အခန်း (၂၃၅-၂၃၆)
Vol. 17 Ch. 235-236
အခန်း (၂၃၅) - ကောင်းကင်ဘုံသို့ ဝင်ရောက်ခြင်း၊ နဂါးက လမ်းပြခြင်းနှင့် အလွန်မိုက်သော ခံစားချက်
သက်ရှိသတ္တဝါအပေါင်းသည် ထိတ်လန့်အံ့ဩနေကြပြီး... ဖီးနစ်ဧကရာဇ်နှင့် အခြားသူများသည် အဘယ်ကြောင့်... ကောင်းကင်ဘုံအရှင်သခင် ကုချန်နှင့် အထက်ကောင်းကင်အပေါ်... ရုတ်တရက် ရိုသေလေးစားသွားရသည်ကို... နားမလည်နိုင် ဖြစ်နေကြသည်။
သို့သော်... ဖီးနစ်ဧကရာဇ်နှင့် အခြားသော အရှင်သခင်များသည် အထက်ကောင်းကင်တားမြစ်နယ်မြေ အပြင်ဘက်တွင်... ရပ်လျက်ရှိပြီး သူတို့၏မျက်နှာအမူအရာများမှာ အလွန်ရိုသေလေးစားမှု ရှိနေကာ... မလိုလားဟန် သို့မဟုတ် စိတ်မရှည်ဟန် အနည်းငယ်မျှပင် မရှိချေ။
ယခင်က ကုချန်အပေါ် ဝေဖန်ပြစ်တင်ခဲ့ခြင်းမှာ... ကုချန်သည် တားမြစ်နယ်မြေအသီးသီးကို အကြိမ်ကြိမ် ဖိနှိပ်ခဲ့သဖြင့်... သူတို့၏သိက္ခာများ ကျဆင်းစေခဲ့သည်ဟု ယုံကြည်ခဲ့သောကြောင့် ဖြစ်သည်။
သို့သော်... ယခုအခါတွင်မူ ကုချန်၏ စစ်မှန်သော တိုက်ခိုက်စွမ်းရည်ကို သိရှိသွားပြီးနောက်... ကျန်ရှိနေသေးသော တားမြစ်နယ်မြေအရှင်သခင်များသည် ဒေါသအလျဉ်း မရှိတော့ချေ။
ကောင်းကင်ဘုံအရှင်သခင်သည် စစ်မှန်သော အင်မော်တယ်အဆင့်အထက်ရှိသော သူများကိုပင် သတ်ဖြတ်နိုင်စွမ်းရှိသော ဖြစ်တည်မှုတစ်ခု ဖြစ်ပေသည်။
ဤမျှ ကြီးမားသော စွမ်းအားကွာခြားချက် ရှိနေသည်ဖြစ်ရာ... သူသည် အဆုံးမဲ့ကမ္ဘာ နယ်ပယ်ငါးခုရှိ... ရှင်သန်ခြင်းတားမြစ်နယ်မြေအရှင် ဆိုသူများကို အလေးမထားခြင်းမှာ... မည်သည့် အမှားအယွင်း ရှိပါမည်နည်း။
ဤကမ္ဘာလောကသည် အားကြီးသူက အားနည်းသူကို ဝါးမြိုသည့် နေရာဖြစ်ပြီး... အားကြီးသူ ပြုလုပ်သမျှသည် အမှန်တရားဖြစ်ကာ... အားနည်းသူမှာ အားကြီးသူကို နာခံရုံသာ ရှိသည်။
ဤသည်မှာ ဖီးနစ်ဧကရာဇ်နှင့် အခြားသော တားမြစ်နယ်မြေအရှင်သခင်များ၏ ယုတ္တိတရားပင် ဖြစ်သည်။
လွန်ခဲ့သောအချိန်များ၌ သူတို့သည် ကမ္ဘာလောကရှိ သက်ရှိအားလုံးကို အားနည်းသူများအဖြစ် သတ်မှတ်ခဲ့ကြခြင်းသာ ဖြစ်သည်။
သို့သော် ယခုအခါတွင်မူ သူတို့ကိုယ်တိုင် အားနည်းသူများ ဖြစ်လာခဲ့ကြလေပြီ။
အသက်ကယ်တင်ပေးခဲ့သည့် ကျေးဇူးတရားနှင့် ပတ်သက်၍ ဖီးနစ်ဧကရာဇ်နှင့် အခြားသူများ၏ အယူအဆမှာ မှားယွင်းခြင်း မရှိပေ။
အကယ်၍... ကုချန်သာ ရွှယ်ကျန်းနှင့် ပိုမိုကြောက်မက်ဖွယ်ကောင်းသော ဖြစ်တည်မှုများကို ဆက်တိုက်သတ်ဖြတ်ခြင်း မပြုခဲ့ပါက... သူတို့သည် ကောင်းကင်ချောက်နက်ကို ဖောက်ထွက်ပြီး ကျယ်ပြောလှသော အင်မော်တယ်နယ်မြေသို့ ရောက်ရှိချိန်တွင်... ရွှယ်ကျန်း၏အစာအဖြစ် ရောက်ရှိသွားနိုင်ပေသည်။
ကုချန်သည် ဤအရှင်သခင်များကို တိုက်ရိုက် ကယ်တင်ခဲ့ခြင်း မဟုတ်သော်လည်း သွယ်ဝိုက်သောနည်းဖြင့် သူတို့၏ အသက်များကို ကယ်တင်ပေးခဲ့ခြင်း ဖြစ်သည်။
ထို့ကြောင့် အသက်ကယ်တင်ပေးခဲ့သည့် ကျေးဇူးတရားအတွက် လာရောက် ကျေးဇူးတင်ခြင်းမှာ မည်သည့်အမှားအယွင်း ရှိပါမည်နည်း။
...
အထက်ကောင်းကင်တားမြစ်နယ်မြေ အတွင်း၌.....
