အခန်း (၁၅၁-၁၅၂)
Vol. 11 Ch. 151-152
အခန်း (၁၅၁) - ဟွမ်သွမ့်အင်မော်တယ်သန္ဓေသား၊ ဂိုဏ်းပေါင်းစုံ၏တက်လှမ်းခြင်းနှင့် အတိတ်မှအမှန်တရား
ကုချန်သည် မို့ကျိုယိုနှင့် ဆက်လက်၍ အချိန်ဖြုန်းနေရန် စိတ်ဝင်စားမှုမရှိသည်မှာ သဘာဝကျ၏။ အားလုံးကို ခြုံငုံကြည့်လျှင် အခြားတစ်ဖက်သားသည် သူ၏လက်တွင်းသို့ ကျရောက်နှင့်ပြီးဖြစ်ရာ... သူလုပ်ရန်လိုအပ်သည်မှာ သူ၏နတ်ဘုရားစွမ်းအင်ကို သန့်စင်ပြီး... မှတ်ဉာဏ်များအတွက် သူ၏အသိဉာဏ်ပင်လယ်ကို ရှာဖွေရန်သာ ဖြစ်သည်။ အဘယ်ကြောင့် သူနှင့်စကားပြောကာ အချိန်ပိုဖြုန်းနေဦးမည်နည်း။
မည်သည့် မမျှော်လင့်ထားသော ခုခံမှုအဖြစ်အပျက်များမျှ မရှိခဲ့ပေ။ မို့ကျိုယို၏ နတ်ဘုရားစွမ်းအင်သည် ချက်ချင်းပင် ပျက်စီးသွားခဲ့ပြီး... ကုချန်၏ အသိဉာဏ်ပင်လယ်ထဲသို့ စီးဝင်လာသော မှတ်ဉာဏ်အပိုင်းအစများသာ ကျန်ရစ်ခဲ့သည်။ ထို့ပြင်... မို့ကျိုယို၏ မှတ်ဉာဏ်များကို စူးစမ်းခြင်းဖြင့်... ကုချန်သည် နောက်ဆုံးတွင် အဖြစ်အပျက် အစအဆုံးကို နားလည်သဘောပေါက်သွားခဲ့လေ၏။
ဤ ဆေးဖိုကိုးဖို မသေမျိုးမင်းဆက်အား... လွန်ခဲ့သော နှစ်ပေါင်းသိန်းပေါင်းများစွာက... ဆေးဖိုကိုးဖို မဟာဧကရာဇ် အမည်ရသော တည်ရှိမှုတစ်ခုမှ တည်ထောင်ခဲ့ခြင်း ဖြစ်သည်။
ဆေးဖိုကိုးဖို မသေမျိုးမင်းဆက်၏ မှတ်တမ်းများအရ... ဆေးဖိုကိုးဖိုမဟာဧကရာဇ်သည် သူ၏ဘဝနောက်ဆုံးအချိန်၌ မသေမျိုးနယ်ပယ်သို့ အောင်မြင်စွာ တက်လှမ်းနိုင်ခဲ့ပြီး... သူ၏ အစွမ်းထက်ဧကရာဇ်လက်နက်ဖြစ်သော နဂါးကိုးကောင် အင်မော်တယ်ဆေးဖိုကို သူ၏မျိုးဆက်များထံ ထားရစ်ခဲ့သည်။
ဆေးဖိုကိုးဖို မဟာဧကရာဇ်သည် မသေမျိုးအဖြစ်သို့ အောင်မြင်စွာ တက်လှမ်းနိုင်ခဲ့ပြီး... နဂါးကိုးကောင် အင်မော်တယ်ဆေးဖိုကို ချန်ထားခဲ့သောကြောင့်ပင်... သူ၏မျိုးဆက်များသည် မိမိတို့ကိုယ်ကို 'မသေမျိုးမင်းဆက်' ဟူ၍ ရည်ညွှန်းခေါ်ဝေါ်ခဲ့ကြခြင်း ဖြစ်သည်။
ဤသည်မှာ ဒဏ္ဍာရီလာ မသေမျိုးတစ်ဦးမှ ချန်ရစ်ခဲ့သည်ဟု ဆိုသော သူတို့၏ အမွေအနှစ် ထူးခြားသာလွန်မှုကို ပြသရန် ဖြစ်၏။
နဂါးကိုးကောင် အင်မော်တယ်ဆေးဖိုကိုလည်း ဆေးဖိုကိုးဖို မဟာဧကရာဇ်၏ မျိုးဆက်များက ' အင်မော်တယ် ' ဟူ၍ အမည်ပေးခဲ့ကြသည်။
ထို့ပြင် ဆေးဖိုကိုးဖို မဟာဧကရာဇ် တက်လှမ်းသွားစဉ် နဂါးကိုးကောင် အင်မော်တယ်ဆေးဖိုအပြင် အခြားအရာတစ်ခုကိုလည်း ချန်ထားခဲ့သေး၏။
၎င်းမှာ နဂါးကိုးကောင် အင်မော်တယ်ဆေးဖိုအတွင်း၌ ထားရှိပြီး... သူ၏မျိုးဆက်များထံ ချန်ရစ်ခဲ့သော ဟွမ်သွမ့်မသေမျိုးသန္ဓေသားပင် ဖြစ်သည်။
ဤ ဟွမ်သွမ့်မသေမျိုးသန္ဓေသားသည် ကျောက်တုံးကြမ်းတစ်တုံးနှင့်တူပြီး... မျက်နှာပြင်တွင် ဟွမ်သွမ့်အစဉ်ပုံစံများဖြင့် တန်ဆာဆင်ထားသည်။ ကောင်းကင်မျက်လုံး တန်ခိုးဖြင့်ပင်လျှင်... ထိုမျက်နှာပြင်ကို ထွင်းဖောက်၍ အတွင်း၌ မည်သည့်အရာ ပါဝင်သည်ကို မမြင်နိုင်ပေ။
ဆေးဖိုကိုးဖို မဟာဧကရာဇ်၏ မျိုးဆက်များသည်... နဂါးကိုးကောင် အင်မော်တယ်ဆေးဖိုအတွင်း သိုလှောင်ထားသော ဤမသေမျိုးသန္ဓေသားထံမှ... သတိမထားမိနိုင်လောက်အောင် တိုးညှင်းသော နှလုံးခုန်သံကိုသာ ရံဖန်ရံခါ ခံစားသိရှိရသည်။
သို့သော်... ဆေးဖိုကိုးဖို မဟာဧကရာဇ်သည် ဟွမ်သွမ့်မသေမျိုးသန္ဓေသားနှင့် ပတ်သက်၍ ရှင်းပြခဲ့ခြင်းမရှိဘဲ... သူ၏မျိုးဆက်များအား ၎င်းကို အထူးဂရုတစိုက်နှင့် လေးစားသမှုဖြင့် ဆက်ဆံရမည်ဟူသော... ညွှန်ကြားချက်တစ်ခုတည်းကိုသာ ချန်ထားခဲ့သည်။
