အခန်း (၁၅၄)

🥝 Chapter 154

ခဏတာမျှ စုကျိုသည် မည်သို့ပြုမူရမည်ကို မသိဘဲ ဖြစ်နေကာ သူ ဆရာသခင်လုကျိကျောင်းကို ကယ်တင်ရမည့်အရေးကို ဝေခွဲမရ ဖြစ်နေသည်။

သို့သော် သူမသည် 'မတ်တပ်ရပ်' လျက် လုကျိကျောင်းကိုထိပ်ဆုံးမှ အောက်ခြေအထိ လုံးဝမျိုချထားသော အရောင်ခုနစ်မျိုးနှင့် ခြင်္သေ့ခွေးကြီးကိုကြည့်လိုက်သည်။

ဟင်း၊ တကယ်လို့ သူမသာ သူ့ကို ကယ်တင်လိုက်ရင် ထွက်လာမယ့် တံတွေးတွေက... သူမ အနည်းငယ်ကြောက်မိသည်။

စုကျို ဝေခွဲမရ ဖြစ်နေစဉ်မှာပင် ကချေသည်ခန်းမမှ ညီမအချို့သည် ဝမ်းသာအားရဖြင့် သူ့အခန်းထဲသို့ ပြေးဝင်လာကြသည်။

"ဂုဏ်ယူပါတယ် ဆရာမစု”

ဝူချင်းချန်းသည် သူ့ ညီမများနှင့်အတူ စုကျိုကိုဂုဏ်ပြုရန် ပြေးဝင်လာကြသည်။

"ကောင်းလိုက်တာ၊ ဆရာမစုက ထိပ်ဆုံး သုံးဆယ့်ခြောက်သင်းစာရင်းထဲကို တိုက်ရိုက်တက်သွားပြီပဲ၊ အား—"

၎င်းတို့၏ဝမ်းသာအားရ အော်ဟစ်သံများမှာ အခန်းထဲရှိ ဧရာမ အရောင်ခုနစ်မျိုးနှင့် အမွှေးလုံးကြီးက လုကျိကျောင်းဟု ယူဆရသူကို ကိုက်ထားသည်ကို မြင်လိုက်ရသောအခါ ရုတ်တရက်ရပ်တန့်သွားကြသည်။

ကချေသည်ခန်းမမှာ အသိပညာမရှိသော တတိယတန်းစားဂိုဏ်းမဟုတ်ပေ။

ဝိညာဉ်ပိုးဖလံဂေဟာတွင် မွေးမြူထားသောပိုးဖလံများသည် ကျင့်ကြံသူများနှင့်အတူ ယှဉ်တွဲနေထိုင်ကာ အလုပ်လုပ်ကြပြီး နက်နဲသော နားလည်မှုများ မျှဝေကြသည်ဟု ကချေသည်များ၏ဆရာများထံမှ ၎င်းတို့ ကြားဖူးကြသည်။

ဒါက... အတူတူနေထိုင်ပြီး အလုပ်လုပ်တာကို ဆိုလိုတာလား ?

"ကျွန်မတို့... အဲ၊ နှောင့်ယှက်မိသွားတာလား”

ဝူချင်းချန်းနှင့် အခြားမိန်းကလေးများသည် အခန်းထဲမှ တိတ်ဆိတ်စွာ ထွက်ခွာသွားကြသည်။

၎င်းတို့သည် ဆရာမစုကျိုနှင့် စကားပြောရန် နောက်မှ ပြန်လာရန် ဆုံးဖြတ်လိုက်ကြသည်။

ယခု မြင်ကွင်းမှာ တကယ့်ကို ထိတ်လန့်စရာကောင်းလှသည်။

"ဟာ၊ ရှောင်ချင်း..."

