အခန်း (၁၀၉-၁၁၀)
Vol. 8 Ch. 109-110
အခန်း (၁၀၉)- သက်ရှိအားလုံး စိတ်ပျက်အားငယ်ခြင်း၊ ဧကရာဇ်မဟာမိတ်အဖွဲ့မှ ယာယီဆုတ်ခွာရန် အမိန့်ပေးခြင်း
သူ မသေဆုံးမီတွင်... နဂါးရင်းမြစ်မဟာဧကရာဇ်၏ မျက်ဝန်းများမှာ... မကျေနပ်မှုနှင့် နောင်တတရားတို့ဖြင့် ပြည့်နှက်နေခဲ့လေသည်။
သူ၏ မကျေနပ်မှုမှာ... သူ့၌ ရှည်လျားသော သက်တမ်းတစ်ခု ကျန်ရှိနေသေးသော်လည်း... ယနေ့ ဤနေရာတွင် ပျက်စီးသေဆုံးရမည် ဖြစ်သောကြောင့်ပင်။
သူ၏ နောင်တတရားမှာမူ... အကယ်၍ ထိုစဉ်က ဧကရာဇ်မဟာမိတ်အဖွဲ့သည် ကုချန်အား အမျက်မထွက်စေခဲ့ဘဲ... သူ့အား ဧကရာဇ်ဂိတ်ကို စောင့်ကြပ်စေကာ နတ်ဆိုးနယ်မြေ၏ ကျူးကျော်မှုအား ခုခံတွန်းလှန်ခွင့် ပေးခဲ့ပါလျှင်... သူသည် ယနေ့ကဲ့သို့ ဝမ်းနည်းကြေကွဲဖွယ် အဆုံးသတ်မျိုးအား ရှောင်ရှားနိုင်ခဲ့မည် မဟုတ်လောဟူ၍ ဖြစ်သည်။
သို့သော် ယခုမူကား... အရာအားလုံး နောက်ကျသွားခဲ့လေပြီ။
မိုယွဲ့အရှင်၏ လက်ဝါးသည် ရက်စက်စွာ ရိုက်ခတ်လိုက်သည့် ထိုအခိုက်တွင်... နဂါးရင်းမြစ်မဟာဧကရာဇ်၏ အမြင်အာရုံမှာ အမှောင်ကျသွားခဲ့ပြီး... သူသည် ထာဝရတိတ်ဆိတ်ခြင်းထဲသို့ ကျရောက်သွားခဲ့တော့သည်။
နဂါးရင်းမြစ်မဟာဧကရာဇ်... ပျက်စီးကျဆုံးသွားလေပြီ!
" ဧကရာဇ်အဆင့်ရဲ့သွေးက... တကယ်ကို မူးယစ်စရာပဲ "
နဂါးရင်းမြစ်မဟာဧကရာဇ်၏ ခန္ဓာကိုယ်သည် ပေါက်ကွဲသွားခဲ့ပြီး... မိုယွဲ့အရှင်သည် ဧကရာဇ်၏ သွေးများဖြင့် ရေချိုးလိုက်လေသည်။ သူ၏မျက်နှာပေါ်တွင် ကျေနပ်ဝမ်းသာသော အမူအရာတစ်ခု ပေါ်ပေါက်လာခဲ့၏။
သူ၏လက်ဝါးထဲရှိ လှံနက်ကြီးပင်လျှင်... သွေးကြောင့် ရူးသွပ်နေသကဲ့သို့ တုန်ခါလျက်... ဟိန်းသံပြုနေလေသည်။
သူ၏ ခြေဖဝါးအောက်ရှိ နဂါးရင်းမြစ်ရှေးဟောင်းကြယ်ကြီးမှာမူ ယခုအခါ သေမလောက် တိတ်ဆိတ်ငြိမ်သက်သွားခဲ့လေပြီ။
" ဘိုးဘေး... ကျဆုံးသွားပြီ! "
" မဟုတ်ဘူး... ဒါ တကယ်မဟုတ်ဘူး... ဘိုးဘေးက ဘယ်လိုလုပ် သေနိုင်မှာလဲ?! "
" ဘုရားရေ! "
နဂါးရင်းမြစ်မိသားစုဝင်များသည် နဂါးရင်းမြစ်မဟာဧကရာဇ်အား မိုယွဲ့အရှင်၏ ရက်စက်စွာ သတ်ဖြတ်ခြင်းကို ကြည့်ရင်း... သူတို့၏ မျက်နှာအမူအရာများမှာ ခဏမျှ ကြောင်ငေးသွားကြပြီး... အိပ်မက်မက်နေသကဲ့သို့ ဖြစ်သွားကြသည်။
လွန်ခဲ့သော ခဏလေးကပင် သူတို့သည် စိတ်လှုပ်ရှားနေကြဆဲ... အားပေးအော်ဟစ်၍ ဝမ်းမြောက်နေကြဆဲ ဖြစ်သည်။
သူတို့သည် နဂါးရင်းမြစ်မဟာဧကရာဇ် ရောက်ရှိလာသည်နှင့်တစ်ပြိုင်နက်... နတ်ဆိုးနယ်မြေအရှင်သခင်အား ဧကန်မုချ တွန်းလှန်နိုင်ပြီး... နဂါးရင်းမြစ်ကြယ်တစ်ခုလုံးကို ကယ်တင်လိမ့်မည်ဟု ယုံကြည်ခဲ့ကြသည်။
သို့သော် ရက်စက်လှသော ရလဒ်သည် လူတိုင်းအား မယုံကြည်နိုင်ဖြစ်စေခဲ့သည်။
နဂါးရင်းမြစ်မဟာဧကရာဇ် သေဆုံးသွားခဲ့ပြီ... ထို့အပြင် သူသည် မမျှော်လင့်ထားဘဲ လျင်မြန်လွန်းစွာ ပျက်စီးကျဆုံးသွားခဲ့လေသည်။
သို့သော် နဂါးရင်းမြစ်မဟာဧကရာဇ် သေဆုံးသွားပါက... နဂါးရင်းမြစ်ကြယ်၏ အခြေအနေ မည်သို့ဖြစ်မည်နည်း။ သူတို့၏ အခြေအနေ မည်သို့ဖြစ်မည်နည်း?!
မိုးကောင်းကင်ကို ဖုံးလွှမ်းနေသော အနက်ရောင်မိုးတိမ်တိုက်ကြီးတစ်ခုကဲ့သို့... ထူထပ်လှသည့် နတ်ဆိုးနယ်မြေတပ်မတော်ကြီးသည် နဂါးရင်းမြစ်ကြယ်အား ကျူးကျော်ဝင်ရောက်လာသည်ကို ကြည့်ရင်း... ၎င်းပေါ်ရှိ သက်ရှိသတ္တဝါအားလုံး၏ မျက်နှာများတွင်... စိတ်ပျက်အားငယ်သော အမူအရာများ ထင်ဟပ်လာကြသည်။
နဂါးရင်းမြစ်ကြယ်၏ ကံကြမ္မာသည် အဆုံးသတ်သွားပြီဖြစ်ကြောင်း သူတို့ သိလိုက်ကြသည်။
သူတို့သည်လည်း အဆုံးသတ်သို့ ရောက်ကြရလေပြီ!
