အခန်း (၁၃၃-၁၃၅)

အခန်း (၁၃၃) - အမှောင်နတ်ဘုရား ဆေးလုံး၊ မြေကမ္ဘာနှင့် သစ်သား ပေါင်းစပ်မှု အောင်မြင်ခြင်း (အပိုင်း ၄)

~သူတို့သည် မည်သို့မျှ ထင်မှတ်မထားခဲ့ကြပေ။

စုချင်းယီသည် သွေးဓားကဲ့သို့သော မိစ္ဆာတစ်ဦးနှင့် ပူးပေါင်းမည်ဟု လည်းကောင်း၊ အခြေခံ တည်ဆောက်ခြင်း အဆင့် ကျင့်ကြံသူ (၁၃) ဦးနှင့် ချီယန်တောင် တစ်ခုလုံးရှိ သက်ရှိများကိုပါ ယဇ်ပူဇော်ခဲ့သည့် ပိုင်ယန် မိစ္ဆာ တာအိုဆရာနှင့်ပါ လက်ဝါးချင်း ရိုက်လိမ့်မည်ဟု လည်းကောင်း မည်သူက တွေးမိပါမည်နည်း။

ယခုမူ သူသည် ထိုလူနှစ်ဦးကို ချန်တောင်တန်း အနီးအနားအထိ ခေါ်ဆောင်လာပြီး ချန်တောင်တန်းကိုပါ ပစ်မှတ်ထားနေပြီ ဖြစ်ချေသည်။

သူ မည်သည့်အရာကို ပြုလုပ်ရန် ကြိုးစားနေသနည်း။

သူ၏ မိစ္ဆာလမ်းစဉ် ခိုင်မာစေရန်အတွက် စုမိသားစု တစ်ခုလုံးကို ဖျက်ဆီးပစ်ရန် ကြံရွယ်နေခြင်းလော။

"ဟူး"

အချိန်အတော်ကြာမှ၊ စုယွင်သည် မျက်လုံးများကို မှိတ်လိုက်ပြီး သက်ပြင်းတစ်ချက် ရှိုက်လိုက်မိလေ၏။ စုချင်းယီသည် တစ်ချိန်က သူ့ထံတွင် ဆေးပညာကို နှစ်အနည်းငယ်ကြာအောင် သင်ယူခဲ့ဖူးသူ တစ်ဦး ဖြစ်ပါလျက်နှင့် ယခုအခါ မည်သို့လုပ်ပြီး ဤအခြေအနေအထိ ရောက်ရှိသွားရသနည်း။

ကျွေးမွေးစောင့်ရှောက်ခဲ့သည့် လက်ကို ပြန်ကိုက်တတ်သော ကျေးဇူးကန်းသည့် ခွေးရူးတစ်ကောင်ထက်ပင် ဆိုးရွားလွန်းလှပေသည်။

စုယွီက တည်ငြိမ်စွာ ပြောလိုက်သည်။

"ဒီရက်ပိုင်း ကျွန်တော်တို့ သတိထားမှ ဖြစ်မယ်... တောင်ကာကွယ်ရေး အခင်းအကျင်းကို အချိန်ပြည့် ဖွင့်ထားရမယ်... ပြီးတော့ ပိုင်ယန် ဆေးပညာရှင်၊ သွေးဓားနဲ့ စုချင်းယီတို့ ပူးပေါင်းပြီး ချန်တောင်တန်း အနီးအနားမှာ ရောက်နေတယ် ဆိုတဲ့ သတင်းကို ယွင်ကျန်းဂိုဏ်း၊ ယွီမိသားစု၊ ကျန်းမိသားစု၊ ဟွမ်မိသားစုနဲ့ တခြား အင်အားစုတွေဆီ ဖြန့်လိုက်ပါ"

"ပိုင်ယန် ဆေးပညာရှင်၊ သွေးဓားနဲ့ စုချင်းယီတို့ရဲ့ အင်အားကို လျှော့တွက်လို့ မရဘူး... ကျွန်တော်တို့ စုမိသားစု တစ်ခုတည်းနဲ့ သူတို့ကို ယှဉ်နိုင်မှာ မဟုတ်ဘူး... ယွင်ကျန်းဂိုဏ်းနဲ့ တခြားသူတွေကိုပဲ ကိုင်တွယ်ခိုင်းလိုက်ပါ"

"စုယွီလေး အကြံပေးတဲ့အတိုင်း လုပ်ကြတာပေါ့"

ဟု စုပင်းက ပြန်လည် တုံ့ပြန်လိုက်၏။

စုဖုန်းကလည်း ခေါင်းငြိမ့်ထောက်ခံလိုက်လေ၏။

"ကောင်းပြီ... လူလွှတ်ပြီး ယွင်ကျန်းဂိုဏ်း၊ ယွီမိသားစု၊ ကျန်းမိသားစုနဲ့ ဟွမ်မိသားစုတို့ကို အကြောင်းကြားလိုက်ပါ့မယ်"

ရုတ်တရက် စုယွီက ထပ်မံ ဖြည့်စွက် ပြောကြားလိုက်သည်။

"ဒါ့အပြင် ဒီသတင်းကို ပိုင်ယွဲ့ အင်မော်တယ် မြို့တော်က အမှန်တရား ခန်းမဆီကိုပါ ပို့ပေးလိုက်ပါ... ဘာပဲဖြစ်ဖြစ် သူတို့က ဒုတိယအဆင့် ထိပ်တန်း ဆေးပညာရှင် တစ်ယောက် ဆုံးရှုံးလိုက်ရတာလေ... ပိုင်ယန် မိစ္ဆာ တာအိုဆရာကို အရှင်လတ်လတ် ဝါးစားချင်နေလောက်ပြီ... သူတို့ကို သတင်းပေးလိုက်ရင် သူတို့လည်း တစ်ဖက်တစ်လမ်းကနေ ပါဝင်လာနိုင်တာပေါ့"

ထိုအခါ၊ စုပင်း၊ စုဖုန်းနှင့် စုယွင်တို့သည် စုယွီကို ထူးဆန်းသော အမူအရာဖြင့် ကြည့်လိုက်ကြ၏။

သူ့စကားများသည် အနည်းငယ် ထူးဆန်းနေသယောင် ရှိပေသည်။

တစ်ခုခုကို မျှော်လင့်နေသကဲ့သို့ပင်။

—--------

ရက်အနည်းငယ် ကြာပြီးနောက်၊ စုမိသားစုက သတင်းဖြန့်လိုက်သည်နှင့် တပြိုင်နက် အင်အားစု အများအပြား၏ အာရုံစိုက်မှုသည် ချန်တောင်တန်းဆီသို့ ရောက်ရှိလာကြပြီး ထင်ကြေး အမျိုးမျိုး ဂယက်ထလာလေ၏။ ပိုင်ယန် ဆေးပညာရှင်သည် ချီယန်တောင်မှ ထွက်ပြေးလွတ်မြောက်လာပြီးနောက် အသစ်စက်စက် ထွက်ပေါ်လာသော ဆေးပညာရှင် မိသားစု ဖြစ်သည့် စုမိသားစုကို ပစ်မှတ်ထားလိမ့်မည်ဟု မည်သူမျှ ထင်မှတ်မထားခဲ့ကြပေ။

ထို့အပြင် လွန်ခဲ့သော နှစ်များစွာက စုမိသားစုကို သစ္စာဖောက်သွားခဲ့သည့် လူတစ်ယောက်က ယခုအချိန်တွင် သွေးဓား လော့ပန်း၊ မီးလျှံဖြူ ဆေးပညာရှင်တို့နှင့်အတူ ပြန်ရောက်လာလိမ့်မည်ဟုလည်း ဘယ်သူမျှ တွေးမထားခဲ့ကြချေ။

သူတို့ ဘာလုပ်ရန် ရည်ရွယ်ထားကြသနည်း။

ကျေးဇူးတရားကို ပြန်ဆပ်ရန် မဟုတ်သည်မှာ သေချာနေပြီ ဖြစ်ရာ၊ မိသားစု တစ်ခုလုံးကို ယဇ်ပူဇော်ပစ်ရန် ကြံစည်နေကြခြင်းသာ ဖြစ်တန်ရာ၏။

စုယွီကမူ အပြင်လောက၏ အရှုပ်အထွေးများကို ဂရုမစိုက်တော့ပေ။ သွေးဓားတို့ သုံးဦး ပြန်လည် ပေါ်ထွက်မလာတော့သဖြင့် သူသည် ချန်တောင်တန်း၌ပင် အေးအေးဆေးဆေး တံခါးပိတ် ကျင့်ကြံနေလိုက်တော့သည်။ မြေကမ္ဘာနှင့် သစ်သား ပေါင်းစပ် ကျင့်စဉ် ဒုတိယအဆင့် ကို ပေါင်းစပ်ရန် ကြိုးစားရင်း၊ တစ်ဖက်မှာလည်း 'ကောင်းကင်ဖီးနစ် နိဗ္ဗာန် သိုင်းကျမ်း' ကို ကျင့်ကြံနေလေ၏။

