အခန်း (၁၄၂-၁၄၄)

အခန်း (၁၄၂) - ရှေးဟောင်း မြေပုံနှင့် နေလမင်း ကျွန်း ဂူစံအိမ် (အပိုင်း ၁)

~စုယွီ၏ လေးနက်သော မျက်နှာ အမူအရာကြောင့် စုချီမှာ ထွက်ခွာမည့် အစီအစဉ်ကို ဖျက်သိမ်းလိုက်ပြီး စပ်စုချင်လာသည်။ သူမသည် တိတ်တဆိတ် လှမ်းလာပြီး စုယွီ၏ လက်ထဲရှိ စာကို ချောင်းကြည့်လိုက်မိသည်။

'ဟောင်ထျန်း ဆေးလုံး' အကြောင်း ဖတ်လိုက်ရသောအခါ စုချီ မနေနိုင်တော့ဘဲ အာမေဋိတ်သံ ထွက်သွား၏။

"တကယ်ကြီးလား... အဲဒီလို ပစ္စည်းမျိုး ပါလာတယ် ဟုတ်လား"

စုပင်းနှင့် စုယွီတို့၏ ကြိုးစားအားထုတ်မှုကြောင့် မိသားစု ချမ်းသာကြွယ်ဝလာပြီးနောက် စုမိသားစု မျိုးဆက်သစ်များသည် ယခင်ကကဲ့သို့ ဗဟုသုတ နည်းပါးခြင်း မရှိတော့ဘဲ သတင်းအချက်အလက်များကို နှံ့စပ်နေကြပြီ ဖြစ်၏။

စုချီသည် 'ဟောင်ထျန်း ဆေးလုံး' အကြောင်း ကောင်းကောင်း ကြားဖူးထားလေသည်။

၎င်းသည် အခြေခံ တည်ဆောက်ခြင်း (အဆင့် ၉) တွင် ရပ်တန့်နေသော စွမ်းအားရှင် တစ်ဦးကို တုပ အမြုတေ အဆင့် သို့ အောင်မြင်စွာ ထိုးဖောက် ဝင်ရောက်နိုင်စေမည့် ရတနာတစ်ပါး ဖြစ်၏။

ယွီမိသားစု၊ ကျန်းမိသားစု၊ ဟွမ်မိသားစုနှင့် ယွင်ကျန်းဂိုဏ်းကဲ့သို့သော အင်အားကြီး အဖွဲ့အစည်းများပင်လျှင် ဤဆေးလုံးကို ရရှိရန် အသည်းအသန် လိုချင်နေကြ၏။

လွန်ခဲ့သော အချိန်က 'ဟောင်ထျန်း ဆေးလုံး' ဖော်စပ်ရာတွင် အဓိက ကျသော ခုန်းလင်အသီး (လေဟာနယ် ဝိညာဉ်သစ်သီး) လေလံပွဲတွင် ပါဝင်လာစဉ်က အမြုတေ ဖွဲ့စည်းခြင်း အဆင့် ကျင့်ကြံသူများသည် အသက်ပေးပြီး လုယူခဲ့ကြ၏။ ယခု အစစ်အမှန် 'ဟောင်ထျန်း ဆေးလုံး' ပါဝင်လာပြီ ဆိုလျှင် မည်မျှ အပြိုင်အဆိုင် ဖြစ်ကြမည်နည်း။

စုယွီ မျက်မှောင် အနည်းငယ် ကြုတ်လိုက်ပြီး တွေးတောလိုက်၏။

'ဟောင်ထျန်း ဆေးလုံး ဘယ်လိုလုပ်ပြီး ပါဝင်လာတာလဲ'

စုချီသည် စာမှ အကြည့်ခွာလိုက်ပြီး စုယွီကို ကြည့်လိုက်၏။ သူ့မျက်နှာ အမူအရာ ရှုပ်ထွေးနေသည်ကို မြင်သောအခါ သူမ မေးလိုက်မိသည်။

"ဦးလေးယွီ... ဘာဖြစ်လို့လဲဟင်"

စုယွီ ခေတ္တမျှ စဉ်းစားပြီးနောက် ပြန်ဖြေလိုက်၏။

"ဟောင်ထျန်း ဆေးလုံး ပေါ်လာတာက ပုံမှန် မဟုတ်ဘူး"

"သာမန် အခြေအနေမှာ ဆိုရင် တာ့ယွဲ့ နန်းတော် အတွက်တောင်မှ ဟောင်ထျန်း ဆေးလုံး ဆိုတာ အဖိုးတန် ရတနာ တစ်ပါး ဖြစ်နေမှာပဲ... လေလံတင်ဖို့ မဖြစ်နိုင်ဘူး"

"ဒါဆိုရင် ဒီ ဟောင်ထျန်း ဆေးလုံးက ဘယ်က ရောက်လာတာလဲ"

ဤအချက်ကို စုယွီ နားမလည်နိုင်သလို၊ စုချီ ဆိုလျှင် ပို၍ပင် နားမလည်နိုင်ပေ။

သို့သော် 'ဟောင်ထျန်း ဆေးလုံး' ပါဝင်လာခြင်း တစ်ခုတည်းကပင် စုယွီကို တာ့ယွဲ့ မှောင်ခိုဈေး သို့ သွားရောက်ရန် ဆွဲဆောင်နိုင်လောက်ပေသည်။ (၈) နှစ်မှ တစ်ကြိမ်သာ ကျင်းပသော တာ့ယွဲ့ မှောင်ခိုဈေး လေလံပွဲသည် လက်လွတ်မခံသင့်သော အခွင့်အရေး တစ်ခု ဖြစ်၏။ ထိုနေရာတွင် သူ လိုအပ်သော အခြား ပစ္စည်းများစွာကိုလည်း ရရှိနိုင်ကောင်း ရရှိနိုင်ပေလိမ့်မည်။

အထူးသဖြင့် (ဒုတိယအဆင့်) ထိပ်တန်း ရုပ်သေး သားရဲ 'လက်ရှစ်ဖက် ဓားတောင်ပံ ပုစဉ်းရင်ကွဲ' ဖန်တီးရန် လိုအပ်သော ကုန်ကြမ်း ပစ္စည်းများကို ရရှိရန် မျှော်လင့်နေသည်။

ထို့အပြင် စုယွီသည် 'ဟောင်ထျန်း ဆေးလုံး' အတွက် အရန် ဆေးဖက်ဝင် ပစ္စည်း အချို့ကိုလည်း လေလံဆွဲရန် ရည်ရွယ်ထားသည်။

သူ့အတွက် 'ဟောင်ထျန်း ဆေးလုံး' မလိုအပ်သော်လည်း၊ သူ့မိသားစုဝင်များ သို့မဟုတ် သူ့ပတ်ဝန်းကျင်ရှိ လူများ လိုအပ်ကောင်း လိုအပ်လာနိုင်သည်။

အရေးကြီးဆုံး အချက်မှာ သူသည် 'ပျက်ပြယ် ခုန်းလင်အသီး ကို ပိုင်ဆိုင်ထားပြီး ဖြစ်၏။ အရန် ပစ္စည်းများကို စုဆောင်းနိုင်ရုံဖြင့် ဆေးဖော်စပ်ရန် ကုန်ကြမ်း ပစ္စည်း အစုံအလင် ရရှိနိုင်မည် ဖြစ်၏။

