အခန်း (၁၄၈-၁၅၀)

အခန်း (၁၄၈) - အသက်ရှည်ခြင်း အဆင့်နှင့် မိစ္ဆာလိပ်၏ လှည့်စားမှု (အပိုင်း ၁)

~(ဒုတိယအဆင့်) အလယ်အလတ်တန်းစား အဆောင်လက်ဖွဲ့ (၅၀) ကို အစုံလိုက် စီစဉ်ထားပြီး၊ ထိုအထဲတွင် ကိုယ်ပျောက် အဆောင်လက်ဖွဲ့ (၁၀) ခု၊ နတ်ဘုရား အမြန်နှုန်း အဆောင်လက်ဖွဲ့ (၁၀) ခု၊ ရွှမ်ကျား ကာကွယ်ရေး အဆောင်လက်ဖွဲ့ (၁၀) ခုနှင့် တိုက်ခိုက်ရေး အဆောင်လက်ဖွဲ့ အမျိုးမျိုး (၂၀) ခုတို့ ပါဝင်လေသည်။

ဤ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ အသုတ်သည် ယခင် (ဒုတိယအဆင့်) အဆင့်နိမ့် အဆောင်လက်ဖွဲ့ အသုတ်ထက် ပိုမို ကြီးမားသော လှုပ်ရှားမှုကို ဖြစ်ပေါ်စေခဲ့သည်။

ဘာပဲဖြစ်ဖြစ် (ဒုတိယအဆင့်) အဆင့်နိမ့် အဆောင်လက်ဖွဲ့များသည် နောက်ဆုံးတွင် အခြေခံ တည်ဆောက်ခြင်း အစောပိုင်း အဆင့်နှင့်သာ သက်ဆိုင်ပြီး၊ အရေအတွက် များပြားသော်လည်း အင်အားကြီး အဖွဲ့အစည်းများအတွက် ခြိမ်းခြောက်မှုမှာ အကန့်အသတ် ရှိလေသည်။

သို့သော် (ဒုတိယအဆင့်) အလယ်အလတ်တန်းစား အဆောင်လက်ဖွဲ့များမှာမူ ကွာခြားလေသည်။

အခြေခံ တည်ဆောက်ခြင်း (အဆင့် ၉) သို့မဟုတ် တုပ အမြုတေ အဆင့် ကျင့်ကြံသူများပင်လျှင် (ဒုတိယအဆင့်) အလယ်အလတ်တန်းစား တိုက်ခိုက်ရေး အဆောင်လက်ဖွဲ့ (၂၀) ၏ စွမ်းအားကို ရင်ဆိုင်ရပါက အကွာအဝေး တစ်ခု ထားရှိရပေမည်။

သို့မဟုတ်ပါက မထင်မှတ်ဘဲ ရှုံးနိမ့်သွားနိုင်မည့် အန္တရာယ် ရှိလေသည်။

"လေလံဆွဲမယ်"

ကျင့်ကြံခြင်း မိသားစု ခေါင်းဆောင် အများအပြားသည် တီးတိုး ရေရွတ်လိုက်ကြပြီး၊ စင်မြင့်ပေါ်ရှိ ထူထဲသော အဆောင်လက်ဖွဲ့ အထပ်လိုက်ကြီးကို စူးစိုက်ကြည့်နေကြ၏။ အဆောင်လက်ဖွဲ့များထံမှ ထွက်ပေါ်နေသော အေးစက်သည့် စွမ်းအင်ကို ခံစားလိုက်ရသဖြင့် သူတို့၏ ဦးရေပြားများ ထုံကျင်သွားပြီး အသံများ တုန်ရီနေကြ၏။ သူတို့သည် ဤအဆောင်လက်ဖွဲ့များကို ရယူရန် ဆုံးဖြတ်ထားကြ၏။

"အလယ်အလတ်စား ဝိညာဉ်ကျောက်တုံး (၃၀၀)"

"အလယ်အလတ်စား ဝိညာဉ်ကျောက်တုံး (၃၅၀)"

ဒုတိယထပ်နှင့် တတိယထပ်ရှိ အဆင့်မြင့် ကျင့်ကြံသူများသည် တစ်ယောက်ပြီး တစ်ယောက် လေလံဆွဲကြပြီး ဈေးနှုန်းကို မြှင့်တင်လိုက်ကြ၏။

ဈေးနှုန်းသည် အလယ်အလတ်စား ဝိညာဉ်ကျောက်တုံး (၆၂၀) အထိ ထိုးတက်သွားမှသာ လေလံဆွဲခြင်း ရပ်တန့်သွားတော့သည်။

စုယွီသည် ဤဈေးနှုန်းကြောင့် အံ့အားသင့်သွား၏။ ဈေးကွက်ပေါက်ဈေးအရ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ တစ်ခုလျှင် အဆင့်နိမ့် ဝိညာဉ်ကျောက်တုံး (၅၀၀) ခန့်သာ ရှိပြီး၊ (၅၀) ခု ဆိုလျှင် အဆင့်နိမ့် ဝိညာဉ်ကျောက်တုံး (၂၅,၀၀၀) ခန့်သာ ကျသင့်မည် ဖြစ်၏။

၎င်းသည် အလယ်အလတ်စား ဝိညာဉ်ကျောက်တုံး (၂၅၀) နှင့် ညီမျှသည်။

သို့သော် လက်တွေ့ လေလံဈေးနှုန်းသည် အလယ်အလတ်စား ဝိညာဉ်ကျောက်တုံး (၆၂၀) အထိ ရောက်ရှိသွားခဲ့ပြီး၊ အဆင့်နိမ့် ဝိညာဉ်ကျောက်တုံး (၆၂,၀၀၀) နှင့် ညီမျှနေသည်မှာ အံ့မခန်းပင်။

ဆိုလိုသည်မှာ အဆောင်လက်ဖွဲ့ တစ်ခုချင်းစီ၏ ဈေးနှုန်းသည် အဆင့်နိမ့် ဝိညာဉ်ကျောက်တုံး (၁,၂၀၀) ကျော် ရှိနေခြင်း ဖြစ်၏။

စုယွီ စိတ်ထဲတွင် အာမေဋိတ် ပြုလိုက်မိသည်။

"သူတို့ ရူးနေကြပြီ"

(ဒုတိယအဆင့်) အလယ်အလတ်တန်းစား အဆောင်လက်ဖွဲ့ (၅၀) ကို အဓိက သားရဲထိန်း အဖွဲ့အစည်း ဖြစ်သော လီမိသားစုက ရရှိသွားခဲ့သည်။

(ဒုတိယအဆင့်) အဆင့်နိမ့် ရုပ်သေး သားရဲနှင့် (ဒုတိယအဆင့်) အဆင့်နိမ့် အဆောင်လက်ဖွဲ့များ လေလံတင်ရောင်းချခြင်းမှ ရရှိသော ဝိညာဉ်ကျောက်တုံးများနှင့် ပေါင်းလိုက်လျှင်၊ ယခု လေလံပွဲတွင် စုယွီသည် အဆင့်နိမ့် ဝိညာဉ်ကျောက်တုံး (၄၃,၀၀၀) နှင့် အလယ်အလတ်စား ဝိညာဉ်ကျောက်တုံး (၁,၁၇၀) အထိ စုဆောင်းမိသွားပြီ ဖြစ်၏။

သီးသန့် အခန်းထဲတွင် ယွီပိုင်ရှန်သည် (ဒုတိယအဆင့်) အလယ်အလတ်တန်းစား အဆောင်လက်ဖွဲ့များ၏ နောက်ဆုံး လေလံဈေးနှုန်းကို မြင်လိုက်ရသောအခါ မျက်နှာ အမူအရာ အမျိုးမျိုး ပြောင်းလဲသွားပြီး တီးတိုး ရေရွတ်လိုက်၏။