....................
အဆုံးမဲ့တိုက်ကြီး၏ အထက်၌.....
နယ်မြေကြီးငါးခုတွင် သက်ရှိသတ္တဝါအားလုံး တိတ်ဆိတ်ငြိမ်သက်နေကြပြီး... သူတို့၏စိတ်ထဲတွင် ပုံရိပ်ယောင်မိုးကောင်းကင်မျက်နှာပြင်ပေါ်၌... သူတို့ မြင်တွေ့ခဲ့ရသမျှကိုသာ ပြန်လည်မြင်ယောင်နေကြသည်။
ဧကရာဇ်မဟာမိတ်အဖွဲ့၏ မဟာဧကရာဇ်သည် အလွန်တရာ အားနည်းပျော့ညံ့လှပြီး... နတ်ဆိုးနယ်မြေအရှင်သခင်၏ သတ်ဖြတ်ခြင်းကို ခံလိုက်ရသည်။
ယနေ့တွင် နဂါးရင်းမြစ်ကြယ်သည် ဒုက္ခခံစားနေရပြီ... နောက်တစ်ကြိမ်တွင် မည်သည့်ကြယ်သို့ ရောက်ရှိလာမည်နည်း။
မကြာမီ အဆုံးမဲ့တိုက်ကြီး၏ အလှည့် ဖြစ်လာမည်လော။
တစ်ခဏတွင်းမှာပင် နယ်မြေကြီးငါးခုအတွင်းရှိ သက်ရှိသတ္တဝါအားလုံးသည် ထိတ်လန့်တုန်လှုပ်နေကြပြီး... ပျက်စီးခြင်းတရားကြီး နီးကပ်လာနေသည်ကို ခံစားနေကြရသည်။
" နတ်ဆိုးနယ်မြေ ကျူးကျော်လာတာကြာပြီ... ဧကရာဇ်မဟာမိတ်အဖွဲ့က မဟာဧကရာဇ်တွေ ဘယ်မှာလဲ? ဘာလို့ မဟာဧကရာဇ် တစ်ယောက်တည်းပဲ ပေါ်လာရတာလဲ? "
" ဟုတ်တယ်! ယွမ်ကျွင်းမဟာဧကရာဇ်က ဧကရာဇ်မဟာမိတ်အဖွဲ့က နတ်ဆိုးနယ်မြေကို နှစ်ပေါင်း ကိုးသောင်းလုံးလုံး ပိတ်ဆို့ထားခဲ့တယ်လို့ ပြောခဲ့တာ မဟုတ်ဘူးလား! ဘာလို့ အခု မဟာဧကရာဇ် တစ်ယောက်တည်းပဲ ပေါ်လာရတာလဲ? "
" ပြီးတော့ အဆုံးမဲ့ဧကရာဇ်မျိုးနွယ်တွေ... သူတို့က ဘာလို့ လှုပ်ရှားမှုမလုပ်ဘဲ... အဆုံးမဲ့ကမ္ဘာကို ကာကွယ်ဖို့ သူတို့ရဲ့ အန္တိမအမွေအနှစ်တွေကို ထုတ်မသုံးကြတာလဲ! "
အဆုံးမဲ့ကမ္ဘာ၏ သက်ရှိသတ္တဝါများသည် ထိတ်လန့်နေကြသလို... သံသယများလည်း ဝင်နေကြသည်။
ယခု နတ်ဆိုးနယ်မြေသည် ကျူးကျော်ဝင်ရောက်လာနေပြီ... ဧကရာဇ်မျိုးနွယ်များ အဘယ်မှာနည်း... ဧကရာဇ်မဟာမိတ်အဖွဲ့မှ ထိုမဟာဧကရာဇ်များ အဘယ်မှာနည်း။
အဘယ်ကြောင့် သူတို့သည် အဆုံးမဲ့ကမ္ဘာ၏ သက်ရှိသတ္တဝါများကို ကာကွယ်ရန် လှုပ်ရှားမှု မပြုလုပ်ကြသနည်း။
နတ်ဆိုးနယ်မြေတပ်မတော်သည် အဆုံးမဲ့တိုက်ကြီးသို့ ရောက်လာတော့မည်။
သက်ရှိသတ္တဝါများသည် ထိတ်လန့်၍ ရှုပ်ထွေးနေကြပြီး... ဤအခိုက်အတန့်တွင် အဆုံးမဲ့ကမ္ဘာရှိ ဧကရာဇ်မျိုးနွယ်အသီးသီးသည်လည်း... အဆုံးမဲ့ကမ္ဘာ၏ သက်ရှိသတ္တဝါများထက် အခြေအနေမထူးခြားလှပေ။
" ဧကရာဇ်မဟာမိတ်အဖွဲ့ကို မြန်မြန် သတင်းပို့! "
" ဒီလောက်ကြီးမားတဲ့ လှုပ်ရှားမှုကြီး ဖြစ်နေတာ... ဧကရာဇ်မဟာမိတ်အဖွဲ့က မဟာဧကရာဇ်တွေ ဘယ်လိုလုပ် မသိဘဲ နေနိုင်မှာလဲ? ဒါ့အပြင်... ငါတို့ သတင်းပို့ပြီးသွားပြီလေ... ဒါပေမယ့် ဧကရာဇ်မဟာမိတ်အဖွဲ့က ဘာအကြောင်းပြန်ကြားချက်မှ မပို့သေးဘူး! "
" မဟာဧကရာဇ်တွေက ဘာသဘောလဲ? သူတို့က ငါတို့ကို စွန့်ပစ်တော့မလို့လား? "
" မဖြစ်နိုင်ဘူး... ငါတို့အားလုံးက ဧကရာဇ်မဟာမိတ်အဖွဲ့ရဲ့ မျိုးဆက်တွေလေ... မဟာဧကရာဇ်က ငါတို့ကို ဘယ်လိုလုပ် စွန့်ပစ်နိုင်မှာလဲ..... "
ဧကရာဇ်မျိုးနွယ်အသီးသီးသည် ထိတ်လန့်တုန်လှုပ်နေကြသည်။ အဘယ်ကြောင့်ဆိုသော် သူတို့သည် နတ်ဆိုးနယ်မြေ၏ ကျူးကျော်မှုအကြောင်း သတင်းပို့ပြီးချိန်မှစ၍... ဧကရာဇ်မဟာမိတ်အဖွဲ့သည် တိတ်ဆိတ်နေခဲ့ပြီး... မည်သည့်တုံ့ပြန်မှုမျှ မရှိသောကြောင့်ဖြစ်သည်။
နတ်ဆိုးနယ်မြေတပ်မတော်သည် အဆုံးမဲ့တိုက်ကြီးသို့ ရောက်ရှိလာတော့မည်ကို မြင်တွေ့နေရသဖြင့်... ဤအဆုံးမဲ့ဧကရာဇ်မျိုးနွယ်များသည် မည်သို့လျှင် စိုးရိမ်ပူပန်ခြင်း မရှိဘဲ နေနိုင်မည်နည်း။
စိုးရိမ်ပူပန်စွာ စောင့်ဆိုင်းမှု ကာလတစ်ခုအပြီးတွင်... မတည်မငြိမ်ဖြစ်နေသော ဧကရာဇ်မျိုးနွယ်များသည် နောက်ဆုံးတွင်... ဧကရာဇ်မဟာမိတ်အဖွဲ့ထံမှ အကြောင်းပြန်ကြားချက်တစ်ခုကို လက်ခံရရှိခဲ့သည်။
လျှို့ဝှက်ဆန်းကြယ်သော မဟာဧကရာဇ်တစ်ပါး၏ ပုံရိပ်ယောင်သည် ဧကရာဇ်မျိုးနွယ်တစ်ခုစီသို့ ဆင်းသက်လာခဲ့ပြီး... သူတို့အား စစ်သင်္ဘောများပေါ်သို့ တက်ရောက်ရန်နှင့် ထိခိုက်မှုမရှိစေရန် အဆုံးမဲ့တိုက်ကြီးမှ... ယာယီ ထွက်ခွာသွားရန် ညွှန်ကြားခဲ့သည်!
