အခန်း (၈၉-၉၀)
Vol. 7 Ch. 89-90
အခန်း (၈၉) - ကောင်းကင်ဘုံအရှင်ကုထျန်းကျွင်း ၊ ထာဝရအသက်ရှင်ခြင်း၏ အခြားရွေးချယ်မှုနှင့် ဧကရာဇ်အဆင့်အား သုံးသပ်ခြင်း
ဧကရာဇ်မဟာမိတ်အဖွဲ့၏ များပြားလှသော ရှေးဟောင်းဧကရာဇ်များထဲတွင် အချို့မှာ အသက်ရှင်လျက် ရှိနေသေးသည်။
ယွမ်ကျွင်းမဟာဧကရာဇ်၏ ရှင်းပြချက်ကို ကြားလိုက်ရသောအခါ ခရမ်းရောင်ဝတ်ရုံဝတ်မဟာဧကရီနှင့် နဂါးရင်းမြစ်မဟာဧကရာဇ် နှစ်ဦးစလုံးသည် အံ့အားသင့်မှုများဖြင့် ပြည့်နှက်သွားခဲ့သည်။
သူတို့သည်လည်း ဧကရာဇ်မဟာမိတ်အဖွဲ့အတွင်းမှ ဧကရာဇ်များ ဖြစ်ကြသော်လည်း ဤကဲ့သို့သော လျှို့ဝှက်ချက်မျိုးကို ပထမဆုံးအကြိမ် ကြားသိရခြင်းပင် ဖြစ်၏။
" ဧကရာဇ်မဟာမိတ်အဖွဲ့က ရှေးဟောင်းဧကရာဇ်တွေ အသက်ရှင်နေတုန်း ရှိသေးတာလား... တာအိုရောင်းရင်းယွမ်ကျွင်း ဆိုလိုတာက... ငါတို့ ဧကရာဇ်မဟာမိတ်အဖွဲ့ရဲ့ ရှေးဟောင်းဧကရာဇ်တချို့က သူတို့ရဲ့တိုက်ခိုက်ရေးစွမ်းအားကို ဖိနှိပ်ပြီး ရှင်သန်ခြင်းတားမြစ်နယ်မြေထဲမှာ အိပ်စက်နေကြတယ်လို့ ပြောတာလား... ဒါပေမဲ့ အဲ့ဒီတားမြစ်နယ်မြေအရှင်သခင်တွေတောင်မှ ဟို ကုမိသားစု မဟာဧကရာဇ်ကို ယှဉ်နိုင်မှာ မဟုတ်ဘူးလေ! "
နဂါးရင်းမြစ်မဟာဧကရာဇ်သည် အနည်းငယ် စိတ်ရှုပ်ထွေးကာ နားမလည်နိုင် ဖြစ်သွားခဲ့၏။
ဤကမ္ဘာလောကတွင် ခေတ်ကာလများတစ်လျှောက် ရှားပါးစွာ အသက်ရှင်သန်နိုင်သော ရှေးဟောင်းဧကရာဇ်များမှာ ထိုရှေးဟောင်း တားမြစ်နယ်မြေအရှင်သခင်များသာ ဖြစ်သင့်သည်။
သို့သော် သူတို့ကဲ့သို့သော မျက်မှောက်ခေတ် ဧကရာဇ်များပင် ထို ကုမိသားစု မဟာဧကရာဇ်အား ယှဉ်နိုင်စွမ်းမရှိလျှင် တားမြစ်နယ်မြေအရှင်သခင်များက မည်သို့ဖြစ်မည်နည်း။ ကောင်းကင်မြှုပ်နှံရှေးဟောင်းဧကရာဇ်၏ ကံကြမ္မာသည် အကောင်းဆုံး ဥပမာဖြစ်၏။
မျှော်လင့်မထားဘဲ... နဂါးရင်းမြစ်မဟာဧကရာဇ် စကားအဆုံးတွင် ယွမ်ကျွင်းမဟာဧကရာဇ်က ဖြည်းညင်းစွာ ခေါင်းခါလိုက်ပြီး ပြောလေသည်။
" ငါပြောတဲ့ ဧကရာဇ်မဟာမိတ်အဖွဲ့ရဲ့ ရှေးဟောင်းဧကရာဇ်တွေက လက်ရှိမှာ ရှင်သန်ခြင်းတားမြစ်နယ်မြေတွေထဲမှာ ရှိမနေဘူး "
ရှင်သန်ခြင်းတားမြစ်နယ်မြေထဲမှာ ရှိမနေဘူးလား... ဒါက ဘာအဓိပ္ပာယ်လဲ။
နဂါးရင်းမြစ်မဟာဧကရာဇ်သည် တုန်လှုပ်သွားပြီး ဖြစ်နိုင်ခြေတစ်ခုအား တွေးတောမိဟန်ရှိ၏။
ယွမ်ကျွင်းမဟာဧကရာဇ် ပြောဆိုခဲ့သော ဧကရာဇ်မဟာမိတ်အဖွဲ့၏ ရှေးဟောင်းဧကရာဇ်များသည် ဧကရာဇ်အဆင့်အား ဖောက်ထွက်ပြီး သက်တမ်းကန့်သတ်ချက်များမှ လွတ်မြောက်ကာ လူ့လောကတွင် ထာဝရအသက်ရှင်ခြင်းကို ရရှိသွားခဲ့ကြပြီလော.....!
နဂါးရင်းမြစ်မဟာဧကရာဇ်က ဆက်လက်မေးမြန်းရန် ပြင်လိုက်စဉ်မှာပင် ယွမ်ကျွင်းမဟာဧကရာဇ်၏ လက်ဝှေ့ယမ်းတားဆီးခြင်းကို ခံလိုက်ရသည်။
" အချိန်တန်တဲ့အခါ မင်းတို့အားလုံး အရာရာကို အလိုလို သိလာကြလိမ့်မယ်။ အခု ငါက ကုချန်ကို နောက်ပိုင်း ရင်ဆိုင်ဖို့အတွက် ပြင်ဆင်မှုတစ်ချို့ အရင်လုပ်ရဦးမယ်။ မင်းတို့မှာ တခြားကိစ္စမရှိဘူးဆိုရင် လောလောဆယ် လူခွဲလိုက်လို့ရပြီ "
ယွမ်ကျွင်းမဟာဧကရာဇ်သည် စကားပြောပြီးသည်နှင့် သူ၏ခန္ဓာပုံသဏ္ဍာန်အား လျင်မြန်စွာ ပျောက်ကွယ်စေလိုက်၏။
ဤသည်ကို မြင်သောအခါ နဂါးရင်းမြစ်မဟာဧကရာဇ်၊ ခရမ်းရောင်ဝတ်ရုံဝတ်မဟာဧကရီနှင့် အခြားသူများသည်လည်း တစ်ဦးပြီးတစ်ဦး ထွက်ခွာသွားကြပြီး ယွမ်ကျွင်းမဟာဧကရာဇ်၏ နောက်တစ်ကြိမ် ဆင့်ခေါ်မှုကို စောင့်ဆိုင်းနေရုံသာ ရှိတော့သည်။
....................
