အခန်း (၉၂၃-၉၂၄)

အခန်း ၉၂၃ ။ တစ်ချက်တည်းနှင့် နာမည်ကြီးသွားမည့် ဧည့်ခံပွဲ (အပိုင်း ၅)

အနောက်တိုင်းသားများအတွက်မူ ဤအစားအစာသည် သူတို့ မကြိုက်နှစ်သက်ဆုံး ဟွာရှအစားအစာဖြစ်သည်။

သို့သော် လက်ဖက်ရည်၊ အရက်နှင့် ဟင်းပွဲများ တစ်ပွဲပြီးတစ်ပွဲရောက်ရှိလာသောအခါ သူတို့၏ မျက်နှာကို ပြင်းထန်စွာ ရိုက်နှက်လိုက်သကဲ့သို့ ဖြစ်သွားကြသည်။ သူတို့သည် သူဌေးကြီးများဆိုသော အဆင့်အတန်းကို ဂရုမစိုက်နိုင်တော့ဘဲ အင်္ကျီလက်ပင့်ကာ တစ်ဝိုင်းတည်းထိုင်သူများနှင့် အရက်လု၊ ဟင်းလု၊ သစ်သီးလု ဖြစ်ကုန်ကြသည်။ သူတို့ အထောက်အထားနှင့် မလိုက်ဖက်သော အပြုအမူများကို လုပ်ဆောင်နေကြသည်။

အရှက်ကွဲတယ်ဆိုတာကိုတော့ ထားလိုက်ပါတော့။ ဘာပဲဖြစ်ဖြစ် သူတို့တစ်ယောက်တည်း လုနေတာ မဟုတ်ဘူး၊ အားလုံး လုနေကြတာပဲ။ တစ်ယောက်အရှက်ကွဲရင် အားလုံး အရှက်ကွဲတာပဲ။ အခုတော့ အရှက်ကွဲတယ်လို့တောင် မထင်တော့ဘူး။

ကံကောင်းသည်မှာ ကုန်းထျန်းဟောက်သည် ဤကဲ့သို့ အခြေအနေမျိုး ဖြစ်လာနိုင်သည်ကို ကြိုတင် တွက်ဆထားသဖြင့် အစားအသောက်များကို လုံလောက်စွာ ပြင်ဆင်ထားသည်။

စားပွဲပေါ်ရှိ ပန်းကန်ခွက်ယောက်များ ပြောင်သလင်းခါသွားသောအခါ အားလုံးသည် ဗိုက်ကားနေကြပြီး ကုလားထိုင် နောက်မှီကိုမှီကာ လုံးဝန်းနေသော ဗိုက်များကို ပွတ်သပ်နေကြသည်။

မူလက သူတို့သည် ဤနေ့လယ်စာကို ကောင်းကောင်းစားရလိမ့်မည်။ ဗိုက်ဝအောင် စားရလိမ့်မည်ဟု မမျှော်လင့်ထားခဲ့ကြပေ။ ဘာပဲပြောပြော သူတို့က ဟွာရှအစားအစာစားရတာ အကျင့်မရှိဘူးလေ။

ရလဒ်ကတော့... ဟဟ...

သူဌေးကြီးတစ်ဦးက ကုန်းထျန်းဟောက်ကို ပြောလိုက်သည်။ "ကုန်း... ဒီနေ့လယ်စာက ကျွန်တော့်ကို ဗိုက်ကွဲလုမတတ် ဖြစ်စေတယ်။ ဒီလောက် ဗိုက်ဝအောင် စားဖူးတာ ဒါ ပထမဆုံးပဲ"

ယခုခေတ် သူတို့အတွက် ကျန်းမာရေး ထိန်းသိမ်းမှုကို အလေးထားကြသဖြင့် ပုံမှန် အစားအသောက် စားသောက်ရာတွင် အာဟာရမျှတမှုကို ဂရုစိုက်ကြသည်။ နည်းနည်းစီ စုံလင်အောင် စားပြီး ၇၀ ရာခိုင်နှုန်းလောက် ဗိုက်ဝရင် တော်ပြီ။

ဗိုက်ဝအောင် စားရတာ ပျော်ရွှင်မှုတစ်ခုလို့ သူတို့ ဘယ်တုန်းကမှ မတွေးခဲ့ဖူးဘူး။ ဘာပဲပြောပြော သူတို့က ပိုက်ဆံမရှား၊ အာဏာမရှားတဲ့သူတွေလေ။ အဓိကက စံစားဖို့ပဲ။ သူတို့ရှေ့မှာ ဘယ်လောက် စားကောင်းတဲ့ အစားအစာပဲရှိရှိ သာမန်ပါပဲ။

ဒါပေမဲ့ ဒီနေ့တော့ သူတို့ တကယ် မထိန်းချုပ်နိုင်ခဲ့ကြဘူး။

ကုန်းထျန်းဟောက်သည် ကြားလိုက်ရသော်လည်း ပြုံးရုံသာ ပြုံးနေပြီး ဘာမှ ပြန်မပြောပေ။

ထို့နောက် အခြား သူဌေးကြီးတစ်ဦးကလည်း "ဟားဟား... ကုန်း၊ ဒီလိုသာ နေ့တိုင်း စားနေရင် ကျွန်တော့် ကိုယ်အလေးချိန် တက်လာပြီး ခဏလေးနဲ့ ဝက် ဖြစ်သွားလိမ့်မယ်" သူတို့ ထိန်းချုပ်နိုင်စွမ်း မရှိတာ မဟုတ်ပါဘူး၊ ဒီအစားအစာတွေက ထိန်းချုပ်ဖို့ ခက်ခဲလွန်းလို့ပါ။

