အခန်း (၂၃၁-၂၃၂)
Vol. 17 Ch. 231-232
အခန်း (၂၃၁) - အမှန်တရား၊ စနစ်တကျ ပြင်ဆင်ထားမှုနှင့် အစီအစဉ်နှစ်ခု
ယွမ်ကျွင်း၏ အမုန်းတရားများ ပြည့်နှက်နေသောအသံကို နားထောင်နေရင်း ကုချန်သည် ဂရုစိုက်ဟန် မပြခဲ့ပေ။
ယွမ်ကျွင်းသည် သက်တမ်းရှည်နန်းတော်အကြောင်း ပြောဆိုရာတွင်... အမုန်းတရားများ ပြည့်နှက်နေသော်လည်း သက်တမ်းရှည်နန်းတော်မှ ချီးမြှင့်ထားသော အသက်ရှည်ပစ္စည်းသာ မရှိခဲ့လျှင်... သူသည် နှစ်ပေါင်းကိုးသောင်းတိုင်အောင် မိမိကိုယ်ကို ချိပ်ပိတ်ခြင်းပြုကာ... ယခုအချိန်ထိ မည်သို့ အကောင်းပကတိ ရှင်သန်နိုင်မည်နည်း။
သက်တမ်းရှည်နန်းတော်မှ ပေးသနားသော သက်တမ်းရှည်ပစ္စည်း ရှိနေခြင်းကြောင့်သာ ယွမ်ကျွင်းအနေဖြင့် မိမိကိုယ်ကို ချိပ်ပိတ်ရန် မလိုအပ်ခဲ့ခြင်းဖြစ်သည်။
' ချီစွမ်းအင်တစ်ခုမှ သန့်စင်သူသုံးပါး ခွဲထွက်ခြင်း ' ပညာရပ်နှင့် ပေါင်းစပ်ထားသော်လည်း... နှစ်ပေါင်းကိုးသောင်း ကြာမြင့်ပြီးနောက်တွင် ယွမ်ကျွင်း၏ကျင့်ကြံမှုအဆင့်သည် အရှင်သခင်အဆင့်တွင်သာ ရပ်တန့်နေပြီး... ထျန်းကျွင်းအဆင့်သို့ ချိုးဖျက်ဝင်ရောက်နိုင်ခြင်း မရှိသေးပေ။
ဤအရာအားလုံးသည် ကုချန်၏ယခင်ဆုံးဖြတ်ချက်ကို ထပ်မံအတည်ပြုပေးလိုက်သကဲ့သို့ ဖြစ်နေသည်။
ဤယွမ်ကျွင်းသည် တကယ်ပင် အသုံးမကျသူ ဖြစ်ချေသည်။
ကုချန်၏ စိတ်ထဲတွင် သူ့အား "အသုံးမကျသူ" ဟူ၍ သတ်မှတ်ထားသည်ကို ယွမ်ကျွင်း မသိရှိခဲ့ပေ။
သူ၏မျက်ဝန်းများထဲတွင် ရူးသွပ်မှု အရိပ်အယောင်တစ်ခု ဖြတ်ပြေးသွားပြီးနောက် ကုချန်ကို ကြည့်ကာ ကျယ်လောင်စွာ ရယ်မောလိုက်လေသည်။
" ကုချန်... မင်းသိလား လွန်ခဲ့တဲ့ နှစ်ပေါင်းကိုးသောင်းတုန်းက သက်တမ်းရှည်နန်းတော်ရဲ့ မူလပစ်မှတ်က မင်းပဲ... ဒါပေမယ့် အဲဒီအချိန်တုန်းက မင်းရဲ့အရည်အချင်းက ထက်မြက်လွန်းလို့... အထက်စီးဆန်တဲ့ ထျန်းကျွင်းတွေရဲ့ မနာလိုမှုကိုတောင် ဆွဲဆောင်နိုင်ခဲ့တယ်... အဲဒါကြောင့် သူတို့က မင်းကို မြေတောင်မမြှောက်ပေးတော့ဘဲ ငါ့ကို ပျိုးထောင်ဖို့ ရွေးချယ်ခဲ့ကြတာ "
" အဲဒီအချိန်တုန်းက မယ်ကူထျန်းကျွင်းက သက်တမ်းရှည်နန်းတော် ကိုယ်စား ငါ့ကို ကတိပေးခဲ့တယ်... ငါသာ သက်တမ်းရှည်နန်းတော်အတွက် ကောင်းကောင်း အလုပ်လုပ်ပေးမယ်ဆိုရင်... 'အသက်ရှည်လောင်းလျာ' စာရင်းထဲ ထည့်ပေးမယ်တဲ့... အနာဂတ်မှာ သက်တမ်းရှည်နန်းတော်ရဲ့ ထျန်းကျွင်းတွေနဲ့အတူ ယှဉ်တွဲပြီး... ထျန်းကျွင်းရာထူးကိုတောင် ရနိုင်မယ်လို့ ပြောခဲ့တာ "
ဤအကြောင်းကို ပြောနေရင်း ယွမ်ကျွင်း၏အကြည့်များသည် ရုတ်တရက် ထူးဆန်းသွားပြီး သူ၏အသံတွင် ဖော်ပြ၍မရနိုင်သော လှောင်ပြောင်မှုများဖြင့် ပြည့်နှက်နေသည်။