"တကယ့်ကို ရူးသွပ်မှုပါပဲ"

"သူတို့က အဆောင်လက်ဖွဲ့ (၅၀) ဝယ်ဖို့ ဒီလောက်ထိ လုပ်ကြတယ် ဆိုတော့... ဟောင်ထျန်း ဆေးလုံးကို လေလံမဆွဲချင်ကြတော့ဘူးလား"

တတိယထပ် သီးသန့် အခန်းများရှိ လူအများအပြား မျက်မှောင် အနည်းငယ် ကြုတ်သွားကြသော်လည်း မကြာမီ သူတို့၏ မျက်နှာပေါ်တွင် အပြုံးများ ပေါ်လာကြ၏။

"ထားလိုက်ပါတော့... လီမိသားစုကို ပေးလိုက်ကြတာပေါ့"

သူတို့သည် ဤ အဆောင်လက်ဖွဲ့ (၅၀) ကို မရရှိလိုက်သော်လည်း လီမိသားစု၏ ဝိညာဉ်ကျောက်တုံးများကို ကုန်ခန်းသွားစေခြင်းကပင် လုံလောက်သော အောင်မြင်မှု ဖြစ်၏။

ထိုသို့သော မမြင်ရသည့် ပြိုင်ဘက် တစ်ဦးသည် အခြေခံအားဖြင့် နုတ်ထွက်သွားပြီဟု ကြေညာလိုက်ခြင်းပင် ဖြစ်၏။

မဆိုးပါချေ။

လေလံပွဲ ဆက်လက် ကျင်းပနေလေသည်။

တာအိုဆရာ ဟုန်အာသည် ရတနာများကို တစ်ခုပြီး တစ်ခု ထုတ်ယူပြသလိုက်၏။ ထိုအထဲတွင် စုယွီ လိုချင်သော ပစ္စည်းတချို့လည်း ပါဝင်သည်။

သူသည် သူ့၏ ရုပ်သေး ကိုယ်ပွားကို အသုံးပြု၍ လေလံဆွဲစေခဲ့ပြီး (ဒုတိယအဆင့်) ဆေးလုံးများ၊ (ဒုတိယအဆင့်) အဆောင်လက်ဖွဲ့များနှင့် (ဒုတိယအဆင့်) ရုပ်သေး သားရဲများ အတွက် အရည်အသွေးမြင့် ကုန်ကြမ်း ပစ္စည်း အများအပြားကို ရရှိနိုင်ခဲ့သည်။

နောက်ဆုံးတွင် တာအိုဆရာ ဟုန်အာသည် ကျောက်စိမ်းမှတ်တမ်း တစ်ခုကို ထုတ်ယူလိုက်ပြီး ကြေညာလိုက်၏။

"ဒါကတော့ ရှေးဟောင်း ကောင်းကင်ဘုံ ဂိတ်တံခါး၊ ကောင်းကင်ဖီးနစ်နန်းတော် အပျက်အစီး နယ်မြေကနေ ရရှိထားတဲ့ ကျင့်စဉ် တစ်ခု ဖြစ်ပါတယ်... 'ရွှမ်မင် ဆန်းကြယ် မြေကမ္ဘာ ကျင့်စဉ်' လို့ ခေါ်ပါတယ်... အမြုတေ ဖွဲ့စည်းခြင်း (အဆင့် ၉) အထိ ကျင့်ကြံနိုင်တဲ့ မြေကမ္ဘာ ဓာတ်သဘာဝ ကျင့်စဉ် တစ်ခု ဖြစ်ပါတယ်"

"ဒီကျင့်စဉ်က ကျင့်ကြံရ ခက်ခဲပေမဲ့ ကန့်သတ်ချက် မရှိတဲ့ ထိပ်တန်း နည်းစနစ် တစ်ခုပါ"

"ကနဦး ဈေးနှုန်းက အဆင့်နိမ့် ဝိညာဉ်ကျောက်တုံး (၃,၀၀၀) ဖြစ်ပြီး၊ ဈေးတိုးမြင့်မှု တိုင်းက အဆင့်နိမ့် ဝိညာဉ်ကျောက်တုံး (၅၀၀) အောက် မနည်းရပါဘူး... လေလံ စတင် ဆွဲနိုင်ပါပြီ"

သီးသန့် အခန်းထဲတွင် စုယွီ၏ လက်များ အနည်းငယ် တုန်ရီသွား၏။ ဝမ်းသာခြင်းနှင့် မယုံကြည်နိုင်ခြင်း ခံစားချက်များ ရောထွေးနေသည်။

သူ အချိန်အကြာကြီး ရှာဖွေနေခဲ့သော 'ရွှမ်မင် ဆန်းကြယ် မြေကမ္ဘာ ကျင့်စဉ်' ၏ ဆက်လက် ကျင့်ကြံရမည့် အပိုင်းသည် အံ့သြစရာ ကောင်းလောက်အောင် ဤလေလံပွဲတွင် ပေါ်ထွက်လာခဲ့လေပြီ။

တပြိုင်နက်တည်းမှာပင် လေလံ အိမ်တော်ရှိ အခြား ကျင့်ကြံသူ အများအပြားသည်လည်း အမြုတေ ဖွဲ့စည်းခြင်း (အဆင့် ၉) အထိ ကျင့်ကြံနိုင်သော မြေကမ္ဘာ ဓာတ်သဘာဝ ကျင့်စဉ် အကြောင်း ကြားလိုက်ရသဖြင့် စိတ်လှုပ်ရှား တက်ကြွသွားကြ၏။ 'အခြေခံ တည်ဆောက်ခြင်း ဆေးလုံး' နှင့် 'ရွှေရောင် ယွမ် ဆေးလုံး' ကဲ့သို့ပင်၊ အမြုတေ ဖွဲ့စည်းခြင်း အဆင့် ကျင့်စဉ်များကို အင်အားကြီး အဖွဲ့အစည်းများက လက်ဝါးကြီးအုပ်ထားလေ့ ရှိသည်။

သာမန် ကျင့်ကြံခြင်း မိသားစုများနှင့် တစ်သီးပုဂ္ဂလ ကျင့်ကြံသူများ အနေဖြင့် အဆင့်မြင့် ကျင့်စဉ်များကို ရရှိရန် အလွန် ခက်ခဲလှသည်။

ဒါက ထိပ်တန်း ကျင့်ကြံသူများ ပေါ်ထွက်လာခြင်းကို တားဆီးရန် အင်အားကြီး အဖွဲ့အစည်းများ အသုံးပြုသော နည်းလမ်းများထဲမှ တစ်ခု ဖြစ်၏။

ကြီးမားသော အတားအဆီး တစ်ခုပင်။

ယခင်က ယွင်ကျန်းဂိုဏ်းမှ စုဇီသည် ကောင်းကင်ဖီးနစ်နန်းတော် အပျက်အစီး နယ်မြေတွင် အခွင့်အလမ်း ရရှိပြီးမှသာ အခြေခံ တည်ဆောက်ခြင်း အဆင့်သို့ တက်လှမ်းနိုင်ခဲ့ခြင်း ဖြစ်၏။ ထိုမတိုင်မီက သူမတွင် အခြေခံ တည်ဆောက်ခြင်း အဆင့် ကျင့်စဉ်များသာ ရှိခဲ့သည်။

အမြုတေ ဖွဲ့စည်းခြင်း အဆင့် ကျင့်စဉ် တစ်ခု ရရှိရန်အတွက် သူမသည် ဂိုဏ်းအကျိုးပြု အမှတ်များဖြင့် လဲလှယ်ရဦးမည် ဖြစ်၏။

