အခန်း (၂၆၉-၂၇၀)
Vol. 20 Ch. 269-270
အခန်း ( ၂၆၉ ) - အဆင့်တက်ခြင်းစတင်ပြီ၊ နတ်ဆိုးမီးတောက်များ သောင်းကျန်းခြင်း၊ ရှီမိုနတ်ဆိုးအရှင်
နတ်ဆိုးနယ်မြေ အတွင်းသို့... ခြေချလိုက်သည်နှင့်တစ်ပြိုင်နက်... ကုချန်သည် ကြီးမြတ်သော နတ်ဆိုးနယ်မြေ၏ ကောင်းကင်တာအိုကို... ချက်ချင်း ခံစားလိုက်ရသည်။
ထို့အပြင်... ကြီးမားသော အလိုဆန္ဒတစ်ခုသည် ကောင်းကင်ယံမှ သက်ဆင်းလာကာ... သူ့အား 'စောင့်ကြည့်' နေသကဲ့သို့ ခံစားလိုက်ရသည်။
ထိုအရာသည်... သက်ရှိတစ်ဦးမဟုတ်ဘဲ နတ်ဆိုးနယ်မြေ၏... ကောင်းကင်နှင့်မြေကြီး အလိုဆန္ဒတော်သာ ဖြစ်သည်။ ကုချန်သည်... နတ်ဆိုးနယ်မြေမှ ဟုတ်မဟုတ်... စမ်းသပ်နေခြင်းဖြစ်သည်။
အကယ်၍... သူသာ နတ်ဆိုးနယ်မြေမှ မဟုတ်ပါက... ထိုအလိုဆန္ဒတော်၏ ဖိနှိပ်မှုကို ခံရမည်ဖြစ်သည်။ နတ်ဆိုးနယ်မြေ၏ အင်မော်တယ်ဘုရင်နှင့် ညီမျှသော... စစ်မှန်သည့် အင်မော်တယ်တစ်ပါးဖြစ်လျှင်ပင် ဤဖိနှိပ်မှုအောက်၌... အရှင်အဆင့်အောက်သို့ ချက်ချင်း ကျဆင်းသွားပေလိမ့်မည်။
သို့သော်... ထိုကြီးမားသော အလိုဆန္ဒတော်သည်... ကုချန်၏ခန္ဓာကိုယ်ပေါ်တွင် အကြိမ်အနည်းငယ် ဖြတ်သန်းသွားပြီးနောက်... တိတ်ဆိတ်စွာ ပြန်လည်ဆုတ်ခွာသွားခဲ့သည်။
အကြောင်းမှာ... ကုချန်၏ခန္ဓာကိုယ်သည် နတ်ဆိုးနယ်မြေ၏ ချီဓာတ်များ စွဲကပ်ခြင်း မရှိသေးသော်လည်း... အခြားကမ္ဘာမှ ချီဓာတ်များနှင့်လည်း ကင်းစင်နေသောကြောင့်ပင်။ ထို့ကြောင့်... နတ်ဆိုးနယ်မြေ၏ ကောင်းကင်တာအိုမှ သူ့အား 'မိမိလူ' ဟု မှတ်ယူကာ... မည်သည့် ဖိနှိပ်မှုကိုမျှ မပြုလုပ်ခဲ့ခြင်း ဖြစ်သည်။
ကုချန်၏အခြေအနေကို နတ်ဆိုးနယ်မြေ၏ အလိုဆန္ဒတော်ကပင် ထွင်းဖောက်မမြင်နိုင်ခဲ့ချေ။ ဤသည်မှာ အဆုံးမဲ့ကမ္ဘာများအတွင်း တစ်မူထူးခြားသော ဖြစ်ရပ်တစ်ခုပင်ဖြစ်သည်။
စမ်းသပ်မှုကို အောင်မြင်စွာ ကျော်ဖြတ်ပြီးနောက်... ကုချန်သည် ကျေနပ်စွာ ပြုံးလိုက်၏။ အရာအားလုံးသည်... သူမျှော်လင့်ထားသည့်အတိုင်းပင်။ သူ၏လက်ရှိရုပ်ခန္ဓာသည်... ကမ္ဘာနှစ်ခုကြားရှိ နယ်စပ်ကို... အခက်အခဲမရှိ ဖြတ်ကျော်နိုင်ရုံသာမက... နတ်ဆိုးနယ်မြေတွင်လည်း ဒေသခံတစ်ဦးကဲ့သို့ လွတ်လပ်စွာ နေနိုင်ပေသည်။