ကုန်းထျန်းဟောက်က ပြုံး၍ ပြောလိုက်သည်။ "စိတ်မပူပါနဲ့၊ ဒီအစားအစာတွေက ဘယ်လောက်စားစား မဝပါဘူး။ ပြီးတော့ ကျွန်တော် ပြောပြမယ်... ကျွန်တော့်အိမ်က ပစ္စည်းတွေက ခန္ဓာကိုယ်အတွက် အကျိုးရှိစေတယ်၊ ဆေးဘက်ဝင် အာနိသင်တောင် ရှိတယ်။ ဥပမာ - အိပ်မပျော်တဲ့သူတွေ ကျွန်တော့်အိမ်က ပစ္စည်းတွေ စားပြီးရင် ကောင်းကောင်း အိပ်ပျော်သွားမယ်။ နာတာရှည် ရောဂါ ရှိတဲ့သူတွေလည်း ခဏခဏ စားပေးရင် မနာတော့ဘူး၊ ရောဂါတောင် ပျောက်ကင်းသွားနိုင်တယ်"

ကုန်းထျန်းဟောက်သည် အခွင့်ကောင်း ယူပြီး ကုန်ပစ္စည်း မိတ်ဆက်လိုက်သည်။

သူဌေးကြီးများ ကြားလိုက်ရသောအခါ အံ့သြသွားကြပြီး မယုံကြည်နိုင် ဖြစ်နေကြသည်။

ဒီအစားအစာတွေ၊ သစ်သီးတွေက စားလို့ကောင်းတာ မှန်ပေမဲ့ သာမန် အစားအစာနဲ့ သစ်သီးပဲလေ။

တကယ်လို့ ဒီဟင်းသီးဟင်းရွက်နဲ့ သစ်သီးတွေမှာ အဲဒီလို အာနိသင် ရှိတယ် ဆိုရင် တစ်ကမ္ဘာလုံးမှာ လူနာဆိုတာ ရှိတော့မှာ မဟုတ်ဘူး။ ဘာလို့လဲဆိုတော့ လူတိုင်း ဟင်းသီးဟင်းရွက်နဲ့ သစ်သီး စားကြတာပဲလေ။

သူတို့ မယုံကြည်သော မျက်နှာထားများကို ကြည့်ပြီး ကုန်းထျန်းဟောက်က တိုက်ရိုက် ပြောလိုက်သည်။ "ခင်ဗျားတို့ ကြည့်လိုက်ရင် သာမန် ဟင်းသီးဟင်းရွက်နဲ့ သစ်သီးတွေလို့ ထင်ရပေမဲ့ တကယ်တမ်းကျတော့ စိုက်ပျိုးတဲ့ မြေဆီလွှာနဲ့ အဆင့်မြင့် နည်းပညာတွေ သုံးပြီး အညစ်အကြေးတွေ ဖယ်ရှားထားလို့ အဆီအနှစ်တွေပဲ ချန်ထားတာပါ။ ဒါကြောင့် အရောင်အသွေးနဲ့ အရသာ ဒီလောက် ကောင်းမွန်နေတာပါ"

ဤနေရာသို့ ရောက်သောအခါ သူ ခနရပ်လိုက်ပြီး မေးလိုက်သည်။ "အရင်တုန်းက ဒီလို ဟင်းသီးဟင်းရွက်နဲ့ သစ်သီးမျိုး တွေ့ဖူးလား။ ဒီလောက် စားလို့ကောင်းတဲ့ အစားအစာနဲ့ သစ်သီးမျိုး စားဖူးလား"

သူဌေးကြီးများက မလိမ်ဘဲ ဖြေလိုက်ကြသည်။ "ဒါတော့ မစားဖူးဘူး" အရင်တုန်းက စားဖူးရင် အခုလို ကိုယ့်ဂုဏ်သိက္ခာကို ဘေးချိတ်ပြီး ထမင်းဝိုင်းမှာ လုစားနေစရာ အကြောင်း မရှိဘူး။

"ဒါပေါ့" ကုန်းထျန်းဟောက် ခေါင်းညိတ်လိုက်သည်။ "ဒီဟင်းသီးဟင်းရွက်နဲ့ သစ်သီးတွေ အကုန်လုံးက ကျွန်တော်တို့ ကိုယ်ပိုင် စိုက်ခင်းက ထွက်တာတွေပါ။ အဆင့်မြင့် နည်းပညာ သုံးပြီး အညစ်အကြေးတွေ ဖယ်ရှားကာ အဆီအနှစ်တွေပဲ ချန်ထားတာမို့လို့ ဘယ်လောက်စားစား ကိုယ်အလေးချိန် မတက်ပါဘူး"

သူဌေးကြီးများ မယုံကြည်နိုင်စွာ မေးလိုက်ကြသည်။ "ကုန်း... ဒီပစ္စည်းတွေ အကုန်လုံး ခင်ဗျားတို့ ကိုယ်ပိုင် စိုက်ခင်းက ထွက်တာလား"

ကုန်းထျန်းဟောက် ခေါင်းညိတ်လိုက်ပြီး ပြောသည်။ "တကယ်တမ်း ပြောရရင် ကျွန်တော့်ဇနီး ရှောင်လင်းယွီ စိုက်ပျိုးထားတာပါ။ ဒီနေ့ စားသောက်တဲ့ ပစ္စည်းတွေ အကုန်လုံးက ဟွာရှက ထောင်ယွမ်ရွာ စိုက်ခင်းကနေ သယ်လာတာပါ"

"ထောင်ယွမ်ရွာ စိုက်ခင်း" သူဌေးကြီး တစ်ဦးက ရေရွတ်လိုက်ပြီး မေးလိုက်သည်။ "ဒါဆို Green Freshအုပ်စုကရော"

"ဟာ... မစ္စတာလွိုက်၊ ခင်ဗျားက Green Freshအုပ်စုကို သိတယ်လား" ကုန်းထျန်းဟောက် အံ့သြစွာ မေးလိုက်သည်။

ဒီမှာရှိတဲ့ လူတွေအကုန်လုံးက ကုန်းထျန်းဟောက် ဖိတ်ကြားထားတဲ့ ကမ္ဘာ့အထက်တန်းလွှာတွေ၊ အထောက်အထား ကြီးမားတဲ့သူတွေ၊ အာဏာရှိတဲ့သူတွေ။

