အခန်း (၄၅၃-၄၅၄)

အပိုင်း (၄၅၃) ကမ္ဘာမြေပေါ်သို့ ယာဉ်ပျံ ဆင်းသက်ခြင်း

အထူးစစ်ဆင်ရေးအဖွဲ့သည် "မျှော်လင့်ချက်မြို့တော်" မှ ထွက်ခွာသွားပြီး မကြာမီတွင် လော်ယွမ်သည်လည်း စာရွက်စာတမ်းကိစ္စ အချို့ကို ကိုင်တွယ်ဖြေရှင်းပြီးနောက် ကွေးညွတ်ပျံသန်းခြင်း စနစ်ကို အသုံးပြုကာ မြို့မှ ထွက်ခွာလာခဲ့လေသည်။

လက်ရှိ ကမ္ဘာမြေ၏ ပတ်ဝန်းကျင် အခြေအနေမှာ ဆိုးရွားလွန်းလှသည်။ အလွန်အမင်း အေးစက်သော ရာသီဥတုက ကမ္ဘာမြေကြီးတစ်ခုလုံးကို လွှမ်းခြုံထား၏။

လူသားများ မြေအောက်မှနေ၍ မြေပြင်ပေါ်သို့ ပြန်တက်လာနိုင်မည့်နေ့ရက်မှာ ဝေးကွာနေဆဲပင်။ မြေအောက်တွင် သိုလှောင်ထားသော ရိက္ခာများနှင့် လက်ကျန်စက်မှုလုပ်ငန်းများသည် မျှော်လင့်ချက်မြို့တော်နှင့် အနီးတစ်ဝိုက်ရှိ လူဦးရေ ၅ သန်း၊ ၆ သန်းခန့်ကို ကယ်တင်နိုင်ရန် မဖြစ်နိုင်တော့ပေ။

လူ့ယဉ်ကျေးမှုကို ပြန်လည်တည်ဆောက်ရန်နှင့် ဖွံ့ဖြိုးတိုးတက်ရန် ဆိုသည်မှာကား ဝေလာဝေး ဖြစ်နေလေပြီ။

အနီးအနား မြို့သုံးမြို့မှ အသက်ရှင်ကျန်ရစ်သူများကို စုစည်းပြီး ထိရောက်သော အုပ်ချုပ်ရေးစနစ်တစ်ခု တည်ထောင်ရန်မှာပင် ခဲယဉ်းလှသည်။

ကံကောင်းသည်မှာ ဂြိုဟ်သားများ ရောက်ရှိလာခြင်းက လူသားမျိုးနွယ်ကို မျိုးသုဉ်းလုနီးပါး ဖြစ်စေခဲ့သော်လည်း အကောင်းပကတိ ကျန်ရှိနေသော ယာဉ်ပျံကြီးတစ်စင်းကို ချန်ထားရစ်ခဲ့ခြင်း ဖြစ်သည်။

၎င်းသည် အလွန်ကြီးမားခမ်းနားသော ယာဉ်ပျံကြီး ဖြစ်သည်။ ဗိုရှင်းဂြိုဟ်သားတို့၏ နည်းပညာမှာ အလိုအလျောက်စနစ် မြင့်မားလွန်းသဖြင့် ယာဉ်ပျံအတွင်းပိုင်း နေရာလွတ် အသုံးပြုပုံမှာ ဇိမ်ခံလွန်းသည်ဟုပင် ဆိုရပေမည်။

အထူးသဖြင့် လူနေအဆောင်များတွင် အာကာသထဲ၌ ကြာရှည်နေထိုင်ရပါက စိတ်ကျဉ်းကျပ်မှု မဖြစ်စေရန်အတွက် မျက်နှာကြက် အမြင့်ကို ပေ ၆၅၀ ကျော် အထိ ထားရှိထားသည်။

ယင်းမှာ ယာဉ်ပျံတစ်ခုလုံး အမြင့်၏ ၇ ပုံ ၂ ပုံခန့် ရှိပြီး ယာဉ်ပျံ၏ အချင်းမှာ ၁ မိုင်နီးပါး ရှိလေသည်။

ထိုအထဲတွင် ဗဟိုဂေဟစနစ် ဥယျာဉ်ကြီးက နေရာအများစုကို ယူထားသည်။ ဗိုရှင်းဂြိုဟ်သားတို့၏ နည်းပညာအရ ဤကဲ့သို့သော ဂေဟစနစ်မျိုး မရှိလျှင်လည်း ပြဿနာမရှိပေ။

ယာဉ်ပျံပေါ်ရှိ လေသန့်စင်စနစ်က လေကို အလိုအလျောက် ထိန်းညှိပေးနိုင်ပြီး လတ်ဆတ်သန့်ရှင်းနေအောင် ပြုလုပ်ပေးနိုင်သည်။

ဤဥယျာဉ်ကြီး ရှိနေရခြင်းမှာ ရှည်လျားသော ကြယ်တာရာခရီးစဉ်တစ်လျှောက်တွင် ပျင်းရိငြီးငွေ့ဖွယ် မဖြစ်စေရန်နှင့် အာကာသရောဂါစု မဖြစ်ပွားစေရန်အတွက်သာ ဖြစ်သည်။

သို့သော် လက်ရှိ အသက်ရှင်ရပ်တည်ရန်ပင် ခက်ခဲနေသော လူသားများအဖို့ ဤအရာများကို ထည့်သွင်းစဉ်းစားနေခြင်းက ဇိမ်ခံလွန်းရာ ကျပေလိမ့်မည်။

အကယ်၍ ရုက္ခဗေဒဥယျာဉ်များနှင့် အသုံးမလိုသော အခန်းများကို ဖယ်ရှားလိုက်မည်ဆိုပါက လူနေအဆောင်တစ်ခုလုံး၏ အသုံးချနိုင်သော ဧရိယာသည် စတုရန်းပေ ၁ ဒသမ ၈ ဘီလီယံ ကျော် ရှိလာမည်ဖြစ်သည်။ အမြင့် ပေ ၆၅၀ နှင့် တွက်ချက်ပါက အသုံးချနိုင်သော ထုထည်မှာ ကုဗပေ ၁၂၃ ဘီလီယံ ကျော်အထိ ရှိပေသည်။

(၁၀x၁၀x၁၀) ပေ ပတ်လည် အခန်းတစ်ခန်းလျှင် လူနှစ်ဦး နေထိုင်မည်ဆိုပါက ဤလူနေအဆောင် တစ်ခုတည်းမှာပင် လူဦးရေ ၂၆ သန်းခန့် ဆံ့မည်ဖြစ်သည်။

ဒါက စိတ်ကူးယဉ် တွက်ချက်မှု သက်သက်သာ ဖြစ်သည်။

လက်တွေ့တွင်မူ နေရာလွတ် အသုံးချနိုင်စွမ်းက ဤမျှ မြင့်မားမည် မဟုတ်ပေ။ သို့သော် လေးပုံတစ်ပုံခန့်သာ အသုံးပြုနိုင်သည် ထားဦး၊ လူဦးရေ ၇ သန်းနီးပါး နေထိုင်နိုင်မည် ဖြစ်ရာ လက်ရှိ ကမ္ဘာပေါ်တွင် ကျန်ရှိနေသော လူဦးရေအားလုံးကို တင်ဆောင်ရန် လုံလောက်ပေသည်။