စုကျိုက အခန်းထဲရှိ ထိတ်လန့်စရာကောင်းသော တိတ်ဆိတ်မှုကို ဖြိုခွဲရန် ၎င်းတို့အား ဆက်နေရန် ဖျောင်းဖျသော်လည်းမအောင်မြင်ခဲ့ပေ။

ညီမမျာ ထွက်သွားသည်နှင့် သူ့အခန်းမှာ သေလုမတတ် ပြန်လည်တိတ်ဆိတ်သွားတော့သည်။

လဲ့ကျယ်နှင့် အခြားသူများမှာဆွံ့အသွားကြသည်။

၎င်းတို့သည် သူမ၏ ခြင်္သေ့ခွေးပိုးဖလံကြီးကို သို့မဟုတ် ဆရာကြီးလုကျိကျောင်းကိုကြည့်နေရမှန်းမသိဘဲ ကြောင်တောင်တောင်ဖြင့် စိုက်ကြည့်နေကြသည်။

【...ကိုးပုံစာ၊ အောင်မြင်စွာ ကော်ပီကူးယူပြီးပါပြီ၊】

အချက်ပေးသံများစွာက တံခါးဝတွင် ကြောင်တောင်တောင် ရပ်နေသော စုကျိုကိုသတိပြန်ဝင်လာစေသည်။

သူမက အခန်းထဲရှိ စားပွဲဘေးတွင် ခြေထောက်တစ်စုံ၏တစ်ဝက်ခန့်သာ မြင်နေရသော ပုံရိပ်ကိုကြည့်ကာ ရယ်မောလိုက်သည်။

"အရှင်သခင်လုရောက်နေတာပဲ၊ ရှင်... ထိုင်မလား”

လုကျိကျောင်း: "..."

လဲ့ကျယ်နှင့် အခြားသူများ: "..."

စုကျို ရှေ့သို့တိုးကာ ချန်ယွမ်ကိုအကူအညီတောင်းရန် ပြင်လိုက်သည်။

"ရှောင်ပိုင်၊ မြန်မြန် လွှတ်လိုက်တော့”

အဆင်ပြေပါတယ်၊ အဆင်ပြေပါတယ်။

သူမက ၎င်းကို ကော်ပီကူးယူပြီးပြီဖြစ်သည်။

"ဖူး—"

ရှောင်ပိုင်က သူမ အတွေးကို ကြားလိုက်ပုံရကာ၊ ဝူးခနဲ အသံနှင့်အတူ မသေမျိုး လူကြီးမင်းလု တစ်ကိုယ်လုံးကိုပြန်ထွေးထုတ်လိုက်သည်။

"အို၊ သူ ပိုးချည်မျှင်တွေ ထွေးထုတ်လိုက်ပြီ”

ယင်လီကမူ လက်ခုပ်တီးလိုက်သည်။

လိုကျားနှင့် ယို့လုတို့မှာ တစ်ပြိုင်နက်တည်း နောက်သို့တစ်လှမ်းဆုတ်လိုက်ကြသည်။

ထင်သည့်အတိုင်းပင်၊ နောက်တစ်ခဏ၌ ယင်လီသည် လုကျိကျောင်း၏ရိုက်ပုတ်ခြင်းကိုခံလိုက်ရကာ အခန်းနံရံသို့ ကပ်သွားတော့သည်။

စုကျို မော့ကြည့်လိုက်သောအခါ လုကျိကျောင်းမှာစိုရွှဲနေပြီး သူ့ကိုယ်ပေါ်တွင် အရောင်စုံပိုးချည်မျှင်အချို့ တွဲလောင်းကျနေသည်ကို တွေ့လိုက်ရသည်။

၎င်းမှာ ရှောင်ပိုင်ထွေးထုတ်လိုက်သည့်အရာများဖြစ်ပုံရသည်။

"သူ တကယ်ပဲ ပိုးချည်မျှင်တွေ ထွေးထုတ်လိုက်တာပဲ”

လဲ့ကျယ်နှင့် အခြားသူများမှာ သက်ပြင်းချနိုင်ကာ ဝမ်းသာအားရဖြစ်သွားကြသည်။

"ဆရာကြီးလုမှာ တကယ်ပဲ နည်းလမ်းရှိတာပဲ”

