အခန်း (၂၀၉)

📝အပိုင်း - ၂၀၉

ဘာသာပြန် - Na Gar🐉

"..."

ဒီလူတွေ သူတို့ရဲ့ အထောက်အထားတွေကို ဖုံးကွယ်ထားကြတာ တကယ်ကို စိတ်ရှုပ်စရာ ကောင်းလှသည်။

ချန်ဆန်းရှီသည် ကျောက်ကျောက်၏ နောက်သို့ လိုက်ရင်း လမ်းခွဲတစ်ခုမှ ပတ်သွားခဲ့သည်။ နောက်ဖေးတံခါးသို့ ရောက်သောအခါ မမျှော်လင့်ဘဲ အသိဟောင်းတစ်ယောက်နှင့် တိုးလေတော့သည်။

ယန်ချန်ချင်း သည်လည်း သံချပ်ကာဝတ်စုံ အပြည့်အစုံဖြင့် အမျိုးသမီးတစ်ဦးနှင့် အလွန်အမင်း နှမြောတသစွာ နုတ်ဆက်နေသည်ကို တွေ့ရသည်။

"ညီအစ်ကိုချန်"

သူ၏ မျက်လုံးများ ပြူးကျယ်သွားသည်။ "မင်း... မင်းက မိန်းကလေးနင်ရှန်နဲ့ တွေ့ဖို့ လာတာတော့ မဟုတ်ပါဘူးနော်..."

"အင်း"

ချန်ဆန်းရှီသည် ပြီးခဲ့သည့်အကြိမ်က ချေးယူထားသော ငွေစက္ကူကို ပြန်ပေးရန် အခွင့်အရေးယူလိုက်ပြီးနောက် နောက်ဖေးတံခါးမှတစ်ဆင့် ခြောက်ထပ်မြောက်အထိ လိုက်သွားခဲ့သည်။

"ဗိုလ်ချုပ်"

သူ အခန်းထဲသို့ ဝင်လိုက်သည်နှင့်...

တံခါးနောက်တွင် ပုန်းနေသော နင်ရှန်သည် သူ့ထံသို့ ပြေးဝင်ဖက်လိုက်သည်။ ချန်ဆန်းရှီက ဘေးသို့ ရှောင်လိုက်သဖြင့် နင်ရှန်းမှာ ဖက်ခွင့်မရဘဲ လွဲချော်သွားသော်လည်း မျက်ရည်လည်ရွဲဖြင့် ပြောရှာသည် "ဗိုလ်ချုပ်က တကယ်ကို ရက်စက်တာပဲ။ တစ်ညတာ ပြီးသွားတော့ တစ်ခေါက်တောင် ပြန်မလာတော့ဘူး။ ကျွန်မဖြင့် ဗိုလ်ချုပ်ကို အရမ်းလွမ်းနေတာ..."

"..."

ချန်ဆန်းရှီမှာ စိတ်ထဲတွင် အတော်လေး အနေရခက်သွားသည်။

အပြင်ဘက်တွင် အစေခံမလေးများ ရှိနေသည်ကိုလည်း သူ သတိထားမိသည်။ ထိုဆူညံသံကို ကြားသည်နှင့် အစေခံများက အုပ်ချုပ်သူ မိန်းမကြီးထံသို့ ချက်ချင်း သတင်းသွားပို့ကြပေလိမ့်မည်။ အိုရန် များ သီးသန့် တွေ့ဆုံခြင်းမှာ ကြီးမားသော တားမြစ်ချက် ဖြစ်သည်။ သို့မဟုတ်ပါက လူတိုင်းက ဤကဲ့သို့ အချစ်ရေးများတွင်သာ အချိန်ဖြုန်းနေကြလျှင် ပြည့်တန်ဆာအိမ်မှာ ဝင်ငွေရတော့မည် မဟုတ်ပေ။ သို့သော် ချန်ဆန်းရှီမှာ ဧကရာဇ်၏ အမိန့်တော်ကို ရရှိထားသူဖြစ်ပြီး ဆွန်ဒူရှန်၏ တပည့်ရင်းဖြစ်ကာ အဆင့်အတန်း မြင့်မားသူဖြစ်သဖြင့် သူတို့က လျစ်လျူရှုပေးထားခြင်း ဖြစ်သည်။

"တော်ပြီ... လူတွေ အကုန်ထွက်သွားကြပြီ၊ ဟန်ဆောင်မနေနဲ့တော့"

