အခန်း (၂၄၁-၂၄၂)
Vol. 18 Ch. 241-242
အခန်း (၂၄၁) - လျှို့ဝှက်ဆန်းကြယ်သော သံလိုက်အိမ်မြှောင်၊ အဆုံးမဲ့ကမ္ဘာ၏ ပြင်ပနှင့် ရှောင်းယွဲ့ ပြန်လည်မွေးဖွားခြင်း
နဂါးပုံသဏ္ဍာန် အမှတ်အသားသည် တောက်ပနေပြီး ကုချန်၏လက်ဝါးပြင်ပေါ်တွင် စစ်မှန်သောနဂါးငယ်လေးတစ်ကောင် ခွေလျက်ရှိနေသကဲ့သို့ ရွှေရောင်အလင်းတန်းများ ထွက်ပေါ်နေသည်။
ကုချန်၏ နတ်ဘုရားအာရုံတစ်မျှင် ဝင်ရောက်သွားသည့်အခါ ထိုအမှတ်အသား၏ ပုံသဏ္ဍာန်သည် ချက်ချင်းပင် ပြောင်းလဲသွားခဲ့သည်။
စူးရှသော အလင်းတန်းများ ဖြာထွက်လာပြီး နဂါးဟိန်းသံများသည် ကောင်းကင်ယံအထိ တုန်ခါသွားစေသည်။
မျက်တောင်တစ်ခတ်အတွင်း ထိုတောက်ပသော နဂါးပုံသဏ္ဍာန်အလင်းတန်းသည် အနည်းငယ်ဟောင်းနွမ်းနေသည့် လက်ဖဝါးအရွယ်အစားရှိ စက်ဝိုင်းပြားတစ်ခုအဖြစ် ပြောင်းလဲကာ ကုချန်၏လက်ဝါးပေါ်၌ ငြိမ်သက်စွာ တည်ရှိနေလေသည်။
" ဒါက..... "
ကုချန်သည် သူ၏လက်ဖဝါးထဲမှ စက်ဝိုင်းပြားကို ကြည့်လိုက်သည်။
ထိုအရာသည် လက်ဖဝါးအရွယ်အစားသာရှိပြီး မျက်နှာပြင်ပေါ်တွင် အဆုံးမဲ့တာအို အက္ခရာသင်္ကေတများ ထူထပ်စွာ ရေးထိုးထားကာ နဂါးပုံသဏ္ဍာန်လက်တံတစ်ခုက လည်ပတ်နေသည်။
ဤအရာသည် သံလိုက်အိမ်မြှောင်တစ်ခုနှင့် တူနေသည်လော။
ကုချန်သည် အနည်းငယ် အံ့အားသင့်သွား၏။
လူသားဧကရာဇ်က သူ့အတွက် ချန်ထားခဲ့မည့်လက်ဆောင်မှာ ဤကဲ့သို့ပစ္စည်းမျိုးဖြစ်နေလိမ့်မည်ဟု သူ မမျှော်လင့်ထားခဲ့မိပေ။
" သံလိုက်အိမ်မြှောင်..... "
ကုချန်သည် တွေးတောလိုက်သည်။
ဤလက်ဖဝါးအရွယ်အစားရှိ... သံလိုက်အိမ်မြှောင်သည် အနည်းငယ်ဟောင်းနွမ်းနေပုံရပြီး... ရှည်လျားလှသော နှစ်ကာလများစွာကတည်းက တည်ရှိခဲ့သည့်ပုံ ပေါက်နေသည်။
သံလိုက်အိမ်မြှောင်ပေါ်ရှိ နဂါးပုံသဏ္ဍာန်လက်တံသည်... ဦးတည်ချက်မငြိမ်မသက် လှုပ်ရှားနေပြီး တစ်ခါတစ်ရံတွင်... လုံးဝကွဲပြားခြားနားသော အရပ်မျက်နှာများကို... ညွှန်ပြနေတတ်သည်။
လူသားဧကရာဇ်က တစ်စုံတစ်ရာကို အရိပ်အမြွက်ပြလို၍ ဤသံလိုက်အိမ်မြှောင်ကို ချန်ထားခဲ့ခြင်းလော။
သို့မဟုတ် လူသားဧကရာဇ် သူ့ကို အမှန်တကယ် ပေးလိုသည့်အရာမှာ သံလိုက်အိမ်မြှောင် ညွှန်ပြနေသည့် နေရာတွင် ရှိနေခြင်းလော။
ကုချန် မျက်မှောင်အနည်းငယ် ကြုတ်လိုက်မိသည်။
သို့သော်... အကယ်၍ သံလိုက်အိမ်မြှောင်ညွှန်ပြသည့်နေရာသည်... လူသားဧကရာဇ် အမှန်တကယ် ချန်ထားလိုသည့်အရာ ရှိသောနေရာဖြစ်ပါက... အဘယ်ကြောင့် သံလိုက်အိမ်မြှောင်၏ တည်နေရာပြခြင်းသည်... အဆက်မပြတ် ပြောင်းလဲနေရသနည်း။
ကုချန်၏ လေ့လာချက်အရ... အသက်ရှူထုတ်သုံးချိန် အတွင်းမှာပင်... နဂါးပုံသဏ္ဍာန်လက်တံ ညွှန်ပြသည့် တည်နေရာများသည်... အကြိမ်ပေါင်းများစွာ ပြောင်းလဲနေခဲ့သည်။
သေချာသည်မှာ... သံလိုက်အိမ်မြှောင် ပျက်နေခြင်း ဖြစ်နိုင်သလို... ၎င်းညွှန်ပြနေသည့်အရာမှာ ပုံသေနေရာတစ်ခုမဟုတ်ဘဲ... သက်ရှိသတ္တဝါတစ်မျိုးမျိုး ဖြစ်နေခြင်းလည်း ဖြစ်နိုင်သည်။