အဆုံးမဲ့ကမ္ဘာ၏ အပြင်ဘက် အဆုံးမဲ့ ဟွမ်သွမ့်ပင်လယ်အတွင်း၌.....
သံချေးတက်နေသော ရှေးဟောင်းကြေးသင်္ဘောတစ်စီးပေါ်တွင်... တာအိုဝတ်ရုံ ဝတ်ဆင်ထားသော ယွမ်ကျွင်းမဟာဧကရာဇ်သည် မျက်လုံးများ ဖွင့်လိုက်ကာ... သူ၏မျက်ဝန်းများထဲ၌ လေးနက်သော အမူအရာတစ်ခု ပေါ်လာခဲ့သည်။
" ကုချန်... မင်းဘာလို့ အသက်ရှင်နေသေးရတာလဲ... ပြီးတော့ မင်းရဲ့အစွမ်းက ဘာလို့ ဒီလောက်တောင် ကြောက်စရာကောင်းနေရသေးတာလဲ...? "
ယွမ်ကျွင်းမဟာဧကရာဇ်သည် တီးတိုးရေရွတ်လိုက်ပြီး... သူ၏စကားလုံးများထဲတွင် မပြေပျောက်နိုင်သော အမုန်းတရားများ ပါဝင်နေခဲ့၏။
အချိန်မည်မျှ ကြာမြင့်သွားသည်မသိ... ကြေးသင်္ဘောသည်တော့ ဖြည်းညင်းစွာ ရပ်တန့်သွားခဲ့၏။
ယွမ်ကျွင်းမဟာဧကရာဇ်၏ မျက်စိထဲသို့ ဝင်ရောက်လာသည်မှာ ခမ်းနားထည်ဝါလှသော မြင်ကွင်းကြီးတစ်ခုပင် ဖြစ်သည်။
အဆုံးမဲ့ဟွမ်သွမ့်ပင်လယ်၏ နက်ရှိုင်းရာတစ်နေရာတွင် အဆုံးမရှိသော ကောင်းကင်မြစ်ကြီးတစ်စင်း ပြိုကျလာသကဲ့သို့ ဟွမ်သွမ့်ကောင်းကင်ရေကန်ကြီးတစ်ခု ဖြစ်ပေါ်နေ၏။
မျက်စိကျိန်းဖွယ် အဖြူရောင် အင်မော်တယ်အလင်းတန်းများသည် ကျယ်ပြောလှသည့် အမည်မသိနေရာတစ်ခုမှ ကျဆင်းလာပြီး ဟွမ်သွမ့်ကောင်းကင်ရေကန်ထဲတွင် ပေါက်ကွဲနေကြ၏။
ယွမ်ကျွင်းမဟာဧကရာဇ်သည် မျက်စိကျိန်းလောက်အောင် ထွန်းလင်းတောက်ပနေသော အင်မော်တယ်အလင်းတန်းများကို မော့ကြည့်လိုက်ရာ သူ၏မျက်ဝန်းများထဲတွင် နက်ရှိုင်းသော တောင့်တမှုတစ်ခု ထင်ဟပ်လာခဲ့၏။
ထိုအခိုက်အတန့်မှာပင်... မရေမတွက်နိုင်သော ဟွမ်သွမ့်ချီ စီးကြောင်းများသည် ယွမ်ကျွင်းမဟာဧကရာဇ်၏ ရှေ့မှောက်တွင် ရုတ်တရက် ယှက်နွယ်စုစည်းသွားပြီး ရှေးဟောင်းတာအိုဝတ်ရုံ ဝတ်ဆင်ထားသည့် ဝေဝါးသော ပုံရိပ်တစ်ခုအဖြစ် ပေါ်လာ၏။ မျက်လုံးတစ်စုံကိုသာ ဖော်ပြထားပြီး... ထိုအကြည့်မှာ ခံစားချက်ကင်းမဲ့လျက်... အေးစက်စွာဖြင့် ယွမ်ကျွင်းမဟာဧကရာဇ်အား ငုံ့ကြည့်နေလေသည်။
" ကောင်းကင်ဘုံအရှင်ထျန်းကျွင်းကို ဂါရဝပြုပါတယ် "
မိမိရှေ့မှ ဟွမ်သွမ့်ပုံရိပ်အား မြင်လိုက်ရသောအခါ... ယွမ်ကျွင်းမဟာဧကရာဇ်သည် လျင်မြန်စွာပင် ဂါရဝပြု ဦးညွှတ်လိုက်၏။
အကယ်၍... နဂါးရင်းမြစ်မဟာဧကရာဇ်နှင့် အခြားသူများသာ ဤမြင်ကွင်းကို မြင်တွေ့လိုက်ရပါက... သူတို့သည် မလွဲမသွေ အံ့အားသင့်သွားကြမည် ဖြစ်၏။
အကြောင်းမှာ... ဧကရာဇ်မဟာမိတ်အဖွဲ့၏ ဧကရာဇ်များထဲတွင် ယွမ်ကျွင်းမဟာဧကရာဇ်သည် တာအိုကို ရရှိခဲ့သည်မှာ အချိန်အကြာဆုံးဖြစ်ရုံသာမက... အစွမ်းခွန်အား၌လည်း အနက်ရှိုင်းဆုံးဖြစ်သောကြောင့်ပင်ဖြစ်၏။
ပုံမှန်အားဖြင့် နဂါးရင်းမြစ်အရှင် ၊ ခရမ်းရောင်ဧကရီနှင့် အခြားသူများသာ ယွမ်ကျွင်းမဟာဧကရာဇ်အား လေးစားရိုသေစွာ ဆက်ဆံကြရသည်။
ယွမ်ကျွင်းမဟာဧကရာဇ်က အခြားမည်သူ့ကိုမဆို ဤသို့ လေးလေးစားစား ဦးညွှတ်သည်ကို သူတို့ မည်သည့်အခါက မြင်ဖူးခဲ့ကြမည်မဟုတ်ပေ။
" ဘာကိစ္စရှိလို့လဲ "
ကောင်းကင်ဘုံအရှင်ထျန်းကျွင်းဟု ခေါ်တွင်သော ပုဂ္ဂိုလ်က ခံစားချက်ကင်းမဲ့သော အကြည့်ဖြင့်ကြည့်လျက် မေးမြန်းလိုက်၏။
