အခန်း (၂၂၁-၂၂၂)
Vol. 16 Ch. 221-222
အခန်း (၂၂၁) - မင်ကူအင်မော်တယ် ကျဆုံးမှုကို မျက်ဝါးထင်ထင်မြင်တွေ့လိုက်ရပြီး ချီလင် တုန်လှုပ်သွားခြင်း
" ချီမုန်... သမီးက ချီလျန်မျိုးနွယ်ရဲ့ အနာဂတ်အတွက် ထည့်တွက်စဉ်းစားပေးတယ်ဆိုတာ အမေသိပါတယ်... ဒါပေမယ့် လောကြီးရင် အမှားပါတတ်တယ်လေ... ကုကောင်းကင်ဧကရာဇ်က ဘယ်လောက်ပဲ အလားအလာရှိပါစေ... သမီးအနေနဲ့ ဒီလောက် စိတ်မလောသင့်ဘူး... အနည်းဆုံးတော့ အမေ့ဆီပြန်လာပြီး အရင်တိုင်ပင်သင့်တာပေါ့..... "
ချီမုန်သည် ကုချန်နှင့် တိတ်တဆိတ် အဆက်အသွယ်လုပ်နေသည်ကို မြင်လိုက်ရသောအခါ ချီလင်သည် ဘေးမှနေ၍ ဆုံးမစကားမပြောဘဲ မနေနိုင်တော့ချေ။
သူ၏သမီးသည် ဘက်စုံတော်သော်လည်း စိတ်မြန်လက်မြန်ရှိလွန်းသည်က တစ်ခုတည်းသော အားနည်းချက်ပင်။
ချီလျန်မျိုးနွယ်၏ လက်ရှိအခြေအနေမှာ မကောင်းမွန်သော်လည်း တစ်ညတည်းနှင့်တော့ မျိုးသုဉ်းသွားမည်မဟုတ်ပေ။
ယခု ချီမုန်မှ... တစ်စုံတစ်ဦးကို သခင်အဖြစ် အသိအမှတ်ပြုရန် အလွန်စိတ်အားထက်သန်နေရာ... နောင်တစ်ချိန်တွင် ကတိပြန်ဖျက်ရန် အလွန်ခက်ခဲသွားလိမ့်မည်။
မိခင်တစ်ယောက်အနေဖြင့် ချီလျိုသည် သမီးဖြစ်သူ၏ ကောင်းကျိုးကို မည်သို့လျစ်လျူရှုထားနိုင်မည်နည်း။
လျှပ်စီးလက်သကဲ့သို့ပင် ချီလျို၏စိတ်ထဲ၌ အတွေးပေါင်းများစွာ ဖြတ်ပြေးသွားခဲ့သည်။
သူ ဆုံးဖြတ်ချက်ချပြီးဖြစ်သည်။ အကယ်၍ ကုကောင်းကင်ဧကရာဇ်သာ သူ၏ စမ်းသပ်စစ်ဆေးမှုကို မအောင်မြင်ခဲ့လျှင်... သို့မဟုတ် ချီလျန်မျိုးနွယ်တစ်ခုလုံး သစ္စာခံရန် မတန်ခဲ့လျှင်... ကြီးမားသော တန်ရာတန်ကြေး ပေးဆပ်ရပါစေဦးတော့... သူသည် ကုချန်အား စည်းရုံးပြီး ချီမုန်၏ ဝိညာဉ်ချုပ်နှောင်မှုကို ဖြေလျော့ပေးကာ... လွတ်လပ်ခွင့်ပြန်ပေးရန် နည်းလမ်းရှာမည်ဟု တေးမှတ်ထားလိုက်သည်။
" အမေ သခင်က သမီးတို့ ဆက်သွယ်တာကို လက်ခံလိုက်ပြီ "
ချီလျို တွေးတောနေစဉ်မှာပင်... ချီမုန်သည် ရုတ်တရက် မျက်လုံးဖွင့်လိုက်ရာ... သူ၏ လှပသော မျက်ဝန်းများထဲတွင်... စိတ်လှုပ်ရှားမှုများ ပြည့်နှက်နေလေ၏။
ချိီမုန်သည် လက်ကိုမြှောက်ကာ... ချီလျို၏ ဖြူဖွေးသော လက်ကောက်ဝတ်ကို... ဆုပ်ကိုင်လိုက်သည်။ နောက်တစ်ခဏ၌ ဆန်းကြယ်သော ဆွဲငင်အားတစ်ခုနှင့်အတူ... သားအမိနှစ်ဦး၏ ဝိညာဉ်အစိတ်အပိုင်းတစ်ခုသည်... အဆုံးမဲ့ကမ္ဘာရှိ ကောင်းကင်ချောက်နက်၏ နက်ရှိုင်းသောနေရာသို့... သက်ဆင်းသွားကြတော့သည်။
" အား!!! "
နာကျင်စွာ အော်ဟစ်သံတစ်ခုသည်... ချီလျို၏ နားစည်ထဲသို့ ရိုက်ခတ်လာသဖြင့်... သူသည် အလိုအလျောက်ပင် ဘေးဘက်သို့... လှည့်ကြည့်လိုက်မိသည်။
ထိုအခိုက်အတန့်တွင်... ချီလျိုသည် သူ၏တစ်ဘဝလုံး မမေ့ပျောက်နိုင်တော့မည့်... မြင်ကွင်းတစ်ခုကို မြင်တွေ့လိုက်ရတော့သည်။
