အခန်း (၁၁၉)
Vol. 12 Ch. 119
ကမ်းစပ်ရှိလဲ့အော်သည် သူမကို အမှန်တကယ် လေးစားသွားမိသည်။
“ဂျူနီယာညီမလေး စုကျို၊ နင်က ခေါင်းဆောင်ဖြစ်တဲ့ ငါ့ထက်တောင် စာတွေ ပိုရလိမ့်မယ် ထင်တယ်”
“နင် ဘာလို့ ခေါင်းဆောင်မလုပ်တာလဲ”
ဒါမှမဟုတ်ရင်၊ နေ့စဉ် စာတွေ အကုန်လုံးကို သူမဆီ လက်ဆင့်ကမ်းပေးဖို့ အချိန်လောက်မှာ မဟုတ်ဘူး။
စုကျို ငုံ့ကြည့်လိုက်ရာ ရေပူစမ်းထဲတွင် ထင်ဟပ်နေသော သူမ့ နဖူးပေါ်ရှိ ကိန်းဂဏန်းကို မြင်လိုက်ရသည်၊ ၎င်းသည် အောက်ခြေအဖွဲ့မှ အခြားသူများကဲ့သို့ပင် ယခုအခါ [၉၉] သို့ မြင့်တက်လာပြီ ဖြစ်သည်။
နတ်ဆိုး ကျင့်ကြံခြင်း တာဝန်များ၊ ဝိညာဉ်ပိုးဖလံဂေဟာ အရွယ်အစား ပြိုင်ပွဲ၊ နတ်ဆိုး ခုခံခြင်း ပြိုင်ပွဲ၊ နှင့် လွန်ခဲ့သော ရက်အနည်းငယ်က ပြိုင်ကွင်း တိုက်ပွဲများ... သူတို့အဖွဲ့၏အဆင့်သတ်မှတ်ချက်သည် လျင်မြန်စွာ မြင့်တက်လာခဲ့လေသည်။
“လောလောဆယ်တော့ မဖြစ်နိုင်သေးဘူး”
စုကျိုသည် ချည်နှောင်ခံထားရသော သူ့ ညာလက်ကို လဲ့အော်ထံ မြှောက်ပြလိုက်သည်။
“ငါတို့ အဆင့်မတက်ခင်အထိ၊ ငါတို့အားလုံး မွေးရာပါ ဝိညာဉ်စွမ်းအင် အသုံးပြုခွင့် ပိတ်ပင်ခံထားရတယ်”
“ပြီးတော့ ပြိုင်ကွင်းဝင်ခွင့်လည်း ပိတ်ပင်ခံထားရတယ်”
လဲ့အော် မျက်မှောင်ကြုတ်လိုက်သည်။
“ဒါဆိုရင် ငါ့အစ်ကိုကြီးနဲ့ တခြားသူတွေကရော...”
စုကျို သူ့ကို ခေါင်းညိတ်ပြလိုက်သည်။
“ငါတို့ သူတို့ကို ဝိညာဉ်စွမ်းအင် လမ်းကြောင်းတွေဖွင့်ခိုင်းလို့ ရတယ်၊ ငါ မလိုချင်တာတွေကို အရင် ထုတ်လိုက်မယ်”
“သူတို့ ငါနဲ့ တခြားအရာတစ်ခုခု လဲလှယ်ချင်လား ကြည့်ရအောင်”
“မှော်ရတနာတွေ၊ ဝိညာဉ်ကျောက်တုံးတွေ၊ ဒါမှမဟုတ် ငါ အလိုအလျောက် ပုံတူကူးယူခဲ့တဲ့ သူတို့ရဲ့ တခြား အစိတ်အပိုင်းတွေလေ...”
စုကျိုသည် ရေပူကန်ထဲတွင် စိမ်နေပြီး၊ သူ့ ခန္ဓာကိုယ်ကို မျက်နှာသုတ်ပဝါဖြင့်ပတ်ထားကာ၊ လှည့်ပတ်နေသော ဝိညာဉ်မြူခိုးများထဲတွင် ပေါ်လိုက် ပျောက်လိုက်ဖြစ်နေသည်။ သို့သော် အားလုံးသည် ချောင်းကြည့်ခံရမှု ကာကွယ်ရေး မန္တန်များကြောင့် ဖြစ်ပေါ်လာသော ပုံရိပ်ယောင်များသာ။
သူမသည် မေးစေ့ကို ပွတ်သပ်ရင်း၊ ကမ်းစပ်ရှိ အောက်ခြေအဖွဲ့သားများနှင့် လဲ့အော်ကို ကြည့်လိုက်လေသည်။
“ဘာပဲဖြစ်ဖြစ်၊ ငါက ပြိုင်ကွင်းကို သွားလို့မရသလို၊ ရေကန်ထဲကနေလည်း ခဏလောက် ထွက်လို့မရဘူးလေ”
“ငါတို့ ရေကန်ထဲမှာ ကျင့်ကြံနေရင်း ပစ္စည်းလေလံပွဲ ကျင်းပရင် ဘယ်လိုလဲ”
“?”
