ရူးလောက်ဖွယ်အဆင့်မြှင့်တင်မှု

အမှန်စင်စစ် အစိမ်းရောင်ဝတ်အစေခံမလေးသည် ထိုစဉ်က မင်းသမီးနန်းဆောင်ထဲတွင် မရှိသော်လည်း အဝေးကြီးမှာရှိနေသည်တော့မဟုတ်။ သူမသည် ကျန်းချန်က ကျောက်စိမ်းအဆောင်ကိုချေမွပြီး အကူအညီတောင်းမည့်အချိန်ကို စောင့်နေခြင်းဖြစ်သည်။

သူ အကူအညီတောင်းလိုက်သည်နှင့် အပေးအယူကို လက်ခံလိုက်သည်ဟု အဓိပ္ပာယ်ရသည်။ သွေးတမန်စစ်တပ်က စုစည်းလိုက်သည့် ဧရာမလှံကြီးကို သူမမြင်လိုက်ရစဉ်က တိုက်ပွဲထဲသို့ သူမကိုယ်တိုင် ဝင်ပါချင်စိတ်ပေါက်သွားခဲ့သည်။

တာအိုနန်းတော်အဆင့် ၈ ကျွမ်းကျင်သူဖြစ်သည့် သူမပင်လျှင် ထိုတိုက်ခိုက်မှုကို ဒဏ်ရာမရဘဲ တားဆီးနိုင်ရန်ခက်ခဲ၏။ ထို့အပြင် အခြားတာအိုနန်းတော်အဆင့် ကျွမ်းကျင်သူခုနစ်ဦးကလည်း တစ်ပြိုင်တည်း တိုက်ခိုက်နေကြသည် မဟုတ်ပါလား။ သူမသာဝင်မပါလျှင် ကျန်းချန် သေချာပေါက် သေလိမ့်မည်ဟု သူမထင်ခဲ့သည်။

သို့သော် သူမနောက်ဆုံးတွင် စိတ်ထိန်းလိုက်သည်။ သူမသာ အစပျိုးပြီး ဝင်ပါလိုက်လျှင် ကျန်းချန်ဘက်က အရှုံးပေးခြင်း မဟုတ်တော့ပေ။

၎င်းသည် သူတို့နှစ်ဦးကြားက ကစားပွဲတစ်ခုဟု သူမယူဆထားသည်။ ထိုတိုက်ခိုက်မှုအပြီးတွင် ကျန်းချန်သေသွားပြီဟု သူမထင်ခဲ့မိသည်။

“လူမိုက်ပဲ။ နင့်ရဲ့ ကံကောင်းမှုတွေက ဘယ်လောက်ပဲကြီးမားပါစေ၊ ဒီလိုမျိုး ဖြုန်းတီးပစ်တာကိုတော့ ခံနိုင်မှာမဟုတ်ဘူး။”

သူမ ထိုသို့မှတ်ချက်ပေးပြီး မကြာမီမှာပင် အကာအကွယ်အတားအဆီးကြီးကို မြင်လိုက်ရသည်။

“နဂါးဝိညာဉ်မဟာအစီအရင်လား။ ရှန့်ကောင်းယဲ့က ဝင်ပါတာလား။”

သူမ ဇဝေဇဝါဖြစ်သွားရသည်။ ဧကရာဇ်က ဘာလုပ်ဖို့ကြိုးစားနေတာလဲ။

ကျန်းချန်က သေသွားလောက်ပြီလေ...

ဘာလို့ မဟာအစီအရင်ကို အသက်သွင်းရတာလဲ...

ထိုအချိန်မှာပင် ကျန်းချန်က ဝိညာဉ်အဆောင်ကို ချေမွလိုက်သည်ကို သူမခံစားလိုက်ရသည်။ သူမ၏ စစ်မှန်သော ဝိညာဉ်အသိစိတ်မှာ အကာအကွယ်အတွင်းသို့ ချက်ချင်းရောက်ရှိသွားပြီး အတွင်းမှမြင်ကွင်းကို မြင်လိုက်ရတော့သည်။

သွေးတမန်စစ်တပ်မှာ လုံးဝချေမှုန်းခံထားရလေပြီ။ ထိပ်တန်းကျွမ်းကျင်သူခုနစ်ဦးမှာလည်း အားအင်ကုန်ခမ်းကာ သေအံ့မူးမူးရုန်းကန်နေကြရသည်။ ကျန်းချန်ကတော့ ဘာမှမဖြစ်ဘဲ အကောင်းတိုင်းရှိနေဆဲ။

ထိုမျှမက ရုပ်သေးအကအဖွဲ့ကလည်း အလုပ်ရှုပ်နေဆဲ။ သီချင်းဆို ကခုန်တာတွေ တစ်ချက်ကလေးမှမရပ်...