အဆုံးမဲ့ကမ္ဘာမှ ယာယီထွက်ခွာ၍ ထိခိုက်မှုမရှိစေရန် ရှောင်ရှားရမည်လော။
ဧကရာဇ်မျိုးနွယ်အသီးသီးသည် အတန်ငယ် ကြောင်ငေးသွားကြသည်။
ဤသည်မှာ ဘာအဓိပ္ပာယ်နည်း။ ဧကရာဇ်မဟာမိတ်အဖွဲ့၏ မဟာဧကရာဇ်များသည် အဆုံးမဲ့တိုက်ကြီးကို စွန့်လွှတ်ရန် ရည်ရွယ်နေကြသလော။ ဤသည်မှာ နတ်ဆိုးနယ်မြေတပ်မတော်၏ သတ်ဖြတ်ခြင်းကို မခံရစေရန် သူတို့အား ကြိုတင်ထွက်ပြေးခိုင်းခြင်းလော။
သို့သော် အဆုံးမဲ့တိုက်ကြီးသည် အဆုံးမဲ့ကမ္ဘာ၏ အဓိကအချက်အချာ ဖြစ်သည်။
အကယ်၍ ဤနေရာကိုပင် စွန့်လွှတ်လိုက်ရပါက... အဆုံးမဲ့ကမ္ဘာတစ်ခုလုံးကို စွန့်လွှတ်လိုက်ခြင်း မဟုတ်ပေလော။
တစ်ခဏတွင်းမှာပင် ဧကရာဇ်မျိုးနွယ်များထဲမှ အချို့သောလူများသည် ဤရလဒ်အား လက်ခံရန် ခက်ခဲနေသည်ကို တွေ့ရှိရသည်။
မည်သို့ပင်ဖြစ်စေ... သူတို့သည် သူတို့ကိုယ်သူတို့ အဆုံးမဲ့ကမ္ဘာ၏ သက်ရှိသတ္တဝါများကို ကာကွယ်စောင့်ရှောက်သူများအဖြစ် သတ်မှတ်လေ့ရှိကြသည်။ ယခုအခါတွင်... အဆုံးမဲ့ကမ္ဘာ၏ သက်ရှိသတ္တဝါများကို စွန့်ပစ်၍ ထွက်ပြေးရမည်ဆိုသော ဤလုပ်ရပ်သည်ကား... အမှန်တကယ်ပင် အလွန်တရာ ဂုဏ်သိက္ခာမဲ့လှပေသည်။
သို့ရာတွင် လျင်မြန်လွန်းစွာပင် ဧကရာဇ်မျိုးနွယ်အသီးသီး၏ မိသားစုခေါင်းဆောင်များနှင့် ဘိုးဘေးများက လူတိုင်းကို နားချစည်းရုံးလိုက်ကြသည်။
" မင်းတို့ ဘာနားလည်လို့လဲ? နတ်ဆိုးနယ်မြေက စစ်သည်တော်တွေရဲ့ အဓိကခွန်အားက ဟိုနတ်ဆိုးနယ်မြေအရှင်သခင်တွေပဲ! အဲ့ဒီနတ်ဆိုးနယ်မြေအရှင်သခင်တွေကို ဖြေရှင်းပြီးရင်... သူတို့ရဲ့ လက်အောက်ခံ နတ်ဆိုးနယ်မြေတပ်မတော်က တိုက်ပွဲမတိုင်ခင်မှာတင် သူ့ဘာသာ ပြိုလဲသွားမှာပဲ! "
" ဧကရာဇ်မဟာမိတ်အဖွဲ့က ဧကရာဇ်တွေရဲ့ အမိန့်က အပြစ်မဲ့သူတွေ မထိခိုက်အောင် ရှောင်ရှားခိုင်းတာသက်သက်ပဲ။ သူတို့က ဒီအဆုံးမဲ့တိုက်ကြီးပေါ်မှာ... ဟိုနတ်ဆိုးနယ်မြေအရှင်သခင်တွေနဲ့ အသေအကြေ တိုက်ခိုက်ကြတော့မှာ! "
"ဟုတ်တယ်! ငါတို့အားလုံး ဆုတ်ခွာသွားမှသာ ငါတို့ ဧကရာဇ်မဟာမိတ်အဖွဲ့က မဟာဧကရာဇ်တွေက စိတ်ကို အပြည့်အဝနှစ်ပြီး ဟိုနတ်ဆိုးနယ်မြေအရှင်သခင်တွေနဲ့ အသေအကြေ တိုက်ခိုက်နိုင်မှာ! "
" ဒါပဲ... ဒါပဲ... ယာယီဆုတ်ခွာခြင်းက အနာဂတ်မှာ ပိုကောင်းတဲ့ တန်ပြန်တိုက်ခိုက်မှုတစ်ခုအတွက်ပဲ။ ဧကရာဇ်အဆင့်တိုက်ပွဲကြီး ပြီးဆုံးသွားတဲ့အခါမှ ငါတို့ ထွက်ပေါ်လာပြီး... နတ်ဆိုးနယ်မြေတပ်မတော်ကို ရှင်းလင်းပြီး... အဆုံးမဲ့ကမ္ဘာက သက်ရှိအားလုံးကို ကာကွယ်ရမယ့်အချိန်ပဲ! "
ဧကရာဇ်မျိုးနွယ်အသီးသီး၏ မိသားစုခေါင်းဆောင်များနှင့် ဘိုးဘေးများ၏ နားချစည်းရုံးမှုအောက်တွင်... ဧကရာဇ်မျိုးနွယ်များအတွင်းရှိ သဘောထားကွဲလွဲမှုငယ်လေးများအားလုံးသည် အဆုံးသတ်သွားကြသည်။
ဧကရာဇ်မျိုးနွယ်ဝင် အများစုအတွက်မူကား... သူတို့သည် အစကတည်းကပင် ဧကရာဇ်မဟာမိတ်အဖွဲ့၏ အမိန့်အား လက်နှစ်ဖက်၊ ခြေနှစ်ဖက်လုံး မြှောက်၍ သဘောတူချင်နေခဲ့ကြသည်။
နှစ်ပေါင်းများစွာ အခွင့်ထူးခံဘဝဖြင့် နေထိုင်ခဲ့ရခြင်းသည်... ဤဧကရာဇ်မျိုးနွယ်ဝင်များအား သူတို့၏ တာဝန်ဝတ္တရားများကို မေ့လျော့သွားစေခဲ့ပြီး... ဧကရာဇ်မျိုးနွယ်တစ်စုအနေဖြင့် မိမိတို့၏ အခွင့်ထူးများကို မည်သို့ ခံစားရမည်ကိုသာ သိရှိစေကြတော့သည်။
အဆုံးမဲ့ကမ္ဘာက သက်ရှိသတ္တဝါတွေရဲ့ အသက်အန္တရာယ်အတွက်လား...?