ထောင်ယွမ်ရွာ စိုက်ခင်း သို့မဟုတ် Green Freshအုပ်စု ဆိုတာ ဟွာရှမှာ နာမည်ကြီးပြီး သာမန် ပြည်သူတွေ အမြင်မှာ ဘီလီယံ ရာပေါင်းများစွာ တန်ဖိုးရှိတဲ့ ကုမ္ပဏီကြီး တစ်ခု။

ဒါပေမဲ့ ဒီကုမ္ပဏီကြီးက ဒီမှာရှိတဲ့ လူတွေ အမြင်မှာတော့ မပြောပလောက်တဲ့၊ အရေးမပါတဲ့ ကုမ္ပဏီလေး တစ်ခုပဲ။

ကုမ္ပဏီအသေးစားလေး တစ်ခုကို သူတို့ ဂရုစိုက်နေမှာ မဟုတ်ဘူး။

ဒါကြောင့် လွိုက်ဆီကနေ Green Freshအုပ်စု ဆိုတဲ့ နာမည် ကြားလိုက်ရတော့ ကုန်းထျန်းဟောက် အံ့သြသွားတာပင်။

လွိုက်က ရယ်မောရင်း ပြောလိုက်သည်။ "လွန်ခဲ့တဲ့ ရက်ပိုင်းက ကျွန်တော့် လက်အောက်ငယ်သား တစ်ယောက် ဟွာရှ သွားပြီး အလုပ်ကိစ္စလုပ်တုန်းက ဟိုဘက်က မိတ်ဖက်က ထောင်ယွမ်ရွာ စိုက်ခင်းကို ခေါ်သွားတာ။ အဲဒီကနေ ထောင်ယွမ်ရွာ စိုက်ခင်းနဲ့ Green Freshအုပ်စု အကြောင်း သိလာတာ"

ဤနေရာသို့ ရောက်သောအခါ သူ ခနရပ်လိုက်ပြီး ရယ်ချင်သလို ပြောလိုက်သည်။ "အဲဒီတုန်းက သူက ကျွန်တော့်ကို ပြောတယ်၊ ထောင်ယွမ်ရွာ စိုက်ခင်းက ဘယ်လောက် လှပကြောင်း၊ အထဲက ပစ္စည်းတွေက ဘယ်လောက် စားလို့ကောင်းကြောင်း ပြောတုန်းက ကျွန်တော် ထင်ခဲ့တာ သူ ပိုပြောနေတယ်လို့။ ဒါပေမဲ့ အခု ကျွန်တော်တို့ စားလိုက်တဲ့ နေ့လယ်စာက ထောင်ယွမ်ရွာ စိုက်ခင်းက လာတယ် ဆိုတာ သိလိုက်ရတော့မှ ကျွန်တော့် လက်အောက်ငယ်သား ပိုပြောတာ မဟုတ်မှန်း သိလိုက်ရတယ်"

ထိုစဉ်က လက်အောက်ငယ်သားက သူ့ကို သေချာ ပြောပြခဲ့သော်လည်း မိတ်ဖက်ဆီက အကျိုးအမြတ် ရထားလို့ Green Freshအုပ်စုက ဟင်းသီးဟင်းရွက်နဲ့ သစ်သီးတွေ ဝယ်ခိုင်းတာလို့ သူ ထင်ခဲ့တယ်။

အခုမှ သိလိုက်ရတယ်၊ အဲဒီ လက်အောက်ငယ်သားက အမှန်အတိုင်း ပြောခဲ့တာပဲ၊ ပြီးတော့ သူ့အတွက် တကယ် စေတနာထားတာပဲ။

ကုန်းထျန်းဟောက် ကြားလိုက်ရသောအခါ ပြုံး၍ ပြောလိုက်သည်။ "ဪ... ဒီလိုကိုး"

ထောင်ယွမ်ရွာနှင့် Green Freshအုပ်စု အကြောင်း ပြောလာမှတော့ ကုန်းထျန်းဟောက်အနေဖြင့် ဆက်လက် မိတ်ဆက်ပေးရန် ဝန်လေးမည် မဟုတ်ပေ။

သူက ပြောသည်။ "ထောင်ယွမ်ရွာ စိုက်ခင်းက မူလက ထောင်ယွမ်ရွာ လို့ ခေါ်ပါတယ်။ ရှုခင်းတွေ လှပတဲ့ ရွာလေး တစ်ရွာပါ။ မက်မွန်ပွင့်တွေက ထူးခြားချက်ဖြစ်ပြီး မက်မွန်သီးက ဒေသထွက်ကုန်ပါ။ ခရီးသွားတွေ အများကြီး လာရောက်လည်ပတ်ကြပါတယ်။

အဲဒါက ကျွန်တော့်ဇနီး မွေးဖွားကြီးပြင်းခဲ့တဲ့ လှပတဲ့ ဇာတိမြေပါ။

လွန်ခဲ့တဲ့ ၄ နှစ်က ကျွန်တော့်ဇနီးက ထောင်ယွမ်ရွာကို ပြုပြင်ပြောင်းလဲမှုတွေ လုပ်ခဲ့တယ်..."