မဟာအစီအရင်ကို ကျန်းချန်က လုံးဝထိန်းချုပ်ထားပြီး အကအဖွဲ့အတွက် ဘေးကင်းလုံခြုံသော နေရာတစ်ခုတောင် သီးသန့်ဖယ်ပေးထားသေးသည်။

အစိမ်းရောင်ဝတ်အစေခံမလေးမှာ သူ၏အနုပညာခံစားချက်နှင့် အရသာကို ဝေဖန်ဖို့တောင် အင်အားမရှိတော့ပေ။ သူမရှေ့က တစ်ဖက်သတ်တိုက်ပွဲကိုကြည့်ပြီး သူမမှင်သက်နေမိသည်။

“ရှင် ဒါကိုဘယ်လိုလုပ်လိုက်တာလဲ။”

ရှန့်ကောင်းယဲ့ကတော့ ကျန်းချန်အတွက်နဲ့ သူ့ရဲ့ကိုယ်ပိုင်အင်အားကြီးကျွမ်းကျင်သူတွေကိုသတ်ဖို့ အစီအရင်ကို အသက်သွင်းမှာမဟုတ်ဘူးလေ။

“ဒီအတိုင်း လုပ်လိုက်တာပါပဲ၊ သာမန်လှုပ်ရှားမှုလေးတစ်ခုပါပဲ။”

အစ်ကိုကြီးချန်က ဘာမှမဟုတ်သလိုမျိုး ပခုံးတွန့်၍ လက်နှစ်ဖက်ကိုဖြန့်ပြလိုက်သည်။

ထိုအချိန်တွင် ထိပ်တန်းကျွမ်းကျင်သူခုနစ်ဦးလုံး သေဆုံးသွားကြလေပြီ။ အကာအကွယ်အတွင်းရှိ ပင်လယ်ရေများမှာ တိတ်ဆိတ်စွာ ပြန်လည်ဆုတ်ခွာသွားပြီး နဂါးနက်ပုံရိပ်ကြီးလည်း ပျောက်ကွယ်သွားကာ အကာအကွယ်အတွင်းမှာ ပြန်လည်ငြိမ်သက်သွားတော့သည်။

အစိမ်းရောင်ဝတ်အစေခံမလေး၏ လှပသောမျက်လုံးများမှာ ဝိုင်းစက်သွားရသည်။ သူမကိုယ်တိုင်ပင် ဤမျှလောက်အထိ မလုပ်နိုင်ပေ။ ကျန်းချန်က တကယ်ပဲ ဤမျှအင်အားကြီးသည်ဟု သူမမယုံနိုင်ပေ။

“ရှင်က နဂါးဝိညာဉ်မဟာအစီအရင်ကို ဘယ်လိုလုပ်တတ်မြောက်နေတာလဲ။ ရှင်က ဒီကိုပထမဆုံးရောက်ဖူးတာမဟုတ်လား။”

“လျှို့ဝှက်ချက်ပေါ့။”

ကျန်းချန်က လျှို့ဝှက်ဆန်းကြယ်စွာပြုံးလိုက်သည်။

အစိမ်းရောင်ဝတ်အစေခံမလေး ခဏမျှတိတ်ဆိတ်သွားပြီး နောက်ဆုံးတွင် မေးလိုက်သည်။

“ရှင်ကအနိုင်ရနေပြီပဲကို ဘာလို့ဝိညာဉ်အဆောင်ကို ချေမွလိုက်သေးတာလဲ။”

အဆောင်ပျက်စီးသွားသောအခါ ကျန်းချန်အကူအညီတောင်းနေပြီဟု သူမထင်ခဲ့သည်။

သူမလည်း ချက်ချင်းဝင်ပါရန် ပြင်ဆင်ထားခဲ့ပြီး သေလောက်သည့် တိုက်ခိုက်မှုကို တားဆီးပေးရန် စီစဉ်ထားခဲ့သည်။ ဝင်လာပြီးတော့မှ သူမ ဘာမှလုပ်ပေးစရာ မလိုတော့ကြောင်း သိလိုက်ရ၏။

“ဪ... မင်းကို သက်သေအဖြစ်ကြည့်ခိုင်းချင်လို့ပါ။”

အစ်ကိုကြီးချန် ပုခုံးတွန့်ပြလိုက်သည်။ တစ်ယောက်ယောက်ကြည့်နေမှ ကြွားရတာက ပိုပြီးကျေနပ်ဖို့ကောင်းသည် မဟုတ်ပါလား။

“ရှင်ကတော့လေ...”