“???”
စုကျိုသည် ရေကန်ထဲတွင် စိမ်နေရင်း၊ ရေထဲသို့ ဆင်းလာသော ဆွဲဆောင်မှုရှိသည့် နတ်ဆိုးမလေးထံမှ ဝိုင်ကောင်းတစ်ခွက်ကို ယူလိုက်ပြီး တစ်ငုံ သောက်လိုက်လေသည်။
သူမသည် ရေပူကန်ထဲတွင် သူ့ခန္ဓာကိုယ် နိမ့်ချည် မြင့်ချည် ဖြစ်နေသည်ကိုခံစားရပြီး၊ ဝိညာဉ်စွမ်းအင် လှိုင်းလုံးများကဲ့သို့ ဖြစ်နေကာ၊ သူမ၏ ဝမ်းဗိုက်အောက်ပိုင်းနှင့် ဒန်ထျန်တို့ ပိုမိုခိုင်မာပြည့်ဝလာသည်ကို ခံစားလိုက်ရလေသည်။
သူမ၏ကျင့်ကြံခြင်းသည် အလိုအလျောက် မြင့်တက်နေလေသည်။
၎င်းသည် ယွမ်သန့်စင်အဆင့်ထိပ်ဆုံးမှ အခြေတည်အဆင့် ဦးတည်ချက်ဆီသို့ အဆက်မပြတ် တိုးတက်နေလေသည်။
သူမသည် လောလောဆယ် ဘာမှလုပ်စရာမလိုပုံရသည်။
ဒီအတိုင်း စိမ်နေရုံဖြင့် လုံလောက်နေလေသည်။
“လေလံပွဲအသေးစားလေး ကျင်းပမယ်” “
အလွှာ ၁ ကနေ ၄၀ အထိ ဂိုဏ်းသားတွေ အကုန်လုံးပါဝင်လာအောင် လုပ်လို့ရမယ့် နည်းလမ်း ရှိလား”
စုကျို လဲ့အော်ကို ကြည့်လိုက်သည်။
လဲ့အော်သည် ရိုးရှင်းသော စိတ်ထားရှိသူ ဖြစ်ပြီး၊ ဂိုဏ်းသားများ လေလံပွဲ စီစဉ်ခြင်း ဖြစ်နိုင်ခြေကို ယခင်က တစ်ခါမှ မစဉ်းစားဖူးပေ။
ဒါပေမဲ့ စုကျို ပြောလာတော့၊ ဒါက စည်းကမ်းနဲ့ မညီဘူးလို့ သူ မထင်ပေ။
“အဲဒီလိုဆိုရင်၊ လူတိုင်းက သူတို့နဲ့ ကိုက်ညီတဲ့ ဝိညာဉ်လက်နက်တွေနဲ့ တိုက်ခိုက်ရေး နည်းစနစ်တွေကို ရနိုင်လောက်တယ်”
စုကျို လက်ဖြန့်ပြလိုက်လေသည်။
“!”
