အခန်း (၂၆၁-၂၆၂)
Vol. 19 Ch. 261-262
အခန်း (၂၆၁) - ခြေရာခံရန် ခက်ခဲခြင်း၊ ဆန်းကြယ်သော ဆက်နွယ်မှုနှင့် ဟွမ်သွမ့်နယ်မြေ
ကုချန်သည်... လူသားဧကရာဇ် ချန်ရစ်ထားခဲ့သော ဆန်းကြယ်သည့် သံလိုက်အိမ်မြှောင်ကို ထုတ်ယူလိုက်သည်နှင့် တပြိုင်နက်... သံလိုက်အိမ်မြှောင်ပေါ်ရှိ နဂါးပုံသဏ္ဍာန် လက်တံသည် ရူးမတတ် လည်ပတ်လာခဲ့သည်။
ယခုလက်ရှိအချိန်၌... လက်တံ၏ လည်ပတ်နှုန်းမှာ... အဆုံးမဲ့ကမ္ဘာတွင် ရှိခဲ့စဉ်ကထက် အဆပေါင်းများစွာ ပိုမိုမြန်ဆန်နေပြီး... အစွန်းရောက်သည့် အခြေအနေသို့ပင်... ရောက်ရှိနေပြီဖြစ်သည်။
ကုချန်သည်... သံလိုက်အိမ်မြှောင်၏ လည်ပတ်မှုပုံစံထဲမှ... တစ်စုံတစ်ရာသော နိယာမကို ရှာဖွေရန် ကြိုးပမ်းရင်း... ဂရုတစိုက် လေ့လာကြည့်ရှုနေ၏။
အကြောင်းမှာ... သံလိုက်အိမ်မြှောင် ညွှန်ပြသည့် ဦးတည်ချက်အတိုင်း လိုက်လံရှာဖွေရန်မှာ... အလွန်ခက်ခဲလွန်းသောကြောင့် ဖြစ်သည်။
ဟွမ်သွမ့်ပင်လယ်မှာ အကန့်အသတ်မရှိ ကျယ်ပြောလှပြီး... သံလိုက်အိမ်မြှောင်ညွှန်ပြသော နေရာမှာလည်း... အချိန်မရွေး ပြောင်းလဲနေ၏။ ကုချန်ကဲ့သို့သော အင်အားမျိုး ပိုင်ဆိုင်ထားလျှင်ပင်... တိုတောင်းလှသော အချိန်အတွင်း သံလိုက်အိမ်မြှောင်ညွှန်ပြသည့် တည်နေရာကို အပြည့်အဝ သတ်မှတ်နိုင်ရန်မှာ... ကောက်ရိုးပုံထဲ အပ်ရှာသကဲ့သို့ ခက်ခဲလှပြီး... ကောင်းကင်ပေါ် တက်လှမ်းရသည်ထက်ပင် ခက်ခဲနေသေးသည်။
ထို့ကြောင့် ကုချန်သည် သံလိုက်အိမ်မြှောင်၏ လည်ပတ်မှုတွင် ပုံသေနိယာမတစ်ခုခု ရှိမရှိ ရှာဖွေကြည့်နေမိသည်။
ကုချန်၏အကြည့်တို့သည် လျှပ်စီးကဲ့သို့ စူးရှနေပြီး... လျင်မြန်စွာ လည်ပတ်နေသော နဂါးပုံသဏ္ဍာန်လက်တံသည်ပင်... သူ့မျက်လုံးထဲ၌ အလွန်နှေးကွေးသွားသကဲ့သို့ ရှိ၏။
သို့သော်... ကံမကောင်းစွာဖြင့် အမွှေးတိုင်တစ်တိုင်ထွန်းညှိချိန် ကုန်ဆုံးသွားပြီးနောက်... ကုချန်မှာ သက်ပြင်းရှည်ကြီးကိုသာ ချလိုက်ရတော့သည်။
ဤအခိုက်အတန့်တွင်... သူသည် အနည်းငယ် မျှော်လင့်ချက်မဲ့သကဲ့သို့ ခံစားလိုက်ရပြီး... ကိုင်တွယ်ရခက်ခဲကြောင်း တွေ့ရှိလိုက်ရသည်။
အကြောင်းမှာ... အမွှေးတိုင်တစ်တိုင်စာမျှ လေ့လာပြီးနောက်... ဆန်းကြယ်သော သံလိုက်အိမ်မြှောင် ညွှန်ပြနေသည့် နေရာ၌... မည်သည့် ပုံသေနိယာမမျှ မရှိနေကြောင်း... စိတ်ပျက်ဖွယ် တွေ့ရှိလိုက်ရခြင်းကြောင့်ပင်။
ပုံသေနိယာမမရှိခြင်းက... သံလိုက်အိမ်မြှောင်၏ ဦးတည်ရာကို လျင်မြန်စွာ မသတ်မှတ်နိုင်ကြောင်း ဆိုလိုနေပြီး... ကံတရားကိုသာ အားကိုးရမည့် သဘောပင်။ ဤအချက်မှာ ကုချန်ကို စိတ်အပျက်ရဆုံး ဖြစ်စေသည်။
အကယ်၍ ကံမကောင်းပါက... နှစ်ထောင်ချီ၊ သောင်းချီကြာအောင် ရှာဖွေလျှင်ပင်... မည်သည့်ရလဒ်မှ ရရှိလိမ့်မည် မဟုတ်ပေ။
ဟွမ်သွမ့်ပင်လယ်မှာ အဆုံးအစမဲ့ ကျယ်ပြောလှရာ သူမည်မျှကြာအောင် ရှာဖွေရမည်နည်း။