ဆေးဖိုကိုးဖိုမဟာဧကရာဇ်၏ မျိုးဆက်များသည် သူ၏ညွှန်ကြားချက်ကို အခိုင်အမာ မှတ်သားထားကြ၏။
နောက်ပိုင်း မရေမတွက်နိုင်သော နှစ်များတစ်လျှောက်လုံး... ဟွမ်သွမ့်မသေမျိုးသန္ဓေသားသည် နဂါးကိုးကောင် အင်မော်တယ်ဆေးဖိုအတွင်း၌... မလှုပ်မယှက် ရှိနေခဲ့သည်။
တဖြည်းဖြည်းဖြင့် ဆေးဖိုကိုးဖို အင်မော်တယ်မင်းဆက်၏ ဆက်တိုက်အုပ်ချုပ်သူများပင်လျှင်... ဟွမ်သွမ့်မသေမျိုးသန္ဓေသား ရှိနေခြင်းကို မေ့လျော့လုနီးပါး ဖြစ်သွားခဲ့ပြီး... နဂါးကိုးကောင် အင်မော်တယ်ဆေးဖိုအား ဝတ်ပြုပူဇော်သည့်အခါမှသာ... ရံဖန်ရံခါ ဆုတောင်းမှုများ ပြုလုပ်ကြတော့သည်။
လွန်ခဲ့သော ဆယ်နှစ်ကျော်ခန့်က နဂါးကိုးကောင် အင်မော်တယ်ဆေးဖိုအတွင်း အမြဲတစေ ငြိမ်သက်နေခဲ့သော ဤ ဟွမ်သွမ့်မသေမျိုးသန္ဓေသားသည် ရုတ်တရက် နိုးထလာခဲ့၏။
မျက်စိကျိန်းမတတ် တောက်ပသော အရောင်အဝါသည် ဆေးဖိုကိုးဖို ကြယ်စုအထက်ရှိ... ကောင်းကင်တစ်ခုလုံးကို ချက်ချင်းပင် ဖုံးကွယ်သွားလုနီးပါး ဖြစ်ခဲ့ပြီး... စစ်မှန်သောမသေမျိုးများ ဆင်းသက်လာခြင်းနှင့် များပြားလှသော ဝိညာဉ်များ တက်လှမ်းခြင်းစသော... အံ့ဖွယ်ရူပါရုံများပင် ထင်ရှားပေါ်ပေါက်ခဲ့သည်။
ရုတ်တရက် ဖြစ်ပေါ်လာသော ဖြစ်စဉ်နှင့် အရောင်အဝါသည် ခဏတာမျှသာ တည်ရှိခဲ့ပြီးနောက် မည်သည့် သဲလွန်စမျှမကျန်ဘဲ ပျောက်ကွယ်သွားခဲ့၏။
ဤအပြောင်းအလဲသည် ဆေးဖိုကိုးဖိုအင်မော်တယ်မင်းဆက်၏ အုပ်ချုပ်သူဖြစ်သော မို့ကျိုယိုအား တုန်လှုပ်သွားစေခဲ့သည်။
သူသည် ချက်ချင်း သွားရောက်စုံစမ်းခဲ့၏။
သူသည် နဂါးကိုးကောင်အင်မော်တယ်ဆေးဖို၏ ရှေ့မှောက်သို့ ရောက်ရှိသောအခါ... ထူးခြားကွဲပြားသော အရာတစ်ခုကို အမှန်တကယ်ပင် တွေ့ရှိခဲ့သည်။
နဂါးကိုးကောင် အင်မော်တယ်ဆေးဖိုအတွင်း၌ နှစ်ပေါင်းများစွာ ငြိမ်သက်နေခဲ့သော ဟွမ်သွမ့်မသေမျိုးသန္ဓေသားသည် ပြန်လည်နိုးထလာဟန်ရှိပြီး အတွင်းမှ ပြင်းထန်အားကောင်းသော နှလုံးခုန်သံများ ထွက်ပေါ်နေခဲ့သည်။
ထိုမျှသာမက မို့ကျိုယိုသည် ဟွမ်သွမ့်မသေမျိုးသန္ဓေသားထံမှ ထွက်ပေါ်လာသော တိုးညှင်း၍ မကြည်မလင်သော တီးတိုးသံများကိုလည်း ကြားလိုက်ရသည်။
" ထူးချွန်သူ... တစ်ထောင်ရဲ့... သွေးကို ရှာဖွေပါ... ငါ့ရဲ့ ခန္ဓာကိုယ်ကို ... ရေလောင်းပါ... ငါ... ပြန်လည်နိုးထ... လာတဲ့အခါ... ဆေးဖိုကိုးဖိုအင်မော်တယ်မင်းဆက်... စုပေါင်းတက်လှမ်းရမဲ့... အချိန် ဖြစ်လိမ့်မယ်... "
ဟွမ်သွမ့်မသေမျိုးသန္ဓေသားသည် အမှန်တကယ်ပင် ပြန်လည်နိုးထလာခဲ့ပြီး... အတွင်း၌ ပါရှိသော လျှို့ဝှက်ဆန်းကြယ်သည့် တည်ရှိမှုက... ဆေးဖိုကိုးဖို အင်မော်တယ်မင်းဆက်အား အမိန့်တစ်ခု ထုတ်ပြန်ခဲ့သည်တည်း။
ဤရုတ်တရက် အလှည့်အပြောင်းသည် မို့ကျိုယိုအား ပြင်ဆင်ထားမှုမရှိဘဲ မှင်သက်သွားစေခဲ့သည်။
ဆေးဖိုကိုးဖိုမဟာဧကရာဇ်၏ ယခင်ညွှန်ကြားချက်ကို တွေးတောမိရာ မို့ကျိုယိုသည် တွေးတောစဉ်းစားခြင်း မပြုဘဲ မနေနိုင်ခဲ့ပေ။
ဆေးဖိုကိုးဖို မဟာဧကရာဇ်သည် ဤနေ့ကို ကြိုတင်မြင်တွေ့ခဲ့လေသလော။
ဟွမ်သွမ့်မသေမျိုးသန္ဓေသားထံမှ နောက်ဆက်တွဲထွက်ပေါ်လာသော စကားလုံးများက မို့ကျိုယို၏ ခန့်မှန်းချက်ကို ပိုမိုအတည်ပြုပေးလိုက်၏။
" ငါက မသေမျိုးနယ်ပယ်ရဲ့ အရှင်သခင် ဖြစ်တယ်... မသေမျိုးသန္ဓေသားကို ယုံကြည်အပ်နှံခဲ့လို့ ပြန်လည်ဝင်စားခဲ့တာ ဖြစ်တယ်... မင်းတို့ရဲ့ ဘိုးဘေးဖြစ်သူ ဆေးဖိုကိုးဖို မဟာဧကရာဇ်ကိုလည်း တာအိုရရှိပြီး... မသေမျိုးနယ်ပယ်ကို တက်လှမ်းနိုင်ဖို့ ငါ ကိုယ်တိုင် လမ်းညွှန်ပြသခဲ့ဖူးတယ်.....