တိုက်ခိုက်ရေးနှင့် လက်နက်များအကြောင်း ပြောလာသောအခါ၊ လဲ့အော် အိပ်ငိုက်မနေတော့ပေ။
သူ ချက်ချင်းစိတ်ဝင်စားသွားလေသည်။
“ငါ အလွှာတိုင်းက ခေါင်းဆောင်တွေကို အခုချက်ချင်း သတင်းပို့လိုက်မယ်။
လူတိုင်းကို ဝိညာဉ်စွမ်းအင်လမ်းကြောင်းတွေ ဖွင့်ခိုင်းပြီး၊ ဆောင်အတွင်းမှာ လေလံပွဲ တာဝန်တစ်ခု ယာယီ တင်ခိုင်းလိုက်မယ်၊ ဆောင်အတွင်းက တိုက်ပွဲတွေနဲ့ တာဝန်တွေကို ပုံရိပ်ယောင်နဲ့ တိုက်ရိုက် ထုတ်လွှင့်လို့ ရတယ်လေ”
“အဲဒီနည်းနဲ့၊ လူတိုင်း ပုံရိပ်ယောင် မြင်ကွင်းတွေကို မြင်ရပြီး လေလံဆွဲရာမှာ ပါဝင်နိုင်လိမ့်မယ်”
စုကျို ခေါင်းညိတ်လိုက်သည်။
အစီအစဉ်သည် ချောမွေ့လျင်မြန်စွာ ဆက်လက် လုပ်ဆောင်သွားလေသည်။
အခြေအအနေကိုမသိဘဲ သတိမေ့နေသော ကျင်းချန်မှလွဲ၍၊ အခြေတည်အဆင့်ထိပ်ဆုံး ငါးယောက်အဖွဲ့သည် လဲ့အော်မှတဆင့် လဲ့ကျယ်နှင့် အခြားသုံးဦးအား သတင်းစကားပါးလိုက်သည်။ အကယ်၍ သူတို့၏ 'ခန္ဓာကိုယ် အစိတ်အပိုင်းများ' သို့မဟုတ် အခြားအရာများ ပါဝင်ပတ်သက် နေပါက၊ စုကျို အနေဖြင့် လေလံပွဲတွင် မပါဝင်ဘဲ သူတို့နှင့် သီးသန့် အရောင်းအဝယ်လုပ်သင့်ကြောင်း ပြောကြားလိုက်လေသည်။ စုကျိုက သူတို့ကို အာမခံလိုက်သည်၊
“ငါက ရိုးသားတဲ့ လူတစ်ယောက်ပါ၊ အတင်းအကျပ်ဝယ်ယူတာ ရောင်းချတာမျိုး ပါဝင်တဲ့ ဘယ်အရာကိုမဆို ငါ ဘယ်တော့မှ လုပ်မှာ မဟုတ်ဘူး”
“စိတ်မပူပါနဲ့၊ နင်တို့ ရလဒ်ကိုကျေနပ်ကြမှာပါ”
လဲ့ကျယ်သည် နတ်ဆိုး ကျင့်ကြံခြင်း တာဝန်များတွင် စုကျို အလွန်စိတ်ချရကြောင်း သူ့ညီလေး လဲ့အော်ထံမှ သိထားခဲ့ပြီးဖြစ်သည်။
သူ တကယ် စိတ်ချသွားလေသည်။
ထို့နောက် သူသည် စုကျိုနှင့် သဘောတူညီချက် တစ်ခု လက်မှတ်ရေးထိုးလိုက်သည်၊ အကယ်၍ သူ့အစိတ်အပိုင်းများကို အများပြည်သူ လေလံပွဲတွင် မတင်ဘူးဆိုပါက၊ သူသည် အလွှာ ၄၀ မှ ၃၀ သို့ ယာယီ လမ်းကြောင်းများကို သူမအား သီးသန့်အကန့်အသတ်မရှိ ဝင်ရောက်ခွင့် ပေးမည်ဟု သဘောတူလိုက်လေသည်။
“ဟင်း၊ ငါက ရိုးသားတဲ့ လူတစ်ယောက်ပါ၊ နင် ငါ့ကို တိုက်ရိုက်ယုံကြည်လိုက်လို့ ရသားနဲ့”
“ဒါပေမဲ့ နင်က ငါ့ကို လမ်းကြောင်းတွေအများကြီး ပေးဖို့ ဇွတ်တောင်းဆိုနေတာကိုး”
“ငါ တကယ် အားနာမိတယ်”
