အခန်း (၂၄၇-၂၄၈)
Vol. 18 Ch. 247-248
အခန်း (၂၄၇) ထိတ်လန့်တုန်လှုပ်ခြင်း၊ နားလည်မှုလွဲမှားခြင်းများ၊ မယ်ကူ၏ သေဆုံးခြင်း
" ဒီလူငယ်လေးက အရှင့်ကို တကယ်ပဲ မမှတ်မိပါဘူး..... "
မယ်ကူထျန်းကျွင်း၏ မျက်နှာပေါ်တွင် အနည်းငယ် အဆင်မပြေသော အပြုံးတစ်ခု ပေါ်လာ၏။
သူ၏ရှေ့မှောက်ရှိလူကို တကယ်ပင် တစ်ခါမျှ မမြင်ဖူးကြောင်း သူခံစားမိသော်လည်း တစ်ချိန်တည်းမှာပင် မယ်ကူထျန်းကျွင်းသည် နားမလည်နိုင် ဖြစ်နေရသည်။
အဆုံးမဲ့ကမ္ဘာထဲတွင် ဤမျှကြောက်မက်ဖွယ်ကောင်းသော ဖြစ်တည်မှုမျိုး ဘယ်အချိန်က ပေါ်လာရသနည်း။
အဘယ်ကြောင့် သူတစ်ခါမျှ မကြားဖူးရသနည်း။
ထို့အပြင် ဤကဲ့သို့သော ဖြစ်တည်မှုမျိုးကို... အဘယ်ကြောင့် ရှောင်ယောက်ထျန်းကျွင်းသည် ယခင်က... သက်တမ်းရှည်နန်းတော်ထဲသို့ ဝင်ရောက်ရန် မကမ်းလှမ်းခဲ့ရသနည်း။
" ငါ့ကို မမှတ်မိဘူးပေါ့... စိတ်ဝင်စားစရာပဲ "
ကုချန်၏မျက်နှာပေါ်တွင် နက်နဲသော အပြုံးတစ်ခု ပေါ်လာသည်။
လွန်ခဲ့သော နှစ်ပေါင်း ၉ သောင်းတွင်... သက်တမ်းရှည်နန်းတော်သည် သူ့အား ဒုက္ခပေးရန် ကြံစည်ခဲ့ပြီး... ယခုကျတော့ သူ့ကို မမှတ်မိဘူးဟု ဆိုနေကြသည်လော။
ဒီသက်တမ်းရှည်နန်းတော်က တကယ်ပဲ 'မြင့်မြတ်ပြီး အထက်စီးဆန်' နေတာကိုး။
သက်တမ်းရှည်နန်းတော်မှ ထျန်းကျွင်းများသည်... အထက်စီးဆန်ပြီး မောက်မာနေကျဖြစ်ကြောင်း... ကုချန် ကောင်းစွာ သိ၏။ လွန်ခဲ့သော နှစ်ပေါင်း ၉ သောင်းတွင်... သူ့အား ဒုက္ခပေးရန် ကြံစည်ခဲ့စဉ်ကပင်... သူတို့သည် သူ၏နာမည်ကိုသာ သိပြီး... လူချင်းတစ်ခါမျှ တွေ့ဖူးလိမ့်မည် မဟုတ်ပေ။
ထိုအချိန်က ထျန်းကျွင်းများ၏ မျက်လုံးထဲတွင်... ကုချန်သည် 'ပုရွက်ဆိတ်' တစ်ကောင်၊ 'နယ်ရုပ်' တစ်ရုပ်မျှသာ ဖြစ်ပြီး... သူ၏ကံကြမ္မာနှင့် အနာဂတ်ကို အချိန်မရွေး စီစဉ်နိုင်သည်ဟု... ယူဆထားကြ၏။ ကုချန်ကို သူတို့ အဘယ်ကြောင့် အာရုံစိုက်နေရမည်နည်း။
သူတို့သည် အမြင့်မှနေ၍ အမိန့်ပေးရုံသာ လိုအပ်ပြီး... သက်တမ်းရှည်နန်းတော်၏ ခွေးများဖြစ်သော ယွမ်ကျွင်းကဲ့သို့သော လူများက... ထိုတာဝန်များကို ပြီးမြောက်အောင် လုပ်ဆောင်ပေးကြမည်မှာ... သဘာဝပင် ဖြစ်သည်။
ကုချန်အား မသိရှိခြင်း။
ဤအချက်သည် သက်တမ်းရှည်နန်းတော်အတွင်းရှိ ထျန်းကျွင်းများမှာ မည်မျှ မောက်မာကြောင်း သက်သေပြနေခြင်းသာ ဖြစ်သည်။
" ငါ့နာမည်က ကုချန် "
ကုချန်သည် တိုးညှင်းစွာ ပြောဆိုလိုက်ပြီး သူ၏အသံသည် အလွန်တည်ငြိမ်နေ၏။
သို့သော်... ထိုအသံသည် မယ်ကူထျန်းကျွင်း၏ နားထဲသို့ ရောက်သွားသောအခါ... မိုးကြိုးပစ်ချလိုက်သကဲ့သို့ ပေါက်ကွဲသွားတော့သည်။
ကု... ကုချန်?
ဒီလူက သူ့ကိုယ်သူ ကုချန်လို့ ပြောလိုက်တာလား?!
မယ်ကူထျန်းကျွင်းသည် ဦးစွာ မှင်သက်သွားပြီးနောက်... သူ၏မျက်နှာတစ်ခုလုံးတွင် ထိတ်လန့်မှုတို့ဖြင့်... ပြည့်နှက်သွားတော့သည်။
ဒီလူက လွန်ခဲ့တဲ့ နှစ်ပေါင်း ၉ သောင်းတုန်းက ထျန်းကျွင်းတွေ ပူးပေါင်းကြံစည်ခဲ့တဲ့ သူရှာနေတဲ့ ကုချန် ဖြစ်နေမလား?