မျှော်လင့်ချက်မြို့တော်နှင့် ယှဉ်လျှင် အရုဏ်ဦးမြို့၊ စည်းလုံးခြင်းမြို့နှင့် အောင်ပွဲမြို့တို့သည် မြို့ငယ်လေးများသာ ဖြစ်ကြသည်။ ဘေးအန္တရာယ် မကျရောက်မီက ထိုမြို့များတွင် လူဦးရေ တစ်သန်းခန့်စီသာ ရှိကြပြီး တောရိုင်းနယ်မြေနှင့် နီးကပ်သော အောင်ပွဲမြို့တွင်မူ ၉ သိန်းကျော်ခန့်သာ ရှိခဲ့သည်။

ကပ်ဘေးအန္တရာယ် ပြီးဆုံးပြီးနောက် ထိုမြို့သုံးမြို့ပေါင်း လူဦးရေမှာ ၃ သန်းပင် မပြည့်တော့ချေ။ မျှော်လင့်ချက်မြို့တော်မှ လူဦးရေနှင့် ပေါင်းလိုက်လျှင် စုစုပေါင်း ၅ သန်းကျော် ၆ သန်းနီးပါးသာ ရှိတော့သည်။

သို့သော် လူသားများ မပြောင်းရွှေ့မီ ယာဉ်ပျံ၏ လူနေအဆောင်ကို အကြီးစား ပြုပြင်မွမ်းမံမှုများ ပြုလုပ်ရပေဦးမည်။ ဦးစွာ လုပ်သားအချို့ကို ပို့ဆောင်ပြီး ယာဉ်ပျံပေါ်တွင် လူနေထိုင်မှု သိပ်သည်းဆများသော အထပ်မြင့် အဆောက်အအုံများကို ဆောက်လုပ်ရမည် ဖြစ်သည်။

……

၁၀ မိနစ် မကြာမီမှာပင် လော်ယွမ်၏ ကွေးညွတ်ပျံသန်းမှု အရှိန်သည် အမြင့်ဆုံးသို့ ရောက်ရှိသွားသည်။

ပြီးခဲ့သော ဗိုရှင်းဂြိုဟ်သားများနှင့် တိုက်ပွဲတွင် လော်ယွမ်၏ စိတ်စွမ်းအားသည် အနည်းငယ် တိုးတက်လာခဲ့သည်။ အမှတ် ၂၀ သို့ ချက်ချင်း မရောက်ရှိသေးသော်လည်း သူ၏ ပျံသန်းမှုအရှိန်ကိုမူ အံ့မခန်း တိုးတက်သွားစေခဲ့သည်။

ယခင်က တစ်စက္ကန့်လျှင် ၉၃ မိုင် သာ ရှိသော်လည်း ယခုအခါ တစ်စက္ကန့်လျှင် ၆၂၀ မိုင် နှုန်းအထိ တိုးတက်လာခဲ့သည်။

ယာဉ်ပျံကြီးနှင့် ကမ္ဘာမြေသည် မိုင်ပေါင်း ၃ သိန်း ၇ သောင်းကျော် ကွာဝေးသော်လည်း ဤကြောက်မက်ဖွယ် အရှိန်ဖြင့်ဆိုလျှင် ၁၀ မိနစ်ခန့်သာ ကြာမြင့်ပေမည်။ အရှိန်ယူချိန်များကိုပါ ထည့်ပေါင်းလျှင်ပင် ၁၇ မိနစ်သာ ကြာပေလိမ့်မည်။

လော်ယွမ်၏ မျက်လုံးထဲတွင် ယာဉ်ပျံကြီးသည် တဖြည်းဖြည်း ကြီးမားလာသည်။ တစ်မိနစ်အကြာတွင် သူသည် အရှိန်ကို လျှော့ချလိုက်ပြီး ဟင်းလင်းပြင်စက်ဝန်း နှင့်အတူ ယာဉ်ပျံကြီး၏ အတွင်းပိုင်းသို့ တိုးဝင်သွားလိုက်သည်။

"ကြိုဆိုပါတယ် ယာဉ်မှူး"

ယာဉ်ပျံထဲသို့ ဝင်ရောက်ပြီး ကွေးညွတ်ပျံသန်းမှု ပူပေါင်းကို ဖြေလျော့လိုက်သည်နှင့် ဉာဏ်ရည်တု ကွန်ပျူတာ ၏ အသံက ညင်သာစွာ ထွက်ပေါ်လာသည်။

လော်ယွမ် မအံ့သြမိပေ။ ဤယာဉ်ပျံ၏ ထောက်လှမ်းနိုင်စွမ်းနှင့်ဆိုလျှင် လူမသိသူမသိ ဝင်ရောက်လာရန်မှာ မဖြစ်နိုင်သော ကိစ္စဖြစ်သည်။

သူသည် ထိန်းချုပ်ခန်းဆီသို့ ခြေလှမ်းကျဲကြီးများဖြင့် လျှောက်သွားရင်း "အခြေအနေ ဘယ်လိုလဲ" ဟု မေးလိုက်သည်။

"အားလုံး ပုံမှန်ပါပဲ... ဒါပေမဲ့ ထုတ်လုပ်ရေးဇုန်နဲ့ အဆက်အသွယ် ပြတ်တောက်နေလို့ ပစ္စည်းထုတ်လုပ်ဖို့တော့ မလုပ်နိုင်ပါဘူး... ကျေးဇူးပြုပြီး အင်ဂျင်နီယာတွေ စေလွှတ်ပြီး ပြုပြင်ပေးပါရန် အကြံပြုပါတယ်" ဟု ဉာဏ်ရည်တုက နူးညံ့စွာ ပြန်ဖြေသည်။

"ငါသိတယ်" လော်ယွမ်က ပြတ်သားစွာ ပြန်ပြောလိုက်သည်။

ဒါက အကျပ်အတည်းတစ်ခု ဖြစ်နေသည်။ အကယ်၍ ပြုပြင်လိုက်ပါက ဉာဏ်ရည်တု၏ ပင်မပရိုဂရမ်သည် ကွမ်တမ်ဆက်သွယ်ရေး စက်ကိရိယာများကို အလိုအလျောက် ထုတ်လုပ်ပြီး ဗိုရှင်းဂြိုဟ်သားများနှင့် ပြန်လည် ဆက်သွယ်ပေလိမ့်မည်။

မပြုပြင်ဘဲ ထားပြန်လျှင်လည်း ထုတ်လုပ်ရေးဇုန် အလုပ်မလုပ်နိုင်သဖြင့် ယာဉ်ပျံပေါ်ရှိ အလိုအလျောက် စက်ရုံများမှာ အလကား ဖြစ်နေမည်။