စုကျို၏ရိုးသားဟန်ရှိသောအသံသည် အလွှာတိုင်းရှိ ခေါင်းဆောင်အဖွဲ့ဝင်များ၏ ဆက်သွယ်ရေးကျောက်တုံးများပေါ်တွင် ပေါ်ထွက်လာလေ သည်။
လူတိုင်းသည် လဲ့ကျယ်၏နမူနာကို အလျင်အမြန်လိုက်နာကြပြီး၊ သူမနှင့် သဘောတူညီချက်များလက်မှတ်ရေးထိုးကာ၊ သူမအတွက် ယာယီ လမ်းကြောင်းများကို အချိန်မရွေးဖွင့်ပေးရန် ဆန္ဒရှိကြလေသည်။
စုကျိုသည် ကုသိုလ်တော် ရေကန်တွင် အမွှေးတိုင်တစ်တိုင်ထွန်းညှိချိန်ထက် လျော့နည်းသော အချိန်စိမ်လိုက်ရုံဖြင့်၊ အလွှာ ၄၀ အောက်ရှိ ဝိညာဉ်ပိုးဖလံဂေဟာခေါင်းဆောင်ဂိုဏ်းသားများ၏ 'ခင်မင်ရင်းနှီးမှု' ကို ရရှိသွားလေသည်။
တစ်ခုတည်းသောခြွင်းချက်မှာ သတိမေ့နေသော အလွှာ ၃၅ ၏ခေါင်းဆောင်ဂိုဏ်းသား ကျင်းချန်ဖြစ်သည်။
သို့သော် ကိစ္စမရှိပေ၊ စိတ်ဝင်တစားစောင့်ကြည့်နေကြသော ဝိညာဉ်ပိုးဖလံဂေဟာဂိုဏ်းသားအရေအတွက် နည်းနည်း တက်ရောက်သည့် ဤလေလံပွဲသည် မကြာမီ စတင်တော့လေသည်။
လေလံပွဲ အချိန်ကို ယင်လီကြိုတင်သိရှိထားသော သခင်တစ်ရာခန်းမနှင့် ကုသိုလ်နှင့်အကုသိုလ် ခန်းမမှ အကြီးအကဲများ အစည်းအဝေး ကျင်းပချိန်နှင့် တိုက်ဆိုင်ရန်တမင်ရွေးချယ်ထားခြင်း ဖြစ်သည်။
ဤအချိန်အတွင်း၊ မည်သည့် အလွှာတွင်မျှ တာဝန်ကျ အုပ်ချုပ်ရေးမှုးများ သို့မဟုတ် အုပ်ချုပ်ရေးမှူးကြီးများ မရှိကြပေ!
၎င်းသည် ဂိုဏ်းသားများအတွက် ထူးခြားသော အရာတစ်ခုခုကိုပြီးမြောက်စေရန် အကောင်းဆုံးအခွင့်အရေး ဖြစ်လေသည်။
မကြာမီ၊ လေလံပွဲပုံရိပ်ယောင်တွင် ကုသိုလ်တော် ရေကန်ထဲ၌ ဝိညာဉ်မြူခိုးများဝန်းရံလျက် ဝိုင်ခွက်ကို အေးအေးလူလူကိုင်ထားသော စုကျိုကို ပြသလိုက်လေသည်။
“ချစ်ခင်ရပါသော ဂျူနီယာညီမလေးများ၊ ဂျူနီယာမောင်လေးများ၊ စီနီယာအစ်ကိုကြီးများနှင့် စီနီယာအစ်မကြီးများ၊ ဒီနေ့ လေလံပွဲကနေ ကြိုဆိုပါတယ်” ကြွားဝါရတာကြိုက်သော ယင်လီသည် ယနေ့ အခမ်းအနားမှူး ဖြစ်သည်။
သူမ ပြောနေစဉ်မှာပင်၊ သန်မာဆုံညာလက်မောင်းနှင့် အလွန်မြန်သော လက်အမြန်နှုန်း ပိုင်ဆိုင်ထားသည့် လဲ့အော်သည်၊ ဂိုဏ်းသားအားလုံး လေလံပွဲ အချက်အလက်များကိုဖတ်ရှုနိုင်စေရန် 'မှတ်ချက်ပုံး' ထဲတွင် စာသားများကို ရိုက်ထည့်နေလေသည်။
“ပထမဆုံးအနေနဲ့၊ ဒီနေ့ လေလံတင်မယ့် ပထမဆုံး ပစ္စည်းဆယ်ခုက—”
“အားလုံး အလွှာ ၃၅ ခေါင်းဆောင် ကျင်းချန်ရဲ့မုန်ညင်းစေ့အိတ်ထဲက လာတာပါ”
[!]
[!]
