အခန်း (၁၅၃-၁၅၄)
Vol. 11 Ch. 153-154
အခန်း (၁၅၃) - လက်စားချေခြင်းသည် တစ်ခုတည်းသော နည်းလမ်း၊ အရှင်သခင်တို့ ကြောက်ရွံ့နေကြခြင်း၊ အပြစ်ကင်းစင်ခြင်းဟူသည် အဘယ်မှာ ရှိနိုင်မည်နည်း
" ချန်ခွန်းရှေးဟောင်းကြယ်တာရာက ဘယ်မှာလဲ "
ဆရာသခင်သည် အဘယ်ကြောင့် ဤမေးခွန်းအား ရုတ်တရက် မေးမြန်းလိုက်ရသနည်း။
ဖူဝမ်သည် တုန်လှုပ်သွားခဲ့ပြီးနောက်တွင်... သူသည် တစ်စုံတစ်ခုကို ပြန်လည်သတိရသွားဟန်တူ၏။ သူ၏ သေးငယ်သော မျက်နှာလေးပေါ်တွင်... ထိတ်လန့်မှုနှင့် မယုံနိုင်မှုတို့ ရောယှက်နေသော အမူအရာတစ်ခု ထင်ဟပ်လာသည်။
ကုချန်က ယဲ့ယင်းယင်းအတွက် လက်စားချေပေးခဲ့သည်ကို ဖူဝမ်သည် လတ်တလောတင် သိရှိထားခဲ့သည်။
လော့ထျန်းနန်းတော်သည် အစ်မယင်းယင်းအား သတ်ရန်အတွက်... လူသတ်သမားတစ်ဦးကိုသာ စေလွှတ်ခဲ့ခြင်းဖြစ်သည်။ ဆရာသခင် သိရှိသွားပြီးနောက်တွင်... သူသည် လော့ထျန်းနန်းတော်ကို အမြစ်ဖြတ်သုတ်သင်ခဲ့ရုံသာမက... ထိုလုပ်ရပ်အတွက် လော့ထျန်းနန်းတော်အား တာဝန်ပေးအပ်ခဲ့သည့်... ဆေးဖိုကိုးဖိုအင်မော်တယ်မင်းဆက်ကိုပင် လျှော့မပေးဘဲ... ဆရာသခင်၏လက်ထဲတွင် လွယ်ကူစွာပင် ပျက်သုဉ်းသွားခဲ့ရသည်။
ယခုအခါ... ဆရာသခင်က သူ့အား ချန်ခွန်းရှေးဟောင်းကြယ်တာရာ၏ နေရာကို မေးမြန်းနေခြင်းသည်... သူ့အတွက် လက်စားချေပေးရန် ရည်ရွယ်နေခြင်း ဖြစ်နိုင်ပါမည်လော။
ဖူဝမ်၏ သေးငယ်သော မျက်နှာလေးပေါ်တွင် တုံ့ဆိုင်းနေသော အရိပ်အယောင်တစ်ခု ပေါ်လာ၏။ သူ၏ မူလရည်ရွယ်ချက်မှာ ဖူမိသားစုအတွက် ကိုယ်တိုင်လက်စားချေနိုင်လောက်သည်အထိ အင်အားကြီးမားလာရန်... ချန်ခွန်းရှေးဟောင်းကြယ်တာရာပေါ်ရှိ ရန်သူအားလုံးကို သတ်ဖြတ်ရန်ဖြစ်ပြီး... ဤကိစ္စဖြင့် ဆရာသခင်ကို အလုပ်မရှုပ်စေလိုခြင်း ဖြစ်သည်။
သို့သော် ဆရာသခင်၏ အသံနေအသံထားအရ... ဆရာသခင်သည် သူ့အတွက် ယခုချက်ချင်း လက်စားချေပေးလိုပုံ ရနေသည်။
" မင်းကိုယ်တိုင် အင်အားကြီးလာတဲ့အထိစောင့်ပြီးမှ လက်စားချေမယ်ဆိုရင်... အဲ့ဒါက မင်းရဲ့မျိုးနွယ်စုရန်သူတွေအတွက် အန္တရာယ်ကင်းတဲ့အချိန်ကာလတစ်ခုကို... အချိန်အတော်ကြာ ပျော်ပျော်ကြီး ဖြတ်သန်းခွင့်ပေးလိုက်တာနဲ့ အတူတူပဲဆိုတာရော မင်း စဉ်းစားမိရဲ့လား... ဒါက မင်းအတွက်ရော သူတို့အတွက်ပါ မတရားဘူး "
ကုချန်သည် ဖူဝမ်၏အတွေးများကို ဖတ်ရှုနိုင်ဟန်တူပြီး... အေးဆေးတည်ငြိမ်စွာ ဆိုလိုက်၏။
" ဒါ့အပြင် မင်းက လက်စားချေဖို့ လုံလောက်တဲ့အထိ အင်အားကြီးလာတဲ့အချိန်ကျရင်... မင်းရဲ့ရန်သူအများစုက အသက်ကြီးပြီး သေသွားပြီးတာမျိုး ဖြစ်နိုင်တယ်... အဲ့ဒီအခါကျမှတော့ လက်စားချေခြင်းက ဘာအဓိပ္ပာယ်ရှိတော့မှာလဲ.....
ငါမင်းကို သင်ပေးမယ့် ပထမဆုံးသင်ခန်းစာကတော့... မင်းမှာ သတ်စရာရန်ငြိုးရှိရင်... အဲ့ဒါကို ချက်ချင်းရှင်းပစ်လိုက်... ရန်ငြိုးကို ကြာကြာ မထားနဲ့... တတ်နိုင်သမျှ အမြန်ဆုံး ရှင်းပစ်!