နယ်ခြားတဖက်တွင် တပ်စွဲထားဆဲဖြစ်သော... သန်းနှင့်ချီသည့် နတ်ဆိုးစစ်တပ်ကြီးကို တစ်ချက်ကြည့်လိုက်သော်လည်း... ကုချန်သည် ထိုပုရွက်ဆိတ်များကို တိုက်ခိုက်ရန် စိတ်ကူးမရှိပေ။ ထို့အစား... သူသည် သူ၏ချီအရှိန်အဝါကို ဖုံးကွယ်ကာ... တိတ်ဆိတ်စွာ ထွက်ခွာလာခဲ့လိုက်၏။
ယခင်ကသာဆိုလျှင်... နတ်ဆိုးနယ်မြေသို့ ဝင်ရောက်ခွင့်ရသည်နှင့် ကုချန်သည်... သတ်ဖြတ်ပွဲ ကျင်းပမည်မှာ အသေအချာပင်။ အဆုံးမဲ့ကမ္ဘာ ရှိ... သက်ရှိများကို ကာကွယ်ရန်နှင့် ဖိအားလျော့ပါးစေရန်... နတ်ဆိုးအရှင်များမှစ၍ စစ်သည်များအဆုံး... အားလုံးကို သတ်ဖြတ်ပစ်မည် ဖြစ်သည်။
သို့သော်... ယခုအခါတွင် ကုချန်သည် ဤနတ်ဆိုးများကို တိုက်ခိုက်ရန်... စိတ်ဝင်စားမှု မရှိတော့ချေ။ အကယ်၍... သူသာ သတ်ဖြတ်လိုက်လျှင်... အနာဂတ်တွင် အဆုံးမဲ့ကမ္ဘာကို... မည်သူက လာရောက်ကျူးကျော်တော့မည်နည်း။
အကယ်၍ လှုပ်ရှားရမည်ဆိုလျှင်... သူပစ်မှတ်ထားမည့်သူမှာ သူ့ကို အကြိမ်ကြိမ် ပစ်မှတ်ထားခဲ့ဖူးသည့်... ရွှမ်ယိုနန်းတော်မှ ဟန်ယိုထျန်းကျွင်းသာ ဖြစ်လိမ့်မည်။ ဤပုရွက်ဆိတ်များကိုမူ သူစိတ်မဝင်စားပေ။
ယခု... သူ၏အဓိကဦးစားပေးမှာ လူသူကင်းမဲ့သော နေရာတစ်ခုကို အမြန်ရှာဖွေပြီး... လက်ရှိအဆင့်ကို ချိုးဖျက်ရန် ကြိုးစားဖို့ပင် ဖြစ်သည်။
နတ်ဆိုးနယ်မြေ ကောင်းကင်တာအို၏ လွှမ်းမိုးမှုအောက်တွင်... သူ၏အသွေးအသားတိုင်းနှင့် ဝိညာဉ်ကအစ ပျော်ရွှင်စွာ အော်ဟစ်နေကြပြီး... အဆင့်တက်ရန် ဆန္ဒပြင်းပြနေသည်ကို သူခံစားနေရသည်။
ကုချန်၏ နတ်ဘုရားအာရုံသည် ချက်ချင်းပင် ပျံ့နှံ့သွားကာ... ရွှမ်ယွမ်နတ်ဆိုးနယ်မြေ အတွင်းပိုင်းရှိ မိုင်ပေါင်းသောင်းချီ ကျယ်ဝန်းသော... လူသူမဲ့ဒေသတစ်ခုကို ရှာဖွေလိုက်၏။ ထို့နောက် တိတ်ဆိတ်စွာပင် ထိုနေရာသို့ ဦးတည်လိုက်လေသည်။
ကျောက်တုံးကျောက်ဆောင်များသာ ရှိသော လူသူမဲ့မြေရိုင်းပေါ်တွင်... ကုချန်သည် မျက်လုံးများကို အနည်းငယ်မှိတ်ကာ တင်ပျဉ်ခွေထိုင်လိုက်ပြီး... ဤကမ္ဘာ၏ အဆုံးမဲ့တာအို များကို တိတ်ဆိတ်စွာ ဆင်ခြင်သုံးသပ်နေလိုက်သည်။