မယ်ကူထျန်းကျွင်း၏ မျက်ဝန်းအိမ်များမှာ ကျဉ်းမြောင်းသွားကြ၏။
ကုချန်နှင့် အတည်မပြုရသေးသော်လည်း သူ၏အမြင်အရ ဤအရာမှာ မလွဲမသွေ သေချာသလောက် ဖြစ်နေပြီဖြစ်သည်။
ဤအဆုံးမဲ့ကမ္ဘာထဲတွင် ကုချန် အများအပြား ရှိနေနိုင်ပြီး ထိုသူတိုင်းက ဤမျှကြောက်မက်ဖွယ်ကောင်းသော အင်အားကို ပိုင်ဆိုင်ထားနိုင်ပါမည်လော။
ဒါပေမယ့် ဒီကုချန်က ဘာလို့ ဒီလောက်သန်မာနေရတာလဲ?
နှစ်ပေါင်း ၉ သောင်း ကြာပြီးနောက်... ဆအသက်ရှည်ဒြပ်စင် မရရှိဘဲနှင့် ဒီလူအသက်ရှင်နေလျှင်တောင် အိုမင်းရင့်ရော်နေသင့်ပြီး... ယခင်ကလောက် ဘုန်းတန်ခိုးမကြီးမားတော့ဘဲ... ပို၍ အားနည်းသွားသင့်သည် မဟုတ်ပါလော။ ဘာကြောင့် ပိုပိုပြီး သန်မာလာရသနည်း။
မယ်ကူထျန်းကျွင်းသည် တုန်လှုပ်ခြောက်ခြားနေပြီး ဤအရာများကို လုံးဝ နားမလည်နိုင်အောင် ဖြစ်နေရသည်။
" မင်း ကောင်းကင်ချောက်နက်ကိစ္စကို စုံစမ်းဖို့ အဆုံးမဲ့ကမ္ဘာကို ရောက်လာတာမလား? "
မယ်ကူထျန်းကျွင်း၏... ထိတ်လန့်နေသော မျက်နှာကို ကြည့်ကာ... ကုချန်သည် သူလာရသည့် ရည်ရွယ်ချက်ကို... ခန့်မှန်းမိပြီးသား ဖြစ်သွားသည်။
သက်တမ်းရှည်နန်းတော်၏ ပူးပေါင်းကြံစည်မှုအကြောင်းကို ယွမ်ကျွင်းဆီမှ သူသိရှိပြီး ဖြစ်သည်။
ယခုအခါ ကောင်းကင်ချောက်နက်ထဲရှိ... စစ်မှန်သော အင်မော်တယ်များအားလုံးကို ကုချန် သတ်ဖြတ်လိုက်ပြီဖြစ်ရာ... သက်တမ်းရှည်နန်းတော်၏ အစီအစဉ်များကို ပျက်စီးသွားစေခဲ့မည်မှာ... သေချာသည်။ ထို့ကြောင့်... စုံစမ်းစစ်ဆေးရန် တစ်စုံတစ်ယောက်ကို စေလွှတ်လိုက်ခြင်းမှာ... သဘာဝကျပေသည်။
" မင်းကို ပြောပြလိုက်မယ်... ယွမ်ကျွင်းကို ငါကိုယ်တော် သတ်လိုက်ပြီ... ကောင်းကင်ချောက်နက်ထဲက စစ်မှန်တဲ့ အင်မော်တယ်တွေကိုလဲ... ငါကိုယ်တော်ပဲ သတ်လိုက်တာ "
ကုချန်သည် အရေးမပါသော ကိစ္စတစ်ခုကို ပြောပြနေသကဲ့သို့ တည်ငြိမ်စွာ ပြောကြားလိုက်၏။
မယ်ကူထျန်းကျွင်းမှာမူ အသက်ရှူဖို့ပင် မေ့လျော့လုနီးပါးအထိ တုန်လှုပ်နေပြီ ဖြစ်သည်။
ယွမ်ကျွင်းကို ကုချန်သတ်လိုက်သည်ဆိုသော ကိစ္စကို... မယ်ကူထျန်းကျွင်း ယခင်က မတွေးမိခဲ့သော်လည်း... လုံးဝလက်မခံနိုင်စရာတော့ မဟုတ်ပေ။
သို့သော်... ဤကုချန်သည် ကောင်းကင်ချောက်နက်ထဲရှိ... စစ်မှန်သော အင်မော်တယ်များကိုပါ... သတ်ဖြတ်ခဲ့သည်ဟု ပြောနေသည်လော။
အဲ့ဒါတွေက... စစ်မှန်တဲ့ အင်မော်တယ်တွေလေ... စစ်မှန်တဲ့ အင်မော်တယ်တွေ!
မယ်ကူထျန်းကျွင်းသည် မယုံနိုင်အောင် ဖြစ်မိသော်လည်း... အင်မော်တယ်တစ်သောင်းမျှော်စင်သည် ယခုတစ်ကြိမ်တွင်... အသက်ရှည်ဒြပ်စင် မချပေးခဲ့ခြင်းနှင့်... ကုချန်၏ ကြောက်မက်ဖွယ် တိုက်ခိုက်နိုင်စွမ်းသည်... မယ်ကူထျန်းကျွင်းကို လက်ဝါးတစ်ချက်တည်းဖြင့် ဖမ်းချုပ်နိုင်ခဲ့ခြင်း... အစရှိသည်တို့သည် ကုချန်၏စကားများကို အတည်ပြုနေသကဲ့သို့ ရှိ၏။
ဒီကုချန်က လိမ်နေတာ မဟုတ်ဘူး!