" ကြည့်ရအောင် "
ကုချန်သည် သံလိုက်အိမ်မြှောင်ကို ကောက်ယူလိုက်ပြီး... ခြေလှမ်းအသာလှမ်းကာ ညွှန်ပြရာ... အရပ်မျက်နှာအတိုင်း စတင်ရှာဖွေလိုက်သည်။
သူ၏လက်ရှိစွမ်းအားဖြင့် အဆုံးမဲ့ကမ္ဘာ အတွင်းရှိ မည်သည့်နေရာကိုမဆို... မျက်တောင်တစ်ခတ်အတွင်း ရောက်ရှိနိုင်သည့်အတွက်... တည်နေရာများ မြန်မြန်ဆန်ဆန် ပြောင်းလဲနေလျှင်ပင်... တည်နေရာအတိအကျကို ရှာဖွေရန် ကုချန်အတွက် မခက်ခဲပေ။
သို့သော်... အသက်ရှူသွင်းထုတ်ချိန်အနည်းငယ် ကြာပြီးနောက်... အထက်ကောင်းကင်ဘုံ ခန်းမဆောင်ကြီးထဲ၌ ကုချန်၏ပုံရိပ် ပြန်လည်ပေါ်လာသည့်အခါ... သူ၏မျက်လုံးများတွင် အံ့သြမှုများ ပြည့်နှက်နေသည်။
အကြောင်းမှာ... ကုချန်၏ စူးစမ်းရှာဖွေမှုအရ သံလိုက်အိမ်မြှောင် ညွှန်ပြနေသည့်အရာမှာ... အဆုံးမဲ့ကမ္ဘာအတွင်း၌ ရှိမနေကြောင်း... အံ့သြဖွယ် တွေ့ရှိလိုက်ရသောကြောင့်ဖြစ်သည်။
ကုချန်သည် အဆုံးမဲ့ကမ္ဘာအတွင်း မည်သည့်နေရာ၌ပင် ရှာဖွေစေကာမူ... ထူးဆန်းသော သံလိုက်အိမ်မြှောင်၏ လက်တံသည်... ပြင်ပကမ္ဘာရှိ ဟွမ်သွမ့်ပင်လယ်ဆီသို့သာ... တစ်ညီတစ်ညွတ်တည်း ညွှန်ပြနေခဲ့သည်။
သံလိုက်အိမ်မြှောင် လမ်းညွှန်ပြသနေသော အရာဝတ္ထုသည် အဆုံးမဲ့ကမ္ဘာထဲတွင်မရှိဘဲ ဟွမ်သွမ့်ပင်လယ်ထဲတွင် ရှိနေခြင်းဖြစ်သည်။
တခဏအတွင်းမှာပင်... ကုချန်သည် လူသားဧကရာဇ် ချန်ထားခဲ့သော ဤထူးဆန်းသည့် သံလိုက်အိမ်မြှောင်အပေါ်... ပို၍ပင် စိတ်ဝင်စားလာခဲ့သည်။
ဟွမ်သွမ့်ပင်လယ်ရှိရာ... အရပ်မျက်နှာသို့ လေးနက်စွာ လှမ်းကြည့်ပြီးနောက်... ကုချန်သည် သံလိုက်အိမ်မြှောင်ကို ယာယီ သိမ်းဆည်းလိုက်လေ၏။
ဟွမ်သွမ့်ပင်လယ်သို့ သွားရောက်ရန် အချိန်မတန်သေးပေ။
အကန့်အသတ်မဲ့ဓားကို အပြည့်အဝ သန့်စင်ပြီးစီးခြင်း မရှိသေးသလို... 'ချီတစ်ပါးမှ သန့်စင်ခြင်းသုံးပါး ခွဲထွက်ခြင်း' ကိုအသုံးပြု၍... ဒုတိယကိုယ်ခန္ဓာကို ဦးစွာ ဖွဲ့စည်းရပေဦးမည်။ ထို့နောက်မှသာ... ဟွမ်သွမ့်ပင်လယ်ထဲသို့ ဝင်ရောက်ကာ... 'သက်တမ်းရှည်နန်းတော်' ကို ဖျက်ဆီးပြီး သံလိုက်အိမ်မြှောင်၏ လျှို့ဝှက်ချက်ကို စူးစမ်းရန်... အချိန်ကျရောက်မည် ဖြစ်သည်။
ကုချန်သည်... ရွှယ်ကျန်း နှင့် မင်ကူအင်မော်တယ် တို့ကို ဆက်တိုက် သတ်ဖြတ်ခဲ့ပြီး... 'သက်တမ်းရှည်နန်းတော်' နှင့် 'အင်မော်တယ်တစ်သောင်းမျှော်စင်' တို့၏ အစီအစဉ်ကောင်းများကို... ဖျက်ဆီးခဲ့ပြီးဖြစ်သည်။
အမှောင်ထဲတွင် ပုန်းအောင်းနေကြသော ထိုလူများသည် ရုတ်တရက် တိတ်တဆိတ် တိုက်ခိုက်လာနိုင်သေးသည် မဟုတ်ပါလော။
အကယ်၍... ကုချန်သာ အဆုံးမဲ့ကမ္ဘာထဲတွင် ရှိနေပါက... ဖြေရှင်းနိုင်မည်ဖြစ်သည်။
သို့သော်... ကုချန်သာ အဆုံးမဲ့ကမ္ဘာမှ ထွက်ခွာသွားပါက... အထက်ကောင်းကင်ဘုံ နှင့် ကုမိသားစု၏ လုံခြုံရေးကို... အာမခံနိုင်မည် မဟုတ်ပေ။
