တာအိုနန်းတော်

ဤအဆိပ်သူရဲကောင်းဝိညာဉ်ကို စတင်အသုံးပြုလိုက်သည်နှင့် ၎င်းမှာ ထာဝရပိုင်ဆိုင်မှု ဖြစ်သွားတော့သည်။ နောင်တွင် တိုက်ပွဲများ၌ ဤဝိညာဉ်ကို ဆင့်ခေါ်လိုက်ပါက ကျန်းချန်၏တိုက်ခိုက်မှုတိုင်းတွင် ၃၀% အဆိပ်ပျက်စီးမှုပါဝင်မည်ဖြစ်ပြီး တိုက်ခိုက်ရေးစွမ်းအားမှာလည်း ၁၀% တိုးတက်လာမည်ဖြစ်သည်။

ဤအဆိပ်မှာ သေမျိုးလောကရှိ သာမန်အဆိပ်မျိုးမဟုတ်။ ၎င်းသည် ရန်သူ၏ ဝိညာဉ်စွမ်းအား၊ ဓားအလင်းတန်းနှင့် တာအိုနန်းတော်တို့ကို တိုက်ရိုက်အဆိပ်သင့်စေကာ နတ်ဘုရားဝိညာဉ် တိုက်ခိုက်မှုများကိုပင် အဆိပ်သင့်စေနိုင်သည်။ တစ်ကြိမ်အဆိပ်မိသွားပါက ပြိုင်ဘက်၏ အခြေခံအုတ်မြစ်ကို တိုက်ရိုက်ပျက်စီးစေမည်ဖြစ်ပြီး အာနိသင်မှာ ပြိုင်ဘက်၏အင်အားအပေါ် မူတည်ပေလိမ့်မည်။

နောက်ဆုံးတွင် သူသည် လက်ကျန် တာအိုကောင်းကင်အင်မော်တယ်စည်းချက်ကို နန်းဆောင်ကိုးခုမြစ်ပေါ်၌ အသုံးပြုလိုက်သည်။ အကြောင်းမှာ နန်းဆောင်ကိုးခုသည် သိုင်းပညာနှင့် အခြားသောနည်းပညာများဖြစ်သည့် ဝင်္ကပါ၊ ကမ္ပည်းစာလုံး၊ စုန်းအတတ်နှင့် အဆိပ်အတတ်တို့ကို သိုင်းပညာအတွင်း ပေါင်းစပ်အသုံးချသည့် နယ်ပယ်အားလုံးနှင့် သက်ဆိုင်သောကြောင့်ပင်။

အင်မော်တယ်တာအိုစည်းချက် အာနိသင်ပြသည်နှင့်တစ်ပြိုင်နက် မူလက အမှန်တရားအဆင့်သာရှိသော နန်းဆောင်ကိုးခုမြစ်မှာ ကြီးမားသောပြောင်းလဲမှုကို ကြုံတွေ့ရတော့သည်။

ကောင်းကင်ယံတွင် သိုင်းတာအိုအမှတ်အသားမြစ်ကိုးစင်း စီးဆင်းနေ၏။ စိမ်းလန်းသော နန်းဆောင်ကိုးခုမြစ်ပေါ်ရှိ သိုင်းတာအိုကမ္ပည်းစာလုံးများသည် အဖြူရောင်မှ မီးခိုးရောင်၊ ထိုမှတစ်ဆင့် ငွေရောင်နှင့် နောက်ဆုံးတွင် ရွှေရောင်အဖြစ်သို့ ပြောင်းလဲသွားတော့သည်။

ကမ္ပည်းစာလုံးများ၏အရောင်မှာ ပိုမိုထင်ရှားလာပြီး ပို၍တောက်ပလာ၏။ ရေတွက်၍မရသော နက်နဲလှသည့်စာလုံးများမှာ ရုတ်တရက် အသက်ဝင်လာသကဲ့သို့ တောက်ပနေတော့သည်။

အင်မော်တယ်တာအိုစည်းချက် လုံးဝပေါင်းစပ်သွားသောအခါ နန်းဆောင်ကိုးခုမြစ်သည် ဓာတ်ကြီးငါးပါးမြစ်နှင့် တန်းတူဖြစ်သွားကာ ကျန်မြစ်ခုနစ်စင်းကို လုံးဝကျော်တက်သွားတော့သည်။

