အခန်း (၁၅၅-၁၅၆)
Vol. 12 Ch. 155-156
အခန်း (၁၅၅) - စကြဝဠာ ပျက်သုဉ်းခြင်း၊ ကစဉ့်ကလျားဖြစ်ခြင်းနှင့် လက်စားချေခြင်း အောင်မြင်မှု
ဘာတွေဖြစ်သွားခဲ့တာလဲ.....
အဆုံးမဲ့ဓားအလင်းတန်းတစ်ခုသည် အဆုံးမဲ့ကမ္ဘာ ကောင်းကင်ယံထက်မှ အံ့အားသင့်ဖွယ် ဆင်းသက်လာပြီး... ချန်ခွန်းရှေးဟောင်းကြယ်အား တွေဝေခြင်းမရှိဘဲ ဝင်ရောက်တိုက်ခိုက်လိုက်သည်။
မည်သူကများ အစွမ်းပြလိုက်ခြင်းနည်း။
ယင်ယန်တာအိုမဟာမိတ်အဖွဲ့၏ ဂိုဏ်းချုပ်ဖြစ်စေ... အခြားသောဂိုဏ်းအသီးသီးမှ ဂိုဏ်းချုပ်များဖြစ်စေ... ယခုအချိန်တွင် သူတို့၏နှလုံးသားထဲ၌ ထိတ်လန့်မှုများသာ ဖြတ်သန်းစီးဆင်းသွားခဲ့ရသည်။
အကြောင်းမှာ... ကောင်းကင်ဘုံကိုးခုထက်မှ ဆင်းသက်လာသော ထိုဓားအလင်းတန်းထံမှ... အဆုံးအစမဲ့ကြီးမားကျယ်ပြန့်သည့် အထွတ်အထိပ်အငွေ့အသက်ကို သူတို့ ခံစားမိလိုက်သောကြောင့်ပင် ဖြစ်သည်။
" အမြန်သွားကြ! "
ယင်ယန်တာအိုနန်းတော်အတွင်း၌ သူတော်စင်အဆင့် အားကောင်းသူအများအပြားသည် ဟိန်းဟောက်အော်ကာ မတ်တတ်ရပ်လိုက်ကြပြီး... ဤနေရာမှ လွတ်မြောက်ရန် ရည်ရွယ်ချက်ဖြင့် တိမ်တိုက်များထဲသို့ တဟုန်ထိုး ခုန်တက်သွားကြသည်။
သို့သော် သူတို့၏ လုပ်ရပ်များမှာ အချည်းနှီးသာဖြစ်ပြီး အသုံးမဝင်ကြောင်း ထင်ရှားနေ၏။
သူတို့ မခုန်ထွက်နိုင်မီမှာပင်... ကောင်းကင်ဘုံကိုးခုထက်မှ ဆင်းသက်လာသော ဓားအလင်းတန်းသည် ဝိညာဉ်ရှိသကဲ့သို့... ဦးစွာရောက်ရှိနေခဲ့သည်။ ၎င်းသည် အဆုံးမဲ့ လေဟာနယ်ကို ဖြတ်ကျော်ကာ... မိုင်သန်းပေါင်းများစွာချီသော လေဟာနယ်ကို ဖြိုခွင်းလျက်... ထွက်ပြေးလိုသော သူတော်စင်အဆင့်ဖြစ်တည်မှုများထံသို့ တည့်မတ်စွာ ဦးတည်လာခဲ့လေ၏။
ဤသည်ကို မြင်လိုက်ရသော ထိုသူတော်စင်အဆင့် အားကောင်းသူများသည် ထိတ်လန့်တုန်လှုပ်သွားကြပြီး... ဓားအလင်းတန်းကို တားဆီးနိုင်ရန် မျှော်လင့်ချက်ဖြင့် သူတော်စင်လက်နက်အမျိုးမျိုးနှင့် မှော်ပစ္စည်းများကို အလိုအလျောက် ဆင့်ခေါ်လိုက်ကြသည်။
" ရွှမ်း..... "
ဓားအလင်းတန်းသည် တိတ်ဆိတ်စွာပင် ဖြတ်သန်းသွားခဲ့ပြီး ခုခံနိုင်စွမ်း အနည်းငယ်မျှပင် မရှိခဲ့ချေ။
ထိုသူတော်စင်အဆင့် ဖြစ်တည်မှုများသည် ချက်ချင်းပင် နေရာ၌ တောင့်တင်းသွားကြ၏။ ထို့နောက် သူတို့၏ သူတော်စင်လက်နက်များနှင့်အတူ... ခန္ဓာကိုယ်များသည် တစ်ပြိုင်နက်တည်း ပေါက်ကွဲသွားကာ အော်ဟစ်သံပင် မထွက်နိုင်လိုက်ဘဲ... လေဟာနယ်အတွင်း တောက်ပသော သွေးပန်းပွင့်များအဖြစ် ပြောင်းလဲသွားတော့သည်။
ကျိုးပဲ့နေသော လက်နက်များနှင့် ကြေမွနေသော အရိုးစများမှာ နေရာအနှံ့ လွင့်ပျံလျက် ရှိနေ၏။
ဤမြင်ကွင်းသည် တာအိုနန်းတော်အတွင်း မလွတ်မြောက်နိုင်သေးသော သူရဲကောင်းများကို ကျောချမ်းသွားစေခဲ့ပြီး... အလိုအလျောက်ပင် သူတို့၏နဖူးပေါ်မှ ချွေးစေးများ စီးကျလာစေခဲ့သည်။
ဤအရာမှာ အလွန်ပင် ကြောက်မက်ဖွယ်ကောင်းလွန်းလှ၏။ ဓားအလင်းတန်း တစ်ချက်တည်းနှင့်ပင် ထိုကဲ့သို့ ဆိုးရွားသော ရလဒ်ကို ဖြစ်ပေါ်စေခဲ့သည်။
ထိုသူများသည် သူတော်စင်လက်နက်များကို ကိုင်ဆောင်ထားသော သူတော်စင်အဆင့် အားကောင်းသူများ ဖြစ်ကြသည်။
ထိုဓားအလင်းတန်း၏ ရှေ့မှောက်တွင် သူတို့၌ ခုခံနိုင်စွမ်း အနည်းငယ်မျှပင်မရှိဘဲ လွယ်ကူစွာပင် ချေမှုန်းခံလိုက်ရသည်။
