သင်က မင်ယွဲ့လား

ရွာသားများသည် ဒေါသအလိပ်လိပ်ဖြင့် မင်ယွဲ့ကို စိုက်ကြည့်နေကြသည်။

ရွှီခယ်တို့ ဇနီးမောင်နှံမှာမူ ယနေ့ကဲ့သို့ စိတ်မသက်မသာဖြစ်ဖွယ် အခြေအနေမျိုးနှင့် ရင်ဆိုင်ရလိမ့်မည်ဟု မမျှော်လင့်ထားခဲ့ကြသဖြင့် သားဖြစ်သူအတွက် ပို၍ပင် စိုးရိမ်မကင်း ဖြစ်နေကြတော့သည်။

"လမ်းဖယ်ပေးလိုက်”

မင်ယွဲ့၏ အမိန့်ပေးသံကြောင့် သက်တော်စောင့်များမှာ ဝေခွဲမရဖြစ်သွားသော်လည်း သူမ ထွက်လာနိုင်ရန် လမ်းဖွင့်

ပေးလိုက်ရသည်။

သို့သော်လည်း သူတို့၏ မျက်လုံးများကမူ အလုပ်ရှင်ဖြစ်သူ တစ်စုံတစ်ဦး၏ ရန်ပြုခြင်းကို ခံရမည်စိုးသဖြင့် မပြတ်စောင့်ကြည့်နေကြသည်။

မင်ယွဲ့သည် တစ်ဖက်မှ ကျောက်ခဲကလေးများကို အမှတ်မထင် ပစ်ကစားရင်း အေးအေးလူလူပင် လျှောက်လှမ်းလာသည်။

ထိုအခါမှ ရွာသားများမှာ မိမိတို့ကို တိုက်ခိုက်ခဲ့သည်မှာ ကျောက်ခဲများဖြစ်ကြောင်း သဘောပေါက်သွားကြသည်။

"ဒီကောင်မ... နင်ပဲကိုး နင် ဒီနေ့တော့ အသေပဲ”

ရွာသားများသည် အခြားသူများကို ပစ်ထားခဲ့ပြီး မင်ယွဲ့ထံသို့ တစ်ဟုန်ထိုး ပြေးဝင်လာကြသည်။

သက်တော်စောင့်များမှာ ကာကွယ်ရန် ပြင်ဆင်သော်လည်း မင်ယွဲ့၏ လှုပ်ရှားမှုက ပို၍ လျင်မြန်နေခဲ့သည်။

သူမသည် လျင်မြန်ဖျတ်လတ်သော အရှိန်ဖြင့် ရှောင်တိမ်းကာ လက်ဖြင့်ဖမ်းဆွဲခြင်း၊ ခြေဖြင့် ကန်ခြင်းတို့ကို တိကျစွာ လုပ်ဆောင်လိုက်သည်။

လူတစ်ယောက် လွင့်ထွက်သွားပြီးနောက် နောက်တစ်ယောက်မှာ မြေပြင်ပေါ်သို့ ခွေကျသွားပြန်သည်။

သက်တော်စောင့်များမှာ မြေပြင်ပေါ်တွင် နာကျင်စွာ အော်ဟစ်နေကြသော ရွာသားများကို ကြည့်ကာ မိမိတို့၏ အလုပ်ရှင်ကို အံ့ဩလေးစားစိတ်ဖြင့် ငေးကြည့်နေမိကြသည်။

အလုပ်ရှင်က သက်တော်စောင့်ကို ပြန်လည်ကာကွယ်ပေးရသည့် ဖြစ်ရပ်မှာ သူတို့ဘဝတွင် ပထမဆုံးပင်။ ရွှီခယ်တို့ ဇနီးမောင်နှံမှာလည်း

သေးသွယ်သော ခန္ဓာကိုယ်ပိုင်ရှင် မင်ယွဲ့တွင် ဤမျှ ပြင်းထန်သော ပေါက်ကွဲအား ရှိလိမ့်မည်ဟု ထင်မထားခဲ့ကြပေ။