စိတ်မကောင်းပေမဲ့... ဧကရာဇ်မျိုးနွယ်ကိုယ်တိုင်တောင် အခုအချိန်မှာ သူတို့ကိုယ်ကို ကာကွယ်ဖို့ မနည်းကြိုးစားနေရတာ... အဲ့ဒီ သက်ရှိသတ္တဝါတွေအကြောင်း ဂရုစိုက်ဖို့ ဘယ်လို အတွေးမျိုး ရှိနိုင်ပါ့မလဲ!
ဤသည်ကား အဆုံးမဲ့ဧကရာဇ်မျိုးနွယ်များအတွင်းရှိ... မျိုးနွယ်ဝင်အများစု၏ စစ်မှန်သော စိတ်နေသဘောထားပင် ဖြစ်သည်။
သူတို့ကိုယ်တိုင် လုံခြုံနေသမျှ ကာလပတ်လုံး... သက်ရှိသတ္တဝါတို့၏ ကမ္ဘာလောကကြီး မည်သို့ပင်ဖြစ်သွားစေကာမူ... အနည်းငယ်မျှ အရေးကြီးမည်မသုတ်ချေ။
ယခုအခါ... အဆုံးမဲ့တိုက်ကြီးမှ ထွက်ပြေးရန် တရားဝင်ဆင်ခြေတစ်ခု ရှိလာပြီဖြစ်သောကြောင့်... ဧကရာဇ်မျိုးနွယ်အသီးသီးသည် လျင်မြန်စွာ ထွက်ခွာသွားလိုကြပြီး... လွတ်မြောက်ရန်... မဟုတ်သေး... တတ်နိုင်သမျှ အဝေးဆုံးသို့ သွားရန် ဖြစ်သည်။
လက်ရှိ ရွှေ့ပြောင်းဆုတ်ခွာခြင်းသည် အနာဂတ်တွင် ပိုမိုကောင်းမွန်သော တန်ပြန်တိုက်ခိုက်မှုတစ်ခု ပြုလုပ်နိုင်ရန်အတွက်သာ ဖြစ်သည်။
ဤသည်မှာ မဟာဗျူဟာမြောက် ဆုတ်ခွာခြင်းတစ်ခုမျှသာဖြစ်ပြီး... ထိတ်လန့်တကြား ထွက်ပြေးခြင်း မဟုတ်သည်မှာ သေချာ၏။
တစ်ခဏတွင်းမှာပင် ဧကရာဇ်မျိုးနွယ်အသီးသီးသည် လျင်မြန်စွာ လှုပ်ရှားလာကြပြီး... သူတို့၏ ခံတပ်စခန်းများမှ အဖိုးတန်ရတနာများကို စုဆောင်းကြကာ... မျိုးနွယ်ဝင်များကို စုစည်းကြပြီး အချိန်မရွေး ရွှေ့ပြောင်းထွက်ခွာရန် ပြင်ဆင်နေကြတော့သည်။
....................
ကောင်းကင်ဘုံတားမြစ်နယ်မြေအတွင်း၌.....
ကုချန်သည် အထက်ကောင်းကင်ပင်မခန်းမဆောင်တွင် နေထိုင်နေခဲ့ပြီး အပြင်သို့ မထွက်ခဲ့သော်ငြား.....
အဆုံးမဲ့ကမ္ဘာ၏ နယ်မြေကြီးငါးခုရှိ လှုပ်ရှားမှုအားလုံးသည် သူ၏ မျက်စိထဲသို့ ကျရောက်နေခဲ့၏။
ကုချန်သည် အဆုံးမဲ့ဧကရာဇ်မျိုးနွယ်များသည် 'အဖိုးတန်ပစ္စည်းများ' ကို ထုပ်ပိုးနေကြပြီး... အဆုံးမဲ့တိုက်ကြီးမှ ထွက်ခွာရန် ပြင်ဆင်နေဟန်ရှိသည်ကို မြင်သောအခါ... မပြုံးဘဲ မနေနိုင်ခဲ့ပေ။
" ထွက်သွားချင်လို့လား? ငါကိုယ်တော့်ကိုရော ခွင့်တောင်းပြီးပြီလား? "
ကုချန်သည် ညင်သာစွာ ရေရွတ်လိုက်သည်။
အတိတ်ကာလတွင်... သူသည် ဤအဆုံးမဲ့ဧကရာဇ်မျိုးနွယ်များအားလုံး၏ သစ္စာဖောက်ခြင်းကို ခံခဲ့ရသည်။ အဆုံးမဲ့တိုက်ကြီးသို့ ပြန်လည်ရောက်ရှိပြီးနောက်... အဘယ်ကြောင့် သူသည် ဤသစ္စာဖောက် ဧကရာဇ်မျိုးနွယ်များအားလုံးကို ချက်ချင်း မျိုးဖြုတ်ပစ်ခြင်း မပြုခဲ့သနည်း။
ဤသည်မှာ ကုချန်က ကြင်နာတတ်သောကြောင့် သို့မဟုတ် စိတ်နှလုံး နူးညံ့သောကြောင့် မဟုတ်ပေ။
အကြောင်းမှာ... ဤအဆုံးမဲ့ဧကရာဇ်မျိုးနွယ်များကို ရိုးရှင်းစွာ ရှင်းလင်းလိုက်ခြင်းသည်... သူတို့အတွက် အလွန်တရာ လွယ်ကူလွန်းသွားမည်ဟု သူခံစားမိသောကြောင့် ဖြစ်သည်။
ယခု... နတ်ဆိုးနယ်မြေသည် တိုက်ခိုက်လာလေပြီ.....