အခု ငါရဲ့ နိုးထချိန်ကို ရောက်ရှိလာပြီ... ငါ့ကို နိုးထဖို့ ကူညီပါ... မင်းတို့လဲ ကြီးမားတဲ့ ကောင်းချီးမင်္ဂလာတွေ ရရှိပြီး... မင်းတို့ရဲ့ ဂိုဏ်းတစ်ခုလုံး တက်လှမ်းနိုင်လိမ့်မယ်..... "
ဟွမ်သွမ့်မသေမျိုးသန္ဓေသား၏ စကားလုံးများကြောင့် မို့ကျိုယို၏ နှလုံးသည် တဒိန်းဒိန်းခုန်သွားလေ၏။
ဟွမ်သွမ့်မသေမျိုးသန္ဓေသား၏ စကားလုံးများကို အတည်ပြုချက်အဖြစ်... ဆေးဖိုကိုးဖို မဟာဧကရာဇ် ချန်ထားခဲ့သော ညွှန်ကြားချက်များနှင့် ပေါင်းစပ်လိုက်သော်... သူသည် မသေမျိုးသန္ဓေသားအတွင်းမှ တည်ရှိမှု ပြောဆိုခဲ့သော စကားတစ်လုံးတစ်ပါဒကိုမျှ သံသယမဝင်ခဲ့ပေ။
မသေမျိုးသန္ဓေသားအတွင်းမှ တည်ရှိမှုကို နိုးထရန် ကူညီလိုက်သည်နှင့်... ဆေးဖိုကိုးဖို အင်မော်တယ်မင်းဆက်တစ်ခုလုံး စုပေါင်းတက်လှမ်းနိုင်မည်လော။
မို့ကျိုယို၏ နှလုံးသည် တဒုတ်ဒုတ်ခုန်နေပြီး... ကြီးမားလှသော ကံကောင်းခြင်းတရားကြီးနှင့် တွေ့ကြုံနေရသည်ဟု ခံစားလိုက်ရသည်။
စုပေါင်းတက်လှမ်းခြင်း။
အကယ်၍ ဤအရာအားလုံးကို သူ အောင်မြင်နိုင်ခဲ့ပါလျှင်... အနာဂတ် ဆေးဖိုကိုးဖိုအင်မော်တယ်မင်းဆက်၏ သမိုင်းတွင်... သူသည် ဆေးဖိုကိုးဖိုမဟာဧကရာဇ်၏ ဒုတိယမြောက် အကြီးမြတ်ဆုံးသော တည်ရှိမှုတစ်ခု ဖြစ်လာမည်ဖြစ်ပြီး... ဆေးဖိုကိုးဖို မသေမျိုးမင်းဆက်၏ မျိုးဆက်များက သူ့အား ရိုသေလေးမြတ်စွာ ဝတ်ပြုပူဇော်ကြလိမ့်မည်။
အဆုံးမဲ့ကမ္ဘာ၏ ရှေးဟောင်း ဧကရာဇ်အဆင့် ကျင့်ကြံသူများထဲတွင်... မသေမျိုးတက်လှမ်းခြင်းကို အောင်မြင်စွာ ပြီးမြောက်နိုင်ခဲ့သူ တစ်ဦးတစ်ယောက်မျှ မရှိကြောင်း... အားလုံး သိရှိကြသောကြောင့် ဖြစ်သည်။
တကယ်လို့ သူသာ ဆေးဖိုကိုးဖိုအင်မော်တယ်မင်းဆက်အား စုပေါင်းတက်လှမ်းနိုင်ရန် ဦးဆောင်နိုင်ခဲ့ပါက... ဆေးဖိုကိုးဖိုအင်မော်တယ် မင်းဆက်သာမက... အဆုံးမဲ့ကမ္ဘာတစ်ခုလုံးကပင် သူ၏အမည်နာမကို သေချာပေါက် မှတ်မိနေကြလိမ့်မည်။
ဤအတွေးဖြင့် မို့ကျိုယို၏ နှလုံးသားသည် အဆုံးမရှိသော စိတ်လှုပ်ရှားမှုများဖြင့် ပြည့်နှက်နေခဲ့သည်။
မတူညီသော မြင့်မြတ်ခန္ဓာသွေးအမျိုးအစား တစ်ထောင်ကို စုဆောင်းရန်သာ မဟုတ်ပါလော။ ဤသည်မှာ ဆေးဖိုကိုးဖိုအင်မော်တယ် မင်းဆက်အတွက် လုံးဝ အခက်အခဲမရှိပေ။
ကိစ္စရပ်များဟာ အလွန်လွယ်ကူသည်ဟု ယုံကြည်သော မို့ကျိုယိုသည် ဟွမ်သွမ့်မသေမျိုးသန္ဓေသား၏ အခြေအနေအား ဒုတိယအကြိမ် စဉ်းစားမနေဘဲ သဘောတူညီလိုက်သည်။
ဆေးဖိုကိုးဖိုအင်မော်တယ်မင်းဆက်သို့ ပြန်ရောက်သောအခါ... သူသည် ဤအမိန့်အား ဆေးဖိုကိုးဖို မသေမျိုးမင်းဆက်၏ အဆင့်မြင့်အရာရှိကြီးများထံ ချက်ချင်းပင် ထုတ်ပြန်ခဲ့ပြီး... သူတို့အား မတူကွဲပြားသော ခန္ဓာကိုယ်များ၏ အစွမ်းထက်သွေးများကို စုဆောင်းရန် ညွှန်ကြားခဲ့သည်။
နှစ်အနည်းငယ် ရှာဖွေပြီးနောက်... ဆေးဖိုကိုးဖိုအင်မော်တယ်မင်းဆက်သည် မတူညီသော ခန္ဓာကိုယ် ဒါဇင်ပေါင်းများစွာ၏ အစွမ်းထက်သွေးများကို ဆက်တိုက် စုဆောင်းနိုင်ခဲ့သည်။
