အခန်း (၁၉၃-၁၉၄)
Vol. 14 Ch. 193-194
အခန်း (၁၉၃) - တားမြစ်နယ်မြေမှ စုဝေးခြင်း၊ ဘာမှပြောင်းလဲ၍မရနိုင်ခြင်းနှင့် ဧကရာဇ် ပြန်လည်ပေါ်ထွန်းလာခြင်း
" အဲ့လိုလား...ငါတကယ်ပဲ နားကြားမှားတာလား "
ကုရှန်းမင်သည် နတ်မျောက်ဝံ ဧကရာဇ်တပိုင်းကို သံသယဖြင့် ကြည့်လိုက်ပြီး သူ၏ အိုမင်းသောမျက်နှာပေါ်တွင် သံသယအရိပ်အယောင်အချို့ ပေါ်လာသည်။
တစ်ချိန်က... ဖီးနစ်ဧကရာဇ်၏ နောက်လိုက်ဖြစ်ခဲ့သော ဤရှေးဟောင်းနတ်မျောက်ဝံသည် ကြမ်းတမ်းပြီး... ကြောက်မက်ဖွယ်ကောင်းသော အသွင်အပြင်ရှိသည်။ အကယ်၍ သာမန်လူသားတစ်ဦးသာ သူ့ကိုမြင်လျှင်... ကြောက်လန့်ပြီး သတိလစ်သွားမည်မှာ သေချာသည်။
သို့သော်... ကုရှန်းမင်သည် မကြာသေးမီက အဖြစ်အပျက်များစွာကို ကြုံတွေ့ခဲ့ရပြီး... နတ်နဂါးမျိုးနွယ်နှင့် ရွှေခြင်္သေ့မျိုးနွယ်မှ အစွမ်းထက်သူများကို နေ့တိုင်းမြင်တွေ့နေရသဖြင့်... ယခု နတ်မျောက်ဝံ ဧကရာဇ်တပိုင်းကို မြင်ရသည့်တိုင် ကြောက်ရွံ့ခြင်းမရှိတော့ပေ။
" ဟုတ်တယ်...အဘိုး နားကြားမှားတာ ဖြစ်မှာပါ " ဟု နတ်မျောက်ဝံ ဧကရာဇ်တပိုင်းက 'ပြုံးရွှင်စွာ' ပြောလိုက်ပြီး... တစ်ချိန်တည်းမှာပင် သူ့နောက်၌ ဝပ်တွားနေသော နတ်နဂါးမျိုးနွယ်နှင့် ရွှေခြင်္သေ့မျိုးနွယ်မှ အစွမ်းထက်သူများကို ကန်ထုတ်လိုက်ကာ... မျက်လုံးဖြင့် စိုက်ကြည့်လိုက်သည်။
" မင်းတို့နှစ်ကောင် ပြောလိုက်လေ... ဟုတ်တယ်မလား "
နတ်မျောက်ဝံ ဧကရာဇ်တပိုင်း၏ အေးစက်သော အကြည့်ကို မြင်လိုက်ရသောအခါ... နတ်နဂါးမျိုးနွယ်နှင့် ရွှေခြင်္သေ့မျိုးနွယ်မှ အစွမ်းထက်သူများသည်... အလိုအလျောက် တုန်လှုပ်သွားကြသည်။
" သခင်နတ်မျောက်ဝံ ပြောတာ မှန်ပါတယ်... ခင်ဗျား နားကြားမှားတာပါ " ဟု အလျင်အမြန် ပြောလိုက်ကြသည်။
" အဲ့ဒါ နားကြားမှားတာပါ... နားကြားမှားတာ သက်သက်ပါပဲ "
နတ်နဂါးမျိုးနွယ်နှင့် ရွှေခြင်္သေ့မျိုးနွယ်မှ အစွမ်းထက်သူများသည်... သူတို့ ကောင်းမွန်စွာ စောင့်ကြပ်နေပါလျက်နှင့်... နတ်မျောက်ဝံ ဧကရာဇ်တပိုင်းက... အဘယ်ကြောင့် ရုတ်တရက် ရောက်လာပြီး... သူတို့နေရာကို ဝင်ယူလိုက်မှန်း မသိကြပေ။
သို့သော်.။ ဤနတ်မျောက်ဝံ ဧကရာဇ်တပိုင်းသည် ဖီးနစ်အရှင်ကိုပင် မျက်လုံးထဲမထည့်ဘဲ... စိတ်ရှိတိုင်း ဆူပူကြိမ်းမောင်းရဲကြောင်း သူတို့ သိကြသည်။
ထိုကဲ့သို့သော ပုဂ္ဂိုလ်မျိုးကို သူတို့အနေဖြင့် သွားရောက် ရန်စရဲမည် မဟုတ်ပေ။
သို့သော်... ဤသာမန်လူသား အဘိုးရှေ့တွင် လိမ္မာယဉ်ကျေးပြီး... ကြင်နာတတ်သော ပုံစံဖမ်းနေသည့် နတ်မျောက်ဝံကို ကြည့်ရင်း... သူတို့နှစ်ဦးမှာ မတုန်လှုပ်ဘဲ မနေနိုင်ကြချေ။
တစ်ချိန်က မာနကြီးပြီး ဘဝင်မြင့်ခဲ့သော နတ်မျောက်ဝံသည် လူသားမျိုးနွယ် အကြီးအကဲတစ်ဦးကို ယခုကဲ့သို့ လေးလေးစားစား ဆက်ဆံလိမ့်မည်ဟု ဘယ်သူ ထင်ထားမိမည်နည်း။
ဒါက တကယ့်ကို ယုံနိုင်စရာမရှိပေ။
" ငါ နားကြားမှားတာပဲ ဖြစ်မယ် " နတ်နဂါးနှင့် ရွှေခြင်္သေ့တို့ ခေါင်းညိတ်ထောက်ခံသည်ကို မြင်သောအခါ ကုရှန်းမင်သည် ခေါင်းခါလိုက်၏။
သူ တကယ်ပဲ နားကြားမှားခဲ့တာပဲ ဖြစ်မယ်။