" ကောင်းကင်ဘုံအရှင်ကို သတင်းပို့စရာ ရှိပါတယ်... အဆုံးမဲ့ကမ္ဘာအတွင်းမှာ ကျွန်တော်မျိုးရဲ့ ထိန်းချုပ်နိုင်စွမ်းထက် အနည်းငယ် ကျော်လွန်သွားတဲ့ ကိစ္စတစ်ခု ဖြစ်ပွားခဲ့ပါတယ်..... "
ယွမ်ကျွင်းမဟာဧကရာဇ်သည် သွားကြိတ်လိုက်ပြီး ကုချန်၏ ဇာတ်လမ်းမှ အစိတ်အပိုင်းအချို့ကို ရွေးချယ်ကာ ပြန်လည်ပြောပြလိုက်သည်။
" ကျွန်တော်မျိုး ဒီတစ်ခေါက် လာခဲ့တာက ကောင်းကင်ဘုံအရှင်ဆီကနေ သက်ရှည်အမိန့်ပြန်တမ်းတစ်ခု လာတောင်းတာပါ... ဒါမှ ကုချန်ကို နောက်ပိုင်း ရင်ဆိုင်တဲ့အခါ အရာအားလုံး အမှားအယွင်းမရှိ သေချာမှာ ဖြစ်ပါတယ် "
" ကုချန်..... "
ယွမ်ကျွင်းမဟာဧကရာဇ်က ကုချန်၏အမည်ကို ဖော်ပြလိုက်သောအခါ ကောင်းကင်ဘုံအရှင်ထျန်းကျွင်း၏ အကြည့်မှာ အနည်းငယ် တုန်ခါသွားပြီး ယွမ်ကျွင်းမဟာဧကရာဇ်အား ကြည့်သော သူ၏မျက်ဝန်းများထဲတွင် မကျေနပ်မှု အရိပ်အယောင်တစ်ခု ရှိလာခဲ့၏။
" ငါ မှတ်မိသလောက်တော့... လွန်ခဲ့တဲ့ နှစ်ကိုးသောင်းက သက်ရှည်ကိုယ်စားလှယ်လောင်းက ဒီ ကုချန်ပဲ မဟုတ်လား.....
နောက်ပိုင်း ကုချန်က ထူးထူးဆန်းဆန်းနဲ့ ပေါ်ပေါ်ထင်ထင် ပြုမူတာတွေကြောင့် ခန်းမထဲက ကောင်းကင်ဘုံအရှင် အတော်များများရဲ့ မကျေနပ်မှုကို ဖြစ်စေခဲ့တယ်... ပြီးတော့ ငါကလဲ ပြင်းပြင်းထန်ထန် ထောက်ခံတာနဲ့ ပေါင်းပြီး သက်ရှည်ကိုယ်စားလှယ်လောင်း နေရာကို မင်းဆီ လွှဲပြောင်းပေးခဲ့တာ.....
အခု နှစ်ကိုးသောင်း ကြာသွားပြီ... ဒါပေမဲ့ မင်းက ငါ့ကို ကုချန် အသက်ရှင်နေတုန်းဆိုတာတင်မကဘူး... မင်းတောင်မှ သူ့ကို ရင်ဆိုင်ဖို့ နည်းလမ်းမရှိဘူးလို့ ပြောနေတာလား "
ကောင်းကင်ဘုံအရှင်ထျန်းကျွင်း၏ စကားများမှာ တည်ငြိမ်နေသော်လည်း... စကားလုံးတိုင်းသည် ယွမ်ကျွင်းမဟာဧကရာဇ်၏ နှလုံးသားအား တူကြီးတစ်လက်ဖြင့် ထုနှက်လိုက်သကဲ့သို့ ဖြစ်နေပြီး... သူ၏နဖူးပြင်တွင် ချွေးစေးများ အလိုအလျောက် ထွက်လာစေခဲ့၏။
" ဒီနှစ်ကိုးသောင်းအတွင်း ကုချန် ဘာတွေကြုံတွေ့ခဲ့လဲ ကျွန်တော်မျိုးလည်း မသိပါဘူး... ဒါပေမဲ့ သူ့ရဲ့ လက်ရှိ တိုက်ခိုက်ရေးစွမ်းအားက တကယ်ကို ကြောက်စရာကောင်းလောက်အောင် ဆိုးရွားနေပါတယ်။ ကျွန်တော်မျိုး စိုးရိမ်တာက... ဒီလူရဲ့ တည်ရှိမှုက ကောင်းကင်ဘုံအရှင်တွေရဲ့ အစီအစဉ်တွေကို အပြောင်းအလဲဖြစ်အောင် နှောင့်ယှက်နိုင်တဲ့အရာတစ်ခု ဖြစ်လာမှာကိုပါပဲ... အဲ့ဒါကြောင့် သူ့ကို အမြန်ဆုံး ရှင်းပစ်ချင်ခဲ့တာပါ..... "
ယွမ်ကျွင်းမဟာဧကရာဇ်မှ လေးနက်စွာ ရှင်းပြလေ၏
" ဟက်... မင်းက သူ မင်းရဲ့ သက်ရှည်ကိုယ်စားလှယ်လောင်း နေရာကို လုယူသွားမှာ ကြောက်နေတာ မဟုတ်လား "
ကောင်းကင်ဘုံအရှင်ထျန်းကျွင်းသည် ယွမ်ကျွင်းမဟာဧကရာဇ်၏ ရှင်းပြချက်ကို လုံးဝ နားမထောင်ဘဲ သူ့အား အဓိပ္ပာယ်ပါသော အကြည့်တစ်ခုဖြင့်သာ ကြည့်လိုက်လေ၏။
" ငါ မင်းကို သက်ရှည်အမိန့်ပြန်တမ်း ပေးလိုက်လို့ရတယ်.....
ဒါပေမဲ့... ကုချန်ရဲ့ ကိစ္စကို ဖြေရှင်းပြီးတဲ့နောက်မှာတော့... အဓိကလုပ်ငန်းကို ကြန့်ကြာအောင် မလုပ်လိုက်မိစေနဲ့ "
အဓိကလုပ်ငန်းလော.....