အစိမ်းရောင်ဝတ်အစေခံမလေး၏ စိတ်ထဲတွင် မြင်းပေါင်းသောင်းချီ ပြေးလွှားနေသလို ခံစားလိုက်ရပြီး ဤလူကို လုံးဝအရှုံးပေးလိုက်ရတော့သည်။

အကာအကွယ် ပျောက်ကွယ်သွားသည်နှင့် ဝိညာဉ်အသိစိတ်မှာလည်း အပြင်လောကတွင် ကြာရှည်မတည်ရှိနိုင်ဘဲ ပျောက်ကွယ်သွား၏။

အစ်ကိုကြီးချန်ကတော့ တိုက်ပွဲမှရရှိလာသောပစ္စည်းများကို ပျော်ပျော်ရွှင်ရွှင် သိမ်းဆည်းတော့သည်။ သွေးတမန်စစ်သည်တစ်သောင်းထံမှ တန်ဖိုးရှိသည့်အရာ ဘာမျှမကျန်တော့ပေ။ သူတို့အားလုံးမှာ ဝိညာဉ်အခြေတည်အဆင့်ရှိကြသော်လည်း သိုလှောင်လက်စွပ်ပင်မရှိကြ။

တခြားဂိုဏ်းတွေမှာဆိုရင် ဝိညာဉ်ခွဲထုတ်ခြင်းအဆင့် ကျင့်ကြံသူတွေတောင် ကိုယ်ပိုင်ပစ္စည်းလေးတွေ ရှိတတ်ကြသည်။

“တကယ်ကို စိတ်ဓာတ်မကောင်းတဲ့လူတွေပဲ။ ချန်ရှင်းမင်းဆက်အတွက် အလုပ်လုပ်ပေးနေတာတောင် သူတို့ရတဲ့အကျိုးခံစားခွင့်က အရမ်းနည်းတာပဲ။”

သူညည်းတွားရင်း သူတို့ထံမှ အဆင့် ၄ စစ်ဝတ်စုံများနှင့် အဆင့် ၅ လက်နက်များကို အမှတ်များအဖြစ် ပြောင်းလဲလိုက်သည်။ နဂါးဝိညာဉ်မဟာအစီအရင်၏ တိုက်စားမှုမှာ သွေးသားသတ္တဝါများကိုသာ ပစ်မှတ်ထားသဖြင့် ဝိညာဉ်လက်နက်များမှာ ပျက်စီးခြင်းမရှိ။ သူတို့ထံမှ အမှတ် ၁.၁ သန်း ရရှိခဲ့သည်။

ကျန်သည့် ထိပ်တန်းကျွမ်းကျင်သူခုနစ်ဦးမှာတော့ တကယ့်အချီကြီးပင်။ သူတို့အားလုံးမှာ တာအိုနန်းတော်အဆင့်ရှိကြပြီး မိသားစုဘိုးဘေးများ၊ စစ်ဘက်ဆိုင်ရာထိပ်သီးများနှင့် ကျောင်းအုပ်ကြီးများဖြစ်ရာ သူတို့၏စုဆောင်းမှုအများစုမှာ ကိုယ်ပိုင်သိုလှောင်လက်စွပ်များထဲတွင် ရှိနေသည်။

ကျန်းချန်သည် လက်စွပ်တစ်ကွင်းကိုဖွင့်လိုက်တိုင်း ဝမ်းသာအားရအော်ဟစ်မိ၏။ အားလုံးတွင် အဆင့် ၈ ဝိညာဉ်လက်နက်များရှိကြပြီး စုချင်းရှိုးနှင့် ဓားအရှင်သခင်ချိုးဟယ်တို့တွင်မူ အဆင့် ၉ ဝိညာဉ်ဓား တစ်လက်စီ ရှိကြသည်။ ဝိညာဉ်ကျောက်တုံးများ၊ ဆေးလုံးများနှင့် ဝိညာဉ်အဆောင်များမှာလည်း အမြောက်အမြားပင်။

ချန်ရှင်းမင်းဆက်ခရီးစဉ်ကမပြီးသေးဘဲ နောက်ပိုင်းတွင်လည်း အသတ်ခံရပြီး ပြန်ရှင်လာနိုင်ခြေရှိသောကြောင့် သူဘာမျှချန်မထားဘဲ အားလုံးကို အမှတ်အဖြစ် ပြောင်းလဲလိုက်သည်။