နောက်ဆုံးတွင် ဤအဆုံးမဲ့ဧကရာဇ်မျိုးနွယ်များကို အစစ်အမှန် အပြစ်ပေးရမည့် အချိန်ကို ကျရောက်လာခဲ့ပြီ... ထို့ကြောင့် ကုချန်သည် သူတို့အား... ဤမျှ လွယ်ကူစွာ ထွက်ခွာသွားခွင့် မပေးနိုင်ချေ။
အခန်း (၁၁၀) - ဧကရာဇ်မျိုးနွယ်စု ထွက်ပြေးလွတ်မြောက်ခြင်း၊ ကုချန် လှုပ်ရှားလာခြင်း၊ အရာအားလုံး သေခြင်းတရားဖြင့် အဆုံးသတ်သွားခြင်း
" မြန်မြန်လုပ်ကြ... မြန်မြန်...လောလောဆယ် အသုံးမဝင်တဲ့အရာတွေကို ဂရုမစိုက်ကြနဲ့ဦး... အရေးကြီးတဲ့ ပစ္စည်းတွေကို အရင်ဆုံး ယူကြ "
ဧကရာဇ်မျိုးနွယ် ယွမ်မိသားစု၌... မိသားစုခေါင်းဆောင် ယွမ်ဝူကျီသည် သူ၏မျိုးနွယ်ဝင်များအား... အဆက်မပြတ် တိုက်တွန်းလျက် ရှိလေသည်။
" မိသားစုခေါင်းဆောင်...လက်အောက်က မျိုးနွယ်ဝင်တွေအားလုံး အဆင်သင့်ဖြစ်နေပါပြီ "
မကြာမီပင် ယွမ်မိသားစု အကြီးအကဲတစ်ဦးသည် သတင်းပို့ရန် အလျင်အမြန် ပြေးလာခဲ့လေသည်။
" ကောင်းပြီ...ဒါဆိုရင် ချက်ချင်း ထွက်ခွာကြစို့ "
ယွမ်ဝူကျီသည် သူ၏နဖူးပြင်မှ ချွေးစက်များကို သုတ်လိုက်ပြီးနောက်... လက်တစ်ဖက်ကို ဝှေ့ယမ်းလိုက်ကာ ယွမ်မိသားစုအား ချက်ချင်းထွက်ခွာရန် အမိန့်ပေးလိုက်လေသည်။
ယွမ်မိသားစု မျိုးနွယ်ဝင်များစွာ စစ်သင်္ဘောပေါ်သို့ တက်ရောက်နေသည်ကို ကြည့်ရင်း... ယွမ်ဝူကျီ၏ နှုတ်ခမ်းထက်တွင် ကျေနပ်သော အပြုံးတစ်ချက် အလိုအလျောက် ပေါ်ပေါက်လာခဲ့သည်။ သူသည် ဤတစ်ကြိမ် နတ်ဆိုးနယ်မြေ၏ ကျူးကျော်မှုမှာ ပြင်းထန်လှပြီး... လွယ်ကူစွာ ငြိမ်သက်သွားမည်မဟုတ်သည်ကို အစောကတည်းက မြင်တွေ့ထားခဲ့ပြီး ဖြစ်လေသည်။
ထို့ကြောင့်... နတ်ဆိုးနယ်မြေ၏ ကျူးကျော်မှုအကြောင်း သူသိရှိလိုက်သည့် ထိုအခိုက်အတန့်တွင်ပင်... သူသည် အဆိုးဆုံးအတွက် ကြိုတင်ပြင်ဆင်ထားခဲ့ပြီး... ယွမ်မိသားစု မျိုးနွယ်ဝင်အားလုံးကို ဆင့်ခေါ်ရန်နှင့် မိသားစုအတွင်းရှိ အဖိုးတန်ရတနာအားလုံးကို စုဆောင်းထားရန် တိတ်တဆိတ် အမိန့်ပေးခဲ့လေသည်။
ယခုအခါ ဧကရာဇ်မဟာမိတ်အဖွဲ့မှ ဆုတ်ခွာရန် အမိန့်ထုတ်ပြန်လိုက်ပြီးနောက်... အခြားဧကရာဇ်မျိုးနွယ်များ ကမောက်ကမ ဖြစ်နေကြဆဲအချိန်၌... ယွမ်မိသားစုသည် ရွှေ့ပြောင်းထွက်ခွာရန် အသင့်ပြင်ဆင်ပြီး ဖြစ်နေလေသည်။
ဤအဆုံးမဲ့နယ်မြေကြီးငါးခုရှိ သက်ရှိသတ္တဝါများအတွက်မူကား... အနာဂတ်တွင် လုံခြုံမှု သေချာသွားသည့်အခါ... ယွမ်မိသားစုသည် သူတို့အား ကာကွယ်ရန် ပြန်လာပေလိမ့်မည်။ ယခုအချိန်အတွက်မူကား... သူတို့၏ ကံကောင်းခြင်းအတွက် သူတို့ဘာသာ ဆုတောင်းနေကြရုံသာ ရှိတော့သည်။
" လူမိုက်တစ်သိုက်... ငါ့ ယွမ်မိသားစုက အရင်ဆုံး ထွက်ခွာသွားတော့မယ် "
ယွမ်မိသားစု မျိုးနွယ်ဝင်အားလုံး ရတနာလှေများနှင့် စစ်သင်္ဘောများပေါ်သို့ တက်ရောက်သွားကြသည်ကို မြင်သောအခါ... ယွမ်ဝူကျီသည် ကျေနပ်စွာ ပြုံးလိုက်ပြီးနောက်... အဆုံးမဲ့တိုက်ကြီးမှ ထွက်ခွာရန် ချက်ချင်း အမိန့်ပေးလိုက်လေသည်။
သို့သော်လည်း မထွက်ခွာမီတွင်... အချိန်မတိုင်မီ ယွမ်မိသားစု၏ ထွက်ပြေးသွားသည့် အမှန်တရားအား အဆုံးမဲ့ကမ္ဘာ၏ သက်ရှိသတ္တဝါများမှ ရှာဖွေတွေ့ရှိမသွားစေရန်... ယွမ်ဝူကျီသည် ယွမ်မိသားစု အကြီးအကဲများအား ကျင့်စဉ်တံတိုင်းတစ်ခုကို အသုံးပြု၍ ရတနာလှေများနှင့် စစ်သင်္ဘောများ၏ ခြေရာများကို လုံးဝ ဖုံးကွယ်ထားရန် အမိန့်ပေးခဲ့သည်။ သို့မှသာ မည်သူတစ်ဦးတစ်ယောက်ကမျှ တွေ့မြင်နိုင်မည် မဟုတ်ပေ။
