အခန်း (၁၅၆-၁၆၀)

အခန်း (၁၅၆) - အလုပ်သမားဘဝမှ အလုပ်ရှင်ဘဝသို့ (၂)

လုံဟောက်ချန်က ပြောသည်။

"အစ်ကိုကျန့်၊ ခဏလောက် ထရပ်ပေးပါ"

ကျန့်ဖုန်းက ဇဝေဇဝါဖြင့် ထရပ်လိုက်သည်။ လုံဟောက်ချန်သည်လည်း ထရပ်လိုက်ပြီး မောက်မာသော အကြည့်ဖြင့် ဘေးပတ်ပတ်လည်ရှိ လူအားလုံးကို ကြည့်ကာ ပြောလိုက်သည်။

"ကျွန်တော် တခြားသဘော မရှိပါဘူး၊ ဒါပေမဲ့ ဒီမှာရှိနေတဲ့ လူအားလုံးဟာ အမှိုက်တွေပါပဲ"

ယန်ဝမ်ကျောက်နှင့် သွမ့်ယီတို့မှာ ဒေါသထွက်သော်လည်း ဘာမှ ပြန်မပြောရဲကြပေ။

"ပြောလို့ ပြီးပြီလား ဟောက်ချန်၊ ထိုင်တော့"

ကျန့်ဖုန်းက ပြောသည်။

"ဟုတ်ကဲ့ပါ"

လုံဟောက်ချန်က ပြန်ဖြေသည်။

ကျန့်ဖုန်းက ဆက်ပြောသည်။

"ဒီမှာရှိနေတဲ့ လူအားလုံးက အမှိုက်တွေပဲ"

...လင်ရှင်းမှာ ရင်ထဲတွင် နာကျင်နေသော်လည်း ကျန့်ဖုန်းကို ဂုဏ်ထူးဆောင်အမှတ် ၉၀,၀၀၀ ပေးလိုက်ရသည်။ သို့သော် ကျန့်ဖုန်းကို ၉၀,၀၀၀ ပေးလိုက်ပြီးသည့်တိုင် သူတို့သည် အမှတ် တစ်သိန်းကျော် အမြတ်ထွက်နေသေးသည်။ သေချာသည်မှာ ထိုအမှတ်များထဲတွင် အယုံလွယ်သူကြီးနှစ်ဦးဖြစ်သော ယန်ဝမ်ကျောက်နှင့် သွမ့်ယီတို့ဆီမှ တစ်ဦးလျှင် တစ်သောင်းစီ ပါဝင်နေသည်။

ယန်ဝမ်ကျောက်နှင့် သွမ့်ယီတို့သည် လင်ရှင်း၏ အမှတ်ကတ်ပြားထဲရှိ အမှတ်အမြောက်အမြားကို မြင်သောအခါ မျက်လုံးများ နီမြန်းလာကြသည်။ အချို့လူများ၏ အမှတ်များမှာ နှမြောစရာ မကောင်းလှသော်လည်း၊ အချို့လူများအတွက်မူ အမှတ်များမှာ လွယ်လွယ်ကူကူ ရရှိနေကြသည်။

"ဆရာဦးလေး..."

ယန်ဝမ်ကျောက်က ကျန့်ဖုန်းကို ကြည့်ကာ လှမ်းခေါ်လိုက်သည်။

"ဘာမှမပြောနဲ့၊ ပြောရင် ငါတို့သံယောဇဉ်တွေ ထိခိုက်ကုန်မယ်"

ကျန့်ဖုန်းက အမြန်တားလိုက်သည်။ ဤကောင်လေးမှာ မနာလိုဖြစ်နေပြီလေ။

"ဒါပေမဲ့ မင်းက ငါ့ကို ဆရာဦးလေးလို့ ခေါ်နေမှတော့ ငါလည်း လျစ်လျူရှုလို့ မဖြစ်ဘူးပေါ့။ ကုန်သွယ်ရေးစင်တာက ကိုယ်ခန္ဓာအားတိုးဆေးလုံးအကြောင်း ကြားဖူးလား ငါ့မှာ လမ်းကြောင်းရှိတယ်။ မင်းတို့ဘက်က အဆင့် ၅ ဒါမှမဟုတ် အဲ့ဒီအထက်ရှိတဲ့ နတ်ဆိုးမျိုးနွယ် ဒါမှမဟုတ် နတ်ဆိုးသားရဲ အလောင်းတွေကို ရှာပေး၊ ကျန်တာ ငါ့တာဝန်ထားလိုက်"

ကျန့်ဖုန်းက ယန်ဝမ်ကျောက်၏ ပုခုံးကို ပုတ်ကာ ပြောလိုက်သည်။

"ကိုယ်ခန္ဓာအားတိုးဆေးလုံး ဆရာဦးလေး... ဒီဆေးလုံးကို ဘယ်သူဖော်စပ်လဲဆိုတာ ဆရာဦးလေး သိတာလား"

ယန်ဝမ်ကျောက်က အံ့သြတကြီး အော်လိုက်သဖြင့် လူတိုင်း၏ အာရုံကို ဆွဲဆောင်လိုက်သလို ဖြစ်သွားသည်။ လုံဟောက်ချန်၏ အဖွဲ့ဝင်များနှင့် လုရှီး၏ အဖွဲ့ဝင်များ အားလုံးပင် အကြည့်လွှဲလာကြသည်။

ကျန့်ဖုန်းက ယန်ဝမ်ကျောက်၏ နဖူးကို တစ်ချက်ပုတ်လိုက်သည်။ ဤကောင်လေးမှာ လုံးဝ မတည်ငြိမ်ဘဲ လျှို့ဝှက်သတင်းအချက်အလက်ကို ထုတ်ပြောလိုက်မိပြီ။

"အစ်ကိုကျန့်..."

လင်ရှင်းက ချော့မော့သော မျက်နှာဖြင့် ရောက်လာသည်၊ သူသည် အမှတ်၉၀,၀၀၀ ရှုံးခဲ့ရသော နှလုံးသား၏ နာကျင်မှုများကို လုံးဝ ဘေးဖယ်ထားလိုက်ပုံရသည်။ သူက မေးလာသည်။

"အစ်ကိုကျန့်... အဲ့ဒီ နတ်ဆိုးဆေးပညာရှင် စီနီယာနဲ့ ကျွန်တော့်ကို မိတ်ဆက်ပေးလို့ ရမလား၊ ကျွန်တော့်ကိုယ်ကျွန်တော် အဂ္ဂိရတ်ပညာမှာ ပါရမီရှိတယ်လို့ ယူဆပါတယ်၊ အကယ်၍ အဲ့ဒီစီနီယာက ကျွန်တော့်ကို သဘောကျပြီး နည်းလမ်းအချို့ သင်ပေးမယ်ဆိုရင် အစ်ကိုကျန့်ရဲ့ အဖော်တွေအတွက် လိုအပ်တဲ့ ဆေးလုံးအားလုံးကို နောင်မှာ ကျွန်တော် တာဝန်ယူပေးပါ့မယ်"

ဤနေရာတွင် ရှိနေသူတိုင်းသည် ကုန်သွယ်ရေးစင်တာရှိ ထိုဆေးလုံးအကြောင်း ကြားဖူးကြသည်။ ဈေးနှုန်းမှာ သင့်တင့်သော်လည်း ပစ္စည်းလက်ကျန် အလွန်နည်းပါးသဖြင့် ရရှိရန် ခက်ခဲလှသည်။ ဘာပဲဖြစ်ဖြစ် ကျန့်ဖုန်းက နှစ်ကြိမ်သာ ရောင်းချခဲ့ရသေးသည် မဟုတ်ပါလား။

"စိတ်မကောင်းပါဘူး၊ အဲ့ဒီလူကြီးက ဘယ်သူလဲဆိုတာ ငါလည်း မသိဘူး၊ ငါက သူ့အတွက် ဆေးဖော်စပ်တဲ့ ပစ္စည်းတွေကို စုဆောင်းပေးရုံသက်သက်ပါပဲ"

ကျန့်ဖုန်းက ခေါင်းခါကာ ရိုးသားသော အမူအရာဖြင့် ပြောလိုက်သည်။

လင်ရှင်းက စိတ်ပျက်စွာဖြင့် သက်ပြင်းချလိုက်ပြီး ပြောလာသည်။

"တကယ်ပါပဲ၊ ကျွန်တော်က အရမ်း မျှော်လင့်မိသွားတာ"

ထို့နောက် လင်ရှင်း၏ မျက်နှာမှာ ရုတ်တရက် ပြောင်းလဲသွားပြီး ကျန့်ဖုန်းကို ထပ်ပြောသည်။

"အစ်ကိုကျန့်... ကျွန်တော်တို့လည်း နတ်ဆိုးမျိုးနွယ် အလောင်းတွေ ရှာပေးလို့ ရတာပဲ၊ အစ်ကိုကျန့်က..."

လင်ရှင်းက မျက်စိတစ်မှိတ်ပြကာ သူ၏လက်များကို ပွတ်သပ်ရင်း ကျန့်ဖုန်းကို တောင်းဆိုသော အကြည့်ဖြင့် ကြည့်လိုက်သည်။ လင်ရှင်း၏ ထိုပုံစံကို မကြည့်ချင်တော့သဖြင့် ကျန့်ဖုန်းက စိတ်မရှည်စွာဖြင့် ပြန်ဖြေလိုက်သည်။

"ကောင်းပြီ၊ ကောင်းပြီ၊ မင်းတို့ကို ငါ မတတ်နိုင်တော့ဘူး၊ ဒါပေမဲ့ ဒီကိစ္စကို ဒီနေ့ ဒီမှာရှိနေတဲ့လူတွေကလွဲလို့ တခြားဘယ်သူမှ မသိစေနဲ့၊ အားလုံးက နတ်ဆိုးအမဲလိုက်သူတွေ ဖြစ်ပေမဲ့ အဲ့ဒီလူကြီးက တစ်ယောက်တည်းရှိတာ၊ သူ့ကို ပင်ပန်းအောင် မလုပ်ကြနဲ့၊ မဟုတ်ရင် သူ ငါ့ကိုတောင် ဂရုစိုက်တော့မှာ မဟုတ်ဘူး"

"အဆင့် ၅ ဒါမှမဟုတ် အဲ့ဒီအထက် နတ်ဆိုးအလောင်း တစ်လောင်းကို ဆေးလုံး နှစ်လုံး ပြန်ပေးမယ်၊ ဒါပဲ၊ ပိုထွက်လာတဲ့ ဆေးလုံးတွေကိုတော့ အဲ့ဒီလူကြီးအတွက် ဆေးဖော်ခအဖြစ် သတ်မှတ်မယ်"

ကျန့်ဖုန်းက ဆက်ပြောသည်။

"ဒါက ငါ ပေးနိုင်တဲ့ အကြီးမားဆုံး အကျိုးခံစားခွင့်ပဲ၊ တခြားလူတွေအတွက်ဆိုရင် အလောင်းတစ်လောင်းက ဆေးလုံးတစ်လုံးတောင် ထွက်ချင်မှ ထွက်မှာ၊ သေချာတာကတော့ အလောင်းတစ်လောင်းကနေ ဆေးလုံး ဘယ်နှစ်လုံး ထွက်လဲဆိုတာ ငါလည်း အတိအကျ မသိဘူး၊ ဆေးဖော်စပ်တဲ့ တခြားပစ္စည်းတွေက ဘာလဲဆိုတာလည်း ငါ မသိဘူး"

ကျန့်ဖုန်း၏ စကားကို ကြားပြီးနောက် လင်ရှင်း၊ လုရှီး၊ ယန်ဝမ်ကျောက်နှင့် သွမ့်ယီတို့ အားလုံး ခေါင်းကို တရစပ် ညိတ်ကြပြီး သူတို့၏ မျက်လုံးများတွင် စိတ်လှုပ်ရှားမှုများ ပြည့်နှက်သွားသည်။ အဘယ်ကြောင့်ဆိုသော် ကုန်သွယ်ရေးစင်တာရှိ ဆေးလုံးများမှာ သူတို့၏ တန်ဖိုးနှင့် နှိုင်းယှဉ်လျှင် မဈေးကြီးသော်လည်း လက်ရှိတွင် သူတို့ ဝယ်ယူနိုင်သည့် အရာများ မဟုတ်သောကြောင့် ဖြစ်သည်။ အဆင့် ၅ ဆေးလုံးတစ်လုံးလျှင် အမှတ် ၁၀၀ ပေးရသော်လည်း၊ အဆင့် ၅ နတ်ဆိုးအလောင်းတစ်လောင်းမှာ အမှတ် ၁၀ သို့မဟုတ် ၂၀ ခန့်သာ တန်ဖိုးရှိသည်။

မကြာမီ လုံဟောက်ချန်သည် စမ်းသပ်ကွင်းပေါ်မှ ဆင်းလာပြီး အဖွဲ့ထဲသို့ ပြန်ရောက်လာသည်။ လင်ရှင်း၏ ရှင်းပြချက်ကို နားထောင်ပြီးနောက် သူသည် ရှေ့သို့ တက်လှမ်းလာခဲ့သည်။

"အစ်ကိုကျန့်... ကျွန်တော် တခြားဘာမှ မပြောတော့ပါဘူး၊ ဒါပေမဲ့ နောင်မှာ တစ်ခုခု အကူအညီလိုရင် တစ်ချက်သာ ခေါ်လိုက်ပါ"

လုံဟောက်ချန်က ကျေးဇူးတင်စွာဖြင့် ပြောလိုက်သည်။ လင်ရှင်းက ဆေးလုံး၏ အာနိသင်ကို ရှင်းပြထားပြီးဖြစ်ရာ လုံဟောက်ချန်သည် ၎င်း၏ တန်ဖိုးကို နားလည်ပြီး ကျန့်ဖုန်း၏ လုပ်ဆောင်ချက်အပေါ် ချက်ချင်းပင် စိတ်လှုပ်ရှားသွားခဲ့သည်။

လူသားမဟာမိတ်အဖွဲ့တွင် ပြင်ပဝိညာဉ်စွမ်းအား တိုးစေသည့် ဆေးလုံးများ ရှိသော်လည်း ၎င်းတို့မှာ အလွန်အမင်း ဈေးကြီးလှပြီး အာနိသင်မှာလည်း ကိုယ်ခန္ဓာအားတိုးဆေးလုံးကို မမီပေ။ ကျန့်ဖုန်းသည် သူတို့အတွက် ဤမျှ ကြီးမားသော အကျိုးကျေးဇူးကို ရရှိရန် ကြိုးစားပေးခြင်းမှာ အမှန်တကယ်ပင် အလေးထားပေးခြင်း ဖြစ်သည်။