ဘယ်လိုပဲဖြစ်ဖြစ် ဟုတ်ပါတယ်... နောက်ဆုံးရွေးချယ်မှုကတော့ မင်းကိုယ်တိုင်ပဲ... မင်းရဲ့ဆုံးဖြတ်ချက်ကို ငါလေးစားတယ် "
စကားအနည်းငယ် ပြောကြားပြီးနောက်... ကုချန်သည် ဆုံးဖြတ်ချက် ချမှတ်ပိုင်ခွင့်ကို ဖူဝမ်ထံသို့ လွှဲအပ်လိုက်သည်။
သူ၏အမြင်၌... ကိုယ်တိုင်လက်စားချေရန် အင်အားကြီးမားလာသည်အထိ စောင့်ဆိုင်းနေခြင်းဟူသော အတွေးသည်... အလွန်ပင် မိုက်မဲလှ၏။
ယခု လက်စားချေနိုင်စွမ်း ရှိနေသည့်အတွက်... နောက်မှလုပ်ရန် စောင့်ဆိုင်းနေကာ... အဘယ်ကြောင့် ယခုပင် မလုပ်ရမည်နည်း။
ထိုအရာသည် ရန်သူများအား အကြောင်းပြချက်မရှိဘဲ လွတ်လပ်စွာ ရှင်သန်နေထိုင်ခွင့် ပေးနေခြင်းမျှသာ မဟုတ်ပါလော။
ထို့အပြင်... အင်အားကြီးမားလာပြီး လက်စားချေလိုသည့်အချိန်တွင်... ရန်သူများသည် အသက်အရွယ်ကြီးရင့်၍ သို့မဟုတ် မတော်တဆမှုတစ်ခုခုဖြင့် သေဆုံးသွားခဲ့လျှင် မည်သို့လုပ်မည်နည်း။
လက်စားချေနိုင်စွမ်း ရှိသည့်အခါ... အခွင့်အရေးတိုင်းကို ဆုပ်ကိုင်ထားရမည်ဖြစ်ပြီး... ချက်ချင်းပင် အကောင်အထည်ဖော်ရမည် ဖြစ်သည်။
ကိုယ်ပိုင်အင်အားကို အသုံးပြုသည်ဖြစ်စေ.. ပြင်ပအင်အားစုများကို အားကိုးသည်ဖြစ်စေ အရေးမကြီးချေ။
လက်စားချေခြင်းကိုသာ အရင်ဆုံး ပြီးမြောက်အောင် လုပ်လိုက်ပါ။
ရှင်းလင်းသည်မှာ... ကုချန်၏ စကားလုံးများသည် ဖူဝမ်အား ယိမ်းယိုင်သွားစေခဲ့ပြီး... သူ၏ သေးငယ်သော မျက်နှာလေးပေါ်တွင် ရှုပ်ထွေးနေသော အမူအရာတစ်ခု ပေါ်လာခဲ့သည်။
ထင်ရှားစွာပင်... သူ တွေးတောနေခဲ့သည်မှာ ကုချန် ခန့်မှန်းထားသည့်အတိုင်းပင် ဖြစ်သည်... သူသည် အနာဂတ်တွင် လက်စားချေရန်အတွက်... သူ၏ ကိုယ်ပိုင်အစွမ်းအပေါ်၌သာ အားကိုးလိုခဲ့သည်။
သို့သော် ဆရာသခင်၏ စကားများသည် အလွန်ပင် အဓိပ္ပာယ်ရှိလှ၏။
သူ့အနေဖြင့် လက်စားချေရန် လုံလောက်သည်အထိ အင်အားကြီးမားလာရန်... နှစ်ပေါင်းမည်မျှ ကြာမြင့်မည်ကို မည်သူသိနိုင်မည်နည်း။ ဤသည်မှာ ထိုအချိန်အတောအတွင်း သူ၏ ရန်သူများက လွတ်လပ်စွာ ရှင်သန်နေထိုင်ကြမည်ဟု ဆိုလိုနေခြင်း မဟုတ်ပါလော။
ဤသည်မှာ ကျဆုံးသွားခဲ့သော ဖူမိသားစု၏ မိသားစုဝင်များအတွက်... သူ၏ ဖခင်နှင့် မိခင်အတွက်... မိသားစုခေါင်းဆောင်နှင့် အကြီးအကဲများအတွက် အမှန်တကယ် တရားမျှတပါ၏လော။
ဤအတွေးဝင်လာသည့်အခါ... ဖူဝမ်၏ မျက်လုံးများထဲတွင် စိတ်ပိုင်းဖြတ်ထားသော အကြည့်တစ်ခု... ရုတ်တရက် ပေါ်ပေါက်လာခဲ့သည်။
သူသည် သူ၏ သေးငယ်သော လက်ကလေးကို ရုတ်တရက် မြှောက်လိုက်ပြီး... ကောင်းကင်ယံရှိ တိကျသော နေရာတစ်ခုသို့ ညွှန်ပြကာ ပြတ်သားစွာ ဆိုလိုက်၏။
" ဆရာသခင်... ချန်ခွန်းရှေးဟောင်းကြယ်တာရာက ဟိုး... အဲ့ဒီဘက်မှာပါ "
" အင်း "
ဤမျှ တိုတောင်းသော အချိန်အတွင်း၌... ဖူဝမ်သည် အသိတရားရသွားသည်ကို မြင်တွေ့ရသဖြင့်... ကုချန်သည် ကျေနပ်စွာဖြင့် ခေါင်းညိတ်လိုက်သည်။
ထို့နောက်... သူ၏ မြင့်မြတ်သော အတွေးစိတ်ကူး လှုပ်ရှားလိုက်သည်နှင့်... လတ်တလောတွင်မှ ဆေးဖိုကိုးဖိုအင်မော်တယ်မင်းဆက်ကို ချေမှုန်းခဲ့သည့် အဆုံးမဲ့ဓားသည်... သူ၏ဘေးတွင် တစ်ဖန်ပြန်လည် ပေါ်ပေါက်လာခဲ့၏။
" သွား! "
ကုချန်သည် အဆုံးမဲ့ဓားကို တစ်ချက်ကြည့်လိုက်ပြီး... အေးစက်စွာ အမိန့်ပေးလိုက်သည်။
" ချွမ် ! "
သူ၏တာဝန်ကို တစ်ဖန်ပြန်လည် ရရှိလိုက်သောအခါ... အဆုံးမဲ့ဓားသည် သူ၏ဓားသွားအား စိတ်လှုပ်ရှားစွာဖြင့် ယိမ်းနွဲ့လိုက်ပြီး... ကောင်းကင်ယံသို့ ပြန်လည်တက်သွားသော နဂါးစစ်တစ်ကောင်ကဲ့သို့... ကြီးမားကျယ်ပြန့်သော ကောင်းကင်ဘုံကိုးခုထဲသို့ ပြင်းထန်စွာ ထိုးဆင်းသွားကာ... စကြဝဠာ၏ နက်ရှိုင်းရာအရပ်ဆီသို့ ဦးတည်သွားလေတော့သည်။
အဆုံးမဲ့ဓား၏ လှုပ်ရှားမှုသည် သဘာဝအတိုင်းပင် ထူးကဲလှသော စွမ်းအားကို ပိုင်ဆိုင်ထားသည်။ ဓားအလင်းရောင်သည် ထက်မြက်တောက်ပလျက်ရှိပြီး... ကောင်းကင်နှင့်မြေကြီး မဖန်ဆင်းမီ ပထမဆုံးသော အလင်းတန်းတစ်ခုကဲ့သို့ပင်... အဝေးလံသော အဆုံးမဲ့ကမ္ဘာဆီသို့ ပျံ့နှံ့သွားကာ... ကြီးမားကျယ်ပြန့်သော နယ်မြေကြီးငါးခုကို တစ်ဖန်ပြန်လည် တုန်လှုပ်စေခဲ့သည်။
ရှင်သန်ခြင်းတားမြစ်နယ်မြေများအတွင်းရှိ ရှေးဟောင်းအရှင်သခင်များပင် နှစ်ခြိုက်စွာ အိပ်စက်နိုင်ခြင်း မရှိတော့ပေ။ ကောင်းကင်ဘုံအရှင်သခင်သည် အဘယ်အရာကို လုပ်ဆောင်နေပါသနည်း။ သူသည် ဘယ်သောအခါမျှ ရပ်တန့်တော့မည် မဟုတ်ပါလော။
