အခန်း (၁၀၃-၁၀၄)
Vol. 8 Ch. 103-104
အခန်း (၁၀၃)- ကျားကိုမောင်း၍ ဝံပုလွေအား မျိုစေခြင်း၊ အားလုံး ကုချန်ကြောင့်သာ
" မို့တိ... ငါတို့ ဘာလုပ်သင့်တယ်လို့ မင်းထင်လဲ "
ခရမ်းရောင်ဝတ်ရုံဝတ်မဟာဧကရီ၏ စိတ်မှာ ကသောင်းကနင်းဖြစ်နေသော်လည်း ဖြေရှင်းချက်တစ်ခုကို စဉ်းစား၍မရချေ။ သူသည် တိတ်ဆိတ်လျက်ရှိသော မို့တိထံသို့သာ အကြည့်ပို့နိုင်တော့ပြီး မို့တိက ဖြေရှင်းချက်တစ်ခု ပေးနိုင်လိမ့်မည်ဟု မျှော်လင့်နေမိသည်။
မည်သို့ပင်ဆိုစေကာမူ... ယွမ်ကျွင်းမဟာဧကရာဇ်၏ ကံကြမ္မာမှာ မသိရသေးဘဲ... ယွမ်ကျွင်း မရှိသည့်အခါ ဧကရာဇ်မဟာမိတ်အတွင်းရှိ ကိစ္စရပ်အများစုကို မို့တိက ဆုံးဖြတ်လေ့ရှိသည်။ ထို့ကြောင့်ပင် ခရမ်းရောင်ဝတ်ရုံဝတ်မဟာဧကရီသည် မို့တိအပေါ်၌သာ မျှော်လင့်ချက်များ ထားနိုင်ခြင်း ဖြစ်သည်။
" ဘာလုပ်ရမှာလဲ "
မို့တိက လှောင်ရယ်လိုက်သည်။
" ဘာမှလုပ်စရာမလိုဘူး။ ငါတို့က အဆုံးမဲ့ကမ္ဘာမှာရှိတဲ့ တစ်ခုတည်းသော ဧကရာဇ်အဆင့်တွေ မဟုတ်ဘူး။ နတ်ဆိုးနယ်မြေရဲ့ ကျူးကျော်မှုက ငါတို့တစ်ဖွဲ့တည်း စိုးရိမ်ရမှာ မဟုတ်ဘူးဆိုတဲ့ အဓိပ္ပာယ်ပဲ "
ဟင်... မို့တိက ဘာကိုဆိုလိုချင်တာလဲ.....
ခရမ်းရောင်ဝတ်ရုံဝတ်မဟာဧကရီသည် ကြောင်သွားပြီး သူမ၏မျက်ခုံးများမှာ အနည်းငယ် တွန့်သွား၏။ သူမ ပထမဆုံး တွေးမိလိုက်သူမှာ ကုချန်ပင် ဖြစ်သည်။
မို့တိက ကုချန်နှင့်ပတ်သက်၍ တစ်စုံတစ်ခု ကြံစည်နေတုန်းလား။
မဖြစ်နိုင်ပေ။ ကုချန်သည် ယခုအခါ အဆုံးမဲ့ကမ္ဘာတစ်ခုလုံးရှိ သက်ရှိအားလုံး၏ အမြင်တွင် သစ္စာဖောက်တစ်ဦးအဖြစ် သတ်မှတ်ခံထားရသည်။ ထို့အပြင် ထိုအချိန်က တာအိုရောင်းရင်း ယွမ်ကျွင်း၏ 'အသရေဖျက်'မှုနှင့် မေးခွန်းထုတ်မှုများကို ရင်ဆိုင်ရာတွင် သူသည် ငြင်းဆန်ရန်ပင် ဝန်မလေးခဲ့ပေ။
ဤသို့သော အခြေအနေမျိုးတွင် ကုချန်သည် အဆုံးမဲ့ကမ္ဘာ၏ လူသားများအတွက် ရှေ့ထွက်၍ မည်သို့ တိုက်ခိုက်ပေးမည်နည်း။
" မို့တိ ဆိုလိုတာက... ရှင်သန်ခြင်းတားမြစ်နယ်မြေတွေထဲက ရှေးဟောင်းအရှင်သခင်တွေကို သုံးမလို့လား။ 'ကျားကိုမောင်းပြီး ဝံပုလွေကို မျိုခိုင်း' မလို့လား "
သူတို့အနားတွင် ရှိနေသော နဂါးရင်းမြစ်မဟာဧကရာဇ်သည် မို့တိ၏ အဓိပ္ပာယ်ကို နားလည်သွားဟန်တူပြီး တွေးတွေးဆဆ မေးလိုက်သည်။
" ဒါပဲ "
မို့တိက ခေါင်းအနည်းငယ် ညိတ်လိုက်၏။
" တားမြစ်နယ်မြေတွေထဲက ရှေးဟောင်းအရှင်သခင်တွေကို အားကိုးမယ် "
ခရမ်းရောင်ဝတ်ရုံဝတ်မဟာဧကရီ၏ မျက်ခုံးများသည် ချက်ချင်း တွန့်ချိုးသွားပြီး သူသည် ချက်ချင်းပင် တုံ့ပြန်လိုက်သည်။
" သူတို့ကို ဘယ်လိုလုပ် ယုံကြည်လို့ရမှာလဲ။ သူတို့သာ ယုံကြည်ရမယ်ဆိုရင် လွန်ခဲ့တဲ့ နှစ်ကိုးသောင်းတုန်းက ကုချန်တစ်ယောက်တည်း နတ်ဆိုးနယ်မြေရဲ့ မိစ္ဆာဆိုးတွေကို သွားပြီး ကာကွယ်စောင့်ရှောက်နေမှာ မဟုတ်ဘူး "
ခရမ်းရောင်ဝတ်ရုံဝတ်မဟာဧကရီသည် မို့တိ၏ အကြံအစည်မှာ အလွန်နုံအလွန်းသည်ဟု ခံစားရ၏။
ကုချန်သည် နှစ်ကိုးသောင်း ကြာပြီးမှသာ စိတ်ပျက်သွားပြီး အဆုံးမဲ့ကမ္ဘာ၏ လူသားများကို ဂရုမစိုက်တော့ခြင်း ဖြစ်လျှင်... တားမြစ်နယ်မြေအသီးသီးတွင် ခိုအောင်းနေကြသော ထိုရှေးဟောင်းအရှင်သခင်များသည် သူတို့ တားမြစ်နယ်မြေများတွင် နေထိုင်ခဲ့သည့် ပထမဆုံးနေ့မှစ၍... အဆုံးမဲ့ကမ္ဘာ၏ လူသားများကို ဖုန်မှုန့်သဖွယ် သဘောထားကာ စွန့်ပစ်ခဲ့ကြပြီး ဖြစ်သည်။