စစ်မှန်တဲ့ အင်မော်တယ်တွေကို သတ်နိုင်တယ်တဲ့.....
မယ်ကူထျန်းကျွင်း၏ ခန္ဓာကိုယ်သည် မသိစိတ်အလျောက် အနည်းငယ် တုန်ယင်သွား၏။
သူသည် ကုချန်ကို သက်တမ်းရှည်နန်းတော်၏ လက်အောက်သို့ ဝင်ရောက်လာစေရန် ခေါ်ယူဖို့ စဉ်းစားခဲ့ဖူးသည်။
ယခင်က... ကုချန်ကို သက်တမ်းရှည်နန်းတော်က ဒုက္ခပေးရန် ကြံစည်ခဲ့ဖူးလျှင်တောင်... မယ်ကူထျန်းကျွင်း၏ အမြင်တွင်မူ... ၎င်းမှာ ကိစ္စသေးလေးတစ်ခုမျှသာ ဖြစ်သည်။
သက်တမ်းရှည်နန်းတော်သို့ ဝင်ရောက်ခြင်းဖြင့် သက်တမ်းရှည်ခြင်းကို တစေ့တစောင်း မြင်တွေ့ခွင့် ရရှိမည်ဖြစ်သည်။
သက်တမ်းရှည်ခြင်း၏ ဆွဲဆောင်မှုနှင့် ယှဉ်လိုက်လျှင်... ယခင်က ခံစားခဲ့ရသော နာကျည်းချက်များနှင့် ပူးပေါင်းကြံစည်မှုများသည်... ဘာပြောစရာ ရှိတော့မည်နည်း။
ဤကုချန်သာ မတုံးအဘူးဆိုလျှင်... သူ၏ခြေရင်းတွင် ဝပ်ဆင်းပြီး ကျေးဇူးတင်စကားဆိုကာ... မျက်ရည်ကျလိမ့်မည်ဟု သူထင်ခဲ့သည်။
သို့သော် သူမှားယွင်းကြောင်း... အကြီးအကျယ် မှားယွင်းကြောင်း... အဖြစ်မှန်က သက်သေပြနေသည်။
ကုချန်၏အင်အားဖြင့်ဆိုလျှင်... သက်တမ်းရှည်နန်းတော်တစ်ခုလုံးကိုပင် မှောက်လှန်ပစ်ရန်... လုံလောက်နေသည်။ သူသည် မည်သို့သောဆန္ဒဖြင့်... သက်တမ်းရှည်နန်းတော်၏ လက်အောက်သို့... ဝင်ရောက်မည်နည်း။
ရှောင်ယောက်ထျန်းကျွင်းက ဒီကုချန်ကို သက်တမ်းရှည်နန်းတော်ရဲ့ ခွေးတစ်ကောင်အဖြစ် မွေးချင်နေသေးတာလား.....
မှားပြီ... လုံးဝမှားပြီ!
ဘေးဆိုးကြုံရတော့မည့် နိမိတ်တစ်ခု မယ်ကူထျန်းကျွင်း၏ရင်ထဲတွင် ရုတ်တရက် ကြီးထွားလာတော့သည်။
ကုချန်၏အင်အားသည် အလွန်ကြောက်စရာ ကောင်းလှ၏။ အကယ်၍... လွန်ခဲ့သောနှစ်များမှ သက်တမ်းရှည်နန်းတော်၏ ပူးပေါင်းကြံစည်မှုကို သူသိသွားပါက... သေချာပေါက် စာရင်းရှင်းပေလိမ့်မည်။ ထိုအချိန်ကျလျှင်... နန်းတော်တွင်းရှိ သက်တမ်းရှည်ထျန်းကျွင်းတစ်ပါးအနေဖြင့်... သူသည် သေချာပေါက် ထိပ်ဆုံးမှ ခံရပေတော့မည်!
ယခုအချိန်တွင်... လွန်ခဲ့သော နှစ်ပေါင်း ၉ သောင်းမှ အဖြစ်အပျက်များကို... ကုချန် မသိရှိပါစေနှင့်ဟုသာ... သူဆုတောင်းရတော့မည်။
မယ်ကူထျန်းကျွင်း၏စိတ်နှလုံး မငြိမ်မသက် ဖြစ်နေစဉ်... နောက်တစ်ခဏ၌ ကုချန်ပြောလိုက်သော စကားများသည်... သူ၏စိတ်ကို ချောက်ကမ်းပါးထဲသို့ တွန်းပို့လိုက်သကဲ့သို့... ဖြစ်သွားစေခဲ့သည်။
" လွန်ခဲ့တဲ့ နှစ်ပေါင်း ၉ သောင်းတုန်းက မင်းတို့ ငါ့ကို ဒုက္ခပေးဖို့ ကြံစည်ခဲ့တယ်... ငါကိုယ်တော်က စာရင်းမရှင်းရသေးခင်မှာ... မင်းက ကိုယ့်သဘောနဲ့ကိုယ် တံခါးဝကို ရောက်လာလိမ့်မယ်လို့... ငါမထင်ထားဘူး "
ကုချန်သည် လျစ်လျူရှုထားသောလေသံဖြင့် ပြောလိုက်ပြီး... သူ့၏ တည်ငြိမ်၍ နက်ရှိုင်းသော အကြည့်များသည်... မယ်ကူထျန်းကျွင်း၏ အတွေးများနှင့် လျှို့ဝှက်ချက်များ အားလုံးကို... ဖောက်ထွင်းမြင်နိုင်စွမ်းရှိပုံရနေသည်။
" ဒါ... နားလည်မှုလွဲတာပါ... အကုန်လုံးက နားလည်မှုလွဲတာပါ "
မယ်ကူထျန်းကျွင်းမှာ ချက်ချင်းဆိုသလို ချွေးစေးများ ပြန်လာတော့သည်။ ကုချန်မှ အရာအားလုံးကို သိပြီးနေလိမ့်မည်ဟု သူ မထင်ထားခဲ့ပေ။
တစ်ချိန်တည်းမှာပင် သူသည် စိတ်ထဲ၌ ကျိန်ဆဲလိုက်မိသည်။ သောက်ကျိုးနည်း ယွမ်ကျွင်း... ဒီကောင် အကုန်လျှောက်ပြောလိုက်တာ နေမှာ!
