အပြစ်ဒဏ်ခတ်ရမည်

"အပြောင်းအလဲဟုတ်လား။ ဒါက သူတော်စင်ကြီး ဘာကိုဆိုလိုတာလဲ။ ကတိဖျက်တော့မယ်လို့ ဆိုလိုတာလား"

နှလုံးသားဌာနမှ ပညာရှင်များ၏မျက်နှာများမှာ ချက်ချင်းပင်ပျက်ယွင်းသွားကြသည်။ ယခုတစ်ကြိမ် အင်မော်တယ်နယ်မြေတံခါးပွင့်ချိန်တွင် သူတို့မျိုးနွယ်စုမှ အဖွဲ့ဝင်ငါးရာခန့်ဝင်ရောက်ရန် စီစဉ်ထား၏။

၎င်းမှာ နှလုံးသားထိုးဖောက်ကန်တော့၏ အစွမ်းထက်သောကာကွယ်မှုကြောင့်ဖြစ်ပြီး လန်ယီ၏ လေးမျက်နှာကမ္ဘာဦးဆေးမီးဖိုမှာမူ အများဆုံးသုံးဦးသာ ကာကွယ်ပေးနိုင်သည်။

အင်မော်တယ်နယ်မြေသို့ ဝင်ရောက်နိုင်ခြင်းမှာ သူတို့အတွက် အလွန်အရေးကြီးသောကိစ္စဖြစ်သည်။ ထိုနေရာတွင်ကျင့်ကြံခြင်းဖြင့် လူသားဘဝမှလွတ်မြောက်ကာ အင်မော်တယ်အဖြစ်သို့ တက်လှမ်းနိုင်မည် မဟုတ်ပါလား။

ထို့အပြင် ရှေးယခင်က အင်မော်တယ်နယ်မြေသို့ရောက်ရှိသွားသော သူတို့၏ဘိုးဘေးကိုးဦးကို ပြန်လည်ရှာဖွေပြီး မျိုးနွယ်စု၏ဂုဏ်ရောင်ကို ပြန်လည်ထွန်းတောက်စေရန် သူတို့က မျှော်လင့်နေကြ၏။

ယခုအခါ တံခါးပွင့်ရန် သုံးလသာလိုတော့သည့်အချိန်တွင်မှ ပူးပေါင်းဆောင်ရွက်မှု ပျက်ပြားသွားပါက သူတို့မှာ သွေးအန်မတတ်ခံစားရမည်ဖြစ်သည်။

"မျိုးနွယ်စုခေါင်းဆောင်ချင်းစော့... မင်း နားလည်မှုလွဲနေပြီ"

သူတော်စင်ပိဖုန်းက သူ၏ ဝတ်ရုံလက်ကိုခါယမ်းလိုက်ရင်း အေးဆေးစွာပြုံးလိုက်သည်။

"ငါက မင်းတို့နဲ့ပူးပေါင်းပြီးတံခါးဖွင့်ဖို့ ဆန္ဒရှိနေတုန်းပါ။ ဒါပေမဲ့ ကန့်သတ်ချက်တစ်ခုတော့ ထပ်တိုးချင်တယ်"

ချင်းစော့က အလျင်အမြန်မေးမြန်းသည်။

"ဘာကန့်သတ်ချက်လဲ"

"ဖေးရှန်ဂိုဏ်းက ဘယ်သူ့ကိုမှ အင်မော်တယ်နယ်မြေထဲ ဝင်ခွင့်မပြုရဘူး"

တံခါးပွင့်သွားသောအခါ ဝင်ပေါက်ကိုးခုရှိမည်ဖြစ်ပြီး ထိုဝင်ပေါက်များကို ဖွင့်လှစ်ပေးသည့် ရတနာကိုးပါး၏ပိုင်ရှင်များက ထိန်းချုပ်ထားမည်ဖြစ်သည်။ ထို့ကြောင့် ရတနာပိုင်ရှင်များမှာ မည်သူ့ကိုမဆို ဝင်ခွင့်ပိတ်ပင်နိုင်သော အစွမ်းရှိ၏။ လန်ယီဝင်ရောက်ရန် မျှော်လင့်ထားသောလမ်းကြောင်းမှာ စုန်းမျိုးနွယ်စု၏ဝင်ပေါက်ဖြစ်သည်။