သို့သော် နောက်တစ်ခဏတွင် သူသည် နတ်မျောက်ဝံကိုကြည့်ကာ စိတ်ပူနေဆဲဖြစ်သဖြင့် မှာကြားလိုက်၏။
" မင်း ကုမိသားစုရွာထဲကို လုံးဝ မဝင်ရဘူးနော်... ရွာထဲက ကလေးတွေ လန့်သွားလိမ့်မယ် "
နတ်နဂါးနှင့် ရွှေခြင်္သေ့တို့ စရောက်လာတုန်းက ကုမိသားစုရွာမှ ကလေးများကို အကြီးအကျယ် ခြောက်လှန့်မိသလို ဖြစ်ခဲ့သည်။
ဤနတ်မျောက်ဝံသည် ပို၍ပင် ကြမ်းတမ်းပြီး ကြောက်စရာကောင်းနေ၏။ သူ၏အသက်အရွယ်အရ သူက ကျင့်သားရနေပြီမို့ မကြောက်သော်လည်း ရွာထဲက ကလေးတွေကတော့ ကြောက်လန့်သွားနိုင်သည်။
" စိတ်မပူပါနဲ့ အဘိုး ကျွန်တော် ကုမိသားစုရွာထဲကို ခြေတစ်လှမ်းတောင် မလှမ်းပါဘူး " ဟု နတ်မျောက်ဝံက အလျင်အမြန် ကတိပေးလိုက်သည်။
ကုမိသားစုရွာထဲ ဝင်မလို့လား။
သူ ရူးနေမှပဲ ဝင်မိလိမ့်မည်။
ဖီးနစ်ဧကရာဇ်က သူ့ကို ကုမိသားစုရွာအပြင်ဘက်တွင် စောင့်ကြပ်ရန်သာ အမိန့်ပေးခဲ့ခြင်း ဖြစ်သည်။ အကယ်၍ သူ ရွာထဲဝင်မိပြီး ကုမိသားစုရွာသား တစ်စုံတစ်ယောက် ထိခိုက်မှုဖြစ်ခဲ့လျှင်... သူ့မှာ အသက်ဆယ်ချောင်း ရှိလျှင်ပင်... ဖီးနစ်ဧကရာဇ် သတ်ခြင်းခံရဖို့ မလုံလောက်ပေ။
" အင်း... ဒါဆိုလည်း ပြီးတာပါပဲ "
နတ်မျောက်ဝံ ဧကရာဇ်တပိုင်းကို မှာကြားပြီးနောက် ကုရှန်းမင်သည် တောင်ဝှေးကို ထောက်ကာ ရွာထဲသို့ ပြန်ဝင်သွားလေသည်။
ကုရှန်းမင် ထွက်သွားပြီးနောက်... နတ်မျောက်ဝံ ဧကရာဇ်တပိုင်း၏ မျက်နှာပေါ်ရှိ 'နူးညံ့သော' အမူအရာသည် ချက်ချင်း ပျောက်ကွယ်သွားပြီး... သူ၏ အေးစက်သော အကြည့်သည် ကုမိသားစုရွာ အပြင်ဘက်ရှိ နေရာတစ်နေရာသို့ ရောက်ရှိသွားသည်။
" မိတ်ဆွေတို့... ပွဲကြည့်နေတာ ကြာပြီပဲ... ကိုယ်ထင်ပြဖို့ အချိန်တန်ပြီ မဟုတ်လား "
နတ်မျောက်ဝံ ဧကရာဇ်တပိုင်း၏ စကားသံဆုံးသည်နှင့်... သူ၏အကြည့် ရောက်ရှိရာ လေဟာနယ်သည် ဖြည်းညင်းစွာ လှုပ်ခတ်သွားပြီး... နတ်မျောက်ဝံ ဧကရာဇ်တပိုင်းထက် မလျော့နည်းသော စွမ်းအားရှိသည့်... ခမ်းနားသော ပုံရိပ်အချို့ ပေါ်ထွက်လာသည်။
ထိုအထဲတွင်... မည်းနက်နေသော နတ်ဘုရားကျားတစ်ကောင်နှင့် ခေါင်းသုံးလုံးပါသော နတ်နဂါးဝါတစ်ကောင်လည်း ပါဝင်သည်။ ထိုပုံရိပ်များတွင် တူညီသော အချက်တစ်ချက်သာ ရှိသည်... ယင်းမှာ ပုံရိပ်တစ်ခုချင်းစီသည် နတ်မျောက်ဝံ ဧကရာဇ်တပိုင်းထက် မနိမ့်ကျသော... ချီစွမ်းအားများကို ထုတ်လွှတ်နေခြင်းပင်ဖြစ်သည်။
ဤပုံရိပ်အားလုံးသည် ဧကရာဇ်တပိုင်းအဆင့်ရှိ ပုဂ္ဂိုလ်များ ဖြစ်ကြသည်။
နတ်မျောက်ဝံ ဧကရာဇ်တပိုင်း၏ နောက်တွင် ဝပ်တွားနေသော... နတ်နဂါးမျိုးနွယ်နှင့် ရွှေခြင်္သေ့မျိုးနွယ်မှ အစွမ်းထက်သူများသည်... ဤမြင်ကွင်းကို မြင်လိုက်ရသောအခါ... ခေါင်းကို ပိုမိုနက်ရှိုင်းစွာ ငုံ့လိုက်ကြပြီး... မော့ကြည့်ရန်ပင် မဝံ့ရဲကြတော့ပေ။
" ဟီးဟီး...မိတ်ဆွေ နတ်မျောက်ဝံ... မတွေ့တာ ကြာပြီပဲ"
ခမ်းနားသော ပုံရိပ်အချို့သည် ကိုယ်ထင်ပြလာသော်လည်း... မည်သည့် လှုပ်ရှားမှုမျှ မပြုလုပ်ဘဲ... နတ်မျောက်ဝံကို ပြုံးရယ်ကာ နှုတ်ဆက်လိုက်ကြ၏။
" ရွှမ်ဟူ...နဂါးဝါ... ချန်ကွေ့ ...မင်းတို့က သက်ဆိုင်ရာ တားမြစ်နယ်မြေတွေမှာ မနေဘဲ ဒီကို ဘာလာလုပ်ကြတာလဲ "
