အကန့်အသတ်မဲ့ ဓားဂိုဏ်း၊ သမိုင်းတစ်လျှောက် အစွမ်းထက်ဆုံး ပါရမီရှင် (၃)

~နောက်ထပ် သုံးနှစ် ကုန်လွန်သွားခဲ့ပြန်ရာ... နင်ချီသည် ကိုးနှစ်သား အရွယ်သို့ ရောက်ရှိလာခဲ့လေသည်။ သူသည် သဘာဝကျကျပင် 'မှော်စွမ်းအင် နယ်ပယ်' သို့ တက်လှမ်းနိုင်ခဲ့ပြီး၊ ကျင့်ကြံသူ အပေါင်း၏ အားကျလေးစားသော မျက်လုံးများ အောက်တွင် အရွယ်မတိုင်မီ 'ပြင်ပဂိုဏ်းတပည့်' တစ်ဦး ဖြစ်လာခဲ့သည်။

နင်ချီကြောင့် ဖြစ်ပေါ်လာသော လှုပ်ခတ်မှုများမှာ ပိုမို ကြီးမားလာလေသည်။

'ကျွမ်းကျင်မှု လွှဲပြောင်းရေး တောင်ထွတ်' မှ ထူးခြားသော ပါရမီရှင် မိဘမဲ့ ကလေးတစ်ယောက် ပေါ်ထွက်လာကြောင်း သတင်းကြားသည်နှင့်၊ လူအချို့သည် မိတ်ဖွဲ့ရန် ရောက်ရှိလာကြ၏။ သို့သော် အစွမ်းထက် ပုဂ္ဂိုလ်ကြီးများကတော့ သိပ်ပြီး အာရုံစိုက်ခြင်း မရှိကြသေးပေ။ 'မှော်စွမ်းအင် နယ်ပယ်' ဆိုသည်မှာ သူတို့၏ အာရုံကို ဖမ်းစားရန် မလုံလောက်သေးသောကြောင့် ဖြစ်သည်။ 'ခရမ်းရောင် နန်းတော် နယ်ပယ်' သို့ ရောက်ရှိမှသာ စစ်မှန်သော အစွမ်းအစ ပြသခြင်းဟု သတ်မှတ်ကြ၏။ ဝိညာဉ်ဆေးဝါးများနှင့် အံ့ဖွယ်ဆေးလုံးများ စားသုံးပြီး လျင်မြန်စွာ တိုးတက်လာသော်လည်း၊ နောက်ပိုင်းတွင် သာမန်လူ ဖြစ်သွားသူများ ဒုနဲ့ဒေး ရှိခဲ့သည် မဟုတ်ပါလော။

လုဇီယွဲ့ကတော့ ပို၍ပင် ပျော်ရွှင်နေလေသည်။ နင်ချီသည် သာမန်မဟုတ်ဘဲ အနာဂတ်တွင် အတိုင်းအဆမဲ့ တိုးတက်နိုင်မည့် အလားအလာ ရှိသူဟု သူမ ဆုံးဖြတ်လိုက်၏။ သူမသည် အချိန်ပေး၍ သူမ၏ အင်မော်တယ် လမ်းစဉ် အတွေ့အကြုံများကို နင်ချီအား သင်ကြားပြသပေးခဲ့သည်။ နင်ချီ အနေဖြင့် ထိုအရာများကို မလိုအပ်သော်လည်း၊ သူမ၏ စေတနာကို အသိအမှတ်ပြုသော အားဖြင့် ကျေးဇူးတင်စွာ လက်ခံခဲ့သည်။ ထို့အပြင် ကျေးဇူးတုံ့ပြန်သော အနေဖြင့် 'မူလဝိညာဉ် နယ်ပယ်' ဆိုင်ရာ ဉာဏ်အလင်း အချို့ကို လုဇီယွဲ့အား လက်ဆင့်ကမ်း ပေးလိုက်ရာ၊ သူမသည် ကြီးမားသော အကျိုးကျေးဇူးများ ရရှိသွားခဲ့လေသည်။