သူတော်စင်ပိဖုန်း၏စကားကို ကြားသောအခါ ချင်းစော့နှင့် အကြီးအကဲများမှာ တစ်ယောက်ကိုတစ်ယောက် နားမလည်နိုင်စွာ ကြည့်လိုက်ကြ၏။

"သူတော်စင်ကြီး... ဖေးရှန်ဂိုဏ်းဆိုတာ ဘယ်ဂိုဏ်းလဲဆိုတာ ကျွန်မတို့ကိုရှင်းပြပေးပါဦး"

ဤစကားကြောင့် သူတော်စင်ပိဖုန်းပင်လျှင် ဆွံ့အသွားရသည်။ ဖေးရှန်ဂိုဏ်း၏သတင်းမှာ အပြင်လောကတွင်ဟိုးဟိုးကျော်နေပြီး သာမန်အရပ်သားများပင် ဆွေးနွေးနေကြသည့်ကိစ္စဖြစ်သည်။ သို့သော် မြင့်မြတ်နယ်မြေအဆင့်ရှိသော ဤမျိုးနွယ်စုကမူ ဘာမှမသိကြပေ။

"ဖေးရှန်ဂိုဏ်းရဲ့ဂိုဏ်းချုပ်က ကျန်းချန်တဲ့။ လန်ယီလည်း အဲဒီမှာရှိနေတယ်"

"ဟင်... ကျန်းချန်နဲ့ လန်ယီ ဟုတ်လား"

ထိုအမည်နှစ်ခုကိုကြားလိုက်ရုံဖြင့် နှလုံးသားဌာနမှလူများမှာ ချက်ချင်းမှတ်မိသွားကြသည်။

"သူတော်စင်ကြီး... ဘာလို့ ဒီလိုဆုံးဖြတ်ချက်ချရတာလဲ။ လန်ယီက စုန်းမျိုးနွယ်စုရဲ့ တစ်ဦးတည်းသော အနွယ်ဝင်ပဲလေ။ ကျန်းချန်ကိုတော့ ပယ်ထုတ်လို့ရပေမဲ့ လန်ယီကိုတော့ ဝင်ခွင့်ပေးသင့်ပါတယ်"

နှလုံးသားမျိုးနွယ်စုနှင့် စုန်းမျိုးနွယ်စုမှာ ယခင်က အခင်ဆုံးမဟာမိတ်များဖြစ်ခဲ့ကြ၏။ လန်ယီကို အင်မော်တယ်နယ်မြေသို့ ခေါ်ဆောင်သွားခြင်းဖြင့် စုန်းမျိုးနွယ်စု ပြန်လည်နိုးထလာရန် သူတို့က မျှော်လင့်ထားခြင်းဖြစ်သည်။

သို့သော် သူတော်စင်ပိဖုန်း၏သဘောထားမှာ အလွန်တင်းမာလှသည်။

"သူတို့က နတ်လူအပေါင်း ရွံရှာဖွယ်ရာတွေကို လုပ်ဆောင်ခဲ့ကြတယ်။ ချင်လင်နယ်မြေက သူတို့ကို လက်မခံနိုင်တော့ဘူး။ ငါက ဒီကိုလာဆွေးနွေးတာမဟုတ်ဘူး၊ ငါ့ရဲ့ဆုံးဖြတ်ချက်ကို လာအသိပေးတာ... မင်းတို့က သူတို့ကို အပြစ်ဒဏ်မခတ်ရင် အင်မော်တယ်နယ်မြေတံခါးကိုလည်း ဖွင့်မှာမဟုတ်ဘူး"

သူတော်စင်ပိဖုန်းသည် ကျန်းချန်၏နောက်ကွယ်တွင် သူတော်စင်အဆင့်ရှိသူတစ်ဦး ရှိနေနိုင်သည်ဟု သံသယရှိသဖြင့် ကိုယ်တိုင်သွားရောက် မတိုက်ခိုက်ဘဲ နှလုံးသားမျိုးနွယ်စုကိုအသုံးချကာ အခြေအနေကိုစုံစမ်းလိုခြင်းဖြစ်သည်။

ချင်းစော့မှာ နားမလည်နိုင်ဖြစ်နေ၏။

"ကျန်းချန်တို့က ပုယွီမြင့်မြတ်နယ်မြေနဲ့ ပဋိပက္ခအနည်းငယ်ပဲရှိတာလေ။ ဒါက သူတော်စင်ကြီးအဆင့်နဲ့ ဝင်ပါဖို့လိုလို့လား"

ပိဖုန်းက သက်ပြင်းချလိုက်ရင်း...