ထို့နောက် ကုန်းထျန်းဟောက်သည် ထောင်ယွမ်ရွာ၏ လှပသော ထူးခြားချက်များ၊ ရှောင်လင်းယွီ အပန်းဖြေစခန်းအဖြစ် ပြောင်းလဲခဲ့ပုံများကို တစ်ခုချင်း ပြောပြလိုက်သည်။

ပုံမှန်အားဖြင့် အလုပ်များပြီး အရိပ်တောင် မတွေ့ရသော သူဌေးကြီးများသည် ယခုအခါ ဗိုက်တင်းနေအောင် စားထားပြီး ဗိုက်ကို ပွတ်သပ်ရင်း ကုန်းထျန်းဟောက် ပြောပြသော ရွာငယ်လေး တစ်ရွာ၏ ပြုပြင်ပြောင်းလဲမှု ပုံပြင်ကို စိတ်ရှည်လက်ရှည် နားထောင်နေကြသည်။ သူတို့အတွက် ဒါက အချိန်ဖြုန်းတာ သက်သက်ပဲ။

အချိန်ဖြုန်းတာက အသက်ဖြုန်းတာနဲ့ အတူတူပဲ။

ဒါပေမဲ့ အခု အားလုံးက အလေးအနက် နားထောင်နေကြပြီး ထိုလှပသော ရွာလေးကို တောင့်တနေသကဲ့သို့ ဖြစ်နေကြသည်။

"အို... ကုန်း၊ အဲဒီ ထောင်ယွမ်ရွာ စိုက်ခင်းက တကယ်ပဲ အဲဒီလောက် လှပလား" သူဌေးကြီး တစ်ဦးက သံသယဖြင့် မေးလိုက်သည်။

မစ္စတာကုန်း ပြောပြနေတဲ့ ရှုခင်းတွေက လူ့ပြည်က နတ်ဘုံနတ်နန်းလိုပဲ၊ အရမ်း လှပလွန်းလို့ သံသယ ဖြစ်စရာ ကောင်းနေတယ်။

ကုန်းထျန်းဟောက်က ပြောသည်။ "ဟဟ... အားလုံး စိတ်ဝင်စားတယ်ဆိုရင် ထောင်ယွမ်ရွာ စိုက်ခင်းရဲ့ ဗီဒီယိုကို အခု ဖွင့်ပြပေးမယ်လေ၊ ဘယ်လိုလဲ"

"အဲဒါ အကောင်းဆုံးပဲ" တစ်ယောက်က ချက်ချင်း ထောက်ခံလိုက်သည်။

ဘာပဲဖြစ်ဖြစ် အခု သူတို့ ဗိုက်တင်းနေပြီး အားနေတာပဲ၊ ထောင်ယွမ်ရွာ စိုက်ခင်း ဘယ်လောက် လှပလဲ ဆိုတာ ကြည့်လိုက်ရအောင်။

ရှောင်လင်းယွီ "..."

အထက်တန်းလွှာ အမျိုးသမီးများ "..."

ဆိုတော့... ပုံမှန်ဆို တစ်နှစ်ပတ်လုံး အလုပ်များနေတဲ့ လူတွေက ဒီနေ့တော့ ရွာလေးတစ်ရွာရဲ့ ဗီဒီယို ကြည့်ဖို့ အားနေကြတယ်ပေါ့။

မှန်ပါသည်... ဤအမျိုးသမီးများသည်လည်း ထောင်ယွမ်ရွာ စိုက်ခင်း မည်မျှ လှပသလဲ၊ ဘာကြောင့် ထူးခြားသော ဟင်းသီးဟင်းရွက်နှင့် သစ်သီးများကို စိုက်ပျိုးနိုင်သလဲ ဆိုသည်ကို သိချင်နေကြသည်။

ကုန်းထျန်းဟောက် အမိန့်ပေးလိုက်သည်နှင့် ဝန်ထမ်းများက ပရိုဂျက်တာကို လျင်မြန်စွာ ပြင်ဆင်လိုက်ကြသည်။

ထောင်ယွမ်ရွာမြင်ကွင်း ထွက်ပေါ်လာသည်နှင့် အားလုံးကို ဆွဲဆောင်သွားခဲ့သည်။

လှပသော ထောင်ယွမ်ရွာသည် ကောင်းကင်အပြည့် ပျံဝဲနေသော ပန်းရောင် ပန်းပွင့်ဖတ်များ ဝန်းရံထားပြီး အိပ်မက်လိုလို၊ စိတ်ကူးယဉ်လိုလို ဖြစ်နေသည်။

ထို့နောက် ပုံရိပ်များ တစ်ခုပြီး တစ်ခု ပရိုဂျက်တာမှတဆင့် အားလုံးရှေ့တွင် ပေါ်လာသည်။

ဗီဒီယို နောက်ခံတေးဂီတမှလွဲ၍ ခန်းမတစ်ခုလုံး တိတ်ဆိတ်ငြိမ်သက်နေပြီး မျက်လုံးများ အရောင်တောက်ကာ ထောင်ယွမ်ရွာ စိုက်ခင်းဟု ခေါ်သော အလှတရားတွင် နစ်မြောနေကြသည်။

၁၅ မိနစ် ကြာပြီးနောက် ဗီဒီယို ပြီးဆုံးသွားသော်လည်း အားလုံး သတိမဝင်နိုင်သေးပေ။

အချိန် မည်မျှ ကြာသွားသည် မသိ၊ တစ်ယောက်က အာမေဋိတ်သံ ပြုလိုက်သည်။ "အို... ဘုရားရေ၊ ဒါ လူ့ပြည်က နတ်ဘုံနတ်နန်းလား။ ဘယ်လိုလုပ် ဒီလောက်လှပတဲ့ နေရာမျိုး ရှိနိုင်ရတာလဲ"

"ဒါ ကျွန်တော် မြင်ဖူးသမျှ အလှပဆုံး နေရာပဲ"

...