ဤသို့ ပြောင်းလဲလိုက်ပြီးနောက် သူ၏ စုစုပေါင်းအမှတ်မှာ ၈.၅၅ သန်းသို့ ရောက်ရှိသွားသည်။ အဆင့်မြှင့်တင်ရန် လိုအပ်သည့် အမှတ် ၁၀ သန်းရရန် မဝေးတော့ပေ။ ကျန်ရှိသည့် ပစ္စည်းများမှာ ဆေးလုံးများနှင့် လက်နက်များသွန်းလုပ်ရန်လိုအပ်သည့် ကောင်းကင်နှင့် မြေကြီး ရတနာပစ္စည်း ဆယ်ခုကျော်ဖြစ်သည်။

၎င်းအပြင် ထိုလူများ၏လက်စွပ်များကိုရှာဖွေရင်း ဝိညာဉ်စွမ်းအားတိုးတက်စေသည့် အဖိုးတန် ဆေးလုံး ၂၁ လုံးကိုလည်း သူ စုဆောင်းနိုင်ခဲ့၏။ ဝိညာဉ်ဆေးလုံးများမှာတော့ အလွန်ရှားပါးလှသဖြင့် ထိုလူများတွင်ရှိခဲ့လျှင်လည်း သူတို့ဘာသာ သောက်သုံးခဲ့ကြမည်ဖြစ်လေသည်။

သူ၏ဝိညာဉ်မှာ နဂါးနက်ရုပ်ကြွင်းကြောင့် တာအိုနန်းတော်အဆင့်သို့ရောက်ရှိသွားပြီးပြီဖြစ်ရာ ယခုသူ့အတွက်လိုအပ်သည်မှာ ဝိညာဉ်စွမ်းအားစုဆောင်းမှုသာ။ ဤဆေးလုံးများမှာ သူ့အတွက် နတ်ဘုရားက ပေးသနားလိုက်သကဲ့သို့ပင်။ သူ ချက်ချင်းထိုင်လိုက်ပြီး နေရာမှာတင် တရားထိုင်ကျင့်ကြံတော့သည်။

အခြားသူသာဆိုလျှင် တရားထိုင်ကျင့်ကြံသည့်အခါ ကွင်းပြင်ကိုရှောင်ကြဉ်ပေလိမ့်မည်၊ အလွန် အန္တရာယ်များလှသည် မဟုတ်ပါလား။

အထူးသဖြင့် အဆင့်တက်ခါနီးအချိန်တွင် နှောင့်ယှက်ခံရပါက ပြဿနာကြီးသွားနိုင်သည်။ သို့သော် ကျန်းချန်ကတော့ ဒါတွေကိုဂရုမစိုက်။ သူ့တွင် ယနေ့အတွက် ပြန်လည်ရှင်သန်ခွင့် နှစ်ကြိမ်ကျန်သေးရာ အသတ်ခံရလျှင်ပင်ကိစ္စမရှိပေ။

သွယ်လျသောလူရိပ်တစ်ခုမှာ သူ၏နောက်သို့ တိတ်တဆိတ်ရောက်လာ၏။ အစိမ်းရောင်ဝတ်အစေခံမလေး၏ ကိုယ်ပွားမဟုတ်ဘဲ ကိုယ်တိုင်ရောက်လာခြင်းဖြစ်သည်။

သူမသည် ကျန်းချန်၏ကျောပြင်ကို တိတ်တဆိတ်ကြည့်နေပြီး ဘာပြောရမှန်းမသိဖြစ်နေသည်။ သူမသည် ဤလူကို လုံးဝအကဲမဖြတ်နိုင်တော့ပေ။ အကယ်၍ သူကငတုံးဆိုရင်လည်း သေသွားတဲ့သူတွေအကုန်လုံးက ရန်သူတွေဖြစ်ပြီး သူကပဲ နောက်ဆုံးမှာပြုံးနိုင်ခဲ့၏။

အကယ်၍ သူကထက်မြက်တယ်လို့ပြောလျှင်လည်း အခုလို ဘာကာကွယ်မှုမှမရှိဘဲနေနေတဲ့ပုံစံက ဘယ်မှာထက်မြက်လို့လဲ...

ထိုအချိန်မှာပင် ကျန်းချန်သည် ကောင်းကင်ကောင်းကင်ကံကြမ္မာအဆင့် ၅ ကျင့်ကြံသူ ဖြစ်လာသည်ကို သူမ သိလိုက်ရသည်။

ဆေးလုံးတွေသောက်ပြီး အဆင့်တက်သွားတာလား...