ဤအရာသည် ယွင်ကျန်းဂိုဏ်းကဲ့သို့သော အင်အားကြီး အဖွဲ့အစည်းဝင်များ အတွက်တောင်မှ အထူးအခွင့်အရေး တစ်ခုတည်း။

သာမန် ကျင့်ကြံသူများ အနေဖြင့် အခြေခံ တည်ဆောက်ခြင်းနှင့် အမြုတေ ဖွဲ့စည်းခြင်း အဆင့် ကျင့်စဉ်များကို မည်သို့ လက်လှမ်းမီနိုင်ပါမည်နည်း။

အင်မော်တယ် လမ်းစဉ်သည် ကွေ့ကောက်နေပြီး၊ အသက်ရှည်ခြင်း လမ်းစဉ်သည် မရေမတွက်နိုင်သော ကျင့်ကြံသူများ၏ အလောင်းကောင်များဖြင့် ပြည့်နှက်နေသည် ဆိုသော စကားမှာ အကြောင်းမဲ့ ပြောဆိုထားခြင်း မဟုတ်ပေ။

"အဆင့်နိမ့် ဝိညာဉ်ကျောက်တုံး (၃,၀၀၀)"

" (၃,၅၀၀) ပေးမယ်"

"ကျုပ်က (၄,၀၀၀) "

မျက်တောင်တစ်ခတ် အတွင်းမှာပင် အမြုတေ ဖွဲ့စည်းခြင်း (အဆင့် ၉) အထိ ကျင့်ကြံနိုင်သော 'ရွှမ်မင် ဆန်းကြယ် မြေကမ္ဘာ ကျင့်စဉ်' ၏ ဈေးနှုန်းသည် အဆင့်နိမ့် ဝိညာဉ်ကျောက်တုံး (၅,၀၀၀) အထိ ထိုးတက်သွားပြီး လေလံဆွဲမှု ပြင်းထန်လာသည်။

ဤဈေးနှုန်းကြောင့် ပထမထပ်ရှိ တစ်သီးပုဂ္ဂလ ကျင့်ကြံသူများနှင့် သာမန် ကျင့်ကြံခြင်း မိသားစုများ၏ မျက်နှာ အမူအရာများ ဆိုးရွားသွားကြသည်။ သူတို့သည် တိတ်တဆိတ် ကျိန်ဆဲလိုက်ကြပြီး၊ ခါးသီးသော အမူအရာများဖြင့် အံကြိတ်ကာ လက်လျှော့လိုက်ကြရ၏။

ဒုတိယထပ်နှင့် တတိယထပ် သီးသန့် အခန်းများရှိ လူများသာ ဆက်လက် လေလံဆွဲနေကြပြီး ဈေးနှုန်းကို မြှင့်တင်နေကြ၏။

ဈေးနှုန်း ဆက်လက် မတက်နိုင်တော့သည့် အချိန်ကျမှသာ စုယွီ လှုပ်ရှားလိုက်၏။ ဈေးနှုန်းကို နှစ်ကြိမ် တိုးမြှင့်ပြီးနောက် အမြုတေ ဖွဲ့စည်းခြင်း အဆင့် လိုအပ်ချက်များ ပါဝင်သော 'ရွှမ်မင် ဆန်းကြယ် မြေကမ္ဘာ ကျင့်စဉ်' ကို အဆင့်နိမ့် ဝိညာဉ်ကျောက်တုံး (၈,၅၀၀) ဖြင့် အောင်မြင်စွာ ရယူနိုင်ခဲ့သည်။

ယွီပိုင်ရှန်သည် စုယွီကို ကြည့်ပြီး စိတ်ဝင်တစား မေးလိုက်၏။

"မင်းရဲ့ မြေကမ္ဘာ ဝိညာဉ်အမြစ် ( နဲ့ ဒီ 'ရွှမ်မင် ဆန်းကြယ် မြေကမ္ဘာ ကျင့်စဉ်' ကို ကျင့်ကြံနေတာလား"

ထိုအခါ၊ သက်ပြင်းချလိုက်ပြီးနောက် စုယွီ ပြုံးကာ ခေါင်းငြိမ့်ပြလိုက်၏။

"ကျွန်တော် ပိုင်ယွဲ့ အင်မော်တယ် မြို့တော်မှာ ရှိတုန်းက လေလံပွဲ တစ်ခုကနေ အခြေခံ တည်ဆောက်ခြင်း (အဆင့် ၄) အောက် နိမ့်တဲ့ အပိုင်းအတွက် 'ရွှမ်မင် ဆန်းကြယ် မြေကမ္ဘာ ကျင့်စဉ်' အစပိုင်းကို ရခဲ့ဖူးတယ်ဗျ... သူ့ရဲ့ ဆက်လက် ကျင့်ကြံရမည့် အပိုင်းကို ရှာနေတာ ကြာပါပြီ"

"ကံကောင်းတာက ကျွန်တော့် ကျင့်ကြံမှုကို မနှောင့်နှေးစေခဲ့ပါဘူး... အခုတော့ နောက်ဆုံးမှာ ရှာတွေ့ပြီး ရယူနိုင်ခဲ့ပြီဗျ”

အခန်း (၁၄၉) - အသက်ရှည်ခြင်း အဆင့်နှင့် မိစ္ဆာလိပ်၏ လှည့်စားမှု (အပိုင်း ၂)

~ယွီပိုင်ရှန်နှင့် ယွီပိုင်ဟယ်တို့ နှစ်ဦး အကြည့်ချင်း ဆုံလိုက်ကြပြီး ရင်ထဲတွင် အနည်းငယ် အံ့သြသွားကြ၏။

‘တိုက်ဆိုင်လိုက်တာ။

မဟုတ်သေးဘူး။ ဒါက မတိုက်ဆိုင်တာလည်း ဖြစ်နိုင်တယ်။’

ရုတ်တရက် ယွီပိုင်ရှန် ခံစားမိလိုက်သည်မှာ ဤအရာသည် တိုက်ဆိုင်မှု မဟုတ်ဘဲ ကံတရားသာ ဖြစ်နိုင်ကြောင်းပင်။

လူတိုင်းမှာ ကိုယ်ပိုင် ကံတရား ရှိကြ၏။

တချို့လူတွေက လမ်းလျှောက်နေရင်း ငှက်ချေးပက်တာ ခံရသည်။

သို့သော်၊ တချို့လူတွေကတော့ မယုံကြည်နိုင်စရာ ကောင်းသော အခွင့်အလမ်းတွေနှင့် အကျိုးကျေးဇူးတွေကို လွယ်လွယ်ကူကူ ရရှိကြသည်။

ဒါက ကံတရား၏ ကွာခြားချက်ပင်။

အခြေခံ တည်ဆောက်ခြင်း (အဆင့် ၃) သာ ရှိသေးသော စုယွီ အနေဖြင့် သူ လိုချင်နေသော ကျင့်စဉ်၏ ဆက်လက် ကျင့်ကြံရမည့် အပိုင်းကို ရရှိသွားခြင်းသည် တိုက်ဆိုင်မှု မဟုတ်ဘဲ သူ၏ ကံတရားက ဖန်တီးပေးခြင်းသာ ဖြစ်လေသည်။

ဤအချက်ကို သဘောပေါက်သွားသောအခါ ယွီပိုင်ရှန်သည် စုယွီကို နောက်တစ်ကြိမ် ကြည့်လိုက်ပြီး တိတ်တဆိတ် တွေးလိုက်မိသည်။

