အခန်း (၂၅၉-၂၆၀)
Vol. 19 Ch. 259-260
အခန်း (၂၅၉) - ခွေးတစ်ကောင်မျှသာ၊ ကံဆိုးတဲ့ညီအစ်ကို၊ တကယ်ပဲ ထွက်သွားတော့မလို့လား
" အင်း..... "
ရှောင်ယောက်ထျန်းကျွင်း၏ အာမခံစကားကိုကြားလိုက်ရပြီးနောက် ချုံးဟွာထျန်းကျွင်းသည် ကျေနပ်အားရစွာဖြင့် ခေါင်းညိတ်လိုက်လေသည်။ ထို့နောက် ဟိန်းသံတစ်ချက်နှင့်အတူ သူ၏ပုံရိပ်သည် ခြေရာလက်ရာမကျန် ပျောက်ကွယ်သွားတော့သည်။
လက်ရှိတွင်... အင်မော်တယ်တစ်သောင်းမျှော်စင်သည် မင်ကူအင်မော်တယ်၏ သေဆုံးမှုကြောင့် ဖရိုဖရဲဖြစ်နေကာ... အောက်ပိုင်းနယ်မြေကို ဂရုစိုက်ရန် အချိန်မရှိချေ။ သူသည် မင်ကူအင်မော်တယ် သေဆုံးရသည့် အကြောင်းရင်းကို... အမြန်ဆုံး စုံစမ်းစစ်ဆေးရမည် ဖြစ်သည်။
ချုံးဟွာထျန်းကျွင်း ထွက်ခွာသွားပြီးနောက်... ရှောင်ယောက်ထျန်းကျွင်းသည် ခေါင်းကို ဖြည်းညှင်းစွာ မော့လိုက်ပြီး... ချုံးဟွာထျန်းကျွင်း ရပ်ခဲ့သည့်နေရာသို့ လှမ်းကြည့်လိုက်သည်။ သူ၏မျက်လုံးများထဲတွင် မသိသာသော အမုန်းတရား အရိပ်အယောင်တစ်ခု ဖြတ်ပြေးသွားခဲ့၏။
" ဒီထျန်းကျွင်းကို အင်မော်တယ်တစ်သောင်းမျှော်စင်ရဲ့ အင်မော်တယ်နယ်မြေ ပြောရေးဆိုခွင့်ရှိသူအဖြစ် ရွေးချယ်တယ်တဲ့လား... ဟက်! ဘာပြောရေးဆိုခွင့်ရှိသူလဲ... အင်မော်တယ်တစ်သောင်းမျှော်စင်ရဲ့ မျက်လုံးထဲမှာတော့ ခွေးတစ်ကောင်ထက် မပိုပါဘူး "
ရှောင်ယောက်ထျန်းကျွင်းသည် ဂရုမစိုက်သောအသံဖြင့် ရေရွတ်လိုက်သည်။
သူ ရှင်းရှင်းလင်းလင်း မြင်နေရ၏။ အင်မော်တယ်တစ်သောင်းမျှော်စင်သည်... သူ့အား သက်တမ်းရှည်ပစ္စည်းများ ပေးသနားထားသော်လည်း... သူတို့၏မျက်လုံးထဲတွင်မူ သူသည် မွေးထားသော... ခွေးတစ်ကောင်သာ ဖြစ်သည်။ အင်မော်တယ်တစ်သောင်းမျှော်စင်သည် သူ့အား သူတို့၏လူရင်းအဖြစ် မည်သည့်အခါမျှ သတ်မှတ်ခဲ့ခြင်း မရှိချေ။
ရှောင်ယောက်ထျန်းကျွင်း အလိုချင်ဆုံးအရာမှာ အဘယ်နည်း။
အင်မော်တယ်တက်လှမ်းခြင်းပင် ဖြစ်သည်။
သက်တမ်းရှည်ပစ္စည်းများကို ဆက်တိုက် စုပ်ယူခြင်းက သူ့အား ထာဝရအသက်ရှင်စေနိုင်သော်လည်း တည်မြဲမှုမရှိပေ။ အကယ်၍... တစ်နေ့တွင် အင်မော်တယ်တစ်သောင်းမျှော်စင်မှ... သက်တမ်းရှည်ပစ္စည်းများ ပေးသနားခြင်းကို ရပ်တန့်လိုက်ပါက... သူသည် သေဆုံးရမည်သာ ဖြစ်သည်။
ဤအချက်သည်ပင် အင်မော်တယ်တစ်သောင်းမျှော်စင်မှ သူ့အား ထိန်းချုပ်ထားသည့် 'အားနည်းချက်' ဖြစ်လာခဲ့သည်။
ရှောင်ယောက်ထျန်းကျွင်း အင်မော်တယ်အဖြစ် မတက်လှမ်းနိုင်သရွေ့... အင်မော်တယ်တစ်သောင်းမျှော်စင်သည် သက်တမ်းရှည်ပစ္စည်း အနည်းငယ်ကို အသုံးပြုကာ... သူ့အား အမြဲတစေ ထိန်းချုပ်ခိုင်းစေနေမည် ဖြစ်သည်။
ယခင်က... ရှောင်ယောက်ထျန်းကျွင်းသည် အင်မော်တယ်နယ်မြေသို့ တက်လှမ်းနိုင်မည့် လမ်းကြောင်းဖွင့်ပေးရန်... အင်မော်တယ်တစ်သောင်းမျှော်စင်အား မတောင်းဆိုခဲ့ဖူးသည်တော့ မဟုတ်ပေ။
သို့သော် အကြိမ်တိုင်းတွင် သူ၏တောင်းဆိုမှုသည် အင်မော်တယ်တစ်သောင်းမျှော်စင်၏ ငြင်းပယ်ခြင်းကိုသာ ခံခဲ့ရသည်။