ဒုတိယမြောက် အင်မော်တယ်အဆင့်အမှတ်အသား ပြီးမြောက်သွားပြီဖြစ်၏။

ကျန်းချန်၏စိတ်ထဲတွင် ဝင်္ကပါ၊ ကမ္ပည်းစာလုံး၊ ဆေးဖော်စပ်ခြင်း၊ လက်နက်သွန်းလုပ်ခြင်း၊ ဗေဒင်၊ နက္ခတ်ဗေဒ၊ ဂီတ၊ စစ်တုရင်၊ ကဗျာ၊ ပန်းချီ၊ စုန်းအတတ်နှင့် အဆိပ်အတတ် စသည့်အသိပညာရပ်ပေါင်းများစွာ အလိုအလျောက်ပေါ်ပေါက်လာသည်။

သူသည် ထိုနယ်ပယ်များတွင် ဆရာတစ်ယောက်ဖြစ်မသွားသော်လည်း နောင်တွင် ထိုအသိပညာများကို သိုင်းပညာနှင့် ပေါင်းစပ်ကာ အစွမ်းထက်သောနည်းလမ်းများအဖြစ် ပြောင်းလဲနိုင်မည်ဖြစ်သည်။

ကံစမ်းမဲမှရရှိခဲ့သော အဆင့် ၄ ဆေးဖော်စပ်ခြင်းအတတ်ကြောင့် သူသည် သူတော်စင်အဆင့်ဆေးလုံးများကို ဖော်စပ်နိုင်သော ဆေးဆရာတစ်ဦးဖြစ်လာခဲ့လေပြီ။ ထို့ကြောင့် ဆေးပညာနှင့် သိုင်းတာအိုပေါင်းစပ်ထားသော အသိအမြင်များဖြစ်သည့် အဆိပ်ဆေးလုံးများ၊ ဆေးလုံးပေါက်ကွဲမှုများ၊ ဆေးလုံးမှပြောင်းလဲသော ဓားဝိညာဉ်များနှင့် ဆေးလုံးဝင်္ကပါများမှာ သူ၏ဦးနှောက်ထဲတွင် ပေါ်ပေါက်လာတော့သည်။

ဤကဲ့သို့သော အသိအမြင်များမှာ အလွန်နက်နဲလှပြီး သူ၏ မူလဆေးပညာအဆင့်ကိုပင် ပြန်လည်မြှင့်တင်ပေးနိုင်သည်။ လောကတွင် လမ်းစဉ်ပေါင်းထောင်ချီရှိသော်လည်း ၎င်းတို့မှာ အချင်းချင်းအထောက်အကူပြုနေကြသည် မဟုတ်ပါလား။

ယခင်က ဓာတ်ကြီးငါးပါးမြစ် အဆင့်မြင့်သွားစဉ်ကကဲ့သို့ပင် သူသည် နှစ်ပေါင်းသန်းချီသောအတွေ့အကြုံများကို ရရှိလိုက်သကဲ့သို့ ခံစားလိုက်ရသည်။

"တကယ်ကို အံ့ဩဖို့ကောင်းတာပဲ"

သူသည် သက်ပြင်းတစ်ချက်ချလိုက်ပြီး လက်ကျန်အမှတ် ၁၆၃ မှတ်ကို ကြည့်ကာ စိတ်မကောင်းဖြစ်သွား၏။ သူ၏လက်စွပ်ကိုပွတ်လိုက်ကာ မြင့်မြတ်သားတော်နှစ်ဦးထံမှရရှိခဲ့သော မှော်ရတနာ နှစ်ခု (အလံနှင့် စာအုပ်) ကို ထုတ်ယူလိုက်သည်။

သူသည် ၎င်းတို့ကို အသုံးမပြုနိုင်သေးပေ။ မူလက ဂိုဏ်းစောင့်ရတနာအဖြစ်ထားရန် စဉ်းစားခဲ့သော်လည်း ယခု အမှတ်မရှိတော့သဖြင့်...