ကျန်းရှင်းရန်သည် ကျန့်ဖုန်း၏ ဘေးတွင် ရပ်နေပြီး ဘာမှမပြောဘဲ သူ့ကို တိတ်တဆိတ် ကြည့်နေသည်။

"ဘာမှမဟုတ်ပါဘူး၊ ငါတို့အားလုံးက နတ်ဆိုးအမဲလိုက်သူတွေပဲဟာ"

ကျန့်ဖုန်းက လက်ဝှေ့ယမ်းကာ ထွက်ခွာရန် ပြင်လိုက်သည်။

"အစ်ကိုကျန့်၊ နောက်ထပ် တစ်ခုရှိသေးတယ်"

ကျန့်ဖုန်းက လုံဟောက်ချန်ကို လှည့်ကြည့်ကာ အနည်းငယ် ဇဝေဇဝါ ဖြစ်သွားသည်။

"ကျွန်တော် အစ်ကိုကျန့်နဲ့ နောက်တစ်ခါ ထပ်ပြီး ယှဉ်ပြိုင်ချင်ပါတယ်"

လုံဟောက်ချန်က လေးနက်စွာ ပြောလိုက်သည်။

ကျန့်ဖုန်းက ခပ်ပါးပါး ပြုံးပြီး ပြောလိုက်သည်။

"မင်းလည်း အခု အဆင့် ၆ ရောက်ခါနီးပြီ မဟုတ်လား မင်း အဆင့် ၆ကို တက်လှမ်းပြီးရင် ငါတို့ ထပ်ပြီး ယှဉ်ပြိုင်ကြတာပေါ့"

"ကောင်းပါပြီ"

လုံဟောက်ချန်၏ မျက်လုံးများမှာ မီးရှူးတိုင်များကဲ့သို့ တောက်ပနေပြီး သူ၏ တိုက်ပွဲစိတ်ဆန္ဒမှာ ဆူပွက်နေသည်။ ကျန့်ဖုန်းက လက်ဝှေ့ယမ်းနှုတ်ဆက်ကာ ကျန်းရှင်းရန်နှင့်အတူ ထွက်ခွာသွားခဲ့သည်။

အလောင်းတစ်လောင်းလျှင် ဆေးလုံး ၁၀ လုံး ထွက်နိုင်သော်လည်း ကျန့်ဖုန်းက ၂ လုံးသာ ပြန်ပေးခြင်းမှာ အနည်းငယ် များလွန်းသည်ဟု ထင်ရနိုင်သည်။

သို့သော် အခြားတစ်ဖက်မှ ကြည့်လျှင် အဆင့် ၅ နတ်ဆိုးတစ်ကောင်ကို သတ်လျှင် အမှတ် ၁၀ ရပြီး အလောင်းကလည်း ၁၀ မှတ်သာ တန်သည်။ ဆေးလုံး ၂ လုံးမှာ အမှတ် ၂၀၀ တန်ဖိုးရှိသည်။ ထို့ကြောင့် လုံဟောက်ချန်တို့မှာ အမှန်တကယ်ပင် အမြတ်အများကြီး ရရှိခဲ့ခြင်း ဖြစ်သည်။ ကျန့်ဖုန်းက ပို၍ ရရှိသွားခြင်းသာပင်။

နတ်ဆိုးဆေးပညာရှင် အရေအတွက်မှာ အလွန်နည်းပါးပြီး ဆေးလုံးရောင်းချမှုမှာ ကုန်သွယ်ရေးစင်တာတွင် အနည်းဆုံးဖြစ်သည်။

ထို့ပြင် လင်ရှင်းသည် ဆေးပညာရှင်တစ်ဦးအနေဖြင့် ဆေးလုံးများ၏ တန်ဖိုးကို နားလည်သည်။

သူဖော်စပ်သော ကျောက်စိမ်းခန္ဓာအကာအကွယ်ဆေးလုံး တစ်လုံးလျှင် အမှတ် ရာဂဏန်းအထိ ရောင်းရပြီး အမြင့်ဆုံး ၄၀၀ အထိ ပေါက်ဈေးရှိသည်။

ဝိညာဉ်အားတိုးဆေးမှာ အမှတ် ၁,၀၀၀ အထိရှိပြီး ဝိညာဉ်ပြည့်လည်ဖြည့်တင်းဆေးလုံးမှာလည်း ၆၀၀ အထိ ရှိသည်။

လင်ရှင်း၏ ဆေးလုံးများမှာ အဆင့် ၄ နှင့် အဆင့် ၅ အနည်းငယ်သာ ဖြစ်သည်။ ထို့ကြောင့် ကျန့်ဖုန်း၏ ဆေးလုံးမှာ အမှန်တကယ်ပင် ဈေးအလွန်ချိုသာစွာ ရောင်းချပေးခြင်း ဖြစ်သည်။

ထိုသို့ ဈေးချိုရခြင်းမှာ လူသား နတ်ဆိုးအမဲလိုက်သမားများ အချင်းချင်းဖြစ်ခြင်းနှင့် လူသားနှင့် နတ်ဆိုးမျိုးနွယ်ကြားရှိ အင်အားကွာဟချက် ကြီးမားနေခြင်းတို့ကြောင့်လည်း ဖြစ်သည်။

မည်သို့ပင်ဆိုစေ ကျန့်ဖုန်းအနေဖြင့် ဆေးဖော်ရန် အပင်ပန်းခံစရာ မလိုပေ။ သူသည် ဆေးဖိုထဲသို့ ပစ္စည်းများ ပစ်ထည့်လိုက်ရုံဖြင့် တစ်ရက်အတွင်း ပြီးစီးသွားမည်ဖြစ်သည်။

လမ်းတွင် ကျန်းရှင်းရန်က မမေးဘဲ မနေနိုင်တော့သည့်အတွက် မေးလိုက်သည်။

"ကျန့်ဖုန်း... ရှင့်ရဲ့ နတ်ဆိုးဆေးပညာရှင် သူငယ်ချင်းက ဘယ်သူလဲ၊ ကျွန်မ တစ်ခါမှ မတွေ့ဖူးပါဘူး၊ ပြီးတော့ ရှင်တို့က ဘယ်လို ဆက်သွယ်ကြတာလဲ"

ကျန့်ဖုန်းက အကျယ်ကြီး ရယ်မောလိုက်သော်လည်း ဘာမှ မပြောပေ။

"ကျွန်မ သိပြီ ရှင့်ရဲ့ နတ်ဆိုးဆေးပညာရှင် သူငယ်ချင်းဆိုတာ တကယ်တော့ ရှင်ကိုယ်တိုင်ပဲ မဟုတ်လား"

ကျန်းရှင်းရန်သည် ဘေးပတ်ပတ်လည်တွင် လူမရှိသည်ကို မြင်သောအခါ ကျန့်ဖုန်း၏ နားနားသို့ ကပ်ကာ တိုးတိုးလေး ကပ်ပြောလိုက်သည်။

ကျန့်ဖုန်းသည် သူ၏ နားတွင် ယားကျိကျိ ဖြစ်သွားသလို ခံစားရသည်။ သူသည် ကျန်းရှင်းရန်၏ သွယ်လျသော ခါးလေးကို ဖက်ကာ သူမ၏ နှာတံလေးကို အသာအယာ ဆိတ်လိုက်သည်။

"မင်းက အများကြီး သိလွန်းနေပြီ"

ကျန့်ဖုန်းက ဟန်လုပ်ကာ ပြောလိုက်သည်။

"ရှင်က ဖုံးကွယ်ဖို့တောင် မကြိုးစားတာပဲ၊ သိဖို့က အရမ်းလွယ်ပါတယ်"

ကျန်းရှင်းရန်က နှာခေါင်းလေးရှုံ့ကာ ပြောသည်။

"နှစ်ပေါင်းများစွာ ဖုံးကွယ်လာခဲ့တဲ့ ငါ့ရဲ့ နတ်ဆိုးဆေးပညာရှင် အဆင့်အတန်းကို မင်းက ဖော်ထုတ်လိုက်လိမ့်မယ်လို့ ငါ မထင်ထားဘူး။ လျှို့ဝှက်ချက်ကို ထိန်းသိမ်းဖို့အတွက် ငါ့ကို အပြစ်မတင်နဲ့တော့၊ ငါကတော့..."

ကျန့်ဖုန်း၏ မျက်နှာမှာ အန္တရာယ်ရှိသော အမူအရာ ပေါ်လာသည်။

သို့သော် ကျန်းရှင်းရန်မှာ မကြောက်ပေ။ သူမက ခေါင်းမော့ကာ မေးသည်။

"ရှင်က ဘာလုပ်နိုင်မှာမို့လို့လဲ"

"ငါက မင်းကို စားပစ်ရုံပဲ ရှိတာပေါ့"

ကျန့်ဖုန်းက လက်ဝှေ့ယမ်းလိုက်ရာ အသံလုံပြီး အပြင်လူ မမြင်နိုင်သော မြင့်မြတ်အလင်းဒိုင်းတစ်ခု ချက်ချင်း ထွက်ပေါ်လာသည်။ ထို့နောက် သူသည် ခေါင်းငုံ့ကာ နူးညံ့နွေးထွေးသော အရာတစ်ခုကို ထိတွေ့လိုက်တော့သည်။

အတော်ကြာပြီးနောက် ကျန့်ဖုန်းသည် ဒိုင်းကို ဖယ်ရှားလိုက်ပြီး ရှေ့သို့ လှမ်းလာခဲ့သည်။ သူ၏ နောက်ကွယ်တွင် ကျန်းရှင်းရန်၏ လှပသော မျက်နှာလေးမှာ နီမြန်းနေပြီး သူမ၏ ခြေထောက်များမှာ ပျော့ခွေနေသလို ခံစားရသည်။ သူမသည် ရှက်ရွံ့မှုများဖြင့် ပြည့်နှက်နေပြီး ကျန့်ဖုန်းနောက်သို့ အမြန်လိုက်ကာ သူ၏ ခါးကို အားရပါးရ ဆိတ်လိုက်သည်။

ကံမကောင်းစွာဖြင့် ကျန့်ဖုန်း၏ ပြင်ပဝိညာဉ်စွမ်းအားမှာ ၇,၀၀၀ ကျော်အထိ ရှိနေသဖြင့် သာမန် ခမ်းနားထည်ဝါသောအဆင့် ပစ္စည်းများပင်လျှင် သူ၏ ကာကွယ်ရေးကို ဖောက်ရန် ခက်ခဲလှသည်။ ကျန်းရှင်းရန်မှာ သူ့ကို လုံးဝ ဆိတ်၍ မရပေ။

"အရမ်း ချိုတာပဲ"

ကျန့်ဖုန်းက သူ့ဘာသာ ပြောသလို ပြောလိုက်သော်လည်း ကျန်းရှင်းရန် ကြားသွားသည်။ သူမက ကျန့်ဖုန်း၏ လက်မောင်းကို အားရပါးရ ကိုက်ပစ်လိုက်ရာ သူမ၏ သွားများပင် ကျိုးလုနီးပါး ဖြစ်သွားသည်။

"မင်းကတော့ တကယ်ကို ဆိုးတာပဲ"

အခန်း (၁၅၇) - ဒီကလေးက လိမ္မာလို့ တော်သေးတာပေါ့ (၁)

အနီးအနားရှိ လူများသည် သူတို့နှစ်ဦး၏ ရင်းနှီးကျွမ်းဝင်သော မြင်ကွင်းကို ကြည့်ကာ နားလည်မှုရှိရှိ ပြုံးလိုက်ကြသည်။ သေချာသည်မှာ အချို့သော လူပျိုကြီးများအတွက်မူ ဤမြင်ကွင်းမှာ အတော်လေး ထိခိုက်မှု ပြင်းထန်လှသည်။

ကျန့်ဖုန်းသည် ကျန်းရှင်းရန်ကို တာဝန်မျှော်စင်သို့ ခေါ်လာခဲ့သည်။ သူသည် ထိုနေရာတွင် တာဝန်အချို့ကို တင်လိုခြင်း ဖြစ်သည်။ ခဏတာ ဆော့ကစားခဲ့သော ကျန်းရှင်းရန်မှာ ယခုအခါ ကျန့်ဖုန်းနောက်သို့ လိမ္မာယဉ်ကျေးစွာ လိုက်ပါလာပြီး သူမ၏ မျက်လုံးများတွင် နူးညံ့သော ချစ်ခင်မြတ်နိုးမှုများ ပြည့်နှက်နေသည်။

ယခင်က ဖြစ်ပျက်ခဲ့သော အဖြစ်အပျက်မှာ သူ့ကို စိတ်ကူးစိတ်သန်းအချို့ ပေးခဲ့သည်။ လက်ရှိတွင် ဗိုလ် အဆင့် နံပါတ် ၂၁ နတ်ဆိုးအမဲလိုက်အဖွဲ့ ၏ အဖွဲ့ဝင်အားလုံးသည် ပြင်ပဝိညာဉ်စွမ်းအား ၁,၀၀၀ ကျော်လွန်နေပြီဖြစ်ရာ အဆင့် ၇ သို့မဟုတ် ထို့ထက်မြင့်သော ကိုယ်ခန္ဓာအားတိုးဆေးလုံးများ လိုအပ်နေပြီဖြစ်သည်။

သူတို့အဖွဲ့သည် အဆင့် ၇ နတ်ဆိုးများကို အမဲလိုက်ခဲသဖြင့် တာဝန်များကို တိုက်ရိုက်ထုတ်ပြန်ပေးခြင်းက ပိုကောင်းပေလိမ့်မည်။ အဆင့်မြင့် နတ်ဆိုးများကို အမဲလိုက်မည့် အစွမ်းထက်သော နတ်ဆိုးအမဲလိုက်အဖွဲ့များစွာ ရှိနေသည် မဟုတ်ပါလား။

ကျန့်ဖုန်းသည် တာဝန်မျှော်စင်မှ ဝန်ထမ်းတစ်ဦးကို ရှာဖွေတွေ့ရှိခဲ့ပြီး ရင်းနှီးစွာ ဆွေးနွေးပြီးနောက် နတ်ဆိုးအမဲလိုက် တာဝန်မျှော်စင်သည် သူ့အတွက် တာဝန်များကို တင်ပေးရန် သဘောတူခဲ့သည်။

