အခန်း (၁၅၉-၁၆၀)
Vol. 12 Ch. 159-160
အခန်း (၁၅၉) - ဧကရာဇ်၏ လောကကို ခွဲဝေရန် ကြံစည်မှုနှင့် လူသားမျိုးနွယ်အား လျစ်လျူရှုခြင်း
အရှေ့ပိုင်းတောကန္တာရတာအိုနယ်မြေ၏ အဆုံးမဲ့တောင်တန်းကြီးများ အတွင်းပိုင်းအနက်ရှိုင်းဆုံးနေရာတွင်.....
တောင်ထိပ်ပေါင်း တစ်သောင်းကို ငုံ့ကြည့်နေသည့်... စစ်မှန်သော ဖီးနစ်ငှက်တစ်ကောင် နားခိုနေသကဲ့သို့... တောင်တန်းကြီးတစ်ခုသည် အဆုံးမဲ့ကမ္ဘာများနှင့် တောင်တန်းများအပေါ်တွင် တည်ရှိနေသည်။
၎င်းသည် ရှေးဟောင်းတော်ဝင်မျိုးနွယ်စုကြီးများထဲမှ တစ်ခုဖြစ်သည့် 'ဖီးနစ်ငှက်နားခိုရာတောင်ကုန်း'၏ ဘိုးဘေးနယ်မြေပင် ဖြစ်သည်။
ဤမျိုးနွယ်စုတွင် ဧကရာဇ်အဆင့်ဖြစ်တည်မှုတစ်ပါး ပေါ်ထွက်ခဲ့ဖူးပြီး... သူတို့၏ သမိုင်းကြောင်းနှင့် အခြေခံအုတ်မြစ် ခိုင်မာနက်ရှိုင်းမှုသည်... သာမန်ဧကရာဇ်မျိုးနွယ်စုများ ယှဉ်နိုင်သည့် အနေအထားထက် များစွာသာလွန်နေသည်။
ယခုအခါ... ဖီးနစ်ငှက်နားခိုရာတောင်ကုန်းသည် တောက်ပသော အလင်းရောင်များဖြင့် ထွန်းလင်းနေပြီး... တာအိုများသည် လေဟာနယ်အတွင်း စိမ့်ဝင်ပျံ့နှံ့လျက် ရှိသည်။ ထိုတာအိုများသည် အချင်းချင်း ယှက်နွယ်ပေါင်းစည်းသွားပြီးနောက်... ဖီးနစ်ငှက်နားခိုရာတောင်ကုန်းအထက်တွင် ပျံသန်းနေသည့်... စစ်မှန်သော ဖီးနစ်ငှက်ပုံရိပ်ယောင်တစ်ခု ဖြစ်ပေါ်လာ၏။
ထိုအချိန်တွင် ဖီးနစ်ငှက်နားခိုရာတောင်ကုန်း၏ အတွင်းပိုင်းအနက်ရှိုင်းဆုံးနေရာ၌.....
လေဟာနယ်ထဲတွင် ရပ်တန့်နေပြီး... မင်္ဂလာရှိသော တိမ်တိုက်များ၊ တာအိုချီစွမ်းအင်များဖြင့် တန်ဆာဆင်ထားသော... ရှေးဟောင်းခန်းမဆောင်ကြီးတစ်ခု ရှိနေသည်။
ထိုခန်းမဆောင်၏ အလယ်ဗဟိုတွင် တရားထိုင်ဖျာအချို့ကို စီစဉ်ထားရှိထား၏။
ထိုဖျာများပေါ်တွင် ပုံရိပ်တစ်ခုစီ တိတ်ဆိတ်စွာ တရားမှတ်နေကြသည်။
ထိုပုံရိပ်များသည် ပုံသဏ္ဍာန် အမျိုးမျိုး ကွဲပြားကြ၏။ အချို့မှာ ဖီးနစ်မျက်လုံးနှင့် ဖီးနစ်အမွှေးအတောင်များ ပါရှိကြပြီး... အချို့၏ ကျောဘက်တွင် ဖြူဖွေးသန့်စင်သော အတောင်ပံတစ်စုံ ပါရှိကြသည်။ အခြားသူများမှာမူ လူသားမျိုးနွယ်ကဲ့သို့ ခန္ဓာကိုယ်ရှိသော်လည်း... ခေါင်းမှာ နဂါးခေါင်းနှင့် တူနေသည်။
သို့သော် သူတို့အားလုံးတွင် တူညီသောအချက်တစ်ခု ရှိသည်။ ဤနေရာ၌ တရားထိုင်နေသော ပုံရိပ်အားလုံး၏ ခန္ဓာကိုယ်အတွင်းမှ ယှဉ်ပြိုင်ဘက်ကင်းသော အားကောင်းသည့် ချီစွမ်းအင်လှိုင်းများ ထွက်ပေါ်နေခြင်းပင် ဖြစ်သည်။
တစ်ဦးတစ်ယောက်မျှ သူတော်စင်အဆင့်အောက် မလျော့နည်းကြပေ!