အချိန်ကြာလာသည်နှင့်အမျှ... သွေးအမျိုးအစားသစ်များ စုဆောင်းခြင်းသည် တဖြည်းဖြည်း ပိုမိုခက်ခဲလာခဲ့၏။
အကြောင်းမှာ ဤသွေးအမျိုးအစားများ၏ ပိုင်ရှင်များသည် အစွမ်းထက်ပုဂ္ဂိုလ်များ ဖြစ်နေကြခြင်း မဟုတ်လျှင် ၎င်းတို့၏ ဂိုဏ်းများမှ အထူးတလည် အကာအကွယ်ပေးထားသော ထူးချွန်သူများ ဖြစ်နေကြသောကြောင့် ဖြစ်သည်။
ဆေးကိုးဖိုအင်မော်တယ်မင်းဆက်အနေဖြင့် ဤသွေးအမျိုးအစားများကို မဖော်ပြဘဲ စုဆောင်းရန်မှာ တဖြည်းဖြည်း ခက်ခဲလာခဲ့သည်။
ဒါဇင်ပေါင်းများစွာသော သွေးအမျိုးအစားများဖြင့် ဆက်တိုက် ရေလောင်းခံရပြီးနောက်... ဟွမ်သွမ့်မသေမျိုးသန္ဓေသားသည် ပို၍ပင် အသိဉာဏ်ရှိလာခဲ့ပြီး... နောက်ဆုံးတွင် နဂါးကိုးကောင် အင်မော်တယ်ဆေးဖိုမှ တိုက်ရိုက်ထွက်ခွာကာ... ကျယ်ပြန့်သော ဟွမ်သွမ့်၏ နက်ရှိုင်းရာအရပ်သို့ ပျံသန်းသွားခဲ့သည်။
ထိုသို့ မထွက်ခွာမီ... ၎င်းသည် မို့ကျိုယိုအား ဆယ်နှစ်အတွင်း နောက်ထပ် သွေးအမျိုးအစား... အစွမ်းထက်သွေး တစ်ရာ စုဆောင်းထားရန် ညွှန်ကြားခဲ့သည်။
ဆယ်နှစ်ပြည့်ပြီးနောက် သူသည် နတ်ဘုရားသွေးဖြင့် ရေချိုးရန် ဆေးဖိုကိုးဖိုအင်မော်တယ် မင်းဆက်သို့ပြန်လာမည် ဖြစ်သည်။
ဆယ်နှစ်သာ အချိန်ရသဖြင့်... ဆေးဖိုကိုးဖိုအင်မော်တယ်မင်းဆက်တစ်ခုတည်း၏ အစွမ်းဖြင့် ဤတာဝန်ကို ပြီးမြောက်ရန်မှာ မဖြစ်နိုင်သလောက်ပင် ဖြစ်သည်။
ဤအခြေအနေများအောက်တွင်... ဆေးဖိုကိုးဖိုအင်မော်တယ်မင်းဆက်သည် ဤတာဝန်အား လော့ထျန်းနန်းတော်သို့ လွှဲအပ်ရန်... စဉ်းစားမိခဲ့သည်။
လော့ထျန်းနန်းတော်သည် ခိုးကြောင်ခိုးဝှက်လုပ်ကြံခြင်း၌ အကျွမ်းကျင်ဆုံး ဖြစ်ရာ... ဤအစွမ်းထက်သွေးများကို စုဆောင်းရန် သူတို့အား တာဝန်ပေးခြင်းသည်... ဆေးဖိုကိုးဖိုအင်မော်တယ်မင်းဆက် ကိုယ်တိုင်လုပ်ဆောင်ခြင်းထက် များစွာ ပိုမိုမြန်ဆန်မည်မှာ ထင်ရှားသည်။
ပို၍အရေးကြီးသည်မှာ... ဤသည်က ဆေးဖိုကိုးဖိုအင်မော်တယ်မင်းဆက်၏ တည်ရှိမှုကို ဖော်ထုတ်မည့်အရေးမှ တားဆီးနိုင်မည်ဖြစ်ပြီး... ကမ္ဘာလောကကြီး၏ ရန်လိုမုန်းတီးမှုကို ခံရခြင်းမှ ရှောင်ရှားနိုင်မည် ဖြစ်သည်။
လော့ထျန်းနန်းတော်၏ ကနဦးတိုးတက်မှုသည် အမှန်ပင် မို့ကျိုယိုအား အလွန်ပျော်ရွှင်စေခဲ့၏။ နှစ်နှစ်အတွင်းမှာပင်... သူတို့သည် အစွမ်းထက်သွေး ဒါဇင်ပေါင်းများစွာကို စုဆောင်းပေးနိုင်ခဲ့သည်။
အစွမ်းထက်သွေးများ၏ နောက်ကွယ်တွင်... သက်ရှိသတ္တဝါတို့၏ သွေးမည်မျှ စွန်းထင်းခဲ့သည်ကိုမူ... ဆေးဖိုကိုးဖိုအင်တော်တယ် မင်းဆက်သည် လုံးဝ ဂရုမစိုက်ခဲ့ပေ။
ဤအရာများကို လော့ထျန်းနန်းတော်က လုပ်ဆောင်နေခြင်းဖြစ်ရာ... ဆေးဖိုကိုးဖိုအင်မော်တယ်မင်းဆက်နှင့် မည်သို့ သက်ဆိုင်ပါမည်နည်း။
သို့သော် မို့ကျိုယို မည်သည့်အခါမျှ မမျှော်လင့်ထားခဲ့သည်မှာ.....