နောက်ထပ် ငါးနှစ် ထပ်မံ ကုန်လွန်သွားခဲ့ပြန်သည်။

အသက် (၁၄) နှစ် အရွယ်တွင် နင်ချီသည် 'မှော်စွမ်းအင် နယ်ပယ်' အထွတ်အထိပ်သို့ ရောက်ရှိခဲ့ပြီးနောက်၊ အဆင့်ချိုးဖျက်ကာ 'ခရမ်းရောင် နန်းတော် နယ်ပယ်' အဆင့်ရှိ 'စစ်မှန်သူ' တစ်ပါး အဖြစ်သို့ ကူးပြောင်းနိုင်ခဲ့သည်။ ထို့ကြောင့် သူသည် 'အတွင်းဂိုဏ်းတပည့်' အဖြစ်သို့ ရာထူးတိုးမြှင့်ခြင်း ခံလိုက်ရလေသည်။

ဤအချိန်မှ စတင်၍ နင်ချီ၏ နာမည်သည် အကန့်အသတ်မဲ့ ဓားဂိုဏ်း တစ်ခုလုံးတွင် ဟိန်းထွက်လာခဲ့လေသည်။ 'အစစ်အမှန် တပည့်' အများအပြားသည် သူ့ကို မိမိတို့ဘက် ပါအောင် စည်းရုံးရန် မျက်စိကျလာကြသော်လည်း၊ သူသည် ယဉ်ကျေးစွာဖြင့် အားလုံးကို ငြင်းပယ်ခဲ့သည်။ အချို့သော 'အစစ်အမှန် တပည့်' များသည် နင်ချီကို တိတ်တဆိတ် ပညာပေးရန် ကြံစည်ကြသော်လည်း၊ အကန့်အသတ်မဲ့ ဓားဂိုဏ်း ဒုတိယ ဂိုဏ်းချုပ်ကြီး၏ ဆင့်ခေါ်စာ ရောက်လာသောအခါ ထိုမသင့်လျော်သော အတွေးများကို ဖျောက်ဖျက်လိုက်ရတော့သည်။

နင်ချီသည် ထိုအစွမ်းထက် ပုဂ္ဂိုလ်ကြီးနှင့် ရင်ဆိုင်ရာတွင် ကောင်းမွန်စွာ ပြုမူနေထိုင်ခဲ့သဖြင့် ဆုလာဘ် အများအပြား ရရှိခဲ့သည့်အပြင်၊ အသိအမှတ်ပြုခံရသော အကြည့်များကိုပါ လက်ခံရရှိခဲ့သည်။

သူ နားလည်လိုက်သည်မှာ... 'ဝူကျိ ခန်းမဆောင်' အတွင်းသို့ ခြေချလိုက်သည့် အချိန်မှစ၍၊ မရေမတွက်နိုင်သော အကြည့်များသည် သူ့ကို အဆက်မပြတ် အကဲခတ် စစ်ဆေးနေကြကြောင်းပင်။ ထိုအကြည့်များတွင် ဝိညာဉ်ရတနာများ၏ မှိန်ဖျဖျ အလင်းရောင်များ ပါဝင်နေ၏။ ဒါသည် အကန့်အသတ်မဲ့ ဓားဂိုဏ်းက သူ့ကို ရှေးဟောင်း မိစ္ဆာဝိညာဉ် တစ်ကောင်ကောင် ပူးကပ်နေခြင်း ရှိမရှိ စစ်ဆေးနေခြင်း ဖြစ်သည်။

ကံကောင်းထောက်မစွာဖြင့် နင်ချီသည် ထိုစမ်းသပ်မှုကို အန္တရာယ်ကင်းစွာ ဖြတ်ကျော်နိုင်ခဲ့ပြီး၊ အစွမ်းထက် ပုဂ္ဂိုလ် အများအပြား၏ ထောက်ခံမှုကို ရရှိခဲ့သဖြင့် သူ၏ ဂုဏ်သတင်းမှာ ပိုမို မြင့်တက်သွားခဲ့လေသည်။

ဒါသည် သူ တွက်ချက်ထားသော ကျင့်ကြံခြင်း အရှိန်အဟုန်ပင် ဖြစ်သည်။ 'ပါရမီရှင်' ဆိုသော သတ်မှတ်ချက် ဘောင်အတွင်းမှာ နေပြီး၊ အကန့်အသတ်မဲ့ ဓားဂိုဏ်း၏ ပုံမှန် စစ်ဆေးမှုများကိုသာ ခံယူရုံဖြင့် ပြီးပြည့်စုံအောင် စီစဉ်ထားခြင်း ဖြစ်သည်။