" ရယ်စရာပဲ... ငါက မင်းကို ကလဲ့စားချေဖို့တောင် မစဉ်းစားရသေးဘူး... သက်တမ်းရှည်နန်းတော်က အဘိုးကြီးတွေက အရင်ဆုံး မနေနိုင် မထိုင်နိုင် ဖြစ်လာကြတာပဲ...သူတို့က မင်းရဲ့ ထက်မြက်မှုကို သတိထားမိပြီး မင်းကို မထိန်းချုပ်နိုင်မှာ... အနာဂတ်မှာ မရေရာမှုတွေ ဖြစ်လာမှာကို ကြောက်ကြတယ်... အဲဒါကြောင့် နတ်ဆိုးနယ်မြေရဲ့ နယ်စပ်ဆီသွားတဲ့ လမ်းကြောင်းတစ်ခုကို ဖွင့်ပေးလိုက်ကြတာပဲ "
" သူတို့ရဲ့ မူလရည်ရွယ်ချက်က... နတ်ဆိုးနယ်မြေကို အသုံးပြုပြီး မင်းကို ရှင်းထုတ်ပစ်ဖို့ပဲ... ဒါပေမယ့် ဘယ်သူထင်မှာလဲ... ရလဒ်က မင်းကို တကယ် မထိန်းချုပ်နိုင် ဖြစ်သွားစေခဲ့တာပဲ... ဟားဟားဟားဟား..... "
လွန်ခဲ့သော နှစ်ပေါင်းကိုးသောင်းက နတ်ဆိုးနယ်မြေ နယ်စပ်သို့ သွားရာလမ်းကြောင်း ပွင့်လာခြင်းသည် သက်တမ်းရှည်နန်းတော်မှ ထျန်းကျွင်းများ၏ လက်ချက်ပင်လော။
ယွမ်ကျွင်း၏စကားများကြောင့် ကုချန် မျက်ခုံးပင့်မိသွားသည်။
ဤရလဒ်သည် သူမျှော်လင့်ထားသည်ထက် အနည်းငယ် ကျော်လွန်နေခဲ့သည်။
အသက်ရှည်နန်းတော်သည် နတ်ဆိုးနယ်မြေ နယ်စပ်သို့သွားရာ လမ်းကြောင်းကို ဖွင့်နိုင်သည့် နည်းလမ်း မည်သို့ ရှိနေရသနည်း။
ယွမ်ကျွင်းပေးသော အကြောင်းပြချက်မှာ ယုတ္တိမရှိလှပေ။
" အဲဒီ ထျန်းကျွင်းတွေက ငါ့ကို သတိထားနေတယ်ဆိုရင် သူတို့ကိုယ်တိုင် ငါ့ကို ရှင်းပစ်လို့ ရတာပဲ... နတ်ဆိုးနယ်မြေကို ဆွဲထည့်လိုက်တာက နည်းနည်းလေး မှားတာနဲ့ အဆုံးမဲ့ကမ္ဘာတစ်ခုလုံး ပျက်စီးသွားနိုင်တယ်... ဒါက သူတို့အတွက် တွက်ခြေကိုက်တဲ့ ကိစ္စ မဟုတ်သလိုပဲ "
ကုချန်က တည်ငြိမ်စွာ မေးမြန်းလိုက်သည်။
ထျန်းကျွင်းများသည် သူ့ကို သတိထားနေသည်ဆိုပါက ကိုယ်တိုင် အရေးယူနိုင်ပေသည်။ ကျားကိုခိုင်းပြီး ဝံပုလွေကို မျိုစေသကဲ့သို့ နတ်ဆိုးနယ်မြေကို အဘယ်ကြောင့် အသုံးပြုရန် လိုအပ်ရသနည်း။
အကယ်၍... လွဲချော်သွားပြီး နတ်ဆိုးနယ်မြေကသာ အဆုံးမဲ့ကမ္ဘာတစ်ခုလုံးကို ဖျက်ဆီးပစ်လိုက်မည်ဆိုပါက... သူတို့၏ အဆုံးမဲ့ကမ္ဘာကို သိမ်းပိုက်မည့် နောက်ဆက်တွဲ အစီအစဉ်ကို... ထိခိုက်စေမည် မဟုတ်ပါလော။
" ဟားဟားဟား... ကုချန်... သက်တမ်းရှည်နန်းတော်က အဘိုးကြီးတွေကို ငါဘာလို့ မုန်းတီးနေလဲ မင်းသိလား "
ယွမ်ကျွင်းသည် မျက်ရည်များ ကျလာသည်အထိ ရယ်မောနေလေသည်။
" အဲဒီ အဘိုးကြီးတွေက ထျန်းကျွင်းအဆင့်ကို သူတို့ကိုယ်ပိုင်စွမ်းအားနဲ့ တက်လှမ်းခဲ့ကြတာ မဟုတ်ဘူး... အင်မော်တယ်နယ်မြေက အင်အားစုတချို့နဲ့ ပူးပေါင်းပြီး... အထက်အင်မော်တယ်တွေရဲ့ ချီးမြှင့်မှုကို လက်ခံရယူခဲ့တဲ့ ကံကောင်းတဲ့ သစ္စာဖောက်တွေပဲ...အဲဒီလိုလုပ်မှ သူတို့က ထျန်းကျွင်းအဆင့်ကို ချိုးဖျက်ဝင်ရောက်နိုင်ခဲ့ကြတာ "
" နန်းတော်ထဲက ထျန်းကျွင်းတချို့ဆိုရင်... အရင်က တားမြစ်နယ်မြေ အရှင်သခင်တွေကနေ ပြောင်းလဲလာကြတာလေ... ရယ်စရာကောင်းလိုက်တာ... တကယ့်ကို ရယ်စရာပဲ "