အတိတ်က လော့ထျန်းနန်းတော်အား ယုံကြည်စွာ တာဝန်လွှဲအပ်ခဲ့သော ဤလုပ်ရပ်သည်ပင်လျှင်... ယခုအခါ ဆေးဖိုကိုးဖိုအင်မော်တယ်မင်းဆက်ကိုယ်တိုင်၏ သေမိန့်စာတမ်း ဖြစ်လာခဲ့ပြီး... နောက်ဆုံးတွင် အရာအားလုံးကို ဖျက်ဆီးပစ်ခဲ့လေတော့သည်။
အခန်း(၁၅၂) - ယင်းယင်း နိုးထလာခြင်း၊ ဖူဝမ်ကို တပည့်အဖြစ် လက်ခံလိုက်ခြင်း၊ သူ အခု ဘယ်မှာ ရှိသနည်း
" ဟွမ်သွမ့်အင်မော်တယ်သန္ဓေသား..... "
မို့ကျိုယို၏ မှတ်ဉာဏ်များကို သေသေချာချာ စိစစ်ပြီးနောက် ကုချန်သည် စဉ်းစားဟန်ဖြင့် မျက်လုံးများကိုမှိတ်ကာ ညင်သာစွာ ရေရွတ်လိုက်လေသည်။
ဆေးဖိုကိုးဖို အင်မော်တယ်မင်းဆက်က လော့ထျန်းနန်းတော်သည် သာလွန်ထူးကဲသော ကိုယ်ခန္ဓာ ၁၀၀ ၏ သွေးများကို စုဆောင်းနိုင်ပါက... လော့ထျန်းနန်းတော်၏ အထွတ်အထိပ် လျှို့ဝှက်ကျမ်းကို ပြီးမြောက်အောင် ကူညီပေးမည်ဟု... တစ်ချိန်က ကတိပြုခဲ့သည်။
လော့ထျန်းနန်းတော်၏ အထွတ်အထိပ် လျှို့ဝှက်ကျမ်းကို ဟွမ်သွမ့်ပင်လယ်၏ နက်ရှိုင်းရာမှ တစ်ချိန်က ရရှိခဲ့ခြင်း ဖြစ်သည်။
ထို့အပြင် အင်မော်တယ်မင်းဆက် လက်ထဲတွင် ရှိနေသော သတ်ဖြတ်ခြင်းတာအို လျှို့ဝှက်ကျမ်း၏ မပြည့်စုံသေးသည့်အပိုင်းကိုလည်း ဆေးဖိုကိုးဖို အင်မော်တယ်မင်းဆက်က ထားခဲ့ခြင်း ဖြစ်သည်။
ဟွမ်သွမ့်အင်မော်တယ်သန္ဓေသားသည်လည်း ဆေးဖိုကိုးဖို မဟာဧကရာဇ်က ဟွမ်သွမ့်ပင်လယ်၏ နက်ရှိုင်းရာမှ ရှာဖွေတွေ့ရှိခဲ့ခြင်း ဖြစ်နိုင်သည်ဟု ကောက်ချက်ချနိုင်သည်။
ဟွမ်သွမ့်အင်မော်တယ်သန္ဓေသား... ကုဝူရှန့် ပြောပြခဲ့သည့် ဟွမ်သွမ့်မိုးကြိုးရေကန်.....
ဟွမ်သွမ့်ပင်လယ် နက်နက်ရှိုင်းရှိုင်းတွင် အမှန်တကယ် မည်သည့် လျှို့ဝှက်ချက်များ ဝှက်ထားသည်ကို မသိနိုင်ပေ။
ကုချန်၏ နှလုံးသားသည် အနည်းငယ် လှုပ်ရှားသွားခဲ့သည်။
နောင်တစ်ချိန်တွင် နတ်ဆိုးနယ်မြေက ကျူးကျော်လာပြီး အဆုံးမဲ့ကမ္ဘာကို ဖျက်ဆီးသည့်အခါတွင်... သူသည် ထိုအခွင့်အရေးကို ယူကာ အထက်ကောင်းကင်တားမြစ်နယ်မြေကို အဆုံးမဲ့ကမ္ဘာမှ ရွှေ့ပြောင်း၍ စူးစမ်းစစ်ဆေးရန်အတွက်... ဟွမ်သွမ့်ပင်လယ်ထဲသို့ ရွက်လွှင့် သွားရောက်နိုင်လိမ့်မည်။
ယခုအချိန်အတွက်မူ အလျင်စလို လုပ်ရန် မလိုသေးချေ။
မို့ကျိုယို သေဆုံးသွားခဲ့ပြီဖြစ်ပြီး ဆေးဖိုကိုးဖို အင်မော်တယ်မင်းဆက်လည်း ဖျက်ဆီးခံလိုက်ရပြီဖြစ်သည်။ ကုချန်၏ ရည်ရွယ်ချက် ပြည့်မြောက်သွားပြီဖြစ်သဖြင့် ဆက်လက် တိုက်ခိုက်ရန် စိတ်ကူးမရှိပေ။
ဟွမ်သွမ့်အင်မော်တယ်သန္ဓေသားကို ယခုအခါ ဟွမ်သွမ့်ပင်လယ်ထဲတွင် ရှာမတွေ့နိုင်တော့ချေ။
မျက်စိစုံမှိတ် ရှာဖွေမည့်အစား စောင့်ဆိုင်းခြင်းက ပိုကောင်းပေသည်။
နောင်တစ်ချိန်တွင် ဟွမ်သွမ့်အင်မော်တယ်သန္ဓေသား ပြန်ရောက်လာပြီး... ဆေးဖိုကိုးဖို အင်မော်တယ်မင်းဆက် ဖျက်ဆီးခံရသည်ကို တွေ့ရှိကာ ပြဿနာရှာလာပါက... ကုချန်သည် လက်ဝါးဖြင့် တစ်ချက်ရိုက်၍ သူ့အား လမ်းကြောင်းမှန်သို့ ပို့ဆောင်ပေးရန် ဝန်လေးမည် မဟုတ်ပေ။
" ဒီတစ်ကြိမ်တော့ အကျိုးအမြတ် မရခဲ့တာတော့ မဟုတ်ဘူးပဲ "