သေချာသည်မှာ ထိုတာဝန်များသည် သတ်ဖြတ်ခြင်းမစ်ရှင်များသာ ဖြစ်သည်။ သတ်ဖြတ်ခြင်းမစ်ရှင်များသည်သာ အချိန်နှင့် နေရာကို ထည့်သွင်းစဉ်းစားရန် မလိုဘဲ ထုတ်ပြန်နိုင်သည်။

ကျန့်ဖုန်းနှင့် လုံဟောက်ချန်၏ အဖွဲ့များ ယခင်က လက်ခံခဲ့သော စူးစမ်းရှာဖွေရေး မစ်ရှင်များကဲ့သို့ မစ်ရှင်မျိုးများသည် ယေဘုယျအားဖြင့် တာဝန်မျှော်စင်က အခက်အခဲအဆင့်ကို ကြိုတင်သတ်မှတ်ထားရန် လိုအပ်ပြီး သက်ဆိုင်ရာ အဆင့်အတန်းရှိသော အဖွဲ့များထံသို့ တာဝန်ပေးအပ်ရခြင်း ဖြစ်သည်။ ထို့အပြင် တာဝန်မျှော်စင်သည် တာဝန်ဆုကြေးအဖြစ် ရရှိမည့် ဂုဏ်ထူးဆောင်အမှတ်များ၏ ၁၀ ရာခိုင်နှုန်းကို လုပ်အားခအဖြစ် နုတ်ယူရန် လိုအပ်သည်။

ဆိုလိုသည်မှာ ကျန့်ဖုန်းတင်လိုက်သော တာဝန်များအတွက် ၎င်းကို ပြီးမြောက်အောင် ဆောင်ရွက်သည့် နတ်ဆိုးအမဲလိုက်အဖွဲ့များကို ဆုကြေးပေးရရုံသာမက တာဝန်မျှော်စင်သို့လည်း ၁၀ ရာခိုင်နှုန်း ပေးဆောင်ရမည် ဖြစ်သည်။

သို့သော် ဤအရာများသည် ကျန့်ဖုန်းအတွက် အသေးအဖွဲ ကိစ္စများသာ ဖြစ်သည်။ အဘယ်ကြောင့်ဆိုသော် နတ်ဆိုးအမဲလိုက်အဖွဲ့များနှင့် တာဝန်မျှော်စင်တို့သည် အမှတ်များစွာ ရရှိနိုင်သော်လည်း သူကိုယ်တိုင်မှာမူ ရှုံးဆုံးမည် မဟုတ်ဘဲ ပို၍ပင် ရရှိနိုင်သောကြောင့် ဖြစ်သည်။

မကြာမီ တာဝန်မျှော်စင်၏ မှော်ကျောက်စာဘုတ်ပြားပေါ်တွင် သတ်ဖြတ်ခြင်းမစ်ရှင် ကြေညာချက်အချို့ ပေါ်လာခဲ့သည်။

သတ်ဖြတ်ခြင်းမစ်ရှင်: အဆင့် ၅ နတ်ဆိုးမျိုးနွယ်စုဝင်များကို အမဲလိုက်ရန်၊ နတ်ဆိုးအလောင်းများနှင့် နတ်ဆိုးအမြုတေများကို စုဆောင်းရန်။ အရေအတွက် အကန့်အသတ်မရှိ။

တာဝန်ဆုကြေး: အဆင့် ၅ နတ်ဆိုးအလောင်း သို့မဟုတ် အမြုတေ အရေအတွက် N၊ ဂုဏ်ထူးဆောင်အမှတ် ဆုကြေး ၅၀ x N။

ယေဘုယျအားဖြင့် ပြောရလျှင် အဆင့် ၅ နတ်ဆိုးတစ်ကောင်သည် ဂုဏ်ထူးဆောင်အမှတ် ၁၀ မှ ၂၀ အထိ တန်ဖိုးရှိသည်။ အလောင်းနှင့် အမြုတေ အပါအဝင်ဆိုလျှင်ပင် အများဆုံး ၅၀ အောက်သာ ရှိပေလိမ့်မည်။ သို့သော် ကျန့်ဖုန်းတင်လိုက်သော တာဝန်မှာ ဆုကြေးကို နှစ်ဆကျော် တိုက်ရိုက် တိုးမြှင့်ပေးလိုက်ခြင်း ဖြစ်သည်။

နတ်ဆိုးများကို အမဲလိုက်ခြင်းမှ ရရှိသော ဂုဏ်ထူးဆောင်အမှတ်များကို နတ်ဆိုးအမဲလိုက်အဖွဲ့သို့ တိုက်ရိုက် ဆုချီးမြှင့်ခြင်းဖြစ်ပြီး၊ နတ်ဆိုးအလောင်းနှင့် အမြုတေများကို စုဆောင်းခြင်းက ပိုမိုများပြားသော အမှတ်များကို ရရှိစေနိုင်သဖြင့် ဤကဲ့သို့သော တာဝန်များသည် နတ်ဆိုးအမဲလိုက်အဖွဲ့များစွာကို ဆွဲဆောင်နိုင်မည်မှာ သေချာသည်။

ကျန့်ဖုန်းအတွက်မူ အဆင့် ၅ နတ်ဆိုးအလောင်းတစ်လောင်းကို အဆင့် ၅ ကိုယ်ခန္ဓာအားတိုးဆေးလုံး ၁၀ လုံးအဖြစ် ဖော်စပ်နိုင်ပြီး ဂုဏ်ထူးဆောင်အမှတ် ၁,၀၀၀ ခန့် တန်ဖိုးရှိသည်။ အနည်းငယ် နာကျင်ဖွယ် ဖြစ်သော်လည်း သူသည် အမှတ် ၉၀၀ ကို အသားတင် အမြတ်ရရှိနေသည်ဟု ဆိုရမည်။

သတ်ဖြတ်ခြင်းမစ်ရှင်: အဆင့် ၆ နတ်ဆိုးကို အမဲလိုက်ရန်... ဆုကြေး ၅၀၀ x N။

သတ်ဖြတ်ခြင်းမစ်ရှင်: အဆင့် ၇ နတ်ဆိုးကို အမဲလိုက်ရန်... ဆုကြေး ၅,၀၀၀ x N။

သတ်ဖြတ်ခြင်းမစ်ရှင်: အဆင့် ၈ နတ်ဆိုးကို အမဲလိုက်ရန်... ဆုကြေး ၂၀,၀၀၀ x N။

သတ်ဖြတ်ခြင်းမစ်ရှင်: အဆင့် ၉ နတ်ဆိုးကို အမဲလိုက်ရန်... ဆုကြေး ၁၀၀,၀၀၀ x N။

ဤအရာသည် ဂုဏ်ထူးဆောင်အမှတ်များ ဖောင်းပွမှုကို ဖြစ်ပေါ်စေနိုင်ပြီး အခြားသော တာဝန်အမျိုးအစားများ ထုတ်ပြန်ခြင်းကို ထိခိုက်စေနိုင်သည်။ သို့သော် မဟာမိတ်အဖွဲ့၏ အထက်လူကြီးများထံ တင်ပြပြီးနောက် တာဝန်မျှော်စင် ဝန်ထမ်းများသည် ကိုယ်ခန္ဓာအားတိုးဆေးလုံးများသည် ကျွမ်းကျင်သူများ၏ အလုံးစုံအစွမ်းကို မြှင့်တင်ပေးနိုင်ပြီး နတ်ဆိုးအမဲလိုက်သမားများ၏ တိုက်ခိုက်ရေးစွမ်းရည်ကို သိသိသာသာ တိုးတက်စေသည်ဟု ကောက်ချက်ချခဲ့ကြသည်။ ထို့ကြောင့် သူတို့သည် တာဝန်များကို ထုတ်ပြန်ခွင့် ပြုခဲ့ကြသည်။

ဤနည်းအားဖြင့် ဗိုလ်အဆင့် နံပါတ် ၂၁ အဖွဲ့သည် အပြင်ထွက်၍ တာဝန်များ မဆောင်ရွက်ဘဲနှင့်ပင် ဂုဏ်ထူးဆောင်အမှတ်များကို အဆက်မပြတ် ရရှိနေတော့မည် ဖြစ်သည်။

ကိုယ်ခန္ဓာအားတိုးဆေးလုံးများမှ ရရှိလာသော ကြီးမားသော ဂုဏ်ထူးဆောင်အမှတ် ဝင်ငွေမှာ ကျန့်ဖုန်းအနေဖြင့် သူ၏ အဖော်များကို အတူတကွ ကြီးထွားလာစေရန် ဦးဆောင်နိုင်မည်ဟု ယုံကြည်မှုရှိရခြင်း၏ အကြောင်းရင်းလည်း ဖြစ်သည်။ သို့မဟုတ်ပါက သူ၏ တိုးတက်မှုနှုန်းအရ တစ်ကိုယ်တော် သွားခြင်းက အကောင်းဆုံး ရွေးချယ်မှု ဖြစ်ပေလိမ့်မည်။

အလုပ်များသော နံနက်ခင်းတစ်ခု ပြီးဆုံးပြီးနောက် ကျန့်ဖုန်းသည် ကျန်းရှင်းရန်ကို မြို့တော်ရှိ ခမ်းနားထည်ဝါသော ဟိုတယ်တစ်ခုသို့ နေ့လယ်စာ ကျွေးရန် ခေါ်ဆောင်သွားခဲ့ပြီး၊ ထို့နောက် မြို့တော်အတွင်း အတော်ကြာ လည်ပတ်ခဲ့ကြကာ ညမမှောင်မီ ဗီလာသို့ ပြန်လာခဲ့ကြသည်။

သူတို့နှစ်ဦးမှာ မကြာသေးမီကမှ သူတို့၏ ဆက်ဆံရေးကို အတည်ပြုခဲ့ကြခြင်း ဖြစ်ပြီး နတ်ဆိုးအမဲလိုက်သမားများ ဖြစ်ကြသည့်အလျောက် နှစ်ယောက်တည်း အချိန်ဖြုန်းရန် အခွင့်အရေး သိပ်မရှိကြပေ။ ထို့ကြောင့် ကျန့်ဖုန်းနှင့် ကျန်းရှင်းရန်တို့ နှစ်ယောက်တည်း ရှိချိန်တိုင်းတွင် သူတို့သည် ထိုအချိန်ကို အလွန်အမင်း တန်ဖိုးထားကြသည်။

နောက်ပိုင်းကာလများတွင် ကျန့်ဖုန်းသည် ကျန်ရှိနေသော အဆင့် ၇ နတ်ဆိုးအလောင်း လေးလောင်းကို အဆင့် ၇ ကိုယ်ခန္ဓာအားတိုးဆေးလုံး ၄၀ အဖြစ် ဖော်စပ်ခဲ့ပြီး သူ၏ အဖော်များကို တစ်ဦးလျှင် ၈ လုံးစီ ခွဲဝေပေးခဲ့သည်။ အဆင့် ၇ ဆေးလုံးများသည် ကျွမ်းကျင်သူတစ်ဦး၏ ပြင်ပဝိညာဉ်စွမ်းအားကို ၃၀၀ ခန့် တိုးမြှင့်ပေးနိုင်ပြီး အသုံးပြုရန် ကန့်သတ်ချက်မရှိသဖြင့် အကြိမ်ကြိမ် အသုံးပြုနိုင်သည်။ သေချာသည်မှာ အသုံးပြုပြီးနောက်တွင် ဆေးယဉ်ပါးမှု အတိုင်းအတာတစ်ခုအထိ ဖြစ်ပေါ်လာနိုင်ပြီး နောက်ပိုင်း အာနိသင်များမှာ အားနည်းသွားနိုင်သည်။ သို့သော် မည်သို့ပင်ဖြစ်စေ အဆင့် ၇ ဆေးလုံး၏ အစွမ်းမှာ အလွန်ပင် ထူးခြားဆဲ ဖြစ်သည်။

မကြာမီ ရက်ပေါင်း ၂၀ ကုန်ဆုံးသွားခဲ့ပြီး ကျန့်ဖုန်းနှင့် သူ၏ အဖော်များ သဘောတူထားသော တစ်လတာ အချိန်ကာလမှာလည်း ရောက်ရှိလာခဲ့သည်။

ကျန့်ဖုန်းသည် သူ၏ အဖော်များအားလုံးကို ဗီလာ၏ ပထမထပ် ဧည့်ခန်းတွင် စုဝေးစေခဲ့သည်။ တစ်လတာ သီးသန့်ကျင့်ကြံပြီးနောက် သူ၏ အဖော်များ၏ အရှိန်အဝါမှာ သိသိသာသာ တိုးတက်လာသည်ကို မြင်ရသဖြင့် ကျန့်ဖုန်းက ကျေနပ်စွာ ခေါင်းညိတ်လိုက်ပြီး ပြောသည်။

"အခု လူတိုင်း ဘယ်လောက်အထိ တိုးတက်လာလဲဆိုတာ ကြည့်ရအောင်"

ကျန့်ဖုန်းသည် အတွင်းဝိညာဉ်စွမ်းအား စမ်းသပ်သည့် ကျောက်မျက်ကို ထုတ်ယူကာ သူ၏ အဖော်များ၏ အတွင်းဝိညာဉ်စွမ်းအားကို ဦးစွာ တိုင်းတာပေးခဲ့သည်။ သေချာပေါက် ကျန့်ဖုန်းကိုယ်တိုင်လည်း စမ်းသပ်ရန် လိုအပ်သည်။

မကြာမီ စမ်းသပ်မှုရလဒ်များ ထွက်ပေါ်လာခဲ့ပြီး အတွင်းဝိညာဉ်စွမ်းအားကို အမြင့်ဆုံးမှ အနိမ့်ဆုံးသို့ အဆင့်သတ်မှတ်လိုက်သည်။ ပုံမှန်အတိုင်းပင် ကျန့်ဖုန်းသည် အမြင့်ဆုံး အတွင်းဝိညာဉ်စွမ်းအားကို ပိုင်ဆိုင်ထားသည်။

