အခန်း (၁၇၇-၁၇၈)
Vol. 13 Ch. 177-178
အခန်း ( ၁၇၇ ) - ဘဝအလှည့်အပြောင်း၊ ဘိုးဘေးကြီးနှင့်တွေ့ဆုံခြင်း၊ အကုန်သင်ကြားပေးခြင်း
ကုဝူရှန့် လူ့ပြည်မှာ အိမ်ထောင်ကျပြီး ကလေးရစဉ်က... ဒဏ်ရာပြင်းထန်နေ၍ သွေးမျိုးဆက်စွမ်းအားသည် မပေါ်လွင်ရုံသာမက... သာမန်လူများထက်ပင် ပိုအားနည်းနေခဲ့သည်။ ထို့ကြောင့် သူ၏မျိုးဆက်များတွင် ကျန်ရစ်ခဲ့သည့် သွေးမျိုးဆက်စွမ်းအားမှာ သာမန်လူများထက်ပင် ပို၍ နည်းပါးသွားခဲ့ခြင်း ဖြစ်မည်။
ထို့ကြောင့် ကုမိသားစုရွာသည် နှစ်ငါးသောင်းမျှ သက်တမ်းရှိပြီ ဖြစ်သော်လည်း ကျင့်ကြံသူတစ်ယောက်မှ မွေးမလာခဲ့ခြင်း ဖြစ်မည်။
ယခင်က ကုဝူရှန့်သည် ရွာသားများ၏ အေးချမ်းသည့်ဘဝကို မနှောင့်ယှက်ချင်ခဲ့သည့် အချက်ကြောင့် ဘာမျှမပြောခဲ့ခြင်းပင်ဖြစ်မည်။
ရွာသားအများစုမှာ ကျင့်ကြံရန် ပါရမီမရှိကြပေ။ သူတို့အား အတင်းကျင့်ကြံခိုင်းစေပြီး မူလဘဝလမ်းကြောင်းမှ သွေဖည်သွားစေသည်က ကောင်းလိမ့်မည်မဟုတ်ပေ။
သို့သော် ယခု သူ၏မျိုးဆက်များထဲတွင် ကျင့်ကြံရန် ပါရမီပါသည့် လူငယ်တစ်ယောက် ပေါ်လာသည်ကို တွေ့ရသည့်အခါ ကုဝူရှန့် မည်သို့ ဝမ်းမသာဘဲ နေမည်နည်း။
" တကယ်ကို စိတ်ကူးလို့မရနိုင်လောက်အောင်ပါပဲ..... "
ကုယိုသည် တီးတိုးရေရွတ်လိုက်၏။ ကုဝူရှန့် ခိုင်းသည့်အတိုင်း မတ်တတ်ထရပ်လိုက်သော်ငြား စိတ်ထဲတွင် တုန်လှုပ်နေခဲ့၏။
စင်စစ်တွင်... အထက်ကောင်းကင်တားမြစ်နယ်မြေသို့ ကိုယ်တိုင်ရောက်လာပြီး... ကုမိသားစုဘိုးဘေးကို ကန်တော့နေရသည်ကိုပင်... အိပ်မက်မက်နေသကဲ့သို့ ခံစားနေရသည်။
ငါက အထက်ကောင်းကင်က ကုမိသားစုရဲ့ သွေးမျိုးဆက် ဆက်ခံသူတဲ့လား။
ဒါက တကယ့်ကို ဘဝပြောင်းသွားတာပဲ။
ယနေ့မှစ၍ သူ၏ဘဝကြီး မည်မျှ ပြောင်းလဲသွားမည်ကို ကုယို မြင်ယောင်နေမိသည်။
ဤသည်က အထက်ကောင်းကင် ကုမိသားစုဖြစ်၏။ အသေးအဖွဲ မိသားစုလေး မဟုတ်သလို... မြင့်မြတ်နယ်မြေတို့... မဟာဂိုဏ်းတို့ဆိုတာမျိုးလည်း မဟုတ်ပေဘူး။
အဆုံးမဲ့ဒေသကြီးငါးခုလုံးတွင် ကုမိသားစုသည် နံပါတ်တစ် တားမြစ်အင်အားစုပဲဖြစ်၏။
ဧကရာဇ်မျိုးနွယ်များပင်လျှင် သူတို့အား ယှဉ်နိုင်ရန် အဝေးကြီး လိုသေး၏။
ဧကရာဇ်မျိုးနွယ်များက ကုမိသားစုကို မုန်းသော်ငြား ဘာမျှမတတ်နိုင်သည်ကို ကုယို ရှင်းရှင်းလင်းလင်း သိ၏။
ဧကရာဇ်မျိုးနွယ်များတင်သာမက အဆုံးမဲ့ဒေသကြီးငါးခုလုံးမှ အခြားအင်အားစုများသည်လည်း အတူတူပင်ဖြစ်မည်။
ကုမိသားစုကို မုန်းသူများ များစွာရှိသော်လည် လက်တုံ့ပြန်ချင်လျှင်ပင် မည်သူမျှ မလုပ်ရဲကြသည်မှာ အမှန်ဖြစ်၏။
အဘယ်ကြောင့်ဆိုသော်... သတ္တိရှိရှိ လုပ်ရဲသည့်သူတိုင်းသည် ကုမိသားစု၏ ဘိုးဘေးကြီး... ဒဏ္ဍာရီလာ ကောင်းကင်ဘုံအရှင်သခင်၏ လက်ချက်နှင့် ပျက်စီးသွားကြခြင်းကြောင့် ဖြစ်လေသည်။