"ဂိုဏ်းစောင့်ရတနာကိုတော့ နောက်မှပဲရှာတော့မယ်။ အခုတော့ အမှတ်လေးရအောင် လဲလိုက်ဦးမှ"

မှော်ရတနာတစ်ခုလျှင် အမှတ် ၅ သန်း တန်ကြေးရှိရာ နှစ်ခုလဲလှယ်ပြီးနောက် သူသည် အမှတ် ၁၀ သန်း ပြန်လည်ရရှိသွားသည်။

"လန်ယီသာ ငါ့အပေါ်သစ္စာရှိမယ်ဆိုရင် သူမရဲ့တန်ကြေးက အနည်းဆုံး သန်း ၂၀ လောက် ရှိမှာပဲ။"

သို့သော် ၎င်းမှာမဖြစ်နိုင်ကြောင်း သူသိသည်။ သူမသည် မျိုးနွယ်စုတစ်ခု၏ ခေါင်းဆောင်ဖြစ်သကဲ့သို့ တာအိုနန်းတော် အဆင့် ၈ ရှိသူ ဖြစ်ရာ ထိုကဲ့သို့သစ္စာခံရန် သဘောတူမည်မဟုတ်။

"ကျင့်ကြံမှုကို အရင်မြှင့်တာပေါ့"

အဆင့် ၃ ကံစမ်းမဲမှ ရရှိထားသော ရတနာဆေးလုံးများနှင့် ယခင်ကကျန်ရှိသောဆေးလုံးများကို ယူကာသောက်တော့သည်။ သူ၏နတ်ဘုရားဝိညာဉ်အဆင့်မှာ တာအိုနန်းတော်အဆင့် ၁ သို့ ကြိုတင်ရောက်ရှိနေသဖြင့် အဆင့်တက်ရန် အဟန့်အတားမရှိဘဲ ဝိညာဉ်စွမ်းအားများမှာ တဟုန်ထိုးတိုးတက်လာသည်။

ချက်ချင်းပင် သူ၏နတ်ဘုရားနန်းတော်မှာ အလိုအလျောက်မြင့်တက်သွားပြီး ကောင်းကင်ယံသို့ ထိုးတက်သွား၏။ ထို့နောက် တိမ်တိုက်များကြားတွင် မှော်ဆန်သောပြောင်းလဲမှုများ စတင်လာသည်။

ခန့်ညားထည်ဝါသော နန်းတော်များက ယခင်နတ်ဘုရားနန်းဆောင်၏နေရာတွင် အစားထိုးဝင်ရောက်လာပြီး နတ်ဘုရားနယ်မြေတစ်ခုကဲ့သို့ တောက်ပနေတော့သည်။

အောက်ရှိမြို့နေလူထုမှာ မော့ကြည့်နေကြပြီး ဘာတွေဖြစ်နေမှန်းမသိကြချေ။

"ဒါ အင်မော်တယ်နန်းတော်ကြီး ဆင်းသက်လာတာလား"

"အင်မော်တယ်တစ်ပါး လူ့လောကကို ကြွလာတာများလား"

ကျင့်ကြံသူအချို့မှာ အနီးကပ်ကြည့်ရန် ပျံတက်သွားသော်လည်း အနားသို့လုံးဝမကပ်နိုင်ကြပေ။ တာအိုနန်းတော်၏ ဖိအားအောက်တွင် သာမန်ကျင့်ကြံသူများ မည်သို့ပျံတက်နိုင်ပါမည်နည်း။

သူတို့မြင်တွေ့ရသည်မှာ ကောင်းကင်ယံမှစီးဆင်းလာသော အလွန်ကျယ်ပြန့်သည့် မြစ်ကိုးစင်းကိုသာ ဖြစ်သည်။ ဤဖြစ်ရပ်ဆန်းမှာ ၁၅ မိနစ်ခန့် ကြာမြင့်ခဲ့သည်။