ဒါက သိပ်ပြီး ခက်ခဲတဲ့ ကိစ္စ မဟုတ်ပါဘူး။

သို့သော် 'ဟောင်ထျန်း ဆေးလုံး' သည် ဒုတိယအဆင့်နှင့် တတိယအဆင့် ကြားတွင် ရှိသော အထူး ဆေးလုံး တစ်မျိုး ဖြစ်၏။

'ဟောင်ထျန်း ဆေးလုံး' ဖော်စပ်ခြင်းသည် လွယ်ကူမည် မဟုတ်ပေ။

"ဒီလိုဆိုရင် အခုကတည်းက စပြီး ပြင်ဆင်မှ ဖြစ်မယ်... မဟုတ်ရင် ငါ့ဆီမှာ ရှိတဲ့ ဝိညာဉ်ကျောက်တုံးတွေနဲ့ လောက်မှာ မဟုတ်ဘူး"

စုယွီ စိတ်ထဲမှ တွေးတောလိုက်၏။

'ရှစ်ခုမြောက် မိစ္ဆာ တောင်တန်း' ဈေးကွက်တွင် အမြတ်အစွန်း ကြီးကြီးမားမား ရရှိခဲ့ပြီးနောက်ပိုင်း သူသည် အရင်းအမြစ် စုဆောင်းခြင်းကို အာရုံမစိုက်တော့ဘဲ ကျင့်ကြံခြင်းကိုသာ အာရုံစိုက်ခဲ့သည်။

ယခု (၈) နှစ် ကြာပြီးနောက် သူ့တွင် ဝိညာဉ်ကျောက်တုံး သိပ်မကျန်တော့ပေ။ အဆင့်နိမ့် ဝိညာဉ်ကျောက်တုံး (၁၀,၀၀၀) အောက်သာ ရှိတော့သည်။

ဤပမာဏသည် လေလံပွဲတွင် သူ လိုချင်သော ပစ္စည်းများကို လေလံဆွဲရန် လုံလောက်မည် မဟုတ်ပေ။

"လေလံပွဲ စဖို့ နှစ်ဝက်လောက် လိုသေးတယ်... ပြင်ဆင်ဖို့ အချိန်လောက်ပါတယ်"

စုယွီသည် စာနှင့် စုချီ ယူလာပေးသော 'နတ်ဘုရားမဲ့ ပန်း' ပါဝင်သော ကုန်ကြမ်း ပစ္စည်း စာရင်းကို သိမ်းဆည်းလိုက်၏။ ယခုအခါ သူ့တွင် 'အမှောင်နတ်ဘုရား ဆေးလုံး' ဖော်စပ်ရန် ကုန်ကြမ်း ပစ္စည်း (၂) စုံ ရရှိထားပြီ ဖြစ်သဖြင့် လေလံပွဲ ပြီးနောက် ဆေးတစ်သုတ် ဖော်စပ်ရန် စီစဉ်လိုက်၏။ ထိုဆေးများကို အသုံးပြုပြီး မိသားစု ခေါင်းဆောင်နှင့် အကြီးအကဲ စုဟယ် တို့ကို အခြေခံ တည်ဆောက်ခြင်း အဆင့်သို့ နောက်တစ်ကြိမ် ကြိုးစား တက်လှမ်းစေမည် ဖြစ်၏။

အကြီးအကဲ စုကျန်းနှင့် စုတာ့ကျွင်း တို့လည်း ရှိသေးသည်။ အသက် (၇၀) သာ ရှိသေးသော စုကျန်းသည် အခြေခံ တည်ဆောက်ခြင်း အဆင့်ကို ကိုယ်တိုင် ကြိုးစား တက်လှမ်းနိုင်သည်။

အသက်ကြီးနေပြီ ဖြစ်သော စုတာ့ကျွင်း အတွက်မူ 'အမှောင်နတ်ဘုရား ဆေးလုံး' ကို သောက်သုံးပြီး ကြိုးစားကြည့်စေရမည်။

အကယ်၍ အောင်မြင်ခဲ့ပါက စုမိသားစု၏ အင်အားသည် နောက်ထပ် တစ်ဆင့် တိုးတက်လာပေလိမ့်မည်။

ပြောစရာ မလိုတော့ပေ။ စုယွီသည် စုချီကို ခေါ်ပြီး နန်းတော်ထဲမှ ထွက်ခွာလာခဲ့သည်။ သူတို့သည် ယွီခယ်အာ၊ ယွီချန်ချင်း တို့နှင့်အတူ အနားယူရန် သွားရောက်ခဲ့ပြီး၊ ဟူတာနှင့် ဟူအာတို့ကိုလည်း 'တိမ်တိုက်ကျား' များထံ ပြန်လည် ပို့ဆောင်ပေးခဲ့သည်။ ယခုအခါ တိမ်တိုက်ကျားများသည် စုမိသားစု၏ အကျော်ကြားဆုံး ယဉ်ပါးသော သားရဲများ ဖြစ်လာခဲ့ပြီ။

လွန်ခဲ့သော တစ်နှစ်က တိမ်တိုက်ကျား မိခင်သည် (ဒုတိယအဆင့်) ထိပ်တန်း မိစ္ဆာသားရဲ အဆင့်သို့ တက်လှမ်းနိုင်ခဲ့သည်။

တိမ်တိုက်ကျား မိခင်သည် ဆေးလုံးတောင် အနီးတဝိုက်တွင် မကြာခဏ လှည့်လည်သွားလာလေ့ ရှိသည်။ ၎င်း၏ ကြမ်းတမ်းပြီး ပြိုင်ဘက်ကင်းသော ပုံရိပ်သည် အနီးနားရှိ ကျင့်ကြံသူများ၊ ဆေးလုံးတောင်သို့ ဆေးတောင်းခံရန် ရောက်လာကြသော တစ်သီးပုဂ္ဂလ ကျင့်ကြံသူများနှင့် မိသားစု ကျင့်ကြံသူများကို ကြောက်ရွံ့ ရိုသေစေခဲ့သည်။

တိမ်တိုက်ကျား ရှိနေခြင်းကြောင့် ဆေးလုံးတောင်သို့ ဆေးလာတောင်းသူများ၏ ဆက်ဆံရေးသည် ပိုမို လေးစားမှု ရှိလာကြ၏။ မည်သူမျှ ဆေးလုံးတောင်တွင် ပြဿနာ မရှာရဲကြပေ။

ရက်အနည်းငယ် ကြာပြီးနောက်၊

စုယွီသည် လျှို့ဝှက်ခန်းမဆောင် အတွင်းသို့ ဝင်ရောက်ပြီး တရားထိုင်ရန် ပြင်ဆင်လိုက်၏။ ကျောက်စိမ်း စင်မြင့် ရှေ့သို့ ရောက်သောအခါ သူ၏ နတ်ဘုရား အာရုံကို ချန်ခွန်းအိတ်ထဲသို့ ပို့လွှတ်ပြီး စုဆောင်းထားသော (ဒုတိယအဆင့်) အဆောင်လက်ဖွဲ့ ကုန်ကြမ်း ပစ္စည်း အရေအတွက်ကို စစ်ဆေးလိုက်၏။ မနည်းလှပေ။

သူနှင့် စုမိသားစု အပြင်၊ ယွီခယ်အာ၊ ယွီချန်ချင်းနှင့် အခြားသူများကပါ သူ့ကိုယ်စား စုဆောင်းပေးထားကြ၏။

