အခန်း (၁၄၁-၁၄၂)
Vol. 11 Ch. 141-142
အခန်း (၁၄၁) - လူတိုင်း ထိတ်လန့်တုန်လှုပ်သွားခြင်း၊ တားမြစ်နယ်မြေအား ဖိနှိပ်ခြင်း
လော့ထျန်းနန်းတော်၏ ထိုလုပ်ကြံသတ်ဖြတ်သူသည် ကုချန်အနေဖြင့် လော့ထျန်းနန်းတော်၏ တိကျသောတည်နေရာကို မည်သည့်အခါမျှ ရှာဖွေတွေ့ရှိနိုင်မည်မဟုတ်ဟု တွေးထင်လျက် ဝမ်းမြောက်ဝမ်းသာ ဖြစ်နေဆဲပင်ဖြစ်သည်။
သို့သော် သူ မသိရှိခဲ့သည့်အချက်မှာ ကုချန်သည် သူ၏စိတ်နှလုံးသားထဲတွင် လော့ထျန်းနန်းတော်အား သေဒဏ်ချမှတ်ပြီးသား ဖြစ်နေပြီ ဆိုသည်ကိုပင်။
မည်သို့ပင်ဖြစ်စေကာမူ... ယနေ့ သူသည် ဤအဆုံးမဲ့ကမ္ဘာအား ဇောက်ထိုးမိုးမျှော် လှန်လှောပစ်မည်ဖြစ်ပြီး... အမှောင်ထဲတွင် ပုန်းအောင်းနေသော ဤပုရွက်ဆိတ်များအား တူးဖော်ကာ ၎င်းတို့အားလုံးကို ချေမွှပစ်မည် ဖြစ်၏။
ဤသည်မှာ ယဲ့ယင်းယင်းအတွက် လက်စားချေရန် သက်သက်မျှသာ မဟုတ်ခဲ့ပေ။
ကုချန်သည် ဤအဖြစ်အပျက်အား အသုံးပြု၍ ဤအဆုံးမဲ့ကမ္ဘာအား ထိတ်လန့်သွားစေရန်နှင့် မသမာသော ရည်ရွယ်ချက်များ ရှိနေသူတို့အား သတိပေးရန်လည်း ရည်ရွယ်ထားခဲ့သည်။
အကယ်၍ ၎င်းသည် တန်းတူရည်တူများကြား မျှတသော တိုက်ပွဲတစ်ခုဖြစ်ပါက... ကုမိသားစုဝင်တစ်ဦး အရိုက်ခံရသည်ဖြစ်စေ... အသတ်ခံရသည်ဖြစ်စေ ကိစ္စမရှိပေ။ အကြောင်းမှာ ၎င်းသည် သူတို့၏ အရည်အချင်း နိမ့်ကျမှုကြောင့်သာ ဖြစ်၏။
သို့သော် တစ်စုံတစ်ယောက်က ယုတ်ညံ့သိမ်ဖျင်းသော လုပ်ကြံသတ်ဖြတ်သည့် နည်းဗျူဟာများဖြင့် အားနည်းသူအား လျှို့ဝှက်အနိုင်ကျင့်ခဲ့မည်ဆိုပါက... ကုချန်အား သူ၏ရက်စက်ကြမ်းကြုတ်သော လုပ်ရပ်အတွက် အပြစ်တင်၍ ရမည်မဟုတ်ဘဲ... ၎င်းတို့နှင့် ၎င်းတို့၏နောက်ကွယ်မှ အင်အားစုများအား ဖုန်မှုန့်အဖြစ်သို့ ချေမွှကာ... လုံးဝဥဿုံ အမြစ်ပြတ်ချေမှုန်းပစ်မည်သာ ဖြစ်သည်။
လော့ထျန်းနန်းတော်သည် ယခုအခါ ကြက်ကိုသတ်၍ မျောက်အား သတိပေးရာတွင် သူတို့ကိုယ်တိုင် အသုံးပြုသည့် ကြက် ဖြစ်သွားခဲ့လေပြီ။
မည်သို့ပင်ဖြစ်စေကာမူ လော့ထျန်းနန်းတော်သည် ယနေ့တွင် မုချ သေဆုံးရမည် ဖြစ်၏။
" ကောင်းကင်ဘုံအရှင်သခင်... လက်လျှော့လိုက်ပါ... ခင်ဗျား လော့ထျန်းနန်းတော်ရဲ့ တည်နေရာအတိအကျကို ဘယ်လိုမှ ရှာတွေ့နိုင်မှာ မဟုတ်ဘူး..... "
သူ၏အနားတွင်မူ လော့ထျန်းနန်းတော်၏ လုပ်ကြံသတ်ဖြတ်သူသည် မည်သည့်အရာများ ဖြစ်ပျက်နေသည်ကို မသိရှိသေးဘဲ... ကုချန်အနေဖြင့် လော့ထျန်းနန်းတော်နှင့် ပတ်သက်သော မည်သည့်သဲလွန်စမျှ ရရှိနိုင်မည်မဟုတ်ဟု ယုံကြည်လျက်... ကျေနပ်နေသော အမူအရာဖြင့် ရှိနေဆဲ ဖြစ်သည်။
ဤအတောအတွင်း ကုချန်၏ မြင့်မြတ်စိတ်အာရုံသည် ပင်လယ်လေးစင်းနှင့် တောတောင်ရှစ်ခွင်ဆီသို့ တိတ်ဆိတ်စွာ ဖြန့်ကျက်သွားခဲ့ပြီး ဖြစ်၏။
" ဘာဖြစ်တာလဲ..... "
အထက်ကောင်းကင်တားမြစ်နယ်မြေနှင့် အနီးကပ်ဆုံးသော ကွေ့ယီအင်မော်တယ်ဂိုဏ်းသည် အထက်ကောင်းကင်တားမြစ်နယ်မြေမှ ထုတ်လွှတ်လိုက်သော အမြင့်ဆုံးသော စွမ်းအားကို ပထမဆုံး ခံစားလိုက်ရသည်။
ကွေ့ယီအင်မော်တယ်ဂိုဏ်းအတွင်းရှိ ဂိုဏ်းချုပ်နှင့် အကြီးအကဲများ အပါအဝင် တပည့်များအားလုံးသည် ချက်ချင်းပင် အလိုအလျောက် ဒူးထောက်လိုက်ကြရပြီး... မည်သည်တို့ ဖြစ်ပျက်နေသည်ကို မသိရှိဘဲ သူတို့၏မျက်လုံးများထဲတွင် ကြောက်ရွံ့ထိတ်လန့်မှုတို့ဖြင့် ပြည့်နှက်လျက်... ကောင်းကင်သို့ မော့ကြည့်နေခဲ့ကြသည်။