ဆေးဖိုကိုးဖိုအင်မော်တယ်မင်းဆက်ကို ဖျက်ဆီးရန် အဆုံးမဲ့ဓားအား ထုတ်လွှတ်ခဲ့သည်မှာ မထူးခြားသည့် ကိစ္စတစ်ခုဖြစ်သော်လည်း... အဘယ်ကြောင့် သူသည် ယခုအချိန်တွင် အဆုံးမဲ့ဓားအား တစ်ဖန်ပြန်လည် ထုတ်လွှတ်နေရပြန်သနည်း။
ဤသေမင်းတမန်သည်... ဤတစ်ကြိမ်တွင် မည်သူ့ကို သွားရောက်... ဖျက်ဆီးဦးမည်နည်း။
တားမြစ်နယ်မြေအသီးသီးမှ ရှေးဟောင်းအရှင်သခင်များသည် ဤအခိုက်အတန့်တွင် အနည်းငယ် ထုံကျင်သွားသကဲ့သို့ ခံစားနေကြရသည်။
ယခင်က... ကုချန်သည် အင်အားကြီးမားကြောင်း သူတို့ သိရှိခဲ့ကြသည့်အခါ... သူတို့သည် သတိကြီးစွာထားပြီး စောင့်ကြည့်ခဲ့ကြသော်လည်း... ကြောက်ရွံ့မှုများစွာကိုမူ မခံစားခဲ့ကြရပေ။
သို့သော် ယခုအခါတွင်မူ... ဤရှေးဟောင်းအရှင်သခင်များသည် ဤကောင်းကင်ဘုံအရှင်သခင်သည်... ကောင်းကင်ဘုံကိုပင် ဆန့်ကျင်နိုင်စွမ်းရှိလောက်အောင် အင်အားကြီးမားပြီး ကြောက်မက်ဖွယ်ကောင်းရုံသာမက... သူ၏ လုပ်ပုံကိုင်ပုံသည်လည်း လုံးဝ အကျိုးအကြောင်းဆီလျော်မှုမရှိသော 'အရူးတစ်ယောက်' ကဲ့သို့ ဖြစ်နေသည်ကို... သဘောပေါက်သွားကြသည်။ အကယ်၍ သူက ဖျက်ဆီးမည်ဟု ပြောလျှင်... သူသည် အမှန်ပင် ဖျက်ဆီးလိမ့်မည်သာ ဖြစ်သည်။
သူသည် ပထမ တစ်စက္ကန့်မျှ အေးဆေးတည်ငြိမ်နေပြီး... နောက်တစ်စက္ကန့်တွင် သင့်အား ဖျက်ဆီးပစ်လိုက်နိုင်ပေသည်။
အရူးတစ်ယောက်သည် ကြောက်စရာမကောင်းပေ။ အင်အားကြီးမားခြင်းသည်လည်း ကြောက်စရာမကောင်းလှပေ။ သို့သော် အင်အားကြီးမားသော အရူးတစ်ယောက်ကမူ ရှေးဟောင်းအရှင်သခင်များကိုပင် သူတို့၏ နှလုံးသားအသည်းခြေတိုင်အောင် တုန်လှုပ်ခြောက်ခြားသွားစေခဲ့သည်။
ရှေးဟောင်းအရှင်သခင်များ တုန်လှုပ်ခြောက်ခြားနေကြစဉ်တွင်... ကျန်ရှိနေသေးသော အဆုံးမဲ့ကမ္ဘာဧကရာဇ်မျိုးနွယ်စုများသည် တုန်လှုပ်နေရုံမျှသာ မဟုတ်တော့ပေ။ သူတို့သည် သေမလောက်ပင် ကြောက်ရွံ့နေကြလေပြီ။
ကုချန်သည် အဆုံးမဲ့ကမ္ဘာသို့ ပြန်လည်ရောက်ရှိလာကတည်းက... ဤအဆုံးမဲ့ကမ္ဘာဧကရာဇ်မျိုးနွယ်စုများသည် နေ့စဉ်နေ့တိုင်း ထိတ်လန့်တုန်လှုပ်မှုများဖြင့် အသက်ရှင်နေခဲ့ကြရသည်။
ကုချန်သည် ယန်မိသားစုနှင့် ကျောက်မိသားစုကဲ့သို့သော ဧကရာဇ်မျိုးနွယ်စုများကို... တစ်စုပြီးတစ်စု ဆက်တိုက် ဖျက်ဆီးခဲ့ပြီးနောက်တွင်... ဤမလုံခြုံမှုနှင့် ကြောက်ရွံ့မှုတို့သည် အထွတ်အထိပ်သို့ ရောက်ရှိသွားခဲ့၏။
အကြောင်းမှာ... ကုချန်သည် ကျန်ရှိနေသေးသော ဧကရာဇ်မျိုးနွယ်စုများကို ဖျက်ဆီးရန်... မည်သည့်အချိန်တွင် လှုပ်ရှားလာမည်ကို... မည်သူတစ်ဦးတစ်ယောက်မျှ မသိသောကြောင့်ပင် ဖြစ်သည်။
အမှန်တကယ်တွင်... အသက်ရှင်ကျန်ရစ်သူ ဤဧကရာဇ်မျိုးနွယ်စုဝင်များသည် တစ်ခါတစ်ရံတွင်... ယန်မိသားစုနှင့် အခြားသော ချေမှုန်းခံလိုက်ရသည့် ဧကရာဇ်မျိုးနွယ်စုများကိုပင် အားကျမိကြသည်။
သေဆုံးခြင်းသည် ကောင်းမွန်လှ၏။ သေဆုံးခြင်းက အရာအားလုံးကို အဆုံးသတ်ပေး၏။ ထပ်ပြီး စဉ်းစားစရာ ဘာတစ်ခုမျှ မရှိတော့ဘဲ... ထာဝရ အိပ်စက်ခြင်းသာ ရှိတော့သည်။
သူတို့နှင့်မတူပေ။ သူတို့သည် အသက်ရှင်နေသေးသော်ငြားလည်း... စဉ်ဆက်မပြတ် ကြောက်ရွံ့မှုများဖြင့် ရှင်သန်နေထိုင်နေကြရပြီး... ထိုအရာသည် နှစ်များကို ရက်များသဖွယ် ဖြတ်သန်းနေထိုင်ရခြင်းထက်ပင် ပိုမို ကြောက်မက်ဖွယ်ကောင်းလှသည်။
ယနေ့တွင်... ကုချန်သည် အကြိမ်ကြိမ် လှုပ်ရှားခဲ့ပြီး... ဦးစွာ လော့ထျန်းနန်းတော်ကို ဖျက်ဆီးကာ... ထို့နောက် ဆေးဖိုကိုးဖိုအင်မော်တယ်မင်းဆက်ကို ဖျက်ဆီးခဲ့ပြီး... ယခုအခါ နောက်ထပ်ဓားတစ်စင်းကို ထုတ်လွှတ်လိုက်ပြန်သည်။ ဤတစ်ကြိမ်တွင် မည်သူ ဒုက္ခရောက်ရမည်ကို မည်သူသိနိုင်မည်နည်း။
ဖြစ်နိုင်သည်မှာ... ကျန်ရှိနေသေးသော ဤအဆုံးမဲ့ကမ္ဘာဧကရာဇ်မျိုးနွယ်စုများ၏ အလှည့်သည်... မကြာမီပင် ကျရောက်လာနိုင်ပေသည်။
အချို့က လေးနက်တည်ကြည်ပြီး... အချို့က ကြောက်ရွံ့ထိတ်လန့်နေကြလျက်... မရေမတွက်နိုင်သော အကြည့်များအောက်တွင်... အဆုံးမဲ့ဓားသည် တိတ်ဆိတ်ငြိမ်သက်ပြီး နက်ရှိုင်းလှသော ကြယ်တာရာများပြည့်နေသည့် ကောင်းကင်ယံကို ခွင်းဖောက်ထွက်သွားကာ... စကြဝဠာ၏ နက်ရှိုင်းရာအရပ်ဆီသို့ ပြင်းထန်စွာ ပျံသန်းသွားလေသည်။
အထက်ကောင်းကင်တားမြစ်နယ်မြေ.....
