အခန်း (၁၆၀-၁၆၂)

အခန်း (၁၆၀) - နေလမင်း ကျွန်း အပျက်အစီးများ၊ ကြီးမားသော အခွင့်အလမ်း (အပိုင်း ၁)

~ကိုယ်ခန္ဓာ သန့်စင်ခြင်း အဆင့်ကို ချိုးဖောက် ဝင်ရောက်ပြီးနောက်၊ စုယွီသည် 'မြေကမ္ဘာနှင့် သစ်သား ကျင့်စဉ်'၊ 'ကောင်းကင်ဖီးနစ် နိဗ္ဗာန် ကျင့်စဉ်' ကဲ့သို့သော ကျင့်စဉ်များကို ပုံမှန်အတိုင်း ဆက်လက် ကျင့်ကြံနေ၏။ မာနထောင်လွှားခြင်း၊ စိတ်လိုက်မာန်ပါ ဖြစ်ခြင်း အလျဉ်းမရှိ။ သူ့အင်အား တိုးတက်လာသော်လည်း၊ သူ၏ မူလ တည်ငြိမ်မှုက မယိမ်းယိုင်ခဲ့။

သူသည် ကျင့်စဉ်များကို စနစ်တကျ လေ့ကျင့်ပြီး၊ တစ်ဆင့်ပြီး တစ်ဆင့် တည်ငြိမ်စွာ တိုးတက်အောင် လုပ်ဆောင်နေလေ၏။

ကိုယ်ခန္ဓာ သန့်စင်ခြင်း လမ်းစဉ်သည် ရှေးယခင်က အလွန် ခမ်းနားကြီးကျယ်ခဲ့ဖူးသည်။ ရှေးဟောင်းခေတ်တွင် ကြောက်မက်ဖွယ် ကောင်းသော သတ္တဝါများသည် ကိုယ်ခန္ဓာ သက်သက်ဖြင့်ပင် နတ်ဘုရားနှင့် မိစ္ဆာ အဆင့်သို့ ရောက်ရှိနိုင်ခဲ့ကြ၏။ သူတို့သည် ကိုယ်ခန္ဓာဖြင့် ကောင်းကင်ကို ထောက်မနိုင်၊ ကောင်းကင်ကို လက်သီးဖြင့် ထိုးဖောက်နိုင်ပြီး၊ ခြေထောက်ဖြင့် ကြယ်များကို ရိုက်ခွဲနိုင်စွမ်း ရှိကြ၏။ စစ်မှန်သော ပြိုင်ဘက်ကင်း သတ္တဝါများ ဖြစ်ခဲ့ကြ၏။

သို့သော် ယခုအခါ ကိုယ်ခန္ဓာ ကျင့်ကြံခြင်း လမ်းစဉ်သည် ချိန်မှိန်သွားခဲ့ပြီး အင်မော်တယ် လမ်းစဉ်နှင့် ယှဉ်လျှင် မှေးမှိန်သွားခဲ့ပြီ ဖြစ်၏။

အင်မော်တယ် လမ်းစဉ်ပေါ်တွင် ဆက်လက် လျှောက်လှမ်းလိုပါက၊ မှော်စွမ်းအင် ကျင့်ကြံခြင်း အဆင့်ကို မမောမပန်း တိုးတက်အောင် လုပ်ဆောင်ရန် လိုအပ်ပေသည်။

မှော်စွမ်းအင် တိုးတက်မှု ဆိုသည်မှာ ညတွင်းချင်း ရရှိနိုင်သော အရာ မဟုတ်ဘဲ၊ နေ့စဉ် မပျက်မကွက် စုဆောင်းရသော အရာ ဖြစ်၏။

ဤသည်မှာ သာမန် ကျင့်ကြံသူများအတွက်ရော၊ စုယွီ၏ ကျင့်စဉ် ကျွမ်းကျင်မှုများအတွက်ပါ အကျုံးဝင်လေ၏။

သို့သော် အခြားသူများနှင့် နှိုင်းယှဉ်လျှင် သူ စုဆောင်းထားသော ကျွမ်းကျင်မှုများတွင် အတားအဆီး ဆိုသည်မှာ မရှိပေ။

ကျင့်စဉ် အမျိုးမျိုးကို လေ့ကျင့်ရင်း နှစ်နာရီကျော် ကုန်ဆုံးသွားပြီးနောက်၊ စုယွီသည် လျှို့ဝှက်ခန်းမဆောင်မှ ချက်ချင်း ထွက်ခွာခြင်း သို့မဟုတ် နေလမင်း ကျွန်းကို ရှာဖွေခြင်း မပြုသေးပေ။

ထို့အစား သူသည် 'အမှောင်နတ်ဘုရား ဆေးလုံး' အတွက် ကုန်ကြမ်း ပစ္စည်းများကို ချန်ခွန်းအိတ်ထဲမှ ထုတ်ယူလိုက်ပြီး အနီးနားရှိ ဆေးဖော်စပ်ရာ နေရာသို့ ရွှေ့ပြောင်းသွားသည်။ ဆေးပေါင်းအိုး တစ်လုံးကို ဆင့်ခေါ်လိုက်ပြီး စိတ်ကို အာရုံစိုက်ကာ 'အမှောင်နတ်ဘုရား ဆေးလုံး' ဖော်စပ်ရန် ပြင်ဆင်လိုက်၏။

"မိသားစု ခေါင်းဆောင်၊ အကြီးအကဲ စုဟယ် နဲ့ ပဉ္စမ အကြီးအကဲ စုတကျွင်း တို့ အားလုံးက ချီစွမ်းအင် စုစည်းခြင်း (အဆင့် ၉) မှာ ရှိနေကြတယ်... သူတို့ အားလုံး အသက်ကြီးနေကြပြီ... 'အခြေခံ တည်ဆောက်ခြင်း ဆေးလုံး' သောက်သုံးပြီး အခြေခံ တည်ဆောက်ခြင်း အဆင့်ကို နောက်တစ်ကြိမ် ကြိုးစား တက်လှမ်းနိုင်ဖို့အတွက် 'အမှောင်နတ်ဘုရား ဆေးလုံး' ကို ပြင်ဆင်ပေးဖို့ လိုအပ်တယ်"

စုယွီ စနစ်တကျ အကွက်ချ စဉ်းစားနေသည်။

"အကြီးအကဲ စုကျန်း ကတော့ သိပ်မကြီးသေးဘူး... သူ ကိုယ်တိုင် 'အခြေခံ တည်ဆောက်ခြင်း ဆေးလုံး' သောက်ပြီး အဆင့်တက်ဖို့ ကြိုးစားနိုင်တယ်"

"ဒါကြောင့် ငါတို့ မိသားစု အနေနဲ့ 'အခြေခံ တည်ဆောက်ခြင်း ဆေးလုံး' (၄) လုံးနဲ့ 'အမှောင်နတ်ဘုရား ဆေးလုံး' (၃) လုံး သုံးစွဲဖို့ လိုအပ်လိမ့်မယ်"

ခေတ္တမျှ တွေးတောပြီးနောက် စုယွီ ပြန်လည် သတိရလိုက်၏။ ပြီးခဲ့တဲ့ တစ်ခေါက်က စုယွင်၊ စုချိန်နှင့် စုရို့ဆု တို့ (၃) လုံး သုံးစွဲပြီးနောက်၊ မိသားစု သိုလှောင်ခန်းထဲမှာ (၈) လုံး ကျန်ရှိနေသေးသည်။

