👑 No Imperial Bloodlne

ယခု ချန်ကျင်းမင်ကို တရားရေးရာဝန်ကြီးကိုယ်တိုင် စစ်ဆေးမေးမြန်းနေသည်။

သို့သော် ဘယ်လောက်ပဲ မေးမြန်းပါစေ ချန်ကျင်းမင်က တူညီသည့် အဖြေတွေကိုပဲ ထပ်ခါထပ်ခါပေးနေခဲ့သည်။

“ဘာစုစ်ယောင်မှ ကျုပ်မသိဘူး၊ ဒီကိစ္စက နားလည်မှုလွဲနေတာ ကျုပ်ဘာမှမသိဘူး”

“အဲ့ဒီ စုစစ်ယောင်က ဒီလိုယုတ်ညံ့တဲ့ လုပ်ရပ်တွေကိုတောင် လုပ်ရဲတာလေ၊ သူ့စကားတွေကကို ယုံလို့ ရပါ့မလား”

“ကျုပ် ဘာမှမသိဘူး၊ ကျုပ်နဲ့ ကျုပ်ဇနီးတို့ကြားက ဆက် ဆံရေးကလည်း ကောင်းမွန်ပြီးသားပဲ၊ ကျုပ်သူ့ကို ဘာလို့ ဒုက္ခပေးရမှာတုန်း”

“သက်သေခိုင်လုံတယ်ဟုတ်လား၊ အဲ့ဒီခိုင်လုံတဲ့ သက်သေတွေအကြောင်း ကျုပ်လည်း ဘာမှမသိခဲ့ရပါလား ? မှား ယွင်းနေတဲ့ အမှုတစ်ခုကို အမှန်လို့ခေါင်းမာယုံကြည်နေသရွေ့တော့ ကျုပ်လည်း ဘာမှမတတ်နိုင်ဘူး”

“အခုလည်း ကျုပ်ဇနီးနေကောင်းထိုင်ကောင်းရှိနေတာပဲ မဟုတ်ဘူးလား ? သူ့မှာ အသက်အန္တရာယ် မရှိဘူးဆိုတော့ ကျုပ်ကို သေဒဏ်ချမှတ်လို့ ရမှာတဲ့လား”

“တရားရေးရာဝန်ကြီးဆိုပြီး ယုံမင်းဆက်ရဲ့ တရားဥပဒေတွေကို လျစ်လျူရှုထားတာလား”’

ဝမ့်ဝမ်ရုန်ကိစ္စနှင့် ပတ်သတ်သမျှကို ချန်ကျင်းမင်ငြင်း ဆန်နေသည်။ ယွဲ့ဟွာနှင့် ပတ်သတ်သည့် ကိစ္စများတွင်ပိုလို့တောင် မသိချင်ယောင်‌ဆောင်နေခဲ့သည်။

“မင်းသားအန်းဟယ်က သာမန်မင်းသားတစ်ပါးလေ၊ စုစစ်ယောင် ဝန်ခံထားတာတွေက စိတ်ကူးယဉ်သက်သက်ပဲ၊ သူ့အလိမ်အညာတွေကို ခင်ဗျားတို့ ယုံကြည်နေတယ်ပေါ့”

“မင်းသားအန်းဟယ်နဲ့ ကျုပ်ရင်းနှီးနေတယ်ဆိုတာက သာမန်ခင်မင်မှုတစ်ခုပဲ၊ ကျန်တာကို ခင်ဗျားတို့ ကြိုက်သလောက် စွပ်စွဲနိုင်တယ်၊ ကျုပ်ဘာမှ တတ်နိုင်မှာမှ မဟုတ်ပဲ”

ချန်ကျင်းမင် အလွန်ခေါင်းမာနေပြီး ဘာမေးမေး အတိုက် အခံတွေသာ ပြန်ဖြေနေခဲ့သည်။

သို့သော် တရားရေးရာဝန်ကြီးဌာနကလည်း အလျှင်မလိုသေးပါ။

စုစစ်ယောင်၏ဝန်ခံချက်များကို ရရှိပြီးသည်နှင့်တစ်ပြိုင် နက် မြို့တော်အတွင်းမှာရှိနေသည့် ယွဲ့ဟွာ ခံတပ်စခန်းများအား လျှပ်စီးလိုအလျှင်ဖြင့် ဝင်ရောက်စီးနှင်းခဲ့သည်။

