အခန်း (၁၉၉-၂၀၀)
Vol. 15 Ch. 199-200
အခန်း (၁၉၉) - ယွမ်ကျွင်း ပြန်ပေါ်လာခြင်း၊ ဖြေရှင်းမရနိုင်သော ပူးပေါင်းကြံစည်မှုနှင့် ကုချန်အတွက် ထောင်ချောက်ဆင်ခြင်း
" ဒါ... သူ ဘယ်လိုဖြစ်နိုင်မှာလဲ "
ကုချင်းရွဲ့သည် မသိစိတ်ဖြင့်... တီးတိုးရေရွတ်လိုက်ရာ သူ၏အသံ၌... မယုံကြည်နိုင်မှုများ ပြည့်နှက်လျက်ရှိသည်။
ထိုအသံကို သူ အမှန်တကယ်ပင် ကြားဖူးခဲ့သည်။
၎င်းသည် ဧကရာဇ်မဟာမိတ်အဖွဲ့၏ မဟာဧကရာဇ်ဖြစ်သော ယွမ်ကျွင်းမဟာဧကရာဇ်၏ အသံ မဟုတ်ပါလော။
သိမ်မွေ့သော ရယ်သံတစ်ခု ပဲ့တင်ထပ်လာစဉ်... ကြီးမားသော အက်ကွဲကြောင်းနောက်မှ အရိပ်တစ်ခုသည် ပေါ်လာပြီး... အက်ကွဲကြောင်းကို ကျော်လွန်၍... အထက်ကောင်းကင်တားမြစ်နယ်မြေကို သက်သောင့်သက်သာ ရပ်လျက် ငုံ့ကြည့်နေသည်ကို... ဝိုးတဝါး တွေ့မြင်ရလေသည်။
လှုပ်ရှားမှု ပြုလုပ်ခဲ့သူမှာလည်း သူပင် ဖြစ်ပေသည်။
ယွမ်ကျွင်းမဟာဧကရာဇ်ပင်တည်း။
ထိုပုံရိပ်ကို မြင်သောအခါ ကမ္ဘာလောကတစ်ခုလုံး ဆူပွက်သွားခဲ့သည်။
ယွမ်ကျွင်းမဟာဧကရာဇ်လား။
ဤဧကရာဇ်မဟာမိတ်အဖွဲ့၏ ဧကရာဇ်သည် ထိုစဉ်က အဆုံးမဲ့ကမ္ဘာ၏ ပြင်ပ၌ ကောင်းကင်ဘုံအရှင်သခင်၏ အသတ်ခံခဲ့ရခြင်း မဟုတ်ပါလော။
ယခု အဘယ်ကြောင့် သူသည် တစ်ဖန်ပြန်လည် အသက်ဝင်၍ 'ရှင်သန်' လာရပြန်သနည်း။
ဤသည်မှာ လုံးဝ ယုတ္တိမတန်ပေ။
...
ကောင်းကင်တားမြစ်နယ်မြေ အတွင်း၌.....
ကုချန်သည် သက်သောင့်သက်သာ ရပ်လျက်... ကောင်းကင်ဘုံကိုးခု၏ နက်ရှိုင်းရာမှ ကျဆင်းလာသော... ဧရာမလက်ဝါးကြီးကို ကြည့်နေခဲ့သည်။ သူ၏ အကြည့်၌ မည်သည့် အံ့ဩမှုမျှ မရှိပေ။
ထိုစဉ်က ယွမ်ကျွင်း၏ သေဆုံးမှုသည် အလွန်ရိုးရှင်းပြီး ထူးခြားမှုမရှိခဲ့ခြင်းကြောင့်... ကုချန်သည် တစ်စုံတစ်ရာ မှားယွင်းနေကြောင်းကို... ဝိုးတဝါး ခံစားမိခဲ့သည်။ ယခု ယွမ်ကျွင်း ပြန်လည်ပေါ်ထွက်လာပြီး... အသက်ပြန်ရှင်လာခြင်းမှာ ကုချန်အတွက်... မျှော်မှန်းထားပြီးသည့် ဖြစ်ရပ်တစ်ခုမျှသာ ဖြစ်လေသည်။
ထို့အပြင် အသက်ပြန်ရှင်လာသည့် ကိစ္စသည်... သာမန်သတ္တဝါများကို ကြောက်ရွံ့ထိတ်လန့်စေနိုင်သော်လည်း... ကုချန်အတွက်မူ အရေးအကြောင်း မရှိပေ။
ယွမ်ကျွင်းကို တစ်ကြိမ်သတ်နိုင်ခဲ့လျှင်... နှစ်ကြိမ်၊ သုံးကြိမ်လည်း သတ်နိုင်ပေသည်။
စွမ်းအားတွင် လုံးဝကွာဟမှုရှိနေသည့် သူ၏ရှေ့မှောက်၌... ယွမ်ကျွင်းသည် အမှန်တကယ် ပြန်လည်ရှင်သန်နိုင်စွမ်းရှိသည်ပင် ဖြစ်စေကာမူ... သူ၏ဆင်းရဲဒုက္ခကိုသာ တိုးစေလိမ့်မည် ဖြစ်၏။
ကုချန်၏ နတ်အသိစိတ်သည် မည်သည့်မြင်သာသော လှုပ်ရှားမှုမျှ မပြုလုပ်ဘဲ အနည်းငယ် လှုပ်ရှားသွားသည်။