အမှန်စင်စစ်... သူတို့၏သက်တမ်းကို ရှည်စေရန်အတွက် ကြာမြင့်စွာ တည်ရှိခဲ့သော အချို့သော ရှေးဟောင်းအရှင်သခင်များသည် တားမြစ်နယ်မြေများမှ ထွက်ခွာကာ... ကမ္ဘာလောကကို သတ်ဖြတ်ရန် ဝန်မလေးဘဲ... သက်ရှိအားလုံး၏ သွေးကို အသုံးပြု၍ မိမိတို့၏ သက်တမ်းကို ဆွဲဆန့်ကြသည်ပင်။
ဤသို့သော သတ္တဝါများသည် အဆုံးမဲ့ကမ္ဘာ၏ လုံခြုံရေးဟု ခေါ်ဆိုသောအရာကို မည်သို့ ဂရုစိုက်မည်နည်းဟု မေးခွန်းထုတ်ရမည်ဖြစ်သည်။
အကယ်၍... ဤရှေးဟောင်းအရှင်သခင်များသည် အဆုံးမဲ့ကမ္ဘာ၏ လူသားများအတွက် အမှန်တကယ် လှုပ်ရှားပေးရန် ဆန္ဒရှိခဲ့ပါက... လွန်ခဲ့သော နှစ်ကိုးသောင်းက ကုချန်သည် နတ်ဆိုးနယ်မြေတစ်ခုလုံးကို တစ်ဦးတည်း ရင်ဆိုင်ခဲ့ရမည် မဟုတ်ပေ။
" သာမန်အခြေအနေတွေမှာတော့ ဒီတားမြစ်နယ်မြေအရှင်သခင်တွေက ယုံကြည်ရမှာ မဟုတ်ဘူး။ ဒါပေမယ့် ဒီလိုအချိန်မျိုးမှာတော့ သူတို့က ယုံကြည်ရတယ် "
မို့တိက အဓိပ္ပာယ်ပါစွာ ပြောလိုက်သည်။
" သူတို့ကို လှုပ်ရှားစေဖို့ သင့်တော်တဲ့ တွန်းအားတစ်ခုတော့ ရှိရမှာပေါ့။ တာအိုရောင်းရင်း ခရမ်းရောင်ဧကရီ ခင်ဗျား ထင်သလား... ဒီတားမြစ်နယ်မြေအရှင်သခင်တွေက ရှင်သန်ခြင်းတားမြစ်နယ်မြေတွေမှာ အဆုံးမဲ့နှစ်တွေကြာအောင် ခိုအောင်းနေတာက... ကမ္ဘာကြီးမှာ မဖြစ်စလောက်လေး ရှင်သန်နေထိုင်ဖို့အတွက်ပဲလို့ "
" မဟုတ်ဘူးပေါ့ "
ခရမ်းရောင်ဝတ်ရုံဝတ်မဟာဧကရီသည် ချက်ချင်း တုံ့ပြန်လိုက်သည်။
" ဒီတားမြစ်နယ်မြေအရှင်သခင်တွေက တားမြစ်နယ်မြေတွေမှာ ခိုအောင်းနေတာက ဒဏ္ဍာရီလာ... လက်လှမ်းမမီနိုင်တဲ့ အင်မော်တယ်တက်လှမ်းခြင်း အခွင့်အရေးကို စောင့်ဆိုင်းဖို့ သက်သက်ပဲ "
အင်မော်တယ်တက်လှမ်းခြင်း အတွက်သာ မဟုတ်ပါက... ဤတားမြစ်နယ်မြေအရှင်သခင်များသည် အဆုံးမဲ့နှစ်များစွာကြာအောင်... အဘယ်ကြောင့် အိပ်စက်နေရန် ဆန္ဒရှိမည်နည်း။
" မှန်တယ်... သူတို့အားလုံးက အင်မော်တယ်တက်လှမ်းခြင်းအတွက်ပဲ "
မို့တိက လက်ခုပ်တီးလိုက်ပြီး လှောင်ရယ်လိုက်သည်။
" ဒါပေမယ့်... တကယ်လို့ သူတို့က အင်မော်တယ်တက်လှမ်းခြင်းအခွင့်အရေးက သူတို့မျက်စိရှေ့မှာပဲ ကျရောက်တော့မယ်ဆိုတာကို တွေ့ရှိသွားခဲ့ရင်... နတ်ဆိုးနယ်မြေရဲ့ ကျူးကျော်မှုက အောင်မြင်သွားပြီး အဆုံးမဲ့ကမ္ဘာကြီးသာ ပျက်စီးသွားမယ်ဆိုရင်... သူတို့ရဲ့ ရှေးကျတဲ့ စောင့်ဆိုင်းမှုတွေအားလုံးက အချည်းနှီး ဖြစ်သွားလိမ့်မယ်။ အဲ့ဒီအခါ သူတို့ ဘာလုပ်မယ်လို့ ခင်ဗျား ထင်လဲ "
" သေချာပေါက် သူတို့မှာ လှုပ်ရှားဖို့ကလွဲပြီး ရွေးချယ်စရာ မရှိတော့ဘူး "
ခရမ်းရောင်ဝတ်ရုံဝတ်မဟာဧကရီ မတုံ့ပြန်နိုင်မီမှာပင်... သူတို့အနားရှိ နဂါးရင်းမြစ်မဟာဧကရာဇ်၏ မျက်လုံးများမှာ အရောင်တောက်လာပြီး ပြောလိုက်သည်။
" ကောင်းတယ်... ကောင်းတယ်! ဒီလိုသာဆိုရင်... အဲ့ဒီတားမြစ်နယ်မြေအရှင်သခင်တွေ အကုန်လုံး ထွက်လာကြလိမ့်မယ်လို့တောင် ငါယုံကြည်တယ် "
တာအိုလမ်းစဉ်အတွက် ယှဉ်ပြိုင်ရသည့် ရန်ငြိုးမှာ ဖြေရှင်း၍မရနိုင်ပေ။ သံသယဖြစ်ဖွယ်မရှိသည်မှာ... အကယ်၍ တစ်စုံတစ်ဦးက ဤတားမြစ်နယ်မြေအရှင်သခင်များ၏ အင်မော်တယ်လမ်းကို ပိတ်ဆို့ရန် သတ္တိရှိပါက... ရန်သူသည် မည်သူပင်ဖြစ်နေပါစေ... သူတို့သည် သဘောတူမည် မဟုတ်ချေ။