" ဒီ အမြင့်ဆုံးစွမ်းအားက အထက်ကောင်းကင်တားမြစ်နယ်မြေကနေ ထုတ်လွှတ်နေတာနဲ့တူတယ် "
ကွေ့ယီအင်မော်တယ်ဂိုဏ်း၏ ဂိုဏ်းချုပ်သည် အသံများ တုန်ယင်လျက် အထက်ကောင်းကင်တားမြစ်နယ်မြေရှိရာသို့ လှမ်းမျှော်ကြည့်လိုက်သည်။
အထက်ကောင်းကင်တားမြစ်နယ်မြေမှ ထုတ်လွှတ်သော အမြင့်ဆုံးစွမ်းအား... ၎င်းသည် ကောင်းကင်ဘုံအရှင်သခင်၏ စွမ်းအား မဟုတ်လော။
ကောင်းကင်ဘုံအရှင်သခင်သည် အဘယ်အရာကို ပြုလုပ်ရန် ကြံရွယ်နေသနည်း။ သူသည် ကွေ့ယီအင်မော်တယ်ဂိုဏ်းအား ဖျက်ဆီးပစ်ရန် ကြံနေသလော။
ကွေ့ယီအင်မော်တယ်ဂိုဏ်း၏ ဂိုဏ်းချုပ်သည် ထိတ်လန့်သွားပြီး အလျင်အမြန်ပင် ကြောက်ရွံ့တကြား ပြောလိုက်သည်။
" အထက်မှာရှိတော်မူသော ကောင်းကင်ဘုံအရှင်သခင်... ကျွန်တော်တို့ ကွေ့ယီအင်မော်တယ်ဂိုဏ်းက ကုမိသားစုနှင့် အထက်ကောင်းကင်တားမြစ်နယ်မြေကို ဘယ်တုန်းကမှပြစ်မှားခဲ့ခြင်း မရှိပါဘူး..... "
ကွေ့ယီအင်မော်တယ်ဂိုဏ်းသည် တစ်ချိန်က ကုမိသားစု၏ အကူအညီတောင်းခံမှုကို လျစ်လျူရှုရန် ရွေးချယ်ခဲ့သော်လည်း... သူတို့သည် လဲပြိုနေသူအား ထပ်ဆင့်ကန်ကျောက်ခဲ့ခြင်းမျိုးတော့ အတိအကျ မပြုလုပ်ခဲ့ကြသည် မဟုတ်ပါလော။
အကယ်၍... ကောင်းကင်ဘုံအရှင်သခင်က ထိုအကြောင်းပြချက်မျှဖြင့် ကွေ့ယီအင်မော်တယ်ဂိုဏ်းအား ဖျက်ဆီးပစ်မည်ဆိုပါက... ၎င်းသည် အလွန်အမင်း အကျိုးအကြောင်းမညီညွတ်ရာ ကျလွန်းလိမ့်မည်။
ကွေ့ယီအင်မော်တယ်ဂိုဏ်း၏ ဂိုဏ်းချုပ်သည် ကြောက်မက်ဖွယ် မျက်နှာထားဖြင့် ရှိနေပြီး... အခြားသော အကြီးအကဲများနှင့် တပည့်များမှာမူ... သူတို့၏ခြေထောက်များသည် တုန်ယင်နေခဲ့ကာ မြေပြင်ပေါ်သို့ ပုံလျက်သား ကျသွားခဲ့ကြပြီး... သူတို့၏မျက်လုံးများထဲတွင် မျှော်လင့်ချက်ကင်းမဲ့စွာဖြင့် ကံကြမ္မာ၏ အဆုံးအဖြတ်ကို စောင့်ဆိုင်းနေခဲ့ကြသည်။
နောက်နေသည်လား။ ထိုသူမှာ ကောင်းကင်ဘုံအရှင်သခင် ဖြစ်၏။
အကယ်၍ သူသည် ကွေ့ယီအင်မော်တယ်ဂိုဏ်းတစ်ခုလုံးအား ချေမှုန်းပစ်လိုပါက... ထွက်ပြေးခြင်းပင်လျှင် အသုံးဝင်မည်မဟုတ်ပေ။ နာခံစွာဖြင့် သေဆုံးခြင်းကို စောင့်ဆိုင်းနေခြင်းသည်သာ... သူတို့လုပ်နိုင်သော တစ်ခုတည်းသောအရာ ဖြစ်၏။
ကွေ့ယီအင်မော်တယ်ဂိုဏ်းတစ်ခုလုံး အထက်မှအောက်အထိ ကံကြမ္မာ၏ အဆုံးအဖြတ်ကို မျှော်လင့်ချက်ကင်းမဲ့စွာ စောင့်ဆိုင်းနေခဲ့ကြသည်။
သို့သော် အဆုံးတွင်... ထိုအမြင့်ဆုံးသော စွမ်းအားသည် အင်မော်တယ်ဂိုဏ်းအတွင်းရှိ သက်ရှိသတ္တဝါအားလုံးအပေါ်သို့ ဖြတ်သန်းတိုက်ခတ်သွားခဲ့သော်လည်း... ၎င်းတို့အား သတ်ဖြတ်ခြင်းမရှိဘဲ... မည်သည့်အရာမျှ မဖြစ်ပျက်ခဲ့သကဲ့သို့ ရုတ်တရက် ပျောက်ကွယ်သွားခဲ့သည်။
ပြီးသွားပြီလား။
သူ၏ပတ်ဝန်းကျင်မှ ပျောက်ကွယ်သွားသော ဖိအားကို ခံစားမိသောအခါ... ကွေ့ယီအင်မော်တယ်ဂိုဏ်း၏ ဂိုဏ်းချုပ်သည် လုံးဝဥဿုံ ကြောင်အနေခဲ့မိသည်။
ထို ကောင်းကင်ဘုံအရှင်သခင်သည် ဘာလုပ်ချင်နေခဲ့သနည်း။ ဖိအားသက်သက်သာ ပေးပြီး... မည်သည့်လှုပ်ရှားမှုမျှ မပြုတော့ဘူးလား။
ကွေ့ယီအင်မော်တယ်ဂိုဏ်း တစ်ခုတည်းသာ မဟုတ်ပေ။ အထက်ကောင်းကင်တားမြစ်နယ်မြေအား ဗဟိုပြုလျက်... အရှေ့ပိုင်းလွင်ပြင် တာအိုနယ်မြေရှိ အမျိုးမျိုးသော မဟာဂိုဏ်းကြီးများနှင့် အင်မော်တယ်ဂိုဏ်းများသည်လည်း... အလားတူ အဖြစ်အပျက်မျိုးကို ကြုံတွေ့ခဲ့ရသည်။
