သူက ဘယ်လိုလုပ် ဒုတိယအဆင့်ရတာလဲ

အရှေ့အရပ်မှ နေမင်းကြီးသည် ခန့်ညားထည်ဝါစွာ ထွက်ပေါ်လာ၏။ နွေးထွေးသော ဆောင်းရာသီ၏ နေရောင်ခြည်သည် မှောင်မိုက်သော တိမ်တိုက်များကို ခက်ခဲစွာ ဖောက်ထွက်ပြီး ရွှမ်ဝူခံတပ်ပေါ်သို့ အလင်းတန်းဖျော့ဖျော့လေးများ ကျရောက်စေသည်။

ရှန်မို ပုံမှန်အတိုင်းပင် နိုးထလာခဲ့သည်။ သူ အိပ်ရာမှ ထသည်နှင့် တစ်ပြိုင်နက် လီဟိုင်ထန်းနှင့် အခြားသူများ တစ်စုံတစ်ခုကို စုရုံးစကားပြောနေကြသည်အား ကြားလိုက်ရသည်။

"...အဲဒီတပ်မှူးက ဘာလို့ ရုတ်တရက် အဖမ်းခံရတာလဲ… တော်တော် ထူးဆန်းတာပဲ"

"သူတင်မကဘူး… နတ်ဆိုးနှိမ်နင်းရေး အစောင့်အရှောက် အတော်များများလည်း အဖမ်းခံရတယ်… သတင်းအရဆိုရင် ဒါက နတ်ဆိုးမျိုးနွယ်နဲ့ ပတ်သက်နေနိုင်တယ်တဲ့"

"ကြောက်စရာကြီးပဲ... ဘယ်သူမှ မသိအောင် နတ်ဆိုးက ကပ်ပါးပြုနိုင်တယ်ဆိုတာ… ငါတို့မှာ ခန္ဓာကိုယ်ကို စစ်ဆေးနိုင်မယ့် နည်းလမ်းတစ်ခုခုသာ ရှိရင် ကောင်းမှာပဲ"

"ငါကြားဖူးတာတော့ စိတ်ဓာတ်ပျော့ညံ့တဲ့သူတွေပဲ နတ်ဆိုးကပ်ပါးပြုတာကို ခံရတာတဲ့… ငါတို့သာ ငါတို့ရဲ့ စိတ်ဓာတ်ကို ခိုင်ခိုင်မာမာ ထားမယ်ဆိုရင် အဆင်ပြေမှာပါ"

"အေး... မင်းပြောတာ မှန်ပါတယ်… ဟော... အစ်ကိုရှန် နိုးပြီလား"

ရှန်မိုကို မြင်လိုက်သောအခါ လီဟိုင်ထန်းနှင့် အခြားသုံးဦးစလုံး၏ မျက်လုံးထဲတွင် လေးစားမှုများ အရိပ်ထင်သွားသည်။

ရှန်မို ပြုံးပြီး ခေါင်းငြိမ့်ပြလိုက်၏။

"ဘာတွေဖြစ်နေကြတာလဲ"

လီဟိုင်ထန်းနှင့် အဖွဲ့တို့ မနေ့ညက ဖြစ်ပျက်ခဲ့သမျှကို အသေးစိတ် ပြန်လည်ပြောပြကြသည်။ ရှန်မိုမှာ ခေါင်းတငြိမ့်ငြိမ့်ဖြင့် နားထောင်လေ၏။ ဤအရာအားလုံးမှာ သူ မျှော်လင့်ထားသည့်အတိုင်းပင် ဖြစ်သည်။ စင်စစ် တပ်မှူးတစ်ဦးနှင့် ပတ်သက်နေသဖြင့် ကျန်းလုံရှန်းအနေဖြင့် ထိုအမည်မသိ တိုင်စာမှာ မှန်ကန်ခြင်း ရှိမရှိကို အရပ်ရပ်မှ အထောက်အထားများ စုဆောင်းကာ သေချာစွာ စစ်ဆေးမည်မှာ သေချာသည်။ တစ်ရက်အတွင်း အဖြေထုတ်နိုင်ခြင်းမှာပင် အလွန်လျင်မြန်လှပြီ ဖြစ်၏။