" ဒါပေမယ့် ဒီတားမြစ်နယ်မြေအရှင်သခင်တွေကို အင်မော်တယ်တက်လှမ်းခြင်းအခွင့်အရေးက သူတို့မျက်စိရှေ့မှာပဲလို့ ယုံလာအောင် ငါတို့က ဘယ်လိုလုပ်ကြမလဲ "
ခရမ်းရောင်ဝတ်ရုံဝတ်မဟာဧကရီသည် မျက်မှောင်ကြုတ်လိုက်ပြီး နားမလည်နိုင် ဖြစ်သွား၏။
" ဟက်... အဲ့ဒါအတွက်တော့ တာအိုရောင်းရင်း ခရမ်းရောင်ဧကရီ စိတ်ပူစရာမလိုပါဘူး "
မို့တိက အေးစက်စက် ပြောဆိုလိုက်ပြီးနောက် သူ၏ပုံရိပ်သည်လည်း တိတ်ဆိတ်စွာ ပျောက်ကွယ်သွား၏။
မို့တိ၏ ပျောက်ကွယ်သွားသော ပုံရိပ်ကို ကြည့်ရင်း ခရမ်းရောင်ဝတ်ရုံဝတ်မဟာဧကရီ၏ မျက်လုံးများထဲတွင် ရှားရှားပါးပါး သံသယနှင့် တည်ကြည်လေးနက်မှု အရိပ်အယောင်တစ်ခု ပေါ်လာ၏။ ဤ မို့တိသည် အလွန်ပင် လျှို့ဝှက်ဆန်းကြယ်ပြီး နားလည်ရ ခက်လွန်းလှသည်။
ထို့အပြင်... တားမြစ်နယ်မြေများရှိ ထိုရှေးဟောင်းအရှင်သခင်များသည် မို့တိ၏ ဆန္ဒအတိုင်း... အရာအားလုံးကို အမှန်တကယ် လုပ်ဆောင်ကြမည်လော။
" တာအိုရောင်းရင်း မို့တိမှာ နည်းလမ်းရှိမှတော့... ဒါက အကောင်းဆုံးပေါ့ "
နဂါးရင်းမြစ်မဟာဧကရာဇ်သည် သက်ပြင်းရှည်ကြီးတစ်ချက် ချလိုက်ပြီး များစွာ စိတ်သက်သာရာ ရသွား၏။
သူ၏ မျိုးဆက်ဖြစ်သော ဧကရာဇ်မျိုးနွယ် နဂါးမိသားစုသည် နှစ်သောင်းပေါင်းများစွာ ဖွံ့ဖြိုးတိုးတက်ပြီးနောက်... မရေမတွက်နိုင်သော မျိုးဆက်များနှင့် သွေးမျိုးဆက်များ ရှိလာခဲ့ပြီး... ရှင်သန်ခြင်းရှေးဟောင်းကြယ်တစ်လုံးကိုပင် သီးခြားပိုင်ဆိုင်ကာ ထိုနေရာတွင် အုပ်စိုးလျက်ရှိသည်။ ယခု နတ်ဆိုးနယ်မြေ၏ ကျူးကျော်မှုနှင့်အတူ... ပစ်မှတ်မှာ ကြီးမားလွန်းသောကြောင့် နဂါးရင်းမြစ်မဟာဧကရာဇ်ပင်လျှင် နဂါးမိသားစုတစ်ခုလုံးကို မကာကွယ်နိုင်တော့ပေ။
သို့သော် ယခု မို့တိက သူ့တွင် နည်းလမ်းရှိသည်ဟု ဆိုလာသောအခါ... ဤသည်မှာ အကောင်းဆုံးပင် ဖြစ်တော့သည်။
...
အဆုံးမဲ့တိုက်ကြီး အရှေ့ပိုင်းစွန့်ပစ်ဒေသ တာအိုနယ်မြေ.....
အထက်ကောင်းကင်တားမြစ်နယ်မြေမှ မကြာသေးမီကမှ ထွက်ခွာလာခဲ့သော ကုချင်းရွဲ့နှင့် ယဲ့ယင်းယင်းတို့သည်လည်း ကုချန်ထံမှ သတင်းစကားတစ်ခု လက်ခံရရှိခဲ့ပြီး... သူတို့ကို အထက်ကောင်းကင်သို့ ယာယီပြန်လာရန် သတိပေးထားသည်။ ကုချန်၏ ဤလုပ်ရပ်သည် သေချာပေါက် ထိုမိန်းကလေးနှစ်ဦး၏ လုံခြုံရေးကို ကာကွယ်ရန်အတွက် ဖြစ်သည်။
မကြာမီအချိန်အတွင်း နတ်ဆိုးနယ်မြေစစ်တပ်သည် အဆုံးမဲ့တိုက်ကြီးသို့ ရောက်ရှိလာနိုင်ပေသည်။ ထိုမိန်းကလေးနှစ်ဦးသည် အထက်ကောင်းကင်တားမြစ်နယ်မြေသို့ ပြန်လာမှသာ... ကုချန်သည် သူတို့၏ လုံခြုံရေးကို ကာကွယ်ပေးနိုင်မည် ဖြစ်သည်။
အထက်ကောင်းကင်တားမြစ်နယ်မြေ၏ အပြင်ဘက်ရှိ အဆုံးမဲ့နယ်မြေငါးခုတွင်... သတ်ဖြတ်မှုများ မည်မျှ သွေးထွက်သံယို ဖြစ်နေမည်ကိုမူ... သူ လုံးဝ ဂရုမစိုက်ခဲ့ပေ။
မိန်းကလေးနှစ်ဦးမှာ လုံးဝ ရှုပ်ထွေးနေကြသော်ငြား... သူတို့အားလုံးသည် ကုချန်၏ အမိန့်ကို နာခံစွာ လိုက်နာခဲ့ကြပြီး... အထက်ကောင်းကင်တားမြစ်နယ်မြေသို့ ပြန်သွားခဲ့ကြသည်။ အပြန်လမ်းတွင်... ကုချင်းရွဲ့၏ မျက်နှာအမူအရာမှာ အနည်းငယ် တည်ကြည်လေးနက်နေသည်ကို သိသာစွာ တွေ့နေရသည်။
ဘိုးဘေးက သူတို့ကို ရုတ်တရက် အထက်ကောင်းကင်သို့ ပြန်လာရန် တောင်းဆိုခြင်းကြောင့် အရေးကြီးသည့် တစ်စုံတစ်ခု ဖြစ်ပျက်ခဲ့ပြီဖြစ်ကြောင်း သူမ သိလိုက်သည်။
ဒါပေမဲ့ တကယ်ပဲ ဘာတွေဖြစ်နေတာလဲ......