" ငါနောက်မှ သိလိုက်ရတာက... နတ်ဆိုးနယ်မြေ လမ်းကြောင်းပွင့်လာတာက ကြိုတင်သတ်မှတ်ထားပြီးသား ကိစ္စတစ်ခုပဲ... အဲဒီအဘိုးကြီးတွေက သူတို့ရဲ့နည်းလမ်းတွေနဲ့ ဒီဖြစ်စဉ်ကို... နည်းနည်းလေး စောအောင် လုပ်လိုက်ကြရုံပဲ "
" သူတို့က နတ်ဆိုးနယ်မြေ လမ်းကြောင်းကို စောစောဖွင့်ပြီး မင်းကို ခုခံခိုင်းချင်ကြတာ... ဒီလိုလုပ်တာက မင်းရဲ့အင်အားကို ပြုန်းတီးစေပြီး... ထိန်းချုပ်လို့ရတဲ့ အတိုင်းအတာတစ်ခုအတွင်း ထားရှိနိုင်ရုံတင်မကဘူး နတ်ဆိုးနယ်မြေကိုပါ တားဆီးနိုင်တယ်... ဒီလို ကျောက်ခဲတစ်လုံးတည်းနဲ့ ငှက်နှစ်ကောင်ပစ်တဲ့ အစီအစဉ်မျိုးကို အဲဒီအဘိုးကြီးတွေက သဘောကျတာ... မင်းကို ကိုယ်တိုင် အရေးယူမှာ မဟုတ်ဘူး "
" တကယ်လို့များ အဲဒီအချိန်တုန်းက မင်းသာ အသတ်ခံလိုက်ရရင်... နောင်အနာဂတ်မှာ နတ်ဆိုးနယ်မြေ လမ်းကြောင်းပွင့်လာတဲ့အခါ... အဲဒီအဘိုးကြီးတွေက ကိုယ်တိုင်သွားပြီး စောင့်ကြပ်ရမှာပေါ့ "
ယွမ်ကျွင်း၏စကားများကို နားထောင်ရင်း... ကုချန်သည် အမူအရာ မပျက်ယွင်းခဲ့သော်လည်း... သူ၏မျက်ဝန်းများထဲတွင် အေးစက်သော အရိပ်အယောင်တစ်ခု ဖြတ်ပြေးသွားခဲ့လေသည်။
တကယ်တော့ လွန်ခဲ့တဲ့ နှစ်ပေါင်းကိုးသောင်းတုန်းက သူကလည်း ယွမ်ကျွင်းလိုပဲ သက်တမ်းရှည်နန်းတော်က ထျန်းကျွင်းဆိုသူတွေရဲ့ စစ်တုရင်နယ်ရုပ်အဖြစ် သဘောထားခံခဲ့ရတာကိုး။
နှမြောစရာကောင်းသည်မှာ... ကုချန်သည် သာမန် ဧကရာဇ်အဆင့်တစ်ဦးသာ ဖြစ်ခဲ့လျှင် ထိုထျန်းကျွင်းများ၏ ဆန္ဒအတိုင်း ဖြစ်လာနိုင်ပြီး... နောက်ဆုံးတွင် မည်သူက သူ့ကို လှည့်ကွက်ဆင်ခဲ့သည်ကိုပင် မသိလိုက်ဘဲ... သေဆုံးသွားရနိုင်သည်။
သို့သော် ယခုအခါ... ကုချန်သည် စစ်တုရင်ခုံတစ်ခုလုံးကို မှောက်လှန်ပစ်နိုင်သည့်... အင်အားကို ပိုင်ဆိုင်ထားပြီးဖြစ်သည်။
ထိုထျန်းကျွင်းများသည်... ကိုယ့်ရှူးကိုယ်ပတ် ကြုံရဖို့သာ ရှိတော့သည်။
" ဒါဆို ဧကရာဇ်ဂိတ်မှာ ငါ့ကို ချုံခိုတိုက်ခိုက်ခဲ့တာကလည်း အဲဒီထျန်းကျွင်းတွေ ခိုင်းလို့ လုပ်ခဲ့တာလား "
ကုချန်က ဆက်လက် မေးမြန်းလိုက်သည်။
" မဟုတ်ဘူး... အဲဒါတော့ မဟုတ်ဘူး... ဧကရာဇ်ဂိတ်မှာ မင်းကို တိုက်ခိုက်သတ်ဖြတ်ဖို့ လုပ်တာက... ငါ့သဘောဆန္ဒသက်သက်ပဲ "
ယွမ်ကျွင်း၏မျက်နှာပေါ်မှ ရူးသွပ်မှုများ အနည်းငယ် လျော့ပါးသွားခဲ့သည်။
" ငါအရင်က ပြောခဲ့သလိုပဲ... သက်တမ်းရှည်နန်းတော်က အဘိုးကြီးတွေက နတ်ဆိုးနယ်မြေလမ်းကြောင်း ပွင့်တော့မယ်ဆိုတာ သိပြီးသား... အဆုံးမဲ့ကမ္ဘာက နောက်ဆုံးကျရင် ပျက်စီးရမယ်ဆိုတာ သိနေကြတော့... မိုးမရွာခင် ကြိုပြင်တဲ့အနေနဲ့ သိမ်းပိုက်ဖို့ ကမ္ဘာသစ်တွေကို ရှာဖွေနေခဲ့ကြတာ "
" အဲဒီနေ့ တကယ်ရောက်လာရင်... အဲဒီအဘိုးကြီးတွေက ငါ့ကို သနားညှာတာမှုမရှိဘဲ စွန့်ပစ်ကြမယ်ဆိုတာ... ငါကောင်းကောင်း သိတာပေါ့ "