စစ်သင်္ဘောများသည် ကောင်းကင်ယံသို့ တက်သွားခဲ့ပြီး... အဆုံးမဲ့တိုက်ကြီး၏ အပြင်ဘက် အာကာသနယ်မြေသို့ လျင်မြန်စွာ ပျံသန်းသွားကြသည်။ လက်ဖက်ရည်တစ်ခွက် သောက်သုံးစာ အချိန်ကာလမျှအတွင်းမှာပင်... ယွမ်မိသားစု၏ ရတနာလှေများနှင့် စစ်သင်္ဘောများသည် အဆုံးမဲ့တိုက်ကြီးမှ ထွက်ခွာသွားခဲ့ပြီး... အပြင်ဘက် အာကာသနယ်မြေသို့ ဝင်ရောက်သွားခဲ့ပြီး ဖြစ်လေသည်။
" မိသားစုခေါင်းဆောင်...ကျွန်တော်တို့ နောက်ထပ် ဘယ်နေရာကို သွားကြမှာလဲ "
စစ်သင်္ဘောအား မောင်းနှင်နေသော ယွမ်မိသားစု တပည့်တစ်ဦးက မေးမြန်းလိုက်သည်။
" ဟို...နတ်ဆိုးနယ်မြေက ကောင်တွေရဲ့ ဆန့်ကျင်ဘက် လားရာအတိုင်း ဝေးနိုင်သမျှ ဝေးဝေး သွား "
ယွမ်ဝူကျီသည် တွန့်ဆုတ်မှု တစ်စုံတစ်ရာမရှိဘဲ အမိန့်ပေးလိုက်လေသည်။
ထိုတစ်ချိန်တည်းမှာပင် သူသည် ဖုံးကွယ်ခြင်း ကျင့်စဉ်တံတိုင်းအား ထိန်းသိမ်းရန် တာဝန်ရှိသော အကြီးအကဲများအား ၎င်း၏လုပ်ဆောင်ချက်ကို ရပ်တန့်ရန် ပြောကြားလိုက်သည်။
ယခုအခါ သူတို့သည် အဆုံးမဲ့တိုက်ကြီးမှ ထွက်ခွာလာခဲ့ပြီး နယ်မြေကြီးငါးခု၏ သက်ရှိသတ္တဝါများ မမြင်တွေ့နိုင်တော့သော နေရာသို့ ရောက်ရှိနေပြီ ဖြစ်သောကြောင့်... ဖုံးကွယ်ခြင်း ကျင့်စဉ်တံတိုင်းအား ဆက်လက် ဖွင့်လှစ်ထားရန် သဘာဝအတိုင်း လိုအပ်တော့မည် မဟုတ်ပေ။ မကြာမီပင် ယွမ်မိသားစု၏ စစ်သင်္ဘောများအားလုံးသည် စကြာဝဠာ၏ ကြယ်တာရာမိုးကောင်းကင်ထက်၌ ပုံရိပ်ပေါ်ထွက်လာကြလေသည်။
ယွမ်ဝူကျီ မျှော်လင့်မထားခဲ့သည်မှာ ယွမ်မိသားစု၏ သင်္ဘောအုပ်စုနှင့် မလှမ်းမကမ်းတွင်... အခြားသော သင်္ဘောအုပ်စုတစ်စုသည်လည်း လေဟာနယ်မြေထဲ၌ ပုံရိပ်ပေါ်ထွက်လာခဲ့ခြင်းပင် ဖြစ်သည်။
" ဒါက..... "
ယွမ်ဝူကျီသည် အံ့အားသင့်စွာဖြင့် ထိုသင်္ဘောအုပ်စု၏ လားရာဘက်သို့ ကြည့်လိုက်ရာ... ၎င်းသည် အမှန်စင်စစ် ဧကရာဇ်မျိုးနွယ် ထို့ပါမိသားစု၏ သင်္ဘောအုပ်စု ဖြစ်နေသည်ကို ရှာဖွေတွေ့ရှိသွားလေသည်။
" ယွမ်မိသားစုခေါင်းဆောင် နေကောင်းရဲ့လား "
ထို့ပါမိသားစု၏ ပင်မသင်္ဘောကြီးထံမှ ဝိညာဉ်အသိဖြင့် ဆက်သွယ်မှုတစ်ခု ရောက်ရှိလာပြီး... တစ်ဖက်လူ၏ မည်သူမည်ဝါဖြစ်ကြောင်းကို ယွမ်ဝူကျီထံသို့ ချက်ချင်း သိရှိစေလိုက်သည်... ၎င်းမှာ ထို့ပါမိသားစု၏ ခေါင်းဆောင် ထို့ပါယဲ့ ပင် ဖြစ်သည်။
" ထို့ပါမိသားစုက အရမ်းလျင်တာပဲ "
ယွမ်ဝူကျီက မပြုံးချင်ပြုံးချင်သော အပြုံးဖြင့် ပြောလိုက်သည်။
သူသည် မိမိကိုယ်မိမိ လုံလောက်အောင် လျင်မြန်စွာ တုံ့ပြန်နိုင်ခဲ့သည်ဟု မျှော်လင့်မထားခဲ့သော်လည်း... ထို့ပါမိသားစု၏ တုံ့ပြန်မှုသည်လည်း နှေးကွေးခြင်း မရှိခဲ့ပေ။
" ဟားဟား...ယွမ်မိသားစုခေါင်းဆောင်ရဲ့ တုံ့ပြန်မှုကလည်း မနှေးပါဘူး "
ထို့ပါယဲ့က ခပ်ဖျော့ဖျော့ ပြုံးလိုက်သည်။
" ငါတို့ မိသားစုနှစ်စုလုံး အဆုံးမဲ့တိုက်ကြီးကနေ အရင်ဆုံး ထွက်ခွာလာခဲ့ကြပြီးပြီလေ... အတူတကွ ခရီးဆက်ကြရင် မကောင်းဘူးလား... မမျှော်လင့်ထားတဲ့ အခြေအနေတစ်ခုခု ကြုံလာခဲ့ရင် တစ်ယောက်နဲ့တစ်ယောက် အပြန်အလှန် ကြည့်ရှုစောင့်ရှောက်နိုင်တာပေါ့ "
" အဲ့ဒီလိုဖြစ်ရင်....."