ဖြောင်း ဖြောင်း ဖြောင်း

၎င်းတို့သည်လည်း ရိုက်ပုတ်ခြင်းခံရကာ ယင်လီနှင့်အတူ နံရံတွင်အဖော်သွားလုပ်ကြရသည်။

မဟာကျင့်ကြံသူ၏အလျင်မျိုးဖြင့် လုကျိကျောင်းသည် သန့်ရှင်းသောဝတ်ရုံကို လျင်မြန်စွာလဲလှယ်လိုက်သည်။

သူ့လေးထောင့်ကျသော မျက်နှာဖြင့် စုကျိုကခေါင်းညိတ်ပြကာ ထိုင်ရန် အချက်ပြလိုက်သည်။

သူသည် စကားရှည်ရှည်ပြောလေ့မရှိသော်လည်း "ရှောင်ကျို၊ ဘာဖြစ်တာလဲ” ဟု မေးလိုက်သည်။

"ဟင်” စုကျို ခေတ္တစဉ်းစားလိုက်သည်။

"ဆရာကြီး၊ ဘယ်ကိစ္စကို မေးတာလဲဟင်”

"..."

ဝိညာဉ်ပိုးဖလံ နတ်သူငယ်လေး၏မျက်နှာတွင် နားလည်သဘောပေါက်သည့် အမူအရာ ပေါ်လာသည်။

ဟုတ်သားပဲ၊ ဘယ်ကိစ္စလဲ ?

ဘယ်လိုလုပ်ပြီး ထိပ်ဆုံး ၃၂ သင်းစာရင်းထဲ တက်သွားတာလဲဆိုတာလား၊ ဒါမှမဟုတ် ရှင် အမျိုခံလိုက်ရတာကိုလား ?

ယင်လီ၊ လဲ့ကျယ်နှင့် အခြားသူများမှာမူ စူးစမ်းလိုစိတ်ဖြင့် ရင်ထဲတွင် အော်ဟစ်နေကြသည်။

လုကျိကျောင်းသည် စားပွဲတွင် ထိုင်လိုက်ကာ မျက်လုံးကို ခဏမှိတ်ပြီးမှ ပြန်ဖွင့်လိုက်သည်။

"အပြင်က ဆူညံသံတွေကို ငါ ကြားတယ်၊ ကျင်းယွီထန်ဂိုဏ်းက ပြိုင်ပွဲဝင်ခွင့် ဆုံးရှုံးသွားပြီ၊ ငါတို့ တိုက်စရာမလိုဘဲ အနိုင်ရတယ်ပေါ့”

"သောက်ကျိုးနည်း”

"ထိတ်လန့်စရာပဲ”

"ဒီလောက်တောင် ကံကောင်းတာလား”

"တကယ်ကို ငါ့ရဲ့နေ့ပဲ၊ ပိုင်ယို့လု မဲနှိုက်တာကတော့ အလကားပဲ—" ယို့လုပါးစပ်မှာ ယင်လီ၏ပိတ်ဆို့ခြင်းကို ချက်ချင်း ခံလိုက်ရသည်။

လူတိုင်းက စုကျိုကို အံ့အားသင့်စွာကြည့်လိုက်ကြသည်။

စုကျို နှိမ့်ချစွာဖြင့် လက်ကာပြလိုက်သည်။

"ဘာမှမဟုတ်ပါဘူး၊ ဘာမှမဟုတ်ပါဘူး”

သို့သော် သူမ၏ လက်အင်္ကျီထဲမှ အရာဝတ္ထုအပုံလိုက်ကြီးမှာ ဝုန်းခနဲမြည်သံနှင့်အတူ ပြုတ်ကျလာသည်။

မူလက လုကျိကျောင်းသည် စုကျို၏ပိုးဖလံက ဆက်နွှယ်နေသော ဝိညာဉ်စွမ်းအားများကိုအာရုံခံမိသလားဟုမေးရန် ပြင်နေသော်လည်း၊ မြေပြင်ပေါ်ရှိ အရာများကို မြင်လိုက်ရသောအခါတိတ်ဆိတ်သွားတော့သည်။

