အခန်း (၁၄၅-၁၄၆)
Vol. 11 Ch. 145-146
အခန်း (၁၄၅) - ကုချန် လှုပ်ရှားလာခြင်း၊ လက်ညှိုးတစ်ညွှန်ဖြင့် လော့ထျန်း၏ လျှို့ဝှက်ချက်များကို ဖော်ထုတ်ခြင်း
" ယိုရှစ်စန်း! မင်း ဘာလို့ ဒီကို ရောက်နေတာလဲ "
ကုချန်၏ ခေါ်ဆောင်ခြင်းခံခဲ့ရပြီး မည်သည့်အရာ ဖြစ်ပျက်ခဲ့သည်ကို မသိရှိသေးသော ထိုသူသည်... ထိန်းချုပ်ခံထားရသော လော့ထျန်းနန်းတော်၏ လုပ်ကြံသတ်ဖြတ်သူအား ကြည့်လိုက်ပြီး... အလိုအလျောက်ပင် အံ့အားတသင့် အော်ဟစ်လိုက်၏။
ရွှမ်ယိုနန်းတော်မှ လူသတ်သမားများတွင် နာမည်များ မရှိကြပေ။ သူတို့သည် တစ်ဦးနှင့်တစ်ဦးအား လျှို့ဝှက်အမည်များဖြင့်သာ ရည်ညွှန်းခေါ်ဝေါ်ကြသည်။
ယခင်က ယဲ့ယင်းယင်းအား လုပ်ကြံသတ်ဖြတ်ရန် ကြိုးပမ်းခဲ့သော ရွှမ်ယိုနန်းတော် လူသတ်သမား၏ လျှို့ဝှက်အမည်မှာ ယိုရှစ်စန်းပင် ဖြစ်သည်။
" ရွှမ်ဝူ! "
ယိုရှစ်စန်းသည် အလွန်ပင် ထိတ်လန့်သွားခဲ့၏။ ရွှမ်ဝူသည် အဆုံးမဲ့တိုက်ကြီးပေါ်ရှိ သူ၏ အထက်အရာရှိ ဖြစ်သည်။
သူ ရရှိခဲ့သော ရွှမ်ယိုနန်းတော်နှင့် သက်ဆိုင်သည့် တာဝန်အားလုံးကို ရွှမ်ဝူမှတစ်ဆင့် သူ့ထံသို့ ထုတ်ပြန်ပေးခဲ့ခြင်း ဖြစ်သည်။
သို့သော် ယခုအခါတွင် ရွှမ်ဝူသည်လည်း အဖမ်းခံလိုက်ရပြီ ဖြစ်သည်။
" ရွှမ်ဝူ! ခင်ဗျား ဘယ်လိုလုပ် ဒီရောက်လာတာလဲ "
" တိစန်း! ပြီးတော့ မင်းလည်း ပါတာပဲ "
ရှိနေသူတိုင်းသည် တစ်ဦးနှင့်တစ်ဦး ကြည့်လိုက်ကြပြီး... တစ်ဦး၏ မျက်လုံးများထဲတွင် အခြားတစ်ဦး၏ ထိတ်လန့်မှုအား... တွေ့မြင်လိုက်ကြရသည်။
အံ့ဩစရာ မရှိပေ... ရှိနေသူအများစုမှာ တစ်ဦးနှင့်တစ်ဦး အပြန်အလှန် ဆက်စပ်နေကြပြီး... လော့ထျန်းနန်းတော်နှင့်လည်း ပတ်သက်ဆက်နွယ်မှုများ ရှိနေကြသည်။
အထူးသဖြင့် ရှင်သန်ခြင်းတားမြစ်နယ်မြေများ၏ အစွန်အဖျားဒေသများတွင် ပုန်းအောင်းနေကြသော လော့ထျန်းနန်းတော်၏ ကောင်းကင်အဆင့် လူသတ်သမားများမှာမူ အလွန်အမင်း ထိတ်လန့်သွားခဲ့ကြသည်။
သူတို့သည် ရှင်သန်ခြင်းတားမြစ်နယ်မြေကဲ့သို့ အန္တရာယ်ရှိသော နေရာတစ်ခုတွင် ပုန်းအောင်းနေခဲ့ကြသည်ဖြစ်ရာ... သူတို့၏ အဆင့်အတန်းသည် လော့ထျန်းနန်းတော်၏ လူသတ်သမားများအကြားတွင် အမြင့်ဆုံး ဖြစ်နေခဲ့သည်။
ထို့ကြောင့်... လော့ထျန်းနန်းတော်၏ အခြားလူသတ်သမား အများစုမှာ... သူတို့နှင့် တိုက်ရိုက်ဆက်သွယ်ရသည့် အထက်အရာရှိကိုသာ သိရှိကြ၏။
သို့သော် လူအနည်းငယ်ကသာလျှင် ရှိနေသူတိုင်း၏ ဇစ်မြစ်ကို သိရှိကြပေသည်။
ထိုသူများသည် အဆုံးမဲ့တိုက်ကြီးပေါ်ရှိ တားမြစ်နယ်မြေများတွင် ပုန်းအောင်းနေသော... လော့ထျန်းနန်းတော်၏ လူသတ်သမားများသာ ဖြစ်ကြသည်။ ထို့ပြင် ဤကောင်းကင်အဆင့် လူသတ်သမားများအား ပို၍ မယုံနိုင်အောင် ဖြစ်စေခဲ့သောအရာမှာ... အဆုံးမဲ့နယ်မြေငါးခုအနှံ့ ပြန့်ကျဲနေသော လော့ထျန်းနန်းတော်၏ လူသတ်သမားများ အားလုံးနီးပါး တစ်ဦးတစ်ယောက်မျှ မလွတ်ဘဲ... ဤနေရာသို့ ဖမ်းဆီးခေါ်ဆောင်ခံခဲ့ရခြင်းပင် ဖြစ်သည်။
ဤပုဂ္ဂိုလ်သည် အဆုံးမဲ့နယ်မြေငါးခုလုံးမှ လော့ထျန်းနန်းတော်၏ လူသတ်သမားများအားလုံးကို မည်သို့ ဖမ်းဆီးနိုင်ခဲ့သနည်း။
လော့ထျန်းနန်းတော်၏ လူသတ်သမားများအားလုံးသည် ရှင်းပြ၍မရနိုင်လောက်အောင် ထိတ်လန့်နေကြပြီး... ယိုရှစ်စန်းသည်လည်း မသိစိတ်၏ စေ့ဆော်မှုဖြင့် မတားဆီးနိုင်စွာ ပြောလိုက်မိလေသည်.....