ဖူဝမ်သည် သူ၏ မျက်နှာလေးကို မော့ထားရင်း... ကြယ်တာရာများ၏ နက်ရှိုင်းရာအရပ်ဆီသို့ ပျောက်ကွယ်သွားသော ဓားအလင်းရောင်ကို ကြည့်ရှုနေကာ... မနေနိုင်ဘဲ မေးမြန်းလိုက်သည်။
" ဆရာသခင်... ဆရာက အဆုံးမဲ့ဓားကို လွှတ်လိုက်တာ... အဲ့ဒါက... အဲ့ဒါက ချန်ခွန်းရှေးဟောင်းကြယ်တာရာကို ဖျက်ဆီးပစ်ဖို့လား "
" ဟုတ်တယ် "
ကုချန်သည် သူ၏အကြည့်ကို အောက်သို့ချလိုက်ပြီး အေးဆေးစွာ ပြန်လည်ဖြေကြားလိုက်သည်။
" ဒါပေမဲ့... ဒါပေမဲ့ ဖူမိသားစုကို ဖျက်ဆီးခဲ့တာက ယင်ယန်တာအိုမဟာမိတ်အဖွဲ့က လူတွေပဲလေ... ချန်ခွန်းရှေးဟောင်းကြယ်တာရာပေါ်က တခြားသက်ရှိတွေက... သူတို့က ဖူမိသားစုကို တိုက်ခိုက်ခဲ့ကြတာ မဟုတ်ဘူး... သူတို့က အပြစ်ကင်းစင်ကြတယ်..... "
ဖူဝမ်သည် ညင်သာစွာ ရှင်းပြလိုက်၏။ သူသည် ငယ်ရွယ်သေး၏။ သူ၏ မျိုးနွယ်စုတစ်ခုလုံး ပျက်စီးသွားသည့် ကပ်ဘေးဆိုးကြီးကို ခံစားခဲ့ရသော်လည်း... ကလေးဆန်မှုနှင့် အပြစ်ကင်းစင်မှု အရိပ်အယောင်တစ်ခုသည် သူ၏ နှလုံးသားထဲတွင် ကျန်ရှိနေသေးပြီး... ဖူမိသားစု၏ ကိစ္စများကြောင့် အပြစ်မဲ့ပြည်သူများ ထိခိုက်ခံစားရသည်ကို သူ မမြင်တွေ့လိုခဲ့ပေ။
သို့သော်လည်း... ကုချန်၏ အဖြေစကားသည် ဖူဝမ်အား တိတ်ဆိတ်ငြိမ်သက်သွားစေခဲ့သည်။
" ချန်ခွန်းရှေးဟောင်းကြယ်တာရာပေါ်မှာ အပြစ်ကင်းစင်တဲ့သူ တစ်ယောက်မှ မရှိဘူး "
ကုချန်သည် အေးဆေးတည်ငြိမ်စွာ ဆိုလိုက်၏။
" လူသားဧကရာဇ်က အဆုံးမဲ့လူသားမျိုးနွယ်စုအပေါ်မှာ ကြီးမားတဲ့ ကျေးဇူးတရားတွေနဲ့ ကြီးမားတဲ့ မေတ္တာတရားတွေ ရှိခဲ့တယ်။ ယင်ယန်တာအိုမဟာမိတ်အဖွဲ့က မင်းရဲ့ ဖူမိသားစုကို ပစ်မှတ်ထားတိုက်ခိုက်တဲ့အချိန်မှာ... တခြားသူတွေက ဘာလို့ ဖူမိသားစုအတွက် ထမရပ်တည်ပေးဘဲ... စကားတစ်ခွန်းမှ မပြောခဲ့ကြတာလဲ။ တစ်ခါတစ်လေမှာ... ဘာမှမလုပ်ဘဲ ရပ်ကြည့်နေတာကလည်း အပြစ်တစ်ခုပဲ "
ယင်ယန်တာအိုမဟာမိတ်အဖွဲ့သည် ဖူမိသားစု ပျက်စီးခြင်း၏ အဓိကတရားခံဖြစ်သည့်အတွက်... သေချာပေါက် လွတ်မြောက်နိုင်မည် မဟုတ်ပေ။
သို့သော် တစ်နည်းအားဖြင့် ကြည့်မည်ဆိုလျှင်... ချန်ခွန်းရှေးဟောင်းကြယ်တာရာပေါ်ရှိ တိတ်ဆိတ်ငြိမ်သက်နေခဲ့သော အခြားသော အင်အားစုများနှင့် သက်ရှိသတ္တဝါများသည်လည်း... ယင်ယန်တာအိုမဟာမိတ်အဖွဲ့၏ ကြံရာပါများပင် မဟုတ်ပါလော။
အခန်း (၁၅၄) - အားလုံးတွင် အပြစ်ရှိ၏၊ ကြိုးပမ်းအားထုတ်မှုများ၊ ဓားသည် စကြဝဠာကို ဖြတ်တောက်သွားခြင်း
တစ်ခါတစ်ရံတွင် လက်ပိုက်ကြည့်နေခြင်းသည်လည်း အပြစ်တစ်ခုပင် ဖြစ်သည်။
ကုချန်၏စကားများသည် ခေါင်းလောင်းကြီးတစ်လုံးကဲ့သို့ ဖူဝမ်၏နှလုံးသားထဲတွင် ပဲ့တင်ထပ်သွားခဲ့၏။
" ဆရာသခင် ပြောတာမှန်တယ်... ဖူဝမ်က အရမ်း နုံအခဲ့တာပဲ "
ဖူဝမ်သည် ခေါင်းငုံ့လိုက်ပြီးနောက် ထပ်မံမော့ကြည့်လိုက်ရာ... သူ၏မျက်လုံးများတွင် စိတ်ပိုင်းဖြတ်ထားသော အမူအရာများဖြင့် ပြည့်နှက်နေသည်။
