ငါ့ရဲ့ကျင့်စဉ်ကို သိရဲ့လား

ဤသိုင်းကွက် ပေါ်ထွက်လာသည်နှင့်တစ်ပြိုင်နက် ကုမင်၏ တည်ငြိမ်လှသော အကြည့်များထဲတွင် လှုပ်ခတ်မှုကြီးတစ်ခု ဖြစ်သွားတော့၏။

"နတ်ဘုရားဆင်ဖြူတော် ငရဲနှိမ်နင်းခြင်း အတတ်”

"မင်း ဒါကို ဘယ်ကနေ သင်ခဲ့တာလဲ”

ကုမင် အလောတကြီး မေးလိုက်သည်။

ရှန်မို၏ သွေးအဆီအနှစ် ကျင့်စဉ်မှာ 'နတ်ဘုရားဆင်ဖြူတော် ငရဲနှိမ်နင်းခြင်း အတတ်' ဖြစ်နေလိမ့်မည်ဟု သူ လုံးဝ မထင်ထားခဲ့ပေ။ သူကိုယ်တိုင် ကျင့်ကြံနေစဉ်အတွင်း ထိုကျင့်စဉ်သည် အလွန်အမင်း အစွမ်းထက်ပြီး လွှမ်းမိုးနိုင်စွမ်းရှိသော သွေးအဆီအနှစ် ကျင့်စဉ်ဖြစ်ကြောင်း သိရှိခဲ့၏။ ၎င်း၏ အပိုင်းအစလေးတစ်ခုသည်ပင် ဤလောကရှိ ကျင့်စဉ်အားလုံးကို ကျော်လွန်ရန် လုံလောက်လှသည်။ အကယ်၍ တစ်စုံတစ်ယောက် ဤကျင့်စဉ်၏ အပြည့်အစုံကို ရရှိခဲ့မည်ဆိုလျှင် နတ်ဆိုးမျိုးနွယ်၏ ပိုမိုမြင့်မားသော အရှင်သခင်နယ်ပယ်သို့ ဧကန်မုချ တက်လှမ်းနိုင်ပေလိမ့်မည်။

ကံမကောင်းစွာဖြင့် သူသည် နတ်ဆိုးလောကတစ်ခုလုံးကို နှံ့အောင်ရှာဖွေခဲ့သော်လည်း ဤကျင့်စဉ်၏ ပထမအဆင့် သုံးဆင့်ကိုသာ ရရှိခဲ့သည်။ ထို့အပြင် သူသည် နတ်ဆိုးလောက၏ ကျယ်ပြောလှသော နယ်မြေကို အုပ်ချုပ်နေသည့် ဧကရာဇ်ဖြစ်ပြီး ဤကျင့်စဉ်အတွက် လိုအပ်သော သက်စောင့်အဆီအနှစ်အတွက် ပူစရာမလိုသော်လည်း ပထမ သုံးဆင့်ကိုသာ အောင်မြင်အောင် ကျင့်ကြံနိုင်ခဲ့၏။

၎င်းတို့မှာ 'ဝိညာဉ်ဖျက် သွေးလှံ'၊ မလှုပ်မယှက် သန့်စင်သော ဘုရင်ခန္ဓာ' နှင့် 'ကောင်းကင်နှင့်မြေကြီး ဖိုကုဋေအတတ်'တို့ ဖြစ်ကြသည်။ ရှန်မို ခုနက အသုံးပြုသွားသော သိုင်းကွက်မှာ 'မလှုပ်မယှက် သန့်စင်သော ဘုရင်ခန္ဓာ' ဖြစ်သည်မှာ ထင်ရှားလှ၏။ သူသည် ထိုသိုင်းကွက်နှင့် အလွန် ရင်းနှီးကျွမ်းဝင်နေသူ မဟုတ်ပါလား။

ရှန်မို ပြသလိုက်သော ထိုခန္ဓာမှာ သူကျင့်ကြံထားသည်ထက်ပင် ပိုမို အစွမ်းထက်နေပြီး ကမ္ဘာပေါ်ရှိ မည်သည့်တိုက်ခိုက်မှုကိုမဆို ခုခံနိုင်မည့်ပုံစံ ရှိနေသည်ကိုလည်း သူ တွေ့လိုက်ရသည်။ ဤသည်မှာ သူတို့နှစ်ဦးကြားရှိ သိုင်းပညာအပေါ် နားလည်သဘောပေါက်မှု ကွာခြားချက်ကြောင့်ပင် ဖြစ်သည်။ ရှန်မို၏ နားလည်မှုစွမ်းအားမှာ အလွန်ပင် ထူးကဲလှသဖြင့် သိုင်းကွက်များအပေါ် နားလည်ပုံမှာ အမှားအယွင်း မရှိသလောက်ပင်။