၅,၈၆၀။ ဤသည်မှာ ကျန့်ဖုန်း၏ အတွင်းဝိညာဉ်စွမ်းအား ဖြစ်သည်။ မြင့်မြတ်ဝိညာဉ်ဆေးလုံးမှတစ်ဆင့် ၁,၀၀၀ တိုးမြှင့်ပြီးနောက် သူသည် ကျင့်ကြံခြင်းကိုသာ အပြည့်အဝ အာရုံမစိုက်ဘဲ သူပိုင်ဆိုင်ထားသော စွမ်းရည်များကို အစဉ်တစိုက် နားလည်သဘောပေါက်အောင် ကြိုးစားခဲ့သည်။

ဤတစ်လအတွင်း သူသည် သူ၏ စွမ်းရည်အားလုံးအပေါ် နားလည်မှုကို အထွတ်အထိပ်အဆင့်သို့ မြှင့်တင်နိုင်ခဲ့သည်။ တူညီသော နယ်ပယ်ရှိသူများကြားတွင် တူညီသော စွမ်းရည်ကို အသုံးပြုမည်ဆိုပါက မည်သူ၏ ကျွမ်းကျင်မှုနှင့် လုပ်ဆောင်နိုင်စွမ်းကမျှ သူ့ကို ကျော်ဖြတ်နိုင်မည် မဟုတ် ဆိုနိုင်သည်။

ဤအရာသည် ကျန့်ဖုန်း၏ အတွင်းဝိညာဉ်စွမ်းအား အလွန်အမင်း မြန်မြန်ဆန်ဆန် တိုးမလာရခြင်း၏ အဓိက အကြောင်းရင်းလည်း ဖြစ်သည်။ သို့သော် ထိုသို့ဖြစ်လင့်ကစား သူသည် သူ၏ အဖော်များထက် များစွာ ရှေ့ရောက်နေဆဲ ဖြစ်သည်။

ဝမ်မင်သည် အတွင်းဝိညာဉ်စွမ်းအား ဒုတိယ အဆင့်တွင် ရှိသည်။ မြင့်မြတ်ဝိညာဉ်ဆေးလုံးကို သောက်သုံးပြီး တစ်လတာ ပြင်းပြင်းထန်ထန် ကျင့်ကြံပြီးနောက် သူ၏ အတွင်းဝိညာဉ်စွမ်းအားမှာ ၃,၉၅၀သို့ ရောက်ရှိခဲ့ကာ ကျင့်ကြံမှုမှာ အဆင့် ၅ အထွတ်အထိပ်သို့ ရောက်ရှိခဲ့သည်။

ဖန်းလီမှာ တတိယဖြစ်ပြီး အတွင်းဝိညာဉ်စွမ်းအား ၃,၉၁၂ သို့ ရောက်ရှိခဲ့ရာ ဝမ်မင်နှင့် သိပ်မကွာခြားဘဲ ကွာဟချက်မှာ အဆက်မပြတ် ကျုံ့ဝင်လာနေသည်။ ဖန်းလီသည် မွေးရာပါ အတွင်းဝိညာဉ်စွမ်းအား ၈၅ ရှိသူဖြစ်ရာ ကျန့်ဖုန်းမှလွဲလျှင် နံပါတ် ၂၁ အဖွဲ့တွင် ကျင့်ကြံမှု ပါရမီအမြင့်ဆုံးသူ ဖြစ်သည်။

ကျန်းရှင်းရန်မှာ စတုတ္ထဖြစ်သည်။ သူမ၏ အမြဲတစေ ကြိုးစားအားထုတ်မှုကြောင့် အတွင်းဝိညာဉ်စွမ်းအားမှာ သိသိသာသာ တိုးတက်လာခဲ့ပြီး လွန်ခဲ့သော ရက် ၂၀ ကထက် ပိုမိုများပြားလာသည်ကို တွေ့ရသည်။ လွန်ခဲ့သော ရက် ၂၀ က ကျန်းရှင်းရန်၏ အတွင်းဝိညာဉ်စွမ်းအားမှာ ၃,၇၄၅ ဖြစ်ပြီး ယခုအခါ ၃,၈၂၇ သို့ ရောက်ရှိခဲ့ကာ သူမသည်လည်း အဆင့် ၅၊ ဒဿမအဆင့် မှော်ဆရာ ဖြစ်လာခဲ့သည်။

မုရုံရှန်းအာမှာ ပဉ္စမဖြစ်သည်။ သူမ၏ အလင်းဒြပ်စင်ဝိညာဉ် ဆင့်ကဲပြောင်းလဲမှုမှတစ်ဆင့် မွေးရာပါ အတွင်းဝိညာဉ်စွမ်းအား တိုးလာပြီးနောက် ကျင့်ကြံမှုပါရမီမှာ များစွာ တိုးတက်လာခဲ့သည်။ ဤတိုင်းတာမှုရလဒ်သည် ကျန့်ဖုန်းကိုပင် အံ့အားသင့်စေခဲ့သည်။

နတ်ဆိုးနှင်ခံတပ်တွင် ရှိစဉ်က သူမ၏ အတွင်းဝိညာဉ်စွမ်းအားမှာ ၂,၀၅၃ သာ ရှိသော်လည်း ယခုအခါ ၃,၅၃၈ ဖြစ်နေပြီ ဖြစ်သည်။ ဤတိုးတက်မှုနှုန်းမှာ ရိုးရိုးလေးနှင့် အံ့သြဖွယ်ကောင်းလှပြီး လုံဟောက်ချန်၏ အဖော်များကိုပင် သေချာပေါက် ကျော်လွန်နေပြီ ဖြစ်သည်။

ဝတုတ်လေး ယောင်လီမှာ အမြဲတမ်း နောက်ဆုံးတွင် ရှိနေသည်။ သူ၏ မွေးရာပါ အတွင်းဝိညာဉ်စွမ်းအားမှာ ၇၀ ဖြစ်သဖြင့် အဖွဲ့အတွင်း အားနည်းသော တည်ရှိမှုတစ်ခုဟု ဆိုနိုင်ပြီး၊ မုရုံရှန်းအာကဲ့သို့ သူ့တွင် ကူညီပေးမည့် အလင်းဒြပ်စင်ဝိညာဉ် မရှိသဖြင့် သူ့ကိုယ်သူသာ လုံးလုံးလျားလျား အားကိုးနေရသည်။ သို့သော် ယောင်လီ၏ တိုးတက်မှုမှာလည်း အတော်လေး များပြားဆဲ ဖြစ်သည်။ ခံတပ်တွင် ၂,၀၁၄ သာ ရှိခဲ့သော်လည်း ယခုအခါ ၃,၃၀၀ ကျော်နေပြီ ဖြစ်သည်။

ပြင်ပဝိညာဉ်စွမ်းအားနှင့် ပတ်သက်၍မူ အဆင့်သတ်မှတ်ချက်မှာ အမြင့်ဆုံးမှ အနိမ့်ဆုံးအတိုင်းပင် ဖြစ်ပြီး ကျန့်ဖုန်းသည် သူ၏ ပြင်ပဝိညာဉ်စွမ်းအားကို ပထမဆုံးအကြိမ် ထုတ်ဖော်ပြသခဲ့သည်။

အခန်း (၁၅၈) - ဒီကလေးက လိမ္မာလို့ တော်သေးတာပေါ့ (၂)

၇,၃၄၀။

ဤကိန်းဂဏန်းမှာ စမ်းသပ်သည့် ကျောက်မျက်ပေါ်တွင် ပေါ်လာသောအခါ ဗီလာတစ်ခုလုံးမှာ အပ်ကျသံပင် ကြားရနိုင်သည်အထိ ကြောက်မက်ဖွယ်ကောင်းလောက်အောင် တိတ်ဆိတ်သွားခဲ့သည်။

"ဟူး..."

လူတိုင်း အသက်ရှူမှားသွားကြပြီး သူတို့၏ တုန်လှုပ်မှုမှာ စကားလုံးဖြင့် ဖော်ပြ၍မရနိုင်အောင်ပင်။ ဤသည်မှာ အဘယ်ကြောင့် ခေါင်းဆောင်က သံချပ်ကာ ဝတ်ဆင်ရန် အမြဲတမ်း ငြင်းပယ်ခဲ့ရခြင်း၏ အကြောင်းရင်းပေလော။ တုန်လှုပ်စရာ၊ ကြောက်မက်ဖွယ်ရာ ဖြစ်ပြီး လုံးဝပင် မကြားဖူးခဲ့ချေ။

ဝတုတ်လေး ယောင်လီမှာ တုန်ရင်နေသော အသံဖြင့်ပင် အော်ဟစ်လိုက်သည်။

"ဘော့စ်... ဘော့စ်သာ ကျွန်တော့်ရှေ့မှာ ရပ်မနေဘူးဆိုရင် ဘော့စ်က လူအဖြစ် ပြောင်းလဲထားတဲ့ နဂါးတစ်ကောင်လို့ ကျွန်တော် တကယ် သံသယဝင်မိမှာပဲ"

ကျန်းရှင်းရန်သည် ဤကိန်းဂဏန်းကို ကြည့်ကာ သွားကိုက်သလို ခံစားလိုက်ရသည်။ အလွန်အမင်း မာကျောလှသဖြင့် သူမ သူ့ကို ကိုက်၍ မရခြင်းမှာ မဆန်းတော့ပေ။

"ခေါင်းဆောင်... နတ်ဆိုးအမဲလိုက်အဖွဲ့ ရွေးချယ်ပွဲတုန်းက ခေါင်းဆောင်ရဲ့ ပြင်ပဝိညာဉ်စွမ်းအားက ဘယ်လောက်လဲ" ဝမ်မင်က မေးလိုက်သည်။

ကျန့်ဖုန်းသည် ဤတစ်ကြိမ်တွင် ဖုံးကွယ်ထားရန် ရည်ရွယ်ချက်မရှိဘဲ တိုက်ရိုက်ပြောလိုက်သည်။

"၃,၀၀၀ ဝန်းကျင်ပါ"

"..."

လူတိုင်း ဆွံ့အသွားကြသည်။ သူသည် အဘယ်ကြောင့် ဒဏ်ရာမရနိုင်ရခြင်းကို ယခုမှ သိတော့သည်။ ပြင်ပဝိညာဉ်စွမ်းအားတစ်ခုတည်းကို အခြေခံလျှင်ပင် ကျန့်ဖုန်း၏ အစွမ်းမှာ မျိုးဆက်သစ်လူငယ်များအကြား အားအကောင်းဆုံးစာရင်းတွင် ပါဝင်နေပြီဖြစ်သည်။ သူ၏ အံ့မခန်း အတွင်းဝိညာဉ်စွမ်းအားနှင့် ပေါင်းစပ်လိုက်လျှင် ကျန့်ဖုန်း၏ အောင်ပွဲမှာ လုံးဝကို သံသယဖြစ်စရာ မရှိတော့ပေ။

"မဆန်းပါဘူး၊ မဆန်းပါဘူး"

ကျန့်ဖုန်း၏ ပြင်ပဝိညာဉ်စွမ်းအားကို သိရှိပြီးနောက် ဝမ်မင်သည် ကျန့်ဖုန်းက သူ၏ မင်ဝမ်အမြောက်ကို အဘယ်ကြောင့် တည်ငြိမ်စွာဖြင့် ထိပ်တိုက်ရင်ဆိုင်နိုင်ခဲ့ကြောင်းကို နောက်ဆုံးတွင် သဘောပေါက်သွားခဲ့သည်။

"မင်ဝမ်အမြောက်က တကယ်ကို အားကောင်းပါတယ်၊ ငါ့ကိုတောင် နာကျင်စေလုနီးပါး ဖြစ်သွားစေခဲ့တယ်"

ကျန့်ဖုန်းက ပြောသည်။ ယခုအခါ အားလုံးသည် အဖော်များဖြစ်ကြပြီး ကျောချင်းကပ် ယုံကြည်ရသူများ ဖြစ်ကြသဖြင့် ကျန့်ဖုန်း၏ နောက်ပြောင်မှုကို အားလုံးက ရယ်မောလိုက်ကြပြီး ဝမ်မင်ကလည်း စိတ်ထဲမထားတော့ပေ။

"ခေါင်းဆောင်... ခေါင်းဆောင်က တကယ်ကို ပုံမှန်မဟုတ်ဘူး"

ဝမ်မင်သည် ကျန့်ဖုန်း၏ အစွမ်းကို တုန်လှုပ်နေစဉ်တွင် သူနှင့် ကျန့်ဖုန်းကြားရှိ ကွာဟချက်မှာ မည်မျှ ကြီးမားကြောင်းကိုလည်း သဘောပေါက်သွားခဲ့သည်။ အကယ်၍ ကျန့်ဖုန်း ထောက်ပံ့ပေးသော ကိုယ်ခန္ဓာအားတိုးဆေးလုံးများသာ မရှိပါက သူ၏ ပြင်ပဝိညာဉ်စွမ်းအားမှာ ယခုအချိန်အထိ ၁,၀၀၀ ပြည့်ရန်ပင် ခက်ခဲပေလိမ့်မည်။ မုရုံရှန်းအာ၊ ဖန်းလီနှင့် အခြားသူများအားလုံးကလည်း သဘောတူသည့်အနေဖြင့် ခေါင်းညိတ်လိုက်ကြသည်။

ကျန့်ဖုန်းက ပြုံးပြီး ပြောလိုက်သည်။

"သေချာ ကျင့်ကြံကြ၊ ကိုယ်ခန္ဓာအားတိုးဆေးလုံးတွေက ထပ်ရှိဦးမှာ၊ မင်းတို့ရဲ့ ပြင်ပဝိညာဉ်စွမ်းအားတွေလည်း တိုးတက်လာမှာပဲ"

ဝမ်မင်သည် ပြင်ပဝိညာဉ်စွမ်းအားတွင်လည်း ဒုတိယအဆင့်၌ ရှိနေသည်။ ဤကာလအတွင်း အဆင့် ၇ ဆေးလုံးများကို သောက်သုံးခြင်းဖြင့် သူ၏ ပြင်ပဝိညာဉ်စွမ်းအားမှာ ၂,၁၂၃ သို့ တိုးလာခဲ့သည်။ သေချာသည်မှာ အဆင့် ၇ ဆေးလုံးကို စုပ်ယူရန် ခက်ခဲမှုမှာ များစွာ တိုးလာခဲ့သည်။ ဝမ်မင်၏ မူလ ၁,၀၀၀ ကျော် ပြင်ပဝိညာဉ်စွမ်းအား အခြေခံပေါ်တွင်ပင် ဆေးလုံးတစ်လုံး၏ ဆေးစွမ်းကို အပြည့်အဝ စုပ်ယူရန် ၁၀ ရက်ခန့် ကြာမြင့်ခဲ့သည်။