နတ်မျောက်ဝံ ဧကရာဇ်တပိုင်းသည် ပုံရိပ်များကို တစ်ချက်ကြည့်ကာ... သူတို့ မည်သူမည်ဝါဖြစ်ကြောင်းကို... စကားတစ်ခွန်းတည်းဖြင့် ဖော်ထုတ်လိုက်သည်။
ဤပုဂ္ဂိုလ်များသည်လည်း သူ့ကဲ့သို့ပင် တားမြစ်နယ်မြေအသီးသီးမှ ရှေးဟောင်းဧကရာဇ်များ၏ စီးတော်ယာဉ်များ သို့မဟုတ် လက်အောက်ငယ်သားများ ဖြစ်ကြကြောင်း ပေါ်လွင်သွား၏။
" မိတ်ဆွေ နတ်မျောက်ဝံက ဘာကိစ္စနဲ့ ဒီရောက်နေတာလဲ... ငါတို့လဲ အဲ့ဒီကိစ္စအတွက်ပဲ ရောက်နေတာပါ "
ရွှမ်ဟူသည် ပျင်းရိစွာဖြင့် ခန္ဓာကိုယ်ကို ဆန့်ထုတ်ရင်း ပြောလိုက်သည်။
" စောစောက ကိုယ်ထင်မပြတာက... ငါတို့ရဲ့ မူလပုံစံတွေကြောင့်... ဟိုသာမန်လူသား ကြောက်သွားမှာစိုးလို့ပါ "
" ဟွန့် "
ရွှမ်ဟူ၏ ရှင်းပြချက်ကို ကြားသောအခါ... နတ်မျောက်ဝံ ဧကရာဇ်တပိုင်းက အေးစက်စွာ နှာမှုတ်လိုက်ကာ... ဘာမျှ ဆက်မပြောတော့ပေ။
ရွှမ်ဟူ သူ့ကို လိမ်မပြောကြောင်း သူယုံကြည်၏။
ပိုမှန်အောင် ပြောရလျှင် သူတို့၏ ကိုယ်ပိုင်အသက်များ... သူတို့သခင်များ၏ အသက်များကို ဂရုမစိုက်ခြင်းမျိုး မဟုတ်လျှင်... ထိုကောင်များမှာ ကုမိသားစုရွာကို ဘာမျှလုပ်ရဲမည် မဟုတ်ဟု... သူယုံကြည်သည်။
" တားမြစ်နယ်မြေတွေက ဧကရာဇ်တပိုင်း အများကြီးက... သာမန်လူသားရွာလေးတစ်ရွာကို ပူးပေါင်းစောင့်ကြပ်နေကြတယ်....ဒီလိုမြင်ကွင်းမျိုးက တစ်ခါမှ မရှိဖူးဘူး "
ရွှမ်ဟူသည် ကြောင်ကြီးတစ်ကောင်ကဲ့သို့ လမ်းလျှောက်နေရင်း... သက်တောင့်သက်သာရှိသော နေရာတစ်နေရာကို ရှာဖွေကာ... မြေပြင်ပေါ်တွင် ပျင်းရိစွာ ဝပ်လိုက်ပြီး စိတ်လှုပ်ရှားစွာ ရေရွတ်လိုက်သည်။
နယ်မြေကြီးငါးခုရှိ သတ္တဝါအပေါင်းကို နာမည်ကြားရုံဖြင့်... မျက်နှာပျက်စေနိုင်သော တားမြစ်နယ်မြေမှ ဧကရာဇ်တပိုင်းများသည်... ယခုအခါ လူသားမျိုးနွယ် သာမန်ရွာလေးတစ်ရွာရှေ့တွင် စုဝေးပြီး... ပူးပေါင်းစောင့်ကြပ်နေကြလိမ့်မည်ဟု ဘယ်သူ ထင်ထားမိမည်နည်း။
အကယ်၍... ဤကိစ္စသာ ပျံ့နှံ့သွားခဲ့လျှင်... စိတ်ကူးယဉ်ပုံပြင်တစ်ခုကဲ့သို့ သတ်မှတ်ကြလိမ့်မည်။
ရွှမ်ဟူ၏ ခံစားချက်ကို ရင်ဆိုင်ရချိန်တွင်... နတ်မျောက်ဝံ ဧကရာဇ်တပိုင်းနှင့် အခြားသော တားမြစ်နယ်မြေမှ ဧကရာဇ်တပိုင်းများကပါ... ဘာမျှ မပြောကြပေ။
ဒီအရာအားလုံးကို သူတို့ ဘယ်လိုလုပ် စိတ်ကူးမိပါ့မလဲ။
သူတို့၏ သက်ဆိုင်ရာ သခင်များသည် ကမ္ဘာကြီးကို တုန်လှုပ်စေခဲ့သော ရှေးဟောင်းအရှင်သခင်များ ဖြစ်ကြသည်။
ယခုအခါတွင်... တားမြစ်နယ်မြေအသီးသီးမှ ထိုအရှင်သခင်များသည် သူတို့၏ အပြင်းထန်ဆုံး တိုက်ခိုက်ရေးအင်အားစုများကို... သာမန်လူသားမျိုးနွယ်ရွာလေးတစ်ရွာအား လာရောက်စောင့်ကြပ်ရန်... အမိန့်ပေးခဲ့ကြသည်။
ထိုသို့လုပ်ဆောင်ရခြင်း၏ ရည်ရွယ်ချက်ကို တားမြစ်နယ်မြေမှ ဧကရာဇ်တပိုင်းများအကြား နားလည်မှု ရှိထားပြီးဖြစ်သည်။
၎င်းသည် ကောင်းကင်ဘုံအရှင်သခင်ကြောင့်သာ ဖြစ်သည်။
တားမြစ်နယ်မြေအားလုံးမှ အရှင်သခင်များကို သူတစ်ဦးတည်း၏ စွမ်းအားဖြင့်... ဤမျှ သတိထားပြီး လေးစားလာအောင် ပြုလုပ်နိုင်ခြင်းသည်... တစ်ခါမှ မကြုံဖူးသော ကိစ္စပင်ဖြစ်သည်။
… … … …
အရှေ့ပိုင်းစွန့်ပစ်ဒေသ တာအိုနယ်မြေ.....