...
အဆုံးမဲ့ကမ္ဘာ၏ နယ်စပ်... ထျန်းချိုကြယ်၏ အထက်တွင်.....
ဤအခိုက်အတန့်တွင်... ထျန်းချိုကြယ်တစ်ခုလုံးသည် မီးခိုးများနှင့် မီးတောက်များဖြင့် ဖုံးလွှမ်းနေ၏။ မရေမတွက်နိုင်သော နတ်ဆိုးနယ်မြေစစ်တပ်သည် ဒီရေအလား... ရှေးဟောင်းကြယ်၏ နေရာဒေသအသီးသီးသို့ တိုးဝင်လျက်ရှိသည်။ သူတို့ တွေ့ဆုံခဲ့သော သက်ရှိအားလုံးသည် ခြွင်းချက်မရှိ သွေးအိုင်ထဲသို့ လဲကျကာ ဝမ်းနည်းဖွယ် သေဆုံးသွားကြရသည်။
ငိုကြွေးသံများနှင့် နာကျင်စွာ အော်ဟစ်သံများသည် ရှေးဟောင်းကြယ်တစ်ခုလုံးတွင် ပဲ့တင်ထပ်နေပြီး... ထိုကြောက်မက်ဖွယ်ရာကို စကားလုံးများဖြင့် ဖော်ပြ၍ မရနိုင်ချေ။
" ဘယ်သူ ငါတို့ကို ကယ်မှာလဲ...! ဘယ်သူ ငါတို့ကို ကယ်မှာလဲ "
" ငရဲဂိုဏ်း၊ ပေါင်းစည်းခြင်းလမ်းစဉ်ဂိုဏ်း... သူတို့ ဘယ်မှာလဲ "
" ဧကရာဇ်မဟာမိတ်အဖွဲ့က ဧကရာဇ်တွေ ဘယ်မှာလဲ။ နတ်ဆိုးနယ်မြေ ကျူးကျော်လာပြီ။ ဧကရာဇ်မဟာမိတ်အဖွဲ့က မဟာဧကရာဇ်တွေကို ဆင်းသက်ပြီး ကျွန်တော်တို့ကို ကယ်တင်ပေးဖို့ တောင်းဆိုပါတယ်! "
" ဧကရာဇ်မဟာမိတ်အဖွဲ့ မဟာဧကရာဇ်တွေကို ဆင်းသက်ပြီး... သက်ရှိအားလုံးကို ဒီဒုက္ခကနေ ကယ်တင်ပေးဖို့ တောင်းပန်ပါတယ်! "
သွေးအိုင်ထဲတွင်... မရေမတွက်နိုင်သော သက်ရှိများသည် ဧကရာဇ်မဟာမိတ်အဖွဲ့၏ လူသားမျိုးနွယ်ဧကရာဇ်များ ဆင်းသက်လာပြီး... သက်ရှိအားလုံးကို သူတို့၏ ဒုက္ခဆင်းရဲမှ ကယ်တင်ပေးရန် မျှော်လင့်လျက်... အော်ဟစ်တောင်းဆိုနေကြသည်။
လွန်ခဲ့သော ခဏက... ထိုကောင်းကင်ပြင်ပေါ်တွင်... ဧကရာဇ်မဟာမိတ်၏ ဧကရာဇ်က ကုချန်သည် လူသားမျိုးနွယ်၏ လူယုတ်မာ၊ သစ္စာဖောက်တစ်ဦးဖြစ်ပြီး... ဧကရာဇ်မဟာမိတ်အဖွဲ့က မဟာဧကရာဇ်များသာလျှင် ဤနှစ်များတစ်လျှောက်လုံး နတ်ဆိုးနယ်မြေကို စောင့်ရှောက်ခဲ့သူများဖြစ်သည်ဟု ပြောခဲ့သည် မဟုတ်ပါလော။
သို့ဖြစ်လျှင်... အဘယ်ကြောင့် ယခုအခါတွင် နတ်ဆိုးနယ်မြေ၏ မိစ္ဆာဆိုးများကို တန်းတန်းမတ်မတ် ချီတက်ခွင့်ပေးကာ... အဆုံးမဲ့ကမ္ဘာအား ကျူးကျော်ခွင့် ပေးထားရသနည်း။
ကုချန်သည် ဧကရာဇ်မဟာမိတ်၏ ဧကရာဇ်အချို့ကို သတ်ဖြတ်ခဲ့သောကြောင့်... ဧကရာဇ်မဟာမိတ်အဖွဲ့၏ အင်အားကို ထိခိုက်စေခဲ့ပြီး... ထို့ကြောင့် သူတို့သည် နတ်ဆိုးနယ်မြေ ရှေ့တန်းကို မထိန်းထားနိုင်တော့ခြင်းလော။
ဒါတွေအားလုံး ကုချန်၏ အမှားပင်တည်း.....