" ကောင်းကင်ဘုံအရှင်သခင်! ခင်ဗျား... ခင်ဗျား ဒါကို ဘယ်လိုလုပ်လိုက်တာလဲ "
သူ မယုံနိုင်ခဲ့ပေ။
သူသည် ရွှမ်ဝူကိုသာ သိရှိသည်... သို့ပါလျက် အဘယ်ကြောင့် ကောင်းကင်ဘုံအရှင်သခင်သည် အဆုံးမဲ့တိုက်ကြီးပေါ်တွင်... ပုန်းအောင်းနေသော လော့ထျန်းနန်းတော် လူသတ်သမားများအားလုံးကို ဖမ်းဆီးခဲ့ရသနည်း။
ထို့အပြင်... ယိုရှစ်စန်းမှ ကုချန်၏ဇစ်မြစ်အား ဖွင့်ဟလိုက်သည်ကို ကြားလိုက်ရသောအခါ... လော့ထျန်းနန်းတော်၏ လူသတ်သမားများသည် ပို၍ပင် တုန်လှုပ်သွားခဲ့ကြသည်။
အထူးသဖြင့် ထိုကောင်းကင်အဆင့် လူသတ်သမားများဖြစ်၏။ သူတို့သည် ရှင်သန်ခြင်းတားမြစ်နယ်မြေများမှ ခေါ်ဆောင်ခံခဲ့ရစဉ်က... ထိုတားမြစ်နယ်မြေများအတွင်းရှိ အရှင်သခင်များမှာ... အဘယ်ကြောင့် သေဆုံးနေသကဲ့သို့ မည်သည့်တုံ့ပြန်မှုမျှ မပြုဘဲ တိတ်ဆိတ်နေခဲ့ကြသည်ကို နားလည်သွားကြ၏။
အမှန်စင်စစ် လှုပ်ရှားခဲ့သူမှာ ဒဏ္ဍာရီလာ ကောင်းကင်ဘုံအရှင်သခင်ပင် ဖြစ်နေခဲ့သည်။
ယိုရှစ်စန်း၏ သူ့အပေါ် လုပ်ကြံသတ်ဖြတ်ရန် ကြိုးပမ်းမှု မအောင်မြင်ခဲ့ပြီးနောက်တွင်... လော့ထျန်းနန်းတော်သည် ယဲ့ယင်းယင်းမှာ ကုမိသားစုနှင့် ပတ်သက်နိုင်ဖွယ်ရှိကြောင်း ဆုံးဖြတ်ခဲ့ပြီး... ထို့နောက်တွင် အဆုံးမဲ့နယ်မြေငါးခု အနှံ့ ပျံ့နှံ့နေသော လော့ထျန်းနန်းတော် လူသတ်သမားများအားလုံးကို ပုန်းအောင်းနေရန် အမိန့်ထုတ်ပြန်ခဲ့သော်လည်း.....
ယခု လှုပ်ရှားလာသူမှာ... အမှန်တကယ်တွင် ဒဏ္ဍာရီလာ ကောင်းကင်ဘုံအရှင်သခင် ဖြစ်နေလိမ့်မည်ဟု... မည်သူက ထင်ထားမိမည်နည်း။
" ကောင်းကင်ဘုံအရှင်သခင်... ဘယ်လိုလုပ်ဖြစ်နိုင်မှာလဲ... အဲ့ဒီ ယဲ့ယင်းယင်းက ပုရွက်ဆိတ်လို သတ္တဝါလေးတစ်ကောင်ပဲဟာ... ဘာလို့..... "
ကောင်းကင်အဆင့် လူသတ်သမားများသည် နားမလည်နိုင် ဖြစ်သွားခဲ့ကြသည်။
ယဲ့ယင်းယင်းသည် ကုချန်နှင့် မည်သို့ ပတ်သက်ဆက်နွယ်သွားခဲ့သည်ကို သူတို့ အမှန်တကယ် နားမလည်ခဲ့ကြပေ။
လွန်ခဲ့သော နှစ်အနည်းငယ်က... ယဲ့ယင်းယင်းသည် ကုမိသားစု၏ ကယ်တင်ခြင်းကို ကံကောင်းစွာ ခံခဲ့ရသော်လည်း... နှစ်ဦးကြားရှိ ဆက်ဆံရေးမှာ ထိုမျှထက် ပိုခဲ့ခြင်း မရှိပေ။
သို့သော် ယခုအခါတွင်... ယဲ့ယင်းယင်းကြောင့် ကောင်းကင်ဘုံအရှင်သခင်သည် ကိုယ်တိုင်ကိုယ်ကျ လှုပ်ရှားလာခဲ့သည်... ဤသည်မှာ.....
သို့သော်... ဤ လော့ထျန်းနန်းတော်၏ လူသတ်သမားများ အရာအားလုံးကို နားလည် သဘောပေါက်မသွားမီမှာပင်... ကုချန်သည် လှုပ်ရှားလိုက်၏။
သူသည် ဤ လော့ထျန်းနန်းတော်၏ လူသတ်သမားများအား ဤနေရာသို့ စုစည်းလိုက်ခြင်းမှာ... သူတို့အား အေးအေးဆေးဆေး စကားစမြည် ပြောဆိုနေသည်ကို ကြည့်ရှုရန် လုံးဝမဟုတ်ဘဲ... ဝိညာဉ်ရှာဖွေခြင်းကို ပိုမို အဆင်ပြေစေရန်အတွက်သာ ဖြစ်သည်။
လော့ထျန်းနန်းတော်မှ လူသတ်သမားများ၏ အံ့အားသင့်ထိတ်လန့်နေသော အကြည့်များကို ရင်ဆိုင်လျက်... ကုချန်သည် သူ၏လက်ဖဝါးအား အနည်းငယ် ဆန့်ထုတ်လိုက်ရာ... ပြိုင်ဘက်ကင်းသော တန်ခိုးအရှိန်အဝါတစ်ခု ထွက်ပေါ်လာခဲ့၏။ ရှိရှိသမျှသော ရွှမ်ယိုနန်းတော် လူသတ်သမားများအားလုံးသည်... ယိုရှစ်စန်းမှလွဲ၍ သူတို့၏ ရုပ်ခန္ဓာများမှာ ဖုန်မှုန့်အဖြစ်သို့ ကြေမွပျက်စီးသွားခဲ့ပြီး... သူတို့၏ နတ်ဝိညာဉ်များမှာမူ ကုချန်၏ လက်ဖဝါးအတွင်းသို့ ဖမ်းယူခံလိုက်ရကာ ချက်ချင်းပင် သန့်စင်ခြင်း ခံလိုက်ရသည်။
မရေမတွက်နိုင်သော ရှုပ်ထွေးသည့် မှတ်ဉာဏ်များ စီးဝင်လာခဲ့လေ၏။