အကယ်၍ သူသာ အစွမ်းကုန် ကြိုးစားမည် ဆိုပါက 'ခရမ်းရောင် နန်းတော် နယ်ပယ်' ရောက်ဖို့ ကိုးနှစ်တောင် ကြာစရာ အကြောင်းမရှိပေ။

သို့သော် လျင်မြန်လွန်းခြင်းသည် မလိုအပ်သော ပြဿနာများကို ဖိတ်ခေါ်ရာ ရောက်ပေလိမ့်မည်။ နှစ်အနည်းငယ် အတွင်းမှာ 'ခရမ်းရောင် နန်းတော် နယ်ပယ်' ရောက်သွားပါက 'ပါရမီရှင်' ဟု သတ်မှတ်ခံရရုံသာမက၊ ထူးခြားဆန်းကြယ်သော အရာများ ပါဝင်ပတ်သက်နေခြင်း ရှိမရှိ အပြင်ရော အတွင်းပါ စောင့်ကြည့် စစ်ဆေးခြင်း ခံရပေလိမ့်မည်။

ယခု အရှိန်အဟုန်ကသာ အသင့်တော်ဆုံး ဖြစ်သည်။

သူ အားနည်းနေသေးသော အချိန်တွင် အစွမ်းထက် ပုဂ္ဂိုလ်များ၏ စောင့်ကြည့်မှုကို ရှောင်ရှားနိုင်သလို၊ 'တောင်နှင့် ပင်လယ် နယ်မြေ' ၏ ကမ္ဘာ့ဆန္ဒ မှ အငြိုးထားမှုကိုလည်း ရှောင်လွှဲနိုင်မည် မဟုတ်ပါလော။

တစ်နေ့နေ့တွင် သူသာ 'မူလဝိညာဉ် နယ်ပယ်' သို့ တက်လှမ်းပြီး မူလဝိညာဉ်အား စုစည်းနိုင်ခဲ့လျှင်၊ မည်သည့် ပြဿနာမျှ ရှိတော့မည် မဟုတ်ပေ။

ထိုသို့ သတိကြီးစွာ ထားနေသည့် ကြားမှပင်...၊

သူ၏ ကျင့်ကြံခြင်း အဆင့် မြင့်မားလာသည်နှင့်အမျှ၊ နင်ချီသည် 'အတွင်းဂိုဏ်း၏ နံပါတ်တစ် ပါရမီရှင်' ဟူသော ဂုဏ်ပုဒ်ကို ရရှိလာခဲ့လေသည်။

လုဇီယွဲ့မှာ အံ့အားသင့်ပြီးရင်း သင့်နေရတော့သည်။ ဘာမှ မတတ်သော ကလေးပေါက်စ အရွယ်မှနေ၍ ဤအဆင့်ထိ ရောက်ရှိလာသော နင်ချီ၏ ကြီးထွားမှုကို သူမ မျက်ဝါးထင်ထင် တွေ့မြင်ခဲ့ရသည် မဟုတ်ပါလော။

ဒါက သူမ၏ စိတ်ကူးယဉ်မှုများထက်ပင် ကျော်လွန်နေတော့၏။ ယခုအခါ နင်ချီ၏ ကျင့်ကြံခြင်း အဆင့်သည် သူမကိုပင် ကျော်တက်တော့မည့် အခြေအနေသို့ ရောက်ရှိနေပြီ ဖြစ်သည်။

ထိုနေ့တွင်...၊

လုဇီယွဲ့သည် ညဘက်ကြီး နင်ချီထံသို့ ရောက်လာခဲ့သည်။ သူမသည် သူမ၏ ခံစားချက်များကို ဖွင့်ဟပြောဆိုပြီးနောက် ရှုပ်ထွေးသော စိတ်ခံစားမှုများဖြင့် ပြန်လည် ထွက်ခွာသွားခဲ့သည်။

"ဂျူနီယာညီလေး နင်...၊ ဒီတစ်ခေါက် အစ်မ ထွက်သွားရင် 'မူလဝိညာဉ် နယ်ပယ်' ကို ချိုးဖျက်ဖို့ သီးသန့် ကျင့်ကြံတော့မယ်...၊ မောင်လေးရဲ့ အင်မော်တယ် လမ်းခရီး ဖြောင့်ဖြူးပါစေလို့ ဆုတောင်းပေးခဲ့ပါတယ်..."