ယွမ်ကျွင်းမဟာဧကရာဇ်သည် တုန်လှုပ်သွားပြီးနောက်... ကောင်းကင်ဘုံအရှင်ထျန်းကျွင်း၏ 'အဓိကလုပ်ငန်း' ဆိုသည်မှာ ဘယ်အရာကို ရည်ညွှန်းကြောင်း သိရှိသွားဟန်ရကာ လျင်မြန်စွာ မေးမြန်းလိုက်၏။
" ကောင်းကင်ဘုံအရှင် ဆိုလိုတာက ဒီတစ်ခေါက်... အချိန်စောလိုက်မှာလား "
" အင်း "
မေ့ကူကောင်းကင်ဘုံအရှင်သည် ခေါင်းအနည်းငယ် ညိတ်လိုက်ပြီး တည်ငြိမ်စွာ ညွှန်ကြားလိုက်၏။
" စည်းမျဉ်းအဟောင်းအတိုင်းပဲ... အသေးစိတ်ကျတဲ့ ကိစ္စတွေကိုတော့ မင်းကိုပဲ ကိုင်တွယ်ဖို့ ထားခဲ့မယ်။ မင်းသာ ဒီကိစ္စကို လှလှပပ ကိုင်တွယ်နိုင်ခဲ့ရင်... အဲ့ဒီအချိန်ကျ မင်း အဆင့်တက်နိုင်တာမျိုး မရှိသေးရင်တောင်မှ... ငါက ဒီအောင်မြင်မှုအပေါ် အခြေခံပြီး မင်းကို ပြင်းပြင်းထန်ထန် ထောက်ခံပေးနိုင်တယ်... မင်းရဲ့ဘွဲ့နာမည်ကနေ 'ကိုယ်စားလှယ်လောင်း' ဆိုတာကို ဖယ်ရှားဖို့ ကြိုးစားပြီး... မင်းကို သက်ရှည်အဖွဲ့ဝင်တွေရဲ့ အဆင့်ထဲ မြန်မြန်ဆန်ဆန် ဝင်ရောက်နိုင်အောင် လုပ်ပေးမယ် "
သက်ရှည်အဖွဲ့ဝင်များ၏ အဆင့်သို့ ဝင်ရောက်ခြင်းလား!
ကောင်းကင်ဘုံအရှင်ထျန်းကျွင်း၏ စကားများသည် ယွမ်ကျွင်းမဟာဧကရာဇ်၏ မျက်ဝန်းများကို ထက်သန်မှုဖြင့် တောက်လောင်စေခဲ့ပြီး... သူ၏အကြည့်ထဲတွင် နက်ရှိုင်းသော တောင့်တမှုတစ်ခု ပေါ်လာခဲ့၏။
" ကောင်းပြီ... မင်း သွားပြီး မြန်မြန် ပြင်ဆင်လိုက်တော့။ ငါက ကုချန်ရဲ့ကိစ္စကို ဖြေရှင်းဖို့... မင်းအတွက် သက်ရှည်အမိန့်ပြန်တမ်းကို သွားယူလိုက်မယ် "
ကောင်းကင်ဘုံအရှင်ထျန်းကျွင်းသည် ညွှန်ကြားချက်တစ်ခု ပေးလိုက်ပြီး... ဟွမ်သွမ့်ချီ စီးကြောင်းများမှ ဖွဲ့စည်းထားသော ပုံရိပ်သည်လည်း တဂျိမ်းဂျိမ်းမြည်သံနှင့်အတူ ပျောက်ကွယ်သွားခဲ့တော့သည်.....
ယွမ်ကျွင်းမဟာဧကရာဇ် တစ်ဦးတည်းသာ နေရာတွင် ရပ်လျက် ကျန်ရစ်ခဲ့ပြီး... အချိန်အတော်ကြာ အတွေးထဲ နစ်မြုပ်နေကာ တစ်စုံတစ်ခုကို တွေးတောနေဟန်တူ၏.....
....................
အထက်ကောင်းကင်တားမြစ်နယ်မြေ.....
ရှေးဟောင်းခန်းမအတွင်း၌ ကုချန်သည် လျှို့ဝှက်ဆန်းကြယ်သော ခေါင်းတလားအဖုံးပေါ်တွင် တင်ပျဉ်ခွေထိုင်လျက် သူ၏မျက်လုံးများကို အနည်းငယ် မှိတ်ထားကာ ကျင့်ကြံနေဟန်တူသည်။
ခေါင်းတလားအဖုံးပေါ်တွင် ထွင်းထုထားသော အင်မော်တယ် တာအိုအစီအရင်စာလုံးများသည်လည်း ဤအခိုက်အတန့်တွင် မှိန်မှိန်လေး လင်းလက်နေကာ ကုချန်အား လွှမ်းခြုံထားလေသည်။
အချိန်မည်မျှ ကြာမြင့်သွားသည်မသိ... ကုချန်သည် ရုတ်တရက် မျက်လုံးများ ဖွင့်လိုက်ပြီး... သူ၏အောက်ရှိ ခေါင်းတလားအဖုံးကို ကြည့်လိုက်ရာ... သူ၏အကြည့်ထဲတွင် တုန်လှုပ်မှု အရိပ်အယောင်တစ်ခု ဖြတ်ပြေးသွားခဲ့သည်။
" ဒီအင်မော်တယ်တာအို အစီအရင်စာလုံးတွေနဲ့ တည်ဆောက်ထားတဲ့ နယ်ပယ်ထဲမှာ... အမြင့်မြတ်ဆုံး သိုင်းပညာရဲ့ တာအိုသဲလွန်စတွေတင်မကဘဲ... တန်ဖိုးကြီးမားလှတဲ့ ကျင့်ကြံခြင်းဆိုင်ရာ သတင်းအချက်အလက်တွေ အများကြီး ရှိနေလိမ့်မယ်လို့ ငါမထင်ထားခဲ့ဘူး..... "
ကုချန်သည် တီးတိုးရေရွတ်လိုက်၏။
လွန်ခဲ့သော ခဏအတွင်း၌ သူသည် အင်မော်တယ်တာအို အစီအရင်စာလုံးများ၏ အကြောင်းအရာ တစ်စိတ်တစ်ပိုင်းအား အဓိပ္ပာယ်ဖော်နိုင်ခဲ့ပြီး... ယင်းမှတစ်ဆင့် ဧကရာဇ်အဆင့် ကျင့်ကြံခြင်း၏ ပိုင်းခြားမှုများနှင့် သက်ဆိုင်သော လျှို့ဝှက်ချက်များအားလုံးကို မြင်တွေ့ခဲ့ရခြင်း ဖြစ်၏...!