ထို့အပြင် ကျန့်ဖုန်းနှင့် အခြားသူများ ခံတပ်အပြင်ဘက်တွင် ရိက္ခာဖြတ်တောက်ရေး တာဝန်ဆောင်ရွက်စဉ်က အဆင့် ၇ နတ်ဆိုး သွေးဆာဘီတာကို အမဲလိုက်ခဲ့ကြရာ၊ ထိုအလောင်းကို ကျန့်ဖုန်းက ဆေးလုံး ၁၀ လုံးအဖြစ် ဖော်စပ်ခဲ့သည်။ ကျန့်ဖုန်းသည် သူ၏ မရှုံးနိမ့်နိုင်သောခန္ဓာကို အဆင့်မြှင့်တင်လိုက်သဖြင့် သူ၏ ပြင်ပဝိညာဉ်စွမ်းအားမှာ ၄,၀၀၀ သို့ တိုက်ရိုက်တိုးသွားခဲ့ရာ အဆင့် ၇ ဆေးလုံးမှာ သူ့အတွက် အသုံးမဝင်တော့ပေ။ ထို့ကြောင့် ထိုဆေးလုံးများကို ဝမ်မင်နှင့် အခြားသူများအား တစ်ဦးလျှင် နှစ်လုံးစီ ခွဲဝေပေးခဲ့သည်။ ဤသည်မှာ ဝမ်မင်တွင် ယခုအခါ ၂,၁၀၀ ကျော် ပြင်ပဝိညာဉ်စွမ်းအား ရှိနေရခြင်း၏ အကြောင်းရင်းလည်း ဖြစ်သည်။

ဖန်းလီမှာ တတိယဖြစ်သည်။ သူမ၏ အထူးသဖြင့် ကိုယ်ခန္ဓာဖွဲ့စည်းပုံကြောင့် ဤမိန်းကလေးမှာ ဆေးလုံးများကို စုပ်ယူရာတွင် ပိုမိုကောင်းမွန်သော အကျိုးသက်ရောက်မှုရှိပုံရသည်။ သူမ၏ ပြင်ပဝိညာဉ်စွမ်းအားမှာ ဝမ်မင်ကို ဖြည်းဖြည်းချင်း လိုက်မီလာပြီး ၂,၁၀၀ အမှတ်သို့ ရောက်ရှိခဲ့သည်။

ထို့နောက်တွင် ကျန်းရှင်းရန်၊ ယောင်လီနှင့် မုရုံရှန်းအာတို့ ဖြစ်ကြသည်။ သူတို့၏ ပြင်ပဝိညာဉ်စွမ်းအားမှာ သိပ်မကွာခြားဘဲ အားလုံး ၂,၀၀၀ ဝန်းကျင်သို့ ရောက်ရှိခဲ့ကြသည်။ ကျန်းရှင်းရန်နှင့် မုရုံရှန်းအာတို့မှာ မှော်ဆရာမများ ဖြစ်ကြသည့်အလျောက် ဆေးလုံးများကို စုပ်ယူမှုနှုန်း သိသိသာသာ နှေးကွေးသဖြင့် သူတို့၏ ခန္ဓာကိုယ်အတွင်း ဆေးစွမ်းများ ကျန်ရှိနေသေးကာ သူတို့၏ ပြင်ပဝိညာဉ်စွမ်းအားမှာ အနည်းငယ် နောက်ကျနေခြင်း ဖြစ်သည်။

ကျန့်ဖုန်းသည် သူ၏ အဖော်များ၏ အတွင်းနှင့် ပြင်ပဝိညာဉ်စွမ်းအား တန်ဖိုးများကို မှတ်သားထားလိုက်သည်။ သူသည် စမ်းသပ်သည့် ကျောက်မျက်ကို သိမ်းဆည်းတော့မည့်အချိန်တွင် ဖန်းလီက ပြောလိုက်သည်။

"ခေါင်းဆောင်... ကျွန်မတို့ ကျန့်ဟောက်ရဲ့ ဝိညာဉ်စွမ်းအား တန်ဖိုးကိုရော မတိုင်းတာကြည့်ဘူးလား"

ဤသည်ကို ကြားသောအခါ ကျန့်ဖုန်းသည် တစ်နေ့လုံး အခန်းထဲတွင်သာ နေထိုင်ကာ ဆာလျှင် အမြုတေစား၊ ဝလျှင် အိပ်စက်နေသော ကောင်လေး ကျန့်ဟောက်ကို သူ လျစ်လျူရှုမိသွားမှန်း သတိပြုမိသွားသည်။

မည်သည့် နတ်ဆိုးသားရဲမျှ သူ့ထက် ပိုမို သက်တောင့်သက်သာရှိသော ဘဝတွင် နေထိုင်ရမည် မဟုတ်ဟု ဆိုရပေမည်။ ကျန့်ဖုန်းနှင့် အခြားသူများသည် ယခုအခါ ကျန့်ဟောက်ကို သူတို့၏ အဖော်နှင့် ညီအစ်ကိုတစ်ဦးအဖြစ် မှတ်ယူထားကြသည်။

ကျန့်ဖုန်းက စဉ်းစားလိုက်ပြီး ပြောသည်။

"အဲ့ဒါလည်း ကောင်းတာပဲ"

ကျန့်ဖုန်းကိုယ်တိုင်လည်း ကျန့်ဟောက်၏ အစွမ်းကို အတော်လေး သိချင်နေသဖြင့် ကျန့်ဟောက်၏ အခန်းသို့သွားကာ သူ့ကို ကုတင်ပေါ်မှ ဆွဲခေါ်လာခဲ့သည်။

"အစ်ကို... ဘာဖြစ်လို့လဲ"

ကျန့်ဟောက်က ဝေဝါးနေသော မျက်လုံးများဖြင့် တိုးတိုးလေး မေးလိုက်ပြီး သူ၏ တောက်ပသော ရွှေရောင်မျက်ဝန်းများမှာ ဖြည်းဖြည်းချင်း လင်းလက်လာသည်။ ကျန့်ဟောက်သည် သူ၏ အစ်ကိုကြီး၊ အစ်မကြီးများ ဝန်းရံနေသည်ကို မြင်သောအခါ အနည်းငယ် ရှက်သွားပြီး ကုတင်ပေါ်မှ အမြန်ဆင်းပြီး မတ်မတ်ရပ်လိုက်သည်။

"မင်းရဲ့ အတွင်းနဲ့ ပြင်ပဝိညာဉ်စွမ်းအားကို စမ်းသပ်ကြည့်ရအောင်"

ကျန့်ဖုန်းက ကျန့်ဟောက်၏ ရှုပ်ပွနေသော ဆံပင်များကို ဖွလိုက်ပြီး စမ်းသပ်သည့် ကျောက်မျက်ကို ပေးလိုက်သည်။

"ဪ၊ ဟုတ်ကဲ့ပါ"

ကျန့်ဟောက်သည် သူ၏ အတွင်းဝိညာဉ်စွမ်းအားကို အရင်ဆုံး စမ်းသပ်လိုက်သည်။

"၉,၉၉၉"

ဤကိန်းဂဏန်း ပေါ်လာသောအခါ ကျန့်ဖုန်းနှင့် အခြားသူများ အားလုံး တုန်လှုပ်သွားကြသည်။ အဖွဲ့အတွင်း အမြင့်ဆုံး အတွင်းဝိညာဉ်စွမ်းအား ပိုင်ရှင်မှာ ကျန့်ဖုန်း မဟုတ်ဘဲ သူ၏ အစီးအနင်းအဖော် ကျန့်ဟောက် ဖြစ်နေလိမ့်မည်ဟု သူတို့ မမျှော်လင့်ထားခဲ့ကြပေ။

၉,၉၉၉...

ဤအရာမှာ အဆင့် ၆ အထွတ်အထိပ်သို့ အပြည့်အဝ ရောက်ရှိနေခြင်း ဖြစ်သည်။ အနည်းငယ်မျှသာ ထပ်မံ တိုးတက်လိုက်ပါက သူ၏ အစွမ်းမှာ အရည်အသွေးပိုင်းဆိုင်ရာ ပြောင်းလဲမှုတစ်ခု ဖြစ်ပေါ်လာမည်ဖြစ်ပြီး အဆင့် ၈ နတ်ဆိုးသားရဲ (လူသား၏ အဆင့် ၇ ကျွမ်းကျင်သူနှင့် ညီမျှသော) အဆင့်သို့ ရောက်ရှိသွားမည် ဖြစ်သည်။

ကျန့်ဖုန်းလည်း အနည်းငယ် ဇဝေဇဝါ ဖြစ်သွားသည်။ ဤကောင်လေး၏ အစွမ်းမှာ အောင်မြင်စွာ ဆင့်ကဲပြောင်းလဲပြီးကတည်းက အဆင့် ၆ အထွတ်အထိပ်တွင် ရှိနေခဲ့ရာ၊ အမြုတေများစွာ စားသုံးပြီးသည့်တိုင် သူ၏ ဝိညာဉ်စွမ်းအားမှာ အဘယ်ကြောင့် အဆင့် ၆ အထွတ်အထိပ်တွင်သာ ရှိနေသေးသနည်း။

ကျန့်ဖုန်း၏ ဇဝေဇဝါ ဖြစ်မှုကို သိရှိသွားသကဲ့သို့ ကျန့်ဟောက်က ရှင်းပြသည်။

"အစ်ကို... ကျွန်တော် အခု စွမ်းအားတွေကို စုဆောင်းဖို့အတွက် အမြုတေတွေကို စားနေတာပါ။ ကျွန်တော့်ရဲ့ အဆင့်တက်မယ့် အတားအဆီးက တကယ်ကို ခိုင်မာလွန်းနေလို့ လုံလောက်တဲ့ စွမ်းအင်တွေ မစုဆောင်းဘဲနဲ့ အဲ့ဒီအတားအဆီးကို ဖြတ်ကျော်ဖို့ မဖြစ်နိုင်လို့ပါ"

"ဒါဆို မင်း အခု ဘယ်လောက်အထိ စုဆောင်းပြီးပြီလဲ"

ကျန့်ဖုန်းက စပ်စုကာ မေးလိုက်သည်။

"၅၀ ရာခိုင်နှုန်းလောက်"

ကျန့်ဟောက်က ရိုးသားစွာ ပြန်ဖြေသည်။

ကျန့်ဖုန်း ခေါင်းကိုက်သွားသည်။ ၅၀ ရာခိုင်နှုန်းတောင် လိုအပ်သော စွမ်းအင်မှာ အမှန်တကယ်ပင် အလွန်တရာ ကြီးမားလှသည်။ နံပါတ် ၂၁ အဖွဲ့က အမဲလိုက်ခဲ့သော နတ်ဆိုးသားရဲ အားလုံး၏ အဆင့် ၅နှင့် ထို့ထက်မြင့်သော အမြုတေအားလုံးနီးပါးမှာ ကျန့်ဟောက်၏ ဗိုက်ထဲသို့ ရောက်ရှိသွားခဲ့သည်။

သာမန်ဟု ထင်ရသော ဤဗိုက်ကလေးမှာ ဤမျှ ကြီးမားသော စွမ်းအင်များကို ထိန်းထားနိုင်ခြင်းမှာ မဆန်းတော့ပေ၊ သူ၏ တိုက်ခိုက်ရေးစွမ်းအားမှာလည်း ထို့ကြောင့် ကြောက်မက်ဖွယ်ကောင်းနေခြင်း ဖြစ်သည်။

နောက်တစ်ခုမှာ ပြင်ပဝိညာဉ်စွမ်းအား စမ်းသပ်မှုဖြစ်ပြီး ရလဒ်မှာ အတူတူပင်ဖြစ်သည်။

၉,၉၉၉။

အတွင်းနှင့် ပြင်ပဝိညာဉ်စွမ်းအား ထပ်တူကျနေခြင်းကြောင့် ကိုယ်ခန္ဓာအစွမ်းတစ်ခုတည်းကို အခြေခံလျှင်ပင် ကျန့်ဟောက်သည် နတ်ဆိုးသားရဲများအကြား အလွန်အမင်း အစွမ်းထက်သော တည်ရှိမှုတစ်ခု ဖြစ်သည်။ အတွင်းနှင့် ပြင်ပဝိညာဉ်စွမ်းအား ပေါင်းစပ်လိုက်ပါက ကျန့်ဖုန်းအနေဖြင့် ကျန့်ဟောက်နှင့် တူညီသောအဆင့်တွင် ယှဉ်နိုင်မည့် မည်သည့် နတ်ဆိုးသားရဲကိုမျှ ရှာတွေ့နိုင်မည် မဟုတ်ပေ။

ဤကဲ့သို့ ကြောက်မက်ဖွယ်ကောင်းသော အစွမ်းနှင့်ဆိုလျှင် ကျန့်ဖုန်းပင် ကျန့်ဟောက်ကို အနိုင်ယူနိုင်ပါ့မလား မသေချာတော့ပေ။ ကံကောင်းထောက်မစွာဖြင့် ဤကလေးမှာ လိမ္မာယဉ်ကျေးပြီး သူ့ကို အချိန်တိုင်း အစ်ကိုဟု ခေါ်ဆိုနေသည်။

မဟုတ်ရင်တော့...