ဤကမ္ဘာလောက၏ အဆုံးမဲ့တာအိုနှင့် နိယာမများအားလုံးသည် ဟိန်းသံပေးကာ သူ၏ဆန္ဒအတိုင်း လှုပ်ရှားလျက် ကောင်းကင်တစ်ခွင်တွင် နိယာမနဂါးကြီးအဖြစ် ပြောင်းလဲသွား၏။ ချက်ချင်းဆိုသလို ကောင်းကင်ကို ဖုံးအုပ်ထားသည့် ဧရာမလက်ဝါးကြီးကို စုတ်ပြဲသွားစေကာ အဆုံးမဲ့ ကောင်းကင်ဘုံကိုးခု၏ နက်ရှိုင်းရာဆီသို့ ပျံသန်းသွားလေသည်။
" ငါကိုယ်တော်ဆီ ဆင်းလာခဲ့ "
ကုချန်သည် လျစ်လျူရှုဟန်ဖြင့် ပြောဆိုလိုက်သည်။
ကောင်းကင်ကို ဖုံးအုပ်ထားသော ဧရာမလက်ဝါး၏ ပိတ်ဆို့မှုကို ဖြတ်ကျော်ပြီးနောက်... ထိုနိယာမနဂါးကြီးသည်လည်း အလားတူပင် လက်တစ်ဖက်အဖြစ် ပြောင်းလဲသွားကာ... ကောင်းကင်ဘုံကိုးခုကို ဖုံးလွှမ်းပြီး ကောင်းကင်ယံရှိ အက်ကွဲကြောင်းနောက်ရှိ... ယွမ်ကျွင်းမဟာဧကရာဇ်ကို ဆုပ်ကိုင်ဖမ်းယူလိုက်သည်။
ထိုအချိန်တွင် ကောင်းကင်နှင့် မြေကြီး၏ အဆုံးမဲ့တာအိုများ ခိုင်မာသွားသကဲ့သို့ ဖြစ်သွားသည်။
ကောင်းကင်ယံရှိ အက်ကွဲကြောင်းနောက်မှ ယွမ်ကျွင်းမဟာဧကရာဇ်သည်ပင်... ထိတ်လန့်တုန်လှုပ်နေပုံရပြီး သူ၏ခန္ဓာကိုယ်သည် တစ်လက်မမျှပင် မလှုပ်ရှားနိုင်တော့ဘဲ... ဧရာမလက်ဝါးကြီးအတွင်း၌ အရှင်ဖမ်းခံလိုက်ရလေ၏။
" အာ... ဒီကောင်က အရေးပါတဲ့ တစ်ယောက်ယောက်လို့ ထင်ခဲ့တာ... အရူးတစ်ယောက်ပဲ ဖြစ်နေတာကိုး "
ကုချန်၏လက်ဝါးထဲတွင် အလွယ်တကူ ဖမ်းဆီးခံလိုက်ရသော ယွမ်ကျွင်းမဟာဧကရာဇ်ကို ကြည့်ရင်း... ကုမိသားစုရွာအဝင်ဝကို စောင့်ကြပ်နေသည့် နတ်မျောက်ဝံသည် မထီမဲ့မြင် ရယ်မောခြင်းကို... မထုတ်ဖော်ဘဲ မနေနိုင်တော့ပေ။
ယွမ်ကျွင်းမဟာဧကရာဇ် အထက်ကောင်းကင်တားမြစ်နယ်မြေကို တိုက်ခိုက်ခဲ့စဉ်က... ဤလူသားမျိုးနွယ်ဧကရာဇ်သည် တစ်စုံတစ်ရာ ထူးခြားသော နည်းလမ်းများ မဟုတ်လျှင်... ပုန်းကွယ်ထားသော စွမ်းအားများ ရှိကောင်းရှိမည်ဟု သူ ထင်ခဲ့မိသည်။
ယခုကြည့်ရသည်မှာ ဘာမျှမဟုတ်ပါချေ။
ကောင်းကင်ဘုံအရှင်သခင်သည် မျက်နှာကိုပင် မပြခဲ့ချေ။ လက်ဝါးတစ်ချက်တည်းနှင့်ပင် သူသည် ခုခံနိုင်စွမ်းမရှိတော့ဘဲ တိုက်ရိုက် အဖမ်းခံလိုက်ရသည်။
" ဒီလောက် စွမ်းရည်လေးနဲ့ ကောင်းကင်ဘုံအရှင်သခင်ကို စိန်ခေါ်ရဲတယ်လား... အသက်ရှင်ရတာကို ငြီးငွေ့နေတာပဲ "
အနီးနားရှိ နောက်ထပ် တားမြစ်နယ်မြေဧကရာဇ်တပိုင်းတစ်ဦးကလည်း မထီမဲ့မြင် ပြောဆိုလိုက်သည်။ ဤလူသားမျိုးနွယ်မှ ယွမ်ကျွင်းမဟာဧကရာဇ်သည် ရူးသွပ်နေသည်ဟု သူ ခံစားရသည်။
ကောင်းကင်ဘုံအရှင်သခင်ကို စိန်ခေါ်ရဲသည်... မင်းမှာ ထိုစွမ်းရည်ရှိသလော။
နယ်ပယ်ငါးခုရှိ လူသားမျိုးနွယ်သည် ကုချန်၏ တစ်ချက်ဖမ်းဆီးမှုဖြင့်... ယွမ်ကျွင်းမဟာဧကရာဇ် အဖမ်းခံရသည်ကို မြင်သောအခါ... အားလုံး တိတ်ဆိတ်သွားကြသည်။
အချို့သူများမှာ ဆက်လက်ကြည့်ရှုရန်ပင် မတတ်နိုင်ကြတော့ပေ။
ဤသည်မှာ လူသားမျိုးနွယ်၏ ဧကရာဇ်မဟာမိတ်အဖွဲ့မှ မဟာဧကရာဇ်လော။ သူသည် အလွန်ပင် အားနည်းလွန်း၏။ ကောင်းကင်ဘုံအရှင်သခင်၏ လက်တစ်ဖက်ကိုပင် မချေမှုန်းနိုင်ပေ။
...