သို့သော် အဆုံးမရှိသော သမုဒ္ဒရာတစ်ခုကဲ့သို့ အားအင်ကြီးမားလှသော ကုချန်၏ နတ်ဝိညာဉ်အတွက်မူ... ဤ လော့ထျန်းနန်းတော် လူသတ်သမားများ၏ နတ်ဝိညာဉ် မှတ်ဉာဏ်များသည် ရေအိုင်ငယ်လေး တစ်အိုင်ဟုပင် သတ်မှတ်၍မရပေ။ ၎င်းတို့သည် သူ၏လက်ထဲတွင် လွယ်ကူစွာပင် သန့်စင်စုပ်ယူခြင်း ခံလိုက်ရသည်။
မကြာမီပင်... ကုချန်သည် ဤမှတ်ဉာဏ်များ အားလုံးကို ကြည့်ရှု၍ ပြီးစီးသွားခဲ့လေသည်။
ထို့အပြင် နောက်ဆုံးရလဒ်သည်လည်း သူ့အား စိတ်ပျက်စေခဲ့ခြင်း မရှိပေ။
ရှင်သန်ခြင်းတားမြစ်နယ်မြေ၏ အစွန်အဖျားတွင် ပုန်းအောင်းနေကြသော... ထို ကောင်းကင်အဆင့် လော့ထျန်းနန်းတော် လူသတ်သမားများ၏ မှတ်ဉာဏ်များမှတစ်ဆင့်... သူသည် လော့ထျန်းနန်းတော်၏ ဌာနချုပ် တည်နေရာကို အောင်မြင်စွာ ရှာဖွေတွေ့ရှိခဲ့သည်။
လော့ထျန်းနန်းတော်၏ ဌာနချုပ်သည် အဆုံးမဲ့ကမ္ဘာ့နယ်မြေ၏ နက်ရှိုင်းသော အတွင်းပိုင်း... ရှေးကျ၍ လူသူကင်းမဲ့သော ကြယ်တစ်လုံးပေါ်ရှိ အာကာသအက်ကွဲကြောင်းတစ်ခု အတွင်းမှ... ကမ္ဘာငယ်တစ်ခုထဲတွင် တည်ရှိနေခဲ့သည်။
ပတ်ဝန်းကျင်အား လော့ထျန်းနန်းတော်၏ ဘိုးဘေးများထံမှ လက်ဆင့်ကမ်းခဲ့သော အစွမ်းထက်သည့် ဖုံးကွယ်ခြင်းအစီအရင်တစ်ခုဖြင့်လည်း ကာကွယ်ထားခဲ့သည်။
ထို့ကြောင့်... ဤမျှ အချိန်ကြာမြင့်ပြီးသည့်တိုင်အောင်... လော့ထျန်းနန်းတော်၏ တည်နေရာသည် လျှို့ဝှက်ဆန်းကြယ်မှုတစ်ခုအဖြစ် ကျန်ရှိနေခဲ့ပြီး... မည်သူတစ်ဦးတစ်ယောက်မျှ ၎င်းကို မရှာဖွေနိုင်ခဲ့ခြင်း ဖြစ်လေသည်။
သို့သော် ယခုအခါတွင်... လော့ထျန်းနန်းတော်၏ တည်နေရာသည် ကုချန်၏ မျက်လုံးများထဲတွင်... လျှို့ဝှက်ချက်တစ်ခု မဟုတ်တော့ပေ။
" ခင်ဗျား... ခင်ဗျား ဘာလုပ်တော့မလို့လဲ "
ကုချန်မှ လော့ထျန်းနန်းတော်၏ လူသတ်သမားများအားလုံးကို ချက်ချင်း သုတ်သင်ဖျက်ဆီးလိုက်သည်ကို မြင်တွေ့လိုက်ရသောအခါ... ယိုရှစ်စန်းသည် ထိတ်လန့်သွားခဲ့ပြီး... ရှင်းပြ၍မရနိုင်သော ကြောက်ရွံ့ထိတ်လန့်မှုတစ်ခုသာ သူ၏နှလုံးသားထဲသို့ တိုးဝင်လာခဲ့တော့သည်။
" လော့ထျန်းနန်းတော် ပျက်စီးရတော့မယ် "
ကုချန်သည် ခံစားချက်ကင်းမဲ့စွာ ပြောကြားလိုက်ပြီး... သူ၏လက်ဖဝါးအား ဖြည်းညင်းစွာ မြှောက်ကာ... စကြဝဠာ၏ နက်ရှိုင်းသော အတွင်းပိုင်းသို့ လက်ညှိုးတစ်ချောင်း ညွှန်ပြလိုက်လေသည်။
လက်ညှိုးတစ်ချက် ညွှန်ပြလိုက်သည်နှင့် လေနှင့်တိမ်တို့ စုစည်းလာခဲ့ပြီး... အဆုံးမဲ့တာအိုများသည်လည်း လိုက်ပါလာခဲ့၏။
အဆုံးမရှိသော ကောင်းကင်နှင့်မြေကြီး၏ စွမ်းအားများသည် ဧရာမ ဟွမ်သွမ့်လက်ညှိုးကြီးတစ်ခုအဖြစ်သို့ အသွင်ပြောင်းသွားခဲ့ပြီး... မရေမတွက်နိုင်သော အံ့အားသင့်နေသည့် အကြည့်များအောက်တွင် အဆုံးမဲ့နယ်မြေငါးခုမှ ပျံသန်းထွက်ခွာသွားကာ... ကျယ်ပြန့်လှသော စကြဝဠာ၏ နက်ရှိုင်းရာနေရာများဆီသို့ ဖြတ်ကျော်သွားခဲ့လေသည်။
အကြည့်တစ်စုံထက်မက ထိုဧရာမ ဟွမ်သွမ့် လက်ညှိုးကြီး၏ နောက်သို့ လိုက်ပါကြည့်ရှုနေခဲ့ကြ၏။
ထိုအကြည့်များ အများစုမှာ ရှင်သန်ခြင်းတားမြစ်နယ်မြေ အသီးသီးမှ ရှေးဟောင်းအရှင်သခင်များနှင့် သက်ဆိုင်ပေသည်။
အဘယ်ကြောင့်ဆိုသော်... ကောင်းကင်ဘုံအရှင်သခင်သည် မည်သူ့ကို ကိုင်တွယ်ဖြေရှင်းရန်အလို့ငှာ... ဤမျှလောက် အပင်ပန်းခံ ကြိုးစားခဲ့သည်ကို သူတို့အားလုံး သိရှိလိုကြသောကြောင့်ပင်။
အသေအချာပင်... ဤ ဧရာမ ဟွမ်သွမ့် လက်ညှိုးကြီး၏ ပန်းတိုင်သည်... အဖြေအား ဖွင့်ပြမည့် နေရာပင် ဖြစ်ပေလိမ့်မည်။
...