ဤသို့ တွေးမိသောအခါ... ထျန်းချိုကြယ်ပေါ်ရှိ သက်ရှိများစွာ၏ နှလုံးသားထဲတွင်... ကုချန်အပေါ်ထားသော အမုန်းတရားသည် အဆပေါင်းများစွာ ပိုမို နက်ရှိုင်းသွားတော့သည်။
အခန်း (၁၀၄)- အသက်လုရုန်းကန်ခြင်း၊ အင်မော်တယ်အစီအစဉ်၊ သူတို့ ဘယ်မှာလဲ
ထျန်းချိုကြယ်ပေါ်တွင်.....
“ လတ်ဆတ်တဲ့သွေးရဲ့အရသာက... တကယ်ကို မူးယစ်စေတာပဲ ”
နတ်ဆိုးနယ်မြေမှ နတ်ဆိုးတစ်ကောင်သည် သူ၏ရှေ့မှ ပြင်းပြင်းထန်ထန် ထွက်ပြေးနေသော လူသားမျိုးနွယ် ကျင့်ကြံသူအား ကြည့်လိုက်ရာ... သူ၏ ကြက်သွေးရောင်မျက်လုံးများထဲတွင် ရက်စက်အေးစက်သော အလင်းရောင်တစ်ခု ပေါ်လာ၏။
သူသည် လက်ထဲရှိ ဓားရှည်ကို မြှောက်လိုက်ပြီး ရက်စက်စွာ ရှေ့သို့ ခုတ်ပိုင်းလိုက်၏။ ဓားအလင်းရောင်တစ်ချက် လက်သွားပြီးနောက်... ထိုလူသားမျိုးနွယ် ကျင့်ကြံသူများသည် ချက်ချင်းပင် တစ်ပိုင်းစီ ပြတ်သွားကာ သွေးများ ပက်ဖျန်းသွားတော့လေ၏။
ထိုနတ်ဆိုးသည် လတ်ဆတ်သောသွေးများဖြင့် ရေချိုးလိုက်ရသကဲ့သို့ ဖြစ်သွားပြီး... မည်သည့်သနားငဲ့ညှာမှုမျှ မခံစားရရုံသာမက... သူ၏မျက်နှာပေါ်တွင် အတော်လေး ပျော်မွေ့နေသော အမူအရာတစ်ခုပင် ပေါ်လာ၏။
သူသည် ပျော်ရွှင်မှုကို ခံစားလိုက်ရပြီး... သူ၏ခွန်အား တိုးလာသည့် လက္ခဏာများကိုလည်း ခံစားလိုက်ရ၏။
သူသည် နတ်ဆိုးနယ်မြေ နယ်စပ်ကို ဤမျှကြာအောင် စောင့်ရှောက်ခဲ့ရခြင်းမှာ... ဤနေ့ကို စောင့်ဆိုင်းနေခြင်းကြောင့် မဟုတ်လော။
နတ်ဆိုးနယ်မြေ သတ္တဝါများသည် နယ်ပယ်အားလုံးကို သိမ်းပိုက်ရန်... အဘယ်ကြောင့် ဤမျှ စိတ်အားထက်သန်နေကြသနည်း။
နတ်ဆိုးနယ်မြေ အရှင်သခင်၏ အမိန့်များအပြင်.....
ပိုမိုကြီးမားသော အကြောင်းရင်းတစ်ခုမှာ... ဤနတ်ဆိုးနယ်မြေ သတ္တဝါများသည် အခြားနယ်ပယ်များမှ သတ္တဝါများကို သတ်ဖြတ်သည့်အခါ... သူတို့သည်လည်း အကျိုးကျေးဇူးများစွာကို ရရှိကြသောကြောင့် ဖြစ်သည်။
“ နတ်ဆိုးတွေ... နတ်ဆိုးတွေပဲ ”
“ ဘယ်သူက ငါတို့ကို ကယ်မှာလဲ! ”
“ ဧကရာဇ်မဟာမိတ်အဖွဲ့ မဟာဧကရာဇ်က ဘာလို့ အခုထိ ဆင်းမလာသေးတာလဲ! ”
ဤရှေးဟောင်းအရှင်သခင် နတ်ဆိုးသည် သွေးများဖြင့် ရေချိုးလျက်... ကောင်းကင်နှင့်မြေကြီးကြားတွင် နတ်ဆိုးဘုရားတစ်ပါးကဲ့သို့ ရပ်နေသည်ကို မြင်သောအခါ... အနီးအနားရှိ သတ္တဝါများသည် ထိတ်လန့်တုန်လှုပ်သွားကြပြီး... ဦးတည်ရာမဲ့စွာ အရပ်လေးမျက်နှာသို့ ပြင်းပြင်းထန်ထန် ထွက်ပြေးကြလေသည်။
သို့သော်... ထိုနတ်ဆိုးနယ်မြေမှ နတ်ဆိုး၏ မျက်လုံးများထဲတွင်မူ... ၎င်းသည် အချည်းနှီးသော ရုန်းကန်မှုတစ်ခုမျှသာ ဖြစ်သည်။
ထွက်ပြေးမည်လော။ သူတို့ ဘယ်ကို ထွက်ပြေးနိုင်မည်နည်း။
ယခု... ဤရှင်သန်ခြင်းရှေးဟောင်းကြယ်ပေါ်တွင်... နေရာတိုင်း၌ နတ်ဆိုးနယ်မြေစစ်တပ်များ ရှိနေသည်။ ဤနေရာမှ ထွက်ပြေးလျှင်လည်း... အခြားနေရာများရှိ အပေါင်းအပါများ၏ သတ်ဖြတ်ခြင်းကို ခံရဦးမည်သာ ဖြစ်ပြီး... ရလဒ်မှာ လုံးဝ ပြောင်းလဲသွားမည် မဟုတ်ပေ။
ထျန်းချိုကြယ်၏ ကောင်းကင်ဘုံကိုးခုအထက်တွင်.....