အခြေအနေများကို ယွဲ့ဟွာ ပြောင်းပြန်လှန်လိုက်မည် စိုးရိမ်သောကြောင့် စုစစ်ယောင်ကိုယ်တိုင်လမ်းပြပေးခဲ့ပြီး သေမင်းတမန်စစ်သည်တော်များကို ယွဲ့ဟွာလျှို့ဝှက်ထားသည့် ခံတပ်စခန်းများစွာသို့ခေါ်ဆောင်သွားပေးခဲ့သည်။

ထိုသေမင်းတမန်စစ်သည်တော်အများစုကို စုစစ်ယောင်က အဆိပ်သုံးပြီး ထိန်းချုပ်ထားသဖြင့် သစ္စာဖောက်ခိုင်းဖို့ ရာလွယ်ကူသည်။

သို့သော် တချို့တွေကမူ လျှို့ဝှက်သတင်းအချက်အလက်ဌာန၏ဦးနှောက်ကျင်းမှုကိုခံထားရသဖြင့် နေရာမှာပင် ကွပ်မျက်ခံခဲ့ရသည်။

ယွဲ့ဟွာဘက်မှလည်း တန်ပြန်တိုက်ခိုက်ဖို့ကြိုးစားခဲ့သည်။

သို့သော် မြို့တော်တွင်း ၎င်းအင်အားစုတွေ နည်းပါးသွားပြီဖြစ်သည်။ ထို့ပြင် ယွဲ့လင်းကလည်း အရာရာကိုအစော ကြီးကတည်းက စီစဉ်ထားရှိခဲ့သည်။

ယွဲ့ဟွာဘက်မှလူများ ပြဿနာရှာလျှင်ပင် ယွဲ့လင်းလူတွေက အမြန်ဆုံးဖိနှိပ်ရှင်းလင်းနိုင်ခဲ့သည်။

ထို့ကြောင့် အစီရင်ခံစာများ တစ်စောင်ပြီးတစ်စောင် ရောက်ရှိလာခဲ့သည်။

ထိုအစီရင်ခံစာများကို ချန်ကျင်းမင်ရှေ့မှာ တရားရေးရာဝန်ကြီးဖွင့်ဖတ်ပြခဲ့သည်။

ချန်ကျင်းမင်အကြံအစည်တွေ ဘယ်လောက်ပဲ စေ့စပ်နေပါစေ ထိုသတင်းတွေကိုကြားပြီး မျက်နှာအနည်းငယ် ပျက်သွားခဲ့လေသည်။

ဒီကမ္ဘာပေါ်မှာ မိန်းမမှန်သမျှသုံးစားလို့မရမှန်း ချန်ကျင်းမင် နားလည်သွားခဲ့ရသည်။

ယွဲ့ဟွာအပေါ် စုစစ်ယောင် ယခုလိုမဆိုင်းမတွသစ္စာဖောက်ပြီး အသက်ရှင်နိုင်မယ်ထင်နေတာလား…

ဒါမှမဟုတ်… သူ သေရတော့မယ်ဆိုတာကိုသိလို့ ယွဲ့ဟွာကိုပါ ငရဲအတူတူခေါ်သွားဖို့ ဆုံးဖြတ်ထားတာလား…

မိန်းမတွေ၏အငြှိုးတရားက ကြောက်စရာကောင်းလွန်းသည်။

မနက်ခင်း သူဖမ်းဆီးခံခဲ့ရသည့်အချိန်ကို ချန်ကျင်းမင် ပြန်မြင်ယောင်မိသည်။ သူ့အတွက် ဝမ့်ဝမ်ရုန် ကာကွယ်ပြောဆိုပေးလိမ့်မည် သို့မဟုတ် ဝင်တားဆီးပေးလိမ့်မည်ဟု မျှော်လင့်ထားခဲ့ခြင်းဖြစ်သည်။

ဒီလူတွေကို ဝမ့်ဝမ်ရုန်သာ အချိန်ခဏလောက်ဆွဲထားပေးနိုင်ခဲ့လျှင် မင်းသားအန်းဟယ်လည်း သတင်းကိုရရှိပြီး ကြိုတင်ပြင်ဆင်မှုတွေ ဆောင်ရွက်ထားနိုင်ခဲ့လောက်သည်။ ထိုအခါ ယခုလိုဖြစ်လာစရာအကြောင်းလည်း လုံးဝမရှိပေ။

သို့သော် ထိုမိန်းမသည် သူဖမ်းဆီးခံလိုက်ရသည်ကို ဒီတိုင်းရပ်ကြည့်နေခဲ့သည်။

ဝမ့်ဝမ်ရုန်အား သူသတ်ပစ်ဖို့ကြံစည်ခဲ့တာမှန်သော်လည်း သူ့ပြုစုစောင့်ရှောက်မှုတွေအောက်မှာ ဝမ့်ဝမ်ရုန်ကြည်နူးပျော်ရွှင်ခဲ့ရသည် မဟုတ်ပါလား ?