သို့သော် ဒါက ယာယီမျှသာ ဖြစ်သည်။ လူသားများ ဖြည်းဖြည်းချင်း ပြောင်းရွှေ့လာပြီးနောက် ဤအလိုအလျောက် စက်ရုံများ၏ လည်ပတ်ပုံကို နားလည်လာပါက ဉာဏ်ရည်တု၏ ထိန်းချုပ်မှုမပါဘဲ ထုတ်လုပ်မှုကို ပုံမှန် လည်ပတ်နိုင်မည်ဖြစ်သည်။ စွမ်းဆောင်ရည် အနည်းငယ် ကျဆင်းနိုင်ခြေတော့ရှိသည်။

ဉာဏ်ရည်တုသည်လည်း လုပ်ရိုးလုပ်စဉ်အရ သတိပေးရုံသာဖြစ်ပြီး ထပ်မံ၍ တိုက်တွန်းခြင်း မပြုတော့ပေ။

"ဒီယာဉ်ပျံကို ကမ္ဘာမြေဆီ မောင်းသွားလို့ ရမလား" ဟု လော်ယွမ်က မေးလိုက်သည်။

"ဝမ်းနည်းပါတယ်... မရပါဘူး... လက်ရှိ ယာဉ်ပျံရဲ့ စုစုပေါင်း အလေးချိန်က တန်ချိန် ၁၇ ဒသမ ၃ ဘီလီယံ ရှိပြီး တွန်းကန်အား ၁၇ ပေ/စက္ကန့်သာ ခံနိုင်ရည် ရှိပါတယ်... ကမ္ဘာမြေရဲ့ ဆွဲငင်အားက ၃၂ ပေ/စက္ကန့် ရှိတဲ့အတွက် ကမ္ဘာ့လေထုထဲ ဝင်ရောက်လိုက်တာနဲ့ ယာဉ်ပျံကြီး ပုံပျက်သွားပြီး မခန့်မှန်းနိုင်တဲ့ ဆိုးကျိုးတွေ ဖြစ်ပေါ်လာနိုင်ပါတယ်"

"ဒီလောက်တောင် လေးတာလား" ဉာဏ်ရည်တု၏ အဖြေကြောင့် လော်ယွမ် မျက်မှောင်ကြုတ်သွားသည်။ ဤအလေးချိန်သည် သူထင်ထားသည်ထက် များစွာ ပိုနေသည်။ တန်ချိန် ၁၇ ဘီလီယံ ဆိုသည်မှာ ကပ်ဘေးမတိုင်မီက တန်ချိန် တစ်သိန်းတင် သင်္ဘောကြီးပေါင်း ၁ သောင်းခွဲခန့်နှင့် ညီမျှနေသည်။

"ယာဉ်ပျံရဲ့ အလေးချိန်က အပိုင်းသုံးပိုင်း ပေါင်းစပ်ထားတာပါ... ယာဉ်ပျံ ကိုယ်ထည်အလေးချိန်... စုဆောင်းထားတဲ့ ကုန်ကြမ်းပစ္စည်းတွေနဲ့ အပိုပစ္စည်း သိုလှောင်မှုတွေ ဖြစ်ပါတယ်"

"ယာဉ်ပျံ ကိုယ်ထည်အလေးချိန်က တန်ချိန် ၁ ဒသမ ၂ ဘီလီယံ... အပိုပစ္စည်း သိုလှောင်မှုက တန်ချိန် ၄ ဒသမ ၄ ဘီလီယံ ရှိပြီး ကျန်တဲ့ အလေးချိန် အများစုကတော့ စုဆောင်းထားတဲ့ ကုန်ကြမ်းပစ္စည်းတွေ ဖြစ်ပါတယ်... အဲဒီအထဲမှာ သန့်စင်သောရေ - တန်ချိန် ၅ ဒသမ ၈ ဘီလီယံ... သန့်စင်သော သံ - တန်ချိန် ၂ ဘီလီယံ... သန့်စင်သော ကြေးနီ - တန်ချိန် ၁ ဒသမ ၃ ဘီလီယံ..."

ယာဉ်ပျံပေါ်တွင် စုဆောင်းထားသော ပစ္စည်းအမျိုးအစားများမှာ အံ့မခန်း များပြားလှပြီး ဒြပ်စင်ဇယားရှိ ဒြပ်စင်အားလုံးနီးပါး ပါဝင်သည်။

ထိုအထဲတွင် ရေသည် ပမာဏအများဆုံးဖြစ်ပြီး ယာဉ်ပျံတစ်ခုလုံး အလေးချိန်၏ သုံးပုံတစ်ပုံခန့် ရှိသည်။ လူသားတို့၏ အမြင်တွင် ရေသည် အသက်ရှင်သန်ရေး အရင်းအမြစ် ဖြစ်သော်လည်း

ဤယာဉ်ပျံအတွက်မူ သက်ရှိများအတွက်သာမက အနုမြူ ပေါင်းစပ်စွမ်းအင် အတွက် လောင်စာလည်း ဖြစ်သလို အော်ဂဲနစ်ဒြပ်ပေါင်းများနှင့် ဓာတုကုန်ကြမ်းများ ထုတ်လုပ်ရာတွင်လည်း အရေးပါသော ဒြပ်စင်ဖြစ်သည်။ ကြယ်တာရာ ခရီးစဉ်များတွင် ရေကို အမြောက်အမြား သုံးစွဲရလေ့ရှိသည်။

"ဒါဆိုရင် အပေါ်ဆုံးထပ်က ယာဉ်ပျံငယ်လေးကော" လော်ယွမ်က ထိန်းချုပ်ခန်းထဲသို့ ဝင်ရင်း ဆက်မေးလိုက်သည်။

"တကယ်လို့ အရှင်က အရေးပေါ် ကယ်ဆယ်ရေး ယာဉ်ပျံကို ဆိုလိုတာဆိုရင်တော့... အဲဒါက ကမ္ဘာမြေကို သွားလို့ ရပါတယ်" ဟု ဉာဏ်ရည်တုက ပြန်ဖြေသည်။

လော်ယွမ် သက်ပြင်းချလိုက်မိပြီး "အဲဒါကို ဘယ်လို မောင်းရမလဲ" ဟု မေးလိုက်သည်။

"သူ့ရဲ့ ထိန်းချုပ်မှုစနစ်က ကျွန်မရဲ့ လက်အောက်ခံ စနစ်တစ်ခုပါပဲ... အရှင်က လုပ်ပိုင်ခွင့် ပေးလိုက်တာနဲ့ သူက အလိုအလျောက် မောင်းနှင်သွားပါလိမ့်မယ်"

"ကောင်းပြီလေ... ဒါနဲ့... ဗိုရှင်းဘာသာစကားနဲ့ တရုတ်ဘာသာစကား ဘာသာပြန် မှတ်တမ်းအချို့ ငါ့ကို ထုတ်ပေးပါ" ထွက်ခွာခါနီးတွင် သတိရသွားသဖြင့် လော်ယွမ် ပြောလိုက်သည်။