အခြေအနေများ ငြိမ်သက်လုနီးပါး ဖြစ်နေချိန်

တွင် ဒေသခံရဲတပ်ဖွဲ့မှာ ရောက်ရှိလာတော့သည်။

"ဘာတွေ လုပ်နေကြတာလဲ ငါတို့နယ်မြေမှာ လာပြီး ပြဿနာရှာနေတာလား နင်တို့ကို အချုပ်ထဲ ထည့်လိုက်ရမလား”

ရွာသားများမှာ မြေပြင်ပေါ်တွင် ဖရိုဖရဲ ဖြစ်နေသည်ကို မြင်လိုက်ရသည့်အခါ ရဲဝန်ထမ်း သုံးဦးမှာ မင်ယွဲ့တို့အဖွဲ့ကို ရာဇဝတ်သားများသဖွယ် ဒေါသတကြီး အော်ဟစ်တော့သည်။

မင်ယွဲ့သည် ရွာထဲမဝင်မီကပင် ရဲတိုင်ခဲ့သော်လည်း ယခုမှ နောက်ကျမှ ရောက်လာပြီး တစ်ဖက်သတ် စွပ်စွဲနေခြင်းမှာ အမှန်တကယ်ပင် စိတ်ပျက်စရာ ကောင်းလှသည်။

"ဘယ်သူက ရဲတိုင်ခဲ့တာလဲဆိုတာ ရှင်တို့ သိသလား”

မင်ယွဲ့၏ မေးခွန်းကြောင့် ရဲအရာရှိမှာ မျက်နှာပျက်သွားသော်လည်း

“ဘယ်သူပဲတိုင်တိုင် လူရိုက်တာတော့ မှားတာပဲ။ အားလုံး ရဲစခန်းကို လိုက်ခဲ့ကြ"

ဟု မာန်မဲလိုက်သည်။

သာမန်လူဆိုလျှင် ယူနီဖောင်းဝတ်ထားသူကို ကြောက်ရွံ့သွားနိုင်သော်လည်း မင်ယွဲ့မှာ ထိုသို့သောသူ မဟုတ်ပေ။

သူမသည် ဥပဒေရေးရာ ကျွမ်းကျင်သူ ရွှီခယ် ကို ခေါ်မလာခဲ့မိသည်ကိုပင် နောင်တရမိသွားသည်။

"ကျွန်မကို ကိုင်တွယ်ဖို့ ရှင့်မှာ လုပ်ပိုင်ခွင့်ရှိမယ် မထင်ဘူး ရှင်တို့ ရဲစခန်းက ဝန်ထမ်းတွေရဲ့ ပျက်ကွက်မှု၊ ရာဇဝတ်သားတွေနဲ့ ပူးပေါင်းကြံစည်မှုတွေကို ကျွန်မ တရားစွဲမယ်”

မင်ယွဲ့၏ စကားတစ်ခွန်းချင်းစီမှာ ရဲဝန်ထမ်းများကို တုန်လှုပ်သွားစေသည်။

သက်တော်စောင့်များမှာလည်း မင်ယွဲ့နှင့် ရဲများကြားတွင် လူတံတိုင်းသဖွယ် ဝင်ရောက် ကာကွယ်လိုက်ကြသည်။

အခြေအနေမှာ တင်းမာမှု အထွတ်အထိပ်သို့ ရောက်ရှိနေစဉ် ကားနှစ်စီးမှာ အရှိန်ဖြင့် မောင်းနှင်လာကာ သူတို့ရှေ့တွင် ရုတ်တရက် ဘရိတ်အုပ် ရပ်တန့်လိုက်သည်။

ကားပေါ်မှ ဆင်းလာသူများမှာ ရဲယူနီဖောင်းများ ဝတ်ဆင်ထားကြသည်။

"အကြီးအကဲ... ဘာကိစ္စကြောင့် ဒီအထိ ကြွလာတာလဲခင်ဗျာ”