ထိုဓားအလင်းတန်းမှာ မည်မျှအထိ ကြောက်စရာကောင်းလိုက်ပါသနည်း။ မည်သူက ထုတ်လွှတ်လိုက်ခြင်းနည်း။
" ထွက်ပြေးလို့ အသုံးမဝင်ဘူး... ငါတို့ ထိပ်တိုက်ရင်ဆိုင်မှ ရမယ်! "
ယင်ယန်တာအိုဝတ်စုံကို ဝတ်ဆင်ထားသော ယင်ယန်တာအိုမဟာမိတ်အဖွဲ့၏ ဂိုဏ်းချုပ်သည် လွှမ်းခြုံလာသော ကြောက်မက်ဖွယ် ဓားအလင်းတန်းကို ကြည့်ကာ တည်ကြည်စွာ သတိပေးလိုက်သည်။
ထွက်ပြေးခြင်းသည် လုံးဝ အသုံးမဝင်ကြောင်း သူသိလိုက်ပြီဖြစ်သည်။
အကြောင်းမှာ ဤဆင်းသက်လာသော ဓားအလင်းတန်း၏ ပစ်မှတ်သည် သူတို့ရှိနေသည့် တာအိုနန်းတော်သာမက ချန်ခွန်းရှေးဟောင်းကြယ်တစ်ခုလုံး ဖြစ်နေသောကြောင့်ပင်။
ဌက်သိုက်မှောက်သွားလျှင် မည်သည့်ဥမျှ အကောင်းကျန်မည် မဟုတ်ချေ။
ကံကောင်းထောက်မစွာဖြင့်... ဤနေရာသို့ ကျရောက်လာမည့် ဓားအလင်းတန်းကို ရှောင်တိမ်းနိုင်ခဲ့လျှင်ပင် သူတို့ လွတ်မြောက်နိုင်မည်လော။
ချန်ခွန်းရှေးဟောင်းကြယ်တစ်ခုလုံး ပျက်သုဉ်းသွားသောအခါ သူတို့သည်လည်း လွတ်မြောက်နိုင်မည် မဟုတ်ပေ။
ထို့ကြောင့် အသက်ရှင်ရန် တစ်ခုတည်းသော အခွင့်အရေးမှာ ထိပ်တိုက် ခုခံရန်သာ ဖြစ်သည်။
ယင်ယန်တာအိုမဟာမိတ်အဖွဲ့ ဂိုဏ်းချုပ်၏ အသံသည်... ရှိနေကြသော အခြားသူရဲကောင်းများကို သတိပေးလိုက်သကဲ့သို့ ဖြစ်သွားပြီး... လူတိုင်းသည် ကြောက်ရွံ့အံ့ဩသွားကြ၏။ ထို့နောက် မည်သည့်အရာကိုမျှ ချန်လှပ်ထားခြင်းမရှိဘဲ... သူတို့၏ အစွမ်းအထက်ဆုံး နည်းလမ်းများကို ထုတ်ဖော်လိုက်ကြတော့သည်။
" ကောင်းကင်ဘုံဂိုဏ်းရဲ့ ဖိနှိပ်ရေးမှော်လက်နက်ကို ပင့်ဆောင်ပါ! "
ဂိုဏ်းကြီးတစ်ခုမှ ဂိုဏ်းချုပ်သည် အော်ဟစ်လိုက်ပြီး... အသက်သွေးအချို့ကို ပူဇော်ကာ လျှို့ဝှက်ဆန်းကြယ်သော လေဟာနယ်လမ်းကြောင်းတစ်ခုကို ဖွင့်လှစ်၍... တစ်စုံတစ်ခုကို ဆင့်ခေါ်လိုက်သည်။
နန်းတော်အတွင်းရှိ အခြားသော ဂိုဏ်းအသီးသီးမှ ဂိုဏ်းချုပ်များသည်လည်း အားနည်းဟန်မပြကြချေ။ ဤသည်မှာ သေရေးရှင်ရေး အခိုက်အတန့်ဖြစ်ကြောင်းနှင့် ယခုအချိန်တွင် လက်တွန့်နေခြင်းသည် သေလမ်းရှာခြင်းသာဖြစ်ကြောင်း သိထားကြသဖြင့်... သူတို့၏ အစွမ်းအထက်ဆုံး နည်းလမ်းများကို ထုတ်ဖော်လိုက်ကြသည်။
သူတို့သည် မိမိတို့၏ သက်ဆိုင်ရာ ဂိုဏ်းနှင့် အဖွဲ့အစည်းများ၏ အခြေခံအုတ်မြစ်များကို ဆင့်ခေါ်ကာ... ကောင်းကင်ဘုံကိုးခု အထက်မှ ဆင်းသက်လာသော ကမ္ဘာပျက်စီးစေမည့် ကောင်းကင်အလင်းတန်းကို ခုခံရန် ကြိုးပမ်းကြတော့သည်။
" အုန်း..... "
ထိုအချိန်၌ စုစုပေါင်း ဧကရာဇ်တပိုင်းအဆင့် လက်နက်ခြောက်ခုသည် ကောင်းကင်ယံသို့ ပျံတက်သွားပြီး... ဟွမ်သွမ့်ချီ အမျှင်တန်းပေါင်း ဘီလီယံချီ ထုတ်လွှတ်ကာ မိုင်သောင်းချီသော လေဟာနယ်ကို တုန်ခါစေလျက်... အောက်ဘက်ရှိ နယ်မြေတစ်ခုလုံးကို ကာကွယ်ပေးထားသည့် မမြင်နိုင်သော အတားအဆီးတစ်ခုကို ဖွဲ့စည်းလိုက်သည်။
ဧကရာဇ်ချီအငွေ့အသက်များ ပါဝင်နေသော ဧကရာဇ်တပိုင်းအဆင့် လက်နက်ခြောက်ခု လေထဲတွင် ဝဲပျံနေသည်ကို ကြည့်ရင်း... ယင်ယန်တာအိုမဟာမိတ်အဖွဲ့မှ အားကောင်းသူများသည် စိတ်သက်သာရာရသွားသည်ဟု ခံစားလိုက်ရသည်။
ဘာပဲဖြစ်ဖြစ် ဒါတွေက ဧကရာဇ်တပိုင်းအဆင့် လက်နက်ခြောက်ခုလေ.....
