အခန်း (၃၁-၃၂)
Vol. 3 Ch. 31-32
အခန်း (၃၁)- တားမြစ်နယ်မြေ၏ အရှင်သခင်၊ ကြည်လင်သော အတွေးအခေါ်နှင့် လှိုင်းထန်နေသော နှလုံးသား
ကုမိသားစုတစ်ခုလုံးအား ရှင်သန်ခြင်းတားမြစ်နယ်မြေသို့ ရွှေ့ပြောင်းခြင်းလော။
ကုချန်၏နှုတ်မှ စကားသံထွက်ပေါ်လာသောအခါ ခန်းမဆောင်အတွင်းရှိ ကုမိသားစုဝင်အားလုံးသည် မိမိတို့အကြားမှားသည်ဟု သံသယဝင်သွားကြလေသည်။
ရှင်သန်ခြင်းတားမြစ်နယ်မြေလော။ ထိုအရာသည် အဘယ်သို့သော နေရာမျိုးဖြစ်သနည်း။ ၎င်းသည် ကမ္ဘာလောကရှိ သက်ရှိအားလုံးကို ၎င်း၏အမည်နာမအား ကြားရုံမျှဖြင့်ပင် တုန်လှုပ်ခြောက်ခြားစေသော ကြောက်မက်ဖွယ်ရာ သေမင်းတမန်နေရာတစ်ခု ဖြစ်သည်တည်း။
ရှေးခေတ်ကတည်းက အသက်ရှင်နေထိုင်ခဲ့သော သတ္တဝါများစွာသည် ၎င်းအတွင်း၌ အိပ်စက်အနားယူနေကြသည်ဟု ဆိုကြ၏။ လက်ရှိမဟာဧကရာဇ်များပင်လျှင် အဆုံးမဲ့ကမ္ဘာအနှံ့ ပြန့်ကျဲနေသော ဤရှင်သန်ခြင်းတားမြစ်နယ်မြေများအကြောင်းကို အလွန်အမင်း လျှို့ဝှက်ထားကြပြီး လွယ်လွယ်ကူကူ ရန်စဝံ့ခြင်းမရှိကြပေ။
ယခုမူ ဘိုးဘေးက ကုမိသားစုတစ်ခုလုံးကို ရှင်သန်ခြင်းတားမြစ်နယ်မြေသို့ ခေါ်ဆောင်၍ ရွှေ့ပြောင်းလိုသည်ဟု ဆိုနေပါတကား။
" ဘာလဲ မင်းတို့ ဒီနေရာကို တွယ်တာနေကြပြီး ငါဧကရာဇ်နဲ့အတူ တားမြစ်နယ်မြေထဲကို လိုက်ဖို့ ဆန္ဒမရှိကြဘူးလား "
ကုချန်သည် ကုမိသားစုဝင်များစွာ၏ မျက်နှာပေါ်ရှိ မယုံနိုင်သည့်အမူအရာများကို ကြည့်ရင်း ပေါ့ပေါ့ပါးပါး မေးလိုက်သည်။
" မဟုတ်ပါဘူး မဟုတ်ပါဘူး လုံးဝမဟုတ်ပါဘူး အရှင်သခင် "
ကုတောက်လင်းသည် ငြင်းဆိုသည့်အနေဖြင့် အလျင်အမြန် ခေါင်းခါလိုက်ပြီးနောက် တိုးတိုးလေးပြောလေ၏။
" ဒါပေမဲ့... ကျွန်တော်တို့ ကုမိသားစုရဲ့ နေအိမ်အသစ်က ဒဏ္ဍာရီလာ ရှင်သန်ခြင်းတားမြစ်နယ်မြေ ဖြစ်လိမ့်မယ်လို့ မမျှော်လင့်ထားမိရုံပါပဲ။ ရှင်သန်ခြင်းတားမြစ်နယ်မြေတွေက ရှေးဟောင်းအရှင်သခင်တွေ အိပ်စက်အနားယူနေတဲ့နေရာတွေနဲ့ ပြည့်နေပြီလို့ ကြားဖူးပါတယ်။ ကျွန်တော်တို့ ကုမိသားစုက ရှင်သန်ခြင်းတားမြစ်နယ်မြေထဲကို ပြောင်းရွှေ့ချင်တယ်ဆိုရင် အထဲမှာအိပ်စက်နေတဲ့ သတ္တဝါတွေက သဘောတူပါ့မလား အရှင်သခင် "
ရှင်သန်ခြင်းတားမြစ်နယ်မြေတိုင်းသည် စကြဝဠာ၏ ကြီးမားသောစွမ်းအားကို အသုံးချနိုင်သည့် လျှို့ဝှက်ဆန်းကြယ်ပြီး နက်နဲသောနေရာတစ်ခုတွင် တည်ရှိသည်။
ထိုသို့သောနေရာများ၏ ပထဝီဝင်အနေအထားနှင့် ပတ်ဝန်းကျင်အခြေအနေများသည် ကုမိသားစုလက်ရှိတည်ရှိရာနေရာထက် အဆပေါင်းများစွာ သာလွန်သည်မှာ သဘာဝကျပေသည်။
သို့မဟုတ်ပါက ရှင်သန်ခြင်းတားမြစ်နယ်မြေသည် ရှေးဟောင်းအရှင်သခင်များအတွက် အိပ်စက်အနားယူရာနေရာ ဖြစ်လာမည်မဟုတ်ပေ။
သို့သော် ဤအကြောင်းကြောင့်ပင် ရှင်သန်ခြင်းတားမြစ်နယ်မြေများကို လျှို့ဝှက်ဆန်းကြယ်ပြီး ကြောက်မက်ဖွယ်ကောင်းသော သတ္တဝါများက ကာလကြာရှည်စွာ ပိုင်းခြားသိမ်းပိုက်ထားခဲ့ကြပြီးဖြစ်သည်။