ဆေးလုံးတွေအလုပ်လုပ်ဖို့ဆိုရင် နယ်ပယ်အပေါ် နားလည်သဘောပေါက်မှု ရှိနေရမှာဖြစ်သလို ဝိညာဉ်ကလည်းလိုက်နိုင်ရမှာဖြစ်သည်။

သူက စောစောကတိုက်ပွဲအတွင်းမှာ တစ်ခုခုကို နားလည်သွားတာများလား...

ထို့နောက် ကျန်းချန်က ဆေးလုံးတွေထပ်သောက်တာကို သူမမြင်လိုက်ရသည်။

သူထပ်ပြီး အဆင့်တက်နိုင်ဦးမှာလား...

တစ်မိနစ်မျှကြာပြီးနောက်တွင် ဤလူ၏အရှိန်အဝါမှာ ကောင်းကင်ကောင်းကင်ကံကြမ္မာအဆင့် ၆ သို့ ရောက်ရှိသွားသည်ကိုမြင်တော့ သူမမှင်သက်သွားရပြန်သည်။

ဒါက ဘယ်လိုလုပ်ဖြစ်နိုင်မှာလဲ...

ကောင်းကင်ကောင်းကင်ကံကြမ္မာအဆင့် ၅ မှ အဆင့် ၆ သို့ ရောက်ရန် ဝိညာဉ်စွမ်းအား အမြောက်အမြားလိုအပ်သည်။ အဖိုးတန်ဆေးလုံးတွေမှာ ဝိညာဉ်စွမ်းအားများစွာပါဝင်နေလျှင်ပင် ကျင့်ကြံသူတွေအနေနဲ့ ၎င်းတို့ကို လုံးဝချေဖျက်ပြီး ဝိညာဉ်စွမ်းအားအဖြစ်ပြောင်းလဲဖို့ အချိန်များစွာယူရသည်။

သာမန်ကောင်းကင်ကောင်းကင်ကံကြမ္မာအဆင့် ကျင့်ကြံသူတစ်ဦးအတွက် ဆေးလုံးတစ်လုံး၏အာနိသင်ကို ချေဖျက်ရန် နှစ်လ၊ သုံးလ သို့မဟုတ် ထိုထက်မက ကြာတတ်သည်။ သူမကဲ့သို့ ထိပ်တန်း ပါရမီရှင်များအတွက်မူ နာရီအနည်းငယ်အတွင်း လုပ်ဆောင်နိုင်၏။

သို့သော် အခု သူမမြင်နေရတာက ဘာလဲ...

ဤလူသည် ဆေးလုံးနှစ်လုံးကိုချေဖျက်ပြီး အဆင့်တက်ရန် အချိန်ခဏသာယူခဲ့သည်။

“ရှင်ကတော့လေ...”

သူမ တစ်ခုခုပြောရန် ပြင်လိုက်သည်။

ထို့နောက် ကျန်းချန်က ဆေးလုံးထပ်သောက်လိုက်ပြန်ပြီး ဤတစ်ကြိမ်တွင် ဆေးလုံးနှစ်လုံးကို တစ်ပြိုင်တည်းချေဖျက်လိုက်သည်။

သူ ရူးနေတာလား...

ကောင်းကင်ကောင်းကင်ကံကြမ္မာအဆင့် ကျင့်ကြံသူတစ်ဦးသည် တစ်ကြိမ်လျှင် ဆေးလုံးတစ်လုံး၏စွမ်းအားကိုသာ ခံနိုင်ရည်ရှိပြီး ၎င်းမှာပုံမှန်အကန့်အသတ်ပင်။ ဆေးလုံးနှစ်လုံးဆိုလျှင် သွေးကြောတွေပေါက်ထွက်သွားနိုင်သည်။

သို့သော် နှစ်မိနစ်အကြာတွင် ကျန်းချန်သည် ဆေးလုံးနှစ်လုံး ထပ်သောက်လိုက်သည်ကို မြင်လိုက်ရပြန်သည်။ ခဏအကြာတွင်သူသည် ကောင်းကင်ကောင်းကင်ကံကြမ္မာအဆင့် ၇ ကျင့်ကြံသူအဖြစ်သို့ အောင်မြင်စွာ အဆင့်တက်သွားတော့သည်။

အစိမ်းရောင်ဝတ်အစေခံမလေးသည် သူမ၏ဘဝသက်တမ်းတစ်လျှောက် ဤသို့မြန်ဆန်စွာအဆင့်တက်သည့်လူမျိုးကို တစ်ခါမှမမြင်ဖူးကြောင်း ကျိန်ဆိုရဲသည်။ သူမ၏ မျက်စိရှေ့မှာတင် အဆင့်တစ်ခုပြီးတစ်ခုကိုကျော်ဖြတ်သွားသည် မဟုတ်ပါလား။