အခန်း (၂၀၁-၂၀၂)
Vol. 15 Ch. 201-202
အခန်း (၂၀၁) - ကျားကို တောင်ပေါ်မှ ဆွဲထုတ်ခြင်း၊ အမြင့်ဆုံးနည်းလမ်း၊ ယဇ်ကောင် ရောက်ရှိလာခြင်း
ယွမ်ကျွင်း၏ ပြန်ပေါ်လာခြင်းသည်... ကုချင်းရွဲ့အား အလွန်ပင် ထိတ်လန့်သွားစေခဲ့ပြီး... သူသည် အရာများစွာကို ချက်ချင်း ဆက်စပ်မိသွား၏။ မူလက သူသည် ယွမ်ကျွင်း ပြန်ပေါ်လာခြင်းမှာ ဘိုးဘေးအား ထောင်ချောက်ဆင်ရန် ရည်ရွယ်ပြီး... ဘိုးဘေးကို ပစ်မှတ်ထားခြင်း ဖြစ်သည်ဟု ထင်ခဲ့သည်။
သို့သော် ယခုအချိန်တွင်... ယွမ်ကျွင်းမဟာဧကရာဇ်၏ ကိုယ်ခန္ဓာအစစ် ပေါ်ပေါက်လာသောအခါ... သူသည် ရုတ်တရက် သဘောပေါက်လိုက်၏။ ယွမ်ကျွင်းမဟာဧကရာဇ်၏ စစ်မှန်သော ရည်ရွယ်ချက်သည်... ဘိုးဘေးမဟုတ်ဘဲ 'ကျားကို တောင်ပေါ်မှ ဆွဲထုတ်ခြင်း' သက်သက်သာဖြစ်ပြီး... ဘိုးဘေးကို ဝေးရာသို့ ဆွဲထုတ်ကာ... အထက်ကောင်းကင်တားမြစ်နယ်မြေကို ပစ်မှတ်ထားရန် ဖြစ်သည်။
" ကုချန်... ကောင်းကင်ဘုံအရှင်သခင်... ဟွန်းဟွန်း "
တတိယ ကောင်းကင်ချောက်နက်အက်ကွဲကြောင်း၏ အပြင်ဘက်တွင်... ယွမ်ကျွင်းမဟာဧကရာဇ်၏ ကိုယ်ခန္ဓာအစစ်သည် ခန့်ညားစွာ ရပ်နေပြီး... အောက်ဘက်ရှိ အထက်ကောင်းကင်တားမြစ်နယ်မြေကို ငုံ့ကြည့်နေ၏။ သူ၏မျက်နှာပေါ်တွင် လျစ်လျူရှုသည့် အသွင်အပြင် ပေါ်လာပြီးနောက်... အနည်းငယ်မျှ တုံ့ဆိုင်းခြင်းမရှိဘဲ သူ၏လက်ဖဝါးကို တစ်ဖန်ပြန်၍ မြှောက်ကာ... အထက်ကောင်းကင်တားမြစ်နယ်မြေဘက်သို့ ဖိချလိုက်သည်။
...
ဒုတိယ ကောင်းကင်ချောက်နက်အက်ကွဲကြောင်း၏ နောက်ဘက်၌.....
ဤသည်မှာ ကျယ်ပြောပြီး အဆုံးမဲ့သော အင်မော်တယ်နယ်မြေတစ်ခု ဖြစ်သည်။ မဟာကောင်းကင်နှင့် မြေကြီးသည် ကျယ်ပြောလှပြီး... အဆုံးမဲ့သော အင်မော်တယ်တာအိုဝိညာဉ်ချီများ၊ စစ်မှန်သော နဂါးများနှင့် စစ်မှန်သော ဖီးနစ်၏ ပုံရိပ်ယောင်များအဖြစ် ပြောင်းလဲကာ... ကောင်းကင်နှင့် မြေကြီးကြားတွင် ပျံဝဲနေကြပြီး... နက်နဲမှုနှင့် ခမ်းနားထည်ဝါမှု၏ အထွတ်အထိပ်သို့ ရောက်ရှိနေသည်။
ဤကျယ်ပြောသော အင်မော်တယ်နယ်မြေ၏ အဆုံး၌... ခမ်းနားထည်ဝါပြီး အဆုံးမဲ့သော ဧရာမတံခါးကြီးတစ်ခုကို... ဝိုးတဝါး မြင်နေရသည်။
သို့သော် အဆုံးမဲ့သော အင်မော်တယ်မြူခိုးများ လှည့်ပတ်နေပြီး... ကမ္ဘာအဆုံးကို ဖုံးအုပ်ထားသောကြောင့်... မှုန်ဝါးသော ပုံသဏ္ဌာန်ကိုသာ မြင်နေရသည်။
ကုချန်သည်... ဒုတိယ ကောင်းကင်ချောက်နက်အက်ကွဲကြောင်း၏ နောက်ကွယ်ရှိ ကမ္ဘာထဲသို့ ဝင်ရောက်လိုက်သောအခါ... သူ၏နောက်ကွယ်ရှိ ကောင်းကင်ချောက်နက်အက်ကွဲကြောင်းသည် ရုတ်တရက် ပိတ်သွားပြီး... မည်သည့်အခါမျှ မတည်ရှိခဲ့ဖူးသကဲ့သို့ ဖြစ်နေ၏။
" ဟွန်းဟွန်း... ကောင်းကင်ဘုံအရှင်သခင်... မင်း ထောင်ချောက်မိသွားပြီ "
