အခန်း (၂၃၁)

ထို့နောက်တွင် ယွမ်ထျန်းကန်းသည် မဟာကျူးနိုင်ငံသို့ သွားရောက်ကာ ထိုနည်းအတိုင်းပင် ဆောင်ရွက်ခဲ့ရာ နောက်ထပ် ငွေတေး ၁၀ သန်း ရရှိခဲ့ပြန်သည်။

ထို့နောက် သူသည် မဟာရွှယ်နိုင်ငံသို့ ခရီးဆက်ခဲ့သည်။ လမ်းခရီးတွင် ဟန်နှင့် ဟာ စစ်သူကြီးနှစ်ဦးသည် ယွမ်ထျန်းကန်းနှင့် စကားစမြည် ပြောဆိုနေကြသည်။

ဟန်စစ်သူကြီးက အထင်ကြီးလေးစားစွာဖြင့် "ခင်ဗျားကတော့ အရင်အတိုင်း တကယ်ကို ကြောက်ဖို့ကောင်းတာပဲ၊ စကားအနည်းငယ် ပြောရုံနဲ့တင် ငွေတေး ၁၀ သန်း ရအောင် လုပ်နိုင်တယ်။ ဒါဟာ တကယ်ကို ကြီးမားတဲ့ အောင်မြင်မှုပဲ၊ ငါတို့ပြန်ရောက်ရင် အရှင်မင်းကြီးက ခင်ဗျားကို ဆုလာဘ်တွေ အများကြီး ပေးမှာ သေချာတယ်" ဟု ပြောလိုက်သည်။

ဟာစစ်သူကြီးကလည်း "ဟုတ်တယ်၊ ခင်ဗျားရဲ့ စွမ်းဆောင်ရည်မျိုးနဲ့ဆိုရင် ဒီလောကမှာ ခင်ဗျားကို ယှဉ်နိုင်သူ ရှိမှာမဟုတ်ဘူး" ဟု ထောက်ခံပြောဆိုလိုက်သည်။

ယွမ်ထျန်းကန်းက ခေါင်းခါယမ်းကာ ရယ်မောရင်း "ကျုပ်ကို မြှောက်ပင့်မနေကြပါနဲ့။ ဒါဟာ ကျုပ်ရဲ့ ကြီးမြတ်မှုကြောင့်မဟုတ်ဘဲ အရှင်မင်းကြီးရဲ့ ကြီးမြတ်မှုကြောင့်ပါ။ အရှင်မင်းကြီးဟာ မင်းဆက်နိုင်ငံကြီး တစ်ခုနဲ့ နှိုင်းယှဉ်နိုင်တဲ့ နိုင်ငံတော်ကြီးကို တည်ထောင်နိုင်ခဲ့လို့သာ ကျုပ်တို့တွေ တခြားနိုင်ငံတွေကို ကြောက်ရွှံ့ထိန်လန့်အောင် လုပ်နိုင်ခဲ့တာပဲ။ ဒါကြောင့် ကျုပ်တို့ဟာ အရှင်မင်းကြီးရဲ့ ဂုဏ်သတင်းကို အသုံးချပြီး ကိုယ့်ရည်မှန်းချက်တွေကို အောင်မြင်အောင် လုပ်ဆောင်နိုင်တာ ဖြစ်တယ်။ တခြားသူသာဆိုရင် ဒီလိုမျိုး သက်ရောက်မှုရှိမှာ မဟုတ်ဘူး" ဟု ဆိုလိုက်သည်။

"ဒါလည်း ဟုတ်တာပါပဲ၊ ခင်ဗျားကလည်း တော်သလို အရှင်မင်းကြီးကလည်း တကယ်ကိုတော်တယ်"