ရေတံခွန်ကဲ့သို့ ဆံနွယ်များနှင့် လွှမ်းမိုးထားသော အရှိန်အဝါရှိသည့်... အဖြူရောင်ဝတ်စုံနှင့် လူပုဂ္ဂိုလ်တစ်ဦးသည် သူ့ကို ကျောပေးလျက် ရပ်နေပြီး... လက်နှစ်ဖက်ကိုမြှောက်ကာ ရန်သူကို နှစ်ပိုင်းဆွဲဖြဲလိုက်ခြင်းပင် ဖြစ်သည်။
သွေးမိုးများ ရွာကျလာကာ... ကောင်းကင်တစ်ခွင်ကို စွန်းထင်းသွားစေသော်လည်း... ထိုလူပုဂ္ဂိုလ်ကို တစ်စက်မျှ မထိတွေ့ပေ။
သွေးစက်တိုင်းတွင်... ဖော်ပြမပြနိုင်လောက်အောင် ကြီးမားသော စွမ်းအားများ ပါဝင်နေပြီး... အရှင်အဆင့်များ လုပ်ဆောင်နိုင်သည်ထက် အဆပေါင်းများစွာ သာလွန်နေသည်။
ထိုအရာသည် စစ်မှန်သော အင်မော်တယ်တစ်ပါး၏ သွေးပင်ဖြစ်သည်။
ထိုအင်မော်တယ်သွေး၏ ပိုင်ရှင်သည် ချီလျို၏ နှလုံးသားကို တုန်လှုပ်သွားစေသည်။
ချီလျန်မျိုးနွယ်ခေါင်းဆောင်တစ်ဦးအနေဖြင့် သူ၏အင်အားသည် မနည်းပါးလှဘဲ စစ်မှန်သော အင်မော်တယ်အဆင့် တစ်ဦးဖြစ်သည်။
သူသည် ဝိညာဉ်အစိတ်အပိုင်းတစ်ခုအနေဖြင့်သာ ဆင်းသက်လာခြင်းဖြစ်သော်လည်း... ရက်ရက်စက်စက် ဆွဲဖြဲခံလိုက်ရသော ခန္ဓာကိုယ်ပိုင်ရှင်သည် သူ့ထက်ပင်... ပိုမိုစွမ်းအားကြီးကြောင်း ပြောနိုင်ပေသည်။
ထိုကဲ့သို့သော အရှိန်အဝါနှင့် ခံစားချက်မျိုးကို... ချီလျိုသည် အတိတ်က ချီလျန်မျိုးနွယ်၏ ရှေးဘိုးဘေးကြီးထံ၌သာ... အာရုံခံခဲ့ဖူးသည်။
ဤသည်မှာ စစ်မှန်သော အင်မော်တယ်အရှင်တစ်ပါး ဖြစ်သည်။
အင်မော်တယ်အရှင်တစ်ပါးသည် လူတစ်ယောက်၏ ဆွဲဖြဲခြင်းကို ခံလိုက်ရသည်တဲ့လော။
ထိုအဖြူရောင်ဝတ်စုံနှင့် လူပုဂ္ဂိုလ်ကား မည်သူနည်း။
" ငါ့ကို ဒီလိုအရှက်ခွဲတဲ့အတွက် တစ်နေ့ကျရင် မင်း ပြန်ပေးဆပ်စေရမယ် "
မင်ကူအင်မော်တယ်သည် ခက်ခက်ခဲခဲဖြင့်... ခန္ဓာကိုယ်ကို နောက်တစ်ကြိမ် ပြန်လည်စုစည်းလိုက်ရာ... မျက်နှာအမူအရာမှာ အလွန်အမင်း အုံ့မှိုင်းနေလေသည်။
သူသည် ဆုတ်ခွာရန် စဉ်းစားနေပြီဖြစ်သည်။ ဤလူ၏ တိုက်ခိုက်နိုင်စွမ်းအားသည် နတ်ဆိုးဆန်လွန်းလှပြီး မင်ကူအင်မော်တယ်ကိုပင် ကျောချမ်းသွားစေသည်။
သူသည် ကုချန်နှင့် ဆက်လက်မတိုက်ခိုက်ရဲတော့ပေ။
ဤခန္ဓာကိုယ်သည် မူလအင်မော်တယ်ရွှံ့ဖြင့် ဖန်တီးထားခြင်းဖြစ်သော်လည်း ခန္ဓာကိုယ်ကို ထိန်းချုပ်ထားသည့် ဝိညာဉ်မှာ စစ်မှန်သော ဝိညာဉ်ဖြစ်သည်။
အကယ်၍ သူဆက်လက်တိုက်ခိုက်ပြီး... ခန္ဓာကိုယ်ရော ဝိညာဉ်ပါ ချေမှုန်းခံလိုက်ရပါက... အင်မော်တယ်လောကတွင် ကျန်ရစ်ခဲ့သော သူ၏ပင်မခန္ဓာကိုယ်သည်လည်း... လုံးဝပျက်စီးသွားမည်ဖြစ်ပြီး အခွံလွတ်ကြီးသာ ကျန်ရစ်ပေလိမ့်မည်။
" ဒီအင်မော်တယ်အရှင်က မင်းကို မှတ်ထားလိုက်ပြီ "
မင်ကူအင်မော်တယ်သည်... ကုချန်၏ ပုံပန်းသဏ္ဍာန်ကို နှလုံးသားထဲတွင် စွဲထင်သွားစေရန် ရည်ရွယ်လျက်... နာကျည်းစွာ စိုက်ကြည့်လိုက်သည်။