ယခုအခါ သူ့ချန်ခွန်းအိတ်ထဲတွင် (ဒုတိယအဆင့်) အဆင့်နိမ့် အဆောင်လက်ဖွဲ့ ကုန်ကြမ်း ပစ္စည်း အစုံ (၂၀၀) နီးပါးနှင့် (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ကုန်ကြမ်း ပစ္စည်း အစုံ (၁၃၇) စုံ ရှိနေပြီ ဖြစ်၏။

"ဒီပစ္စည်းတွေနဲ့ အဆောင်လက်ဖွဲ့ ဘယ်နှခုလောက် ရေးဆွဲနိုင်မလဲ ကြည့်ကြတာပေါ့"

စုယွီ အသက်ပြင်းပြင်း ရှူရှိုက်လိုက်ပြီး စိတ်ကို ငြိမ်သက်အောင် ထားလိုက်၏။

ထို့နောက် (ဒုတိယအဆင့်) ထိပ်တန်း အဆောင်လက်ဖွဲ့ရေး စုတ်တံနှင့် ကုန်ကြမ်း ပစ္စည်း အားလုံးကို ထုတ်ယူပြီး အဆောင်လက်ဖွဲ့များ စတင် ရေးဆွဲလိုက်တော့သည်။

(ဒုတိယအဆင့်) အဆင့်နိမ့် အဆောင်လက်ဖွဲ့များ ရေးဆွဲခြင်းသည် စုယွီအတွက် မခက်ခဲတော့ပေ။

သူသည် တစ်ဆက်တည်း ရေးဆွဲနိုင်ပြီး၊ သူ့ခန္ဓာကိုယ် အတွင်းရှိ မှော်စွမ်းအင်များ အလွန် ကြွယ်ဝနေသဖြင့် အဆောင်လက်ဖွဲ့များကို ဆက်တိုက် ရေးဆွဲနိုင်လေသည်။

တစ်ညတည်းဖြင့် စုယွီသည် (ဒုတိယအဆင့်) အဆင့်နိမ့် အဆောင်လက်ဖွဲ့ (၅) ခု ရေးဆွဲနိုင်ခဲ့သည်။

ထို့နောက် သူသည် တင်ပျဉ်ခွေ ထိုင်ပြီး နေ့စဉ် ကျင့်ကြံခြင်းကို စတင်ကာ ကုန်ခန်းသွားသော စွမ်းအင်နှင့် မှော်စွမ်းအင်များကို ပြန်လည် ဖြည့်တင်းလိုက်၏။

စွမ်းအင်နှင့် မှော်စွမ်းအင်များ ပြည့်ဝသွားသည်နှင့် စုယွီသည် ကျောက်စိမ်း စင်မြင့် ရှေ့တွင် မတ်တပ်ရပ်ပြီး အဆောင်လက်ဖွဲ့များ ဆက်လက် ရေးဆွဲပြန်သည်။

(ဒုတိယအဆင့်) အဆင့်နိမ့် အဆောင်လက်ဖွဲ့ (၁၀၀) ကျော် ရေးဆွဲပြီးနောက် သူ့လက်ထဲရှိ (ဒုတိယအဆင့်) ထိပ်တန်း စုတ်တံသည် မှော်စွမ်းအင် စီးဆင်းမှုကို ခံနိုင်ရည် မရှိတော့ဘဲ အက်ကွဲသွားတော့သည်။

ကံကောင်းထောက်မစွာပင် စုယွီတွင် အရန် စုတ်တံ အများအပြား ရှိနေသေးသည်။ သူသည် ပျက်စီးသွားသော ပစ္စည်းကို လွှင့်ပစ်လိုက်ပြီး စုတ်တံ အသစ် လဲလှယ်ကာ အလုပ်ကို မရပ်မနား ဆက်လက် လုပ်ဆောင်လိုက်၏။

အပြင်ဘက်ဝယ်၊

ထူးခြားသော ဧည့်သည် နှစ်ဦး ဆေးလုံးတောင်သို့ ရောက်ရှိလာကြ၏။ ယွီချန်ချင်းသည် သူတို့ကို မြင်လိုက်ရသောအခါ အနည်းငယ် အံ့အားသင့်သွားပြီး မေးလိုက်၏။

"တာအို မိတ်ဆွေ လန်ရှီ ... တာအို မိတ်ဆွေ လန်ကုန်း... ဘာကိစ္စနဲ့ ဆေးလုံးတောင်ကို ရောက်လာကြတာလဲရှင့်"

ယွီချန်ချင်းသည် လန်ရှီနှင့် လန်ကုန်းတို့ကို တာအို မိတ်ဆွေများ အဖြစ် ရင်းနှီးဖော်ရွေစွာ ဆက်ဆံလိုက်လေသည်။

အခန်း (၁၄၃) - ရှေးဟောင်း မြေပုံနှင့် နေလမင်း ကျွန်း ဂူစံအိမ် (အပိုင်း ၂)

~သို့သော် ချီစွမ်းအင် စုစည်းခြင်း (အဆင့် ၉) တွင်သာ ရှိသေးသော လန်ရှီနှင့် လန်ကုန်းတို့သည် ယွီချန်ချင်း၏ ရှေ့တွင် မာနထောင်လွှားရဲခြင်း မရှိကြပေ။

လန်ရှီနှင့် လန်ကုန်းတို့သည် အလျင်အမြန် ရှေ့တိုးလာပြီး စိုးရိမ်ပူပန်သော အမူအရာဖြင့် နှုတ်ဆက်လိုက်ကြ၏။

"လန်ရှီနဲ့ လန်ကုန်းတို့က အကြီးအကဲ ယွီကို ဂါရဝပြုပါတယ်"

ယွီချန်ချင်းသည် သူတို့နှစ်ဦးကို အောက်ဘက်ရှိ မိသားစု ဧရိယာ တစ်ခုသို့ ခေါ်ဆောင်သွားပြီး ယွီခယ်အာကိုပါ လှမ်းခေါ်လိုက်ကာ နန်းတော်၏ ဘေးခန်းမဆောင် တစ်ခုတွင် ဧည့်ခံလိုက်လေသည်။

လန်ရှီနှင့် လန်ကုန်းတို့သည် ချီစွမ်းအင် စုစည်းခြင်း (အဆင့် ၉) ကျင့်ကြံသူများသာ ဖြစ်ကြသော်လည်း၊ နှစ်ပေါင်းများစွာ အိမ်နီးချင်းများ ဖြစ်ခဲ့ကြသဖြင့် ယွီချန်ချင်းနှင့် ယွီခယ်အာတို့ နှစ်ဦးစလုံးသည် သူတို့ကို အထင်သေးခြင်း မရှိဘဲ ပုံမှန် ဧည့်သည်များကဲ့သို့ပင် ဆက်ဆံကြလေသည်။

လက်ဖက်ရည် တည်ခင်းပြီးနောက် ယွီခယ်အာသည် လိမ်လိမ္မာမာ အမူအရာဖြင့် လန်ရှီနှင့် လန်ကုန်း ညီအစ်မ နှစ်ဦးကို ထိုင်ခိုင်းလိုက်၏။

ယွီခယ်အာက သူတို့နှစ်ဦးကို စိတ်ဝင်တစား ကြည့်လိုက်ပြီး မေးလိုက်၏။

"ညီမလေးတို့ နှစ်ယောက် ဘာကိစ္စနဲ့ ဆေးလုံးတောင်ကို ရောက်လာကြတာလဲ"

လန်ရှီက ယွီခယ်အာကို ကြည့်ပြီး နှုတ်ခမ်း အနည်းငယ် ဟကာ ပြောလိုက်၏။

"ကျွန်မတို့က အကြီးအကဲ စုယွီဆီမှာ သစ္စာခံဖို့ ရောက်လာကြတာပါ... စုမိသားစုက လက်ခံမယ် ဆိုရင်တော့ မိသားစုကို သစ္စာခံရလည်း ကိစ္စ မရှိပါဘူး"

ယွီခယ်အာ အံ့သြသွား၏။

"ညီမလေးတို့ နှစ်ယောက် ပိုင်ယွဲ့ အင်မော်တယ် မြို့တော်မှာ အဆင်ပြေနေကြတာ မဟုတ်ဘူးလား... ဘာဖြစ်လို့..."