" ငါတို့ရဲ့ ဘိုးဘေးဆီက ညွှန်ကြားချက် ရရှိပြီးနောက်... ငါ့ရဲ့ နဂါးကိုးကောင်တောင်ထိပ် ပေါ်ထွက်လာခဲ့ပြီ... မင်းတို့ဘက်ကရော ဘယ်လိုလဲ "
နဂါးခေါင်းနှင့် နဂါးကိုးကောင်တောင်ထိပ်သခင်က ဘေးပတ်ဝန်းကျင်ကို ဝေ့ကြည့်ကာ အေးစက်စွာ ပြောလိုက်သည်။
" ကောင်းကင်ဝိညာဉ်ကျွန်းလဲ အတူတူပါပဲ "
" ချီလင်ချောက်နက်လဲ အတူတူပါပဲ "
ရောက်ရှိနေကြသော တော်ဝင်မျိုးနွယ်သခင်များအားလုံး ခေါင်းညိတ်ထောက်ခံလိုက်ကြသည်။
" ငါတို့ရဲ့ ဘိုးဘေးက ငါတို့အားလုံးကို ပေါ်ထွက်လာဖို့ အမိန့်ပေးခဲ့တယ်... အဲ့ဒါက အင်မော်တယ်တက်လှမ်းခြင်းနဲ့ ဆက်စပ်နေမလား "
နဂါးကိုးကောင်တောင်ထိပ်သခင်သည် အလယ်ပိုင်းဒေသတာအိုနယ်မြေဘက်သို့ လှမ်းမျှော်ကြည့်လိုက်ပြီး သူ၏မျက်လုံးများထဲတွင် တွေးတောဆင်ခြင်ဟန်များ ပေါ်နေ၏။
ရှေးဟောင်းတော်ဝင်မျိုးနွယ်စုဝင်တစ်ဦး ဖြစ်သည့်အားလျော်စွာ... သူ၏မျိုးနွယ်စု အပြည့်အဝ ပြန်လည်နိုးထလာချိန်တွင်... အဆုံးမဲ့ကောင်းကင်ကြီး၏ လက်ရှိအခြေအနေကို သူသိရှိပြီး ဖြစ်သည်။
ကောင်းကင်တွင်းနက်အက်ကွဲကြောင်း ပွင့်တော့မည်ဖြစ်သလို... တားမြစ်နယ်မြေမှ အရှင်များသည်လည်း အသင့်ပြင်ဆင်နေကြပြီး... ဤခေတ်တွင် အင်မော်တယ်အဆင့်သို့ တက်လှမ်းရန် ကြိုးပမ်းနေကြသည်။
" အင်မော်တယ်တက်လှမ်းခြင်းနဲ့ ဆက်စပ်နေရုံလောက်တော့ မဟုတ်လောက်ဘူး... ကောင်းကင်နဲ့ မြေကြီးက ပြောင်းလဲသွားပြီး... အဆုံးမဲ့တာအိုတွေ ပြန်လည်နိုးထလာနေပြီ... တကယ်ပဲ ရှေးဟောင်းခေတ်နှောင်းပိုင်းကထက် ပိုမိုအားကောင်းလာခဲ့ပြီး... ငါတို့ရှေးဟောင်းမျိုးနွယ်စုတွေ ကျင့်ကြံအားထုတ်ဖို့အတွက် ပိုပြီး အထောက်အကူ ဖြစ်လာခဲ့ပြီ "
ချီလင်ချောက်နက်မှ သခင်သည် မျက်လုံးများကို မှိတ်ကာ ခေတ္တမျှ အာရုံခံလိုက်ပြီးနောက် ဖြည်းညင်းစွာ ပြောလိုက်သည်။
ရှေးဟောင်းခေတ်ကာလတွင် အဆုံးမဲ့မျိုးနွယ်စုများ ကြီးစိုးခဲ့ကြပြီး... မျိုးနွယ်စုအသီးသီးသည် အာဏာလုရန် ယှဉ်ပြိုင်ခဲ့ကြသည်။
သို့သော် ရှေးဟောင်းခေတ်နှောင်းပိုင်းတွင်... ကောင်းကင်နှင့် မြေကြီး၏ တာအိုများပြောင်းလဲသွားခဲ့ပြီး... ရှေးဟောင်းမျိုးနွယ်စုများ ကျင့်ကြံအားထုတ်ရန်အတွက် အဆင်မပြေ ဖြစ်လာခဲ့သည်။ ထို့အပြင် တော်ဝင်သခင်အသီးသီး၏ အမိန့်များကြောင့်... ဖီးနစ်ငှက်နားခိုရာတောင်ကုန်း၊ နဂါးကိုးကောင်တောင်ထိပ်နှင့် အခြားသော မျိုးနွယ်စုများ ဦးဆောင်သည့် ရှေးဟောင်းတော်ဝင်မျိုးနွယ်စုများသည်... အနာဂတ်တွင် ပြန်လည်ပေါ်ထွက်လာမည့် အခွင့်အလမ်းကို စောင့်ဆိုင်းရန် အိပ်စက်ခြင်းသို့ ရောက်ရှိသွားခဲ့ကြသည်။
ဆန့်ကျင်ဘက်အားဖြင့်... ထိုအချိန်က လူသားမျိုးနွယ်သည် ကြီးကြီးမားမား ထိခိုက်မှု မရှိခဲ့သဖြင့်... သူတို့အတွက် အိပ်စက်ခြင်းဟူသည် မရှိခဲ့ပေ။ သူတို့သည် ကမ္ဘာလောကတွင် ဆက်လက်ရပ်တည်နေခဲ့ပြီး... ရှေးဟောင်းမျိုးနွယ်စုများ ပိုင်ဆိုင်ခဲ့သော နယ်မြေကျယ်ကြီးများကို တဖြည်းဖြည်း သိမ်းပိုက်ကာ... ဤကမ္ဘာကြီး၏ အရှင်သခင်များ ဖြစ်လာခဲ့ကြသည်။
" ငါတို့ ပေါ်ထွက်လာခြင်းက တော်ဝင်သခင်ကြီးတွေရဲ့ ဆန္ဒဖြစ်သလို... ကောင်းကင်ဘုံရဲ့ အလိုဆန္ဒလဲ ဖြစ်တယ် "
ဖီးနစ်ငှက်နားခိုရာတောင်ကုန်းသခင်သည် ရောက်ရှိနေသော တော်ဝင်သခင်ကြီးအချို့ကို ကြည့်ကာ တစ်လုံးချင်း ပြောလိုက်သည်။
" ဒီတစ်ခါ မင်းတို့ကို ခေါ်လိုက်တာက... ငါတို့ပေါ်ထွက်လာပြီးနောက်... ဘယ်လို တုံ့ပြန်ဆောင်ရွက်ကြမလဲဆိုတာ ဆွေးနွေးဖို့ပဲ.....
ငါ့မျိုးနွယ်စု ပေါ်ထွက်လာပြီးနောက်... လက်ရှိအခြေအနေကို အကြမ်းဖျင်း နားလည်ထားပြီးပြီ... အခုအချိန်က ငါတို့အတွက် အဆုံးမဲ့ကမ္ဘာကြီးကို ခွဲဝေယူဖို့ အချိန်မဟုတ်တော့ဘူး.....