ကုချန်သည် ညင်သာစွာ ရေရွတ်လိုက်၏။
လော့ထျန်းနန်းတော်နှင့် ဆေးဖိုကိုးဖို အင်မော်တယ်မင်းဆက်ကို ဖျက်ဆီးပြီးနောက်... သူသည် လော့ထျန်းနန်းတော်၏ အထွတ်အထိပ် နည်းစနစ်ဖြစ်သည့် လော့ထျန်းသတ်ဖြတ်ခြင်းကျမ်းကိုပါ... ပြီးမြောက်အောင် လုပ်ဆောင်နိုင်ခဲ့ခြင်း ဖြစ်သည်။
ကုချန်သည် တစ်ချက်ကြည့်လိုက်ရုံဖြင့် လော့ထျန်းသတ်ဖြတ်ခြင်းကျမ်းသည်လည်း စစ်မှန်သော ဧကရာဇ်အဆင့် ကျမ်းစာတစ်ခု ဖြစ်ကြောင်း သိရှိလိုက်သည်။
၎င်းသည် လေထဲပျောက်ကွယ်နေကာ တစ္ဆေဆန်သော သတ်ဖြတ်ခြင်းတာအိုကို မှတ်တမ်းတင်ထားသော်လည်း... နတ်ဘုရင်ကျမ်းထဲတွင် ထည့်သွင်းကာ သူ့ ကိုယ်ပိုင်အဖြစ် ဖန်တီးနိုင်သည့်အတွက် ကုချန်အတွက် အသုံးဝင်ဆဲပင် ဖြစ်၏။
လော့ထျန်းသတ်ဖြတ်ခြင်းကျမ်းအပြင် ကုချင်းရွဲ့နှင့် အခြားသူများ ပြန်လည်ယူဆောင်လာခဲ့သော နေလဧကရာဇ်ကျမ်းတို့ ပါဝင်လာခြင်းကြောင့် နတ်ဘုရင်ကျမ်းကို ပိုမိုမြင့်မားသည့် အဆင့်သို့ ကျင့်ကြံနိုင်မည်မှာ သေချာနေပြီ ဖြစ်သည်။
နတ်ဘုရင်ကျမ်းသည် နောက်ထပ် တိုးတက်ပြောင်းလဲသွားသည့်အခါ... သူ၏ ကန့်သတ်ချက်များကို စစ်မှန်စွာ ထိုးဖောက်၍... အမြင့်ဆုံး နတ်ဘုရင်ရာထူးကို ရယူနိုင်မည့် အချိန်အခါ ဖြစ်လာပေလိမ့်မည်။
ဧကရာဇ်အဆင့်၏ ကန့်သတ်ချက်များကို ထိုးဖောက်ပြီးနောက်... သူသည် မည်သို့သော စွမ်းအားမျိုးကို ပိုင်ဆိုင်လာမည်နည်း။
ကုချန်သည် ထိုအခြေအနေကို မျှော်လင့်နေကြောင်း ဖော်ပြလိုက်သည်။
...
ကုချန်သည် ဤတစ်ကြိမ် သူရရှိခဲ့သော အကျိုးအမြတ်များကို ရေတွက်နေစဉ်... တစ်စုံတစ်ခုကို အာရုံခံမိသကဲ့သို့ သူ၏ မျက်လုံးများသည် အနည်းငယ် ပြောင်းလဲသွားခဲ့ပြီး... သူ၏ ပုံသဏ္ဌာန်မှာ ရွေ့လျားသွားခဲ့သည်။
နောက်တစ်စက္ကန့်တွင် သူသည် ယဲ့ယင်းယင်း၏ ခန်းမဆောင်ကြီးထဲသို့ ရောက်ရှိနေခဲ့ပြီး... ခုတင်ပေါ်တွင် ဖြည်းညှင်းစွာ နိုးထလာနေသော ယဲ့ယင်းယင်းကို မြင်တွေ့လိုက်ရသည်။
" ဘိုးဘေးကြီး ရောက်လာပြီပဲ... ကျွန်မလည်း ဘိုးဘေးကြီးဆီ အစီရင်ခံတင်ပြဖို့ ပြင်နေတာပါ..... "
ကုချင်းရွဲ့သည် ကုချန် ရောက်ရှိလာသည်ကို မြင်သောအခါ အလျင်အမြန် ခါးညွှတ် အရိုအသေပေးလိုက်သည်။
သူသည် ယဲ့ယင်းယင်း နိုးထလာသည်ကို ခုမှ ရှာဖွေတွေ့ရှိခဲ့ခြင်းဖြစ်ပြီး... ဘိုးဘေးကြီးအား သတင်းပို့ရန် ပြင်ဆင်နေချိန်တွင်... ဘိုးဘေးကြီးသည် အာရုံခံမိကာ တိုက်ရိုက် ရောက်ရှိလာမည်ဟု မမျှော်လင့်ထားခဲ့ချေ။
" ဆရာသခင်..... "
ယဲ့ယင်းယင်းသည် နိုးထလာပြီး ကုချန် လာရောက်သည်ကို မြင်သောအခါ... နှုတ်ဆက်ရန်အတွက် ခုတင်ပေါ်မှ ရုန်းကန် ထွက်ခွာရန် ကြိုးစားသော်လည်း... ကုချန်က လက်ဝှေ့ယမ်း၍ တားမြစ်လိုက်လေသည်။
" မင်းက ရောဂါကြီးတစ်ခုကနေ ခုမှ ပြန်သက်သာလာတာ... စိတ်ချလက်ချ အနားယူ ကုသမှု ခံယူပါ "
ကုချန်သည် သူ၏လက်ကို ဝှေ့ယမ်းလိုက်ပြီး တိုးတိုးလေး ပြောလိုက်သည်။
" မင်းကို လုပ်ကြံဖို့ ကြိုးစားခဲ့တာကို ငါ ဖြေရှင်းပြီးသွားပြီ... ဒါကြောင့် မင်း စိုးရိမ်စရာ မလိုတော့ဘူး "
သခင်က ဖြေရှင်းပြီးသွားပြီလား.....