ဒီမိန်းမတွေ တော်တော်နှလုံးသားမဲ့တာပဲ!

“ချန်ကျင်းမင်၊ အဲ့ဒီခံတပ်စခန်းတွေမှာ ဖမ်းဆီးရမိခဲ့တဲ့ တပ်သားအများစုက ယွဲ့ဟွာရဲ့တိုက်ရိုက်လက်အောက်ခံတွေပဲ၊ အခု မင်းသားအန်းဟယ် ပုန်ကန်ဖို့ကြံစည်နေတဲ့ သက်သေက ခိုင်လုံသွားခဲ့ပြီနော်”

တရားရေးရာဝန်ကြီး အေးစက်စွာပြောလိုက်သည်။

“အခု မင်းသားအန်းဟယ်ရဲ့စံအိမ်တစ်ဝိုက်မှာ မလွတ် မြောက်နိုင်တဲ့ ကျော့ကွင်းတစ်ခုဆင်ထားလိုက်ပြီ၊ အဲ့ဒီ သစ္စာဖောက် သူပုန်ကိုဖမ်းဆီးဖို့ အရှင်မင်းကြီးရဲ့ အမိန့် တော်ကိုပဲ ကျုပ်တို့လိုအပ်တော့တာ! အခုသက်ညှာမှု ရရှိအောင် ခင်ဗျားဘက်ကဝန်ခံနိုင်မယ့် နောက်ဆုံးအခွင့် အရေးနော်! စုစစ်ယောင်ကိုအတုယူပြီး ဝန်ခံစရာရှိတာမြန်မြန် ဝန်ခံလိုက်စမ်းပါ!”

ချန်ကျင်းမင် အေးစက်စွာရယ်မောလိုက်သည်။

“ကျုပ်နဲ့ မင်းသားအန်းဟယ်ဆိုတာ အစကတည်းက ဘာဆက်နွယ်မှုမှမရှိခဲ့တာလေ၊ ကျုပ်ကို ဘာဝန်ခံစေချင်တာလဲ ? ကျုပ်မှာ ဘာမှဝန်ခံစရာမရှိဘူး!”

တရားရေးရာဝန်ကြီးလည်း အလျှင်မလိုပဲအဓိပ္ပာယ်ပါပါ ပြုံးလိုက်သည်။

“တကယ်တော့ ကျုပ်က တာဝန်အရမေးမြန်းနေရတာပါ၊ ခင်ဗျား ဝန်မခံတာနဲ့ပဲ အရှင်မင်းကြီး ဘာမှမသိနိုင်ဘူးလို့ ထင်နေတာလား ? အရှင်မင်းကြီးက ဉာဏ်အမြော်အမြင်နဲ့ ပြည့်စုံတဲ့ မင်းတစ်ပါးနော်”

ချန်ကျင်းမင် လှောင်ပြုံးသာပြုံးလိုက်သည်။

ထို့နောက် ချန်ကျင်းမင်ရှေ့သို့ တရားရေးရာဝန်ကြီးစာရင်း တစ်ခု ပစ်တင်ပေးလိုက်သည်။

“ဒီလူတွေအားကိုးနဲ့ သတ္တိအရမ်းကောင်းနေတာလား”

ချန်ကျင်းမင် မျက်မှောင်ကြုတ်သွားပြီး ထိုစာရင်းကို လှမ်းကြည့်လိုက်ပါသည်။

ထိုအခါ သူ့မျက်လုံးသူငယ်အိမ်များ ကျုံ့ဝင်သွားခဲ့ရလေတော့သည်။ တစ်ကိုယ်လုံးလည်း ထိန်းမရအောင်တုန်ယင်သွားခဲ့သည်။

ဒါ… ဒါ ဘယ်လိုဖြစ်တာလဲ!

သူ့လျှို့ဝှက်အင်အားစုတွေ အကုန်လုံးကို စာရင်းပေါ်မှာ ရေးသားထားတာပါလား!

