ဆမက လျော့နည်းသွား၏။

မရေမတွက်နိုင်သော သက်ရှိများ စိတ်လှုပ်ရှားပြီး ကိုးကွယ်နေကြသည်မှာ အံ့ဩစရာ မဟုတ်ပေ။ ဒါက အထွတ်အထိပ် ကံအမှတ်ပင်။

ဉာဏ်အလင်း နယ်ပယ် သစ်ပင်သည် အစစ်အမှန်သိုင်း ကမ္ဘာ့ သက်ရှိများကို ပုံမှန်အားဖြင့် မရောက်နိုင်သော အမြင့်များသို့ ရောက်ရှိစေနိုင်ပေသည်။

သက်ရှိ အားလုံး ဦးညွှတ် ဒူးထောက်လိုက်ကြ၏။

"နယ်မြေ အရှင်သခင်ရဲ့ ကျေးဇူးတော်အတွက် ကျေးဇူးတင်ပါတယ်"

သူတို့၏ နှလုံးသားများ ဆူပွက်နေပြီး၊ ဤ အတွေ့အကြုံကို ခံစားရန် မစောင့်နိုင်တော့သကဲ့သို့ ဖြစ်နေကြ၏။

နင်ချီသည် လက်ကို ပိုက်လျက် ရပ်နေပြီး၊ ကမ္ဘာလောကကို ငုံ့ကြည့်ကာ ဖော်ပြ၍ မရနိုင်သော အောင်မြင်မှု ခံစားချက်ကို ခံစားနေရသည်။

သူ နှုတ်ခမ်းကို အနည်းငယ် တွန့်လိုက်ပြီး၊ ထို့နောက် သဘောတကျ ရယ်မောလိုက်၏။

ဉာဏ်အလင်း နယ်ပယ် သစ်ပင် တည်ထောင်လိုက်ခြင်းဖြင့်၊ သူ၏ "အထွတ်အထိပ် လမ်းစဉ်" အတွက် အုတ်မြစ် ချလိုက်ပြီ ဖြစ်သည်။ ဤ လုပ်ရပ်သည် အစစ်အမှန်သိုင်း ကမ္ဘာ့ သက်ရှိ အားလုံးအတွက် ကြီးမားသော ကံအမှတ် ဖြစ်သော်လည်း၊ နင်ချီ အတွက်လည်း အထွတ်အထိပ် အသုံးဝင်မှု ရှိ၏။

"တစ်နည်းအားဖြင့် ပြောရရင်... ဉာဏ်အလင်း နယ်ပယ် သစ်ပင် ဆိုတာ အစစ်အမှန်သိုင်း ကမ္ဘာ တစ်ခုလုံးကို လွှမ်းခြုံထားတဲ့ ကြီးမားတဲ့ 'ကွန်ရက်'ကြီး တစ်ခုပဲ... ဒီ 'ကွန်ရက်' ကနေတစ်ဆင့် သက်ရှိ အားလုံးက ငါ့ရဲ့ ဉာဏ်အလင်းနဲ့ ကျင့်ကြံနိုင်ပြီး ကိုယ့်ကိုယ်ကို မြှင့်တင်နိုင်ကြတယ်... ပြန်ပြီးတော့ သူတို့ရဲ့ ကျင့်ကြံခြင်း အောင်မြင်မှုတွေ၊ ဆန်းသစ်တဲ့ စိတ်ကူးတွေ၊ သိမြင်နားလည်မှုတွေ အားလုံးက နယ်ပယ် သစ်ပင်ကြီးဆီ ပြန်လည် စီးဝင်လာပြီး... ငါ့ရဲ့ ကြီးထွားမှုအတွက် အရင်းအမြစ်တွေ ဖြစ်လာမှာ"

"တစ်ယောက်တည်း အင်အားက အကန့်အသတ် ရှိတယ်... ဒါပေမယ့်.. သက်ရှိ အားလုံးရဲ့ အင်အားကတော့ အကန့်အသတ်မဲ့ ကြီးမားတယ်"

"ဒါက လမ်းစဉ် အားလုံးရဲ့ မူလအစ ပဲ"