ဤသည်မှာ သူ၏လက်ရှိအဆင့်နှင့် ခွန်အားကို ရှင်းရှင်းလင်းလင်းနှင့် နက်နက်နဲနဲ နားလည်သဘောပေါက်သွားသော ပထမဆုံးအကြိမ်လည်း ဖြစ်လေသည်.....
အခန်း (၉၀) - ဧကရာဇ်၏ ဒဏ္ဍာရီ၊ ရှင်သန်ဖွံ့ဖြိုးတိုးတက်ခြင်းနှင့် အတူတကွ လျှောက်လှမ်းနေသော အမျိုးသမီးနှစ်ဦး
" ဒါဆို ဒါက... ဧကရာဇ်အဆင့်အထွတ်အထိပ်ရဲ့ စစ်မှန်တဲ့ စွမ်းအားပဲ " ကုချန်သည် အမှန်ပင် နားလည်သဘောပေါက်သွားသော အမူအရာဖြင့် ညင်သာစွာ ရေရွတ်လိုက်၏။
ဤအခိုက်အတန့်၌သာလျှင် သူသည် ခေါင်းတလားအဖုံးပေါ်တွင် ထွင်းထုထားသော အင်မော်တယ် အစီအရင်စာလုံးများမှတစ်ဆင့် ဧကရာဇ်အဆင့်၏ တိကျသော ပိုင်းခြားမှုများကို စစ်မှန်စွာ နားလည်သဘောပေါက်သွားခဲ့တော့၏...!
အင်မော်တယ်အစီအရင်စာလုံးများရှိ မှတ်တမ်းများအရ... ယနေ့ အဆုံးမဲ့ကမ္ဘာရှိ ဧကရာဇ်အဆင့်ဟု ခေါ်တွင်ကြသော တည်ရှိမှုများသည် တုယောင်ဧကရာဇ်များသာလျှင် ဖြစ်ကြ၏။ သူတို့၏ စစ်မှန်သော အဆင့်မှာ အရှင်သခင်အဆင့်သာ ဖြစ်သင့်သည်။
အတိတ်ကာလ၌ဖြစ်စေ... ပစ္စုပ္ပန်ကာလ၌ဖြစ်စေ... အဆုံးမဲ့ကမ္ဘာတွင် မွေးဖွားခဲ့သော ဧကရာဇ်အဆင့်ပုဂ္ဂိုလ် အများစုသည် အရှင်သခင်နယ်ပယ်အတွင်း၌သာ ရှိနေခဲ့ကြသည်။
ထို့ပြင် အရှင်သခင်နယ်ပယ်အား ကျော်လွန်၍ ဖောက်ထွက်နိုင်ခဲ့လျှင် ထိုသူအား ကောင်းကင်ဘုံအရှင်ဟု ခေါ်ဆိုနိုင်ပေ၏...!
အရှင်သခင်တစ်ဦး၏ သက်တမ်းမှာ နှစ်သုံးသောင်းမှ ငါးသောင်းအထိသာ ဖြစ်သည်။ ကောင်းကင်ဘုံအရှင်တစ်ဦး၏ သက်တမ်းမှာမူ နှစ်တစ်သိန်း ဖြစ်၏...!
ကုချန်သည် ဧကရာဇ်ဂိတ်အား နှစ်ကိုးသောင်းကြာတိုင် မသေဆုံးဘဲ စောင့်ကြပ်နိုင်ခဲ့ခြင်း အကြောင်းရင်းမှာ... ဧကရာဇ်ဂိတ်အား စောင့်ကြပ်နေစဉ်ကာလအတွင်း သူ၏အဆင့်သည် အရှင်သခင်အဆင့်မှ ဒဏ္ဍာရီလာ ကောင်းကင်ဘုံအရှင်နယ်ပယ်သို့ တိတ်တဆိတ် ဖောက်ထွက်သွားခဲ့သောကြောင့်ဖြစ်ပြီး... ဤသည်ကပင် သူ့အား ယခုအချိန်အထိ အသက်ရှင်နေစေခဲ့ခြင်း ဖြစ်သည်။
ကောင်းကင်ဘုံအရှင်အဆင့်အား ဖောက်ထွက်ခြင်းသည် ဒဏ္ဍာရီလာ အင်မော်တယ်နယ်ပယ်သို့ ပို့ဆောင်ပေးခြင်းဖြစ်ပြီး... ထိုနေရာတွင် လူတစ်ဦး၏ သက်တမ်းသည် ကောင်းကင်နှင့်အမျှ ရှည်ကြာသည်ဟု ဆို၏။ သို့သော် မည်သို့ဖောက်ထွက်ရမည်ဆိုသည့် အချက်အား အင်မော်တယ် အစီအရင်စာလုံးများတွင် မှတ်တမ်းတင်ထားခြင်းကို မတွေ့ခဲ့သည်ကြောင့်... ကုချန်သည် ခေါင်းတလားအဖုံးပေါ်ရှိ အင်မော်တယ်အစီအရင်စာလုံးများအပေါ် သူ၏အဓိပ္ပာယ်ဖော်မှုမှာ ပြည့်စုံမှုမရှိသေးသောကြောင့် ရှာဖွေမတွေ့ရှိသေးခြင်း ဖြစ်မည်ဟု သံသယရှိနေခဲ့၏။
ထို့အပြင် ခေါင်းတလားအဖုံးပေါ်ရှိ မှတ်တမ်းများအရ... ကောင်းကင်ဘုံအရှင်အဆင့်၏ ကန့်သတ်ချက်များကို ချိုးဖျက်နိုင်သော်လည်း... အင်မော်တယ်တက်လှမ်းခြင်းသို့ မရောက်ရှိသေးသူများသည် ဒဏ္ဍာရီလာ 'ဧကရာဇ်' များ ဖြစ်ကြ၏။
ဧကရာဇ်တစ်ဦးအနေဖြင့် ကောင်းကင်နှင့် မြေကြီးထံမှ သက်ရှည်အရာဝတ္ထုများကို သိမ်မွေ့စွာ ပေါင်းစပ်ဖွဲ့စည်းနိုင်ပြီး... သက်တမ်း၏ ချည်နှောင်မှု သံကြိုးများအား ချိုးဖျက်ကာ ထာဝရတည်ရှိနိုင်သော ဘဝမျိုးကို ရရှိနိုင်ပေသည်...!