လူသားမျိုးနွယ်က အင်အားကြီးထွားလာပြီး ဒီကမ္ဘာကြီးရဲ့ ဇာတ်လိုက်တွေ ဖြစ်လာကြပြီ... ငါတို့ကျတော့ လူသားမျိုးနွယ်ရဲ့ မျက်လုံးထဲမှာ 'ရှေးဟောင်းအကြွင်းအကျန်မျိုးနွယ်စုတွေ' သာသာ ဖြစ်နေကြပြီ "
ဖီးနစ်ငှက်နားခိုရာတောင်ကုန်းသခင်ကြီး၏ အသံတွင် လှောင်ပြောင်မှု အရိပ်အယောင်များ ပါဝင်နေ၏။ အထူးသဖြင့် 'ရှေးဟောင်းအကြွင်းအကျန်မျိုးနွယ်စုများ' ဟူသော စကားလုံးကို သုံးနှုန်းလိုက်ချိန်တွင် ဖော်ပြမရနိုင်သော သရော်မှုများဖြင့် ပြည့်နှက်နေသည်။
" ဒီတော်ဝင်သခင်ကြီးလဲ နည်းနည်းတော့ ကြားထားမိတယ်... လူသားမျိုးနွယ်တဲ့... ဟား... အတိတ်တုန်းက ငါတို့ရဲ့ အစာဖြစ်ဖို့တောင် မထိုက်တန်ခဲ့တဲ့ မျိုးနွယ်စုက အခုတော့... တခြားသူတွေအပေါ် ဗိုလ်ကျစိုးမိုးပြီး ဒီကမ္ဘာကြီးရဲ့ ပူးတွဲအရှင်သခင်နေရာကို လုယူနိုင်ခဲ့တယ်တဲ့လား... တကယ့်ကို ရယ်စရာကောင်းလွန်းတယ်! "
နဂါးကိုးကောင်တောင်ထိပ်သခင်ကြီးသည် သရော်စွာ နှာခေါင်းရှုံ့လိုက်ပြီး... သူ၏မျက်လုံးများသည် စူးရှကာ အေးစက်မှုများဖြင့် ပြည့်နှက်နေသည်။
" ကျားမရှိတဲ့အခါ မျောက်က ဘုရင်ဖြစ်လာတာပေါ့... အခု မျိုးနွယ်စုအားလုံး ပြန်လည်နိုးထလာပြီဆိုတော့... လူသားမျိုးနွယ်အနေနဲ့ ဘေးဖယ်ပေးပြီး သူတို့ရဲ့ မူလနေရာကို ပြန်သွားသင့်ပြီ "
ကောင်းကင်ဝိညာဉ်ကျွန်းသခင်ကြီးသည် မျက်လွှာကို အနည်းငယ် ချလိုက်ပြီး အေးစက်စွာ ပြောလိုက်၏။
" ဟင်းဟင်း... အားလုံး သဘောထားတူညီကြတယ်ဆိုရင်တော့ ကိုင်တွယ်ရ လွယ်ကူသွားပြီပေါ့ "
ရောက်ရှိနေကြသော တော်ဝင်သခင်ကြီးအားလုံးသည် လက်ရှိလူသားမျိုးနွယ်အပေါ် မကျေမနပ် ဖြစ်နေကြသည်ကို မြင်လိုက်ရသောအခါ ဖီးနစ်ငှက်နားခိုရာတောင်ကုန်းသခင်ကြီးသည် ဖြည်းညင်းစွာ ခေါင်းညိတ်လိုက်၏။
ဖီးနစ်ငှက်နားခိုရာတောင်ကုန်း စတင်ပေါ်ထွက်လာချိန်တွင်... လူသားမျိုးနွယ်၏ လက်ရှိအင်အားကို သူ နားလည်သဘောပေါက်ခဲ့ပြီး ဖြစ်သည်။
ရှေးဟောင်းခေတ်ကတည်းက လူသားမျိုးနွယ်တွင် လူဦးရေ အများအပြား ရှိခဲ့ရုံသာမက... ကာလကြာရှည်လာသည်နှင့်အမျှ ဧကရာဇ်အဆင့်ဖြစ်တည်မှု အများအပြား ပေါ်ထွက်လာခဲ့ပြီး... အဆုံးမဲ့ဧကရာဇ်မျိုးနွယ်စုများဟု ခေါ်ဝေါ်ကြသော မျိုးနွယ်စုများကို ချန်ရစ်ထားခဲ့ကြသည်။
ဖီးနစ်ငှက်နားခိုရာတောင်ကုန်းသခင်ကြီးသည် လူသားမျိုးနွယ်ကို စိတ်ထဲမှ အမှန်တကယ် လေးစားမှု မရှိခဲ့သော်လည်း.....
လူသားမျိုးနွယ်သည် ယခင်ကနှင့် မတူတော့ကြောင်းကိုတော့ သူဝန်ခံရပေမည်။ သူတို့သည် ရှေးဟောင်းခေတ်က အဆုံးမဲ့မျိုးနွယ်စုများ၏ အနိုင်ကျင့်မှုကို ခံခဲ့ရသော အားနည်းသည့် မျိုးနွယ်စု မဟုတ်တော့ပေ။
ဖီးနစ်ငှက်နားခိုရာတောင်ကုန်း၏ အင်အားတစ်ခုတည်းကိုသာ အားကိုးပြီး... လူသားမျိုးနွယ်ကို ဖိနှိပ်ရန် မဖြစ်နိုင်သည်မှာ သေချာ၏။
ထို့ကြောင့် ဖီးနစ်ငှက်နားခိုရာတောင်ကုန်းသခင်ကြီးသည် ရှေးဟောင်းတော်ဝင်မျိုးနွယ်စုများမှ သခင်ကြီးအားလုံးကို ဆွေးနွေးရန် ဖိတ်ခေါ်ခဲ့ခြင်း ဖြစ်သည်။ အဓိက ရည်ရွယ်ချက်မှာ လက်ရှိလူသားမျိုးနွယ်အပေါ် တော်ဝင်သခင်ကြီးများ၏ သဘောထားကို သိရှိလို၍ ဖြစ်သည်။
ယခုတော့ ရလဒ်မှာ မဆိုးလှပေ။
သူတစ်ယောက်တည်း လူသားမျိုးနွယ်ကို မကျေမနပ် ဖြစ်နေခြင်း မဟုတ်ဘဲ... ရောက်ရှိနေကြသော တော်ဝင်သခင်ကြီးများအားလုံးလည်း ထိုနည်းလည်းကောင်းပင် သဘောထားတူညီနေကြ၏။
ထိုသို့ဆိုလျှင် ကိုင်တွယ်ရ လွယ်ကူသွားပေလိမ့်မည်။
တော်ဝင်မျိုးနွယ်စုတစ်ခုတည်းက လူသားမျိုးနွယ်ကို မဖိနှိပ်နိုင်သော်လည်း... တော်ဝင်မျိုးနွယ်စု အများအပြား အင်အားပေါင်းစည်းလိုက်ပါက... အခြေအနေသည် လုံးဝကွာခြားသွားပေလိမ့်မည်။
လူသားမျိုးနွယ်တွင် လူဦးရေ အများအပြား ရှိနေလျှင်လည်း အသုံးဝင်မည် မဟုတ်ပေ။