လေဟာနယ်၌ အနည်းငယ် အေးစက်သော ရယ်သံတစ်ခု ရုတ်တရက် ပဲ့တင်ထပ်လာ၏။ ၎င်းသည် ယွမ်ကျွင်းမဟာဧကရာဇ်၏အသံပင် ဖြစ်သည်။
ကုချန်သည် အသံလာရာဘက်သို့ ကြည့်လိုက်ရာ... ကောင်းကင်ယံအထက်ရှိ လေဟာနယ် အက်ကွဲနေသည်ကိုသာ မြင်လိုက်ရပြီး... ယွမ်ကျွင်းမဟာဧကရာဇ်၏ ပုံရိပ်သာ တစ်ဖန်ပြန်၍ ပေါ်လာ၏။ တိကျစွာဆိုရသော်... ၎င်းသည် ယွမ်ကျွင်းမဟာဧကရာဇ်၏... ပုံရိပ်ယောင်ဖြစ်သည်။
" ကျားကို တောင်ပေါ်က ဆွဲထုတ်တာလား "
ကုချန်သည် ပျောက်ကွယ်သွားသော ကောင်းကင်ချောက်နက် အက်ကွဲကြောင်းကို နောက်ပြန်ကြည့်ကာ တီးတိုး ရေရွတ်လိုက်သည်။ ယွမ်ကျွင်းမဟာဧကရာဇ်၏ ရည်ရွယ်ချက်ကို သူ သဘောပေါက်လိုက်ဟန်တူ၏။ သို့သော် သူ၏မျက်နှာတွင် ထိတ်လန့်မှု အရိပ်အယောင်မျှ မရှိဘဲ ဤအရာအားလုံးကို ယခင်ကတည်းက ကြိုတင်မျှော်မှန်းထားသကဲ့သို့ ဖြစ်နေသည်။
" မင်း အရမ်း စွမ်းအားကြီးတယ်... ဒါကြောင့် ငါကိုယ်တော်က အပိုပြင်ဆင်မှုတွေ လုပ်ဖို့ လိုတယ် "
ယွမ်ကျွင်းမဟာဧကရာဇ်၏ ပုံရိပ်ယောင်သည် ကုချန်အား လှောင်ပြောင်သည့် အမူအရာဖြင့် ကြည့်လိုက်သည်။
" ငါကိုယ်တော်က... မင်း ဘယ်လိုလုပ် ဒီလောက် မြန်မြန် စွမ်းအားကြီးလာရတာလဲဆိုပြီး အံ့ဩနေခဲ့တာ... သက်တမ်းရှည် အမိန့်တော်ကတောင် မင်းကို မထိခိုက်နိုင်ခဲ့ဘူး.....
အကြာကြီး စဉ်းစားပြီးတဲ့နောက်... အဲဒါက အထက်ကောင်းကင်တားမြစ်နယ်မြေနဲ့ ဆက်စပ်နေနိုင်တယ်လို့ ထင်တယ်... အခု မင်း ဒီထောင်ချောက်ထဲ ရောက်လာပြီဆိုတော့... ငါကိုယ်တော်က အထက်ကောင်းကင်ထဲမှာ ဘယ်လို လျှို့ဝှက်ချက်မျိုး ဝှက်ထားလဲလို့ စုံစမ်းချင်တာ သဘာဝကျတယ် "
...
" ဒါဆို... မင်း ငါကိုယ်တော်ကို ဒီကို ခဲခဲယဉ်းယဉ်း ခေါ်ဆောင်ခဲ့တာက... ကောင်းကင်တားမြစ်နယ်မြေထဲက 'ကံကြမ္မာ' ကို... ခိုးကြည့်ဖို့သက်သက်ပဲလား "
ကုချန်သည် စဉ်းစားဟန်ဖြင့် ပြောလိုက်သည်။
" ဟုတ်ပါတယ်... ဒါပဲသက်သက်တော့ မဟုတ်ဘူးပေါ့! "
ယွမ်ကျွင်းမဟာဧကရာဇ်သည် လှောင်ပြောင်လိုက်သည်။
" ကောင်းကင်တားမြစ်နယ်မြေထဲက ကံကြမ္မာကို ငါကိုယ်တော်က လိုချင်တယ်... မင်းရဲ့ အသက်ကိုလဲ ငါကိုယ်တော်က ယူချင်တယ်.....
ကုချန်... ကုချန်... ငါကိုယ်တော် ဘယ်လိုလုပ် သေရာက ပြန်ရှင်လာရတာလဲဆိုတာ... မင်း မသိချင်ဘူးလား "
ယွမ်ကျွင်းမဟာဧကရာဇ်သည် ဂုဏ်ယူစွာ ရေရွတ်လိုက်၏။ ကုချန် စကားမပြောမီ သူ ကိုယ်တိုင်သာ ပြန်ဖြေလိုက်၏။
" မင်းကို အမှန်အတိုင်း ပြောရရင်... အဲဒီနေ့က ဧကရာဇ်ဂိတ်တံခါးမှာ မင်းကို တိုက်ခိုက်ခဲ့တဲ့သူနဲ့... ဧကရာဇ်မဟာမိတ်အဖွဲ့ထဲက မို့တိဧကရာဇ်တို့ဟာ... ငါကိုယ်တော်က ပြိုင်ဘက်ကင်း နည်းလမ်းတစ်ခုနဲ့ စုစည်းထားတဲ့... ကိုယ်ပွားနှစ်ခုပဲ!