'ဧကရာဇ်' ဟူသော စကားလုံးသည် ဒဏ္ဍာရီတစ်ခုဖြစ်သလို ဂုဏ်ကျက်သရေတစ်ခုလည်း ဖြစ်သည်။ ကျယ်ပြောလှသော အင်မော်တယ်နယ်ပယ်၌ပင် ဧကရာဇ်အဆင့်သို့ ရောက်ရှိနိုင်သူ များများစားစား မရှိဟု ဆိုကြသည်။
ဧကရာဇ်တစ်ဦးသည် အင်မော်တယ်တစ်ဦး မဟုတ်သေးသော်ငြား စစ်မှန်သော အင်မော်တယ်တစ်ဦးနှင့် အပြိုင် ယှဉ်ပြိုင်တိုက်ခိုက်နိုင်သည်! အချို့သည် အင်မော်တယ်များကိုပင် ကျော်လွန်နိုင်ပြီး အင်မော်တယ်အားလုံးအပေါ် အထက်စီးမှ ကြည့်ရှုနိုင်ကြသည်!
ခေါင်းတလားအဖုံးပေါ်တွင် စစ်မှန်သော ဧကရာဇ်အဆင့်အကြောင်း များစွာ ဖော်ပြထားခြင်း မရှိခဲ့ပေ။ ဧကရာဇ်အဆင့်သည် လွန်စွာ အစွမ်းထက်ပြီး မကြုံဖူးသော အဆုံးစွန်အဆင့်တစ်ခုဖြစ်ကြောင်းနှင့် ဧကရာဇ်အဆင့်မှ အင်မော်တယ်နယ်ပယ်သို့ တက်လှမ်းသူများ၏ အနာဂတ်အောင်မြင်မှုများသည် တိုင်းတာ၍မရနိုင်ကြောင်းကိုသာ ဝေဝေဝါးဝါး ဖော်ပြထားခဲ့သည်။
သို့သော် ဧကရာဇ်အဆင့်၏ အထက်စီးဆန်သော သဘာဝကြောင့် ကောင်းကင်နှင့် မြေကြီးတစ်ခုတည်း၏ အဆုံးမဲ့တာအိုများသည် ဧကရာဇ်တစ်ဦးတည်းကိုသာ မွေးဖွားခွင့်ပြု၏။
ဥပမာအားဖြင့်... ကုချန် နေထိုင်ရာ အဆုံးမဲ့ကမ္ဘာတွင် ယခု သူသည် ဧကရာဇ်အဆင့်အထွတ်အထိပ်၌ ရှိနေပြီဖြစ်ရာ သူသာ ပျက်စီးမသွားပါက အဆုံးမဲ့ကမ္ဘာတွင် ဒုတိယမြောက် ဧကရာဇ်တစ်ဦး မွေးဖွားလာရန် မဖြစ်နိုင်တော့ပေ။
သူအသက်ရှင်လျှင် အခြားသူများ သေဆုံးရမည်။ သူသေဆုံးမှသာ အခြားသူများ အသက်ရှင်နိုင်မည်။ ဧကရာဇ်နှစ်ဦးသည် ဆုံတွေ့ကြမည် မဟုတ်ချေ! ဤသည်ပင် စစ်မှန်သော ဧကရာဇ်အဆင့် ဖြစ်သည်!
" ဒီ အဆုံးမဲ့ကမ္ဘာထဲက ဧကရာဇ်အဆင့်လို့ခေါ်တာတွေက ဘယ်နေရာက ကြားလာမှန်းမသိတဲ့ 'ဧကရာဇ်' ဆိုတဲ့ စကားလုံးကို သူတို့ဘာသာသူတို့ ပေးအပ်ထားကြတဲ့ ဘွဲ့နာမည်တစ်ခုသက်သက်ပဲ ဖြစ်ရမယ် " ကုချန်က အမှန်ကိုသိသွားကာ ရယ်မောလိုက်၏။
အဆုံးမဲ့ကမ္ဘာရှိ ဧကရာဇ်အဆင့် ကျင့်ကြံသူအားလုံးသည် တုယောင်ဧကရာဇ်များသာ ဖြစ်နေခဲ့ကြသည်တည်း.....
ရှင်သန်ခြင်းတားမြစ်နယ်မြေများတွင် ရှင်သန်ကျန်ရစ်နေသော ထိုရှေးဟောင်းတည်ရှိမှုများကဲ့သို့ပင် သူတို့အား အရှင်သခင်များဟုသာ ခေါ်ဆိုနိုင်မည်ဖြစ်၏။
ယန်ဧကရာဇ်ကဲ့သို့သော သူတစ်ဦးသည်ပင် ကောင်းကင်ဘုံအရှင်အဆင့်ကို အရိပ်အယောင်မျှပင် မမြင်ဖူးခဲ့သည်ဖြစ်ရာ... ဒဏ္ဍာရီလာ ဧကရာဇ်အဆင့်ကိုကား ဆိုဖွယ်ရာမရှိတော့ချေ။
သူတို့နှစ်ဦးကြားရှိ အဆင့်ကွာခြားမှုမှာ အလွန်အမင်း ကြီးမားလွန်းသည်ကြောင့် သူသည် ယန်ဧကရာဇ်အား ဓားတစ်ချက်တည်းဖြင့် သတ်ဖြတ်နိုင်ခဲ့သည်မှာ အံ့ဩစရာမရှိတော့ချေ။
ဧကရာဇ်အဆင့်၏ လျှို့ဝှက်ချက်ကို ဖော်ထုတ်ပြီးနောက်တွင်... ကုချန်သည် သူ၏လက်ရှိအဆင့်ကြောင့် မာနထောင်လွှားခြင်း သို့မဟုတ် မိမိကိုယ်မိမိ ကျေနပ်နှစ်သိမ့်ခြင်း မဖြစ်သွားခဲ့ပေ။ ထိုအစား သူသည် မျက်လုံးများမှိတ်လျက် တင်ပျဉ်ခွေထိုင်ကာ ကျင့်ကြံခြင်း၌သာ စိတ်ရောကိုယ်ပါ မြှုပ်နှံထားဆဲဖြစ်သည်။
ကျင့်ကြံခြင်း၏ လမ်းခရီးသည် အဆုံးမရှိကြောင်း သူသိ၏။ ဒဏ္ဍာရီလာ ဧကရာဇ်အဆင့်သည်ပင်လျှင် ရှည်လျားလှသော ကျင့်ကြံခြင်းခရီး၏ အဆုံးသတ် လုံးဝမဟုတ်ချေ...!
... ... ... ...