အရှင်သခင် ၅ ပါး၏ ကျေးဇူးတင်စကားသံများသည်... အဆုံးမဲ့ကောင်းကင်ယံတွင် ပဲ့တင်ထပ်ကာ... အထက်ကောင်းကင်တားမြစ်နယ်မြေ၏ နက်ရှိုင်းသော နေရာများအထိ... ရောက်ရှိလာခဲ့လေသည်။
ဤအချိန်၌ ကုမိသားစုဝင်များ၏ မျက်နှာအမူအရာသည် နယ်ပယ်ငါးခုမှ သက်ရှိများနှင့် မခြားနားပေ။ အားလုံးမှာ မျက်လုံးပြူးကာ အံ့အားသင့်နေကြတော့၏။
သူတို့၏ဘိုးဘေးသည် ကောင်းကင်ချောက်နက်သို့ တစ်ခေါက်သွားရုံမျှဖြင့်... မည်သို့သော အကြောင်းကြောင့်... ဤတားမြစ်နယ်မြေအရှင်သခင်များ၏ အသက်သခင်ကျေးဇူးရှင် ဖြစ်လာရသနည်းဟု... နားမလည်နိုင် ဖြစ်နေကြသည်။
ထို့အပြင်... ဤအရှင်သခင်များ၏ စကားကို နားထောင်ကြည့်လျှင် သူတို့၏သဘောထားသည် လုံးဝ ပြောင်းလဲသွားကြောင်း... သူတို့၏ လေသံတွင် ရိုသေလေးစားမှုများ ပါဝင်နေကြောင်းကိုပင်... ကြားသိနေရသည်။
" ဘိုးဘေးက အဲ့ဒီကောင်းကင်ချောက်နက်ထဲမှာ တကယ်ပဲ ဘာတွေလုပ်ခဲ့တာလဲ "
ကုတောက်လင်းသည် မုတ်ဆိတ်မွေးကို သပ်ရင်း အံ့အားသင့်စွာ ရေရွတ်လိုက်မိသည်။
" ဒီရှေးဟောင်းတားမြစ်နယ်မြေအရှင်သခင်တွေကို... စိတ်နှလုံးအကြွင်းမဲ့ ယုံကြည်လက်ခံသွားအောင် လုပ်နိုင်တယ်ဆိုတော့... ကမ္ဘာမြေကို တုန်လှုပ်စေမယ့် ကိစ္စကြီးတစ်ခု ဖြစ်ပျက်ခဲ့တာ ဖြစ်ရမယ် "
ကုဝူရှန့်သည် စိတ်လှုပ်ရှားစွာဖြင့် သက်ပြင်းချလိုက်၏။
ဤတားမြစ်နယ်မြေအရှင်သခင်များသည် အမြဲတစေ မာန်မာနကြီးသူများ ဖြစ်ကြပြီး... သာမန် အဆုံးမဲ့ကမ္ဘာဧကရာဇ်အဆင့် ကျွမ်းကျင်သူတစ်ဦးပင်လျှင်... သူတို့ထံမှ ယဉ်ကျေးပျူငှာမှုကို မျှော်လင့်၍ မရနိုင်ပေ။
သူတို့၏ဘိုးဘေးသည် တားမြစ်နယ်မြေအသီးသီးကို အကြိမ်ကြိမ် ဖိအားပေးခဲ့စဉ်ကပင်... ထိုတားမြစ်နယ်မြေများအတွင်းရှိ ရှေးဟောင်းအရှင်သခင် အများစုသည် ဒေါသထွက်ရုံသာ တတ်နိုင်ပြီး... စကားမပြောရဲကြသော်လည်း စိတ်ရင်းမှန်ဖြင့် ယုံကြည်လက်ခံခြင်း မရှိခဲ့ကြပေ။
သို့သော်... ယခုအခါ ဤအရှင်သခင်များကို ကြည့်ရသည်မှာ... ဘိုးဘေးအပေါ် လုံးဝယုံကြည်လက်ခံသွားပြီး သူတို့အထက်ရှိ ဖြစ်တည်မှုတစ်ခုအဖြစ်... အပြည့်အဝ သတ်မှတ်လိုက်သည်မှာ ထင်ရှားသည်။
ထို့ကြောင့် သံသယဖြစ်စရာမလိုဘဲ... ကောင်းကင်ချောက်နက် အတွင်း၌ တွေးတော၍ပင် မရနိုင်သော... 'ကိစ္စကြီး' တစ်ခု ဖြစ်ပျက်ခဲ့သည်မှာ သေချာပေသည်။
အထက်ကောင်းကင်ပင်မခန်းမဆောင် အတွင်း၌.....
ကုချန်သည် မူလက မျက်လုံးများကို မှိတ်ထားပြီး... အဆုံးမဲ့ဓား ဆင့်ကဲပြောင်းလဲမည့်အချိန်ကို တိတ်ဆိတ်စွာ စောင့်ဆိုင်းနေစဉ်... ဖီးနစ်ဧကရာဇ်နှင့် အခြားသူများ၏ အသံများမှာ... သူ၏နားထဲသို့ ရုတ်တရက် ရောက်ရှိလာခဲ့လေသည်။
ဒီကောင်တွေ သူ့ဆီကို ဘာလာလုပ်ကြတာလဲ။
ကုချန်၏မျက်လုံးများတွင် တွေးတောရိပ်တစ်ခု ပေါ်လာလေသည်။
ဖီးနစ်ဧကရာဇ်နှင့် အခြားသူများသည်... အသက်ကယ်တင်ပေးခဲ့သည့် ကျေးဇူးတရားအတွက်... သက်သက် လာရောက်ကျေးဇူးတင်သည်ဟု... သူ မယုံကြည်ပေ။ သို့သော်... သူတို့၏ တိကျသော ရည်ရွယ်ချက်ကို... သူ မသိရှိသေးချေ။
" ဝင်ခဲ့ကြ "
ကုချန်သည် လျစ်လျူရှုစွာ လက်ဝှေ့ယမ်းလိုက်ပြီး... အထက်ကောင်းကင်တားမြစ်နယ်မြေ၏ အပြင်ဘက်အကာအကွယ်ကို အနည်းငယ် ဟပေးလိုက်ကာ... ဖီးနစ်ဧကရာဇ်နှင့် အခြားသူများ ဝင်ရောက်လာရန် အချက်ပြလိုက်သည်။
သူတို့သည် အရှင်သခင်အနည်းငယ်မျှသာ ဖြစ်ရာ သူ့ရှေ့တွင် မည်သည့်ပြဿနာမျှ ရှာနိုင်မည် မဟုတ်ပေ။
...