ကုမိသားစုဝင်ဆိုသည့် ဂုဏ်ပုဒ်ရသွားလျှင်... အဆုံးမဲ့ဒေသကြီးငါးခု၌ ကန့်လန့်တိုက် လမ်းလျှောက်လျှင်ပင်... မည်သူမျှ သူ့အား ဘာမျှလုပ်ရဲမည် မဟုတ်ပေ။
သို့သော် ကုယိုက ကြွားဝါတတ်သည့်သူ မဟုတ်သလို... ကုမိသားစုအရှိန်အဝါကို သုံးပြီး... သူများကို အနိုင်ကျင့်မည့်သူလည်း မဟုတ်ပေ။
" မင်း အခု ဘာသိုင်းကျမ်းကို ကျင့်ကြံနေတာလဲ... ဟွမ်သွမ့်မူလဂိုဏ်းက နည်းလမ်းလား "
ကုယို အတွေးလွန်နေချိန်တွင်... ကုဝူရှန့်၏ အသံသည် ကြားဖြတ်ဝင်လာ၏။
" ဘိုးဘေးကို တင်ပြပါတယ်... တပည့် ကျင့်ကြံနေတာ ဟွမ်သွမ့်မူလဂိုဏ်းက နည်းလမ်း မဟုတ်ပါဘူး... နေမင်းကျမ်းစာပါ "
ကုဝူရှန့်ကို ရင်ဆိုင်ရချိန်မှာ... ကုယို ဘာမျှ ဖုံးကွယ်မထားရဲဘဲ... လျှို့ဝှက်နယ်မြေမှ ရှေးဟောင်းသူတော်စင်၏ အမွေအနှစ်အား... ရရှိခဲ့သည့်အကြောင်း အကုန်ပြောပြလိုက်၏။
" နေမင်းကျမ်းစာ..... "
ကုဝူရှန့်၏ မျက်လုံးတွေထဲတွင် အနည်းငယ် အံ့ဩသွားသည့် အရိပ်အယောင် ပေါ်လာခဲ့သည်။
သူ၏မျိုးဆက်ထဲတွင်... ယခုကဲ့သို့ ကံကောင်းမှုမျိုး ရထားသူ ရှိလိမ့်မည်ဟု... ထင်မထားခဲ့ခြင်း ဖြစ်သည်။
ထိုသို့ဆိုလျှင်တော့ သူ၏အစီအစဉ်ကို ပြောင်းရတော့မည်။
ကုဝူရှန့်သည် လေးနက်စွာ စဉ်းစားလိုက်၏။
မူလက ကုယိုအား သူ၏ဘေးတွင်ထား၍ ကိုယ်တိုင် သင်ပေးရန်ဖြစ်သည်။
သို့သော် ကုယိုက နေမင်းကျမ်းစာအား ကျင့်ကြံနေသည်ကို ကြားလိုက်ရသည့်အခါ စိတ်ပြောင်းသွားခဲ့သည်။
အခု နေနဲ့လဧကရာဇ်ကျမ်းစာ နှစ်ခုလုံးသည် ဘိုးဘေးကြီးလက်ထဲတွင် ရှိနေသည်။
လူသားဧကရာဇ်၏ သွေးမျိုးဆက် ဆက်ခံသူ ဖူဝမ်ပင် ယခုဆိုလျှင် ဘိုးဘေးကြီး၏ ဒုတိယတပည့် ဖြစ်နေပြီဖြစ်သည်။
ထို့အပြင် ကုယိုသည် ယခု နေမင်းကျမ်းစာကို အဓိက ကျင့်ကြံနေ၏။
ထို့ကြောင့် ကုယိုကို လမ်းပြပေးရန် ဘိုးဘေးကြီးထက် သင့်တော်သူ မရှိတော့ဘူးဟု ပြောလို့ရ၏။
" လာ... ဘိုးဘေးကြီးကို သွားကန်တော့ရအောင်... လိုက်ခဲ့ "
ကုဝူရှန့်သည် တွေဝေမနေတော့ဘဲ ကုယိုကို လက်ယပ်ခေါ်လိုက်သည်။
" ဘိုးဘေးကြီးကို... သွားတွေ့မယ် "
ကုယိုသည် တံတွေးမြိုချလိုက်မိပြီး... တည်ငြိမ်စပြုနေသည့် စိတ်များမှာလည်း ပြန်လှုပ်ရှားလာခဲ့သည်။
ကုဝူရှန့်ပြောသည့် ဘိုးဘေးကြီးဆိုသည်မှာ မည်သူဖြစ်ကို သူသိနေ၏။
ကုမိသားစုရွာဘိုးဘေးကပင်... ဘိုးဘေးကြီးဟု ခေါ်ရသည့်ပုဂ္ဂိုလ်မှာ တစ်မိသားစုလုံးတွင်... ယခင်တုန်းက ကုမိသားစုမဟာဧကရာဇ်... ယခု ကောင်းကင်ဘုံအရှင်သခင်သာ ရှိသည်။
ထိုမျှ အရှိန်အဝါကြီးမားသည့် ပုဂ္ဂိုလ်မျိုးကို တွေ့ရမည်ဖြစ်သည်ကြောင့်... ကုယိုသည် မည်သို့ စိတ်မလှုပ်ရှားဘဲ နေမည်နည်း။
...