ဒေသခံရဲများမှာ အံ့အားသင့်စွာ မေးမြန်းလိုက်

သည်။

"ငါတို့သာ မလာရင် မင်းတို့ ဘယ်လောက်တောင် ပြဿနာတွေ ရှာဦးမလဲဆိုတာ ဘယ်သူသိမှာလဲ"

ဟု လူကြီးဖြစ်သူက အော်ဟစ်ကြိမ်းမောင်းလိုက်သော်လည်း သူ၏ မျက်လုံးများက မင်ယွဲ့ကိုသာ စူးစိုက်ကြည့်နေသည်။

မင်ယွဲ့သည် အခြေအနေကို ချက်ချင်း ရိပ်မိလိုက်သည်။

ဤသူမှာ မိုဟန်ကျီ ဖုန်းဆက်ခေါ်လိုက်သော အဆင့်မြင့် အရာရှိကြီး ဖြစ်ပေလိမ့်မည်။

ထိုအရာရှိကြီးမှာ မင်ယွဲ့ကို မြင်သည်နှင့် လေသံကို ချက်ချင်းပြောင်းကာ

“သင်က မင်ယွဲ့ မဟုတ်လား ထိတ်လန့်သွားစေခဲ့ရင် တောင်းပန်ပါတယ်"

ဟု ယဉ်ကျေးစွာ ဆိုလာသည်။

"ဟုတ်ပါတယ်... ကျွန်မပါ"

ဟု မင်ယွဲ့က တည်ငြိမ်စွာ ဖြေကြားလိုက်သည်။

အဆိုပါ မြင်ကွင်းကြောင့် ဒေသခံရဲအရာရှိမှာ ခြေဖျားလက်ဖျားများ တုန်ရီလာတော့သည်။

မင်ယွဲ့ကို ဖမ်းဆီးရန် ကြံစွယ်ခဲ့သော ရဲဝန်ထမ်းမှာလည်း မိမိဘဝ ဇာတ်သိမ်းပြီဟု တွေးကာ ကြောက်လန့်နေမိသည်။

မင်ယွဲ့သည် ကားပျက်ထဲမှ စာရွက်စာတမ်းတွဲကို ပြန်လည်ယူဆောင်လာပြီး အရာရှိကြီးရှေ့တွင် ရှင်းလင်းတင်ပြလိုက်သည်။

"ရှင်က ဒီမှာ အဆင့်အမြင့်ဆုံးလူဆိုတော့ ဒီကိစ္စကို ဖြေရှင်းပေးဖို့ အသင့်တော်ဆုံးပဲ ကျွန်မတို့က မစ္စတာရွှီတို့ရဲ့ ပျောက်ဆုံးနေတဲ့ သားလေးကို လာရှာတာပါ ဒါပေမဲ့ ရွာသားတွေက လမ်းပိတ်ပြီး ငွေတောင်းကြတယ် ကျွန်မတို့က ငြင်းလိုက်တော့ သူတို့က အကြမ်းဖက်ခဲ့ကြတာပါ ဒါဟာ ကိုယ့်ကိုယ်ကိုယ် ကာကွယ်ခြင်း သက်သက်ပါပဲ”

မင်ယွဲ့က အကျိုးအကြောင်း ခိုင်လုံစွာ ရှင်းပြလိုက်ရာ အရာရှိကြီးမှာ မျက်မှောင်ကြုတ်သွားသည်။ လူကုန်ကူးမှုနှင့် ဆက်နွှယ်နေသဖြင့် ကိစ္စမှာ ပို၍ ကြီးမားသွားခဲ့ပြီ။

ထိုစဉ် ဝေးရာမှ ကားအင်ဂျင်သံ ပြင်းပြင်းထွက်ပေါ်လာသည်။

မင်ယွဲ့သည် မော့ကြည့်လိုက်မိကာ ရင်ထဲမှ အလိုလို သိရှိနေမိသည်။ ထိုကားထဲတွင် ပါလာသူမှာ အဝေးမှ အပြေးအလွှား ရောက်ရှိလာသော မိုဟန်ကျီပင် ဖြစ်ရမည်။