အထက်ကောင်းကင်တားမြစ်နယ်မြေမှ အမြင့်ဆုံးသော စွမ်းအား ဖြတ်သန်းတိုက်ခတ်သွားပြီး... အင်မော်တယ်ဂိုဏ်းများနှင့် မဟာဂိုဏ်းကြီးများ အတွင်းရှိ လူအားလုံးကို ထိတ်လန့်စေခဲ့သော်ငြား... ထိုဖိအားသည် တိုတောင်းလွန်းသော အချိန်ကာလတစ်ခုမျှသာ ကြာမြင့်ခဲ့ပြီး... မည်သည့်အရာမျှ မဖြစ်ပျက်ခဲ့သကဲ့သို့ လျင်မြန်စွာ ပျောက်ကွယ်သွားခဲ့၏။
အင်မော်တယ်ဂိုဏ်းများနှင့် မဟာဂိုဏ်းကြီးများသာမက... အနီးအနားရှိ အင်အားပိုမိုနည်းပါးသော ကောင်းချီးမင်္ဂလာမြေအချို့၊ သာမန်လူသားတို့၏ မြို့များနှင့် ကျေးရွာများပါမကျန်... ထိုအမြင့်ဆုံးသော စွမ်းအား၏ ဖြတ်သန်းတိုက်ခတ်မှုကို ခံခဲ့ရသည်။
ဤကဲ့သို့ ကြီးမားလှသော လှုပ်ရှားမှုကြီးသည် အလိုလျောက်ပင် အဆုံးမဲ့ကမ္ဘာတစ်ခုလုံးအား တပ်လှန့်လိုက်သကဲ့သို့ ဖြစ်သွားစေခဲ့သည်။
တန်ခိုးကြီးသော ပုဂ္ဂိုလ်များအားလုံးသည် အထက်ကောင်းကင်တားမြစ်နယ်မြေရှိရာသို့ ကြည့်လိုက်ကြပြီး... သူတို့၏မျက်လုံးများထဲတွင် သံသယများနှင့် မသေချာမရေရာမှုတို့ဖြင့် ပြည့်နှက်နေခဲ့သည်။
ကောင်းကင်ဘုံအရှင်သခင်သည် ဘာလုပ်ချင်နေခဲ့သနည်း။
" ကောင်းကင်ဘုံအရှင်သခင်...သူက နတ်ဆိုးနယ်မြေကို ကူညီပြီး ငါတို့ အဆုံးမဲ့ကမ္ဘာက သက်ရှိအားလုံးကို ဖျက်ဆီးချင်နေတာများလား "
သက်ရှိသတ္တဝါတစ်ဦးက တုန်ယင်စွာဖြင့် ပြောလိုက်သည်။
အတိတ်ကာလ၌ မဟာဧကရာဇ် ယွမ်ကျွင်းသည် ကောင်းကင်ယံမျက်နှာပြင်ပြသမှုမှတစ်ဆင့် ကုချန်၏ စစ်မှန်သော 'မျက်နှာ' ကို ဖော်ထုတ်ခဲ့စဉ်က... ဤသာမန်လူများသည် ဒေါသတို့ဖြင့် ပြည့်နှက်ခဲ့ကြပြီး... ကုချန်အား သစ္စာဖောက်တစ်ဦးဟု အသက်ရှူတိုင်း ခေါ်ဝေါ်ခဲ့ကြကာ... သူတို့၏စကားလုံးများမှာ အလွန်အမင်း ပြင်းထန်ခဲ့သည်။
သို့သော်... ယခု... ကုချန်၏ လွှမ်းမိုးနိုင်သော ဖိအားနှင့် ရင်ဆိုင်ရသောအခါ... ဤသာမန်လူများသည် အန္တရာယ်မရှိသော ငုံးငှက်ကလေးများ အုပ်စုကဲ့သို့ ဖြစ်သွားကြသည်။ သူတို့၏ခေါင်းများကို ငုံ့ထားလျက် တုန်လှုပ်နေကြပြီး... စကားတစ်ခွန်းမျှ မပြောဝံ့တော့ပေ။
အဘယ်ကြောင့်ဆိုသော် သာမန်လူများသည် ကုချန် ဘာလုပ်မည်ကို မသိကြသော်လည်း... အချက်တစ်ချက်ကိုမူ နားလည်ကြသည်။ ယခုအချိန်တွင် ထွက်ပေါ်လာပြီး... ကောင်းကင်ဘုံအရှင်သခင်အား ဆန့်ကျင်ဝံ့သူ မည်သူမဆိုသည် သေဆုံးရမည်သာ ဖြစ်သည်။
ရှင်ခြင်းနှင့် သေခြင်းတရား၏ ရှေ့မှောက်တွင် လူမိုက်မဟုတ်သူ မည်သူမဆို မှန်ကန်သော ရွေးချယ်မှုကို ပြုလုပ်မည်သာ ဖြစ်၏။
" ဟက်...တွေ့ပြီ...ထင်တဲ့အတိုင်းပဲ "
မြင့်မြတ်စိတ်အာရုံ၏ စုံစမ်းစစ်ဆေးမှုအောက်တွင် အသက်ရှူချိန် အနည်းငယ်မျှအတွင်း၌... ကုချန်သည် အောင်မြင်မှုတစ်ခု ရရှိခဲ့ပြီး... သာမန်လူများကြားထဲတွင် လော့ထျန်းနန်းတော်၏ လုပ်ကြံသတ်ဖြတ်သူနှင့် ရောင်ဝါချင်း ဆင်တူသော လူအချို့ကို ရှာဖွေတွေ့ရှိခဲ့သည်။
လော့ထျန်းနန်းတော်၏ လူသတ်သမားများသည် တစ်ခါတစ်ရံ သာမန်လူတို့၏ မြို့များတွင် ပုန်းကွယ်နေကြပြီး... တစ်ခါတစ်ရံ ဂိုဏ်းများနှင့် ဘာသာရေးအုပ်စုများထဲတွင် ပုန်းကွယ်နေကြကာ... အားလုံးသည် သူတို့၏ ရောင်ဝါများကို ဖုံးကွယ်ထားခဲ့ကြသည်။