သို့သော် လက်ရှိတွင် ကုချန်၌ အခြားရွေးချယ်စရာ မရှိချေ။ 'ကံတရားကို လောင်းကြေးထပ်ခြင်း' ဖြစ်နေလျှင်ပင် စွန့်စားရုံသာ ရှိတော့သည်။
" ငါ့ကံတရားက လုံလောက်မယ်လို့ မျှော်လင့်ရတာပဲ "
ကုချန်သည် တီးတိုး ရေရွတ်လိုက်ပြီးနောက်... သံလိုက်အိမ်မြှောင် ညွှန်ပြသည့် ဦးတည်ချက်အတိုင်း... လျင်မြန်စွာ စတင်ရွေ့လျားလိုက်သည်။
ဤသို့ဖြင့် တစ်ရက်နီးပါး ကုန်ဆုံးသွားပြီးနောက် ကုချန်သည် ရပ်တန့်လိုက်၏။
သူ၏လက်ဖဝါးထဲတွင်... ရူးမတတ် လည်ပတ်နေဆဲဖြစ်သော သံလိုက်အိမ်မြှောင်ကို ကြည့်ရင်း... ကုချန်သည် မျက်ခုံးကျုံ့သွား၏။
သူ၏ တစ်ရက်လုံး ရှာဖွေမှုမှာ လုံးဝ အရာမထင်ခဲ့ချေ။
ဤရလဒ်မှာ... ကုချန်၏ မျှော်လင့်ထားမှု အတွင်း၌သာ ရှိသော်လည်း... သူ့အား အနည်းငယ် စိတ်ပျက်စေခဲ့သည်။
ဤနှုန်းထားအတိုင်းဆိုလျှင် မည်သည့်အချိန်ကျမှ သူရှာဖွေတွေ့ရှိနိုင်မည်နည်း။
" ကံတရားကို လောင်းကြေးထပ်တာကလဲ အလုပ်မဖြစ်ဘူးပဲ "
ကုချန်သည် တစ်ကိုယ်တည်း ရေရွတ်လိုက်၏။ သူ၏ကံတရား ကောင်းမွန်လိမ့်မည်... သံလိုက်အိမ်မြှောင်ညွှန်ပြသည့် နေရာကို အားစိုက်ထုတ်စရာမလိုဘဲ ရှာတွေ့လိမ့်မည်ဟု... မူလက ထင်မှတ်ထားခဲ့သော်လည်း... ရလဒ်မှာ သူအလိုရှိသကဲ့သို့ ဖြစ်မလာခဲ့ပေ။
ဟွမ်ကျိုအာဆိုသော မိန်းကလေးကို ခေါ်လာခဲ့သင့်သလားဟု ကုချန် မသိစိတ်မှ တွေးလိုက်မိသည်။
သို့သော်... သူသည် သူ၏လက်ထဲရှိ ဆန်းကြယ်သော သံလိုက်အိမ်မြှောင်ကို... ဆက်လက် လေ့လာလိုက်သည်။
ဤဆန်းကြယ်သော သံလိုက်အိမ်မြှောင်သည် လူသားဧကရာဇ် ချန်ရစ်ခဲ့သော ပစ္စည်းဖြစ်သည်။
လူသားဧကရာဇ်က မထွက်ခွာမီ ဤပစ္စည်းကို လေးနက်စွာ အပ်နှင်းခဲ့ခြင်း၌ သဘာဝကျသော အကြောင်းရင်းတစ်ခု ရှိရပေမည်။
လူသားဧကရာဇ်အနေဖြင့်... သူ့အား ဤကဲ့သို့သော နောက်ပြောင်မှုကြီး ပြုလုပ်မည်မဟုတ်ဟု... ကုချန် ယုံကြည်သည်။ ဤသံလိုက်အိမ်မြှောင် ညွှန်ပြနေသည့် နေရာတွင်... စိတ်ကူးမယဉ်နိုင်လောက်သော ကံတရားအထောက်အပံ့ကြီး... ရှိနေပေလိမ့်မည်။
" ဒါပေမယ့်... အခု အဓိကပြဿနာက ငါဒီနေရာကို လုံးဝ ရှာမတွေ့နိုင်တာပဲ... တွေ့ရင်င်ကော ဘာထူးမှာလဲ... သူရဲ့တည်နေရာတွေ ပြောင်းလဲတဲ့နှုန်းက မြန်လွန်းနေတာ... ငါ အစွန်းအဖျားကိုတစ်ချက်ကလေး မြင်လိုက်ရရုံနဲ့တင် နေရာရွှေ့သွားပြန်ဉီးမယ် "
ကုချန်သည် ဖြေရှင်းနည်းတစ်ခုကို စဉ်းစားရင်း လေးနက်သော အကြည့်ဖြင့် ငေးမောနေမိသည်။
ရုတ်တရက် သူတစ်ခုခုကို သတိပြုမိသွား၏။
လူသားဧကရာဇ်သည် ကံတရားတာအိုကို ကျင့်ကြံခဲ့သူဖြစ်ရာ... ဤသံလိုက်အိမ်မြှောင်အတွင်းရှိ လျှို့ဝှက်ချက်များကို... ဖမ်းဆုပ်ကြည့်ရှုနိုင်ကောင်းသည်။ သူကိုယ်တိုင် ကံတရားတာအိုကို မကျင့်ကြံဖူးသော်လည်း... ကျောက်စိမ်းကဲ့သို့ ဖြူဖွေးသော လက်တစ်ဖက်ကို တွေ့မြင်ခဲ့ရစဉ်က... 'ကောင်းကင်ဘုံအလုံးစုံ အမှန်တရား နားလည်ခြင်း' နည်းလမ်းကို ထိုးထွင်းသိမြင်ခဲ့သည်။