ကမ္ဘာတစ်ဝန်းလုံး ဆူပွက်နေချိန်တွင် ကုချန်၏ မျက်ခုံးများသည် အနည်းငယ် ပင့်တက်သွားခဲ့၏။
အကြောင်းမှာ... ယွမ်ကျွင်းမဟာဧကရာဇ်ကို ဖမ်းဆီးလိုက်သောအခါ အခြားတစ်ဖက်သည်... သူ၏ ကိုယ်ပွားအစစ်အမှန်မဟုတ်ဘဲ စွမ်းအားများသာရှိသည့် 'ဗလာခွံ' တစ်ခုမျှသာ ဖြစ်နေကြောင်း... သူ တွေ့ရှိခဲ့ရသောကြောင့်ပင်။
" ဟားဟားဟား... ကောင်းကင်ဘုံအရှင်သခင်... ခင်ဗျား ထပ်ပြီးတော့ ထောင်ချောက်မိသွားပြီ "
ယွမ်ကျွင်းမဟာဧကရာဇ်သည် ဧရာမလက်ဝါးထဲတွင် အဖမ်းခံထားရသော်လည်း... သူ၏မျက်နှာတွင် ထိတ်လန့်မှု အရိပ်အယောင်မရှိ... ထိုအစား အထက်ကောင်းကင်တားမြစ်နယ်မြေဘက်သို့ အဓိပ္ပာယ်ရှိစွာ ကြည့်ကာ.....
" ကုချန်... ခင်ဗျား လွန်ခဲ့တဲ့ နှစ်ပေါင်းကိုးသောင်းက အမှန်တရားကို မသိချင်ဘူးလား... ခင်ဗျားသာ ငါကိုယ်တော်ကို ဖမ်းနိုင်မယ်ဆိုရင်... ငါကိုယ်တော်က အရာအားလုံးကို ပြောပြမှာ သေချာတယ်... ဟားဟားဟား "
ယွမ်ကျွင်းမဟာဧကရာဇ်၏ အနည်းငယ် မောက်မာသော အသံဆုံးသည်နှင့် .. သူ၏ခန္ဓာကိုယ်သည် ရုတ်တရက် ပေါက်ကွဲသွားပြီး... အပြင်ဘက်သို့ ဖျက်ဆီးနိုင်စွမ်းရှိသော စွမ်းအားများ... အဆုံးမရှိ လျှံတက်သွား၏။
ကုချန်၏ အမူအရာ မပြောင်းလဲပေ။ သူသည် သူ၏လက်ဝါးကို အနည်းငယ်သာ ပိတ်လိုက်ပြီး... ကြယ်ပေါင်းများစွာကို ဖျက်ဆီးနိုင်လောက်သည့် ထိုကြောက်မက်ဖွယ်ကောင်းသော စွမ်းအားအားလုံးကို... သူ၏လက်ဝါးအတွင်း၌ပင် ချေဖျက်ပစ်လိုက်သည်။
" လွန်ခဲ့တဲ့ နှစ်ပေါင်းကိုးသောင်းက အမှန်တရား..... "
ကုချန်သည် ယွမ်ကျွင်း ပေါ်ထွက်လာခဲ့သော အက်ကွဲကြောင်းဘက်သို့ ကြည့်လိုက်သည်။
ထိုအက်ကွဲကြောင်းသည် အလယ်ပိုင်းနယ်မြေ၌ ပေါ်ထွက်ခဲ့သော... ကောင်းကင်ချောက်နက်ကြီးနှင့် ဆင်တူနေပြီး... အဆုံးမရှိ နက်နဲဆန်းကြယ်ကာ... အင်မော်တယ်တာအိုဝိညာဉ် ချီလှိုင်းများ ထွက်ပေါ်နေခဲ့သည်။
ထိုတားမြစ်နယ်မြေအရှင်များ အသက်ရှင်နေသေးပါက... ဤမြင်ကွင်းကို မြင်သောအခါ... လုံးဝ ရှုပ်ထွေးသွားမည်မှာ သေချာသည်။
အလယ်ပိုင်းနယ်မြေအထက်မှ ကောင်းကင်ချောက်နက်ကြီးသည်... သူတို့၏ ခန့်မှန်းချက်အရ အင်မော်တယ်နယ်မြေသို့ ဦးတည်သည့်... လမ်းကြောင်းဖြစ်သည်။ ထိုသို့ဆိုလျှင်... အရှေ့ပိုင်းနယ်မြေအထက်၌ ယခုပေါ်လာသော အက်ကွဲကြောင်းသည်... မည်သည့်နေရာသို့ ဦးတည်နေသနည်း။
ဤဆိုရိုးစကားဖြစ်သော... အင်မော်တယ်တက်လှမ်းခြင်းသို့ ဦးတည်သည့် ကောင်းကင်ချောက်နက်လမ်းကြောင်းသည်... ယွမ်ကျွင်းမဟုတ်လျှင် သူ၏နောက်ကွယ်မှ စွမ်းအားနှင့် ဆက်စပ်မှု ရှိနေသည်လော။
ကုချန် စဉ်းစားခန်း ဖွင့်လိုက်၏။
ယွမ်ကျွင်း၏ ကောင်းကင်ချောက်နက် အက်ကွဲကြောင်းနှင့် ဆင်တူသော လမ်းကြောင်းတစ်ခု ပေါ်ထွက်လာအောင် ပြုလုပ်နိုင်စွမ်းသည် သက်သေတစ်ခု ဖြစ်နေသည်။
လူသားဧကရာဇ်၏ အင်မော်တယ်တက်လှမ်းခြင်းသည် လှည့်စားမှုသာ ဖြစ်သည်ဟူသော အတိတ်က သတိပေးစကားနှင့် ပေါင်းစပ်လိုက်လျှင်.....
လှည့်စားမှု... လှည့်စားမှု... လှည့်စားမှု ရှိခဲ့သည့်အတွက်... ထောင်ချောက်ဆင်သူ တစ်ဦးဦး ရှိရမည်သာ။
ဤသည်ကို... ယနေ့ ယွမ်ကျွင်း၏ လုပ်ရပ်များနှင့် ဆက်စပ်လိုက်သောအခါ... အချို့ကိစ္စများကို သက်သေပြနိုင်ပြီ ဖြစ်သည်။
လူသားဧကရာဇ်ပေတံ ကျိုးပဲ့သွားခြင်းနှင့်... လူသားဧကရာဇ် ကျဆုံးသွားခြင်းပင်လျှင်... ဤယွမ်ကျွင်း၏ နောက်ကွယ်မှ စွမ်းအားနှင့်... မကင်းနိုင်ဘဲ ဆက်စပ်နေပေလိမ့်မည်။
" လွန်ခဲ့တဲ့ နှစ်ပေါင်းကိုးသောင်းက အမှန်တရားကို သုံးပြီး... ငါကိုယ်တော်ကို ထောင်ချောက်ထဲဝင်အောင်... ဆွဲဆောင်ချင်တာလား "
ကုချန်သည် ယွမ်ကျွင်း၏ရည်ရွယ်ချက်ကို မြင်နေပြီ ဖြစ်သည်။
ဤသည်မှာ ယွမ်ကျွင်း၏ သိသာသော အစီအမံပင်။
သူသည် တမင်တကာ ငါးစာချ၍... ကုချန်ကို ထောင်ချောက်ထဲသို့ ဆွဲဆောင်ချင်သည်။ အရာအားလုံးကို စားပွဲပေါ်တင်ပေးထားသော်လည်း.....
