နောက်ထပ် အစိတ်အပိုင်းတစ်ခုလား

"ပုန်းကွယ်နေသော ဖီးနစ်သွေးမျိုးဆက်ပဲ"

မိုချန်၏ ကြွယ်ဝလှသောအတွေ့အကြုံများအရ လင်းနင်၏ဇာစ်မြစ်ကို တစ်ချက်ကြည့်ရုံနှင့် သိရှိသွားသည်။

"တကယ်ကြီး ပုန်းကွယ်နေသော ဖီးနစ်သွေးမျိုးဆက် ဖြစ်နေတာပဲ"

သူသည် နှစ်ကြိမ်တိုင်တိုင်ရေရွတ်ရင်း လင်းနင်ရှိရာသို့ အပြေးအလွှားသွားလိုက်သည်။ သွေးမျိုးဆက် နိုးထခြင်းဆိုသည်မှာ အင်မော်တယ်လောကတွင် အတွေ့ရများသောအရာဖြစ်၏။

သို့သော် သွေးမျိုးဆက်များတွင်လည်း အဆင့်အတန်းကွဲပြားမှုရှိသည်။ ပုန်းကွယ်နေသော ဖီးနစ်သွေးမျိုးဆက်မှာ ထိပ်တန်းအဆင့်တွင်ပါဝင်ပြီး အင်မော်တယ်လောကမှာပင် အလွန်ရှားပါး၏။

စောစောက ကျိလင်းဟန်ကိုတွေ့စဉ်ကလည်း သူ တိတ်တဆိတ်အံ့အားသင့်ခဲ့ရသည်။ ၎င်း၏ ဝင်ပေါက်ခုနှစ်ခု ထူးကဲခန္ဓာကိုယ်မှာလည်း အင်မော်တယ်လောကတွင် ထိပ်တန်းပါရမီတစ်ခုဟု သတ်မှတ်၍ရလေသည်။ ဂိုဏ်းအတွင်း ဤကဲ့သို့သောသူများရှိနေလိမ့်မည်ဟု သူမထင်ထားခဲ့ပေ။

ကောင်းကင်သားတော်ဖြစ်သည့်အတိုင်း ထိပ်တန်းပါရမီရှင်များကို ဆွဲဆောင်နိုင်သည်မှာမဆန်းချေ။ ယခု ပုန်းကွယ်နေသော ဖီးနစ်သွေးမျိုးဆက်ကိုပါ မြင်လိုက်ရသည့်အခါ ပို၍တုန်လှုပ်သွားရသည်။

ကောင်းကင်သားတော်တစ်ယောက်၏ ကံတရားမှာ ဤမျှအထိကြီးမားလှသည်။

ဤအမျိုးသမီးနှစ်ဦးသာ အင်မော်တယ်လောကသို့ရောက်သွားလျှင် အင်အားကြီးအဖွဲ့အစည်းများက သူတို့ကို အလုအယက်လုယူကြပေလိမ့်မည်။ ထိုသို့သောသူများကို အောက်လောကမှာကတည်းက သိမ်းသွင်းထားနိုင်ခဲ့သည်မှာ အံ့ဩစရာပင်။

"ဘာလဲ... ပုန်းကွယ်နေသော ဖီးနစ်သွေးမျိုးဆက်အကြောင်း သိတာလား"

"သိတာပေါ့။ ဒီမိန်းကလေးရဲ့သွေးမျိုးဆက်က တကယ်တော့ အပြည့်အဝမနိုးထသေးဘူး။ အကြောင်းကတော့ သူမက အမှောင်စွမ်းအားရှိတဲ့ကျင့်စဉ်ကို မကျင့်ရသေးလို့ပဲ..."