နတ်ဆိုးနယ်မြေ အရှင်သခင်အချို့သည် ကောင်းကင်ယံ၌ မြင့်မားစွာ ရပ်နေကြပြီး... ထျန်းချိုကြယ်ပေါ်ရှိ သွေးထွက်သံယို မြင်ကွင်းကို အပေါ်မှ ငုံ့ကြည့်နေကြကာ... သူတို့၏ မျက်နှာအမူအရာများမှာ ပုံမှန်အတိုင်းပင် ဖြစ်ပြီး... စကားစမြည်ပြောကာ ရယ်မောနေကြသည်ပင်။
သူတို့အတွက်မူ... ဤအဆုံးမဲ့ကမ္ဘာရှိ သတ္တဝါများသည်... ပုရွက်ဆိတ်များသဖွယ် ဖြစ်ကြသည်။
သူတို့သည် ပုရွက်ဆိတ်များ၏ အသက်ရှင်ခြင်းနှင့် သေဆုံးခြင်းကို မည်သို့ ဂရုစိုက်နိုင်မည်နည်း။
“ ကောင်းတယ်... ငါတို့ကို ဒီလောက်နှစ်တွေကြာအောင် ဖိနှိပ်ထားပြီးမှတော့... ငါတို့တွေ စိတ်ဒေါသကို သေချာ ဖြေလျှော့သင့်တာပေါ့ ”
“ ဒီပုရွက်ဆိတ်တွေ မျှော်လင့်ချက်မဲ့ပြီး အော်ဟစ်နေတာကို မြင်ရတာထက်... ဒီအရှင်သခင်ကို ပိုပြီး ပျော်ရွှင်စေတာ ဘာမှမရှိဘူး ”
“ အရင်ဆုံး နေ့တစ်ဝက်လောက် သတ်လိုက်... ဒီရှေးဟောင်းကြယ်ပေါ်က သတ္တဝါအားလုံးကို သတ်ဖြတ်ပြီးရင်... နောက် ရှင်သန်ခြင်းရှေးဟောင်းကြယ်တစ်ခုဆီ ဆက်သွားကြတာပေါ့ ”
နတ်ဆိုးနယ်မြေ အရှင်သခင်အချို့၏ အသံများသည် အေးစက်နေပြီး... ထျန်းချိုကြယ်ပေါ်ရှိ သတ္တဝါများ၏ ကြေကွဲဖွယ် အခြေအနေကို လုံးဝ စိတ်မဝင်စားကြပေ။
အမှန်စင်စစ်... သူတို့အတွက်မူ ထျန်းချိုကြယ်ကို ခြေတစ်ဖက်တည်းဖြင့် ရိုးရှင်းစွာ နင်းခြေဖျက်ဆီးနိုင်ပြီး... ဤနေရာရှိ သက်ရှိအားလုံးကို ပျက်စီးသွားစေရန် ပြုလုပ်နိုင်၏။
သို့သော် ဤနတ်ဆိုးနယ်မြေ အရှင်သခင်များသည် ထိုသို့ မလုပ်ခဲ့ကြဘဲ... သက်ရှိအားလုံးကို သတ်ဖြတ်ရန်... သူတို့၏ နှလုံးသားထဲရှိ နှစ်ပေါင်းများစွာ စုပုံနေသော နာကြည်းမှုနှင့် ဒေါသများကို ဖြေလျှော့ရန်အတွက်... သန်းနှင့်ချီသော နတ်ဆိုးနယ်မြေစစ်တပ်ကို လှုပ်ရှားခွင့် ပေးခဲ့ကြဟန်တူသည်။
“ ကောင်းကင်ဘုံအရှင်သခင်က တကယ်ပဲ ပေါ်လာမှာ မဟုတ်ဘူးနဲ့တူတယ်..... ”
အခြား နတ်ဆိုးနယ်မြေ အရှင်သခင်များက ထျန်းချိုကြယ်ပေါ်တွင် ဖြစ်ပျက်နေသမျှ အရာအားလုံးကို စိတ်ဝင်တစား ကြည့်ရှုနေစဉ်.....
မိုယွဲ့အရှင်၏ အကြည့်မှာမူ အဆုံးမဲ့ကမ္ဘာ စကြဝဠာ၏ နက်ရှိုင်းရာဆီသို့ တိတ်ဆိတ်စွာ လှည့်သွားပြီး... သိမ်မွေ့သော စိတ်သက်သာရာရမှု အရိပ်အယောင်တစ်ခုကို ဖော်ပြနေသည်။
အကယ်၍ ထိုလူသားမျိုးနွယ် ကုကောင်းကင်ဘုံဧကရာဇ်က သူတို့ကို တားဆီးလိုခဲ့ပါက... နတ်ဆိုးနယ်မြေစစ်တပ်သည် အဆုံးမဲ့ကမ္ဘာသို့ ကျူးကျော်ဝင်ရောက်ခါနီး အချိန်တွင်ပင် သူသည် လှုပ်ရှားခဲ့မည်ဖြစ်ပြီး.... သူတို့ကို အဆုံးမဲ့ကမ္ဘာသို့ ဗြောင်ကျကျ ကျူးကျော်ဝင်ရောက်ခွင့် ပေးခဲ့မည် မဟုတ်သည်မှာ သေချာ၏။
ယခုမူ... ထိုကုကောင်းကင်ဘုံဧကရာဇ်သည် ပေါ်မလာသေးသဖြင့်... သူသည် နောင်လည်း ပေါ်လာတော့မည် မဟုတ်ပေ။
သို့ဖြစ်လျှင်... ဤအဆုံးမဲ့ကမ္ဘာအား ကျူးကျော်မှုသည် ပိုမို ချောမွေ့သွားမည် ဖြစ်သည်။
မိုယွဲ့အရှင်သည် သက်ပြင်းတစ်ချက် ချလိုက်သည်။ နတ်ဆိုးနယ်မြေ နယ်စပ်ကို နှစ်ပေါင်းများစွာ စောင့်ရှောက်ရင်း... ကုချန်သည် သူ၏နှလုံးသားထဲတွင် ပြောမပြနိုင်သော အရိပ်မည်းတစ်ခုကို ကာလရှည်ကြာစွာ ထားရစ်ခဲ့ပြီး ဖြစ်သည်။
မိုယွဲ့အရှင်၏ အမြင်အရ... သူသည် ထိုကုချန်နှင့် မတွေ့ဆုံခြင်းသည်သာ အကောင်းဆုံးပင် ဖြစ်သည်။
မည်သို့ပင်ဖြစ်စေ... မမျှော်လင့်ထားသော အခြေအနေများ ရှိမလာနိုင်လောက်တော့ဟု... မျှော်လင့်ရ၏။
မိုယွဲ့အရှင်သည် ထျန်းကျွင်းအဆင့်အရှင်ထံသို့ လှမ်းကြည့်လိုက်ပြီး... စိတ်အနည်းငယ် ပိုမို တည်ငြိမ်သွားသည်ကို ခံစားလိုက်ရသည်။
ဤတစ်ကြိမ်သည် လွန်ခဲ့သော နှစ်ကိုးသောင်းကနှင့် မတူတော့ပေ။ ယခု အဆုံးမဲ့ကမ္ဘာကို ကျူးကျော်ရာတွင်... ဤနတ်ဆိုးနယ်မြေ အရှင်သခင်များအပြင်... ရွှမ်ယိုနန်းတော်မှ ထျန်းကျွင်းအဆင့်လည်း အတူ လိုက်ပါလာသည်။
ထျန်းကျွင်းအဆင့်အရှင် ရှိနေသဖြင့်... မည်သည့် မတော်တဆမှုမျှ ဖြစ်လာတော့မည် မဟုတ်ပေ။
…………
အဆုံးမဲ့ကမ္ဘာ စကြဝဠာအတွင်းရှိ ရှင်သန်ခြင်းတားမြစ်နယ်မြေ အားလုံး၏ အတွင်း၌.....
