အခန်း (၅၀၇၆-၅၀၈၀)

Chapter 5076

လုယွီသည် တခြားအရာရှိများ မည်သို့ တွေးထင်သည်ကို ဂရုမစိုက်ခဲ့ချေ။

လုယွီလုပ်သမျှ အရာအားလုံးသည် လျင်မြန်မှု တိကျမှုနှင့်ပြင်းထန်မှုတို့ ရောယှက်နေသည်။ သူသည် လျင်မြန်ပြီး အချိန်ဆွဲခြင်း မပြုရပေ။

ဤအကြောင်းကြောင့် လီစစ်သည် ထျန်းတအိမ်တော်သို့ တိုက်ရိုက်ပြောင်းရွှေ့နေထိုင်ခဲ့သည်။ သူသည် လုယွီနှင့် အရေးကြီးသော ကိစ္စရပ်များကို မကြာခဏ ဆွေးနွေးလေ့ရှိသည်။ ဆုံးဖြတ်ချက်တစ်ခု ချပြီးသည်နှင့် သူသည်ထိုကိစ္စကိုကိုင်တွယ်ရန် အမိန့်ပြန်တမ်းကို ချက်ချင်းရေးသားပေလိမ့်မည်။

အမိန့်ပြန်တမ်းများ မကြာခဏ ထုတ်ပြန်သောကြောင့် သတင်းစကားများ ပေးပို့သော မိန်းမစိုးအရာရှိများကို တော်ဝင်မြို့တော်အထက်ရှိ မိုးကောင်းကင်ယံတွင် ပျံသန်းခွင့်ပြုခဲ့သည်။ အချိန်တိုအတွင်းမှာပင် နေ့စဉ်နေ့တိုင်း တော်ဝင်မြို့တော်အထက်ရှိ မိုးကောင်းကင်ယံတွင် ရှည်လျားသော မျဉ်းကွေးများပုံစံဖြင့် မိန်းမစိုးများ ပျံသန်းနေသည်ကို တွေ့မြင်နိုင်ပေမည်။ အများဆုံးအချိန်တွင် မိန်းမစိုးတစ်ရာခန့်အထိပင် ပျံသန်းနေကြပြီး ဤသည်မှာ အလွန်အံ့အားသင့်ဖွယ်ကောင်းသော မြင်ကွင်းတစ်ခုပင်။

ဤနည်းလမ်းသည် တော်ဝင်နန်းတွင်းရှိ အရာရှိအားလုံးကို ကြက်သေသေပြီး စကားမပြောနိုင်ဖြစ်စေခဲ့သည်။

"အတွင်းဝန်အဖွဲ့မှာ လူတစ်ယောက်ပဲရှိတယ်...လီစစ်ရဲ့ အာဏာက ကြောက်ဖို့ကောင်းတယ်... ဘယ်သူမှ သူ့ကိုမယှဉ်နိုင်ဘူး"

"ဒါက အစစ်အမှန်အာဏာပဲ.... အတိတ်က ဟွမ်ကျိချန်နဲ့ ရှထန်ကန်းတို့က လီစစ်နဲ့ယှဉ်ရင် အရေးမပါတဲ့သူတွေပဲ.... လီစစ်ရဲ့အာဏာနဲ့ယှဉ်ရင် သူတို့က မပြောပလောက်တော့ဘူး"

"သူက ငယ်ရွယ်ပြီး ခွန်အားအပြည့်ရှိတယ်....သူတစ်ခုခုလုပ်ချင်ရင် ဘယ်သူမှ သူ့ကိုတားနိုင်မှာမဟုတ်ဘူးလို့ ငါ စိုးရိမ်တယ်"

လူအများသည် လှံဦးကို လုယွီထံသို့ တိုက်ရိုက်မညွှန်ဝံ့ကြသဖြင့် လီစစ်ကိုသာ သရော်တော်တော်မှတ်ချက်များ ပေးနိုင်ခဲ့ကြသည်။

လုယွီသည် အမတ်များနှင့် မတွေ့ဆုံရန် ရွေးချယ်ခဲ့သည်။ သူသည် အမတ်များနှင့်မဆွေးနွေးလိုကြောင်း သိသာထင်ရှားပေ၏။ သူသည် လူတိုင်းကို သူ၏အမိန့်များအား တင်းကြပ်စွာလိုက်နာစေလိုရုံသာဖြစ်သည်။

ဤသည်မှာ အတိတ်ကစည်းမျဉ်းများကို ချိုးဖောက်ပြီးဖြစ်ကာ အမတ်များ၏အခွင့်အာဏာကိုပင် ပြန်လည်သိမ်းဆည်းသွားခဲ့သည်။ ဤသည်မှာ ကြီးမားသော တန်ပြန်တုံ့ပြန်မှုကို ဖြစ်ပေါ်စေခဲ့သည်။ အမတ်ကြီးများနှင့် တရားစီရင်ရေးရုံးတော်မှ အရာရှိများပင်လျှင် လီစစ်ကို စွပ်စွဲပြစ်တင်ရန် စာများတင်သွင်းခဲ့ကြသည်။

အရှေ့အောင်နိုင်ခြင်းကြယ်မြစ်အဖွဲ့သည် လီစစ်နှင့် မရင်းနှီးသောကြောင့် မည်သူမျှ သူ့အတွက် စကားမပြောပေးခဲ့ချေ။

လုအဖွဲ့အစည်းသည် လီစစ်က ပုန်းကွယ်နဂါးစစ်တပ်ကို ဘက်လိုက်ခဲ့သောကြောင့် တိတ်ဆိတ်စွာနေရန် ရွေးချယ်ခဲ့သည်။ သူတို့သည် သူ့ကို မကူညီခဲ့ကြပေ။

လီစစ်သည် အင်အားစုအမျိုးမျိုး၏ ဝိုင်းပယ်ခြင်းကို ခံခဲ့ရသည်။ မည်သူမျှ သူ၏နောက်တွင် ရပ်တည်ရန် ဆန္ဒမရှိဘဲ စစ်မှန်သော အထီးကျန်အရာရှိတစ်ဦး ဖြစ်လာခဲ့သည်။ ဤပြောင်းလဲမှုသည် အလွန်လျှင်မြန်ပေ၏။ မျက်စိတစ်မှိတ်အတွင်းမှာပင် လီစစ်သည် လုအဖွဲ့အစည်း၏ခေါင်းဆောင်အဖြစ်မှ လူအမြောက်အများ၏ရန်သူတော် ဖြစ်လာခဲ့သည်။

ထျန်းတအိမ်တော်... မြစိမ်းရောင်ဝါးတောထဲ၌...

ကြည်လင်သော ရေတံခွန်တစ်ခုသည် မိုးကောင်းကင်ယံမှ ကျဆင်းလာပြီး ကြယ်မြစ်တစ်ခု ကျဆင်းလာသည့်အလားပင်။ အေးမြသော လေပြေတစ်ရပ်သည် အရပ်မျက်နှာအဘက်ဘက်တွင် လှည့်ပတ်၍တိုက်ခတ်နေပြီး မြစိမ်းရောင်ဝါးတောအတွင်းတွင် တရှဲရှဲအသံများကို ထွက်ပေါ်စေသည်။

ထူထပ်သိပ်သည်းသော စိတ်ဝိညာဉ်စွမ်းအားများသည် ခြံဝန်းတစ်ခုလုံးကို ဝန်းရံထားပြီး ဤနေရာကို သုခဘုံတစ်ခုကဲ့သို့ ဖြစ်စေသည်။ ဤသည်မှာ ထိုက်ချမ်ဧကရာဇ် အမဲလိုက်ပြီးလျှင် အနားယူလေ့ရှိသော နေရာပင်။ ယခုအချိန်ထိ အပြင်ဘက်တွင် တောက်ပသော အဝါရောင်နဂါးအလံကို ကိုင်ဆောင်ထားသော နဂါးအစောင့်တစ်စုံ ရှိနေသည်။ ဤသည်မှာ ဧကရာဇ်သည် ဤနေရာတွင် နေထိုင်ကြောင်းကို ကိုယ်စားပြုပေ၏။

လုယွီနှင့်လီစစ်တို့သည် ရေတံခွန်အောက်တွင် မျက်နှာချင်းဆိုင် ထိုင်နေကြသည်။ သူတို့နှစ်ဦးသည် နတ်ဘုရားစိတ်အာရုံကို အသုံးပြု၍ အချင်းချင်း ဆက်သွယ်ပြောဆိုကြသည်။