အထက်ကောင်းကင်ဘုံ တားမြစ်နယ်မြေအပြင်ဘက်ရှိ... မဟာအစီအရင်သည် ဧကရာဇ်အဆင့်အတန်းဝင် အထွတ်အထိပ် အစီအရင်ဖြစ်သော်လည်း... လက်ရှိတွင် ကုချန်နှင့် ရန်ဘက်ပြုနေသော ရန်သူများထဲ၌... စစ်မှန်သော အင်မော်တယ်နှင့် အင်မော်တယ်အရှင်သခင်အဆင့် ရှိသူများပင်... ပါဝင်နေနိုင်သည်။
ထိုကဲ့သို့သော ရန်သူများနှင့် ရင်ဆိုင်ရသည့်အခါ... လက်ရှိ 'ကပ်ဘေးတစ်သောင်း သတ်ဖြတ်ခြင်းအစီအရင်' ၏ စွမ်းအားမှာ... လုံလောက်မှုမရှိ ဖြစ်လာနိုင်သည်။
ကုချန်အနေဖြင့်... ဟွမ်သွမ့်ပင်လယ်ထဲသို့ မဆင်မခြင် ဝင်ရောက်သွားပြီးမှ... မိမိ၏ အခြေစိုက်စခန်း ဖျက်ဆီးခံလိုက်ရလျှင်... ထိုရလဒ်သည် သူ မလိုလားအပ်ဆုံး အရာပင် ဖြစ်သည်။
ထို့ကြောင့်... အသင့်လျော်ဆုံးနည်းလမ်းမှာ 'ချီတစ်ပါးမှ သန့်စင်ခြင်းသုံးပါး ခွဲထွက်ခြင်း' ကို အသုံးပြု၍... ဒုတိယကိုယ်ခန္ဓာကို ဦးစွာဖွဲ့စည်းပြီး ကိုယ်ခန္ဓာတစ်ခုက အထက်ကောင်းကင်ဘုံကို စောင့်ကြပ်ကာ... ကျန်တစ်ခုက ဟွမ်သွမ့် ကိုစူးစမ်းလေ့လာခြင်းသည်သာ... စိတ်အချရဆုံး ဖြစ်ပေလိမ့်မည်။
" ဒီလိုဆိုမှတော့ အခုပဲ ဒုတိယကိုယ်ခန္ဓာကို စတင်ဖွဲ့စည်းတော့မယ် "
ကုချန်သည် ခြေချိတ်ထိုင်လိုက်ပြီး... မျက်လုံးများကို အနည်းငယ်မှိတ်ကာ... 'ချီတစ်ပါးမှ သန့်စင်ခြင်းသုံးပါး ခွဲထွက်ခြင်း' နည်းလမ်းအတိုင်း... ဒုတိယကိုယ်ခန္ဓာကို စတင်ဖွဲ့စည်းလေတော့သည်။
'ချီတစ်ပါးမှ သန့်စင်ခြင်းသုံးပါး ခွဲထွက်ခြင်း' ဆိုသည်မှာ... အမည်နှင့်လိုက်ဖက်စွာပင် မူလခန္ဓာကိုယ်အပါအဝင် ခန္ဓာကိုယ်သုံးခုကို... တပြိုင်နက်တည်း ပိုင်ဆိုင်နိုင်စေခြင်း ဖြစ်သည်။
ခန္ဓာကိုယ်သုံးခုသည် သန့်စင်ခြင်းသုံးပါး ဖြစ်ပြီး... ယခု ကုချန် ဖွဲ့စည်းမည့်အရာမှာ... ဒုတိယမြောက် ကိုယ်ခန္ဓာဖြစ်သည်။
...
" နောက်ဆုံးတော့... နောက်ဆုံးတော့..... "
အထက်ကောင်းကင်ဘုံ တားမြစ်နယ်မြေ၏ နက်ရှိုင်းသောနေရာရှိ... ကုချင်းရွဲ့၏ ကျင့်ကြံရာဂူအတွင်း၌... လရောင်ကဲ့သို့ အဖြူရောင် နန်းတော်ဝတ်စုံကို ဝတ်ဆင်ထားသော... ပုံရိပ်တစ်ခု ရှိနေသည်။ အေးစက်တည်ငြိမ်သော မျက်နှာသွင်ပြင်နှင့်... နှင်းကဲ့သို့ ဖြူဖွေးသော အသားအရေရှိသည့် ထိုအမျိုးသမီးသည်... သူ၏လက်များကို ကြည့်ရှုရင်း... လှပကြည်လင်သော မျက်ဝန်းများထဲတွင်... အတိုင်းအဆမဲ့ စိတ်လှုပ်ရှားမှုများ ပြည့်နှက်နေသည်။
" ဂုဏ်ယူပါတယ် ဆရာသခင် "
ကုချင်းရွဲ့သည်... သူ၏ရှေ့တွင် ရပ်နေသော နတ်သမီးတစ်ပါးကဲ့သို့ ထူးခြားသည့် အမျိုးသမီးကို ကြည့်ကာ... နှလုံးသားထဲမှ လှိုက်လှိုက်လှဲလှဲ ဂုဏ်ပြုစကား ဆိုလိုက်သည်။
သူ၏ရှေ့မှ အမျိုးသမီးမှာ... မူလအစအင်မော်တယ်ရွှံ့၏ အကူအညီဖြင့်... ရုပ်ခန္ဓာကို ပြန်လည်ဖွဲ့စည်းနိုင်ခဲ့သည့်... ကောင်းကင်နတ်သမီး ရှောင်းယွဲ့ ပင်ဖြစ်သည်။