ယခုအခါ ဘိုးဘေးက ကုမိသားစုတစ်ခုလုံးကို ရှင်သန်ခြင်းတားမြစ်နယ်မြေသို့ ခေါ်ဆောင်လိုပါက တားမြစ်နယ်မြေအတွင်းရှိ ထိုကြောက်မက်ဖွယ်ကောင်းသော သတ္တဝါများက သဘောတူမည်လော။
သို့သော် ကုတောက်လင်း၏ စိုးရိမ်ပူပန်မှုများနှင့် သံသယများကို ရင်ဆိုင်ရာတွင် ကုချန်သည် မျက်လုံးများကို အနည်းငယ် မှေးစင်းလိုက်ပြီး တည်ငြိမ်စွာပြောဆိုလိုက်သည်။
" ငါဧကရာဇ် လုပ်ချင်တဲ့အရာတွေကို သူတို့ ဝင်စွက်ဖက်စရာမလိုဘူး မင်းတို့က အချိန်ကျရင် ငါဧကရာဇ်နဲ့အတူ တားမြစ်နယ်မြေထဲကို ပြောင်းရွှေ့လာဖို့ပဲ လိုတယ် "
ထိုရှင်သန်ခြင်းတားမြစ်နယ်မြေများ၏ အခြေအနေကို ကုချန်ထက် ပိုသိသူ တစ်ဦးတစ်ယောက်မျှ မရှိပေ။
၎င်းတို့အတွင်း၌ အိပ်စက်အနားယူနေသော သတ္တဝါများအားလုံးသည် အတိတ်မှ ဧကရာဇ်အဆင့် သတ္တဝါများ ဖြစ်ကြသည်။
သာမန်ဧကရာဇ်အဆင့် သတ္တဝါများ၏ သက်တမ်းမှာ အများဆုံး အနှစ်သုံးသောင်းမှ ငါးသောင်းအထိသာ ရှိသည်။
သို့သော် အချို့သော ဧကရာဇ်အဆင့် သတ္တဝါများသည် သူတို့၏သက်တမ်း ကုန်ဆုံးခါနီးအချိန်တွင် ရိုးရှင်းစွာ ပျက်သုဉ်းသွားရန် ဆန္ဒမရှိဘဲ ထာဝရအသက်ရှင်ရန် အခွင့်အလမ်းတစ်ခုကိုရှာဖွေရန် မျှော်လင့်ခဲ့ကြသောကြောင့် အမြင့်မြတ်ဆုံးသော နည်းလမ်းများကို အသုံးပြု၍ မိမိတို့၏တိုက်ခိုက်ရေးစွမ်းရည်ကို ချိပ်ပိတ်ကာ လောကကြီးတွင် အိပ်စက်အနားယူခဲ့ကြသည်။
ဤဧကရာဇ်အဆင့် သတ္တဝါများ အိပ်စက်အနားယူရာနေရာများမှာ ယနေ့ အဆုံးမဲ့ကမ္ဘာရှိ ရှင်သန်ခြင်းတားမြစ်နယ်မြေအသီးသီးပင် ဖြစ်သည်တည်း။
အချိန်ကာလများ ကြာမြင့်လာသောကြောင့် ဤရှင်သန်ခြင်းတားမြစ်နယ်မြေအများစုတွင် အိပ်စက်နေသော ဧကရာဇ်အဆင့်သတ္တဝါ တစ်ဦးထက်မက များနေသည်။
ထို့ကြောင့် နောက်ပိုင်းတွင် တာအိုကိုရရှိပြီး ဧကရာဇ်ဖြစ်လာသော လက်ရှိဧကရာဇ်များပင်လျှင် ဤရှင်သန်ခြင်းတားမြစ်နယ်မြေများကို ရန်စဝံ့ခြင်းမရှိကြပေ။
မည်သို့ပင်ဆိုစေကာမူ လက်ရှိမဟာဧကရာဇ်တစ်ပါးသည် မည်မျှပင် အင်အားကြီးမားသည်ဖြစ်စေ သူ၏စွမ်းအားမှာ အကန့်အသတ်ရှိပြီး နှစ်ပေါင်းများစွာကြာအောင် စုဆောင်းထားသော ရှင်သန်ခြင်းတားမြစ်နယ်မြေတစ်ခု၏ အင်အားနှင့် ယှဉ်ပြိုင်နိုင်စွမ်းမရှိပေ။
အနှစ်ကိုးသောင်းအကြာက နတ်ဆိုးနယ်မြေ ကျူးကျော်လာစဥ် ကုချန်သည် တားမြစ်နယ်မြေများတွင် အိပ်စက်နေသော ဤရှေးဟောင်းဧကရာဇ်များနှင့် ရှေးဟောင်းအရှင်သခင်များကို နတ်ဆိုးနယ်မြေမှ မကောင်းဆိုးဝါး နတ်ဆိုးများနှင့် ရင်ဆိုင်စေရန် ' ကျားများကို မောင်းထုတ်၍ ဝံပုလွေများကို ကိုက်စားစေခြင်း ' ဟူသော ဗျူဟာကို အသုံးပြုရန် စဥ်းစားခဲ့ဖူးသည်။
သို့သော် ရှင်သန်ခြင်းတားမြစ်နယ်မြေများတွင် အိပ်စက်နေသော ဤရှေးဟောင်းသတ္တဝါများသည် အတိတ်က အဆုံးမဲ့ကမ္ဘာကို ကာကွယ်ခဲ့သော ရှေးဟောင်းဧကရာဇ်များနှင့် ရှေးဟောင်းအရှင်သခင်များ မဟုတ်ကြတော့ဘဲ သူတို့၏ တာအိုနှလုံးသားမှာ သံကဲ့သို့မာကျောပြီး စိတ်ထဲတွင် ထာဝရအသက်ရှင်လိုသော အတွေးတစ်ခုသာ ကျန်ရှိနေသော မိစ္ဆာများ ဖြစ်နေကြသည်။