အကယ်၍ ဒီတစ်ခါ (၄) လုံး ထပ်သုံးလိုက်ရင် တစ်ဝက်လောက်ပဲ ကျန်တော့မှာ။

"ပြန်လည် ဖြည့်တင်းဖို့ ပြင်ဆင်ရမယ်... ယွီမိသားစုလည်း လိုအပ်လောက်တယ်... သူတို့ အရင်က ပြောဖူးတာတော့ (၄) နှစ် (၅) နှစ် နေမှ တစ်ကြိမ် ဆေးဖော်ကြတာ ဆိုတော့... မကြာခင် 'အခြေခံ တည်ဆောက်ခြင်း ဆေးလုံး' ကုန်ကြမ်း ပစ္စည်း (၂) စုံ လာပို့လောက်တယ်"

စုယွီ သက်ပြင်းမသိမသာ မှုတ်ထုတ်လိုက်မိ၏။

ဒါဆိုရင် မိသားစု အနေနဲ့ 'အခြေခံ တည်ဆောက်ခြင်း ဆေးလုံး' (၄) လုံး (၅) လုံးလောက် ပြန်လည် ဖြည့်တင်းနိုင်လောက်ပြီ ဖြစ်၏။

နှမြောစရာ ကောင်းတာက ဒီကာလ အတွင်းမှာ ဘယ်သူကမှ စုမိသားစုကို 'အခြေခံ တည်ဆောက်ခြင်း ဆေးလုံး' ဖော်စပ်ပေးဖို့ လာမကမ်းလှမ်းခဲ့ကြတာပဲ။

မဟုတ်ရင် သူ နည်းနည်းလောက် စုဆောင်းထားလို့ ရနိုင်မှာပါ။

"'အခြေခံ တည်ဆောက်ခြင်း ဆေးလုံး' ကုန်ကြမ်း ပစ္စည်းတွေ အတွက် 'ဟင်းလင်းပြင် ဝိညာဉ် သစ်သီး' တွေ လိုအပ်နေသေးတယ်... 'သန့်စင်သော မိစ္ဆာ အမြုတေ' နဲ့ တခြား ပစ္စည်းတွေက (၃) စုံစာ လောက်တော့ ရှိတယ်... ဒါပေမဲ့ 'ဟင်းလင်းပြင် ဝိညာဉ် သစ်သီး' ကတော့ တကယ့်ကို ခေါင်းကိုက်စရာပဲ... အင်အားကြီး အဖွဲ့အစည်းတွေက လက်ဝါးကြီးအုပ်ထားကြတယ်... တောရိုင်းထဲမှာ တွေ့ရတဲ့ 'ဟင်းလင်းပြင် ဝိညာဉ် သစ်ပင်' တွေ ဆိုရင်လည်း သူတို့က တူးရွှေ့ပြီး ယူသွားကြတယ်... ရှာဖို့ တော်တော် ခက်တယ်"

စုယွီ မျက်မှောင် အနည်းငယ် ကြုတ်လိုက်မိသည်။

တပြိုင်နက်တည်းမှာပင် သူ့ခေါင်းထဲ၌ အကြံတစ်ခု ဝင်လာသည်။ 'ဟင်းလင်းပြင် ဝိညာဉ် သစ်ပင်' လိုမျိုး အဓိက ကုန်ကြမ်း ပစ္စည်း ဝိညာဉ် အပင်တွေကို စတင် စုဆောင်းဖို့ အချိန်တန်ပြီ ဖြစ်၏။

မဟုတ်ရင် စုမိသားစု အနေနဲ့ 'အခြေခံ တည်ဆောက်ခြင်း ဆေးလုံး' ကုန်ကြမ်း ပစ္စည်းတွေအတွက် သူများ လက်ခုပ်ထဲက ရေ ဖြစ်နေရဦးမှာ။

ထိုသို့ တွေးတောပြီးနောက် စုယွီသည် အခြား အတွေးများကို ဖိနှိပ်ထားလိုက်ပြီး 'ရွှေပုစဉ်းရင်ကွဲ ကျင့်စဉ်' ကို လည်ပတ်ကာ 'အမှောင်နတ်ဘုရား ဆေးလုံး' ကို စတင် ဖော်စပ်လိုက်၏။

"'နတ်ဘုရားမဲ့ ပန်း'... 'ကောင်းကင် မြွေ မြက်'... 'ဝိညာဉ် ခြင်ဆီ အရည်' ..."

ဆေးဖက်ဝင် ပစ္စည်းများသည် တစ်ခုပြီး တစ်ခု ဆေးပေါင်းအိုးထဲသို့ ကျရောက်သွားပြီး ဆေးရည် အဖြစ်သို့ ပြောင်းလဲသွားကြ၏။

တစ်နာရီကျော်ခန့် အကြာဝယ်၊

ဤ 'အမှောင်နတ်ဘုရား ဆေးလုံး' တစ်သုတ်ကို အောင်မြင်စွာ ဖော်စပ်နိုင်ခဲ့သည်။

"ဝူး"

စုယွီက ဆေးလုံး သိမ်းဆည်းခြင်း နည်းစနစ်ကို အသုံးပြုလိုက်သည်နှင့် ဆေးပေါင်းအိုး အဖုံး ပွင့်ထွက်သွားသည်။ ချက်ချင်း ဆိုသလိုပင် ဆေးလုံး (၄) လုံး ပျံထွက်လာသည်။ တစ်လုံးစီသည် လုံးဝန်းနေပြီး ထူးခြားသော မွှေးပျံ့သည့် ရနံ့များ ထွက်ပေါ်နေကာ အပြစ်အနာအဆာ ကင်းမဲ့သော ပုလဲလုံးများကဲ့သို့ ဖြစ်နေသည်။

ထို ဆေးလုံး (၄) လုံးကို ကြည့်ပြီး စုယွီ၏ မျက်လုံးများ အနည်းငယ် အရောင်လက်သွားသည်။ သူ မဲ့ပြုံးတစ်ချက် ပြုံးလိုက်ပြီး ပြောလိုက်၏။

"မဆိုးပါဘူး... ထိပ်တန်း အရည်အသွေး 'အမှောင်နတ်ဘုရား ဆေးလုံး' (၄) လုံးပဲ"

'အမှောင်နတ်ဘုရား ဆေးလုံး' ၏ အဆင့်အတန်းသည် မမြင့်မားလှပေ။ (ဒုတိယအဆင့်) အဆင့်နိမ့် ဆေးလုံးမျှသာ ဖြစ်၏။

သို့သော် စုယွီ၏ ဒုတိယအကြိမ် ကြိုးစားမှုတွင် ဆေးလုံး (၄) လုံး တစ်ပြိုင်နက် ထွက်ရှိလာပြီး၊ အားလုံးက ထိပ်တန်း အရည်အသွေး ဖြစ်နေသည်။

အကယ်၍ အခြား (ဒုတိယအဆင့်) ဆေးပညာရှင်များသာ သူ့ဆေးပညာကို မြင်တွေ့လိုက်ရပါက ပါးစပ်အဟောင်းသား ဖြစ်သွားကြပေလိမ့်မည်။

တစ်သုတ်တွင် ထွက်ရှိသော ဆေးလုံး အရေအတွက်သည် ဆေးပညာရှင်၏ ကျွမ်းကျင်မှုအပေါ် မူတည်သကဲ့သို့ ကုန်ကြမ်း ပစ္စည်းများ၏ အရည်အသွေးအပေါ်လည်း မူတည်လေ၏။ တချို့ ပစ္စည်းများက (၅) လုံး အထိ ကန့်သတ်ချက် ရှိပြီး၊ တချို့က (၄) လုံးသာ ရရှိနိုင်သည်။

ဤ 'အမှောင်နတ်ဘုရား ဆေးလုံး' ကုန်ကြမ်း ပစ္စည်းများ အတွက်မူ (၄) လုံးသည် ကန့်သတ်ချက် ဖြစ်နေ၏။