လက်နက်ခြောက်ခု၏ ပေါင်းစည်းထားသော စွမ်းအားနှင့်... နှစ်ပေါင်းထောင်ချီ၊ သောင်းချီ စုဆောင်းထားသော သူတို့၏ သက်ဆိုင်ရာ ဂိုဏ်းနှင့် အဖွဲ့အစည်းများ၏ အခြေခံအုတ်မြစ်များ ပေါင်းစပ်လိုက်ပါက... သူတို့သည် စစ်မှန်သော ဧကရာဇ်လက်နက်တစ်ခုနှင့် ယှဉ်နိုင်သော စွမ်းအားကိုပင် ထုတ်ဖော်နိုင်ပေလိမ့်မည်။
သေချာပေါက်ပင် ဤသည်မှာ... ကောင်းကင်မှ ဆင်းသက်လာသော ကြောက်မက်ဖွယ် ဓားအလင်းတန်းကို တားဆီးရန် လုံလောက်ပေလိမ့်မည်... မဟုတ်ပါလော။
ယင်ယန်တာအိုမဟာမိတ်အဖွဲ့မှ အားကောင်းသူများသာမက... ချန်ခွန်းရှေးဟောင်းကြယ်ပေါ်ရှိ အခြားသော ဖြစ်တည်မှုများသည်လည်း... ယင်ယန်တာအိုမဟာမိတ်အဖွဲ့မှ ဧကရာဇ်တပိုင်းအဆင့် လက်နက်များကို အသုံးပြုကာ ခုခံနေသည်ကို မြင်လိုက်ရသဖြင့်... စိတ်သက်သာရာရသွားကြသည်။ တချိန်တည်းမှာပင် သူတို့သည် တိတ်တဆိတ် တွေးတောနေမိကြ၏။
မည်သူ့လက်ချက်မို့လို့ ဤမျှ ရက်စက်ကာ ချန်ခွန်းရှေးဟောင်းကြယ်ကို သေလမ်းသို့ ပို့ဆောင်လိုရသနည်း။
ကံကောင်းထောက်မစွာပင် ချန်ခွန်းရှေးဟောင်းကြယ်ကို ကာကွယ်ပေးနေသော ယင်ယန်တာအိုမဟာမိတ်အဖွဲ့ ရှိနေခဲ့သည်။ သို့မဟုတ်ပါက သက်ရှိအားလုံး အန္တရာယ်ကြုံတွေ့ရပေလိမ့်မည်။
ချန်ခွန်းရှေးဟောင်းကြယ်ပေါ်ရှိ သက်ရှိအားလုံးသည် အားတက်သွားကြသည်။
သို့သော် ဤအားတက်မှုသည် လုံးဝ ပျက်စီးမသွားမီ အချိန်အကြာကြီး မခံလိုက်ချေ။
ဧကရာဇ်တပိုင်းအဆင့် လက်နက်ခြောက်ခုသည် ကောင်းကင်ယံတွင် နေရာယူကာ ကောင်းကင်အပြည့် ဖုံးလွှမ်းနေသော ဓားအလင်းတန်းကို ပူးပေါင်းခုခံနေကြသည်။
သို့သော် ပထမဆုံး ဓားအလင်းတန်း ကျရောက်လာသောအခါ... ထိုဓားအလင်းတန်းများသည် ချန်ခွန်းရှေးဟောင်းကြယ်ပေါ်ရှိ မည်သည့်အင်အားစုကမျှ ယှဉ်ပြိုင်နိုင်သော စွမ်းအားမဟုတ်ကြောင်း... လူတိုင်း သဘောပေါက်သွားကြသည်။
အကြောင်းမှာ ထိုဓားအလင်းတန်း ကျရောက်လာချိန်တွင်... ဧကရာဇ်တပိုင်းအဆင့် လက်နက်ခြောက်ခုမှာ ခုခံရန် အချိန်ပင် မရလိုက်ဘဲ ဖြတ်တောက်ခံလိုက်ရကာ... ဖုန်မှုန့်များအဖြစ် ပြောင်းလဲပြီး ကောင်းကင်ယံ၌ ပျောက်ကွယ်သွားခဲ့ရသည်။
ဤအရာတွေသည် အမှန်ပင် ဧကရာဇ်တပိုင်းအဆင့် လက်နက်ခြောက်ခုဖြစ်၏။
၎င်းတို့သည် ထိုဓားအလင်းတန်းကြောင့် တစ်ခုပြီးတစ်ခု ချက်ချင်း ချေမှုန်းခံလိုက်ရပြီး... အပိုင်းအစတစ်ခုမျှပင် မကျန်ရစ်ခဲ့ပေ။
ယင်ယန်တာအိုနန်းတော်အတွင်းတွင် သေလောက်အောင် တိတ်ဆိတ်နေ၏။
လူတိုင်း၏ မျက်နှာပေါ်တွင် မျှော်လင့်ချက်မဲ့မှုများ ထွင်းထုထားသကဲ့သို့ ဖြစ်နေသည်။
ဒါတွေက ဧကရာဇ်တပိုင်းအဆင့် လက်နက်ခြောက်ခုလေ... အပိုင်းအစတစ်ခုမျှ မကျန်ရစ်ဘဲ ချက်ချင်းဆိုသလို အားလုံး ချေမှုန်းခံလိုက်ရတာလား...!?
ဤကဲ့သို့ ကြောက်မက်ဖွယ်ကောင်းသော စွမ်းအားသည် သူတို့ ခုခံနိုင်စွမ်းထက် ကျော်လွန်နေခဲ့သည်။
" ဘယ်သူလဲကွ?! "
အဆုံးမဲ့သော စိတ်ပျက်အားငယ်မှုအောက်တွင်... အားကောင်းသူတစ်ဦးသည် သူ၏စိတ်ထဲမှ ကြောက်ရွံ့မှုနှင့် ဒေါသများကို ဖွင့်ထုတ်နေသကဲ့သို့... နာကျည်းစွာ အော်ဟစ်လိုက်သည်။
ယင်ယန်တာအိုမဟာမိတ်အဖွဲ့ကို ဖျက်ဆီးရုံသာမက... ချန်ခွန်းရှေးဟောင်းကြယ်တစ်ခုလုံးကိုပါ သုတ်သင်ရှင်းလင်းရန်... မည်သူက ပြုလုပ်နေသည်ကို သူနားမလည်နိုင်ပေ။
နတ်ဆိုးနယ်မြေစစ်တပ်များ ဖြစ်နိုင်သလား။ သို့သော် နတ်ဆိုးနယ်မြေစစ်တပ်သည်... အဆုံးမဲ့ကမ္ဘာ၏ ရှင်သန်ခြင်းတားမြစ်နယ်မြေရှိ ရှေးဟောင်းအရှင်များ၏ တွန်းလှန်မှုကို ခံလိုက်ရပြီး... ကစဉ့်ကလျား ထွက်ပြေးသွားကြပြီဟု ပြောကြသည် မဟုတ်ပါလော။
ကံမကောင်းစွာဖြင့်... ယင်ယန်တာအိုမဟာမိတ်အဖွဲ့မှ အားကောင်းသူများ ဒေါသထွက်ပြီး မလိုလားနေလျှင်တောင်မှ.....