'ကောင်းကင်ဘုံအလုံးစုံ အမှန်တရား နားလည်ခြင်း' နည်းလမ်းသည် အရာအားလုံးကို လွှမ်းခြုံထားပြီး... ကောင်းကင်ဘုံ၏ တာအိုအားလုံး ၎င်းအတွင်း၌ ပါဝင်နေရာ... ကံတရားတာအိုသည်လည်း ချွင်းချက်မရှိ ပါဝင်ပေသည်။
သူသည် 'ကောင်းကင်ဘုံအလုံးစုံ အမှန်တရား နားလည်ခြင်း' ကို အသုံးပြု၍... ဤဆန်းကြယ်သော သံလိုက်အိမ်မြှောင်ကို ဖြိုခွဲလေ့လာကြည့်လျှင်... မရနိုင်ပေဘူးလော။
ဤသို့ တွေးမိသည်နှင့် ကုချန်၏ စိတ်နှလုံး လှုပ်ရှားသွားလေသည်။
တုံ့ဆိုင်းနေခြင်း မရှိဘဲ... 'ကောင်းကင်ဘုံအလုံးစုံ အမှန်တရား နားလည်ခြင်း' ကို တိတ်တဆိတ် လည်ပတ်စေလိုက်ပြီး... ထိုစွမ်းအားများကို လက်ဖဝါးထဲရှိ သံလိုက်အိမ်မြှောင်ထဲသို့... ဂရုတစိုက် ထည့်သွင်းလိုက်လေသည်။
" ဝုန်း...! "
ကုချန်ကို အံ့အားသင့်စေပြီး ဝမ်းမြောက်စေသော အပြောင်းအလဲတစ်ခု ဖြစ်ပေါ်လာ၏။
'ကောင်းကင်ဘုံအလုံးစုံ အမှန်တရား နားလည်ခြင်း' စွမ်းအားကို လက်ခံရရှိပြီးနောက် သံလိုက်အိမ်မြှောင်၏ မျက်နှာပြင်သည် ဝိုးတဝါး အလင်းရောင်များဖြင့် တောက်ပလာလေသည်။
နဂါးပုံသဏ္ဍာန် လက်တံ၏ လည်ပတ်နှုန်းမှာလည်း... ချက်ချင်းဆိုသလို အဆပေါင်းများစွာ၊ ရာပေါင်းများစွာ... နှေးကွေးသွားတော့သည်။
" ဒါက..... "
ကုချန်သည်... ဤအပြောင်းအလဲကြောင့် ဝမ်းသာသလိုလို... နားမလည်သလိုလို ဖြစ်သွားရသည်။
သံလိုက်အိမ်မြှောင်လက်တံ၏ လည်ပတ်နှုန်း နှေးကွေးသွားခြင်းကြောင့်... ညွှန်ပြရာနေရာကို ရှာဖွေတွေ့ရှိနိုင်မည့် အခွင့်အလမ်း အဆမတန် တိုးပွားလာသဖြင့်... သူပျော်ရွှင်မိသည်။
သို့သော်... သူ၏ စွမ်းအားလည်ပတ်မှုသည် သံလိုက်အိမ်မြှောင်ကိုသာ... သက်ရောက်မှု ရှိစေသည်လော။ သို့မဟုတ်... သံလိုက်အိမ်မြှောင် ညွှန်ပြနေသည့် နေရာ၏ ရွေ့လျားနှုန်းကိုပါ... နှေးကွေးသွားစေခြင်းလော။
နှစ်ခုကြားတွင် မမြင်နိုင်သော ဆက်နွယ်မှု တစ်စုံတစ်ရာ ရှိနေသလော။
ကုချန်သည် နားမလည်နိုင် ဖြစ်နေပြီး... ခဏတာ အဖြေရှာမရ ဖြစ်နေသဖြင့်... သံလိုက်အိမ်မြှောင် ညွှန်ပြသည့် ဦးတည်ချက်အတိုင်း လုံ့လစိုက်ထုတ်၍... ဆက်လက်ရှာဖွေရန်သာ ဆုံးဖြတ်လိုက်သည်။
ဤတစ်ကြိမ် ရှာဖွေမှုသည် ယခင်ကထက် များစွာ ချောမွေ့လေသည်။
နဂါးပုံသဏ္ဍာန် လက်တံ လည်ပတ်မှု နှေးကွေးသွားခြင်းနှင့်အတူ... ကုချန်သည် လျင်မြန်စွာ ရွေ့လျားကာ အချိန်တိုအတွင်း... ဟွမ်သွမ့်ပင်လယ်၌ မိုင်သန်းပေါင်းများစွာ ခရီးနှင်ပြီးနောက်... နောက်ဆုံးတွင် သံလိုက်အိမ်မြှောင် ညွှန်ပြသောနေရာကို... အမှန်တကယ် ရှာတွေ့ခဲ့လေပြီ။
ရုတ်တရက်... နဂါးပုံစံလက်တံသည် ရူးမတတ် လည်ပတ်နေရာမှ ရပ်တန့်သွားပြီး... စိတ်ကူးမယဉ်နိုင်လောက်သော တောက်ပသည့် အရောင်အသွေးများ... ဖြာထွက်လာလေသည်။