" ဒါ့အပြင်... သက်တမ်းရှည်နန်းတော်ထဲမှာ မင်းက နတ်ဆိုးနယ်မြေနယ်စပ်ကို နှစ်ပေါင်းကိုးသောင်းကြာ မသေဘဲ စောင့်ကြပ်နေနိုင်တာကို မြင်ပြီး... မင်းကို ငါ့နေရာမှာ အစားထိုးဖို့ 'အသက်ရှည်လောင်းလျာ' အဖြစ် ရွေးချယ်ချင်နေတဲ့... မသေမသိုး အဘိုးကြီးတချို့ ရှိနေသေးတယ် "
" ဒါပေါ့... ငါက အဲဒီအဘိုးကြီးတွေ စိတ်တိုင်းကျ ဖြစ်ခွင့်မပေးနိုင်ဘူးလေ... အဲဒါကြောင့် ငါ့ရဲ့ကိုယ်ပွားတစ်ခုကို လွှတ်ပြီး မင်းကို တိုက်ခိုက်သတ်ဖြတ်ဖို့ လုပ်ခဲ့တာပဲ... နှမြောစရာကောင်းတာက မအောင်မြင်ခဲ့တာပဲ "
" ဒါပေမယ့်လဲ ဖြစ်ပါတယ်... ငါက အရန်အစီအစဉ် ပြင်ဆင်ထားပြီးသားလေ...မင်းကို တိုက်ခိုက်နေတုန်းမှာပဲ မင်းရဲ့ကုမိသားစုကို ဖျက်ဆီးဖို့ လူလွှတ်ထားခဲ့တာ "
" ကုမိသားစုရဲ့ ကံဆိုးမိုးမှောင်ကျမှုကို မင်းသိလိုက်တာနဲ့... မင်းမသေသရွေ့ အဆုံးမဲ့ကမ္ဘာကို ပြန်လာပြီး စုံစမ်းမယ်ဆိုတာ ငါသိတယ်...အဲဒီကျရင် သက်တမ်းရှည်နန်းတော်က အဘိုးကြီးတွေက မင်းကို ကိုင်တွယ်ဖို့... ငါ့ကိုပဲ အားကိုးရတော့မှာလေ "
" ပြီးတော့ နောက်ဆက်တွဲ ဖြစ်ပျက်ခဲ့သမျှ အရာအားလုံးက ငါမျှော်လင့်ထားတဲ့အတိုင်း ဖြစ်လာခဲ့တာပဲ "
" ငါမမျှော်လင့်ထားတဲ့ တစ်ခုတည်းသော အရာကတော့... မင်းရဲ့အင်အား တိုးတက်နှုန်း အရမ်းမြန်နေတာပဲ... ငါ့အစီအစဉ်တွေကို လုံးဝ ဖျက်ဆီးပစ်လိုက်တာ... တကယ်ကို မုန်းစရာကောင်းချက်ပဲ "
ယွမ်ကျွင်းသည် အရာအားလုံးကို တွက်ချက်ထားပြီး... နှစ်ဖက်ညှပ် အစီအစဉ်များပင် ရေးဆွဲထားခဲ့သည်။ အကယ်၍... ကုချန်အား လုပ်ကြံမှု အောင်မြင်ခဲ့ပါက ကလဲ့စားချေနိုင်ရုံသာမက... ဖုံးကွယ်နေသော ရန်သူကြီးတစ်ဦးကိုပါ ရှင်းလင်းနိုင်မည်ဖြစ်ရာ... ဝမ်းမြောက်စရာ ကိစ္စပင် ဖြစ်လိမ့်မည်။
မအောင်မြင်ခဲ့လျှင်လည်း... ကုမိသားစုပျက်စီးခြင်းကို အသုံးပြု၍ ကုချန်အား အဆုံးမဲ့ကမ္ဘာသို့ ပြန်လာရန်... မျှားခေါ်နိုင်မည်ဖြစ်သည်။ ထို့အပြင်... ပြဿနာများ ဖန်တီးလိုက်ခြင်းအားဖြင့် သက်တမ်းရှည်နန်းတော်သည် သူ့အား အလွယ်တကူ လက်မလွှတ်ရဲတော့ဘဲ... ဆက်လက်အားကိုးကာ အသုံးပြုလာရမည်ဖြစ်သည်။
ဤကဲ့သို့သော ဉာဏ်နီဉာဏ်နက်များသည် တကယ်ပင် အပြစ်ပြောစရာ မရှိချေ။
သို့သော်... သူ တွက်ချက်၍ မရနိုင်ခဲ့သော တစ်ခုတည်းသော အရာမှာ... ကုချန်၏ ကျိုးကြောင်းဆီလျော်မှု မရှိလောက်အောင် မြန်ဆန်လွန်းသည့်... အင်အားတိုးတက်မှုပင် ဖြစ်သည်။
ထိုအချက်ကြောင့်ပင်... နောက်ဆက်တွဲ အဖြစ်အပျက်များသည် သူ၏ထိန်းချုပ်မှုအောက်မှ လွတ်ကင်းကာ... ရှုပ်ထွေးသွားခဲ့ရခြင်း ဖြစ်သည်။
အံ့ဩစရာ မရှိတော့ပေ... ဧကရာဇ်ဂိတ်တွင် ထိုနက်နဲဆန်းကြယ်သော ဧကရာဇ်မှ သူ့အား တိုက်ခိုက်သတ်ဖြတ်စဉ်က... ကုမိသားစု ပျက်စီးတော့မည့် အခြေအနေကို ချက်ချင်း ပြသခဲ့သည်မှာ... အကြောင်းမဲ့သက်သက် မဟုတ်ပေ။ သူ့တွင် ဤကဲ့သို့ ရည်ရွယ်ချက်များ ရှိနေခဲ့ခြင်းသာ.....
