အဆင့် ၃ စွမ်းရည်

အကယ်၍ ကျန်းချန်သည် သိမြင်မှုစွမ်းရည်ကိုသုံး၍ ချီချန်းကို ကြည့်လိုက်မည်ဆိုပါက ၎င်း၏တန်ဖိုးမှာ အမှတ် ၇,၅၀၀ မှ ၅,၅၀၀ သို့ ကျဆင်းသွားကြောင်း တွေ့ရပေလိမ့်မည်။

သူနှင့်အတူပါလာသော ဆယ်ယောက်ကျော်ထဲမှ ခုနစ်ယောက်မှာ သွေးအန်ပြီး ထိုနေရာ၌ပင် သေဆုံးသွားခဲ့သည်။

အခြေအနေအကောင်းဆုံးမှာ ကောင်းကင်ကံကြမ္မာအဆင့် ၁ ဖြစ်သည့် လူကျန့်ဖြစ်သည်။ သူသည် မျက်နှာဖြူဖျော့သွားပြီး ဒဏ်ရာမှာမသေးလှပေ။

"ဒါက အနည်းဆုံး အဆင့် ၉ ရှိတဲ့ ဝိညာဉ်အဆောင်စာရွက်ပဲ၊ ငါတို့ ခုခံနိုင်တဲ့အရာ မဟုတ်ဘူး"

ကျန်းချန်သည် သူ၏တပည့်များကို လှည့်စားနိုင်သော်လည်း လူကျန့်ကိုမူလှည့်စား၍မရပေ။

ခုနကဖြစ်ပျက်သွားသမျှသည် ထိုအဆောင်စာရွက်၏အစွမ်းကြောင့်ဖြစ်ကြောင်း သူ ရှင်းရှင်းလင်းလင်းသိသည်။

ကံကောင်းထောက်မစွာဖြင့် သူအဝေးတွင်ရှိနေခဲ့ခြင်းဖြစ်သည်၊ အကယ်၍ ဆယ်မိုင်ပတ်လည်အတွင်းရှိနေခဲ့ပါက သူလည်း အသက်ရှင်ရန်လမ်းမရှိပေ။

"ဒီနေရာမှာ ဆက်နေလို့ မဖြစ်တော့ဘူး"

"အခုချက်ချင်း ပါယွန်းခန်းမကိုပြန်ကြမယ်"

ဤတစ်ကြိမ်တွင် ချီချန်းသည် ပြန်လည်ငြင်းဆန်ခြင်းမရှိတော့ဘဲ လူကျန့်ထက်ပင် ဦးအောင်ထွက်ပြေးတော့သည်။

ကျန်းချန်ထံတွင် ထိုကဲ့သို့သော အဆင့် ၉ အဆောင်စာရွက် မည်မျှကျန်နေဦးမည် မသိနိုင်ချေ။

သူတို့ထွက်ပြေးသွားချိန်တွင် ကျန်းချန်သည် တိုက်ပွဲကို အဆုံးသတ်လိုက်ပြီဖြစ်သည်။

အမှန်တကယ်တွင် ရန်သူငါးရာကျော်ရှိရာမှ ဝိညာဉ်ခွဲထုတ်ခြင်းအဆင့်နှစ်ဦးကိုသာ သူ၏ဓားချက်ဖြင့် သတ်ခဲ့ခြင်းဖြစ်ပြီး ကျန်သူများမှာမူ အဆောင်စာရွက်ကြောင့် ပေါက်ကွဲသေဆုံးသွားခြင်းဖြစ်သည်။

"ဟူး... ကောင်းကင်ဘုံက သက်ရှိတွေကိုတန်ဖိုးထားတတ်တယ်၊ ဒီဂိုဏ်းချုပ်ကလည်း သူတို့ကို အကုန်မသတ်ချင်ပါဘူး။ မင်းတို့က ငါ့ကို အတင်းအကျပ်လုပ်ခိုင်းတာပဲ။"