ဟန်စစ်သူကြီးက အနည်းငယ် စိုးရိမ်ပူပန်စွာဖြင့် "မဟာရှီနဲ့ မဟာကျူး နိုင်ငံတို့ရဲ့ ကိစ္စတွေက ကိုင်တွယ်ရလွယ်ကူပေမဲ့ အခုသွားမယ့် မဟာရွှယ်နိုင်ငံကတော့ အခြေအနေ သိပ်မကောင်းမှာကို စိုးရိမ်မိတယ်။ မဟာရွှယ်ဧကရာဇ်က သန်မာရုံတင်မကဘဲ ခေါင်းမာပြီး စိတ်လိုက်မာန်ပါ လုပ်တက်တယ်လို့ ကြားဖူးတယ်။ သူက ခြိမ်းခြောက်တာတွေကို အလေးထားမှာမဟုတ်ဘဲ ကျွန်တော်တို့ကိုတောင် ပြန်တိုက်ခိုက်နိုင်တယ်" ဟု ပြောလိုက်သည်။

ယွမ်ထျန်းကန်းကလည်း ခေါင်းညိတ်လိုက်ကာ "အမှန်တိုင်း ပြောရရင် သူ တကယ်ပဲ အဲဒီလို လုပ်လိမ့်မယ်။ သူက နဂိုမူလ မဟာရွှယ်ရဲ့ တော်ဝင်မိသားစုဝင်တွေကို သတ်ဖြတ်ပြီးမှ ဧကရာဇ်ဝတ်ရုံကို ဝတ်ဆင်ပြီး အာဏာရလာခဲ့သူ မဟုတ်လား"

"ငါတို့ရဲ့ ခရီးက အန္တရာယ်တွေနဲ့ ပြည့်နေတယ်၊ အင်အားကို အင်အားနဲ့ပဲ တုံ့ပြန်ပြီး ဘာပဲဖြစ်လာဖြစ်လာ ရင်ဆိုင်သွားရမှာပဲ။ ဒါပေမဲ့ ဘာပဲဖြစ်ဖြစ် ခင်ဗျားရဲ့ ဘေးကင်းရေးကိုတော့ ကျွန်တော်တို့ အစွမ်းကုန် ကာကွယ်ပေးပါ့မယ်" ဟု ဟာစစ်သူကြီးက လေးနက်သော မျက်နှာထားဖြင့် ပြောလိုက်သည်။

အခြားတစ်ဦးကလည်း ခေါင်းကို အားပါးတရ ညိတ်ကာ သဘောတူကြောင်း ပြသလိုက်သည်။

ယွမ်ထျန်းကန်းက ယုံကြည်မှုအပြည့်ဖြင့် "စိုးရိမ်စရာမလိုပါဘူး၊ ငါတို့ ဒီခရီးက ဘေးကင်းမှာ သေချာပါတယ်၊ အံ့အားသင့်စရာတွေ ရှိနိုင်ပေမဲ့ တကယ့်အန္တရာယ်တော့ ရှိမှာမဟုတ်ဘူး" ဟု ဆိုလိုက်သည်။

……….

မျက်စိတစ်မှိတ်အတွင်းမှာပင် သူတို့သည် မဟာရွှယ်နိုင်ငံသို့ ရောက်ရှိလာခဲ့ကြသည်။ ယွမ်ထျန်းကန်းသည် မဟာရွှယ်ဧကရာဇ်ကို တွေ့ဆုံရန် နန်းတော်အတွင်းသို့ ဝင်ရောက်ခဲ့သည်။

မဟာရွှယ်ဧကရာဇ်သည် ယခုကဲ့သို့ အချိန်မျိုးတွင် မဟာရှ နိုင်ငံက သံတမန်များ စေလွှတ်လိုက်ကြောင်း သိရသောအခါ အလွန်အံ့အားသင့်သွားခဲ့သည်။ မဟာရှ နိုင်ငံသည် နိုင်ငံသုံးနိုင်ငံ စစ်ပွဲတွင် ဝင်ရောက်စွက်ဖက်ရန် ပြင်ဆင်နေခြင်းပေလော။