တဖြည်းဖြည်းနှင့် အားလုံး သတိဝင်လာကြပြီး ဆွေးနွေးပြောဆိုနေကြသည်။

ဘာပဲပြောပြော ဒီထောင်ယွမ်ရွာဆိုတဲ့ နေရာကို မရောက်ဖူးပေမဲ့ ဗီဒီယိုကြည့်ရုံနဲ့တင် ကိုယ်တိုင် ရောက်သွားသလို ခံစားရပြီး တောင့်တမှု၊ လိုချင်မှုတွေ ဖြစ်ပေါ်လာစေတယ်။ ဒါက ရင်ထဲက တုန်လှုပ်မှု တစ်မျိုးပဲ။

ထိုအချိန်တွင် တစ်ယောက်က ကုန်းထျန်းဟောက်ကို မေးလိုက်သည်။ "ကုန်း... ဒါ ထောင်ယွမ်ရွာ စိုက်ခင်းလား။ ခင်ဗျားဇနီး မွေးဖွားကြီးပြင်းခဲ့တဲ့ နေရာလား။ ဒီနေရာက တကယ်ပဲ ဒီလောက် လှလား" သူတို့ ကုန်းထျန်းဟောက်ကို သံသယဝင်တာ အပြစ်မဆိုသာပါဘူး၊ အဓိကက ဗီဒီယိုနဲ့ လက်တွေ့ဘဝက ကွာခြားတတ်တယ်လေ။

ဗီဒီယို ရိုက်ကူးထားတဲ့ အရာအများစုက ပိုလှအောင် ပြုပြင်မွမ်းမံထားတတ်ကြတယ်။

ကုန်းထျန်းဟောက်က ပြုံး၍ ပြောလိုက်သည်။ "ကျွန်တော့်ဇနီး မွေးဖွားခဲ့တဲ့ နေရာက တကယ် လှပပါတယ်။ ပြီးတော့ အဲဒီနေရာက လူကို ပြုစုပျိုးထောင်ပေးတဲ့ နေရာကောင်း တစ်ခုပါ၊ ကိုယ်ကျင့်တရား လေ့ကျင့်ဖို့ နေရာကောင်း တစ်ခုပါ။ ကျွန်တော့်အဘိုး အသက် ၈၀ ကျော် အဘိုးအိုကြီးတောင် အဲဒီမှာ ခဏလောက်နေလိုက်တာ အခု ကြည့်ရတာ ပိုပို နုပျိုလာတယ်"

ထို့နောက် ဇနီးသည် မပါလာသော သူဌေးကြီး တစ်ဦးက ရယ်မောရင်း ပြောလိုက်သည်။ "အဲဒီနေရာက လူကို ပြုစုပျိုးထောင်ပေးတဲ့ နေရာကောင်းဆိုတာ ဟုတ်လောက်တယ်။ ကြည့်ပါဦး... ခင်ဗျားဇနီးကို ပြုစုပျိုးထောင်ထားတာ ကလေးမွေးပြီးတာတောင် ဒီလောက် စိုပြည်ပြီး လှပနေတုန်းပဲ"

အခြားသူများလည်း ချက်ချင်း ထောက်ခံကြသည်။ "ဟားဟား... ဟွာရှ စကားပုံ တစ်ခု ကြားဖူးတယ်၊ 'ဒေသတစ်ခုက ရေမြေက ဒေသတစ်ခုက လူကို ပြုစုပျိုးထောင်တယ်' တဲ့။ ထောင်ယွမ်ရွာက အဲဒီလောက် လှပတဲ့ နေရာဆိုတော့ မွေးထုတ်လိုက်တဲ့ သားသမီးတွေကလည်း လှပကြတာပေါ့၊ မစ္စစ်ကုန်း လိုမျိုးပေါ့"

"ထောင်ယွမ်ရွာက တကယ်ပဲ နတ်ဘုရားတွေနေတဲ့နေရာ ဖြစ်လောက်တယ်။ ပြုစုပျိုးထောင်လိုက်တဲ့ လူတွေက လှပသလို စိုက်ပျိုးလိုက်တဲ့ ပစ္စည်းတွေကလည်း ထူးခြားပြီး အရသာ ရှိတယ်"

"ကျွန်တော် အဲဒီ လူ့ပြည်က နတ်ဘုံနတ်နန်းကို တကယ် သွားကြည့်ချင်တယ်"

"ကျွန်တော်တို့လည်း သွားကြည့်ချင်တယ်"

...

အားလုံးက သူတို့ရဲ့ သိချင်စိတ်ကို ဖြည့်ဆည်းဖို့ သွားရောက် ကြည့်ရှုချင်ကြောင်း ဆွေးနွေးနေကြသည်။

အထူးသဖြင့် အထက်တန်းလွှာ အမျိုးသမီးများ ဖြစ်သည်။

ပုံမှန်အားဖြင့် ခင်ဗျားသည်က အလုပ်များလွန်း၍ အရိပ်ပင် မတွေ့ရဘဲ သူတို့ကမူ ကျောက်ရုပ်ကဲ့သို့ ခင်ပွန်းသည် ပြန်လာမည်ကို စောင့်မျှော်နေရသည်၊ သို့မဟုတ် အထက်တန်းလွှာ အသိုင်းအဝိုင်းမှ ပွဲလမ်းသဘင်များကို တက်ရောက်ပြီး နေ့စဉ် အလုပ်မရှိ ဖြစ်နေကြသည်။

ယခု အနားယူ အပန်းဖြေရန် နေရာကောင်း တစ်ခု တွေ့ရှိထားပြီ ဖြစ်ရာ သေချာပေါက် သွားရောက် ကြည့်ရှုချင်ကြသည်။

***

စိုက်ပျိုးရေးနေရာလွတ်က ငါ့ကိုချမ်းသာလာစေတယ်

အခန်း ၉၂၄ ။ နေ့လယ်စာ စားပြီးနောက်

နေ့လယ်စာ စားပြီးနောက် အားလုံးသည် စားသောက်ခန်းမတွင် ခဏကြာ အနားယူကာ စကားစမြည် ပြောဆိုကြပြီးနောက် လူစုခွဲလိုက်ကြသည်။

ဗိုက်ဝသွားသောကြောင့် တချို့က စံအိမ်ထဲ လျှောက်လည်ကြသည်၊ တချို့က အခန်းပြန်ပြီး အနားယူကြသည်။

ညစာစားပွဲကို စောင့်ဆိုင်းနေကြသည်။

သာမန် နေ့လယ်စာ တစ်နပ်မျှသာဖြစ်ပြီး ယခင်က သူတို့ အထင်မကြီးသော နေ့လယ်စာ ဖြစ်သော်လည်း သူတို့အတွက် အမှတ်ရစရာ အကောင်းဆုံး၊ မေ့မရနိုင်ဆုံး နေ့လယ်စာ ဖြစ်လာလိမ့်မည်ဟု မည်သူမျှ ထင်မှတ်မထားခဲ့ကြပေ။