လွန်ခဲ့သော နှစ်ပေါင်း ၉ သောင်းမှ ကိစ္စကို... သက်တမ်းရှည်နန်းတော်မှ ထျန်းကျွင်းများအပြင်... လက်တွေ့လုပ်ဆောင်ခဲ့သူ ယွမ်ကျွင်းသာ သိရှိသည်။
ယခု ကုချန်မှ အမှန်တရားကို သိနေပြီဆိုတော့... သတင်းပေါက်ကြားသူသည် ယွမ်ကျွင်း မဟုတ်လျှင်... ဘယ်သူဖြစ်နိုင်ဦးမည်နည်း။
သို့သော် ယခုအချိန်သည် ဤကိစ္စများကို စဉ်းစားနေရမည့်အချိန် မဟုတ်သည်မှာ ထင်ရှား၏။
ကုချန်၏ လျစ်လျူရှုထားသော အမူအရာသည် မယ်ကူထျန်းကျွင်း၏နှလုံးကို တဒိန်းဒိန်း ခုန်စေ၏။ သူသည် အချိန်မဆွဲဘဲ အလျင်အမြန်ပင် ရှင်းပြလိုက်တော့သည်။
" လွန်ခဲ့တဲ့ နှစ်ပေါင်း ၉ သောင်းတုန်းက... ကျွန်တော်က သက်တမ်းရှည်နန်းတော်ထဲကို အသစ်ရောက်ခါစပါ... နန်းတော်ထဲမှာ ဘာလုပ်ပိုင်ခွင့်မှ မရှိပါဘူး.....
အရှင့်ကို ဒုက္ခပေးဖို့ ကြံစည်ခဲ့တဲ့ကိစ္စကို... နန်းတော်ထဲက တခြားထျန်းကျွင်းတွေက ဦးဆောင်ခဲ့တာဖြစ်ပြီး... နောက်ဆုံးမှာ ရှောင်ယောက်ထျန်းကျွင်းက အတည်ပြုခဲ့တာပါ.....
ကျွန်တော်က ထောက်ခံမဲ တစ်မဲပဲ ပေးခဲ့ရရုံပါ... ကျွန်တော့်အခန်းကဏ္ဍက ပြောပလောက်တာ မဟုတ်ပါဘူး... တကယ်ကို ပြောပလောက်တာ မဟုတ်ပါဘူး "
ဤအချက်နှင့် ပတ်သက်၍ မယ်ကူထျန်းကျွင်း လိမ်ညာနေခြင်း မရှိပေ။
ထိုစဉ်က... ကုချန်နှင့် ပတ်သက်သည့် ကိစ္စတွင်... သူသည် ထောက်ခံမဲတစ်မဲသာ ပေးခဲ့သည်မှာ... 'အမှန်' ပင် ဖြစ်သည်။
ပြောပလောက်တာ မဟုတ်ဘူးတဲ့လား?
မယ်ကူထျန်းကျွင်း၏... ဖျော့တော့ပြီး အားနည်းသော ရှင်းပြချက်ကို နားထောင်ရင်း... ကုချန်သည် မဲ့ပြုံး ပြုံးလိုက်၏။
သက်တမ်းရှည်နန်းတော်မှ ဤအဖိုးကြီးများသည်... မိမိတို့ကိုယ်ကို အရာရာကို စိတ်တိုင်းကျ စီစဉ်ထိန်းချုပ်နိုင်သော... မြင့်မြတ်သည့် ဘုရားသခင်များဟု... ထင်မှတ်နေကြသည်။ မဲတစ်မဲပေးလိုက်ရုံဖြင့်... သူ၏ကံကြမ္မာကို ယိမ်းယိုင်စေရန် ဆုံးဖြတ်နိုင်သည်ဟု... သူတို့ တကယ်ထင်နေကြသည်လော။
" စိတ်မပူပါနဲ့... ငါကိုယ်တော်က ဒီစာရင်းတွေ အကုန်လုံးကို... သေချာပေါက် ရှင်းမှာပါ "
ကုချန်သည် လျစ်လျူရှုထားသောလေသံဖြင့် ပြောကြားလိုက်၏။ ထို့နောက်... မယ်ကူထျန်းကျွင်း၏ လုံးဝထိတ်လန့်တုန်လှုပ်နေသော အကြည့်အောက်၌ပင်... လက်ဝါးတစ်ဖက်ကို ဖြည်းညင်းစွာ ဆန့်ထုတ်လိုက်ကာ... မယ်ကူထျန်းကျွင်း၏ နှလုံးနေရာသို့... ဖိချလိုက်လေတော့သည်။
" ဘုန်း! "
ပြိုင်ဘက်ကင်းသော စွမ်းအားများ ထွက်ပေါ်လာကာ... မယ်ကူထျန်းကျွင်း၏ ခန္ဓာကိုယ်သည် ချက်ချင်း ပေါက်ကွဲထွက်သွားတော့၏။ သူ၏ဝိညာဉ်သည်ပင်... အပိုင်းပိုင်းအစစ ဆုတ်ဖြဲခံလိုက်ရပြီး ပြာကျသွားကာ... လုံးဝပျက်စီးသွားတော့လေသည်။
အခန်း (၂၄၈) - ချီမုန် အစည်းအဝေးတက်ခြင်း၊ အင်မော်တယ်ရွှေသုံးတုံးနှင့် ခရီးစဉ်မွမ်းမံခြင်း
ကုချန်သည် သူ၏ရှေ့မှောက်တွင် လေထဲပျောက်ကွယ်သွားသော မယ်ကူထျန်းကျွင်းကို ကြည့်ရင်း တည်ငြိမ်နေလေသည်။