လန်ရှီနှင့် လန်ကုန်းတို့ လေသံတိုးတိုးဖြင့် ပြောလိုက်ကြ၏။

"မကြာသေးခင်က ပိုင်ယွဲ့ အင်မော်တယ် မြို့တော်မှာ အခြေအနေတွေ ရှုပ်ထွေးနေတယ်... ဝိညာဉ် ခန်းမ က အကြီးအကဲ ထျန်းဖူက ရွှေကျောက်စိမ်း နတ်ဘုရား ဂိတ်တံခါး အပျက်အစီး နယ်မြေကနေ ပြန်ရောက်လာပြီး ခန်းမဆောင်သခင်နဲ့ အကြီးအကျယ် ထိပ်တိုက် တွေ့နေကြတယ်... ဝိညာဉ် ခန်းမနဲ့ အမှန်တရားခန်းမက လူတွေ အများကြီး တိုက်ခိုက်နေကြတယ်"

"အဲဒါကြောင့် မူးယစ် နတ်ဘုရား မျှော်စင် မှာ စီးပွားရေး သိပ်မကောင်းတော့ဘူး... ကျွန်မတို့လည်း သွားစရာ နေရာ မရှိတော့ဘူး"

"ဒါကြောင့် အကြီးအကဲ စုယွီက ကျွန်မတို့ကို လက်ခံမလား ဆိုတာ သိချင်လို့ ဆေးလုံးတောင်ကို ရောက်လာခဲ့တာပါ"

ထိုသို့ ပြောပြီးနောက် လန်ရှီက ဆက်ပြောသည်။

"ကျွန်မတို့က ဂီတပညာရှင် တွေ အဖြစ် လုပ်ကိုင်ကြပေမဲ့ (ပထမအဆင့်) ထိပ်တန်း ဂီတပညာရှင်တွေရဲ့ အခန်းကဏ္ဍကို လျှော့တွက်လို့ မရပါဘူး... လူအများစုက ဒါကို သတိမထားမိကြပါဘူးနော်"

ဂီတပညာရှင်များတွင် ကျယ်ပြန့်သော စွမ်းရည်များ ရှိကြ၏။ တချို့က တိုက်ပွဲဝင်ရာတွင် ကျွမ်းကျင်ပြီး ဂီတသံစဉ် တစ်ခုတည်းဖြင့် ရန်သူထောင်ပေါင်းများစွာကို သတ်ဖြတ်နိုင်စွမ်း ရှိကြ၏။ တချို့ကမူ အထောက်အကူ ပြုရာတွင် ကျွမ်းကျင်ပြီး စိတ်ကို သန့်စင်ပေးခြင်း၊ မိစ္ဆာ ချီစွမ်းအင်များကို ဖယ်ရှားပေးခြင်း၊ အတွင်းစိတ် မိစ္ဆာများကို မောင်းထုတ်ပေးခြင်းနှင့် စိတ်ဓာတ်ခွန်အား မြှင့်တင်ပေးခြင်း စသည်တို့ကို ပြုလုပ်ပေးနိုင်ကြ၏။

ကျင့်ကြံခြင်း လောကတွင် လူအများအပြားသည် ဤ ဂီတဖျော်ဖြေမှုများကို နားထောင်လေ့ ရှိကြ၏။

မူးယစ် နတ်မိမယ် မျှော်စင်ကဲ့သို့သော နေရာများတွင် ဂီတတီးခတ်ခြင်းသည် အမျိုးသမီး ဖျော်ဖြေသူများ အတွက် သက်သက် မဟုတ်ဘဲ ဂီတပညာရှင်များ၏ စွမ်းရည်ကိုပါ ပြသခြင်း ဖြစ်လေသည်။

ယွီခယ်အာသည် ဂီတပညာရှင်များ အကြောင်း အနည်းငယ် နားလည်သော်လည်း နက်နက်ရှိုင်းရှိုင်း မသိရှိပေ။

သို့သော် ဤနေရာသည် စုမိသားစု ဖြစ်၏။ သူမသည် စုယွီ၏ နောက်လိုက် ဖြစ်သော်လည်း စည်းကျော်ပြီး လန်ရှီနှင့် လန်ကုန်းတို့ကို စုမိသားစုက လက်ခံရန် ဆုံးဖြတ်ချက် ချပေးပိုင်ခွင့် မရှိပေ။

ထို့ကြောင့် စဉ်းစားပြီးနောက် ယွီခယ်အာသည် လန်ရှီနှင့် လန်ကုန်းတို့ကို စုမိသားစု ခေါင်းဆောင် စုဖုန်းနှင့် မိတ်ဆက်ပေးလိုက်၏။

လန်ရှီနှင့် လန်ကုန်းတို့ကို တွေ့လိုက်ရသောအခါ စုဖုန်းသည် ချက်ချင်း လက်ခုပ်တီးပြီး သူတို့ကို လက်ခံရန် ဆုံးဖြတ်လိုက်ကာ ယွီခယ်အာ၏ စောင့်ရှောက်မှုအောက်တွင် ထားရှိလိုက်

တော့သည်။

သူမတို့သည် စုမိသားစု ဘိုးဘေး (၃) ဦး၏ နေ့စဉ် လိုအပ်ချက်များကို ဖြည့်ဆည်းပေးရာတွင် အသုံးဝင်ပေလိမ့်မည်။

ချီစွမ်းအင် စုစည်းခြင်း (အဆင့် ၉) ကျင့်ကြံသူ နှစ်ဦးကို လစဉ်ကြေး ပေးရခြင်းသည် လက်ရှိ စုမိသားစုအတွက် ဘာမှ မဟုတ်ပေ။

....