[ဂျူနီယာညီမလေးယင်လီ၊ နင် အကုန်သိနေတာပဲ၊ ဒီမနက် ဖြစ်ပျက်ခဲ့တာတွေ ပြီးနောက် ကျင်းချန်ရဲေဂုဏ်သတင်း ထိုးကျသွားတာ နင် မသိဘူးလား။]
[ဟုတ်တယ်၊ အဆောင်ရဲတစ်ပတ်ရစ် ဈေးကွက်ထဲမှာ၊ ကျင်းချန်ရဲ့ပုံတူတွေနဲ့ ရုပ်တုတွေ အများကြီးကို ထုတ်ရောင်းနေကြတယ်၊ ဈေးနှုန်းက ဝိညာဉ်ကျောက်တုံး ၉၉၉ ကနေ ၉၉ အထိ ကျသွားပြီ။]
“ဒါတွေအကုန်လုံးက အသုံးမဝင်ဘူး၊ ကျင်းချန်ရဲ့ထုတ်ကုန်တွေ”
“ဒါပေမဲ့ ရှောင်ကျိုက ဒါတွေကိုယူလာတာ မဟုတ်တာ သေချာတယ်”
ရေပူကန်ထဲတွင် စိမ်နေသော ယင်လီသည်လည်း ပုံရိပ်ယောင်ဘက်သိုလက်ဟန်ပြလိုက်သည်။
“အားလုံးပဲ၊ ကျေးဇူးပြုပြီး စိတ်ရှည်ကြပါ”
“ကြည့်လိုက်”
စုကျီကျီ၊ စုရှင်းချန်၊ ကျူးပိုင်ယွီ နှင့် အခြားသူများသည် ရေပူကန်ထဲတွင် တန်းစီနေကြလေသည်။
ယင်လီ လက်ဖြန့်လိုက်ရာ၊ သူတို့အားလုံးသည် သူတို့နောက်ရှိ ကျောက်နံရံမှ အနီရောင်ပိုးသားဗန်းများကို ကောက်ယူလိုက်ကြပြီး၊ ဗန်းများထဲတွင် ဒုတိယအဆင့် ရတနာရောင်စုံများတောက်ပနေသော ဝိညာဉ်လက်နက်များနှင့် မှော်ရတနာများ ပြည့်နှက်နေလေသည်။
ဤ ဝိညာဉ်လက်နက်များနှင့် မှော်ရတနာ တစ်ခုချင်းစီတွင် စာလုံးအသေးလေးတစ်ကြောင်းလည်း ပါရှိလေသည်။
[ကျင်းချန် လက်ခံရရှိခဲ့သော လက်ဆောင်များ - ဒုတိယအဆင့် မက်မွန်ပွင့်ဓား ပုံတူများ ၁-၉]
[ကျင်းချန် လက်ခံရရှိခဲ့သော လက်ဆောင်များ - ဒုတိယအဆင့် မိုးမခသစ်သားဓား ပုံတူများ ၁-၉]
[ကျင်းချန် လက်ခံရရှိခဲ့သော လက်ဆောင်များ - ဒုတိယအဆင့် အရှိန်မြှင့် ဖိနပ် ပုံတူများ ၁-၉]
[ကျင်းချန် လက်ခံရရှိခဲ့သော လက်ဆောင်များ - ဒုတိယအဆင့် အမျိုးသမီး ဆံထိုး ပုံတူများ ၁-၉]
...
[ကျင်းချန် လက်ခံရရှိခဲ့သော လက်ဆောင်များ - ဒုတိယအဆင့် ဒူးလေး ပုံတူများ ၁-၉]
ဒါတွေအားလုံးက စုကျို ကျင်းချန်ကိုအကြိမ်ကြိမ်ထိတွေ့ပြီးနောက်ရရှိခဲ့သော ပစ္စည်းများ၏ပုံတူများ ဖြစ်ကြသည်။
ပြိုင်ကွင်းပေါ်တွင် သူမ တွေ့ဆုံခဲ့ရသော လျောင်ညီအစ်မများမှလွဲ၍ (သူမသည် ပိုးချည်ကဲ့သို့သော ဓားများကို မြင်တွေ့ခဲ့ရပြီး၊ လက်ဆောင် အဖြစ် ဓားရိုးပုံတူ ကိုးခုကိုပြန်ပေးခဲ့သည်)၊ ကျင်းချန်ဆီမှ သူမ လက်ခံရရှိခဲ့သော ဤကျန်ရှိသည့် ပုံတူများ၏မူရင်းပိုင်ရှင်များကို သူမ မသိပေ။
သူမ အနေဖြင့် အားလုံးကိုလိုက်ရှာနေရန် မဖြစ်နိုင်ပေ။
ပြီးတော့ ပိုးကောင်တွေကိုကျွေးဖို့ဆိုတာကလည်း... တတိယအဆင့် မျက်နှာဖုံးသော့ခလောက်များကို အသုံးပြုလေ့ရှိသော သူမ၏ ခွေးဖြူကြီးသည် ယခုအခါ ဒုတိယအဆင့် ရတနာများကို အနည်းငယ်ရွေးချယ်တတ်နေပြီဖြစ်သည်။
အောက်ခြေအဖွဲ့တွင်လည်း ဓားများ သို့မဟုတ် ဒူးလေးများမလိုအပ်ကြပေ။
ယနေ့၊ သူမ အကုန်ရောင်းပစ်မည်!