ပထမ အကြိမ် အောင်မြင်စွာ ဖော်စပ်ပြီးနောက် စုယွီသည် တင်ပျဉ်ခွေ ထိုင်ကာ သူ့၏ မှော်စွမ်းအင်နှင့် စွမ်းအင်များကို ပြန်လည် ဖြည့်တင်းလိုက်၏။

တစ်နာရီ အကြာတွင် စုယွီသည် ဒုတိယ အသုတ် 'အမှောင်နတ်ဘုရား ဆေးလုံး' ကို စတင် ဖော်စပ်လိုက်ပြန်သည်။

ဤ ဒုတိယ အသုတ်တွင် စုယွီသည် သူ့ကိုယ်သူ ကျော်လွန်အောင် လုပ်ဆောင်နိုင်ခဲ့ပြီး 'အမှောင်နတ်ဘုရား ဆေးလုံး' (၅) လုံး ထွက်ရှိလာသည်။ ထိုအထဲမှ တစ်လုံးသည် ပြီးပြည့်စုံသော အရည်အသွေး ဖြစ်ပြီး၊ ကျန် (၄) လုံးသည် ထိပ်တန်း အရည်အသွေး ဖြစ်ကြ၏။

"မဆိုးဘူး"

ထင်ရှားပြတ်သားသော ဆေးလုံး အဆင်များ ပါရှိသည့် ပြီးပြည့်စုံသော 'အမှောင်နတ်ဘုရား ဆေးလုံး' ကို ကြည့်ပြီး စုယွီ တိတ်တဆိတ် ကျေနပ်နေမိသည်။

အကယ်၍ ဤ 'အမှောင်နတ်ဘုရား ဆေးလုံး' ကို သောက်သုံးပါက မိသားစု ခေါင်းဆောင်၏ အဆင့်တက်နိုင်ခြေသည် ပိုမို မြင့်မားလာပေလိမ့်မည်။

မှော်စွမ်းအင်များ ပြန်လည် ပြည့်ဝလာပြီးနောက် စုယွီ နောက်ဆုံးတွင် လျှို့ဝှက်ခန်းမဆောင်မှ ထွက်ခွာလာခဲ့သည်။

ထိုအချိန်တွင် အပြင်ဘက်၌ မှောင်နေပြီ ဖြစ်၏။

စုယွီသည် စုဖုန်း၊ စုဟယ်၊ စုတကျွင်းနှင့် စုကျန်း တို့ကို ရှာဖွေတွေ့ရှိခဲ့သည်။ 'အမှောင်နတ်ဘုရား ဆေးလုံး' (၃) လုံးကို စုဖုန်းအား ပေးအပ်လိုက်ပြီး အဆင့်တက်ပြီးနောက် ဖြစ်ပေါ်လာနိုင်သော ဆိုးကျိုးများကို ရှင်းလင်း ပြောပြလိုက်ပါသည်။ အခြေခံ တည်ဆောက်ခြင်း အဆင့်ကို တက်လှမ်းရန် ကြိုးစားမလား၊ မကြိုးစားဘူးလား ဆိုသည်ကို သူတို့ ဆုံးဖြတ်ချက် အတိုင်းသာ ထားရှိလိုက်၏။

စုကျန်း အတွက်မူ စုယွီက ထိပ်တန်း အရည်အသွေး 'အခြေခံ တည်ဆောက်ခြင်း ဆေးလုံး' တစ်လုံး ပေးအပ်လိုက်ပြီး၊ တံခါးပိတ် ကျင့်ကြံရန်နှင့် အဆင့်တက်ရန် ကြိုးစားရန် မှာကြားလိုက်၏။

မျှော်လင့်ထားသည့် အတိုင်းပင်၊ သူတို့၏ အထွတ်အထိပ် အခြေအနေကို ပြန်လည် ရရှိနိုင်ပြီး အခြေခံ တည်ဆောက်ခြင်း အဆင့်ကို နောက်တစ်ကြိမ် ကြိုးစား တက်လှမ်းနိုင်မည် ဆိုသည်ကို ကြားလိုက်ရသောအခါ၊ စုဖုန်း၊ စုဟယ်နှင့် စုတကျွင်းတို့သည် အံကြိတ်ပြီး ရှေ့ဆက်တိုးရန် ရွေးချယ်လိုက်ကြ၏။

စုဖုန်းသည် အသက် (၁၀၄) နှစ် ရှိနေပြီ ဖြစ်ပြီး သက်တမ်း ကုန်ဆုံးရန် မလိုတော့ပေ။ ဖြစ်နိုင်တာက နှစ် (၂၀) ခန့်သာ ကျန်တော့မည်။

စုဟယ်က ငယ်ရွယ်သော်လည်း အသက် (၈၀) ကျော်နေပြီ ဖြစ်ပြီး စုကျန်းထက် အနည်းငယ် ကြီးသည်။

စုတကျွင်းက အသက် (၉၀) ကျော်နေ၏။

အကယ်၍ သူတို့ အခြေခံ တည်ဆောက်ခြင်း အဆင့်ကို နောက်တစ်ကြိမ် ထပ်မကြိုးစားခဲ့လျှင်၊ သူတို့အတွက် အခွင့်အရေး ရှိတော့မည် မဟုတ်ပေ။

အကယ်၍ အောင်မြင်ခဲ့လျှင် သူတို့၏ သက်တမ်းကို ဆယ်စုနှစ် အနည်းငယ် ထပ်မံ ဆွဲဆန့်နိုင်ပေလိမ့်မည်။

သူတို့ (၄) ဦးသည် သီးခြားစီ တံခါးပိတ် ကျင့်ကြံခြင်းကို စတင်ကြပြီး အဆင့်တက်ရန် ပြင်ဆင်ကြလေ၏။

စုယွီသည် တာအို ကိုယ်ပွား ရုပ်သေးကို သူတို့အား စောင့်ရှောက်ရန် ထားခဲ့ပြီး၊ သူ ကိုယ်တိုင်ကမူ လွတ်မြောက်ခြင်း နည်းစနစ်ကို အသုံးပြုကာ မြေကြီးအောက် နက်နက်သို့ တိုးဝင်သွားပြီး နေလမင်း ကျွန်း၏ ခြေရာလက်ရာများကို ဆက်လက် ရှာဖွေလိုက်၏။

လဝက် ကြာပြီးနောက်။

စုယွီသည် ဆေးလုံး တောင်တန်း အောက်ခြေရှိ ဧရိယာ အတော်များများကို ရှာဖွေပြီးသွားပြီ ဖြစ်၏။ မြေအောက် ဥမင်လိုဏ်ခေါင်းများနှင့် မြေအောက် ရေလမ်းကြောင်း အများအပြားကို တွေ့ရှိခဲ့သော်လည်း နေလမင်း ကျွန်း၏ အရိပ်အယောင်မျှ မတွေ့ရှိရသေးပေ။

အခန်း (၁၆၁) - နေလမင်း ကျွန်း အပျက်အစီးများ၊ ကြီးမားသော အခွင့်အလမ်း (အပိုင်း ၂)

~ထိုနေ့တွင် တာအိုဆရာ ရှုယွီ သည် ပျံသန်းရေး လှေ ဖြင့် ဆေးလုံးတောင်သို့ နောက်တစ်ကြိမ် ရောက်ရှိလာ၏။

စုယွီကို တွေ့လိုက်သည်နှင့် တာအိုဆရာ ရှုယွီသည် ဆေးလုံး ကိစ္စကို မမေးဘဲ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ပညာနှင့် ပတ်သက်၍ အလေးအနက် မေးမြန်းလိုက်၏။