" ကုဝူရှန့်နဲ့ မျိုးဆက်သစ် ကုယိုတို့ ဘိုးဘေးကြီးကို ဂါရဝပြုပါတယ် "
အထက်ကောင်းကင်ပင်မ ခန်းမဆောင်ထဲတွင် ကုဝူရှန့်သည် ကုယိုကို ခေါ်လာပြီး ကုချန်ကို အရိုအသေပေးလိုက်၏။
" ထကြ "
ကုချန်သည် မျက်လွှာပင့်ပြီး ကုယိုကို တစ်ချက် ကြည့်လိုက်၏။
ခဏအတွင်းမှာပင် ကုယိုတစ်ယောက်... ကုချန်၏ မျက်လုံးအောက်တွင်... သူ၏ခန္ဓာကိုယ် အတွင်းအပြင် လျှို့ဝှက်ချက်မကျန်... အကုန်မြင်ခံလိုက်ရသလို ခံစားလိုက်ရသည်။
" မင်း ဒီကောင်လေးကို ခေါ်လာတာ ငါ့ဆီကနေ ရှေးဟောင်းနေမင်းကျမ်းစာကို သင်ပေးစေချင်လို့ မဟုတ်လား "
ကုချန်သည် မည်မျှပင် စွမ်းအားကြီးသည်လဲဆိုလျှင် ကုယိုကို တစ်ချက်ကြည့်ရုံနှင့် ကုဝူရှန့်၏ ရည်ရွယ်ချက်ကို သိနေလေသည်။
" ဘိုးဘေးကြီးရဲ့ မျက်လုံးအောက်မှာ ဘာမှ ဖုံးကွယ်ထားလို့ မရပါဘူး "
ကုဝူရှန့်က ရယ်မောရင်း ကုချန်ကို ရိုရိုသေသေ ပြောလိုက်၏။
" ဘိုးဘေးကြီး... ကုယိုက ကျွန်တော့်မျိုးဆက်တွေထဲမှာ ကျင့်ကြံမှုပါရမီပါတဲ့ တစ်ဦးတည်းသောသူပါ... ဘိုးဘေးကြီး သူ့ကို ကောင်းကောင်း ပြုစုပျိုးထောင်ပေးပါဦး "
" အင်း "
ကုချန်သည် ခေါင်းညိတ်လိုက်၏။
ကုဝူရှန့်မှ ကုယိုကို အလေးထားသည်မှာ ဆန်းကြယ်နေခြင်းတော့ မဟုတ်ပေ။
နှစ်သောင်းချီကြာမှ... ပါရမီရှင်တစ်ယောက် ထွက်လာသည်ကို... အရေးပေးပြီး ကောင်းကောင်း ပျိုးထောင်ပေးချင်သည်က... သဘာဝကျ၏။
" ဒါဆိုရင်တော့ ငါကိုယ်တော်က မင်းကို ရှေးဟောင်းနေမင်းကျမ်းစာ အပြည့်အစုံ သင်ပေးမယ် "
ကုချန်သည် တည်ငြိမ်စွာ ပြောပြီးနောက် ကုယို၏နဖူးကို လက်ညှိုးနှင့် တို့လိုက်သည်။
နောက်တစ်စက္ကန့်မှာပင်... နေမင်းကျမ်းစာ၏ ကျယ်ပြန့်နက်နဲသည့် အကြောင်းအရာများမှာ ရေစီးကြောင်းပမာ... သူ၏ခေါင်းထဲသို့ ဝင်ရောက်လာခဲ့သည်။
" ရှေးဟောင်းနေမင်းကျမ်းစာ... ဒါ ရှေးဟောင်းနေမင်းကျမ်းစာပဲ "
ရှုပ်ထွေးနက်နဲသည့် ကျမ်းစာများ ခေါင်းထဲသို့ ရောက်လာသည့်အခါ ကုယိုသည် အံ့ဩမှုကို ဖုံးမထားနိုင် ဖြစ်နေတော့သည်။
သူ အရင်ရထားသည့် ရှေးဟောင်းသူတော်စင်အမွေအနှစ်ထဲမှ အရာသည် လူသားဧကရာဇ် ဖန်တီးခဲ့သော ကျမ်းစာ၏ ရိုးရှင်းသည့်ကျမ်းကွဲပင် ရှိသေးသည်။
အခု ဘိုးဘေးကြီး ပေးလိုက်သည်က လူသားဧကရာဇ် ဖန်တီးခဲ့သည့် မူရင်းအစစ်ဖြစ်သည်။
သူ့ကို ပိုလန့်သွားစေသည်က နောက်မှ စကားတွေပင်ဖြစ်သည်။
ကုချန်သည် ကုယိုကို ကျမ်းစာများ အကုန်သင်ပေးပြီးနောက် ထပ်မံ ပြောကြားလိုက်သည်။
" ယင်နဲ့ယန် တာအိုဆိုတာ... အကြမ်းနဲ့အနု ပေါင်းစပ်ထားတာ တစ်ခုမှ မရှိလို့ မဖြစ်ဘူး... မင်းက နေမင်းတာအိုတစ်ခုတည်းကိုပဲ ကျင့်ကြံမယ်ဆိုရင်... အနာဂတ်မှာ ဧကရာဇ်တစ်ပိုင်းအဆင့်... ကံကောင်းရင် အရှင်သခင်အဆင့်အထိ ရောက်နိုင်ပေမယ့် ရှေ့ဆက်တက်ဖို့ လမ်းမရှိတော့ဘူး.....