မင်း ငါကိုယ်တော်ရဲ့ ကိုယ်ပွားတစ်ပါးကို ဧကရာဇ်ဂိတ်တံခါးမှာ သတ်ဖြတ်ခဲ့တယ်... ပြီးတော့ ငါကိုယ်တော်ရဲ့ ကိုယ်ခန္ဓာအစစ်ကို အဆုံးမဲ့ကမ္ဘာအပြင်ဘက်မှာ သတ်ခဲ့တယ်... ဒါပေမယ့် ငါကိုယ်တော်မှာ ကိုယ်ပွားတစ်ခု ကျန်နေသေးတယ်.....
အဲဒီကိုယ်ပွားကို ပင်မကိုယ်ခန္ဓာအဖြစ် ချက်ချင်း ပြန်ပြောင်းလဲလို့ရတယ်... မင်း ငါကိုယ်တော်ကို မသတ်နိုင်ခဲ့တဲ့အတွက်... အရမ်း စိတ်ပျက်နေမှာပဲ ဟုတ်လား "
ယွမ်ကျွင်းမဟာဧကရာဇ်သည် လွန်စွာ ဂုဏ်ယူနေခဲ့၏။ သူသည် လွတ်မြောက်ရန် လမ်းမရှိတော့ဟု ခံစားရဟန်ရှိသဖြင့်... ဤလျှို့ဝှက်ချက်ကို ကုချန်အား ပွင့်ပွင့်လင်းလင်း ဖော်ထုတ်ပြောပြခဲ့သည်။
...
" ကိုယ်ပွားနှစ်ခု... ပင်မကိုယ်ခန္ဓာရဲ့ တိုက်ခိုက်ရေးစွမ်းအားကို ပိုင်ဆိုင်ရုံတင်မဟုတ်ဘဲ... ပင်မကိုယ်ခန္ဓာနဲ့ သီးသန့် တည်ရှိနိုင်စွမ်းရှိတယ်... အင်မော်တယ်နယ်မြေမှာတောင် ဒီလို ပြိုင်ဘက်ကင်း နည်းလမ်းမျိုး ရှိမှာ မဟုတ်ဘူးလို့... ငါ ထင်တယ် "
ကုချန်၏ဝတ်ရုံစွန်းတွင် ချိတ်ဆွဲထားသော သိုလှောင်လက်စွပ်သည် ဝိုးတဝါး တောက်ပလာပြီး ကောင်းကင်နတ်သမီးရှောင်းယွဲ့၏ အနည်းငယ် ထိတ်လန့်တကြားဖြစ်နေသော အသံ ထွက်ပေါ်လာ၏။
ကိုယ်ပွားနှစ်ခုကို ဖန်တီးခြင်း... ပင်မကိုယ်ခန္ဓာနှင့် တူညီသော တိုက်ခိုက်ရေးစွမ်းအားကို ပိုင်ဆိုင်ခြင်းသည်... မိမိ၏ တိုက်ခိုက်ရေးစွမ်းအားကို ချက်ချင်း သုံးဆတိုးပွားစေသည်နှင့် တူညီသည်။ ဒဏ္ဍာရီလာ အင်မော်တယ်ဘုရင်၏ နည်းလမ်းများပင်လျှင်... နှိုင်းယှဉ်နိုင်မည် မဟုတ်ပေ။
" မင်း ငါကိုယ်တော်ကို ဒီကို ခေါ်ဆောင်ဖို့ အသည်းအသန် ကြိုးပမ်းခဲ့တာဟာ... ဒီ အသုံးမကျတဲ့ စကားတွေ ပြောဖို့သက်သက်တော့ မဖြစ်သင့်ဘူး "
ကုချန်သည် တည်ငြိမ်စွာ ပြောကြားလိုက်သည်။
...