အဆုံးမရှိသော စကြဝဠာ၏ နက်ရှိုင်းသော အတွင်းပိုင်း.....
လူသူကင်းမဲ့၍ စွန့်ပစ်ထားသော သက်ရှိဂြိုဟ်တစ်ခုပေါ်တွင်.....
ကမ္ဘာငယ်တစ်ခုအတွင်းရှိ အာကာသအက်ကွဲကြောင်းတစ်ခုထဲ၌... လော့ထျန်းနန်းတော်၏ ဌာနချုပ် ပုန်းကွယ်လျက်ရှိသည်။
လော့ထျန်းနန်းတော်၏ လက်ရှိအရှင်သခင်သည် သူ၏ရှေ့မှောက်ရှိ မရေမတွက်နိုင်သော လက်နက်များအား စိုက်ကြည့်နေခဲ့ပြီး... သူ၏မျက်လုံးများထဲတွင် ပြင်းပြသောဆန္ဒနှင့် မျှော်လင့်တကြီး ဖြစ်နေသော အသွင်အပြင်တစ်ခု ရှိနေခဲ့သည်။
သူ၏ရှေ့မှောက်၌ ပြန့်ကျဲနေသော လက်နက်များအားလုံးတွင် တူညီသော အချက်တစ်ချက် ရှိနေ၏။ ၎င်းတို့၏ မျက်နှာပြင်များတွင် သွေးများ စွန်းထင်းနေခဲ့ပြီး... သွေးအလုံအလောက် စုပ်ယူထားသော လောဘကြီးသည့် သားရဲတိရစ္ဆာန်များကဲ့သို့ပင် ဖြစ်နေသည်။
ထို့အပြင် ဤလက်နက်အမျိုးမျိုးပေါ်တွင် စွန်းထင်းနေသော သွေးများသည်လည်း ကွဲပြားလျက်ရှိသည်။
အချို့မှာ သာမန် အနီရင့်ရောင် ဖြစ်ကြပြီး... အချို့မှာမူ လှပသော ခရမ်းရောင်ဖျော့ သို့မဟုတ် ရွှေရောင်များ ဖြစ်ကြသည်။
သို့သော် ခြွင်းချက်မရှိဘဲ... ဤလက်နက်များပေါ်ရှိ သွေးများအားလုံးသည် အလွန်အမင်း အစွမ်းထက်သော သွေးမျိုးဆက်တုန်ခါမှုလှိုင်းများကို ထုတ်လွှတ်လျက် ရှိနေသည်။
အစွမ်းထက်သော ကျင့်ကြံသူတစ်ဦးသာ ဤနေရာ၌ ရှိနေခဲ့ပါလျှင်... သူတို့သည် ရှင်းပြ၍မရနိုင်လောက်အောင် ထိတ်လန့်သွားကြမည်မှာ သေချာ၏။
အဘယ်ကြောင့်ဆိုသော်... ဤနေရာရှိ လက်နက် တစ်ခုချင်းစီတိုင်းသည် အလွန်အမင်း အစွမ်းထက်သော သွေးမျိုးဆက်တစ်ခုဖြင့်... လိမ်းကျံ စွန်းထင်းနေသောကြောင့်ပင် ဖြစ်သည်။
ရှေးဟောင်းနဂါးသွေး၊ မသေမျိုးနတ်ဘုရင်ခန္ဓာ၊ ထို့ရှသခင်ခန္ဓာ.....
အစွမ်းထက်သော သွေးမျိုးဆက်နှင့် ခန္ဓာပိုင်ရှင်များစွာ၏ လတ်ဆတ်သော သွေးများသည်... ဤလက်နက်မြောက်မြားစွာပေါ်တွင် လိမ်းကျံ စွန်းထင်းနေခဲ့ပြီး... မယုံနိုင်လောက်အောင် ကြေကွဲဖွယ်ကောင်းကာ လှပနေခဲ့သည်။
" မြင့်မြတ်ခန္ဓာ သွေးမျိုးဆက်တစ်ခုပဲ လိုတော့တယ်... ဒါရရင် လိုအပ်တဲ့ ခန္ဓာသွေးမျိုးဆက်တွေအားလုံး ပြည့်စုံသွားပြီ "
လော့ထျန်းနန်းတော်၏ အရှင်သခင်သည် သူ၏ရှေ့မှောက်ရှိ လက်နက်မြောက်မြားစွာကို ကြည့်လိုက်ပြီး... တစ်စုံတစ်ခုကို စဉ်းစားမိသွားဟန်ဖြင့် သူ၏မျက်လုံးများထဲတွင် နောင်တနှင့် ဒေါသ အရိပ်အယောင်တစ်ခု ပေါ်ထွက်လာခဲ့သည်။
" အသုံးမကျဘူး... တကယ် အသုံးမကျဘူး... အဲ့ဒီ မြင့်မြတ်ခန္ဓာ သွေးမျိုးဆက်ကိုသာ စောစော ယူလာခဲ့နိုင်ရင်... ဒီအရှင်သခင် ဘာလို့ စောင့်နေစရာ လိုတော့မှာလဲ "
အခန်း (၁၄၆) - လော့ထျန်း သတ်ဖြတ်ခြင်း ကျင့်စဉ်၊ လက်တစ်ချောင်း၏ စွမ်းအား၊ ချက်ချင်း ပျက်စီးခြင်း
လော့ထျန်းနန်းတော်၏ အရှင်သခင်သည် အမျက်ထွက်လျက် ရှိ၏။
သူသည် မြင့်မြတ်ခန္ဓာ သွေးမျိုးဆက်တစ်ခုတည်းသာ လိုအပ်တော့သည်။ ထို့နောက်တွင်... သူသည် လိုအပ်သော တော်ဝင်သွေး နှင့် မြင့်မြတ်သွေး အားလုံးကို စုဆောင်းနိုင်မည်ဖြစ်ပြီး... သူ အမြဲတမ်း အိပ်မက်မက်ခဲ့ရသော ပစ္စည်းအား ပြန်လည်ရယူနိုင်မည် ဖြစ်သည်။
သို့သော် ထိုအသုံးမကျသောသူ ယိုရှစ်စန်းမှာ မအောင်မြင်ခဲ့ကြောင်းကို မည်သူက သိရှိမည်နည်း။
သူသည် မအောင်မြင်ခဲ့ရုံသာမကဘဲ... ဤကိစ္စရပ်သည် အထက်ကောင်းကင်တားမြစ်နယ်မြေမှ ကုမိသားစုနှင့် ပတ်သက်ဆက်နွယ်နေပုံ ရှိနေသည်။