'ဒီလိုဆိုရင် သူက ထူးကဲတဲ့ ကံတရား ပိုင်ရှင်ပဲ... ကံကောင်းတဲ့ သူတွေက ဘေးအန္တရာယ်ကို လုံခြုံမှု အဖြစ် ပြောင်းလဲနိုင်ကြတယ်... သူ့ရဲ့ ရှေ့ဆက်ရမယ့် လမ်းခရီးက သိပ်ပြီး ခက်ခဲမှာ မဟုတ်ဘူး'

'အနည်းဆုံးတော့ သူက အခြေခံ တည်ဆောက်ခြင်း နောက်ဆုံးအဆင့်... အဆင့် (၉) အထိတောင်မှ တည်ငြိမ်စွာ ရောက်ရှိနိုင်လောက်တယ်'

စုယွီအတွက် သူ့၏ အမြင့်ဆုံး မျှော်လင့်ချက်မှာ အခြေခံ တည်ဆောက်ခြင်း (အဆင့် ၉) သို့ ရောက်ရှိရန် ဖြစ်၏။

ထို့ထက် ပိုမြင့်မားသော အဆင့် ဆိုသည်မှာ ယွီပိုင်ရှန် ကိုယ်တိုင်တောင် အိပ်မက် မမက်ရဲသော အမြင့်တစ်ခု ပါပင်။

အခြေခံ တည်ဆောက်ခြင်း အဆင့်မှ အမြုတေ ဖွဲ့စည်းခြင်း အဆင့်သို့ ထိုးဖောက် ဝင်ရောက်ရန် ခက်ခဲမှုသည် သာမန် လူများ စိတ်ကူးကြည့်၍ မရနိုင်လောက်အောင်ပင်။ သူ ကိုယ်တိုင်တောင်မှ အမြုတေ ဖွဲ့စည်းခြင်း အဆင့်သို့ ရောက်ရှိနိုင်မည်၊ မရောက်ရှိနိုင်မည်ကို မသေချာသေးပေ။

စုယွီ၏ ပျမ်းမျှ ပါရမီနှင့် ဝိညာဉ်အမြစ်ကို ထည့်သွင်းစဉ်းစားပါက အခြေခံ တည်ဆောက်ခြင်း (အဆင့် ၉) သို့ ရောက်ရှိခြင်းသည်ပင် အလွန် ကောင်းမွန်နေလေပြီ။

လေလံခန်းမ တစ်ခုလုံး တိတ်ဆိတ်သွားပြန်သည်။

ထို့နောက်ဝယ်၊

အခြေခံ တည်ဆောက်ခြင်း ဆေးလုံး၏ အဓိက ကုန်ကြမ်း ပစ္စည်းများ၊ 'ဟောင်ထျန်း ဆေးလုံး' ၏ အရန် ဆေးဖက်ဝင် ပစ္စည်းများ၊ (ဒုတိယအဆင့်) ထိပ်တန်း ရုပ်သေး သားရဲ 'လက်ရှစ်ဖက် ဓားတောင်ပံ ပုစဉ်းရင်ကွဲ' ဖန်တီးရန် လိုအပ်သော 'အလင်းအရိပ် ကျောက်တုံး' တို့ ပေါ်ထွက်လာကြ၏။

တာအို ကိုယ်ပွား ရုပ်သေးသည် 'အလင်းအရိပ် ကျောက်တုံး' ကို လက်လွတ်မခံဘဲ အဆင့်နိမ့် ဝိညာဉ်ကျောက်တုံး (၆,၀၀၀) ကျော် အသုံးပြုပြီး ဝယ်ယူလိုက်၏။

ဤ 'အလင်းအရိပ် ကျောက်တုံး' ကို ရရှိလိုက်သဖြင့် စုယွီသည် 'လက်ရှစ်ဖက် ဓားတောင်ပံ ပုစဉ်းရင်ကွဲ' ရုပ်သေး သားရဲ ဖန်တီးရန် လိုအပ်သော ကုန်ကြမ်း ပစ္စည်း (၈၀) ရာခိုင်နှုန်းခန့်ကို စုဆောင်းမိသွားပြီ ဖြစ်၏။ ဤသတင်းကောင်းကြောင့် သူ ပျော်ရွှင်သွား၏။

နောက်ထပ် နှစ်အနည်းငယ် ကြာလျှင် လုံလောက်သော ကုန်ကြမ်း ပစ္စည်းများကို စုဆောင်းနိုင်လောက်ပြီ ဖြစ်၏။

ထိုအချိန် ရောက်လျှင် သူ့၏ ကျင့်ကြံခြင်း အဆင့်သည်လည်း အခြေခံ တည်ဆောက်ခြင်း (အဆင့် ၄) သို့ ရောက်ရှိနေလောက်ပြီ။

ထိုအခါကျမှ သူသည် (ဒုတိယအဆင့်) ထိပ်တန်း ရုပ်သေး သားရဲကို ဖန်တီးရန် ကြိုးစားနိုင်သည်။

'ဟောင်ထျန်း ဆေးလုံး' ၏ အရန် ဆေးဖက်ဝင် ပစ္စည်းများ အတွက်မူ ပြိုင်ဆိုင်မှု ပြင်းထန်လွန်းလှပြီး ဈေးနှုန်းများမှာလည်း မာလွန်းလှသည်။ တာအို ကိုယ်ပွား ရုပ်သေးသည် 'ဟောင်ထျန်း ဆေးလုံး' ဖော်စပ်ရန် အရန် ဆေးဖက်ဝင် ပစ္စည်း (၂) စုံကိုသာ ဝယ်ယူနိုင်ခဲ့သည်။ အခြား ပစ္စည်းများ အတွက်မူ ထိုမျှ မြင့်မားသော ဈေးနှုန်းများဖြင့် ဝယ်ယူရန် မတန်ပေ။

စုယွီအနေနှင့် အလွန်အကျွံ ထင်ပေါ်၍ မဖြစ်ပေ။

ထိုသို့ လုပ်ဆောင်ခြင်းသည် တာအို ကိုယ်ပွား ရုပ်သေးကို လူအများ၏ အာရုံစိုက်မှု ဗဟိုချက် ဖြစ်သွားစေနိုင်သည်။

အဲဒါက အလွန် အန္တရာယ် များပါသည်။

အရန် ဆေးဖက်ဝင် ပစ္စည်းများကို သီးခြား ဆက်လက် စုဆောင်းရဦးမည် ဖြစ်ကြောင်း စုယွီ စိတ်ပျက်လက်ပျက် သတိရလိုက်မိ၏။ ဤလေလံပွဲတွင် စုဆောင်းရန် အလွန် ခက်ခဲလွန်းလှပါသည်။

လေလံပွဲ ပြီးဆုံးခါနီးဝယ်၊

တာအိုဆရာ ဟုန်အာသည် 'ဟောင်ထျန်း ဆေးလုံး' ကို ထုတ်ယူလိုက်ပြီး လေးနက်သော မျက်နှာ အမူအရာဖြင့် ကြေညာလိုက်၏။

"ဟောင်ထျန်း ဆေးလုံးရဲ့ ကနဦး ဈေးနှုန်းက အလယ်အလတ်စား ဝိညာဉ်ကျောက်တုံး (၁,၀၀၀) ပါ... ဈေးတိုးမြင့်မှု တိုင်းက အလယ်အလတ်စား ဝိညာဉ်ကျောက်တုံး (၁၀၀) အောက် မနည်းရပါဘူး... စိတ်ဝင်စားသူများ လေလံဆွဲနိုင်ပါပြီ"