ပြန်လည်ရရှိသော အဖြေမှာ... အင်မော်တယ်နယ်မြေနှင့် အောက်ပိုင်းနယ်မြေကြားရှိ လမ်းကြောင်းကို... အင်မော်တယ်တံခါးဖြင့် ပိတ်ထားသည်မှာ ကြာပြီဖြစ်၍ ဖွင့်ရန် မဖြစ်နိုင်ကြောင်းနှင့်... ရှောင်ယောက်ထျန်းကျွင်းအနေဖြင့် အင်မော်တယ်နယ်မြေသို့ တက်ရောက်ရန် မဖြစ်နိုင်ကြောင်းပင် ဖြစ်သည်။
ဟင်းဟင်း... ဒါတွေအားလုံးက ဆင်ခြေတွေပါပဲ။
အကယ်၍ အင်မော်တယ်တံခါးကို အမှန်တကယ် ဖွင့်မရပါက... ရွှယ်ကျန်းနှင့် အင်မော်တယ်တစ်သောင်းမျှော်စင်မှ... စစ်မှန်သော အင်မော်တယ်များသည် အင်မော်တယ်နယ်မြေမှ အောက်ပိုင်းနယ်မြေသို့... မည်သို့ ဆင်းသက်လာနိုင်မည်နည်း။
အဆုံးစွန်ထိ ပြောရလျှင်... အင်မော်တယ်တစ်သောင်းမျှော်စင်သည် သူ့အား လူရင်းအဖြစ်... တစ်ခါမျှ သဘောမထားခဲ့ဖူးသောကြောင့်သာ ဖြစ်သည်။ ထို့ကြောင့် သူ့အတွက် ကြီးမားသော တန်ဖိုးပေးဆပ်ရန် မလိုလားကြပေ။
ရှောင်ယောက်ထျန်းကျွင်းသည် ဤအချက်ကို သိရှိပြီး ဒေါသထွက်မိသော်လည်း သူတတ်နိုင်သည်မှာ ဘာမျှမရှိချေ။
အဘယ်ကြောင့်ဆိုသော်... သူ၏ အသက်ရှင်ခြင်းနှင့် သေဆုံးခြင်းသည် အင်မော်တယ်တစ်သောင်းမျှော်စင်၏ လက်ထဲတွင်... ရှိနေသောကြောင့်ပင်။ အကယ်၍... အင်မော်တယ်တစ်သောင်းမျှော်စင်မှ သက်တမ်းရှည်ပစ္စည်းများ ပေးသနားခြင်းကို ရပ်ဆိုင်းလိုက်ပါက... သူ့ကို စောင့်ကြိုနေသည်မှာ သက်တမ်းကုန်ဆုံးခြင်းနှင့် ဝမ်းနည်းဖွယ်ရာ သေဆုံးခြင်းသာ ဖြစ်သည်။
" ကံကောင်းတာက... ဒီထျန်းကျွင်းက အင်မော်တယ်တစ်သောင်းမျှော်စင်အပေါ် ဘယ်တုန်းကမှ မျှော်လင့်ချက်မထားခဲ့ဘူး... အင်မော်တယ်တက်လှမ်းဖို့ဆိုတာ ကိုယ့်ကိုယ်ကိုပဲ အားကိုးရမှာ "
ရှောင်ယောက်ထျန်းကျွင်း၏ မျက်လုံးများထဲတွင် စူးရှသော အရောင်တစ်ချက် လက်သွားခဲ့သည်။ သူသည် မျက်လုံးများကို အသာအယာမှိတ်ကာ အာရုံခံလိုက်၏။
နောက်တစ်ခဏတွင်... ဝိုးတဝါးပုံရိပ်တစ်ခုသည် သူ၏ခန္ဓာကိုယ်မှ ကွဲထွက်သွားပြီး ...ကျယ်ပြောလှသော ဟွမ်သွမ့်နယ်မြေ၏ နက်ရှိုင်းရာအရပ်ဆီသို့... ပျံသန်းသွားတော့သည်။
.........
" အစ်ကိုကြီး... ငါတို့ နောက်ဘယ်သွားကြမလဲ "
သက်တမ်းရှည်နန်းတော် တည်ရှိရာနေရာမှ အလျင်အမြန် ထွက်ခွာလာပြီးနောက် လုယီသည် ထိုဘေးဆိုးကြီးမှ လွတ်မြောက်ခဲ့ပြီဖြစ်၍ သက်ပြင်းချလိုက်မိသည်။
သို့သော် ချက်ချင်းဆိုသလိုပင် တွေဝေမှုနှင့် ဆုံးရှုံးမှု ခံစားချက်တို့က လုယီ၏ စိတ်နှလုံးကို လွှမ်းမိုးသွား၏။
သက်တမ်းရှည်နန်းတော် ပျက်စီးသွားခြင်းနှင့်အတူ ညီအစ်ကိုနှစ်ဦး၏ သက်တမ်းရှည်ရန် မျှော်လင့်ချက်သည်လည်း ပျက်သုဉ်းသွားခဲ့ရပြီ ဖြစ်သည်။
ယခု သူတို့နှစ်ဦး မည်သည့်နေရာသို့ သွားရမည်နည်း။
" တစ်ဆင့်ချင်းပဲ စဉ်းစားကြတာပေါ့။ အရင်ဆုံး လုနယ်မြေကို ပြန်ကြမယ် "
လုကျားသည် မှိုင်တွေသော မျက်နှာထားဖြင့် ပြောဆိုလိုက်၏။
ဟွမ်သွမ့်ပင်လယ်သည် တကယ်ပင် အန္တရာယ်များလွန်းလှသည်။ ကြောက်မက်ဖွယ်ကောင်းသော ဖြစ်တည်မှုများမှာ အဆုံးမရှိ ထွက်ပေါ်လျက်ရှိသည်။