"အမှန်အတိုင်းပြောရရင် ပုယွီမြင့်မြတ်နယ်မြေက သူတို့လက်ချက်နဲ့ အမြစ်ပြတ်သုတ်သင်ခံလိုက်ရပြီ"

"ဘာ"

နှလုံးသားဌာနမှပညာရှင်များမှာ အလွန်အမင်းတုန်လှုပ်သွားကြသည်။

"ပုယွီမြင့်မြတ်နယ်မြေက ပျက်စီးသွားပြီလား။ ကျန်းချန်ကပဲ လုပ်လိုက်တာလား။ ကျန်းချန်က တာအိုနန်းတော်အဆင့်ပဲရှိတာ မဟုတ်ဘူးလား"

သူတော်စင်ပိဖုန်းက အေးစက်စွာဖြင့် ရွေးချယ်စရာနှစ်ခုကိုပေး၏။

"ဖေးရှန်ဂိုဏ်းကို ချင်လင်နယ်မြေကနေမောင်းထုတ်ဖို့... ဒါမှမဟုတ်ရင် သူတို့ကို အင်မော်တယ်နယ်မြေထဲ ဝင်ခွင့်ပိတ်ပင်ဖို့ လုပ်ရမယ်။ နောက်ရက်အနည်းငယ်အတွင်း သူတို့ရဲ့ ဂိုဏ်းတည်ထောင်ခြင်း အခမ်းအနားရှိတယ်၊ အဲဒီမတိုင်ခင် ငါ့ကို ကျေနပ်လောက်တဲ့အဖြေတစ်ခုပေးပါ"

ဟုဆိုကာ ပျောက်ကွယ်သွားတော့သည်။

ပိဖုန်းထွက်ခွာသွားပြီးနောက် နှလုံးသားဌာနတစ်ခုလုံး တိတ်ဆိတ်သွားသည်။ သူတို့၏ခေါင်းထဲတွင် ကျန်းချန်က ပုယွီမြင့်မြတ်နယ်မြေကို ဖျက်ဆီးလိုက်သည်ဟူသော စကားတစ်ခွန်းကသာ ပဲ့တင်ထပ်နေ၏။ ပုယွီမြင့်မြတ်နယ်မြေမှာ သူတို့နှင့် အင်အားချင်းမကွာခြားသော်လည်း ထိုမျှအင်အားကြီးသောနေရာကြီး တစ်ညတည်းနှင့် ပျောက်ကွယ်သွားသည်မှာ မယုံနိုင်စရာပင်။

ချင်းစော့သည် ကျန်းချန်ထွက်ခွာသွားစဉ်က ပြောခဲ့သော

"ငါ့နာမည်ကို မင်းတို့ မကြာခင်ပြန်ကြားရလိမ့်မယ်"

ဟူသည့်စကားကို သတိရသွားသည်။ ထိုစဉ်က သူမအရေးမစိုက်ခဲ့သော်လည်း ယခုမူ ထိုစကားမှာ တကယ်ဖြစ်လာခဲ့လေပြီ။

"မျိုးနွယ်စုခေါင်းဆောင်... ကျွန်မတို့ဘာလုပ်ကြမလဲ။ သူတော်စင်ပိဖုန်းရဲ့စကားကို မလိုက်နာရင် အင်မော်တယ်နယ်မြေကိုသွားနိုင်တော့မှာမဟုတ်ဘူး"

ချင်းစော့က နားထင်ကိုဖိလိုက်ရင်း အမိန့်ပေးလိုက်တော့သည်...

"လူလွှတ်ပြီး သတင်းကိုအမြန်စုံစမ်းခိုင်း... သူတို့ရဲ့အခမ်းအနားအကြောင်းကိုလည်း သိအောင်လုပ်"