အခန်း (၁၃၆-၁၃၈)

အခန်း (၁၃၆) - အမြုတေ ဖွဲ့စည်းခြင်း အဆင့် စွမ်းအားနှင့် (ဒုတိယအဆင့်) ထိပ်တန်း အရည်အသွေး ရုပ်သေး (အပိုင်း ၁)

~လျှို့ဝှက်ခန်းမဆောင် အတွင်းတွင် ရေတွက်၍ မကုန်နိုင်သော အခင်းအကျင်းများ စတင် လည်ပတ်နေပြီး ကာကွယ်ရေး အခင်းအကျင်း၏ အတားအဆီးများသည် ခန်းမဆောင် တစ်ခုလုံးကို လွှမ်းခြုံထားလိုက်၏။

စုယွီသည် ချန်တောင်တန်းရှိ မိသားစု နေအိမ်သို့ ပြန်ရောက်နေသော်လည်း ဘယ်တော့မှ သတိမလစ်ဟင်းတတ်ပေ။ လျှို့ဝှက်ခန်းမဆောင် အတွင်း၌ ကျင့်ကြံနိုင်သည့် အချိန်တိုင်း သူသည် ဝင်ရောက် ကျင့်ကြံလေ့ရှိပြီး၊ ကျင့်ကြံနေစဉ် ကာလအတွင်း အသုံးပြုနိုင်သမျှသော အခင်းအကျင်း အားလုံးကို ဖွင့်လှစ်ထားလေ့ ရှိသည်။

တောင်ထိပ်များ၊ ကျောက်တုံးကြီးများ၊ သို့မဟုတ် သစ်ပင်ထိပ်ဖျားများပေါ်တွင် ကျင့်ကြံခြင်းသည် အထင်ကြီးဖွယ် ကောင်းသော်လည်း လုံခြုံရေး အန္တရာယ် များသည်ဟု စုယွီ ခံစားမိသည်။ တစ်ခဏတာ အာရုံလွင့်ပါးသွားခြင်းသည် ကျင့်ကြံခြင်းကို ထိခိုက်စေရုံ သက်သက် မကဘဲ အသက်အန္တရာယ်ပင် ရှိနိုင်သည် မဟုတ်ပါလော။

"ဝူး"

ထိုအချိန်တွင် စုယွီသည် အခြေခံ တည်ဆောက်ခြင်း (အဆင့် ၂) ရှိ 'မြေကမ္ဘာနှင့် သစ်သား ပေါင်းစပ် ကျင့်စဉ်' ကို လည်ပတ်နေသည်။ ချက်ချင်း ဆိုသလိုပင် သူ့၏ ဒန်တျန် အတွင်းရှိ သီးခြားစီ တည်ရှိနေသော အစိမ်းရောင် သစ်သား မှော်စွမ်းအင်နှင့် ထူထဲသော မြေကမ္ဘာ မှော်စွမ်းအင်တို့သည် လှုံ့ဆော်ခံလိုက်ရပြီး စီးဆင်းလာကြ၏။ ထို မှော်စွမ်းအင် နှစ်မျိုးသည် သူ၏ သွေးကြောများမှတစ်ဆင့် ခန္ဓာကိုယ် အနှံ့သို့ လှည့်ပတ် စီးဆင်းသွားကြပြီး၊ စိမ်းစိုသော အရောင်နှင့် အညိုရင့်ရောင် မှော်စွမ်းအင် အမျှင်တန်းများသည် ပေါင်းစည်းသွားကာ ချက်ချင်းပင် တစ်သားတည်း ဖြစ်သွားကြလေသည်။

"ဝုန်း"

မျက်တောင်တစ်ခတ် အတွင်းမှာပင် စုယွီ၏ ခန္ဓာကိုယ် အတွင်းမှ စွမ်းအားကြီးမားသော အရှိန်အဝါ တစ်ခု ပေါက်ကွဲထွက်ပေါ်လာသည်။

အစိမ်းရောင် သစ်သား မှော်စွမ်းအင်နှင့် ထူထဲသော မြေကမ္ဘာ မှော်စွမ်းအင်များ ပိုမို ပေါင်းစည်းလာသည်နှင့်အမျှ စုယွီ၏ အတွင်းစိတ် အရှိန်အဝါသည် ပိုမို အားကောင်းလာသည်။ ပေါင်းစည်းထားသော မှော်စွမ်းအင်များ၏ ရလဒ် အရှိန်အဝါသည် သူ ထင်ထားသည်ထက် ပိုမို ပြင်းထန်ပြီး၊ သာမန် အခြေခံ တည်ဆောက်ခြင်း (အဆင့် ၂) ထက် များစွာ သာလွန်နေပေသည်။

သို့သော် ဤကြီးမားသော စွမ်းအား၊ အသစ်စက်စက် ပေါင်းစည်းထားသော မြေကမ္ဘာနှင့် သစ်သား ဓာတ်သဘာဝ မှော်စွမ်းအင်သည် ရှေးဟောင်း ရေတွင်းနက်ကြီး တစ်ခုအလား တည်ငြိမ်နေပြီး မည်သည့် ကြမ်းတမ်းသော လှုပ်ရှားမှုမှ ပြသခြင်း မရှိပေ။

'အစိမ်းရောင် သစ်သား နှစ်ပတ်လည် ကွင်း ကျင့်စဉ်' မှ ရရှိသော အစိမ်းရောင် သစ်သား မှော်စွမ်းအင်သည် သဘာဝ အလျောက် အေးချမ်းပြီး သန့်စင်နေသည်။ ထို့အတူ 'ရွှမ်မင် ဆန်းကြယ် မြေကမ္ဘာ သိုင်းကျမ်း' မှ ရရှိသော ထူထဲသည့် မြေကမ္ဘာ မှော်စွမ်းအင်သည် အရာရာကို သယ်ဆောင်နိုင်သော နက်နဲသည့် လျှို့ဝှက်ချက်များကို ပိုင်ဆိုင်ထားသည်။ ထို့ကြောင့် အစိမ်းရောင် သစ်သား မှော်စွမ်းအင်သည် ထူထဲသည့် မြေကမ္ဘာ မှော်စွမ်းအင်ပေါ်သို့ ကျရောက်သွားသောအခါ အလွယ်တကူ လက်ခံ သယ်ဆောင်သွားနိုင်ခြင်း ဖြစ်လေသည်။

'မြေကမ္ဘာနှင့် သစ်သား ပေါင်းစပ် ကျင့်စဉ်' ကို စွမ်းအင် လည်ပတ်မှု ကြီး တစ်ပတ် ပြည့်အောင် လည်ပတ်ပြီးနောက် စုယွီ၏ ခန္ဓာကိုယ် အတွင်းရှိ အစိမ်းရောင် သစ်သား မှော်စွမ်းအင်နှင့် ထူထဲသော မြေကမ္ဘာ မှော်စွမ်းအင်တို့သည် လုံးဝ ပေါင်းစည်းသွားပြီး တစ်သားတည်း ဖြစ်သွားကြ၏။

တပြိုင်နက်တည်းမှာပင် စုယွီ၏ အရှိန်အဝါသည် မြင့်တက်လာသည်။ သူသည် အခြေခံ တည်ဆောက်ခြင်း (အဆင့် ၂) တွင် ရှိနေဆဲ ဖြစ်သော်လည်း အမှန်တကယ်တွင်မူ ယခင်ကထက် များစွာ ပိုမို စွမ်းအားကြီးမားလာခြင်း ဖြစ်ပေသည်။

"ဟူး"

တစ်နာရီကျော် ကြာပြီးနောက်တွင် စုယွီသည် မျက်လုံးများကို ဖွင့်လိုက်ပြီး သက်ပြင်းချလိုက်၏။