သူတို့အတွက်မူ အဆုံးမဲ့ကမ္ဘာတစ်ခုလုံး ပြောင်းပြန်ဇောက်ထိုးဖြစ်သွားပြီး သက်ရှိအားလုံး သေဆုံးသွားလျှင်ပင် အရေးမကြီးပေ။ အဓိကမှာ သူတို့၏ ထာဝရတည်ရှိမှုကို မထိခိုက်ရန်သာဖြစ်၏။
ဤအကြောင်းကြောင့်ပင် အဆုံးမဲ့ကမ္ဘာရှိ သက်ရှိသတ္တဝါများအတွက် ကုချန်သည် ထိုအချိန်က ဤရှင်သန်ခြင်းတားမြစ်နယ်မြေများကို ပစ်မှတ်မထားခဲ့ခြင်းဖြစ်သည်။
အကယ်၍ သူသာ ဤတားမြစ်နယ်မြေ သတ္တဝါများကို တစ်ဖန်ပြန်လည်ထွက်ပေါ်လာအောင် ရန်စလိုက်ပါက နတ်ဆိုးနယ်မြေမှ အရှင်သခင်အမျိုးမျိုးနှင့် ပေါင်းစပ်သွားလျှင် ကုချန်ပင်လျှင် အဆုံးမရှိသော ခေါင်းကိုက်မှုကို ခံစားရပေမည်။
သို့သော် ယခုအခါ ကုချန်သည် အဆုံးမဲ့ကမ္ဘာသို့ တစ်ဖန်ပြန်လည်ရောက်ရှိလာပြီး သက်ရှိအားလုံးကို ကာကွယ်ရမည့် ဝန်ထုပ်ဝန်ပိုးမရှိတော့သည့်အခါ အရာရာတိုင်းသည် ရိုးရှင်းသွားခဲ့သည်။
ယခင်က သူသည် ဤအဆုံးမဲ့ကမ္ဘာမှ သက်ရှိသတ္တဝါများကြောင့် အနှောင့်အယှက်ခံခဲ့ရသဖြင့် သူ၏လုပ်ဆောင်ချက်များသည် နေရာတိုင်းတွင် ချုပ်တည်းခံခဲ့ရပြီး ချီတုံချတုံဖြစ်ကာ ထိုတားမြစ်နယ်မြေ သတ္တဝါများနှင့် များစွာ ပတ်သက်ရန် မဝံ့ရဲခဲ့ပေ။
သို့သော် ယခုအခါ ဤအဆုံးမဲ့ကမ္ဘာမှ သက်ရှိသတ္တဝါများ၏ ချည်နှောင်မှုမရှိတော့သဖြင့် သူ့တွင် အားနည်းချက်ဟူ၍ ပြောစရာမရှိတော့ချေ။
တားမြစ်နယ်မြေ၏ အရှင်သခင်များလော။ အကယ်၍ သင်တို့သည် ငါဧကရာဇ်ကို ရန်စဝံ့ပါက အဆုံးမရှိသော တိုက်ပွဲတစ်ခုသာ ဖြစ်ပွားပေမည်။
တားမြစ်နယ်မြေ၏ အရှင်သခင်များ ထွက်ပေါ်လာပြီး သက်ရှိအားလုံးကို ခြိမ်းခြောက်မှုအဖြစ် အသုံးပြုလိုက ရှေ့ဆက်လုပ်ကြလော့။ ဤအဆုံးမဲ့ကမ္ဘာရှိ သက်ရှိသတ္တဝါများ လုံးဝပျက်သုဉ်းသွားလျှင်ပင် ငါဧကရာဇ်နှင့် အဘယ်မျှ မသက်ဆိုင်ပေ။
ငါဧကရာဇ်သည် ဤတားမြစ်နယ်မြေကို သိမ်းပိုက်လိုသည်။ မည်သူမဆို ငြင်းဆန်ဝံ့ပါက ပျက်သုဉ်းသွားစေ။
ဤသို့တွေးလိုက်ရာ ကုချန်၏ အတွေးအခေါ်များသည် မယုံနိုင်လောက်အောင် ကြည်လင်သွားသည်။
အားနည်းချက်များမရှိတော့ခြင်းနှင့် ဖြောင့်မတ်မှန်ကန်မှုများဖြင့် ရစ်ပတ်ချည်နှောင်ခြင်းမခံရတော့သည့် ဤခံစားချက်သည် အလွန်အမင်းပင် စိတ်လှုပ်ရှားဖွယ်ကောင်းလှသည်တည်း။
တိုတိုပြောရလျှင် ကုချန်တွင် ယခုအခါ ကျင့်ဝတ်စည်းကမ်းတစ်ခုသာ ရှိသည်။
မည်သူမဆို မနာခံပါက နှိမ်နင်းလော့။
တားမြစ်နယ်မြေ၏ မည်သည့်အရှင်သခင်ဖြစ်စေ လက်ရှိကမ္ဘာ၏ မည်သည့်မဟာဧကရာဇ်ဖြစ်စေ တားမြစ်နယ်မြေ၏ မည်သည့်အရှင်ဖြစ်စေ အရေးမကြီးပေ။
သင်တို့သည် ငါဧကရာဇ်၏ဆန္ဒကို ဆန့်ကျင်ဝံ့ပြီး ငါဧကရာဇ်ကို မနှစ်မြို့စေပါက အားလုံးကို နှိမ်နင်းလော့။ တစ်ဦးတစ်ယောက်မျှ အသက်ရှင်မကျန်စေနှင့်။
" ဘိုးဘေး... သူက ရှင်သန်ခြင်းတားမြစ်နယ်မြေထဲကို ပြောင်းရွှေ့ချင်နေတာပဲ..."