စုယွီသည် (၆) လတိတိ တံခါးပိတ် ကျင့်ကြံရန် ရည်ရွယ်ထားသော်လည်း (၅) လ အကြာတွင် လျှို့ဝှက်ခန်းမဆောင်မှ ပြန်ထွက်လာခဲ့ပါသည်။

အခင်းအကျင်းများနှင့် နန်းတော်များကို ဖြတ်သန်းပြီး သူ့ခန္ဓာကိုယ်ပေါ်သို့ ကျရောက်လာသော နွေးထွေးသည့် နေရောင်ခြည်ကို ခံစားလိုက်ရသောအခါ စုယွီ အသက်ကို ဖြည်းညှင်းစွာ ရှူထုတ်လိုက်ပြီး ထိုနွေးထွေးမှုကို အရသာခံလိုက်၏။ အလွန် သက်သောင့်သက်သာ ရှိလှသည်။

နာကျင်ကိုက်ခဲနေသော လက်ကောက်ဝတ်များကို နှိပ်နယ်လိုက်ပြီးနောက် စုယွီသည် သူ့၏ နတ်ဘုရား အာရုံကို ချန်ခွန်းအိတ်ထဲသို့ ပို့လွှတ်လိုက်၏။ ထူထဲသော အဆောင်လက်ဖွဲ့ အလွှာလိုက်ကြီးများကို မြင်လိုက်ရသောအခါ ကျေနပ်အားရသွားပြီး တကိုယ်တည်း ရေရွတ်လိုက်၏။

"(ဒုတိယအဆင့်) အဆင့်နိမ့် အဆောင်လက်ဖွဲ့ (၁၉၁) ခု နဲ့ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ (၈၇) ခု ရှိတယ်"

အကယ်၍ ပြင်ပလူများသာ ဤအရေအတွက်ကို သိရှိသွားပါက တုန်လှုပ်သွားကြပေလိမ့်မည်။

ဒါက စုယွီ လက်ရှိ ပိုင်ဆိုင်ထားပြီးသော စတော့များကို ထည့်သွင်း တွက်ချက်ထားခြင်း မရှိသေးပေ။

ကျန်းမိသားစုနှင့် ဟွမ်မိသားစုတို့ ပူးပေါင်းလိုက်လျှင်တောင်မှ ဤ အဆောင်လက်ဖွဲ့များ၏ တိုက်ခိုက်မှုကို ရှောင်တိမ်းပြီး ကြောက်လန့်တကြား ဆုတ်ခွာသွားကြရပေလိမ့်မည်။

ဘာပဲဖြစ်ဖြစ် ကျင့်ကြံသူ ဘယ်နှယောက်ကများ ဒီလို တရစပ် တိုက်ခိုက်မှုကို ခံနိုင်ရည် ရှိပါမည်နည်း။

မိသားစု နှစ်ခု၏ အခင်းအကျင်းများနှင့် ရုပ်သေး သားရဲများ ဆိုသည်မှာ...

အရာရာတိုင်းတွင် ၎င်းတို့၏ အသုံးဝင်ပုံနှင့် လျှို့ဝှက်ချက်များ ကိုယ်စီ ရှိကြစမြဲပင်။

သူတို့သည် အပြန်အလှန် ပျက်စီးခြင်း သို့မဟုတ် လုံးဝ ပျက်စီးခြင်း အဆုံးသတ်မျိုးကို စွန့်စားရဲကြမည် မဟုတ်ပေ။

သို့တိုင်၊...

စုယွီသည် ဤ အဆောင်လက်ဖွဲ့ အားလုံးကို သိမ်းဆည်းထားရန် အစီအစဉ် မရှိပေ။ ထက်ဝက်ခန့်ကို တာ့ယွဲ့ မှောင်ခိုဈေး လေလံပွဲတွင် ရောင်းချရန် စီစဉ်ထားသည်။ (ဒုတိယအဆင့်) အဆင့်နိမ့် အဆောင်လက်ဖွဲ့ (၁၀၀) နှင့် (ဒုတိယအဆင့်) အလယ်အလတ်တန်းစား အဆောင်လက်ဖွဲ့ (၅၀) ခန့် ဖြစ်၏။

၎င်းတို့ကို အလယ်အလတ်စား ဝိညာဉ်ကျောက်တုံးများ အဖြစ် ပြောင်းလဲလိုက်ပါက အင်အားစု အချို့ကို ဆွဲဆောင်နိုင်ကောင်း ဆွဲဆောင်နိုင်ပေလိမ့်မည်။

အဆောင်လက်ဖွဲ့ အားလုံးကို လေလံတင်လိုက်လျှင်ကော။ အရေအတွက် များလွန်းအားကြီးပြီး ဈေးကွက်ကို လွှမ်းမိုးသွားပါက ဈေးနှုန်း ကျဆင်းသွားနိုင်သည်။

ထက်ဝက်ခန့် ဆိုလျှင် ပိုမို သင့်တော်ပေလိမ့်မည်။

"အလယ်အလတ်စား ဝိညာဉ်ကျောက်တုံး (၆၀၀) ကနေ (၇၀၀) လောက်တော့ ရလောက်တယ်"

စုယွီ တွက်ချက်ကြည့်လိုက်၏။

"ဒီငွေပမာဏနဲ့ ဆိုရင် လေလံပွဲမှာ ငါ့အတွက် အခြေခံ ကောင်းကောင်း ရနိုင်ပြီ"

'ဟောင်ထျန်း ဆေးလုံး' ၏ အရန် ပစ္စည်းများသည် ဈေးမပေါလှပေ။

သူ့၏ တာအို ကိုယ်ပွား ရုပ်သေးသည် (ဒုတိယအဆင့်) ထိပ်တန်း ရုပ်သေး သားရဲ အဆင့်သို့ ရောက်ရှိနေပြီး အခြေခံ တည်ဆောက်ခြင်း (အဆင့် ၇) နှင့် ညီမျှသော စွမ်းအား ရှိနေပြီ ဖြစ်၏။ ၎င်းကို ဆက်လက် မြှင့်တင်ရန်အတွက် (ဒုတိယအဆင့်) ထိပ်တန်း ကုန်ကြမ်း ပစ္စည်းများကို ဆက်လက် စုဆောင်းရန် လိုအပ်နေသည်။

ထို့အပြင် (ဒုတိယအဆင့်) ထိပ်တန်း ရုပ်သေး သားရဲ 'လက်ရှစ်ဖက် ဓားတောင်ပံ ပုစဉ်းရင်ကွဲ' အတွက် ကုန်ကြမ်း ပစ္စည်းများကလည်း ငွေကြေး ကုန်ကျမှု များပြားလှသည်။

နောက်ပိုင်းတွင် သူသည် ရေဓာတ်နှင့် သတ္တုဓာတ် ကျင့်စဉ်များကို ဆက်လက် ကျင့်ကြံရဦးမည် ဖြစ်၏။

အကယ်၍ သူသာ ဓာတ်ကြီးငါးပါး ဝိညာဉ်အမြစ်များကို တပြိုင်နက်တည်း ကျင့်ကြံမည် ဆိုပါက နေ့စဉ် ကျင့်ကြံမှုအတွက် လိုအပ်သော အရင်းအမြစ် ပမာဏသည် မိုးထိအောင် မြင့်မားနေပေလိမ့်မည်။

ဤအတွေးသည် သူ့ကို ခြောက်လှန့်နေဆဲပင်။

ထိုသို့ဆိုလျှင် အလယ်အလတ်စား ဝိညာဉ်ကျောက်တုံး (၆၀၀) မှ (၇၀၀) ခန့်သည် လုံလောက်ချင်မှ လုံလောက်ပေလိမ့်မည်။

စဉ်းစားကြည့်လိုက်သောအခါ သူ့တွင် (ဒုတိယအဆင့်) အလယ်အလတ်တန်းစား 'အတောင်ပံနှစ်ဖက် မိုးကြိုးမြွေ' တစ်ကောင် ရှိနေသေးသည်။ လက်ရှိအချိန်တွင် ၎င်းသည် သိပ်ပြီး အသုံးမဝင်တော့ပေ။