"ဒါကမှ သက်ရှိ အားလုံးရဲ့ ဉာဏ်ပညာကို စုစည်းတာ စစ်စစ်ပဲ... ငါ့ရဲ့ ကောင်းကင်ကို အန်တုနိုင်တဲ့ ဉာဏ်အလင်း ရဲ့ အလားအလာကို အမြင့်ဆုံး အသုံးချလိုက်တာပဲ"

"ဒါ့အပြင်... ဉာဏ်အလင်း နယ်ပယ် သစ်ပင်က ကမ္ဘာ့ ဝိညာဉ်စွမ်းအင်နဲ့ ပေါင်းစပ်သွားပြီး... နယ်မြေများ ပင်လယ် ထဲက ဝိညာဉ်စွမ်းအင်တွေကို အများဆုံး စုပ်ယူပေးနိုင်တယ်... ကမ္ဘာကြီးကို ချဲ့ထွင်ပေးနိုင်တယ်... ကျင့်ကြံသူတွေ များလာလေ... နယ်ပယ် သစ်ပင်ကြီးနဲ့ ချိတ်ဆက်ပြီး ကျင့်ကြံသူတွေ များလာလေ... သူတို့က နယ်မြေများ ပင်လယ် ထဲက ဝိညာဉ်စွမ်းအင်တွေကို တိုက်ရိုက် သန့်စင်ပေးနိုင်ပြီး... ကမ္ဘာကြီးကို ကြီးထွားစေလိမ့်မယ်... ဒါဆို ကျင့်ကြံသူ ပိုများများ လက်ခံနိုင်လာမယ်... အပြုသဘောဆောင်တဲ့ သံသရာလည်ပတ်မှု တစ်ခု ဖြစ်လာမှာ"

"ဒါက အကောင်းဆုံး အကျိုးကျေးဇူးပဲ... ပြီးပြည့်စုံတဲ့ သံသရာပဲ"

သေချာသည်မှာ…၊ ပေးဆပ်မှု နှင့် ရယူမှု ရှိစမြဲပင်။ ဉာဏ်အလင်း နယ်ပယ် သစ်ပင်၏ စွမ်းအားကို အသုံးပြုပြီး ကျင့်ကြံသူများသည် သူတို့၏ ကျင့်ကြံခြင်းတွင် လျှို့ဝှက်ချက် ရှိတော့မည် မဟုတ်ဘဲ၊ နင်ချီ၏ အသုံးပြုခြင်းကို ခံရပေမည်။ သို့သော် နောက်ဆုံး တွင် ဘာရပြီး ဘာဆုံးရှုံးမလဲ ဆိုတာ ကိုယ်တိုင် ဆုံးဖြတ်ရမည့် ကိစ္စ ဖြစ်သော်လည်း၊ ငြင်းဆန်မည့် သူ အလွန် နည်းပါးပေလိမ့်မည်။

မကြာမီ အနာဂတ်တွင်၊ အစစ်အမှန်သိုင်း ကမ္ဘာသည် ဉာဏ်အလင်း နယ်ပယ် သစ်ပင်၏ ပံ့ပိုးမှုဖြင့် ဖွံ့ဖြိုး တိုးတက်လာနိုင်ပေသည်။

နင်ချီသည် သူ၏ ဖန်တီးမှုအပေါ်ပိုမို ကျေနပ်အားရ လာ၏။

ဉာဏ်အလင်း နယ်ပယ် သစ်ပင်သည် သူ ယခင်က စဉ်းစားခဲ့သော ပြဿနာ နှစ်ခုစလုံးကို ပြီးပြည့်စုံစွာ ဖြေရှင်းပေးနိုင်ခဲ့သည်။

ယခုမှ စ၍ သူသည် ဤ မေးခွန်းများနှင့် ပတ်သက် ပြီး စိတ်ရှုပ်စရာ လိုတော့မည် မဟုတ်ချေ။

သက်ရှိ အားလုံးက သူ့အတွက် ကျင့်ကြံပေးနေကြ တာ... ထိုပျော်ရွှင်မှုမျိုးက စကားလုံးတွေနှင့်တောင် ဖော်ပြ၍ မရနိုင်ပါချေ။