ကျန်းလုံရှန်း သူ့စာရင်းထဲရှိ လူများကို ဖမ်းဆီးပြီးပြီဆိုလျှင် သူ၏ စစ်မှုထမ်းရမှတ်များလည်း ရောက်ရှိလာသင့်ပြီ မဟုတ်ပါလား။

ရှန်မို သူ၏လက်ကောက်ဝတ်ရှိ နတ်ဆိုးနှိမ်နင်းရေး လက်ပတ်ကို အာရုံခံကြည့်လိုက်သည်။ ထို့နောက် သူ၏မျက်နှာတွင် ဝမ်းသာကြည်နူးမှုများ လင်းလက်သွားတော့၏။ သူသည် ဘ္အဆင့် စစ်မှုထမ်းရမှတ်ပေါင်း (၂၀) တိတိ ရရှိခဲ့သည်။ ထင်သည့်အတိုင်းပင် ကောင်းကင်ဘုံတာအိုသည် ရမှတ်များ ချီးမြှင့်ရာတွင် ဖြစ်ရပ်တစ်ခုလုံး၏ အကျိုးသက်ရောက်မှုကို ထည့်သွင်းစဉ်းစားခြင်း ဖြစ်၏။

ရှန်မိုသည် နတ်ဆိုးများနှင့် တိုက်ရိုက်မတိုက်ခိုက်ခဲ့သလို၊ အန်းကျန့်ရှုံနှင့် အခြားသူများကိုလည်း ကိုယ်တိုင်မဖမ်းဆီးခဲ့သော်လည်း ဤစစ်ဆင်ရေးတစ်ခုလုံးတွင် အဆုံးအဖြတ်ပေးနိုင်သော အခန်းကဏ္ဍမှ ပါဝင်ခဲ့သည်။ သူသာ မရှိခဲ့လျှင် အန်းကျန့်ရှုံနှင့် နတ်ဆိုးသုတ်သင်ရေးအသင်းဝင်များမှာ မည်သည့်အခါမျှ ဖော်ထုတ်ခံရမည် မဟုတ်ပေ။ ၎င်းတို့သည် နတ်ဆိုးမျိုးနွယ်နှင့် အတွင်းအပြင် ပူးပေါင်းကာ ခံတပ်ကို အကြီးအကျယ် ပျက်စီးစေပြီး ကံကြမ္မာတွင် ဖော်ပြထားသည့်အတိုင်း ဝမ်းနည်းဖွယ် အကျိုးဆက်များကို ဖြစ်ပေါ်စေခဲ့ပေလိမ့်မည်။

'သာမန် စစ်မှန်သောနတ်ဆိုးအရှင်သခင်တစ်ဦးကို သတ်ဖြတ်ရင် ပျမ်းမျှအားဖြင့် ဒီအဆင့် စစ်မှုထမ်းရမှတ် (၁၀) မှတ် ရတတ်တယ်’ 'ရမှတ်ပမာဏက နတ်ဆိုးရဲ့ အင်အား၊ သွေးမျိုးဆက်နဲ့ သူဦးဆောင်တဲ့ လက်အောက်ငယ်သား အရေအတွက်ပေါ်မှာ မူတည်တယ်’ 'စစ်မှန်သောနတ်ဆိုးအရှင်သခင်ရဲ့ အင်အား ပိုကြီးလေလေ ရမှတ် ပိုရလေလေပဲ… တစ်ခါတလေ ငါးဆ၊ ခြောက်ဆ ဒါမှမဟုတ် အဲဒီထက်မက ပိုရနိုင်တယ်’