"တာအို မိတ်ဆွေ စု... ခင်ဗျားရဲ့ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ဖန်တီးတဲ့ အောင်မြင်မှု နှုန်းထားက ဘယ်လောက်လဲ"

စုယွီ မျက်မှောင် အနည်းငယ် ကြုတ်သွားပြီး ခဏတာ စဉ်းစားဟန် ပြုလိုက်၏။ ထို့နောက်မှ အေးဆေးစွာ ဖြေကြားလိုက်၏။

"၄၀ ရာခိုင်နှုန်းလောက် ရှိမယ်"

တကယ်တမ်းတွင် ၇၀ ရာခိုင်နှုန်းနှင့် ၈၀ ရာခိုင်နှုန်းကြား ရှိသည်။

သို့သော် (တတိယအဆင့်) အဆင့်နိမ့် အဆောင်လက်ဖွဲ့ ပညာရှင် တစ်ဦးက (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ရေးဆွဲလျှင်ပင် ဤ အောင်မြင်မှု နှုန်းထားသည် ပုံမှန်ဟု သတ်မှတ်၍ ရသည်။

လက်ရှိတွင် သူ့၏ ကျင့်ကြံခြင်း အဆင့်သည် အခြေခံ တည်ဆောက်ခြင်း (အဆင့် ၃) သာ ရှိသေးသည်။ (ဒုတိယအဆင့်) အလယ်အလတ်တန်းစား အဆောင်လက်ဖွဲ့များအတွက် ၇၀ ရာခိုင်နှုန်းမှ ၈၀ ရာခိုင်နှုန်း အောင်မြင်မှု ရရှိသည် ဆိုပါက အလွန် ကြောက်မက်ဖွယ် ကောင်းလှသည်။ ဤအချက်ကို သူ လုံးဝ ထုတ်ဖော်ပြသ၍ မဖြစ်ပေ။

ထို့အပြင် ၄၀ ရာခိုင်နှုန်း အောင်မြင်မှု နှုန်းထား ဆိုလျှင်ပင် (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ပညာရှင်များကြားတွင် ထိပ်တန်း အဆင့်ဟု သတ်မှတ်၍ ရနေပြီ ဖြစ်၏။

"၄၀ ရာခိုင်နှုန်း ဟုတ်လား"

တာအိုဆရာ ရှုယွီ အံ့အားသင့်စွာဖြင့် စုယွီကို စိုက်ကြည့်လိုက်၏။ သူ မျှော်လင့်ထားသည်မှာ အနည်းဆုံး ၂၀ ရာခိုင်နှုန်း၊ အကောင်းဆုံး အခြေအနေတွင် ပုံမှန် အဆင့် ၃၀ ရာခိုင်နှုန်းလောက်သာ ရှိမည်ဟု ထင်ထားခဲ့ခြင်း ဖြစ်၏။

သို့သော် အခြေခံ တည်ဆောက်ခြင်း (အဆင့် ၃) သာ ရှိသေးသော စုယွီသည် (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ပညာတွင် ဤမျှ ကျွမ်းကျင်ပိုင်နိုင်လိမ့်မည်ဟု သူ လုံးဝ ထင်မထားခဲ့ပေ။

စုယွီကို လေးလေးနက်နက် တစ်ချက် ကြည့်လိုက်ပြီးနောက် တာအိုဆရာ ရှုယွီက အလေးအနက် ပြောလိုက်၏။

"တာ့ယွဲ့ မှောင်ခိုဈေးက (ဒုတိယအဆင့်) အလယ်အလတ်တန်းစား အဆောင်လက်ဖွဲ့ အများအပြား လိုအပ်နေတယ်... ဒါကြောင့် တာအို မိတ်ဆွေ စု အနေနဲ့ အရည်အသွေး နိမ့်တဲ့ အဆောင်လက်ဖွဲ့တွေ ဖန်တီးစရာ မလိုပါဘူး"

"ကုန်ကြမ်း ပစ္စည်း (၃) စုံကို အဆောင်လက်ဖွဲ့ တစ်ခု ထွက်အောင် လုပ်ပေးရင် ရပြီ... 'ကောင်းကင် အပျက်အစီး ခန်းမဆောင်' က တာအို မိတ်ဆွေ စု ကို အဆောင်လက်ဖွဲ့ တစ်ခုအတွက် အလယ်အလတ်စား ဝိညာဉ်ကျောက်တုံး (၃) တုံး ဆုချီးမြှင့်ပါ့မယ်"

"ဒါက (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ကုန်ကြမ်း ပစ္စည်း (၆၀) စုံပါ... ယူသွားလိုက်ပါ... လဝက် ကြာရင် ပြီးစီးတဲ့ အဆောင်လက်ဖွဲ့တွေနဲ့အတူ ခင်ဗျားရဲ့ ဆုကြေးကို ပြန်လာယူပါ့မယ်"

ခေတ္တမျှ စဉ်းစားပြီးနောက် စုယွီ ခေါင်းငြိမ့်ကာ သဘောတူလိုက်၏။

"ကောင်းပါပြီ... ကျွန်တော် လက်ခံပါတယ်"

ကုန်ကြမ်း ပစ္စည်း အတွက် ပူပန်စရာ မလိုသရွေ့ အဆင်ပြေသည်။ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ကုန်ကြမ်း ပစ္စည်းများ စုဆောင်းရသည်မှာ လွယ်ကူသော ကိစ္စ မဟုတ်ပေ။ ထို့အပြင် ပြီးစီးသော အဆောင်လက်ဖွဲ့ တစ်ခုအတွက် အဆင့်နိမ့် ဝိညာဉ်ကျောက်တုံး (၃၀၀) ကျော်နှင့် ညီမျှသော ဆုကြေး ရရှိမည် ဖြစ်ရာ ထိုက်တန်သည်ဟု ဆိုရမည်။

လဝက် အတွင်း သူသည် ပြီးစီးသော အဆောင်လက်ဖွဲ့ (၂၀) သာ ပေးအပ်ရန် လိုအပ်သည်။

ထိုအချိန် ရောက်လျှင် ကုန်ကြမ်း ပစ္စည်း ထက်ဝက်ခန့် ကျန်ရှိနေမည် ဖြစ်၏။ ထို့အပြင် အဆင့်နိမ့် ဝိညာဉ်ကျောက်တုံး (၆,၀၀၀) ကျော်နှင့် ညီမျှသော အလယ်အလတ်စား ဝိညာဉ်ကျောက်တုံး (၆၀) ကိုလည်း ရရှိမည် ဖြစ်၏။ တန်ဖိုး ရှိသော အရောင်းအဝယ် တစ်ခု ဖြစ်၏။

ဒါပေါ့လေ။ စုယွီ အဓိက စိတ်ဝင်စားသည်မှာ 'ကောင်းကင် အပျက်အစီး ခန်းမဆောင်' ၏ ကုန်ကြမ်း ပစ္စည်းများ ဖြစ်၏။ ဤနှုန်းထား အတိုင်း ဆက်လက် လုပ်ဆောင်နိုင်ပါက တစ်ကြိမ်လျှင် ထက်ဝက်ခန့် စုဆောင်းထားနိုင်မည် ဖြစ်၏။ ဤနည်းဖြင့် 'ကောင်းကင် အပျက်အစီး ခန်းမဆောင်' ထံမှ (ဒုတိယအဆင့်) အလယ်အလတ်တန်းစား အဆောင်လက်ဖွဲ့ ကုန်ကြမ်း ပစ္စည်း အမြောက်အမြား ရရှိနိုင်ပေလိမ့်မည်။