ကျန်းချန်ကလည်း စိတ်ထဲမှထောက်ခံလိုက်သည်။ ယခင်က သူ သိမြင်မှုစွမ်းရည်သုံးပြီး လင်းနင်ကို စစ်ဆေးစဉ်ကလည်း စနစ်ကလည်း ဤသို့ပြောခဲ့ဖူးသည်။

"ဒါဆို မင်းမှာ အမှောင်စွမ်းအားကျင့်စဉ်ရှိလား"

"ရှိတာပေါ့"

မိုချန်သည် လက်ဝါးချင်းပွတ်ရင်း ရတနာတစ်ခုကိုမြင်လိုက်ရသကဲ့သို့ လင်းနင်ကို မျက်တောင်မခတ်တမ်း ကြည့်နေတော့သည်။

"ဂိုဏ်းချုပ်... ကျွန်တော့်ရဲ့ဘွဲ့နာမည်က အမှောင်သခင်ဆိုတာကို မေ့သွားပြီလား။ ကျွန်တော်အဓိကကျင့်ကြံတာက အမှောင်စွမ်းအားကျင့်စဉ်တွေပဲ။ အကယ်၍ ဂိုဏ်းချုပ်သာမကန့်ကွက်ရင် ဒီမိန်းကလေးကို ကျွန်တော့်ရဲ့တပည့်အဖြစ်လက်ခံပြီး စိတ်ရောကိုယ်ပါ သင်ကြားပေးချင်ပါတယ်"

ဤစကားမှာ သူ၏ရင်ထဲမှလာသောစကားဖြစ်၏။ ၎င်းသည် ပုန်းကွယ်နေသော ဖီးနစ်သွေးမျိုးဆက် ဖြစ်သည်။ အကယ်၍ သူမကို ကောင်းကောင်းပျိုးထောင်ပြီး အင်မော်တယ်လောကသို့ ခေါ်သွားနိုင်လျှင် သူမ၏အောင်မြင်မှုမှာ သူမ၏ဆရာဖြစ်သောသူ့ထက်ပင် သာလွန်သွားပေလိမ့်မည်။

သူ၏အနာဂတ်အတွက်အားကိုးရမည့် ရွှေပေါင်ကြီးတစ်လုံးကို ကြိုတင်ရှာထားခြင်းနှင့်အတူတူပင်။

မိုချန်ကိုဆရာတင်ခြင်းက လင်းနင်အတွက် ပို၍အလားအလာကောင်းသဖြင့် ကျန်းချန်လည်း မကန့်ကွက်ပေ။

"ရပါတယ်၊ ဒါပေမဲ့ ရှောင်ဟန်ရဲ့ သဘောထားကို အရင်မေးရမယ်"

အကြောင်းမှာ သူမက လင်းနင်၏ လက်ရှိဆရာဖြစ်နေသောကြောင့်ပင်။

"ကျွန်မလည်း မကန့်ကွက်ပါဘူး"

ကျိလင်းဟန်ကလည်း ချက်ချင်းပင် ခေါင်းညိတ်သဘောတူလိုက်သည်။ သူမ လင်းနင်ကို တပည့်အဖြစ် အတင်းလက်ခံခဲ့ခြင်းမှာ ကျန်းချန်ကိုဆရာမတင်မိအောင် တားဆီးရန်သာ။

မိုချန်ကို ဆရာတင်မည်ဆိုလျှင်တော့ သူမဂရုမစိုက်ပေ။

"ကျွန်မ သဘောမတူဘူး"

လင်းနင်မှာ နားထောင်နေရင်းနှင့် ဂိုဏ်းချုပ်ကသူမကို အခြားတစ်ယောက်ဆီ ထပ်တွန်းပို့နေသည်ကို သိသဖြင့် ချက်ချင်းပင်မကျေမနပ်ဖြစ်သွားသည်။

"ဂိုဏ်းချုပ်က ကျွန်မကို ဘေးနားမှာမထားချင်တာ တကယ်ပဲလား... ကျွန်မ အခုကြီးလာပြီလေ၊ သူတို့ထက်မညံ့ပါဘူး"