ရှန်မိုသည် လီတန့်ယွဲ့နှင့် အခြားသူများ၏ စကားဝိုင်းမှ ကြားဖူးသည်များကို ပြန်လည်စဉ်းစားနေ၏။ ထိုသတင်းအချက်အလက်မှာ ၎င်းတို့၏ တပ်မှူး နင်ထျန်းယင်းထံမှ ရရှိခြင်းဖြစ်ပါသည်။ ငွေရောင်အထွတ်အထိပ် စစ်မှန်သောနတ်ဆိုးအရှင်သခင်ကို သတ်လျှင် ပျမ်းမျှ ဒီအဆင့် ရမှတ် (၄၀)။ ရွှေရောင်အထွတ်အထိပ် စစ်မှန်သောနတ်ဆိုးအရှင်သခင်ကို သတ်လျှင် ပျမ်းမျှ စီအဆင့် ရမှတ် (၂၀)။ ထိပ်သီးစစ်မှန်သောနတ်ဆိုးအရှင်သခင်ကို သတ်လျှင် ပျမ်းမျှ ဘီအဆင့် ရမှတ် (၂) မှတ်။ ကပ်ပါးပြုခံရသော အစောင့်အရှောက်တစ်ဦးကို တိုင်ကြားလျှင် ပျမ်းမျှ စီအဆင့် ရမှတ် (၁) မှတ်။

ထိုအချက်အလက်အတိုင်းဆိုလျှင် ရှန်မို၏ အန်းကျန့်ရှုံနှင့် နတ်ဆိုးသုတ်သင်ရေးအသင်းကို အမည်မသိတိုင်ကြားမှုမှာ သူ့ကို ပုံမှန်ရမှတ်ထက် (၁၀) ဆခန့် ပိုမိုရရှိစေခဲ့သည်။ ၎င်းမှာ အလွန်တရာ ကြီးမားလှသော ပမာဏပင်။ အကယ်၍ စစ်ဘက်ဆိုင်ရာ ရာထူးတိုးမြှင့်ခြင်းမှာ ကျင့်ကြံမှုအဆင့်အတန်းနှင့် မသက်ဆိုင်ခဲ့လျှင် ရှန်မို ယခုပင် မြေကမ္ဘာအဆင့် နတ်ဆိုးနှိမ်နင်းရေး အစောင့်အရှောက်အဖြစ် ချက်ချင်း ရာထူးတိုးသွားနိုင်ပေ၏။

'အခုတော့ နတ်ဘုရားဆင်မင်း နှိမ်နင်းခြင်းအတတ်ရဲ့ ပဉ္စမမြောက်အလွှာကို နောက်ဆုံးတော့ လဲလှယ်လို့ ရပြီ… ငါ့ရဲ့ သွေးစွမ်းအင်က အမြင့်ဆုံးအဆင့်ကို ရောက်နေတာ ကြာပြီ… ကျင့်စဉ်ကို ရတာနဲ့ ငွေရောင်အထွတ်အထိပ် အရှင်သခင်အဆင့်ကို ခဏချင်း တက်လှမ်းနိုင်လိမ့်မယ်’

ရှန်မို ပြုံးလိုက်မိသည်။

နောက်ထပ် နှစ်ရက်ကြာလျှင် ကောင်းကင်ဘုံဘဏ္ဍာတိုက် တစ်ဖန် ပြန်လည်ပေါ်ထွက်လာတော့မည်။ သူသည် နတ်ဘုရားဆင်မင်း နှိမ်နင်းခြင်းအတတ်၏ ပဉ္စမမြောက်အလွှာကို မျှော်လင့်နေခဲ့သည်မှာ အတော်ကြာလေပြီ။

နှစ်ရက်အကြာတွင်။

ကောင်းကင်ဘုံဘဏ္ဍာတိုက်သည် သတ်မှတ်ထားသည့်အတိုင်း ပေါ်ထွက်လာခဲ့၏။ သို့သော် ကောင်းကင်ဘုံ ရွှေရောင်အဆင့်သတ်မှတ်ချက်စာရင်းမှာမူ ထူးဆန်းစွာ ပေါ်မလာခဲ့ပေ။