ဤအချိန်အခိုက်အတန့်တွင် လုယွီ၏ ခန္ဓာကိုယ်နံဘေးပတ်လည်တွင် မရေမတွက်နိုင်သော သင်္ကေတအက္ခရာများဖြင့် ဝန်းရံထားသည်။ ဤသင်္ကေတအက္ခရာများသည် ရှုပ်ထွေးပြီး လျှို့ဝှက်ဆန်းကြယ်ကာ နားလည်ရခက်ပေ၏။ ထောင်နှင့်ချီသော သင်္ကေတအက္ခရာများသည် တစ်ခါတစ်ရံ၌ ကြယ်တာရာမြေပုံများအဖြစ် တစ်ခါတစ်ရံ၌ ကြမ်းတမ်းသော သားရဲများအဖြစ် ပြောင်းလဲသွားပြီး အဆုံးမရှိ ပြောင်းလဲနေသည်။

ပူပြင်းသောနေသည် ကောင်းကင်ယံတွင် မြင့်မားစွာ တည်ရှိနေသည်။ နေရောင်သည် ထူထပ်သော ဝါးတောကို ဖြတ်သန်းပြီး လုယွီ၏ ခန္ဓာကိုယ်ပေါ်သို့ ကျရောက်လာသည်။ အချိန်တခဏအတွင်းမှာပင် ဤနေရောင်ခြည်အလင်းတန်းသည် လုယွီ၏ခန္ဓာကိုယ်ကို ထွန်းလင်းတောက်ပစေပြီး သူ့ကို လျှို့ဝှက်ဆန်းကြယ်ကာ ထူးခြားနေစေသည်။

အမွှေးတိုင်တစ်တိုင် လောင်ကျွမ်းချိန်စာခန့် ကြာမြင့်ပြီးနောက် သူတို့နှစ်ဦးသည် နောက်ဆုံးတွင် သူတို့၏ဆက်သွယ်စကားပြောဆိုမှုမှ နိုးထလာခဲ့ကြသည်။

"ရှန့်သူတော်စင်က ဒီလောကမှာ တကယ်ကို ရှားပါးတဲ့ ပါရမီရှင်တစ်ယောက်ပဲ... ဒီအံ့အားသင့်စရာကောင်းတဲ့ စိတ်ကူးတွေက အရမ်းကို နက်နဲသိမ်မွေ့ပြီး လျှို့ဝှက်ဆန်းကြယ်တယ်.... ကွန်ဖြူးရှပ်ဂိုဏ်းမှာ ပညာရပ်တွေ အများကြီးရှိတယ်.... ရှန့်သူတော်စင်က ထူးခြားတဲ့အရာတစ်ခုခု လုပ်ခဲ့မှာ သေချာတယ်"

လုယွီသည် သူ၏ ဉာဏ်အလင်းပွင့်ခြင်းမှ နိုးထလာပြီးနောက် အံ့အားတသင့်ရေရွတ်လိုက်သည်။

သူတို့နှစ်ဦးသည် နံနက်စောစောတွင် ကျင့်ကြံမှုဆိုင်ရာ ထိုးထွင်းသိမြင်မှုများကို စတင်ဖလှယ်ခဲ့ကြသည်။ ဤသည်မှာ သူတို့အချင်းချင်း နည်းစနစ်ခြင်းဖလှယ်၍ လေ့လာသင်ယူခြင်းပင်။ သင်ယူခြင်းသည် ရေစီးကြောင်းကို ဆန့်ကျင်၍ လှော်ခတ်ခြင်းနှင့်တူသည်။ အကယ်၍ တစ်စုံတစ်ယောက်သည် ရှေ့ဆက်မတိုးပါက နောက်ကျကျန်ရစ်ပေလိမ့်မည်။ လုယွီ၏ ကျင့်ကြံဆင့်နယ်ပယ်တွင်ပင် သူသည် အဆက်မပြတ် သင်ယူလေ့လာရန် လိုအပ်ပေ၏။

ကျိုးကောက လီစစ်၏အမွေအနှစ်သည် တံခါးပိတ်ကျင့်ကြံသော သူတော်စင်တစ်ပါးထံမှ လာသည်ဟု ပြောခဲ့ဖူးသည်။

လုယွီသည် စူးစမ်းလိုစိတ်ဖြင့် မေးမြန်းပြီးနောက် လီစစ်၏ဆရာသခင်သည် အမှန်တကယ်ကို ကွန်ဖြူးရှပ်ဂိုဏ်း၏သူတော်စင်တစ်ပါးဖြစ်သော ရှန့်ခုန်ဖြစ်ကြောင်း သိရှိခဲ့သည်။

Chapter 5077

ဤသည်မှာ ရှေးဟောင်း ကွန်ဖြူးရှပ်ဝါဒ တာအိုဝါဒ ဥပဒေဝါဒ ဧကရာဇ်၏အမြင် လူ့သဘာဝများကို ကျွမ်းကျင်ပိုင်နိုင်ကာ လူသားသည် ကောင်းကင်ဘုံကို အောင်နိုင်သည်ဟု အဆိုရှိသော ဒဏ္ဍာရီလာ ပုဂ္ဂိုလ်တစ်ဦးပင်။

ဤအတွေးအမြင်များသည် အမှန်တကယ်ကိုပင် လုယွီ၏အတွေးအမြင်များနှင့် တိုက်ဆိုင်နေသည်။

လုယွီသည် ဤအတွေးအမြင်များကို ကြားပြီးနောက် ဤသူတော်စင်ကို ချက်ချင်းစိတ်ဝင်စားလာခဲ့သည်။ လီစစ်နှင့် နာရီအနည်းငယ်ကြာ ဆက်သွယ်ပြောဆိုပြီးနောက် သူသည် ဤသူတော်စင်၏ အတွေးအမြင်အများစုကို နောက်ဆုံးတွင် နားထောင်ခဲ့သည်။

လီစစ်သည် ရှန့်သူတော်စင်၏တပည့်ပင်။ သူ ယခုလက်ရှိချိန်တွင် ထုတ်ဖော်ပြသခဲ့သော နည်းလမ်းများအနက်မှ အတိုင်းအတာတစ်ခုသည် ရှန့်သူတော်စင်၏ သိမ်မွေ့သောလွှမ်းမိုးမှုကြောင့်ပင်။

ကျောင်းတော်သားများ တခြားသူတော်စင်များနှင့် မတူဘဲ ရှန့်သူတော်စင်သည် မူဝါဒများ အသုံးချရာတွင် သဘောတရား၏အခန်းကဏ္ဍကို ပို၍အာရုံစိုက်ခဲ့သည်။

ဤသည်မှာ လုယွီ တန်ဖိုးအထားဆုံးသောအရာပင်။

အချိန်တိုအတွင်းမှာပင် လုယွီ၏ကျောနောက်တွင် တောက်ပသောရောင်စုံအလင်းစက်ဝန်းများ ထွက်ပေါ်လာသည်။ ထိုအလင်းစက်ဝန်းများသည် ဖြည်းညှင်းစွာ လည်ပတ်နေပေ၏။ လည်ပတ်မှုတိုင်းနှင့်အတူ အလင်းစက်ဝိုင်းများတွင် ကံကြမ္မာသင်္ကေတများ ထွင်းထုထားသကဲ့သို့ ဖြစ်နေပြီး လုယွီ၏ကွန်ဖြူးရှပ်တာအိုဥပဒေသကို မြင့်တက်စေသည်။

"အရှင်ဧကရာဇ်က တကယ့်ကို ပါရမီရှင်တစ်ယောက်ပဲ.... ကျွန်တော်က ဒီနက်နဲတဲ့ အခြေခံသဘောတရားတွေကို အချိန်အတော်ကြီးကြာမှ နားလည်ခဲ့တာ...အရှင်မင်းကြီးက ဒီနေ့ ကျွန်တော်ပြောတာကို နားထောင်ပြီးတာနဲ့ နားလည်နိုင်လိမ့်မယ်လို့ ကျွန်တော် မမျှော်လင့်ခဲ့ဘူး....ဒီနားလည်နိုင်စွမ်းက ရှေးခေတ်ကတည်းက အတော်လေးရှားပါးလောက်တယ်"