သူသည် ဓာတ်ကြီးငါးပါးကို အသုံးပြုပြီး သူ၏ ရွှေရောင် အမြုတေ လမ်းစဉ်ကို ကျင့်ကြံရန် ရည်ရွယ်ထားခြင်း ဖြစ်၏။

ထို့ကြောင့် မြေကမ္ဘာနှင့် သစ်သား ပေါင်းစပ် ကျင့်စဉ်သည် အဓိက သော့ချက် ဖြစ်သလို၊ မီး၊ သတ္တု၊ ရေ ဟူသော ကျန်ရှိသည့် ဓာတ်သဘာဝ သုံးမျိုးကို ကျင့်ကြံရန်လည်း သူ့အစီအစဉ်ထဲတွင် ထည့်သွင်းထားရပေမည်။

အကယ်၍ ပေါင်းစပ်ထားသော ဓာတ်ကြီးငါးပါး မှော်စွမ်းအင်များက ရွှေရောင် အမြုတေ ဖွဲ့စည်းရာတွင် အထောက်အကူ မပြုနိုင်ပါက ဓာတ်ကြီးငါးပါး ကျင့်စဉ်များကို ပေါင်းစပ်ရန် စဉ်းစားရတော့မည် ဖြစ်သည်။ သူနှင့် သင့်တော်မည့် ဓာတ်ကြီးငါးပါး ကျင့်စဉ် တစ်ခုကို ကိုယ်တိုင် ဖန်တီးရပေလိမ့်မည်။

လဝက်ခန့် ကြာသောအခါ၊

'ကောင်းကင်ဖီးနစ် နိဗ္ဗာန် သိုင်းကျမ်း' သည် (ပဉ္စမအဆင့်) ကို ထိုးဖောက် ဝင်ရောက်နိုင်ခဲ့ပြီး၊ သူ၏ ကျင့်ကြံမှု အဆင့်သည်လည်း ချီစွမ်းအင် စုစည်းခြင်း (အဆင့် ၅) သို့ ရောက်ရှိသွားခဲ့လေ၏။

ဤတိုးတက်မှုသည် ယခင်က 'ရွှမ်မင် မြေကမ္ဘာ သိုင်းကျမ်း' ကျင့်ကြံစဉ်ကထက် များစွာ ပိုမို မြန်ဆန်နေပေသည်။

သို့သော် စုယွီ မသိလိုက်သည်မှာ စုမိသားစု ကိစ္စကြောင့် ယွင်ကျန်းဂိုဏ်း အတွင်း၌ ပဋိပက္ခ တစ်ခု ဖြစ်ပွားနေသည် ဆိုသော အချက်ပင်။ ဂိုဏ်းချုပ်၏ မျိုးဆက်များသည် စုချင်းယီ၏ အခြေအနေကို အခွင့်ကောင်းယူပြီး စုမိသားစု တစ်ခုလုံးကို အပြစ်ပေးရန် အဆိုပြုခဲ့ကြသော်လည်း၊ ပထမ အကြီးအကဲက တားဆီးခဲ့ပြီး ဂိုဏ်းချုပ် မျိုးဆက်များနှင့် ထိပ်တိုက် တွေ့ဆုံရန် စစ်မြေပြင် တစ်ခုအဖြစ် အသုံးပြုခဲ့လေ၏။

ဂိုဏ်းချုပ် မျိုးဆက်နှင့် ပထမ အကြီးအကဲ မျိုးဆက်တို့သည် နောက်တစ်ကြိမ် ပေါ်ပေါ်ထင်ထင် ထိပ်တိုက် တွေ့ဆုံခဲ့ကြပြန်၏။

နောက်ဆုံးတွင် ဂိုဏ်းချုပ် မျိုးဆက်က ပုန်းအောင်းပြီး အသက်ရှင်သန်ရန် ရွေးချယ်လိုက်သဖြင့် မျိုးဆက် နှစ်ခုကြားက တင်းမာမှုများ ခေတ္တ လျော့ပါးသွားခဲ့သည်။ ပထမ အကြီးအကဲ မျိုးဆက်၏ ကာကွယ်မှုအောက်တွင် စုမိသားစုသည် ကပ်ဘေးမှ သီသီလေး လွတ်မြောက်သွားခဲ့ရသည်။

ဤကိစ္စသည် စုမိသားစုကို တိုက်ရိုက် ရည်ရွယ်ခြင်း မဟုတ်ပေ။ ဂိုဏ်းချုပ် မျိုးဆက်က ပထမ အကြီးအကဲ မျိုးဆက်ကို စမ်းသပ်သည့် နောက်ထပ် လုပ်ရပ်တစ်ခု သက်သက်သာ ဖြစ်၏။ ကံကောင်းထောက်မစွာပင် ပထမ အကြီးအကဲ မျိုးဆက်က ဖိအားများကို ခံနိုင်ရည် ရှိနေသေးပြီး အဆုံးထိ ခေါင်းမာမာဖြင့် ခုခံရန် ရွေးချယ်ခဲ့ကြလေ၏။

ယွင်ကျန်းဂိုဏ်း အတွင်းမှ ပြဿနာများ အပြင်၊ နောက်ထပ် လဝက်အကြာတွင် ချန်တောင်တန်းဆီသို့ နောက်ထပ် ကပ်ဘေးတစ်ခု ကျရောက်လာခဲ့သည်။

ဟွမ်မိသားစုနှင့် ကျန်းမိသားစုတို့၏ ခေါင်းဆောင်များ ဖြစ်ကြသော အခြေခံ တည်ဆောက်ခြင်း (အဆင့် ၉) ကျင့်ကြံသူများသည် အခြေခံ တည်ဆောက်ခြင်း အဆင့် ကျင့်ကြံသူ (၁၀) ဦး ပါဝင်သည့် အဖွဲ့ကို ဦးဆောင်ပြီး ချန်တောင်တန်းရှိ စုမိသားစု နေအိမ် အပြင်ဘက်သို့ ရောက်ရှိလာကြသည်။ သူတို့၏ ရည်ရွယ်ချက်မှာ အဆင့်မြင့် အဖွဲ့ဝင်များအတွက် တရားမျှတမှု ရှာဖွေရန်ဟု ဆိုကြလေ၏။

"မြစ်ရေစီးမြို့က စုမိသားစု... မင်းတို့က မိစ္ဆာလမ်းစဉ် လိုက်သူတွေနဲ့ ပူးပေါင်းပြီး ငါတို့ ကျန်းမိသားစုက အခြေခံ တည်ဆောက်ခြင်း အဆင့် (၁၃) ယောက်ကို ယဇ်ပူဇော်ခဲ့တယ်... ဝူယန်တောင်က သက်ရှိတွေ အားလုံးကိုတောင် ယဇ်ပူဇော်ခဲ့ကြတယ်... ဟွန့်... မင်းတို့... မင်းတို့ရဲ့ အပြစ်ကို ဝန်ခံမလား"

မိုးကြိုးပစ်ချလိုက်သကဲ့သို့ ဟိန်းညံသော အော်သံကြီးက ချန်တောင်တန်းပေါ်ရှိ လူတိုင်း၏ နားထဲတွင် ပဲ့တင်ထပ်သွားတော့သည်။

ခြံဝင်းအတွင်းမှာကား၊

စုယွီက ယွီချန်ချင်းနှင့် အခြားသူများကို ဆေးပညာ သင်ကြားပေးနေစဉ် မကောင်းဆိုးဝါး ဖိအားတစ်ခု ချဉ်းကပ်လာသည်ကို ခံစားလိုက်ရသဖြင့် မျက်နှာထား ပြောင်းလဲသွားလေ၏။

မလှမ်းမကမ်းတွင် ဟူတာ၊ ဟူအာတို့နှင့် ကစားနေသော ယွီခယ်အာသည်လည်း မျက်နှာထား ပြောင်းလဲသွားပြီး ချန်တောင်တန်း အပြင်ဘက်သို့ လှမ်းကြည့်လိုက်၏။

"ကျန်းမိသားစုက ဝါရင့် အကြီးအကဲ ကျန်းဝေ ပါလား"

ထို့နောက် အခြေခံ တည်ဆောက်ခြင်း (အဆင့် ၉) ရှိသည့် နောက်ထပ် အရှိန်အဝါ တစ်ခုကို ခံစားမိလိုက်ပြန်သည်။