ချန်ဧကရာဇ်သည် ကောင်းကင်ထက်တွင် ရပ်တန့်နေပြီး... သတ္တဝါအပေါင်း၏ အသက်များကို ရက်စက်စွာ စားသောက်နေသည်။
သူ၏မျက်လုံးများထဲတွင် စာနာစိတ် သို့မဟုတ် သနားကြင်နာမှု အရိပ်အယောင်တစ်ခုမျှ မရှိဘဲ အဆုံးမဲ့ အေးစက်မှုသာ ရှိသည်။
မရေမတွက်နိုင်သော လူများ၏ ဆုတောင်းသံများနှင့် အသနားခံသံများကို ကြားလိုက်ရသောအခါ သူ မဲ့ပြုံးမပြုံးဘဲ မနေနိုင်ခဲ့ပေ။
လူသားမျိုးနွယ် မဟာဧကရာဇ် ဆင်းသက်လာပြီး ကယ်တင်ဖို့ တောင်းပန်နေကြတာလား။
တကယ့်ကို ရယ်စရာကောင်းလွန်းတယ်။
ယခုအခါ တားမြစ်နယ်မြေမှ အရှင်သခင်အားလုံး ဆင်းသက်လာကြပြီဖြစ်ရာ... လူသားမျိုးနွယ် ဧကရာဇ်တစ်ပါး အမှန်တကယ် ရောက်လာခဲ့လျှင်ပင်... ဤလူများ၏ ကံကြမ္မာကို လုံးဝ ပြောင်းလဲနိုင်မည် မဟုတ်ပေ။
" ဟမ် "
သူ၏ မြင့်မြတ်သောအာရုံသည် အဆုံးမဲ့ကမ္ဘာမြေပြင်ကို ဖြတ်ကျော်ကြည့်ရှုလိုက်ချိန်တွင် ချန်ဧကရာဇ်သည် တစ်စုံတစ်ခုကို ရုတ်တရက် အာရုံခံမိလိုက်သလို ဖြစ်သွား၏။
အရှေ့ပိုင်းစွန့်ပစ်ဒေသ တာအိုနယ်မြေ၏ ကျယ်ပြန့်သော မြေပြင်ပေါ်တွင်... လေဟာနယ်အက်ကွဲကြောင်းတစ်ခု ရုတ်တရက် ပေါက်ကွဲထွက်ပေါ်လာပြီး... အဆုံးမဲ့ ဧကရာဇ်အဆင့် ချီစွမ်းအားများကို သယ်ဆောင်လျက်... ကမ္ဘာလောကသို့ ကိုယ်ထင်ပြလာသည်။
လေဟာနယ်အက်ကွဲကြောင်း၏ တစ်ဖက်တွင် အံ့သြဖွယ်ရာ ခမ်းနားသော မြင်ကွင်းတစ်ခု ရှိနေသည်။
ကြက်သွေးရောင်၊ ရွှေရောင်နှင့် မည်းနက်သောအရောင်များ ယှက်နွယ်နေသည့် ကျယ်ပြောလှသော သမုဒ္ဒရာကြီးတစ်ခုအပေါ်တွင် ရှေးဟောင်းကျွန်းတစ်ကျွန်း မျောပါနေ၏။
ရှေးဟောင်းကျွန်းပေါ်တွင် ယင်ယန်မိခင်သစ်ပင်များ ရပ်တည်နေပြီး... ကြီးမားသော ယင်နှင့် ယန်စွမ်းအားများကို လှည့်ပတ်စီးဆင်းစေကာ... ကောင်းကင်ကြီးကိုပင် အဖြူနှင့် အမည်း... အရောင်နှစ်မျိုးအဖြစ် ဆေးဆိုးသွားလေ၏။
ချန်ဧကရာဇ်၏ နှလုံးသားကို ပိုမိုတုန်လှုပ်သွားစေသည့်အရာမှာ... ယင်ယန်မိခင်သစ်ပင်များအောက်တွင် တည်ရှိနေသော... ရှေးဟောင်းခေါင်းတလားနှစ်လုံးပင် ဖြစ်သည်။
ထိုရှေးဟောင်းခေါင်းတလားနှစ်လုံးဘေးတွင်... ပုံရိပ်တစ်ခု တိတ်ဆိတ်စွာ ရပ်နေပြီး... သူ့အား စကားတစ်ခွန်းမျှမဆိုဘဲ ကြည့်နေလေသည်။
အခန်း (၁၉၄) - နှမြောစရာကောင်းခြင်း၊ သွေးစွန်းသောလက်မောင်းများနှင့် ရှေးဟောင်းဧကရာဇ်အား မျိုချလိုက်သည့် ခေါင်းတလား
ထိုပုံရိပ်ကား မည်သို့သော ပုဂ္ဂိုလ်နည်း။
အစိမ်းရောင်ဝတ်ရုံကို ရိုးရှင်းစွာ ဝတ်ဆင်ထားပြီး တိတ်ဆိတ်စွာ ရပ်နေသော်လည်း... ဘုံသုံးပါးနှင့် ဘဝလမ်းခြောက်သွယ်ကို လွှမ်းမိုးနိုင်သည့်... ပြိုင်ဘက်ကင်း အရှိန်အဝါကို ထုတ်လွှတ်နေသည်။ ထာဝရကာလနှင့် စကြာဝဠာတစ်ခုလုံးကို ဖြတ်ကျော်နိုင်စွမ်းရှိသော ပုံရိပ်တစ်ခုပင်။
ထိုပုံရိပ်၏ ဘေးတစ်ဖက်တစ်ချက်စီတွင်... ကြက်သွေးရောင် ရှေးဟောင်းခေါင်းတလားနှစ်လုံး လဲလျောင်းနေပြီး... သွေးပျက်ဖွယ်ကောင်းသော အငွေ့အသက်များ ရှိနေ၏။