လီစစ်က စိတ်ရင်းအတိုင်း ချီးကျူးလိုက်သည်။

ဤသည်မှာ လုယွီ၏အဆင့်အတန်းကြောင့် မဟုတ်ဘဲ သူ၏နားလည်နိုင်စွမ်းသည် အမှန်တကယ်ကို အလွန်မြင့်မားသောကြောင့်ပင်။

စာပေသူတော်စင်တစ်ဦး၏ အန္တိမပညာရပ်များသည် ကျောင်းတော်သားတစ်ဦးအတွက် သူ၏ဘဝတလျှောက်လုံး လေ့လာသင်ယူရန် လုံလောက်သည်။ သို့ရာတွင် လုယွီသည် ထိုအရာများကို ကြားလိုက်သည်နှင့် နားလည်သဘောပေါက်သွားသည်။ သူသည် ဤပညာရပ်များကို ချက်ချင်းနားလည်သဘောပေါက်သွားပြီး သူ၏ကိုယ်ပိုင် ကွန်ဖြူးရှပ်ဥပဒေစွမ်းအားကို ဖွဲ့စည်းခဲ့သည်။ ဤကဲ့သို့အရည်အချင်းမျိုးသည် အမှန်တကယ်ကို အလွန်ရှားပါးပေ၏။

လုယွီက ခပ်ဖျော့ဖျော့ပြုံးကာ သူ့ကိုယ်ကို နှိမ့်ချခြင်းမရှိဘဲ တိုက်ရိုက်ပြောဆိုလိုက်သည်။

"ရှန့်သူတော်စင်ရဲ့ အတွေးအခေါ်တွေက ငါနဲ့ တစ်ထပ်တည်းကျတယ်...ငါက ရှန့်သူတော်စင်ကို တောင်ပေါ်ကနေ ဆင်းလာဖို့ တောင်းဆိုချင်တယ်... သူက ငါ့ကို တွေ့ဖို့ ဆန္ဒရှိပါ့မလား မသိဘူး"

သူသည် ယခုချိန်၌ မွေးရာပါသူတော်စင်တစ်ဦးပင်။ ရွှယ်အင်မော်တယ် အလယ်အလတ်အဆင့်စွမ်းအားနှင့် သိုင်းအင်မော်တယ်တစ်ယောက်၏ခွန်အား ပေါင်းစပ်လိုက်လျှင် ဤအသိပညာများကို လေ့လာဆင်ခြင်ရန် သူ၏အတွေးတစ်ချက်သာ လိုအပ်သည်။

လုယွီသည် ကွေ့ကောက်ပြောဆိုခြင်း မပြုဘဲ သူ၏ရည်ရွယ်ချက်ကို တိုက်ရိုက်ဖွင့်ဟပြောဆိုခဲ့သည်။

အကယ်၍ ဤအဆင့်ရှိ သူတော်စင်တစ်ဦးက သူ့ကိုကူညီနိုင်မည်ဆိုလျှင် ၎င်းသည် ငွေဖြင့် တိုင်းတာမရနိုင်သော ကံကောင်းခြင်းတစ်ခုဖြစ်မည်မှာ သေချာသည်။

"ကျွန်တော် စိုးရိမ်တာကတော့ ဒီကိစ္စက မဖြစ်နိုင်မှာကိုပဲ"

ဤစကားကိုကြားလျှင် လီစစ်က သူ၏ခေါင်းကို ခါယမ်းလိုက်သည်။

"ကျွန်တော့်ရဲ့ဆရာက အမြဲတမ်း တိမ်စိုင်လို လွင့်မျောပြီးတော့ တောတောင်ထဲက ကြိုးကြာငှက်လို လွတ်လပ်ပေါ့ပါးတဲ့ အခြေအနေမှာပဲ ရှိနေခဲ့တာ.... သူက ငြိမ်းချမ်းတိတ်ဆိတ်မှုကို ကြိုက်တယ်...သူက ဒီနှစ်တွေတလျှောက်လုံး တံခါးပိတ်ကျင့်ကြံနေခဲ့တာ... သူထွက်လာဖို့ ဆန္ဒမရှိမှာကို ကျွန်တော် စိုးရိမ်တယ်"

အမှန်တကယ်ကိုပင် စာပေသူတော်စင်တစ်ယောက်ကို ဖိတ်ခေါ်ရသည်မှာ လွယ်ကူသော ကိစ္စတစ်ရပ်မဟုတ်ချေ။

တာယွီကောင်းကင်ဘုံအင်ပါယာသည် ကြီးမားကျယ်ပြန့်သော်လည်း စာပေသူတော်စင် သုံးပါးသာ ဧကရာဇ်ကိုကူညီရန်အတွက် တော်ဝင်နန်းတွင်းသို့ဝင်ရောက်ရန် ဆန္ဒရှိခဲ့လေ၏။ ဤသည်မှတဆင့် ဤကိစ္စ မည်မျှထိခက်ခဲသည်မှာ သိသာထင်ရှားသည်။

လီစစ်က ထပ်မံ၍ ပြောဆိုသည်။

"ဒါပေမဲ့ အရှင်ဧကရာဇ်က ပြောပြီးပြီဆိုမှတော့ ကျွန်တော်က ဆရာနဲ့ ဆက်သွယ်ဖို့ နည်းလမ်းရှာပါ့မယ်....ဆရာက တောင်ပေါ်ကနေ ထွက်လာဖို့ ဆန္ဒရှိတယ်ဆိုရင် သူ့ရဲ့အကူအညီနဲ့ ကျွန်တော်တို့အင်ပါယာရဲ့ ကံကြမ္မာက အကန့်အသတ်ကို ချိုးဖျက်ပြီး လောကကြီးကို အုပ်စိုးနိုင်မှာ သေချာတယ်"

ဤအချိန်အခိုက်အတန့်တွင် တာယွီအင်ပါယာ ထန်အင်ပါယာနှင့် ကျိုးအင်ပါယာတို့ သုံးခုလုံးတွင် သူတော်စင်မရှိတော့ချေ။

အကယ်၍ လုယွီထံတွင် ဤအချိန်၌ စာပေသူတော်စင်တစ်ဦးကို သူ၏ထောက်တိုင်အဖြစ် ရရှိနေမည်ဆိုပါက သူ၏အဆင့် မြင့်မားသွားမည်မှာ သေချာပေါက်ပင်။ သူ၏စွမ်းအားဖြင့် တခြားပြိုင်ဘက်နှစ်ဦးကို ချက်ချင်းချေမှုန်းနိုင်ပေလိမ့်မည်။

"မင်း စိတ်လှုပ်ရှားနေဖို့မလိုဘူး...ငါက စဥ်းစားမိရုံပဲ....ဒီကိစ္စက ကောင်းကင်ဘုံရဲ့ အလိုတော်ပေါ်မှာလည်း မူတည်တယ်...ဖြစ်နိုင်ရင် ကောင်းတယ်....ဒါပေမဲ့ မဖြစ်နိုင်ရင် ငါ အတင်းအကြပ်မလုပ်ဘူး"

လုယွီက သူ၏လက်ကို ဝှေ့ယမ်းလိုက်သော်လည်း အပြောင်းအလဲကျမ်းစာကိုမူ မသုံးခဲ့ချေ။

အပြောင်းအလဲကျမ်းစာသည် ထိပ်တန်းအဆင့် ကံကြမ္မာကျမ်းစာပင်။ ဤကျမ်းစာသည် အနာဂတ်ကို ကြိုတင်ခန့်မှန်းနိုင်ပြီး လောကကြီးအတွင်းမှ သက်ရှိအမြောက်အများ၏ကံကြမ္မာကို ထိန်းချုပ်နိုင်သည်။ သို့ရာတွင် စာပေသူတော်စင်တစ်ဦးအတွက် ဤကဲ့သို့ နည်းလမ်းမျိုးကို အသုံးပြုပါက အချည်းနှီးသာ ဖြစ်သွားပေမည်။

လုယွီသည် ရှန့်သူတော်စင်ကို တံခါးပိတ်ကျင့်ကြံရာမှ ထွက်လာရန် ဖိတ်ခေါ်လိုပေ၏။ သူသည် အပြောင်းအလဲကျမ်းစာကို မဆင်မခြင်သုံးလျှင် ရှန့်သူတော်စင်ကို စော်ကားရာရောက်မည်မှာ သေချာပေါက်ပင်။