ချန်ဆန်းရှီ တံခါးကို ပိတ်လိုက်သည်။ "နာရီဝက်နေရင် ငါ စစ်တန်းလျားမှာ လူစုရတော့မယ် မြန်မြန်ပြောစမ်း"

တစ်စုံတစ်ဦးမှ ခိုးနားထောင်ခြင်း မရှိကြောင်း အတည်ပြုပြီးနောက်

နင်ရှန်သည် မတ်မတ်ထိုင်ကာ အလေးအနက် ပြောလိုက်သည်။ "ဗိုလ်ချုပ်... အခု စစ်ထွက်မယ့် မင်ပြည်နယ်က မျက်ခုံးနီတပ်မတော်ရဲ့ ခေါင်းဆောင်

လျန်ကျိနျန် အကြောင်း ဗိုလ်ချုပ် ဘယ်လောက် သိထားသလဲ"

"စာမေးပွဲကျ ရှုံးနိမ့်ခဲ့တဲ့ စာသင်သားတစ်ယောက်၊ သူ့လက်ထဲမှာ 'ကောင်းကင်ဘုံကျမ်းစာ' ရှိတယ်လို့ သိထားတယ်" ချန်ဆန်းရှီက မေးလိုက်သည်။ "မိန်းကလေးနင်ရှန်း... မင်း အဲဒီကျမ်းစာအကြောင်း ပြောချင်တာ မဟုတ်လား"

မသေမျိုးခြေရာကို လိုက်ရှာနေသည့် "မသေမျိုးရှာဖွေရေးမျှော်စင်" အနေဖြင့် ၎င်းကို စိတ်ဝင်စားနေမည်မှာ ပုံမှန်ပင်။

"ဗိုလ်ချုပ်ကို ဘာမှ ဖုံးကွယ်လို့ မရပါလား" နင်ရှန်က ခပ်တိုးတိုး ဆိုသည်။ "ဒါဆိုရင် ဗိုလ်ချုပ်... အဲဒီကျမ်းစာရဲ့ ထူးခြားတဲ့ လုပ်ဆောင်ချက်တွေအကြောင်းကော ဘယ်လောက် သိထားသလဲ"

ချန်ဆန်းရှီက ခေါင်းခါပြလိုက်သည်။

"ဒါဆိုရင် ကျွန်မက ဗိုလ်ချုပ်အတွက် အသုံးဝင်သေးတာပေါ့နော်"

နင်ရှန်သည် သူမ၏ နုနယ်သော လက်ချောင်းလေးများဖြင့် စားပွဲပေါ်ရှိ ရေစက်များကို ကစားရင်း "မင်ပြည်နယ်က ကျွန်မတို့ရဲ့ သတင်းတွေအရဆိုရင် လျန်ကျိနျန်ဆီမှာရှိတဲ့ အဲဒီရတနာဟာ စစ်သည်တွေကို တိုက်ပွဲအတွင်းမှာ ကောင်းကင်နဲ့ မြေကြီးရဲ့ စွမ်းအားတွေကို အသုံးချခွင့် ပေးထားတာပါ။ သူ့ရဲ့ အပြင်းထန်ဆုံး အခြေအနေမှာဆိုရင် စစ်သည် နှစ်ထောင်တည်းနဲ့တင် နက်နဲပုံရိပ်အဆင့်ရှိတဲ့ ဗိုလ်ချုပ်တစ်ယောက်ကို ဝိုင်းရံသတ်ဖြတ်နိုင်ပြီး သူတို့ဘက်က အသေအပျောက် ခုနစ်ရာထက် မပိုပါဘူး"

"မူလက မင်ပြည်နယ်မှာ နက်နဲပုံရိပ်အစောပိုင်းအဆင့်ရှိတဲ့ ဗိုလ်ချုပ်

တစ်ယောက် ရှိခဲ့တယ်၊ သူဟာ ဒီလိုနည်းနဲ့ သေဆုံးခဲ့ရတာပါ"

"ဒီခန့်မှန်းချက်အရဆိုရင် စစ်သည် ငါးထောင်သာ သုံးမယ်ဆိုရင် အသေအပျောက် တစ်ထောင့်ငါးရာထက် မပိုဘဲ စစ်နတ်ဘုရားတစ်ယောက်ကိုတောင် ဝိုင်းရံသတ်ဖြတ်နိုင်စွမ်း ရှိပါတယ်။ ဪ... ဒါက နက်နဲပုံရိပ်အဆင့် သိုင်းပညာရှင်တွေ မပါဘဲ မဟာသွေးကြောအဆင့် အောက်က သာမန်စစ်သည်တွေကိုပဲ သုံးပြီး တွက်ချက်ထားတာပါ"