လူသားမျိုးနွယ်ဧကရာဇ် လျှို့ဝှက်နယ်မြေ ပေါ်ထွက်လာခြင်းပင်။
ယင်ယန်မိခင်သစ်ပင်နှစ်ပင်သည် တောက်ပနေပြီး... ကောင်းကင်ကို အုပ်မိုးထားသော ထီးကြီးတစ်လက်ကဲ့သို့... အဆုံးမဲ့ယင်ယန်တာအိုနိယာမများသည် အဆုံးမဲ့တိုက်ကြီးတစ်ခုလုံး၏ ကောင်းကင်အသွင်အပြင်ကိုပင်... ပြောင်းလဲသွားစေသည်။
" မင်းက ဘယ်သူလဲ "
ချန်ဧကရာဇ်သည် ယင်ယန်မိခင်သစ်ပင်အောက်တွင် ရပ်နေသော အစိမ်းရောင်ဝတ်ရုံနှင့် လူကို စိုက်ကြည့်လိုက်သည်။ သူ၏ မျက်လုံးများထဲတွင် ဟွမ်သွမ့်စွမ်းအားများ လည်ပတ်နေပြီး ထိုလူ မည်သူမည်ဝါဖြစ်ကြောင်းကို တွေးတောနေသည်။
" ငါ့နာမည်က ဖူရှီးပါ "
အစိမ်းရောင်ဝတ်ရုံနှင့် အဘိုးအိုသည် ဘေးနားရှိ ခေါင်းတလားကို ပွတ်သပ်ရင်း တည်ငြိမ်စွာ ပြောလိုက်သည်။
ဖူရှီး.....
ချန်ဧကရာဇ် အံ့အားသင့်သွား၏။ သူ ဤနာမည်ကို တစ်ခါမှ မကြားဖူးသလိုပင်။
" ဖူရှီး... အဲ့ဒါ ဟိုတုန်းက လူသားမျိုးနွယ်ဧကရာဇ်ရဲ့ နာမည် မဟုတ်လား "
အလယ်ပိုင်းဒေသနယ်မြေရှိ... ရှေးဟောင်းအရှင်သခင်တစ်ပါးသည် တစ်စုံတစ်ခုကို အာရုံခံမိလိုက်သကဲ့သို့... အရှေ့ပိုင်းစွန့်ပစ်ဒေသ တာအိုနယ်မြေဆီသို့ လှမ်းကြည့်ကာ... အံ့သြတကြီး ရေရွတ်လိုက်သည်။
" လူသားမျိုးနွယ်ဧကရာဇ်လား "
ချန်ဧကရာဇ်၏ မျက်လုံးများထဲတွင်... အံ့သြမှုအရိပ်အယောင် အနည်းငယ် ပေါ်လာသော်လည်း... လျင်မြန်စွာပင် ပြန်လည်တည်ငြိမ်သွားကာ... သူ၏အသံမှာလည်း အေးစက်စက်ပုံစံသို့ ပြန်ရောက်သွား၏။
" နောက်မှ ပေါ်လာတဲ့သူ တစ်ယောက်ပဲကိုး... ငါက အရေးကြီးတဲ့ပုဂ္ဂိုလ်များလားလို့ "
ချန်ဧကရာဇ်သည် ရှေးဟောင်းခေတ်ဦးကာလကတည်းက တာအိုအောင်မြင်ခဲ့သူဖြစ်သည်။ ရှေးဟောင်းတားမြစ်နယ်မြေများအတွင်း အိပ်စက်နေကြသော အရှင်သခင်များကြားတွင်ပင် သူသည် သက်တမ်းအရှည်ကြာဆုံး အုပ်စုဝင်ဖြစ်သည်။
ထိုစဉ်က သူ တာအိုအောင်မြင်ချိန်၌ လူသားမျိုးနွယ်သည် ထင်ရှားခြင်းမရှိသေးသလို လူသားမျိုးနွယ်ဧကရာဇ်လည်း မပေါ်ထွန်းသေးချေ။ ထို့ကြောင့် တစ်ဖက်လူ၏ နာမည်ကို မကြားဖူးသည်မှာ သဘာဝကျပေသည်။
သို့သော် နယ်မြေကြီးငါးခုမှ သက်ရှိများသည် ရှေးဟောင်းအရှင်သခင်ထံမှ "လူသားမျိုးနွယ်ဧကရာဇ်" ဟူသော စကားလုံးကို ကြားလိုက်ရသောအခါ ချက်ချင်းပင် စိတ်လှုပ်ရှားသွားကြသည်။
ရေနစ်နေသူတစ်ဦးက ကောက်ရိုးတစ်မျှင်ကို လှမ်းဆွဲမိလိုက်သကဲ့သို့... သူတို့၏ မျှော်လင့်ချက်အပြည့်ပါသော အကြည့်များကို... အစိမ်းရောင်ဝတ်ရုံနှင့် ပုံရိပ်ထံသို့ ပို့လိုက်ကြသည်။
" လူသားမျိုးနွယ်ဧကရာဇ်... အဲ့ဒါ ငါတို့လူသားမျိုးနွယ်ရဲ့ ဘိုးဘေးပဲ "
" သူ့ရဲ့ သားစဉ်မြေးဆက်တွေ ဒုက္ခရောက်နေတာမြင်ပြီး လာကယ်တာလား "
" ဟားဟားဟား... ငါတို့လူသားမျိုးနွယ်ဘိုးဘေး ဆင်းသက်လာပြီ... ငါတို့ကို ကာကွယ်ပေးဖို့ လာတာ သေချာတယ်... ငါတို့ လွတ်မြောက်ပြီ "