"ငါ့မှာ ရှန့်သူတော်စင်ဆီကို ယူသွားစေချင်တဲ့ စကားအချို့ရှိတယ်"

လုယွီက အဝေးမှ ရေတံခွန်ကို ကြည့်လိုက်သည်။

"ပြောပါ အရှင်"

လီစစ်က တုံ့ပြန်သည်။

"ကြယ်တာရာတွေက လည်ပတ်မှုစည်းမျဥ်းကို လိုက်နာတယ်....နေနဲ့လက ဖြတ်သန်းသွားတယ်..... ခေတ်ကာလလေးခေတ်မှာ ယင်နဲ့ယန်က ပြောင်းလဲတယ်...လေနဲ့မိုးက အကျိုးသက်ရောက်တယ်...ရှန့်သူတော်စင်က မိုးကောင်းကင်တာအိုက သဘာဝအတိုင်းပဲလို့ ပြောခဲ့တယ်ဆိုရင် အလိုဆန္ဒမရှိသင့်ဘူး... အကြောင်းပြချက်မရှိဘူး ကောင်းခြင်းနဲ့ဆိုးခြင်း ကွဲပြားမှုမရှိဘူး....ဒါပေမဲ့ အခု မိုးကောင်းကင်တာအိုရဲ့အထက်မှာ သူ့ကိုကျော်လွှားတဲ့ နောက်ထပ်အလိုဆန္ဒတစ်မျိုးရှိနေတယ်..... ဒီနေ့ ငါက ဒီအလိုဆန္ဒကို ဖယ်ရှားပြီးတော့ သဘာဝတရားကို လောကကြီးဆီ ပြန်ပို့ပေးချင်တယ်.....ဒါပေမဲ့ ငါက အင်အားမလုံလောက်မှာကို ငါ စိုးရိမ်တယ်....ရှန့်သူတော်စင်ရဲ့ အကူအညီကို ရနိုင်လိမ့်မယ်လို့ မျှော်လင့်ပါတယ်"

Chapter 5078

လုယွီသည် အချိန်တခဏကြာ စဉ်းစားပြီးနောက် ဆက်လက်၍ ပြောဆိုသည်။

"ဒီကိစ္စပြီးရင် တစ်ဝက်စီ ခွဲဝေယူကြမယ်"

"ဒါ... ဒီအရာရှိက အရှင်ဧကရာဇ်ရဲ့စကားတွေကို သေချာပေါက် ပြောပြပါ့မယ်"

လီစစ်သည် အချိန်တခဏကြာ တွေဝေတုံ့ဆိုင်းပြီးနောက် သူ နားကြားမှားခြင်းမရှိကြောင်း အတည်ပြုလိုက်သည်။ သူ၏မျက်နှာပေါ်တွင် ခါးသည်းသောအပြုံးတစ်ခု ထင်ဟပ်လာပေ၏။

လုယွီ၏စကားများသည် စာပေသူတော်စင်တစ်ဦးကို ရည်ညွှန်းနေပုံမရဘဲ ဓားပြတစ်စုက မထွက်ခွာမီ အကျိုးအမြတ်များကို မည်သို့ခွဲဝေရမည်အား ဆွေးနွေးနေသကဲ့သို့ ဖြစ်နေသည်။

လုယွီသည် ခေါင်းညိတ်ပြီးနောက် သူ၏အကြည့်က လီစစ်ပေါ်သို့ ကျရောက်သွားသည်။

"ဒီအချိန်အတောအတွင်းမှာ မင်းကို ငါက ပါဝင်ပတ်သက်စေခဲ့တယ်လို့ သတ်မှတ်နိုင်တယ်... စာလွှာတော်တော်များများက မင်းအပေါ် စွပ်စွဲပြစ်တင်ထားတာဆိုတော့ မင်း အရမ်းပင်ပန်းနေမှာကို ငါ စိုးရိမ်တယ်"

ဘုန်း...

လီစစ် ထိတ်လန့်တုန်လှုပ်သွားသည်။ သူသည် အလျင်အမြန်ဒူးထောက်ပြီး ပြောဆိုလိုက်၏။

"ဒီအရာရှိက အာဏာရှိတဲ့ အရာရှိတစ်ယောက်ဖြစ်နေပြီ....အပြင်လူတွေရဲ့အမြင်မှာ ကျွန်တော်က သစ္စာဖောက်တစ်ယောက်ပဲ... အရှင်ဧကရာဇ်က စကားတစ်ခွန်းပြောလိုက်တာနဲ့ ဒီအရာရှိက အပြစ်ပေးခံဖို့ ဆန္ဒရှိပါတယ်"

အချိန်တခဏအကြာတွင် လုယွီက ရုတ်တရက် ခေါင်းခါပြီး သက်ပြင်းရှိုက်လိုက်သည်။

"ငါတို့ကြားမှာ ဒီလိုဖြစ်နေစရာ မလိုပါဘူး... မင်းက သူတို့ ပြောခဲ့တဲ့ လူစားမျိုးသာဆိုရင် ဒီလူတွေရဲ့သတိပေးချက်မရှိရင်တောင် ငါက အရေးယူမှာပါ"

သူ၏ ယခင်စီနီယာအစ်ကို လီစစ်သည် သူ၏ရှေ့တွင် ဒူးထောက်နေသည်ကို မြင်တွေ့ချိန်တွင် လုယွီသည် သူ၏စိတ်နှလုံးသားအတွင်း၌ ရုတ်တရက်အထီးကျန်ဆန်မှုကို ခံစားလိုက်ရသည်။

ရှေးဟောင်းခေတ်ကတည်းက ဧကရာဇ်များသည် တစ်ယောက်တည်းသာ ဖြစ်ပေ၏။

ယခုအချိန်၌ သူသည် ဤခံစားချက်ကို နောက်ဆုံးတွင် နားလည်သဘောပေါက်သွားလေပြီ။

သို့ရာတွင် လုယွီသည် သူ၏စိတ်နှလုံးသားအတွင်းမှ စိတ်ခံစားချက်များကို လျင်မြန်စွာ ဖယ်ရှားပြီး ဆက်လက်၍ပြောဆိုသည်။

"မင်း ကောင်းကောင်းလုပ်ခဲ့တယ်...အရင်ဆုံး စစ်သည်တော်တွေနဲ့ စလိုက်ပါ...စစ်ဗိုလ်ချုပ်တွေအားလုံးကို တည်ငြိမ်အောင်လုပ်ဖို့ လိုတယ်..... ငါတို့ နောက်ထပ်လုပ်ရမှာက ကျင့်ကြံခြင်းအင်ပါယာတစ်ခုလုံးရဲ့ အခြေခံအုတ်မြစ်ကို တည်ဆောက်ဖို့ပဲ.... ဒီစစ်ဗိုလ်ချုပ်တွေရဲ့ ထောက်ခံတွေမှုကို ရယူဖို့ လိုတယ်...ဒါတင်မကဘူး စစ်သည်တော်တွေရဲ့အဆင့်အတန်းကို မြှင့်တင်တာက နောင်အနာဂတ်မှာ ထူးချွန်တဲ့ ကျင့်ကြံသူတွေ စစ်တပ်ထဲကိုဝင်လာဖို့ ဆန္ဒရှိလာလိမ့်မယ်...ဒါက နောက်ဆုံးပန်းတိုင်ဖြစ်ပြီးတော့ အသင့်တော်ဆုံး အစီအစဉ်ပဲ"

လီစစ်၏စိတ်အခြေအနေသည် လုံးလုံးလျားလျား တည်ငြိမ်သွားခြင်း မရှိသေးချေ။ သူက ဆက်လက်၍ ပြောဆိုသည်။

"ဒါတွေအားလုံးက အရှင်ဧကရာဇ်ရဲ့ဆန္ဒအတိုင်းပါပဲ....အရှင်ဧကရာဇ်က အဝေးကြီးကို ကြိုတွေးမထားခဲ့ရင် ကျွန်တော် ဒီလောက်အများကြီး စဉ်းစားမိမှာ မဟုတ်တာကို ကျွန်တော် စိုးရိမ်တယ်"

"ငါကလည်း တခြားလူတွေဆီကနေ သင်ယူနေတာပဲ....စာပေသူတော်စင်ရီက သူ့ရဲ့မှတ်ဉာဏ်တစ်စိတ်တစ်ပိုင်းကို ငါ့ကိုပြခဲ့တယ်.... ဒါက ငါ့ကို အများကြီး အကျိုးရှိစေခဲ့တယ်"