ထိုတစ်ခဏ၌ ကုချန်သည် ဦးတည်ရာနေရာကို ဖျတ်ခနဲ မြင်တွေ့လိုက်ရသည်။
၎င်းသည်... အဆုံးမဲ့ ဟွမ်သွမ့်မြူခိုးများ လွှမ်းခြုံထားသော မိုင်တစ်ရာခန့်သာ ကျယ်ဝန်းသည့်... ဆန်းကြယ်သော နေရာတစ်ခုဖြစ်သည်။ ကျယ်ပြောလှသည့် ဟွမ်သွမ့်ပင်လယ်ကြီးနှင့် နှိုင်းယှဉ်လျှင်... ပြောပလောက်သည့် ပမာဏ မရှိချေ။
သို့သော်... ထိုနေရာမှ ထွက်ပေါ်နေသော အဆုံးမဲ့ ဟွမ်သွမ့်ချီများနှင့်... အထွတ်အထိပ် မြင့်မြတ်သည့် အငွေ့အသက်များက... ၎င်း၏ ထူးခြားမှုကို ချက်ချင်း သိရှိစေသည်။
ထိုဟွမ်သွမ့်နယ်မြေကို တွေ့ရှိလိုက်သည်နှင့်... ကုချန် စိတ်လှုပ်ရှားသွားပြီး ထိုနေရာသို့... အပြေးအလွှား သွားလိုက်လေသည်။
မျက်တောင်တစ်ခတ်စာ၏... သောင်းပုံတစ်ပုံမျှပင် မကြာလိုက်သော အချိန်အတွင်း... ကုချန်သည် ထိုဟွမ်သွမ့်နယ်မြေ၏ တည်နေရာသို့... ရောက်ရှိသွား၏။ သို့သော်... သူ့ကို ကြောင်အသွားစေသည်မှာ... သူရောက်ရှိသွားချိန်၌ ထိုမိုင်တစ်ရာကျယ်ဝန်းသော ဟွမ်သွမ့်နယ်မြေသည်... ခြေရာလက်ရာမကျန် ပျောက်ကွယ်သွားခြင်းပင်။
" ..... "
ကုချန် ဆဲရေးတိုင်းထွာချင်စိတ် ပေါက်သွားသော်လည်း... သံလိုက်အိမ်မြှောင် လမ်းညွှန်မှုအတိုင်း ဆက်လက် ရှာဖွေရုံမှတစ်ပါး... မတတ်နိုင်ချေ။
တစ်ကြိမ် ရှာတွေ့လျှင် ဒုတိယအကြိမ်လည်း ရှာတွေ့နိုင်ရမည်။
ထိုဟွမ်သွမ့်နယ်မြေသည် သူ၏ရှာဖွေမှုကို အမြဲတမ်း ရှောင်တိမ်းနေနိုင်မည်ဟု သူ မယုံကြည်ပေ။
ကုချန်သည် ဆိုးဝါးသောကံတရားကို မယုံကြည်ဘဲ ဟွမ်သွမ့်ပင်လယ်အတွင်း လျင်မြန်စွာ ဆက်လက် ရွေ့လျားနေသည်။
ရက်ဝက်ခန့် ကြာပြီးနောက် ထိုဟွမ်သွမ့်နယ်မြေကို ဒုတိယအကြိမ် ရှာဖွေတွေ့ရှိခဲ့သည်။
သို့သော် ထူးဆန်းသည်မှာ... ဤတစ်ကြိမ်တွင်လည်း သူနီးကပ်သွားသည်နှင့် တပြိုင်နက်... ထိုဟွမ်သွမ့်နယ်မြေသည် ချက်ချင်း ပျောက်ကွယ်သွားပြန်သည်။
၎င်းသည် အသက်ရှိနေသကဲ့သို့ ကုချန်ကို တမင် ရှောင်တိမ်းနေပုံရသည်။
ရှောင်တိမ်းနေတာလား။
လက်ဖဝါးထဲတွင်... လည်ပတ်နေဆဲဖြစ်သော သံလိုက်အိမ်မြှောင်ကို ကြည့်ရင်း... ကုချန်သည် အေးစက်စွာ ပြုံးလိုက်ပြီး... ဆက်လက် ရှာဖွေလိုက်သည်။
နောက်ထပ် ရက်ဝက်ခန့် ကြာသောအခါ ထိုဟွမ်သွမ့်နယ်မြေကို တတိယအကြိမ်မြောက် ရှာတွေ့ခဲ့သည်။
သို့သော်... ဤတစ်ကြိမ်တွင်မူ ထိုနယ်မြေ မထွက်ခွာနိုင်မီ... ကုချန်သည် 'ကောင်းကင်ဘုံအလုံးစုံ အမှန်တရား နားလည်ခြင်း' ကို တိတ်တဆိတ် လည်ပတ်လိုက်ပြီး... ထိုဟွမ်သွမ့်နယ်မြေဆီသို့ လက်ဖဝါးတစ်ဖက် ဆန့်ထုတ်လိုက်တော့သည်။
အခန်း (၂၆၂) - ကောင်းကင်ကျောက်တိုင်၊ လျှို့ဝှက်ချက်များနှင့် ကံတရား
ဤတစ်ကြိမ်တွင်... ကုချန်သည် ဟွမ်သွမ့်နယ်မြေအတွင်းသို့... တစ်ကိုယ်တည်း အတင်းအဓမ္မ ဝင်ရောက်ရန်... မကြိုးစားတော့ပေ။ ထိုအစား... သူသည် ‘ကောင်းကင်ဘုံအလုံးစုံ အမှန်တရား နားလည်ခြင်း’ စွမ်းအားကို ထုတ်ဖော်လိုက်ပြီး... ဟွမ်သွမ့်နယ်မြေကို နေရာတွင် ရပ်တန့်သွားစေရန် လက်ဝါးဖြင့် ဖိချကာ... ထိန်းချုပ်ရန် ကြိုးစားလိုက်သည်။