……

မကြာမီ လော်ယွမ်သည် စာရွက်စာတမ်းထပ်ကြီးကို ကိုင်ဆောင်လျက် အပေါ်ထပ်ရှိ ယာဉ်ပျံငယ်ဆီသို့ ရောက်ရှိလာသည်။ လုပ်ပိုင်ခွင့် အတည်ပြုပြီးနောက် ယာဉ်ပျံတံခါး ပွင့်သွားသည်။

"ကြိုဆိုပါတယ် ယာဉ်မှူး... ကျွန်တော်က အရေးပေါ် ကယ်ဆယ်ရေး ယာဉ်ပျံရဲ့ ထိန်းချုပ်မှုစနစ် အမှတ် ၀၀၂ ပါ... အချိန်မရွေး ဝန်ဆောင်မှု ပေးဖို့ အသင့်ပါပဲ"

လော်ယွမ် ထိန်းချုပ်ခန်းထဲသို့ ဝင်လိုက်သည်။ ထိန်းချုပ်ခန်း အပြင်အဆင်မှာ မိခင်ယာဉ်ပျံကြီးနှင့် ဆင်တူသဖြင့် သူ တစ်ချက်ဝေ့ကြည့်လိုက်ပြီး ပြောလိုက်သည်။

"ငါ ကမ္ဘာမြေကို သွားစရာ ရှိတယ်"

"တည်နေရာညွှန်းကိန်း ထည့်သွင်းပေးပါ"

သုံးဖက်မြင် ဖန်သားပြင်ပေါ်တွင် ကမ္ဘာမြေပုံရိပ်နှင့်တကွ ရှုပ်ထွေးသော ကိုဩဒိနိတ် ကိန်းဂဏန်းများ ပေါ်လာသည်။

ဒီကာလအတွင်း အသားကျလာပြီ ဖြစ်သဖြင့် သုံးဖက်မြင် ပုံရိပ်များကို သူ နားလည်နေပြီ ဖြစ်သည်။ ၎င်းသည် လက်လှုပ်ရှားမှုများကို ဖမ်းယူနိုင်ပြီး ပုံရိပ်ကို စိတ်ကြိုက် ထိန်းချုပ်နိုင်သည်။ လူသားတို့၏ မျက်နှာပြင်ထိတွေ့ နည်းပညာနှင့် ဆင်တူသော်လည်း အဆပေါင်းများစွာ ပိုမိုခေတ်မီသည်။

လော်ယွမ်သည် ပုံရိပ်ကို အသာအယာ ဆွဲယူလိုက်ရာ ကမ္ဘာလုံးပုံရိပ်သည် ချက်ချင်း ကြီးလာသည်။ ထိန်းချုပ်ခန်းထဲတွင် အစစ်နှင့် တူလွန်းလှသော ဧရာမ ဘောလုံးကြီးတစ်ခု ပေါ်လာသကဲ့သို့ပင်။

အသေးစိတ် အချက်အလက်များပါ မကျန် ပြတ်သားလွန်းသဖြင့် အသေအချာ မကြည့်လျှင် အစစ်ဟုပင် ထင်မှတ်ရနိုင်သည်။

ထိုပုံရိပ်သည် လက်ရှိ ကမ္ဘာမြေ၏ အချိန်နှင့်တစ်ပြေးညီ ပုံရိပ်ဖြစ်သည်။ ကမ္ဘာ့အပြင်ဘက်တွင် မီးခိုးရောင်သမ်းနေသော အလင်းရောင်များ ဖုံးလွှမ်းနေသဖြင့် မြေပြင်အခြေအနေကို လုံးဝ မမြင်ရပေ။

"ညစ်ညမ်းနေတဲ့ လေထုအလွှာကို ဖယ်ရှားလိုက်" လော်ယွမ် မျက်မှောင်ကြုတ်ကာ အမိန့်ပေးလိုက်သည်။

စကားဆုံးသည်နှင့် ကမ္ဘာမြေ၏ မူလရုပ်သွင် ပေါ်လာသည်။ လော်ယွမ်က နေရာတစ်ခုကို လက်ဖြင့် ထောက်ပြလိုက်ပြီး "ဒီနေရာကို သွားမယ်" ဟု ပြောလိုက်သည်။

"တည်နေရာညွှန်းကိန်း ထည့်သွင်းပြီးပါပြီ... အမိုးဖွင့်ရန် လျှောက်ထားသည်..."

"လျှောက်ထားချက် အောင်မြင်သည်..."

"ဆွဲငင်အားဆန့်ကျင် အင်ဂျင်များ စတင်လည်ပတ်နေပြီ..."

"ပြင်ပမြင်ကွင်းတု စနစ် စတင်လည်ပတ်နေပြီ..."

"ယာဉ်ပျံသည် မိခင်ယာဉ်မှ ခွဲထွက်တော့မည် ဖြစ်ပါသဖြင့် ယာဉ်မှူးအနေဖြင့် ပြင်ဆင်ထားပါရန်..."

ခေါင်းပေါ်မှ အမိုးခုံးသည် ပန်းပွင့်ဖတ်များသဖွယ် ပွင့်ဟသွားပြီးနောက် ယာဉ်ပျံငယ်သည် ဖြည်းညှင်းစွာ အပေါ်သို့ မြင့်တက်လာသည်။

မိခင်ယာဉ်ပျံကြီးမှ ခွဲထွက်ပြီး တစ်မိနစ်ခန့်အကြာတွင် ပင်မအင်ဂျင်ပေါက်မှ စူးရှတောက်ပသော အလင်းတန်းများ ပန်းထွက်လာကာ ယာဉ်ပျံငယ်သည် ကမ္ဘာမြေဆီသို့ ဦးတည်ရွေ့လျားသွားလေသည်။

အရှိန် တဖြည်းဖြည်း မြန်ဆန်လာရာ မျက်စိတစ်မှိတ်အတွင်းမှာပင် မိခင်ယာဉ်ပျံကြီးသည် နောက်တွင် ကျန်ရစ်ခဲ့ပြီး သေးငယ်သွားလေသည်။

လော်ယွမ်သည် လေပေါ်တွင် ပေါလောပေါ်နေသော ထိုင်ခုံပေါ်တွင် ထိုင်ရင်း သုံးဖက်မြင် ဖန်သားပြင်ပေါ်မှ ပြင်ပမြင်ကွင်းတုကို စိတ်ဝင်တစား ကြည့်ရှုနေလိုက်သည်။

သို့သော် ခဏအကြာတွင် စိတ်မပါတော့သဖြင့် လက်ထဲမှ ဗိုရှင်းဘာသာစကားနှင့် တရုတ်ဘာသာစကား ဘာသာပြန် မှတ်တမ်းများကိုသာ အသေအချာ ဖတ်ရှုနေလိုက်သည်။

