ရွှမ်ယွမ် စစ်ရထား (အပိုင်း ၁)

ယနေ့အတွက် ကံဆိုးမှုကို ဖြေရှင်းပြီးနောက် ကျန်းရွှမ်သည် ပလ္လင်ခွေထိုင်လိုက်၏။ သူ၏စိတ်ထဲရှိ ဖန်တီးခြင်း ကျောက်စိမ်းလိပ်ပြာသည် အတောင်ပံများကို ညင်သာစွာခတ်လိုက်ပြီး အစွမ်းထက်သော စိတ်ဝိညာဉ်စွမ်းအားများသည် နူးညံ့သော ကြိုးမျှင်များအဖြစ် ပြောင်းလဲကာ သူ၏ခန္ဓာကိုယ်အနှံ့ ပျံ့နှံ့သွားသည်။

မျက်စိတစ်မှိတ်အတွင်းမှာပင် သူ၏ရုပ်ခန္ဓာကိုယ်တွင် ရှိနေသော ပြဿနာတိုင်းကို သူ အပြည့်အဝ မြင်တွေ့လိုက်ရသည်။

ထာဝရနှလုံးသားသည် ပြင်းထန်စွာ ခုန်လှုပ်သွားပြီး သန့်စင်သော စွမ်းအားများကို သူ၏ ခန္ဓာကိုယ်အနှံ့အပြားသို့ လျင်မြန်စွာ ပို့ဆောင်ပေးလိုက်သည်။

ဤတစ်ကြိမ် ကောင်းကင်ဥပဒေသမြို့တော်သို့ သွားရောက်ခြင်းသည် အန္တရာယ်များဖြင့် ပြည့်နှက်နေပြီး ထိပ်သီးကျင့်ကြံသူ အမြောက်အများ၏ ဝိုင်းရံတိုက်ခိုက်ခြင်းကို ခံခဲ့ရသော်လည်း သူအတွက် အကျိုးကျေးဇူးများစွာ ရရှိခဲ့သည်။

ကျားဖြူအစောင့်တပ်သား သုံးထောင်၏ အလောင်းများ လက်နက်များ သံချပ်ကာများနှင့် ရတနာများ အမတ်ကြီးနှစ်ဦး ဗောဓိသတ္တတစ်ပါး နတ်ဆိုးဧကရာဇ်တစ်ပါးနှင့် ရန်ချူးယောင်တို့၏ ပိုင်ဆိုင်မှုများ....

သူ၏ခန္ဓာကိုယ်သည် နေရာတွင်ထိုင်၍ ကျင့်ကြံနေပြီး အတွင်းဒဏ်ရာများကို ကုစားနေစဉ်၌ သူ၏စိတ်ဆန္ဒ တစ်စွန်းတစ်စသည် ရွှမ်ကမ္ဘာထဲသို့ ဝင်ရောက်နေပြီဖြစ်ကာ သူ၏ရှေ့မှ ပစ္စည်းအမြောက်အများကို ကြည့်ရှုနေသည်။

ကျားဖြူအစောင့်တပ်သားများ၏ သံချပ်ကာများနှင့် လက်နက်များသည် ကောင်းမွန်သည်ဟု ယူဆရသော်လည်း လက်ရှိကျန်းရွှမ်အတွက်မူ လုံးဝအသုံးမဝင်ချေ။ သူသည် တစ်ချက်ကြည့်ပြီးနောက် ထိုအရာများကို ဘေးဖယ်ထားလိုက်၏။

သူသည် လေထဲသို့ သူ၏လက်ကိုဖမ်းဆုပ်လိုက်ရာ အဖြူနှင့်အမည်း ရောယှက်နေသော ညှဉ်းပန်းနှိပ်စက်ရေး ကိရိယာတစ်ခုက သူ၏လက်ဝါးပေါ်တွင် ထွက်ပေါ်လာသည်။

ဤသည်မှာ တရားရေးအမတ်ကြီး၏ရတနာဖြစ်သော ပါးကွက်သမား သံခြေချင်းပင်။

"ဒါက ချန်တယ်ဓားကို မယှဉ်နိုင်ပေမယ့် သိပ်တော့မကွာခြားပါဘူး..."