သို့သော် 'မြေကမ္ဘာနှင့် သစ်သား ပေါင်းစပ် ကျင့်စဉ်' ကို စွမ်းအင် လည်ပတ်မှု ကြီး တစ်ပတ် လည်ပတ်ပြီးနောက် ရရှိလာသော ရလဒ်များကို လေ့လာကြည့်လိုက်သောအခါ သူ အနည်းငယ် အံ့အားသင့်သွားရ၏။

'မြေကမ္ဘာနှင့် သစ်သား ပေါင်းစပ် ကျင့်စဉ်' မှတဆင့် ပေါင်းစည်းထားသော ဓာတ်သဘာဝ နှစ်မျိုး မှော်စွမ်းအင်၏ လည်ပတ်နှုန်းသည် 'အစိမ်းရောင် သစ်သား နှစ်ပတ်လည် ကွင်း ကျင့်စဉ်' သို့မဟုတ် 'ရွှမ်မင် ဆန်းကြယ် မြေကမ္ဘာ သိုင်းကျမ်း' ကို သီးခြားစီ ကျင့်ကြံခြင်းထက် အနည်းငယ် နှေးကွေးသော်လည်း၊ ဤ ပေါင်းစပ် ကျင့်စဉ်ကို ကျင့်ကြံခြင်းသည် အစိမ်းရောင် သစ်သား မှော်စွမ်းအင်နှင့် ထူထဲသော မြေကမ္ဘာ မှော်စွမ်းအင် နှစ်မျိုးလုံးကို တပြိုင်နက်တည်း တိုးတက် ကောင်းမွန်စေနိုင်သည်။

၎င်းသည် 'အစိမ်းရောင် သစ်သား နှစ်ပတ်လည် ကွင်း ကျင့်စဉ်' နှင့် 'ရွှမ်မင် ဆန်းကြယ် မြေကမ္ဘာ သိုင်းကျမ်း' နှစ်ခုလုံးကို တပြိုင်နက်တည်း ကျင့်ကြံနေသည်နှင့် တူညီနေပေသည်။

သူသည် အချိန် ထက်ဝက်နီးပါး သက်သာသွားခဲ့သည်။

'မြေကမ္ဘာနှင့် သစ်သား ပေါင်းစပ် ကျင့်စဉ်' ကို ကျင့်ကြံခြင်း၏ ရလဒ်သည် ကျင့်စဉ် နှစ်ခုကို သီးခြားစီ ကျင့်ကြံခြင်းထက် (၁၀) ပုံ (၁) ပုံခန့် ပိုမို မြန်ဆန်လေသည်။

ဤရလဒ်သည် စုယွီ၏ မျှော်လင့်ချက်ထက် များစွာ ကျော်လွန်နေသည်။

ကနဦးတွင် သူသည် ဓာတ်ကြီးငါးပါး ပေါင်းစပ်ရန် ပြင်ဆင်ခြင်းနှင့် ပိုမို ကောင်းမွန်စွာ ကျင့်ကြံနိုင်ရန် ရည်ရွယ်ချက်ဖြင့် မြေကမ္ဘာနှင့် သစ်သား ဓာတ်သဘာဝ နှစ်မျိုးကို ပေါင်းစပ်ရန် ကြိုးစားခဲ့ခြင်းသာ ဖြစ်၏။

သို့သော် 'မြေကမ္ဘာနှင့် သစ်သား ပေါင်းစပ် ကျင့်စဉ်' သည် သူ၏ ကျင့်ကြံခြင်း နှုန်းထားကို (၁၀) ပုံ (၁) ပုံခန့် မြန်ဆန်လာစေလိမ့်မည်ဟု မည်သူက ထင်ထားပါမည်နည်း။

၎င်းသည် သူ၏ အဆင့်နိမ့် ဝိညာဉ်အမြစ် ကို အလယ်အလတ်စား ဝိညာဉ်အမြစ် အဆင့်သို့ မြှင့်တင်လိုက်သည်နှင့် တူညီနေသည်။

"ဓာတ်သဘာဝ နှစ်မျိုး ပေါင်းစပ် ကျင့်စဉ်ကတောင် ဒီလို အကျိုးကျေးဇူး ရတယ် ဆိုရင်... ဓာတ်သဘာဝ သုံးမျိုး ပေါင်းစပ်တာ... ဒါမှမဟုတ် ဓာတ်ကြီးငါးပါးလုံးကို တပြိုင်နက်တည်း ကျင့်ကြံတာမျိုး လုပ်နိုင်ရင် ဘာတွေ ဖြစ်လာမလဲ"

စုယွီ၏ မျက်လုံးအိမ်များ အနည်းငယ် ကျဉ်းမြောင်းသွားပြီး အံ့သြမှုနှင့် မယုံကြည်နိုင်မှုတို့ ရောထွေးနေသည်။

အကယ်၍ သူ တွေးထားသည့်အတိုင်းသာ ဖြစ်လာခဲ့လျှင် ဓာတ်ကြီးငါးပါးလုံးကို တပြိုင်နက်တည်း ကျင့်ကြံပြီး 'ဓာတ်ကြီးငါးပါး ပေါင်းစပ် ကျင့်စဉ်' ကို အသုံးပြုလိုက်ပါက သူ၏ ကျင့်ကြံခြင်း နှုန်းထားသည် ထိပ်တန်း ဝိညာဉ်အမြစ် ပိုင်ရှင်များ သို့မဟုတ် မြေကမ္ဘာ အဆင့် ဝိညာဉ်အမြစ် ပိုင်ရှင် ပါရမီရှင်များနှင့် သိပ်ကွာခြားတော့မည် မဟုတ်ပေ။

ထိုအတွေးကြောင့် စုယွီ ဂနာမငြိမ် ဖြစ်လာသည်။

သူ့စိတ်ပြန်လည် တည်ငြိမ်ရန် အချိန်အနည်းငယ် ယူလိုက်ရ၏။ တွေးတောဆင်ခြင်ဟန်ဖြင့် သူ ပြောလိုက်၏။

"ဓာတ်ကြီးငါးပါး ပေါင်းစပ်ဖို့ ဆိုတာ အရမ်း ခက်ခဲလွန်းတယ်... အခု ငါ 'မြေကမ္ဘာနှင့် သစ်သား ပေါင်းစပ် ကျင့်စဉ်' ကို ကျင့်ကြံနိုင်တာကလည်း အခြေခံ အုတ်မြစ် ရှိပြီးသားမို့လို့ပါ... ဓာတ်သဘာဝ သုံးမျိုး၊ လေးမျိုး၊ ဒါမှမဟုတ် ဓာတ်ကြီးငါးပါးလုံးကို ဘယ်လို ပေါင်းစပ်ရမလဲ ဆိုတာ သဲလွန်စတောင် မရှိသေးဘူး"

အချိန်ကြာမြင့်စွာ စဉ်းစားပြီးနောက် စုယွီ သက်ပြင်းတိုးတိုးလေး ချလိုက်ပြီး ရေရွတ်လိုက်၏။

"'ဓာတ်ကြီးငါးပါး ပေါင်းစပ် ကျင့်စဉ်' အမွေအနှစ်နဲ့ ပတ်သက်တဲ့ သတင်းအချက်အလက်တွေကို ဆက်လက် ရှာဖွေရုံပဲ ရှိတော့တာပေါ့"

"လောလောဆယ်တော့ မီး၊ ရေ နဲ့ သတ္တု ဓာတ်သဘာဝ မှော်စွမ်းအင်တွေကို အရင်ဆုံး ကျင့်ကြံရမယ်"

"အနည်းဆုံးတော့ မြေကမ္ဘာနဲ့ သစ်သား ဓာတ်သဘာဝ နှစ်မျိုး ပေါင်းစပ် မှော်စွမ်းအင်ရဲ့ ကျင့်ကြံမှု အဆင့်ကို မီအောင် လိုက်ရမယ်"