ရှန်မို ထိုအရာကို ဂရုမစိုက်ပါ။ သူ နတ်ဘုရားဆင်မင်း နှိမ်နင်းခြင်းအတတ်၏ ပဉ္စမမြောက်အလွှာ၊ ချင်းလွမ်း သွေးအနှစ်သာရ နှစ်ခုနှင့် နတ်ဘုရားမိုးကြိုး ရေအနှစ်သာရ အမြုတေတစ်ခုတို့ကို အလျင်အမြန်ပင် လဲလှယ်လိုက်သည်။

နတ်ဘုရားဆင်မင်း နှိမ်နင်းခြင်းအတတ် ပဉ္စမအလွှာ - ဘီအဆင့် ရမှတ် (၁၃) မှတ်။ ချင်းလွမ်း သွေးအနှစ်သာရ နှစ်ခု - စုစုပေါင်း ဒီအဆင့် ရမှတ် (၁၀၀)။ နတ်ဘုရားမိုးကြိုး ရေအနှစ်သာရ အမြုတေ - ဒီအဆင့် ရမှတ် (၆၁) မှတ်။

ဤအရာများအားလုံးကို သုံးစွဲပြီးနောက် ရှန်မိုတွင် ဘီအဆင့် ရမှတ် အနည်းငယ်သာ ကျန်တော့သည်။ သို့သော်လည်း ဤစစ်မှုထမ်းရမှတ် ပမာဏမှာပင် အနက်ရောင်အဆင့် နှင့် အဝါရောင် အဆင့် အစောင့်အရှောက် အများစုထက် များစွာ သာလွန်နေသေး၏။ အလွန် ကံကောင်းလှသော အနက်ရောင်အဆင့် အစောင့်အရှောက် အနည်းငယ်သာ ဤမျှများပြားသော ရမှတ်ကို စုဆောင်းနိုင်လိမ့်မည်။

ရှန်မို မျက်ခုံးပင့်လိုက်မိသည်။ အရေးကြီးသော အချက်တစ်ခုကို သူ ရုတ်တရက် သတိရသွားခြင်း ဖြစ်၏။

"ဒီလောက် စစ်မှုထမ်းရမှတ်တွေနဲ့ဆိုရင်... ငါ လူသားအဆင့်သတ်မှတ်ချက်ရဲ့ ထိပ်ဆုံးကို ရောက်သွားနိုင်တယ် မဟုတ်လား"

"ဒုက္ခပဲ... အဲဒါဆိုရင် ငါက ပစ်မှတ်ထားခံရမှာ သေချာတယ်"

နတ်ဆိုးမျိုးနွယ်များသည် ကောင်းကင်ဘုံ အဆင့်သတ်မှတ်ချက် စာရင်း (၃) ခုကို အမြဲတမ်း စောင့်ကြည့်နေကြောင်း သူ သိထားသည်။ အဆင့်သတ်မှတ်ချက်တွင် ထိပ်ဆုံးမှ ပါဝင်နေသော အစောင့်အရှောက်များသည် နတ်ဆိုးများ၏ အထူးအာရုံစိုက်မှုကို အမြဲခံရလေ့ရှိသည်။ ၎င်းတွင် လုပ်ကြံသတ်ဖြတ်ခြင်းနှင့် အဆိပ်ခတ်ခြင်းများလည်း ပါဝင်၏။ ပြီးလျှင် စစ်မြေပြင်သို့ ရောက်သည်နှင့် သူတို့သည် အဓိက ပစ်မှတ်များ ဖြစ်လာလိမ့်မည်။ နတ်ဆိုးနှိမ်နင်းရေးအစောင့်အရှောက်များအတွက်မူ ဤအဆင့်သတ်မှတ်ချက်တွင် ပါဝင်ခြင်းမှာ ဂုဏ်ယူစရာဖြစ်သော်လည်း နတ်ဆိုးမျိုးနွယ်များအတွက်မူ ၎င်းမှာ ဆုကြေးထုတ်ခံရသူများ၏ စာရင်းပင်။