" ကုချန်... ကုချန်... မင်း နောက်ပိုင်းမှာလဲ... ဒီလိုမျိုး မာနကြီးနေနိုင်ဖို့ မျှော်လင့်ပါတယ် "
ကုချန်၏ လျစ်လျူရှုသည့် အမူအရာကို မြင်သောအခါ... ယွမ်ကျွင်းသည် အေးစက်စွာ နှာမှုတ်လိုက်ပြီးနောက်... သူ၏လက်ကို ဝှေ့ယမ်းကာ ကျယ်ပြောသော အင်မော်တယ်နယ်မြေ၏ အဆုံးဘက်သို့... အရိုအသေပေးသည့် အနေဖြင့် ပြောလိုက်သည်။
" ယဇ်ကောင် ရောက်ရှိလာပါပြီ... အင်မော်တယ်... ကျေးဇူးပြုပြီး သုံးဆောင်ပါ "
" ဒုန်း! "
ယွမ်ကျွင်းမဟာဧကရာဇ်၏အသံ ထွက်ပေါ်လာသောအခါ... ကျယ်ပြောသော အင်မော်တယ်နယ်မြေ၏ အဆုံးကို ဖုံးအုပ်ထားသော အင်မော်တယ်မြူခိုးများသည်... ရုတ်တရက် ကင်းစင်သွား၏။
အေးစက်ပြီး ဧရာမမျက်လုံးတစ်စုံသည်... ကောင်းကင်ယံတွင် မြင့်မားစွာရှိနေပြီး... ကုချန်အား အေးစက်စူးရှစွာ စိုက်ကြည့်နေ၏။
ထိုမျက်လုံးကြီး စိုက်ကြည့်ရာနေရာတိုင်းတွင်... ကြောက်ဖွယ်ကောင်းလွန်းသော ဖိအားကို ခံစားရကာ... အရာအားလုံးအား အေးခဲပျက်စီးစေနိုင်၏။
ထိုမျက်လုံးများ၏ နက်နဲရာ၌ လောဘကြီးလွန်းသည့် ရည်ရွယ်ချက်များ လှည့်ပတ်နေသည်ကို မြင်နိုင်သည်။
အင်မော်တယ်နယ်မြေ၏အဆုံး၌ ကောင်းကင်နှင့် မြေကြီး တုန်လှုပ်သွား၏။ ထိုမျက်လုံးတစ်စုံ၏အောက်တွင်... ဧရာမ ပုံရိပ်ယောင် ပါးစပ်တစ်ခု ပေါ်လာပြီး... ကျယ်လောင်လွန်းသော အသံကို ထုတ်လွှတ်လာ၏။
" မင်း တကယ်ကို ကောင်းကောင်း လုပ်ခဲ့တယ်... ဒီအင်မော်တယ်..... "
သို့သော် အသံသည် ရုတ်တရက် ရပ်တန့်သွား၏။
အဘယ်ကြောင့်ဆိုသော်... ထိုအချိန်တွင် ကျိုးပဲ့နေသော... အင်မော်တယ်အဆင့် ပေတံတစ်ခုသည် လေဟာနယ်ကို ဖြတ်ကျော်ကာ... ၎င်း၏ မျက်လုံးတစ်လုံးကို ရုတ်တရက် ထိုးနှက်လိုက်ပြီး... သွေးများကို ပေပေါင်းထောင်ချီအထိ ပျံ့ကျဲစေလျက်... ကောင်းကင်တစ်ခုလုံးကို နီရဲသွားစေသောကြောင့်ပင်။
အခန်း (၂၀၂) - ရွှယ်ကျန်းဟု အမည်ပေးခြင်း၊ ဧကရာဇ်၏ လုပ်ရပ်များနှင့် သတ်ဖြတ်ရေးစည်းရိုး အသက်ဝင်လာခြင်း
ဤရုတ်တရက် မြင်ကွင်းကြောင့်... ကုချန်သည် အနည်းငယ် အံ့အားသင့်သွားပြီး... ကောင်းကင်ယံမှ ယွမ်ကျွင်း၏ ပုံရိပ်ယောင်သည်လည်း... ရုတ်တရက် မျက်နှာအမူအရာ ပြောင်းလဲသွားသည်။
" ဒါ... ဘယ်လိုလုပ် ဖြစ်နိုင်မှာလဲ... "
အင်မော်တယ်ပေတံဖြင့် ထိုးနှက်ခံရကာ... သွေးများ ပေကျံလျက် ပေထောင်ချီ ပျံ့ကျဲသွားသော ဧရာမမျက်လုံးကြီးကို ကြည့်ရင်း... ယွမ်ကျွင်းမှာ လုံးဝ မထင်မှတ်ထားသကဲ့သို့ ထိတ်လန့်သွားရသည်။
" ဒါက ဝိညာဉ်အပိုင်းအစလေးပဲ... ဘယ်လိုလုပ် ဒီအထိ ရောက်လာတာလဲ..... "
သွေးစွန်းနေသော အင်မော်တယ်ပေတံကို ကြည့်ရင်း... ယွမ်ကျွင်း၏ မျက်နှာအမူအရာမှာ အရုပ်ဆိုးသွားပြီး... အင်မော်တယ်ပေတံ မည်သည့်နေရာမှ လာသည်ကိုလည်း သိနေဟန်တူ၏။