"ဟွမ်မိသားစုက ဝါရင့် အကြီးအကဲ ဟွမ်ထျန်းဟွာ လည်း ပါတယ်"

အပြင်ဘက်မှ စွမ်းအားကြီးသော အရှိန်အဝါများကို အာရုံခံမိလိုက်သော စုယွီ၏ မျက်နှာက တည်ကြည်လေးနက်သွားပြီး ပြန်လည် တုံ့ပြန်မည့် နည်းဗျူဟာကို စိတ်ထဲတွင် တွေးတောလိုက်သည်။ ကျန်းမိသားစုနှင့် ဟွမ်မိသားစုတို့က စုမိသားစုကို ဆန့်ကျင်နေကြပြီ ဆိုသည်မှာ ထင်ရှားနေပေပြီ။ မိစ္ဆာလမ်းစဉ်နှင့် ပူးပေါင်းသည် ဆိုသည်မှာ အကြောင်းပြချက် သက်သက်သာ ဖြစ်ချေသည်။

စုမိသားစုကို ရှင်းပစ်ရန် အကြောင်းပြချက် တစ်ခုသာ ဖြစ်၏။

'အားနည်းခြင်းက အပြစ်တစ်ခုပါပဲ... တကယ်လို့ စုမိသားစုမှာသာ တုပ အမြုတေ အဆင့်၊ ဒါမှမဟုတ် အမြုတေ ဖွဲ့စည်းခြင်း အဆင့်လောက်သာ ရှိခဲ့ရင် ဒီမိသားစု နှစ်ခုက လေတောင် လည်ရဲမှာ မဟုတ်ဘူး'

စုယွီ စိတ်ထဲမှ တွေးလိုက်မိသည်။

စုယွီက တာအို ကိုယ်ပွား ရုပ်သေးကို လွှတ်ပြီး လျှို့ဝှက်ဆန်းကြယ်သော စွမ်းအားရှင် တစ်ဦး အနေဖြင့် မိသားစုကို ကာကွယ်ခိုင်းရန် ပြင်ဆင်လိုက်ချိန်မှာပင် ရင်းနှီးသော အသံတစ်သံ ထွက်ပေါ်လာလေ၏။

"ဟိုးဟိုးဟိုး... ကျန်းဝေ... ငါတို့ မတွေ့တာ သိပ်မကြာသေးပါဘူး... မင်းရဲ့ စရိုက်က အခုထိ အောက်တန်းကျနေတုန်းပါလား"

"ရွှစ်... ရွှစ်... ရွှစ်"

ပျံသန်းနေသော သားရဲထိန်း အဖွဲ့များ ထွက်ပေါ်လာပြီး ချန်တောင်တန်း ရှေ့တွင် ဆင်းသက်လိုက်ကြသည်။ ကျန်းဝေ၊ ဟွမ်ထျန်းဟွာနှင့် သူတို့၏ အဖွဲ့များကိုလည်း ပိတ်ဆို့ထားလိုက်ကြ၏။

ယွီပိုင်ဟယ်သည် သားရဲကောင်ကြီး တစ်ကောင်၏ ကျောပေါ်မှ ခုန်ဆင်းလိုက်ပြီး သူ၏ ရေခဲပမာ အေးစက်နေသော မျက်လုံးများဖြင့် စုဝေးနေသော လူအုပ်ကြီးကို စိုက်ကြည့်လိုက်လေတော့သည်။

အခန်း (၁၃၄) - အမှောင်နတ်ဘုရား ဆေးလုံး၊ မြေကမ္ဘာနှင့် သစ်သား ပေါင်းစပ်မှု အောင်မြင်ခြင်း (အပိုင်း ၅)

~"အကြီးအကဲ ကျန်း... အကြီးအကဲ ဟွမ်... ငါတို့ မတွေ့တာ တော်တော် ကြာနေပြီပဲ... ဟုတ်တယ်မလား"

ယွီပိုင်ဟယ်က အေးစက်စက် လေသံဖြင့် ပြောလိုက်သည်။

ကျန်းမိသားစု... ဟွမ်မိသားစု...

ရှေ့ဆုံးမှ ခေါင်းဆောင် ပုဂ္ဂိုလ် နှစ်ဦး၏ မျက်နှာထားများ အုံ့မှိုင်းသွားကြသည်။ ယွီပိုင်ဟယ် ကိုယ်တိုင်၏ ကျင့်ကြံခြင်း အဆင့်ဖြစ်သော အခြေခံ တည်ဆောက်ခြင်း (အဆင့် ၇) မှာ စိုးရိမ်စရာ မဟုတ်သော်လည်း၊ ဒုတိယအဆင့် ထိပ်တန်း သားရဲထိန်း တစ်ဦး ဖြစ်သောကြောင့် သူ၏ အင်အားကို ကိုယ်ပိုင် စွမ်းအား သက်သက်ဖြင့် တိုင်းတာ၍ မရပေ။

သူ့ကို သူ ယဉ်ပါးအောင် ထိန်းကျောင်းထားသော သားရဲများ၏ အင်အားဖြင့် တိုင်းတာရမည် ဖြစ်ပေသည်။

ကျန်းမိသားစုနှင့် ဟွမ်မိသားစု ဘက်တွင် အဖွဲ့ဝင် (၁၀) ဦး ရှိသော်လည်း ယွီမိသားစု ဘက်တွင်မူ (၄) ဦးသာ ရှိလေ၏။

သို့သော် ထို (၄) ဦးနှင့်အတူ ယဉ်ပါးသော သားရဲ (၁၂) ကောင် ပါလာခဲ့သည်။

ယွီပိုင်ဟယ်၏ ဘေးတွင် ရှိနေသော သားရဲမှာ ယွီမိသားစု၏ ကျော်ကြားသော ရွှေလင်းယုန် ဖြစ်ပြီး ဒုတိယအဆင့် ထိပ်တန်း အင်အား ရှိလေ၏။ အခြား သားရဲ (၂) ကောင်မှာလည်း ဒုတိယအဆင့် ထိပ်တန်း သားရဲများ ဖြစ်ကြပြီး ရွှေလင်းယုန်ထက် အနည်းငယ်သာ နိမ့်ကျသည်။

ကျန်ရှိသော သားရဲ (၉) ကောင်မှာမူ ဒုတိယအဆင့် အလယ်အလတ်တန်းစား အထက်တွင် ရှိကြသည်။

ထိုအချိန်တွင် သားရဲ (၁၂) ကောင်သည် ကျန်းမိသားစုနှင့် ဟွမ်မိသားစုမှ အဖွဲ့ဝင် (၁၀) ဦးကို စူးစိုက်ကြည့်နေကြသည်။

အခြေခံ တည်ဆောက်ခြင်း (အဆင့် ၉) ရှိကြသော ကျန်းဝေနှင့် ဟွမ်ထျန်းဟွာတို့ ခေတ္တမျှ တိတ်ဆိတ်သွားကြသည်။

ကျန်းဝေက ယွီပိုင်ဟယ်ကို ကြည့်ပြီး တည်ငြိမ်စွာ ပြောလိုက်သည်။

"ဒီကိစ္စက ယွီမိသားစုနဲ့ ဘာမှ မဆိုင်ဘူး... မင်း သေချာပေါက် ဝင်ပါချင်တာလား... ယွီပိုင်ဟယ်... သေချာ စဉ်းစားပါဦး"

ယွီပိုင်ဟယ်သည် အရပ်ရှည်ပြီး ကြံ့ခိုင်သန်စွမ်းကာ မတ်မတ်ရပ်နေပုံမှာ ကောင်းကင်သို့ ပျံတက်တော့မည့် နဂါးတစ်ကောင်နှင့် တူနေသည်။ သူတို့ကို ခြိမ်းခြောက်သော အကြည့်ဖြင့် စိုက်ကြည့်ရင်း စကားတစ်လုံးတည်း ပြောလိုက်သည်။

"ထွက်သွား"

သူ့စကားလုံးသည် ယွင်ကျန်းဂိုဏ်း လက်အောက်ရှိ နံပါတ်တစ် ကျင့်ကြံခြင်း မိသားစု ဖြစ်သော ယွီမိသားစု၏ ဂုဏ်သိက္ခာကို ကိုယ်စားပြုနေသည်။

စုမိသားစုသည် ယွီမိသားစု၏ အကာအကွယ်အောက်တွင် ရှိနေသည်မှာ ထင်ရှားလှပေသည်။

"မင်း... ဟွန့်... မင်းတို့ မိသားစု တကယ်ပဲ ဆုတ်ယုတ်နေပြီ... မင်းတို့ နောင်တရမယ့် အချိန် ရောက်လာလိမ့်မယ်"