မူလက... သက်တမ်းရှည်နန်းတော်သည် အရာအားလုံးကို လွှမ်းမိုးထားနိုင်သော အထွတ်အထိပ် အင်အားစုတစ်ခုဟု... သူ ထင်မှတ်ခဲ့သော်လည်း လူတစ်ယောက်တည်း၏ လက်ချက်ဖြင့်... တခဏအတွင်း အလုံးစုံ ပျက်စီးသွားလိမ့်မည်ဟု... လုံးဝ မျှော်လင့်မထားခဲ့မိပေ။
ဤအချက်က လုကျားအား... ဤဟွမ်သွမ့်ပင်လယ်တွင် သူတို့ညီအစ်ကို၏ အင်အားမှာ လုံလောက်မှု မရှိကြောင်း... နက်နက်ရှိုင်းရှိုင်း သဘောပေါက်သွားစေခဲ့သည်။
ကျယ်ပြောလှသော ဟွမ်သွမ့်ပင်လယ်သည်... အဆုံးမဲ့ အန္တရာယ်များဖြင့် ပြည့်နှက်နေသည်ဖြစ်ရာ... လုနယ်မြေသို့ ဦးစွာပြန်ပြီးမှ ရေရှည်အတွက် စီစဉ်ခြင်းက... ပိုကောင်းပေလိမ့်မည်။
" ဟူး... ဒီလိုပဲ လုပ်ရတော့မှာပေါ့ "
လုယီသည် သက်ပြင်းချလိုက်၏။ မလိုလားအပ်သော်လည်း လုကျား၏ အကြံပြုချက်ကို သဘောတူရုံမှတပါး အခြားမရှိတော့ချေ။
ခဏတာမျှကြာလျှင်... လုညီအစ်ကိုနှစ်ဦးစလုံးသည် စကားပြောရန် စိတ်မပါတော့ဘဲ... လုနယ်မြေသို့ အမြန်ပြန်ရန်သာ အာရုံစိုက်နေကြသည်။
" နေပါဦး... မင်းတို့နှစ်ယောက် "
သူတို့နှစ်ဦး အလျင်အမြန် သွားနေစဉ်မှာပင်... ဝိုးတဝါးပုံရိပ်တစ်ခုသည် လေဟာနယ်ထဲမှ ရုတ်တရက် ပေါ်ထွက်လာပြီး... သူတို့၏ လမ်းကို ပိတ်ဆို့လိုက်၏။
" ရှောင်ယောက်ထျန်းကျွင်း? "
ရှေးဟောင်းတာအိုဝတ်စုံကို ဝတ်ဆင်ထားပြီး... ရုတ်တရက် ပေါ်လာသော ပုံရိပ်ကို ကြည့်ရင်း..
လုကျားနှင့် လုယီတို့၏ မျက်လုံးများတွင်... သတိထားမှုများ ချက်ချင်း ပြည့်နှက်သွား၏။
" ရှောင်ယောက်ထျန်းကျွင်း... သက်တမ်းရှည်နန်းတော်က ပျက်စီးသွားပြီ "
လုကျားသည် ရှောင်ယောက်ထျန်းကျွင်းကို သတိကြီးစွာကြည့်ရင်း... "အရင်က ထျန်းကျွင်း ပေးခဲ့တဲ့ ကတိတွေကတော့ ဖြစ်လာတော့မယ် မထင်ဘူး" ဟု... ဖြည်းညှင်းစွာ ပြောဆိုလိုက်သည်။
လုကျား၏အသံထဲတွင် ဖိနှိပ်ထားသော ဒေါသအရိပ်အယောင် အနည်းငယ် ပါဝင်နေ၏။
အကယ်၍သာ သူတို့ နောက်ကျမရောက်ခဲ့လျှင်... ခဏလေး စောရောက်ခဲ့လျှင်ပင် ထိုဘေးဆိုးကြီး၏ လက်ချက်ဖြင့်... အသာလေး အသတ်ခံလိုက်ရနိုင်ပေသည်။
ထိုအရာအားလုံး၏ တရားခံမှာ... သူတို့အား သက်တမ်းရှည်နန်းတော်သို့ ဖိတ်ခေါ်ခဲ့သော... ရှောင်ယောက်ထျန်းကျွင်းပင် ဖြစ်သည်။ လုကျား မည်သို့ ဒေါသမထွက်ဘဲ နေနိုင်မည်နည်း။
သို့သော်... ရှောင်ယောက်ထျန်းကျွင်း၏ အင်အားမှာ သူ့ထက် များစွာ သာလွန်ကြောင်း သိထားသောကြောင့်သာ... လုကျားသည် ဒေါသကို ထုတ်မပြရဲခြင်း ဖြစ်သည်။
" သက်တမ်းရှည်နန်းတော် ပျက်စီးသွားတဲ့အကြောင်း... ဒီထျန်းကျွင်း သိပြီးသားပါ... ဒီလို အပြောင်းအလဲ ဖြစ်လာမယ်လို့... ဒီထျန်းကျွင်း မမျှော်လင့်ထားခဲ့မိဘူး "
ရှောင်ယောက်ထျန်းကျွင်းသည် စိတ်လှုပ်ရှားစွာ သက်ပြင်းချရင်း.....
" ဒီထျန်းကျွင်း ရောက်သွားတဲ့အချိန်မှာ အဲ့ဒီအရူးက ထွက်ပြေးသွားပြီ " ဟု ပြောကြားလေသည်။
ထွက်ပြေးသွားသည်?