" ဖူရှီး "
ကမ္ဘာ၏အစွန်အဖျားတွင် ကျန်ရှိနေသည့် တစ်ခုတည်းသော ဧရာမမျက်လုံးသည်... ကျိုးပဲ့နေသော အင်မော်တယ်ပေတံကို စူးစိုက်ကြည့်နေပြီး... သူ၏အကြည့်၌ မုန်းတီးမှုများဖြင့် ပြည့်နှက်နေသည်။
" ဒီလောက်နှစ်တွေ ကြာပြီးတာတောင်... မင်းက အခုထိ ဒီလိုပဲ ဇွဲရှိပြီး... စိတ်အနှောင့်အယှက်ဖြစ်စရာ ကောင်းတုန်းပဲ "
" ဝီ..... "
အင်မော်တယ်ပေတံသည် နောက်ပြန်ပျံလာပြီး... လူသားဧကရာဇ်၏ လက်ဖဝါးထဲသို့... ကျရောက်သွား၏။
" ရွှယ်ကျန်း... မင်းက မသေဘဲ ရှိနေသေးတာမလို့... ငါကိုယ်တော်က မင်းကို လမ်းပြပို့ဆောင်ပေးဖို့ လာခဲ့တာ "
လူသားဧကရာဇ်သည် အင်မော်တယ်ပေတံကို ကိုင်ဆောင်လျက်... ကောင်းကင်ယံတွင် မတ်မတ်ရပ်နေပြီး... ကမ္ဘာ၏ အစွန်အဖျားရှိ ဧရာမမျက်လုံးကို ကြည့်ကာ... တည်ငြိမ်စွာ ပြောဆိုလိုက်သည်။
ထို့နောက် လူသားဧကရာဇ်သည် ကုချန်ကို ကြည့်ကာ နှုတ်ဆက်သည့်အနေဖြင့် ခပ်ဖွဖွ ခေါင်းညိတ်ပြလိုက်သည်။
ကုချန်၏မျက်လုံးများမှာ လှုပ်ခတ်သွားပြီး လူသားဧကရာဇ်၏ လက်ရှိအခြေအနေကို သူ သဘောပေါက်လိုက်ဟန်တူ၏။ သူသည် စကားမပြောဘဲ သက်ပြင်းအသာချကာ ခပ်ဖွဖွ ပြန်လည် ခေါင်းညိတ်ပြလိုက်သည်။
" ဖူရှီး..... "
မုန်းတီးမှုနှင့် ရန်လိုမှုများ ပြည့်နှက်နေသော ကျယ်လောင်သည့် အသံတစ်ခုသည် ကမ္ဘာ၏ အစွန်အဖျားတွင် တစ်ဖန်ပြန်၍ ပဲ့တင်ထပ်လာသည်။
ထိုအချိန်တွင်... ကမ္ဘာ၏အစွန်အဖျားကို ဖုံးအုပ်ထားသော အင်မော်တယ်မြူခိုးများသည်လည်း... နောက်ဆုံး၌ ကင်းစင်သွားပြီး ထိုနေရာရှိ မြင်ကွင်းကို အပြည့်အစုံ မြင်ရစေ၏။
ကောင်းကင်နှင့် မြေကြီးကြားတွင်... မတ်မတ်ရပ်နေသော ခမ်းနားကြီးကျယ်သည့် အင်မော်တယ်တံခါးဝရှေ့၌... ပလ္လင်တစ်ခုသည် ကောင်းကင်ဘုံအားလုံးကို မိုးထားသကဲ့သို့ တည်ရှိနေ၏။
ထိုပလ္လင်ပေါ်၌ ပုံရိပ်တစ်ခုသည် ခန့်ညားထည်ဝါစွာ ထိုင်နေပြီး လူသားဧကရာဇ်နှင့် ကုချန်ကို အေးစက်စွာ စောင့်ကြည့်နေလေသည်။
" ဒီလူက..... "
ကုချန်၏ အဝတ်အစားပေါ်တွင် ချိတ်ဆွဲထားသော သိုလှောင်လက်စွပ်သည် အနည်းငယ် တုန်ယင်သွားပြီး ကောင်းကင်နတ်သမီး ရှောင်းယွဲ့၏ အနည်းငယ် မတည်ငြိမ်သော အသံ ထွက်ပေါ်လာ၏။
ပလ္လင်ပေါ်တွင် ခန့်ညားထည်ဝါစွာ ထိုင်နေသော ထိုပုံရိပ်သည် 'တစ်ဝက်' သာ ကျန်ရှိတော့သည်။
သူ၏ ဦးခေါင်းအလယ်ဗဟိုမှသည် ခြေထောက်အထိ... ကြောက်မက်ဖွယ်ကောင်းသည့် အမာရွတ်ကြီးတစ်ခု ရှိနေပြီး... ခန္ဓာကိုယ်၏ ဘယ်ဘက်ခြမ်းသာ ကျန်ရှိတော့ကာ ညာဘက်ခြမ်းမှာ ပျောက်ဆုံးနေသည်။
သူ၏ခန္ဓာကိုယ်ရှိ ကျိုးပဲ့နေသော အပိုင်းမှပင်... သွေးစိမ်းများ စဉ်ဆက်မပြတ် စီးကျနေပြီး... သူ၏အောက်ရှိ ပလ္လင်ကို နီရဲနေစေသည်။
ပို၍ပင် ကြောက်မက်ဖွယ်ကောင်းသည်မှာ.....