"ငါကိုယ်တော်က မင်းကို အသက်ချမ်းသာခွင့် ပေးနိုင်တယ်… မင်းသာ ဒီ 'နတ်ဘုရားဆင်ဖြူတော် ငရဲနှိမ်နင်းခြင်း အတတ်' အပြည့်အစုံကို သင်ပေးမယ်ဆိုရင် အရင်က ငါပေးခဲ့တဲ့ ကတိတွေအားလုံး အတည်ပဲ"

ကုမင်မှ လေးနက်သော အသံဖြင့် ဆိုလိုက်သည်။

ကျင့်ကြံသူများလည်း ဤစကားကို ကြားသောအခါ တုန်လှုပ်သွားကြသည်။ ထို 'နတ်ဘုရားဆင်ဖြူတော် ငရဲနှိမ်နင်းခြင်း အတတ်' ဆိုသည်မှာ ကုမင်ကိုပင် စိတ်လှုပ်ရှားသွားစေလောက်အောင် အဘယ်မျှ အစွမ်းထက်သနည်း။

“ခေါင်းဆောင်ငယ်ရဲ့ သွေးအဆီအနှစ် နယ်ပယ်က ဘာလို့ ဒီလောက်မြန်မြန် တိုးတက်လာသလဲဆိုတာ မဆန်းတော့ဘူး… ဒီကျင့်စဉ်က အနည်းဆုံးတော့ 'ကောင်းကင်အဆင့်' ကျင့်စဉ် ဖြစ်ရမယ်"

ဝမ်မူချွမ်မှ ဝင်ပြောမိသည်။

"ဟုတ်တယ်… ကောင်းကင်အဆင့် ကျင့်စဉ်မျိုးမှသာ ကုမင်ကို ဒီလောက်အထိ စိတ်လှုပ်ရှားစေနိုင်မှာ"

ထုံယွမ်ကလည်း အံ့ဩစွာ ဆို၏။

ကောင်းကင်ယံတွင်။

ရှန်မိုမှာ အမူအရာမပျက်ဘဲ

"ကုမင်… မင်း အများကြီး တွေးနေပြီပဲ… လူသားနဲ့ နတ်ဆိုးဆိုတာ ဘယ်တော့မှ အတူမရှိနိုင်ဘူး… ဒီနေ့မှာတော့ မင်း သေရင်သေ… မဟုတ်ရင် ငါ သေရမယ်… တတိယ ရလဒ်ဆိုတာ မရှိဘူး"

ကုမင် သက်ပြင်းချကာ

"ဒီတစ်ကြိမ်မှာတော့ မင်းကို တကယ် မသေစေချင်ဘူးကွာ… မင်းရဲ့ နားလည်နိုင်စွမ်းက ငါ့ထက် အများကြီး သာလွန်တယ်… မင်းသာ ငါ့ကို ဒီကျင့်စဉ် အပြည့်အစုံ သင်ပေးမယ်ဆိုရင် ငါ့ရဲ့ အစွမ်းတွေက အများကြီး တိုးလာမှာပဲ… ဒါဟာ နှစ်ဦးနှစ်ဖက်လုံးအတွက် အကျိုးရှိတာပဲ မဟုတ်လား… ကံမကောင်းတာက မင်းက ဘာလို့ ဒီလောက်တောင် အမြင်မရှိရတာလဲ”

စကားဆုံးသည်နှင့် ကုမင်၏ လက်ထဲမှ သွေးစွမ်းအင်များ ပန်းထွက်လာသည်။ သူ ထိုစွမ်းအင်များကို အတင်းဆွဲယူကာ ရှေးကျပြီး အထီးကျန်ဆန်သော ပုံစံရှိသည့် သွေးလှံတစ်စင်းအဖြစ် ပြောင်းလဲလိုက်သည်။