ယခုအချိန်တွင် တိုက်ပွဲ၏ ရလဒ်ကို ပြောင်းလဲနိုင်သည့် တစ်ခုတည်းသော အင်အားစုမှာ မဟာရှသာ ဖြစ်သည်။ သူတို့ မည်သည့်ဘက်က ရပ်တည်ပေးသည်ဖြစ်စေ၊ ထိုဘက်ကသာ အောင်ပွဲခံမည် ဖြစ်သည်။

ထိုအထဲတွင် သူတို့သည် မဟာရှီနှင့် မဟာကျူး နိုင်ငံများကို ကူညီရန် အလားအလာ အရှိဆုံးဖြစ်သည်။ အဘယ်ကြောင့်ဆိုသော် မဟာရှ နိုင်ငံအတွက် အကြီးမားဆုံး ခြိမ်းခြောက်မှုမှာ သူ၏ မဟာရွှယ်နိုင်ငံ ဖြစ်နေသောကြောင့်ပင် ဖြစ်သည်။ အကယ်၍ မဟာရှီနှင့် မဟာကျူး နိုင်ငံကိုသာ သိမ်းပိုက်လိုက်ပါက သူ၏ နိုင်ငံတော်အင်အားသည် အဆမတန် မြင့်တက်လာမည်ဖြစ်ပြီး မဟာရှအတွက် ပို၍ပင် ခြိမ်းခြောက်မှု ဖြစ်လာပေလိမ့်မည်။

ထို့ကြောင့် သူတို့သည် မဟာရွှယ်ကို တန်ပြန်ရန်အတွက် မဟာရှီနှင့် မဟာကျူးနိုင်ငံများကိုသာ ထောက်ခံကြပေလိမ့်မည်။ ဤအချိန်သည် လှုပ်ရှားရန် အသင့်တော်ဆုံးအချိန်ပင် ဖြစ်သည်။

"ငါတို့ရဲ့ မဟာရွှယ်နိုင်ငံက အရင် ကြိုးပမ်းခဲ့သမျှ အရာအားလုံး ဆုံးရှုံးရတော့မှာလား"

မဟာရွှယ်ဧကရာဇ်၏ နှလုံးသားထဲတွင် တွန့်ဆုတ်မှုတို့နှင့် စိုးရိမ်မှုများ ပြည့်နှက်နေသော်လည်း မျက်နှာတွင်မူ မည်သည့် ခံစားချက်မျှ မပြဘဲ "မဟာရှက မင်းတို့ကို ဒီကို စေလွှတ်လိုက်တာ ဘာကိစ္စရှိလို့လဲ" ဟု မေးလိုက်သည်။

ယွမ်ထျန်းကန်းသည် တစ်ဖက်လူ၏ မျက်လုံးများကို စိုက်ကြည့်ကာ ပြုံးလျက် နှုတ်ဆက်လိုက်ပြီး "မဟာရွှယ်ဧကရာဇ်ခင်ဗျာ၊ ကျွန်တော်မျိုးတို့ရဲ့ ရည်ရွယ်ချက်ကို အရှင်မင်းကြီး ဧကန်မုချ ခန့်မှန်းမိပြီးသား ဖြစ်မှာပါ။ အခုဆိုရင် သုံးနိုင်ငံစစ်ပွဲ အခြေအနေက ရှင်းလင်းနေပါပြီ၊ မဟာရှီနဲ့ မဟာကျူး နိုင်ငံတို့ဟာ တစ်ပွဲပြီးတစ်ပွဲ ရှုံးနိမ့်နေပါတယ်။ ကျွန်ုပ်တို့ မဟာရှ နိုင်ငံဟာ မဟာရှီ၊ မဟာကျူး နိုင်ငံတို့နဲ့ နီးကပ်တဲ့ ဆက်ဆံရေး ရှိတာကြောင့် မဟာရွှယ်ကို စစ်ချီဖို့ ပြင်ဆင်နေပါတယ်"