သိသာထင်ရှားသည်မှာ နတ်ဆိုးနယ်မြေ၏ အဆုံးမဲ့တာအို အနှစ်သာရသည် အဆုံးမဲ့ကမ္ဘာ၏ တာအိုများနှင့် နှိုင်းယှဉ်၍မရနိုင်လောက်အောင် မြင့်မားနေခြင်းပင်။
ယခုသူလုပ်ဆောင်ရမည်မှာ... သူ၏ ကိုယ်ပိုင်တာအိုကို အသုံးပြု၍ နတ်ဆိုးနယ်မြေ၏ ကောင်းကင်မြေကြီးနှင့် ဆက်သွယ်ကာ... ကြီးမားလှသော နတ်ဆိုးနယ်မြေ အဆုံးမဲ့တာအိုများကြားတွင် သူ၏တာအိုကို အပ်နှံပြီး... အဆင့်ချိုးဖျက်မှုနှင့် ဘဝအဆင့်အတန်း မြင့်တက်မှုကို ရယူရန်ဖြစ်သည်။
အဆုံးမဲ့ကမ္ဘာ၏... ကောင်းကင်တာအို အနှစ်သာရမှာ မလုံလောက်ဘဲ အဆင့်နိမ့်နေသဖြင့်... ကုချန်၏တာအိုကို လက်ခံနိုင်စွမ်းမရှိသလို ဤကဲ့သို့သော အဆင့်မြှင့်တင်မှုကိုလည်း... မလုပ်ဆောင်ပေးနိုင်ခဲ့ချေ။
သို့သော် နတ်ဆိုးနယ်မြေ၏ တာအိုမှာမူ လုံလောက်သည်ထက်ပင် ပိုနေသေးသည်။
ကုချန် ပြုံးလိုက်သည်... သူ၏ မျက်ဝန်းနက်များထဲတွင်... အဆုံးမဲ့တာအိုမီးဖိုကြီးသည် ပြင်းထန်စွာ တောက်လောင်လာပြီး... လေဟာနယ် ဆီသို့ ဦးတည်ကာ... ကျယ်ပြန့်သော ကောင်းကင်တာအိုနှင့် ဖြည်းညင်းစွာ ပေါင်းစည်းသွားတော့သည်။
" ဝုန်း! "
ထိုအခိုက်အတန့်တွင်... ကုချန်၏ခန္ဓာကိုယ်အတွင်းမှ မရေမတွက်နိုင်သော တာအိုချည်နှောင်ခြင်း ကြိုးမျှင်များ ဖြာထွက်လာပြီး... နဂါးများကဲ့သို့ ကောင်းကင်ကိုးခုထက်သို့ တိုးဝင် ပျောက်ကွယ်သွားသည်ကို... ဝိုးတဝါး မြင်တွေ့နေရသည်။
ထို့အပြင်... ကြီးမားလှသော ကောင်းကင်နှင့်မြေကြီး စွမ်းအားများသည် ကောင်းကင်ကိုးခုထက်မှ သက်ဆင်းလာပြီး... ကုချန်၏ ခန္ဓာကိုယ်မှ ထွက်ပေါ်နေသော တာအိုကြိုးမျှင်များနှင့် ဆက်သွယ်ကာ... ချက်ချင်းပင် တောက်လောင်နေသော တာအိုမီးတောက်များအဖြစ်... ပြောင်းလဲသွား၏။
ထိုမီးတောက်များသည် တာအိုကြိုးမျှင်များမှတစ်ဆင့် ကုချန်၏ခန္ဓာကိုယ်ထဲသို့ ချက်ချင်း လောင်ကျွမ်းစီးဆင်းသွားသည်။
ဤအချိန်တွင် ကုချန်သည် သူ၏ခန္ဓာကိုယ်အတွင်းမှ ချည်နှောင်မှုများ ပြတ်တောက်သွားသည့်အသံကို ကြားလိုက်ရသကဲ့သို့ ခံစားလိုက်ရသည်။
သူ့အား ချုပ်နှောင်ထားသော အဆင့်အတားအဆီး မရှိတော့ကာ... ကြာမြင့်စွာ ရပ်တန့်နေခဲ့သော သူ၏စွမ်းအားများသည်... ချက်ချင်းပင် တိုးတက်မြင့်မားလာခဲ့၏။
