ကောင်းကင်အထိမြင့်တက်သွားသောခွန်အား

"ဘာလဲ... အခုခင်များတို့အလှည့်ကျတော့ မသေရဲကြတော့ဘူးလား"

"လွန်ခဲ့တဲ့တစ်မိနစ်ကတင် လက်စားချေမယ်လို့အော်ဟစ်နေကြတဲ့သတ္တိတွေ ဘယ်ရောက်ကုန်ပြီလဲ။ ကဲ... မြန်မြန်လုပ်ကြစမ်းပါ"

ကျန်းချန်က သူတို့ကိုယ်သူတို့ သတ်သေမှာမဟုတ်မှန်းသိသော်လည်း သူတို့၏တွန့်ဆုတ်နေသော ရုပ်ပျက်ဆင်းပျက်အမူအရာကိုကြည့်ပြီး ကျေနပ်နေမိသည်။

"သတ်စမ်း"

အရှင်မြတ်ကျင့်ဟွမ်းသည် တစ်စက္ကန့်မျှပင် ထပ်မံအောင့်အည်းမထားနိုင်တော့ဘဲ အော်ဟစ်လိုက်သည်။ အင်အားသာနေမှတော့ စကားအများကြီးပြောနေရန်မလို။

"သူက ခေါင်းဆောင်ပဲ၊ သူ့ကို အရင်ရှင်းပစ်ကြ"

"ဟုတ်တယ်၊ ဘာပဲဖြစ်ဖြစ် ဒီတရားခံကို အရင်ဆုံးသုတ်သင်ရမယ်"

"သူ့ကို အလွယ်တကူမသေစေနဲ့"

ပညာရှင်အားလုံး တစ်ပြိုင်နက်တိုက်ခိုက်လိုက်၏။ သူတော်စင်အဆင့် ပညာရှင်သုံးဦးသည် သူတို့၏ နယ်ပယ်များကို ထပ်မံဖြန့်ကျက်လိုက်ပြီး ကျန်းချန်ကို ပိတ်လှောင်လိုက်ကြသည်။

နယ်ပယ်အတွင်းရှိနိယာမများ ထပ်မံပြောင်းလဲသွားသော်လည်း ကျန်းချန်က တည်ငြိမ်စွာဖြင့် သူ၏တာအိုနန်းတော်ကို ထုတ်ဖော်လိုက်သည်။ သူစုပ်ယူလိုက်သော ဝိညာဉ်တစ်သိန်းသည် သူ၏စိတ်ဝိညာဉ်ကိုသာ မြင့်တက်စေခဲ့ပြီး ဝိညာဉ်စွမ်းအားအဆင့်မှာ တာအိုနန်းတော်အဆင့် ၄ တွင် ရှိနေဆဲဖြစ်သည်။ သို့သော် အချို့သောအရာများမှာ ထာဝရပြောင်းလဲသွားချေပြီ။

သူ၏ ကိုးရောင်ခြယ်တာအိုနန်းတော်ကိုကြည့်လျှင် ယခင်က အင်မော်တယ်အဆင့်မြစ်နှစ်စင်းမှလွဲ၍ ကျန်သောမြစ်များမှာအဆင့်နိမ့်၏။ ကျန်းချန်သည် တရားထိုင်ခြင်း သို့မဟုတ် ကျင့်စဉ်ကို လေ့လာခြင်း၌ စိတ်မဝင်စားခဲ့သောကြောင့်ဖြစ်သည်။ သို့သော် ယခုအခါ ကောင်းကင်မှကျဆင်းလာသော မြစ်ကိုးစင်းအနက် ကျန်သောမြစ်ခုနစ်စင်းလုံးသည် သူတော်စင်အဆင့်သို့ တိုက်ရိုက်ခုန်တက်သွားကြသည်။

ကျင့်ကြံသူတစ်သိန်း၏ ဘဝအတွေ့အကြုံများနှင့် ထိုးထွင်းသိမြင်မှုများသည် ကျန်းချန်၏ အားနည်းချက်ဖြစ်သော အတွေ့အကြုံနည်းပါးမှုနှင့် အခြေခံမခိုင်မာမှုကို အကောင်းဆုံး ဖြည့်ဆည်းပေးလိုက်သည်။ ယခုအခါ အောက်ကမ္ဘာတစ်ခုလုံးတွင် သူတော်စင်များအပါအဝင် မည်သူမျှ ကျန်းချန်၏ ဗဟုသုတနှင့် အတွေ့အကြုံကို မယှဉ်နိုင်တော့ပေ။

သူ့တွင် နယ်ပယ်မရှိသေးသော်လည်း သူတော်စင်အဆင့်စိတ်ဝိညာဉ် ရှိနေပြီဖြစ်သည်။ သူ၏ စိတ်ဝိညာဉ်စွမ်းအားကို ထုတ်လွှတ်လိုက်သောအခါ စစ်မြေပြင်တစ်ခုလုံး ဝိညာဉ်မုန်တိုင်း တိုက်ခတ်သွားသလိုဖြစ်သွား၏။

သူတော်စင်အဆင့်၏ နယ်ပယ်သုံးခုသည် တစ်ပြိုင်နက်တည်း အစိတ်စိတ်အမွှာမွှာ ကွဲအက်သွားသည်။ နယ်ပယ်များပျက်စီးသွားသဖြင့် ပိုင်ရှင်ဖြစ်သော သူတော်စင်သုံးဦးမှာ သူတို့၏အခြေခံထိခိုက်သွားပြီး သွေးအန်ကာ ဝိညာဉ်များကြေမွကုန်သည်။