လော့ထျန်းနန်းတော်၏ အရှင်သခင်သည် အဆုံးမဲ့တိုက်ကြီးပေါ်ရှိ လော့ထျန်းနန်းတော် လူသတ်သမားများအားလုံးကို ပုန်းအောင်းနေရန် အသေအချာ အမိန့်ပေးခဲ့သောကြောင့်... မြင့်မြတ်သွေးအား အောင်မြင်စွာ စုဆောင်းနိုင်ရန်မှာ အလှမ်းဝေးသော မျှော်လင့်ချက်တစ်ခု ဖြစ်လာပေလိမ့်မည်။
အထူးသဖြင့်... လွန်ခဲ့သော နှစ်အနည်းငယ်က မြင့်မြတ်သွေးအား စုဆောင်းရန် ကြိုးပမ်းမှုသည် ကုမိသားစု၏ တားဆီးမှုကြောင့် မအောင်မမြင် ဖြစ်ခဲ့ရပြီး... နှစ်အနည်းငယ်အကြာ... သူတို့ ထပ်မံ ကြိုးစားခဲ့သည့်အခါ၌ပင်လျှင်... မျှော်လင့်မထားစွာ ကုမိသားစု၏ လက်ချက်ဖြင့်ပင် ပျက်စီးသွားခဲ့ရပြန်သည်။
လော့ထျန်းနန်းတော်၏ အရှင်သခင်သည် အလွန်အမင်း အမျက်ထွက်ခဲ့၏။
ကုမိသားစု မဟာဧကရာဇ်၏ ပြန်လည်ရောက်ရှိလာခြင်းနှင့် သူ၏ ကုမိသားစုတစ်ခုလုံးအား အထက်ကောင်းကင်တားမြစ်နယ်မြေသို့ နေရာပြောင်းရွှေ့လိုက်ခြင်းသာ မဖြစ်ခဲ့ပါလျှင်... သူသည် ကုမိသားစုအား လုပ်ကြံသတ်ဖြတ်ရန် သူ၏ လူသတ်သမားများကို ယခင်ကတည်းက အမိန့်ပေးခဲ့ပြီးလောက်ပြီ ဖြစ်သည်။
ယခုအခါ... ကုမိသားစုဝင်များအားလုံးသည် ကောင်းကင်ဘုံတားမြစ်နယ်မြေတွင် ပုန်းအောင်းနေကြပြီး... သူ ကြားသိရသည်မှာ မြင့်မြတ်ခန္ဓာသည်ပင် ကောင်းကင်ဘုံတားမြစ်နယ်မြေ၌ ပုန်းအောင်းနေသည်ဟူ၍ ဖြစ်သည်။
လော့ထျန်းနန်းတော်၏ အရှင်သခင်သည် လုံးဝ ကူကယ်ရာမဲ့စွာဖြင့် စိုးရိမ်ပူပန်စွာ ကြည့်ရှုနေရုံသာ ရှိတော့သည်။
မည်သို့ပင်ဖြစ်စေ... လော့ထျန်းနန်းတော်သည် လုပ်ကြံသတ်ဖြတ်ခြင်း တာအိုလမ်းစဉ်၌သာ ကျွမ်းကျင်သည်ဖြစ်ရာ... ကောင်းကင်ဘုံတားမြစ်နယ်မြေအား အတင်းအကျပ် ကျူးကျော်ရန် ကြိုးစားခြင်းသည်... အရူးတစ်ယောက်၏ အိပ်မက်တစ်ခုမျှသာ ဖြစ်ပေလိမ့်မည်။
ထို့အပြင် မြင့်မြတ်သွေးကို ရရှိရန်အတွက်... ယဲ့ယင်းယင်းမှလွဲ၍... ဤကမ္ဘာလောကကြီးတွင် ဒုတိယတစ်ဦး မရှိခဲ့ပေ။
မည်မျှ ဒေါသထွက်စရာ... မည်မျှ စိတ်အနှောင့်အယှက် ဖြစ်စရာ ကောင်းလိုက်ပါသနည်း။
လော့ထျန်းနန်းတော် အရှင်သခင်၏ စိတ်အခြေအနေသည် ဤအခိုက်အတန့်တွင် အလွန်အမင်း ဆိုးရွားလျက်ရှိ၏။
မည်သို့ပင်ဖြစ်စေ... ထိုပစ္စည်းသည် သူ့အတွက် ကြီးမားလှသော ဆွဲဆောင်မှုတစ်ခုအား ပိုင်ဆိုင်ထားသည်။
လော့ထျန်းနန်းတော်၏ လက်ရှိအရှင်သခင်တစ်ဦးအနေဖြင့်... သူသည် လော့ထျန်းနန်းတော်၏ အဓိကလျှို့ဝှက်ချက်များစွာကို အလိုလျောက်ပင် သိရှိနေသည်။
ဥပမာအားဖြင့်... လော့ထျန်းနန်းတော်၏ ရတနာဖြစ်သော လော့ထျန်း သတ်ဖြတ်ခြင်း ကျင့်စဉ်ကျမ်းပင် ဖြစ်သည်။
လော့ထျန်းနန်းတော်သည် နှစ်ပေါင်းများစွာတိုင် မကျဆုံးဘဲ ရပ်တည်နိုင်ခဲ့ခြင်းမှာ... လော့ထျန်း သတ်ဖြတ်ခြင်း ကျင့်စဉ်ကျမ်း တည်ရှိနေသောကြောင့်ပင် ဖြစ်သည်။
လော့ထျန်းနန်းတော် အရှင်သခင်၏ နှလုံးသားထဲ၌ပင်... လော့ထျန်း သတ်ဖြတ်ခြင်း ကျင့်စဉ်ကျမ်းသည် ဧကရာဇ်အဆင့် ကျင့်စဉ်ဟု ခေါ်ဆိုကြသော အရာထက် များစွာ ပိုမို အစွမ်းထက်ပေသည်။
အဘယ်ကြောင့်ဆိုသော်... လော့ထျန်း သတ်ဖြတ်ခြင်း ကျင့်စဉ်ကျမ်းသည် လော့ထျန်းနန်းတော်အား တည်ထောင်သူမှ အဆုံးမဲ့ဟွမ်သွမ့်ပင်လယ်၏ နက်ရှိုင်းရာမှ ရှာဖွေတွေ့ရှိခဲ့သော အထွတ်အထိပ် နတ်ဘုရားကျမ်းတစ်စောင် ဖြစ်နေသောကြောင့်ပင်။
၎င်းအတွင်း၌ မှတ်တမ်းတင်ထားသော တာအိုလမ်းစဉ်သည် အရာအားလုံးကို လွှမ်းခြုံနိုင်ပြီး... ကျယ်ပြန့်ကာ ရှုပ်ထွေးလှသဖြင့်... သာမန် ကျင့်ကြံခြင်း ကျင့်စဉ်များဖြင့် နှိုင်းယှဉ်နိုင်သည်ထက် များစွာ ကျော်လွန်နေခဲ့သည်။