'မြေကမ္ဘာနှင့် သစ်သား ပေါင်းစပ် ကျင့်စဉ်' ၏ ကျင့်ကြံခြင်း နှုန်းထားနှင့် တိုးတက်မှုကို တိကျစွာ တွက်ချက်ကြည့်ပြီးနောက် အခြေခံ တည်ဆောက်ခြင်း (အဆင့် ၃) သို့ တက်လှမ်းရန် (၅) နှစ်အောက်သာ ကြာမြင့်မည်ဟု သူ ခန့်မှန်းလိုက်၏။

အကယ်၍ သူသာ 'အစိမ်းရောင် သစ်သား နှစ်ပတ်လည် ကွင်း ကျင့်စဉ်' နှင့် 'ရွှမ်မင် ဆန်းကြယ် မြေကမ္ဘာ သိုင်းကျမ်း' ကို သီးခြားစီ ကျင့်ကြံမည် ဆိုပါက (၅) နှစ်ခွဲနီးပါး ကြာမြင့်ပေလိမ့်မည်။

ဤကျင့်ကြံခြင်း နှုန်းထားသည် သာမန် အလယ်အလတ်စား ဝိညာဉ်အမြစ် ပိုင်ရှင်နှင့် မခြားနားပေ။

"(၅) နှစ်အတွင်း အခြေခံ တည်ဆောက်ခြင်း (အဆင့် ၃) ကို ရောက်မယ် ဆိုရင်... (၁၅) နှစ် အတွင်းမှာ အခြေခံ တည်ဆောက်ခြင်း အလယ်အလတ် အဆင့်ကို ရောက်နိုင်မှာပေါ့"

စုယွီ တွက်ချက်ကြည့်လိုက်၏။ နောက်ထပ် (၁၅) နှစ် အကြာတွင် သူသည် အသက် (၇၉) သို့မဟုတ် (၈၀) ဝန်းကျင်သာ ရှိဦးမည် ဖြစ်ပြီး သက်တမ်းမှာ နှစ် (၂၅၀) မှ (၂၆၀) အထိ ကျန်ရှိနေဦးမည်။

'အသက် (၂၀) (၃၀) အရွယ်' လူငယ်လေး တစ်ယောက်နှင့် တူညီနေသည်။

မဆိုးပါဘူး။

ငါ မအိုသေးပါဘူး။

သူ အခြေခံ တည်ဆောက်ခြင်း (အဆင့် ၉) သို့ ရောက်ရှိပြီး သက်တမ်း နှစ် (၃၀၀) ကျော် ပိုင်ဆိုင်လာချိန်တွင် ယခုလက်ရှိ အခြေခံ တည်ဆောက်ခြင်း အဆင့် ကျင့်ကြံသူ အများစုသည် မြေမှုန့်ဘဝ ရောက်ရှိသွားကြပြီး၊ အချိန်မြစ်ရေစီးကြောင်းထဲတွင် အမှုန်အမွှားလေးများ အဖြစ်သာ ကျန်ရစ်ကြတော့မည် ဖြစ်၏။

"ကျင့်ကြံခြင်း လောက ဆိုတာ ဘယ်သူက ပါရမီ ပိုကောင်းလဲ၊ ဘယ်သူက ကျင့်ကြံခြင်း အဆင့် ပိုမြင့်လဲ ဆိုတာပေါ် မူတည်တာ မဟုတ်ဘူး"

"ဘယ်သူက အသက်အရှည်ဆုံး နေနိုင်မလဲ ဆိုတာပေါ်မှာပဲ မူတည်တာ"

စုယွီ တွေးတောနေရင်း ရွှီဝမ်ရှန်း ကို သတိရသွား၏။ ရွှီဝမ်ရှန်း၏ ကျင့်ကြံခြင်း အဆင့်သည် သူ့ထက် မြင့်မားပြီး ပါရမီလည်း ပိုကောင်းသော်လည်း၊ နောက်ထပ် နှစ် (၁၈၀) ကြာလျှင် ရွှီဝမ်ရှန်း ရှိနေဦးမည်လော ဆိုသည်ကို ပြောရန် ခက်ခဲလှသည်။ အဘယ်ကြောင့်ဆိုသော် သူသည် အတိုင်းအတာထက် ကျော်လွန် လုပ်ဆောင်ခဲ့သောကြောင့် ဖြစ်၏။

အသက်မရှင်သန်နိုင်လျှင် ထာဝရအသက်ရှင်ခြင်း တာအိုလမ်းစဉ်ကို မည်သို့ ရှာဖွေနိုင်ပါမည်နည်း။

ထို့နောက် စုယွီသည် ခေါင်းကို အနည်းငယ် ခါယမ်းလိုက်ပြီး သူ့စိတ်ခံစားချက်များကို ဖိနှိပ်လိုက်၏။ 'ကောင်းကင်ဖီးနစ် နိဗ္ဗာန် သိုင်းကျမ်း'၊ 'မိကျောင်းသားရဲ (၁၀၈) ကွက် ကိုယ်ခန္ဓာ ကျင့်စဉ်' နှင့် 'ရွှေပုစဉ်းရင်ကွဲ ကျင့်စဉ်' တို့ကို ဆက်လက် ကျင့်ကြံပြီးနောက် လျှို့ဝှက်ခန်းမဆောင် အတွင်းမှ ထွက်ခွာလာခဲ့သည်။

တစ်လခန့် ကြာသောအခါ၊ စုမိသားစု၏ နယ်မြေအသစ်သည် မူလက 'ဝူယန်တောင်' တွင် တည်ရှိပြီး မိသားစု ပြောင်းရွှေ့လာပြီးနောက် 'ဆေးလုံးတောင်' ဟု အမည်ပြောင်းလဲ ခေါ်ဝေါ်ခဲ့သည်။ ဆေးလုံးတောင်သည် ချန်တောင်တန်း၏ အရှေ့မြောက်ဘက်တွင် တည်ရှိပြီး ယွီမိသားစု၏ ကျောက်မည်းတောင်တန်း နှင့် ပိုမို နီးကပ်သည်။ ၎င်းသည် ကျောက်မည်းတောင်တန်း၏ အရှေ့ဘက်တွင် တည်ရှိ၏။ တက်ကြွနေသော မီးတောင် (၅) လုံးကို ဗဟိုပြုထားသည့် မီးတောင်တန်းကြီး တစ်ခုတည်း။

ဆေးပညာရှင် ပိုင်ယန် တည်ဆောက်ခဲ့သော ရှေးဟောင်း ဆေးဖော်စပ်ရာ ဂူစံအိမ်သည် မီးတောင်အုပ်စု၏ အရှေ့ဘက်စွန်းတွင် တည်ရှိပြီး အရှေ့ဘက်စွန်း မီးတောင်ခြေရင်းမှ (၁၀) မိုင်ခန့် ကွာဝေးလေသည်။

အခန်း (၁၃၇) - အမြုတေ ဖွဲ့စည်းခြင်း အဆင့် စွမ်းအားနှင့် (ဒုတိယအဆင့်) ထိပ်တန်း အရည်အသွေး ရုပ်သေး (အပိုင်း ၂)

~ဤနေရာသည် သေးငယ်သော ကုန်းကမူများစွာ စုဝေးနေသည့် နေရာတစ်ခု ဖြစ်ပြီး သစ်ပင်ပန်းမန်များသည် ယေဘုယျအားဖြင့် နိမ့်ပါးကြ၏။ သစ်ပင်များသည် ကျောက်တုံးများကြားနှင့် လျှိုမြောင်များကြားတွင် ပေါက်ရောက်ကြပြီး အမြင့်ပေ (၃၀) မှ (၄၀) ခန့်သာ ရှိလေသည်။

ဆေးပညာရှင် ပိုင်ယန် တည်ဆောက်ခဲ့သော ဂူစံအိမ်သည် ကုန်းကမူများကြားရှိ မြေအောက် မီးတောင်ချော်ရည် အက်ကွဲကြောင်း တစ်ခုအတွင်း၌ တည်ရှိသည်။