ပုံရိပ်ဖမ်းယူနေဆဲဖြစ်သဖြင့် သူ၏ဟန်ထုတ်စကားများမှာ အလွန်ပင်ပီပြင်နေတော့သည်။

အခြားတစ်ဖက်ရှိ ဖေးရှန်ဂိုဏ်းတွင်မူ အောင်ပွဲခံသံများ ဆူညံနေလေပြီ။

"ငါတို့ နိုင်ပြီ"

"ဂိုဏ်းချုပ်ကြီး နိုင်ပြီ"

"ဂိုဏ်းချုပ်က အရမ်းတော်တာပဲ၊ ဓားတစ်ချက်တည်းနဲ့ ရန်သူတွေကို အပြတ်ရှင်းလိုက်တာ..."

"သူက တကယ့် နတ်ဘုရားတစ်ပါးပဲ"

"ကျားလေးက သူ့ဘာသာသူ အမှတ်ယူနေတာ၊ ဂိုဏ်းချုပ်ရဲ့အစွမ်းနဲ့ဆိုရင် အဲဒီကျား ကူစရာတောင်မလိုဘူး။"

အတွင်းထဲမှ မျက်စိသုံးလုံးကျား- မြောင်... မြောင်... မြောင်... (ဘာတွေပြောနေကြတာလဲကွာ)

"ဂိုဏ်းချုပ်ရဲ့ အစွမ်းက ငါတို့ထင်ထားတာထက် အများကြီးပိုတယ်"

လူတိုင်းချီးကျူးနေကြစဉ် စီနီယာအစ်ကိုချင်မှာမူ ဂုဏ်ယူဝင့်ကြွားနေသည်။

သူသည် ယခင်က ကျန်းချန် ဓားတစ်ချက်တည်းနှင့်နိုင်လိမ့်မည်ဟု ခန့်မှန်းခဲ့သူဖြစ်သောကြောင့်ပင်။

ထိုအချိန်တွင် ပုံရိပ်လွှင့်မျက်နှာပြင်ပိတ်သွားသည်။ ပစ္စည်းများ သိမ်းဆည်းရတော့မည့်အချိန်ဖြစ်သဖြင့် အစ်ကိုကြီးချန်က သူ၏ပုံရိပ်ကိုထိန်းသိမ်းရန် ထိုသို့လုပ်ဆောင်လိုက်ခြင်းဖြစ်သည်။

ယခုတစ်ကြိမ်ရိတ်သိမ်းမှုမှာ ယခင်အကြိမ်အားလုံးပေါင်းသည်ထက်ပင် သာလွန်သည်။

ဝိညာဉ်အခြေတည်အဆင့် ပညာရှင် ၂၀ ကျော်ထံမှ အဆင့် ၆ ဝိညာဉ်လက်နက်များ၊ ဝိညာဉ်ကျောက်တုံးများ၊ ဆေးလုံးများနှင့် အဆောင်စာရွက်များ အများအပြားရရှိလိုက်သည်။

ပစ္စည်းများကို စနစ်ထံတွင်လဲလှယ်လိုက်သောအခါ အမှတ် ၂၃၀,၀၀၀ ကျော် ရရှိခဲ့သည်။ ယခင် ကျန်ရှိသောအမှတ်များနှင့် ပေါင်းလိုက်လျှင် စုစုပေါင်း ၂၅၀,၀၀၀ ကျော် ရှိသွားပြီ ဖြစ်သည်။

"ပစ္စည်းလုတာက အမှတ်ရဖို့ အမြန်ဆုံးနည်းလမ်းပဲ"

ကျန်းချန် သက်ပြင်းချလိုက်မိသည်။ သူသာ ကိုယ့်ဘာသာကိုယ်ကျင့်ကြံပြီး ရတနာရှာမည်ဆိုပါက အမှတ် ၁၀၀,၀၀၀ ရရန်ပင် မည်မျှကြာမည်နည်း။