ဟုတ်ပါသည်... ဖူမိသားစုအား ဖျက်ဆီးခဲ့သော ယင်ယန်တာအိုမဟာမိတ်အဖွဲ့သည် အမှန်တကယ်ပင် အပြစ်ရှိပေသည်။
သို့သော် လက်ပိုက်ကြည့်နေခဲ့ကြသော သူတို့သည်လည်း အပြစ်ရှိသူများ မဟုတ်ကြပါလော။
ယင်ယန်တာအိုမဟာမိတ်အဖွဲ့၏ ဝိုင်းရံပိတ်ဆို့မှုနှင့် ရင်ဆိုင်နေရစဉ်... ဖူမိသားစုမှ လူအများအား အကူအညီတောင်းခံရန် စေလွှတ်ခဲ့ပုံကို... ဖူဝမ်သည် ယခုအချိန်အထိ မှတ်မိနေသေး၏။
ဖူမိသားစုဝင်များအားလုံးသည် ကြိုးစားခုခံတွန်းလှန်လျက် ရှိခဲ့ကြသော်လည်း... သူတို့၏ နှလုံးသားများထဲ၌မူ မျှော်လင့်ချက်ကို လက်မလွှတ်သေးချေ။
အကြောင်းမှာ... သူတို့သည် ဖူမိသားစုနှင့် အဆက်အဆံကောင်းများရှိသော အခြားအင်အားစုများက... လာရောက်ကူညီမည့်အရေးကို စောင့်မျှော်နေခဲ့ကြသောကြောင့်ပင် ဖြစ်သည်။
သို့သော် ရလဒ်မှာ အဘယ်သို့နည်း။
ယင်ယန်တာအိုမဟာမိတ်အဖွဲ့ ရောက်ရှိလာချိန်မှစ၍ ဖူမိသားစု ပျက်စီးသွားချိန်အထိ... ရက်ပေါင်းများစွာ ကြာမြင့်ခဲ့သော်လည်း... မည်သည့်အင်အားစုတစ်ခုမျှ... လူတစ်ဦးတစ်ယောက်မျှပင် ဖူမိသားစုအား လာရောက်ထောက်ပံ့ခြင်း မရှိခဲ့ပေ။
အဆုံးသတ်၌... ဖူမိသားစုဝင်များသည် အဆုံးမရှိသော နောင်တတရားများနှင့် မကျေနပ်နိုင်မှုများစွာဖြင့်... သွေးအိုင်ထဲတွင် လဲကျသေဆုံးသွားခဲ့ကြသည်။
သူ၏ မိသားစုတစ်စုလုံး၏ မျှော်လင့်ချက်အား ပခုံးထက်တွင် ထမ်းပိုးထားသော ဖူဝမ်တစ်ဦးတည်းသာလျှင်... အံ့ဩဖွယ်ရာကောင်းလောက်အောင် အသက်ရှင် လွတ်မြောက်ခဲ့ရသည်။
ဖူမိသားစုထဲသို့ ကျူးကျော်ဝင်ရောက်လာစဉ်... ယင်ယန်တာအိုမဟာမိတ်အဖွဲ့မှ ကျွမ်းကျင်သူတစ်ဦး ပြောကြားခဲ့သော စကားများကို... သူ မှတ်မိနေသေး၏။
" ဟက်! ဖူမိသားစု... မင်းတို့ ခေါင်းမာပြီး ခုခံနေတာ ဘာအဓိပ္ပာယ်ရှိလို့လဲ... စစ်ကူတွေ စောင့်နေတာလား... ဒီအရှင်သခင်က မင်းတို့ကို အသေအချာ ပြောလိုက်မယ်... ဘာစစ်ကူမှ လာမှာမဟုတ်ဘူး.....
တကယ်တော့... မင်းတို့ မျှော်လင့်ချက်ထားနေတဲ့ စစ်ကူဆိုတဲ့ကောင်တွေက... အခု အပိုင်ရမယ့် ဝေစုကို ခွဲယူဖို့ စောင့်နေကြတာ "
ထိုအချိန်က... ဤစကားများ၏ အဓိပ္ပာယ်ကို... ဖူဝမ် နားမလည်ခဲ့ပေ။
သို့သော် ယခုအခါတွင်မူ သူ နားလည်သွားခဲ့ပြီဖြစ်သည်။
ဆရာသခင် ပြောသည်မှာ မှန်ပေသည်... ချန်ခွန်းရှေးဟောင်းကြယ်တာရာပေါ်ရှိ မည်သည့်သက်ရှိသတ္တဝါမျှ... အပြစ်ကင်းစင်ခြင်း မရှိပေ။
ချန်ခွန်းရှေးဟောင်းကြယ်တာရာ... ပျက်စီးသွားလေပြီ။
ဖူဝမ်၏ သေးငယ်သော မျက်နှာလေးပေါ်ရှိ စိတ်ပိုင်းဖြတ်ထားသော အမူအရာကို ကြည့်လိုက်ပြီးနောက်... သူ၏လက်များကို နောက်သို့ပစ်လျက် အေးဆေးတည်ငြိမ်စွာ ရပ်နေသော ဘိုးဘေးကြီးကို ကြည့်လိုက်ရင်း... ကုချင်းရွဲ့သည် လျှို့ဝှက်နယ်မြေထဲတွင် လူသားဧကရာဇ် ပြောကြားခဲ့သော စကားများကို ရုတ်တရက် ပြန်လည်သတိရသွားမိသည်။
ထိုအချိန်က... သူသည် လူသားဧကရာဇ်အား ဖူမိသားစုကို ဖျက်ဆီးခဲ့သူများအပေါ်... လက်တုံ့ပြန်မည်လားဟု မေးမြန်းခဲ့သည်။