စုယွီ၊ ယွီခယ်အာ၊ ယွီချန်ချင်းနှင့် အခြားသူများသည် ချန်တောင်တန်းမှ ဤနေရာသို့ ရောက်ရှိလာကြသောအခါ၊ ဝူယန်တောင်မှ တပည့်ဟောင်း ဖြစ်သူ လီပင်ချန်းသည် သူတို့ကို တွေ့ဆုံရသည့်အတွက် ဝမ်းမြောက်ဝမ်းသာ ဖြစ်ကာ ဂူစံအိမ်အတွင်းသို့ လမ်းပြ ခေါ်ဆောင်သွားလေသည်။

မြေအောက် မီးတောင်ချော်ရည် အက်ကွဲကြောင်းထဲသို့ ပေ (၁၀၀) ခန့် ဝင်ရောက်သွားပြီးနောက် ရှေ့တွင် ခမ်းနားထည်ဝါသော ခန်းမဆောင်ကြီး တစ်ခု ပေါ်လာသည်။

ခန်းမဆောင်ပေါ်တွင် 'ဆေးလုံးမျှော်စင်' ဟု ရေးသားထားသော ဆိုင်းဘုတ်တစ်ခု ချိတ်ဆွဲထား၏။

လီပင်ချန်းသည် ဆေးလုံးမျှော်စင်ကို ညွှန်ပြရင်း သက်ပြင်းချကာ ပြောလိုက်၏။

"ကျွန်တော်.. ဒီနေရာမှာ နေခဲ့ဖူးတယ်... အဲဒီတုန်းက ဒီအဆောက်အအုံကို 'ဝူယန်မျှော်စင်' လို့ ခေါ်ခဲ့ကြတာ... ဆေးပညာရှင် မိစ္ဆာ ပိုင်ယန်ကို ရှာဖို့ ဝူယန်တောင်ကို ရောက်လာတဲ့ သူတိုင်း ဒီနေရာကို ဖြတ်ကျော်ရသလို၊ ဒီနေရာမှာပဲ နေထိုင်ခဲ့ကြရတယ်"

အတိတ်ကို ပြန်ပြောင်း သတိရရင်း လီပင်ချန်းသည် တစ်ချိန်က (ဒုတိယအဆင့်) ထိပ်တန်း ဆေးပညာရှင် ပိုင်ယန်၏ ဂုဏ်သတင်းအောက်တွင် ကြီးကျယ်ခမ်းနားခဲ့ဖူးကြောင်း တွေးမိသွား၏။

သို့သော် ထိုအတွေးများ ဝင်ရောက်လာသည်နှင့် လီပင်ချန်း ရုတ်တရက် တုန်လှုပ်သွား၏။

‘ဟွန့်၊

ဘာအတွက် ကြီးကျယ်ခမ်းနားခဲ့ရတာလဲ။’

ထို မိစ္ဆာကောင် ပိုင်ယန်သည် သေသင့်သော ကောင်ဖြစ်၏။ သူ့သက်တမ်းကို ဆွဲဆန့်ရန် တစ်ခုတည်းအတွက်နှင့် အခြေခံ တည်ဆောက်ခြင်း အဆင့် ကျင့်ကြံသူ (၁၃) ဦးကို ယဇ်ပူဇော်ခဲ့သည်။ ထို့အပြင် (ဒုတိယအဆင့်) ဆေးပညာရှင် (၁၀) ဦးကျော်နှင့် ဝူယန်တောင်ရှိ လူတိုင်း၏ အသက်ကိုလည်း စတေးခဲ့လေသည်။ စုစုပေါင်း လူအနည်းဆုံး ရာနှင့်ချီ၊ ထောင်နှင့်ချီ ရှိပေလိမ့်မည်။

အကယ်၍ သူသာ တစ်စုံတစ်ခု မှားယွင်းနေကြောင်း စောစီးစွာ ရိပ်မိပြီး ဝူယန်တောင်မှ စောစော ထွက်ခွာရန် မရွေးချယ်ခဲ့ပါက...

သူ၊ လီပင်ချန်းသည်လည်း ထိုယဇ်ပူဇော်ခံရသူများထဲတွင် ပါဝင်နေလောက်ပြီ ဖြစ်၏။

မူလက စိတ်ဓာတ်ကြံ့ခိုင်သော လီပင်ချန်းသည် သူ၏ စိတ်ထဲတွင် ဆေးပညာရှင် ပိုင်ယန်ကို လျင်မြန်စွာ ကျိန်ဆဲလိုက်ပြီး လူတိုင်းကို ဆေးလုံးမျှော်စင် အတွင်းသို့ ခေါ်ဆောင်သွားလေသည်။

ထိုအချိန်တွင် ဆေးလုံးမျှော်စင် အတွင်း၌ တတိယ အကြီးအကဲ စုဟယ်သည် စုမိသားစုထံမှ ဆေးဖော်စပ်ရန် ရောက်ရှိလာသော ဧည့်သည်များကို ဧည့်ခံနေသည်။ မိစ္ဆာအိုကြီး ပိုင်ယန်၏ ကြောက်မက်ဖွယ် ယဇ်ပူဇော်မှုများကြောင့် ယွင်ကျန်းဂိုဏ်း နယ်မြေအတွင်းရှိ (ဒုတိယအဆင့်) ဆေးပညာရှင် အများစုသည် သေဆုံးလုနီးပါး ဖြစ်သွားခဲ့ရ၏။

ယခုအခါ အခြေခံ တည်ဆောက်ခြင်း အဆင့်ရှိ တစ်သီးပုဂ္ဂလ ကျင့်ကြံသူများနှင့် ယွင်ကျန်းဂိုဏ်း ဒေသအတွင်းရှိ ကျင့်ကြံခြင်း မိသားစုများ အနေဖြင့် စုမိသားစုနှင့် ဆေးဖော်စပ်ရေး ပူးပေါင်းဆောင်ရွက်ရန်သာ ရွေးချယ်စရာ ရှိတော့သည်။

ဤအချက်က ဆေးလုံးတောင်ကို ယခင်ကထက် ပိုမို စည်ကားလာစေခဲ့သည်။

ဆေးလုံးမျှော်စင်ကို ကျော်လွန်ပြီးနောက် လူတိုင်း ရှေ့သို့ ဆက်လက် လျှောက်လှမ်းခဲ့ကြ၏။

"အောက်ဘက်မှာ ဧရိယာ (၃) ခု ရှိတယ်... တစ်ခုက မြေကမ္ဘာ မီးလျှံ အလွှာကို သွားတဲ့ လမ်း... တစ်ခုက ဂူစံအိမ်ရဲ့ အဓိက အလွှာ ဖြစ်ပြီး နေထိုင်ဖို့ နန်းတော်တချို့ ရှိတယ်... နောက်တစ်ခုကတော့ ဂူစံအိမ် ကျင့်ကြံရေး ဧရိယာပါ... မိသားစုက အဲဒီမှာ ကျင့်ကြံရေး အခန်းတွေ အများကြီး ဖွင့်လှစ်ထားပါတယ်"

လီပင်ချန်းက စုယွီနှင့် အခြားသူများကို မိတ်ဆက်ပေးလိုက်၏။

ဆေးပညာရှင် ပိုင်ယန်သည် ဝူယန်တောင်၏ (ဒုတိယအဆင့်) ဝိညာဉ်ကြောကို အပြည့်အဝ အသုံးချခြင်း မရှိဘဲ ဤကဲ့သို့သော ဂူစံအိမ်တစ်ခုကိုသာ တည်ဆောက်ခဲ့ခြင်း ဖြစ်၏။