တော်ဝင်မျိုးနွယ်စု အများအပြား၏ ပေါင်းစည်းအင်အားကို အရေအတွက်များပြားရုံ သက်သက်ဖြင့် မကျော်လွှားနိုင်ပေ။
" ဖီးနစ်ဧကရာဇ်သခင်ကြီးက ဘာကို ဆိုလိုတာလဲ "
နဂါးကိုးကောင်တောင်ထိပ်သခင်ကြီးသည် ဖီးနစ်ငှက်နားခိုရာတောင်ကုန်းသခင်ကြီးကို တစ်ချက်ကြည့်လိုက်ရာ သူ့စကား၏အဓိပ္ပါယ်ကို နားလည်သွားပုံရသည်။
" မျိုးနွယ်စုတွေ ပြန်လည်နိုးထလာတယ်ဆိုတာ ငါတို့ရဲ့ ဘိုးဘေးနယ်မြေတွေထဲမှာပဲ ကျုံ့ပြီး နေကြဖို့ မဟုတ်တာ သေချာတယ်... ဒီအဆုံးမဲ့ကမ္ဘာကြီးက အစကတည်းက ငါတို့ပိုင်ဆိုင်ခဲ့တာ ဖြစ်လို့... အခုလဲ ငါတို့ပဲပိုင်ဆိုင်ရမှာပေါ့ "
ဖီးနစ်ငှက်နားခိုရာတောင်ကုန်းသခင်ကြီးက အေးစက်စွာ ပြောကြားလိုက်၏။
" ငါတို့ တော်ဝင်မျိုးနွယ်စုတွေတင် မကဘဲ... ငါတို့အမိန့်အောက်က ဘုရင်မျိုးနွယ်စုအသီးသီးလဲ လုံလောက်တဲ့ နယ်မြေပိုင်နက်တွေ လိုအပ်တယ် "
ရှေးဟောင်းတော်ဝင်မျိုးနွယ်စုများ ပေါ်ထွက်လာခြင်းနှင့်အတူ သူတို့၏ အမိန့်အောက်ရှိ မရေမတွက်နိုင်သော ဘုရင်မျိုးနွယ်စုများလည်း ပေါ်ထွက်လာကြသည်။
အကယ်၍ သူတို့သည် ပေါ်ထွက်လာပြီးနောက်... ဘိုးဘေးနယ်မြေများထဲတွင်သာ ကျုံ့နေကြရမည်ဆိုလျှင်... ရယ်စရာ ဖြစ်မနေပေဘူးလော။
ရှေးဟောင်းခေတ်က ဤအဆုံးမဲ့ကမ္ဘာကြီးကို တော်ဝင်မျိုးနွယ်စုအသီးသီးက ခွဲဝေပိုင်းခြား အုပ်ချုပ်ခဲ့ကြသည်။
လူသားမျိုးနွယ်အတွက်မူ... သူတို့သည် အဆုံးမဲ့ကမ္ဘာကြီး၏ ထောင့်တစ်နေရာလေးကိုသာ သိမ်းပိုက်နိုင်ခဲ့ပြီး... ထိုနေရာကျဉ်းကျဉ်းလေးဖြင့် ကျေနပ်ရောင့်ရဲခဲ့ကြရသည်။
ယခုအခါ တော်ဝင်မျိုးနွယ်စုများ ပြန်လည်နိုးထလာပြီဖြစ်ရာ... လူသားမျိုးနွယ်သည် သဘာဝကျကျပင် ဤအဆုံးမဲ့ကမ္ဘာကြီးကို ဆက်လက်သိမ်းပိုက်ထားနိုင်မည် မဟုတ်တော့ဘဲ... အတိတ်က သူတို့ သိမ်းပိုက်ခဲ့သော နယ်မြေအားလုံးကို ပြန်လည်ထုတ်ပေးရပေလိမ့်မည်။
" ဖီးနစ်ဧကရာဇ်သခင်ကြီးရဲ့ ရည်ရွယ်ချက်က ဒီတော်ဝင်သခင်ကြီးရဲ့ ဆန္ဒနဲ့ ထပ်တူကျပါတယ် "
ကောင်းကင်ဝိညာဉ်ကျွန်းသခင်ကြီး၏ ကျောဘက်ရှိ ဖြူဖွေးသန့်စင်သော အတောင်ပံများသည် အနည်းငယ် လှုပ်ခတ်သွားပြီး သူ၏မျက်နှာတွင် သဘောတူညီသည့် အမူအရာများ ပေါ်လာ၏။
" ဒီတော်ဝင်သခင်ကြီးရဲ့ အမြင်အရတော့... တစ်ယောက်နဲ့တစ်ယောက် စိတ်ဝမ်းမကွဲကြရအောင် အခုပဲ အဆုံးမဲ့ဒေသကြီးငါးခုလုံးကို ခွဲဝေလိုက်ကြစို့... မင်းတို့အားလုံး ဘယ်လို သဘောရလဲ "
" လက်ခံပါတယ် "
" ကောင်းပြီ "
ကောင်းကင်ဝိညာဉ်ကျွန်းသခင်ကြီး၏ စကားကို... ရောက်ရှိနေသော တော်ဝင်သခင်ကြီးများအားလုံးက... တညီတညွတ်တည်း သဘောတူလက်ခံလိုက်ကြသည်။
ထို့နောက်တွင် ဖီးနစ်ငှက်နားခိုရာတောင်ကုန်းသခင်ကြီးက လက်ကို ဝှေ့ယမ်းလိုက်ရာ... အဆုံးမဲ့ဒေသကြီးငါးခု၏ မြေပုံ ပုံရိပ်ယောင်တစ်ခုသည် ရှေးဟောင်းတော်ဝင်သခင်ကြီးများ၏ ရှေ့မှောက်တွင် ပေါ်လာခဲ့၏။
ထို့နောက် ရောက်ရှိနေကြသော ရှေးဟောင်းတော်ဝင်သခင်ကြီးများသည် လက်များကို ဆန့်တန်းကာ... သူတို့နှင့် သူတို့၏ အမိန့်အောက်ရှိ ဘုရင်မျိုးနွယ်စုများအတွက် နယ်မြေများကို စတင်ခွဲဝေယူကြတော့သည်။
ဤလုပ်ငန်းစဉ်တစ်လျှောက်လုံးတွင် တော်ဝင်သခင်ကြီးတစ်ဦးတစ်ယောက်မျှ လူသားမျိုးနွယ်အကြောင်းကို ထည့်သွင်းပြောဆိုခြင်း မရှိခဲ့ကြပေ။
ထိုနယ်မြေများတွင် မူလကတည်းက နေထိုင်လျက်ရှိသော လူသားမျိုးနွယ်သည်... ဤတော်ဝင်သခင်ကြီးများ၏ မျက်လုံးထဲတွင်... လေကဲ့သို့ လုံးဝ မရှိခဲ့ဖူးသယောင် သို့မဟုတ် စိုးရိမ်စရာ မလိုသော အရာများအဖြစ်သာ... ရှိနေပုံရသည်။
အခန်း (၁၆၀) - အရင်ယဉ်ကျေးပြီးမှ အကြမ်းဖက်ခြင်း၊ လူထုစိတ်လှုပ်ရှားမှုနှင့် ချမ်ယွမ်ဂိုဏ်း ပျက်စီးရတော့မည့်ကိန်း
ခဏအကြာတွင်.....