သူမသည် အစ်ကိုကြီးချန်၏ လက်မောင်းကိုလွှတ်လိုက်ပြီး သူမ၏ရင်ဘတ်ကိုပုတ်ပြကာ မျက်လုံးများ နီမြန်းလာတော့သည်။

ရွှမ်ကျီရုပ်ပုံထဲတွင် နှစ်ပေါင်း ၇၀ ကြာနေထိုင်ခဲ့ပြီးနောက် သူမသည် အပြည့်အဝ ဖွံ့ဖြိုးကြီးထွားခဲ့လေပြီ။ ဝိညာဉ်ခွဲထုတ်ခြင်းအဆင့်၏အစွမ်းကြောင့် ရုပ်ရည်ကို ထိန်းသိမ်းထားနိုင်သဖြင့် သူမသည် အသက် ၂၀ အရွယ် အလှဆုံးပုံစံမှာပင်ရှိနေသည်။

အစ်ကိုကြီးချန် သက်ပြင်းချလိုက်မိသည်။

"မိန်းကလေးရာ... ဒါက သေကွဲရှင်ကွဲ ခွဲခွာရမှာမှ မဟုတ်တာ၊ ဒီလောက်ထိဝမ်းနည်းနေဖို့ လိုလို့လား။ အကြီးအကဲမိုကလည်း ငါတို့ဂိုဏ်းထဲဝင်လာတာပဲ၊ ငါတို့ နေ့တိုင်းတွေ့လို့ရနေတာပဲလေ"

လင်းနင်က ဇွဲမလျှော့ပေ။

"ဒါပေမဲ့ ဂိုဏ်းချုပ် အရင်ကတိပေးခဲ့တယ်လေ၊ ကျွန်မသာ ကျိလင်းဟန်ကိုကျော်တက်နိုင်ရင် ကျွန်မကို တပည့်အဖြစ်လက်ခံမယ်လို့"

ငါဘယ်တုန်းက အဲဒီလိုပြောခဲ့လို့လဲ... အဲဒါ မင်းတို့နှစ်ယောက်ဘာသာ ဆုံးဖြတ်ခဲ့တာမဟုတ်လား

ကျန်းချန် စိတ်ထဲကရေရွတ်လိုက်မိသည်။ ၎င်းအပြင် သူမက ကျိလင်းဟန်ကို မကျော်တက်နိုင်သေးပေ။

လင်းနင်မှာ အလွန်စိတ်မကောင်းဖြစ်နေသည်ကိုမြင်ရသဖြင့် သူက တရားဝင်ကတိတစ်ခု ပေးလိုက်ရတော့သည်။

"ဒီလိုလုပ်ရအောင်... မင်းသာ အကြီးအကဲမိုချန်ရဲ့ အထွတ်အထိပ်အချိန်က ကျင့်ကြံမှုအဆင့်ကို ကျော်တက်နိုင်ရင် ငါမင်းကိုတပည့်အဖြစ် သေချာပေါက်လက်ခံမယ်။ ငါ ကတိမဖျက်ဘူး"

"တကယ်လား"

"တပည့်အားလုံး သက်သေအဖြစ်မှတ်ထားကြ"

အစ်ကိုကြီးချန်က လက်ခါပြီးပြောလိုက်သည်။

ရောက်နေသူအားလုံးမှာ စိတ်ထဲမှနေ၍ 'ဂိုဏ်းချုပ်ကတော့ လိမ်နေပြန်ပြီ' ဟု တွေးနေကြသည်။

လင်းနင်မှာ ရွှမ်ကျီရုပ်ပုံထဲက ထွက်လာကာစဖြစ်သဖြင့် အကြီးအကဲမိုမှာ အင်မော်တယ်တစ်ပါးဖြစ်ကြောင်း မသိပေ။

သူမ၏ပါရမီနှင့်ဆိုလျှင် နှစ်အနည်းငယ်အတွင်း ကျော်တက်နိုင်မည်ဟု ထင်နေပေလိမ့်မည်။

"ကောင်းပြီလေ"