" ကောင်းကင်ဘုံအရှင်သခင်က သဘောတူလိုက်ပြီ "
အထက်ကောင်းကင်တားမြစ်နယ်မြေ အပြင်ဘက်တွင်... ကုချန်၏အဖြေစကားကို ကြားလိုက်ရသောအခါ... ဖီးနစ်ဧကရာဇ်နှင့် အခြား ၅ ဦးတို့၏ ခန္ဓာကိုယ်များမှာ... မထိန်းချုပ်နိုင်ဘဲ တုန်ယင်သွားကြသည်။
အထက်ကောင်းကင်တားမြစ်နယ်မြေ၏ နက်ရှိုင်းရာသို့ ဦးတည်နေသော လမ်းကြောင်းကို ကြည့်ရင်း... ဖီးနစ်ဧကရာဇ်၏မျက်လုံးများတွင် စိတ်လှုပ်ရှားမှုနှင့် စိုးရိမ်ပူပန်မှုများ... ရောယှက် ထွက်ပေါ်လာ၏။
ကောင်းကင်ဘုံအရှင်သခင်က သူ့ကို တွေ့ဆုံရန် ဆန္ဒရှိခြင်းသည် အကောင်းဆုံးသတင်းပင် ဖြစ်သည်။ တစ်နည်းအားဖြင့် ဆိုရလျှင် သူ၏ ရည်မှန်းချက် တစ်ဝက် ပြီးမြောက်သွားပြီဟု ဆိုနိုင်သည်။
" အားလုံးပဲ... ကြွပါ "
ဖီးနစ်ဧကရာဇ်သည် ရင်ထဲမှ စိတ်လှုပ်ရှားမှုလှိုင်းလုံးများကို ဖိနှိပ်လိုက်ပြီး အခြားသော တားမြစ်နယ်မြေအရှင်သခင် ၄ ဦးကို လက်ဟန်ပြလိုက်သည်။
" ကြွပါ "
လူအနည်းငယ်သည် အကြည့်ချင်း ဖလှယ်လိုက်ကြပြီး... တုံ့ဆိုင်းခြင်းမရှိ အထက်ကောင်းကင်တားမြစ်နယ်မြေထဲသို့... ဝင်ရောက်လာကြလေသည်။
" ဂါး..... "
အထက်ကောင်းကင်တားမြစ်နယ်မြေ၏ အစွန်အဖျားတွင်... မူလရှေးဟောင်းတွင်းနက်မှ ခွဲထွက်ပြီး ကုချန်နောက်သို့ လိုက်ပါရန် ရွေးချယ်ခဲ့သော ရေနဂါးအိုကြီးသည်... ပျော်ရွှင်စွာဖြင့် ကိုယ်လက်ဆန့်တန်းနေသော်ငြား နောက်တစ်ခဏတွင်... အရှင်သခင် ၅ ပါး အတူတကွ ရောက်ရှိလာသည်ကို မြင်လိုက်ရလေသည်။
" ..... "
ဖီးနစ်ဧကရာဇ်ကို မြင်လိုက်ရသောအခါ ရေနဂါးအိုကြီး၏ မျက်လုံးများတွင် နေရခက်သော အရိပ်အယောင်တစ်ခု ချက်ချင်း ဖြတ်ပြေးသွား၏။
သူသည် မူလက မူလရှေးဟောင်းတွင်းနက်မှ ဖြစ်ပြီး... နောက်ပိုင်းတွင် မူလရှေးဟောင်းတွင်းနက်မှ ခွဲထွက်လာခဲ့ရာ... ယခုအခါ သူ၏ ယခင် 'ဆရာသမားဟောင်း' ကို ပြန်လည်တွေ့ဆုံရသောအခါ... မည်သို့ နေရခက်ခြင်း မရှိဘဲ နေနိုင်ပါမည်နည်း။
စောစောက... ဖီးနစ်ဧကရာဇ်နှင့် အခြားသူများ၏ အသံကို ကြားလိုက်ရကတည်းက... မျက်နှာပူစရာ အခြေအနေကို ရှောင်ရှားရန်... ပုန်းအောင်းနေဖို့ ရည်ရွယ်ခဲ့သည်။
သို့သော်... မထင်မှတ်ထားစွာပင် ကုချန်သည် ဤအရှင်သခင်များကို... အထက်ကောင်းကင်တားမြစ်နယ်မြေ၏ နက်ရှိုင်းရာသို့ လမ်းပြခေါ်ဆောင်သွားရန်... သူ့ကို တိုက်ရိုက် အမိန့်ပေးခဲ့သည်။
ရေနဂါးအိုကြီးသည် မတတ်သာသဖြင့်... ကုချန်၏အမိန့်ကို နာခံပြီး... လက်ရှိအခြေအနေသို့ ရောက်ရှိလာရခြင်း ဖြစ်သည်။
" ကျွန်တော့်အရှင်သခင်က ခင်ဗျားတို့ကို ခေါ်ဆောင်သွားဖို့ အမိန့်ပေးလိုက်ပါတယ် "
ရေနဂါးအိုကြီးသည် ကြီးမားသော ဦးခေါင်းကို ခါယမ်းလိုက်ပြီး ဟိန်းသံပါသော အသံဖြင့် ပြောဆိုလိုက်သည်။
တားမြစ်နယ်မြေတွင် နှစ်ပေါင်းများစွာ နေထိုင်ခဲ့သော အတွေ့အကြုံကြောင့်... ရေနဂါးအိုကြီးသည် ဤတားမြစ်နယ်မြေအရှင်သခင်များအပေါ်... သဘာဝအလျောက် ကြောက်ရွံ့ရိုသေစိတ် ရှိနေသည်။
ထို့ကြောင့်... သူသည် အလိုအလျောက်ပင် ခေါင်းငုံ့ပေးကာ... ဤအရှင်သခင်များကို သူ့အပေါ် စီးနင်းလိုက်ပါစေရန်... ခွင့်ပြုလုပ်လိုက်မိသည်။
သို့သော် သူ၏ဦးခေါင်း မငုံ့မီတွင်ပင်... ဖီးနစ်ဧကရာဇ်သည် လက်ကာပြကာ... အလျင်အမြန် တားဆီးလိုက်၏။