ဧကရာဇ်အဆင့် ချည်နှောင်မှုများ ပြတ်တောက်သွားပြီ။ ငါ ဘယ်အဆင့်ထိ ရောက်နိုင်မလဲဆိုတာ ကြည့်ရသေးတာပေါ့။
ကုချန်၏မျက်လုံးများထဲတွင် မျှော်လင့်ချက်အရိပ်အယောင်များ ဖြတ်သန်းသွားလေသည်။
ကောင်းကင်ဧကရာဇ်အဆင့်တွင် အဆင့်ထပ်တက်ခြင်းသည် သမိုင်းတစ်လျှောက် တစ်ခါမျှ မရှိဖူးသော ဖြစ်ရပ်တစ်ခုပင်။
ပြင်းထန်စွာ တောက်လောင်နေသော... အဆုံးမဲ့တာအိုမီးတောက်များသည် ကုချန်၏ခန္ဓာကိုယ်ကို လွှမ်းခြုံထားပြီး... သူ၏ ရုပ်ခန္ဓာနှင့် နတ်ဘုရားဝိညာဉ်ကို သန့်စင်ပေးနေသည်မှာ... ပိုးတုံးလုံးမှ လိပ်ပြာအဖြစ် ပြောင်းလဲသွားစေသကဲ့သို့ပင်။
ယခုအချိန်တွင်... သူ၏ခန္ဓာကိုယ်တစ်ခုလုံးသည် ပြင်းထန်သော နတ်ဆိုးမီးတောက်များ လောင်ကျွမ်းနေပြီး... အလွန်ကြောက်မက်ဖွယ်ကောင်းသော မြင်ကွင်းတစ်ခု ဖြစ်နေ၏။
နတ်ဆိုးမျောက်ဝံအရှင်နှင့် အခြားသူများသာ... ယခုအချိန်တွင် ကုချန်ကို မြင်တွေ့ခဲ့လျှင်... သူ့အား ကြောက်ရွံ့သွားကြမည်ဖြစ်ပြီး နတ်ဆိုးနယ်မြေမှ... အစွမ်းထက်သော ပုဂ္ဂိုလ်ကြီးတစ်ဦးဟုသာ ထင်မှတ်ကြပေမည်။ ဤသူသည် ကုချန်ဖြစ်သည်ဟု မည်သို့မျှ တွေးမိကြမည် မဟုတ်ပေ။
ကုကောင်းကင်ဧကရာဇ်နှင့်... ကြောက်မက်ဖွယ် နတ်ဆိုးမီးတောက်များ... ဤအရာနှစ်ခုကို မည်သူက ဆက်စပ်တွေးတောနိုင်မည်နည်း။
.....
ကုချန် အဆင့်တက်ရန် ကြိုးပမ်းနေစဉ်.....
ရွှမ်ယွမ်နတ်ဆိုးနယ်မြေ၏ အထက် ကောင်းကင်ယံတွင်.....
ကျယ်ပြန့်ပြီး ရှေးကျသော ကောင်းကင်နှင့်မြေကြီးကြားတွင်... အဆုံးမဲ့နတ်ဆိုးချီများ ပြည့်နှက်နေပြီး... အရာအားလုံးကို ဝါးမြိုထားသကဲ့သို့ ရှိနေသည်။
လှုပ်ရှားနေသော နတ်ဆိုးချီများကြားတွင်... ရွှေရောင်ဆံပင်နှင့် ရှေးဟောင်းအနက်ရောင်ဝတ်ရုံကို ဝတ်ဆင်ထားသော... ခမ်းနားထည်ဝါသည့် ပုံရိပ်တစ်ခုကို ဝိုးတဝါး မြင်တွေ့ရသည်။ ထိုပုံရိပ်သည်... မျက်လုံးများကို မှိတ်ထားကာ ရွှံ့ရုပ်တုတစ်ခုကဲ့သို့... မလှုပ်မယှက် ရှိနေ၏။
ထိုပုံရိပ်၏ ဘေးပတ်လည်ရှိ လေဟာနယ်သည် အက်ကွဲနေပြီး... နတ်ဘုရားများနှင့် နတ်ဆိုးသုံးထောင်၏ ငိုကြွေးသံ၊ ရွတ်ဆိုသံများကို သဲ့သဲ့ကြားနေရသဖြင့်... အလွန်ထူးဆန်းကာ ကျောချမ်းဖွယ်ကောင်းလှသည်။