လုယွီက သူ၏လက်ကို ဝှေ့ယမ်းလိုက်သည်။ ရုတ်ချည်းဆိုသလိုပင် သန့်စင်သောမှတ်ဉာဏ်တစ်ခုသည် လီစစ်၏စိတ်အတွင်းသို့ စီးဝင်သွားပေ၏။

သမုဒ္ဒရာကဲ့သို့ ကြီးမားကျယ်ပြန့်သော မှတ်ဉာဏ်များသည် လီစစ်၏ စိတ်အတွင်းတွင် မြင်းများဒုန်းစိုင်းပြေးလာသည့်အလား ချက်ချင်းဖြတ်ပြေးသွားသည်။ လီစစ်သည် လောကမတူသော နေရာတစ်ခုတွင် ရှိနေသကဲ့သို့ ခံစားလိုက်ရသည်။ အချိန်တခဏအတွင်းမှာပင် မရေမတွက်နိုင်သော မြင်ကွင်းများသည် သူ၏စိတ်အတွင်းတွင် ဖြတ်ပြေးသွားပေ၏။

"ကောင်းကင်ဘုံအလွန်လောက... ဒီလောကကြီးထဲမှာ ဒီလိုတည်ရှိမှုမျိုး ရှိနေတာပါလား"

လီစစ်သည် ထိတ်လန့်တုန်လှုပ်သွားပြီး သူ၏မျက်လုံးများ တွေဝေမိန်းမောနေပုံရသည်။

သူသည် လောကကို တွေ့ကြုံဖူးသူတစ်ဦးဟု သတ်မှတ်နိုင်သော်လည်း သမိုင်းမတင်မီခေတ်က ရှေးဦးသက်ရှိများ၏ဖျက်ဆီးခြင်းကို ခံခဲ့ရသော ကြယ်နယ်မြေများကို မြင်တွေ့ချိန်၌ သူ ခံစားခဲ့ရသော ထိတ်လန့်တုန်လှုပ်မှုကို စကားလုံးများဖြင့်ပင် ဖော်ပြ၍မရနိုင်ခဲ့ချေ။

"ရှေးဦးသက်ရှိတွေက အရမ်းအစွမ်းထက်ကြတယ်...သူတို့ကို ဖြေရှင်းလို့မရတာတော့ မဟုတ်ဘူး.... ရှန့်သူတော်စင်က လူတွေက ကောင်းကင်ဘုံကို ကျော်လွှားဖို့ ကံကြမ္မာပါလာတယ်လို့ ပြောခဲ့တယ်..ငါလည်း ဒီအချက်ကို သဘောတူတယ်... ကောင်းကင်ဘုံက ပြောင်းလဲချင်တယ်ဆိုရင် ရှေးဦးသက်ရှိတွေလို တည်ရှိမျိုးတွေကို ခွင့်ပြုလို့မရဘူး.....ငါတို့က သက်ရှိတွေအားလုံးရဲ့ခေါင်းထက်မှာ အမြဲတမ်းနေနိုင်ရမယ်"

လုယွီက ထပ်မံ၍ ပြောဆိုလိုက်သည်။

"ငါ့မှာ အစီအစဉ်တစ်ခုရှိတယ်.... ရှန့်သူတော်စင်ကို အဲ့ဒီအကြောင်း ပြောပြပေးပါ.... ငါလည်း ဒီအကြောင်းကို သေချာမသိဘူး.... ကံကြမ္မာဟောကိန်းရဲ့ ရလဒ်က အများအားဖြင့် သေဆုံးခြင်းနိမိတ် ဆယ်ခါပြထားပြီးတော့ ရှင်သန်ခြင်းက မရှိသလောက်ပဲ.... ငါ့မှာ အကူအညီအလုံအလောက်ရှိဖို့ လိုတယ်"

ထို့နောက် အသံပေးပို့ခြင်းတစ်ခုက လီစစ်ရဲ့နားအတွင်းသို့ ဝင်ရောက်လာသည်။

လုယွီ ပြောဆိုခဲ့သောအစီအစဉ်ကို ကြားပြီးနောက် လီစစ်သည် သြဇာအာဏာကြီးမားသော အတွင်းဝန်တစ်ယောက်ဖြစ်သည့်တိုင် အတိုင်းအဆမရှိ ထိတ်လန့်တုန်လှုပ်သွားခဲ့ပေ၏။

"အရှင်ရဲ့ဒီအစီအစဉ်က အရမ်းရဲတင်းလွန်းတယ်.... အင်ပါယာက အခုမှတည်ထောင်တာ.... ဘာလို့ အချိန်အတိုင်းအတာတစ်ခုလောက်ထိ အသံတိတ်မနေတာလဲ"

လီစစ်က မေးမြန်းသည်။

"အချိန်မကျန်တော့ဘူး....ဒါ့ပြင် ငါ ထီးနန်းမတက်သေးတာလည်း ဒီအကြောင်းကြောင့်ပဲ.... အခြေအနေကို အချိန်တိုအတွင်း ဖြေရှင်းလို့မရဘူး...ငါ့မှာလည်း သေချာစေ့စပ်တဲ့ အစီအစဉ်တွေဆွဲဖို့ အချိန်မရှိဘူး..... ဒီတစ်ခါတော့ ဘာပဲဖြစ်ဖြစ် လောင်းကြေးထပ်ရတော့မယ်"

လုယွီက လီစစ်ကို ကြည့်ပြီး စိတ်လှုပ်ရှားစွာဖြင့် သက်ပြင်းရှိုက်လိုက်သည်။

"ပူးပေါင်းကြံစည်မှုက လူပေါ်မူတည်ပြီးတော့ အောင်မြင်မှုက ကောင်းကင်ဘုံပေါ်မူတည်တယ်...နောက်တစ်ခုကတော့ ငါတို့လုပ်သင့်တာကို လုပ်ရမယ့်အချိန်ပဲ"

Chapter 5079

နောက်တစ်နေ့၌....

စကြဝဠာခန်းမဆောင်...တော်ဝင်နန်းတွင်းညီလာခံ၌....

အမတ်ကြီးကျိုးသည် နန်းတွင်းအမိန့်ပြန်တမ်းကို ကိုင်ဆောင်ပြီး လုယွီကို ဖတ်ကြားပြခဲ့သည်။

လီစစ်အား ကျုံးကျီနန်းတော်၏အတွင်းဝန်ချုပ်ဘွဲ့ကို ချီးမြှင့်ခဲ့လေ၏။

ဖေးထျန်ကွမ်းအား ဘဏ္ဍာရေးအမတ်ကြီး ဖန်တီးခြင်းခန်းမဆောင်၏မဟာအတွင်းဝန်နှင့် အုပ်ချုပ်ရေးအဖွဲ့၏အတွင်းဝန်ချုပ်တို့ဘွဲ့ကို ချီးမြှင့်ခဲ့သည်။

ချန်ကျင်းအား ဝမ်ဟွာခန်းမဆောင်၏ အတွင်းဝန်ချုပ်ဘွဲ့ ချီးမြှင့်ခဲ့သည်။

ကျန်းရွှမ်စဲသည် ယဥ်ကျေးမှုရေးရာအမတ်ကြီးနှင့် ဝူယင်းခန်းမဆောင်၏ အတွင်းဝန်ချုပ်ဖြစ်လာခဲ့သည်။

ဖုန်းရွှမ်စစ်သည် ဝမ်ယွမ်ခန်းမဆောင်၏ အတွင်းဝန်ချုပ်ဖြစ်လာပေ၏။

ထို့အပြင် အလုပ်သမားရေးရာအမတ်ကြီး လျှူပင်းကျုံးအားလည်း အရှေ့ခန်းမဆောင်၏ အတွင်းဝန်ချုပ်အဖြစ် ခန့်အပ်ခဲ့သည်။

မူလအတွင်းဝန်ချုပ် ယန်ရှိုးသည် အငြိမ်းစားယူပြီးနောက် သူ၏ဇာတိမြို့သို့ ပြန်သွားခဲ့သည်။ လုယွီသည် ဤဝါရင့်အမတ်ကြီးအား အလွန်မြင့်မားသော ဆက်ဆံမှုတစ်ခု ပေးအပ်ခဲ့ပြီး သူကိုယ်တိုင်လိုက်ပို့ခဲ့သည်။ သူသည် ယန်ရှိုးအား ထိုနေရာ၌ပင် "ဝမ်ကျုံး" ဟူသောဘွဲ့ကို ပေးအပ်ခဲ့သည်။