ဤသံခြေချင်း၏ အဆင့်သည် ယခင်စိတ်ဝိညာဉ်ဆင့်ခေါ်ခြင်းတံခွန်ထက် များစွာသာလွန်သည်။ ဤသည်က သံသရာအမွေအနှစ်မျှော်စင်နှင့် အရပ်ဆယ်မျက်နှာ ဗောဓိနတ်ဆိုးနှိမ်နင်းခြင်းကြိုးကဲ့သို့ ရတနာများနှင့် ယှဉ်နိုင်နေလေပြီ။ သို့ရာတွင် ဤရတနာသည် ချန်တယ်ဓားနှင့် နှိုင်းယှဉ်လျှင်မူ အနည်းငယ် နိမ့်ကျနေဆဲပင်။

သူ နောက်တစ်ကြိမ် ဆွဲယူလိုက်ရာ ရွှေရောင်သံချပ်ကာ စစ်ရထားသည် သူ၏ရှေ့တွင် ထွက်ပေါ်လာပေ၏။

ရွှေရောင်သံချပ်ကာ တိုက်ပွဲဝင်ရုပ်သေး သို့မဟုတ် စစ်ရထား တစ်ခုတည်းဆိုလျှင် အများဆုံးအနေဖြင့် စိတ်ဝိညာဉ်ဆင့်ခေါ်ခြင်းတံခွန်၏ အဆင့်တွင်ရှိသော ပစ္စည်းတစ်ခုသာ ဖြစ်သည်။ သို့ရာတွင် ထိုအရာနှစ်ခု ပေါင်းစပ်လိုက်ချိန်၌ သံခြေချင်းထက်ပင် ပို၍ကောင်းမွန်ပြီး ချန်တယ်ဓားနှင့် တန်းတူအဆင့်သို့ ရောက်ရှိသွားသည်။

ရုတ်ချည်းဆိုသလိုပင် ရှေးဟောင်းဇီသာတစ်လက်က သူ၏လက်ထဲတွင် ထွက်ပေါ်လာသည်။

ဂီတကောင်းကင်ကံကြမ္မာ ထိန်းချုပ်သူ၏ ရတနာဖြစ်သော ကောင်းကင်ကိုးထပ်ဇီသာ....

ဤသည်မှာလည်း သံခြေချင်းနှင့် ယှဉ်နိုင်သော ရတနာတစ်ခုပင်။

ထျန်းလီအင်ပါယာတွင်ပင် ဤအဆင့်ရှိ ရတနာ အမြောက်အများ မရှိချေ။ သူသည် တစ်ကြိမ်တည်းဖြင့် ထိုရတနာများကို ရရှိခဲ့သည်။

မဟာကတိသစ္စာ တောက်ပဘုရင် ဗောဓိသတ္တနှင့် အဆိပ်တစ်သောင်း နတ်ဆိုးဧကရာဇ်တို့၏ ရတနာများမှာမူ ကောင်းကင်ကိုးထပ်ဇီသာနှင့်များစွာကွာခြားခြင်း မရှိချေ။

"ရတနာတွေ အများကြီး ရှိနေတာက အသုံးမဝင်ဘူး... တစ်ခုတည်းဖြစ်အောင် သန့်စင်လို့ ရမလားဆိုတာ ကြည့်ရအောင်..."

ကျန်းရွှမ် စဉ်းစားတွေးတောလိုက်၏။

ရတနာများစွာရှိခြင်းသည် အံ့အားသင့်စရာ ကောင်းနိုင်သော်လည်း သူ့ထက် အားနည်းသူများကို သူ လက်ဝါးတစ်ချက်တည်းဖြင့် သတ်ဖြတ်နိုင်သည်။ သူ့ထက်ပို၍ သန်မာအားကောင်းသူများအတွက်မူ သူ့ထံ၌ ရတနာများစွာရှိနေလျှင်ပင် အသုံးဝင်မည်မဟုတ်ချေ။ သူသည် ရှုပ်ထွေးနေသော အရာများကို အသုံးပြုမည့်အစား တစ်ခုတည်းကို အထူးပြု အသုံးပြုခြင်းက ပို၍ကောင်းမွန်ပေမည်။

"ချန်တယ်ဓားကို အစပျိုးအဆင့် ကောင်းကင်ကံကြမ္မာ ရတနာလို့ပဲ သတ်မှတ်လို့ရတယ်... သိပ်ပြီးအစွမ်းမထက်ဘူး"