လီပင်ချန်းသည် စုယွီနှင့် အခြားသူများကို မိသားစု နယ်မြေအတွင်းရှိ ဂူစံအိမ်၏ အဓိက အလွှာသို့ ခေါ်ဆောင်သွားပြီး အတွင်းဘက် အကျဆုံး နန်းတော်သို့ ရောက်ရှိသွား၏။ သူမသည် အိမ်ထိန်း တစ်ဦးကဲ့သို့ ပြောလိုက်၏။

"မိစ္ဆာအိုကြီး ပိုင်ယန်ရဲ့ နန်းတော်ဟောင်းကို ဖျက်ဆီးပစ်လိုက်ပါပြီ... ဒါက မိသားစု ခေါင်းဆောင် တည်ဆောက်ပေးထားတဲ့ မျှော်စင်သခင် အတွက် နေအိမ်အသစ်ပါ"

"အောက်ဘက်က လျှို့ဝှက်ခန်းမဆောင် တစ်ခုလုံးကို ဝိညာဉ်သတ္တုရိုင်း တွေနဲ့ ပြုလုပ်ထားပြီး... ယွင်ကျန်းဂိုဏ်းက (ဒုတိယအဆင့်) ထိပ်တန်း အခင်းအကျင်း ပညာရှင် ချထားပေးတဲ့ အခင်းအကျင်း အလွှာတွေလည်း ရှိပါတယ်... အရမ်း လုံခြုံပါတယ်ဗျ"

"ဘေးနားက နန်းတော်တချို့ကတော့ အခြား ဘိုးဘေးတွေ၊ မိသားစု အကြီးအကဲတွေနဲ့ အကြီးအကဲတွေရဲ့ နေအိမ်တွေပါ"

စုယွီ ဤနေရာတွင် အခြေချ နေထိုင်လိုက်၏။

စုမိသားစုသည် ဆေးလုံးတောင်ကို သိမ်းပိုက်ပြီးနောက် ဤ မြေအောက် မီးတောင်ချော်ရည် အက်ကွဲကြောင်း ဂူစံအိမ်ကို ဖွံ့ဖြိုးတိုးတက်အောင် လုပ်ဆောင်ရုံသာမက ဆေးလုံးတောင် အပြင်ဘက်ရှိ ဝိညာဉ်ကြောကိုလည်း စတင် အသုံးချလာကြ၏။

ကုန်းကမူများနှင့် လျှိုမြောင် ဧရိယာများကို တူးဖော်ပြီး ဝိညာဉ်စပါးနှင့် ဝိညာဉ်ဆေးပင်များ စိုက်ပျိုးရန်အတွက် ဝိညာဉ် စိုက်ခင်းများ အဖြစ် ပြောင်းလဲလိုက်ကြ၏။

(ဒုတိယအဆင့်) ဝိညာဉ်ကြော၏ ဧရိယာသည် (ပထမအဆင့်) ဝိညာဉ်ကြောထက် နှစ်ဆနီးပါး ပိုမို ကြီးမားသဖြင့် စုမိသားစုသည် ဆေးလုံးတောင်တွင် အရင်းအမြစ် နယ်မြေ အများအပြားကို ဖွင့်လှစ်နိုင်ခဲ့သည်။ အနာဂတ်တွင် စုမိသားစုဝင် အရေအတွက် နှစ်ဆ တိုးလာလျှင်တောင်မှ ဆေးလုံးတောင် ဝိညာဉ်ကြောသည် လက်ခံနိုင်စွမ်း ရှိပေသည်။

စုမိသားစုသည် ချန်တောင်တန်းမှ ဆေးလုံးတောင်သို့ ချောမွေ့စွာ ပြောင်းရွှေ့နိုင်ခဲ့ပြီး မည်သည့် အနှောင့်အယှက်၊ မတော်တဆမှုမှ မဖြစ်ပွားခဲ့ပေ။

ဆေးလုံးတောင်သို့ ရောက်ရှိပြီးနောက် စုယွီသည် ဤနေရာတွင် တံခါးပိတ် ကျင့်ကြံခြင်းကို ဆက်လက် ပြုလုပ်ရန် ဆုံးဖြတ်လိုက်၏။

(ဒုတိယအဆင့်) ဂူစံအိမ်သည် သူ၏ နေ့စဉ် ကျင့်ကြံမှု လိုအပ်ချက်များကို ဖြည့်ဆည်းပေးနိုင်ပြီ ဖြစ်၏။

တဆက်တည်းမှာပင် သူသည် မိသားစု၏ ဆေးလုံးမျှော်စင် ဂုဏ်သတင်းကို မြှင့်တင်ပေးခဲ့ပြီး မိသားစု၏ နှစ်ထောင်ချီ သက်တမ်းအတွက် ကြွယ်ဝချမ်းသာမှု အရင်းအမြစ်ကို ဖွင့်လှစ်ပေးခဲ့သည်။

သို့နှင့်၊ အချိန်များ ကုန်ဆုံးသွားပါသည်။

တစ်နှစ်ကြာပြီးနောက်၊

နောက်ဆုံးတွင် စုယွီသည် 'အမှောင်နတ်ဘုရား ဆေးလုံး' ဖော်စပ်ရန်အတွက် လိုအပ်သော ကုန်ကြမ်း ပစ္စည်း အစုံအလင်ကို မိသားစု စုဆောင်းသော ပစ္စည်းများထဲတွင် တိတ်တဆိတ် ထည့်သွင်းပြီး စုဆောင်းနိုင်ခဲ့သည်။ အဓိက အကြောင်းရင်းမှာ (ဒုတိယအဆင့်) ဝိညာဉ် ဆေးဖက်ဝင် အပင် ဖြစ်သော 'နတ်ဘုရားမဲ့ ပန်း' သည် အလွန် ရှားပါးသောကြောင့် ဖြစ်၏။

မိသားစုသည် ပိုင်ယွဲ့ အင်မော်တယ် မြို့တော်၊ တာ့ယွဲ့ မှောင်ခိုဈေးနှင့် အခြား ဈေးကွက်များကို သွားရောက် ရှာဖွေခဲ့ရပြီး 'နတ်ဘုရားမဲ့ ပန်း' ၏ သဲလွန်စကို တွေ့ရှိရန် တစ်နှစ်ကျော် ကြာမြင့်ခဲ့သည်။

'အမှောင်နတ်ဘုရား ဆေးလုံး' ၏ ကုန်ကြမ်း ပစ္စည်း တန်ဖိုးမှာ သိပ်မများလှပေ။ ခန့်မှန်းခြေအားဖြင့် အဆင့်နိမ့် ဝိညာဉ်ကျောက်တုံး (၁,၅၀၀) ကျော်သာ ကုန်ကျသည်။

'အခြေခံ တည်ဆောက်ခြင်း ဆေးလုံး' နှင့် နှိုင်းယှဉ်လျှင် ဤပမာဏသည် များစွာ သက်သာလှပေသည်။

'အမှောင်နတ်ဘုရား ဆေးလုံး' အတွက် ကုန်ကြမ်း ပစ္စည်းများ ရရှိသည်နှင့် တပြိုင်နက် စုယွီသည် ဆေးဖော်စပ်ခန်းထဲသို့ ဝင်ရောက်ရန် မစောင့်နိုင်တော့ပေ။ သူသည် တင်ပျဉ်ခွေ ထိုင်လိုက်ပြီး စိတ်ကို ငြိမ်သက်အောင် ထားကာ အာရုံစူးစိုက်လိုက်၏။ စိတ်ငြိမ်သက်သွားပြီး အာရုံထွေပြားမှု ကင်းမဲ့သွားသောအခါ ဆေးဖိုကို ထုတ်ယူပြီး 'အမှောင်နတ်ဘုရား ဆေးလုံး' ကို စတင် ဖော်စပ်လိုက်တော့သည်။

"နတ်ဘုရားမဲ့ ပန်း... ကောင်းကင် မြွေနဂါး မြက်ပင်... ဝိညာဉ် ခြင်ဆီ အရည်..."