တကယ်ပဲ အဲဒီလောက် စွမ်းအားကြီးတာလားချန်ဆန်းရှီ စိတ်ထဲတွင် လေးစားကြောက်ရွံ့မှု အနည်းငယ် ဖြစ်ပေါ်လာသည်။

လွန်ခဲ့သော အချိန်အတော်ကြာက သူသည် မဟာရှန်မှတ်တမ်းတွင် ချောင်ရှဲ့ သည် ရန်သူ့စစ်သည် နှစ်ထောင့်သုံးရာကို တစ်ယောက်တည်း သတ်ဖြတ်ခဲ့ကြောင်း ဖတ်ခဲ့ရဖူးသည်။ လျန်ကျိုးသို့ ရောက်သောအခါ အစ်ကိုကြီးဖန်နှင့် ဆွေးနွေးရင်း ပိုမိုအသေးစိတ်သော အချက်အလက်များကို သိခဲ့ရသည်။

ချောင်ရှဲ့က ထိုလူနှစ်ထောင့်သုံးရာကို သတ်စဉ်က ရန်သူ့တပ်ထဲတွင် စစ်နတ်ဘုရားတစ်ဦးနှင့် နက်နဲပုံရိပ်အဆင့် သုံးဦး ပါဝင်နေသည်။ ထိုသို့သာ မဟုတ်ပါက သတ်နိုင်သည့် အရေအတွက်မှာ ပိုများပေလိမ့်မည်။

ဖန်ချင်းယွမ်ရှင်းပြခဲ့သည်မှာ တူညီသောအဆင့်ရှိတဲ့ပြိုင်ဘက်မရှိပါက အတော်အတန် ခွန်အားရှိသော စစ်နတ်ဘုရားတစ်ဦးသည် သူ၏ခွန်အား မကုန်ခမ်းမီ ရန်သူ့စစ်သည် နှစ်ထောင့်ငါးရာထက်မကကို တစ်ယောက်တည်း သတ်ဖြတ်နိုင်စွမ်း ရှိသည်။

သို့သော် မျက်ခုံးနီတပ်မတော်မှာမူ စစ်သည်တစ်ထောင်ကျော်ဖြင့် စစ်နတ်ဘုရားတစ်ဦးကို ဝိုင်းသတ်နိုင်သည်ဆိုခြင်းမှာ သူတို့၏ တိုက်ခိုက်ရေးစွမ်းရည်ကို နှစ်ဆ တိုးမြှင့်ထားခြင်းပင် ဖြစ်သည်။စစ်မြေပြင်တွင် ဤအရာမှာ ထိတ်လန့်ဖွယ်ရာ အယူအဆတစ်ခု ဖြစ်သည်။

သတိပြုရမည်မှာ ၎င်းသည် စစ်နတ်ဘုရားနှင့် နှိုင်းယှဉ်ပြရုံသာ ရှိသေးပြီး၊ လက်တွေ့ မင်ပြည်နယ် စစ်မြေပြင်တွင်မူ စစ်နတ်ဘုရားတစ်ဦးမှ မရှိပေ။ ထို့ကြောင့် သူတို့သည် တခြားတပ်မတော်များနှင့် ရင်ဆိုင်ရလျှင် "ကောင်းကင်ဘုံက နတ်စစ်သည်" များကဲ့သို့ ဖြစ်နေပေလိမ့်မည်။

မြို့ခြောက်မြို့ကို ရက်ပိုင်းအတွင်း အလွယ်တကူ သိမ်းပိုက်နိုင်ခဲ့ခြင်းမှာ မဆန်းတော့ပေ။

"ဒါပေမဲ့~"

နင်ရှန်၏ လေသံမှာ ပြောင်းလဲသွားသည်။ "ဒါဟာ သူတို့ရဲ့ အပြင်းထန်ဆုံး တိုက်ပွဲပဲ။ အဲဒီနောက်ပိုင်းမှာတော့ မျက်ခုံးနီတပ်မတော်ဟာ အဲဒီလောက်ထိ ပြင်းထန်တဲ့ စွမ်းအားကို ထပ်မပြနိုင်တော့ဘဲ ရွှေစမ်းရေမြို့မှာတင် ရှေ့မတိုးနိုင်ဘဲ ရပ်တန့်နေခဲ့ပါတယ်"