နတ်ဆိုးနယ်မြေ၏ ကျူးကျော်မှုနှင့်အတူ... တားမြစ်နယ်မြေများတွင် အိပ်စက်နေသော ရှေးဟောင်းအရှင်သခင် အများအပြားဟာ တုန်လှုပ် နိုးထလာကြပြီး... ဤသတင်းကို သိရှိသွားကြသည်။
“ နတ်ဆိုးနယ်မြေ ကျူးကျော်မှုဟုတ်လား... သေစမ်းကွာ... ဘာလို့ ဒီအချိန်ကိုမှ ရွေးရတာလဲ..... ”
“ အင်မော်တယ်တက်လှမ်းခြင်းအတွက် မျှော်လင့်ချက်က ငါ့မျက်စိရှေ့မှာတင် ရောက်နေပြီ။ ဒီလို အခိုက်အတန့်မျိုးမှာ... ဘယ်သူမှ ဒီအရှင်သခင်ရဲ့ အင်မော်တယ်တက်လှမ်းခြင်း အစီအစဉ်ကို လာနှောင့်ယှက်ဖို့ မျှော်လင့်မနေနဲ့ ”
“ အားလုံးပဲ... ငါတို့ လှုပ်ရှားကြမလား ”
တားမြစ်နယ်မြေများ အတွင်းရှိ အရှင်သခင်များအားလုံး ဒေါသထွက်နေကြပြီး... အချို့ အရှင်သခင်များမှာ နတ်ဆိုးနယ်မြေကို ခုခံရန် အသင့်ပြင်ထားကြပြီး ဖြစ်သည်။
ဟုတ်ပါသည်။ ဤသည်မှာ တားမြစ်နယ်မြေများ အတွင်းရှိ ဤရှေးဟောင်းအရှင်သခင်များက စိတ်ပြောင်းသွားပြီး အဆုံးမဲ့ကမ္ဘာ၏ သတ္တဝါများအတွက် တစ်ခုခု လုပ်ပေးရန် ဆုံးဖြတ်လိုက်ခြင်းကြောင့် မဟုတ်ဘဲ... သူတို့၏ စူးစမ်းရှာဖွေမှုများနှင့် တွက်ချက်မှုများအရ... အင်မော်တယ်နယ်မြေသို့ ဦးတည်သည်ဟု... ကောလာဟလ ထွက်ပေါ်နေသော အင်မော်တယ်လမ်းသည် မကြာမီ ပွင့်ဖွင့်လာနိုင်ခြေ များသောကြောင့် ဖြစ်သည်။
သူတို့သည် မည်သူ့ကိုမျှ သူတို့၏ အင်မော်တယ်တက်လှမ်းခြင်း အစီအစဉ်ကို နှောင့်ယှက်ခွင့် ပြုမည် မဟုတ်ပေ။
သို့သော်... ဤတားမြစ်နယ်မြေ အရှင်သခင်များ၏ ဒေါသသည် ခဏမျှသာ ကြာမြင့်ခဲ့ပြီး... ထို့နောက် သူတို့အားလုံး တည်ငြိမ်သွားကြသည်။
ဤအချိန်တွင်... မူလရှေးဟောင်းတွင်းနက်မှ ရှေးဟောင်းအရှင်သခင်တစ်ဦးက စကားပြောလာသည်။
“ တာအိုရောင်းရင်းတို့... ခင်ဗျားတို့ ခန့်မှန်းထားတဲ့ အင်မော်တယ်လမ်းက ဘယ်မှာ ပွင့်မှာလဲ ”
ဤစကားကို ကြားသောအခါ... အခြား တားမြစ်နယ်မြေများမှ အရှင်သခင်များက တုံ့ပြန်ကြသည်။
“ ဒီအရှင်သခင် တွက်ချက်မိသလောက်... အင်မော်တယ်လမ်း ပွင့်မယ့်နေရာက အဆုံးမဲ့တိုက်ကြီးပေါ်မှာပဲ ”
“ ဟုတ်တယ်... ဒီအရှင်သခင်ရဲ့ တွက်ချက်မှု ရလဒ်ကလည်း အတူတူပဲ ”
“ ဒီလိုသာဆိုရင်တော့.....”