ယန်တစ်ခုတည်းနဲ့ မဖြစ်တည်နိုင်သလို... ယင်တစ်ခုတည်းနဲ့လည်း မကြီးထွားနိုင်ဘူး... မင်း ဒီရှေးဟောင်းနေမင်းကျမ်းစာကို အခြေခံအဆင့် အောင်မြင်သွားရင်... ငါကိုယ်တော်က ရှေးဟောင်းလမင်းကျမ်းစာ ကျင့်စဉ်ကိုပါ ထပ်သင်ပေးမယ် "
ယင်နဲ့ယန် နည်းလမ်းနှစ်ခုလုံး လိုအပ်သည်။
နေမင်းကျင့်စဉ်တစ်ခုတည်း သို့မဟုတ် လမင်းကျင့်စဉ်တစ်ခုတည်း ကျင့်ကြံသည်က မကောင်းနိုင်ပေ။
ရေတိုမှာ အကျိုးရှိပေမယ့် ရေရှည်မှာ ဆိုးကျိုးများသာ ပိုများလိမ့်မည်။
ကုဝူရှန့်သည် ကုယိုကို ယနေ့ သေချာခေါ်လာပေးသဖြင့် ကုမိသားစုမျိုးဆက်သစ်အတွက် ကုချန်သည် ဘာကိုမျှ နှမြောနေစရာ အကြောင်းရှိတော့မည် မဟုတ်ပေ။
အခန်း (၁၇၈) - စီစဉ်မှုများ ပြီးစီးခြင်း၊ကြက်သွေးရောင်မြွေနဂါးအရှင် ရောက်ရှိလာခြင်းနှင့် ကုချန်ကို ဝင်ရောက်တွေ့ဆုံခြင်း
ဘိုးဘေးကြီးက သူ့ကို ရှေးဟောင်းနေမင်းကျမ်းစာ သင်ပေးရုံတင်မကဘူး.... ရှေးဟောင်းလမင်းကျမ်းစာကိုပါ သင်ပေးဖို့ စီစဉ်ထားတယ်တဲ့လား.....
ကြမ်းပြင်ပေါ် ဒူးထောက်နေသော ကုယိုသည် ကုချန်၏ စကားကို ကြားလိုက်ရသောအခါ... ဦးစွာ ကြောင်အမ်းသွားပြီးနောက် မျက်နှာတစ်ခုလုံး စိတ်လှုပ်ရှားမှုတို့ဖြင့် ပြည့်နှက်သွားလေသည်။
ထိုရှေးဟောင်းသူတော်စင်၏ အမွေအနှစ်မှတဆင့်... လူသားမျိုးနွယ်၏ မူလမိခင်ကျမ်းစာနှစ်စောင်ဖြစ်သော ရှေးဟောင်းလမင်းကျမ်းစာနှင့် ရှေးဟောင်းနေမင်းကျမ်းစာတို့သည်... မည်မျှ အဖိုးတန်ကြောင်း ကုယို ကောင်းစွာ သိထားသည်။
ဤမိခင်ကျမ်းစာနှစ်စောင်သာ မရှိခဲ့လျှင်... နောင်တစ်ချိန်တွင် လူသားမျိုးနွယ် စည်ပင်ထွန်းကားလာစရာ အကြောင်းမရှိဟု... ဆိုနိုင်သည်။
ထိုရှေးဟောင်းလူသားသူတော်စင်သည်ပင်... ရှေးဟောင်းနေမင်းကျမ်းစာ၏ တစ်စိတ်တစ်ပိုင်း အမွေအနှစ်ကိုသာ ရရှိခဲ့ပြီး... ထိုမျှဖြင့်ပင် သူတော်စင်နယ်ပယ်သို့ တက်လှမ်းနိုင်ခဲ့ခြင်း ဖြစ်သည်။
ယခုတွင်မူ သူသည် ရှေးဟောင်းနေမင်းကျမ်းစာကို ချက်ချင်း ရရှိနိုင်ရုံသာမက.....
အချိန်တန်လျှင် ရှေးဟောင်းလမင်းကျမ်းစာကိုပါ သင်ယူခွင့်ရမည်တဲ့လား.....