လုကျားနှင့် လုယီတို့သည် ရှောင်ယောက်ထျန်းကျွင်းအား မကြည့်ဘဲ မနေနိုင် ဖြစ်သွားရသည်။
ရှောင်ယောက်ထျန်းကျွင်းသည် သက်တမ်းရှည်နန်းတော်ကို ဖျက်ဆီးခဲ့သော ထိုဘေးဆိုးကြီးကို တကယ်ပင် မကြောက်ရွံ့ခြင်းလော သို့မဟုတ် ဖြစ်ပြီးမှ မျက်နှာမပျက်အောင် ဟန်ဆောင်နေခြင်းလော ဆိုသည်ကို သူတို့ မသေချာပေ။
မည်သို့ပင်ဆိုစေကာမူ... အခြေအနေများ ဤသို့ဖြစ်လာပြီဖြစ်ရာ... လုကျားသည် ရှောင်ယောက်ထျန်းကျွင်းနှင့် ယဉ်ကျေးဟန်ဆောင်နေရန်... ရည်ရွယ်ချက် မရှိတော့ချေ။
သူသည် ရှောင်ယောက်ထျန်းကျွင်းကို ကြည့်ကာ တစ်လုံးချင်း ပြောဆိုလိုက်၏။
" ထျန်းကျွင်း... ကျွန်တော်တို့ ညီအစ်ကိုတွေ ထပ်ခါထပ်ခါ စဉ်းစားပြီးပြီ... ဟွမ်သွမ့်ပင်လယ်က အရမ်း အန္တရာယ်များလွန်းတယ်... လုနယ်မြေကိုပြန်ပြီး ကြိုးကြိုးစားစား ကျင့်ကြံတာက ပိုစိတ်ချရတယ်... ထျန်းကျွင်းမှာ တခြားကိစ္စ မရှိတော့ရင် ကျွန်တော်တို့ သွားခွင့်ပြုပါဦး "
ဤအခြေအနေတွင်... ရှောင်ယောက်ထျန်းကျွင်း ငြင်းပယ်မည်ကို ကြောက်ရွံ့သကဲ့သို့... လုကျားနှင့် လုယီတို့သည် တိတ်တဆိတ် သတိထားလိုက်ကာ... တိုက်ခိုက်ရန် အသင့်ပြင်ထားလိုက်ကြသည်။
သို့သော် ရှောင်ယောက်ထျန်းကျွင်း၏ နောက်ဆက်တွဲ တုံ့ပြန်မှုသည် လုကျားနှင့် လုယီတို့၏ စိတ်ကို သက်သာရာရသွားစေခဲ့သည်။
" ကြည့်ရတာ မင်းတို့နှစ်ယောက်က ဒီထျန်းကျွင်းနဲ့အတူ သက်တမ်းရှည်နန်းတော်ကို ပြန်လည်တည်ဆောက်ဖို့ အစီအစဉ် မရှိကြဘူးပေါ့ "
ရှောင်ယောက်ထျန်းကျွင်းမှ.....
" ကောင်းပြီလေ... လူတိုင်းမှာ ကိုယ်ပိုင်ဆန္ဒတွေ ရှိကြတာပဲ... မင်းတို့နှစ်ယောက် ဆုံးဖြတ်ပြီးပြီဆိုမှတော့ ဒီထျန်းကျွင်းကလဲ အတင်းအကျပ် မလုပ်ပါဘူး... မင်းတို့ သွားလို့ရပါပြီ " ဟု ပေါ့ပါးစွာ ပြောဆိုလိုက်သည်။
ဤရှောင်ယောက်ထျန်းကျွင်းသည် တကယ်ပင် သူတို့အား အခက်တွေ့အောင် လုပ်မည့်ပုံမပေါ်ချေ။
ရှောင်ယောက်ထျန်းကျွင်း၏ သဘောတူညီသော အမူအရာကို မြင်လိုက်ရသဖြင့်... လုကျားနှင့် လုယီတို့သည် တိတ်တဆိတ် စိတ်သက်သာရာရသွားပြီး... လက်သီးဆုပ်ကာ အရိုအသေပြုရင်း ပြောဆိုလိုက်ကြသည်။
" ဒါဆိုရင် ကျွန်တော်တို့ သွားပါရစေ "
ထိုသို့ပြောပြီးနောက်... ညီအစ်ကိုနှစ်ဦးစလုံးသည် အလင်းတန်းများအဖြစ် ပြောင်းလဲကာ... ထိုနေရာမှ ထွက်ခွာရန် ပြင်လိုက်ကြလေသည်။
သို့သော်... လုကျားနှင့် လုယီတို့ ထွက်ခွာတော့မည့် ဆဲဆဲတွင်... ရှောင်ယောက်ထျန်းကျွင်း၏ မူလက နူးညံ့သိမ်မွေ့သော အကြည့်သည်... ရုတ်တရက် အေးစက်သွားခဲ့လေသည်။
" ငါက သွားဆိုတာနဲ့ မင်းတို့က တကယ် ထွက်သွားကြတာလား "
ထိုအေးစက်သော အသံ ထွက်ပေါ်လာသည်နှင့် တပြိုင်နက်... လုကျားနှင့် လုယီတို့၏ ရင်ထဲတွင်... ရုတ်တရက် စိမ့်ခနဲ ခံစားလိုက်ကြရသည်။
အဘယ်ကြောင့်ဆိုသော်... သူတို့၏ နောက်ကျောဘက်တွင် မရေမတွက်နိုင်သော အမိန့်သင်္ကေတများ ဝန်းရံထားသည့် ဟွမ်သွမ့်လက်ဝါးကြီးတစ်ခု ပေါ်လာပြီး... သူတို့ပတ်ဝန်းကျင်ရှိ လေဟာနယ်ကို အပြည့်အဝ ပိတ်ဆို့ကာ... အတွင်းဘက်သို့ ကျုံ့ဝင်လာသောကြောင့်ပင်။
ထိုလုပ်ရပ်သည် လုကျားနှင့် လုယီတို့၏အသက်ကို ယူရန် ရည်ရွယ်ထားပုံပင်။