လူသားဧကရာဇ်၏ ထိုအချိန်က အဖြေသည် ကုချင်းရွဲ့အား အလွန်ပင် ရှုပ်ထွေးသွားစေခဲ့သည်။ လူသားဧကရာဇ်က သူလက်တုံ့ပြန်မည်မဟုတ်ကြောင်း... အကြောင်းမှာ ထိုသက်ရှိသတ္တဝါတို့၏ ကံကြမ္မာသည် သူ၏လက်ဖြင့် အဆုံးသတ်သင့်သည် မဟုတ်သောကြောင့်ဟု ဆိုခဲ့သည်။
ယခုအခါတွင်မူ... ကုချင်းရွဲ့သည် လူသားဧကရာဇ်၏ ဆိုလိုရင်းကို... နောက်ဆုံးတွင် နားလည်သဘောပေါက်သွားခဲ့လေပြီ။
အမှန်မှာ... ဘိုးဘေးသည် ဤသို့လှုပ်ရှားလာမည်ကို... လူသားဧကရာဇ်က အစကတည်းက ကြိုတင်မြင်တွေ့ထားခဲ့ပြီး ဖြစ်၏။
လှုပ်ရှားရန် အခွင့်အရေးကို ဘိုးဘေးကြီးထံသို့ ပေးအပ်လိုက်ခြင်းဖြင့်... ဖူမိသားစုအား ဖျက်ဆီးခဲ့သော တရားခံအားလုံးသည် ချေမှုန်းခံရမည်ဖြစ်ပြီး... ဂုဏ်ကျေးဇူးအားလုံးသည် ဘိုးဘေးကြီးထံသို့သာ ရောက်ရှိသွားမည်ဖြစ်ကာ... ဖူဝမ်သည်လည်း ဘိုးဘေးကြီးအပေါ်တွင် တိုင်းတာမရနိုင်သော ကျေးဇူးတင်ရှိမှုများဖြင့်... ထိုအချိန်မှစ၍ ဘိုးဘေးကြီး၏နောက်သို့ စိတ်နှလုံးအကြွင်းမဲ့ လိုက်ပါလျက် ကျင့်ကြံတော့မည် ဖြစ်သည်။
လူသားဧကရာဇ်အရှင်သည် ဖူဝမ်၏ အနာဂတ်အတွက် အမှန်တကယ်ပင် အစွမ်းကုန် ကြိုးပမ်းအားထုတ်ပေးခဲ့သည်ဟုသာ ဆိုနိုင်ပေတော့သည်။
ကုချင်းရွဲ့သည် သက်ပြင်းတစ်ချက်ချလိုက်ပြီး တစ်ချိန်တည်းမှာပင်... သူ၏ လှပသော မျက်လုံးများသည် ကောင်းကင်ဘုံကိုးခု၏ အလွန်တစ်ဖက်ဆီသို့ အလိုအလျောက်ပင် ကြည့်ရှုလိုက်မိသည်... ချန်ခွန်းရှေးဟောင်းကြယ်တာရာ၏ ကံကြမ္မာကို မျက်မြင်ကိုယ်တွေ့ ကြည့်ရှုလိုသည့်အလားပင်။
မဟာစကြဝဠာ၏ နက်ရှိုင်းသော အာကာသထဲ၌.....
ထက်မြက်တောက်ပသော ဓားအလင်းရောင်သည် ကောင်းကင်ယံကို ဖြတ်သန်းသွားကာ... အဆုံးမဲ့သော စကြဝဠာကို ထိုးဖောက်သွား၏။ အဆုံးမဲ့ဓား၏ လမ်းကြောင်းကို ပိတ်ဆို့နေသော ဂြိုဟ်သိမ်ဂြိုဟ်မွှားများနှင့် ကြယ်တာရာအားလုံးသည် နှစ်ပိုင်းဖြတ်တောက်ခံလိုက်ရပြီး... မည်သည့်အရာကမျှ တားဆီးနိုင်ခြင်း မရှိချေ။
ခမ်းနားထည်ဝါလှသော ဓားအလင်းရောင်သည် မျက်စိကျိန်းလောက်အောင် တောက်ပသော ကြယ်တာရာကိုပင် လွှမ်းမိုးသွားခဲ့ပြီး... ဤအေးစက်တိတ်ဆိတ်လှသော စကြဝဠာကြယ်တာရာများပြည့်နေသည့် ကောင်းကင်ယံတွင် တစ်ခုတည်းသော အလင်းရောင် ဖြစ်လာခဲ့သည်။
အခါအားလျော်စွာ... သက်ရှိတို့၏ ရှေးဟောင်းကြယ်တာရာများပေါ်ရှိ သက်ရှိသတ္တဝါများသည် ထိုအခိုက်အတန့်တွင် မော့ကြည့်လိုက်မိပါက... အဆုံးမဲ့ဓား၏ အရိပ်အယောင်သည် ကြယ်တာရာများပြည့်နေသော ကောင်းကင်ယံကို ဖြတ်သန်းသွားသည်ကို တစ်ချက်မျှ မြင်တွေ့လိုက်မိနိုင်သော်လည်း... ထိုမျှသာ ဖြစ်သည်။
သူတို့ မျက်တောင်တစ်ခတ် ပုတ်လိုက်သည့်အချိန်တွင်... အရာအားလုံးသည် ပျောက်ကွယ်သွားခဲ့ပြီး ဖြစ်သည်။
ချန်ခွန်းရှေးဟောင်းကြယ်တာရာ.....
ခမ်းနားထည်ဝါပြီး ကြီးမားလှသော ယင်နှင့်ယန်မြင့်မြတ်သော ခန်းမတစ်ခု၏ အတွင်း၌.....