သူ့အနေဖြင့် ခန့်မှန်းထားသော်လည်း တစ်ဖက်လူက တိုက်ရိုက်ပြောဆိုလာသည့်အခါ မဟာရွှယ်ဧကရာဇ်၏ စိတ်ထဲမှာ လေးလံသွားခဲ့သည်။ မဟာရှက တကယ်ပဲ စစ်ချီတော့မှာလား။ အကယ်၍ မဟာရှက စစ်တိုက်လာလျှင် ဤတိုက်ပွဲတွင် သူတို့ ရှုံးနိမ့်ရန် သေချာသလောက် ရှိနေသည်။

သို့သော် သူ၏ စိတ်ဓာတ်မှာ လျော့ကျမသွားဘဲ ကျယ်လောင်စွာ အော်ဟစ်လိုက်ကာ "တိုက်မယ်ဆိုရင်လည်း တိုက်ကြတာပေါ့၊ ငါကိုယ်တော်က မင်းတို့ကို ကြောက်နေမယ် ထင်နေတာလား။ ငါကိုယ်တော် စိတ်မကြည်ဘူး၊ ဧည့်သည်တွေကို ပြန်လွတ်လိုက်တော့"

"မဟာရွှယ်ဧကရာဇ်၊ ကျေးဇူးပြုပြီး မလောပါနဲ့ဦး၊ ကျွန်တော်မျိုးမှာ ပြောစရာ ကျန်ပါသေးတယ်" ဟု ယွမ်ထျန်းကန်းက ပြုံးလျက် ပြောလိုက်သည်။

"မောင်မင်းမှာ ဘာပြောစရာ ကျန်သေးတာလဲ" ဟု မဟာရွှယ်ဧကရာဇ်က ခက်ထန်စွာ မေးလိုက်သည်။

"စကားပုံတစ်ခု ရှိပါတယ် 'ကောင်းကင်ဘုံဟာ သက်ရှိအားလုံးကို တန်ဖိုးထားတယ်' တဲ့၊ ကျွန်တော်မျိုးတို့ရဲ့ ဧကရာဇ်မင်းမြတ်ဟာလည်း သနားကြင်နာတတ်ပြီး မလိုအပ်ဘဲ သွေးချောင်းစီးတာတွေကို မလိုလားပါဘူး။ ဒါကြောင့် မဟာရှအနေနဲ့ မဟာရွှယ်ကို အခွင့်အရေးတစ်ခု ပေးနေတာပါ။ အရှင်မင်းကြီးကသာ ငွေတေး ၁၀ သန်း ပေးဆောင်မယ်ဆိုရင် မဟာရှဟာ စစ်တပ် လုံးဝ စေလွှတ်မှာ မဟုတ်ပါဘူး။ အရှင်မင်းကြီးအနေနဲ့ မဟာရှီနဲ့ မဟာကျူးကို အမြစ်ပျက် ချေမှုန်းပစ်မယ်ဆိုရင်တောင် ကျွန်တော်မျိုးတို့ စစ်တပ် စေလွှတ်မှာ မဟုတ်ပါဘူး"

“ ချီးလိုပဲ… မင်းတို့ မဟာရှက ငါ့လို ဧကရာဇ်ဆီကနေ ငွေညှစ်ရဲတယ်ပေါ့လေ။ ငါ ဘယ်တော့မှ သဘောမတူဘူး" ဟု မဟာရွှယ်ဧကရာဇ်က ဒေါသတကြီး အော်ဟစ်သည်။

သူ့တွင် ၁၀ သန်း ရှိသည်ဖြစ်စေ၊ မရှိသည်ဖြစ်စေ သူ လုံးဝ သဘောတူမည်မဟုတ်ပေ။ ဒါဟာ နိုင်ငံရဲ့ အုတ်မြစ်နဲ့တင် သက်ဆိုင်နေတာ မဟုတ်ဘဲ သူ့ရဲ့ ဂုဏ်သိက္ခာ၊ အင်အားကြီးသူတစ်ယောက်၏ ဂုဏ်သိက္ခာနှင့်လည်း သက်ဆိုင်နေသည်။ အကယ်၍ သူသာ ငွေတေး ၁၀ သန်း ထုတ်ပေးလိုက်လျှင် သူသည် အရှက်ကွဲပြီး သူတစ်ပါး၏ လှောင်ပြောင်မှုကို ခံရပေလိမ့်မည်။ သူ၏ သိက္ခာကို အထိပါးခံမည့်အစား စစ်တပ်တစ်ခုလုံးကိုသာ အဆုံးရှုံးခံလိုက်မည် ဖြစ်သည်။