ဝိညာဉ်ပိုးဖလံဂေဟာ ဆိုင်ရှိဝတ်စုံရောင်းသောရုပ်တုများကဲ့သို့ ကိုးခုပြန့်ကျဲနေပြီး၊ ကိုယ်အပေါ်ပိုင်းမှာ... သူနှင့်တစ်ထေရာတည်း တူနေသော ဦးခေါင်းကိုးလုံးနှင့်ဆက်နေသည်။

[လုကျိကျောင်း၏ကိုယ်အပေါ်ပိုင်း ကော်ပီပုံတူများ] ၉ ခု

တိတ်ဆိတ်ခြင်း……

လုကျိကျောင်း မတ်တပ်ရပ်လိုက်ကာ ခဏတာပျောက်ကွယ်သွားချင်မိသည်။

"ဟားဟားဟား၊ ဒါက ဘာကြီးလဲ”

"ရယ်လို့ မဆုံးတော့ဘူး၊ ညီလေး ဒီတပည့်မလေးရဲ့အရည်အချင်းက တကယ်စိတ်ဝင်စားစရာကောင်းတာပဲ၊ ကိုးဆဆ ရလဒ်ထွက်တာလား”

"ဟဲဟဲဟဲ၊ သူ့ဝိညာဉ်ပိုးဖလံက မင်းကိုဝါးမြိုလိုက်ပြီး မင်းရဲ့ပုံတူ ကိုးခုရလိုက်တာပဲ”

သူ့လက်အင်္ကျီအိတ်ထဲမှ ပန်းချီကားများထဲမှ ဒေါသတကြီး ရယ်မောသံများထွက်ပေါ်လာသည်။

စာလိပ်များမှာရယ်မောသံများကြောင့် တုန်ခါနေကာ စက္ကူသံများတကျစ်ကျစ်မြည်နေလေသည်။

သို့သော် မကြာမီ လုကျိကျောင်းမော့ကြည့်လိုက်ကာ စုကျိုကို အသေအချာစိုက်ကြည့်လိုက်သည်။

"ဒါပဲလား”

စုကျို မျက်တောင်ခတ်လိုက်ပြီးမှ သူမ ညာဘက်လက်အင်္ကျီထဲသို့ ဘယ်ဘက်လက်ဖြင့်အမြန်နှိုက်ကာ၊ တိမ်တိုက်ထဲမှအဘိုးအို၊ ယဉ်ကျေးသိမ်မွေ့သော အမျိုးသမီး သို့မဟုတ် ခန့်ညားသော လူငယ်လေးတစ်ဦး၏ ပုံတူ စာလိပ်အချို့ကိုဆွဲထုတ်လိုက်သည်။

လုကျိကျောင်းလက်အင်္ကျီထဲတွင် ဒေါသတကြီးရယ်မောနေသော လူကြီးမင်းများ၏စာလိပ်မှာ ချက်ချင်းအေးခဲသွားတော့သည်။

"?"

"!!!"

ကျင်းယွီထန်ဂိုဏ်း တစ်ဖွဲ့လုံးဖမ်းဆီးခံလိုက်ရသည်။

ဒုတိယခေါင်းဆောင်ချွမ်းလျောင်သည် တည်ငြိမ်သောမျက်နှာထားဖြင့် သူ့ရှေ့မှ ဝိညာဉ်ကုန်သည်အသင်းအရာရှိများကို ကြည့်လိုက်သည်။ "ဟုတ်ပါတယ်၊ ကျွန်တော့်ရဲ့ အရင်နာမည်က လျောင်ချွမ်းပါ”

သူသည် မိမိကိုယ် မိမိ အဖမ်းခံရလိမ့်မည်ဟု မထင်ထားခဲ့ပေ။

သူသည် မြွေမိစ္ဆာတစ်ဦးဖြစ်သည်။

မိစ္ဆာကျင့်ကြံသူ တစ်ဦးလည်း ဖြစ်သည်။

မြွေမိစ္ဆာမျိုးနွယ်သည် အရေခွံလဲတိုင်း ၎င်းတို့ရုပ်အသွင်ကို ပြောင်းလဲနိုင်သော အခွင့်အရေးရှိကြသည်။