အခန်း (၂၆၀) - လျှို့ဝှက်ဆန်းကြယ်သော ပစ္စည်း၊ ကောက်ကျစ်စဉ်းလဲခြင်းနှင့် သံလိုက်အိမ်မြှောင်အား ရှာဖွေခြင်း
" ရှောင်ယောက်ထျန်းကျွင်း! ခင်ဗျား ဘာလုပ်တာလဲ "
လုကျားသည် ခေါင်းလှည့်ကြည့်လိုက်ရာ သူ၏မျက်လုံးများထဲတွင် ထိတ်လန့်မှုနှင့် ဒေါသများ ပြည့်နှက်နေလေသည်။
သူတို့ညီအစ်ကိုနှစ်ယောက်အား... ထွက်ခွာခွင့်ပြုရန် ရည်ရွယ်ထားပြီးဖြစ်သော ရှောင်ယောက်ထျန်းကျွင်းသည်... အဘယ်ကြောင့် ယခုအချိန်ကျမှ ရုတ်တရက် အလစ်ဝင်တိုက်ခိုက်ရသနည်းဆိုသည်ကို... သူနားမလည်နိုင်ချေ။
" ဘာလုပ်တာလဲ ဟုတ်လား... ငါ ထျန်းကျွင်းက မင်းတို့နှစ်ယောက်ကို အခွင့်အရေးပေးခဲ့တယ်လေ... ဒါပေမယ့် မင်းတို့က အမိအရ မဆုပ်ကိုင်နိုင်ခဲ့ဘူး မဟုတ်လား... ဒီလိုမှတော့ လိမ်လိမ်မ္မာမ္မာနဲ့ပဲ... သေလမ်းကို ရွေးလိုက်ကြတော့ "
ရှောင်ယောက်ထျန်းကျွင်း၏ အကြည့်များမှာ အေးစက်နေသော်လည်း... သူ၏လုပ်ရပ်များမှာမူ အနည်းငယ်မျှ ရပ်တန့်သွားခြင်း... မရှိပေ။ ဧရာမဟွမ်သွမ့်လက်ဝါးကြီးသည် ရုတ်တရက် ပိတ်ကျသွားပြီး... လုကျားနှင့် လုယီတို့အား လုံးဝချေမှုန်းပစ်ရန်... ရည်ရွယ်လိုက်သည်။
သူတို့သည် ပုရွက်ဆိတ်နှစ်ကောင်မျှသာ ဖြစ်သည်။ မူလက... သူတို့ကို အချိန်အနည်းငယ်ကြာအောင် 'ပြုစုပျိုးထောင်' ထားရန် စိတ်ကူးခဲ့သော်လည်း... ဤနှစ်ယောက်သည် မိမိတို့၏အခြေအနေကို နားမလည်ကြသဖြင့်... ဆက်လက်အသက်ရှင်နေစေရန် အကြောင်းပြချက် မရှိတော့ချေ။
" ပူးပေါင်းလိုက်ကြစို့ "
အထက်မှ ကျဆင်းလာသော ဧရာမဟွမ်သွမ့်လက်ဝါးကြီးကို မြင်လိုက်ရသောအခါ လုကျားသည် ဒေါသတကြီး ဟစ်အော်လိုက်၏။
ရှောင်ယောက်ထျန်းကျွင်းသည်... မည်သို့ပင်ဆိုစေကာမူ ထျန်းကျွင်းအဆင့် ကျင့်ကြံခြင်းပိုင်ဆိုင်ထားသူဖြစ်ရာ... သူတို့နှင့် နှိုင်းယှဉ်၍မရအောင် သန်မာသူဖြစ်သည်။ အသက်ရှင်ရပ်တည်နိုင်ရန်အတွက်... သူတို့ ပူးပေါင်းမှသာ ဖြစ်ပေမည်။
လုယီသည်လည်း ဤအချက်ကို သိရှိထားပုံရသည်။ လုကျား ပြောစရာမလိုဘဲ... သူသည် လုကျားနှင့် တိတ်တဆိတ် ပူးပေါင်းလိုက်ကာ... လွှမ်းမိုးဖိစီးလာသော ဧရာမဟွမ်သွမ့်လက်ဝါးကြီးကို... အတူတကွ ခုခံလိုက်ကြသည်။
လုနယ်မြေမှ လာကြသော လုညီအစ်ကိုများသည် သွေးမျိုးဆက် ဆက်နွယ်မှုရှိကြသည်။ သူတို့၏ ပူးပေါင်းဆောင်ရွက်မှုသည် အလွန်တိတ်ဆိတ်သိမ်မွေ့ပြီး... အတူတကွ လက်တွဲလိုက်သောအခါ တစ်ဦးချင်းစီ လှုပ်ရှားသည်ထက်... ပိုမိုအစွမ်းထက်သော အကျိုးသက်ရောက်မှုကို ပြသနိုင်ခဲ့သည်။
သူတို့၏ ပူးပေါင်းတိုက်ခိုက်မှုကို အထွတ်အထိပ်အရှင်အဆင့်ရှိသူများပင် တောင့်ခံနိုင်ရန် ခက်ခဲလိမ့်မည်ဖြစ်သည်။
သို့သော်... လုကျားနှင့် လုယီတို့၏ ခုခံမှုကို ကြည့်ရင်း... ရှောင်ယောက်ထျန်းကျွင်း၏ မျက်နှာအမူအရာမှာ... အေးစက်တည်ငြိမ်နေဆဲဖြစ်သည်။
သူတို့ကို အစကတည်းက ရွေးချယ်ခဲ့ရသည့် အကြောင်းရင်းမှာ... သမိုင်းတစ်လျှောက် သူမြင်ဖူးသမျှသော ဧကရာဇ်အဆင့် ကျင့်ကြံသူများထဲတွင်ပင်... လုညီအစ်ကိုများ၏ မွေးရာပါပါရမီသည် ထိပ်တန်းအဆင့်ဖြစ်သောကြောင့်ပင်။