ဒီအကောင်ကို လေလံတင်လိုက်ရင် အလယ်အလတ်စား ဝိညာဉ်ကျောက်တုံး ရာဂဏန်းလောက်တော့ ရနိုင်လောက်တယ် မဟုတ်လား။

'အတောင်ပံနှစ်ဖက် မိုးကြိုးမြွေ' ၏ ကုန်ကြမ်း တန်ဖိုးသည် အဆင့်နိမ့် ဝိညာဉ်ကျောက်တုံး (၁၀,၀၀၀) ကျော် ရှိသည်။

အကယ်၍ အလယ်အလတ်စား ဝိညာဉ်ကျောက်တုံး (၅၀၀) ခန့်ဖြင့် လေလံတင်နိုင်လျှင် ရှုံးမည် မဟုတ်ပေ။

"ထားလိုက်ပါတော့... (ဒုတိယအဆင့်) အလယ်အလတ်တန်းစား ရုပ်သေး သားရဲ အတွက် ကုန်ကြမ်း ပစ္စည်းတွေ စုဆောင်းရတာ မလွယ်ဘူး... မိသားစုဆီက (ဒုတိယအဆင့်) အဆင့်နိမ့် ရုပ်သေး သားရဲ နှစ်ကောင် ယူပြီး ဒီ 'အတောင်ပံနှစ်ဖက် မိုးကြိုးမြွေ' ရုပ်သေး သားရဲ နေရာမှာ အစားထိုးလိုက်တာ ပိုကောင်းမယ်"

အချိန်ကြာမြင့်စွာ စဉ်းစားပြီးနောက် စုယွီ ခေါင်းခါလိုက်ပြီး သက်ပြင်းချလိုက်၏။

"(ဒုတိယအဆင့်) အဆင့်နိမ့် ရုပ်သေး သားရဲ နှစ်ကောင်ကိုတော့ လေလံပွဲမှာ ရောင်းချဖို့ အခွင့်အရေး ရှာကြည့်ရမယ်”

အခန်း (၁၄၄) - ရှေးဟောင်း မြေပုံနှင့် နေလမင်း ကျွန်း ဂူစံအိမ် (အပိုင်း ၃)

~ယွီခယ်အာနှင့်အတူ လန်ရှီ၊ လန်ကုန်း ညီအစ်မနှစ်ယောက် ပါလာသည်ကို တွေ့လိုက်ရသောအခါ စုယွီ အနည်းငယ် အံ့အားသင့်သွား၏။

သူတို့ ဘာကြောင့် ဒီနေရာကို ရောက်နေကြတာလဲ။

ခဏအကြာတွင် ပိုင်ယွဲ့ အင်မော်တယ် မြို့တော်၌ အပြောင်းအလဲတချို့ ဖြစ်ပေါ်နေကြောင်း လန်ရှီ၏ ပြောပြချက်အရ စုယွီ သိရှိလိုက်ရ၏။

နှစ်များ ကုန်လွန်လာသည်နှင့်အမျှ ရွှီဝမ်ရှန်း သည် အခြေခံ တည်ဆောက်ခြင်း (အဆင့် ၉) သို့ ရောက်ရှိနေပြီ ဖြစ်ပြီး ပိုမို မောက်မာလာခဲ့သည်။ အမှန်တရား ခန်းမ ၏ ဩဇာလွှမ်းမိုးမှုကို ပိုင်ယွဲ့ အင်မော်တယ် မြို့တော်၏ နေရာအနှံ့သို့ တိုးချဲ့လာခဲ့သည်။

ယခင်က ကျင့်ကြံသူ အများအပြား သည်းခံနိုင်ခဲ့ကြ၏။

သို့သော် မကြာသေးမီက ရွှေကျောက်စိမ်း နတ်ဘုရား ဂိတ်တံခါး အပျက်အစီး နယ်မြေမှ ပြန်ရောက်လာသော အကြီးအကဲ ထျန်းဖူ သည် ခန်းမဆောင် အစစ်အမှန်နှင့် ထိပ်တိုက် တွေ့ဆုံနေပြီ ဖြစ်၏။ တစ်ဖက်တွင် တာအိုသခင် စစ်မှန်သူ ပိုင်ယွဲ့ ၏ တပည့်ကြီး ဖြစ်သော တုပ အမြုတေ အဆင့် စွမ်းအားရှင် ထျန်းဖူ ရှိနေပြီး၊ အခြားတစ်ဖက်တွင် အခြေခံ တည်ဆောက်ခြင်း (အဆင့် ၉) ကျင့်ကြံသူ ဖြစ်သည့်အပြင် (ဒုတိယအဆင့်) ထိပ်တန်း ဆေးပညာရှင်နှင့် လက်နက် သွန်းလုပ်သူလည်း ဖြစ်သော ရွှီဝမ်ရှန်း ရှိနေသည်။ ရွှီဝမ်ရှန်းတွင် ပါရမီရှင် တပည့်တစ်စုလည်း ရှိနေသေးသည်။ အခြေအနေမှာ ပုံဖော်လာနေပြီ ဖြစ်၏။

ဤအခြေအနေကြောင့် ပိုင်ယွဲ့ အင်မော်တယ် မြို့တော် တစ်ခုလုံးတွင် တင်းမာသော လေထုများ လွှမ်းခြုံနေလေသည်။

အခြေအနေ မည်မျှ တင်းမာနေသနည်း ဆိုလျှင် လန်ရှီနှင့် လန်ကုန်း ညီအစ်မနှစ်ယောက် ပိုင်ယွဲ့ အင်မော်တယ် မြို့တော်တွင် မနေရဲတော့ဘဲ ထွက်ပြေးလာကြရသည် အထိပင်။

အကြီးအကဲ ထျန်းဖူသည် ခန်းမဆောင် အစစ်အမှန်ကို ထိန်းချုပ်လိုနေသည်။

သို့သော် တာအိုသခင် စစ်မှန်သူ ပိုင်ယွဲ့ ပေါ်ထွက်မလာသည်မှာ ကြာမြင့်နေပြီ ဖြစ်သဖြင့် အကြီးအကဲ ထျန်းဖူ စိုးရိမ်ပူပန်လာသည်။ ရှုပ်ထွေးနေသော အခြေအနေများကို ကိုင်တွယ်ဖြေရှင်းရန်အတွက် ပိုင်ယွဲ့ အင်မော်တယ် မြို့တော်သို့ အမြန် ပြန်လာခဲ့ရခြင်း ဖြစ်၏။

‘ဒါဆိုရင် အကြီးအကဲ ထျန်းဖူ ကိုယ်တိုင် အရေးယူဆောင်ရွက်ဖို့ ရွေးချယ်စရာ မရှိတော့ဘူး ဆိုတဲ့ သဘောပေါ့။’

ထိုအကြောင်းကို တွေးမိရင်း စုယွီ၏ ရင်ထဲတွင် လှုပ်ခတ်လာရသည်။

အကယ်၍ ပိုင်ယွဲ့ အင်မော်တယ် မြို့တော်ပင်လျှင် ဖရိုဖရဲ ဖြစ်သွားခဲ့ပါက ဆေးလုံးများ၊ အဆောင်လက်ဖွဲ့များ၊ အခင်းအကျင်းများနှင့် ရုပ်သေး သားရဲများကဲ့သို့သော ပစ္စည်းများသည် ရောင်းကောင်းလာဦးမည် မဟုတ်ပါလော။