ထို့ကြောင့် ၎င်းတို့၏ရုပ်ရည်မှာ အမြဲတမ်းကွဲပြားနေတတ်သည်။

သူသည် အမှန်တရားကိုစစ်ဆေးရန် ၎င်းတို့အား ကျင်းယွီထန်ဂိုဏ်းသို့ ပြန်လည်ပို့ဆောင်မည့် အရာရှိများကို ကြည့်ကာ နားမလည်နိုင်အောင် ဖြစ်နေသည်။

"မင်းတို့ ဘယ်လို သိသွားတာလဲ”

ဝိညာဉ်ကုန်သည်အသင်း အရာရှိများမှာမူ နှုတ်ခမ်းကို တင်းတင်းစေ့ထားကာ အေးစက်သော မျက်နှာထားများဖြင့်သာ ရှိနေကြသည်။

၎င်းတို့ မဖြေကြားနိုင်ပေ။

ဘာလို့လဲဆိုတော့ ဒါက ၎င်းတို့ ရှာတွေ့ခဲ့တာ မဟုတ်လို့ဖြစ်သည်။

ဒါက ဝိညာဉ်ပိုးဖလံဂေဟာက အခြေခံအုတ်မြစ်တည်ဆောက်ခြင်းအဆင့် အစောပိုင်းမှာပဲ ရှိသေးတဲ့ တပည့်မလေး တစ်ယောက်က ရှာတွေ့ခဲ့တာလေ၊ ၎င်းတို့ ဘယ်လို ဖြေရမှာလဲ ?

၎င်းတို့၏ တာဝန်ပေါ့လျော့မှုကြောင့် ၎င်းတို့လစဉ်လစာများကို လိုင်လိုင်နတ်သမီးက သုံးလစာဖြတ်တောက်လိုက်သည်မဟုတ်ပါလား ?

"ပါးစပ်ပိတ်ထား၊ သူ့ကို ချည်လိုက်ကြ၊ ပျံသန်းရေးယာဉ်ပေါ် တင်လိုက်တော့” ပျံသန်းရေးယာဉ်မှာ အရှိန်ဖြင့် ထွက်ခွာသွားပြီး ကျင်းယွီထန်ဂိုဏ်းသို့ လျင်မြန်စွာဆိုက်ရောက်ခဲ့သည်။ ဝိညာဉ်ကုန်သည်အသင်းသည် ဝိညာဉ်လက်မှုပညာရှင်များအသင်းနှင့် ပူးပေါင်းကာ မိစ္ဆာကျင့်ကြံသူများနှင့် တိတ်တဆိတ်ပူးပေါင်းနေသော ကျင်းယွီထန်ဂိုဏ်းမှ လူကြီးမင်းများနှင့် တပည့်များကိုချက်ချင်း စုံစမ်းစစ်ဆေး တော့သည်။

လူအမြောက်အမြားအဖမ်းခံရပြီး ကျင်းယွီထန်ဂိုဏ်းကို ဝိညာဉ်ကျောက်တုံး ငါးသန်းဒဏ်ရိုက်လိုက်သည်။

တစ်ချိန်တည်းမှာပင် လျောင်ချွမ်းအမည်ရှိခဲ့ပြီး ယခုချွမ်းလျောင်အဖြစ် ဟန်ဆောင်နေသူမှာ သူ့ကျင့်စဉ်များ အားလုံးဖျက်သိမ်းခံရပြီး တစ်သက်တစ်ကျွန်း ထောင်ဒဏ်ချမှတ်ခြင်းခံလိုက်ရသည်။

ရုံးတင်စစ်ဆေးနေစဉ်အတွင်း လျောင်ချွမ်းကို ကျင်းယွီထန်ဂိုဏ်း၏မြေအောက်ထောင်တွင် ခေတ္တချုပ်နှောင်ထားခဲ့ရာ၊ သူသည် ဝိညာဉ်ပိုးဖလံဂေဟာတွင် အရေခွံလဲကာကျင့်ကြံနေစဉ်က ဆုံတွေ့ခဲ့ဖူးသော သိကျွမ်းသူနှစ်ဦးနှင့် ချက်ချင်းဆုံတွေ့ခဲ့ရသည်။