ကျန်းဝေသည် အရှက်ရပြီး ဒေါသထွက်လွန်းသဖြင့် မျက်နှာများ နီရဲနေသည်။ ယွီပိုင်ဟယ်က ဤမျှ ရိုင်းစိုင်းစွာဖြင့် သူ့ကို ထွက်သွားရန် ပြောဆိုရဲလိမ့်မည်ဟု သူ ထင်မထားခဲ့မိပေ။

ကောင်းပြီလေ။

"သွားကြစို့"

ကျန်းဝေ၊ ဟွမ်ထျန်းဟွာနှင့် အခြားသူများသည် မကျေမနပ် မျက်နှာထားများဖြင့် ထွက်ခွာသွားကြသည်။ သူတို့သည် ယွီပိုင်ဟယ်ကို ရန်စရဲခြင်း မရှိသဖြင့် ဆေးပညာရှင် ပိုင်ယန်ကို အခြားနေရာတွင် ဆက်လက် လိုက်လံ ရှာဖွေရန်သာ တတ်နိုင်ကြတော့သည်။

ကျန်းမိသားစုနှင့် ဟွမ်မိသားစုဝင်များ ထွက်ခွာသွားသည်ကို မြင်သောအခါ ချန်တောင်တန်း ပေါ်မှ စုယွီ သက်ပြင်းချလိုက်မိသည်။

ယွီမိသားစု ရောက်လာခဲ့ပြီ ဖြစ်၏။

တိုက်ဆိုင်လွန်းလှသည်။ မိသားစု (၃) ခုလုံး တပြိုင်နက်တည်း ရောက်ရှိလာကြသည်။ အနည်းဆုံးတော့ ယွီမိသားစု ရောက်ရှိလာခြင်းက စုမိသားစု၏ တင်းမာနေသော အခြေအနေကို လျော့ပါးသွားစေခဲ့သည်။

ထို့နောက် စုယွီသည် ယွီခယ်အာနှင့် အခြားသူများနှင့်အတူ ယွီမိသားစုဝင်များကို ကြိုဆိုရန် သွားရောက်ခဲ့သည်။

ထိုည။

ယွီပိုင်ဟယ်နှင့် သူ့အဖွဲ့အတွက် စုမိသားစုက တည်ခင်းဧည့်ခံသော စားသောက်ပွဲတွင် ယွီပိုင်ဟယ်က ပေါ့ပေါ့ပါးပါး ပြောလိုက်လေသည်။

"စုမိသားစုက ယွင်ကျန်းဂိုဏ်းက အခင်းအကျင်း ပညာရှင်ကို ဖိတ်ခေါ်ပြီး ဒုတိယအဆင့် ထိပ်တန်း တောင်ကာကွယ်ရေး အခင်းအကျင်း တည်ဆောက်ထားတာ ကံကောင်းသွားတယ်... မဟုတ်ရင် အခြေအနေတွေ ဆိုးရွားသွားနိုင်တယ်"

စုယွီက ခါးသက်သက် ပြုံးလိုက်ပြီး ပြန်ပြောလိုက်သည်။

"ကျွန်တော်တို့က ဟန်ကိုယ့်ဖို့ လုပ်နေရတာပါ... အခင်းအကျင်းကို ထောက်ပံ့ပေးမယ့် ဒုတိယအဆင့် ဝိညာဉ်ကြော မရှိတော့ ဝိညာဉ်ကျောက်တုံးတွေ အများကြီး ကုန်ကျပါတယ်"

ထိုအခါ၊ ယွီပိုင်ဟယ်က မေးလိုက်သည်။

"စုယွီ.. ဒါဆိုရင် ဝူယန်တောင်ကို ဘာလို့ ဝင်မသိမ်းတာလဲ... အခုဆိုရင် ယွင်ကျန်းဂိုဏ်းက ပထမ အကြီးအကဲ မျိုးဆက်တွေက အဲဒီနေရာကို သိမ်းပိုက်ထားတယ်... စုမိသားစုနဲ့ ယွင်ကျန်းဂိုဏ်း ပထမ အကြီးအကဲ မျိုးဆက်တို့ရဲ့ ဆက်ဆံရေးရယ်... စုမိသားစုရဲ့ လျင်မြန်တဲ့ တိုးတက်မှုရယ်ကို ထည့်တွက်လိုက်ရင်... မင်းတို့ အဲဒီနေရာကို ရနိုင်မယ့် အခွင့်အရေး ကောင်းကောင်း ရှိတယ်လို့ ငါ ထင်တယ်"

"မကြာသေးခင်က ယွင်ကျန်းဂိုဏ်း ဂိုဏ်းချုပ် မျိုးဆက်တွေက စုချင်းယီ ကိစ္စကို အကြောင်းပြပြီး စုမိသားစုကို ဖိနှိပ်ဖို့ ကြိုးစားခဲ့ကြတယ်... ဒါပေမဲ့ ပထမ အကြီးအကဲက မင်းတို့ကို ကာကွယ်ပေးဖို့ အစွမ်းကုန် ကြိုးစားခဲ့တယ်လေ"

"စုမိသားစုက ယွင်ကျန်းဂိုဏ်း ပထမ အကြီးအကဲကို မှီခိုရမှာပဲ... ဝူယန်တောင်ကို သိမ်းပိုက်လိုက်တာ ဘာမှ မဖြစ်ပါဘူး"

"ဆေးပညာရှင် ပိုင်ယန်လို ကောင်တွေကတော့ ဝူယန်တောင် နားတောင် ကပ်ရဲမှာ မဟုတ်ဘူး... သူတို့ လာရင်တောင် မင်းတို့မှာ ခုခံနိုင်တဲ့ အင်အား ရှိပါတယ်"

‘ဘာ…

ဂိုဏ်းချုပ် မျိုးဆက်တွေက စုချင်းယီ ကိစ္စကို အသုံးချပြီး စုမိသားစုကို ဖျက်ဆီးဖို့ ကြိုးစားခဲ့ကြတာလား။’

စုယွီ၊ စုပင်း၊ စုဖုန်းနှင့် အခြား စုမိသားစုဝင်များ၏ မျက်နှာထားများ မသိမသာ ပြောင်းလဲသွားကြသည်။ ကျောပြင်မှ ချွေးစေးများ စီးကျလာပြီး ယွင်ကျန်းဂိုဏ်း ပထမ အကြီးအကဲသည် လူကောင်းတစ်ယောက် ဖြစ်ပြီး မိမိလူများကို ထပ်ခါတလဲလဲ ကူညီပေးခဲ့သည့်အတွက် တိတ်တဆိတ် ဝမ်းမြောက်မိကြသည်။

ယခုမှ သူတို့ သဘောပေါက်လိုက်ကြသည်။

အချိန်တိုအတွင်းမှာပင် သူတို့ မိသားစုသည် ကပ်ဘေးနှစ်ခုမှ သီသီလေး လွတ်မြောက်ခဲ့ရခြင်း ဖြစ်သည်။

ဝူယန်တောင် ကိစ္စနှင့် ပတ်သက်၍ စုယွီ ဝင်ရောက် စွက်ဖက်ခြင်း မပြုဘဲ မိသားစု အကြီးအကဲများနှင့် ယွီပိုင်ဟယ်တို့ကို ဆွေးနွေးတိုင်ပင်စေကာ ဝူယန်တောင်ကို သိမ်းပိုက်ခြင်း၏ ကောင်းကျိုး ဆိုးကျိုးများကို ချိန်ဆစေခဲ့သည်။

ကောင်းကျိုးမှာ ထင်ရှားလှသည်။ အကယ်၍ သူတို့သည် ဝူယန်တောင်ရှိ ဒုတိယအဆင့် ဂူစံအိမ်ကို မိသားစု အခြေစိုက်စခန်း အဖြစ် အသုံးပြုနိုင်ပါက စုမိသားစု၏ အခြေခံ အုတ်မြစ်သည် များစွာ တိုးတက်လာမည် ဖြစ်သည်။

တပြိုင်နက်တည်းမှာပင် မိသားစုဝင်များ၏ ကျင့်ကြံခြင်းကိုလည်း များစွာ အထောက်အကူ ပြုပေလိမ့်မည်။

သို့သော် ဆိုးကျိုးလည်း ရှိနေသည်။ ပထမ အကြီးအကဲ မျိုးဆက်သည် လောလောဆယ် ယွင်ကျန်းဂိုဏ်း အတွင်း၌ အားနည်းနေချိန် ဖြစ်သည်။ အကယ်၍ သူတို့က ဝူယန်တောင် ဂူစံအိမ်ကို သိမ်းပိုက်လိုက်ပါက စုမိသားစုနှင့် ယွင်ကျန်းဂိုဏ်း ပထမ အကြီးအကဲ မျိုးဆက်တို့၏ ဆက်ဆံရေးသည် ပိုမို နက်ရှိုင်းသွားပေလိမ့်မည်။