အကယ်၍... ရွှမ်ယိုနန်းတော်မှ ဟန်ယိုထျန်းကျွင်းသာ ဤနေရာ၌ ရှိနေပြီး... ဤပုံရိပ်ကို မြင်တွေ့ခဲ့လျှင် မြေပြင်ပေါ် ဒူးထောက်ကာ... ခေါင်းပင်မော့ရဲမည် မဟုတ်ချေ။
အကြောင်းမှာ... ရှေးဟောင်းဝတ်ရုံကို ဝတ်ဆင်ထားသော ဤပုဂ္ဂိုလ်သည်... ကျယ်ပြန့်သော နတ်ဆိုးနယ်မြေ ရာပေါင်းများစွာကို အုပ်စိုးသည့်... အထွတ်အထိပ် အင်မော်တယ်ဘုရင်... ရှီမိုကောင်းကင်အရှင်ပင် ဖြစ်သောကြောင့်တည်း။
ရွှမ်ယွမ်နတ်ဆိုးနယ်မြေသည် သူပိုင်ဆိုင်သော အားနည်းသည့် နယ်မြေများထဲမှ တစ်ခုသာ ဖြစ်သည်။
ရွှမ်ယွမ်နတ်ဆိုးနယ်မြေတွင်... မြင့်မားသောနေရာ၌ ရှိနေသည့် ဟန်ယိုထျန်းကျွင်းပင်လျှင်... အခြားနတ်ဆိုးနယ်မြေများမှ အစွမ်းထက်ပုဂ္ဂိုလ်များ စုပေါင်းဂါရဝပြုကြသည့်... ရှီမိုကောင်းကင်အရှင်ကို အဝေးမှသာ ဖူးမြော်ခွင့်ရခဲ့ဖူးပြီး... အနားသို့ ကပ်ခွင့်ပင် မရှိခဲ့ချေ။
ဤရှီမိုကောင်းကင်အရှင်သည် နှစ်ပေါင်းများစွာ ကြာမြင့်အောင် တိတ်ဆိတ်စွာ အနားယူနေခဲ့ခြင်း ဖြစ်သည်။
ရုတ်တရက်... ရှီမိုကောင်းကင်အရှင်သည် အကြောင်းရင်းတစ်စုံတစ်ရာရှိသကဲ့သို့... ခေါင်းကို ဆက်ကနဲ မော့လိုက်၏။ ပိတ်ထားသော မျက်လုံးများ ပွင့်လာပြီး... အရာအားလုံးကို ဆုတ်ဖြဲနိုင်သော စူးရှသည့် အကြည့်နှစ်ခုသည်... အဆုံးမဲ့နတ်ဆိုးချီများကို ဖြတ်သန်းကာ... အောက်ဘက်ရှိ ကျယ်ပြောလှသော နတ်ဆိုးနယ်မြေဆီသို့... ထိုးဖောက်သွားလေတော့သည်။
အခန်း ( ၂၇၀ ) - ရှီမိုနတ်ဆိုးအရှင်၏ သံသယ၊ အောင်မြင်စွာ အဆင့်တက်ခြင်း၊ အင်မော်တယ်ဘုရင်နှင့် ယှဉ်နိုင်စွမ်း
" ဒီအရှိန်အဝါက... "
သတ္တုချင်းပွတ်တိုက်သံကဲ့သို့ စူးရှသောအသံသည် ကျယ်ပြန့်သော ကောင်းကင်နှင့်မြေကြီးကြားတွင် ပဲ့တင်ထပ်သွား၏။
ရှီမိုကောင်းကင်အရှင်၏ မျက်လုံးများထဲတွင်... ကမ္ဘာလောက ဖန်တီးခြင်းနှင့် နယ်ပယ်အသီးသီး ပျက်စီးခြင်းတို့၏... ကြောက်မက်ဖွယ်ရာ ပုံရိပ်များ လှည့်ပတ်နေသည်ကို ဝိုးတဝါး မြင်တွေ့နေရသည်။
ထိုအခါ သူ၏မျက်နှာပေါ်တွင် လေးနက်မှုနှင့် အံ့သြမှု အရိပ်အယောင်များ ပေါ်ထွက်လာ၏။