ကျန်းရွှမ်၏အတွေးများကို သိရှိသွားချိန်၌ နှင်းနတ်ဆိုးအရှင်၏မျက်နှာပေါ်တွင် အပြုံးတစ်ခု ထင်ဟပ်လာပြီး ရှေ့သို့တိုးလာသည်။

ယခုအချိန်တွင် ကျန်းရွှမ်၏စွမ်းအားကို သူကိုယ်တိုင် မြင်တွေ့ခဲ့ရပြီဖြစ်သောကြောင့် ခုခံလိုစိတ် လုံးဝမရှိတော့ဘဲ အကြွင်းမဲ့ သစ္စာရှိသွားလေပြီ။

"ကောင်းကင်ကံကြမ္မာ ရတနာလား"

ကျန်းရွှမ် ဇဝေဇဝါဖြင့် မေးမြန်းသည်။

"ကောင်းကင်ကံကြမ္မာ ရတနာတွေဆိုတာ ကောင်းကင်ကံကြမ္မာ စွမ်းအားနဲ့ သွန်းလုပ်ထားတဲ့ လက်နက်တွေပါ... ဒါတွေက အကန့်အသတ်မရှိ စွမ်းအားကြီးမားပြီးတော့ ကောင်းကောင်း အသုံးပြုနိုင်ရင် ဓားချက်တစ်ချက်တည်းနဲ့ ကံကြမ္မာမြစ်ကို ဖြတ်တောက်နိုင်တယ်"

နှင်းနတ်ဆိုးအရှင်က အလျင်အမြန် ရှင်းပြလေ၏။

ကျန်းရွှမ် အံ့အားသင့်သွားသည်။

ကံကြမ္မာမြစ်ဆိုသည်မှာ ဝေဝါးပြီး ပုံရိပ်ယောင်ဆန်သော မြစ်တစ်စင်းဖြစ်ကာ ပုံမှန်အားဖြင့် ဆုပ်ကိုင်၍မရနိုင်သော အရာပင်။ ဤကဲ့သို့ လက်နက်မျိုးက ကံကြမ္မာမြစ်ကို အမှန်တကယ် ဖြတ်တောက်နိုင်သည် ဆိုခြင်းမှာ ကောင်းကင်အလိုကို ဆန့်ကျင်လွန်းနေလေပြီ။

"ချန်တယ်ဓားက အစပျိုးအဆင့် ကောင်းကင်ကံကြမ္မာ ရတနာပဲ ရှိသေးတယ်ဆိုရင်... ကောင်းကင်ကိုးထပ်ဇီသာနဲ့ သံခြေချင်းလို လက်နက်တွေက ဘယ်အဆင့်မှာ ရှိလဲ"

ကျန်းရွှမ် သိချင်စိတ် ပြင်းပြလာသည်။

ယခင်က ရင်းမြစ်လက်နက်များကို အထွတ်အထိပ် အဆင့်မြင့် အလယ်အလတ်နှင့် အဆင့်နိမ့်ဟု ခွဲခြားထားကြောင်း သူ သိရှိထားသော်လည်း ကောင်းကင်ကံကြမ္မာ ရတနာအဆင့်များ၌ ခွဲခြားမှုရှိသည်ကိုမူ သူ မသိရှိခဲ့ပေ။

နှင်းနတ်ဆိုးအရှင်က ပြောဆိုသည်။

"အဲ့ဒါတွေအားလုံးက အထွတ်အထိပ်အဆင့် ရင်းမြစ်လက်နက်တွေပဲ... ဒါက သာမာန်ရင်းမြစ်လက်နက်တွေထက် အများကြီး သာလွန်တယ်... ဒီအဆင့်လက်နက်တွေက မများပေမယ့် နည်းလည်းမနည်းဘူး... ဥပမာအနေနဲ့ ကျွန်တော်တို့ အရင်က တွေ့ခဲ့တဲ့ ကောင်းကင်ဘုံနဂါးရှစ်ကောင် ခေါင်းလောင်းနဲ့ မဟာနေမင်း ဗုဒ္ဓစည်းတံဆိပ်တို့လိုပေါ့... ရွှေရောင်သံချပ်ကာ တိုက်ပွဲဝင်ရုပ်သေးနဲ့ ရွှေရောင်သံချပ်ကာ စစ်ရထားက သီးခြားစီဆိုရင် နှစ်ခုစလုံးက အထွတ်အထိပ်အဆင့် ရင်းမြစ်လက်နက်တွေပဲ... ဒါပေမယ့် အဲ့ဒီနှစ်ခုကို ပေါင်းစပ်လိုက်ရင် ကောင်းကင်ကံကြမ္မာ အဆင့်ကို ဝင်ရောက်နိုင်လောက်တယ်"

"အဲ့ဒီလိုကိုး..."