အခန်း (၁၅၉) - ထာဝရမျှော်စင်၏ စမ်းသပ်မှုများ (၁)

ကျန့်ဖုန်း၏ ရိုက်ခတ်မှုကို ခံစားရပြီးနောက် အမှတ် ၂၁ အဖွဲ့သည် ကျန့်ဟောက်ထံမှလည်း နောက်ထပ် ရိုက်ခတ်မှုတစ်ခုကို ထပ်မံခံစားလိုက်ရပြန်သည်။ ဤလူတစ်ယောက်နှင့် နဂါးတစ်ကောင်မှာ အမှန်တကယ်ပင် ပုံမှန်မဟုတ်ကြပေ။

ဤအချိန်တွင် လူတိုင်းသည် စိတ်ထဲမှ တိတ်တဆိတ် ညည်းတွားနေကြပြီး ကြီးမားသော ဖိအားကို ခံစားနေရသည်။ သူတို့နှင့် ကျန့်ဖုန်း၊ ကျန့်ဟောက်တို့ကြားရှိ ကွာဟချက်မှာ ကြီးမားလွန်းသဖြင့် အစွမ်းထက်သော ရန်သူများနှင့် ရင်ဆိုင်ရချိန်တွင် သူတို့အနေဖြင့် အခန်းကဏ္ဍ အများကြီး မပါဝင်နိုင်ပေ။ သူတို့သည် ကျန့်ဖုန်းနှင့် ကျန့်ဟောက်တို့ အစွမ်းထက်ရန်သူများကို တိုက်ခိုက်နေသည်ကိုသာ ကြည့်နေရရုံသာ ရှိသည်။

သေချာသည်မှာ အဖွဲ့အတွင်းရှိ လူတိုင်းတွင် အစားထိုး၍မရသော ကိုယ်ပိုင်အခန်းကဏ္ဍများ ရှိကြသည်။ အကယ်၍ အဖွဲ့တွင် ကျန့်ဖုန်းနှင့် ကျန့်ဟောက် မရှိလျှင်ပင် ကျန်းရှင်းရန်နှင့် အခြားသူများ၏ အစွမ်းမှာ အတော်အတန် အားကောင်းသော နတ်ဆိုးအမဲလိုက်အဖွဲ့တစ်ခုနှင့် ယှဉ်ပြိုင်နိုင်သည်။

ကျန့်ဖုန်းနှင့် ကျန့်ဟောက်တို့မှာမူ အမှတ် ၂၁ အဖွဲ့၏ အမြင့်ဆုံး အကန့်အသတ်ကဲ့သို့ ဖြစ်နေကြသည်။ သူတို့၏ အစွမ်းက အဖွဲ့၏ နောက်ဆုံးအလားအလာကို ဆုံးဖြတ်ပေးသည်။ ကျန့်ဖုန်းနှင့် ကျန့်ဟောက်တို့ကြောင့်သာ အဖွဲ့၏ စွမ်းအားအဆင့်အတန်းမှာ အတင်းအဓမ္မ မြှင့်တင်ခြင်း ခံထားရခြင်း ဖြစ်သည်။

"အားလုံးပဲ အဆင်သင့်ပြင်ထားကြ၊ အခုကစပြီး ငါတို့ အထူးလေ့ကျင့်ရေးကို စတင်တော့မယ်"

ကျန့်ဖုန်းက အခြားသူများကို ကြည့်ကာ ပြောလိုက်သည်။

"ကောင်းပါပြီ၊ ကျွန်တော် ဒါကို စောင့်နေတာ။ ဒီတစ်လလုံးမှာ အသက်ရှူကျပ်နေတာပဲ"

ယောင်လီက စိတ်လှုပ်ရှားစွာ ပြောသည်။ အခြားသူများလည်း စမ်းသပ်ကြည့်ချင်စိတ်ဖြင့် ထက်သန်နေကြသည်။ ကျန့်ဖုန်းထံမှ ထာဝရမျှော်စင်အကြောင်း ကြားသိရပြီးကတည်းက ကျန့်ဖုန်းပြောသကဲ့သို့ သူတို့၏ အစွမ်းကို လျင်မြန်စွာ မြှင့်တင်ပေးနိုင်မလားဆိုသည်ကို အတည်ပြုရန်အတွက် ထိုနေရာသို့ ဝင်ရောက်စမ်းသပ်ရန် သူတို့ မျှော်လင့်နေခဲ့ကြသည်။

မကြာမီ ကျန်းရှင်းရန်နှင့် အခြားလေးဦးလုံးသည် သူတို့၏ ကိရိယာတန်ဆာပလာများကို ဝတ်ဆင်ပြီး ကျန့်ဖုန်းကို ဝိုင်းပတ်ကာ စက်ဝိုင်းပုံစံ ရပ်လိုက်ကြသည်။ ကျန့်ဖုန်းသည်လည်း သူ၏ မြင့်မြတ်ကံကြမ္မာဓားနှင့် ခမ်းနားထည်ဝါသော မြင့်မြတ်ဝိညာဉ်ဓား တို့ကို ထုတ်ယူလိုက်သည်။

ကျန့်ဖုန်း၏ အမြင်အရ နံပါတ် ၂၁ အဖွဲ့သည် ခမ်းနားထည်ဝါသောအဆင့် ကိရိယာများသို့ အဆင့်မြှင့်ပြီးနောက် သာမန် စစ်သေနာပတိအဆင့်အဖွဲ့ထက် အားမနည်းတော့သည်မှာ သေချာသည်။ သူတို့ လက်ရှိတွင် လိုအပ်နေသည်မှာ ကျင့်ကြံမှုအဆင့် တိုးတက်ရန်သာ ဖြစ်သည်။

ဝမ်မင်၊ ကျန်းရှင်းရန်နှင့် အခြားသူများ အဆင့် ၆သို့ တက်လှမ်းနိုင်သည်နှင့် နံပါတ် ၂၁ အဖွဲ့သည် သဘာဝအလျောက် စစ်သေနာပတိအဆင့်အဖွဲ့အဖြစ်သို့ တိုးတက်သွားပေလိမ့်မည်။ ရာထူးတိုးရန် အခြေအနေများနှင့် စစ်ဆေးမှုများမှာ ကျန့်ဖုန်းအတွက် ပြဿနာရှိမည်မဟုတ်ဟု သူ ယူဆထားသည်။ ဘာပဲဖြစ်ဖြစ် သူတို့အတွက် ဂုဏ်ထူးဆောင်အမှတ်နှင့် အစွမ်းမှာ မဆိုးလှပေ။

ကျန့်ဖုန်းသည် မျက်လုံးကို မှိတ်လိုက်ပြီး ကြောက်မက်ဖွယ် အော်ဟစ်သံဂူနောက်ပိုင်းတွင် ပထမဆုံးအကြိမ်အဖြစ် ထာဝရမျှော်စင်နှင့် တက်ကြွစွာ ဆက်သွယ်လိုက်သည်။ လှိုင်းတွန့်လေးများကဲ့သို့ နူးညံ့သော ရွှေရောင်အလင်းတန်းများသည် သူ၏ ရင်ဘတ်မှ ထွက်ပေါ်လာသည်။ ကျန့်ဖုန်း၏ ရင်ဘတ်တွင် ဆွဲထားသော ထာဝရသံစဉ်မှာ တောက်ပစွာ လင်းလက်လာသည်။

ထာဝရမျှော်စင်၏ သော့ချက်ဖြစ်သောကြောင့် ထာဝရသံစဉ်မှတစ်ဆင့်သာ ကျန့်ဖုန်းသည် မျှော်စင်နှင့် ဆက်သွယ်နိုင်ပြီး ဟင်းလင်းပြင်ကို ဖြတ်ကျော်နိုင်သည်။ ထာဝရသံစဉ်မှ ထွက်ပေါ်လာသော အလင်းရောင်များ ပိုမိုအားကောင်းလာသည်နှင့်အမျှ ကျန့်ဖုန်း၏ စိတ်ထိန်းချုပ်မှုအောက်တွင် သူ၏ ခြေဖဝါးအောက်၌ ရွှေရောင်အလင်းကွင်းတစ်ခု စတင်ပေါ်ပေါက်လာသည်။

ထို့နောက် ချက်ချင်းပင် ထိုရွှေရောင်အလင်းကွင်းမှာ လျင်မြန်စွာ ပြန့်နှံ့သွားပြီး ကျန်းရှင်းရန်၊ ဝမ်မင်၊ ယောင်လီ၊ ဖန်းလီနှင့် မုရုံရှန်းအာတို့၏ ခြေဖဝါးအောက်တွင်လည်း ပေါ်လာသည်။ ဆက်လက်၍ မှိန်ဖျော့သော ရွှေရောင်ပုံစံများသည် ထိုအလင်းကွင်း ခုနစ်ခုကို အတူတကွ ချိတ်ဆက်ပေးလိုက်သည်။

စူးရှသော အဖြူရောင်အလင်းတန်းမှာ ကျန့်ဖုန်း၏ ရင်ဘတ်မှ ပေါက်ကွဲထွက်လာပြီးနောက် နှင်းပွင့်ပုံသဏ္ဌာန်ရှိသော မှော်အစီအရင်တစ်ခုမှာ ကျန့်ဖုန်းတို့၏ အထက်တွင် လွင့်ပျံလာသည်။ နောက်တစ်ခဏတွင် အလင်းရောင်မှာ ဗဟိုအမှတ်တစ်ခုသို့ ရုတ်တရက် စုစည်းသွားပြီး ကျန့်ဖုန်းနှင့် အခြားငါးဦးကို သယ်ဆောင်ကာ ပျောက်ကွယ်သွားတော့သည်။

ဆယ်စက္ကန့်ခန့်အကြာတွင် ကျန့်ဖုန်း မျက်လုံးပြန်ဖွင့်လိုက်သောအခါ သူတို့သည် ထာဝရမျှော်စင်၏ အပြင်ဘက်သို့ ရောက်ရှိနေပြီဖြစ်သည်။ ဤနေရာမှာ ကြောက်မက်ဖွယ် ညည်းတွားသံဂူနှင့် ဆင်တူသော ဂူတစ်ခုဖြစ်ပြီး၊ မကျေမနပ်ဖြစ်နေသော ဝိညာဉ်ပေါင်းများစွာဖြင့် ပြည့်နှက်နေကာ သူတို့၏ ညည်းတွားသံများမှာ နိမ့်ချည်မြင့်ချည် ထွက်ပေါ်နေသည်။

ထာဝရမျှော်စင် တည်ရှိရာ ဟင်းလင်းပြင်မှာ မြင့်မြတ်နတ်ဆိုးတိုက်ကြီးနှင့် မသက်ဆိုင်တော့ပေ။ ဤဟင်းလင်းပြင်ကို ယီလိုင်ခဲ့စစ်က သူ၏ အမြင့်မြတ်ဆုံး စွမ်းအားဖြင့် ဖန်တီးခဲ့ခြင်း ဖြစ်သည်။ ယီလိုင်ခဲ့စစ်သည် သူ၏ သက်တမ်းအတွင်း ဟင်းလင်းပြင်ကို ဖန်တီးနိုင်သည်အထိ မည်မျှပင် အစွမ်းထက်ခဲ့ကြောင်း စိတ်ကူးကြည့်ရန်ပင် ခက်ခဲလှသည်။

ဤနေရာသို့ ရောက်ရောက်ချင်း ကျန့်ဖုန်းမှလွဲ၍ လူတိုင်းသည် သူတို့၏ ဝိညာဉ်များ တုန်ရင်နေသကဲ့သို့ စိတ်နှလုံး အနက်ရှိုင်းဆုံးမှ ထိန်းချုပ်၍မရသော ကြောက်ရွံ့မှုကို ခံစားလိုက်ရသည်။ ကြောက်မက်ဖွယ်ရာ သေခြင်းတရား အရှိန်အဝါသည် သူတို့ထံသို့ စီးဆင်းလာပြီး အဆုံးမဲ့ အေးစက်ငြိမ်သက်မှုများဖြင့် သူတို့အား လွှမ်းမိုးကာ မျှော်လင့်ချက်မဲ့စေပြီး ကြက်သီးမွေးညင်းများ ထသွားစေသည်။ လူတိုင်းသည် မသိစိတ်ဖြင့် သူတို့၏ လက်နက်များကို တင်းတင်းကြပ်ကြပ် ဆုပ်ကိုင်ထားလိုက်ကြသည်။

ကျန့်ဖုန်းသည် မြင့်မြတ်အလင်းဒိုင်းကို အမြန် ထုတ်လွှတ်လိုက်သည်။ ထိုဒိုင်း၏ အတိုင်းအတာအတွင်းရှိ သတ္တဝါအားလုံးသည် ထာဝရသံစဉ်၏ အကာအကွယ်ကို ရရှိမည်ဖြစ်ပြီး ဝိညာဉ်များ၏ ညည်းတွားသံ သို့မဟုတ် တိုက်ခိုက်မှုများကို ခံစားရမည် မဟုတ်ပေ။

"ဘော့စ်... ဒါက အရမ်းလွန်လွန်းတယ်"

ယောင်လီ၏ မျက်လုံးများမှာ တုန်လှုပ်မှုများဖြင့် ပြည့်နှက်နေသည်၊ သူ၏ ရှေ့ရှိ မီတာ ၁၀၀ မြင့်သော ထာဝရမျှော်စင်ကို ကြည့်ကာ မိမိကိုယ်ကို ပုရွက်ဆိတ်တစ်ကောင်ကဲ့သို့ သေးငယ်သည်ဟု ခံစားနေရသည်။

"နတ်ဆိုးသူတော်စင်၊ သေခြင်းတရားမှော်နတ်ဘုရားက သူ့သက်တမ်းမှာ ဘယ်လောက်တောင် အစွမ်းထက်ပြီး ကြောက်စရာကောင်းခဲ့မလဲဆိုတာ စိတ်ကူးကြည့်ရုံနဲ့တင် ကြောက်ဖို့ကောင်းတယ်"

ဝမ်မင်က အံ့သြတကြီး ပြောသည်။ အခြားသူများလည်း သဘောတူသည့်အနေဖြင့် ခေါင်းညိတ်ကြသည်။

ကျန့်ဖုန်းသည် သူ၏ အဖော်များကို ထာဝရမျှော်စင်၏ တံခါးဆီသို့ ဦးဆောင်ခေါ်သွားသည်။ ဝမ်မင်နှင့် အခြားသူများသည် ကျန့်ဖုန်းနောက်မှ သတိထား၍ လိုက်လာကြပြီး အလင်းဒိုင်း၏ အပြင်ဘက်သို့ မထွက်ရဲကြပေ။ ထာဝရမျှော်စင်၏ တံခါးမှာ အလိုအလျောက် ပွင့်သွားပြီး ကျန့်ဖုန်းတို့ ငါးဦး အထဲသို့ ဝင်ခဲ့ကြသည်။

မျှော်စင်ထဲသို့ ဝင်လိုက်သည်နှင့် ပတ်ဝန်းကျင်ရှိ သေခြင်းတရား စွမ်းအင်မှာ ချက်ချင်းပင် ပိုမိုအားကောင်းလာပြီး အပြင်ဘက်မှ ညည်းတွားသံများမှာလည်း ရုတ်တရက် ရပ်တန့်သွားသည်။ ကျန့်ဖုန်းသည် အလင်းဒိုင်းကို ဖယ်ရှားလိုက်ပြီး သူ၏ အဖော်များကို မျှော်စင်အတွင်းရှိ အရှိန်အဝါကို ခံစားခွင့်ပေးလိုက်သည်။