ထို့နောက်... သူသည် ဝိညာဉ်ပြန်ခေါ်သည့် နည်းလမ်းကို အသုံးပြု၍... မူလအင်မော်တယ်ရွှံ့ထဲမှ သူ၏ဝိညာဉ်ကို ဆွဲထုတ်ကာ အင်မော်တယ်လောကသို့ ပြန်ရန်... ကြံရွယ်လိုက်သည်။
သို့သော် ကံဆိုးစွာပင်... ဤအဆင့်ထိ တိုက်ခိုက်ပြီးမှ ကုချန်သည်... သူ့အား ထွက်သွားခွင့်ပေးပါမည်လော။
" ငါကိုယ်တော်က မင်းကို ထွက်သွားခွင့်ပြုလိုက်လို့လား "
ကုချန်သည် တိုးညှင်းစွာ ပြောလိုက်သော်လည်း... သူ၏လက်လှုပ်ရှားမှုများမှာ ရပ်တန့်ခြင်းမရှိဘဲ... မင်ကူအင်မော်တယ်ကို ပြတ်ပြတ်သားသား ဖိနှိပ်လိုက်သည်။
လက်ဝါးတစ်ချက် ရိုက်နှိပ်လိုက်သည်နှင့် လေဟာနယ် ပြိုကွဲသွားပြီး ကောင်းကင်နှင့် မြေကြီး၏ အဆုံးမဲ့တာအိုများ တုန်လှုပ်သွားကြသည်။
" ဘုန်း "
မင်ကူအင်မော်တယ်သည် အစွမ်းကုန် ခုခံရန် ကြိုးစားသော်လည်း... ကုချန်၏ လက်ဝါးရိုက်ချက်က ရင်ဘတ်ကို ထိမှန်သွားဆဲပင်။ သူ၏ဝိညာဉ်ပင် တုန်ခါထိခိုက်သွားပြီး... သူလုပ်ဆောင်နေသော ဝိညာဉ်ပြန်ခေါ်သည့် နည်းလမ်းသည်လည်း... အလိုအလျောက် ပြတ်တောက်သွားတော့သည်။
" မင်း ငါ့ကို သတ်ရဲသလား "
ဤအခိုက်အတန့်တွင် မင်ကူအင်မော်တယ်သည် အမှန်တကယ် ထိတ်လန့်သွားပြီဖြစ်သည်။
အဘယ်ကြောင့်ဆိုသော်... ကုချန်သာ သူ့ကို လွှတ်ပေးရန် ဆန္ဒမရှိပါက... ယနေ့တွင် သူ၏ ဝိညာဉ်သည် အင်မော်တယ်လောကသို့ ပြန်နိုင်မည့် အခွင့်အရေး လုံးဝမရှိတော့ကြောင်း... နားလည်လိုက်သောကြောင့် ဖြစ်သည်။
" မင်းငါ့ကို သတ်မယ်ဆိုရင်... အင်မော်တယ်တစ်သောင်းမျှော်စင်က ဒီအင်မော်တယ်အရှင်အတွက် သေချာပေါက် ကလဲ့စားချေလိမ့်မယ်... ငါတို့ အင်မော်တယ်တစ်သောင်းမျှော်စင်က အင်မော်တယ်လောကကို လွှမ်းမိုးထားတာ... မျှော်စင်ရဲ့ အခြေခံအုတ်မြစ်က မင်းထင်ထားတာထက် အများကြီး ပိုတယ် "
သေရေးရှင်ရေး အခိုက်အတန့်တွင်... မင်ကူအင်မော်တယ်သည် ရွှယ်ကျန်းကဲ့သို့ပင် ရွေးချယ်မှုတစ်ခုတည်းကို ပြုလုပ်ခဲ့ပြီး... ကုချန်ကို ခြိမ်းခြောက်ရန် အင်မော်တယ်တစ်သောင်းမျှော်စင် အကြောင်းကို ထုတ်ပြောလာခဲ့သည်။
သို့သော်... ရွှယ်ကျန်းသာ အသက်ရှင်နေသေးပါက... သူသည် သေချာပေါက် ခါးသီးစွာ ပြုံးမိပေလိမ့်မည်။
သူ... အင်မော်တယ်တစ်သောင်းမျှော်စင်အကြောင်း ပြောစဉ်မှာလည်း အလုပ်မဖြစ်ခဲ့ရာ... ယခု မင်ကူအင်မော်တယ် ပြောသည့်အခါရော... အလုပ်ဖြစ်ပါမည်လော။
ကုချန်သည် သေမင်းတမန်တစ်ဦးဖြစ်ရာ ဤခြိမ်းခြောက်မှုများကို လုံးဝဂရုစိုက်မည် မဟုတ်ပေ။
အမှန်တကယ်ပင်... မင်ကူအင်မော်တယ် ပြောဆိုသော အင်မော်တယ်တစ်သောင်းမျှော်စင်သည် ကုချန်အား... စိုးရိမ်မှု အနည်းငယ်မျှပင် မဖြစ်ပေါ်စေနိုင်ခဲ့ပေ။ သူသည် မင်ကူအင်မော်တယ်ကို... လျစ်လျူရှုကာ ကြည့်လိုက်ပြီး.....