အခန်း (၂၃၂) - ရွေးချယ်မှု နှစ်ကြိမ်စလုံးမှားယွင်းခြင်း၊ ယွမ်ကျွင်း၏ နိဂုံး
ကုချန်၏စိတ်ထဲတွင် အရာအားလုံးသည် နောက်ဆုံး၌ ဆက်စပ်သွားခဲ့လေပြီ။
ဖြစ်ရပ်များ၏ သီးခြားအကြောင်းအရာများသည် သူ၏မျက်စိရှေ့တွင် ရှင်းလင်းစွာ ပေါ်လာခဲ့သည်။
လွန်ခဲ့သော နှစ်ပေါင်းသိန်းချီက... လူသားဧကရာဇ်သည် ကောင်းကင်ချောက်နက်ထဲသို့ ဝင်ရောက်ကာ... စစ်မှန်သော အင်မော်တယ် နှစ်ပါးကို သတ်ဖြတ်ပြီး... ရွှယ်ကျန်းကို ပြင်းထန်စွာ ဒဏ်ရာရစေခဲ့သည်။ ၎င်းသည်... အဆုံးမဲ့ကမ္ဘာရှိ သက်ရှိများအတွက် အချိန်ဆွဲပေးရန် ရည်ရွယ်ပြီး... နောင်လာနောက်သားများ စစ်မှန်သော အင်မော်တယ်များ၏ အစာမဖြစ်လာစေရန်... ကာကွယ်ပေးခဲ့ခြင်းဖြစ်သည်။
သို့သော် ရွှယ်ကျန်းသည် လှည့်ကွက်ငယ်တစ်ခုကို အသုံးပြုပြီး... အဆုံးမဲ့ကမ္ဘာအတွင်းရှိ အချို့သော သက်ရှိများကို သစ္စာဖောက်စေကာ... သူ၏လက်အောက်ခံအဖြစ် အမှုထမ်းစေခဲ့သည်။
အဆုံးမဲ့ကမ္ဘာရှိ သက်ရှိသန်းပေါင်းများစွာကို သစ္စာဖောက်ခဲ့သူများသည် သက်တမ်းရှည်နန်းတော်ကို စတင်တည်ထောင်ခဲ့သူများ ဖြစ်နိုင်ခြေများသည်။
ထို့နောက်... သက်တမ်းရှည်နန်းတော်မှ ထိုအသက်ရှည်ထျန်းကျွင်းများသည် အင်မော်တယ်တစ်သောင်းမျှော်စင်မှ... စစ်မှန်သော အင်မော်တယ်များကို လျှို့ဝှက်စွာ အမှုထမ်းခဲ့ကြ၏။ သူတို့သည် ကမ္ဘာလောကတွင်... လူသားဧကရာဇ် ချန်ထားခဲ့သော ခြေရာများကို ဖျက်ပစ်ကာ... လူသားဧကရာဇ် ချန်ထားခဲ့သော နေလဧကရာဇ်ကျမ်းစာ အမွေအနှစ်များကို... တိတ်တဆိတ် ဖျက်ဆီးခဲ့ကြသည်။
ထို့အပြင်... အဆုံးမဲ့ကမ္ဘာအတွင်းရှိ ဧကရာဇ်အဆင့် ကျွမ်းကျင်သူများကို သူတို့၏ ထောင်ချောက်ထဲသို့... ကျရောက်စေရန် စဉ်ဆက်မပြတ် မြှူဆွယ်ခဲ့ကြပြီး... အင်မော်တယ်တစ်သောင်းမျှော်စင်မှ အသက်ရှည်ပစ္စည်းများဖြင့် လဲလှယ်ခဲ့ကြသည်။
နောက်ပိုင်းတွင်... အချိန်ကြာလာသည်နှင့်အမျှ ထိုအသက်ရှည်ထျန်းကျွင်းများသည် တဖြည်းဖြည်း ပိုဆိုးဝါးလာပြီး... အဆုံးမဲ့ကမ္ဘာအတွင်း သူတို့အတွက် ညစ်ပတ်ပြီး ခက်ခဲသော အလုပ်များကို လုပ်ဆောင်ပေးမည့်... 'ကိုယ်စားလှယ်' များကို စတင်ပျိုးထောင်လာကြသည်။
ယွမ်ကျွင်းသည် သက်တမ်းရှည်နန်းတော်မှ ရှေးဟောင်းအသက်ရှည်ထျန်းကျွင်းများ ရွေးချယ်ခဲ့သော 'ကိုယ်စားလှယ်' ဖြစ်သည်။
ယွမ်ကျွင်း၏စကားများအရ... အချိန်ကြာလာသည်နှင့်အမျှ ထိုအသက်ရှည်ထျန်းကျွင်းများသည်... မျိုးပွားမြေအဖြစ် အသုံးပြုရန် ကမ္ဘာသစ်များကို ရှာဖွေနေပုံရပြီး... သူတို့၏ ပူးပေါင်းသူများသည်လည်း... မူလက အင်မော်တယ်တစ်သောင်းမျှော်စင်တွင် ရွှယ်ကျန်းတစ်ဦးတည်းသာ ရှိခဲ့ရာမှ... အင်မော်တယ်နယ်မြေ အင်အားစုများစွာအထိ တဖြည်းဖြည်း တိုးချဲ့လာခဲ့သည်။
သက်တမ်းရှည်နန်းတော်ဆိုတာ ဒါပါလား... အသက်ရှည်ထျန်းကျွင်းတွေဆိုတာ ဒါပါလား.....