ဒါသည်လည်း စမ်းသပ်ချက်တစ်ခုပင်။
‘ကောင်းကင်ဘုံအလုံးစုံ အမှန်တရား နားလည်ခြင်း’ စွမ်းအားသည်... ဆန်းကြယ်သော သံလိုက်အိမ်မြှောင်ကို သက်ရောက်မှု ရှိစေခဲ့သည့်အတွက်... ဤဟွမ်သွမ့်နယ်မြေကိုလည်း ခေတ္တထိန်းချုပ်နိုင်ကောင်းပါရဲ့ဟု ယူဆ၍... ချဉ်းကပ်ကြည့်ခြင်း ဖြစ်သည်။
" ဝုန်း...! "
ဧရာမလက်ဝါးကြီးသည် ချက်ချင်းပင် ဟွမ်သွမ့်နယ်မြေထက်သို့ ကျဆင်းသွား၏။
ထို့နောက် ဖြစ်ပေါ်လာသော ရလဒ်မှာ ကုချန်ကို ဝမ်းသာသွားစေခဲ့သည်။
လက်ဝါးကြီး ကျဆင်းလာသည်နှင့်အမျှ... ၎င်းတွင် ပါဝင်သော ‘ကောင်းကင်ဘုံအလုံးစုံ အမှန်တရား နားလည်ခြင်း’ ၏ ကြီးမားသော စွမ်းအားသည်... ဟွမ်သွမ့်နယ်မြေနှင့် ပဲ့တင်ထပ်မှု တစ်စုံတစ်ရာ ဖြစ်ပေါ်စေပြီး ၎င်းကို မရွေ့လျားနိုင်အောင်... ခေတ္တမျှ တည်ငြိမ်သွားစေခဲ့သည်။
ဤအရာကိုမြင်သည်နှင့် ကုချန်သည် တုံ့ဆိုင်းမနေတော့ပေ။ သူသည် ချက်ချင်း ပျံတက်သွားပြီး ဟွမ်သွမ့်နယ်မြေအတွင်းသို့ ဝင်ရောက်သွားတော့သည်။
အခွင့်အရေးဆိုသည်မှာ တစ်ခါသာ ရတတ်သည်။
ထို့ပြင်... ယခု လှုပ်ရှားနေသည်မှာ ‘ချီတစ်ခုမှ သန့်စင်ခြင်းသုံးပါး အသွင်ပြောင်းလဲခြင်း’ ပညာရပ်ဖြင့် ဖန်တီးထားသော... ကိုယ်ပွားတစ်ခုသာ ဖြစ်သည်။ ဆုံးရှုံးသွားလျှင်ပင်... မူလခန္ဓာကိုယ်ကို ထိခိုက်မည် မဟုတ်သဖြင့်... ကုချန်သည် ပြတ်ပြတ်သားသား ဆုံးဖြတ်ရဲခြင်း ဖြစ်သည်။
ခဏအတွင်းမှာပင် ကုချန်သည် ဤဟွမ်သွမ့်နယ်မြေထဲသို့ ရောက်ရှိသွားပြီ ဖြစ်သည်။
သူ၏မျက်စိရှေ့မှ မြင်ကွင်းသည်လည်း အဆုံးအစမဲ့သော ဟွမ်သွမ့်နယ်မြေအဖြစ် ပြောင်းလဲသွား၏။
ကုချန်သည် သူ၏လက်ထဲရှိ သံလိုက်အိမ်မြှောင်ကို မသိစိတ်မှ ကြည့်လိုက်မိသည်။
ယခင်က... အဆက်မပြတ် လည်ပတ်နေသော ဆန်းကြယ်သည့် သံလိုက်အိမ်မြှောင်သည် ယခုအခါ မလှုပ်ရှားတော့ဘဲ... ရှေ့တည့်တည့်ရှိ ဦးတည်ချက်တစ်ခုအား ညွှန်ပြနေသည်ကို... တွေ့လိုက်ရသည်။
ဤသည်ကိုမြင်လျှင်... ကုချန်သည် တိုးတိတ်စွာ ရယ်မောလိုက်ကာ... သံလိုက်အိမ်မြှောင် ညွှန်ပြသည့် ဦးတည်ချက်အတိုင်း... ဆက်လက် ချီတက်သွားလေသည်။
" မုန်ညင်းစေ့အထဲမှာ မြင်းမိုရ်တောင်ကို ထည့်သွင်းထားတဲ့ နည်းလမ်းများလား "
ခဏကြာ ရှေ့ဆက်သွားပြီးနောက် ကုချန်၏ မျက်နှာပေါ်တွင် အံ့သြသော အရိပ်အယောင်များ ပေါ်လာ၏။
သူသည် သတိကြီးစွာထားပြီး ဖြည်းဖြည်းချင်း ရွေ့လျားနေသော်လည်း... ဤအချိန်တိုအတွင်း သူဖြတ်သန်းခဲ့သော အကွာအဝေးသည် မိုင်တစ်ရာ အချင်းဝက်သာ ရှိသည့်... ဟွမ်သွမ့်နယ်မြေတစ်ခု၏ ပမာဏထက် များစွာ ကျော်လွန်နေပြီ ဖြစ်သည်။
သို့သော်... ရလဒ်မှာ သူသည် ခရီးအဝေးကြီး နှင်ပြီးသည့်တိုင်... ဤဟွမ်သွမ့်နယ်မြေထဲတွင်သာ ရှိနေသေးပြီး... ထွက်ခွာသွားခြင်း မရှိသေးပေ။