အခြား မိတ်ဆက်စကားများ မပါဝင်ပေ။

သို့သော် 'ဟောင်ထျန်း ဆေးလုံး' ကို ထုတ်ပြလိုက်သည်နှင့် တပြိုင်နက် အမြုတေ ဖွဲ့စည်းခြင်း အဆင့် အရှိန်အဝါ (၄) ခုနှင့် တုပ အမြုတေ အဆင့် အရှိန်အဝါ (၁၀) ခုကျော်သည် သူ့အပေါ် ကျရောက်လာသည်။ လေလံ အိမ်တော် အတွင်းရှိ လေထုသည် ခဲသွားသကဲ့သို့ ဖြစ်သွား၏။

လေဖိအား တစ်ခုသည် လေလံ အိမ်တော် အတွင်းရှိ ကျင့်ကြံသူ အားလုံး၏ ရင်ဘတ်ကို ဖိနှိပ်ထားသကဲ့သို့ ဖြစ်နေပြီး အသက်ရှူကျပ်စေသည်။

လေလံ အိမ်တော် တစ်ခုလုံး တိတ်ဆိတ်ငြိမ်သက်သွား၏။

အသက်ရှူချိန် (၁၀) ကြိမ်ခန့် ကုန်ဆုံးသွား၏။

ထိုအချိန်ကျမှ တတိယထပ်မှ အေးဆေးတည်ငြိမ်သော အသံတစ်သံ ထွက်ပေါ်လာသည်။

"(၁,၀၀၀)"

ဘေးခန်းမှ အသံတစ်သံ ထွက်ပေါ်လာသည်။

"(၁,၁၀၀)"

"ဟွန့်... ခင်ဗျားတို့ အဘိုးကြီး နှစ်ယောက်က ကပ်စေးနည်းလိုက်တာဗျာ... ကျုပ်ပဲ ယူလိုက်ပါ့မယ်... အလယ်အလတ်စား ဝိညာဉ်ကျောက်တုံး (၂,၀၀၀)"

အနည်းငယ် လွှမ်းမိုးလိုစိတ် ရှိပြီး ထူထဲသော အသံတစ်သံ ထွက်ပေါ်လာသည်။ စုယွီ၏ အခန်းထဲတွင် ယွီပိုင်ရှန်၏ မျက်နှာ အမူအရာ အနည်းငယ် ပြောင်းလဲသွားပြီး တိုးတိုးလေး ပြောလိုက်၏။

"တစ်သီးပုဂ္ဂလ ကျင့်ကြံသူ မိုးကြိုး တာအိုဆရာ ပဲ... အမြုတေ ဖွဲ့စည်းခြင်း အလယ်အလတ် အဆင့် ရှိတယ်"

နောက်တစ်ခဏတွင် နက်ရှိုင်းသော အသံတစ်သံ ထွက်ပေါ်လာသည်။

"(၂,၁၀၀)..."

ထိုအသံ မဆုံးမီမှာပင် မိုးကြိုး တာအိုဆရာက လွှမ်းမိုးလိုစိတ်ဖြင့် ထပ်မံ ပြောဆိုလိုက်၏။

"(၂,၅၀၀)... ကျုပ် ပြောသားပဲ... ကပ်စေးမနည်းကြနဲ့လို့... ခင်ဗျားတို့ ပိုက်ဆံ မပေးချင်ရင် ဒီဆေးလုံးကို ကျုပ်ပဲ ယူလိုက်မယ်... ကျုပ် လိုချင်တယ်"

"မိုးကြိုး မိတ်ဆွေ... ခင်ဗျားက လွန်နေပါပြီ"

"ငါ (၂,၆၀၀) ပေးမယ်"

"(၂,၇၀၀)"

ဈေးနှုန်းသည် ဆက်တိုက် မြင့်တက်နေပြီး အလယ်အလတ်စား ဝိညာဉ်ကျောက်တုံး (၃,၀၀၀) ကို လျင်မြန်စွာ ကျော်လွန်သွား၏။

ဈေးနှုန်း (၃,၅၀၀) အထိ ရောက်ရှိသွားသောအခါ မိုးကြိုး တာအိုဆရာသည် ထပ်မံ လေလံမဆွဲတော့ပေ။ သို့သော် 'ဟောင်ထျန်း ဆေးလုံး' ကို လိုချင်နေကြသော အင်အားစု အနည်းငယ် ရှိနေဆဲ ဖြစ်၏။

နောက်ဆုံးတွင် တစ်စုံတစ်ယောက်က အလယ်အလတ်စား ဝိညာဉ်ကျောက်တုံး (၄,၇၀၀) ပေးလိုက်၏။

ယွီပိုင်ရှန်နှင့် ယွီပိုင်ဟယ်တို့၏ မျက်နှာ အမူအရာများ အနည်းငယ် ပြောင်းလဲသွား၏။ ဤအသံသည် သူတို့ မကြားချင်ဆုံး အသံ ဖြစ်သောကြောင့် ဖြစ်၏။ သူတို့ လေသံတိုးတိုးဖြင့် ပြောလိုက်ကြ၏။

"မကောင်းတော့ဘူး... ဒါ ယွင်ကျန်းဂိုဏ်း ဂိုဏ်းချုပ်ပဲ"

စိုးရိမ်ပူပန်သော အကြည့်များအောက်တွင် 'ဟောင်ထျန်း ဆေးလုံး' ကို ယွင်ကျန်းဂိုဏ်းက အောင်မြင်စွာ လေလံဆွဲ ရယူသွားခဲ့သည်။

တတိယထပ်ရှိ အခန်းများထဲမှ တစ်ခုဝယ်၊

တာအိုဆရာ ရှုဟိုင် သည် ထိုနေရာသို့ ယခုမှ ရောက်ရှိလာပြီး 'ဟောင်ထျန်း ဆေးလုံး' ၏ ကနဦး ဈေးနှုန်းကို ကြည့်ကာ ခေါင်းခါလိုက်မိသည်။

"ဒီပစ္စည်းက အလွန်ဆုံး ရှိမှ တုပ အမြုတေ အဆင့်ကို ရောက်အောင်ပဲ ကူညီပေးနိုင်မှာ... ဖြစ်နိုင်တာက ကျုပ်ရဲ့ လက်ရှိ အင်အားထက်တောင် နည်းနေဦးမှာ... ဒီလောက်ထိ ဈေးကြီးပေးပြီး ချီးမွမ်းနေဖို့ လိုလို့လား"

သူ့ပခုံးပေါ်ရှိ လက်ဖဝါး အရွယ်အစားခန့် မိစ္ဆာလိပ် သည် အောက်ဘက်သို့ ငုံ့ကြည့်လိုက်၏။ မိစ္ဆာမျိုးနွယ်ဝင် ဖြစ်ကြောင်း ထုတ်ဖော်မပြချင်သဖြင့် စိတ်ချင်း ဆက်သွယ် ပြောဆိုလိုက်၏။

"ကျစ်... ကျစ်... မင်းက သာမန် ကျင့်ကြံသူတွေရဲ့ လိုအပ်ချက်ကို တကယ်ပဲ အထင်ကြီးလေးစားမှု မရှိပါလား"

"မင်းရဲ့ မျက်လုံးထဲမှာတော့ မင်းက ထူးချွန်တဲ့ ပါရမီ ရှိပြီး အမြုတေ ဖွဲ့စည်းခြင်း အဆင့်ကို ရောက်ဖို့ အခွင့်အလမ်း များတယ် ဆိုတော့... ဒီ ဟောင်ထျန်း ဆေးလုံးက မင်းအတွက် ဘာမှ မဟုတ်ဘူးပေါ့လေ"