ကျန်းရွှမ် ရုတ်တရက် နားလည်သွားပြီး တချိန်တည်းမှာပင် သိချင်စိတ်ပြင်းပြမှုများဖြင့် ပြည့်နှက်နေသည်။

"ဒါဆိုရင် အိမ်ရှေ့စံမင်းသား အရင်က သုံးခဲ့တဲ့ အသေးစား ကျောက်စိမ်းစည်းတံဆိပ်နဲ့ တောင်တန်းမြစ်ပြင်တံဆိပ်ပြားက ဘယ်အဆင့် မှာ ရှိနေလဲ"

တောင်တန်းမြစ်ပြင်တံဆိပ်ပြားနှင့် အသေးစားကျောက်စိမ်းစည်းတံဆိပ်တို့၏ စွမ်းအားသည် ချန်တယ်ဓားထက် မနိမ့်ကျဘဲ သာလွန်ကောင်း သာလွန်နိုင်သည်။

နှင်းနတ်ဆိုးအရှင်က တုံ့ပြန်အဖြေပေးလိုက်၏။

"ကျွန်တော်ရဲ့ ခန့်မှန်းချက်သာ မှန်ရင် အဲ့ဒါတွေက ဒုတိယအဆင့် ကောင်းကင်ကံကြမ္မာ ရတနာတွေ ဖြစ်လောက်တယ်"

ကျန်းရွှမ် အံ့အားသင့်သွားသည်။

"ဒုတိယအဆင့်လား..."

နှင်းနတ်ဆိုးအရှင်က ခေါင်းညိတ်လိုက်ပြီး ကျားမသံ မကွဲပြားသော သူ၏အသံဖြင့် ဆက်လက်၍ ပြောဆိုသည်။

"ကောင်းကင်ကံကြမ္မာ ရတနာတွေကို အဆင့်သုံးဆင့် ခွဲခြားထားတယ်... ပထမအဆင့်က အမြင့်ဆုံးဖြစ်ပြီး တတိယအဆင့်က အနိမ့်ဆုံးပါ... တတိယအဆင့်က အစပျိုးအဆင့်လို့ ခေါ်တဲ့ ချန်တယ်ဓားရဲ့ အဆင့်မျိုးပါ... ဒါကို နားထောင်ရတာ အားနည်းသလို ထင်ရပေမယ့် ရင်းမြစ်ကမ္ဘာတစ်ခုလုံးမှာတော့ သေချာပေါက် အကောင်းဆုံးတွေထဲမှာ ပါဝင်တယ်"

ကျန်းရွှမ်က ခေါင်းညိတ်လိုက်သည်။

ချန်တယ်ဓားသည် လက်ရှိတွင် သူ မြင်တွေ့ဖူးသမျှ အရာများအနက် အစွမ်းထက်ဆုံး လက်နက် ဖြစ်သည်။ ဤရတနာကို သန့်စင်နိုင်ခဲ့သောကြောင့်သာ သူသည် ပြိုင်ဘက်ကင်းဖြစ်ခဲ့ပြီး အမတ်ကြီးနှစ်ဦး ဗောဓိသတ္တတစ်ပါးနှင့် နတ်ဆိုးဧကရာဇ်တစ်ပါးတို့ကို ဆက်တိုက် သတ်ဖြတ်နိုင်ခဲ့ခြင်းပင်။

ထို့နောက် ကျန်းရွှမ်က မေးမြန်းလိုက်၏။

"ဒီလိုဆိုရင်... ဧကရာဇ်ဖုရှန်းရဲ့ တော်ဝင်စည်းတံဆိပ်နဲ့ ထိုက်အမ်းဓားက ပထမအဆင့် ကောင်းကင်ကံကြမ္မာ ရတနာတွေလား"