ကုချင်းရွဲ့သည် တိုးတိတ်စွာ ရေရွတ်လိုက်ပြီး သူမ၏လှပသောမျက်လုံးများမှာ တုန်လှုပ်မှုဖြင့် ပြည့်နှက်နေ၏။
ဘိုးဘေးသည် ဧကရာဇ်မျိုးနွယ်စုထံမှ လက်စားချေခြင်းကို ခံရမည်စိုးသဖြင့် ကုမိသားစုကို လျှို့ဝှက်သောနေရာတစ်ခု သို့မဟုတ် ကမ္ဘာငယ်တစ်ခုသို့ တိတ်တဆိတ် ရွှေ့ပြောင်းလိုသည်ဟု သူမ မူလက ထင်ခဲ့သည်။
သို့သော် ယခုကြည့်ရသည်မှာ သူမ လုံးဝနားလည်မှုလွဲခဲ့ဟန်ရှိသည်။ ဘိုးဘေးတွင် ထိုသို့သော အတွေးအခေါ်များ လုံးဝမရှိခဲ့ပေ။
ရှင်သန်ခြင်းတားမြစ်နယ်မြေ ထိုအရာသည် အဘယ်သို့သော နေရာမျိုးဖြစ်သနည်း။
၎င်းသည် အဆုံးမဲ့ကမ္ဘာရှိ သက်ရှိအားလုံးကို ၎င်း၏အမည်နာမအား ကြားရုံမျှဖြင့် တုန်လှုပ်စေသော သေမင်း၏မြေ သေမင်းတမန်နေရာတစ်ခု ဖြစ်သည်။
အဆုံးမဲ့ကမ္ဘာတွင် ရှင်သန်ခြင်းတားမြစ်နယ်မြေသည် အဘယ်ကြောင့် ဤမျှ နာမည်ဆိုးဖြင့် ကျော်ကြားရသနည်း။
ထိုရှင်သန်ခြင်းတားမြစ်နယ်မြေများအတွင်း၌ အရှင်သခင်များ အိပ်စက်အနားယူနေသည့်အချက်အပြင် အခြားအကြောင်းရင်းတစ်ခုလည်း ရှိသေးသည်။ သင်သည် မည်သည့်အဆင့်ရှိ ကျွမ်းကျင်သူဖြစ်စေ ရှင်သန်ခြင်းတားမြစ်နယ်မြေထဲသို့ ခြေတစ်လှမ်းလှမ်းဝံ့သည်နှင့် သင်သေဆုံးရမည် ဖြစ်သည်။
ကုမိသားစုတစ်ခုလုံးကို ရှင်သန်ခြင်းတားမြစ်နယ်မြေသို့ ရွှေ့ပြောင်းခြင်းသည် ကြေညာချက်တစ်ခုပင်ဖြစ်သည်။
ယခုမှစ၍ အဆုံးမဲ့ကမ္ဘာတွင် မည်သို့သော ကျွမ်းကျင်သူ၊ မည်သို့သော အင်အားစုဖြစ်စေ၊ ကုမိသားစုတည်ရှိရာ တားမြစ်နယ်မြေသို့ ချဉ်းကပ်ဝံ့သူတိုင်း သေမည်။
ဘိုးဘေးသည် ကုမိသားစုခိုလှုံရန် ပြင်ဆင်နေခြင်းက မည်သို့ဖြစ်နိုင်မည်နည်း။ သူသည် ကမ္ဘာလောကရှိ လူတိုင်းကိုရင်ဆိုင်ရန် ရှင်းလင်းစွာ ရည်ရွယ်နေခြင်းသာ ဖြစ်သည်။
တစ်ခဏအတွင်း ကုချင်းရွဲ့၏နှလုံးသားသည် လှိုင်းထန်လာပြီး သူမ၏လှပသောမျက်လုံးများထဲတွင် စိတ်လှုပ်ရှားမှုအရိပ်အယောင်တစ်ခု လင်းလက်လာ၏။
ကုမျိုးနွယ်ဝင်တစ်ဦးအနေဖြင့် သူမသည် ငယ်စဥ်ကတည်းက ကုချန်၏ လုပ်ဆောင်ချက်များနှင့် ဒဏ္ဍာရီများကို နားထောင် ကြီးပြင်းလာခဲ့ပြီး ကုမိသားစု၏ဘိုးဘေးဖြစ်သူ ကုချန်အပေါ်တွင် သဘာဝအတိုင်း မှီခိုအားထားမှုနှင့် ချစ်ခင်မြတ်နိုးမှု ရှိခဲ့သည်။
ယခုအခါ ကုချန်ပြန်လည်ရောက်ရှိလာသောအခါ ကုချင်းရွဲ့သည် ဘိုးဘေးကုချန်မှာ ထိုဒဏ္ဍာရီများနှင့် လုပ်ဆောင်ချက်များတွင် ပေါ်လွင်သည်ထက် ပိုမိုပြတ်သားပြီး ဩဇာလွှမ်းမိုးကြောင်း တွေ့ရှိလိုက်ရရာ ယင်းသည် ကုချင်းရွဲ့၏နှလုံးသားကို စိတ်လှုပ်ရှားမှုဖြင့် လှိုင်းထန်စေပြီး မိမိကိုယ်ကို ထိန်းချုပ်နိုင်စွမ်းမရှိအောင် ဖြစ်သွားစေသည်။
ဤသည်ကား ကုမိသားစု၏ ဘိုးဘေးပင်တည်း။
ဤသည်ကား သူမ၏ စိတ်အာရုံထဲရှိ နှိုင်းယှဉ်၍မရလောက်အောင် ဩဇာလွှမ်းမိုးသော ကုချန်မဟာဧကရာဇ်ပင်တည်း။
" ကောင်းပြီ တခြားကိစ္စတွေ မရှိတော့ဘူးဆိုရင် မင်းတို့အားလုံး အရင်ထွက်သွားနိုင်ပြီ "
ခန်းမထဲရှိ ကုမိသားစုဝင်အများစုသည် ကုမိသားစု ရှင်သန်ခြင်းတားမြစ်နယ်မြေသို့ ပြောင်းရွှေ့တော့မည့်သတင်းကို အတော်အတန် လက်ခံလိုက်နိုင်ပြီးနောက် ကုချန်သည် လက်ကိုဝှေ့ယမ်းကာ ခန်းမထဲရှိ ကုမိသားစုဝင်အားလုံးကို ထွက်သွားစေလိုက်သည်။