ထိုအခါမှသာ လင်းနင်မှာ ဝမ်းနည်းရာမှ ဝမ်းသာသွားတော့သည်။ သူမသည် မိုချန်နှင့်တွေ့ဆုံကာ တပည့်အဖြစ် ဂါရဝပြုလိုက်သည်။

မိုချန်မှာလည်း ပြုံးပျော်နေတော့သည်၊ ဤကဲ့သို့သော ပါရမီရှင်တစ်ဦးကို တပည့်အဖြစ်ရရှိလိုက်ခြင်းမှာ တန်ဖိုးမဖြတ်နိုင်သောရတနာတစ်ခုကို ရရှိလိုက်သကဲ့သို့ပင်။

ထိုအချိန်တွင် "အဝါလေး" က စိတ်ချင်းဆက်သွယ်ကာ သတင်းပို့လိုက်သည်။

"မေမေ... မေမေ... အစိတ်အပိုင်း... အစိတ်အပိုင်းတစ်ခု လာနေပြီ"

"ဟမ်... သမီးလေး... ဘာတွေပြောနေတာလဲ"

"နောက်ထပ်အစိတ်အပိုင်းတစ်ခု... ဖေးရှန်ဂိုဏ်းကိုလာနေပြီ။ မေမေ အဲဒါကို ရအောင်ယူရမယ်"

"ဟာ"

ကျန်းချန်ကြောင်သွားသည်။

ကမ္ဘာ့နှလုံးသားအစိတ်အပိုင်းတွေမှာ ခြေထောက်တွေ ပါလာလို့လား... ၎င်းက ဖေးရှန်ဂိုဏ်းကို သူ့ဘာသာသူလာတယ်ဟုတ်လား...

ချက်ချင်းဆိုသလိုပင် အဝေးမှ စည်းချက်ကျကျတီးမှုတ်သံများကို အားလုံးကြားလိုက်ကြရ၏။ မော့ကြည့်လိုက်သည့်အခါ သူတို့အားလုံးလန့်သွားကြတော့သည်။

မီတာထောင်ချီရှည်လျားသော အဖြူရောင်ဝိညာဉ်ငှက်ကြီးတစ်ကောင်သည် သူတို့ရှိရာပျံသန်းလာနေသည်။

ဝိညာဉ်ငှက်ကြီး၏ဘေးပတ်ပတ်လည်တွင် သံချပ်ကာဝတ်စစ်သည်တော်ရာပေါင်းများစွာ ဝန်းရံလျှက်ရှိ၏။ လမ်းတစ်လျှောက်တွင်လည်း ပန်းပွင့်လေးများမှာ မိုးရွာသကဲ့သို့ တဖွဲဖွဲကျဆင်းနေပြီး အလွန်လှပသော မြင်ကွင်းတစ်ခုဖြစ်နေသည်။

ဖေးရှန်ဂိုဏ်းတွင် ဂိုဏ်းစောင့်အစီအရင် သို့မဟုတ် ဂိတ်စောင့်တပည့်များ မရှိသဖြင့် သူတို့မှာ အတားအဆီးမရှိ ဝင်ရောက်လာကြသည်။

လမ်းပြအဘိုးကြီးမိုချန်က ဂိုဏ်းချုပ်အတွက် သတင်းအချက်အလက်များကို အချိန်မီပေးလိုက်၏။

"အဲဒါ လွမ်ငှက်ပဲ၊ အဆင့် ၆ ဝိညာဉ်သားရဲတစ်မျိုးပေါ့။ ဒါပေမဲ့ သူက တိုက်ခိုက်ရေးမှာ မတော်ဘူး၊ ဒါကြောင့်ဖမ်းရလွယ်ပြီး စီးတော်ယာဉ်အဖြစ်သုံးကြတာ"