ဗိုရှင်းဂြိုဟ်သားတို့၏ စာရွက်များမှာ ကမ္ဘာမြေမှ စာရွက်များထက် ပိုမိုမာကျောပြီး ခိုင်ခံ့သည်။ ကိုယ်ပိုင် ဇီဝကွန်ပျူတာများ ခေတ်စားလာသဖြင့် ဗိုရှင်းဂြိုဟ်သားများသည် စာရွက်စာတမ်း သိပ်မသုံးကြတော့ပေ။

သမိုင်းဝင် မှတ်တမ်းများနှင့် အရန်သင့် သိမ်းဆည်းလိုသော အချက်အလက်များအတွက်သာ အသုံးပြုကြတော့သည်။

ဤစာရွက်များသည် ရေစိုခံ၊ မီးလောင်ခံ၊ ဆွေးမြည့်မှုဒဏ် ခံနိုင်ပြီး နှစ်ပေါင်းရာချီ သဘာဝအတိုင်း မပျက်စီးဘဲ နေနိုင်သည်။

သဘာဝအလျောက် ပျက်စီးရန် ခက်ခဲသောကြောင့် ဤစာရွက်များကို သုံးစွဲရာတွင် တင်းကျပ်သော စည်းမျဉ်းများ ရှိသည်။ အသုံးပြုမှုတိုင်းအတွက် မှတ်ပုံတင်ရသည်။ သို့သော် လော်ယွမ်အတွက်တော့ ထိုစည်းမျဉ်းများက အရာမဝင်ပေ။

ယာဉ်မှူးထိုင်ခုံပေါ်တွင် ထိုင်ရင်း သူ စာဖတ်နေသည်မှာ မိနစ်အနည်းငယ်သာ ရှိသေးသော်လည်း ယာဉ်ပျံငယ်သည် ကမ္ဘာ့လေထုထဲသို့ စတင် ဝင်ရောက်လာလေတော့သည်။

ဆက်ရန်...

အပိုင်း (၄၅၄) စိတ်ဓာတ်ခွန်အား မြှင့်တင်ခြင်း

ဤသည်မှာ အရေးပေါ် ကယ်ဆယ်ရေးယာဉ်တစ်စီး ဖြစ်သော်ငြားလည်း အလွန်အားကောင်းသော စွမ်းအင်မောင်းနှင်အားကြောင့် ကြယ်တာရာများအကြား ခရီးနှင်နိုင်စွမ်း ရှိပေသည်။

၎င်း၏ အမြင့်ဆုံး အမြန်နှုန်းသည် အလင်းအလျင်၏ တစ်ဝက်ခန့်အထိ ရောက်ရှိနိုင်သည်။ သို့သော် ဥက္ကာခဲများ ထူထပ်လှသော နေအဖွဲ့အစည်းအတွင်း၌ ထိုအမြန်နှုန်းဖြင့် မောင်းနှင်ခြင်းမှာ ကိုယ့်သေတွင်း ကိုယ်တူးခြင်းနှင့် မခြားနားပေ။

ထို့ကြောင့် ယာဉ်ပျံ၏ အမြန်နှုန်းမှာ လော်ယွမ်၏ အာကာသ ကွေးညွှတ်ပျံသန်းမှု အရှိန်နှင့် တူညီရုံမျှသာ ရှိသည်။

ကမ္ဘာ့လေထုအတွင်းသို့ ဝင်ရောက်လာချိန်တွင်မူ ယာဉ်ပျံ၏ အရှိန်မှာ ပို၍ လျော့ကျသွားသည်။ သို့သော် ထိုသို့ လျော့ကျသွားသည် ဆိုရာ၌လည်း နှိုင်းယှဉ်ချက် သဘောအရသာ ဖြစ်ပေသည်။

လေထုနှင့် ပြင်းထန်စွာ ပွတ်တိုက်မှုကြောင့် ကြီးမားလှသော ယာဉ်ပျံကြီးသည် မီးတောက်များ လောင်ကျွမ်းနေသော ဥက္ကာခဲနီကြီး တစ်လုံးပမာ ဖြစ်ပေါ်နေပြီး ၎င်း၏ နောက်မြီးပိုင်းတွင် ရှည်လျားသော မီးတန်းကြီးကို သယ်ဆောင်ကာ ကမ္ဘာမြေပြင်ဆီသို့ အရှိန်အဟုန်ဖြင့် တိုးဝင်လာလေသည်။

ထိန်းချုပ်ခန်းအတွင်း၌ ပြင်ပမြင်ကွင်းကို ပြသနေသော သုံးဖက်မြင် ပုံရိပ်ယောင်များသည် မီးတောက်များဖြင့် ဖုံးလွှမ်းသွားပြီး ဘေးဘက်ရှိ ဖန်သားပြင်၌သာ အချက်အလက်များ ပေါ်နေတော့သည်။

လော်ယွမ်က ခေါင်းမော့၍ တစ်ချက်ကြည့်လိုက်သော်လည်း သိပ်ပြီး ဂရုမစိုက်လှပေ။ အမှောင်ထု လွှမ်းမိုးနေသော အာကာသထဲတွင် ပျံသန်းရသည့် ယာဉ်ပျံဖြစ်သည့်အားလျော်စွာ ၎င်း၏ ပျံသန်းမှုလမ်းကြောင်းသည် အမြင်အာရုံတစ်ခုတည်းအပေါ်တွင်သာ မှီခိုနေခြင်း မဟုတ်ဘဲ ထောက်လှမ်းရေး စနစ်မျိုးစုံကို ပေါင်းစပ်အသုံးပြုထားခြင်း ဖြစ်သည်။

ထို့ကြောင့် ပြင်ပမြင်ကွင်းကို မျက်မြင်မကြည့်နိုင်ခြင်းက ယာဉ်ပျံ၏ ခရီးလမ်းကို ထိခိုက်စေခြင်း မရှိပေ။

သူက အကြည့်ကို ပြန်ရုတ်လိုက်ပြီး အချက်အလက်များကို ဆက်လက် ဖတ်ရှုလိုက်သည်။

ဗိုရှင်းဂြိုဟ်သားတို့၏ စာပေသည် တရုတ်စာကဲ့သို့ပင် ရုပ်ပုံစာလုံးများမှ ဆင်းသက်လာခြင်း ဖြစ်ပြီး စာလုံးပေါင်းစပ်ဖွဲ့စည်းထားခြင်းမျိုး မဟုတ်ပေ။

ထို့ကြောင့် ၎င်းတို့တွင် စာလုံးရေ နည်းပါးပြီး တစ်သောင်းကျော်ခန့်သာ ရှိသည်။ ထို့ပြင် သူက ဗိုရှင်းဘာသာစကားဖြင့် စကားပြောဆိုရန် မလိုသဖြင့် အသံထွက်များကို ထည့်သွင်းစဉ်းစားစရာ မလိုဘဲ စာလုံးတစ်လုံးချင်းစီ၏ အဓိပ္ပာယ်ကို မှတ်မိရုံဖြင့် သင်ယူရ လွယ်ကူနေသည်။