လွန်ခဲ့သော နှစ်ပေါင်းကိုးသောင်းက အမှန်တရားကို သိချင်သည်မဟုတ်လော။ သတ္တိရှိလျှင် လာရှာလှည့်ပါ။
" စိတ်ဝင်စားစရာတော့ နည်းနည်းကောင်းတယ် "
ကုချန်၏နှုတ်ခမ်းများသည် ရှားရှားပါးပါး ပြုံးလာ၏။
ထိုစဉ်က အဆုံးမဲ့ကမ္ဘာ၏ပြင်ပ၌... ယွမ်ကျွင်းသည် ကောင်းကင်အရှင်သခင်အဆင့် စွမ်းအားများ ပြည့်နှက်နေသော... သက်တမ်းရှည် အမိန့်တော်ကို ထုတ်လွှတ်ခဲ့သော်လည်း... သူသည် အလွယ်တကူ ဖျက်ဆီးပစ်ခဲ့သည်။
ထို့ကြောင့် သူသာ မမိုက်မဲပါက... တူညီသော နည်းလမ်းများသည် ကုချန်အပေါ်... မည်သည့်အကျိုးသက်ရောက်မှုမျှ ရှိမည်မဟုတ်ကြောင်း... သိသင့်သည်။
ထို့ကြောင့် ယနေ့ သူ ပေါ်ထွက်လာပြီး... ကုချန်ကို ထောင်ချောက်ထဲသို့ တက်ကြွစွာ ဆွဲဆောင်ရဲသည်ဆိုခြင်းမှာ... ထိုကောင်းကင်ချောက်နက်ကြီး၏ နောက်ကွယ်တွင်... ကောင်းကင်အရှင်သခင်အဆင့် စွမ်းအားထက်ပင် ပိုမိုကြောက်မက်ဖွယ်ကောင်းသော... တစ်စုံတစ်ရာ ရှိနေကြောင်း သက်သေပြနေသည်။
ကောင်းကင်အရှင်သခင်အဆင့်ကို ကျော်လွန်နေတဲ့ စွမ်းအားလား။
ကုချန်၏ စိတ်ဝင်စားမှုမှာ အနည်းငယ် မြင့်တက်လာ၏။
ဧကရာဇ်အဆင့်သို့ စတင်ဝင်ရောက်လာသည့်အချိန်မှစ၍... သူသည် မည်သည့်သင့်လျော်သော ပြိုင်ဘက်ကိုမျှ... မတွေ့ဆုံခဲ့ရပေ။ အထူးသဖြင့် ဧကရာဇ်အဆင့်အထွတ်အထိပ်သို့ ဖောက်ထွင်းဝင်ရောက်ပြီး... ဧကရာဇ်နယ်ပယ်သို့ ဝင်ရောက်ပြီးနောက် ကုချန်အတွက် ပြိုင်ဘက်ရှာရန်... ပို၍ပင် မဖြစ်နိုင်တော့ပေ။
သူ၏မျက်လုံးများ၌ ကောင်းကင်အရှင်သခင်အဆင့်ဆိုသည်မှာ... ချီပင်လယ်အဆင့်ရှိ သေးငယ်သော ကျင့်ကြံသူတစ်ဦးနှင့် မခြားနားပေ။ လက်ဝါးတစ်ချက်တည်း၏ ကိစ္စသာ ဖြစ်၏။
ယခု ယွမ်ကျွင်းသည် ကုချန်အတွက် တမင်တကာ ထောင်ချောက်ဆင်နေ၏။ သူ မမိုက်မဲပါက... ကုချန်အတွက် ပြင်ဆင်ထားသော ထောင်ချောက်၌... ကောင်းကင်အရှင်သခင်အဆင့်ကို ကျော်လွန်သော စွမ်းအားရှိသူ ရှိရမည်သာ။
ကောင်းကင်အရှင်သခင်အဆင့်ကို ကျော်လွန်သော စွမ်းအားသည် ဧကရာဇ် သို့မဟုတ် အင်မော်တယ် ဖြစ်မည်လော။
ကုချန်သည် မျှော်လင့်ချက် အနည်းငယ်ဖြင့် စောင့်စားနေခဲ့သည်။
လွန်ခဲ့သော နှစ်ပေါင်းကိုးသောင်းက အမှန်တရားကို သူ စေ့စေ့စပ်စပ် စုံစမ်းစစ်ဆေးရမည်သာ ဖြစ်သည်။ ကောင်းကင်ချောက်နက်ကြီး၏ နောက်ကွယ်တွင်... အဆုံးမဲ့ဓားကို ဆွဲဆောင်နေသော တစ်စုံတစ်ရာ ရှိနေခြင်းနှင့် ပေါင်းစပ်လိုက်သောအခါ... ဤသည်မှာ ကုချန် အမှန်တကယ် သွားရောက်ရမည့် ဒုတိယအကြောင်းရင်း ဖြစ်လာခဲ့သည်။
သူ့အား ထောင်ချောက်ဆင်ရန် ကြံစည်သည်လော။
ဒီထောင်ချောက်က ငါကိုယ်တော်ကို... စိတ်ပျက်အားငယ်စေမှာ မဟုတ်ဘူးလို့ မျှော်လင့်ရတာပဲ.....