'နတ်ဘုရားဆင်ဖြူတော် ငရဲနှိမ်နင်းခြင်း အတတ်' အပေါ် ကုမင်၏ နားလည်မှုမှာ ရှန်မိုကို မမီသော်လည်း သူ၏ သွေးအဆီအနှစ် နယ်ပယ်မှာ ပိုမြင့်နေသည်ကို သူ သေချာပေါက် သိထား၏။ စွမ်းအင် ပမာဏသာ အလုံအလောက် များပြားမည်ဆိုလျှင် အရည်အသွေးကို ဖိနှိပ်နိုင်လိမ့်မည် မဟုတ်ပါလား။

ရှန်မို အေးဆေးစွာ ပြုံးလိုက်ပြီး

"ဒီသိုင်းကွက်နဲ့ ငါ့ကို ယှဉ်မလို့လား… မင်း အများကြီး တွေးနေပြန်ပြီ"

သူ၏ လက်များကို ဆွဲလိုက်ရာ ကုမင်ထက်ပင် ပို၍ အထီးကျန်ဆန်သော အရှိန်အဝါရှိသည့် သွေးလှံတစ်စင်း ပေါ်ထွက်လာသည်။

ကုမင် အံ့ဩသွားသည်မှာ ရှန်မို၏ သွေးလှံအရွယ်အစားမှာ သူ၏ သွေးလှံထက် လုံးပတ် တစ်ပတ်စာခန့် ပိုကြီးနေခြင်းပင်။ သူ မှင်တက်သွားပြီး

“မင်းရဲ့ သွေးလှံက... ဒါဆို မင်းရဲ့ သွေးအဆီအနှစ်က..."

ကုမင် စကား ဆက်မပြောနိုင်တော့ပေ။ အကြောင်းမှာ ရှန်မိုမှ တိုက်စစ်စတင်လိုက်ပြီး သွေးလှံကို ပစ်လွှတ်လိုက်ပြီ ဖြစ်သောကြောင့်ပင်။ ကုမင်၏ အကြည့်များမှာ ခက်ထန်သွားပြီး သူ၏ ညာဘက်လက်မောင်း ကြွက်သားများ ရုန်းကြွလာကာ သွေးလှံကို ပြန်လည်ပစ်လွှတ်လိုက်သည်။

'ဝိညာဉ်ဖျက် သွေးလှံ' နှစ်စင်းသည် ကနဦးတွင် ပေပေါင်း သောင်းချီ ကွာဝေးနေသော်လည်း မျက်တောင်တစ်ခတ်အတွင်းမှာပင် ထိပ်တိုက် တွေ့ဆုံသွားကြတော့၏။

အပ်ဖျားနှင့် ဂျုံမှော်ကဲ့သို့!

ဥက္ကာခဲနှင့် မီးတောင် ထိပ်တိုက်တွေ့သကဲ့သို့ပင်!

"ဒိုင်း!"

မြေကမ္ဘာတုန်ဟီးသွားစေမည့် ပေါက်ကွဲသံကြီး ကောင်းကင်တွင် ပေါ်ထွက်လာသည်။ ကောင်းကင်တစ်ခုလုံး သွေးရောင်များ ဖုံးလွှမ်းသွားပြီး လူတိုင်း၏ အမြင်အာရုံကို လုံးဝ ကွယ်ပျောက်စေ၏။

"ဘာဖြစ်သွားတာလဲ?"

"ဒါက ကုမင်နဲ့ ရှန်မိုတို့ရဲ့ သွေးအဆီအနှစ် သိုင်းပညာတွေလား… သူတို့ သုံးတာက တစ်ထပ်တည်းပဲ"

"ဘယ်သူက အသာစီးရနေလဲ… ငါ ဘာမှ မမြင်ရတော့ဘူး”

ကျင့်ကြံသူများ အော်ဟစ်နေမိကြ၏။ မျှော်စင်သင်္ဘောပေါ်ရှိ နဂါးသွေးအစောင့်တပ်များမှာလည်း အလွန်ပင် စိုးရိမ်ပူပန်နေကြပြီး ကောင်းကင်ယံကို စိုက်ကြည့်နေကြသည်။

"ရှုး!"