သို့သော်... ကုချန်၏ ဧကရာဇ်စွမ်းအား ဖြတ်သန်းတိုက်ခတ်သွားသည်နှင့်အမျှ... မကောင်းဆိုးဝါး နတ်ဆိုးများနှင့် မိစ္ဆာအားလုံးသည် ပုန်းအောင်းစရာနေရာ မရှိတော့ဘဲ... သူ၏အာရုံခံနိုင်စွမ်းမှ လွတ်မြောက်နိုင်ခြင်း မရှိခဲ့ပေ။
ဤပုန်းကွယ်နေသော လော့ထျန်းနန်းတော်၏ လူသတ်သမားများအားလုံးသည် သူ၏ မှတ်သားခြင်းနှင့် ပစ်မှတ်ထားခြင်းကို ခံလိုက်ရသည်။
သို့သော်... လော့ထျန်းနန်းတော်၏ လူသတ်သမား အတော်များများကို ရှာဖွေတွေ့ရှိခဲ့ပြီး ဖြစ်သော်လည်း... ကုချန်သည် သူ၏ရှာဖွေမှုအား ရပ်တန့်လိုက်ခြင်း မရှိသေးပေ။
သူသိသည်မှာ ဤငါးမွှားလေးများကို ဖမ်းဆီးရုံမျှဖြင့် မလုံလောက်သေးကြောင်းပင်။
လော့ထျန်းနန်းတော်၏ သတိကြီးစွာဖြင့် လုပ်ဆောင်လေ့ရှိသော သဘာဝအရ... အဆုံးမဲ့တိုက်ကြီးတစ်ခုလုံးတွင် လော့ထျန်းနန်းတော်၏ လူသတ်သမား တစ်ဦး သို့မဟုတ် နှစ်ဦးမျှသာ ၎င်း၏ တည်နေရာကို သိရှိနိုင်ပေလိမ့်မည်။
အခြားသူများအများစုမှာမူ ကုမိသားစုမှ ဖမ်းဆီးထားသော လော့ထျန်းနန်းတော်၏ လုပ်ကြံသတ်ဖြတ်သူကဲ့သို့ပင်... လော့ထျန်းနန်းတော်၏ တည်နေရာနှင့် ပတ်သက်၍ မည်သည့်အရာမျှ သိရှိကြခြင်း မရှိပေ။
ထို့ကြောင့်... ကုချန်သည် သူ၏သတိထားမှုကို လျှော့ချလိုက်ခြင်းမရှိဘဲ... ထိုအစား အဆုံးမဲ့ နယ်မြေကြီးငါးခုလုံးအား ရှာဖွေမှု ပြုလုပ်ကာ... လော့ထျန်းနန်းတော်နှင့် ဆက်စပ်နေသူတိုင်းကို အမြစ်မှ ဆွဲနှုတ်ပစ်ရန်... တစ်ဦးတစ်ယောက်မျှ မလွတ်ကျန်စေရန် ရည်ရွယ်လိုက်သည်။
" အဲ့ဒီ... ကောင်းကင်ဘုံအရှင်သခင်က ဘာတွေလုပ်ချင်နေတာလဲ "
မကြာမီပင် ကုချန်၏ လုပ်ဆောင်ချက်များသည် အမျိုးမျိုးသော ရှင်သန်ခြင်းတားမြစ်နယ်မြေများထဲတွင် အိပ်စက်နေသော ရှေးဟောင်းအရှင်သခင်များအား တပ်လှန့်လိုက်သကဲ့သို့ ဖြစ်သွားစေခဲ့သည်။
သူတို့အားလုံးသည် သူတို့၏မျက်လုံးများကို မြှင့်တင်လိုက်ကြပြီး... အထက်ကောင်းကင်တားမြစ်နယ်မြေရှိရာသို့ ကြည့်လိုက်ကြရာ... သူတို့၏အကြည့်များထဲတွင် ရှုပ်ထွေးမှုနှင့် နားမလည်နိုင်မှုတို့ဖြင့် ပြည့်နှက်နေခဲ့သည်။
၎င်းတို့သည် ကုချန်၏ ဤလုပ်ရပ်ဖြင့် ရည်ရွယ်ချက်ကို နားမလည်ခဲ့ကြပေ။ ဤသည်မှာ သာမန်လူများအား သူ၏စွမ်းအားကို ထုတ်ဖော်ပြသရန် သက်သက်မျှသာလော။
သို့သော် မကြာမီပင် ဤတားမြစ်နယ်မြေ အရှင်သခင်များ၏ စိတ်ထဲမှ သံသယများသည် တုန်လှုပ်မှုနှင့် ဒေါသအဖြစ်သို့ ပြောင်းလဲသွားခဲ့သည်။
အဘယ်ကြောင့်ဆိုသော်... ကုချန်၏ ရောင်ဝါသည် အဆုံးအစမရှိသော နယ်မြေကို ဖြတ်သန်းတိုက်ခတ်ပြီးနောက်... ရပ်တန့်သွားမည့် အရိပ်အယောင်မရှိဘဲ... အမျိုးမျိုးသော ရှင်သန်ခြင်းတားမြစ်နယ်မြေများဆီသို့ ကြီးကျယ်ခမ်းနားစွာ ဆက်လက် ဖြန့်ကျက်လာခဲ့သောကြောင့်ပင်။
သက်ရှိသတ္တဝါအားလုံးကို စုံစမ်းစစ်ဆေးပြီး ခြိမ်းခြောက်ရုံမျှဖြင့် မလုံလောက်သေးဘဲ... ယခု သူသည် ရှင်သန်ခြင်းတားမြစ်နယ်မြေများထဲသို့ ထိုးဖောက်ဝင်ရောက်လိုနေသလော။
တားမြစ်နယ်မြေများအတွင်းရှိ ရှေးဟောင်းအရှင်သခင်များသည် နောက်ဆုံးတွင် ဆက်လက်၍ ထိုင်မနေနိုင်ကြတော့ပေ။
အခန်း (၁၄၂) - ဓားသည် ကောင်းကင်ကိုးခွင်ကို ဖြတ်သန်းခြင်း၊ တားမြစ်နယ်မြေအား ဖိနှိပ်ခြင်း၊ အရာအားလုံး တိတ်ဆိတ်ငြိမ်သက်သွားခြင်း