"ဒါပေမဲ့ သာမန် ကျင့်ကြံသူတွေရဲ့ မျက်လုံးထဲမှာတော့ ဒီ ဟောင်ထျန်း ဆေးလုံးက သူတို့ရဲ့ တစ်ခုတည်းသော ရွေးချယ်စရာပဲ"

"တုပ အမြုတေ အဆင့် ရောက်သွားရင် အနည်းဆုံးတော့ သူတို့ရဲ့ အင်အား တိုးလာမယ်... ပိုအရေးကြီးတာက လူသား သက်တမ်း ကန့်သတ်ချက်ကို ကျော်လွန်ပြီး နောက်ထပ် နှစ် (၁၀၀) လောက် ပိုအသက်ရှင်နိုင်မှာလေ"

"ဒီ အပိုဆောင်း သက်တမ်း နှစ် (၁၀၀) က တန်ဖိုး မရှိဘူးလား"

ထိုစကားများအား ကြားသောအခါ၊ တာအိုဆရာ ရှုဟိုင် ခေတ္တမျှ နှုတ်ဆိတ်သွားပြီးနောက် လေးနက်စွာ ခေါင်းငြိမ့်လိုက်၏။

"တန်ဖိုး ရှိပါတယ်"

အောက်ထပ်တွင် တာအိုဆရာ ဟုန်အာသည် နောက်ဆုံး လေလံပစ္စည်း ဖြစ်သော ထူးကဲသော မှော်လက်နက် တစ်ခုကို ထုတ်ယူပြသလိုက်၏။ တာအိုဆရာ ရှုဟိုင် စိတ်ဝင်တစား ကြည့်ရှုနေသည်။

သူ့ဆရာ ဖြစ်သော တာ့ယွဲ့ နန်းတော်မှ အမြုတေ ဖွဲ့စည်းခြင်း အဆင့် အကြီးအကဲ တာအိုဆရာ ထျဲကျွမ်သည် တာ့ယွဲ့ မှောင်ခိုဈေးကို ကိုယ်တိုင် ကြီးကြပ်ကွပ်ကဲနေသဖြင့် သူသည် လေလံပွဲတွင် ပါဝင်ခွင့် ရရှိခဲ့ခြင်းပါပင်။

အခန်း (၁၅၀) - အသက်ရှည်ခြင်း အဆင့်နှင့် မိစ္ဆာလိပ်၏ လှည့်စားမှု (အပိုင်း ၃)

~တာအိုဆရာ ရှုဟိုင်သည် အင်အားစု အသီးသီးက ရှားပါး မှော်လက်နက်များကို အလုအယက် လေလံဆွဲနေကြသည်ကို ကြည့်နေစဉ်၊ သူ့ပခုံးပေါ်ရှိ မိစ္ဆာလိပ် သည် ရုတ်တရက် တုန်လှုပ်သွားပြီး မျက်လုံးများ ပြူးကျယ်သွား၏။ ၎င်း၏ မျက်ခွံများ ပင့်တက်သွားပြီး ဟာသဆန်သော မျက်နှာ အမူအရာ ဖြစ်ပေါ်သွား၏။

မိစ္ဆာလိပ်သည် ဒုတိယထပ်ရှိ သီးသန့် အခန်း တစ်ခုကို အံ့သြမှင်သက်စွာ ကြည့်နေမိသည်။ မျက်စိကျိန်းမတတ် တောက်ပသော အစိမ်းရောင် အလင်းတန်း တစ်ခုသည် သူ့ကို လှမ်းပုတ်လိုက်သကဲ့သို့ ခံစားလိုက်ရ၏။ သူ မျက်တောင် အကြိမ်ကြိမ် ခတ်ကြည့်သော်လည်း အခြေအနေမှာ အတူတူပင်။ သူသည် ထူးခြားသော ကံတရား တစ်ခုကို ရှာဖွေတွေ့ရှိခဲ့လေပြီ။ ခေတ္တမျှ တိတ်ဆိတ်သွားပြီးနောက် မိစ္ဆာလိပ်သည် စိတ်လှုပ်ရှားစွာဖြင့် စိတ်ချင်း ဆက်သွယ်ကာ ပြောလိုက်၏။

"ရှုဟိုင်... အဲဒီ လူငယ်လေးကို မင်း သိလား"

"ဘယ်သူလဲ"

မိစ္ဆာလိပ်၏ အသံထဲတွင် တုန်ရီနေမှုများ ပါဝင်နေသဖြင့် တာအိုဆရာ ရှုဟိုင် နားမလည်နိုင် ဖြစ်သွား၏။

"ဟိုတစ်ယောက်လေ"

မိစ္ဆာလိပ်က အချက်ပြလိုက်သောအခါ တာအိုဆရာ ရှုဟိုင်သည် သီးသန့် အခန်း၏ လက်ရန်းနားသို့ လျှောက်သွားပြီး ဒုတိယထပ်ရှိ အခန်း တစ်ခုအတွင်းမှ အစိမ်းရောင် ဝတ်ရုံ ဝတ်ဆင်ထားသော လူငယ်လေးကို ကြည့်လိုက်၏။ သူ မျက်မှောင် အနည်းငယ် ကြုတ်လိုက်ပြီး ခေါင်းခါလိုက်ကာ ပြောလိုက်၏။

"ငါ မသိဘူး"

ထို့နောက် သူသည် ပခုံးပေါ်ရှိ မိစ္ဆာလိပ်ကို နားမလည်နိုင်စွာ ကြည့်ပြီး မေးလိုက်၏။

"သူက ဘာဖြစ်လို့လဲ"

"သူနဲ့ မိတ်ဆွေဖွဲ့... သူ့ကို ကျေနပ်အောင် ထား... ပြီးရင် သူ့နောက်လိုက် လုပ်လိုက်"

မိစ္ဆာလိပ်သည် နောက်ခြေထောက် နှစ်ချောင်းဖြင့် မတ်တပ်ရပ်လိုက်ပြီး၊ တာအိုဆရာ ရှုဟိုင်ကို လှည့်ကြည့်ကာ ပုံမှန် မဟုတ်သော အလေးအနက် အမူအရာဖြင့် စိတ်ချင်း ဆက်သွယ် ပြောဆိုလိုက်၏။

တာအိုဆရာ ရှုဟိုင် ခေတ္တမျှ ကြောင်အမ်းသွား၏။

အသိစိတ် ပြန်ဝင်လာသောအခါ တာအိုဆရာ ရှုဟိုင်သည် မျက်လုံးများ ဖြည်းညှင်းစွာ ပြူးကျယ်လာပြီး မိစ္ဆာလိပ်ကို ကြည့်ကာ စိတ်ပျက်လက်ပျက်ဖြင့် တံတွေးထွေးလုနီးပါး ဖြစ်သွား၏။

"မင်း ဘာပြောနေတာလဲ ဆိုတာကို နားလည်ရဲ့လား... ငါက တာ့ယွဲ့ နန်းတော် အကြီးအကဲ တစ်ယောက်ရဲ့ တိုက်ရိုက် တပည့်ကွ... မင်းက ငါ့ကို သူ့ကို ကျေနပ်အောင် ထားပြီး နောက်လိုက် လုပ်ခိုင်းနေတာလား"

"သူ့မှာ ဘာအရည်အချင်း ရှိလို့လဲ"

"သူက ဧကန္တ.. ဘယ်သူလဲ"

သူ မသိဘူး ဆိုကတည်းက ထိုလူငယ်သည် တာ့ယွဲ့ နန်းတော်မှ ထိပ်တန်း ပါရမီရှင် တစ်ဦး မဟုတ်ဘဲ သာမန် ကျင့်ကြံသူ တစ်ဦးသာ ဖြစ်ကြောင်း ထင်ရှားနေပေသည်။