ထိုပုံရိပ် ထိုင်နေသော ပလ္လင်ခြေရင်း၌ သွေးများပေကျံနေသော ပုံရိပ်နှစ်ခု မှောက်လျက်လဲကာ တည်ရှိနေလေ၏။
ပုံရိပ်နှစ်ခုစလုံးသည် ရှေးဟောင်းအင်မော်တယ်တာအိုဝတ်စုံများ ဝတ်ဆင်ထားကြပြီး သေဆုံးနေကြပြီးဖြစ်သော်ငြား အဆုံးမဲ့သော အင်မော်တယ်အရှိန်အဝါကို ထုတ်လွှတ်နေဆဲပင်။
၎င်းသည် အဆုံးမဲ့ဧကရာဇ်အဆင့်ကို ကျော်လွန်သော အရှိန်အဝါ... အင်မော်တယ်နယ်မြေနှင့်သာ သီးသန့်သက်ဆိုင်သော... အမြင့်ဆုံးအရှိန်အဝါပင်။
" စစ်မှန်တဲ့ အင်မော်တယ်နှစ်ပါး "
ကောင်းကင်နတ်သမီး ရှောင်းယွဲ့သည် မသိစိတ်အလျောက် ထိတ်လန့်စွာ အော်ဟစ်လိုက်မိ၏။
ပလ္လင်အောက်တွင် မှောက်လျက်လဲနေသော ပုံရိပ်နှစ်ခုစလုံးသည် အသက်ရှင်စဉ်က စစ်မှန်သော အင်မော်တယ်အဆင့် သတ္တဝါများ ဖြစ်ခဲ့ကြလိမ့်မည်။
ပလ္လင်ပေါ်တွင် ခန့်ညားထည်ဝါစွာ ထိုင်နေသော ထိုပုံရိပ်အတွက်မူ... ခန္ဓာကိုယ်တစ်ဝက်သာ ကျန်ရှိသော်လည်း သူထံမှ ထွက်ပေါ်လာသော အရှိန်အဝါကိုကြည့်ခြင်းဖြင့်... ထိုသို့ ဒဏ်ရာများ မရရှိခဲ့မီက သူသည်... အထွတ်အထိပ် အင်မော်တယ်အဆင့် သတ္တဝါ ဖြစ်နိုင်ကြောင်း... ကောင်းကင်နတ်သမီး ရှောင်းယွဲ့ ခန့်မှန်းမိလိုက်သည်။
အထွတ်အထိပ် အင်မော်တယ်တစ်ပါးနှင့် စစ်မှန်သော အင်မော်တယ်နှစ်ပါးသည် အဘယ်ကြောင့် ဤကဲ့သို့ ကံကြမ္မာနှင့် ကြုံတွေ့ခဲ့ရသနည်း။
ကောင်းကင်နတ်သမီး ရှောင်းယွဲ့၏နှလုံးသားတွင် အေးစက်သော ခံစားမှုတစ်ခု ဖြစ်ပေါ်လာ၏။ ထို့နောက်... လူသားဧကရာဇ်၏ အမည်ကို ရေရွတ်ခဲ့သော ရွှယ်ကျန်းဟု အမည်ပေးထားသည့်... ထိုသတ္တဝါကို ပြန်အမှတ်ရလိုက်သောအခါ... မယုံနိုင်စရာ အတွေးတစ်ခု သူ၏စိတ်ထဲသို့ ချက်ချင်း ဝင်ရောက်လာ၏။
ဤအရာအားလုံးသည်... ယခင် လူသားဧကရာဇ်၏ လက်ချက်များ ဖြစ်နိုင်သလော။
...
ကောင်းကင်နတ်သမီး ရှောင်းယွဲ့ ထိတ်လန့်နေစဉ် ရွှယ်ကျန်း၏ နောက်ဆက်တွဲ စကားများသည် သူ၏ခန့်မှန်းချက်ကို တိုက်ရိုက် အတည်ပြုပေးခဲ့သည်။
" ဖူရှီး... မင်း အခု ဒီကို လာတာက ဘာထူးမှာလဲ... အဲဒီတုန်းက မင်း ငါ့ရဲ့ စစ်မှန်တဲ့ အင်မော်တယ် လက်အောက်ခံနှစ်ယောက်ကို သတ်ပြီး... ငါ့ကိုပါ ပြင်းပြင်းထန်ထန် ဒဏ်ရာရစေခဲ့သလို...မင်းလဲ မင်းရဲ့အသက်နဲ့ ပြန်ပေးခဲ့ရတာပဲ......
အခု ငါ အသက်ရှင်နေတာကို မြင်တော့ မင်း အရမ်း စိတ်ပျက်သွားပြီ မဟုတ်လား "
ရွှယ်ကျန်းသည် ကျန်ရှိနေသေးသော သူ၏ မျက်လုံးတစ်လုံးတည်းဖြင့် လူသားဧကရာဇ်ကို စူးစိုက်ကြည့်နေပြီး သူ၏အကြည့်၌ ရူးသွပ်မှုများ ပြည့်နှက်နေ၏။
" အဲဒီတုန်းက မင်း ငါ့ရဲ့ အင်မော်တယ်ခန္ဓာကိုယ်တစ်ဝက်ကို အသည်းအသန် ယူသွားခဲ့လို့... ငါ့မှာ မူလချီစွမ်းအားကို ပြန်ရနိုင်ဖို့ အတော်ကြာကြာ ခက်ခက်ခဲခဲ ကြိုးစားခဲ့ရတယ်.....