ဤအချက်အတွက် ရှင်းပြနိုင်သော အကြောင်းပြချက် တစ်ခုသာ ရှိသည်။ အပြင်ဘက်မှ ကြည့်လျှင်... မိုင်တစ်ရာ အချင်းဝက်သာ ရှိသည်ဟု ထင်ရသော ဤဟွမ်သွမ့်နယ်မြေသည်... အတွင်းပိုင်းတွင်မူ အတိုင်းအဆမဲ့ ကျယ်ပြောလှခြင်း ဖြစ်ပေသည်။
ထိုအရာကို နားလည်ပြီးနောက် ကုချန်သည် ဆက်လက် ချီတက်ခဲ့၏။
ဤတစ်ကြိမ်တွင် တစ်နာရီနီးပါး ကြာမြင့်ပြီးနောက် ကုချန်၏မျက်စိရှေ့မှ မြင်ကွင်းမှာ နောက်ဆုံးတွင် ပြောင်းလဲသွားတော့သည်။
ကုချန်၏အမြင်အာရုံ တစ်ဆုံးတွင်... အဆုံးမဲ့ ဟွမ်သွမ့်ချီများ လှိုင်းထနေပြီး... ထိုဟွမ်သွမ့်ချီများ၏ အဆုံးတွင် မှုန်ဝါးဝါး ပုံရိပ်တစ်ခုသည်... တရိပ်ရိပ် ပေါ်လာလိုက် ပျောက်သွားလိုက် ဖြစ်နေသည်။
" အဲ့ဒါက..... "
ကုချန်သည် ထိုမှုန်ဝါးဝါး ပုံရိပ်ကို စူးစိုက်ကြည့်လိုက်ရာ တည်ငြိမ်နေကျ မျက်ဝန်းများပင် ရှားရှားပါးပါး တုန်လှုပ်သွားလေ၏။
သူဘာမြင်လိုက်ရသနည်း။
ထိုမှုန်ဝါးဝါး ပုံရိပ်သည် ခမ်းနားထည်ဝါသော ကောင်းကင်ကျောက်တိုင်ကြီး ဖြစ်နေသည်။
ရှေးဟောင်း ကောင်းကင်ကျောက်တိုင်ကြီးသည် ပြိုင်ဘက်ကင်းသော ခမ်းနားမှုဖြင့် ဟွမ်သွမ့်နယ်မြေ၏ အဆုံး၌ တည်ရှိနေလေသည်။
" ကောင်းကင်ကျောက်တိုင်? "
ကုချန်၏မျက်လုံးထဲမှ တုန်လှုပ်မှုများသည် ချက်ချင်းပင် ဇဝေဇဝါ ဖြစ်မှုအဖြစ် ပြောင်းလဲသွား၏။
အကြောင်းမှာ သူသည် ဤမြင်ကွင်းကို ရင်းနှီးနေသကဲ့သို့ ခံစားလိုက်ရသောကြောင့် ဖြစ်သည်။
ယခင်က ယွမ်ကျွင်းကို ဝိညာဉ်ရှာဖွေခဲ့စဉ်က ယွမ်ကျွင်း၏ မှတ်ဉာဏ်ထဲတွင် ဤမြင်ကွင်းကို မြင်တွေ့ခဲ့ဖူးသည်။
လွန်ခဲ့သော နှစ်ပေါင်း ကိုးသောင်းက... ယွမ်ကျွင်းသည် ကုချန်နှင့် တာအိုလမ်းစဉ် ယှဉ်ပြိုင်ရာတွင် ရှုံးနိမ့်ခဲ့ပြီးနောက်... ဟွမ်သွမ့်ပင်လယ် နက်ရှိုင်းရာသို့ တစ်ကိုယ်တည်း ဝင်ရောက်သွားခဲ့သည်။ ထိုအချိန်တွင်... သူ၏ကံကြမ္မာကို ပြောင်းလဲပေးမည့် ဤကောင်းကင်ကျောက်တိုင်ကို... ရှာဖွေတွေ့ရှိခဲ့ခြင်း ဖြစ်သည်။
ထိုကောင်းကင်ကျောက်တိုင်မှနေ၍... သူသည် ‘ချီတစ်ခုမှ သန့်စင်ခြင်းသုံးပါး အသွင်ပြောင်းလဲခြင်း’ နည်းလမ်းတစ်ဝက်ကို နားလည်သဘောပေါက်ခဲ့ပြီးနောက်တွင်... ယွမ်ကျွင်းမဟာဧကရာဇ် အဆင့်အတန်းသို့ ရောက်ရှိလာခဲ့ခြင်း ဖြစ်သည်။
ယခု... ကုချန် မြင်တွေ့နေရသော ကောင်းကင်ကျောက်တိုင်သည်... ထိုစဉ်က ယွမ်ကျွင်း မြင်တွေ့ခဲ့ရသော... ကောင်းကင်ကျောက်တိုင်နှင့် တစ်ပုံစံတည်းပင်။
ပြောရလျှင်... ဤနေရာသည် ထိုစဉ်က ယွမ်ကျွင်း မတော်တဆ ရောက်ရှိသွားခဲ့သော... ဆန်းကြယ်သည့် နေရာပင် ဖြစ်သည်။
ထိုသို့ တွေးမိသောအခါ ကုချန်သည် စိတ်လှုပ်ရှားမှုကို မထိန်းနိုင်တော့ပေ။