ခန်းမဆောင်အတွင်းရှိ တော်ဝင်မျိုးနွယ်စုသခင်ကြီးများအားလုံး၏ မျက်နှာတွင် ကျေနပ်အားရမှုများ ပေါ်လာကြသည်။
အဆုံးမဲ့ကမ္ဘာနယ်မြေ၏ ပုံရိပ်ယောင်မြေပုံပေါ်တွင် အရောင်အမျိုးမျိုး ခြယ်သထားပြီးဖြစ်ကာ တော်ဝင်မျိုးနွယ်စုသခင်ကြီးများအကြား ခွဲဝေပြီးစီးသွားပြီဖြစ်သည်။
တော်ဝင်မျိုးနွယ်စုသခင်ကြီးတစ်ပါးအနေဖြင့်... သူတို့၏တာဝန်မှာ တော်ဝင်မျိုးနွယ်စုအချင်းချင်း နယ်မြေခွဲဝေရန်သာမက... သူတို့အမိန့်အောက်ရှိ ဘုရင်မျိုးနွယ်စုများအတွက်ပါ သင့်တော်သော နယ်မြေများကို ရှာဖွေခွဲဝေပေးရန် ဖြစ်သည်။
ယခုအခါ မျိုးနွယ်စုတိုင်းအတွက် သင့်လျော်သော နယ်မြေများ ‘ခွဲဝေ’ ပြီးပြီဖြစ်ရာ... ရောက်ရှိနေသော တော်ဝင်သခင်ကြီးများသည် အလွန်ပင် ကျေနပ်နေကြ၏။
အမှန်စင်စစ်တွင် အဆုံးမဲ့လူသားမျိုးနွယ်နှင့် ပတ်သက်၍ ဤရှေးဟောင်းတော်ဝင်သခင်ကြီးများသည် လုံးဝမျိုးတုန်းသတ်ဖြတ်ခြင်း မပြုလုပ်ခဲ့ကြပေ။ ‘စေတနာ’ ထားသည့်အနေဖြင့် လူသားမျိုးနွယ်အတွက် နယ်မြေအချို့ကို ချန်ထားပေးခဲ့ကြသည်။
သို့သော် လူသားမျိုးနွယ်အတွက် ချန်ထားပေးခဲ့သော နယ်မြေအများစုမှာ... ချီစွမ်းအင်နည်းပါးပြီး မြုံသောမြေများသာ ဖြစ်ကာ... သူတို့သိမ်းပိုက်လိုက်သော ချီစွမ်းအင်ကြွယ်ဝသည့် နယ်မြေများနှင့် လုံးဝယှဉ်၍မရနိုင်ပေ။
အဆုံးမဲ့ဧကရာဇ်မျိုးနွယ်စုများနှင့် ပတ်သက်၍မူ တော်ဝင်သခင်ကြီးများသည် မျက်နှာသာ ပေးခဲ့ကြသည်။
မည်သို့ပင်ဆိုစေကာမူ ဤမိသားစုအင်အားစုများသည် ဧကရာဇ်အဆင့်ဖြစ်တည်မှုများ ပေါ်ထွန်းခဲ့ဖူးရာ... လုံးဝမျိုးတုန်းသတ်ဖြတ်လိုက်ပါက ပြန်လည်တိုက်ခိုက်မှုများနှင့် ကြုံတွေ့ရနိုင်သဖြင့်... မလိုလားအပ်သော ပြဿနာများ ဖြစ်လာနိုင်သည်။
ထို့ကြောင့် ငြိမ်သက်စွာနေပြီး... ဤအဆုံးမဲ့ဧကရာဇ်မျိုးနွယ်စုများကို သူတို့၏ မူလနယ်မြေများတွင် ဆက်လက်နေထိုင်ခွင့် ပြုလိုက်ခြင်းက... ပိုကောင်းပေသည်။
ဤသည်မှာ အဆုံးမဲ့ဧကရာဇ်မျိုးနွယ်စုများကို မျက်နှာသာပေးခြင်းသာမက... ထိုမျိုးနွယ်စုများ၏ နောက်ကွယ်တွင် ရှိနေနိုင်သော အလားအလာရှိသည့် ဧကရာဇ်အဆင့်ဖြစ်တည်မှုများကိုပါ... မျက်နှာသာပေးခြင်း ဖြစ်သည်။
“ ကဲ... နယ်မြေခွဲဝေတဲ့ကိစ္စ ဆွေးနွေးပြီးပြီဆိုတော့ အဆုံးသတ်လိုက်ကြစို့... နောက်တစ်ဆင့်အနေနဲ့ အမိန့်ပြန်တမ်း ထုတ်ပြန်ပြီး... ဘုရင်မျိုးနွယ်စုအသီးသီးကို သူတို့သက်ဆိုင်ရာ နယ်မြေတွေဆီ သွားရောက်သိမ်းပိုက်ခိုင်းရမယ် ”
နယ်မြေခွဲဝေမှုကိစ္စ ပြီးစီးသွားသည်နှင့်... နဂါးကိုးကောင်တောင်ထိပ်သခင်ကြီးက စိတ်မရှည်သောလေသံဖြင့် ပြောလိုက်သည်။
“ ဒီကိစ္စကို မလောပါနဲ့ဦး ”