ခဏအကြာဝယ်၊

တာအိုဆရာ ရှုယွီနှင့် စုယွီတို့သည် အဆောင်လက်ဖွဲ့ အားလုံးကို တိုက်ခိုက်ရေး အမျိုးအစားများသာ ဖြစ်စေရန် သဘောတူလိုက်ကြ၏။ ထို့နောက် ယခု ကာလအတွင်း စုမိသားစု ဖော်စပ်ထားသော ဆေးလုံးများ ပါဝင်သည့် ချန်ခွန်းအိတ် တစ်လုံးကို စုရွီအန်းထံမှ လက်ခံရယူလိုက်၏။

စုမိသားစု ပိုင်ဆိုင်သော ကုန်ကြမ်း ပစ္စည်းများဖြင့် ဖော်စပ်ထားသော ဆေးလုံးများအတွက် ဝိညာဉ်ကျောက်တုံး စာရင်းရှင်းတမ်းများကို စုရွီအန်းနှင့် ဖြေရှင်းပြီးနောက် တာအိုဆရာ ရှုယွီ ပြန်လည် ထွက်ခွာရန် ပြင်ဆင်လိုက်၏။ သို့သော် စုယွီက သူ့ကို လှမ်းတားလိုက်၏။

"တာအို မိတ်ဆွေ ရှုယွီ... ခဏလေး"

စုယွီက မေးမြန်းလိုက်၏။

"တာ့ယွဲ့ နန်းတော်ရဲ့ တိုက်ရိုက် တပည့် တာအိုဆရာ ရှုဟိုင် အကြောင်း သတင်းအချက်အလက် ရှိမလား"

အံ့သြသွားသော တာအိုဆရာ ရှုယွီ လှည့်ကြည့်လိုက်ပြီး ပြန်မေးလိုက်၏။

"တာအို မိတ်ဆွေ စု... ဘာဖြစ်လို့ ဒီသတင်းအချက်အလက်ကို လိုချင်ရတာလဲ"

ခေတ္တမျှ စဉ်းစားပြီးနောက် စုယွီ ရှင်းပြလိုက်၏။

"ကျွန်တော် တာ့ယွဲ့ မှောင်ခိုဈေးမှာ ရှိတုန်းက တာအိုဆရာ ရှုဟိုင်က တွေ့ဆုံဖို့ ဖိတ်ကြားလွှာ ပေးပို့ခဲ့ဖူးတယ်... ဒါပေမဲ့ မိသားစုဆီ အမြန် ပြန်လာစရာ ရှိလို့ ငြင်းပယ်ခဲ့ရတယ်"

"အခုတော့ တာအိုဆရာ ရှုဟိုင်က ဘယ်လို လူစားမျိုးလဲ ဆိုတာ သိချင်လို့ပါ"

"အော်"

တာအိုဆရာ ရှုယွီ စဉ်းစားလိုက်၏။ အတိတ်က တာအိုဆရာ ရှုဟိုင်၏ လုပ်ရပ်များကို ပြန်လည် သတိရလိုက်၏။ ယွင်ကျန်းဂိုဏ်းမှ ချန်ပိုင်လိုင် သည် စုယွီနှင့် စုဇီတို့ကို ရန်စခဲ့သဖြင့် ယွီခယ်အာ၏ ယဉ်ပါးသော သားရဲ၏ ရိုက်နှက်မှုကို ခံရပြီး ပြင်းထန်စွာ ဒဏ်ရာရရှိခဲ့သည်။

ယွင်ကျန်းဂိုဏ်း ဒုတိယ အကြီးအကဲသည် သူ့တပည့်အတွက် လက်တုံ့ပြန်ရန် ကြံစည်ခဲ့သော်လည်း၊ တာအိုဆရာ ရှုဟိုင်က သူ့ ဂျူနီယာ တပည့်ကို စေလွှတ်ပြီး ယွင်ကျန်းဂိုဏ်းကို ဖိအားပေးကာ တောင်းပန်ခိုင်းလိမ့်မည်ဟု မျှော်လင့်မထားခဲ့ပေ။

အကြောင်းရင်းက ဘာလဲ။ တာအို မိတ်ဆွေ စု က တာအိုဆရာ ရှုဟိုင်ရဲ့ မိတ်ဆွေရင်း ဖြစ်နေလို့တဲ့လား။

ဒါပေမဲ့...

ထူးဆန်းပြီး ရယ်စရာ ကောင်းတာက 'ကောင်းကင် အပျက်အစီး ခန်းမဆောင်' ရဲ့ မှတ်တမ်းတွေထဲမှာ တာအိုဆရာ ရှုဟိုင်နဲ့ စုယွီ၊ ဒါမှမဟုတ် စုဇီ၊ ဒါမှမဟုတ် စုမိသားစုဝင် တစ်ယောက်ယောက်နဲ့ အဆက်အသွယ် ရှိခဲ့တဲ့ အထောက်အထား လုံးဝ မရှိတာပါပဲ။

ဒါဆိုရင် ဒီ မိတ်ဆွေရင်း ဆိုတာ ဘယ်သူလဲ။ ဘယ်လိုလုပ်ပြီး မိတ်ဆွေရင်းတွေ ဖြစ်သွားကြတာလဲ။

တာအိုဆရာ ရှုဟိုင်က ဘာကြောင့် ဒီကိစ္စမှာ ဝင်ပါခဲ့တာလဲ။

သတင်းအချက်အလက်များကို အမြဲတမ်း ခွဲခြမ်းစိတ်ဖြာလေ့ရှိသော တာအိုဆရာ ရှုယွီသည် ဤကိစ္စကို အဖြေရှာ၍ မရနိုင် ဖြစ်နေသည်။

သူ စုယွီကို ကြည့်ပြီး တစ်ချက် ရယ်ကာ ပြောလိုက်၏။

"အရင်တုန်းက ဆိုရင်တော့ တာအို မိတ်ဆွေ စု အနေနဲ့ တာအိုဆရာ ရှုဟိုင် အကြောင်း သတင်းအချက်အလက် ဝယ်ယူလို့ ရမှာ မဟုတ်ဘူး... ဒါပေမဲ့ အခုတော့ ရပါပြီ... ဘယ်အပိုင်းကို စိတ်ဝင်စားတာလဲ"

"အထွေထွေ သတင်းအချက်အလက်လောက် ဆိုရင် ရပါပြီ... တာအိုဆရာ ရှုဟိုင်ရဲ့ စရိုက်လက္ခဏာကို သိချင်ရုံပါ"

"အဆင့်နိမ့် ဝိညာဉ်ကျောက်တုံး (၁,၀၀၀)"

ဒီလောက် များတာလား။

သို့သော် ခေတ္တမျှ စဉ်းစားပြီးနောက် စုယွီ သဘောပေါက်လိုက်၏။ တာ့ယွဲ့ နန်းတော် အကြီးအကဲ တစ်ဦး၏ တိုက်ရိုက် တပည့် အကြောင်း သတင်းအချက်အလက် စုဆောင်းရခြင်းသည် လွယ်ကူသော ကိစ္စ မဟုတ်သလို အန္တရာယ်လည်း များလှသည်ပင်။

ထို့ကြောင့် အဆင့်နိမ့် ဝိညာဉ်ကျောက်တုံး (၁,၀၀၀) ဆိုသည်မှာ တကယ်တမ်းတွင် မများလှပေ။

ဝိညာဉ်ကျောက်တုံးများ ပေးချေပြီးနောက် စုယွီသည် တာအိုဆရာ ရှုယွီထံမှ ကျောက်စိမ်းမှတ်တမ်း တစ်ခုကို လက်ခံရရှိလိုက်၏။ ထို့နောက် တာအိုဆရာ ရှုယွီသည် ပျံသန်းရေး လှေပေါ်သို့ တက်ရောက်ပြီး ထွက်ခွာသွားလေ၏။