ထိုအော်ဟစ်သံများသည် မည်သည့်တုံ့ပြန်မှုကိုမျှ မရရှိခဲ့ပေ။
သူ့ကို တုံ့ပြန်လိုက်သည်မှာ ကောင်းကင်မှ ဆင်းသက်လာသော တောက်ပအေးစက်သည့် ဓားအလင်းတန်းသာ ဖြစ်သည်။
ကုချန်အတွက်မူ ယင်ယန်တာအိုမဟာမိတ်အဖွဲ့ မဆိုထားနှင့်... ဤချန်ခွန်းရှေးဟောင်းကြယ်တစ်ခုလုံးသည်ပင်... သူ့မျက်လုံးထဲ၌ ပုရွက်ဆိတ်တစ်ကောင်မျှသာ ဖြစ်သည်။
ပုရွက်ဆိတ်တစ်ကောင်က ကောင်းကင်ဘုံကို မည်သို့ အော်ဟစ်ရဲမည်နည်း။
ကောင်းကင်ဘုံသို့ အော်ဟစ်လိုက်လျှင်ပင်... ကောင်းကင်ဘုံထံမှ မည်သည့်တုံ့ပြန်မှုကိုမျှ ရရှိမည် မဟုတ်ပေ။
အကြောင်းမှာ ထိုနှစ်ခုသည် တူညီမှုရှိသည့် ဖြစ်တည်မှုများ လုံးဝ မဟုတ်သောကြောင့်ပင်။
" ရွှမ်း..... "
မျှော်လင့်ချက်မဲ့နေသော သို့မဟုတ် မလိုလားသော အကြည့်ပေါင်းများစွာ၏ အလယ်တွင်... အဆုံးမဲ့ဓားအလင်းတန်းသည် ချန်ခွန်းရှေးဟောင်းကြယ်တစ်ခုလုံးကို လွှမ်းခြုံလျက်... တိတ်ဆိတ်စွာ ဆင်းသက်လာ၏။
မည်သည့်ခြွင်းချက်... မည်သည့်အတားအဆီးမျှ မရှိချေ။
ဓားအလင်းတန်း ဖြတ်သန်းသွားရာ နေရာတိုင်းတွင်... တောင်များနှင့် မြစ်များအားလုံး ဖုန်မှုန့်အဖြစ် ပြောင်းလဲသွားပြီး... သက်ရှိများနှင့် အားကောင်းသူအားလုံးသည် ချွင်းချက်မရှိ... အရိုးစများနှင့် သွေးမြူများအဖြစ် ပြောင်းလဲသွားကြသည်။
ဓားအလင်းတန်းသည် ကိုးနဝင်းနယ်မြေများကို ဖြတ်ကျော်ကာ... မြင်ကွင်းအတွင်းရှိ အရာအားလုံးကို ဝါးမြိုလျက် ဖြတ်သန်းသွားသည်။
တခဏအတွင်းမှာပင်... ချန်ခွန်းရှေးဟောင်းကြယ်တစ်ခုလုံးသည် အေးစက်သော စကြဝဠာအတွင်း တောက်ပသော မီးပွားတစ်ခုအဖြစ် ပြောင်းလဲသွားပြီး... မီးရှူးမီးပန်းများကဲ့သို့ ပွင့်လန်းလာကာ ဝမ်းနည်းဖွယ်ကောင်းလောက်အောင် လှပနေတော့သည်။
ထိုမြင်ကွင်းသည် ကုချန်၏ တမင် ပြသထားမှုအောက်တွင်... ဖူဝမ်၏ မျက်လုံးများရှေ့၌ ရှင်းလင်းစွာ ပေါ်လာခဲ့သည်။
သူ တစ်ချိန်က နေထိုင်ခဲ့ဖူးသော ရှေးဟောင်းကြယ်ကြီးသည် သူ့ရှေ့မှောက် စကြဝဠာထဲတွင်... မီးရှူးမီးပန်းများအဖြစ် ပြောင်းလဲသွားသည်ကို ကြည့်ရင်း... ဖူဝမ်၏ နှလုံးသားထဲတွင် တွယ်တာမှု မရှိခဲ့ပေ။ ထိုအစား ထူးဆန်းသော ကျေနပ်မှုတစ်ခုဖြင့်သာ ပြည့်နှက်နေခဲ့သည်။
အကြောင်းမှာ ထိုရှေးဟောင်းကြယ်ပေါ်တွင် သူသိကျွမ်းသောသူဟူ၍ တစ်ဦးတစ်ယောက်မျှ မကျန်တော့သောကြောင့်ပင်။
ယခုအခါ ချန်ခွန်းရှေးဟောင်းကြယ် ပျက်သုဉ်းသွားပြီး... ထိုကြယ်ပေါ်ရှိ သူ၏ ရန်သူများအားလုံးလည်း ပျက်စီးသွားပြီဖြစ်ရာ... ဖူဝမ်သည် မည်သို့ ကျေနပ်မှုမရှိဘဲ နေနိုင်မည်နည်း။
" အဖေ၊ အမေ၊ မိသားစုခေါင်းဆောင်၊ အကြီးအကဲအားလုံးနဲ့ ညီအစ်ကိုမောင်နှမတို့... ငါ့တို့ဖူမိသားစုရဲ့ ကြီးမားတဲ့ ကလဲ့စားကို ချေပြီးပြီမို့ ငြိမ်းချမ်းစွာ အနားယူကြပါတော့..... "
ဖူဝမ်သည် တိုးညှင်းစွာ ရေရွတ်လိုက်ပြီး... မျက်ရည်များသည် သူ၏ မျက်နှာပေါ်မှတဆင့်... ပါးပြင်နုနုလေးများပေါ်သို့ တိတ်ဆိတ်စွာ စီးကျလာတော့သည်။
အခန်း (၁၅၆) - ကမ္ဘာကြီး ထပ်မံပြောင်းလဲခြင်း၊ စွန့်စားမှုပြုကာ တွင်းနက်ထဲသို့ အတင်းဝင်ရောက်ခြင်း
ဖူဝမ်၏ မျက်ရည်စိုရွှဲနေသော မျက်နှာလေးကို ကြည့်ရင်း ကုချင်းရွဲ့သည် ဘာမျှမပြောဘဲ သူ့အား တိတ်ဆိတ်စွာ ပွေ့ဖက်ထားလိုက်သည်။
ဤမိန်းမပျိုလေးသည် ဝန်ထုပ်ဝန်ပိုးများစွာကို ထမ်းပိုးထားရကြောင်း သူ သိထားသည်။