ယဲ့ယင်းယင်းသည် ကုချန်၏ "ဖြေရှင်းပြီးပြီ" ဆိုသည့် စကားကို အတိအကျ နားမလည်သေးဘဲ စဥ်းစားသွားခဲ့သည်။ သူသည် ကုချန်က သူ့ကို သတ်ရန် ကြိုးစားခဲ့သည့် လော့ထျန်းနန်းတော်၏ လုပ်ကြံသူအား သတ်လိုက်ပြီဟုသာ ထင်လိုက်သည်။
သို့သော် ကုချန်၏ နောက်ဆက်တွဲ စကားများက ယဲ့ယင်းယင်းအား လုံးဝ မျက်လုံးပြူး အံ့အားသင့်သွားစေခဲ့သည်။
" မင်းကို တိုက်ခိုက်ခဲ့တဲ့ လုပ်ကြံသူက လော့ထျန်းနန်းတော်က လာတာပဲ... အခု လော့ထျန်းနန်းတော်ကို ငါ ဖျက်ဆီးပြီးသွားပြီ... ဒါကြောင့် မင်း လော့ထျန်းနန်းတော်ရဲ့ လုပ်ကြံသတ်ဖြတ်သူတွေရဲ့ တိုက်ခိုက်မှုကို ခံရမှာ စိုးရိမ်စရာ မလိုတော့ဘူး.....
လော့ထျန်းနန်းတော်ကို မင်းကို လုပ်ကြံဖို့ တာဝန်ပေးခဲ့တဲ့သူက ဆေးဖိုကိုးဖို အင်မော်တယ်မင်းဆက်ပဲ... အဲဒီ ဆေးဖိုကိုးဖို အင်မော်တယ်မင်းဆက်ကိုလည်း ငါ ဖျက်ဆီးပြီးပြီ "
ကုချန်သည် ပေါ့ပေါ့ပါးပါး ပြောဆိုလိုက်ပြီး... ယဲ့ယင်းယင်းကို သူ လုပ်ကြံခံရခြင်း၏ အကြောင်းရင်းကို အကျဉ်းချုဉ်း ရှင်းပြလိုက်သည်။
သို့သော် ယဲ့ယင်းယင်းသည် သူ လုပ်ကြံခံရခြင်း၏ အကြောင်းရင်းကို သိပ်ဂရုမစိုက်တော့ချေ။
ယခုအချိန်တွင် သူ၏ သခင် ပြောခဲ့သော စကားများသာ သူ၏ စိတ်ထဲတွင် ပဲ့တင်ထပ်နေခဲ့သည်။
လော့ထျန်းနန်းတော် ဖျက်ဆီးခံရကာ... ဆေးဖိုကိုးဖို အင်မော်တယ်မင်းဆက် ဖျက်ဆီးခံရ၏.....
ယဲ့ယင်းယင်းသည် လော့ထျန်းနန်းတော်နှင့် ဆေးဖိုကိုးဖို အင်မော်တယ်မင်းဆက်တို့နှင့် ပတ်သက်၍ အများကြီး မသိသော်လည်း အနည်းငယ်တော့ သိရှိထား၏။
ဤအင်အားစု နှစ်ခုစလုံးကို ဖျက်ဆီးရန်မှာ အဆုံးမဲ့ကမ္ဘာ မဟာဧကရာဇ် ဆင်းသက်လာလျှင်ပင် လုပ်ဆောင်နိုင်မည် မဟုတ်ဟု ပြောနိုင်ပေသည်။
ယခုမူ ဆရာသခင်သည် သူ့အတွက် လက်စားချေရန်... ဤအင်အားကြီး နှစ်ခုစလုံးကို တိုက်ရိုက် ဖျက်ဆီးပစ်လိုက်ချေပြီ.....
ပို၍ ထိတ်လန့်စရာကောင်းသည်မှာ သူမေ့မြောနေခဲ့သည်မှာ မည်မျှကြာခဲ့ပြီနည်း။
သူ နိုးမလာမီတွင်ပင် သခင်က သူ့အတွက် လက်စားချေပေးခဲ့ချေပြီလား။
ဒါက အရမ်းကို မယုံနိုင်စရာကောင်းလွန်းနေပြီ.....
ယဲ့ယင်းယင်းသည် စကားမပြောနိုင်ဘဲ သူ၏ နှလုံးသားထဲတွင် နွေးထွေးမှု လှိုင်းလုံးများ တရိပ်ရိပ် တက်လာသည်ကိုသာ ခံစားရသည်။
သူသည် မိဘမဲ့ တစ်ဦး ဖြစ်ခဲ့ပြီး ယခင်က ဂရုစိုက်မှုခံရသည့် ခံစားချက်ကို တစ်ခါမျှ မခံစားခဲ့ရဖူးချေ။
သို့သော် ယခုအခါ ဆရာသခင်၏ တပည့် ဖြစ်လာပြီး... ကုမိသားစုနှင့်အတူ အထက်ကောင်းကင်တားမြစ်နယ်မြေသို့ ဝင်ရောက်လာကတည်းက... ယဲ့ယင်းယင်းသည် ကြာရှည်စွာ ပျောက်ဆုံးနေခဲ့သော မိသားစု၏ နွေးထွေးမှုကို နောက်ဆုံးတွင် ခံစားလိုက်ရခြင်းပင် ဖြစ်သည်။
ဆရာသခင်၏ အကာအကွယ်ပေးမှုက သူ့ကို ပို၍ပင် ရင်ထဲထိ နက်ရှိုင်းစွာ ခံစားမိစေခဲ့သည်။
နောင်တွင် သူ ကြီးပြင်းလာသောအခါ... သခင် မရှိသည့်တိုင်... သူသည် သခင်၏ အရေးကြီးသော တာဝန်ကို ထမ်းဆောင်ပြီး... ကုမိသားစုကို ကောင်းမွန်စွာ ကာကွယ်ပေးကာ... မည်သူမျှ မနှောင့်ယှက်နိုင်စေရန် လုပ်ဆောင်ပေးမည် ဖြစ်သည်။
သို့သော် ကုမိသားစုကို သခင်ကဲ့သို့ ကာကွယ်ရန်အတွက်... သူ၏ လက်ရှိ ခွန်အားသည် အလွန်အမင်း အားနည်းနေဆဲပင်.....