ညစာစားပွဲအတွက် သူတို့ ရုတ်တရက် မျှော်လင့်လာကြသည်။

ညစာစားပွဲကို ညနေ ၅ နာရီခွဲတွင် စတင်မည် ဖြစ်သည်။

မလာရောက်ခင်က လူတိုင်းသည် ကိုယ့်အတွက် ညနေခင်းဝတ်စုံများ ပြင်ဆင်လာခဲ့ကြပြီး ညဘက်တွင် လူအများ အံ့သြသွားအောင် ပြင်ဆင်ရန် ရည်ရွယ်ထားကြသည်။

ဟဟ... ဒါက အထက်တန်းလွှာတွေကြားက အလှပြိုင်ပွဲလေး တစ်ခုပါပဲ။

……

သူဌေးကြီးများနှင့် လူစုခွဲပြီးနောက် ကုန်းထျန်းဟောက်၊ ရှောင်လင်းယွီ၊ ဘရူးစ်နှင့် ကျန့်ယောင်ကျူတို့သည် အစည်းအဝေး အသေးစားလေး တစ်ခု ပြုလုပ်ကြသည်။

"ဟားဟား..."

ကုန်းထျန်းဟောက်၏ စာကြည့်ခန်းထဲ ရောက်သည်နှင့် ကျန့်ယောင်ကျူက ဝမ်းသာအားရ ရယ်မောလိုက်သည်။

"ဒီကမ္ဘာ့အထက်တန်းလွှာတွေက ကျွန်တော်တို့နဲ့ ဘာကွာခြားမလဲလို့ တွေးနေတာ။ တကယ်တမ်းကျတော့ ကျွန်တော်တို့ သာမန်လူတွေနဲ့ ဘာမှ မကွာခြားပါလား။ တူတွေ၊ ဓားတွေ၊ ခက်ရင်းတွေ ကိုင်ပြီး စားပွဲပေါ်မှာ အစားအသောက် လုနေကြတာ၊ အထက်တန်းလွှာ သူဌေးကြီး ပုံစံ လုံးဝ မပေါက်ဘူး။ အပြင်က သတင်းထောက်တွေသာ သိသွားရင် ဘယ်လိုရေးကြမလဲ မသိဘူး။ ဟဟ..."

ရှောင်လင်းယွီက မကျေမနပ် ပြောလိုက်သည်။

"တော်ပါတော့... ရှင် ရယ်ချင်ရင် ခဏပဲ ရယ်ပါ၊ အပြင်ကလူတွေ ကြားသွားပါဦးမယ်။ တချို့လူတွေက ဘေးအခန်းမှာ နားနေကြသေးတာ"

ကျန့်ယောင်ကျူ ပါးစပ်ကို ချက်ချင်း အုပ်လိုက်ပြီး ခေါင်းခါကာ ပြောလိုက်သည်။

"ဒါဆို မရယ်တော့ဘူး"

ဘရူးစ်က သူ့ခေါင်းကို ပုတ်ပြီး လှောင်ပြောင်လိုက်သည်။

"ဟဟ... ကျန့်၊ အသံလုံစနစ် ဆိုတာ မကြားဖူးဘူးလား။ ဒါက မစ္စတာကုန်းရဲ့ စာကြည့်ခန်းလေ၊ အသံလုံစနစ်က ဘယ်လောက် ကောင်းမလဲ စဉ်းစားကြည့်။ ဒါကြောင့် စိတ်ချ၊ မင်း ဒီမှာ ဘယ်လောက် ကျယ်ကျယ်ရယ်ရယ်၊ ဘယ်လောက် ကျယ်ကျယ်ပြောပြော အပြင်က ကြားမှာ မဟုတ်ဘူး"

ကုန်းထျန်းဟောက်နှင့် ရှောင်လင်းယွီ "..." ကလေးဆန်လိုက်တာ။

"ဪ... ဟုတ်လား" ကျန့်ယောင်ကျူ ချက်ချင်း သတိရသွားပြီး အသံကျယ်ကြီးဖြင့် ပြောလိုက်သည်။ "ဒါဆိုရင်တော့ တကယ် ကောင်းတာပေါ့"

သူ အရမ်းပျော်နေလို့ ရယ်သံကို ထိန်းချုပ်မထားချင်ဘူး။

"ဟားဟား... ဒီ အထက်တန်းလွှာ ဆိုတဲ့လူတွေက ဒီတစ်ခေါက်တော့ ကိုယ့်အထောက်အထားနဲ့ ဂုဏ်သိက္ခာကိုတောင် ဂရုမစိုက်နိုင်ဘဲ ထမင်းဝိုင်းမှာ အစားအသောက် လုနေကြတယ်။ ကျွန်တော် ကိုယ်တိုင် မကြုံဖူးရင် ဘယ်ယုံမလဲ" ကျန့်ယောင်ကျူက ပျော်ရွှင်စွာ ပြောလိုက်သည်။

ဘရူးစ်က ခေါင်းညိတ် ထောက်ခံလိုက်သည်။

"ကျွန်တော်လည်း မထင်ထားဘူး၊ သူတို့က ဂုဏ်သိက္ခာကို ဂရုမစိုက်ဘဲ ထမင်းဝိုင်းမှာ အစားအသောက် လုကြလိမ့်မယ်လို့"

သူတို့ အထောက်အထားနဲ့ ကလေးတွေလို အစားအသောက် လုနေတာ စဉ်းစားကြည့်လို့တောင် မရဘူး။ ဒီလူတွေက အထောက်အထား ရှိတယ်၊ အာဏာ ရှိတယ်၊ ဘာစားစရာ ကောင်းတာ မစားဖူးလို့လဲ။