ဤကဲ့သို့သော အခွင့်အရေးမျိုးကို ကုယို ယခင်က စိတ်ကူးပင် မယဉ်ရဲခဲ့ပေ။
" ဘိုးဘေးကြီးကို ဘာလို့ ကျေးဇူးမတင်သေးတာလဲ "
ကုယိုတစ်ယောက် ကြောင်ငေးနေသည်ကို မြင်သည့်အခါ ကုဝူရှန့်က အလျင်အမြန် သတိပေးလိုက်သည်။
ကုဝူရှန့်၏ သတိပေးမှုကို ကြားလိုက်ရမှ ကုယိုသည် အိပ်မက်မှ လန့်နိုးသွားသကဲ့သို့ ကပျာကယာ ဦးခိုက်လိုက်ကာ ပြောလိုက်သည်။
" ကုယိုက ဘိုးဘေးကြီးကို ကျေးဇူးတင်ပါတယ် "
" အင်း "
ကြမ်းပြင်ပေါ် ဝပ်တွားခယနေသော ကုယိုကို ကြည့်ရင်း... ကုချန်သည် မျက်လွှာကို အနည်းငယ်ချကာ ဆက်လက် မှာကြားလိုက်၏။
" ဒီနေ့ကစပြီး မင်းက ကျင့်ကြံဖို့အတွက် အထက်ကောင်းကင်မှာပဲ နေရမယ်.....
ကျင့်ကြံတဲ့အခါ အခက်အခဲ တစ်စုံတစ်ရာ ရှိလာရင်... ငါ့တပည့် ဖူဝမ်ကို သွားမေးလို့ရတယ်... သူ မင်းကို ဖြေရှင်းပေးလိမ့်မယ် "
ကုယိုကို ကုဝူရှန့်က အထူးတလည် အလေးထားသော်လည်း... ကုချန်ကိုယ်တိုင် တပည့်အဖြစ် လက်ခံပြုစုပျိုးထောင်ပေးရလောက်အောင်တော့ မလုံလောက်သေးပေ။
သူက ရှေးဟောင်းနေမင်းကျမ်းစာကို ကျင့်ကြံမည်ဖြစ်သောကြောင့်... ဖူဝမ်သည် သူ့ကို လမ်းညွှန်ပြသပေးရန် အသင့်တော်ဆုံး သူဖြစ်သည်။
ဖူဝမ်သည် အသက်ငယ်ရွယ်သေးသော်လည်း... လူသားဧကရာဇ်သွေးမျိုးဆက်ကို ပိုင်ဆိုင်ထားသူ ဖြစ်သည့်အပြင်... ရှေးဟောင်းနေမင်းကျမ်းစာနှင့် ရှေးဟောင်းလမင်းကျမ်းစာတို့၏ 'အဆင့်မြင့်ကျင့်စဉ်' ဖြစ်သော... နေလဧကရာဇ်ကျမ်းစာကို ကျင့်ကြံထားသူ ဖြစ်သည်။
ကုယို၏ ကျင့်ကြံမှုကို လမ်းညွှန်ပေးရန်မှာ ရိုးရှင်းသော ကိစ္စလေးတစ်ခုသာ ဖြစ်၏။
ကုချန် မှာကြားပြီးနောက်... ကုဝူရှန့်သည် ကုယိုကို ခေါ်ဆောင်ကာ ထပ်မံ ဂါရဝပြုပြီး... အထက်ကောင်းကင်ပင်မခန်းမဆောင်မှ ထွက်ခွာသွားကြလေသည်။
တစ်ချိန်တည်းမှာပင် ကုမိသားစုအတွင်း အေးချမ်းသော မြင်ကွင်းများ ရှိနေချိန်၌.....
အဆုံးမဲ့ကမ္ဘာအပြင်ဘက်၊ ဟွမ်သွမ့်ပင်လယ်အတွင်းတွင်.....
ကြက်သွေးရောင်ဆဆံကေသာများနှင့်... တင့်တယ်လှပသော ပုံရိပ်တစ်ခုသည် ကြည်လင်သော အလင်းရောင်များ လွှမ်းခြုံလျက်... အဆုံးမရှိသော ဟွမ်သွမ့်ပင်လယ်ကို ဖြတ်ကျော်ကာ... အဆုံးမဲ့ကမ္ဘာ၏ အပြင်ဘက်သို့ နောက်ဆုံးတွင် ရောက်ရှိလာခဲ့သည်။
ဤသူမှာ ကုချန်ကို 'လက်နက်ချရန်' စည်းရုံးသိမ်းသွင်းဖို့... ဟန်ယိုထျန်းကျွင်း စေလွှတ်လိုက်သော... ကြက်သွေးရောင်မြွေနဂါးအရှင် ပင် ဖြစ်သည်။
" အဆုံးမဲ့ကမ္ဘာ..... "