"ငါ့ရဲ့ ရမှတ်တွေကို နည်းနည်း ထပ်သုံးလိုက်တာ ပိုကောင်းမယ်… အဆင့် အရမ်းမြင့်နေစရာ မလိုဘူး" "အခု နံပါတ်တစ်က ဘယ်သူလဲ… ကြက်ဖစိမ်းခံတပ်က အနက်ရောင်အဆင့် အစောင့်အရှောက် ထန်ရှန့်ထင်လား"

"ကောင်းပြီ... ငါ သူ့ရဲ့ အောက်နားလေးမှာပဲ နေလိုက်မယ်"

ထိုသို့ဖြင့် ရှန်မိုသည် ကျန်ရှိသော သူ၏ ရမှတ်များကို သွေးအနှစ်သာရ အမျိုးမျိုးနှင့် နတ်ဘုရားမိုးကြိုး ရေအနှစ်သာရများ ဝယ်ယူရန်အတွက် ရဲရဲတင်းတင်း အသုံးပြုလိုက်တော့သည်။ ရှားပါးငှက်နှင့် သားရဲများ၏ သွေးအနှစ်သာရမှာ နတ်ဘုရားဆင်မင်း နှိမ်နင်းခြင်းအတတ်ကို ကျင့်ကြံရန် အကောင်းဆုံး ဖြစ်၏။ နတ်ဘုရားမိုးကြိုး ရေအနှစ်သာရမှာမူ နတ်ဘုရားမိုးကြိုး နတ်ဆိုးနှိမ်နင်းရေးကျမ်းကို ကျင့်ကြံရာတွင် အထောက်အကူပြုရန် အသုံးဝင်သည်။ ဤအရင်းအမြစ်များသည် မည်သည့်အခါမျှ အလဟဿမဖြစ်ဘဲ များများရှိလေ ပိုကောင်းလေပင် ဖြစ်၏။

ဤသို့ ဈေးဝယ်ထွက်ပြီးနောက် ရှန်မို၏ စစ်မှုထမ်းရမှတ်မှာ ဘီအဆင့် (၁) မှတ်သာ ကျန်တော့သည်။ ထိုအချိန်မှသာ သူ ကျေနပ်စွာ ခေါင်းငြိမ့်မိလေ၏။

နောက်တစ်ရက် ကုန်လွန်သွားသည်။

နောက်ဆုံးတွင် ကောင်းကင်ဘုံ ရွှေရောင်အဆင့်သတ်မှတ်ချက်များ ပေါ်ထွက်လာခဲ့သည်။

တစ်စုံတစ်ရာသော အကြောင်းပြချက်ကြောင့် ယခုတစ်ကြိမ်တွင် အဆင့်သတ်မှတ်ချက်များသည် ဘဏ္ဍာတိုက် ပေါ်ထွက်ပြီးမှ ပေါ်လာခြင်း ဖြစ်သည်။ နှစ်ပေါင်းထောင်ချီတိုင်အောင် ကောင်းကင်ဘုံ အဆင့်သတ်မှတ်ချက်စာရင်း သုံးခုနှင့် ဘဏ္ဍာတိုက်သည် ဆယ်ရက်လျှင် တစ်ကြိမ် ပုံမှန်ပေါ်ထွက်လေ့ရှိပြီး စောခြင်း၊ နောက်ကျခြင်း လုံးဝမရှိခဲ့ဖူးပေ။ ဤမမျှော်လင့်ဘဲ နောက်ကျမှုကြောင့် အစောင့်အရှောက်များမှာ အတော်လေး ဇဝေဇဝါ ဖြစ်နေကြသည်။

ကောင်းကင်ဘုံ၏ အလိုဆန္ဒပင်လျှင် အလုပ်ပျက်ကွက်သည့် အလုပ်သမားတစ်ယောက်လို နောက်ကျနိုင်သလား။