" ကျွန်တော်မျိုးတို့ အမိန့်ကိုနာခံပါတယ် "
ကုတောက်လင်းနှင့် အခြားသူများသည် အလျင်အမြန် လေးစားစွာဦးညွှတ်ပြီး ခန်းမအပြင်ဘက်သို့ လျှောက်သွားကြသည်။
မိသားစုခေါင်းဆောင်နှင့် အခြားသူများ ထွက်ခွာသွားသည်ကိုမြင်သောအခါ ကုချင်းရွဲ့သည် များများစားစားမတွေးဘဲ မိသားစုခေါင်းဆောင်နှင့် အခြားသူများနှင့်အတူ ထွက်ခွာရန် ရည်ရွယ်လိုက်သည်။
သို့သော် သူမထွက်ခွာရန် ခြေတစ်လှမ်းလှမ်းခြင်းမပြုနိုင်မီမှာပင် ကုချန်၏ တိုးညှင်းသော အသံသည် သူမ၏နားထဲတွင် ထွက်ပေါ်လာခဲ့၏။
" ကုချင်းရွဲ့ မင်း ခဏနေခဲ့ဦး "
အခန်း (၃၂)- လက်စွပ်ဝိညာဉ်၊ ရှောင်းယွဲ့နတ်သမီးနှင့် တိတ်ဆိတ်သော တုန်လှုပ်မှု
ကုချန်၏ခေါ်သံကို ကြားလိုက်ရသောအခါ ကုချင်းရွဲ့သည် အနည်းငယ် မှင်သက်သွားခြင်းမှ မကင်းနိုင်ခဲ့ပေ။
အဘယ်ကြောင့် ဘိုးဘေးကြီးက သူမအား တစ်ဦးတည်း သီးသန့်နေခဲ့စေလိုသနည်း။
သူမ စိတ်ရှုပ်ထွေးနေသော်လည်း ကုချင်းရွဲ့သည် ကုချန်၏အမိန့်ကို သဘာဝကျကျပင် နာခံလိုက်၏။
ထို့ကြောင့် အခြားကုမျိုးနွယ်ဝင်များအားလုံး ထွက်ခွာသွားပြီးနောက် ပင်မခန်းမဆောင်အတွင်း၌ ကုချန်နှင့် ကုချင်းရွဲ့နှစ်ဦးတည်းသာ ကျန်ရစ်ခဲ့သည်။
" ဘိုးဘေးကြီး ကုချင်းရွဲ့ကို ဘာများ ညွှန်ကြားစရာ ရှိလို့နေခိုင်းရတာပါလဲ "
ကုချင်းရွဲ့သည် သူ၏ဦးခေါင်းကို အနည်းငယ်ငုံ့ကာ ရိုသေစွာ မေးမြန်းလိုက်သည်။
ကုချန်၏အကြည့်သည် ကုချင်းရွဲ့အပေါ်သို့ ကျရောက်သွား၏။ သူမသည် လက်ရှိကုမိသားစုတွင် အတော်ဆုံး မျိုးဆက်သစ်တပည့်တစ်ဦးဖြစ်သည်မှာ သံသယရှိစရာမလိုပေ။ အသက်နှစ်ဆယ်ပင် မပြည့်သေးဘဲ သူမသည် တာအိုနန်းတော်အဆင့် အထွတ်အထိပ်ကျင့်ကြံမှုအဆင့်ကို ပိုင်ဆိုင်ထားပြီး သူဖန်တီးခဲ့သော ကုကောင်းကင်ဘုံဧကရာဇ်ကျမ်းကို စတင်ကျင့်ကြံနေပြီဖြစ်သည်။ သူမသည် ကုမိသားစုတစ်ခုလုံးတွင် ကုချန် အကျေနပ်ဆုံးသူဖြစ်သည်မှာ ယုံမှားစရာမရှိချေ။
သို့သော်...
ကုချန်၏အကြည့်သည် ကုချင်းရွဲ့ထံမှ ရွှေ့လျားသွားပြီး သူမ၏လက်ချောင်းပေါ်ရှိ ရှေးကျသော သိုလှောင်လက်စွပ်ပေါ်သို့ ကျရောက်သွားသည်။
အကယ်၍ အရင်ကသာဆိုလျှင် သူ၏ဧကရာဇ်အဆင့် ကျင့်ကြံမှုဖြင့်ပင် သေချာစုံစမ်းစစ်ဆေးခြင်းမရှိဘဲ ဤသိုလှောင်လက်စွပ်ကို သူလျစ်လျူရှုမိကောင်း ရှုမိပေမည်။
သို့သော် ယခုအခါတွင် သူသည် စစ်မှန်သော ဧကရာဇ်အဆင့်အထွက်အထိပ်ကျင့်ကြံမှုကို ပိုင်ဆိုင်ထားပြီး သူ၏ နတ်ဘုရားဝိညာဉ်စွမ်းအားမှာ အဆပေါင်းများစွာ တိုးတက်လာခဲ့သည်။
ထို့ကြောင့် ကုမိသားစုဝင်အားလုံးကို ဤပင်မခန်းမဆောင်တွင် စုစည်းပြီးနောက် ကုချန်သည် သူ၏အကြည့်ကို တစ်ချက်ဝေ့ကြည့်လိုက်ရုံဖြင့် ကုချင်းရွဲ့၏ လက်ချောင်းပေါ်ရှိ သိုလှောင်လက်စွပ်၏ ' သာမန်မဟုတ်သည့်အချက် ' ကို ချက်ချင်း သတိပြုမိလိုက်လေသည်။
ရှေးကျပုံရသော ဤသိုလှောင်လက်စွပ်အတွင်း၌ အစိတ်စိတ်အမြွှာမြွှာဖြစ်နေသော ဝိညာဉ်တစ်ခု ပုန်းခိုနေခဲ့၏။