သူ၏ မှတ်ဉာဏ်စွမ်းအားမှာ အံ့မခန်း ကောင်းမွန်လှပြီး တစ်ကြိမ်ကြည့်ရုံဖြင့် မမေ့နိုင်အောင် မှတ်မိနေတတ်သည်။ တိုတောင်းလှသော အချိန်လေးအတွင်းမှာပင် သူက ဗိုရှင်းစာပေကို ယေဘုယျ နားလည်သွားပြီ ဖြစ်သည်။

စာပိုဒ်ရှည်ကြီးများကို ဖတ်ရှုရာတွင် အနည်းငယ် ခက်ခဲနေသေးသော်လည်း ကိရိယာများနှင့် ခလုတ်များပေါ်ရှိ စာတန်းများကို ဖတ်ရှုရာတွင်မူ မည်သည့်ပြဿနာမျှ မရှိတော့ပေ။

မကြာမီ ယာဉ်ပျံကြီးသည် ဖြည်းညှင်းစွာ ဆင်းသက်လာပြီးနောက် တုန်ခါမှု အနည်းငယ် ဖြစ်ပေါ်ကာ ရပ်တန့်သွားတော့သည်။

ယာဉ်ပျံ စတင်ထွက်ခွာချိန်က ကမ္ဘာမြေနှင့် မိုင်ပေါင်း သုံးသိန်း ခုနစ်သောင်းခန့် ကွာဝေးသော်လည်း ခရီးလမ်း၏ ၉၀ ရာခိုင်နှုန်းခန့်ကို မိနစ်ပိုင်းအတွင်း ရောက်ရှိလာခဲ့သည်။ သို့သော် နောက်ဆုံး ကျန်ရှိသော မိုင် ခြောက်ထောင်ခန့်ကိုမူ နာရီဝက်နီးပါး ကြာအောင် မောင်းနှင်ခဲ့ရသည်။

"အရှင် ယာဉ်မှူး... အရေးပေါ် ကယ်ဆယ်ရေးယာဉ်ဟာ သတ်မှတ်ထားတဲ့ တည်နေရာညွှန်းကိန်းကို ရောက်ပါပြီ... ပြင်ပဆွဲငင်အား ၉.၂ ၊ လေတိုက်နှုန်း ၈.၂ အဆင့်၊ မြင်ကွင်း ကြည်လင်ပြတ်သားမှု တစ်ပေခန့်၊ အပူချိန် အနှုတ် ၃၁ ဒီဂရီ၊ လေထုပါဝင်မှုနှုန်းမှာ..."

"တံခါးဖွင့်လိုက်တော့" လော်ယွမ်က စကားဖြတ်ပြောလိုက်သည်။ ဤဉာဏ်ရည်တု စနစ်သည် ပင်မကွန်ပျူတာမှ ခွဲထွက်လာသော စနစ်ခွဲတစ်ခုသာ ဖြစ်သဖြင့် စစ်မှန်သော ဉာဏ်ရည်ဉာဏ်သွေး မရှိဘဲ စက်ရုပ်ဆန်လွန်းသည်ကို တွေ့မြင်နေရသည်။

"အရှင် ယာဉ်မှူး... ယာဉ်ပျံတံခါး ပွင့်သွားပါပြီ... ထပ်မံ သတိပေးလိုသည်မှာ ပြင်ပပတ်ဝန်းကျင် အခြေအနေ ဆိုးရွားလွန်းသဖြင့် သက်ရှိများ ရှင်သန်ရန် မသင့်လျော်ပါ... အာကာသ ဝတ်စုံကို ဝတ်ဆင်ရန် အကြံပြုလိုပါသည်..." ဉာဏ်ရည်တု စနစ်က တာဝန်ကျေပွန်စွာ သတိပေးနေသည်။

သို့သော် ၎င်း၏ စကားမဆုံးခင်မှာပင် လော်ယွမ်သည် ယာဉ်ပျံပေါ်မှ ဆင်းခွာသွားပြီး ဖြစ်သည်။

မျှော်လင့်ချက်မြို့၏ မြေအောက်မြို့တော်ကြီး ပြိုကျပျက်စီးမည်ကို စိုးရိမ်သဖြင့် ယာဉ်ပျံဆင်းသက်မည့် နေရာကို မြို့အပြင်ဘက် သဲကန္တာရထဲတွင် ရွေးချယ်ခဲ့ခြင်း ဖြစ်သည်။

ကြီးမားလှသော ယာဉ်ပျံကြီး၏ ကိုယ်ထည်သည် သဲမုန်တိုင်းများကြားတွင် တောင်မည်းကြီး တစ်လုံးပမာ မလှုပ်မယှက် တည်ရှိနေသည်။

လော်ယွမ်က နောက်သို့ တစ်ချက်လှည့်ကြည့်လိုက်ပြီးနောက် မျှော်လင့်ချက်မြို့တော်ဆီသို့ လျင်မြန်စွာ ဦးတည်ထွက်ခွာသွားလေသည်။

…………

တစ်နေကုန်နီးပါး ပြုပြင်ပြီးနောက် မြေအောက်မြို့တော်၏ လျှပ်စစ်ဓာတ်အားလိုင်းများ ပြန်လည် ကောင်းမွန်လာခဲ့ပြီ ဖြစ်သည်။ လော်ယွမ် နေထိုင်သော စံအိမ်သည်လည်း လျှပ်စစ်မီး ဦးဆုံး ပြန်လည်ရရှိသည့် နေရာများထဲတွင် ပါဝင်လေသည်။

ယခုအချိန်တွင် စံအိမ်ရာအတွင်း၌ ပျော်ရွှင်ကြည်နူးဖွယ်ရာ ရယ်မောသံများ ထွက်ပေါ်နေသည်။

ဝမ်ရှီရှီသည် ယနေ့တွင် မိုးပြာရောင် အင်္ကျီကို ဝတ်ဆင်ထားသည်။ သူမ၏ မျက်နှာလေးမှာ ပန်းရောင်သန်းနေပြီး လခြမ်းကွေးပုံ မျက်လုံးလေးများက ဆယ်ကျော်သက်ဆန်သော အပြစ်ကင်းစင်မှုနှင့် မိန်းမပျိုလေးတစ်ယောက်၏ ဆွဲဆောင်မှုတို့ကို ပေါင်းစပ်ထားသကဲ့သို့ ချစ်စဖွယ် ကောင်းလှသည်။

သူမက မေးစေ့ကို လက်ဖြင့်ထောက်ကာ ပျင်းရိငြီးငွေ့စွာဖြင့် ပြောလိုက်သည်။ "ကိုကြီးယွမ်က ဘာလို့ အခုထိ ပြန်မလာသေးတာလဲ"