ချန်ကျင်းမင် မျက်လုံးတွေ ကျွတ်ကျမတတ်ပြူးကျယ်သွားပြီး စာရင်းကို အစအဆုံးဖတ်ကြည့်လိုက်သည်။

ပထမတော့ ချန်ကျင်းမင် မယုံကြည်နိုင်ဖြစ်နေမိသည်။ ထို့နောက် သူ့ရည်ရွယ်ချက် ပြောင်းလဲသွားခဲ့သည်။

စာရင်းထဲမှာ ယွဲ့လင်း ထည့်သွင်းဖို့ကျန်ရစ်ခဲ့မည့် အမည်တစ်ခုလောက်ကိုသာ ရှာချင်ခဲ့မိသည်။

သို့သော် စာရင်းကို အစအဆုံးအကြိမ်ကြိမ်ဖတ်ကြည့်လိုက်ပြီးနောက် ယွဲ့လင်း မည်သူ့ကိုမှချန်လှပ်မထားခဲ့မှန်း သေချာသွားရသည်။

နှစ်ပေါင်းများစွာအချိန်ယူပြီး သူ တည်ဆောက်ထားခဲ့ရသည့် အဆက်အသွယ်အားလုံးကို ယွဲ့လင်း တစ်ဦးမကျန် အကုန်သိနေလေသည်။

ထိုအဆက်အသွယ်တွေအားလုံးကို ဆက်လက်လျှို့ဝှက်ထားနိုင်ပါက အရေးကြီးသည့်အချိန်တစ်ခုမှာ ထုတ်သုံးနိုင်လိမ့်မည်။

သို့သော် ယခုမူ ၎င်းတို့အားလုံး စတေးရတော့မည့် နယ်ရုပ်တွေဖြစ်ကုန်လေပြီ။

ချန်ကျင်းမင် အတော်လေးထိတ်လန့်ချောက်ချားသွားပြီး မျက်နှာတွေ ဖြူရော်သွားခဲ့ရသည်။

ယွဲ့လင်းဘာကြောင့် ထိုမျှအစွမ်းထက်နေရသလဲ သူ နားမလည်နိုင်ပါ။

နှစ်ပေါင်းများစွာအတွင်း သူနှင့်ယွဲ့ဟွာတို့၏လှုပ်ရှားမှုတိုင်းကို အရှင်မင်းကြီး မျက်ခြေမပြတ်စောင့်ကြည့်နေခဲ့တာများလား!

အရာအားလုံးကို ယွဲ့လင်း လက်ထဲမှာ ထိန်းချုပ်ထားနိုင်ခဲ့လို့ နန်းတက်ပြီးတဲ့နောက် သူတို့တွေကို မရပ်မနားထိုးနှက်နိုင်ခဲ့တာလား!

လပိုင်းအတွင်းမှာပင် ၎င်းတို့ နှစ် ၂၀ ခန့်တည်ဆောက် ထားရသည့် အင်အားစုများကို ယွဲ့လင်း တစ်စစီဖြစ်သွားအောင်ဖြိုခွင်းပစ်လိုက်နိုင်သည်။

တရားရေးရာဝန်ကြီးက အဓိပ္ပာယ်ပါပါပြောလိုက်သည်။

“ဝန်ကြီးချန်… ကောင်းကင်ဘုံရဲ့သားတော်ဆိုကတည်းက ကောင်းကင်ဘုံရဲ့ကံကြမ္မာကို ကိုင်ဆောင်ထားတဲ့လူ၊ အပြင်က မိစ္ဆာတွေ၊ မကောင်းဆိုးဝါးတွေက ကောင်းကင် ဘုံရဲ့သားတော်ကို နည်းနည်းလေးတောင် ဒုက္ခပေးနိုင်မှာ မဟုတ်ဘူး၊ တော်ဝင်သွေးမပါရင် ဘယ်သူမှ တော်ဝင်အိမ်တော်ရဲ့ လူတစ်ယောက်ဖြစ်မလာနိုင်ဘူး”

ထိုစကားတွေကို ချန်ကျင်းမင်ရှေ့မှာပြောဖို့ တရားရေးရာဝန်ကြီးအား ယွဲ့လင်း သေချာညွှန်ကြားထားခဲ့ခြင်းဖြစ် သည်။

တရားရေးရာဝန်ကြီးလည်း အနည်းငယ် နားမလည်နိုင်ဖြစ်မိသည်။ ထိုစကားက အနည်းငယ်ထူးဆန်းနေပြန်သည်။