ဤနေရာတွင် သေခြင်းတရား အရှိန်အဝါမှလွဲ၍ အခြားဒြပ်စင်များ လုံးဝမရှိသလောက်ပင်။ နံပါတ် ၂၁ အဖွဲ့အနေဖြင့် ဤနေရာတွင် စမ်းသပ်မှုခံယူရန်အတွက် ထာဝရမျှော်စင်အတွင်းရှိ ပတ်ဝန်းကျင်နှင့် လိုက်လျောညီထွေဖြစ်အောင် အရင်နေသားကျရမည်ဖြစ်သည်၊ မဟုတ်ပါက မည်သို့ တိုက်ခိုက်နိုင်ပါမည်နည်း။

"အားလုံး အဆင်သင့်ပြင်ကြ၊ နောက် ၁၀ မိနစ်နေရင် စမ်းသပ်မှု စတော့မယ်"

ကျန့်ဖုန်းက လေးနက်သော အသံဖြင့် ပြောသည်။

"ဒီနေရာမှာပဲ ငြိမ်ငြိမ်လေးနေတာ အကောင်းဆုံးပဲ။ မင်းတို့ ရှေ့ကို လှမ်းလိုက်တာနဲ့ စမ်းသပ်မှု စတင်ပြီလို့ အဓိပ္ပာယ်ရတယ်"

"ဟုတ်"

လူတိုင်း ခေါင်းညိတ်ကြသည်။

၁၀ မိနစ်မှာ လျင်မြန်စွာ ကုန်ဆုံးသွားပြီး ကျန့်ဖုန်းက ထပ်ပြောသည်။

"ဒီနေရာက အခြေအနေက နည်းနည်း ထူးခြားတယ်။ ငါ အရင်ဆုံး သရုပ်ပြမယ်၊ အားလုံး သတိထားကြည့်ကြ"

ကျန့်ဖုန်းသည် ပြောပြောဆိုဆိုနှင့် သူ၏ ဓားနှစ်လက်ကို ကိုင်ကာ ရှေ့သို့ လှမ်းလိုက်သည်။ သူ၏ တတိယမြောက် ခြေလှမ်းတွင်ပင် ယန္တရားတစ်ခုကို ထိလိုက်သကဲ့သို့ အဖြူရောင်အလင်းတန်း နှစ်ခုမှာ မြေပြင်မှ ထွက်ပေါ်လာပြီး ကြီးမားသော အရိုးစုသူရဲကောင်းနှစ်ခုအဖြစ် ပြောင်းလဲသွားသည်။

ဘယ်ဘက်တွင် ဒိုင်း၊ ညာဘက်တွင် ဓားကို ကိုင်ဆောင်ထားပြီး သတ္တိ၊ ယုံကြည်ခြင်းနှင့် ပြင်းထန်သောတိုက်စစ် ဟူသော အားဖြည့်အလင်းကွင်း သုံးခုကို နင်းထားကာ ပြင်းထန်သော အရှိန်အဝါကို ထုတ်လွှတ်နေသည်။

အဆင့် ၆။

ဤအရိုးစုများမှ ထွက်ပေါ်လာသော အရှိန်အဝါက အဆင့် ၆ ဖြစ်သည်မှာ ထင်ရှားလှသည်။ မျှော်စင်ထဲ ဝင်ဝင်ချင်း စမ်းသပ်မှုမှာပင် အဆင့် ၆ ပြိုင်ဘက်များနှင့် ရင်ဆိုင်ရခြင်း ဖြစ်သည်။ ထို့အပြင် အရိုးစုများမှ ထွက်ပေါ်လာသော အလင်းဒြပ်စင် အရှိန်အဝါကလည်း လူတိုင်းကို အံ့အားသင့်စေသည်။

ကျန့်ဖုန်းသည် သူ၏ ဓားနှစ်လက်ကို ကိုင်ကာ သူတို့ကို ထိပ်တိုက်ရင်ဆိုင်လိုက်ပြီး တောက်ပသော ရွှေရောင်အလင်းဓားသွား နှစ်ခုကို ထုတ်လွှတ်လိုက်သည်။

မြင့်မြတ်အလင်းကြက်ခြေခတ်ဓားချက်။

ကြီးမားသော ရွှေရောင်အလင်းဓားသွားများသည် လေထုကို ဖြတ်တောက်ကာ အရိုးစုသူရဲကောင်း နှစ်ကောင်ကို တစ်ပြိုင်နက်တည်း ထိမှန်သွားသည်။

"ဒုန်း—"

ဤတိုက်ခိုက်မှု လွှမ်းမိုးသော ဧရိယာမှာ အလွန်ကျယ်ပြန့်လွန်းသဖြင့် မကျယ်ဝန်းသော မျှော်စင်အတွင်းပိုင်းတွင် ရှောင်တိမ်းရန် မဖြစ်နိုင်ပေ။ ထို့ကြောင့် အရိုးစုစစ်သည်နှစ်ဦးမှာ ထိပ်တိုက် ရင်ဆိုင်ရန်သာ ရွေးချယ်နိုင်တော့သည်။ စုစည်းနေသော ရွှေရောင်အလင်းတန်းနှစ်ခု ချက်ချင်း ပေါက်ကွဲထွက်သွားပြီး ပြင်းထန်သော ဟိန်းသံတစ်ခု ထွက်ပေါ်လာသည်။ အဆင့် ၆ အရိုးစုသူရဲကောင်း နှစ်ကောင်မှာ တစ်ပြိုင်နက်တည်း နောက်သို့ လွင့်ထွက်သွားပြီး သူတို့လက်ထဲရှိ အရိုးဒိုင်းများမှာပင် အက်ကွဲကြောင်းများ ပေါ်လာသည်။ နတ်ဘုရားအစောင့်အရှောက်အကာအကွယ်သည်ပင် ကျန့်ဖုန်း၏ တိုက်ခိုက်မှုကို မတားဆီးနိုင်လုနီးပါး ဖြစ်သွားသည်။

အခန်း (၁၆၀) - ထာဝရမျှော်စင်၏ စမ်းသပ်မှုများ (၂)

ကျန့်ဖုန်း၏ လက်ရှိ ပြင်ပဝိညာဉ်စွမ်းအား ၅,၀၀၀ ကျော်မှာ အရိုးစုသူရဲကောင်း နှစ်ကောင်နှင့် နှိုင်းယှဉ်လျှင် စုစုပေါင်း ဝိညာဉ်စွမ်းအားမှာ များစွာ သေးငယ်လှသော်လည်း၊ သူ၏ ကိုယ်ပိုင်ကိရိယာများနှင့် စွမ်းရည်အဆင့်မှာ လက်ရှိအဆင့်ထက် လုံးဝ သာလွန်နေသဖြင့် အရိုးစုသူရဲကောင်း နှစ်ကောင်ကို တိုက်ခိုက်ရန် ခက်ခဲခြင်း မရှိပေ။

ကျန့်ဖုန်းသည် တိုက်စစ်ကို ဆက်လက်ဆင်နွှဲလိုက်ရာ ကောင်းကင်မှ ရွှေရောင်အလင်းတန်းတစ်ခု ကျဆင်းလာသည်။ အတွင်းဝိညာဉ်စွမ်းအား ၁,၀၀၀ ပါဝင်သော အသူရာခုတ်ချက်က ချက်ချင်း ကျရောက်လာသည်။

"ဒေါင်—"

အရိုးစုသူရဲကောင်း တစ်ကောင်၏ လက်ထဲမှ အရိုးဒိုင်းနှင့် အရိုးဓားမှာ ချက်ချင်းပင် ကျိုးပဲ့သွားပြီး မြင့်မားသော အရိုးစုကိုယ်ထည် တစ်ခုလုံးမှာလည်း ကျန့်ဖုန်း၏ ဓားချက်ကြောင့် နှစ်ပိုင်း ပြတ်သွားတော့သည်။

ဤအချိန်တွင် ကျန့်ဖုန်းသည် ကျန်ရှိနေသော အရိုးစုသူရဲကောင်း၏ တိုက်ခိုက်မှုကို ရင်ဆိုင်လိုက်ရသည်။ ၎င်းသည် လက်တစ်ဖက်တွင် ဓား၊ အခြားတစ်ဖက်တွင် ဒိုင်းကို ကိုင်ကာ ပြင်းထန်စွာ ပြေးဝင်လာပြီး ဒိုင်းဖြင့် အားရပါးရ တိုက်လိုက်သည်။

"ဘုန်း"

သို့သော် ကျန့်ဖုန်းမှာ ဤတိုက်ခိုက်မှုအောက်တွင် မလှုပ်မယှက် ရှိနေဆဲ ဖြစ်သည်။ သူ၏ အားကောင်းသော ပြင်ပဝိညာဉ်စွမ်းအားကြောင့် သူ၏ ကိုယ်ခန္ဓာအစွမ်းမှာ လက်ရှိနယ်ပယ်၏ အထွတ်အထိပ်သို့ ရောက်ရှိနေသည်မှာ သေချာသည်။ သို့သော် ကျန့်ဖုန်းသည် နောက်ထပ် တိုက်ခိုက်မှုကို ခန္ဓာကိုယ်အစွမ်းသက်သက်ဖြင့် ခုခံရန် မဝံ့ရဲပေ။

ဒိုင်းဖြင့် တိုက်ခိုက်မှုမှာ လွင့်ထွက်သွားပြီးနောက် အရိုးစုသူရဲကောင်းသည် အသူရာခုတ်ချက်ဖြင့် ဆက်လက် တိုက်ခိုက်လာသည်။ ထို့အပြင် ထိုအရိုးစုသူရဲကောင်း၏ အသူရာခုတ်ချက် အသုံးပြုမှုမှာ အပြစ်ပြောစရာမရှိအောင် ပြည့်စုံလွန်းသည်ဟု ဆိုနိုင်သည်။

အရိုးစုသူရဲကောင်း၏ စွမ်းရည်အသုံးပြုမှုနှင့် နှိုင်းယှဉ်လျှင် ကျန့်ဖုန်းအနေဖြင့် အသေးစိတ်ပိုင်းများတွင် ကွာဟချက် ရှိနေသေးသည်။ သေချာသည်မှာ ဤတိုက်ပွဲအတွင်း ကျန့်ဖုန်းသည် အသူရာခုတ်ချက် စွမ်းရည်အပေါ် သူ၏ နားလည်မှုကို မြှင့်တင်ပေးနိုင်မည့် အသေးစိတ် အချက်အလက်အချို့ကိုလည်း ရယူနိုင်ခဲ့သည်။

ကျန့်ဖုန်းသည် သူ၏ ဓားနှစ်လက်ကို ရင်ဘတ်ရှေ့တွင် ကြက်ခြေခတ်ပုံစံ ကာလိုက်ရာ တောက်ပသော ရွှေရောင်အလင်းတန်းမှာ ချက်ချင်း စုစည်းသွားသည်။

နတ်ဘုရားအစောင့်အရှောက်အကာအကွယ်။

ကျန့်ဖုန်း၏ လက်ရှိ စွမ်းရည်အပေါ် နားလည်မှုအရ သူသည် ကိရိယာတန်ဆာပလာ အကန့်အသတ်မရှိဘဲ ၎င်းကို အသုံးပြုနိုင်သည်။ ဝိညာဉ်စွမ်းအားဖြင့် စုစည်းထားသော ဓားရှည်တစ်လက်ဖြင့်ပင် သူသည် နတ်ဘုရားအစောင့်အရှောက်အကာအကွယ်ကို အသုံးပြုနိုင်သည်။

ကျန့်ဖုန်း၏ အသူရာခုတ်ချက်သည် အရိုးစုသူရဲကောင်း နှစ်ကောင်ကို တစ်ပြိုင်နက် လွင့်ထွက်သွားစေနိုင်သော်လည်း၊ အရိုးစုသူရဲကောင်း၏ အသူရာခုတ်ချက်မှာ ကျန့်ဖုန်း၏ ခန္ဓာကိုယ်ကို မလှုပ်ရှားစေနိုင်ပေ။ အရိုးစုသူရဲကောင်းသည် ဤစွမ်းရည်၏ အစွမ်းကုန်ကို ထုတ်သုံးခဲ့သော်လည်း သူရဲကောင်း၏ အားအကောင်းဆုံး ကာကွယ်ရေးစွမ်းရည်နှင့် ပြင်ပဝိညာဉ်စွမ်းအား ၇,၀၀၀ ကျော် ရှိသော ကျန့်ဖုန်းကိုမူ မတတ်နိုင်ပေ။

မြင့်မြတ်ဓား၊ မိုးကြိုးရိုက်ချက်။

နတ်ဘုရားအစောင့်အရှောက်အကာအကွယ်မှ ငှားရမ်းထားသော ဝိညာဉ်စွမ်းအား အစိတ်အပိုင်းတစ်ခုကို အသုံးပြု၍ ကျန့်ဖုန်းသည် ပြန်လည်တိုက်စစ်ဆင်လိုက်သည်။ မြင့်မြတ်ဓားဖြင့် အားဖြည့်ထားသော မိုးကြိုးရိုက်ချက်မှာ ပြင်းထန်သော တိုက်စစ်ကို ထုတ်လွှတ်လိုက်ပြီး၊ ဓားအရိပ် ဒါဇင်ပေါင်းများစွာအဖြစ် ပြောင်းလဲကာ အရိုးစုသူရဲကောင်း၏ ပုံရိပ်ကို ချက်ချင်း ဖျက်ဆီးပစ်လိုက်သည်။

ဤအချိန်တွင် အရိုးစုအလောင်းနှစ်ခုပေါ်၌ အဖြူရောင်အလင်းတန်း နှစ်ခု ပေါ်လာသည်။ ကျန့်ဖုန်းက ဝိညာဉ်စွမ်းအားဖြင့် လမ်းပြလိုက်ရာ ထိုအလင်းတန်းများသည် သူ၏ ရှေ့သို့ ရောက်လာသည်။ စွမ်းရည် အမွေအနှစ်ပါဝင်သော ရွှေရောင်အလင်းကွင်းမှာ ပေါ်မလာသော်လည်း၊ ဤအဖြူရောင်အလင်းနှစ်ခုတွင် ဝိညာဉ်စွမ်းအား အမှတ် ၂၀ ပါဝင်နေသည်။