လေပြင်းတစ်ချက် တိုက်ခတ်သွားသည်။ သွေးရောင်အလင်းတန်းများ ချက်ချင်း လွင့်စင်သွားပြီး ရှန်မိုနှင့် ကုမင်၏ ရုပ်သွင်များ ပေါ်လာ၏။ လူသားတစ်ဦးနှင့် နတ်ဆိုးတစ်ဦး၊ နှစ်ဦးစလုံး တစ်လက်မမျှ နောက်မဆုတ်ဘဲ ရှိနေကြသည်။

ကုမင် ငုံ့ကြည့်လိုက်သောအခါ သူ၏ ရင်ဘတ်ရှိ ချပ်ဝတ်တန်ဆာပေါ်တွင် အချိုင့်တစ်ခု ဖြစ်သွားသည်ကို တွေ့လိုက်ရသဖြင့် သူ မျက်မှောင်ကြုတ်သွားသည်။

သူ တကယ်ပဲ ဒဏ်ရာရသွားတာလား။

အကယ်၍သာ ဤ 'နဂါးအရှိန်အဝါ တိုက်ပွဲချပ်ဝတ်' မရှိခဲ့လျှင် သူ၏ ရင်ဘတ်၌ ထိမှန်သွားပေလိမ့်မည်။

ရှန်မို၏ အင်အားမှာ ဤမျှ ကြောက်မက်ဖွယ်ကောင်းသော အဆင့်အထိ ရောက်နေပြီလား!

သို့သော်လည်း ချပ်ဝတ်ပေါ်ရှိ အချိုင့်မှာ သိပ်မထင်ရှားသဖြင့် လူသားကျင့်ကြံသူများနှင့် နဂါးသွေးအစောင့်တပ်များမှာ သတိမထားမိကြပေ။

ဤတိုက်ခိုက်မှုအပြီးတွင် မည်သူက အသာစီးရသနည်းဆိုသည်ကို နှစ်ဖက်လုံးက မပြောနိုင်ကြ။ သို့သော် ကုမင်သည် မည်သူမျှ မတားဆီးနိုင်သော အရှိန်အဟုန်ဖြင့် ရောက်လာခဲ့သော်လည်း နှစ်ကွက်ဆက်တိုက် ရှန်မိုကို ချက်ချင်း မသတ်နိုင်ခဲ့ခြင်းကပင် သူ့အတွက် အားနည်းချက် ဖြစ်နေပြီဖြစ်သည်။

ခဏအတွင်းမှာပင် လူသားကျင့်ကြံသူများ၏ မျက်နှာတွင် ဝမ်းသာရိပ်များ ပေါ်လာ၏။ ရှန်မိုသည် ကုမင်နှင့် အဆင့်တူ ယှဉ်ပြိုင်နိုင်လိမ့်မည်ဟု မည်သူမျှ မထင်ထားခဲ့ပေ။

ရှန်မို တည်ငြိမ်စွာ ဆိုလိုက်သည်။

“နတ်ဘုရားဆင်ဖြူတော် ငရဲနှိမ်နင်းခြင်း အတတ် ရဲ့ သိုင်းကွက်တွေကို သုံးပြီး ငါ့ကို သတ်ချင်နေတာ နတ်ဆိုးဧကရာဇ်ကတော့ ရည်မှန်းချက် ကြီးလွန်းနေတာပဲ"

ကုမင် အသက်ကို ခပ်ပြင်းပြင်း အကြိမ်ကြိမ် ရှူလိုက်ပြီး သူ၏ စိတ်ကို အမြန် ပြန်လည်တည်ငြိမ်အောင် ထိန်းလိုက်သည်။ သူသည် အဆင့်နိမ့် ဝံပုလွေနတ်ဆိုး ဘဝမှ ယနေ့အခြေအနေအထိ တစ်ဆင့်ချင်း တက်လှမ်းလာခဲ့သူ ဖြစ်၏။ ခြေလှမ်းတိုင်းမှာ သွေးစက်များဖြင့် စိုရွှဲနေခဲ့ပြီး အလောင်းများကို နင်းကာ တက်လာခဲ့ရသူ ဖြစ်လေသည်။

သူသည် အချိန်အတော်ကြာအောင် အမြဲတမ်း အသာစီးရကာ တစ်ဖက်လူကို ဖိနှိပ်ခဲ့သည်မှာ ကျင့်သားရနေခဲ့ပြီဖြစ်သည်။ အခုလို အဆင့်တူ ပြိုင်ဘက်မျိုးနှင့် ရုတ်တရက် တွေ့ဆုံရခြင်းသည် အနည်းငယ် ထင်မှတ်မထားသော အခြေအနေ ဖြစ်နေ၏။ သို့သော် သူ အမြန် နာလန်ထူလာခဲ့သည်။ ပြုံးပင် ပြုံးလိုက်သေးသည်။