အကယ်၍ ရှီမိုကောင်းကင်ဘုံမှ နတ်ဆိုးအရှင်များသာ ဤမြင်ကွင်းကို မြင်တွေ့ခဲ့လျှင် အလွန်အမင်း တုန်လှုပ်သွားကြပေလိမ့်မည်။
ဤပုဂ္ဂိုလ်ကား နတ်ဆိုးနယ်မြေ၏ အထွတ်အထိပ် တည်ရှိမှုများထဲမှ တစ်ပါးဖြစ်သော ကြီးမြတ်လှသည့် ရှီမိုကောင်းကင်အရှင် ဖြစ်ပေသည်။
ဤလောကတွင် မည်သည့်အရာက ကြီးမြတ်သော ရှီမိုကောင်းကင်အရှင်အား လေးနက်သွားစေနိုင်သနည်း။
" ချီရှောင် သေဆုံးသွားပြီးတာတောင် အခု နောက်ထပ်တစ်ယောက် ထပ်ပေါ်လာပြန်ပြီလား... ငါ့ရဲ့ ရှီမိုကောင်းကင်ဘုံက ဘာလို့ ဒီလောက်တောင် ဂဏှာမငြိမ် ဖြစ်နေရတာလဲ "
ရှီမိုကောင်းကင်အရှင်၏ မျက်နှာထားမှာ အနည်းငယ် မဲမှောင်နေသည်။
ရှီမိုကောင်းကင်ဘုံအောက်ရှိ... ကျယ်ပြန့်သော နတ်ဆိုးနယ်မြေအတွင်းမှ နတ်ဆိုးတစ်ကောင်သည်... အထွတ်အထိပ် အင်မော်တယ်ဘုရင်အဆင့်ကို ဝင်ရောက်ရန် ဝင်ရောက်စီးနင်းတိုက်ခိုက်နေသည်ကို... သူအာရုံခံမိလိုက်သောကြောင့် ဖြစ်သည်။
ဘယ်သူက အင်မော်တယ်ဘုရင်အဆင့်ကို တက်လှမ်းဖို့ ကြိုးစားနေတာလဲ။
ချီရှောင်သည်တော့ သေဆုံးသွားခဲ့ပြီဖြစ်၏။ ကျန်သည့် နတ်ဆိုးအရှင်များကို သူကောင်းကောင်းသိသည်။ သူတို့ထဲတွင် ယခုအချိန်၌ အင်မော်တယ်ဘုရင်အဆင့်သို့ တက်လှမ်းနိုင်စွမ်းရှိသူ တစ်ဦးမျှမရှိပေ။
အခြား နတ်ဆိုးကောင်းကင်ဘုံများမှ ပုဂ္ဂိုလ်များ ဖြစ်နေမည်လော။
ရှီမိုကောင်းကင်အရှင်၏ မျက်လုံးများမှာ တောက်ပလာပြီး... သူ၏နတ်ဘုရားအာရုံကို ချက်ချင်း စေလွှတ်ကာ... ကျယ်ပြန့်သော နတ်ဆိုးနယ်မြေများအတွင်း ထိုးဖောက်ဝင်ရောက်၍... အင်မော်တယ်ဘုရင်အဆင့်သို့ တက်လှမ်းရန် ကြိုးစားနေသော... ထိုလျှို့ဝှက်ဆန်းကြယ်သည့် ပုဂ္ဂိုလ်ကို ရှာဖွေလိုက်သည်။
သို့သော်... သူ၏နတ်ဘုရားအာရုံ အပြည့်အဝ မရောက်ရှိမီမှာပင်... အင်မော်တယ်ဘုရင်အဆင့်၏ သဲ့သဲ့မျှသော အရှိန်အဝါသည်... ချက်ချင်းဆိုသလို ခြေရာလက်ရာမကျန် ပျောက်ကွယ်သွားသည်ကို တွေ့လိုက်ရသဖြင့်... အံ့အားသင့်သွားရသည်။
" ဒါ ဘယ်လိုလုပ် ဖြစ်နိုင်မှာလဲ "
ရှီမိုကောင်းကင်အရှင်၏ မျက်နှာတွင်... ဇဝေဇဝါဖြစ်နေသော အမူအရာများ ပေါ်လာကာ... နားလည်ရန် ခက်ခဲနေပုံရသည်။