မမျှော်လင့်ဘဲ၊ ဤထုတ်ပြန်ချက်သည် ဂိုဏ်းသားများထံမှ ပြင်းထန်သော တုံ့ပြန်မှုကိုဖြစ်ပေါ်စေခဲ့လေသည်။
【! ထိတ်လန့်စရာပဲ! ဒီ မက်မွန်ပွင့်ဓားက ဆံထိုးပန်းပွင့်ဆောင်က စီနီယာအစ်မမက်မွန်ပွင့်ပိုင်တာ မဟုတ်ဘူးလား၊ ဘာလဲ၊ ကျင်းချန်က ငါ့ရဲ့ မိုးမခသစ်သားဓားကို ယူသွားတယ်၊ ဒါပေမဲ့ သူက ငါ့ရဲ့ရန်သူတော် စီနီယာအစ်မမက်မွန်ပွင့်ရဲ့ ဓားကိုပါ ယူထားတာလား။】
【နေပါဦး၊ ဒီဒူးလေးက... စီနီယာအစ်ကိုကျင်းချန်က ငါ့ကို ပြောတယ်၊ သူက ရှေးဟောင်းကျမ်းဂန်အများအပြားကို ကိုးကားပြီး ဒါရဲ့ ပုံသဏ္ဍာန်ကိုတီထွင်ခဲ့တာတဲ့၊ လက်ကိုင်ကိုတောင် ကိုယ်တိုင် ဒီဇိုင်းဆွဲခဲ့တာတဲ့။
【ဘာ ? အဲဒါက လက်ဆောင်ရထားတာလား ? ဘယ်သူက သူ့ကို ပေးခဲ့တာလဲ ? အမျိုးသမီး ကျင့်ကြံသူလား။】
【အာ... ဒီ အရှိန်မြှင့်ဖိနပ်တွေ... ခေါင်းဆောင်ကျင်း ပြောဖူးတယ်၊ သူ ကျင်းမိသားစုဆီကနေ ကိုယ်ပိုင် ကြိုးစားအားထုတ်မှုနဲ့ အနိုင်ရခဲ့တာလို့ ငါ မှတ်မိတယ်၊ ဘယ်လိုလုပ်ပြီး တခြားသူဆီကရတဲ့ လက်ဆောင် ဖြစ်နေရတာလဲ။】
【အာ...】
ဤပစ္စည်းများသည် ထိုမျှပြင်းထန်သော ဆွေးနွေးမှုဖြစ်စေလိမ့်မည်ဟု စုကျို မမျှော်လင့်ခဲ့မိပေ။
မကြာမီ၊ လူတိုင်း စတင် လေလံဆွဲကြလေသည်။
ဝိညာဉ်ပိုးဖလံဂေဟာ၏ဂိုဏ်းသားများသည် ဝိညာဉ်ပစ္စည်းကိရိယာအများအပြားကို စားသုံးသော ပိုးကောင်များကို မွေးမြူကြသည်။
ကျင်းချန် နာမည်မှလွဲ၍၊ ဤပစ္စည်းများသည် ရောင်းထွက်ရန် အခက်အခဲရှိမည် မဟုတ်ပေ။
စုကျိုသည် သူတို့ကို ခေတ္တမျှ ကြည့်ရှုပြီးနောက်၊ ဆက်လက် အာရုံမစိုက်တော့ပေ။
ယင်လီနှင့် ကျူးပိုင်ယွီတို့ တာဝန်ယူထားကြသဖြင့်၊ ဘာမှ မှားယွင်းမည်မဟုတ်ပေ။
ချန်ယွမ် အနီရောင်ဝတ်ရုံကိုဝတ်ဆင်လျက်၊ သူမသည် အနီးနားရှိ ဝိညာဉ်စွမ်းအင်ပိုမိုကြွယ်ဝသောကုသိုလ်မှတ်မြင့် ဧရိယာဖြစ်သည့် အခြေတည်အဆင့်ရေကန်သို့ သွားလိုက်လေသည်။