ပြီးလျှင် ထိုဝိညာဉ်၏ အနှစ်သာရမှာ သာမန်ဧကရာဇ်အဆင့်ပုဂ္ဂိုလ်တစ်ဦးထက်ပင် မြင့်မားနေဟန်တူသည်။
စိတ်ဝင်စားစရာပဲ လက်စွပ်ထဲက လူကြီးတစ်ယောက်လား။
ဤသည်မှာ သူ၏ကုမိသားစုမှ ဤမျိုးဆက်သစ်လေး၏ 'ကံကောင်းခြင်းအဆောင်' ပင်လော။
သို့သော်လည်း ဤအရာကိုသိရှိသည့်တိုင် ကုချန်သည် ကုချင်းရွဲ့ပိုင်ဆိုင်သော ' ကံကောင်းခြင်းအဆောင် ' ကို ပို၍နက်နက်နဲနဲ စူးစမ်းရန် ရည်ရွယ်ချက်မရှိခဲ့ပေ။
သမိုင်းတစ်လျှောက်တွင် ပါရမီရှင်တေ၏ ထွန်းတောက်လာမှုသည် မရေမတွက်နိုင်သော အခွင့်အရေးများနှင့် ကံကောင်းမှုများ ပေါင်းစပ်ခြင်း၏ ရလဒ်မဟုတ်ခဲ့ပါသနည်း။
ပါရမီရှင်တိုင်းတွင် သူတို့၏လျှို့ဝှက်ချက်များ ရှိကြသည်။
ကုချင်းရွဲ့သည် သူ၏မျိုးဆက်ဖြစ်သည့်အလျောက် သူမတွင် အခွင့်အရေးများလေလေ သူမ၏စွမ်းအား ကြီးမားလေလေ ကုချန် ပို၍ပျော်ရွှင်လေလေ ဖြစ်ပေမည်။ ထိုအရာမှလွဲ၍ သူ့တွင် အခြားအတွေးများ မရှိချေ။
သို့သော်လည်း ကုချင်းရွဲ့၏ ဘိုးဘေကြီးတစ်ဦးအနေဖြင့် ယခု ကုချင်းရွဲ့ပိုင်ဆိုင်သော ဤ ' ကံကောင်းခြင်းအဆောင် ' ကို ရှာဖွေတွေ့ရှိပြီးနောက် ကုချန်သည် သူမအတွက် ဖြစ်လာနိုင်ခြေရှိသော လျှို့ဝှက်အန္တရာယ်များကို ဖယ်ရှားပေးလိုသည်မှာ သဘာဝကျပေသည်။
မည်သို့ပင်ဆိုစေကာမူ လက်စွပ်တစ်ခုအတွင်း ပုန်းခိုနေသော အစိတ်စိတ်အမြွှာမြွှာဖြစ်နေသည့် ဝိညာဉ်တစ်ခု၏အနှစ်သာရမှာ သာမန်ဧကရာဇ်အဆင့်ကိုပင် ကျော်လွန်နေဟန်တူသော ဝိညာဉ်တစ်ခုသည် ကောင်းသည်ဖြစ်စေ ဆိုးသည်ဖြစ်စေ အနာဂတ်တွင် ကုချင်းရွဲ့အား အန္တရာယ်ဖြစ်စေမည့် တစ်စုံတစ်ရာကို ပြုလုပ်မည်လားဆိုသည်ကို မည်သူကမျှ အာမမခံနိုင်ပေ။
" ကိုယ်ထင်ပြစမ်း "
ကုချန်၏မျက်လုံးများသည် အနည်းငယ် မှေးကျသွားပြီး ကုချင်းရွဲ့၏လက်ချောင်းပေါ်ရှိ သိုလှောင်လက်စွပ်ကို ကြည့်လိုက်စဉ် ကျယ်ပြန့်သောစွမ်းအားလှိုင်းတစ်ခု ဆင်းသက်လာကာ ကုချင်းရွဲ့၏လက်ချောင်းပေါ်ရှိ သိုလှောင်လက်စွပ်ကို လုံးဝဖုံးလွှမ်းသွားလေသည်။
" ဘုန်း --- "
ကုချန် လှုပ်ရှားလိုက်သည်နှင့် ကုချင်းရွဲ့၏လက်စွပ်အတွင်း ပုန်းခိုနေသော အကြွင်းအကျန်ဝိညာဉ်သည် သူဖော်ထုတ်ခံလိုက်ရကြောင်း သိရှိသွားဟန်တူသည်။ သိုလှောင်လက်စွပ်သည် ခပ်မှိန်မှိန်လင်းလက်လာပြီး လေဟာနယ်ထဲတွင် အရိပ်ပုံရိပ်တစ်ခုကို အမှန်တကယ်ပင် ပုံဖော်လိုက်လေသည်။
ထိုအရာသည် မသဲမကွဲဖြစ်နေသော အမျိုးသမီးပုံရိပ်တစ်ခုဖြစ်ပြီး လရောင်ကဲ့သို့ ဖြူစွတ်သော နန်းတွင်းဝတ်စုံကို ဝတ်ဆင်ထားကာ ကျစ်လျစ်၍ တင့်တယ်သော ကိုယ်ဟန်ရှိကာ လောကီအစာကို မမှီဝဲသော ကောင်းကင်နတ်သမီးတစ်ပါးကဲ့သို့ အတွင်းအလှနှင့် နူးညံ့သိမ်မွေ့သော ကိုယ်ငွေ့ကိုယ်ရှိန်တို့ရှိနေသည်။
" ရှောင်းယွဲ့နတ်သမီးမှ မဟာဧကရာဇ်အား ဂါရဝပြုပါတယ် "
မသဲမကွဲဖြစ်နေသော အမျိုးသမီးပုံရိပ် ပေါ်လာပြီးနောက် သူမသည် သူ၏မျက်လုံးများထဲမှ တုန်လှုပ်မှုကို လျင်မြန်စွာ ချိုးနှိမ်လိုက်ပြီးနောက် ကုချန်အား လှပကျော့ရှင်းစွာ ဦးညွှတ်လိုက်သည်။
" ဆရာသခင် ရှင်... "
သူ့ဘေးရှိ ကုချင်းရွဲ့သည် အလွန်အမင်း တုန်လှုပ်သွားခဲ့ပြီးဖြစ်သည်။