ထိုအချိန်တွင် စုယွီသည် တာအိုဆရာ ရှုဟိုင် အကြောင်း ပါဝင်သော ကျောက်စိမ်းမှတ်တမ်းကို ကြည့်ရှုလိုက်၏။ တာအိုဆရာ ရှုဟိုင်၏ ဘဝ အတွေ့အကြုံများနှင့် စရိုက်လက္ခဏာများ၊ အသက်အရွယ်၊ ဝိညာဉ်အမြစ်၊ ကျင့်စဉ်၊ ထူးခြားသော စွမ်းရည်များနှင့် အခြား အချက်အလက်များ ပါဝင်လေ၏။ အဆင့်နိမ့် ဝိညာဉ်ကျောက်တုံး (၁,၀၀၀) ဆိုသော ဈေးနှုန်းသည် တကယ်တမ်း မျှတသည်ဟု ဆိုရမည်။

"တာအိုဆရာ ရှုဟိုင်... နာမည်ရင်း ချန်ရှုလင် ... လျှို့ဝှက် ကျင့်ကြံသူ ချန်မိသားစုမှ မွေးဖွားသည်... လက်ရှိ အသက် (၁၀၃) နှစ်... ထူးချွန်သော ပါရမီရှင် မြေကမ္ဘာ အဆင့် ရေဓာတ် ဝိညာဉ်အမြစ် ပိုင်ရှင်... လွန်ခဲ့သော (၅၂) နှစ်ကတည်းက အခြေခံ တည်ဆောက်ခြင်း (အဆင့် ၉) သို့ ရောက်ရှိခဲ့သည်..."

ထိုအချက်ကို မြင်လိုက်ရသောအခါ စုယွီ မျက်မှောင်ကြုတ်လိုက်မိသည်။

တာအိုဆရာ ရှုဟိုင်က အသက် (၁၀၀) ကျော်နေပြီကိုး။

လွန်ခဲ့သော (၅၂) နှစ်ကတည်းက အခြေခံ တည်ဆောက်ခြင်း (အဆင့် ၉) ကို ရောက်ရှိခဲ့တာလား။

နှစ်ပေါင်း (၅၀) ကျော်ကြာ အဆင့်မတက်သေးဘဲ နေနေတာက... အမြုတေ ဖွဲ့စည်းခြင်း အဆင့် ကို တက်လှမ်းဖို့ ယုံကြည်မှု မရှိလို့များလား။

ဒါမှမဟုတ် ရွှေရောင် အမြုတေကို စောင့်နေတာလား။

အခြား အတွေးတစ်ခု စုယွီ၏ ခေါင်းထဲသို့ ဝင်ရောက်လာသည်။

'ဒါမှမဟုတ် တာ့ယွဲ့ နန်းတော်မှာ ရွှေရောင် အမြုတေ တာအို အမွေအနှစ် ရှိနေပြီး... သူက ရွှေရောင် အမြုတေ လမ်းစဉ်ကို လျှောက်လှမ်းချင်နေတာများလား'

ထိုကိစ္စကို သိပ်ပြီး အာရုံမစိုက်တော့ဘဲ...

စုယွီသည် တာအိုဆရာ ရှုဟိုင်၏ ဘဝ ဖြစ်စဉ်များကို အသေးစိတ် လေ့လာကြည့်ရှုလိုက်၏။ ဖြစ်ရပ် တစ်ခုချင်းစီကို ကြည့်ရှုပြီးနောက် စုယွီ ကိုယ့်ဘာသာ တွေးတောလိုက်မိသည်။

'ဒီလူက... တိတ်တိတ်ဆိတ်ဆိတ် ကျင့်ကြံရတာကို ကြိုက်ပုံရတယ်... ဟုတ်တယ်... သူက ပြဿနာ ရှာလေ့ မရှိဘူး... ပြီးတော့ စာဖတ်တာကို အနှစ်သက်ဆုံးပဲ... ဒါကြောင့် သူ့ဆရာ တာအိုဆရာ ထျဲကျွမ် ရဲ့ လက်အောက်မှာ 'တာအိုဆရာ ရှုဟိုင်' (စာအုပ်ပင်လယ်) ဆိုတဲ့ ဘွဲ့နာမည်ကို ရွေးချယ်ခဲ့တာ ဖြစ်မယ်’

အခန်း (၁၆၂) - အပိုင်း (၀၉၉) - နေလမင်း ကျွန်း အပျက်အစီးများ၊ ကြီးမားသော အခွင့်အလမ်း (အပိုင်း ၃)

စာရင်းကို အစအဆုံး ဖတ်ရှုလိုက်သော်လည်း စုယွီသည် တာအိုဆရာ ရှုဟိုင်နှင့် ပတ်သက်ပြီး ထူးခြားချက် သို့မဟုတ် မူမမှန်မှု တစ်စုံတစ်ရာ မတွေ့ရှိရပေ။

'လျှို့ဝှက် ကျင့်ကြံသူ ချန်မိသားစု ဆိုတာ ဘာလဲ'

'ဘာကို လျှို့ဝှက် ကျင့်ကြံသူ မိသားစုလို့ ခေါ်တာလဲ'

အတိတ်ဘဝက ဗဟုသုတများကို ပြန်ပြောင်း စဉ်းစားကြည့်လိုက်သောအခါ စုယွီ စိတ်ထဲတွင် အတွေးတစ်ခု ပေါ်လာသည်။

‘ဖြစ်နိုင်တာက... မိမိတို့ကိုယ်ကို လူသိရှင်ကြား ထုတ်ဖော်မပြတဲ့ ကျင့်ကြံသူ မိသားစုတွေ ရှိနေနိုင်မလား... လောကကြီးနဲ့ အဆက်အသွယ် ဖြတ်ပြီး သီးသန့် ပုန်းအောင်းနေတဲ့ မိသားစုတွေလား’

ထိုအတွေးကြောင့် စုယွီ မျက်မှောင် အနည်းငယ် ကြုတ်သွားသည်။ ချန်မိသားစု၏ အင်အားသည် ဓားမြို့တော် ချင်မိသားစုနှင့် သားရဲထိန်း လီမိသားစုတို့နှင့် ယှဉ်လျှင် မည်သို့ ရှိမည်ကို မခန့်မှန်းနိုင် ဖြစ်နေသည်။

"အချိန်တန်ရင်တော့ သိလာရမှာပါလေ"

စုယွီသည် တာအိုဆရာ ရှုဟိုင်အပေါ် ထားရှိသော သတိထားမှုနှင့် သံသယကို ခေတ္တ လျှော့ချလိုက်၏။

တာအိုဆရာ ရှုဟိုင်၏ အဆင့်အတန်းနှင့် သူ့နောက်ကွယ်တွင် ရှိနေသော အမြုတေ ဖွဲ့စည်းခြင်း အဆင့် ဆရာသခင်ကို ထည့်သွင်း စဉ်းစားလိုက်သည်။

အကယ်၍ သူတို့သာ စုယွီ သို့မဟုတ် စုမိသားစုကို ဒုက္ခပေးချင်သည် ဆိုပါက၊ ထွက်ပြေး လွတ်မြောက်စရာ နေရာ ရှိမည် မဟုတ်ပေ။

သို့သော်၊ လောလောဆယ်တော့ ဆိုးကျိုး ဖြစ်လာစရာ အကြောင်း မရှိပါ။

စဉ်းစားကြည့်လိုက်တော့ စုယွီ ပြန်လည် သတိရလိုက်၏။ သူသည် ရှုဟိုင်၏ နောက်ခံကို စုံစမ်းပြီး သတင်းအချက်အလက် ရယူနိုင်ခဲ့သည်။