" အဲ့လိုလုပ်ဖို့ မလိုပါဘူး... ရေနဂါးညီနောင်က လမ်းပြပေးရုံနဲ့ လုံလောက်ပါတယ် "
ဖီးနစ်ဧကရာဇ်၏ စကားလုံးများသည် အလွန်ယဉ်ကျေးလှ၏။ သာမန်အချိန်များတွင်ဆိုလျှင်... ဧကရာဇ်တစ်ပိုင်းအဆင့် ရေနဂါးတစ်ကောင်အနေဖြင့်... သူ၏စီးနင်းခြင်းကို ခံရသည်မှာ ကံကောင်းခြင်းနှင့် ကုသိုလ်ကံထူးခြင်းပင် ဖြစ်သည်။
သို့သော် ဤနေရာသည် အထက်ကောင်းကင်တားမြစ်နယ်မြေ ဖြစ်နေ၏။
ဤရေနဂါးသည်လည်း သူတို့ကို ကြိုဆိုရန် ကောင်းကင်ဘုံအရှင်သခင်၏အမိန့်ကို ရရှိထားသူ ဖြစ်သည်။
အကယ်၍ သူတို့သာ ရေနဂါး၏ခေါင်းပေါ်သို့ တကယ် တက်စီးလိုက်လျှင် ကောင်းကင်ဘုံအရှင်သခင်ကို ဗြောင်ကျကျ မလေးမစား ပြုရာ မရောက်ပေဘူးလော။
တစ်ချိန်တည်းမှာပင် ဖီးနစ်ဧကရာဇ်သည် စိတ်ထဲ၌ သက်ပြင်းမချဘဲ မနေနိုင်တော့ပေ။
ဤရေနဂါးအိုကြီးသည် သခင်ကို မည်သို့ ရွေးချယ်ရမည်ကို တကယ်ပင် သိရှိပေသည်။ ယခင် မူလရှေးဟောင်းတွင်းနက်တွင် ရှိစဉ်က... ဤရေနဂါးအိုကြီးသည် မူလရှေးဟောင်းတွင်းနက်၏ နက်ရှိုင်းရာသို့ ဝင်ရောက်ရန် အရည်အချင်းပင် မရှိဘဲ... အပြင်ဘက်နယ်မြေများတွင်သာ လှည့်လည်သွားလာနိုင်ခဲ့သည်။
သို့သော်... ယခုအခါ ဤရေနဂါးအိုကြီးသည် ကောင်းကင်ဘုံအရှင်သခင်ကို မှီခိုအားထားလိုက်နိုင်ပြီဖြစ်ရာ... သူပင်လျှင် ရေနဂါးအိုကြီးအပေါ် အနည်းငယ်မျှ မလေးမစား မပြုရဲတော့ပေ။
ဉာဏ်ရည်ဉာဏ်သွေးနှင့် ပတ်သက်လျှင် ယခင်က သူတို့သည် ဤရေနဂါးအိုကြီးလောက် မတော်ခဲ့ကြပေ။
" ဗျာ "
ရေနဂါးအိုကြီးသည် အစပိုင်းတွင် လန့်သွားပြီး... ဖီးနစ်ဧကရာဇ်မှ သူ့အပေါ် အဘယ်ကြောင့် ဤမျှ ယဉ်ကျေးနေသနည်း... သူ့ကို 'ရေနဂါးညီနောင်' ဟုပင် နှိမ့်ချခေါ်ဝေါ်နေသနည်းဟူသည်ကို... နားမလည်နိုင် ဖြစ်နေရလေသည်။
သို့သော် ထို့နောက်တွင်... သူ တစ်စုံတစ်ခုကို နားလည်သဘောပေါက်သွားသကဲ့သို့ ဖြစ်သွားပြီး... ကြီးမားသော ဦးခေါင်းကို တဆက်ဆက် ညိတ်ကာ ပြောလိုက်သည်။
" ကောင်းပြီလေ "
ဖီးနစ်ဧကရာဇ်နှင့် တားမြစ်နယ်မြေအရှင်သခင် ၅ ဦးတို့... သူ့နောက်မှ ငြိမ်သက်စွာ လိုက်ပါလာသည်ကို ကြည့်ရင်း... ရေနဂါးအိုကြီးသည် စိတ်ထဲ၌ ကျေနပ်အားရနေမိသည်။
ဟုတ်ပါသည်... သူ မေ့လုနီးပါး ဖြစ်နေခဲ့သည်။
ယခုအခါ သူသည်... မူလရှေးဟောင်းတွင်းနက်မှ မည်သူမျှ သတိမထားမိသော ရေနဂါးအိုကြီး မဟုတ်တော့ဘဲ... အထက်ကောင်းကင်တားမြစ်နယ်မြေပိုင် ဖြစ်နေပြီ။ သူသည် ကောင်းကင်ဘုံအရှင်သခင်၏ 'နဂါး' ဖြစ်နေပြီ။
ကောင်းကင်ဘုံအပြင်ဘက်တွင် အရှင်သခင်တစ်ပါးသည် သူ့ကို တစ်ချက်ပင် ကြည့်ချင်မှ ကြည့်မည် ဖြစ်သည်။
သို့သော် ကောင်းကင်ဘုံအတွင်း၌မူ အရှင်သခင်တစ်ပါးပင်လျှင် သူ့ကို 'ရေနဂါးညီနောင်' ဟု ခေါ်ဝေါ်ရပေသည်။
အားကိုးစရာ နောက်ခံအင်အားကြီးမားသည် ဆိုသည်မှာ ဤကဲ့သို့ ခံစားရခြင်းလော။
တကယ်ပင် ခံစား၍ ကောင်းလွန်းလှပေသည်။
အခန်း (၂၃၆) - ကုချန်နှင့် တွေ့ဆုံခြင်း၊ အင်မော်တယ်ဖြစ်လာရန် ခက်ခဲခြင်းနှင့် ကျန်းထျန်း၏ လက်အောက်ခံပြုခြင်း
ရေနဂါးအိုကြီး၏လမ်းပြမှုဖြင့် မကြာမီတွင်ပင် ဖီးနစ်ဧကရာဇ်နှင့် အခြားသူများသည် အထက်ကောင်းကင်တားမြစ်နယ်မြေ၏ နက်ရှိုင်းရာသို့ ရောက်ရှိလာကြသည်။
ကုမိသားစုဝင်များအားလုံးသည် ဖီးနစ်ဧကရာဇ်နှင့် အခြားသူများကို ကြည့်ရင်း သူတို့၏မျက်လုံးများတွင် ခံစားချက်မျိုးစုံ ပေါ်လာလေ၏။