အကယ်၍ ဘိုးဘေးသာ ဝင်မပါခဲ့လျှင်... သူကိုယ်တိုင် လက်စားချေနိုင်ရန် မကူညီပေးခဲ့လျှင်... ဖူဝမ်၏ အနာဂတ်ဘဝတစ်ခုလုံးသည် ဤအမုန်းတရား၏ နာကျင်မှုများထဲတွင် နှစ်မြုပ်နေပြီး... လွတ်မြောက်လမ်း ရှာတွေ့နိုင်မည် မဟုတ်ပေ။
သို့သော် ယခုအခါ ဖူမိသားစုကို သုတ်သင်ခဲ့သော တရားခံများအားလုံးကို ရှင်းလင်းပြီးဖြစ်၏။
ဖူဝမ်သည် သူ၏ နာကျည်းချက်များကို စွန့်လွှတ်နိုင်ပြီဖြစ်ပြီး... ကျင့်ကြံခြင်းအပေါ်တွင်သာ အာရုံစိုက်နိုင်တော့မည် ဖြစ်သည်။
တစ်နည်းအားဖြင့် ဆိုရလျှင် ဤအရာသည် ဖူဝမ်အတွက် ကောင်းသောအရာလည်း ဖြစ်၏။
အမုန်းတရားသည် လူတစ်ယောက်ကို ပိုမိုသန်မာလာစေရန် တွန်းအားပေးနိုင်သော်လည်း... အမုန်းတရား၏ နာကျင်မှုထဲတွင် အချိန်ကြာမြင့်စွာ နှစ်မြုပ်နေပါက... ကျင့်ကြံခြင်းလမ်းစဉ်၌ စွဲလမ်းစိတ်လွန်ကဲခြင်း သို့မဟုတ် အစွန်းရောက်ခြင်းများ ဖြစ်လာနိုင်ပြီး... ထိုအရာက ဆန့်ကျင်ဘက်ရလဒ်များကိုသာ ဖြစ်ပေါ်စေလေ့ရှိသည်။
" ကောင်းပြီ... ဆရာက မင်းကို အရင်ဆုံး တစ်ရက်လောက် အနားပေးမယ်... တစ်ရက်ပြီးရင်တော့ ဆရာနဲ့အတူ စကျင့်ကြံရမယ် "
ကုချန်က ညင်သာစွာ ပြောလိုက်သည်။
သူသည် ဖူဝမ်၏ ကျင့်ကြံခြင်းလမ်းစဉ်အတွက် စီစဉ်ပြီးဖြစ်သည်။
သူ၏ အကြီးဆုံးတပည့်ဖြစ်သော ယဲ့ယင်းယင်း နှင့်မတူဘဲ ကုချန်သည် ဖူဝမ်အတွက် နေလဧကရာဇ်ကျမ်းစာကို ကျင့်ကြံစေရန် စီစဉ်ထားခြင်း ဖြစ်သည်။
အကြောင်းမှာ ဖူဝမ်သည် လူသားဧကရာဇ်သွေးမျိုးဆက်ကို ပိုင်ဆိုင်ထားသူဖြစ်ရာ... နေလဧကရာဇ်ကျမ်းစာကို ကျင့်ကြံခြင်းသည် သဘာဝကျစွာပင် အားစိုက်ထုတ်မှု ထက်ဝက်ဖြင့်... ရလဒ်နှစ်ဆ ရရှိစေမည် ဖြစ်သောကြောင့်ပင်။
သူ့အနေဖြင့် နေလဧကရာဇ်ကျမ်းစာကို အထွတ်အထိပ်အဆင့်အထိ ကျင့်ကြံပြီးမှသာ... သူ၏ ကိုယ်ပိုင်လမ်းစဉ်ကို ဖောက်လုပ်ရန် ကြိုးစားခြင်းသည်လည်း နောက်ကျမည် မဟုတ်ပေ။
ထိုအချိန်မရောက်မီ လူသားဧကရာဇ် လျှောက်လှမ်းခဲ့ဖူးသော တာအိုလမ်းစဉ်ကို အတုယူခြင်းသည် ဖူဝမ်အတွက် အကောင်းဆုံး ရွေးချယ်မှုပင် ဖြစ်သည်။
" ကျေးဇူးတင်ပါတယ် ဆရာ..... "
ဖူဝမ်သည် သူ၏ မျက်နှာလေးပေါ်မှ မျက်ရည်များကို သုတ်လိုက်ပြီး... ကုချန်အား ကျေးဇူးတင်စွာဖြင့် ဦးညွှတ်လိုက်သည်။-
ယခုအချိန်တွင် သူ၏ စိတ်ခံစားချက်များမှာ ဂယောက်ဂယက်ဖြစ်နေပြီး... ကျင့်ကြံရန် အမှန်တကယ် မသင့်တော်သေးပေ။ ကျင့်ကြံခြင်း မစတင်မီ တစ်ရက်ခန့် အချိန်ယူကာ စိတ်ငြိမ်အောင်ထားခြင်းသည် သေချာပေါက် အကောင်းဆုံး ရွေးချယ်မှုဖြစ်သည်။
ဤကိစ္စအဝဝကို ဖြေရှင်းပြီးနောက်... ကုချန် သည် အထက်ကောင်းကင်ခန်းမဆောင်ကြီးသို့ ပြန်လာခဲ့ပြီး... သူ ယခုလေးတင် ရရှိထားသော နေလဧကရာဇ်ကျမ်းစာနှင့် လော်ထျန်းသတ်ဖြတ်ခြင်းကျမ်းတို့ကို ဆက်လက်လေ့လာရန် ပြင်ဆင်လိုက်သည်။
သို့သော် သူသည် ခေါင်းတလားအဖုံးပေါ်တွင် ခြေချိတ်ထိုင်ကာ ကျင့်ကြံရန် ပြင်ဆင်လိုက်စဉ်မှာပင် သူ၏နှလုံးသား ရုတ်တရက် လှုပ်ရှားသွားခဲ့သည်။
အကြောင်းမှာ... ဤအဆုံးမဲ့ကမ္ဘာ၏ အဆုံးမဲ့တာအိုများသည် မသိမသာ ထပ်မံပြောင်းလဲသွားသကဲ့သို့... သူ ရုတ်တရက် ခံစားလိုက်ရသောကြောင့်ပင်။ အဆုံးမဲ့တာအိုနိယာမများသည် ပိုမိုရှင်းလင်းလာပြီး... ကောင်းကင်နှင့်မြေကြီး ဝိညာဉ်ချီများသည်ပင် အဆများစွာ ပိုမိုသိပ်သည်းလာသကဲ့သို့ ဖြစ်နေ၏။
အလယ်ပိုင်းပြည်နယ်တာအိုနယ်မြေ အထက်မှာပေါ်လာတဲ့ ကောင်းကင်တွင်းနက်အက်ကွဲကြောင်းကြောင့်များလား.....