မျက်စိတစ်မှိတ်အတွင်း ရက်အနည်းငယ် ကုန်လွန်သွားခဲ့သည်။
ကောင်းကင်ဘုံတားမြစ်နယ်မြေ၏ အဓိကနေရာတွင် ကုမိသားစုတပည့် အများအပြားသည် ကျင့်ကြံနေကြခြင်း သို့မဟုတ် သူတို့၏ နတ်စွမ်းအင်နည်းစနစ်များကို ထက်မြက်အောင် လေ့ကျင့်နေကြခြင်းများ ပြုလုပ်လျက်ရှိရာ အလွန်ပင် စည်ကားသိုက်မြိုက်လျက် ရှိသည်။
ကုတောက်လင်းသည် သူ၏ဘေးရှိ အားမာန်အပြည့်နှင့် တက်ကြွလန်းဆန်းနေသော ကုမိသားစုတပည့်များစွာကို ကြည့်လိုက်ပြီး သူ့မျက်နှာပေါ်တွင် ပေါ်လာသော အပြုံးသည် သူ၏မျက်လုံးထောင့်ရှိ အရေးအကြောင်းအနည်းငယ်ကိုပင် ပြေပျောက်သွားစေခဲ့သည်။
ဘိုးဘေးကြီးသည် အဆုံးမဲ့ကမ္ဘာသို့ ပြန်လည်ရောက်ရှိလာပြီး... ကုမိသားစုတစ်ခုလုံးအား ကောင်းကင်ဘုံတားမြစ်နယ်မြေအတွင်းသို့ ပြောင်းရွှေ့ရန် ဦးဆောင်ခဲ့သည့် အချိန်မှစ၍... ကုတောက်လင်းသည် နေ့ရက်တိုင်းအား အိပ်မက်တစ်ခုထဲ၌ ရှင်သန်နေရသကဲ့သို့ ခံစားခဲ့ရသည်။
ယခုအခါ ကုမိသားစုတပည့်များအားလုံးသည် ဘိုးဘေးကြီးမှ လက်ဆင့်ကမ်းပေးခဲ့သော နိဗ္ဗာနဧကရာဇ်ကျမ်း တစ်စောင်စီ ရရှိရုံသာမက... သူတို့၏ ကျင့်ကြံအဆင့်နှင့် သင့်လျော်သော ကျင့်ကြံဆေးလုံးအမျိုးမျိုးနှင့် ပစ္စည်းများကိုပါ နေ့စဉ် လက်ခံရရှိကြသည်။
ကုမိသားစုတပည့်များအားလုံး၏ ခွန်အားသည် လျင်မြန်စွာ ခုန်ပျံတိုးတက်လျက် ရှိသည်။ နတ်နဂါးအသွင်ပြောင်းခြင်းအဆင့်နှင့် ကောင်းကင်တက်လှမ်းခြင်းအဆင့်ရှိ ကုမိသားစုအကြီးအကဲ အများအပြားပင်လျှင် သူတို့၏အဆင့်များကို ဆက်တိုက် ဖောက်ထွက်နိုင်ခဲ့ကြပြီး ကုမိသားစု၏အင်အားကို အတိုင်းအတာတစ်ခုအထိ တိုးမြှင့်ပေးခဲ့သည်။
ထိုမျှသာမက... အဝေးဘိုးဘေး ကုဝူရှန် ပြန်လည်ရောက်ရှိလာခြင်းက ကုမိသားစု၏ အခြေခံအုတ်မြစ်အား များစွာ ပိုမိုတောင့်တင်းခိုင်မာစေခဲ့သည်။ အနာဂတ်တွင်... အကယ်၍ ဘိုးဘေးကြီးသည် အကြောင်းတစ်ခုခုကြောင့် ကုမိသားစုမှ ထွက်ခွာသွားရလျှင်ပင်... ကုဝူရှန်က တာဝန်ယူရန်ရှိနေပါက ကုမိသားစုသည် မည်သည့်အရာကိုမဆို ကိုင်တွယ်ဖြေရှင်းရန် ယုံကြည်မှု ရှိနေမည်ဖြစ်သည်။
အကယ်၍ ကုမိသားစုသည် လက်ရှိအရှိန်အဟုန်အတိုင်း ဆက်လက်တိုးတက်နေမည်ဆိုပါက... တစ်နေ့တွင် ဘိုးဘေးကြီး မရှိသည့်တိုင်အောင်... ကုမိသားစု၏အင်အားသည် ထို ဧကရာဇ်မျိုးနွယ်ကြီးများအား ချေမှုန်းနိုင်စွမ်းရှိသည်ကို သူအမှန်တကယ် မြင်တွေ့ရနိုင်သည်ဟု ခန့်မှန်းမိ၏။
" မိသားစုခေါင်းဆောင်... ကျွန်မတို့ ကောင်းကင်ဘုံတားမြစ်နယ်မြေကနေ အချိန်ကာလတစ်ခုလောက် ခဏထွက်သွားဖို့ လိုအပ်ပါတယ် "
ကုတောက်လင်းသည် ကုမိသားစု၏ အနာဂတ်အား ပျော်ရွှင်စွာ စိတ်ကူးပုံဖော်နေစဉ်မှာပင် ကြည်လင်သော အသံတစ်ခု ထွက်ပေါ်လာပြီး သူ၏အတွေးစများအား ဖြတ်တောက်လိုက်သည်။
ကုတောက်လင်းသည် အလိုအလျောက်ပင် အသံလာရာဘက်သို့ ကြည့်လိုက်ရာ... ကုချင်းရွဲ့နှင့် ယဲ့ယင်းယင်းတို့ အတူတကွ လျှောက်လှမ်းလာသည်ကို တွေ့လိုက်ရသည်။ သူ့အား ယခုလေးတင် စကားပြောလိုက်သူမှာ ကုမိသားစု၏ မျိုးဆက်သစ်မှ ထူးချွန်သောတပည့်တစ်ဦးဖြစ်သည့် ကုချင်းရွဲ့ ဖြစ်လေသည်။
" ကုချင်းရွဲ့... မင်း... အပြင်ထွက်ပြီး စွန့်စားမလို့လား "
ကုတောက်လင်းသည် အမျိုးသမီးနှစ်ဦးအား လှမ်းကြည့်လိုက်သလို... သူ၏စိတ်ထဲတွင်လည်း အကြမ်းဖျင်း သဘောပေါက်နားလည်လိုက်သည်။