သူသည် အခြားတပည့်များကဲ့သို့ မြှောက်ပင့်ရမှာကိုဝန်လေးနေသော်လည်း သူ၏ပညာရပ်ပိုင်းဆိုင်ရာ ဗဟုသုတများကို ထုတ်ကြွားရန်အခွင့်အရေးကိုတော့ ကျွမ်းကျင်စွာအသုံးချတတ်သည်။

ကျန်းချန်က ခေါင်းညိတ်လိုက်သော်လည်း စိတ်ထဲတွင်တော့ အနည်းငယ် မနာလိုဖြစ်နေမိ၏။ ဝိညာဉ်ငှက်၏ တိုက်ခိုက်ရေးစွမ်းအားက မည်သို့ဖြစ်စေ အဓိကကတော့ ပွဲထွက်ပုံက ခမ်းနားလွန်းနေခြင်းပင်... ကြွားရန်သက်သက်သုံးမည်ဆိုလျှင် အနည်းဆုံး မှတ် ၆၆ မှတ်လောက်တိုးနိုင်မှာ သေချာသည်။

လွမ်ငှက်ကြီးနီးကပ်လာသည့်အခါ နေရောင်ကိုကွယ်သွားသဖြင့် ကောင်းကင်မှာ မှောင်အတိ ကျသွားတော့သည်။ ထိုအခါမှသာ လွမ်ငှက်၏ကျောပေါ်တွင် လူတစ်ယောက်တည်းမဟုတ်ဘဲ အနည်းဆုံး လူတစ်ရာခန့်ရှိနေသည်ကို အားလုံးမြင်လိုက်ရ၏။

အလယ်တွင် ငယ်ရွယ်ချောမောသော အမျိုးသမီးတစ်ဦး ထိုင်နေသည်။ သူမသည် အရောင်စုံပြီး ခန့်ညားသော ပိုးထည်ဝတ်ရုံကို ဝတ်ဆင်ထားကာ ပန်းရောင် လီလီပန်းပုံစံစကတ်နှင့် ရွှေရောင် ဇာပါးလေးကို ခြုံထားသည်။

သူမ၏ ဆံပင်တွင် ပုလဲနှင့် ကျောက်စိမ်းဆံထိုးကို ထိုးထားပြီး နီးကပ်လာသည့်အခါ သူမ၏လှပသောမျက်နှာကို အားလုံးမြင်တွေ့လိုက်ရသည်။

လွမ်ငှက်၏ကျောပေါ်တွင် သေးငယ်ပြီးလက်ရာမြောက်သော ယာယီနန်းဆောင်တစ်ခုရှိပြီး သူမက ထိုနန်းဆောင်၏အလယ်တွင်ထိုင်နေ၏။

ကြာပန်းလေးများကဲ့သို့ လှပသော နန်းတွင်းအပျိုတော်ရှစ်ဦးက သူမကိုခစားနေကြပြီး နောက်ကွယ်မှ ပုလွေနှင့် စောင်းတီးနေသူများမှာလည်း နန်းတွင်းအပျိုတော်များပင်ဖြစ်ကြသည်။

လွမ်ငှက်၏ ဘေးပတ်လည်တွင်လည်း တောက်ပသော ငွေရောင်သံချပ်ကာဝတ်ဆင်ထားသည့် နန်းတွင်းကိုယ်ရံတော်တစ်ရာခန့်က ခြံရံလိုက်ပါလာကြသည်။

"ဒါ... ဒါတွေက ချန်ရှင်းမင်းဆက်ကလူတွေ မဟုတ်လား"

လော့ယွမ်က မသေမချာဖြင့် ပြောလိုက်သည်။ အခြားသူများမှာလည်း ချက်ချင်းသတိရသွား၏။

"ဟုတ်တယ်၊ အဲဒီအမျိုးသမီးက မင်းသမီးနင်ထီဖြစ်ရမယ်"

"မဖြစ်နိုင်တာ၊ တကယ်ကြီး သူမလား"