သို့သော်... တစ်ခုတည်းသော နှမြောစရာကောင်းသည့်အချက်မှာ... လော့ထျန်းနန်းတော်၏ ပထမဆုံး အရှင်သခင် ရရှိခဲ့သော လော့ထျန်း သတ်ဖြတ်ခြင်း ကျင့်စဉ်ကျမ်းသည် ပြီးပြည့်စုံခြင်း မရှိခဲ့ခြင်းပင် ဖြစ်သည်။ အစိတ်အပိုင်းတစ်ခုမှာ ပျောက်ဆုံးနေခဲ့ပြီး... ၎င်းက လော့ထျန်း သတ်ဖြတ်ခြင်း ကျင့်စဉ်ကျမ်း၏ တစ်ခုတည်းသော ချို့ယွင်းချက်ဖြစ်စေကာ... ပြီးပြည့်စုံခြင်း မရှိခဲ့ပေ။
လော့ထျန်းနန်းတော် ပထမဆုံး အရှင်သခင်၏ ခန့်မှန်းချက်အရ... အကယ်၍ တစ်စုံတစ်ဦးသည် ပြီးပြည့်စုံသော လော့ထျန်း သတ်ဖြတ်ခြင်း ကျင့်စဉ်ကျမ်းအား ရရှိပြီး ကျင့်ကြံနိုင်ခဲ့မည်ဆိုလျှင်... သူတို့သည် ဧကရာဇ်အဆင့်အထက်ရှိ သက်ရှိတစ်ဦးအဖြစ်သို့တိုင် ကျင့်ကြံနိုင်ဖွယ်ရာ များလွန်းလှ၏။
သို့သော် ကံမကောင်းစွာပင်... နောက်ပိုင်းတွင် ဟွမ်သွမ့်ပင်လယ်၏ နက်ရှိုင်းရာနေရာများ၌ အကြိမ်များစွာ စူးစမ်းရှာဖွေခဲ့သော ပထမဆုံး လော့ထျန်းနန်းတော် အရှင်သခင်သည်ပင်လျှင်... လော့ထျန်း သတ်ဖြတ်ခြင်း ကျင့်စဉ်ကျမ်း၏ ကျန်ရှိနေသော အစိတ်အပိုင်းအတွက် သဲလွန်စ တစ်စုံတစ်ရာမျှ မရှာဖွေနိုင်ခဲ့ပေ။
နောက်ဆုံးတွင်... သူသည် အလွန်အမင်း ပြင်းထန်စွာ စွန့်စားလွန်းမှုကြောင့်... ဟွမ်သွမ့်ပင်လယ်၏ နက်ရှိုင်းရာနေရာတွင် ကျဆုံးသွားခဲ့ရသည်အထိပင် ဖြစ်ခဲ့သည်။
လော့ထျန်းနန်းတော်သည် နောက်ပိုင်းတွင်... အစွမ်းထက်သော ကျင့်ကြံသူများအား အကြိမ်များစွာ စေလွှတ်၍ ရှာဖွေခဲ့သော်လည်း... မည်သည့်အရာမျှ ရှာဖွေမတွေ့ရှိခဲ့ကြပေ။
သို့သော်... လွန်ခဲ့သော နှစ်အနည်းငယ်က.....
လျှို့ဝှက်ဆန်းကြယ်သော သက်ရှိတစ်ဦးသည် ရုတ်တရက် လော့ထျန်းနန်းတော်အား ရှာဖွေတွေ့ရှိခဲ့ပြီး... လော့ထျန်းနန်းတော်အား အပ်နှံရန် တာဝန်တစ်ခု ရှိသည်ဟု အခိုင်အမာ ဆိုခဲ့သည်။
အပ်နှံလိုက်သော တာဝန်မှာမူ... လော့ထျန်းနန်းတော်အား အဆုံးမဲ့ကမ္ဘာအတွင်းရှိ အစွမ်းထက်သော မြင့်မြတ်ခန္ဓာများနှင့် သွေးမျိုးဆက် အမျိုးမျိုးကို ရှာဖွေစေပြီး... သူတို့၏ သွေးများအား စုဆောင်းရန် ဖြစ်သည်။
တော်ဝင်ခန္ဓာ၊ နတ်ဘုရားခန္ဓာ နှင့် မြင့်မြတ်ခန္ဓာတို့မှ သွေး အမျိုးအစား အနည်းဆုံး တစ်ရာ ပြည့်မီအောင် စုဆောင်းပြီးလျှင်... ထိုတာဝန်သည် ပြီးမြောက်ပေလိမ့်မည်။
လော့ထျန်းနန်းတော်၏ အရှင်သခင်သည် ဤတာဝန်အား ကြားသိလိုက်ရသောအခါ... သူ၏ ပထမဆုံး အတွေးမှာ ငြင်းပယ်ရန် ဖြစ်သည်။
အဆုံးမဲ့ကမ္ဘာသည် နယ်နိမိတ်မရှိ ကျယ်ပြန့်လှပြီး... ၎င်းအတွင်းရှိ ကျင့်ကြံသူများသည် မြစ်ကိုဖြတ်ကူးနေသော ငါးကြင်းများကဲ့သို့ပင် များပြားလှကာ... မရေမတွက်နိုင်အောင် ရှိနေသည်။
သို့သော် ထိုသို့ဖြစ်နေလျှင်ပင်... မရေမတွက်နိုင်သော ကျင့်ကြံသူများအကြားတွင်... အစွမ်းထက်သော မြင့်မြတ်ခန္ဓာများ သို့မဟုတ် သွေးမျိုးဆက်များ ပိုင်ဆိုင်ကြသူများသည်... ဖီးနစ်ငှက်မွှေးများနှင့် ချီလင်ချိုများကဲ့သို့ပင် ရှားပါးလှသည်။
ထို့အပြင်... ဤမြင့်မြတ်ခန္ဓာများနှင့် သွေးမျိုးဆက်များ၏ ပိုင်ရှင်များသည်... ဂိုဏ်းအကြီးအကဲများမှ ကာကွယ်ပေးထားသော ပါရမီရှင်များ... သို့မဟုတ် နေရာဒေသတစ်ခုတွင် ကျော်ကြားပြီးသားဖြစ်သော အစွမ်းထက် ကျင့်ကြံသူများ ဖြစ်ကြသည်။
တစ်ဦး သို့မဟုတ် နှစ်ဦး ဆိုလျှင် အဆင်ပြေနိုင်သေး၏။