၎င်းမှာ ကျန့်ဖုန်းတို့အတွက် ကျင့်ကြံရန် အချိန်အတော်ပေးရမည့် ပမာဏ ဖြစ်သည်။ ထို့ပြင် ဤအလင်းတန်းများသည် မည်သည့်ဒြပ်စင်အမျိုးအစားမှ မခွဲခြားထားသော ဝိညာဉ်စွမ်းအားများ ဖြစ်သဖြင့် လူတိုင်း စုပ်ယူနိုင်သည်။

ကျန့်ဖုန်းက လက်ဝှေ့ယမ်းလိုက်ရာ ထိုအလင်းတန်းနှစ်ခုမှာ ကျန်းရှင်းရန်နှင့် မုရုံရှန်းအာတို့၏ ရင်ဘတ်ထဲသို့ အသီးသီး ဝင်ရောက်သွားသည်။

"ဟင်"

ကျန်းရှင်းရန်နှင့် မုရုံရှန်းအာတို့ နှစ်ဦးစလုံး အာမေဍိတ်သံလေးများ ထွက်ပေါ်လာသည်။ သူတို့သည် ကျန့်ဖုန်းကို ယုံကြည်ကြသဖြင့် ဤဝိညာဉ်စွမ်းအားများကို ခုခံခြင်း မပြုကြပေ။ အဖြူရောင်အလင်းများ သူတို့၏ ရင်ဘတ်ထဲသို့ ဝင်ရောက်သွားသောအခါ သူတို့၏ ဝိညာဉ်စွမ်းအားမှာ အမှတ် ၁၀ ခန့်စီ တိုးလာသည်ကို တွေ့ရှိလိုက်ရသည်။

ကျန့်ဖုန်းသည် ဇဝေဇဝါဖြစ်နေသော သူတို့နှစ်ဦးကို ကြည့်ကာ ပြုံးပြီး လူတိုင်းကို ရှင်းပြလိုက်သည်။

"ဒီအဖြူရောင်အလင်းက ဝိညာဉ်စွမ်းအား အလင်းကွင်းပဲ။ အလင်းကွင်း တစ်ခုက ဝိညာဉ်စွမ်းအား ၁၀ မှတ် တိုးစေတယ်။ ဒါဟာ စမ်းသပ်မှုအတွက် ဆုလာဘ်ပဲ။ အားလုံး နားလည်ကြတယ် မဟုတ်လား"

အားလုံးက ခေါင်းညိတ်ကြပြီး ယောင်လီက စိတ်လှုပ်ရှားစွာ ပြောလိုက်သည်။

"ဝိညာဉ်စွမ်းအား ၁၀ မှတ်၊ ဒီလောက် လွယ်တာလား ကျွန်တော် တစ်နေ့လုံး ကျင့်ကြံရင်တောင် ၁၀ မှတ် မတိုးဘူး"

ကျန့်ဖုန်းသည် ထက်သန်နေသော လူအုပ်ကြီးကို ကြည့်လိုက်သည်၊ အထူးသဖြင့် ဝတုတ်လေး ယောင်လီကို ဖြစ်သည်။ ကျန့်ဖုန်းနှင့် အရိုးစုစစ်သည်တို့၏ တိုက်ပွဲမှာ မြန်ဆန်လွန်းသဖြင့် သူသည် အရိုးစုစစ်သည်များ၏ အစွမ်းကို အပြည့်အဝ တန်ဖိုးမထားမိခြင်း ဖြစ်ပေလိမ့်မည်။ သူ မကြာခင် နောင်တရပေတော့မည်။

"ဖန်းလီ... မင်းရော ဘယ်လိုလဲ"

ကျန့်ဖုန်းသည် မျက်နှာအမူအရာ မကောင်းသော ဖန်းလီကို ကြည့်ကာ မေးလိုက်သည်။ သေခြင်းတရားမှော်နတ်ဘုရား ယီလိုင်ခဲ့စစ်သည် အလင်းသားတော် ဖြစ်ခဲ့သဖြင့် အမှောင်ဓာတ်ကို အလွန်အမင်း မုန်းတီးသည်။ ကျန့်ဖုန်းသည် ဖန်းလီကို မျှော်စင်ထဲသို့ ခေါ်လာနိုင်သော်လည်း၊ မျှော်စင်၏ ကိုယ်ပိုင်အလင်းဓာတ်က ဖန်းလီ၏ အမှောင်ဓာတ်ကို တွန်းကန်နေမှုကိုမူ သူ မထိန်းချုပ်နိုင်ပေ။

ဖန်းလီ၏ မျက်နှာမှာ အနည်းငယ် ဖြူဖျော့နေသော်လည်း သူမက ခေါင်းညိတ်ကာ ပြန်ဖြေသည်။ "

ကျွန်မ တောင့်ခံနိုင်ပါတယ်၊ ဒါပေမဲ့ ကျွန်မရဲ့ အစွမ်းက ၈၀ ရာခိုင်နှုန်းလောက်ပဲ ရှိတော့မယ် ထင်တယ်”

ကျန့်ဖုန်းက စဉ်းစားလိုက်ကာ ပြောသည်။

"၈၀ ရာခိုင်နှုန်းဆိုရင် ရပါတယ်။ အကယ်၍ မတောင့်ခံနိုင်တော့ရင် ငါ့ကို ပြောပါ၊ ငါ မင်းကို အချိန်မရွေး ပြန်ပို့ပေးလို့ ရတယ်"

ဖန်းလီက ကျန့်ဖုန်းကို ကျေးဇူးတင်သော အကြည့်ဖြင့် ကြည့်ကာ ပြောလိုက်သည်။

"နားလည်ပါပြီ ခေါင်းဆောင်"

"အားလုံးပဲ၊ ငါ့နောက်က လိုက်ခဲ့ကြ"

ကျန့်ဖုန်းက အသံနိမ့်နိမ့်ဖြင့် ပြောကာ အဖွဲ့၏ ရှေ့ဆုံးမှ လမ်းလျှောက်သွားသည်။ ငါးလှမ်းခန့် လှမ်းပြီးနောက် ပုံရိပ်ယောင်တစ်ခု ဖျတ်ခနဲ ဖြတ်ပြေးသွားသည်။

"အားလုံး သတိထား"

ကျန့်ဖုန်း၏ သတိပေးသံနှင့်အတူ သူ၏နောက်ရှိ ဝမ်မင်ထံမှ ညည်းတွားသံတစ်ချက် ထွက်ပေါ်လာသည်။ သူ၏ ဒိုင်းပေါ်ရှိ မြေဓာတ်အလင်းမှာ တိုက်ရိုက် ကွဲကြေသွားပြီး သူကိုယ်တိုင်လည်း နောက်သို့ ခြေတစ်လှမ်း ဆုတ်လိုက်ရသည်။

မည်မျှပင် မောက်မာပြီး ကြောက်မက်ဖွယ်ကောင်းသော တိုက်ခိုက်မှုလဲ။ အကယ်၍ ဤတိုက်ခိုက်မှုသာ လူသားခန္ဓာကိုယ်ပေါ်သို့ တိုက်ရိုက်ကျရောက်ခဲ့ပါက ပြင်ပဝိညာဉ်စွမ်းအား ၂,၀၀၀ ရှိရင်တောင်မှ သူတို့၏ ကိုယ်ခန္ဓာမှာ ချက်ချင်းပင် အစအန ပျောက်သွားပေလိမ့်မည်။

အဘယ်ကြောင့်ဆိုသော် ဤတိုက်ခိုက်မှုမှာ အမှန်တကယ်ပင် အလွန်အမင်း အစွမ်းထက်သောကြောင့် ဖြစ်သည်။ ကံကောင်းထောက်မစွာဖြင့် ဤတိုက်ခိုက်မှုမှာ ဝမ်မင်ဆီသို့ ဦးတည်ခဲ့ခြင်းဖြစ်ပြီး ဝမ်မင်၏ ဒိုင်းကြီးကြောင့် နောက်ကွယ်ရှိ မှော်ဆရာ သုံးဦးမှာ ထိခိုက်မှု မရှိခဲ့ခြင်း ဖြစ်သည်။

လုပ်ကြံသတ်ဖြတ်သူ၊ ထို့ပြင် တစ်ယောက်တည်းလည်း မဟုတ်ပေ။

အဖွဲ့၏ နောက်ဆုံးတွင်ရှိသော မုရုံရှန်းအာမှာ ချက်ချင်း တုံ့ပြန်လိုက်ပြီး အမှန်တရားမျက်လုံးစွမ်းရည်ကို ချက်ချင်း ထုတ်လွှတ်လိုက်သည်။ အမှန်တရားမျက်လုံး၏ အလင်းအောက်တွင် ပိန်ပါးသော အရိုးစုလုပ်ကြံသတ်ဖြတ်သူနှစ်ဦးမှာ ပေါ်လာပြီးနောက် ပြန်လည် ပျောက်ကွယ်သွားပြန်သည်။

တစ်ချိန်တည်းမှာပင် အဖွဲ့၏ အလယ်တွင်ရှိသော ကျန်းရှင်းရန်သည် ဝမ်မင်၏ ကာကွယ်ရေး ဟာကွက်များကို စောင့်ကြည့်ကာ ရေခဲဒိုင်း အများအပြားကို အဆက်မပြတ် ထုတ်လွှတ်ပေးနေသည်။

"ဒေါင်၊ ဒေါင်"

ကျန်းရှင်းရန် ထုတ်လွှတ်လိုက်သော ရေခဲဒိုင်း နှစ်ခုမှာ ချက်ချင်းပင် ကွဲကြေသွားသည်။ အခြားတစ်ဖက်တွင်မူ ယောင်လီ၏ အာမေဍိတ်သံ ထွက်ပေါ်လာသည်။ သူ၏ သံချပ်ကာ ရင်ဘတ်ပေါ်တွင် နက်ရှိုင်းသော ခြစ်ရာတစ်ခု ရုတ်တရက် ပေါ်လာသော်လည်း ကံကောင်းထောက်မစွာဖြင့် ခမ်းနားထည်ဝါသောအဆင့် ကိရိယာမှာ အစွမ်းထက်သဖြင့် သူ၏ ကိုယ်ခန္ဓာကိုမူ ဒဏ်ရာမရစေခဲ့ပေ။ ယောင်လီကိုယ်တိုင်လည်း ဤတိုက်ခိုက်မှု၏ ကြီးမားသော အရှိန်ကြောင့် လွင့်ထွက်သွားပြီး ဘေးရှိ နံရံကို ပြင်းထန်စွာ တိုက်မိသွားသည်။

"တကယ့်ကို အားကောင်းတဲ့ စွမ်းအားပဲ၊ အမှတ်တစ်ခုတည်းမှာပဲ စုစည်းထားတာ"

ယောင်လီက အံ့သြတကြီး ပြောသည်။ လုပ်ကြံသတ်ဖြတ်သူ တစ်ဦးအနေဖြင့် သူသည် ဤမျှ အဆင့်မြင့်သော တိုက်ခိုက်မှုမျိုးကို မပိုင်ဆိုင်ထားပေ။ ၎င်းသည် အဆင့် ၅ စွမ်းရည်ဖြစ်သော ဧကရာဇ်ဓားချက် ထက်ပင် ပိုမို ပြင်းထန်ပြီး သူ၏ သံချပ်ကာကိုပင် ဖောက်ထွက်လုနီးပါး ဖြစ်သွားစေသည်။ ထို့ပြင် ၎င်းမှာ အလွန်အမင်း မြန်ဆန်လွန်းလှသည်။ ယောင်လီသည် သူ၏ သံချပ်ကာတွင် ပါရှိသော ဟင်းလင်းပြင်ဒိုင်းကိုပင် အချိန်မီ အသုံးမပြုနိုင်ခဲ့ပေ။

ဤအချိန်တွင် မုရုံရှန်းအာသည် အမှန်တရားမျက်လုံး နှစ်ခုကို ထပ်မံထုတ်လွှတ်ကာ ပတ်ဝန်းကျင် ဟင်းလင်းပြင်တစ်ခုလုံးကို လွှမ်းခြုံထားလိုက်သဖြင့် အရိုးစုလုပ်ကြံသတ်ဖြတ်သူများ ပုန်းကွယ်စရာ နေရာမရှိတော့ပေ။ ထို့ကြောင့် နံပါတ် ၂၁ အဖွဲ့အတွက် ပြန်လည်တိုက်စစ်ဆင်ရန် အချိန်ရောက်လာပြီ ဖြစ်သည်။

ကျန်းရှင်းရန်၏ မှော်နှင်တံမှာ လျင်မြန်စွာ လှုပ်ရှားသွားပြီး ဆံပင်မျှင်ကဲ့သို့ သေးသွယ်သော ရေခဲဝိညာဉ်အပ် နှစ်ခုကို ချက်ချင်း စုစည်းကာ ပစ်လွှတ်လိုက်သည်။ ၎င်းတို့ ဖြတ်သန်းသွားရာ လေထုမှာပင် ခဲသွားပုံရသည်။ ထိုရေခဲအပ် နှစ်ခုသည် အရိုးစုလုပ်ကြံသတ်ဖြတ်သူ နှစ်ဦး၏ လက်ထဲရှိ ဓားမြှောင်တိုများနှင့် တိုက်ရိုက် ထိပ်တိုက်တွေ့သွားပြီး ၎င်းတို့ပေါ်တွင် အပ်ပေါက်ရာငယ်လေးများ ချန်ထားခဲ့သည်။

တစ်ချိန်တည်းမှာပင် ယောင်လီ၏ ပုံရိပ်မှာလည်း ဟင်းလင်းပြင်အတွင်း ပျောက်ကွယ်သွားသည်။ ဤသည်မှာ သူ၏ ဟင်းလင်းပြင် စွမ်းရည်ဖြစ်ပြီး လုပ်ကြံသတ်ဖြတ်သူ၏ ပုန်းကွယ်ခြင်း စွမ်းရည်မဟုတ်ပေ။ ထို့ကြောင့် အမှန်တရားမျက်လုံး၏ အလင်းအောက်တွင်ပင် ယောင်လီ၏ ပုံရိပ်မှာ လုံးဝ ပျောက်ကွယ်သွားပုံရသည်။

အရိုးစုလုပ်ကြံသတ်ဖြတ်သူ တစ်ဦး၏ နောက်ကွယ်ရှိ ဟင်းလင်းပြင်တွင် လှိုင်းတွန့်လေးတစ်ခုသာ ပေါ်လာပြီး ဓားမြှောင်တစ်လက်မှာ တိတ်ဆိတ်စွာ ထွက်ပေါ်လာတော့သည်။