သူမသည် ဘိုးဘေးကြီးက သူမ၏အကြီးမားဆုံးသော လျှို့ဝှက်ချက်ကို တစ်ချက်ကြည့်ရုံဖြင့် သိမြင်သွားလိမ့်မည်ဟု မည်သည့်အခါကမျှ မမျှော်လင့်ထားခဲ့ပေ။
ဤရှေးဟောင်းသိုလှောင်လက်စွပ်သည် သူမအတိတ်က ခရီးသွားစဉ် မမျှော်လင့်ဘဲ ရရှိခဲ့သောအရာဖြစ်သည်။ နောက်ပိုင်းတွင် သူမသည် ဤလက်စွပ်အတွင်းမှ အမျိုးသမီးနတ်ဘုရားဝိညာဉ်၏ တပည့်တစ်ဦးဖြစ်လာခဲ့ပြီး ကျင့်ကြံခြင်းဆိုင်ရာ ညွှန်ပြမှုများစွာကို လက်ခံရရှိခဲ့ရာ သူမ၏ကျင့်ကြံမှုမှာ လျင်မြန်စွာတိုးတက်လာပြီး အရှေ့ဘက်တောင်တန်း တာအိုနယ်မြေရှိ မျိုးဆက်သစ်များကြားတွင် ကျော်ကြားလာခဲ့သည်။
ယခုမူ ဘိုးဘေးကြီးသည် သူမ၏ဆရာသခင်တည်ရှိမှုကို တစ်ချက်ကြည့်ရုံဖြင့် ရှာဖွေတွေ့ရှိခဲ့သည်။
ကုချင်းရွဲ့ကို ပို၍ပင် အံ့အားသင့်စေသောအရာမှာ သူမ၏ဆရာသခင်သည် လက်ရှိတွင် အကြွင်းအကျန်ဝိညာဉ်တစ်ခုသာဖြစ်ပြီး အတိတ်က မှတ်ဉာဏ်များစွာကို ဆုံးရှုံးထားသော်လည်း နှစ်ပေါင်းများစွာ စကားပြောဆိုမှုများမှတစ်ဆင့် ကုချင်းရွဲ့သည် သူမဆရာသခင်၏ဇာစ်မြစ်မှာ အလွန်လျှို့ဝှက်ဆန်းကြယ်ပြီး အံ့အားသင့်ဖွယ်ကောင်းကြောင်း မသဲမကွဲ ခွဲခြားသိမြင်နိုင်သည်။
အမှန်စင်စစ်တွင် သူမ၏ဆရာသခင်သည် အဆုံးမဲ့ကမ္ဘာမှ မဟုတ်နိုင်ခြေများရုံသာမက သူ၏အထွတ်အထိပ်အချိန်က စွမ်းအားသည် အဆုံးမဲ့ကမ္ဘာ၏ ဧကရာဇ်အဆင့်ကိုပင် ကျော်လွန်ခဲ့သည်။
အကြောင်းမှာ သူမ၏ဆရာသခင်သည် သူမနှင့်အတူရှိနေစဉ်ကတည်းက အဆုံးမဲ့ကမ္ဘာတွင် မည်သည့်ဧကရာဇ်အဆင့်ပုဂ္ဂိုလ်ကိုမျှ မမြင်ဖူးသော်လည်း အဆုံးမဲ့ကမ္ဘာရှိ ဧကရာဇ်အဆင့်ပုဂ္ဂိုလ်များအကြောင်း ပြောသည့်အခါ သူမ၏လေသံမှာ အတော်လေး မထီမဲ့မြင်ပြုဟန်ရှိပြီး သူတို့ကို အထင်သေးကြည့်နေသကဲ့သို့ပင်။
ယခုမူ သူမ၏ဆရာသခင်သည် ကိုယ်ထင်ပြပြီး ဘိုးဘေးကြီးအား ရိုသေစွာ ဂါရဝပြုနေသည်။ ဤသည်မှာ အဘယ်သို့သော အခြေအနေနည်း။
ကုချင်းရွဲ့သည် အနည်းငယ် စိတ်ရှုပ်ထွေးသွားသော်လည်း သူမ လျင်မြန်စွာ တုံ့ပြန်နိုင်ခဲ့ပြီး အလျင်အမြန် ရှင်းပြလိုက်သည်။
" ဘိုးဘေးကြီး အထင်မလွဲပါနဲ့ ဆရာသခင်က ကျွန်မအပေါ်မှာ မကောင်းတဲ့ရည်ရွယ်ချက် မရှိပါဘူး--- "
သို့သော် ကုချင်းရွဲ့ ရှင်းမပြမီမှာပင် ကုချန်က သူ၏လက်ကို ဝှေ့ယမ်းကာ ဖြတ်ပြောလိုက်သည်။
" မင်း ရှင်းပြစရာမလိုဘူး "
ကုချန်က ပြုံးလိုက်ပြီး ကုချင်းရွဲ့ကို တစ်ချက်ကြည့်လိုက်ကာ သူ၏အကြည့်ကို ရှောင်းယွဲ့နတ်သမီးထံသို့ လှည့်လိုက်သည်။
" ဒီဧကရာဇ်က ကုချင်းရွဲ့ ဒီသိုလှောင်လက်စွပ်ကို ဘယ်လိုရခဲ့လဲဆိုတာ သိဖို့ စိတ်မဝင်စားဘူး မင်းတို့နှစ်ယောက် ဘာသဘောတူညီမှု ရခဲ့လဲဆိုတာကိုလည်း စိတ်မဝင်စားဘူး "
" ဒီဧကရာဇ် ပြောချင်တာတစ်ခုပဲရှိတယ် မင်းက ကုချင်းရွဲ့နဲ့ တွယ်ကပ်နေမှတော့ သူမကို ကောင်းကောင်းသင်ကြားပေး အကယ်၍ မင်းက သစ္စာဖောက်ဖျက်လိုတဲ့စိတ် အနည်းငယ်လေးတောင် ထားရဲရင် ဒီဧကရာဇ်က မင်းတို့ကို ပေါ့ပေါ့တန်တန် ခွင့်လွှတ်မှာမဟုတ်ဘူး နားလည်ရဲ့လား "
ကုချန်၏အသံသည် အလွန်တည်ငြိမ်ပြီး ခြိမ်းခြောက်နေဟန်ပင် မရှိချေ။