ထိုလူငယ်သည် အခြေခံ တည်ဆောက်ခြင်း (အဆင့် ၃) မျှသာ ရှိသေးပြီး၊ အလွန် အားနည်းကာ သာမန် ဆန်လွန်းပြီး၊ ထူးခြားမှု မရှိကြောင်း တာအိုဆရာ ရှုဟိုင် တစ်ချက်ကြည့်ရုံဖြင့် သိရှိနိုင်သည်။ သူ ကိုယ်တိုင်ကမူ တာ့ယွဲ့ နန်းတော်၏ တိုက်ရိုက် တပည့် ဖြစ်ပြီး၊ အခြေခံ တည်ဆောက်ခြင်း (အဆင့် ၉) သို့ ရောက်ရှိနေသည့်အပြင် မြေကမ္ဘာ အဆင့် ဝိညာဉ်အမြစ် ပိုင်ရှင် ဖြစ်ကာ တစ်ဖက်လူထက် လုံးဝ သာလွန်နေပေသည်။

သူက ဒီလို သာမန် ကျင့်ကြံသူ တစ်ယောက်ရဲ့ နောက်လိုက် လုပ်ရမယ်တဲ့လား။ ဒီလိပ်အိုကြီး ရူးသွားပြီလား။

သို့သော် မိစ္ဆာလိပ်က သူ့ကို အထင်သေးသော အကြည့်ဖြင့် ကြည့်ပြီး ပြောလိုက်၏။

"တာ့ယွဲ့ နန်းတော်ရဲ့ တိုက်ရိုက် တပည့် ဆိုတာကြီးကို အရမ်း မြင့်မြတ်တဲ့ အရာ တစ်ခုလို ထပ်ခါတလဲလဲ မပြောစမ်းပါနဲ့... မင်းက အဲဒါကို ဆုတံဆိပ် တစ်ခုလို ဝှေ့ယမ်းပြနေတာ... ရှက်ဖို့ ကောင်းလိုက်တာကွာ"

"ငါ မင်းကို ဘာလို့ သူ့ကို ကျေနပ်အောင် ထားပြီး နောက်လိုက် လုပ်ခိုင်းလဲ ဆိုတာ သိလား"

မိစ္ဆာလိပ်က စိတ်ချင်း ဆက်သွယ် ပြောဆိုလိုက်၏။

"ဒီလို ပြောပြမယ်ကွာ... မင်းက နည်းနည်းလေး အသုံးဝင်လို့သာ ငါ မင်းကို အဖော် အဖြစ် ခေါ်ထားတာ... ငါနဲ့အတူ စားကောင်းသောက်ဖွယ်တွေ စားသောက်ခွင့် ပေးထားတာ"

"ဒါပေမဲ့ အဲဒီလူကို မြင်လိုက်ရတဲ့ အချိန်မှာ... ငါ သူ့ရှေ့မှာ ဒူးထောက်ပြီး ငါ့ကို လက်ခံပါလို့ တောင်းပန်ချင်စိတ် ပေါက်သွားတယ်... အဲဒီ ကွာခြားချက်ကို မင်း နားလည်လား"

သောက်ကျိုးနည်း။

တာအိုဆရာ ရှုဟိုင်သည် မိစ္ဆာလိပ်ကို ကြည့်ပြီး လုံးဝ အံ့အားသင့်သွား၏။ သူသည် အမြဲတမ်း တည်ငြိမ်အောင် နေတတ်သူ ဖြစ်သော်လည်း၊ မကြာသေးမီက အကြောင်းပြချက် တစ်စုံတစ်ရာ မရှိဘဲ အရာရာ ကမောက်ကမ ဖြစ်နေသကဲ့သို့ ခံစားနေရ၏။

ငါက တကယ်ပဲ အဲဒီလောက် ညံ့ဖျင်းနေလို့လား။

သို့သော် အချိန်အတော်ကြာမှ တာအိုဆရာ ရှုဟိုင် ဖြည်းညှင်းစွာ ပြန်လည် တည်ငြိမ်သွားပြီး သူ့မျက်နှာ အမူအရာ သိသိသာသာ လေးနက်သွား၏။ မိစ္ဆာလိပ် ပြောသော စကားများကို တွေးတောရင်း သူ့ရင်ထဲတွင် သံသယများနှင့် လှုပ်ရှားမှုများ ပြည့်နှက်သွား၏။

မိစ္ဆာလိပ်၏ စကားများသည် ရိုင်းစိုင်းသော်လည်း အကြောင်းပြချက် မရှိဘဲ ပြောဆိုခြင်းတော့ မဟုတ်ပေ။

တာအိုဆရာ ရှုဟိုင်သည် မိစ္ဆာလိပ်၏ အစစ်အမှန် စွမ်းရည်များကို မြင်တွေ့ဖူးပြီး ဖြစ်၏။

၎င်းသည် ထူးဆန်းပြီး နတ်ဆရာ ကဲ့သို့ ဖြစ်နေသော်လည်း၊ အလွန် လျှို့ဝှက်ဆန်းကြယ်ပြီး တာအို ကျင့်ကြံခြင်း အရိပ်အယောင်များ ပြသနေကာ သာမန် မိစ္ဆာ တစ်ကောင် မဟုတ်သည်မှာ သေချာသည်။

မိစ္ဆာလိပ်၏ အစစ်အမှန် အင်အားကို သူ မသိသော်လည်း တာအိုဆရာ ရှုဟိုင် သေချာ သိသော အချက်တစ်ချက် ရှိသည်။ ၎င်းမှာ သူသည် မိစ္ဆာလိပ်ကို နိုင်အောင် တိုက်ခိုက်နိုင်မည် မဟုတ်ဘဲ၊ မိစ္ဆာလိပ်၏ အင်အားသည် သူ ထင်ထားသည်ထက် ကျော်လွန်နေနိုင်သည် ဆိုသော အချက်ပင်။

ထိုသို့ဆိုလျှင် မိစ္ဆာလိပ်၏ စကားများကို ဟာသ အဖြစ် သဘောထား၍ မရနိုင်ပေ။

ထို့အပြင် မိစ္ဆာလိပ်၏ အမူအရာကို ကြည့်ခြင်းအားဖြင့် သူပြောသော စကားများသည် အတည်ဖြစ်ကြောင်း ထင်ရှားနေသည်။

မိစ္ဆာလိပ်၏ မျက်လုံးထဲတွင် တာအိုဆရာ ရှုဟိုင်သည် နောက်လိုက် တစ်ယောက် အဖြစ်သာ ထိုက်တန်သော်လည်း၊ ထိုလူငယ်မှာမူ မိစ္ဆာလိပ် ကိုယ်တိုင် ဒူးထောက်ပြီး ခိုလှုံခွင့် တောင်းခံချင်လောက်အောင် ထိုက်တန်သူ ဖြစ်နေသည်။

ဒီ ကွာခြားချက်က...