သူမ၏ ရင်ထဲတွင် အကျပ်အတည်း တစ်ခုကို ခံစားနေရသည်။

နင်ချီက သူမကို ကျော်တက်တော့မည် ဟု ခံစားမိသည့် အချိန်တွင်၊ နောင်တစ်ချိန် သူ့ကို 'စီနီယာအစ်ကို' ဟု ပြန်ခေါ်ရမည့် အရေးကို တွေးမိပြီး ပြောမပြတတ်အောင် နေရခက်နေမိသည်။

နင်ချီသည် ခေါင်းကိုသာ ခါယမ်းလိုက်ရင်း ပြုံးလိုက်မိတော့သည်။

သူ၏ မသိမသာ ကူညီပံ့ပိုးမှုများကြောင့် လုဇီယွဲ့ အနေဖြင့် 'မူလဝိညာဉ် နယ်ပယ်' သို့ တက်လှမ်းရန် ခက်ခဲမည် မဟုတ်သော်လည်း၊ အချိန် ဘယ်လောက် ကြာမလဲ ဆိုတာတော့ မသေချာပေ။ လုဇီယွဲ့၏ ရည်ရွယ်ချက်ကို သူ နားလည်သည်။

သူမသည် 'မူလဝိညာဉ် နယ်ပယ်' မရောက်မချင်း သီးသန့်ကျင့်ကြံရာမှ ထွက်လာမည် မဟုတ်ပေ။ ထိုသို့ ပြုလုပ်နိုင်ရန်အတွက် သူမသည် ဆယ်စုနှစ်များစွာ တာဝန်မထမ်းဆောင်ဘဲ နေနိုင်ရန် ဂုဏ်ပြုမှတ် အများအပြားကို အသုံးပြုခဲ့ရသည်။

သူမနှင့် ပြန်ဆုံတွေ့ရဖို့ အချိန်တစ်ခု စောင့်ရဦးမည်ဟု နင်ချီ ကြိုတင် ခံစားမိလိုက်၏။

မျက်စိတစ်မှိတ် အတွင်းမှာပင် နောက်ထပ် (၁၀) နှစ် ကုန်လွန်သွားခဲ့ပြန်သည်။

ယခုနှစ်တွင် နင်ချီသည် အသက် (၂၄) နှစ် အရွယ်သို့ ရောက်ရှိနေပြီ ဖြစ်သည်။ သူသည် အတွင်းဂိုဏ်း၏ နံပါတ်တစ် ပါရမီရှင် သာမက၊ နံပါတ်တစ် အစွမ်းအထက်ဆုံး ပုဂ္ဂိုလ်လည်း ဖြစ်လာခဲ့သည်။

မရေမတွက်နိုင်သော တပည့်များသည် သူ့ကို လေးစားအားကျနေကြပြီး၊ 'အစစ်အမှန် တပည့်'များကပင် သူ့ကို လေးစားမှု ပြသကြ၏။

နင်ချီ တစ်ယောက်.. ဘယ်တော့များမှ 'အစစ်အမှန် တပည့်' ဖြစ်လာမလဲ ဟု လူအများက ထင်ကြေးပေး ပြောဆိုနေကြ၏။ သူသည် အကန့်အသတ်မဲ့ ဓားဂိုဏ်း သမိုင်းတစ်လျှောက်တွင် အစွမ်းထက်ဆုံး ပါရမီရှင် ဖြစ်လာကောင်း ဖြစ်လာနိုင်ပေသည်။

ထိုနှစ်တွင် လုဇီယွဲ့ သီးသန့်ကျင့်ကြံနေသည်မှာ (၁၀) နှစ် ရှိပြီ ဖြစ်သော်လည်း ပြန်ထွက်မလာသေးပေ။

နင်ချီကတော့... 'မူလဝိညာဉ် နယ်ပယ်' အဆင့်ရှိ 'အစစ်အမှန် ဧကရာဇ်' တစ်ပါး အဖြစ်သို့ ရောက်ရှိရန် လက်တစ်ကမ်း အလိုသို့ ရောက်ရှိနေခဲ့တော့၏။တော့၏။