ငါ ပြန်ကောင်းလာပြီးတော့ တစ်ကြိမ်ထက်မက ရှာဖွေခဲ့ပေမဲ့... ခြေရာလေးတောင် ရှာမတွေ့ခဲ့ဘူး... မင်းက ငါ့ရဲ့ခန္ဓာကိုယ်တစ်ဝက်ကို အဲဒီနေရာမှာ ဝှက်ထားမယ်လို့ လုံးဝကို မထင်ခဲ့မိဘူး... ဟင်း..... "
ရွှယ်ကျန်းသည် ယွမ်ကျွင်းမဟာဧကရာဇ်အား ကြည့်လျက် လျစ်လျူရှုဟန်ဖြင့် အမိန့်ပေးလိုက်သည်။
" မင်းသွား! ဒီအင်မော်တယ်ရဲ့ ကျန်ရှိနေတဲ့ ခန္ဓာကိုယ်တစ်ဝက်ကို အမြန် ပြန်ယူလာခဲ့... ပြီးရင် ဒီအင်မော်တယ်က မင်းကို ထာဝရရှင်သန်နိုင်မဲ့ ဘဝကို ပေးမယ် "
" ဟုတ်ကဲ့ပါ "
ယွမ်ကျွင်းသည် ပထမတွင် လန့်သွားသော်ငြား... ရွှယ်ကျန်း ဆိုလိုသည်ကို နားလည်လိုက်၏။ သူသည် ကုချန်ကို အနက်ရှိုင်းဆုံး ကြည့်လိုက်ပြီးနောက်... ချက်ချင်း ပျောက်ကွယ်သွား၏။
...
" လွန်ခဲ့တဲ့ နှစ်ပေါင်း... တစ်သန်းငါးသိန်းတုန်းက ဒဏ္ဍာရီလာ အင်မော်တယ်လမ်း ပွင့်လာခဲ့တယ်... ငါ့ရဲ့ စွမ်းအားက ကောင်းကင်မြတ်နိုးဖွယ်အဆင့်ကို ဖောက်ထွင်းပြီး... ဒဏ္ဍာရီလာ ဧကရာဇ်အဆင့်ကို ရောက်ခဲ့တာမို့ ဒီအခွင့်အရေးကို လက်လွတ်ခံစရာ မရှိဘူး... အဲဒါကြောင့် အင်မော်တယ်လမ်းထဲကို ဝင်ခဲ့တယ် "
ယွမ်ကျွင်း၏ပုံရိပ် ပျောက်ကွယ်သွားသော်လည်း... လူသားဧကရာဇ်သည် အလျင်စလို မဖြစ်ဘဲ... ကုချန်အား အတိတ်က ဖြစ်ရပ်များကိုပင် ပြန်ပြောပြနေလေသည်။
" ဒါပေမယ့် ရလဒ်က ငါမျှော်လင့်ထားတာတက် ကျော်လွန်သွားခဲ့တယ်... အဲဒီ အင်မော်တယ်လမ်းလို့ ခေါ်တဲ့ နောက်ကွယ်မှာ... ကမ္ဘာလောကကြီး အိပ်မက်မက်နေတဲ့ အင်မော်တယ်တက်လှမ်းခြင်းဆိုတာမျိုး ရှိမနေခဲ့ဘူး... အားလုံးက လှည့်စားမှုတစ်ခုပဲ.....
ဒီတိုက်ပွဲမှာ ငါ စစ်မှန်တဲ့ အင်မော်တယ်နှစ်ပါးကို သတ်ပြီး... ရွှယ်ကျန်းကို ပြင်းပြင်းထန်ထန် ဒဏ်ရာရစေခဲ့တယ်... ဒါပေမယ့် ငါလဲ ပင်ပန်းနွမ်းနယ်ပြီး ဘာမှ ထပ်လုပ်ဖို့ ခွန်အားမရှိတော့ဘူး.....
ရွှယ်ကျန်း ပြန်လာမှာကို တားဆီးဖို့အတွက် သူ့ရဲ့ ခန္ဓာကိုယ်တစ်ဝက်ကို အသည်းအသန် ယူသွားခဲ့ရုံပဲ တတ်နိုင်ခဲ့တယ်... ဒါမှ သူ ပြန်ပြီးကောင်းမွန်ဖို့ ခက်ခဲပြီး... ငါ့ရဲ့အဆုံးမဲ့ကမ္ဘာကို နောက်တစ်ကြိမ် ပစ်မှတ်မထားနိုင်မှာ "
ဤသို့ပြောချိန်တွင် လူသားဧကရာဇ်၏ အကြည့်သည် နက်ရှိုင်းလျက် ဝမ်းနည်းမှုများ ပါဝင်လာ၏။
" ငါ အဆုံးမဲ့ကမ္ဘာရဲ့ နောင်လာမယ့် မျိုးဆက်တွေအတွက် အချိန်အလုံအလောက် ဆွဲပေးနိုင်မယ်... ကောင်းကင်ချောက်နက်ကြီးရဲ့ နောက်ကွယ်က သတ္တဝါတွေနဲ့ ရင်ဆိုင်ဖို့ အချိန်ရနိုင်မယ်လို့ မျှော်လင့်ခဲ့ပေမယ့်... နောက်ဆုံးမှာတော့ သစ္စာဖောက်မှုနဲ့ပဲ ရင်ဆိုင်ရလိမ့်မယ်လို့ ဘယ်တုန်းကမှ မမျှော်လင့်ခဲ့ဘူး..... "
သစ္စာဖောက်မှုလား။
လူသားဧကရာဇ်၏ ဤစကားကို ကြားသောအခါ ကုချန်သည် အနည်းငယ် အံ့အားသင့်သွား၏။
လွန်ခဲ့သော နှစ်ပေါင်းကိုးသောင်းက... သူကိုယ်တိုင် အင်မော်တယ်လမ်း၏ အစွန်အဖျားသို့ ဝင်ရောက်ခဲ့သော်ငြား... ၎င်းသည် နတ်ဆိုးနယ်မြေ၏ နယ်နိမိတ်ဖြစ်ကြောင်းသာ တွေ့ရှိခဲ့ရသည်။ သူသည် နှစ်ပေါင်းကိုးသောင်းကြာ စိတ်ရှည်စွာ စောင့်ရှောက်ပေးခဲ့သော်လည်း... နောက်ဆုံးတွင် အဆုံးမဲ့ကမ္ဘာရှိ သတ္တဝါပေါင်းများစွာ၏... သစ္စာဖောက်မှုကို ရင်ဆိုင်ခဲ့ရသည်။
လူသားဧကရာဇ်သည် သူ၏ခေတ်၌... ဤကောင်းကင်ချောက်နက် အက်ကွဲကြောင်းထဲသို့ ဝင်ရောက်ခဲ့ပြီး... ကောင်းကင်ကို လှုပ်ခတ်စေသော တိုက်ပွဲကို ဆင်နွှဲခဲ့သော်လည်း... နောက်ဆုံးတွင် သစ္စာဖောက်ခံခဲ့ရပြန်သည်။
သို့သော် လူသားဧကရာဇ်၏ စကားများအရ... သစ္စာဖောက်မှုသည် ဖူမိသားစု ဖျက်ဆီးခံရခြင်းကို ရည်ညွှန်းနေခြင်း မဟုတ်ဘဲ... အခြားတစ်စုံတစ်ရာကို ရည်ညွှန်းနေပုံရသည် မဟုတ်လော။
...