သို့သော် ယခုအခါ... အခြားတစ်ဖက်မှ လိုချင်နေသည်မှာ... ထူးကဲသော ခန္ဓာပိုင်ရှင် တစ်ရာကျော်၏ သွေးများ ဖြစ်နေသည်။ ဤကဲ့သို့သော တာဝန်မျိုးသည် လော့ထျန်းနန်းတော်ပင်လျှင် ပြီးမြောက်အောင်မြင်ရန် ခက်ခဲလိမ့်မည် ဖြစ်သည်။
အကယ်၍ သူတို့သည် ဤတာဝန်အား ပြီးမြောက်အောင်မြင်အောင် လုပ်ဆောင်မည်ဆိုလျှင်ပင်... အလွန်အမင်း ကြီးမားသော တန်ဖိုးတစ်ခုအား ပေးဆပ်ရမည် ဖြစ်သည်။
သို့သော်... လော့ထျန်းနန်းတော်၏ အရှင်သခင် မငြင်းပယ်နိုင်မီမှာပင်... အခြားတစ်ဖက်မှ ကမ်းလှမ်းလာသော အခြေအနေများက သူ့အား တုန်လှုပ်သွားစေခဲ့သည်။
အဘယ်ကြောင့်ဆိုသော်... အခြားတစ်ဖက်မှ ကမ်းလှမ်းသော တန်ဖိုးမှာ... အမှန်ပင် လော့ထျန်း သတ်ဖြတ်ခြင်း ကျင့်စဉ်ကျမ်း၏ ကျန်ရှိနေသော... မပြည့်စုံသည့် အစိတ်အပိုင်း ဖြစ်နေသောကြောင့်ပင်။
လော့ထျန်းနန်းတော်မှ ထိုတာဝန်အား ပြီးမြောက်အောင်မြင်ခဲ့လျှင်... ထိုလျှို့ဝှက်ဆန်းကြယ်သော သက်ရှိက လော့ထျန်းနန်းတော်အား... လော့ထျန်း သတ်ဖြတ်ခြင်း ကျင့်စဉ်ကျမ်းအား ပြီးပြည့်စုံစေရန် ကူညီမည်ဟု ကတိပေးခဲ့သည်။
အစပိုင်းတွင်... လော့ထျန်းနန်းတော်၏ အရှင်သခင်သည် လုံးဝ မယုံကြည်ခဲ့ပေ။ လော့ထျန်းနန်းတော်သည် လော့ထျန်း သတ်ဖြတ်ခြင်း ကျင့်စဉ်ကျမ်း၏ ပျောက်ဆုံးနေသော အစိတ်အပိုင်းအတွက် နှစ်ပေါင်း သောင်းချီကြာ ရှာဖွေခဲ့ရသည်... ယခုမူ ထိုသူက ၎င်းအား ပြီးပြည့်စုံအောင် လုပ်ဆောင်နိုင်သည်ဟု ပြောနေသလော။ ဤသည်မှာ မည်သို့ ဖြစ်နိုင်မည်နည်း။
သို့သော်... အခြားတစ်ဖက်မှ လော့ထျန်း သတ်ဖြတ်ခြင်း ကျင့်စဉ်ကျမ်း၏ မပြည့်စုံသော အစိတ်အပိုင်းမှ အကြောင်းအရာအချို့အား ပြောပြလာသောအခါ... နှိုင်းယှဉ်လေ့လာမှုတစ်ခု ပြုလုပ်ပြီးနောက်တွင်... လော့ထျန်းနန်းတော်၏ အရှင်သခင်သည် အခြားတစ်ဖက်မှ ပြောကြားလိုက်သော အရာမှာ... အမှန်တရား ဖြစ်နိုင်ခြေ များလွန်းကြောင်းကို တုန်လှုပ်စွာဖြင့် တွေ့ရှိလိုက်ရကာ... ရွေးချယ်စရာ မရှိခဲ့ပေ။
ဤလျှို့ဝှက်ဆန်းကြယ်သော ပုဂ္ဂိုလ်သည်... လော့ထျန်း သတ်ဖြတ်ခြင်း ကျင့်စဉ်ကျမ်း၏ မပြည့်စုံသော အစိတ်အပိုင်းအား... အမှန်တကယ် ပိုင်ဆိုင်ထား၏။
ဤကဲ့သို့ ရက်ရောလှသော ကမ်းလှမ်းမှုသည် လော့ထျန်းနန်းတော် အရှင်သခင်၏ နှလုံးသားအား ချက်ချင်းပင် တဒိတ်ဒိတ် ခုန်သွားစေခဲ့သည်။
လော့ထျန်း သတ်ဖြတ်ခြင်း ကျင့်စဉ်ကျမ်းအား ပြီးပြည့်စုံအောင် ပြုလုပ်နိုင်ခဲ့မည်ဆိုလျှင်... ရရှိလာမည့် အရာများစွာကို သူ ကောင်းစွာ သိရှိနေသည်။
ဤသည်မှာ လော့ထျန်းနန်းတော်၏ အင်အားသည် နောက်ထပ်အဆင့်တစ်ခုသို့ မြင့်တက်သွားနိုင်ရုံသာမက... လော့ထျန်း သတ်ဖြတ်ခြင်း ကျင့်စဉ်ကျမ်းအား ပြီးပြည့်စုံအောင် ပြုလုပ်ခဲ့သူ တစ်ဦးအနေဖြင့်... သူ၏နာမည်သည် လော့ထျန်းနန်းတော်၏ သမိုင်းတွင်... ထာဝရ ကမ္ပည်းထိုး မှတ်တမ်းတင်ခံရမည်လည်း ဖြစ်၏။
ဤသို့ ရက်ရောလှသော ကမ်းလှမ်းမှုကြောင့်... ကြီးမားသော တန်ဖိုးတစ်ခုအား ပြန်ပေးဆပ်ရမည်ဆိုလျှင်ပင်... ထိုက်တန်လှ၏။ လော့ထျန်းနန်းတော်၏ အရှင်သခင်သည် သေချာပေါက် ငြင်းပယ်မည် မဟုတ်ပေ။
ထို့ကြောင့် သူသည် လော့ထျန်းနန်းတော်၏ လူသတ်သမားများအားလုံးထံသို့ အမိန့်များ ထုတ်ပြန်ရန် စတင်ခဲ့သည်။
သို့သော်... ရှာဖွေတွေ့ရှိခံရခြင်းမှ ရှောင်ရှားရန်အတွက် သူ အမိန့်ထုတ်ပြန်ခဲ့သည့်အခါ... သူသည် ထိုလူသတ်သမားများအား... ဤသွေးမျိုးဆက်ပိုင်ရှင်များအား အောင်မြင်စွာ လုပ်ကြံသတ်ဖြတ်ပြီးနောက်တွင်... သူတို့၏ အသွေးအသားပါသော သွေးများ စွန်းထင်းနေသည့် လက်နက်များကိုသာ... လော့ထျန်းနန်းတော်ထံသို့ ပေးအပ်ရန်လိုအပ်သည်ဟု ပြောကြားခဲ့၏။