ကုချန် သည် အလယ်ပိုင်းပြည်နယ်တာအိုနယ်မြေ အထက်ရှိရာ အရပ်မျက်နှာသို့ လှမ်းကြည့်လိုက်ရာ သူ၏မျက်နှာတွင် တွေးတောနေသော အမူအရာတစ်ခု ပေါ်လာ၏။
အဆုံးမဲ့ကမ္ဘာ၏ ပြောင်းလဲမှုများသည် ထိုကောင်းကင်တွင်းနက်အက်ကွဲကြောင်း ပေါ်လာပြီးနောက်ပိုင်းတွင်မှ အတိအကျ စတင်လာခြင်းဖြစ်သည်။
ကောင်းကင်တွင်းနက်အက်ကွဲကြောင်းမှ စိမ့်ထွက်လာသော အင်မော်တယ်နယ်မြေချီအငွေ့အသက်များကြောင့် အဆုံးမဲ့ကမ္ဘာတွင် ထိုကဲ့သို့သော ပြောင်းလဲမှုများ ဖြစ်ပေါ်လာရခြင်းလော။
ကိစ္စရပ်များမှာ ထင်သလောက် မရိုးရှင်းဟု ခံစားရသဖြင့် ကုချန်၏ မျက်ခုံးများမှာ အနည်းငယ် တွန့်ချိုးသွားသည်။
စစ်မှန်သော ဧကရာဇ်အဆင့် ဖြစ်တည်မှုတစ်ခုအနေဖြင့် သူ၏ အာရုံခံနိုင်စွမ်းသည် သာမန် တုယောင်ဧကရာဇ်များထက် များစွာ ပိုမိုထက်မြက်သည်။
ထိုတားမြစ်နယ်မြေများထဲရှိ ရှေးဟောင်းအရှင်များအနေဖြင့် ခွဲခြားသိမြင်နိုင်မည် မဟုတ်သော်လည်း... ဤအဆုံးမဲ့ကမ္ဘာအတွင်းရှိ ပြောင်းလဲမှုများသည် သဘာဝအတိုင်း ဖြစ်ပေါ်လာခြင်းမဟုတ်ဘဲ... တမင်တကာ ကြိုးကိုင်ဖန်တီးထားသည့် ရလဒ်တစ်ခုနှင့် တူနေကြောင်း သူ ဝိုးတဝါး အာရုံခံမိနေသည်။
၎င်းသည် အချိန်တန်ချိန်၌ သဘာဝအတိုင်း ရင့်မှည့်ပြီး ကြွေကျလာသည့် သစ်သီးတစ်လုံးနှင့် တူနေသည်။
သို့သော် ဤအဆုံးမဲ့ကမ္ဘာသည် သဘာဝအတိုင်း ရင့်မှည့်ပြီး ကြွေကျရန် အချိန်မတန်သေးသည်မှာ ထင်ရှားသော်လည်း... တစ်စုံတစ်ဦးက 'အတင်းအဓမ္မ ရင့်မှည့်အောင်' လုပ်ထားသကဲ့သို့ ဖြစ်နေသည်မှာ အလွန်ထူးဆန်းနေသည်။
ငါဘဲ အထင်မှားနေတာလား... ဒါမှမဟုတ် ဒီ အင်မော်တယ်တက်လှမ်းခြင်းဆိုတာက တကယ်ပဲ ပြဿနာရှိနေတာလား.....
ကုချန်၏စိတ်ထဲတွင် လူသားဧကရာဇ် သူ့အား ချန်ထားခဲ့ဖူးသော သတိပေးစကားများကို ပြန်လည်အမှတ်ရလာ၏။
အင်မော်တယ်တက်လှမ်းခြင်းဆိုတာ လှည့်စားမှုတစ်ခုပဲ!
လွန်ခဲ့သော နှစ်ကိုးသောင်းက အင်မော်တယ်လမ်းကြောင်း ပွင့်လာပြီဟု သူ မှားယွင်းစွာ ယုံကြည်ခဲ့ပြီး... အင်မော်တယ်လမ်းကြောင်းထဲသို့ တိုးဝင်ခဲ့ဖူးသည်။ သို့သော် လမ်းဆုံးသို့ ရောက်သောအခါ ထိုနေရာသည် အမှန်တကယ်တွင် နတ်ဆိုးနယ်မြေ၏ နယ်စပ်သာဖြစ်ပြီး... အင်မော်တယ်နယ်မြေ လုံးဝမဟုတ်ကြောင်း သူ တွေ့ရှိခဲ့ရသည်။
ယခု နှစ်ကိုးသောင်း ကြာပြီးနောက် အင်မော်တယ်နယ်မြေသို့ ဦးတည်သည်ဟု သံသယရှိရသော နောက်ထပ်လမ်းကြောင်းတစ်ခု ပေါ်လာပြန်သည်။
ဒီလမ်းရဲ့အဆုံးက ဘယ်ကို ဦးတည်နေတာလဲ... ဒဏ္ဍာရီလာ အင်မော်တယ်နယ်မြေများ ဖြစ်နေမလား.....