"ကံစမ်းမဲမနှိုက်ရတာကြာပြီ၊ အခုတော့ တစ်ခါလောက် သုံးဖြုန်းလိုက်ဦးမယ်။"

အဆင့် ၃ ကံစမ်းမဲ တစ်ကြိမ်နှိုက်ရန် အမှတ် ၁၀၀,၀၀၀ ကုန်ကျသည်။ ဈေးကြီးသော်လည်း သူ တတ်နိုင်နေသည့်အတွက် နှိပ်လိုက်၏။

“ဒင်... ဂုဏ်ယူပါသည်။ လက်ခံသူသည် ရွှမ်ကျီရုပ်ပုံ အပိုင်းအစတစ်ခု ရရှိသည်။”

ဒါက ဘာကြီးလဲ... ပုံအစုတ်လေးတစ်ခုလား... အဲဒါကလည်း အပိုင်းအစတဲ့လား

အစ်ကိုကြီးချန်သွေးအန်မတတ် ဖြစ်သွားသည်။ ၎င်းသည် အမှတ် ၁၀၀,၀၀၀ တန်သည် မဟုတ်ပါလား။

သို့သော် ရုပ်ပုံ၏ဖော်ပြချက်ကို ဖတ်ကြည့်ပြီးနောက် သူပြန်ပြုံးနိုင်သွားသည်။

ရွှမ်ကျီရုပ်ပုံ- ရှေးဦးကာလမှ ထူးခြားသောရတနာတစ်ခုဖြစ်ပြီး ကိုယ်ပိုင်ဟင်းလင်းပြင်နှင့် ကိုယ်ပိုင်စည်းမျဉ်းများရှိသည်။ ဤရုပ်ပုံအတွင်းရှိ အချိန်စီးဆင်းမှုနှုန်းမှာ အပြင်လောကထက် အဆ ၁,၀၀၀ ပိုမြန်သည်။

အပိုင်းအစ- ဟင်းလင်းပြင်မှာ မတည်ငြိမ်သေးဘဲ လူ ၃ ဦးသာ ဝင်ရောက်နိုင်သည်။

အပြည့်အစုံ- အပိုင်းအစအားလုံးစုမိပါက နတ်ဘုရားနန်းတော်ကို ရရှိမည်ဖြစ်ပြီး စည်းမျဉ်းအားလုံးကို လက်ခံသူကထိန်းချုပ်နိုင်သည်။

ဤမြေပုံအပိုင်းအစလေးပင်လျှင် အလွန်အသုံးဝင်လှသည်။ တပည့် ၃ ယောက်ကိုထည့်ပြီး တစ်ရက်ကျင့်ကြံခိုင်းပါက အပြင်လောက၏ ရက်ပေါင်း ၁,၀၀၀ နှင့် ညီမျှသည်။ ၎င်းမှာ အချိန်အခန်းသို့ ရတနာမျိုးဖြစ်သည်။

သူသည် မြေပုံထဲသို့ ဝိညာဉ်အာရုံဖြင့်ဝင်ကြည့်ရာ နေရာအလွန်ကျယ်သော်လည်း မီးတောင်များ ပေါက်ကွဲနေပြီး အဆိပ်ငွေ့များပြည့်နေသဖြင့် သာမန်လူဝင်၍မရသေးပေ။

အချိန်အတော်ကြာ ပြုပြင်မွမ်းမံပြီးမှသာ ထိုနေရာကို တည်ငြိမ်သွားစေခဲ့သည်။ သို့သော် ဝိညာဉ်ခွဲထုတ်ခြင်းအဆင့်အောက် ကျင့်ကြံသူများမှာမူ ထိုထဲတွင်ရှင်သန်ရန် ခက်ခဲဦးမည်ဖြစ်သည်။

"နောက်တစ်ခါ ထပ်နှိုက်မယ်"

ဒင်... ဂုဏ်ယူပါသည်။ လက်ခံသူသည် အဆင့် ၃ ဆေးဖော်စပ်ခြင်းနည်းစနစ်ကို ရရှိခဲ့သည်။

"သောက်ခွေး..."