" နောက်ဆုံးစကား မှာလို့ ပြီးပြီလား... ပြီးပြီဆိုရင်လဲ လမ်းဆက်လျှောက်လိုက်တော့..... " ဟု ပြောကြားလိုက်လေသည်။
မုန်တိုင်းကဲ့သို့သော တိုက်ခိုက်မှုများ နောက်တစ်ကြိမ် ကျရောက်လာသည်။
လက်သီးအလင်းတန်းများသည် ကမ္ဘာမြေကို ဖုံးလွှမ်းသွားပြီး... အဆုံးမဲ့တာအို ရေစီးကြောင်းများ သွန်းချလိုက်သကဲ့သို့... မင်ကူအင်မော်တယ်ကို ချက်ချင်း ဝါးမြိုသွားတော့သည်။
မင်ကူအင်မော်တယ်သည် ကုချန်၏ ပြိုင်ဘက်အဆင့်နှင့် အလှမ်းဝေးကွာလှသော်လည်း... သူသည် အရည်အချင်းပြည့်မီသော... 'သဲအိတ်' တစ်လုံး ဖြစ်သည်။ ယခင်က... ကုချန် ကြုံတွေ့ခဲ့ရသော အထိမခံသည့် ပြိုင်ဘက်များနှင့် မတူဘဲ... ကုချန်ကို အနည်းငယ် ကျေနပ်စေနိုင်သူဖြစ်သည်။
" ဘုန်း! "
အင်မော်တယ်သွေးများ မပြတ်တမ်း လွင့်စဉ်ထွက်လာပြီး... မင်ကူအင်မော်တယ်၏ ခန္ဓာကိုယ်သည် အကြိမ်ကြိမ် ပြိုကွဲကာ... အကြိမ်ကြိမ် ခက်ခက်ခဲခဲ ပြန်လည်စုစည်းနေရသည်။
နောက်ဆုံးအချိန်တွင်... သူ၏ ဝိညာဉ်၌ပင် အက်ကွဲကြောင်းများ ဖုံးလွှမ်းသွားပြီး... ရုပ်ခန္ဓာကိုယ်ကို ပြန်လည်တည်ဆောက်ရန် မထောက်ပံ့နိုင်တော့ပေ။
" မလုပ်နဲ့!!! "
ကုချန်၏လက်က ရက်စက်စွာ ဆန့်ထွက်လာသည်ကို မြင်လိုက်ရသောအခါ မင်းကူအင်မော်တယ်သည် နောက်ဆုံးတွင် မျှော်လင့်ချက်မဲ့စွာ အော်ဟစ်လိုက်တော့သည်။
သို့သော်... ရလဒ်အားလုံးမှာ သတ်မှတ်ပြီးဖြစ်၍... မည်သည့်အရာကိုမျှ ပြောင်းလဲနိုင်ခြင်း... မရှိတော့ပေ။
ကုချန်၏လက်ဝါးသည် သက်ညှာမှုကင်းမဲ့စွာ ကျဆင်းလာပြီး... မင်ကူအင်မော်တယ်၏ ခန္ဓာကိုယ်ကို... နောက်တစ်ကြိမ် နှစ်ပိုင်းဆွဲဖြဲလိုက်ပြန်သည်။
ဤတစ်ကြိမ်တွင်... ကုချန်၏ပြိုင်ဘက်ကင်း ဝိညာဉ်စွမ်းအားသည် အခွင့်ကောင်းယူ၍... မူလအင်မော်တယ်ရွှံ့ဖြင့် ပြုလုပ်ထားသော ရုပ်ခန္ဓာကိုယ်ထဲသို့ ဝင်ရောက်ကာ... မင်ကူအင်မော်တယ်၏ဝိညာဉ်ကို ချက်ချင်း အပြီးတိုင် ချေမှုန်းပစ်လိုက်တော့သည်။
" ဝူး... ဝူး..... "
ကောင်းကင်ဘုံကိုးခုအထက်တွင် လေနှင့် တိမ်တိုက်များ ပြောင်းလဲသွားလေသည်။
မိုင်သန်းပေါင်းများစွာကျယ်ဝန်းသော ကောင်းကင်ကြီးသည်... သွေးနီရောင် ပြောင်းလဲသွားကာ... အဆုံးမဲ့သွေးမိုးများ ရွာသွန်းကျလာ၏။
မင်ကူအင်မော်တယ် ကျဆုံးသွားပြီဖြစ်သည်။
မင်ကူအင်မော်တယ် သေဆုံးသွားသည်နှင့်အမျှ... သူ၏ ဝိညာဉ်ထိန်းချုပ်မှုအောက်တွင် မရှိတော့သော မူလအင်မော်တယ်ရွှံ့သည်... တဖြည်းဖြည်းနှင့် ယခင် ဟွမ်သွမ့်အခြေအနေသို့ ပြန်လည်ရောက်ရှိသွားသည်။
အင်မော်တယ်ဓားသည်လည်း လက်မအရွယ်အစားသို့ ပြန်လည်ပြောင်းလဲသွားပြီး မြေပြင်ပေါ်သို့ 'ချွမ်' ခနဲ ကျသွားတော့သည်။
ကုချန်သည် ရှေ့သို့လှမ်းကာ... မူလအင်မော်တယ်ရွှံ့နှင့် အင်မော်တယ်ဓားသေးလေးကို... သိမ်းဆည်းလိုက်သည်။
မင်ကူအင်မော်တယ်၏ ခန္ဓာကိုယ်ကို ထပ်ခါတလဲလဲ ဆွဲဖြဲနေရခြင်းမှာ... ကုချန်သည် ရက်စက်စွာ ပျော်ရွှင်လို၍ မဟုတ်ဘဲ... မူလအင်မော်တယ်ရွှံ့၏ ပြည့်စုံမှုကို ကာကွယ်ရန်အတွက် ဖြစ်သည်။
အကယ်၍... ကုချန်သာ တန်ကြေးကို ဂရုမစိုက်ဘဲ အစွမ်းကုန် တိုက်ခိုက်ခဲ့လျှင်... မင်ကူအင်မော်တယ်ကို စောစီးစွာကပင် သတ်ဖြတ်နိုင်ခဲ့မည် ဖြစ်သော်လည်း... ၎င်း၏ တန်ဖိုးမှာ မူလအင်မော်တယ်ရွှံ့ မပြည့်မစုံ ဖြစ်သွားခြင်းပင် ဖြစ်ပေလိမ့်မည်။ ဤရလဒ်သည်... ကုချန် မြင်တွေ့လိုသော... အရာမဟုတ်ပေ။