မရေမတွက်နိုင်သော လူသားမျိုးနွယ်များသည် ဝမ်းသာမျက်ရည်ကျကာ ကယ်တင်ခံရပြီဟု ခံစားလိုက်ကြရသည်။
လူသားမျိုးနွယ်ဧကရာဇ်ဆိုသည်မှာ လူသားမျိုးနွယ်၏ ဘိုးဘေးဖြစ်သည်။
လူသားမျိုးနွယ်မှ မွေးဖွားလာသော ဧကရာဇ်အဆင့် ကျင့်ကြံသူများစွာကြားတွင်ပင် သူသည် အမြင့်မြတ်ဆုံးနှင့် အခန့်ညားဆုံး နေရာတွင် ရှိနေသည်။
ယခု လူသားမျိုးနွယ်ဧကရာဇ် ဆင်းသက်လာခြင်းသည် လူသားမျိုးနွယ်ကို ကာကွယ်ရန် မဟုတ်လျှင် အခြား ဘာဖြစ်နိုင်မည်နည်း။
" လူသားမျိုးနွယ်ကို ကာကွယ်မယ် ဟုတ်လား "
သက်ရှိအပေါင်း၏ အသံများသည် ချန်ဧကရာဇ်၏ နားထဲသို့ ရောက်ရှိသွား၏။ သူသည် ယင်ယန်တာအိုသစ်ပင်အောက်တွင် ရပ်နေသော ပုံရိပ်ကို ကြည့်ကာ... မျက်နှာပေါ်တွင် အေးစက်သော အပြုံးတစ်ခု ပေါ်လာပြီး... တစ်ဖက်လူ၏ အခြေအနေကို အကဲခတ်မိသွားသကဲ့သို့ ပြောလိုက်သည်။
" ဝိညာဉ်အကြွင်းအကျန်လေးတစ်ခုပဲကို... လူသားမျိုးနွယ်ကို ကာကွယ်နိုင်ပါ့မလား "
ယင်ယန်တာအိုသစ်ပင်အောက်တွင် ရပ်နေသော ပုံရိပ်သည်... အတိတ်က ကုချင်းရွဲ့နှင့် အခြားသူများကို ကောင်းချီးပေးခဲ့သော... လူသားမျိုးနွယ်ဧကရာဇ်၏ ဝိညာဉ်အကြွင်းအကျန်ပင် ဖြစ်သည်။
ချန်ဧကရာဇ်၏ စွမ်းအားဖြင့်ဆိုလျှင် ဤအချက်ကို တစ်ချက်ကြည့်ရုံဖြင့် သိမြင်နိုင်သည်။
ဝိညာဉ်အကြွင်းအကျန် သက်သက်သာ ဖြစ်ပြီး... မူလခန္ဓာကိုယ်သည် ပျက်စီးသွားခဲ့သည်မှာ ကြာလောက်ပြီဖြစ်သော သူအား... လူသားမျိုးနွယ်ကို ကာကွယ်မည်ဟု ပြောရဲသေးသည်လော။
တကယ့်ကို ရယ်စရာကောင်းလွန်းတယ်.....
ဝိညာဉ်အကြွင်းအကျန်တဲ့လား.....
နယ်မြေကြီးငါးခုမှ လူသားမျိုးနွယ်များသည် ချန်ဧကရာဇ်၏ အထင်သေးသော စကားများကို ကြားလိုက်ရသောအခါ မျက်နှာများ ဖြူဖျော့သွားကြ၏။
လူသားမျိုးနွယ်ဧကရာဇ်တောင်မှ သူတို့ကို မကယ်နိုင်တော့ဘူးလား။
" ဒီလိုအချိန်မျိုးမှာ ဒီနေရာကို ရှာတွေ့တာက ငါ့အတွက် ကံကောင်းမှုတစ်ခုလို့ ပြောလို့ရတာပဲ "
ချန်ဧကရာဇ်သည် ရှေးဟောင်းကျွန်းပေါ်ရှိ ယင်ယန်မိခင်သစ်ပင်များကို ကြည့်လိုက်ပြီး သူ၏ မျက်လုံးများထဲတွင် နှစ်သက်သဘောကျမှုများ ပေါ်လာသည်။
နှစ်ပေါင်းများစွာ ရှင်သန်လာခဲ့သော ရှေးဟောင်းအရှင်သခင်တစ်ပါးအနေဖြင့်... သူသည် အင်မော်တယ်မြင့်မြတ်ဆေးဝါးများကို စားသုံးခဲ့ဖူးသည်မှာ... သဘာဝကျပေသည်။ သာမန် အင်မော်တယ်မြင့်မြတ်ဆေးဝါးများသည်... သူ၏အသက်ကို ဆက်လက် မဆွဲဆန့်ပေးနိုင်တော့ပေ။
သို့သော် ဤရှေးဟောင်းကျွန်းပေါ်ရှိ ယင်ယန်မိခင်သစ်ပင်များထက်မှ သာမန် အင်မော်တယ်မြင့်မြတ်ဆေးဝါးများကို ကျော်လွန်သော အငွေ့အသက်ကို သူ အာရုံခံမိလိုက်သည်။
ဤမိခင်သစ်ပင်နှစ်ပင်ကို သန့်စင်စားသုံးလိုက်ပါက... အံ့ဖွယ်အာနိသင်များ ရရှိနိုင်ပြီး... သူ၏အခြေအနေကို ပိုမိုကောင်းမွန်အောင် ပြန်လည်ကုစားပေးနိုင်လိမ့်မည်။