ရှင်သန်ခြင်းတားမြစ်နယ်မြေများအတွင်း၌ အိပ်စက်နေကြသော ရှေးဟောင်းအရှင်သခင်များအနက် မည်သူသည် လောကကြီးထဲတွင် အဆုံးမဲ့သောနှစ်များအား ဖြတ်သန်းခဲ့သည့် ရှေးဟောင်းတည်ရှိမှုတစ်ခု မဟုတ်ခဲ့ပါသနည်း။ ၎င်းတို့အနက် မည်သူသည် သူနှင့်ပတ်သက်၍ များပြားလှသော လျှို့ဝှက်ချက်များ မရှိဘဲ နေခဲ့ပါသနည်း။
သို့သော် ယခုအခါတွင်မူ... ကောင်းကင်ဘုံအရှင်သခင်သည် အဆုံးမဲ့ကမ္ဘာအပေါ်၌ သူ၏စွမ်းအားကို ထုတ်ဖော်ပြသနေရုံတင်မကဘဲ... သူ၏ဖိအား ဖြန့်ကျက်လာသည်နှင့်အမျှ... သူသည် တစ်စုံတစ်ခုကို ရှာဖွေစူးစမ်းနေဟန် ရှိလေသည်။
အကယ်၍ သူ၏စွမ်းအား အား အမျိုးမျိုးသော ရှင်သန်ခြင်းတားမြစ်နယ်မြေများထဲသို့ ဝင်ရောက်ခွင့်ပြုလိုက်ပါက... ဤသည်မှာ တားမြစ်နယ်မြေများအတွင်းရှိ အရှင်သခင်များတွင် ဤကောင်းကင်ဘုံအရှင်သခင်၏ ရှေ့မှောက်၌... မည်သည့်လျှို့ဝှက်ချက်မျှ ကျန်ရှိတော့မည်မဟုတ်ဟု အဓိပ္ပာယ်သက်ရောက်နေသည် မဟုတ်ပါလော။ တားမြစ်နယ်မြေ အရှင်သခင်များအဖို့... ဤသည်မှာ လုံးဝ လက်ခံနိုင်ဖွယ်ရာ မရှိသည့်အရာ ဖြစ်လေသည်။
" ကောင်းကင်ဘုံအရှင်သခင်... ခင်ဗျား ဘာလုပ်နေတာလဲ..... "
" ရပ်လိုက်..... "
" ကောင်းကင်ဘုံအရှင်သခင်... ခင်ဗျား အရမ်းလွန်လွန်းနေပြီ "
မူလရှေးဟောင်းတွင်းနက်အတွင်းမှ ထိတ်လန့်တုန်လှုပ်မှုနှင့် ဒေါသတကြီး အော်ဟစ်သံများစွာ ထွက်ပေါ်လာခဲ့သည်။ အရှေ့ပိုင်းလွင်ပြင် တာအိုနယ်မြေအတွင်း၌ တည်ရှိသော ရှင်သန်ခြင်းတားမြစ်နယ်မြေတစ်ခုအနေဖြင့်... မူလရှေးဟောင်းတွင်းနက်သည် ကုချန်၏ ဖိအားဖြင့် ပထမဆုံး စူးစမ်းခံရသည့် ရှင်သန်ခြင်းတားမြစ်နယ်မြေလည်း ဖြစ်ခဲ့သည်။
ချက်ချင်းပင်... ကမ္ဘာမြေကို တုန်ခါသွားစေနိုင်သော အရှင်သခင်တို့၏ ရောင်ဝါများစွာ ထွက်ပေါ်လာခဲ့ပြီး... ကောင်းကင်ဘုံကိုးခု၏ တိမ်တိုက်များကိုပင် လှုပ်ခတ်သွားစေခဲ့သည်။
သို့သော်...မူလရှေးဟောင်းတွင်းနက်အတွင်းရှိ ရှေးဟောင်းအရှင်သခင်များ၏ ပြင်းထန်သော တုံ့ပြန်မှုကို ရင်ဆိုင်ရသော်လည်း... ကုချန်၏ မျက်နှာအမူအရာသည် ယခင်အတိုင်းပင် လျစ်လျူရှုလျက် ရှိနေခဲ့၏။ သူသည် ဤအရှင်သခင်များအား ရှင်းပြရန်ပင် အရေးမစိုက်ဘဲ တည်ငြိမ်စွာ ပြောလိုက်လေသည်.....
" ငါကိုယ်တော်ကို... တားဆီးဝံ့သူတိုင်း... သေရမယ် "
" မင်း..... "
ကုချန်၏ အာဏာပြင်းသော ရပ်တည်ချက်နှင့် ရင်ဆိုင်ရသောအခါ... မူလရှေးဟောင်းတွင်းနက်အတွင်းရှိ အရှင်သခင်များသည် ထိတ်လန့်မှုနှင့် ဒေါသတို့ဖြင့် ပြည့်နှက်သွားကြ၏။ အင်မော်တယ်လမ်းကြောင်း ဖွင့်လှစ်တော့မည့် ဤအရေးကြီးသော အခိုက်အတန့်တွင်... အရှုပ်အထွေးသစ်များ မဖန်တီးလိုကြဘဲ ကုချန်နှင့် ရန်သူများ မဖြစ်လိုကြပေ။ သို့သော် ကုချန်၏ လုပ်ရပ်များမှာ အမှန်တကယ်ပင် လွန်လွန်းလှသည်တကား။
" ငါတို့က ဒီအတိုင်း ဆက်ပြီး သည်းခံနေရတော့မှာလား... ဒီကောင်းကင်ဘုံအရှင်သခင်က ငါတို့အပေါ်မှာ ဗိုလ်ကျပြီး ကြိုက်သလို လုပ်နေတာကို ခံနေရမှာလား..... "
" ငါတို့သာ ဒီထက်ပိုပြီး သည်းခံနေမယ်ဆိုရင်... ငါတို့အားလုံး သူရဲဘောကြောင်တဲ့သူတွေ ဖြစ်သွားလိမ့်မယ် "
" ဒါက... အရမ်းလွန်လွန်းတယ် "