"မဟာရွှယ်ဧကရာဇ်ခင်ဗျာ၊ ထပ်ပြီးတော့ မစဉ်းစားချင်ဘူးလား" ဟု ယွမ်ထျန်းကန်းက မေးလိုက်သည်။

မဟာရွှယ်ဧကရာဇ်က လက်ကို ယမ်းလိုက်ကာ "ထပ်စဉ်းစားစရာ မလိုတော့ဘူး၊ ငါကိုယ်တော် လုံးဝ ငြင်းတယ်။ အခု ငါကိုယ်တော် စိတ်တိုနေပြီ။ အစောင့်တွေ၊ သူတို့ကို ခေါ်သွားပြီး ငါ့အမျက်ဒေါသတွေ ပြေစေဖို့ ခေါင်းဖြတ်သတ်ပစ်လိုက်ကြ"

"အမိန့်တော်အတိုင်းပါ အရှင်မင်းကြီး" နန်းတွင်းအစောင့်တပ်များ စတင်လှုပ်ရှားလာပြီး ချီဖွဲ့တည်ခြင်းအဆင့် သိုင်းပညာရှင် အများအပြားက သူတို့ကို ဝိုင်းထားလိုက်ကြသည်။

ယွမ်ထျန်းကန်းက သူ၏ ညာဘက်လက်ကို မြှောက်လိုက်ပြီး "နေပါဦး"

"မောင်မင်းမှာ နောက်ဆုံးပြောချင်တဲ့ စကားရှိလို့လား။ ရှိရင် ခုပြောလိုက်"

"မဟာရွှယ်ဧကရာဇ်၊ မဆင်မခြင် မလုပ်ပါနဲ့" ယွမ်ထျန်းကန်းက အေးအေးလူလူ ပြုံးကာ "ကျွန်တော်မျိုးတို့ မထွက်လာခင် အရှင်မင်းကြီးက ပြောလိုက်ပါတယ်၊ အကယ်၍ သုံးရက်အတွင်း ကျွန်တော်မျိုးတို့ ပြန်မရောက်လာဘူးဆိုရင် စီနီယာ ဓားအဖိုးအိုကို ဒီ မဟာရွှယ်နိုင်ငံကို စေလွှတ်ပြီး အရှင့်ကို စိန်ခေါ်ခိုင်းမယ်လို့ မိန့်ကြားလိုက်ပါတယ်"

မဟာရွှယ်ဧကရာဇ်သည် ဒေါသတွေအထွတ်အထိပ်သို့ ရောက်သွားပြီး "မောင်မင်း ငါကိုယ်တော်ကို ခြိမ်းခြောက်နေတာလား"

"ဒါဟာ ခြိမ်းခြောက်တာမဟုတ်ပါဘူး၊ ကိုယ့်ကိုယ်ကိုယ် ကာကွယ်ရုံသက်သက်ပါ" ယွမ်ထျန်းကန်းက ပြုံးလျက် ပြန်လည်ဖြေကြားလိုက်သည်။ "ဒါ့အပြင် အရှင်မင်းကြီးက စစ်ချီတဲ့အခါမှာ အနှောင့်အယှက် မရှိအောင် စီနီယာ ဓားအဖိုးအိုကိုပါ စေလွှတ်မယ်လို့ မိန့်ကြားထားပါတယ်။ ဒါကြောင့် အရှင်မင်းကြီး၊ သေချာ ပြန်စဉ်းစားစေချင်ပါတယ်"