ယွမ်ဝူကျီသည် ခဏမျှ စဉ်းစားလိုက်ပြီး... ထို့ပါယဲ့၏ အကြံပြုချက်မှာ ကောင်းမွန်သည်ဟု တွေးလိုက်မိသည်။
ယခုအခါ နတ်ဆိုးနယ်မြေသည် ကျူးကျော်ဝင်ရောက်လာပြီဖြစ်ရာ... ဤသည်မှာ ဒုက္ခများသော အချိန်အခါဖြစ်ပြီး... မမျှော်လင့်ထားသော အရာများ ဖြစ်မလာဟု အာမခံချက် မရှိပေ။ ဧကရာဇ်မျိုးနွယ်နှစ်စု အတူတကွ ခရီးသွားခြင်းသည် သူတို့၏ အင်အားကို ပိုမို အားကောင်းစေမည်ဖြစ်ပြီး... အချို့သော အန္တရာယ်များကို ကိုင်တွယ်ဖြေရှင်းရန် ပိုမို လွယ်ကူစေပေလိမ့်မည်။ ဤသို့ တွေးမိသောအခါ ယွမ်ဝူကျီသည် လင်းလက်တောက်ပစွာ ပြုံးလိုက်လေသည်။
" ဟားဟား... ညီတော် ထို့ပါရဲ့ အကြံပြုချက်က အရမ်းပဲ ကောင်းမွန်တယ်... ကိုယ်တော်လဲ မငြင်းပယ်တော့ပါဘူး... ကိုယ်တော်တို့ မိသားစုနှစ်စု အတူတကွ ခရီးဆက်ကြပါစို့ "
သဘောတူညီချက် ရရှိပြီးနောက်... ယွမ်မိသားစုနှင့် ထို့ပါမိသားစုတို့၏ သင်္ဘောအုပ်စုများသည် ပေါင်းစည်းလိုက်ကြသည်။
" ထွက်ခွာကြ..... "
မိသားစုနှစ်စု၏ စစ်သင်္ဘောများသည် ခန့်ညားထည်ဝါစွာ ရှေ့သို့တိုးလျက်... အဆုံးမဲ့တိုက်ကြီးအား နောက်ကွယ်တွင် ထားခဲ့ရန် ဦးတည်လိုက်ကြတော့သည်။
သို့သော်လည်း ဤအခိုက်အတန့်လေးမှာပင် ကြီးမားလှသော စွမ်းအားတစ်ခုသည် အဆုံးမဲ့တိုက်ကြီးမှ ထွက်ပေါ်လာခဲ့ပြီး... အဆုံးမဲ့နယ်မြေကြီးငါးခုတစ်ခွင်သို့ ပျံ့နှံ့သွားကာ ဧကရာဇ်မျိုးနွယ်အသီးသီး၏ ခံတပ်စခန်းများကို ထိုးဖောက်ဝင်ရောက်လျက်... တစ်ချိန်တည်းမှာပင် ယွမ်မိသားစုနှင့် ထို့ပါမိသားစုတို့၏ သင်္ဘောအုပ်စုများကိုပါ ဝန်းရံပိတ်ဆို့လိုက်လေသည်။
" ထွက်သွားဖို့ ကြိုးစားနေတာလား...ငါကိုယ်တော်က မင်းတို့ကို ခွင့်ပြုချက် ပေးခဲ့ပြီးပြီလား... "
ခံစားချက်ကင်းမဲ့သော အသံတစ်ခုသည် ယွမ်မိသားစုနှင့် ထို့ပါမိသားစု မျိုးနွယ်ဝင်များ၏ နားများထဲတွင် ပဲ့တင်ထပ်သွားခဲ့သည်။ သူတို့သာမကဘဲ အဆုံးမဲ့တိုက်ကြီးပေါ်တွင် ကျန်ရှိနေသေးသော အခြားဧကရာဇ်မျိုးနွယ်များအားလုံးသည်လည်း ဤခံစားချက်ကင်းမဲ့သော အသံကို ကြားလိုက်ကြရသည်။၎င်းမှာ ကောင်းကင်ဘုံအရှင်သခင် ပင်တည်း။
ဤအသံကို ကြားလိုက်ရသည်နှင့် ဧကရာဇ်မျိုးနွယ်ဝင်အားလုံး၏ မျက်နှာအမူအရာများသည် ရုတ်တရက် ပြောင်းလဲသွားကြသည်။ အကြောင်းမှာ... ဤအသံသည် သူတို့အတွက် အလွန်တရာ ရင်းနှီးကျွမ်းဝင်နေသောကြောင့်ပင်။ ၎င်းမှာ အခြားမည်သူမျှ မဟုတ်ဘဲ ယခင် ကုမိသားစု မဟာဧကရာဇ်... ယခု ကောင်းကင်ဘုံအရှင်သခင် ပင် ဖြစ်သည်။
ကောင်းကင်ဘုံအရှင်သခင်... သူ ဘာလုပ်ရန် ကြံရွယ်နေသနည်း။
ယွမ်ဝူကျီ၏ မျက်နှာပေါ်တွင် ရုန်းကန်နေရသော အမူအရာများ ထင်ဟပ်လာသည်။ ယွမ်မိသားစုသည် အန္တရာယ်များလှသော အဆုံးမဲ့တိုက်ကြီးမှ ထွက်ခွာသွားတော့မည် ဖြစ်သော်လည်း... ယခု ကောင်းကင်ဘုံအရှင်သခင်က သူ့အား နေခဲ့ရန် ပြောကြားနေသည်လော။ တကယ့်ကို ရယ်ဖွယ်ရာပင်။
သူတို့၏ ရုန်းကန်မှုနှင့် တွန့်ဆုတ်မှုများကြားတွင်... ယွမ်ဝူကျီနှင့် ထို့ပါယဲ့ နှစ်ဦးစလုံးသည် ရပ်တန့်ရန် အမိန့်အား... အချိန်မီ ထုတ်ပြန်နိုင်ခြင်း မရှိခဲ့ပေ။
ထို့နောက် နောက်တစ်ခဏ၌ ဓားအလင်းတန်းတစ်ခုသည် ထာဝရကို ထိုးဖောက်လျက် လက်ခနဲ ဖြတ်သန်းသွားပြီး... ယွမ်မိသားစုနှင့် ထို့ပါမိသားစု သင်္ဘောအုပ်စုများ၏ ရှေ့ဆုံးမှ စစ်သင်္ဘောအချို့အား... ချက်ချင်းပင် ချေမှုန်းဖျက်ဆီးကာ ပြာမှုန့်အဖြစ်သို့ ပြောင်းလဲသွားစေခဲ့သည်။
" ရပ်ကြ... မြန်မြန်... ရပ်လိုက်ကြ "
ဤမြင်ကွင်းကို မြင်တွေ့လိုက်ရသောအခါ... ယွမ်ဝူကျီနှင့် ထို့ပါယဲ့တို့သည် အိပ်မက်မှ နိုးထလာသကဲ့သို့... ရုတ်တရက် သတိဝင်လာခဲ့ပြီး အလျင်အမြန် အမိန့်များ ထုတ်ပြန်လိုက်ကြတော့သည်။
" ကောင်းကင်ဘုံအရှင်သခင်... ခင်ဗျား ဘာလုပ်ချင်နေတာလဲ "
ယွမ်ဝူကျီသည် ဒေါသတကြီး ပြောလိုက်သည်။ ဤ ကောင်းကင်ဘုံအရှင်သခင်သည် ယခုမှ ပေါ်ထွက်လာပြီး ဘာလုပ်လိုနေသနည်း။
" ငါကိုယ်တော်က ဘာလုပ်ချင်တာလဲ ဟုတ်လား..... "
ကုချန်သည် ခပ်ဖွဖွ ရယ်မောလိုက်ပြီး... ခံစားချက်ကင်းမဲ့စွာ ဆိုလိုက်သည်။