ဤအခိုက်အတန့်တွင်... မူလရှေးဟောင်းတွင်းနက်အတွင်းရှိ ရှေးဟောင်းအရှင်သခင်များအားလုံးသည် ယခင်ကနှင့်မတူဘဲ စည်းလုံးသွားကြဟန်ရှိပြီး... အင်အားစုပေါင်း၍ ကုချန်အား အသေအလဲ တိုက်ခိုက်လိုသော ဟန်ပန်ကို ပြသနေခဲ့သည်။ ဤအခိုက်အတန့်အတွင်း၌... ဧကရာဇ်တပိုင်းအဆင့် ရေနဂါးကြီးကဲ့သို့သော မူလရှေးဟောင်းတွင်းနက်၏ အပြင်ဘက်ဒေသများတွင် နေထိုင်သည့် တားမြစ်နယ်မြေ သတ္တဝါများအားလုံးသည်... မြေပြင်ပေါ်တွင် ဝပ်တွားရင်း တုန်လှုပ်နေခဲ့ကြ၏။
ကောင်းကင်ဘုံအရှင်သခင်နှင့် တားမြစ်နယ်မြေ အရှင်သခင်များကြားမှ ထိပ်တိုက်တွေ့ဆုံမှုသည် ၎င်းတို့ ပါဝင်နိုင်သည့်အရာ မဟုတ်ခဲ့ပေ။ အကယ်၍ စစ်ပွဲကြီးတစ်ခု အမှန်တကယ် ဖြစ်ပွားခဲ့ပါက... ၎င်းတို့သည် အမြောက်စာမျှအဖြစ်ပင် သတ်မှတ်ခံရမည်မဟုတ်ဘဲ... မျက်စိတစ်မှိတ်အတွင်း၌ပင် ချေမှုန်းခံရမည် ဖြစ်သည်။
" အုန်း...! "
ကုချန်၏ မြင့်မြတ်စိတ်အာရုံသည် ရှေ့သို့ ဆက်လက်တိုးဝင်သွားစဉ် မမြင်နိုင်သော ရောင်ဝါတစ်ခု ဖြတ်သန်းတိုက်ခတ်သွားပြီး... ဤတားမြစ်နယ်မြေ သတ္တဝါများအားလုံးအပေါ် ဖြတ်ကျော်သွားသည်။ ၎င်းတို့သည် လော့ထျန်းနန်းတော်၏ ရောင်ဝါဖြင့် ဆက်စပ်မှု ရှိ၊ မရှိကို ပိုင်းခြားစစ်ဆေးပြီး နောက်တွင်... သူ၏ မြင့်မြတ်စိတ်အာရုံသည် မူလရှေးဟောင်းတွင်းနက်၏ ပိုမိုနက်ရှိုင်းသောနေရာသို့ ဆက်လက်ဝင်ရောက်သွားခဲ့သည်။
" ဒါ... အရမ်းလွန်လွန်းနေပြီ..... "
ဤအချိန်တွင် တားမြစ်နယ်မြေ အရှင်သခင်တစ်ပါးသည် ထိုင်မနေနိုင်တော့ဘဲ လှုပ်ရှားလိုက်၏။
နဂါးရုပ်ထွင်း အနက်ရောင်ရွှေ လှံရှည်ကြီးတစ်လက်သည် မူလရှေးဟောင်းတွင်းနက်အတွင်းမှ ရုတ်တရက် ထွက်ပေါ်လာကာ... တားမြစ်နယ်မြေ၏ အဓိကနေရာအပြင်ဘက်တွင် ရပ်တန့်လျက်... တချွင်ချွင်မြည်သံပေးရင်း တုန်ခါနေကာ... မိုင်ပေါင်းထောင်ချီသော လေဟာနယ်ကို ခွင်းဖောက်သွားပြီး... ကုချန်၏ မြင့်မြတ်စိတ်အာရုံအား ထပ်မံစူးစမ်းခြင်းမှ တားဆီးရန် ရည်ရွယ်လျက်... ၎င်း၏ သခင်ကိုယ်စား အသံပြုနေသကဲ့သို့ ရှိလေသည်။
" သေလမ်းကို ရှာနေတာပဲ "
ဤသည်ကို မြင်သောအခါ ကုချန်သည် လျစ်လျူရှုစွာ ပြောလိုက်ပြီး... မည်သည့်မြင်သာသော လှုပ်ရှားမှုမျှ မပြုလုပ်ခဲ့သော်ငြား... အဆုံးမဲ့ဓားသည် တစ်စုံတစ်ခုမှ လှုံ့ဆော်လိုက်သကဲ့သို့ ရုတ်တရက် ပျံတက်သွားကာ... အရှေ့ပိုင်းလွင်ပြင် တာအိုနယ်မြေ၏ အဆုံးမဲ့သော နယ်နိမိတ်ကို ဖြတ်ကျော်ပြီး... မူလရှေးဟောင်းတွင်းနက်ထဲသို့ ပြင်းထန်စွာ ခုတ်ပိုင်းဝင်ရောက်သွားလေသည်။
ဤဓားချက်သည် ထာဝရတည်ရှိနိုင်သည့် အရာများကိုပင် ချေမှုန်းနိုင်ပြီး... ၎င်း၏ဓားအလင်းရောင်သည် တောတောင်ကိုးခွင်နှင့် အရပ်ရှစ်မျက်နှာအား ဖြတ်သန်းတိုက်ခတ်လျက်... ဤတားမြစ်နယ်မြေအား တစ်ချက်တည်းဖြင့် ပြားပြားဝပ်သွားစေရန် ရည်ရွယ်ထားသကဲ့သို့... မူလရှေးဟောင်းတွင်းနက်ထဲသို့ ပြင်းထန်စွာ ထိုးစိုက်ဝင်ရောက်သွားလေသည်။
" ဘုန်း...! "
အဆုံးမဲ့ဓားသည် နှိုင်းယှဉ်၍မရသော စွမ်းအားကို သယ်ဆောင်လျက်... ခုတ်ပိုင်းချလိုက်၏။ နဂါးရုပ်ထွင်း ရွှေလှံရှည်ကြီးအား ရက်စက်စွာ ထိမှန်သွားကာ... ဤအစွမ်းထက်လက်နက်ကြီးအား တို့ဟူးတစ်တုံးကို လှီးဖြတ်လိုက်သကဲ့သို့ တစ်စစီ ဖြစ်သွားစေခဲ့သည်။