ထိုအရာအားလုံးကို ပြုလုပ်ပြီးနောက်... ကုချန်သည် ချီမုန်ရှိရာဘက်သို့ အကြည့်ပို့လိုက်ပြီး... အေးစက်စွာ မေးမြန်းလိုက်သည်။
" ဘာကိစ္စလဲ "
ကုချန်၏ အကြည့်နှင့် ဆုံတွေ့လိုက်ရသောအခါ... ချီမုန်သာမက ချီလင်၏ခန္ဓာကိုယ်ပင်လျှင်... နေရာမှာပင် တောင့်တင်းသွားရသည်။
ဤသည်မှာ အင်မော်တယ်အရှင်တစ်ပါးကို လက်ဗလာဖြင့် ဆွဲဖြဲနိုင်သော ဖြစ်တည်မှုတစ်ခုပင်။
သူ၏ဘေးနားမှ ထွက်ပေါ်လာသော တိုးညှင်းသည့် အသံလေးကြောင့် ချီလျိုမှာ အသက်ရှူရန်ပင် မေ့လျော့သွားလုနီးပါး ဖြစ်သွားရသည်။
" အမေ... သူက သမီးရဲ့ သခင်... ကုကောင်းကင်ဧကရာဇ်လေ "
အခန်း (၂၂၂) - မျိုးနွယ်စုတစ်ခုလုံး သစ္စာဆိုခြင်း၊ အပြန်အလှန် သတိထားစောင့်ကြည့်မှုနှင့် ချီလင်၏ အညံ့ခံခြင်း
" ဒီလူက ငါ့သမီး အသိအမှတ်ပြုထားတဲ့ သခင် အဆုံးမဲ့ကမ္ဘာက ကုကောင်းကင်ဧကရာဇ်လား "
နားထဲတွင် ချီမုန်၏အသံကို ကြားလိုက်ရသော်လည်း ချီလျိုသည် အိပ်မက်မက်နေသကဲ့သို့ ခံစားလိုက်ရသည်။
ဧကရာဇ်အဆင့်... ဤလူသည် တကယ်ပင် ဧကရာဇ်အဆင့်လော။
ဧကရာဇ်အဆင့်ဖြစ်တည်မှုမှ အင်မော်တယ်အရှင်တစ်ပါးကို လက်ဗလာနှင့် ဆွဲဖြဲပစ်လိုက်ခြင်းလော။ ဧကရာဇ်အဆင့်ဖြစ်တည်မှုသည် ဤမျှ... အထွတ်အထိပ်စွမ်းအားကို ပိုင်ဆိုင်ထားသည်ဆိုသော အချက်မှာ... ချီလျန်မျိုးနွယ်၏ ရှေးဟောင်းမှတ်တမ်းများတွင်ပင် မရှိခဲ့ဖူးပေ။
ချီလျို၏မျက်ဝန်းအိမ်များ ကျဉ်းမြောင်းသွားကာ ကုချန်၏ တိုက်ခိုက်နိုင်စွမ်းကြောင့် အလွန်အမင်း ထိတ်လန့်သွားရသည်။
ဟုတ်ပါသည်... သူ ကြောက်ရွံ့နေခြင်း ဖြစ်သည်။
သူသည် စစ်မှန်သော အင်မော်တယ်တစ်ပါးဖြစ်၍... မင်ကူအင်မော်တယ်၏ ကျင့်ကြံခြင်းအဆင့်မှာ... အင်မော်တယ်အရှင်အဆင့်ဖြစ်ကြောင်း တစ်ချက်ကြည့်ရုံဖြင့် သိနိုင်သည်။
ထို့အတူ ဤကုကောင်းကင်ဧကရာဇ်သည် စစ်မှန်သော အင်မော်တယ်အဆင့်သို့ မရောက်သေးဘဲ လူသားတာအိုအဆင့်၌သာ ရှိနေသေးကြောင်းကိုလည်း သူ သိမြင်နိုင်သည်။
ဧကရာဇ်အဆင့်ခန္ဓာကိုယ်ဖြင့် စစ်မှန်သော အင်မော်တယ်တစ်ပါးကို ယှဉ်ပြိုင်တိုက်ခိုက်ခြင်း.....
ထိုကဲ့သို့သော မှတ်တမ်းမျိုးကို သူ၏ဘိုးဘေးများ ချန်ရစ်ခဲ့သော ရှေးဟောင်းမှတ်တမ်းများတွင် တွေ့ဖူးသည်။
သို့သော် ဧကရာဇ်အဆင့် ခန္ဓာကိုယ်ဖြင့် အင်မော်တယ်အရှင်တစ်ပါးကို ယှဉ်ပြိုင်တိုက်ခိုက်ခြင်းလော။
ချီလျန်မျိုးနွယ်၏ မှတ်တမ်းများတွင် မပါရှိသည်ကို ထားလိုက်ပါဉီး... ကြီးမားကျယ်ပြန့်သော အင်မော်တယ်လောက၏ ရှေးပဝေသဏီကတည်းက ယနေ့အထိ... ထိုကဲ့သို့သော ဖြစ်တည်မှုမျိုး တစ်ခါမျှ မွေးဖွားခဲ့ဖူးခြင်းမရှိခဲ့ဘူးလို့ ချီလျို ထင်နေမိသည်။
ဤသည်မှာ အဆင့်ကြီးနှစ်ခုကို ကျော်ဖြတ်ပြီး... ရန်သူကို သတ်ဖြတ်ခြင်းသက်သက် မဟုတ်ဘဲ... လူသားတာအိုနှင့် အင်မော်တယ်တာအိုကြားမှ ကွာဟချက်ကြီးကို... ကျော်ဖြတ်လိုက်ခြင်း ဖြစ်သောကြောင့်ပင်။
ဧကရာဇ်အဆင့်မှ စစ်မှန်သော အင်မော်တယ်ကို ယှဉ်ပြိုင်နိုင်လျှင်... အင်မော်တယ်ဘုရင်မျိုးစေ့ဟု ခေါ်ဆိုနိုင်ပြီး... အနာဂတ်တွင် မသေဆုံးသရွေ့... အင်မော်တယ်ဘုရင်အဆင့်သို့ ရောက်ရှိရန် ကံပါလာပြီးဖြစ်သည်။
သို့ဆိုလျှင် ဧကရာဇ်အဆင့်မှ အင်မော်တယ်အရှင်တစ်ပါးအား ဖိနှိပ်သတ်ဖြတ်လိုက်ခြင်းကရော.....