"မှောင်ခိုဈေး ပွဲတော် ပြီးရင် စုမိသားစုအတွက် ဆေးလုံးတွေ၊ အဆောင်လက်ဖွဲ့တွေနဲ့ ရုပ်သေး သားရဲတွေ စုဆောင်းထားသင့်တယ် ထင်တယ်"

စုယွီ စဉ်းစားလိုက်ပြီး သူ့မျက်နှာပေါ်တွင် အပြုံးဖျော့ဖျော့လေး ပေါ်လာသည်။

‘ပထမဆုံး ပစ္စည်းတွေကို စုဆောင်းထားမယ်... ပြီးမှ ဈေးကောင်းလာတဲ့ အချိန်ကျမှ ထုတ်ရောင်းမယ်။’

ယခင်က ဖြစ်ပွားခဲ့သော ဖရိုဖရဲ အခြေအနေများမှ သူ အမြတ်အစွန်း ကောင်းကောင်း ရရှိခဲ့ဖူးသည်။

တစ်ကြိမ်က ချန်မိသားစုနှင့် ပိုင်မိသားစုတို့၏ ပဋိပက္ခ ဖြစ်ပြီး၊ နောက်တစ်ကြိမ်က 'ရှစ်ခုမြောက် မိစ္ဆာ တောင်တန်း' တွင် ဖြောင့်မတ်သော ဂိုဏ်းများနှင့် မိစ္ဆာ ဂိုဏ်းများအကြား ရန်ပွဲ ဖြစ်ပွားစဉ်က ဖြစ်၏။

တာအိုသခင် စစ်မှန်သူ ပိုင်ယွဲ့ ရဲ့ တပည့်နှစ်ယောက် ဘယ်တော့လောက် စတင် တိုက်ခိုက်ကြမလဲ ဆိုတာ သိချင်စမ်းပါဘိ။

စုယွီသည် ပိုင်ယွဲ့ အင်မော်တယ် မြို့တော် အတွင်း ပဋိပက္ခ ဖြစ်ပွားမည့် အရေးကို မျှော်လင့်နေမိသည်။

အဘယ်ကြောင့်ဆိုသော် သူသည် ထိုမြို့တော်အပေါ် မည်သည့် သံယောဇဉ်မှ မရှိသောကြောင့်ပင်။

လန်ရှီနှင့် လန်ကုန်း ညီအစ်မနှစ်ယောက် ဆေးလုံးတောင် သို့ ရောက်ရှိလာကြ၏။ သူတို့သည် စုယွီ၏ ဘေးတွင် အစေအပါးများ အဖြစ် အစေခံရမည် ဖြစ်သော်လည်း မည်သည့် ကန့်ကွက်မှုမျှ မရှိကြပေ။

ဘာပဲဖြစ်ဖြစ် လက်ရှိအချိန်တွင် စုယွီ၏ ဂုဏ်သတင်းသည် အတော်လေး ကောင်းမွန်နေသည်။ အထူးသဖြင့် ယွင်ကျန်းဂိုဏ်း နယ်မြေ အတွင်းတွင် ဖြစ်၏။

သူသည် (ဒုတိယအဆင့်) ထိပ်တန်း ဆေးပညာရှင် အောက်တွင် နံပါတ်တစ် ပုဂ္ဂိုလ်ဟူသော ဂုဏ်ပုဒ်ကို ဝေဝါးဝါး ရရှိနေလေပြီ။

သူတို့သည် ချီစွမ်းအင် စုစည်းခြင်း (အဆင့် ၉) ကျင့်ကြံသူများသာ ဖြစ်ကြသဖြင့် စုယွီအား အစေအပါးများ အဖြစ် အစေခံရခြင်းသည် ရှက်စရာ မဟုတ်ပေ။

ဒါပေါ့လေ။ သူမတို့က အစေအပါး သက်သက်ပါပင်။

သူမတို့ အနေဖြင့် စုယွီကို လုံးဝ မှီခိုအားထားရမည့် အမျိုးသမီးများ ဖြစ်လာရန် ရည်ရွယ်ချက် မရှိကြပေ။

...

(၂) ရက် ကြာပြီးနောက်၊

'တိမ်တိုက်ကျား' ဟု ခေါ်သော သားရဲကောင်ကြီး တစ်ကောင်သည် ဆေးလုံးတောင်မှ ကောင်းကင်ယံသို့ ပျံတက်သွားပြီး အတောင်ပံများကို ခမ်းနားစွာ ဖြန့်ကျက်လိုက်၏။ (ဒုတိယအဆင့်) ထိပ်တန်း သားရဲ ဖြစ်သောကြောင့် ၎င်း၏ အမြန်နှုန်းသည် လက်ရှိ (ဒုတိယအဆင့်) အလယ်အလတ်တန်းစား အမွှေးနက် သိမ်းငှက် နှင့် ခေါင်းနှစ်လုံး သွေးလင်းယုန် တို့ထက် များစွာ သာလွန်လေသည်။

တိမ်တိုက်ကျား၏ ကျောပေါ်တွင် စုယွီ၊ လီပင်ချန်း၊ ယွီခယ်အာ၊ လန်ရှီနှင့် လန်ကုန်းတို့ တင်ပျဉ်ခွေ ထိုင်လိုက်ပါလာကြ၏။

ယင် စွမ်းအင်များ လွန်ကဲနေသဖြင့် စုယွီသည် လီပင်ချန်းကိုပါ မှောင်ခိုဈေးသို့ အတူ ခေါ်ဆောင်လာခဲ့ခြင်း ဖြစ်၏။

"မျှော်စင်သခင်... တာအိုသခင် စစ်မှန်သူ ပိုင်ယွဲ့ က မကြာခင် သက်တမ်း ကုန်ဆုံးတော့မလား... မဟုတ်ရင် သူ ဘာလို့ ဒီလောက် ကြာကြာ ပျောက်နေရတာလဲ... သူ့တပည့် နှစ်ယောက်က တိုက်ခိုက်လုနီးပါး ဖြစ်နေတာတောင် သူ ပေါ်မလာဘူး"

လန် ညီအစ်မနှစ်ယောက်ထံမှ ပိုင်ယွဲ့ အင်မော်တယ် မြို့တော်၏ အခြေအနေကို ကြားသိလိုက်ရသော လီပင်ချန်းသည် တုန်လှုပ်ချောက်ချားစွာ မေးလိုက်၏။

စုယွီ ခေါင်းခါလိုက်၏။ သူသည် တာအိုသခင် စစ်မှန်သူ ပိုင်ယွဲ့ ကို တစ်ခါမှပင် မမြင်ဖူးခဲ့ပေ။

တာအိုသခင် စစ်မှန်သူ ပိုင်ယွဲ့ ၏ သက်တမ်း အကြောင်း သူ မည်သို့ သိနိုင်ပါမည်နည်း။

သို့သော်၊ ယွင်ကျန်းဂိုဏ်း အတွက်တော့...