အဆုံးမဲ့တိုက်ကြီး... အရှေ့ပိုင်းနယ်မြေ ကောင်းကင်ယံအထက်၌.....
ယွမ်ကျွင်းမဟာဧကရာဇ်၏ လက်ဝါးသည် အထက်ကောင်းကင်ပေါ်သို့ ကျဆင်းလာ၏။ သူ၏မျက်လုံးများတွင် ကိုယ့်ကိုယ်ကိုယ် ကျေနပ်မှုအရိပ်အယောင်တစ်ခု ရှိနေသည်။
ကောင်းကင်ဘုံအရှင်သခင်သည် လှည့်စားခံရ၍ ထွက်ခွာသွားပြီဖြစ်ရာ... ဤကျယ်လှပြောသော ကောင်းကင်ယံတွင် မည်သူက... သူ့အား တားဆီးနိုင်မည်နည်း။
သို့သော်... ယွမ်ကျွင်းမဟာဧကရာဇ်သည် သူ၏ လက်ဝါးတစ်ချက်တည်းဖြင့်... အထက်ကောင်းကင်တားမြစ်နယ်မြေကို ချေမှုန်းနိုင်ပြီဟု အပြည့်အဝ ယုံကြည်မှုရှိနေစဉ်... အထက်ကောင်းကင်အထက်မှ မြင်ကွင်းသည် ရုတ်တရက် ပြောင်းလဲသွားလေသည်။
လေဟာနယ်၌ အဆုံးမဲ့ဟွမ်သွမ့်ချီများ လျှံတက်လာ၏။ မိုးကြိုးဘေးဒုက္ခများ နေရာအနှံ့ ဖြစ်ပေါ်နေပြီး မြေ၊ မီး၊ လေ၊ ရေတို့၏ ချီစွမ်းအားများ တစ်လှည့်စီ ပေါ်ထွက်လာသည်။
ဘေးဒုက္ခ၏ အဆုံးမဲ့စွမ်းအားသည် ကမ္ဘာပျက်ကြိတ်ဆုံအဖြစ် ပြောင်းလဲသွားပြီး ယွမ်ကျွင်းမဟာဧကရာဇ် ဆန့်ထုတ်လိုက်သော လက်ကို အလွယ်တကူ ကြိတ်ချေ ဖျက်ဆီးလိုက်သည်။
" ဒါက ကပ်ဘေးတစ်သောင်းသတ်ဖြတ်ခြင်း အစီအရင်ပဲ "
ကောင်းကင်တားဘုံမြစ်နယ်မြေအတွင်း၌ ယွမ်ကျွင်းမဟာဧကရာဇ်၏ တိုက်ခိုက်မှု အလွယ်တကူ ချေမှုန်းခံရသည်ကို မြင်သောအခါ ကုချင်းရွဲ့၏ မျက်လုံးများတွင် စိတ်လှုပ်ရှားမှု အရိပ်အယောင်တစ်ခု ပေါ်လာသည်။
ဤကပ်ဘေးတစ်သောင်းသတ်ဖြတ်ခြင်း အစီအရင်သည်... ဘိုးဘေးကြီး ကုမိသားစုကို အထက်ကောင်းကင်သို့ ပြောင်းရွှေ့ပြီးနောက်... နောင်တွင် သူ အပြင်တွင် ရောက်ရှိနေချိန်၌... တစ်စုံတစ်ဦးက အထက်ကောင်းကင်အား အနှောင့်အယှက်ပေးမည်ကို စိုးရိမ်သည့်အတွက်... ကုမိသားစုကို ကာကွယ်ရန် တည်ဆောက်ခဲ့ခြင်းဖြစ်သည်။
အချိန်များစွာကြာပြီးနောက် ဤအစီအရင်ကြီးကို နောက်ဆုံးတွင် အသုံးပြုလာရလိမ့်မည်ဟု သူ မမျှော်လင့်ခဲ့ပေ။