ကျင်းချန်နှင့် ချန်ကျိုး

ချန်ကျိုးသည် ကျင်းယွီထန်ခန်းမ မန်နေဂျာကိုတိုက်ခိုက်ပြီး ကျင်းချန်ထံမှငွေခိုးခဲ့သဖြင့် အကြွေးဆပ်ရန် ကျင်းယွီထန်ဂိုဏ်းတွင် အကျဉ်းချခံထားရခြင်း ဖြစ်သည်။

ကျင်းချန်မှာမူ ကျင်းမိသားစု၏ မွေးစားသားတစ်ဦးအနေဖြင့် မွေးမြူစရိတ်များစွာကုန်ကျခဲ့ပြီး အမျိုးသမီးကျင့်ကြံသူများစွာ၏ တိုင်ကြားခြင်းကို ခံခဲ့ရသဖြင့် အပြည့်အဝလျော်ကြေးပေးရန် တောင်းဆိုခံထားရခြင်းဖြစ်သည်။

ယခုမူ မိစ္ဆာကျင့်ကြံသူလျောင်ချွမ်းပါ အကျဉ်းကျလာခဲ့ပြီဖြစ်သည်။

သူ့ကြောင့် အထောက်အထား ပေါ်ပေါက်သွားကာ ကျင်းယွီထန်ဂိုဏ်းမှာ ငါးသန်းဒဏ်ရိုက်ခံခဲ့ရသည်။

"ဟင်း၊ စီနီယာအစ်ကို လျောင်ချွမ်းလား”

ကျင်းချန်သည်ယခုအခါ သူ့ မွေးမြူစရိတ်များကိုပင် ပြန်မဆပ်နိုင်တော့သဖြင့် ချန်ကျိုးကဲ့သို့ပင် သူ့လက်မောင်းများကိုဖြတ်ကာ သူ့ ဝိညာဉ်သွေးများကိုရောင်းချပြီး အကြွေးဆပ်နေရသည်။

သူနှင့် ချန်ကျိုး၏ နေ့စဉ် ဖျော်ဖြေမှုမှာ စုကျို၏ ကြောက်စရာကောင်းသော နည်းလမ်းများကို အပြစ်တင် ပြောဆိုနေခြင်းပင် ဖြစ်သည်။

ထို့ပြင်၎င်းတို့သည် အစောင့်များဖွင့်ပြထားသော ဝိညာဉ်လမ်းစဉ်ပြိုင်ပွဲ၏ထုတ်လွှင့်မှုကိုလည်း တိတ်တဆိတ်ကြည့်ရှုနေကြသည်။

၎င်းတို့သည် အပိုပြိုင်ပွဲများကိုမတွေ့ခဲ့ရသော်လည်း၊ စုကျိုသည် ဝိညာဉ်ပိုးဖလံဂေဟာကိုကိုယ်စားပြုကာ အုပ်စု (C) တွင် အဆင့်တစ်များစွာ ရရှိခဲ့သည်ကို သိနေကြသည်။

ဒါ စုကျိုပဲ၊

ကျင်းချန်ကမူ ကျင့်စဉ်များ ပျက်စီးသွားသော လျောင်ချွမ်းကိုကြည့်ကာ ပြုံးလိုက်သည်။

"အစ်ကို လျောင်လည်း ဝိညာဉ်ပိုးဖလံဂေဟာမှာ ရှိတုန်းက စုကျိုကိုအကြွေးတင်ခဲ့တာလား ကျွန်တော် မထင်ထားဘူး”

ချန်ကျိုးလည်း လှောင်ပြောင်သောမျက်နှာထားဖြင့် "ဒါပေါ့၊ မဟုတ်ရင် မင်း ဘာလို့ ဒီကိုရောက်လာမှာလဲ” ဟု ပြောလိုက်သည်။

လျောင်ချွမ်း: "???"

စုကျိုလား ??