သူ၏ဆရာသခင်သည် ရုပ်ခန္ဓာကို... အောင်မြင်စွာ ပြန်လည်ဖွဲ့စည်းနိုင်သည်ကို မြင်လိုက်ရသောအခါ... ကုချင်းရွဲ့မှာ စိတ်လှုပ်ရှားမှုကို မထိန်းနိုင် ဖြစ်ရသည်။
သူသည် သိုလှောင်လက်စွပ်ကို ရရှိပြီးနောက်... ကောင်းကင်နတ်သမီး ရှောင်းယွဲ့နှင့် သဘောတူညီမှု... ရယူခဲ့ကြသည်။ ကောင်းကင်နတ်သမီး ရှောင်းယွဲ့က... သူ့ကို တပည့်အဖြစ်လက်ခံပြီး... ကျင့်ကြံခြင်းလမ်းစဉ်ကို လမ်းညွှန်ပေးရမည်။
ကုချင်းရွဲ့ကမူ... အနာဂတ်တွင် ကောင်းကင်နတ်သမီး ရှောင်းယွဲ့၏ ခန္ဓာကိုယ်ကို ပြန်လည်ဖွဲ့စည်းပေးနိုင်မည့်... မြင့်မြတ်သော ရတနာများကို ရှာဖွေပေးရန် တာဝန်ယူရမည်ဖြစ်သည်။
ထိုအချိန်က... ကုချင်းရွဲ့သည် ချက်ချင်း သဘောတူခဲ့သော်လည်း... ဤကိစ္စကို ပြီးမြောက်အောင်မြင်ရန် မည်မျှခက်ခဲမည်ကို... ရှင်းလင်းစွာ သိရှိထားခဲ့သည်။
ယခုမူ... တစ်နှစ်၊ နှစ်နှစ်မပြည့်ခင်မှာပင် ဆရာသခင်သည် သူ၏ရုပ်ခန္ဓာကို... အောင်မြင်စွာ ပြန်လည်ဖွဲ့စည်းနိုင်ခဲ့ပြီ ဖြစ်ရာ... ဤသည်မှာ အိပ်မက်တစ်ခုကဲ့သို့ပင် ဖြစ်နေသည်။
ဤအရာအားလုံးသည် ဘိုးဘေး ရှိနေခြင်းကြောင့်သာ ဖြစ်ကြောင်း ကုချင်းရွဲ့ သိရှိသည်။
အကယ်၍ ဘိုးဘေးသာ မရှိခဲ့လျှင်... ဆရာသခင်အနေဖြင့် ရုပ်ခန္ဓာပြန်လည်ဖွဲ့စည်းနိုင်ရန် မည်သည့်အချိန်ထိ စောင့်ဆိုင်းရမည်ကို... သိနိုင်မည် မဟုတ်ပေ။
" ရုပ်ခန္ဓာကို ပြန်လည်ဖွဲ့စည်းနိုင်လိုက်တော့မှပဲ... ဒီအဆုံးမဲ့ကမ္ဘာကြီးမှာ ငါ့အတွက် ရပ်တည်စရာနေရာတစ်ခု... အမှန်တကယ် ရှိလာတော့တယ် "
ကောင်းကင်နတ်သမီး ရှောင်းယွဲ့သည် တိုးညှင်းစွာ သက်ပြင်းချလိုက်၏။
" ဆရာသခင်... ဆရာသခင်ရဲ့ လက်ရှိအဆင့်က ဘာလဲဟင်... စစ်မှန်တဲ့ အင်မော်တယ် အဆင့်လား "
ကုချင်းရွဲ့က စူးစမ်းလိုစိတ်ဖြင့် မေးမြန်းလိုက်သည်။
" ဘယ်လိုလုပ် ဖြစ်နိုင်မှာလဲ "
ကောင်းကင်နတ်သမီး ရှောင်းယွဲ့သည် တခစ်ခစ်ရယ်မောကာ ခေါင်းခါလိုက်သည်။
" ဟိုးအရင်တုန်းက... ဆရာသခင် အထွတ်အထိပ်ရောက်နေချိန်မှာတောင်... စစ်မှန်တဲ့ အင်မော်တယ် ကျင့်ကြံခြင်းအဆင့်ပဲ ရှိခဲ့တာ... အခုမှ လက်ကျန်ဝိညာဉ်တစ်ခုနဲ့ ရုပ်ခန္ဓာကို ပြန်လည်ဖွဲ့စည်းထားရုံ ရှိသေးတယ်... လက်ရှိ ကျင့်ကြံခြင်းအဆင့်က မင်းတို့ရဲ့ အဆုံးမဲ့ကမ္ဘာ စကားနဲ့ပြောရရင်... ဧကရာဇ်အဆင့်လောက်ပဲ ရှိသေးတယ် "
ကောင်းကင်နတ်သမီး ရှောင်းယွဲ့ ရည်ညွှန်းသော ဧကရာဇ်အဆင့် ဆိုသည်မှာ... အဆုံးမဲ့ကမ္ဘာ၏ တုယောင်ဧကရာဇ် အဆင့်... ဆိုလိုသည်မှာ အရှင်သခင်အဆင့် ကျင့်ကြံခြင်းမျိုးသာ ဖြစ်ပြီး... ကုချန်ကဲ့သို့ စစ်မှန်သော ဧကရာဇ်အဆင့် မဟုတ်ပေ။
" အဆုံးမဲ့ကမ္ဘာရဲ့ ဧကရာဇ်အဆင့်..... "
ကုချင်းရွဲ့သည် မသိစိတ်ဖြင့် လျှာကို ထုတ်လိုက်မိသည်။