သူ၏ ရှေ့တွင် ခမ်းနားကြီးကျယ်စွာ တည်ရှိနေသော အဆုံးမဲ့ကမ္ဘာအတားအဆီးကြီးကို ကြည့်ရင်း... ကြက်သွေးရောင်မြွေနဂါးအရှင်၏ ကျဉ်းမြောင်းပြီး လှပသော မျက်ဝန်းများထဲတွင်... ရှုပ်ထွေးသော အမူအရာများ ပေါ်လာ၏။
တကယ်တော့ သူ၏ အင်အားနှင့်ဆိုလျှင် အဆုံးမဲ့ကမ္ဘာသို့ ဒီထက်စောပြီး ရောက်လာနိုင်ခဲ့သည်။
သို့သော် ရက်အနည်းငယ်ကြာ နှောင့်နှေးနေရခြင်းမှာ... ထိုကုကောင်းကင်ဧကရာဇ်ကို မည်သို့ စည်းရုံးရမည်နည်း ဆိုသည်ကို... စဉ်းစားမရသေးသောကြောင့် ဖြစ်သည်။
ကုကောင်းကင်ဧကရာဇ်ကို လက်နက်ချခိုင်းဖို့ ကိစ္စကို ဟန်ယိုထျန်းကျွင်း ပြောတာကတော့ လွယ်လိုက်တာ။
" ငါသာ နတ်ဆိုးနယ်မြေရဲ့ တိုက်ရိုက်မျိုးဆက်သာဆိုရင် ဟန်ယိုထျန်းကျွင်းက ငါ့ကို လွှတ်ပါ့မလား... ဟွန်း... ငါတို့ နတ်စပ်ဖီးနစ်မျိုးနွယ်က နတ်ဆိုးနယ်မြေအတွက် သွေးမြေကျခံခဲ့တာ နှစ်ပေါင်းသောင်းချီနေပြီ... ဒါပေမယ့် အခုထိ ဒီကောင်တွေက ငါတို့ကို သတိထား စောင့်ကြည့်နေတုန်းပဲ... "
ကြက်သွေးရောင်မြွေနဂါးအရှင်၏ စိတ်ထဲတွင် အတွေးများ ရှုပ်ထွေးနေ၏။
နတ်ဆိုးနယ်မြေသည် အဆုံးမရှိ ကျယ်ပြန့်လှသည်။ သူသည် လက်ရှိနတ်ဆိုးနယ်မြေမှ မဟုတ်ဘဲ... အခြားနတ်ဆိုးနယ်မြေတစ်ခုမှ ဖြစ်ပြီး နတ်စပ်ဖီးနစ်မျိုးနွယ်ဝင် ဖြစ်သည်။
နတ်စပ်ဖီးနစ်မျိုးနွယ်သည် နတ်ဆိုးနယ်မြေတွင် အလွန်ထူးခြားပြီး သိမ်မွေ့သော အနေအထား၌ ရှိသည်။ သူတို့သည် မူလနတ်ဆိုးနယ်မြေ သက်ရှိများ မဟုတ်ကြဘဲ နတ်ဆိုးနယ်မြေက ကမ္ဘာအမျိုးမျိုးကို သိမ်းပိုက်စဉ် နောက်ပိုင်းမှ ဝင်ရောက်ခိုလှုံလာခဲ့သော မျိုးနွယ်စု ဖြစ်သည်။
ထို့ကြောင့်... ထို 'မူလ' နတ်ဆိုးနယ်မြေ သက်ရှိများ၏ မျက်လုံးထဲတွင် နှစ်ပေါင်းမည်မျှပင် ကြာပါစေ... နတ်စပ်ဖီးနစ်မျိုးနွယ်သည် မူလနတ်ဆိုးများနှင့် မတူသော 'တိုင်းတစ်ပါးမျိုးနွယ်' သာ ဖြစ်နေဆဲပင်။
ဤသဘောထားကို ပေါ်ပေါ်ထင်ထင် ထုတ်မပြကြသော်လည်း... ကြက်သွေးရောင်မြွေနဂါးအရှင် ကောင်းစွာ သိ၏။
ထို့သို့မဟုတ်ပါက... ဟန်ယိုထျန်းကျွင်းတွင် ရွေးချယ်စရာ လူများစွာ ရှိပါလျက်နှင့်.... ဤသောက်ကျိုးနည်း တာဝန်ကို ထမ်းဆောင်ရန်... သူ့ကိုမှ အဘယ်ကြောင့် သီးသန့် ရွေးချယ်ခဲ့သနည်း။
သူသည် ရွှမ်ယိုနန်းတော်၏ တိုက်ရိုက်မျိုးဆက် မဟုတ်သောကြောင့်... စည်းရုံးမှု မအောင်မြင်ဘဲ ထိုကုကောင်းကင်ဧကရာဇ်၏ သတ်ဖြတ်ခြင်းကို ခံရလျှင်ပင်... ကိစ္စမရှိဟု သဘောထားသောကြောင့် မဟုတ်ပါလော။