သူ့ကို ဖမ်းဆီးခဲ့သည့် စတုတ္ထအဆင့်ရှိသော စိတ်ရောင်ပြန်ဟပ်ခြင်းမှန်က လျောင်ချွမ်းအား သူ့ အတိတ်က လုပ်ရပ်များကိုသတိရစေခဲ့သည်။

သူသည် ဝေဝေဝါးဝါးမှတ်ဉာဏ်များထဲမှ ရိုးသားဖြောင့်မတ်သော အမျိုးသမီးတစ်ဦး၏ပုံရိပ်ကို နောက်ဆုံးတွင်ပြန်လည်သတိရလာခဲ့သည်။

လွန်ခဲ့သော နှစ်နှစ်ကဖြောင့်မတ်သောလမ်းစဉ်၏ ဖမ်းဆီးခြင်းမှလွတ်မြောက်ရန် သူသည် သူ့အမည်ကို လျောင်ချွမ်းဟုပြောင်းလဲကာ ဝိညာဉ်ပိုးဖလံဂေဟာသို့ ဝင်ရောက်ကျင့်ကြံခဲ့သည်။ တစ်ခါက သူသည် ပြင်းထန်စွာဒဏ်ရာရခဲ့ပြီး ဤအမျိုးသမီးစုကျို၏ကယ်တင်ခြင်းကို ခံခဲ့ရသည်။

ထိုစဉ်က သူမသည် သူ့အတွက် ဆေးဝါးများဝယ်ရန်နှင့် ကုသမှုခံယူရန် ဝိညာဉ်ကျောက်တုံးများစွာအကုန်အကျခံခဲ့သည်။

သူ ပြန်လည်သက်သာလာပြီးနောက် သူ့ကျင့်စဉ်များမှာ လျင်မြန်စွာတိုးတက်လာခဲ့သော်လည်း သူ နှုတ်မဆက်ဘဲ ထွက်ခွာသွားခဲ့ကာ ဝိညာဉ်ပိုးဖလံဂေဟာ၏ထိပ်တန်းအဆင့်များအထိတက်လှမ်းသွားခဲ့သည်။

လွန်ခဲ့သော တစ်နှစ်ကျော်က ကျင်းယွီထန်ဂိုဏ်းသည် အခြေခံအုတ်မြစ်တည်ဆောက်ခြင်း ပြိုင်ပွဲတွင်ပါဝင်ရန် ရွှေအမြုတေတစ်ဝက်အဆင့်ရှိ သော ကျင့်ကြံသူများကို ငှားရမ်းရန် မှောင်ခိုစျေးကွက်တွင် ဈေးကြီးပေးကာ ကြော်ငြာခဲ့သည်။ ထို့ကြောင့် သူသည် အရေခွံလဲကာသေဟန် ဆောင်ပြီး ချွမ်းလျောင်အဖြစ်ပြောင်းလဲကာ ဝိညာဉ်ပိုးဖလံဂေဟာမှထွက်ခွာခဲ့ခြင်းဖြစ်သည်။ သူသည် သူ့ကို ကယ်တင်ခဲ့သော အမျိုးသမီးအ ကြောင်းကို လုံးဝမေ့လျော့သွားခဲ့သည်။

ယခုမူ ဤဝေဝေဝါးဝါးပိန်ပါးသော ပုံရိပ်သည် ဝိညာဉ်ပိုးဖလံဂေဟာ အခြေခံအုတ်မြစ်တည်ဆောက်ခြင်းအဖွဲ့ခေါင်းဆောင်၏ကြယ်ပမာ တောက်ပသောမျက်လုံးများနှင့် တဖြည်းဖြည်း ထပ်တူကျလာတော့သည်။

စုကျိုလား ?

သူမလား ?