ယွမ်ကျွင်း ပိုင်ဆိုင်ခဲ့သော... မပြည့်စုံသည့် ‘ချီတစ်ခုမှ သန့်စင်ခြင်းသုံးပါး အသွင်ပြောင်းလဲခြင်း’ နည်းလမ်းကို လေ့လာပြီးနောက်... ကျန်ရှိနေသော နည်းလမ်းများကို ဆက်လက် လေ့လာနိုင်ရန်အတွက်... ထိုကောင်းကင်ကျောက်တိုင်ကို မည်သည့်အချိန်မှ ရှာတွေ့နိုင်ပါ့မည်နည်းဟု... သူ ညည်းတွားခဲ့ဖူးသည်။
သူ အားစိုက်ခွန်စိုက်... ရှာဖွေခဲ့ရသော အရာသည် ဤမျှ လွယ်ကူစွာ တွေ့ရှိလိမ့်မည်ဟု... ထင်မှတ်မထားခဲ့မိပေ။
သူ မရှာဖွေရသေးခင်မှာပင်... ဤကောင်းကင်ကျောက်တိုင်က သူ၏ရှေ့မှောက်သို့... ရောက်ရှိလာခဲ့ပြီ ဖြစ်သည်။
ဤသည်ကို သဘောပေါက်လိုက်သည်နှင့်... ကုချန်သည် သူ၏လက်ဖဝါးထဲမှ ဆန်းကြယ်သော သံလိုက်အိမ်မြှောင်ကို... မသိစိတ်မှ ပြန်ကြည့်လိုက်မိပြီး စဉ်းစားသွားရ၏။
ဤဆန်းကြယ်သော သံလိုက်အိမ်မြှောင်ကို လူသားဧကရာဇ်မှ ပေးခဲ့ခြင်း ဖြစ်သည်။
ဆိုလိုသည်မှာ... လူသားဧကရာဇ်သည်လည်း ဤနေရာသို့ ရောက်ဖူးပြီး... ဤနေရာ၏ ကံတရားအထောက်အပံ့ကို... ရရှိခဲ့ဖူးသည် မဟုတ်ပါလော။
ဟုတ်သည်။ ဒါဆိုလျှင် အဓိပ္ပာယ်ရှိသွားပြီ။
အဆုံးမဲ့ကမ္ဘာတွင် ရှေးယခင်ကတည်းက မွေးဖွားလာခဲ့သော အရှင်သခင်ပေါင်း ဒါဇင်နှင့်ချီ သို့မဟုတ် ရာနှင့်ချီ၍ ရှိခဲ့သည်။
သို့သော် အမှန်တကယ် ဧကရာဇ်အဆင့်သို့ ရောက်ရှိခဲ့သူမှာ လူသားဧကရာဇ် တစ်ဦးတည်းသာ ရှိ၏။
လူသားဧကရာဇ်အနေဖြင့်... တာအိုလမ်းစဉ်ကို အောင်မြင်ပြီး ဧကရာဇ် ဖြစ်လာနိုင်ခြင်းမှာ... သူ၏ကိုယ်ပိုင် ကျင့်ကြံမှု နက်ရှိုင်းခြင်းအပြင်... ဤနေရာမှ ရရှိသော ကံတရားအထောက်အပံ့နှင့်လည်း... သက်ဆိုင်နေပေလိမ့်မည်။
နောက်ဆုံးတော့... လူတိုင်းသည် ယွမ်ကျွင်းကဲ့သို့ အသုံးမကျသူ... မဟုတ်ပေ။ ယွမ်ကျွင်းသည်... ကြီးမားသော ကံတရားအထောက်အပံ့ကို ရရှိခဲ့သော်လည်း... အဆုံးတွင် အရှင်သခင်အဆင့်သာ ဖြစ်လာခဲ့ပြီး... ကောင်းကင်ဘုံအရှင်သခင် အဆင့်သို့ပင်... မရောက်ရှိခဲ့ပေ။
လူသားမျိုးနွယ်၏ ထူးချွန်ပြောင်မြောက်ဆုံး ဖြစ်တည်မှု တစ်ခုအနေဖြင့်... လူသားဧကရာဇ်သည် ဤနေရာမှ ကံတရားအထောက်အပံ့ကို အမှီပြု၍... တာအိုလမ်းစဉ် အောင်မြင်ကာ ဧကရာဇ် ဖြစ်လာသည်မှာ... နားလည်၍ မရနိုင်သော ကိစ္စမဟုတ်ပေ။
သို့သော် ကုချန် နားမလည်နိုင်သော အချက်တစ်ချက် ရှိနေသေးသည်။ လူသားဧကရာဇ်သည် ဤနေရာကို ပထမဆုံးအကြိမ် မည်သို့ ရှာတွေ့ခဲ့သနည်း။
အကယ်၍... ယွမ်ကျွင်းကဲ့သို့ မတော်တဆ ရောက်ရှိလာခဲ့ခြင်း ဖြစ်ပါက... ဤနေရာ၏ တည်နေရာ အပြောင်းအလဲများကို... မှတ်တမ်းတင်ထားသော သံလိုက်အိမ်မြှောင်ကို... မည်သို့ ဖန်တီးခဲ့သနည်း။
လတ်တလော စူးစမ်းရှာဖွေမှုများအရ... ဤဆန်းကြယ်သော သံလိုက်အိမ်မြှောင်၏ လမ်းညွှန်မှု မပါဘဲ... ဟွမ်သွမ့်ပင်လယ်ထဲတွင် ဤဟွမ်သွမ့်နယ်မြေနှင့် မတော်တဆ တိုးမိလျှင်ပင်... သတိမထားမိဘဲ ကျော်သွားမိနိုင်ကြောင်း... ကုချန် အသေအချာ သိရှိထားသည်။