မဟုတ်လျှင်... အဆုံးမဲ့ကမ္ဘာကို ကျူးကျော်ရန် ကြိုးစားရင်း... မကြာသေးမီကမှ ကျရှုံးခဲ့ပြီး ကုကောင်းကင်ဧကရာဇ်နှင့် ထိတွေ့ဖူးသော... မိုယွဲ့အရှင်သည်သာ စည်းရုံးရန် အကောင်းဆုံး ကိုယ်စားလှယ် ဖြစ်ပေလိမ့်မည်။
" မင်းအဖွားကို လာပတ်ဖို့ အဲ့လောက် မလွယ်ဘူးနော် "
ကြက်သွေးရောင်မြွေနဂါးအရှင်၏ လှပသော မျက်ဝန်းများ လက်ခနဲ ဖြစ်သွားပြီး... ကုချန်ကို 'စည်းရုံး' ရမည့် နည်းဗျူဟာကို စဉ်းစားနေပုံရသည်။
နတ်ဆိုးနယ်မြေ၏နယ်စပ်ကို အချိန်ကြာမြင့်စွာ စောင့်ကြပ်ခဲ့ဖူးသဖြင့်... ဤကုကောင်းကင်ဧကရာဇ်သည် မည်သို့သော စရိုက်သဘာဝရှိကြောင်း သူ ကောင်းစွာ သိသည်။
အကယ်၍ သူသာ လက်နက်ချရန် ချက်ချင်း သွားပြောလိုက်ပါက... နောက်တစ်ခွန်း မပြောနိုင်ခင်မှာပင်... ဤကုကောင်းကင်ဧကရာဇ်က ဓားတစ်ချက်တည်းဖြင့်... သူ့ကို သတ်ပစ်လိုက်မည်ကို စိုးရိမ်ရသည်။
သူက အပျော့ဆွဲရင် လိုက်လျောပေမယ့်... အတင်းအဓမ္မလုပ်ရင် လက်မခံမယ့်သူမျိုး။
ဤသည်မှာ ကုချန်အပေါ် ကြက်သွေးရောင်မြွေနဂါးအရှင်၏ အမြင်ပင် ဖြစ်သည်။
" ဒီလိုပဲ လုပ်ရမယ် "
အချိန်ကြာမြင့်စွာ စဉ်းစားပြီးနောက်... ကြက်သွေးရောင်မြွေနဂါးအရှင် ဆုံးဖြတ်ချက်ချလိုက်ပုံ ရသည်။ သူ၏ လှပသော မျက်ဝန်းများထဲတွင်... ပြတ်သားသော အရိပ်အယောင် ပေါ်လာပြီးနောက်... ကြက်သွေးရောင် အလင်းတန်းတစ်ခုအဖြစ် ပြောင်းလဲကာ... အဆုံးမဲ့ကမ္ဘာထဲသို့ တိတ်တဆိတ် ဝင်ရောက်သွားလေသည်။
.......
" ကုကောင်းကင်ဧကရာဇ် ရှိပါသလား... နတ်ဆိုးနယ်မြေက ကြက်သွေးရောင်မြွေနဂါး လာရောက် တွေ့ဆုံခွင့် တောင်းခံပါတယ် "
အထက်ကောင်းကင်တားမြစ်နယ်မြေ အပြင်ဘက်တွင်... ကြက်သွေးရောင် ဆံကေသာများနှင့် ကောက်ကြောင်းအလှ ပေါ်လွင်နေသော ကြက်သွေးရောင်မြွေနဂါးအရှင်သည်... သူ၏ အရှိန်အဝါကို ဖုံးကွယ်မထားပေ။ ထိုအစား သူသည်... အထက်ကောင်းကင် အပြင်ဘက်တွင် ခေါင်းကို အနည်းငယ် ငုံ့လျက်... ရိုရိုသေသေ ရပ်နေပြီး လေးစားစွာ ပြောဆိုလိုက်၏။
ကြက်သွေးရောင်မြွေနဂါးအရှင်၏ အသံမှာ မကျယ်လောင်သော်လည်း... ကုကောင်းကင်ဧကရာဇ်သာ အထက်ကောင်းကင်တားမြစ်နယ်မြေထဲတွင် ရှိနေပါက... သူ၏ အသံကို သေချာပေါက် ကြားနိုင်မည်ဟု သိထားသည်။
ထင်ထားသည့်အတိုင်းပင်... ကြက်သွေးရောင်မြွေနဂါးအရှင်၏ စကားသံ ဆုံးသည်နှင့်... ကုချန်၏ လျစ်လျူရှုထားသော အသံသည်... အထက်ကောင်းကင်အတွင်းမှ ပဲ့တင်ထပ် ထွက်ပေါ်လာ၏။
" ဘာကိစ္စလဲ..... "
အထက်ကောင်းကင်ပင်မဆောင်ထဲတွင်... ကုချန်၏ မျက်လုံးများထဲ၌... ဇဝေဇဝါဖြစ်မှု အရိပ်အယောင် အနည်းငယ် ရှိနေသည်။
ကြက်သွေးရောင်မြွေနဂါးအရှင် .....