ဤသည်မှာ ကြီးမားသော ဂုဏ်ပြုမှုတစ်ခုပင်။ မရေမတွက်နိုင်သော အမတ်ကြီးများ၏မျက်လုံးအောက်တွင် ယန်ရှိုးသည် သူ့တပည့်များ၏အထောက်အပံ့ဖြင့် ဝေါယာဉ်ပေါ်တွင်ထိုင်ပြီး တော်ဝင်မြို့တော်၏ မြင့်မြတ်သော တံခါးဝမှတဆင့် ဖြည်းဖြည်းချင်း ပျောက်ကွယ်သွားခဲ့သည်။

ယန်ရှိုး၏ထွက်ခွာသွားခြင်းသည် ခေတ်တစ်ခေတ်၏ အဆုံးသတ်ပင်။

ဤသည်မှာ ရှေးရိုးစွဲအုပ်စု၏

ကိုယ်စားပြုမှုတစ်ခုဖြစ်သဖြင့်

ယန်ရှိုး၏ထွက်ခွာသွားခြင်းနှင့်အတူ တော်ဝင်နန်းတွင်းတစ်ခုလုံးသည် ကြီးမားသော ပြောင်းလဲမှုတစ်ခုကို ကြုံတွေ့ရပေမည်။

ယန်ရှိုး၏ထွက်ခွာသွားခြင်းနှင့် နှိုင်းယှဉ်လျှင် လူတိုင်း၏ အာရုံစိုက်မှုသည် အတွင်းဝန်ချုပ်ဖြစ်လာသည့် လီစစ်အပေါ်တွင်သာ စုစည်း၍ကျရောက်နေခဲ့သည်။

မည်သည့်တိုင်ပင်ဆွေးနွေးမှုမရှိဘဲ လုယွီသည် လီစစ်အား အတွင်းဝန်ချုပ်အဖြစ် ခန့်အပ်ရန် ဆုံးဖြတ်ပြီးဖြစ်သည်။

လူအမြောက်အများသည် ဤသို့ခန့်အပ်မည်ကို အချိန်အတော်ကြာကတည်းက စဉ်းစားခဲ့ကြသော်လည်း ထိုအဖြေကိုကြားပြီးနောက် သူတို့သည် လက်မခံနိုင်သေးချေ။

အပြင်းထန်ဆုံး တုံ့ပြန်မှုရှိသူမှာ အရှေ့အောင်နိုင်ခြင်းကြယ်မြစ်အဖွဲ့မှလွဲ၍ တခြားလူများ မဟုတ်ပေ။

ပုန်းကွယ်နဂါးစစ်တပ်မှ စစ်ဗိုလ်ချုပ်အမြောက်အများသည် ဖေးထျန်ကွမ်း၏နောက်သို့ လိုက်ပါခဲ့ကြသော်လည်း သူသည် ဒုတိယအဆင့် အမတ်ကြီးတစ်ဦးသာ ဖြစ်လာခဲ့သည်။ လူအများစုသည် ဤအချက်ကို လက်မခံနိုင်ခဲ့ကြချေ။

သူတို့အတွက် ဖေးထျန်ကွမ်းသည် အတိတ်တွင် အရှေ့အောင်နိုင်ခြင်းကြယ်မြစ်၌တွင် ဦးဆောင်ခဲ့သူပင်။ ယခုအချိန်၌ သူသည် လူငယ်လေးတစ်ဦး၏လက်အောက်တွင် ရှိနေပေ၏။ ဤသည်မှာ လူအများစုအတွက် လက်မခံနိုင်သောအရာပင်။

"အုပ်ချုပ်ရေးအဖွဲ့ကို သွားပြီး လီစစ်ကို ငါတို့ကိုယ်တိုင်မေးမယ်...."

"သူက အရှင်မင်းကြီးနောက်ကို ဘယ်လောက်ကြာကြာ လိုက်ခဲ့ဖူးလို့လဲ.... သူက သူ့ကိုယ်သူ ကြီးမြတ်တယ်လို့ ပြောရဲတယ်.... သူ့မှာ ဘာအခွင့်အရေးရှိလို့လဲ...."

လုအဖွဲ့အစည်းမှ စစ်ဗိုလ်ချုပ်တစ်စုသည် ဝမ်ယွမ်ခန်းမဆောင်ဘက်သို့ ဒေါသတကြီးအပြေးသွားကြသော်လည်း လုကျင်းရှန့်က လမ်းခုလတ်တွင် တားဆီးခဲ့သည်။

"အရှင်ဧကရာဇ်က မင်းတို့ကိုပေးခဲ့တဲ့ ကျေးဇူးတရားတွေကို မမေ့နဲ့"

လုကျင်းရှန့်၏အမူအယာသည် အေးစက်တင်းမာနေပြီး သူသည် လုအဖွဲ့အစည်းမှအရာရှိများအားလုံးကို အမှန်တကယ် နှိမ်နင်းနိုင်ခဲ့သည်။

ဤသည်မှာ လုယွီ၏စစ်တပ်ရှိ နံပါတ်တစ်ပုဂ္ဂိုလ်မှ သူ၏အခွင့်အာဏာကို ပြသခဲ့သော ပထမဆုံးအကြိမ်ဖြစ်ပြီး မည်သူမျှ သူ့ကို ငြင်းဆန်ဝံ့ခြင်းမရှိချေ။

လုအဖွဲ့အစည်းဝင် အရာရှိများအားလုံး ကြက်သေသေသွားကြသည်။ သူတို့သည် ဆန္ဒမရှိသော်လည်း ဤသည်မှာ လုယွီ၏အစီအစဉ်ဖြစ်ကြောင်း သူတို့ နားလည်ခဲ့ကြသည်။ သူတို့သည် လီစစ်ထံသို့ ဓားများဆွဲထုတ်ဝံ့သော်လည်း လုယွီထံသို့ ဓားများညွှန်ပြဝံ့ခြင်းမရှိချေ။

စကြဝဠာခန်းမဆောင်...

လီစစ်နှင့်အမတ်ကြီးတစ်စုသည် အင်ပါယာ၏ စည်းမျဥ်းဥပဒေများကို ဆွေးနွေးနေလေ၏။

"လက်ရှိမှာ နေရာအသီးသီးက ကုန်ဈေးနှုန်းတွေ တည်ငြိမ်သွားပြီ...အရင်က စစ်ပွဲကြောင့် ပျက်စီးသွားတဲ့ နေရာတွေထဲက အများစုကို ပြန်လည်တည်ဆောက်ပြီးပြီ....ဒါပေမဲ့ ဒေသအများစုက ပျက်စီးယိုယွင်းနေတဲ့ အခြေအနေမှာပဲ ရှိနေသေးပြီးတော့ မြေနေရာအများအပြားကို စွန့်ပစ်ထားတယ်.... အိုးအိမ်တွေကနေ ထွက်ပြေးပြီး တိမ်းရှောင်နေရတဲ့ လူတွေတောင် အများကြီးရှိတယ်"

အမတ်ကြီးတစ်ဦးက လီစစ်ကိုကြည့်ပြီး မေးမြန်းသည်။

"အတွင်းဝန်ချုပ်မှာ ဘယ်လိုစိတ်ကူးမျိုး ရှိပါသလဲ"

"အရှင်ဧကရာဇ်က အရှေ့အောင်နိုင်ခြင်းကြယ်မြစ်ရဲ့ အုပ်ချုပ်ရေးခရီးစဉ်မှာ နည်းလမ်းတွေအများကြီးကို စမ်းသပ်ခဲ့ပြီးပြီ...ဒီနည်းလမ်းတွေကို ဒေသခံနေရာတွေမှာ အကောင်အထည်ဖော်တာက တော်တော်လေးထိရောက်တယ်"

လီစစ်၏မျက်နှာအမူအယာသည် တည်ငြိမ်နေပေ၏။

"လူတွေက အစားအစာအတွက် အလုပ်လုပ်နေကြတာ.... လူတွေမှာ အသက်မွေးဝမ်းကျောင်းရှိနေသရွေ့ လူတစ်ယောက်က မိသားစုကိုထောက်ပံ့ဖို့ လုံလောက်တဲ့ဝင်ငွေရှိလာနိုင်တယ်.... ဝင်ငွေမရှိတဲ့ဒုက္ခသည်တွေကတော့ ဓားပြတွေဖြစ်လာနိုင်ပြီးတော့ ဥပဒေနဲ့ငြိမ်ဝပ်ပိပြားမှုကို အနှောင့်အယှက်ပေးလာနိုင်တယ်...."