ဖီးနစ်ငှက်နားခိုရာတောင်ကုန်းသခင်ကြီးက ဖြည်းညင်းစွာ ပြောလိုက်သည်။
“ ပထမဆုံးအနေနဲ့ အဆုံးမဲ့ဧကရာဇ်မျိုးနွယ်စုတွေနဲ့ လူသားမျိုးနွယ်ထဲက အင်အားကြီးဂိုဏ်းတွေကို အကြောင်းကြားဖို့ လူလွှတ်လိုက်ပါ... ငါတို့က အရင်ယဉ်ကျေးပြီး နောက်မှအကြမ်းဖက်မည့် နည်းလမ်းကို သုံးမယ်... သူတို့ကို ထွက်သွားဖို့ တစ်ရက်အချိန်ပေးမယ်... မဟုတ်ရင်တော့ အကျိုးဆက်ကို သူတို့ဘာသာ ခံစားစေရမယ် ”
မည်သို့ပင်ဆိုစေ လက်ရှိလူသားမျိုးနွယ်သည် ရှေးဟောင်းဘုရင်မျိုးနွယ်စုတိုင်း အနိုင်ကျင့်နိုင်သော အတိတ်က လူသားမျိုးနွယ် မဟုတ်တော့ပေ။
တော်ဝင်မျိုးနွယ်စုအသီးသီး၏ ပေါင်းစည်းအင်အားသည် လူသားမျိုးနွယ်ကို လျစ်လျူရှုရန် လုံလောက်သည်မှာ မှန်သော်လည်း... မလိုအပ်သော ပဋိပက္ခများကို ရှောင်ရှားရန်အတွက်... လူသားမျိုးနွယ်ကို မျက်နှာသာ အနည်းငယ်ပေးကာ ကြိုတင်ဖယ်ရှားခိုင်းခြင်းက ပိုကောင်းပေသည်။
“ ဟင်းဟင်း... ဖီးနစ်ဧကရာဇ်က စဉ်းစားတွေးခေါ်ရာမှာ ပြည့်စုံလွန်းပါတယ်... ဒါက လူသားမျိုးနွယ်ကို လုံလုံလောက်လောက် မျက်နှာသာပေးလိုက်တာပဲ... ဒီပုရွက်ဆိတ်တွေက အကောင်းအဆိုး နားမလည်သေးဘူးဆိုရင်တော့ ဟွန်း... ငါ့ကို ရိုင်းပြတယ်လို့ အပြစ်မတင်နဲ့! ”
ကောင်းကင်ဝိညာဉ်ကျွန်းသခင်ကြီးသည် နှာခေါင်းရှုံ့၍ ပြောဆိုလိုက်၏။
“ ကောင်းပြီ... ကန့်ကွက်စရာမရှိရင် အစီအစဉ်အတိုင်း ဆက်လုပ်ကြမယ် ”
ဖီးနစ်ငှက်နားခိုရာတောင်ကုန်းသခင်ကြီးက လက်ကိုဝှေ့ယမ်းကာ အေးစက်စွာ ပြောကြားလိုက်သည်။
… … … …
မကြာမီမှာပင်.....
တော်ဝင်မျိုးနွယ်စုအသီးသီး၏ အမိန့်ကို ရရှိပြီးနောက်... ရှေးဟောင်းဘုရင်မျိုးနွယ်စုများသည် အဆုံးမဲ့ဒေသကြီးငါးခုသို့ လူများစေလွှတ်ကာ... ရှေးဟောင်းမျိုးနွယ်စုများ၏ ကမ္ဘာလောကကို ခွဲဝေမည့် ‘အမိန့်’ ကို... ဒေသကြီးငါးခုအတွင်းရှိ လူသားမျိုးနွယ် အင်မော်တယ်ဂိုဏ်းများနှင့် မဟာကျောင်းတော်ကြီးများသို့ ကြေညာခဲ့ကြသည်။
ဤအမိန့် ထွက်ပေါ်လာသည်နှင့်တစ်ပြိုင်နက်... အဆုံးမဲ့ဒေသကြီးငါးခုလုံးတွင် ကြီးမားသော လှုပ်ခတ်မှုကြီး ဖြစ်ပေါ်သွားခဲ့၏။
“ ဒါက လွန်လွန်းတယ်! ဒီရှေးဟောင်းအကြွင်းအကျန်မျိုးနွယ်စုတွေက ဒီကမ္ဘာကြီးကို ရှေးဟောင်းခေတ်လို့ ထင်နေကြတုန်းလား... ဒီကမ္ဘာက ငါတို့လူသားမျိုးနွယ် ပိုင်တာကွ! ”
“ အဲ့ဒီ ရှေးဟောင်းအကြွင်းအကျန်မျိုးနွယ်စုတွေရဲ့ အင်အားကို လျှော့တွက်လို့ မရဘူး! အဆုံးမဲ့ဒေသကြီးငါးခုကို လာပြီးကြေညာတဲ့ အကြွင်းအကျန်မျိုးနွယ်စုတွေထဲက အားအနည်းဆုံးသူတွေတောင် တာအိုပေါင်းစည်းခြင်းအဆင့် ရှိနေကြတာ မမြင်ဘူးလား.....