အစ်ကိုကြီးချန်သည် စနစ်ကိုမြေကြီးပေါ်ပစ်ပေါက်ပြီး နင်းခြေပစ်ချင်စိတ်ပေါက်သွားသည်။

သူသည် ယခင်က ယောင်ချိုးလင်၏စွမ်းရည်များကို ကူးယူထားသဖြင့် အဆင့် ၃ ဆေးဆရာ ဖြစ်နေပြီ မဟုတ်ပါလား။ အမှတ် ၁၀၀,၀၀၀ သုံးပြီး ရလာသည်မှာ အပိုဖြစ်နေသည်ဟုသူထင်မိသည်။

သို့သော် စနစ်၏ အဆင့် ၃ ဆေးဖော်စပ်ခြင်းနည်းစနစ်ကို သေချာကြည့်လိုက်သောအခါမှ ကွာခြားချက်ကိုတွေ့လိုက်ရသည်။

ဤကမ္ဘာ၏ အဆင့် ၃ ဆေးဆရာမှာ အဆင့် ၃ ဝိညာဉ်ဆေးလုံးများကိုသာ ဖော်စပ်နိုင်သည်။ သို့သော် စနစ်၏ အဆင့်သတ်မှတ်ချက်မှာ-

အဆင့် ၁- အဆင့် ၅ ဝိညာဉ်ဆေးလုံးများ ဖော်စပ်နိုင်သည်။

အဆင့် ၂- အဆင့် ၉ ဝိညာဉ်ဆေးလုံးများ ဖော်စပ်နိုင်သည်။ (ဤကမ္ဘာ၏ အဆင့် ၉ ဆေးဆရာနှင့် ညီမျှသည်)

အဆင့် ၃- ဝိညာဉ်ဆေးလုံးများထက် သာလွန်သော ရတနာဆေးလုံး'များကို ဖော်စပ်နိုင်သည်။

ဆိုလိုသည်မှာ သူသည် ယခုအခါ ဆေးဘုရင်ကြီးတစ်ဦးဖြစ်သွားလေပြီ။

ထို့အပြင် စနစ်၏နည်းလမ်းမှာ ဆေးမီးဖို သို့မဟုတ် ထူးခြားသောမီးတောက်များ မလိုပေ။

ပစ္စည်းများကို စနစ်ထဲထည့်ပြီး ပေါင်းစပ်လိုက်ရုံဖြင့် ၁၀၀% အောင်မြင်မှုနှုန်းရရှိမည်ဖြစ်သည်။

"စနစ်က ငါ့ကိုမညှာတာဘူးလို့တော့ ပြောလို့မရဘူးပဲ"

သူသည် ထိုစွမ်းရည်ကိုသင်ယူလိုက်ရာ နှစ်ပေါင်းထောင်ချီ၍ ဆေးဖော်စပ်ခဲ့သကဲ့သို့ အသိပညာများ ခေါင်းထဲသို့ ရောက်ရှိလာသည်။ ယောင်ချိုးလင်၏ အတွေ့အကြုံမှာ သူနှင့်ယှဉ်လျှင် ဘာမှမဟုတ်တော့ပေ။

ယခုအခါ အမှတ် ၅၀,၀၀၀ ခန့်သာ ကျန်တော့သည်။ အစ်ကိုကြီးချန်သည် သွားကြိတ်ကာ အဆင့် ၂ ကံစမ်းမဲကို ငါးကြိမ်ဆက်တိုက် နှိုက်ပြီး အမှတ်များကိုအကုန်သုံးပစ်ရန် ဆုံးဖြတ်လိုက်တော့သည်။