လက်ရှိဧကရာဇ်မင်းကြီးဟည် သွေးသားမျိုးရိုးအစွဲရှိသူ မဟုတ်သော်လည်း ချန်ကျင်းမင်ကိုတော့ ဒီစကားသေချာပြောလိုက်ဖို့ မှာကြားခဲ့ခြင်းဖြစ်သည်။

သို့သော် ထိုစကားကိုကြားပြီးနောက် ချန်ကျင်းမင်၏တုန့်ပြန်မှုက အမှန်ပင်အလွန်ကြီးမားသွားခဲ့သည်။

အလွန်တရာကြောက်စရာကောင်းသည့် စကားလုံးများကို ကြားလိုက်ရသကဲ့သို့ ချန်ကျင်းမင်တစ်ကိုယ်လုံးနုံးချည့်သွားခဲ့သည်။

တစ်ယောက်တည်း ကြက်သေသေရင်း တတွတ်တွတ် ရေရွတ်နေခဲ့သည်။

“ကောင်းကင်ဘုံရဲ့သားတော်…”

“ကောင်းကင်ဘုံရဲ့သားတော်…”

ထို့နောက် ချန်ကျင်းမင် မျက်လုံးများ သွေးချင်းနီသွားပြီး တရားရေးရာဝန်ကြီးကို ဒေါသတကြီး စိုက်ကြည့်လိုက်ပါသည်။

“ဘာကိုကြည့်ပြီးပြောတာလဲ ? သောက်အဓိပ္ပာယ်မရှိတဲ့ ‘ကောင်းကင်ဘုံရဲ့သားတော်’လား! ဘာကိုကြည့်ပြီး သူ့ကို ကောင်းကင်ဘုံရဲ့သားတော်လို့ ခေါ်ရဲတာလဲ! သူ့လိုလူမျိုးက ရို့ရို့နဲ့တန်းတူရပ်တည်နိုင်မှာတဲ့လား! ပြောစမ်း ဘာကို ကြည့်ပြီး ပြောတာလဲလို့!”

ချန်ကျင်းမင် အတော်လေး လှုံ့ဆော်ခံလိုက်ရပုံပေါ်သည်။ ရုတ်တရက်ကြီး မတ်တပ်ထရပ်ကာ သံကြိုးတွေကိုတရွတ်တိုက်ဆွဲလျက် တရားရေးရာဝန်ကြီးထံပြေးလာခဲ့သည်။

“သခင်ကြီး!”

အစောင့်တပ်သားနှစ်ဦး ရှေ့ထွက်လာကြပြီး အလျှင်အမြန် တားဆီးလိုက်ကြသည်။

“မလိုဘူး”

တရားရေးရာဝန်ကြီးသည်အစောင့်တပ်သားနှစ်ဦးကို နောက်ဆုတ်ခိုင်းလိုက်ပြီး ချန်ကျင်းမင်အား မျက်မှောင် ကြုတ်လျက် မေးမြန်းလိုက်ပါသည်။

“ရို့ရို့ဆိုတာ ဘယ်သူလဲ ခင်ဗျားဘာတွေ ပြောနေတာလဲ”

ချန်ကျင်းမင် နှုတ်ခမ်းထက် ထူးထူးဆန်းဆန်းအပြုံးတစ်ခုပေါ်လာပြီး အသံကလည်း အလွန်နူးညံ့သိမ်မွေ့သွားခဲ့သည်။

“ရို့ရို့… ကျုပ် အချစ်ရဆုံးသူလေး ၊ သူက တခြားမိန်းမတွေနဲ့ ကွာခြားတယ်၊ ရို့ရို့က မြင့်မြတ်တယ်၊ လှပတယ်၊ ကျုပ် နှလုံးသားထဲမှာ အမြတ်တနိုးတန်ဖိုးထားခဲ့ရတဲ့ လရောင်ဖြူလေးပဲ…”

“သူ… သူနဲ့ အရင်ဆုံး ဆုံခဲ့ရတာ ကျုပ်ပဲ! အဲ့ဒီ မျိုးမစစ်ကောင် ယွဲ့မိုကြောင့်သာ မဟုတ်ရင် ရို့ရို့လေးကို ကျုပ်ပိုင်ဆိုင်ခဲ့ရမှာ! ကျုပ်နဲ့အတူ ပေါင်းဖက်ရပြီး ရင်သွေးတွေ အများကြီး မွေးဖွားနိုင်ခဲ့မှာ!”