ကုချန်သည် သက်တမ်းရှည်နန်းတော်၏ တည်နေရာကို အတိအကျသိရှိထားပြီးဖြစ်ရာ... မယ်ကူထျန်းကျွင်းထံမှ မည်သည့်အရာကိုမျှ သိရှိရန်... မလိုအပ်တော့ချေ။ ထို့ကြောင့်... သူ့အား တိုက်ရိုက်သတ်ဖြတ်လိုက်ခြင်းက... ပို၍ ရိုးရှင်းပေသည်။
ထို့အပြင်... မကြာသေးမီက မယ်ကူထျန်းကျွင်း၏ အပြုအမူအရ... သက်တမ်းရှည်နန်းတော်အတွင်း သူ၏အဆင့်အတန်းမှာ မမြင့်မားလှကြောင်း သိသာထင်ရှားရာ... အဓိကလျှို့ဝှက်ချက်များကို သိရှိထားနိုင်မည် မဟုတ်ပေ။
ယွမ်ကျွင်း၏ နတ်ဘုရားအာရုံ၌ပင် အင်မော်တယ်အစစ်အမှန် တားမြစ်ချက် ထားရှိထားသေးသည်။
မယ်ကူထျန်းကျွင်း၏နှုတ်မှ... သက်တမ်းရှည်နန်းတော်အကြောင်း သတင်းအချက်အလက်များကို... နှိုက်ထုတ်ရန် ကြိုးစားခြင်းသည်... ပို၍ ခက်ခဲပေလိမ့်မည်။
ထို့ကြောင့် ကုချန်သည် အချည်းနှီးသော ကိစ္စရပ်များအတွက် အချိန်ဖြုန်းမနေလိုဘဲ သူ့အား သတ်ဖြတ်လိုက်ခြင်း ဖြစ်သည်။
" သက်တမ်းရှည်နန်းတော်... ရှောင်ယောက်ထျန်းကျွင်း..... "
ကုချန်သည် တီးတိုးရေရွတ်လိုက်၏။
မယ်ကူထျန်းကျွင်း၏ စကားများမှတစ်ဆင့်... သက်တမ်းရှည်နန်းတော်၏ အရှင်သခင်အစစ်အမှန်မှာ... မည်သူဖြစ်ကြောင်း သူသိရှိလိုက်ရသည်။
ရှောင်ယောက်ထျန်းကျွင်း.....
ဤအမည်ကို သူတစ်ခါမျှ မကြားဖူးခဲ့ချေ။ ဤသူသည် လူသားဧကရာဇ်ကို သစ္စာဖောက်ကာ အင်မော်တယ်နယ်မြေ အင်အားစုများနှင့် ပူးပေါင်းခဲ့သည့် ပထမဆုံး သစ္စာဖောက်လော။
ကုချန်သည် စိတ်ကို တည်ငြိမ်အောင်ထားကာ... သက်တမ်းရှည်နန်းတော်ကို သုတ်သင်ရှင်းလင်းရန်... ဟွမ်သွမ့်ပင်လယ်သို့ ထွက်ခွာမည့်အစီအစဉ်ကို စတင်လိုက်သည်။
သို့သော် ထိုအချိန်၌ပင် သူ၏အကြည့်များသည် အနည်းငယ် လှုပ်ခတ်သွား၏။
အကြောင်းမှာ... နတ်ဆိုးနယ်မြေ၌ ရှိနေသော ချီမုန်သည်... သူနှင့် နတ်ဘုရားဝိညာဉ်ချင်း ဆက်သွယ်ရန် တောင်းဆိုနေသည်ကို... သူ သတိထားမိလိုက်သောကြောင့် ဖြစ်သည်။
ကုချန်၏စိတ်အာရုံသည် လှုပ်ရှားသွားကာ ဆက်သွယ်မှုကို လက်ခံလိုက်သည်။
နောက်တစ်ခဏတွင် ချီမုန်၏ တင့်တယ်လှပသော ပုံရိပ်သည် ကုချန်ရှေ့၌ ပေါ်လာလေ၏။
" ချီမုန်က သခင့်ကို ဂါရဝပြုပါတယ် "
ချီမုန်သည် ပေါ်လာသည်နှင့် ကုချန်အား ရိုသေလေးစားစွာ ဦးညွှတ်လိုက်သည်။
" ပြောပါ... ဘာကိစ္စရှိလို့လဲ "
ကုချန်သည် လက်ကိုဝှေ့ယမ်းကာ ချီမုန်အား ထရပ်ရန် အချက်ပြရင်း မေးမြန်းလိုက်သည်။
" သခင်... ချီလျန်မျိုးနွယ်ကို ရှာဖွေခိုင်းထားတဲ့ အင်မော်တယ်ရွှေနဲ့ ပတ်သက်ပြီး... သဲလွန်စရထားပါပြီ "
ချီမုန်သည် ရိုသေစွာဖြင့် လျှောက်တင်လေ၏။
" ဒီကာလအတွင်းမှာ ချီလျန်မျိုးနွယ်က သခင့်အမိန့်အတိုင်း... အင်မော်တယ်ရွှေကို ကြိုးစားပမ်းစား ရှာဖွေခဲ့ပြီး... အခု သုံးတုံး တွေ့ရှိထားပါတယ်... သခင် ကျေးဇူးပြုပြီး ကြည့်ရှုပေးပါဦး "