ကုချန်၏မျက်လုံးများတွင် အေးစက်သော အလင်းရောင်တစ်ခု ပေါ်လာလေသည်။
လွန်ခဲ့သော နှစ်ပေါင်းကိုးသောင်းက သူသည် လုံးဝ အမှောင်ထဲတွင် ရှိနေခဲ့သလိုပင်။ နတ်ဆိုးနယ်မြေသို့ သွားရာလမ်းကြောင်း ရုတ်တရက် ပွင့်သွားခြင်းသည်လည်း သက်တမ်းရှည်နန်းတော်အတွင်းရှိ ထျန်းကျွင်းများ၏ လက်ချက်ဖြစ်ကြောင်း သိလိုက်ရသည်။
တစ်နည်းအားဖြင့် ပြောရလျှင် ယွမ်ကျွင်း၏ သစ္စာဖောက်မှုသည် ကုချန်ကို နှိုးဆော်လိုက်သကဲ့သို့ ဖြစ်စေခဲ့သည်။
သို့မဟုတ်ပါက... သူသည် ယခုအချိန်ထိ ဧကရာဇ်ဂိတ်ကို... စောင့်ကြပ်နေဆဲ ဖြစ်နိုင်သည်။ သို့မဟုတ်... သူ၏ခန္ဓာကိုယ်အတွင်းရှိ တာအိုဒဏ်ရာများကို မထိန်းချုပ်နိုင်တော့ဘဲ... ဝမ်းနည်းပူဆွေးမှုဖြင့် သေဆုံးသွားနိုင်ပေသည်။
" သက်တမ်းရှည်နန်းတော်က ထျန်းကျွင်းတွေ... အဲဒီတုန်းက မင်းကို စိတ်ကြိုက်ကြိုးကိုင်နိုင်ခဲ့တာက လူ့သဘာဝကို ကောင်းကောင်းသိလို့ပဲ... မင်း အမှန်တရားကို သိလိုက်တာနဲ့ အဆုံးမဲ့ကမ္ဘာက သက်ရှိသန်းပေါင်းများစွာအတွက် မင်းကိုယ်မင်း စတေးပြီး.... နတ်ဆိုးနယ်မြေကို တစ်ယောက်တည်း သွားစောင့်မယ်ဆိုတာ သူတို့ သိနေခဲ့တယ် "
ယွမ်ကျွင်းသည် ကုချန်ကိုစိုက်ကြည့်ရင်း သူ၏နှုတ်ခမ်းထောင့်တွင် ထူးဆန်းသော အပြုံးတစ်ခု ပေါ်လာ၏။
" ရလဒ်ကလဲ တကယ်ပဲ ဒီလိုဖြစ်လာခဲ့တာပဲ... ဒါပေမယ့် ငါကိုယ်တော် မထင်ခဲ့တာက အဆုံးမဲ့ကမ္ဘာက သက်ရှိသန်းပေါင်းများစွာက ဒီလောက် မိုက်မဲလိမ့်မယ် ဆိုတာပဲ... မင်းထွက်သွားပြီး မကြာခင်မှာပဲ ငါကိုယ်တော်ဘာမှမလုပ်ရသေးဘဲနဲ့... ဒီသာမန်လူတွေက မင်းရဲ့အောင်မြင်မှုတွေကို မေ့လျော့သွားကြတယ်လေ "
" ငါကိုယ်တော်က သူတို့ကို သိပ်ပြီး လမ်းညွှန်မှု မပေးခဲ့ပေမယ့်... သက်ရှိများစွာက မင်းအပေါ် မကောင်းတဲ့ သဘောထားတွေ ထားရှိလာကြတယ်... မင်းက နတ်ဆိုးနယ်မြေကို လုံးဝ သွားမစောင့်ကြပ်ဘဲ အင်မော်တယ်တက်လှမ်းခြင်း ကံကောင်းမှုကို တစ်ယောက်တည်း ခံစားပြီး... အဆုံးမဲ့ကမ္ဘာက သက်ရှိသန်းပေါင်းများစွာရဲ့ လမ်းကြောင်းကို ဖြတ်တောက်လိုက်တယ်လို့ ထင်နေကြတာ "
" ဟားဟားဟား... ဘယ်လောက်တောင် လှောင်ပြောင်ချင်စရာကောင်းလိုက်လဲ... မင်းက အဆုံးမဲ့ကမ္ဘာ လူသားမျိုးနွယ်အတွက် နတ်ဆိုးနယ်မြေကို စောင့်ကြပ်ပေးခဲ့ပေမယ့်... လူသားမျိုးနွယ်က မင်းရဲ့ကျေးဇူးကို လုံးဝ နားမလည်ဘဲ... ရန်သူလိုတောင် သဘောထားကြတာလေ "
ယွမ်ကျွင်း၏မျက်နှာပေါ်ရှိ ထူးဆန်းသောအပြုံးကို ကြည့်နေသော်ငြား ကုချန်၏အမူအရာသည် တည်ငြိမ်နေဆဲဖြစ်သည်။
သူသည် လူသားမျိုးနွယ်၏သဘာဝကို ယခင်ကတည်းက သိမြင်ခဲ့ပြီးဖြစ်သည်။ သို့မဟုတ်ပါက ယွမ်ကျွင်း၏သစ္စာဖောက်မှုကို ခံရပြီးနောက် နတ်ဆိုးနယ်မြေကို ကာကွယ်ရန် လုံးဝ လက်လျှော့လိုက်မည် မဟုတ်ပေ။
လွန်ခဲ့သော နှစ်ပေါင်းကိုးသောင်းက နတ်ဆိုးနယ်မြေ ဖရိုဖရဲဖြစ်မှုသည် အဆုံးမဲ့ကမ္ဘာတစ်ခုလုံးတွင် ကျော်ကြားခဲ့သည်။
အဆုံးမဲ့ကမ္ဘာ ဧကရာဇ်မျိုးနွယ်စုများသည်... ယွမ်ကျွင်း၏ ညွှန်ကြားမှုနှင့် လွှမ်းမိုးမှုအောက်တွင် ကုချန်ကို သစ္စာဖောက်ခဲ့ပြီး... နှစ်ပေါင်းကိုးသောင်းတိုင်အောင် နယ်စပ်သို့ မည်သည့် အထောက်အပံ့မှ မပေးပို့ခဲ့သော်လည်း.....
သာမန်လူများကရော ဘာထူးသနည်း.....