အနာဂတ်တွင် ယွင်ကျန်းဂိုဏ်း ပထမ အကြီးအကဲ တစ်ခုခု ဖြစ်သွားပါက စုမိသားစုလည်း အလွယ်တကူ ရောပါသွားနိုင်သည်။

သို့သော် ဤဆိုးကျိုးနှင့် ပတ်သက်၍ စုမိသားစု အနေဖြင့် ဂရုမစိုက်တော့ပေ။

သူတို့ ဝူယန်တောင် ဂူစံအိမ်ကို မသိမ်းပိုက်လျှင်တောင်မှ ယွင်ကျန်းဂိုဏ်း ဂိုဏ်းချုပ် မျိုးဆက်၏ မျက်စိစူးစရာ ဖြစ်နေပြီးသား ဖြစ်သည်။

ယခုတစ်ကြိမ်တွင် သူတို့သည် စုချင်းယီ ကိစ္စကို အသုံးပြုပြီး စုမိသားစုကို ကိုင်တွယ်ရန်ပင် ကြိုးစားခဲ့ကြသည်။

သူတို့ မိသားစုအတွက် နောက်ဆုတ်စရာ လမ်းကျန်သေးပါသလော။

စုယွီသည် ဤကိစ္စကို ဝင်ရောက် ကိုင်တွယ်ခြင်း မပြုခဲ့သလို၊ ယွီပိုင်ဟယ်သည်လည်း ချန်တောင်တန်းပေါ်တွင် ကြာကြာ မနေခဲ့ပေ။ နောက်တစ်နေ့တွင် သူသည် တောင်ပေါ်မှ ဆင်းသွားပြီး ဆေးပညာရှင် ပိုင်ယန်၊ သွေးဓားနှင့် စုချင်းယီတို့၏ ခြေရာများကို ဆက်လက် လိုက်လံ ရှာဖွေလေ၏။

ဤအဖြစ်အပျက် ပြီးနောက် ယွင်ကျန်းဂိုဏ်း အတွင်းရှိ အင်အားစု အသီးသီး၏ ရပ်တည်ချက်များ ရှင်းလင်းသွားခဲ့သည်။

သို့သော် အပေါ်ယံတွင်မူ အင်အားစု အသီးသီးသည် ဘာမှ မဖြစ်ခဲ့သကဲ့သို့ ငြိမ်းချမ်းနေပုံ ရလေ၏။

လျှို့ဝှက်ခန်းမဆောင် အတွင်း၊

စုဖုန်း အပါအဝင် အကြီးအကဲများသည် ဝူယန်တောင်ရှိ ဒုတိယအဆင့် ဂူစံအိမ် ကိစ္စကို စီစဉ်နေကြစဉ် စုယွီသည် ပုံမှန်အတိုင်း သူ့အချိန်ဇယားနှင့်သူ ကျင့်ကြံနေခဲ့သည်။ လိုအပ်သည့်အခါတိုင်း သူသည် ဆေးဖော်ခြင်း သို့မဟုတ် ယွီချန်ချင်းကဲ့သို့ အခြားသူများကို ဆေးဖော်နည်း လမ်းညွှန်ပေးခြင်းများ ပြုလုပ်သည်။

ယခုအချိန်တွင် သူလိုချင်သည်မှာ ကျင့်ကြံခြင်းကို ကြိုးစားအားထုတ်ပြီး ကိုယ်ပိုင် စွမ်းအားကို မြှင့်တင်ရန်သာ ဖြစ်သည်။

သို့မဟုတ်ပါက လက်ရှိ စွမ်းအားဖြင့် တာ့ယွဲ့ နယ်မြေ ကျင့်ကြံခြင်း လောက၏ ပိုမို ရှုပ်ထွေးလာသော အခြေအနေများအောက်တွင် ကိုယ့်ကိုယ်ကို ကာကွယ်ရန် ခက်ခဲနိုင်ပေသည်။

တစ်လခန့် ကြာသောအခါ၊

စုယွီ၏ 'ကောင်းကင်ဖီးနစ် နိဗ္ဗာန် သိုင်းကျမ်း' သည် (ဆဋ္ဌမအဆင့်) သို့ ရောက်ရှိသွားပြီး၊ သူ၏ ချီစွမ်းအင် စုစည်းခြင်း အဆင့်သည်လည်း (အဆင့် ၆) သို့ ရောက်ရှိသွားခဲ့သည်။

လျှို့ဝှက်ခန်းမဆောင် အတွင်းတွင် စုယွီသည် တင်ပျဉ်ခွေ ထိုင်နေပြီး စိတ်ကို စုစည်းထားကာ အာရုံထွေပြားမှု ကင်းမဲ့နေသည်။ ရွှေပုစဉ်းရင်ကွဲ ကျင့်စဉ် လည်ပတ်နေပြီး တောက်ပသော ရွှေရောင် အလင်းတန်းများက သူ့ခန္ဓာကိုယ်ကို လွှမ်းခြုံထားသည်။ သူ့စိတ်အစဉ်မှာ ဗလာကျင်းနေ၏။

ရှေးဟောင်း တာအိုဆရာ၏ အမွေအနှစ်ကို ဆက်လက် လေ့လာ ဆင်ခြင်နေစဉ် တာအိုဆရာ ပင်းယွီ ပေးအပ်ခဲ့သော သတင်းအချက်အလက်များသည် တစစ ပေါ်ထွက်လာသည်။

အမြုတေ ဖွဲ့စည်းခြင်း အဆင့်သို့ ရောက်ရှိပြီးနောက် တာအိုဆရာ ပင်းယွီသည် အခြား ခရီးစဉ် တစ်ခုကို စတင်ခဲ့သည်။

"ငါ…နေလမင်း ကျွန်းမှာ... တာအိုဆရာ ပင်းယွီက မီးဓာတ် တာအိုဆရာ ဖြစ်တဲ့ အမြုတေ ဖွဲ့စည်းခြင်း အဆင့် အမျိုးသမီး ကျင့်ကြံသူ 'ကျဲ' နဲ့ တွေ့ဆုံခဲ့တယ်... နေလမင်း ကျွန်းမှာ ရေခဲနဲ့ မီး ဓာတ်သဘာဝ နှစ်မျိုး ပေါင်းစပ်ထားတဲ့ တတိယအဆင့် ဂူစံအိမ် တစ်ခု ရှိတယ်... ကံတရား အားလျော်စွာ သူတို့ တွေ့ဆုံခဲ့ကြပြီး ထူးခြားတဲ့ ဓာတ်သဘာဝ နှစ်မျိုး ရဲ့ (တတိယအဆင့်) ဂူစံအိမ်နဲ့ ပေါင်းစပ်လိုက်တဲ့အခါ... သူတို့ နှစ်ယောက်လုံး အကြီးစား တိုးတက်မှုတွေ ရခဲ့ကြတာပဲ"

စုယွီ အံ့သြမှင်သက်သွားသည်။

အခန်း (၁၃၅) - အမှောင်နတ်ဘုရား ဆေးလုံး၊ မြေကမ္ဘာနှင့် သစ်သား ပေါင်းစပ်မှု အောင်မြင်ခြင်း (အပိုင်း ၆)

~တာအိုဆရာ ပင်းယွီသည် ထိုအကြောင်းနှင့် ပတ်သက်၍ အနည်းငယ်သာ ပြောပြခဲ့ပါသည်။ သူက ရေခဲနှင့် မီး ဓာတ်သဘာဝ ပေါင်းစပ်ခြင်းသည် ကျင့်ကြံခြင်း နှုန်းထားကို များစွာ တိုးတက်စေနိုင်ကြောင်း အလေးပေး ပြောကြားခဲ့၏။

၎င်းကို ရွှေရောင် အမြုတေ အခြေခံ အုတ်မြစ်ကို သန့်စင်ရန်အတွက်လည်း အသုံးပြုနိုင်ပေသည်။

တာအိုဆရာ ပင်းယွီ ပေးအပ်ခဲ့သော သတင်းအချက်အလက်များသည် နေလမင်း ကျွန်းရှိ ရေခဲနှင့် မီး ဓာတ်သဘာဝ နှစ်မျိုး ပေါင်းစပ် ဂူစံအိမ်တွင် နောင်လာနောက်သားများအတွက် ရည်ရွယ်၍ ချန်ထားရစ်ခဲ့ခြင်း ဖြစ်တန်ရာ၏။

သို့သော်ငြားလည်း...