"မင်းကို ငါ အထင်မသေးခဲ့ဘူးဆိုတာ ဒါက သက်သေပြလိုက်တာပဲ… မင်းဟာ ငါ့ရဲ့ အစွမ်းအကုန် ထုတ်သုံးဖို့ ထိုက်တန်တဲ့ ပြိုင်ဘက်တစ်ယောက် ဖြစ်နေတယ်”

ကုမင်သည် မိမိကိုယ်ကို "ငါကိုယ်တော်" ဟု သုံးနှုန်းခြင်းကို ရပ်လိုက်ပြီး "ငါ" ဟုသာ သုံးလိုက်တော့သည်။ ဤသည်မှာ လေးစားမှုကို ဖော်ပြခြင်း ဖြစ်ပြီး သူ အစွမ်းကုန် တိုက်ခိုက်တော့မည်ဟု ဆိုလိုခြင်းပင် ဖြစ်၏။

ကုမင် အေးဆေးစွာဖြင့်

"ငါ ကျင့်ကြံတဲ့ စိတ်ဝိညာဉ်စွမ်းအင် ကျင့်စဉ်က ဘာလဲဆိုတာ မင်း သိသလား”

ရှန်မို ပြုံးလိုက်သော်လည်း ပြန်မဖြေပေ။ ကံကြမ္မာစနစ်ထဲတွင် သူ မြင်တွေ့ခဲ့ရသည်မှာ ကြာပြီဖြစ်၍ ကောင်းကောင်း သိပါသည်။ ထိုကျင့်စဉ်၏ အားသာချက်နှင့် အားနည်းချက်များကိုလည်း အားလုံး ဖတ်ထား၏။

ကုမင် အေးစက်စွာ ဆက်ပြောသည်။

"ငါ ကျင့်ကြံတာက နဂါးကိုးစင်း ဧကရာဇ်အတတ်ပဲ… ဒါက မင်းတို့ ကျင်းနိုင်ငံရဲ့ တော်ဝင်ကျင့်စဉ် မဟုတ်လား”

ဤစကားကို ကြားသောအခါ ရှန်မို တုန်လှုပ်ခြင်း မရှိသော်လည်း အောက်ခြေရှိ ကျင့်ကြံသူများမှာမူ အလွန်ပင် အံ့အားသင့်သွားကြ၏။ 'နဂါးကိုးစင်း ဧကရာဇ်အတတ်' ဆိုသည်မှာ ကျင်းနိုင်ငံ၏ နာမည်အကျော်ဆုံး ကောင်းကင်အဆင့် ကျင့်စဉ် ဖြစ်သည်။ တော်ဝင်မိသားစုမှ ယင်းကို အပြင်သို့ မပေါက်ကြားစေရန် ပြင်းပြင်းထန်ထန် တားမြစ်ထားပြီး တိုက်ရိုက်မျိုးဆက်များကိုသာ သင်ကြားပေးခြင်း ဖြစ်သည်။ အကယ်၍ တစ်စုံတစ်ယောက်က စွန့်ပစ်ခံရပြီး သာမန်လူ ဖြစ်သွားမည်ဆိုလျှင်ပင် ထိုကျင့်စဉ်နှင့် ပတ်သက်သော မှတ်ဉာဏ်များကို ဖျက်ဆီးပစ်သည့် လျှို့ဝှက်အတတ်ကို အသုံးပြုကြ၏။ ထို့ကြောင့် ဤကျင့်စဉ်မှာ သာမန်လူများ၏ လက်ထဲသို့ အပိုင်းအစလေးပင် ရောက်ရန် မဖြစ်နိုင်ပေ။

ကုမင်က ဘယ်လိုလုပ်ပြီး ရရှိသွားတာလဲ။

"အဲ့ဒါ ဘယ်ကနေ ရလာတာလဲ"