ဒါကို ဘယ်လိုသတ်မှတ်ရမလဲ...ဒီ ကုကောင်းကင်ဧကရာဇ်က အနာဂတ်မှာ အင်မော်တယ်ဘုရင်အဆင့်ထက် ကျော်လွန်သွားနိုင်မလား။
ချီမုန်သည် အရှင်အဆင့်သာရှိသေးပြီး စစ်မှန်သော အင်မော်တယ် မဟုတ်သေးသဖြင့်... မင်ကူအင်မော်တယ်၏ စစ်မှန်သော တိုက်ခိုက်နိုင်စွမ်းကို... ချီလျိုကဲ့သို့ ခွဲခြားမသိမြင်နိုင်ပေ။ အင်အားကြီးမားသော ရန်သူတစ်ယောက်ဟုသာ သိထားသည်။
ထို့ကြောင့် မိခင်ဖြစ်သူ မည်မျှတုန်လှုပ်နေသည်ကို သူ မသိရှိပေ။
မိခင်ဖြစ်သူ ဘာကြောင့် ကြောင်အမ်းအမ်း ဖြစ်နေသည်ကို နားမလည်သော်လည်း... ကုချန်၏ မေးမြန်းမှုကို ရင်ဆိုင်ရချိန်တွင် ချီမုန်သည် လျစ်လျူမရှုရဲဘဲ... ကုချန်ကို လေးလေးစားစား ဦးညွှတ်လိုက်သည်။
" ချီမုန်က သခင့်ကို ဂါရဝပြုပါတယ် "
စကားဆုံးသည်နှင့် ချီမုန်သည် ဘေးတွင် ငူငူငိုင်ငိုင် ရပ်နေသော မိခင်ဖြစ်သူကို ခိုးကြည့်လိုက်ရာ စိတ်ထဲတွင် ပို၍ စိုးရိမ်လာ၏။
အမေ ဘာဖြစ်သွားတာလဲ...ဒီကို ရောက်ကတည်းက ဘာလို့ ပုံမှန်မဟုတ်သလို ဖြစ်နေရတာလဲ။
ချီမုန်သည် အနည်းငယ် စိတ်ပူလာပြီး... မိခင်ဖြစ်သူ၏ အပြုအမူကြောင့် သခင် စိတ်ဆိုးသွားမည်ကို စိုးရိမ်သဖြင့်... ဘေးဘက်သို့ အကြည့်လွှဲကာ ချီလျိုကို မျက်စိဖြင့် အချက်ပြလိုက်သည်။
ချီမုန် ခေါင်းလှည့်လိုက်သည်နှင့် မှင်သက်သွားစေမည့် မြင်ကွင်းတစ်ခုကို တွေ့လိုက်ရသည်။
ချီလျန်မျိုးနွယ်၏ ခေါင်းဆောင်... ဂုဏ်ကျက်သရေရှိသော စစ်မှန်သော အင်မော်တယ်တစ်ပါးဖြစ်သည့် မိခင်သည်... ဒူးထောက်ချလိုက်ကာ သူ၏ ကျက်သရေရှိသော ခန္ဓာကိုယ်ဖြင့်... မြေပြင်ပေါ်တွင် ဝပ်ဆင်းလိုက်လေသည်။ သူ၏ ဒူးထောက်ထားပုံသည် ချီမုန်ထက်ပင် ပို၍ ရိုသေကိုင်းရှိုင်းနေသေး၏။
ချီလျိုသည် မြေပြင်ပေါ်တွင် လေးလေးစားစား ဒူးထောက်လျက်... သူ၏ ဖြူဖွေးသော နဖူးကို မြေကြီးနှင့် ထိကာ... ရိုသေစွာ ပြောလိုက်သည်။
" ချီလျန်မျိုးနွယ်ခေါင်းဆောင် ချီလျိုက သမီးဖြစ်သူ ချီမုန်နဲ့အတူ သခင့်ကို ဂါရဝပြုပါတယ် "
ဒါက... အမေ... ဒါက.....
ချီလျို၏လုပ်ရပ်များကို ကြည့်ရင်း ချီမုန်မှာ ကြောင်အမ်းသွားရသည်။
ဘာတွေဖြစ်ကုန်တာလဲ... အမေက သခင်နဲ့ လူကိုယ်တိုင်တွေ့ပြီး သေသေချာချာ အကဲဖြတ်ပြီးမှ... ဆုံးဖြတ်ချက်ချမယ်လို့ ပြောခဲ့တာ မဟုတ်လား.....
အခုကျမှ ဘာလို့ ဒီလောက် ပြတ်ပြတ်သားသား ပြောင်းလဲသွားတာလဲ။ ပြီးတော့ အမေ့ပုံစံကို ကြည့်ရတာ လုံးဝကို အညံ့ခံလိုစိတ် အပြည့်ရှိနေတဲ့ ပုံစံပဲ။ ဘာတွေဖြစ်ကုန်တာလဲ။
" ကြောင်တောင်တောင် ရပ်မနေနဲ့ ... သေချာ ဒူးထောက်စမ်း "
ချီမုန် ငေးငိုင်နေဆဲဖြစ်သည်ကို မြင်သောအခါ... ချီလျိုသည် တိုးညှင်းသော အသံဖြင့်... သတိပေးလိုက်၏။ ချီမုန်၏သံသယများကိုမူ ဤအချိန်တွင် ရှင်းပြမနေနိုင်ပေ။
အကဲဖြတ်ခြင်းနဲ့ စဉ်းစားချင့်ချိန်ခြင်းတဲ့လား.....