ယခင်က ရေကန်ကြီးသည် ယခုအခါ တာ့ယွဲ့ နယ်မြေ ဖြစ်လာခဲ့ပြီး၊ ယခင်က ချင်းမုကျွန်းပေါ်ရှိ ရွှေကျောက်စိမ်း နတ်ဘုရား ဂိတ်တံခါးသည် ယခုအခါ မိစ္ဆာတောင်ထွတ် ရှစ်ခု ရှေးဟောင်း အပျက်အစီး ဖြစ်လာခဲ့ရ၏။

ထို့ကြောင့် နေလမင်း ကျွန်းသည် မည်သည့် နေရာတွင် ရှိနေမည်နည်း။

(တတိယအဆင့်) ဂူစံအိမ် နှစ်ခုကို ကြည့်ရင်း စုယွီ တီးတိုး ရေရွတ်လိုက်မိပါသည်။

"ရှေးဟောင်း တာ့ယွဲ့ နယ်မြေ မြေပုံ ရှိမရှိ.. သိရအောင် ကောင်းကင်သိုင်းကျမ်း မျှော်စင်ကို သွားကြည့်ဖို့ လိုမယ် ထင်တယ်"

အကယ်၍ သူသာ ထို ဂူစံအိမ် နှစ်ခုကို ရှာတွေ့နိုင်ခဲ့လျှင် အလွန် ကောင်းမွန်ပေလိမ့်မည်။

ရုတ်တရက် စုယွီ၏ မျက်လုံးအိမ်များ ကျဉ်းမြောင်းသွား၏။

"တစ်နေ့မှာ ငါ နေလမင်း ကျွန်း အနီးတဝိုက် လှည့်လည်သွားလာနေတုန်း ပင်လယ်ထဲကနေ အလောင်းတစ်ခု မျောပါလာခဲ့တယ်... အဲဒါက အမြုတေ ဖွဲ့စည်းခြင်း အဆင့် တာအိုဆရာ တစ်ပါး ဖြစ်ပုံရတယ်... ဒါပေမဲ့ သူ ဘာကြောင့် ရေကန်ထဲမှာ သေဆုံးခဲ့ရလဲ ဆိုတာ ငါ မသိဘူး"

"ငါ အဲဒီ တာအို မိတ်ဆွေအတွက် အုတ်ဂူတစ်ခု တည်ဆောက်ပြီး ကောင်းမွန်စွာ မြှုပ်နှံပေးလိုက်တယ်... သူ့ဆီမှာ စိတ်ဝင်စားစရာ ကောင်းတဲ့ ဆေးနည်းတစ်စောင် တွေ့ခဲ့ရတယ်... 'အမှောင်နတ်ဘုရား ဆေးလုံး'တဲ့... အဆင့်တက်လှမ်းရာမှာ အထောက်အကူ ပြုတဲ့ ဆေးဝါး တစ်မျိုး ပါပဲ"

"အဲဒီ တာအို မိတ်ဆွေက သက်တမ်း ကုန်ခါနီး အချိန်မှာ အခြေခံ တည်ဆောက်ခြင်း အဆင့်ကို တက်လှမ်းနိုင်မယ့် ဖြစ်နိုင်ခြေ တိုးမြင့်လာအောင် အဲဒီ ဆေးနည်းကို ပြုပြင်ပြောင်းလဲထားခဲ့တယ်... ငါ့အတွက်တော့ အသုံးမဝင်ပေမဲ့ ကျင့်ကြံခြင်း မိသားစု တစ်ခုအတွက် ဆိုရင်တော့ ဒီဆေးနည်းက တန်ဖိုး ကြီးမားနိုင်တယ်"

"'အမှောင်နတ်ဘုရား ဆေးလုံး' ကို သောက်သုံးပြီးနောက် ဝိညာဉ် စွမ်းအား အခြေအနေကို (၇) ရက်တိုင်တိုင် အထွတ်အထိပ် အခြေအနေမှာ ထိန်းထားနိုင်တယ်... (၇) ရက် ကျော်လွန်သွားရင်တော့ ဝိညာဉ် စွမ်းအား ကုန်ခန်းသွားပြီး ဆိုးရွားတဲ့ နောက်ဆက်တွဲ ဆိုးကျိုးတွေ ခံစားရလိမ့်မယ်... ဒါ့အပြင် 'အမှောင်နတ်ဘုရား ဆေးလုံး' ကို မှီခိုပြီး အခြေခံ တည်ဆောက်ခြင်း အဆင့် တက်လှမ်းထားသူတွေဟာ အလွန် အားနည်းပြီး နောက်ထပ် အဆင့်တက်လှမ်းနိုင်မယ့် အခွင့်အလမ်း လုံးဝ မရှိတော့ဘူး"

"ဒါပေမဲ့ အားနည်းတဲ့ အခြေခံ တည်ဆောက်ခြင်း အဆင့် ဆိုရင်တောင်မှ အခြေခံ တည်ဆောက်ခြင်း အဆင့်ပါပဲ... အဲဒါက သက်တမ်းကို အနည်းဆုံး နှစ် (၃၀) (၄၀) လောက် ဆွဲဆန့်ပေးနိုင်တယ်လေ"

"ဒါကြောင့် ဒီဆေးနည်းက ငါ့အတွက် အသုံးမဝင်ပေမဲ့ ကျင့်ကြံခြင်း မိသားစု တစ်ခုအတွက် ဆိုရင်တော့ သူတို့ရဲ့ မိသားစု အခြေခံ အုတ်မြစ်ကို သေချာပေါက် မြှင့်တင်ပေးနိုင်လိမ့်မယ်"

တာအိုဆရာ ပင်းယွီ မှတ်တမ်းတင်ထားသော သတင်းအချက်အလက်များပင်။

စုယွီ တုန်လှုပ်သွားရပါသည်။

ဤအရာ။

ဤကဲ့သို့သော ဆေးလုံးမျိုး ရှိနိုင်ပါသလော။

ကျင့်ကြံသူ၏ ဝိညာဉ် စွမ်းအား အခြေအနေကို (၇) ရက်တိုင်တိုင် အတင်းအဓမ္မ မြှင့်တင်ပေးထားပြီး၊ သက်ကြီးပိုင်း ကျင့်ကြံသူများကို အခြေခံ တည်ဆောက်ခြင်း အဆင့် တက်လှမ်းရန် ကြိုးပမ်းနိုင်လောက်သည့် စွမ်းအင် အလုံအလောက် ပေးစွမ်းနိုင်သည်တဲ့လား။

ဒီနည်းလမ်းက နောက်ဆက်တွဲ ကျင့်ကြံမှု အဆင့်တွေကို တိုးတက်မှု မရှိစေတော့ဘူး ဆိုပေမဲ့ ဒီလောက်ဆိုရင်ပဲ လုံလောက်နေပါပြီလေ။

ဟုတ်သည်။

ဆေးလုံးက အထွတ်အထိပ် မဟုတ်တော့သည့် ချီစွမ်းအင် စုစည်းခြင်း (အဆင့် ၉) ရဲ့

အခြေအနေကို အထွတ်အထိပ် အခြေအနေဆီ ဖိအားဖြင့် ပြန်လည် ရောက်ရှိစေရုံ သက်သက်ပါပင်။ အခြေခံ တည်ဆောက်ခြင်း အဆင့်ကို တက်လှမ်းချင်လျှင်တော့ ကိုယ့်ကိုယ်ကို အားကိုးရဦးမှာ ဖြစ်သလို၊ အခြေခံ တည်ဆောက်ခြင်း ဆေးလုံးကို တွဲဖက် သောက်သုံးကြည့်ရပါမည်။။

အောင်မြင်မလား၊ မအောင်မြင်ဘူးလား ဆိုတာကတော့ မသေချာသေးပါ။

"'အမှောင်နတ်ဘုရား ဆေးလုံး' ရဲ့ အဓိက ပါဝင်ပစ္စည်းက 'နတ်ဘုရားမဲ့ ပန်း' ပဲ... ကံကောင်းတာက 'နတ်ဘုရားမဲ့ ပန်း' ဟာ ဒုတိယအဆင့် ဝိညာဉ် ဆေးဖက်ဝင် အပင် ဖြစ်ပြီး အတော်လေး ရှားပါးပေမဲ့၊ ဝိညာဉ် စွမ်းအားနဲ့ နတ်ဘုရား အာရုံကို ပြန်လည် ဖြည့်တင်းပေးတဲ့ ရှားပါး ဆေးလုံးတွေရဲ့ ကုန်ကြမ်း ပစ္စည်း ဖြစ်နေတာပဲ... အခြေခံ တည်ဆောက်ခြင်း ဆေးလုံးနဲ့ ဟောင်ထျန်း ဆေးလုံးတို့ရဲ့ ကုန်ကြမ်း ပစ္စည်းတွေနဲ့ ယှဉ်ရင် စုဆောင်းရတာ အများကြီး ပိုလွယ်ကူတယ်"