"သူမက ငါတို့ဖေးရှန်ဂိုဏ်းကို တကယ်ကြီး ရောက်လာတာလား... ငါ အိမ်မက် မက်နေတာလား"

"ဘုရားရေ... သူမက ချန်ရှင်းမင်းဆက်ရဲ့ နံပါတ်တစ်ကျင့်ကြံခြင်းပါရမီရှင်ပဲ"

ဂိုဏ်းချုပ်ဟောင်း လက်ထက်ကတည်းက ကြီးပြင်းလာခဲ့သော ကျိလင်းဟန်မှလွဲ၍ ဖေးရှန်ဂိုဏ်း၏ အခြားတပည့်များမှာ ချန်ရှင်းမင်းဆက်၏ နယ်နိမိတ်အတွင်းရှိခရိုင်များမှ လာကြသူများဖြစ်သည်။

ဂိုဏ်းထဲမဝင်မီကသူတို့သည် လူ့လောကရှိ မင်းဆက်၏အုပ်ချုပ်မှုအောက်တွင် ရှိခဲ့ကြသူများဖြစ်ရာ သူတို့သည် ပါယွန်းခန်းမနှင့်မရင်းနှီးသော်လည်း ပိုမိုဝေးကွာသော ချန်ရှင်းမင်းဆက်နှင့်တော့ အလွန်ရင်းနှီးကြသည်။

မင်းသမီးနင်ထီမှာ မင်းဆက်တစ်ခုလုံး၏အချစ်ဆုံးသမီးတော်ဖြစ်ပြီး ထူးခြားသောပါရမီကို ပိုင်ဆိုင်ထား၏။ သူမ၏နာမည်မှာ သူတို့နားထဲတွင် နှစ်ပေါင်းများစွာကတည်းက စွဲထင်နေခဲ့ခြင်းဖြစ်သည်။

သူမရောက်ရှိလာသည်ကိုမြင်ရသည့်အခါ သူတို့အားလုံးအံ့အားသင့်သွားကြပြီး အနည်းငယ်ပင် ဂုဏ်ယူမိသွားကြသည်။ ငယ်ငယ်ကတည်းကကြားဖူးနေရသည့် နာမည်ကျော်ကြယ်ပွင့်တစ်ဦးက သူတို့ရှေ့တွင် ရုတ်တရက်ပေါ်လာသကဲ့သို့ပင်။

သို့သော်လည်း လှပစွာပေါ်ထွက်လာသော ဤကြယ်ပွင့်မှာ ချက်ချင်းပင် အခြေအနေတစ်ခုနှင့် ကြုံတွေ့လိုက်ရသည်။ အလွန်တည်ငြိမ်စွာပျံသန်းလာသော လွမ်ငှက်ကြီးမှာ ဆင်းသက်ခါနီးတွင် ရုတ်တရက်လန့်သွား၏။

၎င်းသည် အော်ဟစ်ကာ ပြင်းထန်စွာတုန်ခါနေပြီး ဤနေရာမှထွက်ပြေးချင်နေပုံရသည်။ မင်းသမီးနင်ထီနှင့် ကိုယ်ရံတော်များက အတင်းထိန်းချုပ်သော်လည်း မငြိမ်ပေ။

နန်းဆောင်အတွင်းမှ အပျိုတော်များမှာလည်း ထိတ်လန့်တကြား အော်ဟစ်နေကြတော့သည်။

"အဲဒါ အဲဒီကျားကြောင့်ပဲ။ သူ့ရဲ့ အဆင့်က မြင့်လွန်းနေပြီး သူ့ရဲ့အရှိန်အဝါက လွမ်ငှက်ကို ကြောက်လန့်သွားစေတာ"

ကျန်းချန်မေးစရာမလိုဘဲ အလိုက်သိလှသောလမ်းပြအဘိုးကြီးမိုချန်က အချိန်မီ ရှင်းပြပေးလိုက်လေသည်။