တစ်ချိန်က ဤတားမြစ်နယ်မြေအရှင်သခင်များသည် ကုမိသားစုဝင်များအတွက် လက်လှမ်းမမီနိုင်သော အရှင်သခင်များ ဖြစ်ခဲ့ကြသည်။
သို့သော်... ယခုအခါ သူတို့သည် အရှင်သခင်များ ဖြစ်နေလင့်ကစား... သူတို့၏စွမ်းအားချီကို ထိန်းချုပ်ထားကြကာ ကုမိသားစုထံသို့ ခေါင်းငုံ့၍... အလွန်ရိုသေလေးစားစွာ လာရောက်ဂါရဝပြုနေကြရသည်။ ဤမျှကြီးမားသော ကွာခြားချက်မှာ တကယ်ပင် စိတ်လှုပ်ရှားဖွယ် ကောင်းလှပေသည်။
ဤအပြောင်းအလဲအားလုံးကို ဖန်တီးခဲ့သူမှာ သူတို့၏ဘိုးဘေးပင် ဖြစ်သည်။
ခဏတာအတွင်း... ကုမိသားစုဝင်များအားလုံးသည်... အထက်ကောင်းကင်၏ အနက်ရှိုင်းဆုံးနေရာတွင် တည်ရှိနေသော ရှေးဟောင်းခန်းမဆောင်ကြီးဆီသို့... အလိုအလျောက် လှမ်းကြည့်လိုက်မိကြပြီး... သူတို့၏မျက်ဝန်းများတွင် ရိုသေလေးစားမှုများ ပြည့်နှက်နေကြ၏။
" အားလုံးပဲ ကြွပါ... ဘိုးဘေးက ခန်းမဆောင်ထဲမှာ စောင့်နေပါတယ် "
ကုတောက်လင်းသည် ရှေ့သို့ တက်လာပြီး... အရှင်သခင်များကို နှုတ်ဆက်ကာ... အထက်ကောင်းကင်ပင်မခန်းမဆောင်ရှေ့သို့ ခေါ်ဆောင်သွားပြီးနောက်... ရိုသေလေးစားစွာ သတင်းပို့လိုက်သည်။
" ဘိုးဘေး... ဧည့်သည်တွေကို ခေါ်ဆောင်လာပါပြီ "
" ဝင်ခဲ့ကြ "
အထက်ကောင်းကင်ပင်မခန်းမဆောင် အတွင်းမှ လျစ်လျူရှုသော အသံတစ်ခု ထွက်ပေါ်လာကာ ခန်းမဆောင်တံခါးများသည်လည တစ်ပြိုင်နက်တည်း ပွင့်သွား၏။
ဖီးနစ်ဧကရာဇ်နှင့် ရွှမ်အရှင်တို့သည် အကြည့်ချင်း ဖလှယ်လိုက်ကြပြီး ခြေလှမ်းလှမ်းကာ အထက်ကောင်းကင်ပင်မခန်းမဆောင် အတွင်းသို့ ဝင်ရောက်လိုက်ကြသည်။
အရှင်သခင်များ ပင်မခန်းမဆောင် အတွင်းသို့ ဝင်ရောက်လာသည်နှင့် တစ်ပြိုင်နက်... ပြိုင်ဘက်ကင်းသော ဝတ်ရုံဖြူကို ဝတ်ဆင်ထားပြီး လက်ကို နောက်ပစ်ကာ ရပ်နေသော ပုံရိပ်ကို... ချက်ချင်း မြင်တွေ့လိုက်ကြရသည်။
" ကောင်းကင်ဘုံအရှင်သခင်ကို ဂါရဝပြုပါတယ် "
ဖီးနစ်ဧကရာဇ်နှင့် အခြားသူများအားလုံးသည် ခေါင်းငုံ့ကာ ကုချန်ကို သဘာဝကျကျ နှုတ်ဆက်လိုက်ကြသည်။
ကုချန်သည် စကားမပြောဘဲ ဖီးနစ်ဧကရာဇ်နှင့် အခြားသူများကိုသာ ကြည့်နေလိုက်သည်။ သူ၏ နက်နဲသောအကြည့်သည်... ဖီးနစ်ဧကရာဇ်နှင့် အခြားသူများ၏ကျောပြင်တွင်... ဆူးများ စိုက်နေသကဲ့သို့ ခံစားရစေပြီး... သူတို့၏ နှလုံးသား အနက်ရှိုင်းဆုံး လျှို့ဝှက်ချက်များကိုပင်... ဖောက်ထွင်းမြင်နိုင်သကဲ့သို့ ဖြစ်စေသည်။
" ကောင်းကင်ဘုံအရှင်သခင်က... ကောင်းကင်ချောက်နက်ထဲမှာ မကောင်းဆိုးဝါးအင်မော်တယ်ကို သတ်ဖြတ်ပြီး... ကျွန်တော်တို့ရဲ့ အသက်တွေကို ကယ်တင်ပေးခဲ့ပါတယ်... ဒါကြောင့် ကျေးဇူးတင်ကြောင်း ပြောကြားဖို့... အထူးတလည် လာရောက်ခဲ့တာပါ "
ဖီးနစ်ဧကရာဇ်သည် အားတင်းလျက် ဦးစွာ ပြောဆိုလိုက်သည်။
တစ်ချိန်တည်းမှာပင်... သူသည် လက်ဖဝါးကို အနည်းငယ် မြှောက်လိုက်ကာ... ကုချန်ရှေ့တွင် သိုလှောင်လက်စွပ် ဒါဇင်ပေါင်းများစွာကို တင်ပြလိုက်ကာ... ရိုသေလေးစားစွာ ထပ်မံ ပြောဆိုလိုက်သည်။
" ဒီအထဲမှာ... မူလရှေးဟောင်းတွင်းနက်ကနေ ကျွန်တော် စုဆောင်းခဲ့တဲ့... မြင့်မြတ်ရတနာ အမျိုးမျိုးနဲ့ အရှင်သခင်အဆင့် လက်နက်တွေ ပါဝင်ပါတယ်... အခု ကျွန်တော်တို့ရဲ့ အသက်ကို ကယ်တင်ပေးခဲ့တဲ့အတွက်... ကျေးဇူးတင်တဲ့အနေနဲ့ ကောင်းကင်ဘုံအရှင်သခင်ကို ဆက်သလိုက်ပါတယ် "