ကောင်းကင်နတ်သမီး ရှောင်းယွဲ့က ဂရုမစိုက်သကဲ့သို့ ပေါ့ပေါ့ပါးပါး ပြောဆိုလိုက်သော်လည်း... ဘိုးဘေး၏ ရှေ့မှောက်တွင် မည်သည့် ဧကရာဇ်အဆင့်မဆို လက်ဖဝါးတစ်ချက် သို့မဟုတ် ဓားတစ်ချက်သာ ခံနိုင်မည် ဖြစ်သော်လည်း... အဆုံးမဲ့ကမ္ဘာတစ်ခုလုံးကို ခြုံငုံကြည့်ပါက ထိုကဲ့သို့သော တည်ရှိမှုများသည်... ရှေးခေတ်ကာလကတည်းက အထွတ်အထိပ်တွင် အမှန်တကယ် ရပ်တည်နိုင်ခဲ့သော သူများအဖြစ် သတ်မှတ်ခံရကြောင်း... ကုချင်းရွဲ့ သိထားသည်။
" ငါ့ရဲ့ ရုပ်ခန္ဓာကို... ပြန်လည်ဖွဲ့စည်းရာမှာ ကူညီပေးခဲ့တဲ့ ကျေးဇူးတရားအတွက်... ကျေးဇူးတင်စကားဆိုဖို့ ကုကောင်းကင်ဧကရာဇ်ကို... သွားရှာလိုက်ဦးမယ် "
ကုချင်းရွဲ့နှင့် စကားအနည်းငယ် ထပ်ပြောပြီးနောက်... ကောင်းကင်နတ်သမီး ရှောင်းယွဲ့သည် ကုချန်ကို ရှာဖွေကာ... ကျေးဇူးတင်စကားဆိုရန် ပြင်ဆင်လိုက်သည်။
အခန်း (၂၄၂) - ရှောင်းယွဲ့ ကုမိသားစုနှင့် နှောင်ဖွဲ့ရန် ဆုံးဖြတ်ခြင်း၊ ထျန်းကျွင်းတို့၏ ပူးပေါင်းကြံစည်မှု
ကောင်းကင်နတ်သမီး ရှောင်းယွဲ့သည် သူ၏ရုပ်ခန္ဓာကို ပြန်လည်ပုံဖော်ပြီးနောက်... ကုချန်အား ကျေးဇူးတင်စကားဆိုရန် ရည်ရွယ်ခဲ့သော်လည်း... ကုချန်မှာ ဒုတိယကိုယ်ပွားကို သန့်စင်ရန် တံခါးပိတ်ကျင့်ကြံနေသဖြင့်... မတွေ့လိုက်ရပေ။
သို့သော်... သူသည် ကုချန်ထံ သစ္စာခံထားသည့် ဖီးနစ်ဧကရာဇ်နှင့် ရှေးဟောင်းဧကရာဇ် ကျန်းထျန်းတို့ကို တွေ့မြင်ခဲ့ရပြီး... ကုတောက်လင်းထံမှ ထိုအရှင်သခင်နှစ်ပါး၏ လက်ရှိအခြေအနေကို သိရှိခဲ့ရသည်။
ကုကောင်းကင်ဧကရာဇ်က သူတို့ကို ကုမိသားစုမျိုးဆက်သစ်လူငယ်များအား သင်ကြားပေးရန် အမိန့်ပေးခဲ့သည်တဲ့လော။
ဖီးနစ်ဧကရာဇ်နှင့် ရှေးဟောင်းဧကရာဇ် ကျန်းထျန်းတို့ကို ကြည့်ရင်း ရှောင်းယွဲ့၏ စိတ်ထဲတွင် ဖော်မပြနိုင်သော အရေးတကြီးလိုအပ်မှုမျိုး ခံစားလိုက်ရသည်။
ပထမက... နတ်ဆိုးနယ်မြေမှ ချီလျန်မျိုးနွယ်ဖြစ်ပြီး... ယခု အဆုံးမဲ့ကမ္ဘာမှ တားမြစ်နယ်မြေအရှင်သခင်များကပါ... ဤကုမိသားစုဘိုးဘေးထံ သစ္စာခံလာကြပြီ ဖြစ်သည်။
အကယ်၍... သူ့အနေဖြင့် ပိုမိုကြီးမားသော 'အသုံးဝင်မှု' ကို အမြန်ဆုံး မပြသနိုင်ပါက... ကုမိသားစုတွင် သို့မဟုတ် ကုချန်၏ အမြင်တွင်... သူ၏ 'အရေးပါမှု'မှာ လျင်မြန်စွာ ပျောက်ဆုံးသွားမည်ကို... စိုးရိမ်မိသည်။
ကောင်းကင်နတ်သမီး ရှောင်းယွဲ့သည် အနည်းငယ် စိတ်လှုပ်ရှားသွား၏။
ယခင်က... သူသည် ကုချင်းရွဲ့၏ ဆရာဖြစ်ခြင်း၊ ရုပ်ခန္ဓာပြန်လည်ရရှိပြီးနောက် စစ်မှန်သော အင်မော်တယ်အဆင့် သို့ ပြန်လည်ရောက်ရှိနိုင်ခြင်းတို့ကြောင့်... ကုချန်၏ အင်အားစုများကြားတွင် အရေးပါသော နေရာတစ်ခု မရနိုင်လျှင်တောင်... မရှိမဖြစ် လိုအပ်သူတစ်ဦး ဖြစ်နေလိမ့်မည်ဟု ထင်မှတ်ခဲ့သည်။
သို့သော်... ယခုအခါ ချီလျန်မျိုးနွယ်နှင့် အဆုံးမဲ့ကမ္ဘာမှ အရှင်သခင်များ ဆက်တိုက် သစ္စာခံလာမှုကို မြင်တွေ့ရသောအခါ... သူ၏ယခင်အတွေးများမှာ အလွန်နုံအလွန်းကြောင်း ရှောင်းယွဲ့ သဘောပေါက်လိုက်သည်။