ယခုအခါ ကျန်းချန်သည် တာအိုနန်းတော်အဆင့် ၁ ကျွမ်းကျင်သူတစ်ဦး ဖြစ်လာခဲ့လေပြီ။ ထို့နောက် ယခင်ကရရှိခဲ့သော မြင့်မြတ်နဂါးကျမ်းကို ထုတ်ယူလိုက်သည်။ တာအိုနန်းတော်အဆင့်သို့ ရောက်ရှိချိန်တွင် ဤကျမ်းကိုထုတ်ယူလိုက်ခြင်းကြောင့် သူသည်သတ္တမအဆင့်အသိအမြင်ကို ရရှိသွား၏။ ရလဒ်အနေဖြင့် သူ၏တာအိုနန်းတော်အခြေခံမှာ မယုံနိုင်လောက်အောင် ခိုင်မာသွားတော့သည်။

သူ၏ခွန်အားကို မြှင့်တင်ရန်ဝန်မလေးဘဲ နတ်ဘုရားဝိညာဉ်ကိုမြှင့်တင်ပေးသော သူတော်စင်ဆေးလုံးနှစ်လုံးကိုလည်း သောက်သုံးလိုက်သည်။ တာအိုနန်းတော်အဆင့် ကျင့်ကြံသူ မည်သူကမှ သူတော်စင်ဆေးလုံးကို မသုံးစွဲနိုင်ကြချေ။

သူတော်စင်အဆင့်မှ ကျွမ်းကျင်သူများပင်လျှင် ဆေးတစ်လုံးကို ရာစုနှစ်ပေါင်းများစွာမှ တစ်ကြိမ်သာ သုံးနိုင်ကြခြင်းဖြစ်သည်။ ဆေးလုံး၏အာနိသင်ကြောင့် သူ၏ဝိညာဉ်အဆင့်မှာ တာအိုနန်းတော်အဆင့် ၇ အထိ တဟုန်ထိုးတိုးတက်သွားသည်။

နတ်ဘုရားဝိညာဉ်အဆင့်ရောက်ရှိသွားပြီဖြစ်ရာ စောင့်ဆိုင်းနေရန်မလိုတော့ပေ။ တိုက်ပွဲအပြီးတွင် သိမ်းဆည်းရမိသော ရတနာဆေးလုံး ၆၀ ကျော်ကို အသုံးပြုလိုက်၏။

တာအိုနန်းတော်အဆင့်တွင် လိုအပ်သောဝိညာဉ်စွမ်းအားမှာ ကောင်းကင်ကံကြမ္မာအဆင့်ထက် ဆယ်ဆကျော်များပြားသဖြင့် အဆင့်တက်ခြင်းမှာ ယခင်ကကဲ့သို့ မြန်ဆန်မည်မဟုတ်ပေ။

လန်ယီပြန်ရောက်လာချိန်တွင် ဤကောင်သည် ဆေးလုံးများကိုစားပြီး ထပ်မံအဆင့်မြှင့်နေသည်ကို တွေ့လိုက်ရ၏။ သူသည် အကာအကွယ်ပေးမည့်သူ သို့မဟုတ် သီးခြားနေရာမရှာဘဲ အပြင်ဘက်တွင် တစ်ဦးတည်းထိုင်နေခြင်းမှာ အန္တရာယ်ကို လက်ယပ်ခေါ်နေသကဲ့သို့ပင်။

ထို့အပြင် ဆေးသောက်ပုံမှာလည်း လွန်လွန်းလှ၏။ သူသည် ဆေးလုံးများကို လက်တစ်ဆုပ်စာယူကာ ရေတွက်ခြင်းမရှိဘဲ ပါးစပ်ထဲသွတ်သွင်းနေခြင်းဖြစ်သည်။

ဆေးလုံးတွေကိုချိုချဉ်မှတ်နေတာလား... ရူးနေတာလား...