'ဘာလို့လဲ'

တာအိုဆရာ ရှုဟိုင် မကျေနပ်နိုင်ပေ။ အနည်းငယ် စိတ်ဆိုးမိသည်။ ဘာပဲဖြစ်ဖြစ် သူသည် ကျော်ကြားသော တာ့ယွဲ့ နန်းတော်မှ ပါရမီရှင် တစ်ဦး ဖြစ်သည် မဟုတ်ပါလော။ ဘာကြောင့် သူက ထိုလူငယ်ထက် နိမ့်ကျနေရသနည်း။

ဒါပေါ့လေ။ သူလည်း ဒီကိစ္စကို နားမလည်နိုင်သဖြင့် ခေတ္တမျှ တိတ်ဆိတ်သွားပြီးနောက်၊ ဂျူနီယာ ညီငယ် တစ်ဦးကို ခေါ်ယူပြီး စုယွီ၏ နောက်ခံ သမိုင်းကြောင်းကို စုံစမ်းခိုင်းလိုက်၏။

သူ နောက်လိုက် လုပ်ဖို့ ဆိုတာ မဖြစ်နိုင်ပါ။ တာ့ယွဲ့ နန်းတော်ရဲ့ ဂုဏ်ယူဝင့်ကြွားရသော တိုက်ရိုက် တပည့် တစ်ယောက် အနေနှင့် နာမည် မရှိသည့် လူတစ်ယောက်၏ နောက်လိုက် ဘယ်တော့မှ အဖြစ်ခံမှာ မဟုတ်ပါ။

မိတ်ဆွေဖွဲ့ရုံ သက်သက်... ဟွန့်... ပြီးတော့ သူ့ကို ကျေနပ်အောင် ထားရုံ ဆိုလျှင်တော့..... မတတ်သာ၍သာ၊ လုပ်ပေးချင် လုပ်ပေးလိုက်မည်။

နက်နက်ရှိုင်းရှိုင်း အကြံထုတ်ပြီးနောက် တာအိုဆရာ ရှုဟိုင် သက်ပြင်းချလိုက်ပြီး စိတ်ချင်း ဆက်သွယ် ပြောဆိုလိုက်၏။

"မင်း အမှန်အတိုင်း ပြောတာ ဖြစ်ပါစေလို့ မျှော်လင့်ပါတယ်"

သို့သော် မိစ္ဆာလိပ်သည် ထိုနေရာကို စိတ်အားထက်သန်စွာ ကြည့်ရှုနေပြီး စိတ်မရှည်စွာဖြင့် စိတ်ချင်း ဆက်သွယ် ပြောဆိုလိုက်၏။

"တကယ်တော့ ငါသာ မင်းကို နောက်လိုက် အဖြစ် လက်မခံခဲ့ဘူး ဆိုရင်... ပြီးတော့ ကံတရား အကြွေး တချို့ ပေးဆပ်စရာ မရှိဘူး ဆိုရင်... ငါ အခုလောက်ဆို သူ့ဘေးနားကို ရောက်နေလောက်ပြီ"

သူ့ထက်ပင် ပိုမို မျက်နှာလိုမျက်နှာရ လုပ်ပြီး အရှက်မဲ့သော နောက်လိုက် တစ်ဦးကဲ့သို့ ပြုမူနေသည့် မိစ္ဆာလိပ်ကို ကြည့်ရင်း တာအိုဆရာ ရှုဟိုင် ဒေါသထွက်လာသည်။

လိပ်တစ်ကောင်က ဘယ်လိုလုပ်ပြီး ဒီလို အပြုအမူမျိုး ရှိနေရတာလဲ။

"ကြည့်နေတာ ရပ်လိုက်စမ်းပါ... ဂုဏ်သိက္ခာလေး ဘာလေး ထားပါဦးကွာ... ဟုတ်ပြီလား"

တာအိုဆရာ ရှုဟိုင် ဒေါသတကြီးဖြင့် သော်လည်းကောင်း၊ ကူကယ်ရာမဲ့စွာဖြင့် သော်လည်းကောင်း အကြံပေးလိုက်၏။

မိစ္ဆာလိပ်က ခေါင်းပင် လှည့်မကြည့်ဘဲ ပြန်ပြောလိုက်၏။

"မင်း နားမလည်ပါဘူးကွာ"

တာအိုဆရာ ရှုဟိုင် - "..."

သူ ရင်နာသလို ခံစားလိုက်ရပြီး ငိုချင်သွား၏။ ဘာတွေ ဖြစ်နေတာလဲ။

ခဏအကြာဝယ်၊

ဂျူနီယာ ညီငယ် တစ်ဦးသည် ကျောက်စိမ်းမှတ်တမ်း တစ်ခု ကိုင်ဆောင်ကာ ဝင်ရောက်လာပြီး ရိုသေသမှုဖြင့် ပြောလိုက်၏။

"စီနီယာ အစ်ကိုကြီး... ဒါက ကောင်းကင်ဘုံ ဈေးကွက် ခန်းမဆောင် ကနေ ဝယ်ယူလာတဲ့ သတင်းအချက်အလက်တွေပါ... အဲဒီလူ မွေးဖွားချိန်ကနေ လက်ရှိ အချိန်အထိ အကုန် ပါပါတယ်"

"မင်း သွားလို့ ရပြီ"

တာအိုဆရာ ရှုဟိုင် ကျောက်စိမ်းမှတ်တမ်းကို ယူလိုက်ပြီး ဂျူနီယာ ညီငယ်ကို ထွက်သွားရန် လက်ဝှေ့ယမ်း ပြလိုက်၏။ ထို့နောက် သူ၏ နတ်ဘုရား အာရုံကို ကျောက်စိမ်းမှတ်တမ်းထဲသို့ နှစ်မြှုပ်လိုက်၏။ ချက်ချင်း ဆိုသလိုပင် စုယွီနှင့် ပတ်သက်သော သတင်းအချက်အလက် အားလုံးသည် သူ့စိတ်ထဲတွင် ရှင်းလင်းစွာ ပေါ်လာသည်။

"စုယွီ... ယွင်ကျန်းဂိုဏ်း စုမိသားစုရဲ့ တတိယ ဘိုးဘေး... လက်ရှိ အသက် (၆၇) နှစ်... အဆင့်နိမ့် ဓာတ်ကြီးငါးပါး ဝိညာဉ်အမြစ် ပိုင်ရှင်... အခြေခံ တည်ဆောက်ခြင်း (အဆင့် ၃)... မြေကမ္ဘာနှင့် သစ်သား ဓာတ်သဘာဝ နှစ်မျိုးစလုံး ကျင့်ကြံထားတယ်လို့ သံသယ ရှိရတယ်... (ဒုတိယအဆင့်) အလယ်အလတ်တန်းစား ဆေးပညာရှင် ဖြစ်ပြီး အခြေခံ တည်ဆောက်ခြင်း (အဆင့် ၁) မှာတုန်းက ထိပ်တန်း အရည်အသွေး အခြေခံ တည်ဆောက်ခြင်း ဆေးလုံးကို ဖော်စပ်နိုင်ခဲ့ဖူးတယ်... ဆေးပညာမှာ ထူးချွန်တဲ့ ပါရမီ ရှိတယ်"

"သူ့ကို (ဒုတိယအဆင့်) ရုပ်သေး ပညာရှင်နဲ့ အဆောင်လက်ဖွဲ့ ပညာရှင်လို့ သံသယ ရှိရတယ်... စုမိသားစုနဲ့ ချန်မိသားစု နှစ်ခုစလုံးမှာ (ဒုတိယအဆင့်) ရုပ်သေး သားရဲတွေ အသုံးပြုတာ မြင်တွေ့ခဲ့ရပြီး၊ စုယွီရဲ့ ဘေးနားမှာလည်း (ဒုတိယအဆင့်) ရုပ်သေး သားရဲ တစ်ကောင် ရှိနေတယ်... (ဒုတိယအဆင့်) အဆောင်လက်ဖွဲ့တွေ အသုံးပြုတာကို စုမိသားစု၊ ချန်မိသားစုနဲ့ စုဇီ တို့ဆီမှာ မြင်တွေ့ခဲ့ရတယ်... ဒါကြောင့် ဒီသံသယက (၉၀) ရာခိုင်နှုန်းလောက် မှန်ကန်နိုင်ခြေ ရှိတယ်”