သက်ရှိတစ်ဦး အင်မော်တယ်ဘုရင်အဆင့်သို့ တက်လှမ်းခြင်းသည် နေ့ချင်းညချင်း ပြီးမြောက်နိုင်သော ကိစ္စမဟုတ်ပေ။
သို့သော်... စောစောက ပေါ်ထွက်လာသော အင်မော်တယ်ဘုရင်အဆင့် အရှိန်အဝါသည်... အသက်ရှူချိန် အနည်းငယ်မျှသာ ကြာမြင့်ကာ... လုံးဝ ပျောက်ကွယ်သွား၏။ ဤသည်မှာ... အင်မော်တယ်ဘုရင်အဆင့် တက်လှမ်းခြင်း၏... ပုံမှန်လုပ်ငန်းစဉ်နှင့် လုံးဝ ကွဲပြားနေလေသည်။
အဆင့်တက်ဖို့ ကြိုးစားရင်း ကျရှုံးသွားတာများလား။
ရှီမိုကောင်းကင်အရှင်သည် သံသယဖြစ်မိသော်လည်း ဤသည်မှာ အဖြစ်နိုင်ဆုံးသော ဖြေရှင်းချက်တစ်ခုပင်။
သာမန်အသိအရဆိုလျှင်... အင်မော်တယ်ဘုရင်အဆင့်ကို တက်လှမ်းရန် ရည်ရွယ်ထားပါက... သေချာပေါက် ပြည့်စုံစွာ ပြင်ဆင်ထားရမည်။ ကြိုးစားလိုက်သည်နှင့် ချက်ချင်း မည်သို့ ကျရှုံးနိုင်မည်နည်း။
ဤသည်မှာ စဉ်းစား၍ပင် မရနိုင်သော ကိစ္စဖြစ်သည်။
အတင်းအဓမ္မ အဆင့်တက်ရန် ကြိုးစားခဲ့သော ချီရှောင်ပင်လျှင် နောက်ဆုံးမကျရှုံးမီ တစ်ရက်နီးပါး ကြံ့ကြံ့ခံနိုင်ခဲ့သည် မဟုတ်ပါလော။
ဒါမှမဟုတ် ငါ့ရဲ့တုံ့ပြန်မှုကို စမ်းသပ်ဖို့ တမင်လုပ်လိုက်တာလား။
ဤအတွေးဝင်လာသောအခါ... ရှီမိုကောင်းကင်အရှင်၏ မျက်နှာထားသည် လေးနက်သွားကာ... သံသယများ ဖြစ်ပေါ်လာ၏။ ဤအရာများ မည်သည့်အတွက်ကြောင့် ဖြစ်ပျက်နေရသည်ကို သူနားမလည်နိုင် ဖြစ်နေသည်။
" တကယ့်ကို ထူးဆန်းတဲ့ ဖြစ်ရပ်ပဲ..... "
ကျယ်ပြန့်သော ကောင်းကင်နှင့်မြေကြီးတစ်လျှောက်တွင်... သံသယများနှင့် နားမလည်နိုင်ခြင်းများ ပြည့်နှက်နေသော... ရှီမိုကောင်းကင်အရှင်၏ ရှေးဟောင်းအသံကြီးသာ ပဲ့တင်ထပ်နေတော့သည်။
.........
ရွှမ်ယွမ်နတ်ဆိုးနယ်မြေ အတွင်းတွင် ဖြစ်သည်.....
ကောင်းကင်နှင့်မြေကြီးကို ဆက်သွယ်ထားသော... မရေမတွက်နိုင်သည့် တာအိုကြိုးမျှင်များ လောင်ကျွမ်းသွားသည်နှင့်အမျှ... ကုချန်၏ စွမ်းအားများသည် ကောင်းကင်ဧကရာဇ်အဆင့်မှ... အင်မော်တယ်နယ်ပယ်သို့ အောင်မြင်စွာ ထိုးဖောက်ဝင်ရောက်သွားတော့သည်။
စစ်မှန်သော အင်မော်တယ် အစောပိုင်းအဆင့်၊ စစ်မှန်သော အင်မော်တယ် အထွတ်အထိပ်၊ အင်မော်တယ်အရှင် အစောပိုင်းအဆင့်၊ အင်မော်တယ်အရှင် အထွတ်အထိပ်.....