အခန်း (၂၀၀) - ရှောင်းယွဲ့၏ တောင်းဆိုမှု၊ စစ်တုရင်ခုံကို မှောက်လှန်ခြင်းနှင့် ယွမ်ကျွင်း ပြန်ပေါ်လာခြင်း
" ရှေးဘိုးဘေး အဲဒီထဲကို ဝင်သွားမလား "
ကုချင်းရွဲ့သည် ကောင်းကင်ဘုံကိုးခုတွင် ဖြန့်ကျက်ထားသော ကြီးမားသည့် အက်ကွဲကြောင်းကို ကြည့်ကာ မျက်နှာတွင် စိုးရိမ်ပူပန်မှုများ ပြည့်နှက်နေ၏။
ယွမ်ကျွင်းမဟာဧကရာဇ်၏ အစီအစဉ်သည် အလွန်ထင်ရှားလွန်း၍... မည်သူ့ကိုမျှ လှည့်စားနိုင်မည် မဟုတ်ပေ။ သို့မဟုတ်... ထောင်ချောက်ဆင်၍မရနိုင်သော ပွင့်လင်းသည့် ပူးပေါင်းကြံစည်မှုတစ်ခုဖြစ်ပြီး... ၎င်း၏ ရည်ရွယ်ချက်မှာ ကုချန်ကို ထိုထဲသို့ ဆွဲဆောင်ရန်သာ ဖြစ်မည်။
မဟုတ်ပါက... ယွမ်ကျွင်းမဟာဧကရာဇ်သည် ဤအရာအားလုံးကို လုပ်ဆောင်ရန်... လိုအပ်မည်မဟုတ်ပေ။ သူ၏ စွမ်းအားအချို့ကို အချည်းနှီး သုံးစွဲခြင်းမှလွဲ၍... အခြားမည်သည့် အကျိုးရှိမည်နည်း။
သူ မြင်နိုင်သည့်အရာကို ဘိုးဘေးသည် သူ့ထက်ပင် ပိုမိုရှင်းလင်းစွာ မြင်နိုင်လိမ့်မည်မှာ သေချာသည်။
ပြဿနာမှာ... ယွမ်ကျွင်းမဟာဧကရာဇ်၏ ပွင့်လင်းသော ပူးပေါင်းကြံစည်မှု ရှေ့မှောက်တွင်... ဘိုးဘေး မည်သို့ ရွေးချယ်မည်နည်းဟူသော... မေးခွန်းသာ ဖြစ်၏။
" မင်းရဲ့ ဘိုးဘေးအတွက် စိုးရိမ်စရာ မလိုပါဘူး "
ကောင်းကင်နတ်သမီးရှောင်းယွဲ့၏ တည်ငြိမ်သောအသံသည် လွင့်မျောလာ၏။
" ဧကရာဇ်တစ်ပါး ဧကရာဇ်ဖြစ်လာရတာက... အရာအားလုံးကို လွှမ်းခြုံနိုင်တဲ့ အမြင့်ဆုံးစွမ်းအားကို ပိုင်ဆိုင်ထားလို့ပဲ... ဘယ်ပရိယာယ်၊ ပူးပေါင်းကြံစည်မှု... ဘယ် စစ်တုရင်ကစားပွဲမျိုးကိုမှ ဂရုစိုက်စရာ မလိုဘူး... ဧကရာဇ်တစ်ပါးကို ထောင်ချောက်ဆင်ရဲတဲ့သူတွေအတွက်... ရလဒ်က တစ်ခုတည်းပဲ... စစ်တုရင်ခုံ မှောက်သွားပြီး ကြေကွဲဖွယ် သေဆုံးရခြင်းပဲ "
ကောင်းကင်နတ်သမီးရှောင်းယွဲ့၏ နားဝင်ချိုသောစကားများကို နားထောင်ရင်း ကုချင်းရွဲ့၏ နှလုံးသားမှာ အနည်းငယ် တည်ငြိမ်သွား၏။
ဟုတ်ပေသည်။ ဆရာသခင်ပင် ဘိုးဘေးကို ဤမျှ ယုံကြည်မှုရှိနေသည်ဆိုလျှင်... သူသည် အဘယ်ကြောင့် မလိုအပ်ဘဲ... စိုးရိမ်ပူပန်နေသင့်သနည်း။
" ဆရာသခင်... ဆရာသာ ယွမ်ကျွင်းကို လိုက်ဖမ်းနိုင်ခဲ့ရင်..... "
ကုချင်းရွဲ့သည် ရုတ်တရက် တစ်စုံတစ်ရာကို စဉ်းစားမိသွားပြီး သူ့အား အမှတ်ရစေရန် အမြန်ပြောလိုက်သည်။
ကောင်းကင်နတ်သမီးရှောင်းယွဲ့သည် ထိုကောင်းကင်ချောက်နက်ကြီး၏ နောက်ကွယ်တွင်... သူ၏ရုပ်ခန္ဓာကို ပြန်လည်ပုံဖော်ပေးနိုင်မည့် အမြင့်ဆုံးရတနာတစ်ခု ဆွဲဆောင်နေကြောင်း... အရင်က ပြောခဲ့ဖူးသည်။
ကောင်းကင်နတ်သမီးရှောင်းယွဲ့သည် ဤအကြောင်းကို အရင်က သိရှိခဲ့သော်လည်း... သူ၏ လက်ရှိအခြေအနေအရ ကောင်းကင်ချောက်နက်ထဲသို့ ဝင်ရောက်ကာ... ထိုတားမြစ်နယ်မြေအရှင်များ နှင့် ယှဉ်ပြိုင်တိုက်ခိုက်ရန် မဖြစ်နိုင်သောကြောင့်... မည်သည့်နည်းလမ်းမျှ မရှိခဲ့ပေ။
သို့သော် ယခုအခါ... ဘိုးဘေးသည် ကောင်းကင်ချောက်နက်ထဲသို့ ဝင်ရောက်ရန် ဆုံးဖြတ်ခဲ့ပါက... ဆရာသခင် လိုအပ်သော အမြင့်ဆုံးရတနာကို ပြန်လည်ရယူပေးရန်... ဘိုးဘေးအား တောင်းဆိုနိုင်သည် မဟုတ်လော။
" ငါ့မှာ အဲဒီရည်ရွယ်ချက်တော့ ရှိပါတယ် "