"လျောင်ချွမ်း၊ မင်းရဲ့ အထောက်အထားကိုအတည်ပြုပြီးပြီ၊ လွန်ခဲ့တဲ့တစ်နှစ်ခွဲက ဝိညာဉ်ပိုးဖလံဂေဟာမှာ မင်းက စုကျိုကို ဝိညာဉ်ကျောက်တုံး ၁၄၇,၂၃၂ တင်ခဲ့တယ်”

"မင်းရဲ့ ပုန်းခိုရာနေရာကို ဝိညာဉ်ရှာဖွေခြင်းနည်းလမ်းနဲ့ရှာတွေ့ခဲ့တာမို့ ဒီငွေပမာဏကို သူမဆီ ပြန်ဆပ်ဖို့အတွက် ဖယ်ထားလိုက်မယ်”

မျက်နှာဖုံးစွပ်ထားသော ရှန်းဝူချင်းက အေးစက်စွာပြောလိုက်သည်။

ဒါ တကယ်ပဲ စုကျိုလား ?

ဒါ သူမကြောင့်ပဲလား ?

လျောင်ချွမ်းမှာ ဆွံ့အကာထိတ်လန့်သွားသည်?

"ငါက သူမရဲ့ ဆေးဖိုးတွေပြန်မဆပ်လို့ ဝိညာဉ်ကုန်သည်အသင်းရဲ့ ဖမ်းတာကိုခံလိုက်ရတာလား၊ သူ ငါ့ကို သတင်းပို့လိုက်တာလား”

မဟုတ်ဘူး၊ သူမ အစကတည်းကပြောသင့်တာပေါ့၊ သူ အကြွေးပြန်ဆပ်မှာပေါ့၊ သူ အကြွေးပြန်ဆပ်နိုင်ပါတယ်။

ဝိညာဉ်ကျောက်တုံး ၁၄၀,၀၀၀ ဆိုတာက...

"ဟင်း၊ ၁၄၀,၀၀၀ လား၊ ငါ ဘာလို့ ဝိညာဉ်ဆေးပင်တွေ ဒီလောက်အများကြီး သုံးလိုက်ရတာလဲ၊ အဲဒီဆေးလုံးတွေက အများဆုံး ၄၀,၀၀၀ ပဲ တန်တာလေ”

"အတိုးတွေ၊ အမာရွတ်ဖိုးတွေ၊ စိတ်ပိုင်းဆိုင်ရာ ထိခိုက်နစ်နာကြေးတွေနဲ့ တခြားအရာတွေအကုန်ပါတာလေ”

မျက်နှာဖုံးနောက်ကွယ်မှ ရှန်းဝူချင်းမျက်နှာထားမှာ ဝေခွဲမရနိုင်ဘဲ စုကျိုရေးသားထားသော အကြွေးတောင်းခံလွှာကိုလျောင်ချွမ်းထံသို့ ပစ်ပေးလိုက်သည်၊

"တစ်ခုချင်းစီကို သေသေချာချာရေးထားတယ်၊ မင်းဘာသာ မင်း စစ်ကြည့်လိုက်ပါဦး”

"..."

လျောင်ချွမ်းသည် မြေပြင်ပေါ်သို့ပြိုလဲသွားတော့သည်။

တကယ်လို့ သူသာ အစကနေပြန်စလို့ရရင် သူ ဒါမျိုး ဘယ်တော့မှ လုပ်မှာမဟုတ်တော့ဘူး။

သူမ ပေးတဲ့ ဝိညာဉ်ဆေးပင်တွေကိုသောက်မယ့်အစား သူ သေပစ်လိုက်တာကမှ ပိုကောင်းဦးမယ်။

၄၀,၀၀၀ ကနေ ၁၄၀,၀၀၀ ဖြစ်သွားတယ်တဲ့…

ဒါက မှောင်ခိုစျေးကွက် အတိုးနှုန်းထက်တောင် နှစ်ဆမကပိုများနေတာပဲ

လျောင်ချွမ်းမှာ ကန့်ကွက်စရာမရှိတော့သည်ကို မြင်သောအခါ ရှန်းဝူချင်းသည် ဝိညာဉ်ကျောက်တုံးအိတ်နှင့် ငွေစက္ကူများကို ချက်ချင်း ကောက်ယူလိုက်ကာ မြေအောက်ထောင်ထဲမှပျောက်ကွယ်သွားတော့သည်။

ကျန်တာတွေကိုတော့ အခြားသော ဥပဒေစိုးမိုးရေးအရာရှိများကိုသာ လွှဲထားလိုက်သည်။