ဒါပေမဲ့ ဒီလူတွေက ဟင်းတစ်ပွဲအတွက်နဲ့ ရန်ဖြစ်လုနီးပါး ဖြစ်ခဲ့ကြတာ ဘေးကကြည့်နေတဲ့ သူတို့အတွက် မျက်စိပွင့်သွားစေတယ်။

တကယ်တော့ ဒီလူကြီးတွေကလည်း သာမန်လူတွေပါပဲ။

ဘရူးစ်က ဆက်ပြောသည်။

"တကယ်တော့ ဒါက မျှော်လင့်ထားပြီးသား အခြေအနေ မဟုတ်ဘူးလား။ ကျွန်တော် ပြောသားပဲ... လူမှန်သမျှ ဘယ်သူက ဒီလို အရသာကို ငြင်းဆန်နိုင်မှာလဲ"

ဒါကြောင့် သူက အမြော်အမြင် ကြီးကြီးနဲ့ Green Freshအုပ်စုကို ရွေးချယ်လိုက်တာ။

ဘာလို့လဲဆိုတော့ ဒီဟင်းသီးဟင်းရွက်နဲ့ သစ်သီးတွေကို စားချင်ရင် အချိန်မရွေး စားလို့ရတယ်လေ။ တခြားလူတွေလို ညလုံးပေါက် တန်းစီဝယ်စရာမလိုဘူး။ တန်းစီရင်တောင် ဝယ်လို့ရမရ ဆိုတာကလည်း မသေချာသေးဘူး။

"လူမှန်သမျှ ထမင်းဝိုင်းရောက်ရင် ဒီလို အရသာမျိုး ရှေ့ရောက်လာရင် လုစားဖို့ ရွေးချယ်ကြမှာပဲ" ဘရူးစ်က ရယ်မောရင်း ပြောလိုက်သည်။

ကုန်းထျန်းဟောက်က မျက်ခုံးပင့်လိုက်ပြီး အေးစက်စွာ ပြောလိုက်သည်။

"ဟဟ... မင်းတို့နှစ်ယောက် ဒီလောက် ကျယ်ကျယ်ပြောနေရင် အပြင်ကလူတွေ ဝင်လာကြတော့မယ်"

အလှောင်ခံရတာ ဘယ်သူမှ လက်မခံချင်ကြဘူး။

ကုန်းထျန်းဟောက်၏ သတိပေးသံကို ကြားသောအခါ ဘရူးစ် ပါးစပ် ချက်ချင်း ပိတ်သွားသည်။ ကျန့်ယောင်ကျူလည်း တည်ငြိမ်သွားသည်။ ကုန်းထျန်းဟောက်၏ လက်ရှိပုံစံကို ကြည့်ပြီး သူတို့ ကြောက်ရွံ့နေကြသည်။ ဘာပဲပြောပြော ကုန်းထျန်းဟောက်၏ အရှိန်အဝါနှင့် အေးစက်မှုသည် သူတို့ စိတ်ထဲတွင် စွဲထင်နေဆဲ ဖြစ်သည်။

"အဟမ်း..." ရှောင်လင်းယွီက ဝင်ရောက် ဖြန်ဖြေလိုက်သည်။ "ကဲ... ရှင်တို့ ပြောလည်း ပြောပြီးပြီ၊ ရယ်လည်း ရယ်ပြီးပြီ၊ အလုပ်ကိစ္စ ပြောကြရအောင်"

သူမသည် ဘရူးစ်နှင့် ကျန့်ယောင်ကျူကို တစ်ချက် ကြည့်လိုက်ပြီး လေးနက်စွာ ပြောလိုက်သည်။

"ဒီနေ့ နေ့လယ် လက်ဖက်ရည်ဝိုင်းနဲ့ နေ့လယ်စာရဲ့ ရလဒ်က ကျွန်မတို့ မျှော်မှန်းထားတာထက် ကျော်လွန်နေတယ်"

ဘရူးစ်က လက်ထောင်ပြီး ပြောလိုက်သည်။

"တကယ်တော့ ကျွန်တော်တို့ မျှော်မှန်းထားတဲ့ အတိုင်းပါပဲ"

ကျန့်ယောင်ကျူ ခေါင်းညိတ် ထောက်ခံလိုက်သည်။ "ဟုတ်တယ်"

ဘရူးစ် ပြောသကဲ့သို့ပင် လူမှန်သမျှ ဤကဲ့သို့ အရသာမျိုးကို တွေ့မြင်လိုက်ပါက မည်သူမျှ ငြင်းဆန်နိုင်မည် မဟုတ်ပေ။

အစတုန်းက သူတို့လည်း ဒီလိုပဲ ဖြစ်ခဲ့ကြတာ မဟုတ်လား။

တကယ်တော့ အခုထိ သူတို့လည်း အစားအသောက် လုတာကို မထိန်းချုပ်နိုင်ကြသေးဘူး။

မထိန်းချုပ်နိုင်လို့ကိုပဲ ထောင်ယွမ်ရွာမှာ ထမင်းစားရင် လုစားတာက အလေ့အထသစ် တစ်ခု၊ ဓလေ့ထုံးစံ တစ်ခု ဖြစ်လာပြီး ခရီးသွားတွေကို ဆွဲဆောင်တဲ့ ထူးခြားချက် တစ်ခု ဖြစ်လာတာ။

ရှောင်လင်းယွီ ငြင်းဆန်ခြင်း မပြုဘဲ ပြောလိုက်သည်။

"ဟုတ်ပါတယ်... ဒါပေမဲ့ ရလဒ်ကတော့ ကျွန်မတို့ မျှော်မှန်းထားတာထက် အများကြီး ကျော်လွန်နေပါတယ်"