ကုချန်သည် စိတ်ထဲ၌ တွေးတောနေမိသည်။
အကယ်၍ လွန်ခဲ့သော နှစ်ကိုးသောင်းကသာဆိုလျှင် သူသည် စုံစမ်းစစ်ဆေးရန်အတွက် ကောင်းကင်တွင်းနက်အက်ကွဲကြောင်းထဲသို့ ဝင်ရောက်ရန် သေချာပေါက် တုံ့ဆိုင်းနေမည် မဟုတ်ပေ။
သို့သော် ယခုအခါ ကုချန်၌ အင်မော်တယ်တက်လှမ်းခြင်း ဟုခေါ်သော အရာနှင့်ပတ်သက်ပြီး မည်သည့်စွဲလမ်းမှုမျှ မရှိတော့ချေ။
အင်မော်တယ်နယ်မြေသို့ မသွားလျှင်တောင်မှ သူ၏ စွမ်းအားနှင့် အဆင့်အတန်းဖြင့်... ဤအဆုံးမဲ့ကမ္ဘာတွင် အချိန်အကြာကြီး ရှင်သန်နေထိုင်နိုင်စွမ်း ရှိနေပြီးဖြစ်သည်။
ထို့ကြောင့် အင်မော်တယ်တက်လှမ်းခြင်း ဆိုသည့်အရာကို မျက်စိမှိတ် လိုက်ရှာနေရန် မလိုအပ်ချေ။
" အများကြီး တွေးနေလဲ အပိုပဲ... ကြာရင် ရှင်းသွားမှာပါပဲ "
ကုချန်သည် ရယ်မောလိုက်ပြီး ခေါင်းခါယမ်းကာ ထိုကိစ္စကို ခေတ္တဘေးဖယ်ထားလိုက်သည်။
အင်မော်တယ်တက်လှမ်းခြင်းအပေါ် သူ ဂရုမစိုက်သော်လည်း အခြားသူများစွာက ဂရုစိုက်ကြောင်း သူသိ၏။
မည်သည့်အရာကိုမျှ စုံစမ်းစစ်ဆေးရန် သူ အားထုတ်နေစရာမလိုပေ။ နောက်ဆုံးတွင် ထိုတားမြစ်နယ်မြေများထဲရှိ ရှေးဟောင်းအရှင်များသည် သူသိလိုသော အဖြေများကို သဘာဝကျစွာပင် ယူဆောင်လာပေးကြလိမ့်မည်။
ကုချန် ဤသို့ တွေးနေစဉ်မှာပင် ကောင်းကင်နှင့်မြေကြီးကြားမှ ကြီးမားကျယ်ပြန့်သော စွမ်းအားတစ်ခု မြင့်တက်လာသည်ကို သူ ခံစားလိုက်ရသည်။
ထိုကြီးမားသော စွမ်းအားသည် အထက်ကောင်းကင်တားမြစ်နယ်မြေ၏ ပြင်ပ... မူလရှေးဟောင်းတွင်းနက်ရှိရာ အရပ်မျက်နှာဆီမှ လာပုံရ၏။
" သည်းမခံနိုင်တော့ဘူးလား "
ကုချန် သည် အံ့အားသင့်သွား၏။ ဤတားမြစ်နယ်မြေအရှင်များသည် ဤမျှ စိတ်မရှည်ဖြစ်လိမ့်မည်ဟု သူ မမျှော်လင့်ထားခဲ့ပေ။
သူ၏ အာရုံခံနိုင်စွမ်းထဲတွင် မူလရှေးဟောင်းတွင်းနက် အတွင်းမှ အရှင်သခင်တစ်ပါးသည် အပြည့်အဝ ပြန်လည်နိုးထလာပြီး... သူ၏အခြေအနေကို အထွတ်အထိပ်သို့ ပြန်လည်ရောက်ရှိစေကာ... အလယ်ပိုင်းပြည်နယ်တာအိုနယ်မြေရှိ ကောင်းကင်တွင်းနက်အက်ကွဲကြောင်းဆီသို့ ဦးတည်ပြေးဝင်သွားလေပြီ။
တားမြစ်နယ်မြေအရှင်တစ်ပါးသည် ငြိမ်ငြိမ်မနေနိုင်တော့ဘဲ... အင်မော်တယ်လမ်းကြောင်းပေါ်သို့ အတင်းအဓမ္မ ဝင်ရောက်ရန် ကြိုးပမ်းနေခြင်းပင်...!
...
မူလရှေးဟောင်းတွင်းနက် အတွင်းမှ လှုပ်ရှားမှုသည် အခြားသော အဓိက ရှင်သန်ခြင်းတားမြစ်နယ်မြေများ၏ သတိပြုမိမှုမှ သေချာပေါက် မလွတ်ကင်းနိုင်ပေ။
အေးစက်ကာ ဂရုမစိုက်သော အကြည့်များသည် တစ်ခုပြီးတစ်ခု တောက်ပလာပြီး... မူလရှေးဟောင်းတွင်းနက် ရှိရာဘက်သို့ စောင့်ကြည့်နေကြသည်။ သူတို့၏ မျက်လုံးများထဲတွင် ရှုပ်ထွေးမှုနှင့် နားမလည်နိုင်မှု အရိပ်အယောင်များ ရောနှောနေပုံရသည်။
" ခွန်ဧကရာဇ်လား... သူ ဘာလုပ်နေတာလဲ... အခုချိန်ကြီး အင်မော်တယ်လမ်းကြောင်းပေါ် အတင်းတက်နေတာလား... သူ ရူးသွားပြီလား "
" အင်မော်တယ်လမ်းကြောင်း ပေါ်လာပြီ ဆိုပေမဲ့ တကယ်တမ်း ပွင့်သေးတာမှ မဟုတ်တာ... အချိန်အခါကောင်း မဟုတ်သေးဘူး... အင်မော်တယ်လမ်းကြောင်းထဲ ဝင်ရောက်တာက အန္တရာယ် အဆပေါင်းများစွာ ပိုများလိမ့်မယ်... ခွန်ဧကရာဇ် တကယ်ပဲ ရူးသွားပြီ "
အရှင်သခင်တစ်ပါးမှ တိုးညှင်းစွာ ရေရွတ်လိုက်သည်။
ကောင်းကင်တွင်းနက်အက်ကွဲကြောင်း ပေါ်လာပြီးဖြစ်သော်လည်း တားမြစ်နယ်မြေအရှင်များသည် အဘယ်ကြောင့် ဤမျှကြာအောင် မလှုပ်ရှားကြသနည်း။