ဤကုမိသားစုဘိုးဘေး ပိုမိုသန်မာလာသည်နှင့်အမျှ... အနာဂတ်တွင် အင်အားကြီးသူများစွာ... လာရောက်သစ္စာခံကြပေလိမ့်မည်။ ယခုပင်... စစ်မှန်သော အင်မော်တယ်အဆင့်များ လာရောက်သစ္စာခံနေကြပြီဆိုလျှင်... အနာဂတ်တွင် အင်မော်တယ်အရှင်သခင်အဆင့်များပါ... လာရောက်သစ္စာခံလာကြမည် မဟုတ်ပါလော။
ထိုအခါ... သူဂုဏ်ယူခဲ့သော စစ်မှန်သော အင်မော်တယ်တိုက်ခိုက်ရေးစွမ်းရည်သည်... ကုချန်၏မျက်လုံးထဲတွင် အသုံးမဝင် ဖြစ်သွားပေလိမ့်မည်။
ထို့ကြောင့်... နောက်ကောက်မကျကျန်ရစ်စေရန်နှင့် ကုမိသားစု၏ သင်္ဘောကြီးပေါ်တွင် ရေရှည်လိုက်ပါနိုင်ရန်... အပြောင်းအလဲအချို့ ပြုလုပ်ရပေမည်။ အနည်းဆုံးတော့ ကုမိသားစုတွင် သူ၏ 'အရေးပါမှု' ကို မြှင့်တင်ရပေမည်။
ဤသို့ တွေးတောပြီးနောက်... ရှောင်းယွဲ့သည် ချက်ချင်းပင် ကုဝူရှန့်အား သွားရောက်တွေ့ဆုံကာ... ဖီးနစ်ဧကရာဇ်တို့ကဲ့သို့ပင် သူလည်း ကုမိသားစုမျိုးဆက်သစ်များကို... အခမဲ့ သင်ကြားပေးနိုင်ကြောင်း ပြောဆိုလိုက်သည်။
" အရှင်မက ကျွန်တော့်ကုမိသားစု မျိုးဆက်သစ်တွေကို အခမဲ့ သင်ကြားပေးမယ်လို့ ဆိုလိုတာလား "
ရှောင်းယွဲ့၏ ရည်ရွယ်ချက်ကို နားလည်လိုက်သော ကုဝူရှန့်က အနည်းငယ် အံ့အားသင့်စွာ မေးမြန်းလိုက်သည်။
" ဟုတ်ပါတယ် "
ရှောင်းယွဲ့သည် ခေါင်းညိတ်လိုက်ကာ.....
" ကျွန်မက ကုကောင်းကင်ဧကရာဇ်ရဲ့ ကျေးဇူးကြောင့်... ရုပ်ခန္ဓာပြန်လည်ပုံဖော်နိုင်မယ့် ရတနာကို ရရှိခဲ့ပြီး... အခု ဘဝသစ်တစ်ခု ရရှိထားတာပါ... ဒါကြောင့် ကျေးဇူးပြန်ဆပ်တာက သဘာဝကျပါတယ် "
" အခု ကျွန်မရဲ့ရုပ်ခန္ဓာလဲ ပြန်ရပြီဆိုတော့... အင်အားကို ဖြည်းဖြည်းချင်း ပြန်မြှင့်တင်ဖို့ပဲ လိုတော့တာ... ချင်းရွဲ့လေးကို သင်ပေးတာကလွဲရင် တခြားလုပ်စရာလဲ မရှိပါဘူး... ဒါကြောင့် ကုမိသားစု တပည့်တွေအနေနဲ့ ကျင့်ကြံခြင်းမှာ သံသယတွေ အခက်အခဲတွေရှိရင်... အချိန်သတ်မှတ်ပြီး လာမေးလို့ရပါတယ်... ကျွန်မ ဖြေကြားပေးပါ့မယ် "
" ဒါဆိုရင်တော့ အရမ်းကောင်းတာပေါ့ဗျာ... ကောင်းကင်နတ်သမီး ရှောင်းယွဲ့ရဲ့ လမ်းညွှန်မှုကို ရမယ်ဆိုရင်... ကျွန်တော့်ကုမိသားစု တပည့်တွေ တကယ် ကံကောင်းကြတာပါပဲ "
ကုဝူရှန့်က ရိုးသားစွာ ပြောလိုက်သည်။
" ဒါပေမဲ့... ဒီကိစ္စကို ဘိုးဘေး တံခါးပိတ်ကျင့်ကြံရာကနေ ထွက်လာရင်တော့... ကျွန်တော် ပြန်တင်ပြရပါဦးမယ် "
ကုဝူရှန့် ထိုသို့ ပြောလိုက်သော်လည်း... ဘိုးဘေးအနေဖြင့် ငြင်းပယ်ရန် အကြောင်းပြချက်မရှိကြောင်း... သူသိနေသည်။
ကောင်းကင်နတ်သမီး ရှောင်းယွဲ့ဆိုသည်မှာ တစ်ချိန်က စစ်မှန်သော အင်မော်တယ် အဆင့်လေ။
သူ၏အဆင့်အတန်း ကျဆင်းသွားပြီး... စစ်မှန်သော အင်မော်တယ်အဆင့် တိုက်ခိုက်နိုင်စွမ်း မရှိတော့သော်လည်း... သူ၏အတိတ်က အသိပညာနှင့် အမြင်များက ရှိနေဆဲဖြစ်သည်။
ထိုသို့သော ပုဂ္ဂိုလ်မျိုးမှ ကုမိသားစု လူငယ်များကို ကိုယ်တိုင် သင်ကြားပေးမည်တဲ့လော။