သူတို့သည်... နတ်ဆိုးနယ်မြေ ဖရိုဖရဲဖြစ်မှုကို လုံးဝ မသိနားမလည်သည် မဟုတ်သော်လည်း... နှစ်ပေါင်းကိုးသောင်းတိုင်အောင် ထိုလူများသည်... နတ်ဆိုးနယ်မြေမှ ခြိမ်းခြောက်မှုသည် သူတို့နှင့် မသက်ဆိုင်သကဲ့သို့... တိတ်ဆိတ်နေခဲ့ကြသည်။
ဤကဲ့သို့သော လုပ်ရပ်များသည် စိတ်ပျက်စရာကောင်းပြီး ပို၍ပင် စိတ်ကုန်စေသည်။
ကုချန် ဧကရာဇ်ဂိတ်ကို စွန့်ခွာခဲ့ခြင်းသည်... အဆုံးမဲ့ကမ္ဘာ ဧကရာဇ်မျိုးနွယ်စုများမှ သူ့အား... သစ္စာဖောက်ခဲ့ရုံသက်သက်ကြောင့် မဟုတ်ပေ။ ပိုကြီးမားသော အကြောင်းပြချက်မှာ... အဆုံးမဲ့ကမ္ဘာမှ သာမန်လူများအပေါ်... စိတ်ပျက်သွားခြင်းကြောင့်ဖြစ်သည်။ ဧကရာဇ်ဂိတ်ကို မထောက်ပံ့ခဲ့ကြခြင်းက တစ်ပိုင်းဖြစ်သော်လည်း... ကုမိသားစု ပျက်စီးလုနီးပါး ဖြစ်နေချိန်တွင်... မည်သူတစ်ဦးတစ်ယောက်မျှ ကုမိသားစုအတွက်... တရားမျှတမှု စကားတစ်ခွန်းမျှပင် ထွက်မပြောခဲ့ကြ၍ပင်။
ဤကဲ့သို့သော ကမ္ဘာကြီးကို ကုချန်အနေဖြင့် ကာကွယ်ရန် ဘာလိုအပ်သေးသနည်း။ အရာအားလုံးကို ဖျက်ဆီးပစ်လိုက်ခြင်းက ပို၍ သန့်ရှင်းသွားပေလိမ့်မည်။
ဤအကြောင်းကို တွေးမိသောအခါ ကုချန်၏နှလုံးသားထဲတွင် ရုတ်တရက် ခံစားချက်များ လှုပ်ရှားသွားလေသည်။
ဤအခြေအနေအထိ ရောက်လာရခြင်းသည် ထိုသာမန်လူများ၏ ကိုယ်ပိုင်ရွေးချယ်မှု သက်သက်သာဖြစ်သည်။
လွန်ခဲ့သော နှစ်ပေါင်း သိန်းချီက... သူတို့သည် ရေနဂါးမှ နဂါးအဖြစ် ပြောင်းလဲနိုင်မည့်... အခွင့်အရေး ရှိခဲ့သည်။ လူသားဧကရာဇ် ချန်ထားခဲ့သော အထွတ်အထိပ်ကျမ်းစာများကို အားကိုးလျက်... လူတိုင်း နဂါးကဲ့သို့ ဖြစ်လာမည့် စည်ပင်ဝပြောသော ခေတ်တစ်ခုကို ဖန်တီးကာ... နောက်ဆုံးတွင် အင်မော်တယ်နယ်မြေ၏ ခြိမ်းခြောက်မှုမှ လွတ်မြောက်နိုင်မည့် အခွင့်အရေး ရှိခဲ့သည်။
သို့သော်... နောက်ဆုံးရလဒ်မှာ လူနည်းစုက သစ္စာဖောက်ရန် ရွေးချယ်ခဲ့ပြီး... လူများစုက ဂရုမစိုက်ဘဲနေရန် ရွေးချယ်ခဲ့ကြသည်။ မည်သူမျှ ထကြွပုန်ကန်ခြင်း မပြုခဲ့ကြပေ။ ထို့ကြောင့်... လူသားဧကရာဇ် မသေဆုံးမီ ဖန်တီးခဲ့သော... ကောင်းမွန်သည့် အခြေအနေသည် လုံးဝ ပျက်စီးသွားခဲ့ရ၏။
ယခုအခါ အဆုံးမဲ့ကမ္ဘာမှ သာမန်လူများသည် ဒုတိယအကြိမ် ရွေးချယ်ခွင့်ရခဲ့ကြသည်။ သူတို့သည် ဧကရာဇ်ဂိတ်ကို ထောက်ပံ့ရန် သို့မဟုတ် ကုမိသားစု အန္တရာယ်ကြုံတွေ့နေရချိန်တွင် ကုမိသားစုဘက်မှ ပြောဆိုရန် ရွေးချယ်နိုင်ခဲ့သည်။
သို့သော် သာမန်လူများသည် နောက်တစ်ကြိမ် လက်လျှော့လိုက်ပြန်သည်။ သူတို့သည် သူရဲဘောကြောင်သူများ ဖြစ်ရန် ရွေးချယ်ခဲ့ကြသည်။ ၎င်းသည် ကုချန်ကို လုံးဝ စိတ်ပျက်စေခဲ့ပြီး နောက်ဆုံးတွင် အဆုံးမဲ့ကမ္ဘာကို စွန့်ခွာရန် ဆုံးဖြတ်ချက်ချစေခဲ့သည်။
ရွေးချယ်မှု နှစ်ကြိမ်... ဤသာမန်လူများသည် နှစ်ကြိမ်စလုံး မှားယွင်းစွာ ရွေးချယ်ခဲ့ကြသည်။
ထို့ကြောင့် အဆုံးမဲ့ကမ္ဘာ၏ လက်ရှိအခြေအနေအတွက် လူသားမျိုးနွယ်သည် မည်သူ့ကိုမျှ အပြစ်တင်စရာ မရှိပေ။ ၎င်းသည် သူတို့၏ ကိုယ်ပိုင်ရွေးချယ်မှုကြောင့်သာ ဖြစ်သည်။