အကြောင်းမှာ သူတို့၏ တွက်ချက်မှုများအရ ယခုအချိန်သည် ကောင်းကင်တွင်းနက်ထဲသို့ ဝင်ရောက်ရန် အကောင်းဆုံးအချိန် မဟုတ်သေးသောကြောင့်ပင်။
ကောင်းကင်နှင့်မြေကြီး ပိုမို နိုးထလာပြီး... ကောင်းကင်တွင်းနက်အတွင်းရှိ အင်မော်တယ်တာအိုနိယာမများ ပိုမိုရှင်းလင်းလာမှသာ... ကောင်းကင်တွင်းနက်ထဲသို့ ဝင်ရောက်ကာ သူတို့၏ နောက်ဆုံးလောင်းကြေးကို ထပ်ရမည့်အချိန် ဖြစ်သည်။
သို့သော် ခွန်ဧကရာဇ်သည် သည်းမခံနိုင်တော့ဘဲ... ဤအချိန်၌ ကောင်းကင်တွင်းနက်ထဲသို့ ဝင်ရောက်လိုပုံရသည်မှာ... အခြားသော အရှင်များအတွက် အမှန်ပင် နားမလည်နိုင်စရာ ဖြစ်နေသည်။
သူတို့သည် နှစ်ပေါင်းသောင်းချီ စောင့်ဆိုင်းခဲ့ပြီးပြီဖြစ်ရာ ဤခေတ္တခဏ ကြာချိန်လေးက ဘာများ ကွာခြားသွားစေမည်နည်း။
အခြားသော တားမြစ်နယ်မြေများထဲမှ ရှေးဟောင်းအရှင်များအားလုံးသည် စိတ်ရှုပ်ထွေးနေကြသကဲ့သို့... ယခုအချိန်တွင် ခွန်ဧကရာဇ်၏ နှလုံးသားသည်လည်း နှိုင်းယှဉ်၍မရသော စိတ်ပျက်အားငယ်မှုများဖြင့် ပြည့်နှက်နေ၏။
ဖြစ်နိုင်လျှင် သူသည်လည်း အင်မော်တယ်လမ်းကြောင်းထဲသို့ မဝင်ရောက်မီ... အသင့်တော်ဆုံး အခွင့်အရေး ရောက်သည်အထိ စောင့်ဆိုင်းလိုပါသည်။
သို့သော် ပြဿနာမှာ သူ ဆက်ပြီး မစောင့်နိုင်တော့ခြင်းပင်!
" ကောင်းကင်ဘုံအရှင်သခင်! "
ခွန်ဧကရာဇ်သည် လက်တစ်ကမ်းအကွာတွင် ရှိသော ကောင်းကင်တွင်းနက်အက်ကွဲကြောင်းကို ကြည့်လိုက်၏။ သူ၏မျက်နှာထားမှာ အလွန်အမင်း တင်းမာခက်ထန်နေသည်။
အကယ်၍ မူလရှေးဟောင်းတွင်းနက်အပေါ်... ကောင်းကင်ဘုံအရှင်သခင်၏ စောစောပိုင်းက အင်အားပြမှုနှင့် သူ၏ ကိုယ်ပိုင် ဧကရာဇ်လက်နက်ကို အတင်းအဓမ္မ ချေမှုန်းပစ်ခြင်းသာ မရှိခဲ့လျှင်... သူသည် ယခုအချိန်၌ ကောင်းကင်အက်ကွဲကြောင်းထဲသို့ အတင်းဝင်ရောက်ရန် ဤမျှ အသက်စွန့် စွန့်စားရပါမည်လော။
သူ၏ အသက်နှင့်ရင်းပြီး ကျင့်ကြံထားသော အစွန်းရောက်တာအိုဧကရာဇ်လက်နက် ပျက်စီးသွားခြင်းသည် ခွန်ဧကရာဇ်၏ စွမ်းအား ဆယ်ပုံတစ်ပုံကျော် လျော့ကျသွားစေ၏။
သူ၏ လက်ရှိအခြေအနေဖြင့်... အနာဂတ်တွင် ကောင်းကင်တွင်းနက်အက်ကွဲကြောင်း အပြည့်အဝ ပွင့်လာသောအခါ... အင်မော်တယ်တက်လှမ်းခြင်းကို ရရှိလိုခြင်းသည် လူမိုက်တစ်ယောက်၏ အိပ်မက်ထက် မပိုကြောင်း သူ ကောင်းစွာ သိထား၏။
အကြောင်းမှာ အင်မော်တယ်တက်လှမ်းခြင်းကို ရရှိရန်အတွက်... ကောင်းကင်တွင်းနက်ထဲရှိ စမ်းသပ်မှုများကို ရင်ဆိုင်ရမည်သာမက... အခြားသော တားမြစ်နယ်မြေအရှင်များ၏ ယှဉ်ပြိုင်မှုကိုလည်း ရင်ဆိုင်ရမည် ဖြစ်သောကြောင့်ပင်ဖြစ်၏။
အင်မော်တယ်တက်လှမ်းခြင်းအတွက် နေရာ အရေအတွက် အကန့်အသတ်ရှိပြီး... ဤသည်မှာ တားမြစ်နယ်မြေအရှင်များ၏ ပေါင်းစပ် တွက်ချက်မှု ရလဒ်ပင် ဖြစ်သည်။
အင်မော်တယ်လမ်းကြောင်းပေါ်တွင် အန္တရာယ်သည် ရှေ့ဘက်မှသာ လာသည် မဟုတ်ချေ!
ဤအချက်နှင့်ပတ်သက်၍ တားမြစ်နယ်မြေများအတွင်းရှိ ရှေးဟောင်းအရှင်များအားလုံးသည် ဖွင့်မပြောဘဲ နားလည်ထားကြပြီး ဖြစ်သည်။
ထို့ကြောင့် အင်မော်တယ်တက်လှမ်းခြင်းကို ရရှိရန်အတွက်... ခွန်ဧကရာဇ်သည် ဤအချိန်၌ ကောင်းကင်တွင်းနက်ထဲသို့ အတင်းအဓမ္မ ဝင်ရောက်ကာ... သေးငယ်လှသော အင်မော်တယ်တက်လှမ်းခြင်း အခွင့်အရေးကို ဆုပ်ကိုင်ရန် အသက်စွန့် စွန့်စားရုံသာ ရှိတော့သည်။