စုယွီ အလွန် ဝမ်းမြောက်သွားမိပါသည်။

သို့သော် စိတ်လှုပ်ရှားမှုများ ငြိမ်သက်သွားပြီးနောက် စုယွီ၏ မျက်နှာထား တည်ကြည်လေးနက်သွားပြီး မျက်မှောင်များ ကြုတ်သွားလေ၏။

ယွင်ရှန်း ဈေးမြို့တော်မှာ ဖြစ်စေ၊ ပိုင်ယွဲ့ အင်မော်တယ် မြို့တော်မှာ ဖြစ်စေ၊ တာ့ယွဲ့ မှောင်ခိုဈေးမှာ ဖြစ်စေ 'အမှောင်နတ်ဘုရား ဆေးလုံး' နှင့် ဆင်တူသော ဆေးလုံးမျိုး သူ တစ်ခါမှ မကြားဖူးခဲ့ပါ။

'အမှောင်နတ်ဘုရား ဆေးလုံး' ၏ အာနိသင်ကို ပြန်လည် စဉ်းစားရင်း စုယွီ အသက်ပြင်းပြင်း ရှူရှိုက်လိုက်ပြီး ကိုယ့်ကိုယ်ကို ပြောလိုက်မိသည်။

"ဒီဆေးလုံး အကြောင်း လုံးဝ ပေါက်ကြားလို့ မဖြစ်ဘူး"

သို့မဟုတ်ပါက စုမိသားစု မဆိုထားနှင့်၊ ယွင်ကျန်းဂိုဏ်းပင်လျှင် ဤဆေးနည်းကို ကာကွယ်နိုင်မည် မဟုတ်ပေ။

ထိုသို့ဆိုလျှင် 'အမှောင်နတ်ဘုရား ဆေးလုံး' ကို မည်သို့ အသုံးပြုရမည် ဆိုသည်ကို စုယွီ သေချာ စဉ်းစားရပေတော့မည်။

သေချာသည်မှာ တစ်ခုရှိသည်။ 'အမှောင်နတ်ဘုရား ဆေးလုံး' ဆေးနည်း အကြောင်းကို သူမှလွဲ၍ အခြား မည်သူမျှ သိရှိခွင့် မရှိစေရ။

သူ့တွင် အကြွင်းမဲ့ အာဏာနှင့် စွမ်းအား မရှိသေးမီ အချိန်အထိ 'အမှောင်နတ်ဘုရား ဆေးလုံး' ၏ လုပ်ဆောင်ချက်ကို တတ်နိုင်သမျှ ဖုံးကွယ်ထားရပေမည်။

"အရင်ဆုံး ကုန်ကြမ်း ပစ္စည်းတွေကို စုဆောင်းရမယ်... တကယ်လို့ ဆေးလုံးက အမှန်တကယ် ထိရောက်တယ် ဆိုရင် ဆရာ့ကို အရင်ဆုံး တိတ်တဆိတ် သုံးစွဲခိုင်းရမယ်... ပြီးမှ တခြား အကြီးအကဲတွေကို ဖြည်းဖြည်းချင်း သောက်သုံးခိုင်းပြီး အခြေခံ တည်ဆောက်ခြင်း အဆင့်ကို တက်လှမ်းဖို့ ကြိုးစားခိုင်းရမယ်"

စုယွီ တွက်ချက်လိုက်၏။

'နတ်ဘုရားမဲ့ ပန်း' က စုဆောင်းရ ခက်ခဲသောကြောင့် ဘယ်အချိန်မှာ စုဆောင်းနိုင်မလဲ ဆိုတာ စောင့်ကြည့်ရဦးမည်။

အကယ်၍ အောင်မြင်ခဲ့ပါက စုမိသားစု၏ အခြေခံ အုတ်မြစ်သည် နောက်တစ်ကြိမ် သိသိသာသာ တိုးတက်လာနိုင်ပေလိမ့်မည်။

နောက်တစ်နေ့တွင် စုယွီသည် 'အမှောင်နတ်ဘုရား ဆေးလုံး' အတွက် ကုန်ကြမ်း ပစ္စည်းများကို အခြား ဆေးဖက်ဝင် ပစ္စည်းများနှင့် ရောနှောလိုက်ပြီး မိသားစုကို အတူတကွ ဝယ်ယူခိုင်းလိုက်သည်။

ရက်အနည်းငယ် ကြာပြီးနောက်၊ စုယွီသည် ယွင်ရှန်း ဈေးမြို့တော်ရှိ ကောင်းကင်သိုင်းကျမ်း မျှော်စင်သို့ အချိန်ယူ သွားရောက်ခဲ့သော်လည်း အဘိုးအိုကို မေးမြန်းပြီးနောက် ရှေးဟောင်းတာ့ယွဲ့ နယ်မြေ နှင့် ပတ်သက်သော မြေပုံ သို့မဟုတ် သဲလွန်စ တစ်စုံတစ်ရာမျှ ရှာမတွေ့ခဲ့ပေ။

ဒီရလဒ်က စုယွီ မျှော်လင့်ထားသည့် အတိုင်းပင် ဖြစ်သည်။

ရှေးခေတ်ကာလနှင့် လက်ရှိ တာ့ယွဲ့ နယ်မြေ၏ မြေမျက်နှာသွင်ပြင် အနေအထားသည် များစွာ ပြောင်းလဲသွားခဲ့ပြီ ဖြစ်သည်။

အကယ်၍ ရှေးဟောင်း မြေပုံများ အမှန်တကယ် ရှိခဲ့လျှင် ၎င်းသည် အင်အားစု အားလုံးအတွက် တန်ဖိုးမဖြတ်နိုင်သော ရတနာ တစ်ပါး ဖြစ်နေပေလိမ့်မည်။

ထိုကဲ့သို့သော အရာမျိုးကို မည်သူက အလွယ်တကူ ထုတ်ပြပါမည်နည်း။

"နှမြောစရာပဲ"

စုယွီ စိတ်ထဲတွင် သက်ပြင်းချလိုက်မိသည်။

"ဒီလိုဆိုရင်တော့ ဖြည်းဖြည်းချင်းပဲ ရှာဖွေရတော့မှာပေါ့... အနာဂတ်မှာ နေလမင်း ကျွန်းနဲ့ ပတ်သက်တဲ့ မှတ်တမ်းတွေ ပိုတွေ့မလား ဆိုတာ စောင့်ကြည့်ရမယ်"

ချန်တောင်တန်းသို့ ပြန်ရောက်သောအခါ စုယွီသည် မည်သည့် စိတ်လှုပ်ရှားမှုမျှ မရှိဘဲ တည်ငြိမ်အေးဆေးစွာ ရှိနေသည်။ ရေတွင်းနက်ကြီး တစ်ခုအလား တည်ငြိမ်နေ၏။ မာနထောင်လွှားခြင်း၊ စိတ်လိုက်မာန်ပါ လုပ်ခြင်း မရှိဘဲ ခွေးအိုကြီး တစ်ကောင်ကဲ့သို့ တည်ငြိမ်နေလေ၏။

ဝူယန်တောင် ဂူစံအိမ်အတွက် မိသားစု၏ အစီအစဉ် နောက်ဆုံး ရလဒ်ကို စောင့်ဆိုင်းရင်း သူသည် အေးချမ်းစွာ ကျင့်ကြံနေလိုက်သည်။

နောက်ထပ် တစ်လ ကြာသောအခါ၊

နံနက်ခင်း တစ်ခု၊ လျှို့ဝှက်ခန်းမဆောင် အတွင်း။

"ဝူး"

စုယွီသည် တင်ပျဉ်ခွေ ထိုင်နေလျက် 'ဧကရာဇ် ကိုယ်ခန္ဓာ အမှောင်မြေကမ္ဘာ ကျင့်စဉ်' ကို လည်ပတ်နေသည်။ သူ၏ ဒန်တျန် အတွင်းရှိ ခမ်းနားထည်ဝါသော အမှောင် မှော်စွမ်းအင်များ တစ်ကိုယ်လုံးသို့ စီးဆင်းသွားသည်။ သဘာဝ ဝိညာဉ် စွမ်းအင် အမျှင်တန်းများကို စုပ်ယူပြီး မြေကမ္ဘာ ဓာတ်သဘာဝ အမှောင် မှော်စွမ်းအင် အဖြစ်သို့ ပြောင်းလဲကာ ဒန်တျန် အတွင်းသို့ ပေါင်းစပ်လိုက်သည်။