သို့သော်လည်း ရှောင်းယွဲ့နတ်သမီး၏ အမူအရာမှာ မယုံနိုင်လောက်အောင် လေးနက်နေပြီး ကုချန်၏ဖိအားအောက်တွင် သူမသည် အကြိမ်ကြိမ် သဘောတူရုံသာ တတ်နိုင်တော့သည်။
ဤသည်ကိုမြင်လျှင် ကုချင်းရွဲ့သည်လည်း တိတ်ဆိတ်နေလိုက်သည်။
ဘိုးဘေးကြီးရှေ့တွင် ဤမျှနာခံနေရသော သူမ၏ဆရာသခင်အတွက် အနည်းငယ် စိတ်မကောင်းဖြစ်မိသော်လည်း သူမ၏နှလုံးသားထဲတွင် နွေးထွေးသော စီးကြောင်းတစ်ခု စီးဆင်းသွားလေသည်။
အကြောင်းမှာ ဘိုးဘေးကြီးသည် သူမအတွက် လျှို့ဝှက်အန္တရာယ်များကို ဖယ်ရှားပေးနေခြင်းဖြစ်ကြောင်း သူမသိသောကြောင့်ပင်။
မည်သို့ပင်ဆိုစေကာမူ အစွမ်းထက်သော ပညာရှင်တစ်ဦး၏ နတ်ဘုရားဝိညာဉ်ပါရှိသော ပစ္စည်းများကို ကံကောင်းစွာ ကောက်ရသူများသည် နောက်ဆုံးတွင် ပူးကပ်ခြင်းဖြင့် သိမ်းပိုက်ခံရပြီး ဝါးမျိုခံရသည့်ဥပမာများကို ကုချင်းရွဲ့ ကြားဖူးခဲ့သည်။
နှစ်ပေါင်းများစွာ အတူနေထိုင်ပြီးနောက် သူမသည် ရှောင်းယွဲ့နတ်သမီးမှာ ထိုသို့သောလူစားမျိုးမဟုတ်ဟု ခံစားရသော်လည်း ယနေ့ ဘိုးဘေးကြီး၏ဟန့်တားမှုဖြင့် သူတို့၏ဆရာတပည့်ဆက်ဆံရေးအတွက် နောက်ထပ် အာမခံချက်အလွှာတစ်ခု ထပ်တိုးလိုက်သည်မှာ သံသယဖြစ်ဖွယ်မရှိပေ။
" မင်းတို့ သွားလို့ရပြီ "
ပြောသင့်သည်များအားလုံး ပြောပြီးဖြစ်သည်ကို မြင်သောအခါ ကုချန်သည် နောက်ထပ်စကားများဆိုရန် ရည်ရွယ်ချက်မရှိတော့ချေ။
ရှောင်းယွဲ့နတ်သမီးသည် ကုချင်းရွဲ့အား အန္တရာယ်ဖြစ်စေမည့် မည်သည့်အရာကိုမျှ မပြုလုပ်သရွေ့ အဆင်ပြေသည်။ အခြားကိစ္စများအတွက်မူ ကုချန်သည် ဂရုစိုက်ရန်ပင် ပျင်းရိနေ၏။
……
" ဆရာသခင် ကျွန်မ… "
ပင်မခန်းမဆောင်မှ ထွက်ခွာပြီးနောက် ကုချင်းရွဲ့သည် သူမ၏လက်ချောင်းပေါ်ရှိ သိုလှောင်လက်စွပ်ကို ပွတ်သပ်ရင်း ရှင်းပြလိုစိတ် ဖြစ်လာသည်။
သူမသည် သူမဆရာသခင်၏ မာနကြီးမှုကြောင့် ယခု ဘိုးဘေးကြီး၏ ခြိမ်းခြောက်မှုကို ခံရပြီးနောက် အပေါ်ယံတွင် သဘောတူသည့်တိုင် နှလုံးသားထဲတွင် မကျေနပ်မှုများ ခံစားရမည်ကို စိုးရိမ်နေမိသည်။
" မင်း ဘာမှ ရှင်းပြစရာမလိုဘူး "
ရှေးဟောင်းသိုလှောင်လက်စွပ်သည် ခပ်မှိန်မှိန်လင်းလက်လာပြီး ရှောင်းယွဲ့နတ်သမီး၏ အနည်းငယ် စိတ်လှုပ်ရှားနေသော အသံသည် အတွင်းမှ ထွက်ပေါ်လာသည်။
" အကယ်၍ မင်းရဲ့အဆုံးမဲ့ကမ္ဘာက သာမန် ဧကရာဇ်အဆင့်လို့ခေါ်တဲ့သူတစ်ယောက်က ဒီနတ်သမီးကို အဲ့ဒီလို စကားပြောရဲရင် ဒီနတ်သမီးက သဘာဝကျကျ မကျေမနပ်ဖြစ်မိမှာပဲ ဒါပေမယ့် မင်းရဲ့ဘိုးဘေးကတော့... သူပြောတဲ့စကားတွေကို ဒီနတ်သမီးက နာခံစွာနားထောင်ရုံပဲတတ်နိုင်ပြီး မကျေနပ်မှု နည်းနည်းနည်းငယ်လေးတောင် မထားရဲဘူး "
" အာ ဒီ--- "
ရှောင်းယွဲ့နတ်သမီး၏ လျှို့ဝှက်မထားသော စကားများကို နားထောင်ရင်း ကုချင်းရွဲ့သည် ခဏတာ မှင်တက်သွားလေသည်။
သူမ၏ဆရာသခင်သည် အလွန်မာနကြီးပြီး အတိတ်က ဤအဆုံးမဲ့ကမ္ဘာရှိ ဧကရာဇ်အဆင့်ပုဂ္ဂိုလ်များအကြောင်း ပြောသည့်အခါတွင်ပင် သူ၏လေသံမှာ မထီမဲ့မြင်ပြုဟန်ရှိခဲ့သည်။
သို့သော် ယခုမူ သူမဆရာသခင်၏ ဘိုးဘေးကြီးအပေါ် အကဲဖြတ်မှုသည် အမှန်တကယ်ပင် ဤမျှ မြင့်မားနေပါသလော။