ကောင်းကင်နတ်သမီးရှောင်းယွဲ့၏... ကြည်လင်ပြတ်သားပြီး အေးစက်သောအသံသည် အနည်းငယ် တုံ့ဆိုင်းသွားပြီး... စိုးရိမ်ပူပန်မှုများ ပါလာ၏။
" မင်းရဲ့ ရှေးဟောင်းဘိုးဘေးက ငါ့ရဲ့တောင်းဆိုချက်ကို သဘောတူပါ့မလားဆိုတာပဲ မသိတာ "
ကုချန်သည် ယဲ့ယင်းယင်း၏အသက်ကို ကယ်တင်ခဲ့ပြီးနောက်... သူ့အား ကျေးဇူးကြွေးရှိသည်ဟု တစ်ချိန်က ပြောခဲ့ဖူးပြီး... နောင်တွင် တစ်စုံတစ်ရာ တောင်းဆိုလိုပါက... သူ့အား တောင်းဆိုရန် ပြောခဲ့ဖူးသည်။
သို့သော် ဤသည်မှာ သာမန်အချိန်မဟုတ်ပေ။ ကုချန်၏ လှုပ်ရှားမှုတိုင်းသည် ကိစ္စများစွာ ပါဝင်ပတ်သက်နေ၏။ ဤကုမိသားစုမဟာဧကရာဇ်သည် သူ၏ တောင်းဆိုချက်ကို သဘောတူပါ့မည်လော။
စိတ်ပူပန်သော်လည်း... ကောင်းကင်နတ်သမီး ရှောင်းယွဲ့သည် ဤတစ်သက်တစ်ကြိမ်သာ ရနိုင်သော အခွင့်အရေးကို... လက်လွှတ်မည် မဟုတ်ပေ။
သူသည် သူ၏ပုံရိပ်ကို ထွက်ပေါ်စေပြီး ကုချန်ရှေ့သို့ သွားကာ တောင်းဆိုလိုက်သည်။
" ဒီကောင်းကင်ချောက်နက်ကြီးရဲ့ နောက်ကွယ်မှာ မင်းရဲ့ ရုပ်ခန္ဓာကို ပြန်လည်ပုံဖော်ပေးနိုင်မယ့် အမြင့်မြတ်ဆုံးရတနာ ရှိတယ်ပေါ့ "
ကောင်းကင်နတ်သမီးရှောင်းယွဲ့၏ စကားများကို ကြားပြီးနောက် ကုချန်သည် အနည်းငယ် အံ့အားသင့်သွား၏။
အဆုံးမဲ့ဓားသည်လည်း ဤကောင်းကင်ချောက်နက်ကြီး၏ နောက်ကွယ်မှ သူ လိုအပ်သည့် တစ်စုံတစ်ရာကို အာရုံခံမိခဲ့သည်။ ယခု ကောင်းကင်နတ်သမီးရှောင်းယွဲ့လည်း ထိုသို့ ခံစားမိနေသည်။ နှစ်ခုကြားတွင် ဆက်စပ်မှု ရှိပါသလော။
သို့သော် ခဏတာ စဉ်းစားပြီးနောက် ကုချန်သည် ဤအတွေးကို ဖယ်ရှားလိုက်၏။
ဤကောင်းကင်ချောက်နက်ကြီး၏ နက်ရှိုင်းရာတွင်... မည်သည့်အရာ ရှိနေပါစေ... သူ ဝင်ရောက်ကြည့်ရှုရန်သာ လိုအပ်သည်။ အရာအားလုံးသည် သဘာဝကျကျ ရှင်းလင်းလာလိမ့်မည်။
" အဲဒီလိုဆိုရင် မင်း ငါကိုယ်တော်နဲ့အတူ ကောင်းကင်ချောက်နက်ထဲကို ဝင်ရောက်နိုင်ပါတယ် "
ကုချန်သည် ကောင်းကင်နတ်သမီးရှောင်းယွဲ့ကို တစ်ချက်ကြည့်လိုက်ပြီး လျစ်လျူရှုဟန်ဖြင့် ပြောလိုက်သည်။
သူ အမှန်တကယ် လိုအပ်သောအရာကို ကောင်းကင်နတ်သမီးရှောင်းယွဲ့ ကိုယ်တိုင်သာ သိရှိလိမ့်မည်။ ထို့ကြောင့် ရှောင်းယွဲ့ကို သူ၏နောက်မှ ကောင်းကင်ချောက်နက်ထဲသို့ လိုက်ပါစေခြင်းဖြင့်... ရှောင်းယွဲ့ ရယူလိုသော ရတနာကို လက်လွတ်မသွားစေမည် ဖြစ်သည်။
" ဟုတ်ကဲ့ပါ "
ကုချန် ခေါင်းညိတ် သဘောတူလိုက်သည်ကို မြင်သောအခါ... ကောင်းကင်နတ်သမီး ရှောင်းယွဲ့သည် ဝမ်းမြောက်ဝမ်းသာ ဖြစ်သွားပြီး... သူ၏နတ်ဝိညာဉ်ကို အမြန် ပြန်သိမ်းကာ... သူ၏ သိုလှောင်လက်စွပ်ကို ကုချန်ရှေ့သို့ ရောက်ရှိစေလိုက်သည်။
ကုချန်သည် ခပ်ဖွဖွ ခေါင်းညိတ်လိုက်ပြီး... ထိုသိုလှောင်လက်စွပ်ကို သူ၏ ဝတ်ရုံထောင့်နားရှိ... ချည်တစ်မျှင်နှင့် ပေါ့ပေါ့ပါးပါး ချိတ်ဆွဲလိုက်သည်။
ဤအရာအားလုံးကို လုပ်ဆောင်ပြီးနောက်... သူသည် အထက်ကောင်းကင်ခန်းမဆောင်ကြီး ရှိရာဘက်သို့... သိမ်မွေ့စွာ ခေါင်းညိတ်ပြလိုက်ပြီးနောက်... ခြေလှမ်းကို ပေါ့ပါးစွာ ရှေ့သို့ တိုးလိုက်ကာ... ကောင်းကင်ချောက်နက် အက်ကွဲကြောင်းထဲသို့ တိုက်ရိုက် ပျံသန်းဝင်ရောက်သွားလေသည်။
...