အရပ်မျက်နှာ အသီးသီးမှ ဝိညာဉ် စွမ်းအင်များသည် စုယွီ၏ ခန္ဓာကိုယ်ကို ဗဟိုပြု၍ ဖြည်းညှင်းစွာ စုဝေးလာကြပြီး၊ ဝိညာဉ် စွမ်းအင် ဝဲကတော့ငယ် တစ်ခု အဖြစ် တဖြည်းဖြည်း ဖွဲ့စည်းလာကာ သူ၏ ခန္ဓာကိုယ် အတွင်းသို့ စီးဝင်သွားကြသည်။

နာရီဝက်ခန့် ကြာပြီးနောက်၊

"ဝုန်း"

ခမ်းနားထည်ဝါသော အရှိန်အဝါ တစ်ခု စုယွီထံမှ ရုန်းကြွလာသည်။ မူလက အခြေခံ တည်ဆောက်ခြင်း (အဆင့် ၁) သာ ရှိသေးသော သူ၏ 'ဧကရာဇ် ကိုယ်ခန္ဓာ အမှောင်မြေကမ္ဘာ ကျင့်စဉ်' သည် သဘာဝ အလျောက် (အဆင့် ၂) သို့ တက်လှမ်းသွားခဲ့လေ၏။ မရေမတွက်နိုင်သော သဘာဝ ဝိညာဉ် စွမ်းအင်များသည် အရပ်မျက်နှာ အသီးသီးမှ စုဝေးလာကြပြီး သူ၏ ခန္ဓာကိုယ် အတွင်းသို့ ရူးမိုက်စွာ တိုးဝင်လာကြတော့သည်။

'ဧကရာဇ် ကိုယ်ခန္ဓာ အမှောင်မြေကမ္ဘာ ကျင့်စဉ်' သည် ပိုမို လျင်မြန်စွာ လည်ပတ်နေပြီး ဝိညာဉ် စွမ်းအင် အမြောက်အမြားကို မှော်စွမ်းအင် အဖြစ်သို့ ပြောင်းလဲကာ ဒန်တျန် အတွင်းသို့ ပေါင်းစပ်ပေးနေသည်။

နောက်ထပ် တစ်နာရီ ကြာသောအခါ စုယွီ၏ အမှောင် မှော်စွမ်းအင် ပမာဏသည် သိသိသာသာ တိုးတက်လာခဲ့သည်။

သူ့ထံမှ ထွက်ပေါ်နေသော အဆင့်တက်လှမ်းခြင်း အရှိန်အဝါများ တဖြည်းဖြည်း ငြိမ်သက်သွားပြီး လုံးဝ တည်ငြိမ်သွားလေတော့သည်။

"ဟူး"

စုယွီ မျက်လုံးများကို ဖွင့်လိုက်ပြီး ကျေနပ်အားရသော အမူအရာဖြင့် ပြောလိုက်သည်။

"'ဧကရာဇ် ကိုယ်ခန္ဓာ အမှောင်မြေကမ္ဘာ ကျင့်စဉ်' (အဆင့် ၁၁) ကို ရောက်သွားပြီ"

ဤနည်းအားဖြင့် အခြေခံ တည်ဆောက်ခြင်း (အဆင့် ၂) ရှိ မြေကမ္ဘာနှင့် သစ်သား ကျင့်စဉ်များ ပေါင်းစပ်ခြင်းကို ဆက်လက် ကြိုးစားနိုင်ပြီ ဖြစ်သည်။ အောင်မြင်သွားသည်နှင့် တပြိုင်နက်...

စုယွီ တိတ်တဆိတ် တွေးလိုက်မိသည်။

'ရလဒ်ကို အရင် စောင့်ကြည့်ရအောင်'

သူသည် တံခါးပိတ် ကျင့်ကြံခြင်းမှ ချက်ချင်း မထွက်ခွာဘဲ အခြား ကျင့်စဉ်များကို နေ့စဉ် ပုံမှန်အတိုင်း ဆက်လက် ကျင့်ကြံနေလိုက်သည်။

အချိန်များ ဖြည်းညှင်းစွာ ကုန်ဆုံးသွားသည်။

'ဧကရာဇ် ကိုယ်ခန္ဓာ အမှောင်မြေကမ္ဘာ ကျင့်စဉ်' သည် အခြေခံ တည်ဆောက်ခြင်း (အဆင့် ၂) သို့ ရောက်ရှိပြီးနောက်၊ အခြေခံ တည်ဆောက်ခြင်း (အဆင့် ၂) ရှိ မြေကမ္ဘာနှင့် သစ်သား ကျင့်စဉ်များ ပေါင်းစပ်မှု တိုးတက်မှုသည် များစွာ မြန်ဆန်လာခဲ့သည်။ စုယွီ၏ ကျင့်စဉ် ပေါင်းစပ်မှု ရလဒ်များ စတင် မြင်တွေ့လာရချိန်မှာပင် ယွင်ကျန်းဂိုဏ်း ပထမ အကြီးအကဲက ဝူယန်တောင်ရှိ ဂူစံအိမ်ကို စုမိသားစုအား ပေးအပ်နိုင်ကြောင်း သတင်းစကား ပါးလိုက်လေ၏။

ရိုးရှင်းသော စကားတစ်ခွန်းတည်းသာ။ စုမိသားစုဘက်မှ မည်သည့် အခြေအနေ၊ မည်သည့် တောင်းဆိုချက်မှ လိုက်လျောစရာ မလိုပေ။

သတင်း ရောက်ရှိလာသောအခါ စုမိသားစု တစ်ခုလုံး ပျော်ရွှင်မှုဖြင့် ကခုန်မတတ် ဖြစ်သွားကြသည်။

ဘာပဲဖြစ်ဖြစ် ဝူယန်တောင် ဂူစံအိမ်သည် ဒုတိယအဆင့် ဝိညာဉ်ကြော ဂူစံအိမ် ဖြစ်ပြီး၊ လက်ရှိ သူတို့ သိမ်းပိုက်ထားသော ချန်တောင်တန်း၏ (ပထမအဆင့်) ဝိညာဉ်ကြောနှင့် နှိုင်းယှဉ်၍ မရနိုင်ပေ။

ထို့အပြင် ထင်ရှားသော အချက်တစ်ခုမှာ စုမိသားစု၏ လျင်မြန်သော ဖွံ့ဖြိုးတိုးတက်မှုနှင့်အတူ ချန်တောင်တန်း၏ (ပထမအဆင့်) ဝိညာဉ်ကြောသည် စုမိသားစု၏ အင်အားနှင့် သြဇာအာဏာ ကြီးထွားလာမှု နှုန်းထားကို မမီနိုင်တော့ခြင်းပါပင်။

ဒုတိယအဆင့် ဝိညာဉ်ကြော ဂူစံအိမ် အသစ်တစ်ခု ရှာဖွေရန် အရေးတကြီး လိုအပ်လာရပါ၏။

ဝူယန်တောင် ဂူစံအိမ်ကို ရရှိလိုက်ခြင်းသည် စုမိသားစု၏ လိုအပ်ချက်နှင့် လစ်ဟာမှုများကို ပြီးပြည့်စုံစွာ ဖြည့်ဆည်းပေးလိုက်ခြင်းပင် ဖြစ်ပေသည်။

သို့သော် စုမိသားစုသည် ချန်တောင်တန်း ဟူသော မင်္ဂလာမြေကို စွန့်လွှတ်ရန် အစီအစဉ် မရှိပေ။ လက်ရှိ စုမိသားစု လက်ထဲတွင် ရှိသော အရင်းအမြစ် အမျိုးမျိုးကို စီမံခန့်ခွဲရန်အတွက် မိသားစုဝင် အချို့ကို ဤနေရာတွင် ဆက်လက် ထားရှိမည် ဖြစ်သည်။

ကျန်ရှိသော မိသားစုဝင် အများစုသည် ချန်တောင်တန်းနှင့် သိပ်မဝေးကွာလှသော၊ ခရီးဖြင့် (၁၀) ရက်ခန့် သွားရသည့် ဝူယန်တောင်သို့ တဖြည်းဖြည်း ပြောင်းရွှေ့သွားကြလေ၏။

စုမိသားစု၏ ပြောင်းရွှေ့မှုသည် လဝက်ခန့် ကြာမြင့်ခဲ့သည်။ ထိုအချိန်အတွင်း စုယွီသည် ချန်တောင်တန်း၌ပင် မည်သူ့နှောင့်ယှက်မှုမှ မရှိဘဲ တံခါးပိတ် ကျင့်ကြံနေခဲ့သည်။

နောက်ဆုံးတွင် သူသည် အခြေခံ တည်ဆောက်ခြင်း (အဆင့် ၂) ရှိ မြေကမ္ဘာနှင့် သစ်သား ပေါင်းစပ် ကျင့်စဉ်ကို ဖန်တီးရာတွင် အောင်မြင်သွားခဲ့ရ၏။