သို့မဟုတ်ပါက... အဆုံးမဲ့ကမ္ဘာတစ်ခုတည်းတွင်ပင် မွေးဖွားလာသော ဧကရာဇ်အဆင့်ကျင့်ကြံသူများစွာ ရှိနေပါလျက်... သူသည် အဘယ်ကြောင့် ဤနှစ်ယောက်ကိုမှ... အထူးတလည် ရွေးချယ်ရမည်နည်း။
သို့သော်... ဧကရာဇ်အဆင့်ကျင့်ကြံသူတစ်ဦးသည် မည်မျှပင် သန်မာပါစေ... ဧကရာဇ်အဆင့်ကျင့်ကြံသူတစ်ဦးသာ ဖြစ်နေသေးသည်။ ရှေးဟောင်းထျန်းကျွင်းတစ်ပါးဖြစ်သော သူ၏ရှေ့တွင်မူ... ဤနှစ်ယောက်၏ ခုခံမှုသည် အချည်းနှီးသာဖြစ်ပြီး... ရယ်စရာကောင်းလှပေသည်။
" ဝုန်း! "
လုညီအစ်ကိုများ ပူးပေါင်းလိုက်ပြီး... သူတို့၏ ဆက်တိုက်ထွက်ပေါ်လာသော ဧကရာဇ်အဆင့်စွမ်းအားများသည်... ဧရာမဟွမ်သွမ့်လက်ဝါးကြီးကို ရိုက်ခတ်သွားလေသည်။
သို့သော်... ညီအစ်ကိုနှစ်ဦး စိတ်ပျက်အားငယ်ရသည်မှာ... သူတို့ မည်သို့သော တိုက်ခိုက်မှုမျိုးကို ထုတ်ဖော်သည်ဖြစ်စေ... ဧရာမဟွမ်သွမ့်လက်ဝါးကြီးသည် တုတ်တုတ်မျှ မလှုပ်ရှားပေ။
နောက်ဆုံးတွင်... ညီအစ်ကိုနှစ်ဦး၏ မျှော်လင့်ချက်မဲ့နေသော အကြည့်များအောက်၌... ဧရာမဟွမ်သွမ့်လက်ဝါးကြီးသည် ရုတ်တရက် ပိတ်ကျသွားပြီး... ညီအစ်ကိုနှစ်ဦး၏ ခန္ဓာကိုယ်များကို လုံးဝကြေမွသွားစေကာ... သူတို့၏ဝိညာဉ်များကိုပင် ဖုန်မှုန့်အဖြစ် ကြေပျက်သွားစေတော့သည်။
လုညီအစ်ကိုများ သေဆုံးသွားပြီးနောက်... ပိုင်ရှင်မဲ့နေသော အသားနှင့် တာအိုအစုအဝေးနှစ်ခုကို... လေဟာနယ်ထဲတွင် ချန်ထားရစ်ခဲ့၏။ ထိုအသားနှင့် တာအိုအစုအဝေးနှစ်ခုအတွင်း၌... ထာဝရချီများ လည်ပတ်နေသည်ကို... မှိန်ဖျဖျ မြင်တွေ့နိုင်သည်။
ဤအသားနှင့် တာအိုအစုအဝေးနှစ်ခုစလုံးသည်... လုညီအစ်ကိုများ သေဆုံးပြီးနောက် ပြောင်းလဲသွားသော အရာများဖြစ်ပြီး... ရှောင်ယောက်ထျန်းကျွင်းမှ ရည်ရွယ်ချက်ရှိရှိ ချန်ထားခဲ့ခြင်းဖြစ်သည်။
" မင်းတို့ ငါ့ဆီက ယူသွားတဲ့အရာတွေကို ငါ့ဆီ ပြန်အန်ထုတ်ပေးရမှာ သဘာဝပဲ "
ရှောင်ယောက်ထျန်းကျွင်းသည် အေးစက်စွာ နှာခေါင်းရှုံ့လိုက်ပြီး ပါးစပ်ဟကာ ရှူသွင်းလိုက်လေသည်။ ကြီးမားသော တာအိုစွမ်းအားများ ကိန်းအောင်းနေသည့် အသားနှင့် တာအိုအစုအဝေးနှစ်ခုသည် သူ၏ဝမ်းဗိုက်ထဲသို့ သန့်စင်ဝင်ရောက်သွားတော့သည်။
ရှောင်ယောက်ထျန်းကျွင်း၏ ရင်ဘတ်ထဲတွင်... နှလုံးသားပုံသဏ္ဍာန်ရှိသော လျှို့ဝှက်ဆန်းကြယ်သည့် အရာဝတ္ထုတစ်ခု ရှိနေပြီး... ၎င်း၏မျက်နှာပြင်တွင် မှိန်ဖျော့သော တာအိုချည်နှောင်မှုအလွှာများ ရစ်ပတ်ထားကာ... စည်းချက်ကျကျ ခုန်လှုပ်နေသည်ကို မှိန်ဖျဖျ မြင်တွေ့ရသည်။
လုကျားနှင့် လုယီတို့၏ အသားနှင့် တာအိုများ မျိုချခံရပြီးနောက်... ၎င်းတို့သည် မမြင်နိုင်သော ဆွဲအားတစ်ခု၏ ဆွဲယူခြင်းခံရသကဲ့သို့... ထိုလျှို့ဝှက်ဆန်းကြယ်သော အရာဝတ္ထုထဲသို့ ချက်ချင်း ဝင်ရောက်သွားကာ... မျက်နှာပြင်ပေါ်တွင် ရစ်ပတ်ထားသော တာအိုချည်နှောင်မှုအနည်းငယ်ကို... လင်းလက်သွားစေ၏။
ဤလျှို့ဝှက်ဆန်းကြယ်သော အရာဝတ္ထုကို ဝန်းရံထားသော... တာအိုချည်နှောင်မှု အနည်းငယ် လင်းလက်သွားသည်ကို... မှိန်ဖျဖျ တွေ့မြင်ရသည်။
ဤအရာအားလုံး ပြီးဆုံးသွားပြီးနောက်... ရှောင်ယောက်ထျန်းကျွင်းသည် နှစ်ခြိုက်စွာ အသက်ပြင်းပြင်းရှူသွင်းလိုက်ပြီး... ထွက်ခွာရန် ပြင်ဆင်လိုက်သည်။