ဟာသပဲ... ဒါက ဧကရာဇ်အဆင့် ခန္ဓာကိုယ်နဲ့ အင်မော်တယ်အရှင်ကို ဖိနှိပ်သတ်ဖြတ်နိုင်တဲ့... ကြောက်မက်ဖွယ် ဖြစ်တည်မှုတစ်ခုဖြစ်သည်။
ဤကဲ့သို့ ပါရမီရှင်မျိုးဆိုလျှင်... ကြီးကျယ်ခမ်းနားသည့် အင်မော်တယ်လောက၌ပင်... အင်မော်တယ်ဘုရင်အသီးသီး၏ မျက်နှာသာပေးမှုနှင့် စည်းရုံးမှုကို... ခံရနိုင်သည်။ သာမန် အင်မော်တယ်အစစ်များဆိုလျှင်... မိတ်ဖွဲ့ရန် အရည်အချင်းပင် ရှိမည် မဟုတ်ပေ။
ဤကဲ့သို့ ဖြစ်တည်မှုမျိုးကို ချီလျန်မျိုးနွယ်မှ သခင်အဖြစ် အမှုထမ်းရခြင်းသည် အမြင့်ကို တွယ်တက်ခွင့်ရနိုင်မည့် အခွင့်အရေးဖြစ်သည်။
အကယ်၍ ချီလျိုသာ ဤအခွင့်အရေးကို အရမယူနိုင်လျှင် မျိုးနွယ်ခေါင်းဆောင်တစ်ယောက် အဖြစ်နှင့် မထိုက်တန်တော့ပေ။
တစ်စက္ကန့်မျှ တွန့်ဆုတ်နေလျှင်ပင် ချီလျန်မျိုးနွယ်၏ အနာဂတ်သခင်အပေါ် မလေးစားရာ ရောက်လိမ့်မည်။
ချီလျန်မျိုးနွယ်ခေါင်းဆောင်လော.....
ချီမုန်နှင့် ရုပ်ချင်းဆင်တူကာ.... သူ၏ရှေ့တွင် လေးလေးစားစား ဒူးထောက်နေသော ကျက်သရေရှိသည့် အမျိုးသမီးကို ကြည့်ရင်း... ကုချန် တွေးတောလိုက်သည်။ ချီမုန်၏ လုပ်ဆောင်ချက်များမှာ ဤမျှ မြန်ဆန်ပြီး... မိခင်ဖြစ်သူကိုပါ ယခုပင် သစ္စာဆိုခိုင်းလိမ့်မည်ဟု... မမျှော်လင့်ထားခဲ့ပေ။
" ဟွန်း "
ကုချန်၏ဆံနွယ်ကြားတွင် ချိတ်ဆွဲထားသော... သိုလှောင်လက်စွပ်သည် အနည်းငယ် တောက်ပလာပြီး... ကောင်းကင်နတ်သမီး ရှောင်းယွဲ့၏ ပုံရိပ်သည် ကုချန်ဘေးတွင် ပေါ်လာကာ... သူတစ်ဦးတည်းသာ ကြားနိုင်သော ညည်းသံသဲ့သဲ့ကို ပြုလုပ်လိုက်သည်။
ကုချန်ရှေ့တွင် ဒူးထောက်နေသော လှပသည့် သားအမိနှစ်ဦးကို ကြည့်ရင်း... ရှောင်းယွဲ့၏ လှပသော မျက်ဝန်းများထဲတွင် သတိထားစောင့်ကြည့်မှု အရိပ်အယောင်များ... ပေါ်လာ၏။
ချီမုန်သည် အရှင်အဆင့်သာ ရှိသေးသဖြင့် မသိနိုင်ပေ။
သို့သော် သူသည် တစ်ချိန်က စစ်မှန်သော အင်မော်တယ်တစ်ပါး ဖြစ်ခဲ့ဖူးရာ... ဤချီလျန်မျိုးနွယ်ခေါင်းဆောင်၏ စိတ်ထဲတွင် အမှန်တကယ် ဘာကြံစည်နေသည်ကို... မည်သို့ မမြင်ဘဲ နေမည်နည်း။
စောစောက... ကုချန် အင်မော်တယ်အရှင်တစ်ပါးကို သတ်ဖြတ်လိုက်သည့် မြင်ကွင်းကို... ဤချီလျန်မျိုးနွယ်ခေါင်းဆောင် အစအဆုံး မြင်တွေ့ခဲ့ရသည်။ တစ်ဖက်လူမှာ အူကြောင်ကြောင် မဟုတ်သရွေ့... ဤမျှ အင်အားကြီးသည့် ပုဂ္ဂိုလ်ကို တင်းတင်းကျပ်ကျပ် ဖက်တွယ်ထားရန် ရွေးချယ်မည်မှာ... အသေအချာပင်။
ဧကရာဇ်အဆင့် ခန္ဓာကိုယ်ဖြင့် အင်မော်တယ်အရှင်ကို ဖိနှိပ်သတ်ဖြတ်ခြင်း.....