ကောင်းကင်ဘုံအရှင်သခင်သည်လည်း ကောင်းကင်ချောက်နက်ထဲသို့ ဝင်ရောက်သွားပြီ။
ကုချန်၏ ကောင်းကင်ချောက်နက်ထဲသို့ ဝင်ရောက်သွားသော ပုံရိပ်ကို မြင်သောအခါ နယ်ပယ်ငါးခုမှ သက်ရှိသတ္တဝါများသည် အံ့အားသင့်စွာ မအော်ဟစ်ဘဲ မနေနိုင်ကြတော့ပေ။
အထူးသဖြင့် ရှေးဟောင်းတော်ဝင်မျိုးနွယ်စုများမှာ အလွန်အမင်း စိတ်လှုပ်ရှားနေကြသည်။
အကြောင်းမှာ... သူတို့၏ဘိုးဘေးများ ကောင်းကင်ချောက်နက်ကြီးထဲတွင် တိုက်ခိုက်နေကြသောကြောင့်ပင်။ ကောင်းကင်ဘုံအရှင်သခင်သည် အလွန်အမင်း စွမ်းအားကြီး၏။ သူသာ ကောင်းကင်ချောက်နက်ထဲသို့ ဝင်ရောက်၍... အရှင်သခင်များ ပိုင်ဆိုင်သော အင်မော်တယ်တက်လှမ်းခြင်း အခွင့်အရေးကို လုယူရန် ကြိုးပမ်းပါက... မလွဲမသွေ ပြောင်းလဲမှုများစွာ ဖြစ်ပေါ်လာစေလိမ့်မည်။
" အင်မော်တယ်တက်လှမ်းဖို့အတွက်... စွမ်းအားရော အခွင့်အရေးရော နှစ်ခုစလုံး မရှိမဖြစ် လိုအပ်တယ်... ကောင်းကင်ဘုံအရှင်သခင်က စွမ်းအားကြီးပေမဲ့ အင်မော်တယ်တက်လှမ်းဖို့ အခွင့်အရေး ရှိချင်မှ ရှိလိမ့်မယ် "
ကုမိသားစုရွာရှေ့တွင် နတ်မျောက်ဝံဧကရာဇ်တပိုင်းသည် သူ၏ဦးခေါင်းကို ကုတ်ခြစ်လိုက်ကာ ပြောဆိုလိုက်သည်။
အခြားသော တားမြစ်နယ်မြေဧကရာဇ်တပိုင်းများသည် ဤစကားကို ကြားသောအခါ တိတ်ဆိတ်နေကြ၏။
ဤသည်က နတ်မျောက်ဝံဧကရာဇ်တပိုင်း သူ့ကိုယ်သူ နှစ်သိမ့်နေခြင်းဖြစ်ကြောင်း သူတို့သိကြသည်။
ကောင်းကင်ဘုံအရှင်သခင်ရဲ့ စွမ်းအားနဲ့... သူသာ အရှင်သခင်တွေရဲ့ အင်မော်တယ်တက်လှမ်းခြင်း အခွင့်အရေးကို လုယူချင်တယ်ဆိုရင်... ကျယ်ပြောတဲ့ ကောင်းကင်ယံမှာ ဘယ်သူက သူ့ကို ယှဉ်ပြိုင်နိုင်မှာလဲ။
စွမ်းအားများ တူညီသောအခါ အခွင့်အရေးသည် အရေးပါလာနိုင်သည်။
သို့သော် စွမ်းအားများ အလွန်အမင်း ကွာခြားသွားသောအခါ... မည်သည့်အခွင့်အရေး၊ မည်သည့် ကံကောင်းခြင်းမျှ... လုံးဝ အသုံးမဝင်တော့ပေ။
" ဒီလောက်အထိ အဆိုးမြင်စရာ မလိုပါဘူး... ငါ့အမြင်အရဆိုရင် ကောင်းကင်ဘုံအရှင်သခင်က အင်မော်တယ်တက်လှမ်းခြင်းကို... လုံးဝ စိတ်မဝင်စားတာ ဖြစ်နိုင်တယ် "
တားမြစ်နယ်မြေဧကရာဇ်တပိုင်းများ တိတ်ဆိတ်သွားချိန်တွင်... နတ်မျောက်ဝံသည် တစ်စုံတစ်ရာကို စဉ်းစားမိသွားဟန်ရကာ... လည်ချောင်းသံဖြင့် ပြောလိုက်သည်။
" ကောင်းကင်ဘုံအရှင်သခင်သာ အင်မော်တယ်တက်လှမ်းဖို့ တကယ်ဆန္ဒရှိရင်... ဘာလို့ အခုချိန်ထိ ကောင်းကင်ချောက်နက်ထဲကို ဝင်ရောက်ဖို့ စောင့်နေရမှာလဲ... ငါတို့အရှင်နဲ့ တခြားသူတွေက အင်မော်တယ်တက်လှမ်းခြင်း အခွင့်အရေးကို အရင် လုယူသွားမှာ မကြောက်ဘူးလား.....