နှင်းနတ်ဆိုးအရှင်က တွေဝေတုံ့ဆိုင်းသွားပြီးနောက် ပြောဆိုသည်။

"အဲ့ဒီလို ဟုတ်မဟုတ်ဆိုတာတော့ ကျွန်တော် သေချာမသိဘူး... အဲ့ဒီအဆင့် ရတနာတွေက အသုံးပြုခဲတယ်... တစ်ခါထုတ်သုံးလိုက်တာနဲ့ ကောင်းကင်နဲ့မြေပြင် ပြိုလဲသွားနိုင်တယ်... ကျွန်တော်လို ကျင့်ကြံဆင့်နိမ့်ကျတဲ့သူ တစ်ယောက်က ခန့်မှန်းလို့ရတဲ့အရာမျိုး မဟုတ်ဘူး"

"အဲဒါတော့ အမှန်ပဲ..."

နှင်းနတ်ဆိုးအရှင်နှင့် ပထမဆုံး တွေ့ဆုံစဉ်က အလွန်အစွမ်းထက်သည်ဟု သူ ခံစားခဲ့ရသော်လည်း အများဆုံးအနေဖြင့် အသက်ပင်လယ်နယ်ပယ် နဝမအဆင့် အထွတ်အထိပ် ကျင့်ကြံသူတစ်ဦးသာ ဖြစ်သည်။ ထိုကဲ့သို့ စွမ်းအားဖြင့် ဧကရာဇ်ဖုရှန်းသည် လက်ချောင်းများကို လှုပ်ခတ်လိုက်ရုံဖြင့် သူ့ကို သတ်ဖြတ်နိုင်သဖြင့် တော်ဝင်စည်းတံဆိပ် သို့မဟုတ် ထိုက်အမ်းဓားကို အသုံးပြုရန် လုံးလုံးလျားလျား မလိုအပ်ချေ။

"ဒီရတနာတွေ အားလုံးကို တစ်ခုတည်းဖြစ်အောင် ပေါင်းစပ်ဖို့ ငါ ကြိုးစားကြည့်မယ်... အောင်မြင်ရင်... ဒုတိယအဆင့် ကောင်းကင်ကံကြမ္မာ ရတနာတစ်ခုကို ရနိုင်လောက်တယ်"

ရတနာများ၏ အဆင့်ခွဲခြားမှုကို သိရှိပြီးနောက် ကျန်းရွှမ်၏မျက်လုံးများ တောက်ပလာသည်။

သူ၏ လက်ရှိစွမ်းအားနှင့် တိုက်ခိုက်စွမ်းရည်သည် ဗောဓိသတ္တတစ်ပါးနှင့် ယှဉ်နိုင်ပြီဖြစ်သော်လည်း ဗုဒ္ဓအရှင်နှင့်တခြားသူများကို တွေ့ဆုံချိန်၌ သူ အနိုင်မယူနိုင်ဘဲ ထွက်ပြေးရုံသာ တတ်နိုင်ပေ၏။

သို့ရာတွင် သူ၏လက်ထဲ၌ ဒုတိယအဆင့် ကောင်းကင်ကံကြမ္မာ ရတနာတစ်ခု ရှိနေပါက သူတို့ကို ယှဉ်ပြိုင်နိုင်ကောင်း ယှဉ်ပြိုင်နိုင်ပေမည်။

ယခင်က တောင်တန်းမြစ်ပြင် တံဆိပ်ပြားကို အသက်ပင်လယ် နဝမအဆင့်တွင်သာရှိသော အိမ်ရှေ့စံမင်းသားယွမ်ချင်းမှ အသုံးပြုခဲ့သည်။ ထိုစဉ်က ထိုရတနာ၏စွမ်းအားမှ တစ်ရာခိုင်နှုန်းကိုပင် မထုတ်ဖော်နိုင်ခဲ့သော်လည်း တောင်တန်းများနှင့် မြစ်များကို ဖိနှိပ်နိုင်ပြီး လေဟာနယ်ကို ချိတ်ပိတ်နိုင်ခဲ့သည်။ ယခုချိန်၌ သူသည် ထိုကဲ့သို့ရတနာကို အသုံးပြုနိုင်ပါက ဗုဒ္ဓအရှင်ကို မယှဉ်နိုင်လျှင်ပင် သေချာပေါက် အနည်းငယ် ခုခံနိုင်မည်ဖြစ်ပြီး နောက်လှည့်ထွက်ပြေးရန် လိုအပ်မည် မဟုတ်ချေ။

"စမ်းကြည့်ရအောင်...."