" အဆုံးမဲ့ဧကရာဇ်မျိုးနွယ်တွေက ဒီသက်ရှိသတ္တဝါတွေကို အကာအကွယ်ပေးရမဲ့သူတွေ မဟုတ်ဘူးလား... အခု နတ်ဆိုးနယ်မြေက ကြီးမားတဲ့ ရန်သူကြီးတွေ ငါတို့ ရှေ့မှောက်ကို ရောက်ရှိနေပြီ... မင်းတို့ အဆုံးမဲ့ဧကရာဇ်မျိုးနွယ်တွေက မင်းတို့ရဲ့ တာဝန်တွေကို ဘယ်လိုများ စွန့်ပစ်ပြီး... ထွက်ပြေးနိုင်ရတာလဲ "
" မင်းတို့အားလုံး နေခဲ့ကြပြီး... နတ်ဆိုးနယ်မြေတပ်မတော်နဲ့ သေတဲ့အထိ တိုက်ခိုက်ကြရမယ် "
" မင်း..... "
ယွမ်ဝူကျီနှင့် ထို့ပါယဲ့တို့သည် ကြောင်ငေးသွားကြပြီး... အဆုံးမဲ့တိုက်ကြီးပေါ်တွင် ကျန်ရှိနေသေးသော... ထွက်ပြေးရန် ပြင်ဆင်နေကြသည့် အခြားအဆုံးမဲ့ဧကရာဇ်မျိုးနွယ်များသည်လည်း... အုတ်အော်သောင်းတင်း ဖြစ်သွားကြသည်။
ဤ ကောင်းကင်ဘုံအရှင်သခင်သည် ဤဧကရာဇ်မျိုးနွယ်များကို ထွက်ခွာခွင့် မပေးရုံသာမက... သူတို့အား ဟိုနတ်ဆိုးနယ်မြေက ကောင်များနှင့် တိုက်ခိုက်နေသည်ကို စောင့်ကြည့်နေလိုသည်လော။ ဤနည်းလမ်းသည် အလွန်တရာ ရက်စက်လွန်းလှသည်။
" ကောင်းကင်ဘုံအရှင်သခင်... ခင်ဗျား... ဒီလို ရက်စက်ယုတ်မာနေတာ... ဝဋ်လည်မှာကို မကြောက်ဘူးလား "
ဧကရာဇ်မျိုးနွယ်ဝင်တစ်ဦးက ဒေါသတကြီး ဆိုလိုက်သည်။
သို့သော်... ကုချန်သည် တုံ့ပြန်ခြင်း မပြုခဲ့ပေ။ သူသည် ဤဧကရာဇ်မျိုးနွယ်များအား... ယခု ထွက်ပြေးခြင်း၏ အကျိုးဆက်ကိုသာ ပြောကြားလိုက်ခြင်း ဖြစ်သည်။
လွန်ခဲ့သော နှစ်ပေါင်း ကိုးသောင်းက သူတစ်ဦးတည်းကသာ အဆုံးအစမရှိသော နတ်ဆိုးနယ်မြေက နတ်ဆိုးများကို တွန်းလှန်ခဲ့ပြီး... ထိုအချိန်တွင် ဤအဆုံးမဲ့ဧကရာဇ်မျိုးနွယ်များမှာမူ ဘာတစ်ခုမျှ မလုပ်ဆောင်ဘဲ... နောက်ကွယ်မှနေ၍ အကျိုးအမြတ်များကို ခံစားနေခဲ့ကြသည်။
ယခုအခါ သူတို့ နေရာချင်း လဲလှယ်ရမည့် အချိန်တန်ပြီ ဖြစ်သည်... ဤအဆုံးမဲ့ဧကရာဇ်မျိုးနွယ်များသည် နတ်ဆိုးနယ်မြေမှ နတ်ဆိုးများကို သွားရောက် တိုက်ခိုက်ရမည့် အချိန်ပင်တည်း။
" ပြန်ကြ...အဆုံးမဲ့တိုက်ကြီးဆီကို ပြန်ကြ..... "
ယွမ်ဝူကျီသည် သွားများကို ကြိတ်လိုက်ပြီး အမိန့်ပေးလိုက်သည်။
ယခုအချိန်တွင် ကောင်းကင်ဘုံအရှင်သခင်၏ အလိုဆန္ဒအား ဆန့်ကျင်ခြင်းသည်... သေခြင်းတရားဆီသို့သာ ဦးတည်သွားမည်ဖြစ်ကြောင်း သူ သိရှိနေသည်။ အဆုံးမဲ့တိုက်ကြီးသို့ ပြန်သွားပါက... မျှော်လင့်ချက် အလင်းတန်း သေးသေးလေးတစ်ခု ရှိနေနိုင်သေးသည်။
မည်သို့ပင်ဖြစ်စေ သူတို့သည် အဆုံးမဲ့ကမ္ဘာ၏ အပြင်ဘက်ဒေသတွင် ဆက်လက် နေထိုင်၍ မဖြစ်ပေ။ သို့မဟုတ်ပါက နတ်ဆိုးနယ်မြေတပ်မတော်ကြီး ရောက်ရှိလာသည်နှင့်တစ်ပြိုင်နက် ယွမ်မိသားစုနှင့် ထို့ပါမိသားစုတို့သည် ရှေ့ဆုံးမှ ပစ်မှတ်များ ဖြစ်လာကြပေလိမ့်မည်။
ယွမ်မိသားစုနှင့် ထို့ပါမိသားစုတို့၏ စစ်သင်္ဘောများသည် ဖြည်းညင်းစွာ လှည့်ပတ်လိုက်ကြပြီး... အဆုံးမဲ့တိုက်ကြီးသို့ ပြန်သွားရန် ရည်ရွယ်လိုက်ကြသည်။ သို့သော်လည်း သူတို့သည် ဤကြယ်တာရာမိုးကောင်းကင်မှ ထွက်ခွာရန် အပြုမှာပင်... နောက်ထပ် ဓားအလင်းတန်းတစ်ခုသည် တိုက်ခိုက်လာခဲ့ပြီး... အဆုံးမဲ့တိုက်ကြီး၏ လားရာဘက်နှင့် ကပ်လျက်ရှိသော စစ်သင်္ဘောအချို့ကို ဖျက်ဆီးပစ်လိုက်ပြန်သည်။
" ကောင်းကင်ဘုံအရှင်သခင်...ကျွန်တော်တို့ မထွက်ခွာတော့ဖို့ ဆုံးဖြတ်ပြီးပြီ... ဘာကြောင့် ခင်ဗျားက ဆက်ပြီး တိုက်ခိုက်နေရသေးတာလဲ "
ထို့ပါယဲ့၏ မျက်လုံးများမှာ သွေးနီရောင်တမျှ နီရဲလျက် ရှိသည်။
" ငါကိုယ်တော်က မင်းတို့အားလုံးကို ထွက်မသွားဖို့ အမိန့်ပေးခဲ့ပေမဲ့ အဆုံးမဲ့ကမ္ဘာဆီကို ပြန်လာခွင့်ပြုတယ်လို့ မပြောခဲ့ဘူး "
ကုချန်က ခံစားချက်ကင်းမဲ့စွာ ဆိုလိုက်သည်။
" မင်း..... "
ထို့ပါယဲ့နှင့် ယွမ်ဝူကျီတို့သည် လက်တွေ့တွင် ရူးသွပ်သွားကြတော့မည် ဖြစ်သည်။
အဆုံးမဲ့ကမ္ဘာမှ ထွက်ခွာသွားခြင်းသည် သေခြင်းတရားကို ဆိုလိုသည်။ အဆုံးမဲ့ကမ္ဘာသို့ ပြန်သွားခြင်းသည်လည်း သေခြင်းတရားကို ဆိုလိုသည်။ ဤနေရာတွင် နေထိုင်ရင်း နတ်ဆိုးနယ်မြေတပ်မတော်ကြီး ရောက်ရှိလာသည်ကို စောင့်ဆိုင်းနေခြင်းသည်လည်း သေခြင်းတရားပင် ဖြစ်သည်။
မည်သည့် ရွေးချယ်မှုပင် ဖြစ်စေကာမူ... ယွမ်မိသားစုနှင့် ထို့ပါမိသားစုအား စောင့်ကြိုနေသောအရာမှာ... သေလမ်းမှလွဲ၍ အခြား မည်သည့်အရာမျှ မရှိတော့ပေ။