ငါ့အမြင်အရ... ကောင်းကင်ဘုံအရှင်သခင်က အစက... ကောင်းကင်ချောက်နက်ထဲကို ဝင်ဖို့ ရည်ရွယ်ချက် မရှိခဲ့ဘူး... ယွမ်ကျွင်းဆိုတဲ့လူ ပေါ်လာခဲ့လို့သာ... ကောင်းကင်ချောက်နက်ထဲကို ဆွဲဆောင်ခံလိုက်ရတာ ဖြစ်နိုင်တယ် "
ကောင်းကင်ဘုံအရှင်သခင်သည် အင်မော်တယ်တက်လှမ်းခြင်းကို စိတ်မဝင်စားဘူးလော။
နတ်မျောက်ဝံ၏ စကားများကို ကြားသောအခါ... အခြားသော တားမြစ်နယ်မြေဧကရာဇ်တပိုင်းများသည်... သူ့အား ငြင်းဆိုချင်စိတ် ပေါ်လာကြသည်။
သို့သော် ဂရုတစိုက် စဉ်းစားကြည့်သောအခါ ၎င်းသည် မှန်ကန်နေ၏။
ကောင်းကင်ဘုံအရှင်သခင်သာ အင်မော်တယ်တက်လှမ်းလိုသည်ဆိုလျှင်... အဘယ်ကြောင့် သူသည် ကောင်းကင်ချောက်နက်ထဲသို့... စောစောကတည်းက မဝင်ရောက်ခဲ့သနည်း။ သူ၏ အင်မော်တယ်တက်လှမ်းခြင်း အခွင့်အရေးကို... လုယူခံရမည်ကို မကြောက်ဘူးလော။
ရှင်းပြချက်တစ်ခုတည်းသာ ရှိသည်... ဤကောင်းကင်ဘုံအရှင်သခင်သည် တားမြစ်နယ်မြေအရှင်များအားလုံး တောင့်တနေသော... အင်မော်တယ်တက်လှမ်းခြင်းကို လုံးဝ ဂရုမစိုက်ခြင်းပင် ဖြစ်သည်။
ယွမ်ကျွင်းဆိုသောလူ မရှိခဲ့ပါက... ဤကောင်းကင်ဘုံအရှင်သခင်သည် အထက်ကောင်းကင်တားမြစ်နယ်မြေတွင်သာ ရှိနေခဲ့မည်ဖြစ်ပြီး... အပြင်သို့ လုံးဝ ထွက်လာမည် မဟုတ်ပေ။
" ဒါပေမယ့်... ဒါက အင်မော်တယ်တက်လှမ်းခြင်းလေ..... "
တားမြစ်နယ်မြေဧကရာဇ်တပိုင်းတစ်ဦးမှ တီးတိုးရေရွတ်လိုက်သည်။
ဤကမ္ဘာပေါ်တွင် အင်မော်တယ်တက်လှမ်းခြင်းကို စိတ်မဝင်စားသူ တစ်ဦးတည်း ရှိပါမည်လော။
" မဟုတ်ဘူး "
တားမြစ်နယ်မြေဧကရာဇ်တပိုင်းများ ငေးမောနေစဉ်... နတ်မျောက်ဝံသည် ရုတ်တရက်... တစ်စုံတစ်ရာကို အာရုံခံမိသွားဟန်ဖြင့် အော်ဟစ်လိုက်သည်။
" ကြည့်စမ်း "
အခြားသော တားမြစ်နယ်မြေဧကရာဇ်တပိုင်းများသည်လည်း... တစ်ချိန်တည်းလိုလို တစ်စုံတစ်ရာကို အာရုံခံမိသွားပြီး... သူတို့၏ အကြည့်များကို အရှေ့ပိုင်းနယ်မြေ၏ ကောင်းကင်ယံဘက်သို့ ပို့လိုက်ကြသည်။
ကောင်းကင်ဘုံအရှင်သခင် ဝင်ရောက်သွားပြီးနောက်... ဒုတိယ ကောင်းကင်ချောက်နက် အက်ကွဲကြောင်းသည် ဖြည်းဖြည်းချင်း ပိတ်သွားခဲ့ပြီး... ပေါ်ပေါက်ခဲ့ခြင်း မရှိခဲ့သည့်အလား ဖြစ်သွားသည်ကို သူတို့ မြင်လိုက်ရသည်။
ဒုတိယ ကောင်းကင်ချောက်နက် အက်ကွဲကြောင်း ပိတ်သွားသည်နှင့် တပြိုင်နက်... တတိယ ကောင်းကင်ချောက်နက် အက်ကွဲကြောင်းသည် အရှေ့ပိုင်းနယ်မြေ၏ ကောင်းကင်ယံတွင်... အမှန်တကယ် ပေါ်လာခဲ့သည်။
ထိုတတိယ ကောင်းကင်ချောက်နက် အက်ကွဲကြောင်း၏ နောက်ကွယ်တွင်မူ... တောင်ကြီးတစ်လုံးသဖွယ် ပုံရိပ်တစ်ခု ရှိနေပြီး... ကောင်းကင်ချောက်နက်ကို ကျော်လွန်၍... အထက်ကောင်းကင်တားမြစ်နယ်မြေကို အေးစက်စွာ ငုံ့ကြည့်နေ၏။
" ယွမ်ကျွင်း "
အထက်ကောင်းကင်တားမြစ်နယ်မြေအတွင်းရှိ ကုချင်းရွဲ့နှင့် ကုမိသားစုဝင်များသည်... တတိယ ကောင်းကင်ချောက်နက် အက်ကွဲကြောင်း၏ နောက်ကွယ်တွင် ရပ်နေသော ပုံရိပ်ကို မြင်သောအခါ... အံ့အားသင့်စွာ မအော်ဟစ်ဘဲ မနေနိုင်ကြတော့ပေ။
ဤဇွတ်တရွတ်ဆန်သော ယွမ်ကျွင်းမဟာဧကရာဇ်သည် တစ်ဖန်ပြန်လည် ပေါ်လာပြန်၏။
ဖြစ်နိုင်ပါ့လား... သူရဲ့ပန်းတိုင်က ဘိုးဘေးကို မဟုတ်ဘဲ... အထက်ကောင်းကင်တားမြစ်နယ်မြေ ဖြစ်နေတာလား.....
ပြန်ပေါ်လာသော ယွမ်ကျွင်းမဟာဧကရာဇ်ကို ကြည့်ရင်း... ဤမယုံနိုင်စရာ အတွေးသည် ကုချင်းရွဲ့၏စိတ်ထဲသို့... ချက်ချင်း ရောက်လာခဲ့လေ၏။