စကားပြောရင်း... ချီမုန်သည် လက်ကို ဝှေ့ယမ်းလိုက်ရာ... သူ၏ရှေ့တွင် လူခေါင်းအရွယ်အစားခန့်ရှိသော... အင်မော်တယ်ရွှေ သုံးတုံး ပေါ်လာ၏။
အင်မော်တယ်ရွှေ သုံးတုံးအနက်... ပထမတစ်တုံးမှာ စီးဆင်းနေသော မီးတောင်ချော်ရည်ကဲ့သို့... မီးလျှံပမာ တောက်လောင်နေသည်။ ပုံရိပ်ယောင်မျှသာ ဖြစ်သော်လည်း... အရာအားလုံးကို ပြာကျစေနိုင်သော... ကြောက်မက်ဖွယ် အပူရှိန်ကို ထုတ်လွှတ်နေဆဲ ဖြစ်သည်။
ဒုတိယမြောက် အင်မော်တယ်ရွှေမှာမူ... နှစ်တစ်သောင်း ရေခဲအိုင်ကဲ့သို့ အေးစက်လွန်းလှပြီး... လူတစ်ဦး၏ ဝိညာဉ်ကိုပင် ခဲသွားစေနိုင်မည့်အလား... ထင်မှတ်ရသည်။
တတိယမြောက် အင်မော်တယ်ရွှေသည်ကား... အိပ်မက်ဆန်သော ကြယ်တာရာ ကောင်းကင်နှင့် တူပြီး... ကြယ်ရောင်များ တဖျပ်ဖျပ် လက်ကာ... နက်ရှိုင်း၍ ဆန်းကြယ်လှသည်။
အင်မော်တယ်ရွှေ သုံးတုံးစလုံးသည် မတူညီကြသော်လည်း... အထွတ်အထိပ် နတ်ဘုရားသတ္တုထက်... သာလွန်သော အရှိန်အဝါကို ထုတ်လွှတ်နေကြပြီး... ဟွမ်သွမ့်ပင်လယ်၏ သေမင်းနယ်မြေတွင် ကုချန်ရရှိခဲ့သော... ရွှေဓာတ်သဘာဝ အင်မော်တယ်ရွှေနှင့် နှိုင်းယှဉ်လျှင်... လျော့နည်းခြင်း မရှိပေ။
အင်မော်တယ်ရွှေ သုံးတုံးကို ဒီလောက်မြန်မြန် ရှာတွေ့ခဲ့တာလား?
ချီမုန်ရှေ့ရှိ ကွဲပြားသော အင်မော်တယ်ရွှေ သုံးတုံးကို ကြည့်ရင်း ကုချန် အံ့ဩသွားမိ၏။ ထို့နောက် သူသည် ချီမုန်ကို နက်နက်နဲနဲ ကြည့်ကာ ပြုံး၍ ပြောဆိုလိုက်သည်။
" ချီလျန်မျိုးနွယ်က တကယ်ပဲ ကြိုးစားအားထုတ်တာပဲ "
" သခင့်အတွက် အလုပ်အကျွေးပြုရတာ ကျွန်မတို့ ချီလျန်မျိုးနွယ်အတွက် ဂုဏ်ယူစရာပါ "
ချီမုန်သည် လျင်မြန်စွာ ပြောဆိုလိုက်ပြီး တိတ်တဆိတ် ဝမ်းသာနေမိသည်။ ချီလျန်မျိုးနွယ်၏ ကြိုးပမ်းမှုများသည် သခင့်ကို များစွာ ကျေနပ်စေခဲ့ကြောင်း သူ ခံစားမိလိုက်၏။
ဤသည်မှာ ကောင်းသည့်အရာပင်။ လွန်ခဲ့သည့် ရက်အနည်းငယ်က သူတို့၏ ကြိုးပမ်းအားထုတ်မှုများမှာ အချည်းနှီး မဖြစ်ခဲ့ပေ။
ကုချန် အမိန့်ပေးခဲ့ချိန်မှစ၍... ချီမုန်နှင့် ချီလျိုတို့သည် ချီလျန်မျိုးနွယ်သို့ ပြန်သွားပြီး... ဤကိစ္စကို အဓိကလုပ်ငန်းစဉ်အဖြစ် သတ်မှတ်ခဲ့ကြသည်။
အင်မော်တယ်ရွှေ တစ်တုံးကို ချီလျန်မျိုးနွယ်၏ အဓိက ဘိုးဘေးနယ်မြေအတွင်းတွင် ဝှက်ထားခဲ့ခြင်း ဖြစ်သည်။
နောက်ပိုင်းတွင်... ချီလျိုသည် သတင်းအချက်အလက်များ စုဆောင်းကာ... အခြားနယ်မြေမှ နတ်ဆိုးနယ်မြေ အင်အားစုများနှင့်... အခြားသော အထွတ်အထိပ် ရတနာများကို လဲလှယ်ပြီး... နောက်ထပ် အင်မော်တယ်ရွှေ တစ်တုံးကို ရယူခဲ့သည်။
နောက်ဆုံး အင်မော်တယ်ရွှေ တစ်တုံးကိုမူ... သဲလွန်စများအပေါ် အခြေခံ၍ ချီလျိုသည် သူ၏မျိုးနွယ်မှ... အင်အားကြီးသူများကို ဦးဆောင်ကာ... လျှို့ဝှက်၍ အန္တရာယ်များသော နယ်မြေတစ်ခုမှ... ရယူခဲ့ခြင်း ဖြစ်သည်။