သို့မဟုတ်... ယွမ်ကျွင်းကဲ့သို့ ကံတရားအထောက်အပံ့ ရှာဖွေရန် ဝင်ရောက်သွားပြီး... ကောင်းကင်ကျောက်တိုင်ကို ခေတ္တမျှ နားလည်သဘောပေါက်ပြီးနောက်... ဤနေရာမှ နှင်ထုတ်ခံရကာ ဟွမ်သွမ့်နယ်မြေသည် ခြေရာလက်ရာမကျန်... ပျောက်ကွယ်သွားပေလိမ့်မည်။ ထပ်မံရှာဖွေရန်မှာ... ကောင်းကင်ပေါ် တက်လှမ်းရသကဲ့သို့... ခက်ခဲလှပေမည်။
သို့သော်... လူသားဧကရာဇ်သည် ဤနေရာကို ပထမအကြိမ် ရှာတွေ့နိုင်ခဲ့ရုံသာမက... ၎င်း၏ တည်နေရာများကို ရှာဖွေရန်... သံလိုက်အိမ်မြှောင်ကိုပါ ချန်ထားရစ်နိုင်ခဲ့သည်။ ဤစွမ်းရည်ကိုမူ... ကုချန် လေးစားအားကျရုံမှတစ်ပါး... မတတ်နိုင်ပေ။
ဒါ့အပြင် နောက် အချက်တစ်ချက် ရှိသေး၏။
သူ၏ ‘ကောင်းကင်ဘုံအလုံးစုံ အမှန်တရား နားလည်ခြင်း’ စွမ်းအားသည်... အဘယ်ကြောင့် သံလိုက်အိမ်မြှောင်ကို သက်ရောက်မှု ရှိစေပြီး... ဤနေရာကိုပါ တစ်ပြိုင်နက် ထိန်းချုပ်နိုင်ရသနည်း။
‘ကောင်းကင်ဘုံအလုံးစုံ အမှန်တရား နားလည်ခြင်း’ သာ မရှိပါက... သံလိုက်အိမ်မြှောင် တစ်ခုတည်းကို အားကိုး၍ ဤနေရာကို ရှာဖွေရန်မှာ... ကောက်ရိုးပုံထဲ အပ်ရှာသကဲ့သို့ ခက်ခဲနေပေလိမ့်မည်။
‘ကောင်းကင်ဘုံအလုံးစုံ အမှန်တရား နားလည်ခြင်း’ စွမ်းအားဖြင့်... ဤနေရာကို တည်ငြိမ်အောင် မထိန်းချုပ်နိုင်ပါက... ဤဟွမ်သွမ့်နယ်မြေထဲ ဝင်ရောက်ရန်... ပိုမို ကြိုးစားအားထုတ်ရပေလိမ့်မည်။
‘ကောင်းကင်ဘုံအလုံးစုံ အမှန်တရား နားလည်ခြင်း’ ကိုယ်တိုင်သည်ပင် ဤနေရာနှင့် ရှင်းပြ၍ မရနိုင်သော ဆက်နွယ်မှု တစ်စုံတစ်ရာ ရှိနေသကဲ့သို့ပင်။
အရာအားလုံးကို ကံတရားက မသိမသာ စီစဉ်ထားသကဲ့သို့ ခံစားရသည်။
ပထမဦးစွာ သူသည် ကျောက်စိမ်းကဲ့သို့ ဖြူဖွေးသော ဆန်းကြယ်သည့် လက်ဖဝါးမှနေ၍ ‘ကောင်းကင်ဘုံအလုံးစုံ အမှန်တရား နားလည်ခြင်း’ နည်းလမ်းကို ရရှိခဲ့သည်။
ထို့နောက်... ယွမ်ကျွင်းထံမှ ‘ချီတစ်ခုမှ သန့်စင်ခြင်းသုံးပါး အသွင်ပြောင်းလဲခြင်း’ နည်းလမ်းကို ရရှိခဲ့ပြီး... ဤဟွမ်သွမ့်နယ်မြေ တည်ရှိကြောင်း သိရှိခဲ့ရသည်။
နောက်ဆုံးတွင်... လူသားဧကရာဇ်ထံမှ ဤဆန်းကြယ်သော သံလိုက်အိမ်မြှောင်ကို ရရှိခဲ့ပြီး... ‘ကောင်းကင်ဘုံအလုံးစုံ အမှန်တရား နားလည်ခြင်း’ စွမ်းအားကို အသုံးပြု၍... ဤဟွမ်သွမ့်နယ်မြေထဲသို့ အောင်မြင်စွာ ဝင်ရောက်နိုင်ခဲ့သည်။
အဆင့်တိုင်းသည် တစ်ခုနှင့်တစ်ခု ဆက်စပ်နေပြီး တိုက်ဆိုင်မှု သက်သက်ဟု ရှင်းပြ၍ မရနိုင်ပေ။
ကုချန်၏စိတ်ထဲတွင် သံသယမျိုးစုံ ကိန်းအောင်းနေ၏။
သို့သော်... သူသည် ထိုသံသယအားလုံးကို ချက်ချင်း ဘေးဖယ်လိုက်ပြီး... ဟွမ်သွမ့်နယ်မြေ၏ အဆုံး၌ တည်ရှိနေသော ခမ်းနားထည်ဝါသည့်... ကောင်းကင်ကျောက်တိုင်ကြီးဆီသို့ စူးစိုက်ကြည့်လိုက်သည်။
သူ့တွင် ရှိနေသော မေးခွန်းများအားလုံး၏ အဖြေသည်... ဟွမ်သွမ့်နယ်မြေ အဆုံးရှိ ဤကောင်းကင်ကျောက်တိုင်ကြီးတွင်... ရှိနေပေလိမ့်မည်.....