မဟာရွှယ်ဧကရာဇ်၏နှလုံးသားမှာ ဒေါသကြောင့် ပေါက်ကွဲထွက်တော့မလို ခံစားလိုက်ရသည်။ ဒါဟာ ခြိမ်းခြောက်နေတာပဲ မဟုတ်လား။ ငါကိုယ်တော်က မင်းတို့ တောင်းဆိုချက်ကို သဘောမတူသရွေ့ မင်းတို့က ဓားအဖိုးအိုကို လွှတ်မယ်ပေါ့။

မဟာရှ တစ်နိုင်ငံလုံးမှာ သူ ကြောက်ရတာဆိုလို့ ဓားအဖိုးအိုပဲ ရှိသည်။ တစ်ဖက်လူ၏ ခွန်အားက သူနှင့် တန်းတူဖြစ်သော်လည်း လက်ထဲတွင် နတ်ဘုရားဓား ရှိနေသည့်အတွက် သူ့ကို အနိုင်ယူနိုင်စွမ်းရှိသည်။ ကောင်းကင်အဆင့် မရှိဘဲနှင့် သူတို့ကို ယှဉ်ပြိုင်ရန် လုံးဝ မဖြစ်နိုင်ပေ။

မဟာရွှယ်ဧကရာဇ်၏ မျက်နှာမှာ အလွန်ကြည့်ရဆိုးနေပြီး လက်ကို ယမ်းလိုက်ကာ "မောင်မင်းတို့ အားလုံး ထွက်သွားကြတော့"

"ဟုတ်ကဲ့ပါ အရှင်မင်းကြီး"

ရောက်လာကြသော သိုင်းပညာရှင်များသည် ရုတ်ခြည်းပင် ပြန်လည် ထွက်ခွာသွားကြသည်။

ယွမ်ထျန်းကန်းက ရိုသေစွာ ဦးညွှတ်လိုက်ပြီး "မဟာရွှယ်ဧကရာဇ်၊ ကျွန်တော်မျိုးတို့ မဟာရှရဲ့ တောင်းဆိုချက်နဲ့ ပတ်သက်ပြီး သဘောတူဖို့ ဆုံးဖြတ်လိုက်ပြီလား။ အမြန်ဆုံး အဖြေပေးစေချင်ပါတယ်၊ ကျွန်တော်မျိုး အရှင်မင်းကြီးကို ပြန်တင်ပြရမှာ မို့လို့ပါ။ စစ်ချီဖို့ဆိုတာ သေးငယ်တဲ့ ကိစ္စမဟုတ်ဘဲ ပြင်ဆင်စရာတွေ အများကြီး ရှိနေပါတယ်"

မဟာရွှယ်ဧကရာဇ်က မကျေမနပ်ဖြစ်နေသော လေသံဖြင့် "မင်းတို့ မဟာရှရဲ့ တောင်းဆိုချက်ကို ငါကိုယ်တော် သဘောတူတယ်၊ မင်းတို့ဘက်ကလည်း ကတိတည်ဖို့ မျှော်လင့်တယ်။ ဒါ့အပြင် မင်းတို့ ဧကရာဇ်ကိုလည်း စကားတစ်ခွန်း ပါးလိုက်ဦး။ ‘မတရားမှုတွေကို အလွန်အကျွံ လုပ်တဲ့သူဟာ ကိုယ့်ပျက်စီးခြင်းကို ကိုယ်တိုင် ဖိတ်ခေါ်တာပဲ’ ။ သွားကြတော့"

သူသည် ထိုစကားကို ပြောပြီးသည်နှင့် သူတို့ သုံးဦးကို ထပ်မံ မတွေ့လိုတော့သဖြင့် ချက်ချင်းပင် ထွက်ခွာသွားတော့သည်။

"အရှင်မင်းကြီးဟာ ပညာရှိလှပါပေတယ်၊ ကျွန်တော်မျိုးတို့ကို ခွင့်ပြုပါဦး"

ထို့နောက် ယွမ်ထျန်းကန်းသည် နောက်တစ်ကြိမ် ဦးညွှတ်ကာ အောင်နိုင်သူတစ်ဦး၏ အမူအရာဖြင့် နန်းတော်အတွင်းမှ လျှောက်ထွက်လာခဲ့သည်။