ဤအင်မော်တယ်ရွှေ သုံးတုံးအတွက် ချီလျန်မျိုးနွယ်သည် ကြီးမားသော တန်ကြေးတစ်ခု ပေးဆပ်ခဲ့ရသည်ဟု ဆိုနိုင်သည်။
" နောက်ထပ် အင်မော်တယ်ရွှေ တစ်တုံးအတွက်... သဲလွန်စရထားတယ်လို့ မေမေ ပြောပါတယ်... ဒါပေမယ့် ရယူဖို့ အချိန်နည်းနည်း လိုကောင်းလိုပါလိမ့်မယ် "
ချီမုန်သည် တစ်စုံတစ်ခုကို သတိရသွားပုံရကာ အလျင်အမြန် တင်ပြလေသည်။
" ချီမုန်က ဒီအင်မော်တယ်ရွှေ သုံးတုံးကို သခင့်ဆီ အရင် ယူလာပေးရမလား... ကျန်တဲ့ အင်မော်တယ်ရွှေကိုတော့ ရရှိတဲ့အခါကျမှ သခင့်ဆီ ယူလာခဲ့ပါ့မယ် "
" မလိုပါဘူး "
ပုံရိပ်ယောင် အင်မော်တယ်ရွှေ သုံးတုံးကို ကြည့်ရင်း ကုချန်သည် ချီမုန် မျှော်လင့်မထားသော အဖြေတစ်ခုကို ပေးလိုက်သည်။
" ဒီအင်မော်တယ်ရွှေ သုံးတုံးကို... မင်းတို့ ချီလျန်မျိုးနွယ်ဆီမှာပဲ ယာယီ ထားလိုက်ပါ... နောက်ရက်အနည်းငယ်ကြာရင်... ငါကိုယ်တော် ကိုယ်တိုင် လာယူမယ် "
ကိုယ်တိုင် လာယူမယ်?
ကုချန်၏စကားကြောင့် ချီမုန်သည် ခေတ္တမျှ ကြောင်အသွားပြီး... သူ၏ လှပသော မျက်နှာလေးပေါ်တွင်... အံ့ဩထိတ်လန့်သွားသည့် အရိပ်အယောင်များ ပေါ်လာတော့သည်။
သခင်သည် နတ်ဆိုးနယ်မြေထဲသို့ ဝင်၍... ချီလျန်မျိုးနွယ်ဆီ လာကာ... အင်မော်တယ်ရွှေကို ကိုယ်တိုင် လာယူမည်ကု ဆိုလိုခြင်းဆလာ။
ဒါပေမယ့်.....
ချီမုန်သည် တစ်စုံတစ်ခု မှားယွင်းနေသည်ဟု ခံစားမိကာ စကားလုံးများကို ဂရုတစိုက် ရွေးချယ်ပြီး သတိပေးလိုက်သည်။
" သခင်... နတ်ဆိုးနယ်မြေရဲ့ ကောင်းကင်နဲ့မြေကြီး စည်းမျဉ်းတွေက အဆုံးမဲ့ကမ္ဘာနဲ့ လုံးဝ မတူပါဘူး... တကယ်လို့ သခင်က နတ်ဆိုးနယ်မြေကို လာမယ်ဆိုရင်... သခင့်ရဲ့ အင်အားကို အကြီးအကျယ် ဖိနှိပ်ခံရနိုင်ပါတယ်... ပြီးတော့ ကမ္ဘာနှစ်ခုကြားက ချောက်နက် အတားအဆီးလဲ ရှိနေပါသေးတယ်... သခင့်ရဲ့ အင်အားက ကြီးမားလွန်းတဲ့အတွက် ဖြတ်သန်းဖို့ ခက်ခဲပါလိမ့်မယ် "
လက်ရှိအချိန်တွင်... နတ်ဆိုးနယ်မြေ နယ်စပ်ရှိ ကမ္ဘာနှစ်ခုကြား ချောက်နက်သည်... ထျန်းကျွင်းအဆင့်ရှိသော သက်ရှိများကိုသာ ဖြတ်သန်းခွင့်ပြု၏။
ချီမုန်၏မိခင်ဖြစ်သူ ချီလျိုပင်လျှင်... ယခုအချိန်၌ ထိုကောင်းကင်ချောက်နက်ကြီးကို... ဖြတ်ကျော်နိုင်ခြင်း မရှိသေးပေ။
ကုချန်၏အင်အားသည် ချီလျိုထက် အဆပေါင်းများစွာ သာလွန်နေသဖြင့်... သူသည် ကမ္ဘာနှစ်ခုကြား ချောက်နက်ကို ဖြတ်ကျော်ကာ... နတ်ဆိုးနယ်မြေထဲသို့ ဝင်ရောက်နိုင်မည် မဟုတ်ပေ။
ထို့အပြင်... ကုချန် နတ်ဆိုးနယ်မြေထဲသို့ ဝင်ရောက်နိုင်ခဲ့လျှင်ပင်... အလွန် အန္တရာယ်များလှ၏။
ထျန်းကျွင်းအဆင့်အရှင်မှ နတ်ဆိုးနယ်မြေ အရှင်များကို... အဆုံးမဲ့ကမ္ဘာထဲသို့ ဗြောင်ကျကျ ခေါ်ဆောင်ရဲခဲ့ခြင်းမှာ ...အဆုံးမဲ့ကမ္ဘာ၏ အဆုံးမဲ့တာအိုများသည် နတ်ဆိုးနယ်မြေနှင့်ယှဉ်လျှင်... များစွာ နိမ့်ကျနေသောကြောင့်ဖြစ်ပြီး... ၎င်းတို့အပေါ် မည်သည့် ဖိအားမှ မသက်ရောက်နိုင်ပေ။