ရှောင်းယွဲ့ အစွမ်း ရှိစဉ်ကတောင် ဒီလိုဖြစ်တည်မှုမျိုးကို မော့ကြည့်ရုံပဲ တတ်နိုင်မှာ။
" မြေခွေးမ နှစ်ကောင်..... "
ကောင်းကင်နတ်သမီး ရှောင်းယွဲ့သည် တီးတိုးရေရွတ်လိုက်ပြီး... 'မျက်နှာသာပေးမှုကို အလုခံရတော့မလို' ခံစားလိုက်ရသဖြင့်... သူ၏စိတ်ထဲတွင် သတိထားစောင့်ကြည့်မှုများ မြင့်တက်လာ၏။
သို့သော် သူ အနည်းငယ် ကံကောင်းသည်ဟု ခံစားလိုက်ရသည်။
ဘာပဲဖြစ်ဖြစ် ချီလျန်မျိုးနွယ်က နောက်မှရောက်လာပြီး သစ္စာခံသူတွေပဲလေ။
ယခင်က သူသည် ကုချန်နှင့် ထိတွေ့ဆက်ဆံမှု သိပ်မရှိခဲ့သော်လည်း... ကုချင်းရွဲ့၏ ဆရာဖြစ်လာခဲ့သည်မှာ... ကြာပြီဖြစ်သည်။ ဤပတ်သက်မှု ရှိနေသရွေ့... သူ့အနေဖြင့် အခွင့်အရေးကို ကောင်းစွာ ဆုပ်ကိုင်ထားနိုင်ပါက... အနာဂတ်တွင် ကုချန်၏မျက်လုံးထဲ၌ သူ၏ အဆင့်အတန်းနှင့် အရေးပါမှုသည်... လွယ်လွယ်ကူကူ လှုပ်ခတ်သွားမည် မဟုတ်ပေ။
ချီလျိုသည် ကုချန်ဘေးတွင် ရပ်နေသော... ကောင်းကင်နတ်သမီး ရှောင်းယွဲ့ကို မြင်လိုက်ရသောအခါ… သူ၏ စတ်ထဲတွင်လည်း အလားတူ သတိထားမှုနှင့် အရေးတကြီး ခံစားချက်များ... ပေါ်ပေါက်လာလေသည်။
ဒီကုကောင်းကင်ဧကရာဇ်မှာ သစ္စာဆိုထားတဲ့ စစ်မှန်တဲ့ အင်မော်တယ်တစ်ပါး ရှိပြီးသား ဖြစ်နေလိမ့်မယ်လို့ မထင်ထားခဲ့ဘူး။ ပြီးတော့ ဒီကုကောင်းကင်ဧကရာဇ်ရဲ့ အကြိုက်က ဘာလဲ... မျက်နှာသာရအောင် ဘယ်လိုလုပ်ရမလဲ ဆိုတာကိုလဲ သူ မသိသေးတာကြောင့်... သူ ပိုပြီး ကြိုးစားရမယ်.....
ချီလျိုနှင့် ကောင်းကင်နတ်သမီး ရှောင်းယွဲ့ဟူသော... စစ်မှန်သည့် အင်မော်တယ်နှစ်ပါးသည် တွေ့ဆုံသည့် အခိုက်အတန့်ကစပြီး... အချင်းချင်း သတိထားနေကြသည်ကို ကုချန် မသိရှိပေ။
သူသည် ချီလျိုကို လျစ်လျူရှုကာ တစ်ချက်ကြည့်လိုက်ပြီး တည်ငြိမ်စွာ ပြောလိုက်သည်။
" သစ္စာခံမယ့်ကိစ္စနဲ့ ပတ်သက်ပြီး ချီမုန်က ငါဧကရာဇ်ကို ပြောပြပြီးသားပါ... မင်းတို့ ချီလျန်မျိုးနွယ်က ဝီရိယရှိရှိ အမှုထမ်းသရွေ့... အနာဂတ်မှာ အခက်အခဲတွေ ရှိလာရင် ငါကိုယ်တော်က မင်းတို့ရဲ့ လုံခြုံရေးကို ကာကွယ်ပေးမှာပါ "
" ကျေးဇူးတင်ပါတယ် သခင် "
ကုချန်၏ကတိကို ရရှိလိုက်သဖြင့် ချီလျို၏ နှလုံးသားထဲတွင် စိတ်လှုပ်ရှားမှုများ ပြည့်နှက်သွား၏။
ထို့နောက် သူသည် ဆုံးဖြတ်ချက်တစ်ခု ချလိုက်သည့်အလား... ချီမုန်ကဲ့သို့ပင် သူ၏ ဝိညာဉ်အမှတ်အသားကို... လေးလေးစားစား ဆက်သလိုက်သည်။
" ဒီနေ့ကစပြီး ချီလျန်မျိုးနွယ်က သခင့်ရဲ့ အမိန့်ကို နာခံပါ့မယ် "
ချီလျန်မျိုးနွယ်တစ်ခုလုံး၏ အနာဂတ်ကို... ကုချန်အပေါ် လောင်းကြေးထပ်ရန် ဆုံးဖြတ်ပြီးဖြစ်၍... ချီလျိုသည် ဘာကိုမှ ချန်လှပ်ထားခြင်း... မရှိတော့ပေ။ စိတ်နှလုံး မပြတ်မသားဖြစ်နေခြင်းသည် လုံးဝမလုပ်သင့်သော အရာဖြစ်သည်။ ဤ ကုကောင်းကင်ဧကရာဇ်၏ ယုံကြည်မှုကို အပြည့်အဝရရှိရန်... သူသည် စစ်မှန်သော အင်မော်တယ် ဝိညာဉ်အမှတ်အသားကို ဆက်သလိုက်ခြင်းဖြင့်... သူ၏ သေရေးရှင်ရေးကို ကုချန်လက်ထဲသို့ ထည့်အပ်လိုက်သည်အထိ ပြုလုပ်ခဲ့သည်။
မလုပ်ရင်မလုပ်... လုပ်ရင် အဆုံးထိ လုပ်ရမည်။
သစ္စာဆိုရန် ရည်ရွယ်ပြီးဖြစ်၍ သူသည် ခြွင်းချက်မရှိ သစ္စာစောင့်သိပြီး ရိုးသားမှုရှိသမျှ အကုန်ပေးဆပ်မည်ဖြစ်သည်။
ဤနည်းဖြင့်သာ ကုကောင်းကင်ဧကရာဇ် စိတ်ချရပြီး ချီလျန်မျိုးနွယ်၏ သစ္စာခံယူမှုကို အမှန်တကယ် လက်ခံလာမည်ဖြစ်သည်။
ချီလျို၏ ရှင်သန်ရပ်တည်ရေး ဉာဏ်ပညာပင်ဖြစ်သည်။