အခြားသော တားမြစ်နယ်မြေမှ အရှင်သခင်များသည်လည်း ဤအချက်ကို သတိပြုမိကြပြီး ချန်ဧကရာဇ်အား မနာလိုသော အကြည့်များဖြင့် လှမ်းကြည့်လိုက်ကြသည်။
သို့သော် ထိုရှေးဟောင်းအရှင်သခင်များသည် အနည်းငယ် မနာလိုဖြစ်ရုံသာဖြစ်ပြီး ချန်ဧကရာဇ်၏ ကံကောင်းမှုကို လုယူရန် ဆန္ဒမရှိကြပေ။
သူတို့အတွက် ယခုအချိန်တွင် အကြီးမားဆုံး ကံကောင်းမှုမှာ... ကောင်းကင်ချောက်နက်ကို ဖောက်ထွက်ပြီး... အင်မော်တယ်အဆင့် တက်လှမ်းခြင်းသာ ဖြစ်သည်။ လူသားမျိုးနွယ်ဧကရာဇ်၏ လျှို့ဝှက်နယ်မြေသည်... ချန်ဧကရာဇ်၏ နယ်မြေတွင် ပေါ်ထွန်းလာခြင်းဖြစ်ရာ... ၎င်းသည် ချန်ဧကရာဇ်နှင့်သာ သက်ဆိုင်ပေသည်။ သူတို့သည် ပိုကြီးမားသော ရည်မှန်းချက်ကို မျက်ကွယ်မပြုလိုကြသလို... ကောင်းကင်ချောက်နက်သို့ ဝင်ရောက်ပြီး အင်မော်တယ်တက်လှမ်းမည့် အစီအစဉ်ကိုလည်း... မနှောင့်နှေးစေလိုကြပေ။
ချန်ဧကရာဇ်သည် အကြံတစ်ခုဖြင့်... ရှေးဟောင်းတာအိုနယ်မြေပေါ်သို့ တည်ငြိမ်စွာ ဆင်းသက်လိုက်ပြီး... လူသားမျိုးနွယ်ဧကရာဇ်၏ ဝိညာဉ်အကြွင်းအကျန်ကို လျစ်လျူရှုထားလိုက်သည်။ သူသည် ယင်ယန်မိခင်သစ်ပင်နှစ်ပင်ကို လက်ဖြင့် ပွတ်သပ်ရင်း... အနည်းငယ် ခေါင်းညိတ်ကာ " မဆိုးဘူး...တကယ့်ကို မြင့်မြတ်တဲ့အရာတွေပဲ... ငါ ပြန်လည်သက်သာလာဖို့အတွက် အများကြီး အသုံးဝင်လိမ့်မယ် " ဟု ရေရွတ်လိုက်သည်။
ဤယင်ယန်မိခင်သစ်ပင်နှစ်ပင်သည် သူ၏ပိုင်ဆိုင်မှု ဖြစ်သွားပြီဟု သတ်မှတ်ပြီးနောက်... ချန်ဧကရာဇ်၏ အကြည့်သည် လူသားမျိုးနွယ်ဧကရာဇ် ဝိညာဉ်အကြွင်းအကျန်၏ ဘေးတွင် ရှိနေသော ခေါင်းတလားနှစ်လုံးဆီသို့ ရောက်သွားပြီး... မျက်လုံးထဲတွင် မေးခွန်းထုတ်လိုသည့် အရိပ်အယောင်များ ပေါ်လာ၏။
" မြှုပ်နှံဖို့အတွက် ခေါင်းတလား တစ်လုံးပဲ လိုတာလေ... ဒီမှာက နှစ်လုံးတောင် ရှိနေတယ်... ဒါက ဘာသဘောလဲ "
ချန်ဧကရာဇ်၏ အသံသည် အေးစက်နေပြီး... လူသားမျိုးနွယ်ဧကရာဇ် ဝိညာဉ်အကြွင်းအကျန်ကို မေးခွန်းထုတ်ကာ... အဖြေကို စောင့်ဆိုင်းနေသကဲ့သို့ ဖြစ်နေသည်။
သို့သော် ချန်ဧကရာဇ်၏ မေးခွန်းကို ရင်ဆိုင်ရချိန်တွင် လူသားမျိုးနွယ်ဧကရာဇ် ဝိညာဉ်အကြွင်းအကျန်သည် မျက်လွှာချကာ တိတ်ဆိတ်နေလိုက်သည်။
" ဟွန့်... လူသားမျိုးနွယ်ဧကရာဇ် အသက်ရှင်နေရင်တောင် ငါ့အတွက်တော့ လူငယ်လေး တစ်ယောက်သာသာပဲ... မင်းက ဝိညာဉ်အကြွင်းအကျန်လေး ဖြစ်နေပြီးတော့ ငါ့ရှေ့မှာ မာန်တက်ရဲသေးတယ်ပေါ့ "
လူသားမျိုးနွယ်ဧကရာဇ် ဝိညာဉ်အကြွင်းအကျန်၏ သဘောထားကြောင့် ချန်ဧကရာဇ်သည် မကျေမနပ် ဖြစ်သွားလေသည်။
" မင်း စကားမပြောချင်မှတော့ ငါ့ဘာသာ စစ်ဆေးရတာပေါ့ "
စကားဆုံးသည်နှင့် ချန်ဧကရာဇ်သည် ရှေ့သို့ လှမ်းသွားပြီး... ရှေးဟောင်းခေါင်းတလားတစ်လုံး၏ ဘေးသို့ ရောက်ရှိသွားသည်။ သူသည် ခေါင်းတလားကို ဖွင့်ရန်... လက်ကို မြှောက်လိုက်လေသည်။
" ဟူး..... "