ထက်မြက်သော မြင့်မြတ်သည့် အလင်းစက်ဝန်းများဖြင့် ဖုံးအုပ်ထားသော ကြောက်မက်ဖွယ်ရာ ပုံရိပ် ဆယ်ခုထက်မနည်းသည် ယင်နှင့်ယန် တရားထိုင်ဖျာများပေါ်တွင် တင်ပျဉ်ခွေထိုင်လျက် ရှိနေကြသည်။
" ဖူမိသားစုတစ်စုလုံးကို သုံးကြိမ်တိုင်တိုင် ရှာဖွေပြီးသွားပြီ... နေလဧကရာဇ်ကျမ်းစာရဲ့ သဲလွန်စတစ်ခုမှ ရှာမတွေ့ခဲ့ဘူး "
" အဲ့ဒီအချိန်တုန်းက ဖူမိသားစုထဲမှာ မရှိဘဲ... အပြင်ကို ထွက်ခွာသွားခဲ့တဲ့ ဖူမိသားစုတပည့်တွေအားလုံးကိုလည်း ငါတို့ဂိုဏ်းက ရှာတွေ့ပြီး... ဝိညာဉ်ရှာဖွေစစ်ဆေးနည်းနဲ့ သတ်ပစ်ခဲ့ပြီးပြီ... ဒါပေမဲ့ ယင်ယန်ဧကရာဇ်ကျမ်းစာနဲ့ ပတ်သက်တဲ့ သဲလွန်စ ဘာတစ်ခုမှ မတွေ့ခဲ့ရဘူး "
" နဂါးရှာဖွေရေးမြင့်မြတ်ဂိုဏ်းက အကြိမ်ကြိမ် အတည်ပြုပြီးပြီ... ဖူမိသားစုက ချန်ခွန်းရှေးဟောင်းကြယ်တာရာပေါ်မှာ ဘာလျှို့ဝှက်နယ်မြေ ဒါမှမဟုတ် ဂူသင်္ချိုင်းတစ်ခုမှ ချန်မထားခဲ့ဘူး... သာမန်သင်္ချိုင်းတချို့ပဲ ရှိတယ်။ အဲ့ဒီသင်္ချိုင်းတွေကိုလည်း ငါတို့ တူးဖော်ခဲ့ပြီးပြီ... ဒါပေမဲ့ ဖူမိသားစုဝင်အိုကြီးတချို့ရဲ့ အရိုးတွေကလွဲလို့ ဘာသင်္ဂြိုဟ်ပစ္စည်းမှ မရှိခဲ့ဘူး "
အေးစက်လှသော အသံတစ်ခုပြီးတစ်ခုသည် ယင်ယန်တာအိုခန်းမထဲတွင် ပဲ့တင်ထပ်လျက် ရှိနေသည်။
ထိုအသံတစ်သံချင်းစီ ထွက်ပေါ်လာတိုင်း... ခန်းမအတွင်းရှိ လေထုသည် ပို၍ပင် လေးနက်ပြီး ဖိစီးလာခဲ့သည်။
" ဟွန့်! ဒီမှာလည်း ဘာမှမရှိ... ဟိုမှာလည်း ဘာမှမရှိ... ဒါဆို ငါတို့ အချိန်အကြာကြီး အစီအစဉ်ဆွဲပြီး ဖူမိသားစုကို ဖျက်ဆီးခဲ့တဲ့ လုပ်ရပ်က ဟာသတစ်ခုသက်သက်ပဲ ဖြစ်သွားတာလား "
အင်အားကြီးမားသော ကျွမ်းကျင်သူတစ်ဦးသည် ဒေါသထွက်လာခဲ့ပြီး... သူ၏ပတ်ပတ်လည်ရှိ မြင့်မြတ်သော အလင်းစက်ဝန်းသည် မတည်မငြိမ် တုန်ခါသွားကာ... လေဟာနယ်အား ကွဲထွက်သွားစေပြီး စုတ်ပြဲသွားစေခဲ့သည်။
" ဂိုဏ်းချုပ်ကြီးရွှီ... စိတ်ကို ငြိမ်ငြိမ်ထားပါ "
အကြီးအကဲနေရာတွင် ထိုင်နေသော... ယင်ယန်တာအိုဝတ်ရုံကို ဝတ်ဆင်ထားသည့် အဘိုးအိုတစ်ဦးက... လျစ်လျူရှုသော လေသံဖြင့် ဆိုလိုက်သည်။
" ဖူမိသားစုကတော့ ပျက်စီးသွားခဲ့ပြီ... ဒါပေမဲ့ ငါတို့ စုံစမ်းစစ်ဆေးချက်တွေအရ... ဖူမိသားစုမှာ ထွက်ပြေးလွတ်မြောက်သွားတဲ့ နောက်ဆုံးသွေးသားတစ်ယောက် ကျန်နေသေးတယ်... နေလဧကရာဇ်ကျမ်းစာရဲ့ သဲလွန်စက သူ့ဆီမှာ ရှိနေနိုင်တယ် "
" မဟာမိတ်ခေါင်းဆောင်ကြီးချန် ဆိုလိုတာက... ဖူဝမ်လို့ခေါ်တဲ့ ကောင်မလေးကို ပြောတာလား "
ဂိုဏ်းချုပ်ကြီးရွှီဟု အခေါ်ခံရသော ကျွမ်းကျင်သူသည် ဦးစွာ တုန်လှုပ်သွားပြီးနောက်... မထီမဲ့မြင်ပြုသော လေသံဖြင့် ပယ်ချလိုက်သည်။
" သူက ငါးနှစ် ခြောက်နှစ်အရွယ် ကောင်မလေးတစ်ယောက်ပဲ ရှိသေးတာ။ ထွက်ပြေးလွတ်မြောက်သွားခဲ့ရင်တောင်မှ... ဖူမိသားစုရဲ့ ဘယ်လို အဓိကလျှို့ဝှက်ချက်တွေကိုများ သူက ပိုင်ဆိုင်နိုင်မှာတဲ့လဲ "
" ဟဲဟဲ... ဒီဘိုးဘေးအိုကြီးလည်း အစပိုင်းမှာတော့ အဲ့လိုပဲ တွေးခဲ့မိတာပဲ... ဒါပေမဲ့ သေချာအောင်လို့... အဲ့ဒီကောင်မလေးမှာ ထူးခြားတာ တစ်ခုခုများ ရှိနေမလား သိရအောင်... ဖူဝမ်ရဲ့နောက်ကို လိုက်ဖို့ လူနှစ်ယောက်ကို ငါ လွှတ်ခဲ့သေးတယ် "
ယင်ယန်တာအိုဝတ်ရုံဝတ် အဘိုးအိုက လျစ်လျူရှုသော လေသံဖြင့် ဆိုလိုက်သည်။
" ပြီးတော့ အခု... ငါလွှတ်လိုက်တဲ့ လူနှစ်ယောက်လုံးက တစ်ပြိုင်နက်တည်းနီးပါး အဆက်အသွယ်ပြတ်တောက်သွားခဲ့ပြီး... သူတို့ရဲ့ ဝိညာဉ်မီးခွက်တွေလည်း ငြိမ်းသွားခဲ့ပြီ... ဒါက ဘာကို အဓိပ္ပာယ်ဆောင်လဲဆိုတာတော့... ခင်ဗျားတို့အားလုံးက ကျုပ်ထက် ပိုသိကြလိမ့်မယ်လို့ ထင်ပါတယ် "
ဖူဝမ်၏နောက်သို့ လိုက်ရန် စေလွှတ်လိုက်သော ကျွမ်းကျင်သူနှစ်ဦးစလုံး သေဆုံးသွားခဲ့သည်လော။