"ပထမဆုံးအနေနဲ့ အုပ်ချုပ်ရေးအဖွဲ့က ဒုက္ခသည်တွေကို အကြီးအကျယ် ခေါ်ယူဖို့လိုတယ်...ကျင့်ကြံသူတွေပဲဖြစ်ဖြစ် သာမန်လူတွေပဲဖြစ်ဖြစ်ပေါ့....သူတို့က အသုံးဝင်ရမယ်... ဒါ့ပြင် အရာရှိတွေရဲ့လက်အောက်မှာ ဂိုဏ်းတွေကိုထားရမယ်....အထူးသဖြင့် သံမဏိ ကျောက်မီးသွေး စိတ်ဝိညာဉ်မိုင်းတွင်းနဲ့ လက်နက်သွန်းလုပ်တဲ့ နယ်ပယ်တွေမှာပဲ.... အဲ့ဒီနေရာတွေက လူအများကြီးလိုအပ်တဲ့ နေရာတွေဖြစ်တာကြောင့် ဒုက္ခသည်တွေကို ခေါ်ယူဖို့လိုတယ်"

အမတ်ကြီးတစ်ယောက်က ထပ်မံ၍ မေးမြန်းသည်။

"ပြင်ပအရာရှိတချို့က ဂိုဏ်းတွေကို အုပ်ချုပ်တဲ့အကြောင်း ကြားဖူးပေမဲ့ သူတို့က အရင်က ဂိုဏ်းအင်အားစုတွေက ဖြစ်ခဲ့တော့ ကျင့်ကြံခြင်းလောကမှာ အတွေ့အကြုံတချို့ရှိနေမှာ မလွဲမသွေပဲ....သူတို့ကို ဘယ်လို အသုံးချနိုင်မလဲ"

လီစစ်က ပေါ့ပေါ့ပါးပါး တုံ့ပြန်အဖြေပေးလိုက်၏။

"ဒီဂိုဏ်းအင်အားစုတွေကို ထိန်းချုပ်မယ့်သူတစ်ယောက် လိုအပ်တယ်...ကျွန်တော်က အရှင်ဧကရာဇ်ကို ဒုက္ခသည်တွေ ဂိုဏ်းတွေထဲဝင်တာကို စီမံကွပ်ကဲဖို့အတွက် ရုံးတော်အသစ်နှစ်ခု တည်ဆောက်ပေးဖို့ တောင်းဆိုပြီးပြီ"

အမတ်ကြီးများအားလုံး၏ အံ့အားတသင့်ကြည့်နေသော အကြည့်များအောက်တွင် လီစစ်သည် သူ အချိန်အတော်ကြာယူ၍ ပြင်ဆင်ထားခဲ့သော တော်ဝင်အမိန့်ပြန်တမ်းတစ်ခုကို ထုတ်ယူလိုက်သည်။

တော်ဝင်အမိန့်ပြန်တမ်းတစ်ခု....

ကုန်သွယ်ရေးနှင့်ကူးသန်းရောင်းဝယ်ရေးအဖွဲ့ကို တည်ထောင်ပြီး ဝေ့ကျုံးသည် စစ်ဆေးရေးမှူးများကို ခန့်အပ်ရန် တာဝန်ရှိသော မိန်းမစိုးဖြစ်လာပေ၏။

သူသည် စီးပွားရေးရင်းနှီးမြှုပ်နှံမှုကဲ့သို့သော ကိစ္စရပ်များကို တာဝန်ယူသည်။

မြေယာနှင့်အဆောက်အဦးပိုင်ဆိုင်မှု စီမံခန့်ခွဲရေးဌာနသည် လျူကျင်းအား မိန်းမစိုးစစ်ဆေးရေးမှူးအဖြစ် ခန့်အပ်ပြီး သူသည် ဂိုဏ်းအသီးသီးနှင့် သက်ဆိုင်သောကိစ္စများကို ထိန်းချုပ်ရန် တာဝန်ယူရပေ၏။

Chapter 5080

စကြဝဠာခန်းမဆောင်တစ်ခုလုံး တိတ်ဆိတ်ငြိမ်သက်နေသည်။

အစောပိုင်းက ငြင်းခုံနေကြသော အရာရှိများသည် ဤအချိန်အခိုက်အတန့်တွင် သူတို့၏ ဆွေးနွေးမှုများကို ရပ်တန့်လိုက်ကြသည်။ သူတို့သည် ကြက်သေသေနေသော အမူအယာများဖြင့် ခေါင်းမော့လိုက်ကြ၏။

လီစစ်သည် တော်ဝင်အမိန့်ပြန်တမ်းကို ကြိုတင်ပြင်ဆင်ထားခဲ့သည်။ ဤသည်မှာ လီစစ်သည် အစောကြီးကတည်းက ကြိုတင်ပြင်ဆင်ထားခဲ့သည်ဟု ဆိုလိုခြင်းပင်။ သူတို့နှင့် ဆွေးနွေးခြင်းသည်ပင် သဘောတရားအရသာ ဖြစ်သည်။

အရာရှိများကို ခေါင်းအခဲဆုံးဖြစ်စေသောအရာမှာ ဤအမိန့်သည် တော်ဝင်အမိန့်ပြန်တမ်းဖြစ်သောကြောင့် လုယွီ၏အတည်ပြုချက်ကို ရရှိထားရပေမည်။

သူတို့သည် လီစစ်ကို ပစ်မှတ်ထားနိုင်သော်လည်း လုယွီနှင့်ရင်ဆိုင်ရချိန်၌ သူတို့၏တည်ငြိမ်မှုနှင့် ခိုင်မာသောစိတ်ဓာတ်များ ဆုံးရှုံးသွားခဲ့သည်။

ကျိုးတော်ဝင်မိသားစုသည် တော်ဝင်မြို့တော်မှ စိတ်ပျက်လက်ပျက်ဖြင့် ထွက်ခွာသွားခဲ့သည်။ဤမြင်ကွင်းသည် အမတ်ကြီးများ၏စိတ်အတွင်းတွင် စွဲထင်နေဆဲပင်။ ဤအချိန်အခိုက်အတန့်တွင် လုယွီကို မည်သူမျှ ငြင်းဆန်ဝံ့မည်မဟုတ်ချေ။

"အတွင်းဝန်ချုပ်....ဒီရုံးတော်နှစ်ခုက ဘာတွေလုပ်မလဲဆိုတာကို ရှင်းပြပေးလို့ ရမလား"

အမတ်ကြီးတစ်ဦးက မေးမြန်းသည်။

လီစစ်က ပေါ့ပေါ့ပါးပါး တုံ့ပြန်အဖြေပေးလိုက်၏။

"ပထမဆုံးအနေနဲ့ ဒါက ကုန်သွယ်မှုနဲ့ စက်မှုလုပ်ငန်း အထွေထွေအုပ်ချုပ်ရေးဌာနပဲ....ဒီဌာနရဲ့တာဝန်က တချို့နေရာတွေမှာ ရန်ပုံငွေစုဆောင်းတာကို တာဝန်ယူရမှာ...တိတိကျကျပြောရရင် ဒါက အုပ်ချုပ်ရေးအဖွဲ့အတွက် ရင်းနှီးမြှုပ်နှံမှုတွေကို ဆွဲဆောင်တာပဲ"

အရာရှိများ၏မျက်နှာပေါ်တွင် ကြောင်စီစီအမူအယာများ ရှိနေဆဲဖြစ်သည်ကို မြင်တွေ့ချိန်၌ လီစစ်က ဆက်လက်၍ပြောဆိုခဲ့သည်။