သူတော်စင်အဆင့်တွေတောင် ပါသေးတယ်... ဒါတောင်မှ ရှေးဟောင်းအကြွင်းအကျန်မျိုးနွယ်စုတွေရဲ့ အင်အားအစစ်အမှန်ရဲ့ ထိပ်ဖျားလေးပဲ ရှိသေးတယ်လို့ ပြောကြတယ် ”
“ သူတော်စင်အဆင့်တွေ? ဟွန်း... ငါတို့ အင်မော်တယ်ဂိုဏ်းတွေနဲ့ မဟာကျောင်းတော်ကြီးတွေထဲမှာရော ဘယ်ဂိုဏ်းက သူတော်စင်အဆင့် အမွေအနှစ် မရှိလို့လဲ ”
ဒေသကြီးငါးခုရှိ အင်အားစုအသီးသီးသည် ဒေါသတကြီး ဆွေးနွေးနေကြသော်လည်း... သူတို့၏စကားများထဲတွင် အားကိုးရာမဲ့မှု အရိပ်အယောင်များ ပါဝင်နေ၏။
ထိုရှေးဟောင်းအကြွင်းအကျန်မျိုးနွယ်စုများသည် အလွန်မောက်မာလွန်းလှ၏။ သူတို့ကို ဘိုးဘေးပိုင်နယ်မြေများမှ ဖယ်ရှားပေးရန်... ဘုရင်မျိုးနွယ်စုများနှင့် တော်ဝင်မျိုးနွယ်စုများအတွက် နေရာဖယ်ပေးရန်နှင့် ခြောက်သွေ့ခေါင်းပါးသော နေရာများသို့ ပြောင်းရွှေ့ရန်... ချက်ချင်း အမိန့်ပေးခဲ့ကြသည်။
ဤဘိုးဘေးပိုင်နယ်မြေများသည် ဂိုဏ်းနှင့် ကျောင်းတော်တစ်ခုစီ၏ နှစ်ထောင်ချီ၊ သောင်းချီ ကြိုးပမ်းအားထုတ်မှု ရလဒ်များဖြစ်သည်။
ယခုအခါ ထိုနယ်မြေများကို ရှေးဟောင်းအကြွင်းအကျန်မျိုးနွယ်စုများက တစ်ချက်တည်းနှင့် လာရောက်လုယူမည့်အရေးကို ဤသန့်ရှင်းသောမြေများနှင့် မဟာကျောင်းတော်ကြီးများက မည်သို့ လိုလားပါမည်နည်း။
သို့သော် ရှေးဟောင်းအကြွင်းအကျန်မျိုးနွယ်စုများ၏ အင်အားသည် အင်မော်တယ်ဂိုဏ်းများနှင့် မဟာကျောင်းတော်ကြီးများကို ပူပန်စေခဲ့သည်။
လူသားမျိုးနွယ်၏ အင်မော်တယ်ဂိုဏ်းများနှင့် မဟာကျောင်းတော်ကြီးများအတွက်... သူတော်စင်အဆင့်ဖြစ်တည်မှုတစ်ခုသည် ဂိုဏ်းကာကွယ်ရေး အမွေအနှစ်တစ်ခုအဖြစ် ရှိနေပြီး... အလွယ်တကူ ထုတ်သုံးလေ့မရှိပေ။
သို့သော် ထိုရှေးဟောင်းအကြွင်းအကျန်မျိုးနွယ်စုများမှာမူ အမိန့်လာရောက်ကြေညာရုံမျှနှင့်ပင် သူတော်စင်အဆင့်တစ်ဉီးမက စေလွှတ်ခဲ့ကြသည်။ ၎င်းတို့၏ နောက်ကွယ်တွင် ပိုမိုစွမ်းအားကြီးသော ဖြစ်တည်မှုများ ပုန်းအောင်းနေဦးမည်မှာ ယုံမှားသံသယဖြစ်ဖွယ် မရှိပေ။
ဤသည်မှာ ဗြောင်ကျသော ခြိမ်းခြောက်မှုတစ်ခု ဖြစ်သည်မှာ သေချာသည်။
လူသားမျိုးနွယ်တွင် လူဦးရေ အများအပြား ရှိသော်လည်း... ထိပ်တန်းအဆင့် ကျင့်ကြံသူအရေအတွက်တွင်မူ ရှေးဟောင်းအကြွင်းအကျန်မျိုးနွယ်စုများနှင့် ယှဉ်လျှင်... အားသာချက် မရှိရုံမျှမက ကြီးမားသော အားနည်းချက်ပင် ဖြစ်နေသည်။
မျိုးနွယ်စုများအကြား ယှဉ်ပြိုင်မှုတွင်... ထိပ်တန်းတိုက်ခိုက်ရေးစွမ်းရည်သည်သာ အရေးအကြီးဆုံး ဖြစ်သည်။
ထို့အပြင် ရှေးဟောင်းဘုရင်မျိုးနွယ်စုများ၏ နောက်ကွယ်တွင်... ဧကရာဇ်အဆင့်ဖြစ်တည်မှုများ မွေးထုတ်ပေးခဲ့ဖူးသော ကြောက်မက်ဖွယ်ရာ တော်ဝင်မျိုးနွယ်စု အများအပြား ရှိနေသေးသည်။ သူတို့၏ သမိုင်းကြောင်းနှင့် အခြေခံအုတ်မြစ်သည်... လက်ရှိ လူသားမျိုးနွယ်၏ အဆုံးမဲ့ဧကရာဇ်မျိုးနွယ်စုများထက်ပင် ပိုမိုနက်ရှိုင်း၏။
အဘယ်ကြောင့်ဆိုသော်... ထိုတော်ဝင်မျိုးနွယ်စုများ ကြီးစိုးခဲ့စဉ်က... လက်ရှိ အဆုံးမဲ့ဧကရာဇ်မျိုးနွယ်စုများကို... အရိပ်အယောင်ပင် မတွေ့ရသေးသောကြောင့် ဖြစ်သည်။
ရှေးဟောင်းအကြွင်းအကျန်မျိုးနွယ်စုများ ပေးထားသော အချိန်ကာလမှာ တစ်ရက်သာ ရှိသည်။
သူတို့ ဘာလုပ်ကြမည်နည်း။
“ ငါတို့ရဲ့ ဘိုးဘေးပိုင်နယ်မြေအားလုံးကို တကယ်ပဲ လက်လွတ်ခံလိုက်ရတော့မှာလား! ”
“ နှစ်ပေါင်း သောင်းချီ ကြိုးပမ်းခဲ့ရတာတွေက ခဏလေးအတွင်း ပျက်စီးသွားတော့မယ်။ ဒီရလဒ်ကို ငါအရှင်သခင် လက်မခံနိုင်ဘူး! ”
ဂိုဏ်းချုပ်အချို့က ပြင်းထန်စွာ ပြောဆိုကြပြီး... သူတို့၏ ဘိုးဘေးပိုင်နယ်မြေများကို ဘယ်တော့မှ လက်လွတ်ခံမည် မဟုတ်ကြောင်းနှင့်... ရှေးဟောင်းအကြွင်းအကျန်မျိုးနွယ်စုများကို အဆုံးထိ တိုက်ခိုက်သွားမည်ဖြစ်ကြောင်း... ကြေညာကြသည်။
ဆွေးနွေးမှုအချို့ ပြုလုပ်ပြီးနောက်... ဂိုဏ်းချုပ်များနှင့် ကျောင်းထိုင်ဆရာတော်များကြားတွင် သဘောတူညီမှု မရရှိခဲ့ကြပေ။
သို့သော် သေချာသောအချက်တစ်ခုမှာ မည်သူမျှ မိမိတို့၏ ဘိုးဘေးပိုင်နယ်မြေကို အလွယ်တကူ လက်လွတ်မခံလိုကြခြင်းပင် ဖြစ်သည်။
… … … …
တစ်ရက်အကြာတွင်.....