သို့သော်... ဤအချိန်တွင် ဟွမ်သွမ့်ပင်လယ်၏ အဝေးတစ်နေရာမှ ပစ်ခတ်လိုက်သကဲ့သို့... ပြိုင်ဘက်ကင်းသော ထက်မြက်မှုများကို သယ်ဆောင်လာသည့်... စူးရှအေးစက်သော အလင်းတန်းတစ်ခု ရောက်ရှိလာခဲ့၏။ ၎င်း မရောက်လာမီကပင်... ရှောင်ယောက်ထျန်းကျွင်း၏ ဝိညာဉ်ထဲတွင်... ရုတ်တရက် ထိတ်လန့်မှုကို ဖြစ်ပေါ်စေခဲ့သည်။
" မကောင်းတော့ဘူး "
ရှောင်ယောက်ထျန်းကျွင်း လွန်စွာ ထိတ်လန့်သွားရ၏။ သူ၏ဝိညာဉ်ကိုပင် တုန်လှုပ်သွားစေသည့် ဤစူးရှသော စိတ်ဆန္ဒသည်... ကုချန်၏လက်ထဲရှိ အတိုင်းအဆမဲ့ဓား၏ ချီဖြစ်ကြောင်း... သူအာရုံခံမိလိုက်သောကြောင့်ပင်။
သူသည်... လုညီအစ်ကိုများကို အရေးယူလိုက်ရုံသာ ရှိသေးသော်ငြား... ကုချန်မှာ တုံ့ပြန်ပြီးဖြစ်ကာ... ဤဓားချက်ကို ထုတ်လွှတ်လိုက်ခြင်းဖြစ်သည်။
လုညီအစ်ကိုများ၏ လှုပ်ရှားမှုတိုင်းသည် ကုချန်၏ ထိန်းချုပ်မှုအောက်တွင် ရှိနေသည်မှာ ထင်ရှားလှပေသည်။
" ဟွန်း... တကယ့် ကောက်ကျစ်တဲ့ကောင်စုတ်လေးပဲ... ကံကောင်းလို့ ငါထျန်းကျွင်းက စောစောစီးစီး ပြင်ဆင်ထားခဲ့တာ "
ရှောင်ယောက်ထျန်းကျွင်းသည် အေးစက်စွာ နှာခေါင်းရှုံ့လိုက်သည်။ ကနဦး ထိတ်လန့်မှု ဖြစ်ပြီးနောက် သူ လျင်မြန်စွာ ပြန်လည် တည်ငြိမ်သွား၏။
ကုချန်၏ အတိုင်းအဆမဲ့ဓားဖြင့် ပစ်မှတ်ထားခံရပြီဆိုလျှင်... ကမ္ဘာမြေအဆုံးထိ ထွက်ပြေးလည်း အချည်းနှီးသာဖြစ်ကြောင်း... သူသိသည်။ အရိုးတွင် တွယ်ကပ်နေသော လောက်ကောင်ကဲ့သို့... ဤဓားအလင်းသည် သူ့ကို မီအောင်... လိုက်လာလိမ့်မည်ဖြစ်သည်။
သို့သော် ကံမကောင်းစွာဖြင့် သူ ထွက်ပြေးရန် လုံးဝမလိုအပ်ချေ။
" ကုချန်... ငါထျန်းကျွင်းက မင်းနဲ့ ဒီစာရင်းကို... နောက်ကျရင် ကိုယ်တိုင်ကိုယ်ကျ ရှင်းမယ် "
ရှောင်ယောက်ထျန်းကျွင်းသည်... အတိုင်းအဆမဲ့ဓား လာရာလမ်းကြောင်းကို လေးလေးနက်နက် ကြည့်လိုက်ပြီးနောက်... မည်သည့် တုံ့ဆိုင်းမှုမှမရှိဘဲ သူ၏ခန္ဓာကိုယ်ကို ချက်ချင်း ဖြိုခွဲလိုက်ရာ... လုံးဝပျောက်ကွယ်သွားတော့သည်။
ရှောင်ယောက်ထျန်းကျွင်းသည် တကယ်ပင် ကိုယ့်ကိုယ်ကိုယ် ဖျက်ဆီးလိုက်ခြင်းဖြစ်သည်။
ရှောင်ယောက်ထျန်းကျွင်း ကိုယ့်ကိုယ်ကိုယ် ဖျက်ဆီးပြီး တစ်ခဏအကြာတွင်... မျက်စိကျိန်းမတတ် ဓားအလင်းတန်းများ သယ်ဆောင်လာသော အတိုင်းအဆမဲ့ဓားသည်... ဤလေဟာနယ်နယ်မြေသို့ ရောက်ရှိလာခဲ့သည်။
" ဝုန်း! "
အတိုင်းအဆမဲ့ဓားသည်... ၎င်း၏ပစ်မှတ်ကို မရှာတွေ့နိုင်သောကြောင့် လမ်းပျောက်နေသကဲ့သို့... ဓားသွားကို ရည်ရွယ်ချက်မဲ့ ယမ်းခါနေလေသည်။
နောက်ဆုံးတွင်... လှည့်စားခံလိုက်ရသည်ဟု ခံစားလိုက်ရသဖြင့်... အတိုင်းအဆမဲ့ဓားသည် ဤနေရာရှိ လေဟာနယ်အားလုံးကို ရိုက်ခွဲပစ်လိုက်ပြီးမှ... မလိုလားစွာဖြင့် လှည့်ပြန်သွားတော့သည်။
" ရွှမ်း! "
အချိန်အနည်းငယ် ကြာပြီးနောက်... အဆုံးမဲ့ဝေးကွာသော နေရာတစ်ခုတွင်... ကုချန်သည် အတိုင်းအဆမဲ့ဓားကို သူ၏လက်ဖဝါးထဲ၌... ပြန်လည်ဆုပ်ကိုင်လိုက်သည်။
အတိုင်းအဆမဲ့ဓား၏ မပျော်ရွှင်သော ခံစားချက်များကို အာရုံခံမိပုံရသဖြင့် ကုချန်သည် ဓားကိုယ်ထည်ကို ပွတ်သပ်ရင်း ရယ်မောကာ ပြောလိုက်သည်။