ထိုအစွမ်းထက်သော သွေးမျိုးဆက်ပိုင်ရှင်များအား... လုပ်ကြံသတ်ဖြတ်ရခြင်း၏ ရည်ရွယ်ချက် အမှန်တရားကိုတော့... အောက်ခြေရှိ လူသတ်သမားများထံသို့ ဖွင့်ဟပြောကြားခဲ့ခြင်း မရှိပေ။
ထိုစဉ်က ယဲ့ယင်းယင်းအား လုပ်ကြံသတ်ဖြတ်ရန် မအောင်မြင်ခဲ့ခြင်းသည် လော့ထျန်းနန်းတော်၏ အရှင်သခင်အား အလွန်အမင်း စိုးရိမ်ပူပန်စေခဲ့ခြင်း မရှိပေ။
အဘယ်ကြောင့်ဆိုသော်... ထိုအချိန်က လုပ်ကြံသတ်ဖြတ်မှု တာဝန်သည် စတင်ခဲ့ရုံမျှသာ ရှိသေးပြီး... သူ စုဆောင်းထားခဲ့သော သွေးမျိုးဆက်များသည် တစ်ဒါဇင်မျှသာ ရှိသေးသဖြင့်... တာဝန်ပြီးမြောက်ရန် များစွာ လိုအပ်နေသေးသောကြောင့် ဖြစ်သည်။
ထို့အပြင် နှစ်အနည်းငယ် ကြာမြင့်သွားခဲ့ပြီး... အခြားသော သွေးမျိုးဆက်များအား ဆက်တိုက် စုဆောင်းရရှိလာခဲ့သည်နှင့်အမျှ... အခြားတစ်ဖက်၏ တောင်းဆိုချက်အရ... မြင့်မြတ်ခန္ဓာ သွေးမျိုးဆက် တစ်မျိုးတည်းသာ... လော့ထျန်းနန်းတော်မှ စုဆောင်းရန် ကျန်ရှိတော့သည်။
ထို့ကြောင့်... လော့ထျန်းနန်းတော်၏ အရှင်သခင်သည် ယဲ့ယင်းယင်းအား နောက်တစ်ကြိမ် ထပ်မံ လုပ်ကြံသတ်ဖြတ်ရန်... အမိန့်တစ်ခု ထပ်မံ ထုတ်ပြန်ခဲ့ပြန်လေ၏။
သို့သော် သူ့အား ဒေါသထွက်စေခဲ့သောအရာမှာ... ဤလုပ်ကြံသတ်ဖြတ်ရန် ကြိုးပမ်းမှုသည်... နောက်တစ်ကြိမ် ထပ်မံ ကျရှုံးခဲ့ပြန်ခြင်းပင် ဖြစ်သည်။
" တောက်စ်! ဒီမြင့်မြတ်သွေးကို ငါ ဘယ်လို ရအောင် ယူရမှာလဲ..... "
လော့ထျန်းနန်းတော်၏ အရှင်သခင်သည် စိုးရိမ်ပူပန်စွာဖြင့် ဟိုဟိုသည်သည် လမ်းလျှောက်နေခဲ့ပြီး... သူ၏စိတ်ထဲတွင် မြင့်မြတ်သွေးအား မည်သို့ ရယူရမည်ကို စဉ်းစားနေခဲ့သည်။
သို့သော် ထိုအချိန်မှာပင်.....
သူသည် ဧရာမ စွမ်းအားကြီးတစ်ခု... ကောင်းကင်ယံအား ဖြတ်သန်းလျက်... ရုတ်တရက် လော့ထျန်းနန်းတော်ဆီသို့ ဖိနှိပ်ချလာသည်ကို ခံစားလိုက်ရသည်။
" ဘာဖြစ်တာလဲ?! "
လော့ထျန်းနန်းတော်၏ အရှင်သခင်သည် ထိတ်လန့်တကြား မော့ကြည့်လိုက်ရာ... သူ့ဘဝ၏ နောက်ဆုံးမြင်ကွင်းအား မြင်တွေ့လိုက်ရလေ၏။
ဟွမ်သွမ့်လက်ညှိုးကြီးတစ်ချောင်းသည် စကြဝဠာ ကြယ်တာရာ ကောင်းကင်ယံအား ဖြတ်ကျော်လာသည့်အလား... ပြိုင်ဘက်ကင်းသော တန်ခိုးအရှိန်အဝါဖြင့် ဆင်းသက်လာခဲ့ပြီး... လူသူကင်းမဲ့သော ရှေးဟောင်းကြယ်ပေါ်သို့ ရုတ်တရက် ဆိုက်ရောက်လာခဲ့လေသည်။
" ဘုန်း! "
လက်ညှိုး၏ အဆုံးမဲ့ စွမ်းအားသည် ဂြိုဟ်ပေါ်ရှိ အရာအားလုံးအား ချက်ချင်းပင် ဖျက်ဆီးပစ်လိုက်၏။
အာကာသအက်ကွဲကြောင်းတစ်ခုထဲ၌ ပုန်းကွယ်နေသော လော့ထျန်းနန်းတော်သည်လည်း ခြွင်းချက်မရှိ... တိုးဝှေ့ထကြွနေသော အဆုံးမရှိသည့် အာကာသလှိုင်းများ၏ ဆွဲဖြဲခြင်းကို ခံလိုက်ရသည်။
နန်းတော်အတွင်း၌ ပုန်းခိုနေသော လူသတ်သမားများစွာတို့သည် ခြွင်းချက်မရှိ... အားလုံး မျိုးဖြုတ်သုတ်သင်ခံလိုက်ရပြီး... ဤနေရာ၌ မြှုပ်နှံခြင်း ခံလိုက်ရသည်။
လော့ထျန်းနန်းတော်သည် မျက်စိတစ်မှိတ်အတွင်း မျိုးဖြုတ်သုတ်သင်ခံလိုက်ရ၏။
လော့ထျန်းနန်းတော် အရှင်သခင်၏ ရုပ်ခန္ဓာသည် ချက်ချင်းပင် ကြေမွပျက်စီးသွားခဲ့ပြီး... နတ်ဝိညာဉ် တစ်ခုတည်းသာ ကျန်ရစ်ကာ... အထွတ်အထိပ် စွမ်းအားတစ်ခု၏ လွှမ်းခြုံခြင်းကို ခံရလျက်... လျှို့ဝှက်ဆန်းကြယ်သော ကြယ်တာရာ ကောင်းကင်ယံထဲသို့ ချက်ချင်း ပျောက်ကွယ်သွားခဲ့တော့သည်။