အရှေ့ပိုင်းတောကန္တာရတာအိုနယ်မြေ... ချမ်ယွမ်ဂိုဏ်း ပိုင်နက်နယ်မြေတွင်.....
ချမ်ယွမ်ဂိုဏ်းချုပ်သည် ဂိုဏ်းရှိ အကြီးအကဲများနှင့် တပည့်များကို ဦးဆောင်ကာ တိုက်ပွဲဝင်ရန် အသင့်ပြင်ဆင်ထား၏။
သူတို့သည် ယမန်နေ့က နေရာဖယ်ပေးရန် အကြောင်းကြားခံရသည့် ပထမဆုံးသော လူသားမျိုးနွယ် အင်အားစုဖြစ်ပြီး... ချမ်ယွမ်ဂိုဏ်းရှိ မည်သူတစ်ဦးတစ်ယောက်မျှ ထွက်ခွာလိုခြင်း မရှိကြပေ။
ထို့ကြောင့် ဆွေးနွေးမှုများ ပြုလုပ်ပြီးနောက်... ချမ်ယွမ်ဂိုဏ်းချုပ်သည် ဂိုဏ်း၏ အမွေအနှစ်အားလုံးကို အသုံးပြုပြီး... ချမ်ယွမ်ဂိုဏ်းကို အသက်ပေးကာကွယ်ရန် ဆုံးဖြတ်လိုက်ကြသည်။
“ မဟာအကြီးအကဲ... ဒီတစ်ခါ ချမ်ယွမ်ဂိုဏ်း တောင့်ခံနိုင်မလားဆိုတာ အကြီးအကဲအပေါ်မှာပဲ မူတည်ပါတယ် ”
ချမ်ယွမ်ဂိုဏ်းချုပ်က သူ၏ဘေးရှိ အနက်ရောင်ဝတ်ရုံဝတ် အဘိုးအိုကို လေးစားစွာ ပြောလိုက်သည်။
မူချမ်ချိုးဟု အမည်ရသော ဤအနက်ရောင်ဝတ်ရုံဝတ် အဘိုးအိုသည် ချမ်ယွမ်ဂိုဏ်း၏ အသန်မာဆုံး အကာအကွယ်ဖြစ်သည့် သူတော်စင်အိုကြီးတစ်ပါး ဖြစ်သည်။
“ ဂိုဏ်းချုပ်... စိတ်ချပါ။ ဒီအဘိုးကြီး ရှိနေသမျှ ဒီနေ့ ဘယ်သူမှ ငါ့ချမ်ယွမ်ဂိုဏ်းရဲ့ နယ်မြေတစ်လက်မကိုတောင် မထိပါးစေရဘူး! ”
မူချမ်ချိုးသည် မျက်လွှာချလျက် မာန်ပါပါ ပြောလိုက်သည်။
ရှေးဟောင်းအကြွင်းအကျန်မျိုးနွယ်စုများကြားတွင်... သူတော်စင်များ ရှိနေလျှင်ရော ဘာဖြစ်သနည်း။ သူသည်လည်း သူတော်စင်အဆင့်ဖြစ်တည်မှုတစ်ခုပင်... တစ်ဖက်လူကို သူ အဘယ်ကြောင့် ကြောက်ရမည်နည်း!
သို့သော် မူချမ်ချိုး၏ မျက်နှာပေါ်ရှိ မာန်တက်နေမှုသည် လက်ဖက်ရည်တစ်ခွက်သောက်စာ အချိန်ခန့်သာ ကြာမြင့်ပြီးနောက် ရုတ်တရက် ပျက်စီးသွားခဲ့ရသည်။
အဘယ်ကြောင့်ဆိုသော် ကောင်းကင်အဆုံးမှနေ၍ ကောင်းကင်နှင့် မြေကြီးကို ဖိနှိပ်လာသော ယှဉ်ပြိုင်ဘက်ကင်းသည့် အရှိန်အဝါ ငါးခု ချဉ်းကပ်လာသည်ကို သူ ခံစားလိုက်ရသောကြောင့်ပင်!
ထိုအရှိန်အဝါ ငါးခုစလုံးသည် ခြွင်းချက်မရှိ သူတော်စင်အဆင့်ဖြစ်တည်မှုများ ဖြစ်ကြသည်။
ထို့အပြင် အရှိန်အဝါတစ်ခုစီသည် သူ၏ အရှိန်အဝါထက် ပိုမိုအားကောင်းနေ၏။
“ ငါတို့ရဲ့ အမိန့်ကို အလေးမထားတဲ့ ချမ်ယွမ်ဂိုဏ်း... မျိုးတုန်းသတ်ဖြတ်ခံရဖို့ပဲ ထိုက်တန်တယ် ”
အေးစက်ပြီး ခမ်းနားထည်ဝါသော အသံတစ်သံသည် ကောင်းကင်အဆုံးမှ ပဲ့တင်ထပ်လာ၏။
ကောင်းကင်နှင့် နေမင်းကြီးကို ဖုံးလွှမ်းသွားသော ကြောက်မက်ဖွယ်ရာ ပုံရိပ်ငါးခု ဆင်းသက်လာ၏။ သူတို့၏ အေးစက်သော အကြည့်များသည် အောက်ဘက်ရှိ ချမ်ယွမ်ဂိုဏ်းသားများအပေါ် ကျရောက်လာပြီး... မည်သည့်စကားမျှ ပိုမပြောကြတော့ပေ။
ရှေးဟောင်းတော်ဝင်မျိုးနွယ်မှ သူတော်စင်ငါးပါးသည် ချမ်ယွမ်ဂိုဏ်းကို ဤကမ္ဘာမြေမှ လုံးဝဖျောက်ဖျက်ပစ်ရန် အတူတကွ လှုပ်ရှားလိုက်ကြတော့သည်။