စုယွီ၏ မျက်လုံးများ တောက်ပနေပြီး နတ်ဘုရား၏ အလင်းရောင်များ ဖြာထွက်နေသကဲ့သို့ ဖြစ်နေသည်။ သူ၏ ဆေးပညာ စွမ်းရည်သည် အပြစ်အနာအဆာ ကင်းမဲ့ပြီး ပြီးပြည့်စုံနေပြီ ဖြစ်၏။

(ဒုတိယအဆင့်) ထိပ်တန်း ဆေးပညာရှင်များ၊ သို့မဟုတ် (တတိယအဆင့်) အဆင့်နိမ့် ဆေးပညာရှင်များ ရောက်လာလျှင်တောင်မှ သူတို့ ဖော်စပ်သော (ဒုတိယအဆင့်) အဆင့်နိမ့် ဆေးလုံးများသည် သူ၏ လက်ရာကို မမီနိုင်ကြောင်း စုယွီ ယုံကြည်မှု ရှိလေသည်။

ပါဝင်ပစ္စည်း တစ်မျိုးပြီး တစ်မျိုး ထည့်သွင်းပြီး ဆေးဖိုထဲတွင် သန့်စင်လိုက်ရာ တစ်နာရီကျော် ကြာပြီးနောက်တွင် ဤ (ဒုတိယအဆင့်) အဆင့်နိမ့် 'အမှောင်နတ်ဘုရား ဆေးလုံး' အသုတ်ကို စုယွီ အောင်မြင်စွာ ဖော်စပ်နိုင်ခဲ့သည်။

"ဝူး"

စုယွီက ဆေးလုံး သိမ်းဆည်းခြင်း နည်းစနစ် ကို လုပ်ဆောင်လိုက်ရာ ဆေးဖို၏ အဖုံးသည် ချက်ချင်း ပျံတက်သွား၏။ အထဲမှ အစိမ်းရင့်ရောင် ဆေးလုံးများသည် တစ်လုံးပြီး တစ်လုံး ပျံထွက်လာပြီး စုယွီ၏ ရှေ့တွင် ဝဲပျံနေကြ၏။

ပထမဆုံး အကြိမ် 'အမှောင်နတ်ဘုရား ဆေးလုံး' ဖော်စပ်မှုတွင် ဆေးလုံး (၄) လုံး ရရှိခဲ့သည်။ (၃) လုံးမှာ ထိပ်တန်း အရည်အသွေး ဖြစ်ပြီး (၁) လုံးသာ သာမန် အရည်အသွေး ဖြစ်လေသည်။

စုယွီ အသက်ကို ဖြည်းညှင်းစွာ ရှူရှိုက်လိုက်ပြီး စိတ်ထဲမှ ပြောလိုက်၏။

"မဆိုးဘူးပဲ"

သို့သော် သာမန် အရည်အသွေးရှိ 'အမှောင်နတ်ဘုရား ဆေးလုံး' ကို ကြည့်ပြီး သူ့မျက်မှောင်များ အနည်းငယ် တွန့်ချိုးသွား၏။ ဖျက်ဆီးပစ်ရန် စဉ်းစားလိုက်မိ၏။

ဤဆေးလုံး၏ ကုန်ကြမ်း ပစ္စည်း တန်ဖိုးမှာ မမြင့်မားသလို စုဆောင်းရလည်း မခက်ခဲပေ။ ထို့အပြင် သူသည် 'အမှောင်နတ်ဘုရား ဆေးလုံး' ကို ရောင်းချရန် သို့မဟုတ် လူသိရှင်ကြား ထုတ်ပြရန် အစီအစဉ် မရှိပေ။

သူသည် ဤဆေးလုံးကို သူ့မိသားစုမှ အကြီးအကဲများ သို့မဟုတ် ပါရမီ ကန့်သတ်ချက် ရှိပြီး အသက်ကြီးမှ ချီစွမ်းအင် စုစည်းခြင်း (အဆင့် ၉) သို့ ရောက်ရှိလာသော မျိုးဆက်သစ်များအတွက်သာ အသုံးပြုရန် ရည်ရွယ်ထားပါသည်။

အခန်း (၁၃၈) - အမြုတေ ဖွဲ့စည်းခြင်း အဆင့် စွမ်းအားနှင့် (ဒုတိယအဆင့်) ထိပ်တန်း အရည်အသွေး ရုပ်သေး (အပိုင်း ၃)

~စုယွီ…လိုအပ်သည်မှာ မိသားစု အကြီးအကဲများအတွက် ထိပ်တန်း အရည်အသွေးရှိသော ဆေးလုံးများသာ ဖြစ်၏။ စုယွီ၏ အမြင်တွင် အကယ်၍ ဤအရာသည် အကြီးအကဲများအတွက် ဖြစ်ပါက အကောင်းဆုံး အရည်အသွေးပင်။ သူတို့အတွက် အခြေအနေ ကောင်းမွန်စေရန်နှင့် အဆင့်တက်လှမ်းရန် ကြိုးပမ်းရာတွင် ရာနှုန်းပြည့် အခွင့်အလမ်း သေချာစေရမည် ဖြစ်ပါ၏။

အကယ်၍ သာမန် အရည်အသွေးရှိ 'အမှောင်နတ်ဘုရား ဆေးလုံး' ကို မလိုအပ်ပါက သူ သိမ်းမထားပါပေ။ သိမ်းထားခြင်းဖြင့် ၎င်း၏ တည်ရှိမှုကို ပေါက်ကြားသွားနိုင်မည့် အန္တရာယ်ကို မယူချင်ပေ။

"ဆရာ့အတွက် တစ်လုံး... အကြီးအကဲ စုချန်နဲ့ အကြီးအကဲ စုရို့ဆု တို့အတွက် တစ်လုံးစီ... ထိပ်တန်း အရည်အသွေးရှိတဲ့ (၃) လုံးဆိုရင် လုံလောက်ပြီ"

သူ အကျိုးအကြောင်း ဆင်ခြင်ကြည့်လိုက်၏။

"မိသားစု ခေါင်းဆောင် အတွက်တော့ သူ့အသက်က ကြီးကြီးမားမား ပြဿနာ မဟုတ်သေးဘူး... 'အမှောင်နတ်ဘုရား ဆေးလုံး' အတွက် ကုန်ကြမ်း ပစ္စည်း အသစ်တွေ စုဆောင်းဖို့ တစ်နှစ် နှစ်နှစ်လောက် စောင့်ပြီးမှ ထိပ်တန်း အရည်အသွေး ဒါမှမဟုတ် ပြီးပြည့်စုံတဲ့ အရည်အသွေး ဆေးလုံးကို ဖော်စပ်ပေးလို့ ရတာပဲ... အဲဒီအချိန်ကျမှ အဆင့်တက်ဖို့ ကြိုးစားတာ သူ့အတွက် ပိုကောင်းလိမ့်မယ်"

သို့သော် စုယွီ ခေတ္တမျှ တွေးတောပြီးနောက် နောက်ဆုံးတွင် ထိုအတွေးကို ခေတ္တ ဖိနှိပ်ထားလိုက်၏။

အကယ်၍ ကုန်ကြမ်း ပစ္စည်း အသစ်များ မစုဆောင်းနိုင်ခဲ့လျှင် မည်သို့ လုပ်မည်နည်း။

ထိုသို့ဆိုလျှင် ရှိပြီးသား တစ်လုံးကို ဖျက်ဆီးပစ်လိုက်ခြင်းမှာ မိုက်မဲရာ ကျပေလိမ့်မည်။

"ထားလိုက်ပါတော့... သိမ်းထားတာပဲ ကောင်းပါတယ်... အပြင်ကို မပေါက်ကြားအောင် သတိထားရုံပေါ့"