"ကောင်းကင် အပျက်အစီး ခန်းမဆောင် ရဲ့ 'မြို့တော်ဆယ်ခု တံဆိပ်ပြား'က တကယ် အသုံးဝင်တာပဲ... မဟုတ်ရင် စောစောက တာအိုဆရာ ရှုယွီ ပြောသလိုပဲ... သာမန် လူတစ်ယောက် အနေနဲ့ တာအိုဆရာ ရှုဟိုင်ကို စုံစမ်းဖို့ အရည်အချင်းတောင် ရှိမှာ မဟုတ်ဘူး"

ထိုကိစ္စကို ခေတ္တ ဘေးဖယ်ထားလိုက်ပြီး၊ စုယွီသည် တောင်အောက်တွင် နေလမင်း ကျွန်း ၏ ခြေရာလက်ရာကို ဆက်လက် ရှာဖွေရန် ပြန်သွားလိုက်၏။

'ကောင်းကင် အပျက်အစီး ခန်းမဆောင်' လိုအပ်သော (ဒုတိယအဆင့်) အလယ်အလတ်တန်းစား တိုက်ခိုက်ရေး အဆောင်လက်ဖွဲ့ (၂၀) အတွက်မူ သူ့သိုလှောင်ခန်းထဲတွင် အသင့် ရှိနေပြီးသား ဖြစ်၏။ အချိန်ကျရင် ထုတ်ပေးလိုက်ရုံသာ။

အခု သူ့အတွက် အရေးကြီးဆုံးက နေလမင်း ကျွန်းကို ရှာဖွေတွေ့ရှိဖို့ပင်။

*

(၁၀) ရက် ကြာပြီးနောက်၊

မီးတောင် (၅) လုံး၏ ဗဟိုချက် အောက်ခြေနှင့် အနောက်ဘက် (၃) မိုင်ခန့် အကွာတွင် ဖြစ်၏။

မြေအောက် ပေ (၃၀၀) နီးပါး အနက်တွင် စုယွီသည် အေးစက်သော မြေအောက် စမ်းရေ လိုဏ်ခေါင်း တစ်ခု အတိုင်း ဆင်းသက်လာခဲ့သည်။

အောက်ခြေသို့ နီးကပ်လာလေ စမ်းရေသည် ပိုမို အေးစက်လာလေ ဖြစ်၏။

ပေ (၅၀၀) အနက်သို့ ရောက်ရှိသောအခါ၊ တာ့ယွဲ့ မှောင်ခိုဈေးတွင် တာအိုဆရာ ပင်းယွီ တံခါးပိတ် ကျင့်ကြံခဲ့ဖူးသော ဂူစံအိမ်ထက်ပင် ပိုမို အေးစက်နေသည်။

နောက်ထပ် ပေ (၂၀၀) ထပ်မံ ဆင်းသက်လိုက်သောအခါ ရုတ်တရက် ကွဲထွက်နေသော နေရာတစ်ခု ပေါ်လာပြီး၊ အေးစက်သော စမ်းရေကို အကာအကွယ် အလွှာ တစ်ခုက ဖြတ်တောက်ထားသည်ကို စုယွီ တွေ့လိုက်ရသည်။

အကာအကွယ် အလွှာကို ဖြတ်ကျော် ကြည့်လိုက်သောအခါ 'ကျွန်းငယ်' တစ်ခုကို စုယွီ မြင်တွေ့လိုက်ရသည်။

တစ်ဖက်တွင် ရေခဲနှင်းများ ဖုံးလွှမ်းနေသော ကမ္ဘာတစ်ခု ဖြစ်ပြီး၊ အခြားတစ်ဖက်တွင် မီးပင်လယ် ငရဲခန်း တစ်ခု ဖြစ်နေသည်။ ဤ ဆန့်ကျင်ဘက် အစွန်းရောက် စွမ်းအား နှစ်ခုသည် နေရာ တစ်ခုတည်းတွင် ဆုံစည်းနေကြ၏။

ထိုနေရာတွင် ရပ်နေရင်း ဦးရေပြား ထုံကျင်သွားစေလောက်အောင် ပြင်းထန်သော ရေခဲနှင့် မီး စွမ်းအားများကို ခံစားလိုက်ရသဖြင့် စုယွီ အာမေဋိတ်သံ မပြုဘဲ မနေနိုင်တော့ပေ။

"ဒီ အခင်းအကျင်းက နှစ်ပေါင်းများစွာ ကြာမြင့်နေပြီ... (တတိယအဆင့်) ဂူစံအိမ်ရဲ့ ရေခဲနဲ့ မီး စွမ်းအားတွေ ပြည့်နှက်နေတာများလား"

ထိုအချိန်တွင် သူ့ ဒန်တျန် အတွင်း၌ ငြိမ်သက်နေသော 'ရေခဲ ဝိညာဉ် ပုလဲ'သည် ရုတ်တရက် တုန်ခါလာသည်။

စုယွီသည် 'ရေခဲ ဝိညာဉ် ပုလဲ' နှင့် သူ့ရှေ့မှ ကြီးမားသော အကာအကွယ် အလွှာကြားတွင် ဝေဝါးသော ဆက်နွယ်မှု တစ်ခု ရှိနေကြောင်း ခံစားလိုက်ရသည်။

တာအိုဆရာ ပင်းယွီ ချန်ထားရစ်ခဲ့သော 'ရေခဲ ဝိညာဉ် ပုလဲ' မှတဆင့် သူသည် နေလမင်း ကျွန်း အပျက်အစီးများ အတွင်းသို့ အလွယ်တကူ ဝင်ရောက်နိုင်မည့်ပုံ ရသည်။

"ဝူး"

စုယွီ၏ စိတ်ထဲတွင် အတွေးတစ်ခု ဖြတ်သန်းသွားပြီး၊ ဒန်တျန် အတွင်းမှ 'ရေခဲ ဝိညာဉ် ပုလဲ' ကို ဆင့်ခေါ်လိုက်၏။ မျက်တောင်တစ်ခတ် အတွင်းမှာပင် 'ရေခဲ ဝိညာဉ် ပုလဲ' သည် နေလမင်း ကျွန်း အကာအကွယ် အလွှာပေါ်သို့ တောက်ပသော အလင်းတန်း တစ်ခု ထိုးလွှတ်လိုက်၏။ ယခင်က ဝေဝါးနေသော ဆက်နွယ်မှုသည် ရုတ်တရက် ရှင်းလင်း ပြတ်သားသွားသည်။

'ရေခဲ ဝိညာဉ် ပုလဲ' မှတဆင့် သူသည် နေလမင်း ကျွန်း အတွင်းသို့ လွတ်လပ်စွာ ဝင်ထွက်သွားလာနိုင်ပြီ ဖြစ်၏။

သို့သော် အတွင်းပိုင်းမှ ကြောက်မက်ဖွယ် ကောင်းသော ရေခဲနှင့် မီး စွမ်းအားများကို ခံစားလိုက်ရသဖြင့် စုယွီ တွန့်ဆုတ်သွားသည်။

"အဆင်ပြေပါ့မလား"

'ရေခဲ ဝိညာဉ် ပုလဲ' ကို ကိုင်ဆောင်လျက် သူသည် ဂူစံအိမ်၏ ရေခဲ ဖုံးလွှမ်းသော ဘက်သို့ ဖြည်းညှင်းစွာ တိုးကပ်သွားသည်။

“ဝူး”