" ကုချန်... ငါဘာလို့ မင်းကို ဒီအကြောင်းတွေ အကုန်ပြောပြလိုက်လဲ သိလား "
ယွမ်ကျွင်း၏လေသံသည် ပြောင်းလဲသွားကာ တိုးညှင်းသော အသံဖြင့် ပြောဆိုလိုက်သည်။
သူဘာကြောင့် အရာအားလုံးကို လွယ်လွယ်ကူကူ ထုတ်ဖော်ပြောပြလိုက်ရသနည်း။
ကုချန်နှင့် သက်တမ်းရှည်နန်းတော် နှစ်ခုစလုံးသည်... ယွမ်ကျွင်း၏အမုန်းတရား ပစ်မှတ်များဖြစ်ကြောင်း... ကုချန် ကောင်းစွာသိသည်။ ယခုအခါ... ယွမ်ကျွင်းသည် ကုချန်၏လက်ထဲတွင် ရောက်နေပြီဖြစ်ရာ... လွတ်မြောက်နိုင်တော့မည် မဟုတ်ပေ။ ကုချန်ကို အရာအားလုံး ပြောပြလိုက်ခြင်းသည်... ကုချန်နှင့် သက်တမ်းရှည်နန်းတော်တို့ သေသည်အထိ တိုက်ခိုက်ကြပြီး... နှစ်ဖက်စလုံး အကြီးအကျယ် ထိခိုက်ဆုံးရှုံးစေရန် မျှော်လင့်ခြင်းသာဖြစ်သည်။
မည်သို့ပင်ဆိုစေကာမူ... ဘယ်ဘက်ကပဲ ထိခိုက်နစ်နာပါစေ... ယွမ်ကျွင်းအတွက် သတင်းကောင်း ဖြစ်လိမ့်မည်။
ဒါသည်လည်း မသေဆုံးမီ သူလုပ်နိုင်သည့် တစ်ခုတည်းသော ပေါ်ပေါ်ထင်ထင် လုပ်ကြံမှုပင်ဖြစ်သည်။
နှမြောစရာကောင်းသည်မှာ... ကုချန်၏လက်ရှိအင်အားဖြင့် ထျန်းကျွင်းများကို မဆိုထားနှင့်... သာမန် အင်မော်တယ်ထျန်းကျွင်းများကိုပင်... သတ်ဖြတ်နိုင်စွမ်း ရှိနေပြီဖြစ်သည်။ သက်တမ်းရှည်နန်းတော်ကို ဖျက်ဆီးရန်မှာ... သူ့အတွက် မခက်ခဲပေ။
" ကုချန်... သက်တမ်းရှည်နန်းတော်ရဲ့ တည်နေရာ အတိအကျက..... "
ရုတ်တရက် ယွမ်ကျွင်းသည် စကားစလိုက်၏။ သူသည် ကုချန်အား သက်တမ်းရှည်နန်းတော်၏ တည်နေရာ အတိအကျကို ပြောပြတော့မည့်ဟန်ရှိသည်။ သို့သော်... သူ မပြောနိုင်မီတွင် သူ၏ နတ်ဘုရားဝိညာဉ် အတွင်းပိုင်းတွင် ထားရှိသော... စစ်မှန်သော အင်မော်တယ် တားမြစ်ပိတ်ပင်မှု စတင်လှုပ်ရှားလာကာ... ယွမ်ကျွင်း၏ မျက်နှာသည် ချက်ချင်း ကြောက်မက်ဖွယ် ဖြစ်သွားခဲ့လေသည်။
နောက်တစ်ခဏတွင်... ယွမ်ကျွင်း၏ လက်ကျန် နတ်ဘုရားဝိညာဉ် အပိုင်းအစသည် ရေခဲနှင့် နှင်းများ အရည်ပျော်ကျသွားသကဲ့သို့... ပျောက်ကွယ်သွားလေတော့သည်။ သူသေဆုံးသည်အထိ သက်တမ်းရှည်နန်းတော်၏ တည်နေရာ အတိအကျကို မပြောပြနိုင်ခဲ့ပေ။
ဤရလဒ်သည် ကုချန်အတွက် အံ့ဩစရာ မဟုတ်ပေ။
သက်တမ်းရှည်နန်းတော်သည် သတိကြီးစွာ ထားတတ်၏။ ယွမ်ကျွင်း၏အသိစိတ်ပင်လယ်ထဲတွင် တားမြစ်ပိတ်ပင်မှု တစ်ခုပင် ထည့်ထားခဲ့လေသည်။ သက်တမ်းရှည်နန်းတော်၏ တည်နေရာ အတိအကျကို တစ်စုံတစ်ယောက်အား ထုတ်ဖော်ပြောခွင့်ပြုမည် မဟုတ်ပေ။
မသိရသည်မှာ... လွန်ခဲ့သော နှစ်ပေါင်းငါးသောင်းက ကုဝူရှန့်သည် သက်တမ်းရှည်နန်းတော်၏ တည်နေရာသို့... မည်သို့ အမှတ်မထင် ရောက်ရှိသွားခဲ့သနည်း ဆိုသည်ပင်။ တိုက်ဆိုင်မှုလား သို့မဟုတ် တစ်စုံတစ်ယောက်၏ တမင်စီစဉ်မှု ရလဒ်လော။
" သက်တမ်းရှည်နန်းတော်..... "
ယွမ်ကျွင်း၏ဝိညာဉ်လွင့်ပါးကာ... ပြန့်ကျဲသွားသောနေရာကို ကြည့်ရင်း... ကုချန်သည် တိုးညှင်းစွာ ရေရွတ်လိုက်လေသည်။
ယွမ်ကျွင်း သေဆုံးသွားပြီဖြစ်ရာ... သူ၏နောက်ထပ်ပစ်မှတ်မှာ သက်တမ်းရှည်နန်းတော်အတွင်းရှိ... ရှေးဟောင်းအသက်ရှည်ထျန်းကျွင်းများပင် ဖြစ်တော့သည်။