" တားမြစ်နယ်မြေထဲမှာ... လက်စွပ်ထဲ ထည့်လို့မရတဲ့ အင်မော်တယ်မြင့်မြတ်ဆေးပင် အနည်းငယ်လဲ ကျန်ပါသေးတယ်... နောက်မှ လူလွှတ်ပြီး လာပို့ခိုင်းပါ့မယ် "
သက်မဲ့ပစ္စည်းများကိုသာ သိုလှောင်လက်စွပ်ထဲတွင် သိမ်းဆည်းနိုင်ပေသည်။
အသိဉာဏ် ရှိပြီးဖြစ်သော အင်မော်တယ်မြင့်မြတ်ဆေးပင်များကိုမူ လက်စွပ်အထဲတွင် ထည့်သွင်း၍ မရနိုင်ပေ။
ဖီးနစ်ဧကရာဇ်မှ ထိုစကားကို ပြောလိုက်သည်နှင့်... ရွှမ်အရှင်နှင့် အခြားသူများသည် "ဒီမြေခွေးအိုကြီး" ဟု... ချက်ချင်းပင် တိတ်တဆိတ် ကျိန်ဆဲလိုက်ကြသည်။
မူလက... ကောင်းကင်ဘုံအရှင်သခင်အား သူတို့၏ရည်ရွယ်ချက်ကို ရှင်းပြပြီးမှ... ဤတားမြစ်နယ်မြေရတနာများကို အသုံးပြုကာ... ကောင်းကင်ဘုံအရှင်သခင်၏ အကူအညီဖြင့် အင်မော်တယ်တက်လှမ်းနိုင်ရေးအတွက်... အပေးအယူလုပ်ရန် စဉ်းစားထားခဲ့ကြသည်။
သို့သော်... ဖီးနစ်ဧကရာဇ်သည် ရောက်သည်နှင့် မည်သည့် အပေးအယူမျှမပြောဘဲ... ဤမြင့်မြတ်ရတနာများ အားလုံးကို တိုက်ရိုက် ဆက်သလိုက်မည်ဟု... မည်သူက ထင်ထားပါမည်နည်း။
ထို့ကြောင့် အကယ်၍... သူတို့သာ ဤမြင့်မြတ်ရတနာများကို နောက်မှ ထုတ်ပေးမည်ဆိုလျှင်... ကောင်းကင်ဘုံအရှင်သခင်နှင့် အပေးအယူလုပ်ရန် ကြိုးစားနေသကဲ့သို့... ဖြစ်သွားပေလိမ့်မည်။
ရွှမ်အရှင်နှင့် အခြားသူများသည် မတတ်သာသဖြင့်... သူတို့ စုဆောင်းထားသော တားမြစ်နယ်မြေမြင့်မြတ်ရတနာများကို ချက်ချင်း ထုတ်ယူကာ... ဖီးနစ်ဧကရာဇ်နှင့်အတူ ဆက်သလိုက်ကြသည်။
" ကောင်းကင်ဘုံအရှင်သခင်အနေနဲ့ ကျွန်တော်တို့ရဲ့စေတနာကို လက်ခံပေးမယ်လို့ မျှော်လင့်ပါတယ် "
ရွှမ်အရှင်နှင့် အခြားသူများသည်လည်း... ရတနာများ ဆက်သရန်မှတစ်ပါး အခြားရွေးချယ်စရာ မရှိတော့သည်ကို မြင်သောအခါ... ဖီးနစ်ဧကရာဇ်သည် စိတ်ထဲ၌ လှောင်ပြုံးပြုံးလိုက်မိ၏။ ဤလူအများသည် ပူးပေါင်းကြံစည်ရန် မထိုက်တန်သော သူများသာ ဖြစ်သည်။
ကောင်းကင်ဘုံအရှင်သခင်ကို သစ္စာခံရန် ဆုံးဖြတ်ပြီးမှတော့ အကြီးမားဆုံးသော ရိုးသားမှုကို ပြသသင့်ပေသည်။ အရာရာကို ဖုံးကွယ်ထားခြင်းဖြင့် ဘာအကျိုးရှိမည်နည်း။ ကောင်းကင်ဘုံအရှင်သခင်နှင့် စည်းကမ်းချက်များ ညှိနှိုင်းချင်နေကြသေးသည်လား။
ထိုသို့ပြုလုပ်ခြင်းသည် တစ်ဖက်လူကို မနှစ်မြို့စေရုံသာဖြစ်စေပြီး မည်သည့်အကျိုးသက်ရောက်မှုမှ ရှိမည် မဟုတ်ပေ။
ဖီးနစ်ဧကရာဇ်နှင့် အခြားသူများ တားမြစ်နယ်မြေအသီးသီးမှ ရတနာများအားလုံးကို သူ၏ရှေ့တွင် ချထားသည်ကိုကြည့်ပြီးသည့်တိုင် ကုချန်၏အကြည့်သည် အနည်းငယ်မျှပင် တုန်လှုပ်ခြင်း မရှိပေ။
ဤအရာများသည် အဆုံးမဲ့ကမ္ဘာရှိ ဧကရာဇ်အဆင့် အပါအဝင်... မည်သည့် သက်ရှိကိုမဆို ရူးသွပ်သွားစေနိုင်သော စည်းစိမ်ဥစ္စာများ ဖြစ်ကောင်းဖြစ်နိုင်သော်လည်း... ကုချန်၏မျက်လုံးထဲတွင်မူ သာမန်မျှသာ ဖြစ်သည်။
" မင်းတို့ရဲ့ရည်ရွယ်ချက်ကို ပြော "
ကုချန်သည် တည်ငြိမ်စွာ မေးမြန်းလိုက်သည်။
ဤတားမြစ်နယ်မြေအရှင်သခင်များ လာရောက်ရခြင်း၏ ရည်ရွယ်ချက်သည် သူ့ကို ကျေးဇူးတင်ရုံ သက်သက် မဟုတ်ကြောင်း သူ သိရှိထားသည်။