ကမ္ဘာတစ်ခု၏အရှင်သခင် ဖြစ်လာပြီးနောက် သူ၏လက်နက်သန့်စင်ခြင်း စွမ်းရည်သည်လည်း အထွတ်အထိပ်သို့ ရောက်ရှိခဲ့သည်။ သူ၏ စကားလုံးများသည် ဥပဒေသဖြစ်သော ရွှမ်ကမ္ဘာထဲတွင် ရှိနေခြင်းနှင့် ပေါင်းစပ်လိုက်ပါက သူ၏လက်နက်သန့်စင်မှု မအောင်မြင်လျှင်ပင် ဆုံးရှုံးမှု ကြီးကြီးမားမား ရှိမည်မဟုတ်ချေ။

"ပေါင်းစပ်စမ်း..."

ကျန်းရွှမ်က သူ၏လက်ချောင်းကို လှုပ်ခတ်လိုက်ရာ ရတနာအမြောက်အများသည် အခြေခံအကျဆုံး အမှုန်အမွှားများအဖြစ် ချက်ချင်းပြိုကွဲသွားပြီး စတင်၍ ပေါင်းစပ်လာပေ၏။

ချန်တယ်ဓား ရွှေရောင်သံချပ်ကာ စစ်ရထား ကောင်းကင်ကိုးထပ်ဇီသာ သံခြေချင်း...

အစပျိုးအဆင့် ကောင်းကင်ကံကြမ္မာ ရတနာနှစ်ခုနှင့် အထွတ်အထိပ်အဆင့် ရင်းမြစ်လက်နက် အမြောက်အများအပြား လျှင်မြန်စွာ ပေါင်းစည်းသွားကြသည်။

"မဖြစ်ဘူး... ဒါတွေက တစ်ခုတည်းအဖြစ် မဖွဲ့စည်းနိုင်ဘူး..."

မကြာမီမှာပင် တစ်စုံတစ်ရာ မှားယွင်းနေကြောင်း ကျန်းရွှမ် တွေ့ရှိလိုက်ရသည်။

ဤလက်နက်များသည် ဆီနှင့်ရေကဲ့သို့ ဖြစ်နေပေ၏။ နှစ်ခုလုံးသည် အရည်များဖြစ်သော်လည်း သိသာရှင်းလင်းစွာ ကွဲပြားနေသည်။ ကမ္ဘာတစ်ခု၏ အရှင်သခင် အနေဖြင့်ပင် သူသည် ထိုအရာများကို လုံးလုံးလျားလျား မပေါင်းစပ်နိုင်ချေ။

ရွှမ်ကမ္ဘာထဲတွင် ရှိနေလျှင်ပင် ဤမျှထိ အစွမ်းထက်သော လက်နက်များကို တစ်ခုတည်းအဖြစ် ပေါင်းစပ်ရန် အလွန်ခက်ခဲနေပုံရသည်။

သူသည် လက်ချောင်းများကို အဆက်မပြတ် လှုပ်ရှားလိုက်ပြီး မျက်စိတစ်မှိတ်အတွင်း ထုနှက်ခြင်း ပုံသွင်းခြင်းနှင့် ဝင်္ကပါများ ထွင်းထုခြင်းတို့ကို ပြုလုပ်ခဲ့သည်။ တစ်ရက်မပြည့်မီ သူသည် သန့်စင်ခြင်းနည်းလမ်းပေါင်း ရာပေါင်းများစွာကို အသုံးပြုခဲ့သည်။ သို့ရာတွင် ရလဒ်အနေဖြင့် ဤလက်နက်များသည် ပြီးပြည့်စုံသော ပေါင်းစပ်မှု လက္ခဏာ မပြသဘဲ ဖရိုဖရဲချက်ပြုတ်ထားသော စွပ်ပြုတ်တစ်ပွဲအလား စုပုံထားသော လက်နက်စင်တစ်ခုအလား ဖြစ်နေဆဲပင်။

"တကယ် မရရင်လည်း ထားလိုက်ပါတော့..."

အချိန်အတော်ကြာပြီးနောက် ကျန်းရွှမ်က လက်လျှော့ရန် ဆုံးဖြတ်လိုက်သည်။