သူ့စိတ်ဖြင့် ထိန်းချုပ်လိုက်သည်နှင့် တပြိုင်နက် (ဒုတိယအဆင့်) ထက် သေချာပေါက် ကျော်လွန်နေသော အခင်းအကျင်း အကာအကွယ် အလွှာပေါ်တွင် ဝင်ပေါက်တစ်ခု ရုတ်တရက် ပေါ်လာသည်။ စုယွီသည် အခင်းအကျင်းကို ဖြတ်ကျော်ပြီး နေလမင်း ကျွန်း အတွင်းသို့ ဝင်ရောက်လိုက်၏။

သူ ခြေချလိုက်သည်နှင့် တပြိုင်နက် ကြောက်မက်ဖွယ် ကောင်းသော ရေခဲ စွမ်းအား တစ်ခု သူ့ထံသို့ ဒရောသောပါး ပြေးဝင်လာသည်ကို ခံစားလိုက်ရသည်။

'ကလောက်... ကလောက်... ကလောက်'

မျက်တောင်တစ်ခတ် အတွင်း နေရာလပ် တစ်ခုလုံး အေးခဲသွားသကဲ့သို့ ဖြစ်သွားသည်။

သို့သော် ထိုစွမ်းအားသည် စုယွီ အနီးသို့ ရောက်ရှိလာသည်နှင့် တပြိုင်နက် သူ့လက်ထဲရှိ 'ရေခဲ ဝိညာဉ် ပုလဲ' က ကာကွယ် တားဆီးလိုက်၏။ ဤ စွမ်းအားများသည် နှစ်ပေါင်းများစွာ စုဆောင်းလာခဲ့သော သန့်စင်သည့် သဘာဝ စွမ်းအားများသာ ဖြစ်ပြီး၊ တိုက်ခိုက်လိုသော သဘောသဘာဝ မရှိပေ။

'ရေခဲ ဝိညာဉ် ပုလဲ' ၏ စွမ်းအားကြောင့် ပိုင်ရှင်မဲ့ ဖြစ်နေသော ဤ (တတိယအဆင့်) ဂူစံအိမ်၏ စွမ်းအားများသည် သူ့အတွက် ခြိမ်းခြောက်မှု မဖြစ်နိုင်ကြောင်း ထင်ရှားနေသည်။

ဤအချက်ကို သဘောပေါက်လိုက်သောအခါ စုယွီ သက်ပြင်းချလိုက်နိုင်သည်။

အလွန် သိပ်သည်းသော သဘာဝ ဝိညာဉ် စွမ်းအင်များနှင့် ရေခဲ၊ မီး စွမ်းအားများကို လေ့လာကြည့်ရှုပြီးနောက် စုယွီ ဝမ်းသာအားရ ဖြစ်သွားသည်။

"ဒီစွမ်းအားက (ဒုတိယအဆင့်) ဝိညာဉ် သွေးကြောထက် အများကြီး ပိုအားကောင်းတယ်... ဒီမှာ ကျင့်ကြံရင် သဘာဝ ဝိညာဉ် စွမ်းအင် လိုအပ်ချက် အတွက် လုံးဝ ပူစရာ မလိုတော့ဘူး"

"ငါ့ရဲ့ ကျင့်ကြံမှု နှုန်းထားလည်း ပိုမြန်လာနိုင်တယ်"

တစ်ချက် ကြည့်လိုက်ရာ နေလမင်း ကျွန်း အပျက်အစီးများ အတွင်းတွင် ဂူစံအိမ် နယ်မြေ နှစ်ခုသာ ကျန်ရှိတော့ပြီး၊ နှစ်မိုင် ပတ်လည်ခန့် ကျယ်ဝန်းကာ အခင်းအကျင်းများဖြင့် ဖုံးလွှမ်းထား၏။

တစ်ဖက်တွင် နှင်းများ ဖုံးလွှမ်းနေပြီး၊ အခြားတစ်ဖက်တွင် မီးပင်လယ်ကြီး ကဲ့သို့ ရဲရဲတောက် ပူပြင်းနေသည်။

ထို ဆန့်ကျင်ဘက် စွမ်းအား နှစ်ခု ဆုံစည်းရာ နေရာသည် အနီရောင်နှင့် အဖြူရောင် ဝဲကတော့ကြီး နှစ်ခု တည်ငြိမ်စွာ လည်ပတ်နေသကဲ့သို့ ဖြစ်နေပြီး၊ မမြင်ရသော ပုံသဏ္ဍာန် တစ်ခု အဖြစ် ရောနှော ပေါင်းစပ်နေကြ၏။

ထိုမြင်ကွင်းကို ကြည့်ရင်း စုယွီ၏ ခေါင်းထဲတွင် စကားလုံး နှစ်လုံး ပေါ်လာသည်။

"ယင် နှင့် ယန်"

ဒီမြင်ကွင်းက အရမ်း ဆင်တူနေတယ်။

သို့သော်၊ ဒါကို ဘယ်လို ပြီးမြောက်အောင် လုပ်ခဲ့သလဲ ဆိုတာကတော့ 'ယင် နှင့် ယန်' လို့ ပြောရုံနှင့် နားလည်နိုင်သော အရာ မဟုတ်။ သူက 'ယင် နှင့် ယန်' ရဲ့ အနှစ်သာရကို နားမလည်သေးပါ။

ထိုအချိန်တွင် စုယွီ… ရုတ်တရက် ထူးဆန်းသော အရာတစ်ခုကို သတိပြုမိလိုက်၏။

ရေခဲနှင့် မီး ဝဲကတော့ နှစ်ခု ဆုံစည်းရာ နေရာတွင် အလင်းစက် တစ်ခု ရှိနေသလား။

"အဲဒါ ဘာလဲ"

စုယွီ ရှေ့သို့ ပျံသန်းသွားပြီး ရေခဲလေပြင်းနှင့် နှင်းမြူများကို ဖြတ်ကျော်ကာ ရေခဲနှင့် မီး စွမ်းအားများ ဆုံစည်းရာ နေရာ ရှေ့သို့ ရောက်ရှိသွားသည်။ သူ ထပ်မံ မတိုးကပ်ရဲတော့ပေ။

ထိုနေရာသို့ ရောက်မှသာ သူ ရှင်းရှင်းလင်းလင်း မြင်တွေ့လိုက်ရသည်။ စွမ်းအား နှစ်ခု ဆုံစည်းရာ အလယ်တွင် ပုလဲလုံး တစ်လုံး ရှိနေသည်။ တစ်ဝက်က ကြက်သွေးရောင် တောက်နေပြီး၊ ကျန်တစ်ဝက်က နှင်းကဲ့သို့ ဖြူဖွေးနေသည်။ 'ရေခဲ မီး ပုလဲ'ပင်။

ဆုံစည်းလာသော စွမ်းအား အများစုကို ထို 'ရေခဲ မီး ပုလဲ' က ဝါးမြိုလိုက်၏။

သို့သော် ထို 'ရေခဲ မီး ပုလဲ' သည် စွမ်းအား ပြည့်ဝနေပြီ ဖြစ်လောက်သည်။ ထို့ကြောင့် 'ရေခဲ မီး ပုလဲ' ထံမှ စွမ်းအားများသည် စက်ဝိုင်းပုံစံ လှည့်ပတ်ပြီးနောက်၊ နောက်ဆုံးတွင် 'ရေခဲ မီး ပုလဲ' က ၎င်းအောက်ရှိ မြေကြီးထဲသို့ ထိုးသွင်းလိုက်၏။

တစ်စိတ်တစ်ပိုင်းကို မြေကြီး၏ ဝိညာဉ် သွေးကြောများက စုပ်ယူလိုက်ပြီး၊ ကျန်တစ်စိတ်တစ်ပိုင်းက ဤ (တတိယအဆင့်) ဝိညာဉ် သွေးကြော၏ 'တောင်စောင့် အခင်းအကျင်း'ကို ထိန်းသိမ်းပေးထား၏။