ဖြစ်နိုင်ချေများကို စဉ်းစားရင်း စုယွီ ခေါင်းခါလိုက်၏။

သူ့လက်ထဲရှိ ထိပ်တန်း အရည်အသွေး 'အမှောင်နတ်ဘုရား ဆေးလုံး' ကို စစ်ဆေးကြည့်လိုက်ရာ ထူထဲသော မိစ္ဆာစွမ်းအင် လှိုင်းများ ထွက်ပေါ်နေသည်ကို အာရုံခံမိသည်။ ၎င်းသည် 'အမှောင်နတ်ဘုရား ဆေးလုံး' အမွေအနှစ် မှတ်တမ်းပါ ဖော်ပြချက်များနှင့် ကိုက်ညီနေလေသည်။

"ဒါ အလုပ်ဖြစ်မယ်လို့ မျှော်လင့်ပါတယ်"

မျှော်လင့်တကြီး ရေရွတ်ရင်း ထိပ်တန်း အရည်အသွေး ဆေးလုံး (၃) လုံးကို ကျောက်စိမ်းသေတ္တာ တစ်ခုထဲတွင် ထည့်ကာ ချန်ခွန်းအိတ်ထဲ၌ သိမ်းဆည်းလိုက်၏။ ကျန်ရှိနေသော သာမန် အရည်အသွေး ဆေးလုံး တစ်လုံးကိုမူ သီးခြား ကျောက်စိမ်းသေတ္တာ အသေးလေး တစ်ခုထဲ ထည့်ပြီး အောက်ဆုံးတွင် သိမ်းဆည်းထားလိုက်၏။

ထို့နောက် စုယွီသည် တံခါးပိတ် ကျင့်ကြံခြင်းမှ မျှော်လင့်ချက်များစွာဖြင့် ထွက်ခွာလာပြီး အကြီးအကဲများ ဖြစ်ကြသော စုယွင်၊ စုချန်နှင့် စုရို့ဆု တို့ကို ခေါ်ယူလိုက်လေသည်။

*

ပင်မ ခန်းမဆောင် အတွင်း။

စုချန်နှင့် စုရို့ဆုကို တွေ့လိုက်ရသောအခါ စုယွင်က စုယွီကို စိတ်ဝင်တစား ကြည့်လိုက်ပြီး မေးလိုက်၏။

"ဘာဖြစ်လို့လဲ... ငါတို့ လူကြီးတွေကို အကူအညီ တောင်းစရာ ရှိလို့လား"

ပင်မ ခန်းမဆောင် တစ်ခုလုံးကို တားမြစ် ကာကွယ်ရေး အလွှာ ချထားလိုက်ပြီးနောက် စုယွီ လေသံတိုးတိုးဖြင့် ပြောလိုက်၏။

"ကျွန်တော့်မှာ နည်းလမ်း တစ်ခု ရှိတယ်... အဲဒါက ဆရာတို့ရဲ့ အခြေအနေကို တိုးတက်စေပြီး ရက်အနည်းငယ်လောက် အထွတ်အထိပ် အခြေအနေကို ယာယီ ပြန်ရောက်စေနိုင်ပါတယ်... အဲဒီ ကာလအတွင်းမှာ 'အခြေခံ တည်ဆောက်ခြင်း ဆေးလုံး' ကို သောက်သုံးပြီး အခြေခံ တည်ဆောက်ခြင်း အဆင့်ကို တက်လှမ်းဖို့ ကြိုးစားခွင့် ရလိမ့်မယ်"

"ဒါပေမဲ့ ပေးဆပ်ရမယ့် တန်ဖိုးက ကြီးမားတယ်... အောင်မြင်ရင်တောင်မှ အခြေခံ တည်ဆောက်ခြင်း (အဆင့် ၁) ကို ရောက်ပေမဲ့ သာမန် ချီစွမ်းအင် စုစည်းခြင်း (အဆင့် ၉) ထက် သိပ်ပြီး ပိုမသန်မာနိုင်ဘူး"

"ဒါ့အပြင် အတင်းအကြပ်.. အဆင့်တက်လှမ်းပြီးသွားရင် နောက်ထပ် ကျင့်ကြံခြင်း အဆင့် တိုးတက်လာနိုင်ဖို့ မရှိတော့ပါဘူး"

"ပြီးတော့ အဆင့်တက်လှမ်းဖို့ ကြိုးပမ်းမှု မအောင်မြင်ခဲ့ရင်... သက်တမ်းက အမြန်ဆုံး ကုန်ဆုံးသွားနိုင်တယ်"

အကြီးအကဲ (၃) ဦး ဖြစ်ကြသော စုယွင်၊ စုချန်နှင့် စုရို့ဆုတို့သည် စုယွီ၏ ကြေညာချက်ကြောင့် လန့်ဖျတ်သွားကြ၏။ အခြေအနေကို အတင်းအကြပ် မြှင့်တင်ပြီး အခြေခံ တည်ဆောက်ခြင်း အဆင့်ကို တက်လှမ်းရန် ကြိုးပမ်းခိုင်းသည်တဲ့လား။

ကနဦး တုန်လှုပ်မှု ပြီးဆုံးသွားသောအခါ စုယွင်သည် စိတ်လှုပ်ရှားမှုကြောင့် အသံများ တုန်ရီနေပြီး မေးလိုက်၏။

"တ... တကယ်ပဲ ဖြစ်နိုင်လို့လား"

သူ့မှာ သက်တမ်း သိပ်မကျန်တော့မှန်း သူ ကိုယ်တိုင် သိလေသည်။

အကယ်၍ အခြေခံ တည်ဆောက်ခြင်း အဆင့်ကို တက်လှမ်းနိုင်မည့် နည်းလမ်း ရှိလျှင် သူ လိုလိုလားလား ကြိုးစားကြည့်ချင်သည်။

စုယွီက စုယွင်ကို လေးနက်စွာ စိုက်ကြည့်ပြီး အလေးအနက် ပြောလိုက်၏။

"တကယ်လို့ ဆရာ ကျရှုံးသွားခဲ့ရင် အသက်ရှင်နိုင်ဖို့ အခွင့်အရေး နည်းသွားပြီနော်"

ထိုအခါ၊ စုယွင်က အားပါးတရ ရယ်မောလိုက်၏။

"ဟားဟား.. ဘာပဲဖြစ်ဖြစ် ငါ့မှာ နေရမယ့် သက်တမ်းက နှစ်အနည်းငယ်ပဲ ကျန်တော့တာပါ... အရင်တုန်းက အခြေခံ တည်ဆောက်ခြင်း ဆေးလုံး မသောက်ခဲ့တာက အသုံးမဝင်လို့လေ... ဒါပေမဲ့ အခု ငါ့ရဲ့ အထွတ်အထိပ် အခြေအနေကို ပြန်ရနိုင်မယ်... ပြီးမှ အခြေခံ တည်ဆောက်ခြင်း ဆေးလုံး သောက်မယ် ဆိုရင်တော့... ဖြစ်နိုင်တာက... ငါ့မှာ အခြေခံ တည်ဆောက်ခြင်း အဆင့်ကို ရောက်ဖို့ (၆၀) ကနေ (၇၀) ရာခိုင်နှုန်းလောက် အခွင့်အရေး ရှိလာနိုင်တယ်"

ခေတ္တမျှ တိတ်ဆိတ်သွားပြီးနောက် စုယွီ ဖြည်းညှင်းစွာ ခေါင်းငြိမ့် ထောက်ခံလိုက်သည်။

ထို့နောက် သူက အကြီးအကဲ စုချန်နှင့် စုရို့ဆု ဘက်သို့ လှည့်လိုက်၏။

"အကြီးအကဲ နှစ်ယောက်ရော... စမ်းကြည့်ချင်ကြသလား"