" ဟုတ်ကဲ့ " ကုချင်းရွဲ့က တောက်ပစွာ ပြုံးလျက် ပြောလိုက်သည်။ " အခု ကုမိသားစုက ဘေးကင်းနေပြီဆိုတော့ ကျွန်မမှာ စိတ်ပူစရာ ဘာမှမရှိတော့ဘူးလေ... ဒါကြောင့် အပြင်ထွက်ပြီး လောကအတွေ့အကြုံ ယူဖို့ အခွင့်အရေးကောင်းတစ်ခုပါပဲ "
" အင်း... ဒါလည်း ကောင်းတာပါပဲ "
ကုတောက်လင်းသည် ခေါင်းအနည်းငယ် ညိတ်လိုက်ပြီး ကုချင်းရွဲ့၏ ရွေးချယ်မှုအပေါ် မည်သည့်မနှစ်သက်မှုမျှ မပြသည့်အပြင် သဘောတူညီကြောင်းကိုပင် ဖော်ပြခဲ့သည်။
အဆုံးမရှိသော ကျင့်ကြံခြင်း အရင်းအမြစ်များဖြင့် ကောင်းကင်ဘုံတားမြစ်နယ်မြေအတွင်း၌ အဆက်မပြတ် ကျင့်ကြံနေခြင်းသည် ဘေးကင်းလုံခြုံမှုနှင့် လျင်မြန်သော ကျင့်ကြံတိုးတက်မှုတို့ကို အာမခံနိုင်သော်ငြား ဖန်လုံအိမ်ထဲမှ ပန်းပွင့်များအဖြစ်သာ အဆုံးသတ်သွားပေလိမ့်မည်။ အပြင်သို့ မထွက်... ကြမ်းတမ်းမှုများဖြင့် သွေးတိုးစမ်းခြင်း မခံယူ... သေရေးရှင်ရေး တိုက်ပွဲများတွင် မပါဝင်ဘဲ မည်သို့လျှင် အမှန်တကယ် ကြီးထွားနိုင်မည်နည်း။
သမိုင်းတစ်လျှောက်တွင်... ကျင့်ကြံခြင်းလမ်းခရီး၏ အဆုံးသို့ ရောက်ရှိသွားသူတိုင်းသည် ကျင့်ကြံရုံသက်သက်ဖြင့် ထိုသို့ဖြစ်လာခြင်း မဟုတ်ကြောင်း ကုတောက်လင်း ကောင်းစွာသိ၏။ အဆက်မပြတ် စွန့်စားရှာဖွေခြင်းနှင့် ကြမ်းတမ်းမှုများဖြင့် သွေးတိုးစမ်းခြင်းများမှသာလျှင် စစ်မှန်သော အစွမ်းထက်သူများအား မွေးထုတ်ပေးနိုင်ပေသည်။
" အခု ဒီကျယ်ပြောလှတဲ့ ကောင်းကင်တစ်ခုလုံးရဲ့ မျက်လုံးတွေက ငါတို့ ကုမိသားစုအပေါ်မှာပဲ စုနေကြတယ်။ မင်းတို့ အပြင်ထွက် စွန့်စားတဲ့အခါ ကိုယ့်လုံခြုံရေးကို ဂရုစိုက်ဖို့ သတိရကြဦး "
ကုချင်းရွဲ့နှင့် အခြားသူများ မထွက်ခွာမီတွင်... ကုတောက်လင်းသည် သူတို့အား ထပ်မံ၍ သတိပေးစကားဆိုလိုက်ရသည်။
ယခုအခါ ကုမိသားစုသည် ကောင်းကင်ဘုံတားမြစ်နယ်မြေအတွင်း၌ နေထိုင်လျက် ရှားပါးသော ငြိမ်းချမ်းမှုနှင့် တည်ငြိိမ်မှုတို့ကို ခံစားနေရသော အရာအားလုံးသည် ဘိုးဘေးကြီး တည်ရှိနေသောကြောင့်သာဖြစ်ပြီး... ထို ဧကရာဇ်မျိုးနွယ်ကြီးများနှင့် အခြားသော မသမာသည့် အင်အားစုများ မဆင်မခြင် ပြုမူခြင်းမှ တားဆီးထားနိုင်ခြင်းဖြစ်သောကြောင့် ဖြစ်သည်ကို ကုတောက်လင်း နက်နက်ရှိုင်းရှိုင်းပင် သိရှိနေ၏။
ထို့ကြောင့် ကုချင်းရွဲ့နှင့် အခြားသူများ ကောင်းကင်ဘုံတားမြစ်နယ်မြေမှ ထွက်ခွာခြင်း၊ ဘိုးဘေးကြီး၏ အမြင်အာရုံအောက်မှ ထွက်သွားခြင်းသည် အန္တရာယ်မရှိဟု ဆိုလျှင် လုံးဝပင် မှားယွင်းပေလိမ့်မည်။
" မိသားစုခေါင်းဆောင် စိတ်ချပါ။ ဘိုးဘေးကြီး ပေးသနားထားတဲ့ အသက်ကယ်ဂါထာလက်ဖွဲ့တွေနဲ့ဆို... ကျွန်မတို့ကို ကြံစည်ရဲတဲ့ ဘယ်သူမဆို သေလမ်းရှာတာနဲ့ အတူတူပါပဲ "
ကုချင်းရွဲ့သည် သူမ၏လက်ထဲရှိ ဂါထာလက်ဖွဲ့အား မြှောက်ပြလိုက်ပြီး ချိုသာစွာ ပြုံးပြလိုက်ကာ ယဲ့ယင်းယင်းနှင့်အတူ ထွက်ခွာသွားလေသည်။
... ...
ထိုအချိန်တွင်... အဆုံးမဲ့ကမ္ဘာအတွင်းရှိ လျှို့ဝှက်ဆန်းကြယ်သော ကြယ်တာရာကောင်းကင်တစ်ခု၌.....
ရှေးဟောင်းခန်းမတစ်ခုအတွင်းရှိ ပလ္လင်များစွာပေါ်တွင် အလင်းများ ရုတ်တရက် တောက်ပလာ၏။
ယွမ်ကျွင်းမဟာဧကရာဇ်သည် ခရမ်းရောင်ဝတ်ရုံဝတ် မဟာဧကရီ၊ နဂါးရင်းမြစ်မဟာဧကရာဇ်နှင့် အခြားသူများအား ကြည့်လိုက်ပြီး... သူ၏အကြည့်မှာ လေးနက်လျက် " လူကြီးမင်းတို့... အရာအားလုံး အသင့်ဖြစ်ပါပြီ။ ကျွန်ုပ်တို့ အခုပဲ ဆင်းသက်ကြပြီး... ဟို ကုချန်ကို အဆုံးမဲ့ကမ္ဘာကနေ ထွက်သွားအောင် လုပ်ကြပါစို့! " ဟု ဆိုလိုက်လေ၏။