"သူ အခုလောက်ဆို အလုပ်ရှုပ်နေမှာပေါ့" ကျိုးယလီက လေသံတိုးတိုးဖြင့် ဝင်ပြောသည်။ သူမသည် အစိမ်းရောင် ခါးသိမ်အင်္ကျီကို ဝတ်ဆင်ထားပြီး ရေကဲ့သို့ နူးညံ့သိမ်မွေ့သော ကျန်နန်မိန်းကလေး တစ်ယောက်၏ အငွေ့အသက်ကို ပေးစွမ်းနေသည်။

လက်ရှိတွင် သူမ၏ စိတ်နှလုံးသည် လှုပ်ရှားနေမိသည်။ အပြင်မှ ကြားသိရသော သတင်းများအရ လော်ယွမ်သည် မြို့တော်ဝန် ဖြစ်လာသည်ဟု သိရသဖြင့် သူမ အံ့ဩဝမ်းသာ ဖြစ်နေရသည်။

လော်ယွမ်သည် ယခင်ကတည်းက ဓားတရားအဖွဲ့၏ ဒုတိယဝန်ကြီး ဖြစ်သဖြင့် ရာထူးဂုဏ်ရှိန်အရ မျှော်လင့်ချက်မြို့တော်ဝန်နှင့် တန်းတူဖြစ်သည်။

သို့သော် မိမိဌာနတွင်းမှလွဲ၍ အခြားနေရာများတွင် လုပ်ပိုင်ခွင့် အာဏာ သိပ်မရှိသလို သာမန်ပြည်သူများအပေါ်တွင်လည်း လွှမ်းမိုးမှု နည်းပါးသည်။

သူမ၏ အမြင်တွင် နာမည်သာရှိပြီး လူသိနည်းသော ဒုတိယဝန်ကြီး နေရာထက် အာဏာကြီးမားသော မြို့တော်ဝန် ရာထူးက ပိုမိုမြင့်မြတ်သည်ဟု ခံယူထားသည်။

"အပြင်မှာ ပြောနေကြတာကတော့ အနုမြူ ဆောင်းရာသီ ရောက်လာပြီတဲ့... ကမ္ဘာကြီးက ရေခဲခေတ်ကို ပြန်ရောက်တော့မယ်လို့ ပြောနေကြတယ်... အနာဂတ်မှာ ဘယ်လိုတွေ ဆက်ဖြစ်မလဲ မသိဘူး" ဟွမ်ကျားဟွေက စိုးရိမ်တကြီး ပြောလာသည်။

သူမသည် ခရမ်းရောင် အင်္ကျီထူထူကို ဝတ်ဆင်ထားသော်လည်း သူမ၏ ပြည့်ဖြိုးလှပသော ခန္ဓာကိုယ် ကောက်ကြောင်းအလှကို ဖုံးကွယ်ထားနိုင်ခြင်း မရှိပေ။ သူမ၏ မျက်နှာလေးမှာ ညှိုးငယ်နေပြီး မျက်မှောင်အနည်းငယ် ကြုတ်ထားသည်။

ထိုစကားကို ကြားသောအခါ အားလုံး၏ စိတ်ထဲတွင် စိုးရိမ်ပူပန်မှုများ ဖြစ်ပေါ်လာကြသည်။ ရာသီဥတုက တဖြည်းဖြည်း ပိုမိုအေးစက်လာသည်မှာ အမှန်ပင်ဖြစ်သည်။

မြေအောက်မြို့တော်ထဲတွင် နေထိုင်နေရသည့်တိုင် အအေးဓာတ်ကို ခံစားနေရပြီဖြစ်ရာ အပြင်ဘက်တွင် ဆိုလျှင် ဆိုဖွယ်ရာပင် ရှိတော့မည် မဟုတ်ပေ။

"ကိုကြီးယွမ်က အဲ့ဒါကို ဖြေရှင်းနိုင်မှာပါ" ဝမ်ရှီရှီက ချွဲနွဲ့သော အသံလေးဖြင့် ပြောလိုက်သည်။ သူမ၏ စိတ်ထဲတွင် စိုးရိမ်မှု လုံးဝမရှိပေ။

သူမသည် လော်ယွမ်ကို အမြဲတမ်း ကိုးကွယ်ယုံကြည်သူ ဖြစ်သည်။ သူမ၏ အမြင်တွင် ကိုကြီးယွမ်အတွက် မဖြစ်နိုင်သော အရာဟူ၍ မရှိပေ။

'သူက နတ်ဘုရားမှ မဟုတ်တာ... ရေခဲပြင်ကြီး အရည်ပျော်အောင် လုပ်နိုင်ပါ့မလား' ယဲ့ချိုးယွီက ဝမ်ရှီရှီ၏ စကားကို ကြားသောအခါ စိတ်ထဲမှ ကျိတ်ရယ်လိုက်မိသော်လည်း ထုတ်ဖော်မပြောဘဲ နေလိုက်သည်။

ထိုအမျိုးသမီးများထဲတွင် ယဲ့ချိုးယွီသည် အဝတ်အစား အများဆုံး ဝတ်ဆင်ထားသူ ဖြစ်သည်။ သူမ၏ ခန္ဓာကိုယ် ကြံ့ခိုင်မှုသည် အကြိမ်ကြိမ် ဆင့်ကဲပြောင်းလဲထားသော အခြားသူများနှင့် ယှဉ်လျှင် များစွာ အားနည်းနေသည်။ သူမသည် တစ်ကိုယ်လုံးကို အဝတ်ထူထူများဖြင့် ပတ်ထားသော်လည်း အအေးဒဏ်ကို ခံစားနေရဆဲ ဖြစ်သည်။

ထိုအချိန်တွင် အပြင်ဘက်မှ ဆူညံသံများ ရုတ်တရက် ထွက်ပေါ်လာပြီး တစ်ခုခု ဖြစ်ပွားနေသည့်နှယ် ရှိသည်။

ခေတ္တမျှ နားစွင့်နေပြီးနောက် အသံများက ပိုမိုကျယ်လောင်လာသဖြင့် ဝမ်ရှီရှီသည် ငြိမ်ငြိမ်မနေနိုင်တော့ဘဲ ထိုင်ရာမှ ထလိုက်သည်။ "ငါ အပြင်ထွက်ကြည့်လိုက်ဦးမယ်"

"ဒါဆိုရင် မြန်မြန်သွားပြီး မြန်မြန်ပြန်လာခဲ့နော်" ဟွမ်ကျားဟွေက မှာလိုက်သည်။ လက်ရှိ အချိန်ကာလသည် အခြေအနေများ အချိန်နှင့်အမျှ ပြောင်းလဲနေတတ်သည်။

သူမတို့ နေထိုင်ရာသည် မြို့စွန်ဖြစ်သဖြင့် သတင်းအချက်အလက် ရရှိမှု နည်းပါးလှသည်။ အပြင်ထွက် စုံစမ်းခြင်း မပြုလျှင် ဘာတွေ ဖြစ်ပျက်နေသည်ကို သိရှိနိုင်မည် မဟုတ်ပေ။