ထို့နောက်... အဆုံးမဲ့ဓား၏ အရှိန်အဟုန်သည် လျော့ကျသွားခြင်းမရှိဘဲ... ၎င်း၏ အဆုံးမဲ့သော ဓားအလင်းရောင်သည် ကောင်းကင်ဘုံကိုးခုမှ နဂါးငွေ့တန်းကြီး သွန်ချလိုက်သကဲ့သို့ ရှေးဟောင်းတွင်းနက်သတ္တုတွင်းများထဲသို့ နစ်မြုပ်ဝင်ရောက်သွားကာ... မူလရှေးဟောင်းတွင်းနက်တစ်ခုလုံးအား ပေါက်ကွဲထွက်တော့မည့်အလား... ကြောက်မက်ဖွယ်ကောင်းသော ကမ္ဘာပျက်စေနိုင်သည့် လှုပ်ခတ်မှုများဖြင့် ပြည့်နှက်သွားစေခဲ့သည်။
ဤအရာအားလုံးသည် အလွန်လျင်မြန်စွာ ဖြစ်ပျက်သွားခဲ့၏။ အဆုံးမဲ့ဓား ပျံထွက်သွားသည်မှ နဂါးရုပ်ထွင်း ရွှေလှံရှည်ကြီးအား ဖြတ်တောက်လိုက်ပြီး နောက်... ဓားအလင်းရောင်သည် မူလရှေးဟောင်းတွင်းနက်အတွင်းရှိ အမျိုးမျိုးသော ရှေးဟောင်းသတ္တုတွင်းများထဲသို့ ကျဆင်းသွားသည်အထိ... မျက်စိတစ်မှိတ်၏ တစ်သောင်းပုံတစ်ပုံ အချိန်မျှသာ ကြာမြင့်ခဲ့သည်။
မူလရှေးဟောင်းတွင်းနက်အတွင်းရှိ ရှေးဟောင်းအရှင်သခင်များ တုံ့ပြန်နိုင်ချိန်တွင်မူ... ၎င်းတို့အားလုံးသည် အဆုံးမဲ့ဓားမှ ထုတ်လွှတ်လိုက်သော ကြောက်မက်ဖွယ် လှုပ်ခတ်မှုများအား တားဆီးရန်အတွက်... လှုပ်ရှားရခြင်းမှလွဲ၍ အခြားရွေးချယ်စရာ မရှိတော့ပေ။ ၎င်းတို့သည် လျင်မြန်စွာ လှုပ်ရှားခဲ့ကြရ၏၊ အဘယ်ကြောင့်ဆိုသော် အကယ်၍ ၎င်းတို့သာ လက်ပိုက်ကြည့်နေခဲ့ပါက... မူလရှေးဟောင်းတွင်းနက်တစ်ခုလုံးသည် ဤဓားတစ်ချက်တည်း၏အောက်၌ပင် ပျက်စီးသွားဖွယ် ရှိသောကြောင့် ဖြစ်သည်။
" ဘုန်း...! "
အရှင်သခင်တစ်ပါးပြီးတစ်ပါး၏ စွမ်းအားများ ပေါက်ကွဲထွက်လာပြီး... အဆုံးမဲ့ဓားမှ ထုတ်လွှတ်လိုက်သော နှိုင်းယှဉ်၍မရသော ဓားအလင်းရောင်နှင့် ရင်ဆိုင်လိုက်ကြသောအခါ... ရလဒ်မှာ ဤရှေးဟောင်းအရှင်သခင်များ၏ ကျောရိုးထဲထိ စိမ့်ခနဲ အေးသွားစေခဲ့သည်။ ကောင်းကင်ဘုံအရှင်သခင်သည် လှုပ်ရှားခြင်းပင် မရှိသေးဘဲ... သူ၏လက်နက်ကသာ သူ၏ကိုယ်စား လှုပ်ရှားခဲ့ရုံမျှဖြင့်... ကမ္ဘာပျက်စေနိုင်သော စွမ်းအားကိုထုတ်လွှင့်ခဲ့ပြီး ... အရှင်သခင်များအားလုံး၏ တွေးခေါ်နိုင်စွမ်းထက် များစွာ ကျော်လွန်နေခဲ့သည်။
အရှင်သခင်တစ်ပါးထက်မက အင်အားအပြည့်ဖြင့် လှုပ်ရှားခဲ့ကြသော်လည်း... အဆုံးမဲ့ဓား၏ အတော်အတန်များပြားသော စွမ်းအားပမာဏသည် ယိုစိမ့်ထွက်သွားခဲ့ပြီး... တွင်းပေါက်များ၏ ထက်ဝက်ကို ဖျက်ဆီးပြီး... ရှေးဟောင်းတွင်းနက်ကြီးအား ပြိုကျနစ်မြုပ်စေခဲ့သည်။
ဓားတစ်ချက်တည်းဖြင့် တားမြစ်နယ်မြေတစ်ဝက်ကို ပြားပြားဝပ်သွားစေခဲ့သည်။ ဤအခိုက်အတန့်တွင်... တားမြစ်နယ်မြေအတွင်းရှိ ရှေးဟောင်းအရှင်သခင်များအားလုံး တိတ်ဆိတ်ငြိမ်သက်သွားခဲ့ကြသည်။
ဤသည်မှာ... အဆုံးမဲ့ဓားက သူ့ဘာသာသူ လှုပ်ရှားခဲ့ခြင်းမျှသာ ဖြစ်၏။ အကယ်၍ ကောင်းကင်ဘုံအရှင်သခင် ကိုယ်တိုင် ဓားကိုင်စွဲ၍ တိုက်ခိုက်ခဲ့ပါက... မူလရှေးဟောင်းတွင်းနက်တစ်ခုလုံးသည် အဆုံးမဲ့တိုက်ကြီးပေါ်မှ လုံးဝ ပျောက်ကွယ်သွားမည် မဟုတ်ပါလော။
" နောက်တစ်ကြိမ် ထပ်ပြီး ခုခံရင်... မင်းတို့အားလုံး သေဆုံးပြီး... မူလရှေးဟောင်းတွင်းနက်လဲ ပျက်စီးသွားရလိမ့်မယ် "
ကုချန်၏ အေးစက်သော အသံ ထွက်ပေါ်လာပြီး... မူလရှေးဟောင်းတွင်းနက်အတွင်းရှိ အရှင်သခင်များအားလုံးကို... ချက်ချင်းပင် တိတ်ဆိတ်ငြိမ်သက်သွားစေခဲ့သည်။
အကယ်၍ ကုချန်က ဤသို့ ပြောဝံ့လျှင်... သူသည် သေချာပေါက် ပြုလုပ်လိမ့်မည်ဖြစ်ကြောင်း သူတို့ သိရှိခဲ့ကြ၏။ မူလရှေးဟောင်းတွင်းနက်တစ်ခုလုံးရှိ အရှင်သခင်များအားလုံး၏ အင်အားများကို ပေါင်းစည်းလိုက်လျှင်ပင်... ဤကောင်းကင်ဘုံအရှင်သခင်နှင့် ယှဉ်ပြိုင်နိုင်ဖွယ် မရှိပေ။