ထိုသတင်းကိုသာ ကြားလျှင်... ကလေးစုတ်လေးများ ပါးစပ်စေ့မရအောင် ပျော်ရွှင်ကြမည်မှာ... ကုဝူရှန့် အာမခံရဲသည်။
အကယ်၍... ဤအခွင့်အရေးကို အဆုံးမဲ့ကမ္ဘာ ဒေသကြီးငါးခုရှိ သက်ရှိအားလုံး သိရှိသွားပါက... သွားရည်ကျကာ မနာလိုစိတ်ဖြင့် ရူးသွပ်သွားကြပေလိမ့်မည်။
စဉ်းစားကြည့်ပါ... ချီပင်လယ်အဆင့်... ခန္ဓာသန့်စင်ခြင်းအဆင့်... နတ်တံတားအဆင့်နှင့် တာအိုနန်းတော်အဆင့်သာ ရှိကြသေးသော ကလေးတစ်သိုက်သည်... အရှင်သခင်နှစ်ပါးနှင့် စစ်မှန်သော အင်မော်တယ်တစ်ပါးထံမှ ကိုယ်တိုင်လမ်းညွှန်မှု ရရှိနိုင်ကြမည် ဆိုပါက... ဤသည်မှာ မည်မျှကြီးမားသော အခွင့်အရေးနှင့် ကောင်းချီးမင်္ဂလာ ဖြစ်ပါသနည်း။
သတင်းသာ ပေါက်ကြားသွားလျှင် မည်သူမျှ ယုံကြည်နိုင်မည်ပင် မဟုတ်ပေ။
ကုဝူရှန့်ကိုယ်တိုင်ပင် အနည်းငယ် စိတ်လှုပ်ရှားမိသည်။
သူသည် လက်ရှိတွင်... ဧကရာဇ်တစ်ပိုင်းအဆင့် သာရှိသေးပြီး... တစ်ခါတစ်ရံ ကျင့်ကြံခြင်းတွင် သံသယအချို့ ကြုံတွေ့ရသော်လည်း... ထိုကိစ္စသေးသေးမွှားမွှားလေးများအတွက်... ဘိုးဘေးကို မနှောင့်ယှက်လိုခဲ့ပေ။
ယခု... ရှောင်းယွဲ့ထံမှ လမ်းညွှန်မှုအချို့ ရရှိနိုင်ပါက... ဧကရာဇ်အဆင့်သို့ တက်လှမ်းမည့်လမ်းကြောင်းမှာ... ပိုမိုချောမွေ့သွားပေလိမ့်မည်။
" ဒါဆိုရင်... ကျေးဇူးတင်ပါတယ် "
ကုဝူရှန့်ကို သူ၏ရည်ရွယ်ချက်အား ရှင်းပြပြီးနောက်... ရှောင်းယွဲ့သည် ကျက်သရေရှိစွာ... ပြန်လည်ထွက်ခွာသွား၏။ ထွက်ခွာသွားချိန်တွင်... သူ၏ လှပသော မျက်နှာပေါ်၌... မှေးမှိန်သော အပြုံးတစ်ခု ဖြစ်ပေါ်နေခဲ့သည်။
ဖီးနစ်ဧကရာဇ်တို့ကဲ့သို့ပင်... ကုမိသားစုလူငယ်များကို ပညာသင်ကြားပေးခြင်းသည်... သူ့ကို ကုမိသားစုတစ်ခုလုံးနှင့်... နက်ရှိုင်းစွာ နှောင်ဖွဲ့ထားပေလိမ့်မည်။
ထိုအချိန်ရောက်လျှင် ကုချန် မည်မျှပင် သန်မာလာပါစေ.....
ကုမိသားစုအကြောင်း တွေးမိတိုင်း... သူ ကုမိသားစုအတွက် လုပ်ပေးခဲ့သည်များကို သတိရနေမည်ဖြစ်ရာ... သူ့ကို မတရားဆက်ဆံမည် မဟုတ်ပေ။
" ပြန်ရောက်ရင် သေချာ ပြင်ဆင်ထားမှ ဖြစ်မယ်..... "
ရှောင်းယွဲ့သည် တီးတိုးရေရွတ်လိုက်၏။
လုပ်မည်ဟု ဆုံးဖြတ်ပြီးမှတော့ အကောင်းဆုံး လုပ်ဆောင်ရပေမည်။
သူ့တွင်... အတိတ်က မှတ်ဉာဏ်တစ်စိတ်တစ်ပိုင်းသာ ရှိသော်လည်း... ကျင့်ကြံခြင်းနှင့် ပတ်သက်သည့် မှတ်ဉာဏ်များစွာ... ရှိနေသည်။ နတ်ဘုရားစွမ်းရည်များ၊ ကျင့်ကြံခြင်းနည်းစနစ်များနှင့်... အဆင့်တက်လှမ်းခြင်းဆိုင်ရာ အဓိကအချက်များကို သေချာစွာ စုစည်းပြီးနောက်... သူ သေချာပေါက် ကောင်းမွန်စွာ သင်ကြားပေးမည်ဖြစ်သည်။
အနည်းဆုံးတော့ ထိုတားမြစ်နယ်မြေအရှင်သခင်နှစ်ပါးအောက်တော့ အရောက်ခံမည် မဟုတ်ပေ။
... ... ... ...
ကောင်းကင်တားမြစ်နယ်မြေအတွင်းတွင် ကုမိသားစုသည် စည်ပင်ဝပြောလျက်ရှိသည်။
တစ်ချိန်တည်းမှာပင်... အဆုံးမဲ့ကမ္ဘာ၏ ပြင်ပ... ဟွမ်သွမ့်ပင်လယ် နက်ရှိုင်းသော နေရာတွင်.....