ဤသည်ကို ဖီးနစ်ဧကရာဇ်နှင့် အခြားသူများမှ ကြီးမားသော တန်ဖိုးပေးဆပ်ပြီး ကြိုးစားပမ်းစား လုပ်ဆောင်နေပုံကို ကြည့်ခြင်းအားဖြင့် သိသာထင်ရှားလှသည်။
" အရှင်က တကယ်ပဲ ထိုးထွင်းသိမြင်တဲ့ ဉာဏ်မျက်စိ ရှိပါပေတယ် "
ဖီးနစ်ဧကရာဇ်သည် လက်နှစ်ဖက်ကို ဆုပ်ကိုင်လိုက်ကာ... ကုချန် တစ်စုံတစ်ရာကို ရိပ်စားမိနေပြီဖြစ်ကြောင်း သိလိုက်သဖြင့်... ထပ်မံဖုံးကွယ်မနေတော့ဘဲ အားလုံးကို ပွင့်ပွင့်လင်းလင်း ပြောပြလိုက်တော့၏။
" ကျွန်တော့် ဘဝတစ်လျှောက်လုံး ရှာဖွေခဲ့တာက အင်မော်တယ်တက်လှမ်းခြင်းပါပဲ "
" အခုမှပဲ ကျွန်တော် နားလည်လိုက်ပါပြီ... အင်မော်တယ်တက်လှမ်းခြင်းဆိုတာ လှည့်စားမှုတစ်ခုပါပဲ... အဲဒီ အင်မော်တယ်တံခါးပေါက်က ကျွန်တော် ဖွင့်နိုင်တဲ့အရာ မဟုတ်ပါဘူး... အင်မော်တယ်တက်လှမ်းခြင်းက အခု မျှော်လင့်ချက် မရှိတော့ပါဘူး "
" ဒါပေမယ့်... အရှင်ရဲ့ အောင်မြင်မှုတွေက နက်နဲလှပြီး စစ်မှန်တဲ့ အင်မော်တယ်တွေကိုတောင် သတ်ဖြတ်နိုင်စွမ်း ရှိပါတယ်... ဒီလို မြင့်မြတ်တဲ့ စွမ်းအားမျိုးကို ကျွန်တော် အရမ်းကို လေးစားအားကျမိပါတယ် "
" တကယ်လို့ ကောင်းကင်ဘုံအရှင်သခင်က ကျွန်တော့်ကို အထင်မသေးဘူးဆိုရင်... ကျွန်တော် အရှင့်ရဲ့ လက်အောက်ခံအဖြစ် အမှုထမ်းပြီး အမိန့်နာခံလိုပါတယ်... အနာဂတ်မှာ အင်မော်တယ်တက်လှမ်းဖို့ အခွင့်အရေး ရှိလာခဲ့ရင်... အရှင့်အနေနဲ့ လက်တွန့်မနေဘဲ ကူညီပေးဖို့လောက်ပဲ တောင်းဆိုချင်ပါတယ် "
အင်မော်တယ်တက်လှမ်းဖို့အတွက်လား.....
ဖီးနစ်ဧကရာဇ်၏ပြောပြချက်ကို နားထောင်ပြီးနောက် ကုချန်သည် အရာအားလုံးကို နားလည်သွား၏။
ဤတားမြစ်နယ်မြေအရှင်သခင်များသည် တစ်ချိန်က မာန်မာနကြီးသော ခေါင်းများကိုနှိမ့်ချကာ... အထက်ကောင်းကင်သို့ ရိုသေလေးစားစွာ လာရောက်ဂါရဝပြုကြခြင်းမှာ... အံ့သြစရာ မဟုတ်တော့ပေ။ ထိုသူတို့သည် အင်မော်တယ်တက်လှမ်းခြင်းမှာ လှည့်စားမှုတစ်ခု ဖြစ်ကြောင်း တွေ့ရှိသွားပြီး... သူသည် စစ်မှန်သော အင်မော်တယ်များကို သတ်ဖြတ်နိုင်သော စွမ်းအား ပိုင်ဆိုင်ထားသဖြင့်... စစ်မှန်သော အင်မော်တယ်အဆင့်သို့ ရောက်ရှိနိုင်မည့် နည်းလမ်း ရှိသည်ဟု ယုံကြည်ကာ... သစ္စာခံလိုကြခြင်း ဖြစ်သည်။
" ငါ မင်းတို့ကို အင်မော်တယ် ဖြစ်အောင် မကူညီနိုင်ဘူး "
ကုချန်သည် တည်ငြိမ်စွာ ပြန်လည် ဖြေကြားလိုက်၏။
သူ လိမ်ပြောခြင်း မဟုတ်ပေ။ အင်မော်တယ်တက်လှမ်းခြင်းကို အဆုံးမဲ့တာအိုများ သဟဇာတ ဖြစ်နေသော အင်မော်တယ်နယ်မြေတွင်သာ ရရှိနိုင်မည် ဖြစ်သည်။ အောက်ပိုင်းနယ်မြေရှိ အဆုံးမဲ့တာအို စွမ်းအားများသည် စစ်မှန်သော အင်မော်တယ်တာအိုအသီး ပေါ်ပေါက်လာစေရန် မလုံလောက်ပေ။
ကုချန် ကိုယ်တိုင်ပင် ဤကိစ္စနှင့် ပတ်သက်၍ စွမ်းဆောင်နိုင်ခြင်း မရှိရာ အခြားသူများကို ကူညီရန်မှာ ဝေးစွ။
သို့သော်... ကုချန်သည် အခြားသူများကို အင်မော်တယ်ဖြစ်အောင် မကူညီနိုင်သော်လည်း... သူ၏ကိုယ်ပိုင်စွမ်းအားသည် စစ်မှန်သော အင်မော်တယ်ထက် ကျော်လွန်နေသောကြောင့်... သာမန်ကမ္ဘာတွင် အင်မော်တယ်ဒြပ်စင်များကို စုစည်းပြီး... ထာဝရအသက်ရှင်သန်မှုကို ရရှိစေရန် ကူညီပေးနိုင်သည်။
သို့သော် ကုချန်သည် ဤအရှင်သခင်များကို ဤအကြောင်း ပြောပြရန် ရည်ရွယ်ချက် မရှိပေ။
အင်မော်တယ်ဖြစ်အောင် မကူညီနိုင်ဘူးလား.....