ဤအချိန်တွင် လူသားမျိုးနွယ်ဧကရာဇ် ဝိညာဉ်အကြွင်းအကျန်သည် သက်ပြင်းတစ်ချက် ချလိုက်၏။
သူသည် ရှေးဟောင်းခေါင်းတလားကို ဖွင့်တော့မည့် ချန်ဧကရာဇ်ကို ကြည့်ကာ တည်ငြိမ်စွာ သတိပေးလိုက်၏။
" ဒီခေါင်းတလားကို ဖွင့်လိုက်တာက မင်းအတွက် ကောင်းတဲ့ကိစ္စ မဟုတ်လောက်ဘူး "
" ဟက်...! ဟန်ဆောင်နေတာပဲ... ခေါင်းတလားတစ်လုံးက ငါ့ကို ဘာလုပ်နိုင်မှာမို့လို့လဲ "
လူသားမျိုးနွယ်ဧကရာဇ် ဝိညာဉ်အကြွင်းအကျန်၏ သတိပေးစကားကို ချန်ဧကရာဇ်သည် လုံးဝ လျစ်လျူရှုလိုက်၏။
သူက... အသက်ရှင်နေတဲ့ လူသားမျိုးနွယ်ဧကရာဇ်ကိုတောင် မကြောက်တာ... သေလူတစ်ယောက်ကို ကြောက်ရမှာလား။
ချန်ဧကရာဇ်သည် မထီမဲ့မြင်ပြုကာ ရှေးဟောင်းခေါင်းတလားကို လှမ်းကိုင်လိုက်၏။
" ကျွီ..... "
ကြီးလေးသော အသံတစ်သံ ထွက်ပေါ်လာသည်နှင့်အမျှ... အမြဲတစေ ပိတ်ထားခဲ့သော ခေါင်းတလားအဖုံးသည်... ချန်ဧကရာဇ်၏ တွန်းဖွင့်မှုကြောင့် ဖြည်းညင်းစွာ ပွင့်သွားပြီး... သူ၏ အကြည့်သည်လည်း ခေါင်းတလားထဲသို့ ရောက်ရှိသွား၏။
ခေါင်းတလားအဖုံး ပွင့်သွားသည်နှင့် အတွင်းမှ ဟွမ်သွမ့်ချီလှိုင်းများ လျှံထွက်လာလေသည်။
ချန်ဧကရာဇ်သည် ခေါင်းတလားအတွင်းသို့ စိုက်ကြည့်လိုက်၏။
ရုတ်တရက် ချန်ဧကရာဇ်၏ မျက်နှာပေါ်တွင် အံ့အားသင့်ခြင်းနှင့် တုန်လှုပ်ခြင်းများ ပေါ်လာခဲ့သည်။
" ဒါက..... "
သို့သော် သူ၏ စကားမဆုံးခင်မှာပင်... သွေးစွန်းနေသော လက်မောင်းတစ်ဖက်သည်... ခေါင်းတလားအတွင်းမှ ရုတ်တရက် ဆန့်ထွက်လာပြီး... လက်ချောင်းငါးချောင်းဖြင့် ချန်ဧကရာဇ်၏ ကိုယ်ခန္ဓာကို ကြမ်းတမ်းစွာ ဖမ်းဆုပ်ကာ... ခေါင်းတလားထဲသို့ တိုက်ရိုက် ဆွဲသွင်းလိုက်လေတော့သည်။
သွေးစွန်းလက်မောင်းတွင် ဖော်ပြ၍မရနိုင်သော နတ်ဆိုးစွမ်းအားများ ပါဝင်နေပုံရသည်။ အစမှ အဆုံးထိ ချန်ဧကရာဇ်သည် အနည်းငယ်မျှပင် ပြန်လည်ခုခံနိုင်ခြင်း မရှိခဲ့ပေ။
" ဝုန်း...! "
နောက်ထပ် ကျယ်လောင်သော အသံတစ်သံနှင့်အတူ... သွေးစွန်းလက်မောင်းက ချန်ဧကရာဇ်အား ခေါင်းတလားထဲသို့ ဆွဲသွင်းပြီးနောက်... ပွင့်နေသော ခေါင်းတလားအဖုံးသည်လည်း လေမတိုက်ဘဲ... အလိုအလျောက် ရွေ့လျားကာ ပြန်ပိတ်သွားတော့သည်။
" ဒုန်း... ဒုန်း...! "
ရှေးဟောင်းခေါင်းတလားအတွင်းမှ တိုးညင်းသော အသံအုပ်အုပ်များ ထွက်ပေါ်လာ၏။
ထိုရှေးဟောင်းခေါင်းတလား အနည်းငယ် တုန်ခါနေသည်ကို ဝေဝါးစွာ မြင်တွေ့နိုင်သည်။
သို့သော် ထိုတုန်ခါမှုသည် အချိန်တိုလေးသာ ကြာမြင့်ပြီး ပြန်လည် ငြိမ်သက်သွား၏။
ထို့နောက် ပိုမိုသွေးပျက်ဖွယ်ကောင်းပြီး ကြောက်မက်ဖွယ်ကောင်းသော မြင်ကွင်းတစ်ခု ပေါ်လာခဲ့သည်။
လတ်ဆတ်သော သွေးနီရောင်များသည်... ခေါင်းတလား၏ အက်ကြောင်းများကြားမှ မရပ်မနား စိမ့်ထွက်လာပြီး... ခေါင်းတလားတစ်ခုလုံးကို စွန်းထင်းသွားစေခဲ့သည်။ ဆွဲဆောင်မှုရှိသလို... ကြောက်မက်ဖွယ်လည်း ကောင်းလှပေသည်။