"ငါက ဥပမာအနေနဲ့ တော်ဝင်မြို့တော်ဒေသက ယွင်ယန်ကြယ်နယ်မြေကို ယူပြမယ်....ယွင်ယန်ကြယ်နယ်မြေက တော်တော်ဆင်းရဲတဲ့ ကြယ်နယ်မြေတစ်လုံးပဲ...အဲ့ဒီနေရာမှာ သယံဇာတတွေ အများကြီးမရှိဘူး.... ပိုက်ဆံနဲ့ အစားအစာလည်း အများကြီးမရှိဘူး... ကျင့်ကြံသူတွေတောင် အများကြီးမရှိဘူး...ပုံမှန်အနေနဲ့ဆိုရင် ရာထူးကနေ ဖယ်ရှားခံရတဲ့ အရာရှိတွေပဲ ယွင်ယန်ကြယ်နယ်မြေရဲ့ ကြယ်နယ်မြေအရှင်အဖြစ် ခန့်အပ်ခံရတယ်"

"ဒီလိုနေရာမျိုးမှာ ငွေမရှိတဲ့ သာမာန်လူတွေပဲ နေထိုင်ကြတယ်....ဘယ်သူမှလည်း မရှိဘူး.... နှစ်တွေတလျှောက်လုံးမှာ ယွင်ယန်ကြယ်နယ်မြေကနေ လူတွေအများကြီး ထွက်ခွာသွားခဲ့ကြတယ်.... ခန့်ညားထည်ဝါတဲ့ ယွင်ယန်ခရိုင်မြို့တော်မှာ လူဦးရေက ငါးသိန်းအောက်ပဲရှိတယ်....ကုန်သွယ်မှုနဲ့ ကူးသန်းရောင်းဝယ်ရေးအဖွဲ့ကို တည်ထောင်တာက ဒီဒေသကို ချမ်းသာအောင်လုပ်ဖို့ပဲ"

အမတ်ကြီးတစ်ဦးက အပြုံးနှင့်ပြောဆိုသည်။

"ကျွန်တော်တို့က ယွင်ယန်ကြယ်နယ်မြေအကြောင်း သိထားတယ်...ဒါက ဆင်းရဲတယ်လို့ နာမည်ကြီးတဲ့ နေရာတစ်ခုပဲ....တခြားအရာတွေကို ထားလိုက်အုံး အဲ့ဒီနေရာကနေ ထွက်လာတဲ့ ကျင့်ကြံသူတွေ အများကြီးမရှိဘူး....အများစုက သာမန်လူတွေပဲ....ဘဏ္ဍာရေးဝန်ကြီးဌာနက ယွင်ယန်ကြယ်နယ်မြေကို ထောက်ပံ့ဖို့ နှစ်စဉ်ရန်ပုံငွေအမြောက်အများကို ခွဲဝေပေးတယ်.... ဒီလောက်ထိ ဆင်းရဲပြီးတော့ ဝေးလံခေါင်ဖျားတဲ့နေရာကို ဘယ်လိုလုပ်ပြီး ချမ်းသာအောင်လုပ်နိုင်မှာလဲ...."

တခြားလူများကလည်း ရယ်မောလိုက်ကြသည်။

သူတို့အားလုံးသည် ဘဏ္ဍာရေးဝန်ကြီးဌာနမှ အရာရှိများဖြစ်ကြသည်။ သူတို့သည် လောကကြီး၏ ငွေကြေး ဆန်စပါးနှင့် မြေယာတို့ကို ထိန်းချုပ်ထားသဖြင့် ယွင်ယန်ကြယ်နယ်မြေ၏ အခြေအနေကို ကောင်းစွာသိထားကြသည်။

ဤမျှဆင်းရဲသော နေရာသည် ချမ်းသာလာရန် မည်သည့်အခွင့်အရေးမျှ ရှိလိမ့်မည်မဟုတ်ချေ။

လီစစ်က ခေါင်းညိတ်လိုက်သည်။

"အမှန်ပဲ...သာမန်အသိအရဆိုရင် ယွင်ယန်ကြယ်နယ်မြေမှာ လုံလောက်တဲ့ သယံဇာတတွေ မရှိဘူး..... ဒါပေမဲ့ ယွင်ယန်ကြယ်နယ်မြေပေါ်မှာ လူနေနည်းပါးတဲ့အတွက်ကြောင့် သုံးစွဲဖို့ လုံလောက်တဲ့မြေယာတွေ ရှိနေတာကို မင်းတို့မေ့နေကြတယ်"

အရာရှိက အချိန်တခဏကြာ စဉ်းစားပြီးနောက် ပြောဆိုသည်။

"မင်းက မြေယာသယံဇာတတွေကို တခြားသယံဇာတတွေနဲ့ လဲလှယ်ဖို့ ဆိုလိုတာလား"

"ဒါက လဲလှယ်တာမဟုတ်ဘဲ သယံဇာတတွေကို ကျိုးကြောင်းဆီလျော်စွာနဲ့ ခွဲဝေတာပဲ"

လီစစ်က ပြောဆိုလိုက်၏။

" ငါ မင်းတို့ကို ရိုးရှင်းတဲ့ ဥပမာတစ်ခုပေးမယ်... ယွင်ယန်ကြယ်နယ်မြေက ဒေသကြီးတစ်ခုကို တည်ထောင်နိုင်တယ်...အဲ့ဒီနေရာကို ရင်းနှီးမြှုပ်နှံမှုနဲ့ တည်ဆောက်ရေးတွေအတွက် စီးပွားရေးသမားတွေကို ခေါ်ယူဖို့ အထူးအသုံးပြုနိုင်တယ်... သားရဲမွေးမြူရေးကွင်းတွေ လေ့ကျင့်ရေးကွင်းတွေ ဆေးဝါးအလုပ်ရုံတွေအားလုံးက မြေနေရာတွေအများကြီးလိုအပ်တဲ့လုပ်ငန်းတွေပဲ...တခြားနေရာတွေက စီးပွားရေးသမားတွေကို အဲ့ဒီနေရာမှာ ရင်းနှီးမြှုပ်နှံပြီး စက်မှုလုပ်ငန်းတွေ တည်ဆောက်ဖို့အတွက် ဆွဲဆောင်ဖို့ ဈေးနှုန်းချိုသာမှုကို အသုံးပြုနိုင်တယ်....အဲ့ဒီနောက်မှာ ဒေသခံတွေအတွက် အလုပ်အကိုင်ပြဿနာကို ဖြေရှင်းနိုင်လိမ့်မယ်"

"တစ်ချိန်တည်းမှာပဲ စက်မှုလုပ်ငန်းတွေ တည်ထောင်တာနဲ့အတူ ဒီနေရာတွေက သူတို့ရဲ့ အထွတ်အထိပ်စီးပွားရေးအဆင့်ကို အမြန်ဆုံးရောက်ရှိနိုင်လိမ့်မယ်....ဒါက အကြောင်းအရင်းတွေထဲက တစ်ခုပဲ... ယွင်ယန်ကြယ်နယ်မြေလို ဆင်းရဲတဲ့ ကြယ်နယ်မြေတွေ အများကြီးရှိသေးတယ်.....ကြယ်အရှင်အိမ်တော်တွေမှာ ရန်ပုံငွေရှာဖို့ စီမံကိန်းတွေ ဒါမှမဟုတ် စီမံကိန်းရှာဖို့ ရန်ပုံငွေတွေ ရှိကြတယ်.... ဒါက ဘဏ္ဍာရေးနဲ့ ကူးသန်းရောင်းဝယ်ရေး အထွေထွေအုပ်ချုပ်ရေးဌာနက လုပ်ဆောင်ဖို့ လိုအပ်တဲ့အရာပဲ... သူတို့က အုပ်ချုပ်ရေးအဖွဲ့ကို သယံဇာတခွဲဝေမှုမှာ ကူညီဖို့ လိုအပ်တယ်.... သူတို့က ဒေသတစ်ခုရဲ့ စီးပွားရေးဖွံ့ဖြိုးမှုကို လုပ်ဆောင်ဖို့ လိုအပ်တယ်"

ဤသည်မှာ အလွန်ဆန်းသစ်သော စိတ်ကူးတစ်ခုပင်။

သို့ရာတွင် လက်ရှိနေရာတွင်ရှိနေသော အရာရှိများအားလုံးသည် အလွန်ဥာဏ်ရည်ထက်မြက်သော လူများဖြစ်ကြသည်။ အချိန်တခဏကြာမျှ စဉ်းစားပြီးနောက် သူတို့သည် ထိုရုံးတော်နှစ်ခု၏ အရေးပါမှုကို ချက်ချင်းနားလည်သဘောပေါက်သွားကြသည်။