ကုချန်၏အဖြေစကားကို ကြားလိုက်ရသောအခါ... အရှင်သခင်များ၏ မျက်နှာတွင် စိတ်ပျက်အားငယ်မှု အရိပ်အယောင်များ... ပေါ်လာလေသည်။
ကောင်းကင်ဘုံအရှင်သခင်သည် ကတိတည်သောသူ ဖြစ်သည်။
သူ အင်မော်တယ်ဖြစ်အောင် မကူညီနိုင်ဘူးဟု ပြောမှတော့ ဒါဟာ အမှန်တရားပင် ဖြစ်ပြီး သူတို့ကို လိမ်ညာနေစရာ အကြောင်းမရှိပေ။
ကောင်းကင်ဘုံအရှင်သခင်က သူတို့ကို အင်မော်တယ်ဖြစ်အောင် မကူညီနိုင်မှတော့ သစ္စာခံစရာ လိုသေးသလား။
ခဏတာအတွင်း ရွှမ်အရှင်နှင့် အခြားသူများသည် သူတို့၏ဆုံးဖြတ်ချက်အပေါ် တုံ့ဆိုင်းသွားကြ၏။
" ဒါ့အပြင် ငါ့ကို သစ္စာခံမယ်ဆိုရင် မင်းတို့ရဲ့ ဝိညာဉ်တံဆိပ်တွေကို ပေးအပ်ရမယ် "
ကုချန်က လျစ်လျူရှုစွာ ထပ်မံပြောကြားလိုက်သည်။
အင်မော်တယ် မဖြစ်နိုင်ရုံသာမက... ဝိညာဉ်တံဆိပ်များကိုပါ ပေးအပ်ရမည်လော။ ဆိုလိုသည်မှာ... အနာဂတ်တွင် သူတို့သည် တစ်သက်လုံး ကျွန်ဖြစ်သွားမည် ဖြစ်ပြီး... သူတို့၏ အသက်နှင့် သေခြင်းသည် ကုချန်၏ သဘောဆန္ဒအပေါ်တွင်သာ... မူတည်တော့မည် မဟုတ်ပါလော။
ရွှမ်အရှင်၏မျက်လုံးများတွင် တုံ့ဆိုင်းမှုများ ပိုမိုများပြားလာလေသည်။
အရှင်သခင်များသည် တုံ့ဆိုင်းသွားကြကာ တိတ်ဆိတ်နေကြသည်ကို ကြည့်ရင်း... ကုချန် စိတ်ထဲ၌ လှောင်ပြုံးပြုံးလိုက်သည်။
ချီလျန်မျိုးနွယ်စု သူ့ကို သစ္စာခံလိုစဉ်က... သူတို့၏ စစ်မှန်သော အင်မော်တယ်အဆင့် မျိုးနွယ်စုခေါင်းဆောင်သည်ပင်... ဝိညာဉ်တံဆိပ်ကို နာခံမှုရှိစွာ ပေးအပ်ခဲ့သည်။ ယခုကဲ့သို့ အရှင်သခင် အနည်းငယ်မျှက... မည်သို့ ခြွင်းချက် ဖြစ်နိုင်ပါမည်နည်း။
ကုချန်သည် ဤစကားကို ပြောလိုက်ခြင်းမှာ... ဤအရှင်သခင်များ မည်မျှ ရိုးသားမှု ရှိသည်ကို... သိလို၍သာ ဖြစ်သည်။ အကယ်၍ သူတို့ မရိုးသားလျှင်... သူတို့ကို ပြန်လွှတ်လိုက်ရုံသာ ရှိသည်။
သို့သော် ကုချန် မထင်မှတ်ထားသည်မှာ... သူ စကားပြောပြီးသည်နှင့် ဖီးနစ်ဧကရာဇ်ပင် တုံ့ဆိုင်းနေဆဲအချိန်တွင်... သာမန်ရုပ်ရည်နှင့် ကြံ့ခိုင်သော ခန္ဓာကိုယ်ရှိသည့် အရှင်သခင်တစ်ပါးသည် ရှေ့သို့ ဦးစွာ ထွက်လာပြီး... သူ၏ ဝိညာဉ်တံဆိပ်ကို ရိုသေလေးစားစွာ ပေးအပ်လိုက်ခြင်းပင် ဖြစ်သည်။
" ကျွန်တော် ကျန်းထျန်း... ကောင်းကင်ဘုံအရှင်သခင်ကို သခင်အဖြစ် အမှုထမ်းပြီး... အမိန့်နာခံပါ့မယ် "