မူလရှေးဟောင်းတွင်းနက်မှ ရှေးဟောင်းအရှင်သခင်က အသံတိုးတိုးဖြင့် ပြောလိုက်သည်။
“ အဲ့ဒီ နတ်ဆိုးနယ်မြေ သတ္တဝါတွေက အင်မော်တယ်လမ်း မပွင့်ခင် အဆုံးမဲ့နယ်မြေငါးခုကို မနစ်မြုပ်စေသရွေ့... ငါတို့ စိုးရိမ်စရာမလိုဘူး ”
“ ဒီအဆုံးမဲ့ကမ္ဘာ စကြဝဠာရဲ့ တခြားအစိတ်အပိုင်းတွေကတော့... အားလုံး ပျက်စီးသွားရင်တောင်... အရေးမကြီးဘူး ”
ဤစကားကို ကြားသောအခါ... အခြား တားမြစ်နယ်မြေများမှ အရှင်သခင်များသည် ဦးစွာ ကြောင်သွားကြပြီး... ထို့နောက် သူတို့အားလုံး တည်ငြိမ်သွားကြသည်။
ဟုတ်သည်... အဘယ်ကြောင့် သူတို့သည် ထိုနတ်ဆိုးနယ်မြေမှ နတ်ဆိုးများကို တားဆီးရန်... ယခုချက်ချင်း လှုပ်ရှားရန် လိုအပ်မည်နည်း။
အဆုံးမဲ့တိုက်ကြီး တည်ရှိနေသရွေ့... ဤအဆုံးမဲ့ကမ္ဘာရှိ အခြားနေရာများအားလုံး ပျက်စီးသွားလျှင်ပင်... မည်သို့ အရေးကြီးမည်နည်း။ ၎င်းသည် သူတို့၏ အင်မော်တယ်တက်လှမ်းခြင်း အစီအစဉ်ကို မည်သို့မျှ ထိခိုက်စေမည် မဟုတ်ပေ။
ဆန့်ကျင်ဘက်အနေဖြင့်... ထိုနတ်ဆိုးနယ်မြေမှ နတ်ဆိုးများကို ယခု သွားရောက်တိုက်ခိုက်ခြင်းသည် သူတို့၏ အဖိုးတန်သော စွမ်းအားများကို ကုန်ဆုံးစေနိုင်ပြီး... ၎င်းသည် သူတို့ မလိုချင်သောအရာ ဖြစ်သည်။
ယခုမူ... မူလရှေးဟောင်းတွင်းနက်မှ အရှင်သခင်၏ သတိပေးမှုကြောင့်... အခြား တားမြစ်နယ်မြေများမှ အရှင်သခင်များသည်လည်း ရုတ်တရက် နားလည်သွားကြသည်။
ဟုတ်သည်... အဘယ်ကြောင့် သူတို့သည် ထိုနတ်ဆိုးနယ်မြေမှ နတ်ဆိုးများကို တားဆီးရန်... ချက်ချင်း လှုပ်ရှားရန် လိုအပ်မည်နည်း။
အင်မော်တယ်လမ်းသည် အဆုံးမဲ့တိုက်ကြီးပေါ်တွင် ပွင့်မည်ဖြစ်သောကြောင့်... သူတို့အတွက် အဆုံးမဲ့တိုက်ကြီး မပျက်စီးစေရန်သာ လိုအပ်ပြီး... အဆုံးမဲ့တိုက်ကြီးပေါ်ရှိ သက်ရှိအားလုံး သေဆုံးသွားလျှင်ပင် အရေးမကြီးပေ။
အဆုံးမဲ့ကမ္ဘာ စကြဝဠာ၏ အခြား အစိတ်အပိုင်းများအတွက်မူကား.....
လုံးဝ ပျက်စီးသွားလျှင်ပင်... ဤရှေးဟောင်းအရှင်သခင်များကို တစ်ချက်မျှ မျက်မှောင်ကြုတ်စေမည် မဟုတ်ပေ။
" ဒီလိုသာဆိုရင်... ဒီအတိုင်းပဲ ထားလိုက်ကြတာပေါ့ ”
သဘောတူညီမှုတစ်ခု ရရှိပြီးနောက်... တားမြစ်နယ်မြေ အသီးသီးမှ ရှေးဟောင်းအရှင်သခင်များအားလုံးသည် အိပ်စက်ခြင်းသို့... ပြန်လည် ဝင်ရောက်သွားကြတော့သည်။
…………
ထျန်းချိုကြယ်.....
“ အဲ့ဒီ အဆုံးမဲ့ဧကရာဇ်မျိုးနွယ်တွေ ဘယ်မှာလဲ... ဧကရာဇ်မဟာမိတ်အဖွဲ့ မဟာဧကရာဇ်တွေ ဘယ်မှာလဲ... ဘာလို့ သူတို့ အခုထိ ဆင်းမလာသေးတာလဲ... သူတို့ ငါ့ရဲ့ ထျန်းချိုကြယ်ကို စွန့်ပစ်လိုက်ကြပြီလား ”
ပေါင်းစည်းခြင်းလမ်းစဉ်ဂိုဏ်းချုပ်ကြီးသည် သူ၏ တပည့်များအားလုံး ကြေကွဲဖွယ် သေဆုံးသွားသည်ကို ကြည့်ရင်း... ကောင်းကင်နှင့်မြေကြီးကို သွေးများ စိမ့်ဝင်ပျံ့နှံ့နေသည်ကို မြင်နေရကာ... သူ၏မျက်လုံးများမှာ သွေးမျက်ရည်များဖြင့် ပြည့်နှက်နေပြီး မျှော်လင့်ချက်မဲ့စွာ ဟိန်းဟောက်လိုက်သည်။
နတ်ဆိုးနယ်မြေ ကျူးကျော်မှု၏ ပထမဆုံး အခိုက်အတန့်တွင်... သူတို့သည် အဆုံးမဲ့ဧကရာဇ်မျိုးနွယ်များထံ အကူအညီ တောင်းခံခဲ့ပြီး ဖြစ်သည်။
သို့သော် ယခုအချိန်အထိ... မည်သည့် အားဖြည့်တပ်မျှ ပေါ်မလာသေးပေ။
နှစ်သောင်းပေါင်းများစွာကြာအောင်... ဧကရာဇ်မဟာမိတ်နှင့် အဆုံးမဲ့ဧကရာဇ်မျိုးနွယ်များသည် နတ်ဆိုးနယ်မြေ ကျူးကျော်မှုကို အမြဲတမ်း ခုခံတွန်းလှန်နေခဲ့ကြသည်ဟု သူတို့ ပြောခဲ့သည် မဟုတ်ပါလော။
ယခု... နတ်ဆိုးနယ်မြေ ကျူးကျော်မှုသည် ထျန်းချိုကြယ်ပေါ်ရှိ သက်ရှိအားလုံးနီးပါးကို သတ်ဖြတ်လုနီးပါး ဖြစ်နေပြီ။
ထို အဆုံးမဲ့ဧကရာဇ်မျိုးနွယ်များ... ထို ဧကရာဇ်မဟာမိတ်အဖွဲ့မှ မဟာဧကရာဇ်များ ဘယ်မှာလဲ။