စုချန်က သူ့မုတ်ဆိတ်ဖြူကို သပ်တင်လိုက်ပြီး တဟဲဟဲ ရယ်မောလိုက်၏။

"ငါ့ရဲ့ လက်ရှိ အခြေအနေ အတိုင်းပဲ ဆက်နေရမယ် ဆိုရင်တော့... အနားယူလိုက်ပြီး အခြေခံ တည်ဆောက်ခြင်း ဆေးလုံးကို မဖြုန်းတီးတာ ပိုကောင်းပါတယ်"

"ဒါပေမဲ့ အထွတ်အထိပ် အခြေအနေ ပြန်ရမယ်... ပြီးတော့ အခြေခံ တည်ဆောက်ခြင်း ဆေးလုံးလည်း သောက်ရမယ် ဆိုရင်တော့... အင်း... ငါ့မှာ အောင်မြင်ဖို့ (၆၀) ရာခိုင်နှုန်းလောက် အခွင့်အရေး ရှိနိုင်တယ်"

စုရို့ဆု၏ မျက်နှာတွင် ရှုပ်ထွေးသော အမူအရာများ ပေါ်လာသည်။ သူမ သက်ပြင်းတိုးတိုး ချလိုက်ပြီး စုယွီကို ပြောလိုက်၏။

"ဒီအဘွားအိုက ထွက်ခွာသွားဖို့ ပြင်ဆင်ထားပြီးသားပါ... ဒါပေမဲ့ မင်းက မျှော်လင့်ချက် ပြန်ပေးနေပြန်ပြီ"

စုယွီက ကပျာကယာ ပြန်ပြောလိုက်၏။

"အဲဒီလို မဟုတ်ပါဘူး... ဒီလိုလုပ်တာက တန်ဖိုးကြီးကြီး ပေးဆပ်ရမှာပါ... အဆင့်တက်ဖို့ တစ်ခုတည်းအတွက် အရာအားလုံးကို စွန့်လွှတ်လိုက်ရသလို ဖြစ်နေမှာပါ"

အရေးအကြောင်းများ ပြည့်နှက်နေပြီး ဆံပင်ဖြူဖွေးနေသော စုရို့ဆုက တိုးတိုးလေး ရယ်မောလိုက်ပြီး ပြောလိုက်၏။

"အဟင်း..အဆင့်တက်ဖို့ ဖြစ်နိုင်ခြေ ရှိလာပြီ ဆိုရင်ပဲ လုံလောက်နေပါပြီ"

"ဒီလောကကြီးမှာ လူဘယ်နှယောက်လောက်က နောက်ထပ် တစ်နှစ်လောက် ပိုအသက်ရှင်ချင်နေကြသလဲ"

စုယွင်၊ စုချန်နှင့် စုရို့ဆုတို့သည် စုမိသားစု၏ သာမန် သက်ကြီးပိုင်း အဖွဲ့ဝင်များသာ ဖြစ်ကြ၏။ သူတို့တွင် ကြီးမားသော ရည်မှန်းချက်များ မရှိသလို၊ သက်တမ်းရှည်ဖို့ တစ်ခုတည်းအတွက် မိစ္ဆာ လမ်းစဉ်ကို ရွေးချယ်ခဲ့သည့် မိစ္ဆာအိုကြီး ပိုင်ယန်ကဲ့သို့ ရူးသွပ်မှုမျိုးလည်း မရှိကြပေ။

ယခုအခါ သူတို့တွင် နောက်ထပ် ဆယ်စုနှစ် အနည်းငယ် ပိုမို အသက်ရှင်ခွင့် ရရှိလာပြီ ဖြစ်ရာ သူတို့အတွက် လုံလောက်သည်ထက် ပိုနေလေပြီ။

သူတို့အားလုံး ကျေနပ်ကြ၏။

"ဒါဆိုရင် ဆရာတို့ ကျင့်ကြံနေတဲ့ အချိန်မှာ ကျွန်တော် စောင့်ရှောက်ပေးပါ့မယ်"

စုယွီ ပြောလိုက်၏။ သူတို့၏ အသက်အရွယ် ကြီးရင့်မှုကြောင့် အန္တရာယ် ရှိနိုင်သဖြင့် သူ စိုးရိမ်နေမိသည်။ အကယ်၍ ကျရှုံးသွားခဲ့ပါက ဒုတိယအကြိမ် အခွင့်အရေး ရှိတော့မည် မဟုတ်ပေ။

*

တစ်လခန့် ကြာသောအခါ၊

စုယွီ၏ စောင့်ရှောက်မှုအောက်တွင် စုယွင်နှင့် စုရို့ဆုတို့သည် 'အမှောင်နတ်ဘုရား ဆေးလုံး' နှင့် အရည်အသွေးမြင့် 'အခြေခံ တည်ဆောက်ခြင်း ဆေးလုံး' များ၏ အကူအညီဖြင့် အတားအဆီးများကို ကျော်ဖြတ်ကာ အခြေခံ တည်ဆောက်ခြင်း (အဆင့် ၁) သို့ အောင်မြင်စွာ တက်လှမ်းနိုင်ခဲ့ကြ၏။ ဤအောင်မြင်မှုကြောင့် သူတို့၏ သက်တမ်းကို နှစ် (၃၀) မှ (၄၀) ခန့်အထိ ဆွဲဆန့်နိုင်မည် ဖြစ်၏။

ပေးဆပ်လိုက်ရသော တန်ဖိုးမှာမူ စုယွင်နှင့် စုရို့ဆု နှစ်ဦးစလုံး လဝက်နီးပါး ကုန်ခန်းမောပန်းနေခဲ့ရပြီးမှ အပြည့်အဝ ပြန်လည် ကောင်းမွန်လာခဲ့ခြင်း ဖြစ်၏။

သူတို့၏ ကျင့်ကြံခြင်း အဆင့် တက်လှမ်းမှုသည် အားနည်းသော အခြေခံ တည်ဆောက်ခြင်း မျိုးစေ့များကိုသာ ရရှိစေခဲ့ပြီး၊ အခြေခံ တည်ဆောက်ခြင်း (အဆင့် ၁) များထဲတွင် အားအနည်းဆုံး ဖြစ်နေစေသည်။ သူတို့ အနေဖြင့် ဆက်လက် ကျင့်ကြံရန် သို့မဟုတ် နောက်ထပ် အဆင့်တက်လှမ်းရန် မဖြစ်နိုင်တော့သလောက်ပင်။

အခြေခံ တည်ဆောက်ခြင်း (အဆင့် ၁) သည် သူတို့၏ ကန့်သတ်ချက် ဖြစ်သွားခဲ့ပြီ။

သို့သော်ငြားလည်း သူတို့သည် သူတို့၏ အောင်မြင်မှုအတွက် ကျေနပ်ပျော်ရွှင်နေကြ၏။

အရည်အသွေးမြင့် အခြေခံ တည်ဆောက်ခြင်း ဆေးလုံးများ၏ အကူအညီ ပါဝင်သော်လည်း အခြေခံ တည်ဆောက်ခြင်း အဆင့်သို့ တက်လှမ်းခြင်း လုပ်ငန်းစဉ်သည် ရာနှုန်းပြည့် အာမခံချက် မရှိပေ။

စုယွင်နှင့် စုရို့ဆုတို့ အောင်မြင်စွာ တက်လှမ်းနိုင်ခဲ့သော်လည်း၊ စုမိသားစု၏ ပထမ အကြီးအကဲ ဖြစ်သော စုချန်မှာမူ နောက်ဆုံး အဆင့်တွင် သဘာဝ ဝိညာဉ် စွမ်းအင်များ၏ ရိုက်ခတ်မှုကို မခံနိုင်ခဲ့ဘဲ ကျရှုံးသွားခဲ့ရ၏။ သူ၏ သက်စောင့်စွမ်းအားများ ကွဲပြားလွင့်စင်သွားပြီး လျှို့ဝှက်ခန်းမဆောင် အတွင်းမှ ဘယ်တော့မှ ပြန်မထွက်လာနိုင်တော့ချေ။