သူမအနေဖြင့် ဘာမှမပြောလိုတော့ပေ။ ဤကောင်နှင့်ပတ်သက်လာလျှင် ဘာဖြစ်ဖြစ်ပုံမှန်ဟုသာ ယူဆလိုက်တော့သည်။

ဆေးလုံးအကုန်သောက်ပြီးနောက် ကျန်းချန်သည် တာအိုနန်းတော်အဆင့် ၃ သို့ ရောက်ရှိသွားသည်။ ကျန်သောအဆင့်နိမ့်ဆေးလုံးများမှာမူ သူ၏ကျင့်ကြံမှုအတွက် ထိရောက်မှုမရှိတော့သဖြင့် ဆက်မသုံးတော့ပေ။

"ရှင် အဆင့်မြှင့်လို့ပြီးပြီလား"

လန်ယီက သူမ၏လေသံကို တည်ငြိမ်အောင်ထိန်းကာ မေးလိုက်သည်။

တကယ်ပါပဲ... ဒီကောင်လာတုန်းက ကောင်းကင်ကံကြမ္မာ အဆင့် ၄ ပဲ ရှိတာ၊ အခု သူမရှေ့တင် တာအိုနန်းတော် အဆင့် ၃ ဖြစ်သွားပြီ... ဘယ်နှစ်ရက်ပဲ ရှိသေးလို့လဲ...

သူမကိုယ်တိုင်မှာ စုန်းမျိုးနွယ်၏ အမွေအနှစ်၊ အခွင့်အလမ်းများစွာနှင့် ကြိုးစားအားထုတ်မှုကြောင့်သာ အဆင့် ၈ သို့ ရောက်ခဲ့၏။ ဂိုဏ်းတစ်ခု၏ပံ့ပိုးမှုမရှိဘဲ ဤအဆင့်သို့ရောက်ရန်မှာ အံ့ဖွယ်တစ်ခုပင်။ သို့သော် ဤကောင်မှာမူ သူမကို မည်သည့်အချိန်မဆို ကျော်တက်သွားတော့မည့်ပုံပင်။

"ပြီးပြီ"

ကျန်းချန်က သူမတစ်ယောက်တည်းဖြစ်နေသည်ကို ထူးဆန်းစွာ ကြည့်လိုက်သည်။

"နင်ထီရော... သူမကို သတ်လိုက်ပြီလား"

လန်ယီက ခေါင်းခါပြသည်

"မသတ်ပါဘူး။ အစကတည်းက သူမကို သတ်ဖို့ စိတ်ကူးမရှိခဲ့ဘူး။ ကျိန်စာသုံးခဲ့တာက သူမကို ခြောက်လှန့်ဖို့ပဲ"

ကျန်းချန်က နှုတ်ခမ်းမဲ့ကာပြောလိုက်သည်။

"မင်းစကားကို ယုံတဲ့သူအရူးပဲ"

လန်ယီကစိတ်မဆိုးဘဲ တည်ငြိမ်စွာပြောလိုက်သည်။

"သုံးနှစ်လောက်အတူနေခဲ့တော့ သူမအပေါ်မှာသံယောဇဉ်ရှိခဲ့ပါတယ်။ ဒါကြောင့်လည်း သူမကို လမ်းညွှန်ပေးပြီး တာအိုနန်းတော်အဆင့်ရောက်အောင် ကူညီပေးခဲ့တာပေါ့။ သူမသင်ယူခဲ့သမျှ အများစုက ကျွန်မသင်ပေးခဲ့တာမို့ ကျွန်မက သူမရဲ့ဆရာတစ်ဝက်လို့ ပြောလို့ရပါတယ်။ သူမကို နောင်ကျရင် ခေါ်သွားဖို့တောင် စိတ်ကူးခဲ့သေးတာ..."

သူမ ဆက်မပြောတော့ဘဲ ဝမ်းနည်းရိပ်သန်းစွာဖြင့်...

"သူမကတော့ ကျွန်မကို ဘယ်လိုနှိပ်စက်ပြီး သတ်ရမလဲဆိုတာပဲတွေးနေခဲ့တာကို ဘယ်သူသိမှာလဲ။"

ကျန်းချန်မှာ ပြောစရာစကားမဲ့သွားသည်။

မင်းက လူတစ်ယောက်ကို ကျိန်စာတိုက်ထားတာလေ၊ အဲဒီလူက နာကျင်မှုကိုခုံမင်တဲ့သူမဟုတ်ရင် မင်းကို ဘယ်လိုလုပ်မမုန်းဘဲနေမှာလဲ...