သို့သော် နတ်ဆိုးပင်လယ်ပေါ်သို့ ကျရောက်လာသော နတ်ဘုရားမိုးကြိုးသံများကြောင့် လူတိုင်း ပြန်လည်အေးချမ်းသွားခဲ့၏။ နတ်ဘုရားမိုးကြိုးများ ရှိနေသရွေ့ အရာအားလုံးမှာ အဆင်ပြေနေဆဲပင်။

သို့သော် ယခုတစ်ကြိမ်တွင် အဆင့်သတ်မှတ်ချက် (၃) ခု ပေါ်ထွက်လာသည့်အခါ ကောင်းကင်နှင့် မြေကမ္ဘာအဆင့်သတ်မှတ်ချက်များမှာ သိပ်ပြီး ပြောင်းလဲမှု မရှိခဲ့ပေ။ သို့သော် လူသားအဆင့်သတ်မှတ်ချက်မှာမူ သိသိသာသာ ပြောင်းလဲသွားသည်။

"ဟိုမှာကြည့်စမ်း… အခု လူသားအဆင့်သတ်မှတ်ချက်ရဲ့ ဒုတိယနေရာမှာ ဘယ်သူလဲ… ရှန်မို… ရွှမ်ဝူခံတပ်က… အဝါရောင် အဆင့် နတ်ဆိုးနှိမ်နင်းရေးအစောင့်အရှောက် ဟုတ်လား”

“အဝါရောင်အဆင့် အစောင့်အရှောက်လား… ဘယ်လိုဖြစ်နိုင်မှာလဲ"

"ငါကြားဖူးတာတော့ အနက်ရောင်အဆင့် အစောင့်အရှောက် အများစုတောင် လူသားအဆင့်သတ်မှတ်ချက်မှာ နေရာရဖို့နဲ့ လစဉ်ဆုကြေးရဖို့အတွက် ဘီအဆင့် ရမှတ် (၁) မှတ် ဒါမှမဟုတ် (၂) မှတ်လောက်ပဲ ရှိကြတာ… အဲဒီ အဝါရောင်အဆင့်ကောင်က ဘယ်လိုလုပ်ပြီး ဘီအဆင့် ရမှတ်တွေ ရနေတာလဲ"

"ဒါက အရမ်း ထူးဆန်းလွန်းတယ်… လုံးဝကို အဓိပ္ပာယ်မရှိဘူး… အဲဒီရှန်မိုဆိုတာ ဘယ်သူလဲ… နတ်ဆိုးနှိမ်နင်းရေးဗိုလ်ချုပ်ကြီးတစ်ယောက်ယောက်ရဲ့ တိတ်တိတ်ပုန်း သားများလား… ဗိုလ်ချုပ်ကြီးတွေက ထိပ်သီးစစ်မှန်သောနတ်ဆိုးအရှင်သခင်တွေကို ဖမ်းပေးပြီး သူ့ကိုပဲ အချောသတ် သတ်ခိုင်းလိုက်လို့ ရမှတ်တွေ အကုန်ရသွားတာလား"

"မဖြစ်နိုင်တာ… စစ်မှုထမ်းရမှတ်ဆိုတာ ကောင်းကင်ဘုံရဲ့ အလိုဆန္ဒက စွမ်းဆောင်မှုအပေါ် မူတည်ပြီး ချီးမြှင့်တာ… နတ်ဆိုးတစ်ကောင်ကို သတ်ရာမှာ ဘယ်သူက အများဆုံး ပါဝင်ခဲ့လဲဆိုတာအပေါ်ပဲ မူတည်တာ"

ခံတပ် (၁၀) ခုစလုံးတွင် အစောင့်အရှောက်များစွာမှာ ထင်ကြေးအမျိုးမျိုးဖြင့် ဆူညံပွက်လောရိုက်နေကြ၏။ လူတိုင်း မေးနေကြသည့် မေးခွန်းမှာ အတူတူပင်။