အနီးအနားရှိ တာအိုနန်းတော်အဆင့် ပညာရှင် ၅၀ ကျော်မှာလည်း ထိုဝိညာဉ်မုန်တိုင်း၏ ရိုက်ခတ်မှုကြောင့် သူတို့၏တာအိုနန်းတော်များ ပြိုလဲသွားပြီး ဝိညာဉ်များမှာ လေပြင်းထဲက ဖယောင်းတိုင်မီးအလား ချက်ချင်းငြိမ်းသတ်ခံလိုက်ရသည်။

ကျန်းချန်သည် ဓားကိုပင်ဝှေ့ယမ်းစရာမလိုဘဲ လူအားလုံး နေရာမှာတင်သေဆုံးကုန်သည်။ ကျန်သောတပည့်သုံးထောင်မှာလည်း ဘာသံမျှမထွက်နိုင်ဘဲ ကောင်းကင်ပေါ်မှပြုတ်ကျကုန်၏။

ကျန်းချန်၏ စိတ်ကူးတစ်ခုတည်းဖြင့်ပင် လူအားလုံးသေဆုံးကုန်ပြီး သူတော်စင်သုံးဦးသာ အသက်ရှင်ကျန်တော့သည်။ ၎င်းသည် စိတ်ဝိညာဉ်အဆင့် အပြတ်အသတ် ကွာခြားမှုပင်။

ကျန်းချန်သည် သူတော်စင်သုံးဦး နာကျင်ခံစားနေစဉ် သူ၏စိတ်ဝိညာဉ်စွမ်းအားဖြင့် သူတို့၏ အသိစိတ်ထဲသို့ တိုက်ရိုက်ဝင်ရောက်တိုက်ခိုက်လိုက်သည်။

"သုတ်သင်စမ်း"

ထိုစကားလုံးသည် သူတို့သုံးဦး၏စိတ်ထဲတွင် ဟိန်းထွက်သွားသည်။ ၎င်းမှာ စကားအမိန့်တော်ကျိန်စာပင်။ ကျန်းချန်၏စိတ်ဝိညာဉ်မှာ သူတော်စင်သုံးဦးထက် တစ်ဆင့်မြင့်နေသဖြင့် ထိုစကားတစ်ခွန်းသည် သူတို့အတွက် နောက်ဆုံးသောဖိနှိပ်မှု ဖြစ်သွားသည်။

သူတို့၏မျက်လုံးများမှ အလင်းရောင်များ ကွယ်ပျောက်သွားပြီး ကောင်းကင်ပေါ်မှ သက်မဲ့ခန္ဓာကိုယ်များအဖြစ် ပြုတ်ကျကုန်၏။

ပုယွီမြင့်မြတ်နယ်မြေ၏တိုက်ပွဲမှာ ပြီးဆုံးသွားပြီဖြစ်သည်။ ကျန်းချန်သည် သူ၏သူတော်စင်အရှိန်အဝါကို ပြန်လည်ထိန်းချုပ်လိုက်သည်။ အကယ်၍ စစ်မှန်သော သူတော်စင်အဆင့်နှင့်ယှဉ်လျှင် သူက အားနည်းနေသေးသော်လည်း ဤသူတော်စင်အဆင့်စိတ်ဝိညာဉ်သွေးကြောင့် သူသည် အောက်ကမ္ဘာ၏ထိပ်တန်းပညာရှင် စာရင်းဝင်သွားလေပြီ။

ထို့နောက် သူသည် စစ်မြေပြင်မှပစ္စည်းများကို စတင်သိမ်းဆည်းတော့သည်။ ယခုတစ်ကြိမ် ရိတ်သိမ်းမှုမှာ အလွန်ကြီးမား၏။ သူတော်စင်သုံးဦးထံမှ အဆင့်နိမ့်မှော်ရတနာသုံးခုကို ရရှိခဲ့သည်။

သိမ်းဆည်းရမိသော သိုလှောင်လက်စွပ်ပေါင်း တစ်သိန်းကျော်ရှိသဖြင့် သူ မရေတွက်တော့။ အဆင့်မြင့် ဝိညာဉ်ကျောက်တုံးများနှင့် ဝိညာဉ်ဆေးလုံးများမှာ မရေမတွက်နိုင်အောင် များပြားလှသဖြင့် စနစ်အမှတ်များအဖြစ် ပြောင်းလဲပစ်လိုက်သည်။

ကျန်းချန်သည် ပုယွီမြင့်မြတ်နယ်မြေကို သူ၏ဂိုဏ်းအတွက် နေရာသစ်အဖြစ်အသုံးပြုရန် ရည်ရွယ်ထားသဖြင့် တောင်ထိပ်အားလုံးကို မဖျက်ဆီးခဲ့ပေ။ ဆေးလုံးများနှင့် ဝိညာဉ်ကျောက်တုံး အမြောက်အမြားကိုလည်း တပည့်များကျင့်ကြံရန်အတွက် ချန်ထားခဲ့သည်။

ပစ္စည်းများကို စနစ်အမှတ်များအဖြစ် ပြောင်းလဲပြီးနောက် သူ၏ အမှတ်ပေါင်းမှာ ၃၅၈.၇၄ သန်းအထိ ရှိသွားလေပြီ။