သို့သော်... နတ်ဆိုးနယ်မြေ၏ ကောင်းကင်နှင့်မြေကြီးတာအိုမှာမူ အလွန် အစွမ်းထက်လှရာ... ပြင်ပသက်ရှိများ ဝင်ရောက်လာပါက... ပြင်းထန်သော ဖိနှိပ်မှုကို ခံရမည်မှာ အမှန်ပင် ဖြစ်သည်။
အကယ်၍... ကုချန်သည် နတ်ဆိုးနယ်မြေထဲသို့ ဝင်ရောက်လာပြီး... သူ၏အင်အားကို အကြီးအကျယ် ဖိနှိပ်ခံလိုက်ရပါက... နောက်ပိုင်း အန္တရာယ်တစ်စုံတစ်ရာနှင့် ကြုံတွေ့ရလျှင်... ကြီးမားသော ဆုံးရှုံးမှုများ ဖြစ်လာပေလိမ့်မည်။
ချီလျန်မျိုးနွယ်၏... အနာဂတ်အတွက် ကြည့်လျှင်ပင်... ချီမုန်သည် ကုချန်အား နတ်ဆိုးနယ်မြေသို့ မလာစေလိုပေ။ အကြောင်းမှာ ၎င်းသည် အန္တရာယ်များလွန်းလှသောကြောင့်ပင်။
သို့သော် ကုချန်သည် ချီမုန်၏စိုးရိမ်ပူပန်မှုများကို တည်ငြိမ်လွန်းစွာ တုံ့ပြန်ခဲ့သည်။
" ကိစ္စမရှိဘူး... ငါကိုယ်တော်မှာ ကိုယ်ပိုင်နည်းလမ်းတွေ ရှိတယ် "
ကုချန်သည် တည်ငြိမ်စွာဖြင့် လက်ကိုဝှေ့ယမ်းကာ ချီမုန်အား စကားဆက်မပြောရန် အချက်ပြလိုက်သည်။
ကမ္ဘာနှစ်ခုကြား ချောက်နက်ကို ဖြတ်ကျော်ခြင်းသည် ကုချန်အတွက် ခက်ခဲသော ကိစ္စမဟုတ်ပေ။
အကြောင်းမှာ... သူ၏လက်ရှိအဆင့်သည် လူသားတာအို ဧကရာဇ်အဆင့်တွင်သာ ရှိနေသေးပြီး... အင်မော်တယ်တက်လှမ်းခြင်းအဆင့်သို့... မရောက်ရှိသေးသောကြောင့် ဖြစ်သည်။ ကမ္ဘာနှစ်ခုကြား ချောက်နက်သည်... ကျင့်ကြံမှုအဆင့်ကိုသာ ဖိနှိပ်ပြီး... တိုက်ခိုက်ရေးစွမ်းအားကို ဖိနှိပ်ခြင်း မရှိပေ။ ထို့ကြောင့်... ကုချန်၏ အင်အားဖြင့်... ကမ္ဘာနှစ်ခုကြား ချောက်နက်ကို ပြီးပြည့်စုံစွာ ဖြတ်ကျော်ကာ... နတ်ဆိုးနယ်မြေထဲသို့ ဝင်ရောက်နိုင်မည် ဖြစ်သည်။
နတ်ဆိုးနယ်မြေထဲသို့ ဝင်ရောက်ပြီးသည်နှင့်... သူ၏ဒုတိယခန္ဓာကိုယ်သည် နတ်ဆိုးနယ်မြေ၏... ကောင်းကင်နှင့်မြေကြီးတာအိုကို ချက်ချင်း ချည်နှောင်၍... တံဆိပ်ခတ်နှိပ်လိုက်မည် ဖြစ်ရာ... အစစ်အမှန်နှင့် မခြားနားသော နတ်ဆိုးနယ်မြေ သက်ရှိတစ်ဦး ဖြစ်လာပေလိမ့်မည်။
ထိုအခါ နတ်ဆိုးနယ်မြေ၏ ကောင်းကင်နှင့်မြေကြီးထံမှ... မည်သည့် ဖိနှိပ်မှုကိုမျှ ခံရတော့မည် မဟုတ်ဘဲ... သူ၏တိုက်ခိုက်ရေးစွမ်းအား အပြည့်အဝကို ထုတ်ဖော်နိုင်မည် ဖြစ်သည်။
ထို့ကြောင့် ချီမုန် စိုးရိမ်နေသမျှ အရာအားလုံးသည် ကုချန်အတွက်မူ ဖြစ်နိုင်ခြေ မရှိပေ။
သို့သော် ကုချန်သည် ဤအသေးစိတ်အချက်အလက်များကို ချီမုန်အား ရှင်းပြနေမည် မဟုတ်ချေ။
မည်သို့ပင်ဆိုစေကာမူ... နတ်ဆိုးနယ်မြေသို့ ခရီးထွက်ရန်မှာ... ကုချန် ဟိုးအရင်ကတည်းက ဆုံးဖြတ်ထားပြီးသော... မဟာဗျူဟာတစ်ခု ဖြစ်သည်။
ယခုအခါတွင်မူ... သူ၏ နတ်ဆိုးနယ်မြေ ခရီးစဉ်တွင်... နောက်ထပ် ဦးတည်ရာနေရာတစ်ခုကို ထပ်မံဖြည့်စွက်လိုက်ခြင်းသာ ဖြစ်ပြီး... သူ၏ ခရီးစဉ်ကို မွမ်းမံကာ... ချီလျန်မျိုးနွယ်ထံသို့ တစ်ခေါက်သွားရောက်ရမည်သာ ဖြစ်သည်။