ဤသတင်းကို ကြားလိုက်ရသောအခါ... ရှေးဟောင်းခန်းမကြီးထဲရှိ ကျွမ်းကျင်သူအားလုံးသည် လှုပ်လှုပ်ရှားရှား ဖြစ်သွားကြ၏။
မဟာမိတ်ခေါင်းဆောင်ကြီးချန် စေလွှတ်လိုက်သောသူများသည် အတော်အတန် ကျင့်ကြံမှုအဆင့် ရှိကြမည်မှာ သေချာသည်။
ထိုအပြင်... ဖူမိသားစုမှ တစ်ဦးတည်း အသက်ရှင်ကျန်ရစ်သူ ထိုကောင်မလေးသည်... ကျင့်ကြံခြင်းလမ်းကြောင်းပေါ်သို့ ယခုလေးတင် စတင်လျှောက်လှမ်းရုံသာ ရှိသေးသည်။
သူ၏နောက်သို့ လိုက်နေသော ယင်ယန်တာအိုမဟာမိတ်အဖွဲ့မှ ကျွမ်းကျင်သူနှစ်ဦးကို သူ့အနေဖြင့် သတ်ဖြတ်နိုင်စွမ်း ရှိမည်မှာ လုံးဝ မဖြစ်နိုင်ချေ။
သို့ဆိုလျှင်... ထိုနှစ်ဦးကို မည်သူက သတ်ဖြတ်ခဲ့သနည်း။
ဤသည်မှာ နေလဧကရာဇ်ကျမ်းစာ သို့မဟုတ် တစ်နည်းအားဖြင့်ဆိုသော်... လူသားဧကရာဇ်အမွေအနှစ်နှင့် အလွန်အမင်း သက်ဆိုင်နေနိုင်ဖွယ် ရှိသည်။
ဤသို့ တွေးမိလိုက်သောအခါ... ရှေးဟောင်းခန်းမကြီးထဲရှိ ကျွမ်းကျင်သူအားလုံး၏ မျက်လုံးများသည်... ပြင်းပြသော အငွေ့အသက်များဖြင့် တောက်ပလာကြသည်။
" သူ့ကို ဖမ်းရမယ်... ငါတို့ သူ့ကို မဖြစ်မနေ ဖမ်းပြီးတော့ သေချာစစ်ဆေးမေးမြန်းရမယ် "
" ဟုတ်တယ်... နေလဧကရာဇ်ကျမ်းစာက ငါတို့ ယင်ယန်တာအိုမဟာမိတ်အဖွဲ့ကပဲ ပိုင်ဆိုင်ရမယ် "
အနည်းငယ် လေးလံနေသော အသက်ရှူသံများ ကြားထဲတွင်... ခန်းမထဲရှိ ကျွမ်းကျင်သူအများအပြားသည် တစ်ဦးပြီးတစ်ဦး ထပြောကြကာ... ဖူဝမ်အား အမြန်ဆုံး ဖမ်းဆီးပြီး... လူသားဧကရာဇ်အမွေအနှစ်နှင့် ပတ်သက်သော သဲလွန်စများအတွက် စစ်ဆေးမေးမြန်းရန် လိုအပ်ကြောင်း... ပြောကြားကြသည်။
" အားလုံးပဲ စိတ်ချလက်ချ နေကြပါ... ဒီမဟာမိတ်ခေါင်းဆောင်ကြီးက သေချာပေါက်..... "
ယင်ယန်တာအိုမဟာမိတ်အဖွဲ့၏ ဂိုဏ်းချုပ်ကြီးသည် တစ်စုံတစ်ခုကို ပြောရန် ဟန်ပြင်လိုက်စဉ်မှာပင်... တစ်ခဏအတွင်း၌.. သူ၏ မျက်နှာအမူအရာသည် သိသိသာသာ ပြောင်းလဲသွားခဲ့သည်။
အကြောင်းမှာ သူ၏ မြင့်မြတ်သော အသိအာရုံထဲတွင်... ချန်ခွန်းရှေးဟောင်းကြယ်တာရာ၏ ကောင်းကင်ဘုံကိုးခုထက်မှ ကြောက်မက်ဖွယ်ကောင်းသော ဓားအလင်းရောင်သည်... ကျယ်ပြန့်သော ဒီရေလှိုင်းကြီးတစ်ခုကဲ့သို့ ကျဆင်းလာကာ... ဓားပင်လယ်လှိုင်းလုံးပေါင်း ထောင်သောင်းများစွာကို လှုပ်ခတ်စေလျက်... ကောင်းကင်ဘုံကိုးခုအား ဖုံးလွှမ်းပြီး... သဘာဝအတိုင်းပင် ဤယင်ယန်တာအိုခန်းမ တည်ရှိရာနေရာလည်း အပါအဝင်ဖြစ်သည့်... ချန်ခွန်းရှေးဟောင်းကြယ်တာရာ၏ နေရာတိုင်းစီသို့ ခွဲခြားရွေးချယ်ခြင်းမရှိဘဲ ဖုံးလွှမ်းသွားသည်ကို... သူ ထိတ်လန့်တုန်လှုပ်စွာ တွေ့ရှိလိုက်ရသောကြောင့်ပင် ဖြစ်သည်။
ယင်ယန်တာအိုမဟာမိတ်အဖွဲ့၏ ဂိုဏ်းချုပ်ကြီးသာမကဘဲ... ခန်းမထဲရှိ အခြားသော ကျွမ်းကျင်သူများသည်လည်း ထို့နောက်တွင် ဤအဖြစ်အပျက်ကို တွေ့ရှိသွားကြပြီး... သူတို့အားလုံး၏ မျက်နှာများပေါ်တွင် ကြောက်မက်ဖွယ်ရာ အမူအရာများ ထင်ဟပ်လာကြသည်။
အဘယ်ကြောင့်ဆိုသော် ထိုဓားအလင်းရောင်သည် အမှန်တကယ်ပင် အလွန်အမင်း ကြောက်မက်ဖွယ်ကောင်းလှသောကြောင့် ဖြစ်သည်။ ၎င်းသည် မဟာစကြဝဠာထဲမှ ထုတ်လွှတ်လိုက်ခြင်းဖြစ်ပြီး... စကြဝဠာများကြားမှ ကျဆင်းလာခဲ့သည်။ ၎င်းဖြတ်သန်းသွားရာ နေရာတိုင်းတွင်... ကြယ်တာရာများသည် ပြိုကျပျက်စီးသွားကာ... စကြဝဠာအမှုန်အမွှားများအဖြစ်သို့ ပြောင်းလဲသွားပြီး ပျောက်ကွယ်သွားခဲ့လေသည်။
ကြီးမားကျယ်ပြန့်သော ကြယ်တာရာများပင်... ထိုဓားအလင်းရောင်၏ ဓားချက်တစ်ချက်ကို မခံနိုင်ပါလျှင်... သာမန် ချန်ခွန်းရှေးဟောင်းကြယ်တာရာလေးတစ်ခုက မည်သို့ ခံနိုင်မည်နည်း။
ဤအခိုက်အတန့်တွင်... လူတိုင်း၏ ခန္ဓာကိုယ်များသည် ချက်ချင်းပင်... အေးစက်တောင့်တင်းသွားကြသည်။