အစတုန်းက သူတို့ ထင်ထားတာက အစားအသောက် ဘယ်လောက် ကောင်းကောင်း ဒီသူဌေးကြီးတွေက ဂုဏ်သိက္ခာကို ငဲ့ကွက်ပြီး နေရာမှာတင် အထောက်အထားနဲ့ မလိုက်ဖက်တဲ့ အပြုအမူတွေ လုပ်မှာ မဟုတ်ဘူးလို့ ထင်ထားတာ။ ကိစ္စပြီးမှ အောက်လူတွေကို လွှတ်ပြီး အစားအသောက် ဇာစ်မြစ်ကို မေးခိုင်းမယ်လို့ ထင်ထားတာ။

မထင်မှတ်ထားတာက သူတို့က နေရာမှာတင် အစားအသောက် ဇာစ်မြစ်ကို စိတ်ဝင်စားသွားပြီး ထောင်ယွမ်ရွာ အကြောင်း မေးမြန်းလာတာ၊ ပြီးတော့ ထောင်ယွမ်ရွာကို စိတ်ဝင်စားမှု ပြင်းထန်လာတာတွေပါပဲ။

ဘရူးစ်က

"ဒါဆို ပိုကောင်းသွားပြီပေါ့။ သူတို့က ကျွန်တော်တို့ ကုန်ပစ္စည်းကို နားလည်သွားပြီ၊ ထောင်ယွမ်ရွာ စိုက်ခင်းကို နားလည်သွားပြီ၊ ကျွန်တော်တို့ Green Freshအုပ်စုကို သိသွားပြီ။ ဒါဆိုရင် ကျွန်တော်တို့ သူတို့ဆီမှာ ဆိုင်ဖွင့်ဖို့က အများကြီး လွယ်ကူသွားပြီပေါ့"

ကျန့်ယောင်ကျူကလည်း "အင်း... ဟုတ်တယ်။ ကျွန်တော်တို့က နေရာအသီးသီးမှာ နေရာရွေးပြီးပါပြီ၊ ဖွင့်ပွဲရက် သတ်မှတ်ပြီး ဖွင့်လှစ်ဖို့ပဲ ကျန်တော့တယ်"

သူတို့ နိုင်ငံခြား ဈေးကွက်ကို ချဲ့ထွင်ရန် ပြင်ဆင်စဉ်ကတည်းက နိုင်ငံခြား ဈေးကွက်အတွက် အနေအထား သတ်မှတ်ထားပြီး ဖြစ်သည်။

အားလုံး အဆင့်မြင့် ဇိမ်ခံလမ်းကြောင်းကို သွားမည်၊ ကြိုတင်မှာယူခြင်းနှင့် အိမ်အရောက် ပို့ဆောင်ပေးခြင်း ဝန်ဆောင်မှုပေးမည်။

ရည်ရွယ်ထားသော ဖောက်သည်များမှာ အာဏာရှိ၊ ငွေရှိသော အထက်တန်းလွှာများ ဖြစ်သည်။

ဟဟ... ကြည့်ရတာ ဟွာရှက အာဏာရှိ၊ ငွေရှိတဲ့ အထက်တန်းလွှာတွေနဲ့တော့ သိသိသာသာ ကွာခြားနေသလိုပဲ။

Green Freshအုပ်စုက ဟွာရှက အာဏာရှိ၊ ငွေရှိတဲ့ အထက်တန်းလွှာတွေကို အထင်သေးသလို ဖြစ်မနေဘူးလား။

တကယ်တမ်း အကြီးမားဆုံး ကွာခြားချက်ကတော့ နိုင်ငံခြားမှာ Green Freshအုပ်စုက သာမန်လူတန်းစား လမ်းကြောင်း မသွားဘူး၊ သာမန်လူတွေ Green Freshအုပ်စုရဲ့ ပစ္စည်းတွေကို ဝယ်လို့မရဘူး။

ဟွာရှမှာတော့ တန်းစီလိုက်ရင် ဘယ်သူမဆို ဝယ်လို့ရတယ်။ ဟွာရှမှာ အားလုံး တန်းတူညီမျှ အခွင့်အရေး ရှိတယ်။

ရှောင်လင်းယွီ ဒီလိုလုပ်ရတဲ့ ရည်ရွယ်ချက်က သာမန် ပြည်သူလူထုတွေ ရောဂါကြီးတွေ ခံစားနေရတဲ့အခါ မျှော်လင့်ချက်နဲ့ အခွင့်အရေးတစ်ခုရစေချင်လို့ပါ။

ဒါကြောင့် ဈေးကြီးတယ်လို့ ထင်ရတဲ့ ပစ္စည်းတွေက တကယ်တမ်းကျတော့ တန်ဖိုးက ဈေးနှုန်းထက် အများကြီး ကျော်လွန်နေပါတယ်။

ဒါပေမဲ့ သာမန်လူတွေ မမြင်နိုင်ကြဘူး။

နိုင်ငံခြားမှာတော့ အချက်အလက် အမျိုးမျိုးကို ထည့်သွင်းစဉ်းစားရမယ်။ ဥပမာ - ကုန်ပစ္စည်း ရှားပါးမှု၊ သယ်ယူပို့ဆောင်ရေး စရိတ် ကြီးမြင့်မှု စတာတွေပေါ့။ ရှောင်လင်းယွီက စီးပွားရေးသမား ဖြစ်တဲ့အတွက် အကျိုးအမြတ်ကို ဦးစားပေး စဉ်းစားရမှာပဲ။

အချက်အလက် အမျိုးမျိုး ပေါင်းစပ်လိုက်တဲ့အခါ သာမန် ပြည်သူလူထုက ဝယ်ယူနိုင်စွမ်း မရှိတော့ဘူး။

နိုင်ငံခြား အမှတ်တံဆိပ် ပစ္စည်းတွေ ဟွာရှ သူဌေးတွေကို ရောင်းသလိုပေါ့။ ပစ္စည်းသေးသေးလေး တစ်ခုကို သောင်းချီ၊ သိန်းချီ တန်နေတော့ သာမန် ပြည်သူလူထုက ဝယ်နိုင်စွမ်း မရှိသလို ဝယ်လို့ရမယ့် လမ်းကြောင်းလည်း မရှိဘူး။

***