အဆုံးမဲ့ ဟွမ်သွမ့်ကောင်းကင်ရေကန်အတွင်း အနက်ရှိုင်းဆုံးနေရာ၌ ရှေးဟောင်းနန်းတော်ကြီးတစ်ခု ပေါလောပေါ်လျက်ရှိသည်။
အဆုံးမဲ့ ခရမ်းရောင်မိုးကြိုးများက နန်းတော်ကြီးကို လွှမ်းခြုံထားသော်လည်း အနည်းငယ်မျှ ထိခိုက်စေခြင်း မရှိပေ။
နန်းတော်ကြီးအတွင်းတွင်... ခမ်းနားထည်ဝါသော ပလ္လင်များရှိပြီး... အဆုံးမဲ့ကမ္ဘာအတွင်းရှိ ဧကရာဇ်နန်းဆောင်နှင့်... လွန်စွာတူညီနေသည်။
ယွမ်ကျွင်း တည်ထောင်ခဲ့သော ဧကရာဇ်နန်းဆောင်သည် ဤနေရာကို ပုံတူယူထားခြင်း ဖြစ်သည်။
ဤနေရာကား သက်တမ်းရှည်နန်းတော် ပင် ဖြစ်သည်။
ယခုအချိန်တွင်... သက်တမ်းရှည်နန်းတော်အတွင်းရှိ ကြီးမားသော ပလ္လင်များပေါ်၌... ပုံရိပ်များ ခန့်ညားစွာ ထိုင်နေကြသည်။
ဟွမ်သွမ့်ချီနှင့်... အင်မော်တယ်အလင်းတန်းများ လွှမ်းခြုံထားသော ထိုပုံရိပ်များသည်... အဆုံးမဲ့ကမ္ဘာဧကရာဇ်အဆင့်ကို ကျော်လွန်သော... ကြီးမားနက်ရှိုင်းသည့် အော်ရာများကို ထုတ်လွှတ်နေကြသည်။
နန်းဆောင်ထဲတွင် စုစုပေါင်းပလ္လင်ကိုးခု ရှိသည်။
ပလ္လင်ရှစ်ခုတွင်... အသက်ရှည်ခြင်း ထျန်းကျွင်း များ နေရာယူထားကြသော်လည်း... ခန်းမအလယ်ရှိ အမြင့်မြတ်ဆုံး ပလ္လင်မှာမူ လွတ်နေသည်။
ယခုအချိန်တွင်... ထျန်းကျွင်းရှစ်ပါးစလုံး စုဝေးနေကြပြီး... ခန်းမအတွင်းရှိ လေထုမှာ အလွန်လေးလံနေသည်။
" တာအိုရဲဘော် မယ်ကူ... အဆုံးမဲ့ကမ္ဘာမှာ ဘာတွေဖြစ်နေတာလဲဆိုတာ ငါသိချင်တယ်...ဘာကြောင့် အင်မော်တယ်တစ်သောင်းမျှော်စင်က... အသက်ရှည်ခြင်းပစ္စည်းတွေကို အခုထိ မပေးပို့သေးတာလဲ "
ရှေးဟောင်းဧကရာဇ်ဝတ်ရုံကို ဝတ်ဆင်ထားပြီး... ရွှေရောင်ဆံပင်နှင့် အဘိုးအိုတစ်ဦးက... အခြားပလ္လင်တစ်ခုကို ကြည့်ကာ... မေးခွန်းထုတ်လိုက်သည်။ သူ၏အသံသည် အေးစက်လျက် ခံစားချက်ကင်းမဲ့နေလေ၏။
" ဟွန့်... အဆုံးမဲ့ကမ္ဘာမှာ ဘာဖြစ်နေလဲဆိုတာ ဒီထျန်းကျွင်းက ဘယ်လိုလုပ် သိမှာလဲ... တာအိုရဲဘော် နဂါးနွေအရှင်... မင်းက ဒါတွေအကုန်လုံး ငါလုပ်ထားတယ်လို့... ထင်နေတာတော့ မဟုတ်ပါဘူးနော် "
နဂါးနွေထျန်းကျွင်း၏ မေးခွန်းထုတ်မှုကို ရင်ဆိုင်ရင်း မယ်ကူထျန်းကျွင်းမှ အေးစက်စွာ နှာမှုတ်၍ ပြန်လည်ချေပလိုက်သည်။
သို့သော်... သူ၏စိတ်ထဲတွင်မူ ယွမ်ကျွင်းကို... အကြိမ်ရာထောင်မက ဆဲဆိုနေမိသည်။
ဒီယွမ်ကျွင်းက တကယ့်အသုံးမကျတဲ့ကောင်ပဲ။ ဒီလောက်ကိစ္စသေးသေးလေးကိုတောင် မဖြေရှင်းနိုင်ဘူး။ ငါက သူ့ကို နောက်ထပ် ထျန်းကျွင်းလောင်းအဖြစ် သက်တမ်းရှည်နန်းတော်ထဲမှာ ထောက်ခံပေးချင်နေတာကို။
" မင်းလုပ်တာ ဟုတ်မဟုတ်က အရေးမကြီးပါဘူး "
အခြား ရှေးဟောင်းထျန်းကျွင်းတစ်ပါးမှ အေးစက်စွာ ဝင်ပြောလိုက်သည်။
" အရေးကြီးတာက အဲ့ဒီအဆုံးမဲ့ကမ္ဘာမှာ တကယ်တမ်း ဘာတွေဖြစ်ပျက်ခဲ့သလဲ ဆိုတာပဲ "