သူတို့၏ သက်တမ်း ကုန်ဆုံးလုနီးပြီဟူသော ကောလာဟလ အများအပြား ထွက်ပေါ်နေသည်။ အချိန်ကျရောက်လာပြီလော။

စုယွီ တွက်ချက်မိလိုက်၏။

ထို့နောက်တွင် လီပင်ချန်းလည်း နှုတ်ဆိတ်သွားပြီး၊ တိမ်တိုက်ကျားသည် လမ်းခရီး တစ်လျှောက် မည်သည့် စကားမျှ မပြောဆိုကြဘဲ လဝက်ခန့် အတွင်းမှာပင် မှောင်ခိုဈေးသို့ ရောက်ရှိသွားခဲ့သည်။

မှောင်ခိုဈေးသို့ ရောက်ရှိပြီး မကြာမီမှာပင် စုယွီသည် ဝမ်းကွဲအစ်မ ဖြစ်သူ စုဇီ ပြန်ရောက်နေပြီ ဖြစ်ကြောင်း သိရှိလိုက်ရသဖြင့် အံ့သြဝမ်းမြောက်သွား၏။ စုဇီနှင့်အတူ အခြား အင်အားစုများမှ ပါရမီရှင်များလည်း ပြန်ရောက်လာကြသဖြင့် မှောင်ခိုဈေးသည် ယခင်နှစ်များက လေလံပွဲ ကာလကဲ့သို့ပင် စည်ကားသိုက်မြိုက်နေလေသည်။

*

ဂူစံအိမ် အတွင်းမှာ၊

စုယွီက စုဇီကို ဖိတ်ခေါ်ခိုင်းလိုက်၏။ စုဇီ၏ လက်များ၊ ခြေထောက်များ၊ ဖြူဖွေးနုနယ်သော မျက်နှာနှင့် အခြား အစိတ်အပိုင်းများ အားလုံး ပကတိ အတိုင်း ရှိနေသည်ကို မြင်လိုက်ရမှ သက်ပြင်းချနိုင်တော့သည်။

စုယွီက စကားနာထိုးလိုက်၏။

"အစ်မက (၈) နှစ်လောက် ပျောက်သွားတော့ မောင်ဖြစ်သူကို လန့်အောင် လုပ်တာပဲ"

ထိုအခါ၊ ယခင်ကထက် ပိုမို ရင့်ကျက် တည်ငြိမ်လာသော စုဇီက လက်တစ်ဖက်ဖြင့် ပါးစပ်ကို အုပ်ကာ တိုးတိုးလေး ရယ်မောလိုက်ပြီးနောက်၊

"မောင်လေးက အစ်မကို စိတ်ပူနေတာလား... ဒီအစ်မက အခု အခြေခံ တည်ဆောက်ခြင်း (အဆင့် ၅) ကို ရောက်နေပြီဟယ်... အဲဒီမှာ အခွင့်အလမ်း ကောင်းကောင်းတွေ ရခဲ့တယ်... မဆိုးပါဘူး"

ထို့နောက် သူမ ဆက်ပြောလိုက်၏။

"နှမြောစရာ ကောင်းတာက နင်.. ပါမလာခဲ့တာပဲ... တကယ်လို့ နင်သာ ပါလာခဲ့ရင် အခွင့်အလမ်းတချို့ ရနိုင်ပြီး အနာဂတ်မှာ အမြုတေ ဖွဲ့စည်းနိုင်မယ့် အခွင့်အရေးတောင် ရနိုင်လောက်တယ်"

စုယွီ ခေါင်းကို ဖြည်းညှင်းစွာ ခါယမ်းလိုက်ပြီး ပြောလိုက်၏။

"ကျွန်တော် နောင်တ မရပါဘူး... လက်ရှိ အစ်ကို့ ကျင့်ကြံခြင်း အဆင့်ကလည်း တော်တော်လေး ကောင်းပါတယ်... ပုံမှန် တိုးတက်နေတာပဲ... အခုဆိုရင် မြေကမ္ဘာနဲ့ သစ်သား ဓာတ်သဘာဝ နှစ်မျိုးစလုံး အခြေခံ တည်ဆောက်ခြင်း (အဆင့် ၃) ကို ရောက်နေပြီ"

သူသည် မြေကမ္ဘာနှင့် သစ်သား ဓာတ်သဘာဝ နှစ်မျိုးစလုံးကို ကျင့်ကြံနေသည် ဆိုသော အချက်မှာ လျှို့ဝှက်ချက် မဟုတ်ပေ။ 'ရွှမ်မင် ဆန်းကြယ် မြေကမ္ဘာ သိုင်းကျမ်း' ၏ မှော်စွမ်းအင် အရှိန်အဝါကို သူ ဘယ်တုန်းကမှ ဖုံးကွယ်ထားခြင်း မရှိခဲ့ပေ။ အနည်းဆုံးတော့ စုမိသားစု၏ အဆင့်မြင့် အဖွဲ့ဝင်များ သိရှိထားကြ၏။

စကားစမြည် ပြောဆိုပြီးနောက်၊

စုယွီက မေးလိုက်၏။

"အစ်မက တစ်ယောက်တည်း ပြန်လာတာလား... တာအို မိတ်ဆွေ လော့ ရော..."

စုဇီ ခေါင်းခါလိုက်၏။

"အစ်မ လော့က အဆင်ပြေပါတယ်... သူက လျှို့ဝှက် အပျက်အစီး နယ်မြေထဲမှာ ကျန်နေခဲ့သေးလို့ မထွက်လာသေးတာ... ဒါကြောင့် ငါ.. အရင် ပြန်လာခဲ့တာပါ"

"အော်... ဒါနဲ့"

စုဇီသည် သူမ၏ ချန်ခွန်းအိတ်ထဲမှ သားရေချပ် တစ်ခုကို ရုတ်တရက် ထုတ်ယူလိုက်ပြီး စုယွီကို ကမ်းပေးလိုက်ကာ ပြောလိုက်၏။

"ဒါက ကောင်းကင်ဖီးနစ်နန်းတော် အပျက်အစီးထဲက အစ်မ ရလာတဲ့ ပစ္စည်းတွေထဲက တစ်ခုပါ... ငါ့ အတွက်တော့ အသုံးမဝင်ပါဘူး... နင့်အတွက် အသုံးဝင်မလား ကြည့်ကြည့်ပါဦး"

ဘာပါလိမ့်။

စုယွီ သားရေချပ်ကို ဖြန့်ကြည့်လိုက်သောအခါ အံ့သြမှုနှင့် စိတ်လှုပ်ရှားမှုကြောင့် မျက်လုံးအိမ်များ အနည်းငယ် ကျဉ်းမြောင်းသွား၏။

"ရှေးဟောင်း မြေပုံ တစ်ချပ်ပါလား"

ဤမြေပုံ၏ ခေါင်းစဉ်မှာ "လော့ယွဲ့ ရေကန် မြင်ကွင်းကျယ်" ဟူ၍ ဖြစ်၏။

မြေပုံပေါ်ရှိ မြေမျက်နှာသွင်ပြင် အနေအထားသည် လက်ရှိ တာ့ယွဲ့နယ်မြေ၏ အနေအထားနှင့် လုံးဝ ကွာခြားနေသည်။ ကျွန်းပေါင်းများစွာ ပါဝင်သော ရေကန်ကြီး တစ်ခုကို ပုံဖော်ထားပြီး၊ ထိုကျွန်းများ၏ အမည်များကိုလည်း မြေပုံပေါ်တွင် မှတ်တမ်းတင်ထားလေသည်။