သေစေလောက်သော တိတ်ဆိတ်မှုတစ်ခုထဲတွင်... ကုချန်၏ မြင့်မြတ်စိတ်အာရုံသည် မူလရှေးဟောင်းတွင်းနက်တစ်ခုလုံးအား ဒီရေကဲ့သို့ ဖြတ်သန်းတိုက်ခတ်သွားလေသည်။ ထိုရှေးဟောင်းအရှင်သခင်များ နေထိုင်ကျင့်ကြံရာ နေရာများကိုပင် ချန်လှပ်မထားဘဲ... နေရာတိုင်းကို စေ့စေ့စပ်စပ် ရှာဖွေခဲ့သည်။ အစမှအဆုံးတိုင်အောင်... ဤရှေးဟောင်းအရှင်သခင်များသည် သူတို့၏ ကျင့်ကြံရာနေရာများတွင် တိတ်ဆိတ်စွာ နေထိုင်နေရုံမျှသာ ရှိခဲ့ပြီး... အနည်းငယ်မျှသော လှုပ်ရှားမှုကို ပြုလုပ်ရန်ပင် မဝံ့ခဲ့ကြပေ။
အဘယ်ကြောင့်ဆိုသော် အဆုံးမဲ့ဓားသည် အဆုံးမဲ့သော ဓားစွမ်းအားကို ထုတ်လွှတ်လျက်... ယခုအခါ မူလရှေးဟောင်းတွင်းနက်၏ အထက်တည့်တည့်တွင် ချိတ်ဆွဲထားသောကြောင့် ဖြစ်သည်။ လှုပ်ရှားမှုပြုလုပ်ဝံ့သော မည်သည့်အရှင်သခင်မဆို ဓားချက်တစ်ချက်နှင့် ရင်ဆိုင်ရမည်ဖြစ်ပြီး... သေဆုံးခြင်းနှင့် သူတို့၏ တာအိုများ ပြိုကွဲပျက်စီးခြင်းတို့ဖြင့် အဆုံးသတ်သွားမည် ဖြစ်သည်။
တိတ်ဆိတ်ခြင်း...သေစေလောက်သော... တိတ်ဆိတ်ခြင်းပင်တည်း.....
ကုချန်၏ မြင့်မြတ်စိတ်အာရုံသည် မူလရှေးဟောင်းတွင်းနက်မှ ဒီရေကဲ့သို့ ပြန်လည်ဆုတ်ခွာသွားပြီး... အဆုံးမဲ့ဓားသည်လည်း ထွက်ခွာသွား၏။ ရှေးဟောင်းတွင်းနက်အတွင်းရှိ အရှင်သခင်များသည် စကားမပြောနိုင်ကြသေးဘဲ... သူတို့၏ လက်ရှိ အရှက်ရဖွယ်အခြေအနေအား သက်သာရာရစေရန် မည်သို့ပြောရမည်ကို မသိရှိကြသကဲ့သို့ ရှိနေခဲ့သည်။
ဓားတစ်ချက်တည်း...ဓားတစ်ချက်တည်းမျှဖြင့်... မူလရှေးဟောင်းတွင်းနက်တစ်ခုလုံးအား ခေါင်းမဖော်နိုင်အောင် ဖိနှိပ်ထားနိုင်ခဲ့သည်။ ဤကဲ့သို့သော အရှက်ရဖွယ် အဖြစ်အပျက်သည် စွဲထင်ကျန်ရစ်ပြီး... ဤတားမြစ်နယ်မြေ အရှင်သခင်များ၏ ဘဝတစ်လျှောက်လုံး လိုက်ပါနေမည် ဖြစ်သည်။
မူလရှေးဟောင်းတွင်းနက်အတွင်းရှိ တားမြစ်နယ်မြေ အရှင်သခင်များအားလုံး တိတ်ဆိတ်ငြိမ်သက်သွားကြ၏။
ထို့အတူ အရှေ့ပိုင်းလွင်ပြင် တာအိုနယ်မြေတစ်ခုလုံးသည်လည်း ဤအခိုက်အတန့်တွင် သေစေလောက်သော တိတ်ဆိတ်မှုထဲသို့ ကျရောက်သွားခဲ့သည်။
ကောင်းကင်ဘုံအရှင်သခင်သည် ဤကဲ့သို့သော ရက်စက်ကြမ်းကြုတ်မှုဖြင့် လှုပ်ရှားလိမ့်မည်ဟု မည်သူမျှ မျှော်လင့်မထားခဲ့ပေ။ ၎င်းမှာ အဆုံးမဲ့ကမ္ဘာတစ်ခွင်လုံးတွင် အရှေးအကျဆုံးနှင့် အဆန်းကြယ်ဆုံးသော မူလရှေးဟောင်းတွင်းနက် ရှင်သန်ခြင်းတားမြစ်နယ်မြေတစ်ခု ဖြစ်သည်။
သို့တိုင်...ကုချန်၏ ရှေ့မှောက်တွင်... ၎င်းသည် အသုံးမဝင်သော ကြက်တစ်ကောင်၊ ခွေးတစ်ကောင်ကဲ့သို့ ဖြစ်နေခဲ့ပြီး... တားမြစ်နယ်မြေ၏ ထက်ဝက်သည် ဓားတစ်ချက်တည်းဖြင့် ပြားပြားဝပ်သွားခဲ့ရသည်။ တားမြစ်နယ်မြေအတွင်းရှိ အရှင်သခင်များပင်လျှင် ဒေါသစကားတစ်ခွန်းမျှ မပြောဝံ့ဘဲ... လှုပ်ရှားမှုအနည်းငယ်မျှပင် ပြုလုပ်ရန် မဝံ့ရဲခဲ့ကြပေ။
ဤသည်မှာ လူတို့၏စိတ်ထဲမှ ကြောက်မက်ဖွယ်ကောင်းပြီး ဆန်းကြယ်သော ရှင်သန်ခြင်းတားမြစ်နယ်မြေ ဟုတ်ပါသေးရဲ့လား။
အဘယ်ကြောင့် ကောင်းကင်ဘုံအရှင်သခင်၏ ရှေ့မှောက်တွင်... ၎င်းနှင့် ထိုအင်မော်တယ်ဂိုဏ်းများ၊ အဖွဲ့အစည်းများအကြား... မည်သည့်ကွာခြားမှုမျှ မရှိသကဲ့သို့ ခံစားနေရသနည်း။