" အဲ့ဒီ ရှောင်ယောက်ထျန်းကျွင်းကို သတ်ဖို့ အခွင့်အရေးက နောက်ကျရင် မင်းအပိုင် ဖြစ်လာမှာပါ "
ဤတစ်ကြိမ်တွင်... အတိုင်းအဆမဲ့ဓား အောင်မြင်မှုမရှိဘဲ ပြန်ရောက်လာခြင်းသည်... ကုချန်၏ မျှော်လင့်ချက်ထက် မကျော်လွန်သကဲ့သို့... သူ့ကို အလွန်အမင်း စိတ်ပျက်စေခြင်းလည်း မရှိခဲ့ပေ။
လုကျားနှင့် လုယီတို့အပေါ် သူထားရှိခဲ့သော အမှတ်အသားမျှင်လေးသည် အရေးမပါသော လှုပ်ရှားမှုတစ်ခုသာ ဖြစ်သည်။
အကယ်၍... ရှောင်ယောက်ထျန်းကျွင်းသာ ငါးစာဟပ်ခဲ့လျှင် အံ့အားသင့်စရာ ကောင်းသော်လည်း... ငါးစာမဟပ်လျှင်လည်း နောင်တရစရာ အကြောင်းမရှိပေ။
အဘယ်ကြောင့်ဆိုသော် ကုချန်၏အမြင်တွင် ရှောင်ယောက်ထျန်းကျွင်း ငါးစာဟပ်နိုင်ချေမှာ အလွန်နည်းပါးသောကြောင့်ပင်။
ဤလူသည် အလွန်ကောက်ကျစ်စဉ်းလဲသူဖြစ်သည်။ ထိုစဉ်က လူသားဧကရာဇ်၏ အစီအစဉ်များကိုပင် မှောက်လှန်နိုင်ခဲ့ပြီး... နှစ်သန်းပေါင်းများစွာအတွင်း သူ၏လှုပ်ရှားမှုများမှာ... အပြစ်အနာအဆာကင်းခဲ့သည်။ သူသည် မည်သို့များ ဤမျှကြီးလေးသော အမှားမျိုးကို ကျူးလွန်နိုင်ပါမည်နည်း။
ယခုလေးတင်... ကိုယ့်ကိုယ်ကိုယ် ဖျက်ဆီးသွားခဲ့သည်မှာ... ရှောင်ယောက်ထျန်းကျွင်း စေလွှတ်လိုက်သော ကိုယ်ပွားတစ်ခုမျှသာဖြစ်ကြောင်း... ကုချန်သိ၏။
ထိုကိုယ်ပွားသည် အတိုင်းအဆမဲ့ဓား၏ ပစ်မှတ်ထားခြင်းခံရကြောင်း သိရှိလိုက်သည်နှင့်... တပြိုင်နက် မူလခန္ဓာကိုယ်နှင့် ပြန်လည်ပေါင်းစည်းခြင်း မပြုနိုင်တော့ဘဲ... ပြတ်ပြတ်သားသားပင် ကိုယ့်ကိုယ်ကိုယ် ဖျက်ဆီးလိုက်ခြင်းဖြစ်သည်။
ကုချန်ကို အမှန်တကယ် စိတ်ဝင်စားစေခဲ့သည့်အရာမှာ... ရှောင်ယောက်ထျန်းကျွင်း၏ ရင်ဘတ်ထဲတွင် နှလုံးသားကဲ့သို့ ခုန်လှုပ်နေပြီး... မျက်နှာပြင်တွင် တာအိုမြင့်မြတ်ချည်နှောင်မှုများ ဖုံးအုပ်ထားသည့်... လျှို့ဝှက်ဆန်းကြယ်သော အရာဝတ္ထုပင်ဖြစ်သည်။
အဲ့ဒီဟာက ဘာများလဲ?
ကိုယ်ပွားတစ်ခုမှ လုညီအစ်ကိုများကို မျိုချလိုက်ခြင်းသည်... ဤအရာဝတ္ထုမှတစ်ဆင့် မူလခန္ဓာကိုယ်ကို အကျိုးပြုနိုင်ပုံရသည်မှာ... စိတ်ဝင်စားစရာပင်။
သူ ယခုလေးတင် ရရှိခဲ့သော... တာအိုအသွင်ပြောင်းကောင်းကင်ရေကန်နှင့် ချိတ်ဆက်စဉ်းစားကြည့်လိုက်ရာ... ဤရှောင်ယောက်ထျန်းကျွင်းသည် လုံးဝရိုးရှင်းသူမဟုတ်ဘဲ... ဟွမ်သွမ့်ပင်လယ်ထဲတွင် နှစ်သန်းပေါင်းများစွာအတွင်း ကံကောင်းမှုများစွာ ရရှိခဲ့ပုံရကြောင်း... ကုချန် နားလည်လိုက်သည်။
အတန်ကြာ စဉ်းစားပြီးနောက်... အတိုင်းအဆမဲ့ဓားကို နှစ်သိမ့်လိုက်ပြီး ကုချန်သည် လက်ဖဝါးကို ဖြန့်လိုက်ရာ... လူသားဧကရာဇ် ပေးအပ်ခဲ့သော လျှို့ဝှက်ဆန်းကြယ်သည့် သံလိုက်အိမ်မြှောင်သည်... သူ၏လက်ဖဝါးထဲတွင် ပေါ်လာခဲ့လေသည်။
သက်တမ်းရှည်နန်းတော်၏ ကိစ္စရပ်သည် ယာယီအားဖြင့် ပြီးဆုံးသွားပြီဖြစ်သည်။
နောက်တစ်ဆင့်အနေဖြင့်... သူသည် ဤသံလိုက်အိမ်မြှောင်ပေါ်တွင် မှတ်တမ်းတင်ထားသော... ဟွမ်သွမ့်ပင်လယ်ထဲရှိ တည်နေရာအတွင်း... မည်သည့်အရာများ ဝှက်ထားသည်ကို... စူးစမ်းရှာဖွေရမည်ဖြစ်သည်။