ရှန်မို သာမန်ကာလျှံကာ မေးလိုက်သည်။

ကုမင် ပြုံးလျက်

"ကျင်းနိုင်ငံရဲ့ လူသားဧကရာဇ်ဟာ ငါ့ရဲ့ နတ်ဆိုးမျိုးနွယ်တွေရဲ့ မိုင်းတွင်းတစ်ခုကနေ တက်လာခဲ့တာလေ… သူရခဲ့တဲ့ 'နဂါးကိုးစင်း ဧကရာဇ်အတတ်' ဆိုတာ သူကိုယ်တိုင် ဖန်တီးခဲ့တာ မဟုတ်ဘူး… အဲ့ဒီမိုင်းတွင်းရဲ့ အနက်ရှိုင်းဆုံးနေရာကနေ တူးဖော်ရရှိခဲ့တာ… ဘယ်သူမှ မသိဘူးလို့ သူ ထင်နေပေမဲ့ တကယ်တော့ အဲ့ဒီ ကျောက်စာချပ်ပေါ်က စာသားတွေကို အနည်းဆုံး လူသုံးယောက်က အလွတ်မှတ်မိနေကြတာပဲ”

"လူသားဧကရာဇ် ထွက်သွားတဲ့အခါ ကျောက်စာချပ်ကို ယူသွားပေမဲ့ တခြားသူတွေရဲ့ ဦးနှောက်ထဲက မှတ်ဉာဏ်တွေကိုတော့ သူ ယူမသွားနိုင်ခဲ့ဘူး… ငါတို့ နတ်ဆိုးလောကရဲ့ မျိုးဆက်အဆက်ဆက် ဧကရာဇ်တွေဟာ အဲ့ဒီ အချက်အလက်တွေကို ကူးယူခဲ့ကြပြီး ကျင်းနိုင်ငံ တော်ဝင်မျိုးနွယ်တွေရဲ့ သိုင်းကွက်တွေကို အကြိမ်ကြိမ် စောင့်ကြည့်လေ့လာရင်းနဲ့ တဖြည်းဖြည်း ပြည့်စုံအောင် ပြန်ဖော်ထုတ်ခဲ့ကြတာ… အဲ့ဒါကြောင့် ဒီကျင့်စဉ် ဖြစ်လာတာပဲ”

"မင်း ကျင့်ကြံတဲ့ စိတ်ဝိညာဉ်စွမ်းအင် ကျင့်စဉ်ကလည်း ကောင်းကင်အဆင့် ဖြစ်ရမယ်ဆိုတာ ငါသိတယ်… ဒါပေမဲ့ 'နဂါးကိုးစင်း ဧကရာဇ်အတတ်' နဲ့ ယှဉ်နိုင်တဲ့ ကျင့်စဉ်မျိုး ဘယ်မှာ ရှိမှာလဲ… ရှန်မို… သေချာကြည့်ထားစမ်း”

ကုမင် လက်ကို ဝှေ့ယမ်းလိုက်ရာ သူ၏ စိတ်ဝိညာဉ်စွမ်းအင်များသည် မြစ်ကြီးတစ်စင်းအလား သူ၏ ပုံရိပ်ငယ်အတွင်းမှ စီးထွက်လာ၏။ မကြာမီ ချက်ချင်းဆိုသလိုပင် အရောင်အမျိုးမျိုးရှိသော ဧရာမ နဂါးရှစ်စင်းအဖြစ် ပေါင်းစည်းသွားတော့သည်။

တောက်လောင်နေသော မီးတောက်များဖြင့် 'မီးနဂါး'!

အေးစိမ့်သော အရှိန်အဝါများ ကောင်းကင်ယံကို လွှမ်းမိုးထားသည့် 'ရေခဲနဂါး'!

လျှပ်စီးများ ရစ်ပတ်နေသော 'လျှပ်စီးနဂါး'!

သွေးစွမ်းအင်များ ကောင်းကင်သို့ ပန်းထွက်နေသော 'သွေးနဂါး'!

တစ်ကိုယ်လုံး နွယ်ပင်များ ရစ်ပတ်ထားသော 'သစ်သားနဂါး'!

သတ္တုနှင့် သွန်းလုပ်ထားသည့်အလားရှိသော 'သတ္တုနဂါး'!

လှိုင်းလုံးများ ထနေပြီး ပုံသဏ္ဌာန် အမျိုးမျိုး ပြောင်းလဲနိုင်သော 'ရေနဂါး'!

မြေကြောများနှင့် ဆက်သွယ်ထားကာ တောင်တန်းနှင့် မြစ်များကို ဝါးမြိုနိုင်မည့် 'ကျောက်နဂါး'!