"ဒါကြောင့် ကျွန်မတို့ ခန့်မှန်းတာကတော့ လျန်ကျိနျန်ရဲ့ လက်ထဲက ရတနာ သို့မဟုတ် ကောင်းကင်ဘုံကျမ်းစာဟာ ဝိညာဉ်စွမ်းအားလိုမျိုးပဲ၊ သုံးစွဲလေ ကုန်ဆုံးလေပါပဲ။ အဲဒီစွမ်းအားကို ပြန်ပြီး ဘယ်လို စုဆောင်းရသလဲဆိုတာကိုတော့ မသိရသေးပါဘူး"

ချန်ဆန်းရှီ အလေးအနက် စဉ်းစားလိုက်သည်။ အတိုချုပ်ပြောရလျှင် မျက်ခုံးနီတပ်မတော်မှာ တဖြည်းဖြည်း အားနည်းလာနေခြင်း ဖြစ်သည်။ ၎င်းမှာ သူတို့အတွက် သတင်းကောင်းပင်။ သို့သော် "ကောင်းကင်ဘုံကျမ်းစာ" နှင့် ပတ်သက်၍ သူ၏ သိချင်စိတ်မှာ ပိုမိုပြင်းပြလာသည်။

"မိန်းကလေးနင်ရှန်... မင်းတို့လူတွေထဲက အဲဒီကျမ်းစာကို မြင်ဖူးတဲ့သူ ရှိလား"

"ဘယ်သူမှ မမြင်ဖူးပါဘူး၊ ကျွန်မတို့တင် မဟုတ်ဘူး" နင်ရှန်သည် သူမ၏ လက်ချောင်းလေးဖြင့် ရေစက်ကို ချန်ဆန်းရှီထံသို့ ပက်လိုက်ရာ သူက စိတ်မရှည်သလို ကြည့်လိုက်သဖြင့် သူမက စလိုက်ပြီးနောက် အလေးအနက် ဆက်ပြောသည် "မျက်ခုံးနီတပ်မတော်က လူတွေကိုယ်တိုင်တောင် အဲဒီကျမ်းစာကို မမြင်ဖူးကြဘူး"

"ဒါဆိုရင် တစ်နည်းအားဖြင့် ကောင်းကင်ဘုံကျမ်းစာ တကယ်ရှိ၊ မရှိဆိုတာ မသေချာသေးဘူးပေါ့" ချန်ဆန်းရှီက သုံးသပ်ပြသည်။ "လျန်ကျိနျန်က ဒါကို လုပ်ကြံဖန်တီးထားတာလည်း ဖြစ်နိုင်တယ်။ 'ကောင်းကင်ဘုံကျမ်းစာ' ဆိုတဲ့ နာမည်က နားထောင်လို့ကောင်းပြီး လူတွေရဲ့ အညံ့ခံမှုကို ရစေသလို လူစုဆောင်းဖို့လည်း လွယ်ကူစေတာကိုး။ ဒါပေမဲ့ ဘာပဲဖြစ်ဖြစ် သူ့လက်ထဲမှာ မသေမျိုးလောကက အရာတစ်ခုခုတော့ သေချာပေါက် ရှိနေလိမ့်မယ်"

"ဒါကြောင့် ဒီနေ့ ဗိုလ်ချုပ်ကို ဖိတ်ရတဲ့ အကြောင်းရင်းကတော့ အဲဒီအရာက ဘာလဲဆိုတာကို အတတ်နိုင်ဆုံး စုံစမ်းပေးဖို့ပါပဲ" နင်ရှန်က အေးအေးဆေးဆေး ဆိုသည်။ "ဗိုလ်ချုပ် အောင်ပွဲနဲ့ ပြန်လာတဲ့အခါ ကျွန်မတို့ကို အသိပေးပါ။ အကယ်၍ အဲဒါဟာ မသေမျိုးလောကကို ရောက်ရှိနိုင်မယ့် နည်းလမ်းဆိုရင် ဗိုလ်ချုပ်အနေနဲ့ ကျွန်မတို့ကို အဲဒီသတင်းအချက်အလက် မျှဝေပေးမယ်လို့ မျှော်လင့်ပါတယ်"