ဒီမိန်းမက သူ့ကို ဘာကိစ္စနဲ့ လာရှာတာလဲ။
ထျန်းကျွင်းအဆင့်အရှင်ကို သူ သတ်လိုက်ပြီးပြီ... နတ်ဆိုးနယ်မြေစစ်တပ်ဆိုတာလည်း ပြန်ဆုတ်သွားကြပြီ။ ဒီကြက်သွေးရောင်မြွေနဂါးအရှင်က လက်စားချေဖို့ လာတာတော့ မဟုတ်လောက်ဘူးလို့ ကုချန် ယုံကြည်၏။
လက်စားချေရန် လာသည်ဆိုလျှင် သေလမ်းရှာခြင်းနှင့် အတူတူပင်။
ဒါဆိုရင် ဒီကြက်သွေးရောင်မြွေနဂါးအရှင်က ဘာကိစ္စနဲ့ ရောက်လာတာလဲ။
" ကုကောင်းကင်ဧကရာဇ်... ကျွန်မ အထဲဝင်ပြီး လာရောက် တွေ့ဆုံခွင့် ရနိုင်မလား "
ကြက်သွေးရောင်မြွေနဂါးအရှင်သည် အလွန် နှိမ့်ချသော ပုံစံကို ယူလိုက်ပြီး... အားနည်းဟန်ဆောင်ကာ တိုးညှင်းစွာ ပြောလိုက်သည်။
သူ့အနေဖြင့် ကုကောင်းကင်ဧကရာဇ်ကို တွေ့ခွင့်ပင် မရဘဲ... မည်သို့ စည်းရုံးနိုင်မည်နည်း။ နတ်ဆိုးနယ်မြေသို့ ပြန်ရောက်သောအခါ... မည်သို့ သတင်းပို့ရမည်နည်း။
လူချင်းတွေ့ပြီး အရာအားလုံးကို ရှင်းပြကာ... သူ့အနေဖြင့် 'အကောင်းဆုံး ကြိုးစားခဲ့ကြောင်း' သက်သေပြနိုင်မှသာ... နတ်ဆိုးနယ်မြေသို့ ပြန်ရောက်သောအခါ ဟန်ယိုထျန်းကျွင်း၏ အပြစ်တင်မှုကို ခံရမည် မဟုတ်ပေ။
ဒါက ကြက်သွေးရောင်မြွေနဂါးအရှင်ကို တွေ့ချင်ရသည့် အကြောင်းရင်း အမှန်ပင် ဖြစ်သည်။
ဒါ့အပြင် အခြား အကြောင်းပြချက်တစ်ခုလည်း ရှိသေး၏။
အကယ်၍ သူက ကုကောင်းကင်ဧကရာဇ်နှင့် သီးသန့်တွေ့ပြီး... လက်နက်ချရေးကိစ္စ ဆွေးနွေးလျှင်... ကုချန် သဘောမတူလျှင်တောင် သူ့ကို ဘာမှ လုပ်လိမ့်မည်မဟုတ်ပေ။
သို့သော်... ဤနေရာ၌ လူသိရှင်ကြား ပြောလိုက်၍ ကမ္ဘာသူကမ္ဘာသားများ သိရှိသွားပါက... ကုကောင်းကင်ဧကရာဇ် ဒေါသထွက်ပြီး သူ့ကို ဒေါသအလျောက် သတ်ပစ်လိုက်မည်လား... ဘယ်သူသိနိုင်မည်နည်း.....
ဒီကြက်သွေးရောင်မြွေနဂါးအရှင်က ဘာတွေ လာရှုပ်နေတာလဲ။
ကုချန် စိတ်ရှုပ်သွားသော်လည်း သူလှည့်ကွက်သုံးမည်ကိုတော့ မကြောက်ပေ။ အကြွင်းမဲ့ အင်အားနှင့် ရင်ဆိုင်ရလျှင်... ပူးပေါင်းကြံစည်မှုနှင့် လှည့်ကွက်အားလုံးသည် အဓိပ္ပာယ်မဲ့သွားသည် မဟုတ်ပါလော။
" ဒါဆိုရင်လဲ ဝင်ခဲ့လိုက် "
လျစ်လျူရှုထားသော အသံ ဆုံးသွားသည်နှင့်... ကုချန်က လက်ကို ညင်သာစွာ ဝှေ့ယမ်းလိုက်ရာ... ကြက်သွေးရောင်မြွေနဂါးအရှင်၏ ပတ်လည်ရှိ ကောင်းကင်တာအိုစည်းမျဉ်းများသည်... ချက်ချင်း အက်ကွဲ ပြောင်းလဲသွားလေ၏။
နောက်တစ်စက္ကန့်တွင်... ကြက်သွေးရောင်မြွေနဂါးအရှင်၏ ပုံရိပ်သည် အထက်ကောင်းကင်ပင်မခန်းမဆောင်ထဲသို့ ရောက်ရှိသွားပြီး... ကုချန်၏ ရှေ့မှောက်တွင် ပေါ်လာတော့သည်။
" ကုကောင်းကင်ဧကရာဇ်..... "
ကုချန်ကို အနီးကပ် မြင်လိုက်ရသောအခါ... ကြက်သွေးရောင်မြွေနဂါးအရှင်သည် အာမေဋိတ်သံ လွှတ်ခနဲ ထွက်သွားပြီး... သူ၏ လှပသော မျက်နှာတွင် ထိတ်လန့်မှုများ အထင်းသား ပေါ်လာ၏။
အဘယ်ကြောင့်ဆိုသော်... သူ ပြန်လည်တုံ့ပြန်ချိန်ပင် မရလိုက်ဘဲ... ကုချန်၏ နေရာရွှေ့ပြောင်းခြင်းကို... အလွယ်တကူ ခံလိုက်ရသောကြောင့်ပင်။
ဒါက ကုချန်သာ သူ့ကို သတ်ချင်လျှင်... သူ့အနေဖြင့် ပြန်လည်တုံ့ပြန်ခွင့်ပင် ရမည်မဟုတ်ကြောင်း... ဆိုလိုနေသည် မဟုတ်ပါလော။