ခဏတာအတွင်း ယဲ့ယင်းယင်းသည် စိတ်အားထက်သန် စွာဖြင့် ဆုံးဖြတ်ချက်ချလိုက်သည်။
သူသည် သူ၏ခွန်အားကို အမြန်ဆုံး တိုးတက်အောင် လုပ်ဆောင်ရပေမည်။
" မင်း အဆင်ပြေသွားလို့ ငါ စိတ်သက်သာရာ ရပါပြီ "
ယဲ့ယင်းယင်းကို စစ်ဆေးကြည့်ရှုပြီးနောက် သူ အဆင်ပြေကြောင်း တွေ့ရှိရသောအခါ... ကုချန်သည် လူသားဧကရာဇ်သွေးမျိုးနွယ်၏ အမွေခံ ဖူဝမ်ကို သူ၏ ရှေ့သို့ ခေါ်လိုက်သည်။
" မင်းကို တပည့်အဖြစ် လက်ခံတာက ငါကိုယ်တော်နဲ့ လူသားဧကရာဇ်တို့ရဲ့ သဘောတူညီချက်ပဲ.....
ငါကိုယ်တော်ရဲ့ သင်ကြားပြသမှုအောက်မှာ မင်းက မာနစိတ်မထားပဲ သေသေချာချာ လုံ့လဝီရိယနဲ့ ကျင့်ကြံပါ... လူသားဧကရာဇ်ရဲ့ မျှော်မှန်းချက်တွေကို စိတ်ပျက်အောင် မလုပ်မိဖို့ မျှော်လင့်ပါတယ် "
ကုချန်သည် သူ၏ရှေ့မှ မိန်းကလေးငယ်ကို ကြည့်လိုက်ပြီး သူ၏ အသံသည်လည်း နူးညံ့နေခဲ့သည်။
ဖူမိသားစုနှင့် ကုမိသားစုတို့၏ အတိတ်က ဆင်းရဲဒုက္ခများသည် မည်မျှ ဆင်တူနေခဲ့သနည်း။
သူနှင့် လူသားဧကရာဇ်တို့ နှစ်ဦးစလုံးသည် များပြားသော လူသားမျိုးနွယ်စုအတွက် ကြီးမားသော ပံ့ပိုးမှုများ ပြုလုပ်ခဲ့သော်လည်း... နောက်ဆုံးတွင် သူတို့၏ ကိုယ်ပိုင် သွေးမျိုးနွယ်နှင့် မိသားစုကိုပင် မကာကွယ်နိုင်ခဲ့ကြချေ။
ကုချန်သည် အချိန်မီ ပြန်မလာခဲ့ပါက... ကုမိသားစုသည်ပင် ဖူမိသားစု၏ ကံကြမ္မာမျိုး ကြုံတွေ့ရဖွယ်ရှိပြီး... ထိုထက်ပင် ပို၍ ဆိုးရွားနိုင်ပေသည်။ အကြောင်းမှာ ဖူမိသားစုတွင် ဖူဝမ်ဟူသော သွေးမျိုးနွယ် တစ်ဦးတည်းသာ ကျန်ခဲ့ပြီး... ဖူမိသားစု တစ်ခုလုံး၏ မျှော်လင့်ချက်များကို သယ်ဆောင်၍ အသက်ရှင်သန်ခဲ့ရခြင်း ဖြစ်သည်။
ထိုအကြောင်းကြောင့်ပင် ကုချန်သည် သူ၏ရှေ့မှ မိန်းကလေးငယ် ဖူဝမ်ကို ကြည့်သောအခါ သနားစိတ် ဖြစ်ပေါ်လာခဲ့ခြင်း ဖြစ်သည်။
" ဖူဝမ် ဆရာသခင်ရဲ့ မျှော်မှန်းချက်တွေကို စိတ်ပျက်အောင် လုံးဝ မလုပ်ပါဘူး...နေ့ညမပြတ် လုံ့လဝီရိယနဲ့ ကျင့်ကြံပါ့မယ် ပေါ့ဆဖို့ မရဲပါဘူး..... "
ထိုစကားကို ကြားသောအခါ ဖူဝမ်သည် ကုချန်၏ရှေ့တွင် ရိုသေလေးစားစွာ ဒူးထောက်၍ သုံးကြိမ် ဦးချလိုက်သည်။
သူ၏ ခက်ခဲသော အတွေ့အကြုံများနှင့် ခရီးကြမ်းတို့သည်... မိန်းကလေးငယ်၏ မျက်နှာတွင် သိမ်မွေ့ပျော့ပြောင်းမှု မရှိတော့ဘဲ... ကြံ့ခိုင်မှု အရိပ်အယောင်များ ပေါင်းထည့်ထားခဲ့သည်။
" တပည့်...ထပါတော့... ဒီနေ့ကစပြီး မင်းက ငါ့ရဲ့ ဒုတိယမြောက် ကိုယ်ပိုင်တပည့် ဖြစ်ပြီ "
ဖူဝမ်၏ တပည့်ခံယူပွဲကို အေးဆေးတည်ငြိမ်စွာ လက်ခံပြီးနောက်... ကုချန်သည် သူ၏လက်ကို ဆန့်တန်းကာ မိန်းကလေးငယ်ကို ကူညီ ထူမပေးလိုက်သည်။ ထို့နောက် သူ၏ လက်နှစ်ဖက်ကို နောက်ကျောတွင် ယှက်ထားရင်း... ဖူဝမ်ကို ချက်ချင်းပင် အံ့အားသင့်သွားစေမည့် စကားများကို ပြောလိုက်သည်။
" မင်း ငါကိုယ်တော်ရဲ့ တပည့် ဖြစ်လာကတည်းက ငါဧကရာဇ်ရဲ့ တပည့်ကို ဘယ်သူမှ လာမနှောင့်ယှက်နိုင်ဘူး.....
ဒါက မင်းရဲ့ အစ်မကြီး ယဲ့ယင်းယင်းနဲ့ သက်ဆိုင်သလို မင်းနဲ့လည်း သက်ဆိုင်တယ်.....
ကောင်းပြီ... အခု... ငါ့ကို... ပြောပြပါ မင်း အရင်က နေထိုင်ခဲ့တဲ့ ချန်ခွန်းရှေးဟောင်းကြယ်က ဘယ်မှာလဲ "