ရှန်မိုဆိုတာ ဘယ်သူလဲ။

ပြီးတော့ သူက ဒီလောက်များပြားလှတဲ့ ရမှတ်တွေနဲ့ လူသားအဆင့်သတ်မှတ်ချက်ရဲ့ ဒုတိယနေရာကို ဘယ်လိုလုပ်ပြီး ရုတ်တရက် ရောက်လာတာလဲ။

ကြက်ဖစိမ်းခံတပ်။

ပိန်ပါးပြီး အင်္ကျီမပါသော လူငယ်တစ်ဦးသည် သိုင်းကွက်များကို လေ့ကျင့်နေ၏။ သူ၏ လက်သီးချက်တိုင်းတွင် လေနှင့် မိုးကြိုးသံများ ဟိန်းထွက်နေပြီး ကောင်းကင်ယံကို ခွဲပစ်တော့မည့်အလား တုန်ခါနေစေသည်။ သူကား လူသားအဆင့်သတ်မှတ်ချက်၏ နံပါတ်တစ်ဖြစ်သူ ထန်ရှန့်ထင်ပင် ဖြစ်သည်။ နတ်ဆိုးနှိမ်နင်းရေးဗိုလ်ချုပ်ကြီး အများအပြားမှာ ထန်ရှန့်ထင်သည် တစ်နေ့တွင် ဗိုလ်ချုပ်ကြီးတစ်ဦး ဖြစ်လာလိမ့်မည်ဟု ဆိုခဲ့ကြသည်။ သူသည် နတ်ဆိုးမျိုးနွယ်များ၏ အလိုရှိဆုံးစာရင်းတွင် ကာလကြာရှည် ထိပ်ဆုံးမှ ပါဝင်နေသူ ဖြစ်၏။ နှစ်ပေါင်းများစွာအတွင်း မရေမတွက်နိုင်သော နတ်ဆိုးများမှ သူ့ကို လုပ်ကြံရန်၊ အဆိပ်ခတ်ရန်နှင့် ချောင်းမြောင်းတိုက်ခိုက်ရန် ကြိုးစားခဲ့ကြသော်လည်း အကြိမ်တိုင်းတွင် အသက်ရှင်ကျန်ရစ်ခဲ့ရုံသာမက ပိုမိုအင်အားကြီးမားလာခဲ့သည်။

"တပ်စိတ်မှူး... ကောင်းကင်ဘုံအဆင့်သတ်မှတ်ချက် ပေါ်လာပြီဗျ"

ဘေးမှလူတစ်ဦး ပြုံး၍ ပြောလိုက်သည်။ ထန်ရှန့်ထင်မှာ မျက်တောင်ပင် မခတ်ဘဲ

"ကြည့်စရာ မလိုပါဘူး… အဆင့်သတ်မှတ်ချက်တွေက ပြောင်းလဲခဲပါတယ်"

သူသည် သူ၏ လေ့ကျင့်မှုကို ဆက်လုပ်ရန် ပြင်လိုက်သည်။ သို့သော် သူ၏ဘေးမှ အစောင့်အရှောက်သည် လူသားအဆင့်သတ်မှတ်ချက်ကို ဖတ်ပြီးနောက်တွင် ရုတ်တရက် ကြောင်အသွားတော့၏။

"ဆရာ... ဒုတိယနေရာက ပြောင်းသွားပြီဗျ… ခြင်္သေ့သတ်သမား မဟုတ်တော့ဘူး… ရွှမ်ဝူခံတပ်က ရှန်မိုဆိုတဲ့ အဝါရောင်အဆင့် နတ်ဆိုးနှိမ်နင်းရေး အစောင့်အရှောက် ဖြစ်နေပြီ"

ထန်ရှန့်ထင်၏ လက်သီးချက်မှာ လေထဲတွင်ပင် ရပ်တန့်သွားတော့သည်။