ဝမ်ရှီရှီသည် စံအိမ်ဝင်းထဲမှ အလျင်အမြန် ပြေးထွက်သွားသည်။ အိမ်ဝင်း အပြင်ဘက်တွင် လုံခြုံရေး အစောင့်များ ချထားပြီး လမ်းမပေါ်တွင်လည်း စစ်ဘက်ရဲများက နေ့ညမပြတ် ကင်းလှည့်နေကြသည်။

၎င်းက လော်ယွမ်၏ အမိန့် မဟုတ်သော်လည်း လက်အောက်ငယ်သားများက အကင်းပါးစွာဖြင့် စီစဉ်ပေးထားခြင်း ဖြစ်သည်။

"အစ်ကိုကြီးတို့... အပြင်မှာ ဘာတွေ ဖြစ်နေတာလဲဟင်" ဝမ်ရှီရှီက လုံခြုံရေး အစောင့်တစ်ဦးကို မေးလိုက်သည်။

"ဒီဘက်ကိုတော့ သတင်းမရောက်သေးဘူးဗျ... ကျွန်တော် လူလွှတ်ပြီး မေးပေးရမလား" လုံခြုံရေး ခေါင်းဆောင်က လေးစားစွာဖြင့် ပြန်ဖြေလိုက်သည်။

ယခုအချိန်တွင် ဆက်သွယ်ရေး စနစ်များ အပြည့်အဝ ပြန်မကောင်းသေးသဖြင့် သတင်းစကား ပါးရာတွင် လူကိုယ်တိုင် သွားရောက် ပြောဆိုရသည်က များသည်။

သို့သော် ဤနေရာအထိ အကြောင်းကြားစာ မရောက်သေးခြင်းကို ထောက်ရှုလျှင် လုံခြုံရေးဆိုင်ရာ အန္တရာယ် မဟုတ်သည်မှာ သေချာသည်။

"ရပါတယ်... ကျွန်မဘာသာပဲ သွားကြည့်လိုက်မယ်" ဝမ်ရှီရှီက ပြောပြောဆိုဆိုဖြင့် အပြင်ဘက်သို့ ထွက်ခွာသွားသည်။

မျှော်လင့်ချက်မြို့တော်သည် စစ်အုပ်ချုပ်ရေး အမိန့် ထုတ်ပြန်ထားဆဲ ဖြစ်ပြီး လမ်းတိုင်းတွင် စစ်ဘက်ရဲများ ရှိနေသဖြင့် လုံခြုံရေး အစောင့်များကလည်း သူမကို မတားဆီးတော့ပေ။ ထို့ပြင် သူမသည် သာမန် မိန်းကလေး တစ်ယောက်လည်း မဟုတ်ပေ။

ဝမ်ရှီရှီသည် နှစ်မိုင်၊ သုံးမိုင်ခန့် လျှောက်လာပြီးနောက် လူသူကင်းမဲ့နေသော လမ်းမကြီးသည် ရုတ်တရက် လူအုပ်ကြီးဖြင့် ပြည့်နှက်သွားပြီး ဆူညံပွက်လောရိုက်နေသည်ကို တွေ့လိုက်ရသည်။

လူတိုင်းသည် အလွန်အမင်း စိတ်လှုပ်ရှားနေကြပြီး အချင်းချင်း ကျယ်လောင်စွာ စကားပြောဆိုရင်း စိတ်ခံစားချက်များကို ဖွင့်ထုတ်နေကြသည်။

ဝမ်ရှီရှီသည် ဘေးနားတွင် ခေတ္တမျှ ရပ်နားထောင်နေရင်း ပါးစပ်အဟောင်းသား ဖြစ်သွားရသည်။ သူမ ကြားနေရသည်များကို အံ့ဩမှင်သက်နေမိပြီး မယုံနိုင်လောက်အောင် ဖြစ်နေရသည်။

ထို့နောက်တွင်မူ ပြင်းပြသော စိတ်လှုပ်ရှားမှု တစ်ခုက သူမ၏ ရင်ထဲသို့ ဝင်ရောက်လာသည်။ လူအုပ်ကြီး ပြောဆိုနေသော အကြောင်းအရာကို သူမ မယုံနိုင်အောင် ဖြစ်နေမိသည်။

သူမ ဘာကြားလိုက်ရသနည်း။ မျှော်လင့်ချက်မြို့တော် အပြင်ဘက်တွင် ယာဉ်ပျံကြီး တစ်စင်း ဆင်းသက်ထားကြောင်းနှင့် ထိုယာဉ်ပျံကြီးကို ပြုပြင်မွမ်းမံရန်အတွက် အလုပ်သမားများ ခေါ်ယူနေသည်တဲ့။ ဒါဆိုရင် လူသားတွေ ကမ္ဘာမြေကြီးကနေ ထွက်ခွာကြတော့မှာလား။

......

လော်ယွမ်သည် မျှော်လင့်ချက်မြို့တော်သို့ ပြန်ရောက်သည်နှင့် တစ်ပြိုင်နက် မြို့တော်ခန်းမ အစည်းအဝေးကို ချက်ချင်း ခေါ်ယူလိုက်သည်။

ပြည်သူလူထု၏ စိတ်ဓာတ်ခွန်အားကို မြှင့်တင်ရန်နှင့် စည်းလုံးညီညွတ်မှုကို ပြန်လည် တည်ဆောက်ရန်အတွက် ကြီးမားသော ဝါဒဖြန့်ချိရေး လှုပ်ရှားမှုကြီးကို မြို့တော်တစ်ဝှမ်းတွင် စတင်လိုက်သည်။ တစ်ချိန်တည်းမှာပင် ပထမအသုတ် ရွှေ့ပြောင်းမည့်သူများကို စုစည်း၍ ကြိုတင် ပြင်ဆင်မှုများ ပြုလုပ်နေပြီ ဖြစ်သည်။

ဤပထမအသုတ် ရွှေ့ပြောင်းမည့်သူများထဲတွင် အင်ဂျင်နီယာများနှင့် သုတေသီများအပြင် သာမန် အလုပ်သမားများလည်း အများအပြား ပါဝင်လေသည်။

ဤသတင်း ကြေညာလိုက်မှုသည် ထင်မှတ်ထားသည်ထက် ပိုမို ကောင်းမွန်သော ရလဒ်ကို ဖြစ်ပေါ်စေခဲ့သည်။ ငြိမ်သက်နေသော ရေကန်ထဲသို့ ရေနက်ဗုံးတစ်လုံး ပစ်ချလိုက်သကဲ့သို့ မျှော်လင့်ချက်မြို့တော် တစ်ခုလုံး ပွက်လောရိုက်သွားစေခဲ့သည်။

ပြည်သူများသည် စိတ်လှုပ်ရှားလွန်းသဖြင့် အလုပ်ပင် ဆက်မလုပ်နိုင်ကြတော့ဘဲ မြို့တော်၏ လုပ်ငန်းလည်ပတ်မှုများ ခေတ္တ ရပ်တန့်သွားသည်အထိ ဖြစ်ခဲ့ရလေသည်။

ဆက်ရန်...