ကုချန်၏ ကိုယ်တွင်းချီအရှိန်အဝါသည် အဆင့်များစွာကို ချက်ချင်းဆိုသလို ခုန်ကျော်တက်လှမ်းသွား၏။
ကျယ်ပြောလှသော ကောင်းကင်ဘုံများကို ကြည့်လိုက်လျှင် ဤသည်မှာ အံ့မခန်းဖွယ်ရာ စွမ်းဆောင်မှုတစ်ခုပင်။
အဘယ်ကြောင့်ဆိုသော်... ကျင့်ကြံခြင်းအဆင့်တက်ခြင်းသည် အဆင့်တစ်ခုတက်ရန်ပင် အလွန်ခက်ခဲလှပြီး... အချိန်ကြာမြင့်စွာ ကျင့်ကြံအားထုတ်မှုနှင့် စုဆောင်းမှုများ လိုအပ်သောကြောင့်ဖြစ်သည်။
ကုချန်ကဲ့သို့ အသက်ရှူချိန်အနည်းငယ်အတွင်း အဆင့်များစွာ ခုန်ကျော်တက်လှမ်းနိုင်သော သက်ရှိမျိုး မည်သို့ ရှိနိုင်မည်နည်း။
သို့သော် ကုချန်မှာမူ တည်ငြိမ်နေဆဲပင်...သူ ဤမျှ လျင်မြန်စွာနှင့် သဘာဝလွန် အဆင့်တက်နိုင်ခြင်းမှာ... သူ၏စုဆောင်းထားရှိမှုသည် သာမန်လူများထက်... သန်းပေါင်းများစွာ ပိုမိုနက်ရှိုင်းသည်ကြောင့် ဖြစ်ကြောင်းကို သူသိသည်။
နောက်ဆုံးတွင် ကုချန်၏အဆင့်သည် အင်မော်တယ်အရှင် အထွတ်အထိပ်ကို ကျော်လွန်ပြီးမှသာ ရပ်တန့်သွားလေသည်။
" နောက်ဆုံးတော့ ပြီးသွားပြီ "
ကုချန်သည် မတ်တတ်ရပ်လိုက်လျက် သက်ပြင်းရှည်တစ်ချက်ချကာ သူ၏လက်ရှိအဆင့်ကို သေချာအာရုံခံကြည့်လိုက်လေသည်။
အတားအဆီးကို ချိုးဖျက်ပြီးနောက်... သူသည် ဆက်တိုက်မြင့်တက်လာခဲ့ပြီး... အင်မော်တယ်အရှင် အထွတ်အထိပ်အဆင့်တွင်... တည်ငြိမ်စွာ ရပ်တန့်သွား၏။
အင်မော်တယ်အရှင် အထွတ်အထိပ်ဟု ပြောလျှင် လုံးဝမမှန်ကန်သေးပေ။ အကြောင်းမှာ... သူ၏လက်ရှိအဆင့်သည် ထိုအဆင့်ထက် များစွာကျော်လွန်နေကြောင်း... ကုချန် ရှင်းလင်းစွာ ခံစားနေရသောကြောင့်ဖြစ်သည်။
တစ်ကြိမ်တည်းနှင့် အဆင့်တက်လိုက်ချိန်တွင်... အင်မော်တယ်ဘုရင်အဆင့်၏ တံခါးပေါက်ဝကို ထိတွေ့မိနေပြီဖြစ်ကာ... ခြေတစ်လှမ်းလှမ်းလိုက်ရုံဖြင့် အင်မော်တယ်ဘုရင်အဆင့်သို့ ရောက်ရှိတော့မည်ဖြစ်သည်။
ထို့ကြောင့် သူ၏လက်ရှိအဆင့်ကို 'အင်မော်တယ်ဘုရင်တစ်ပိုင်း' ဟု ခေါ်ဆိုခြင်းက ပိုမိုသင့်လျော်ပေလိမ့်မည်။
ထို့အပြင် ဤသည်မှာ သူ၏ အပြင်ပန်းအဆင့်သာ ဖြစ်သည်။
အမှန်တကယ်တွင်... 'ကောင်းကင်ဘုံအလုံးစုံ အမှန်တရား နားလည်ခြင်း' ၏ မြှင့်တင်ပေးမှုအောက်တွင်... ကုချန်၏ တာအိုနိယာမများအပေါ် နားလည်သဘောပေါက်မှုနှင့် ကျင့်ကြံမှုသည်... အင်မော်တယ်ဘုရင်တစ်ပါးနှင့် တန်းတူဖြစ်နေပြီဟု ဆိုလျှင်လည်း မမှားပေ။
" အခု ငါ့အဆင့်က အင်မော်တယ်ဘုရင်တစ်ပိုင်း ဖြစ်ပေမယ့်... 'ကောင်းကင်ဘုံအလုံးစုံ အမှန်တရား နားလည်ခြင်း' ရယ် 'ချီတစ်ခုမှ သန့်စင်သူသုံးပါး ခွဲထွက်ခြင်း' နဲ့.....
လျှို့ဝှက်ဆန်းကြယ်တဲ့ ခေါင်းတလားအဖုံးကနေ ရရှိခဲ့တဲ့... ဓားသိုင်းပညာရပ်တွေကို ထည့်ပေါင်းလိုက်ရင်... ငါ့ရဲ့တိုက်ခိုက်ရေးစွမ်းရည်က အင်မော်တယ်ဘုရင်တစ်ပါးနဲ့ ယှဉ်နိုင်လောက်တယ် "
ကုချန်သည် စိတ်ထဲတွင် တွက်ဆလိုက်၏။
အင်မော်တယ်နယ်ပယ်သို့ ဝင်ရောက်စမှာပင် အင်မော်တယ်ဘုရင်နှင့် ယှဉ်ပြိုင်နိုင်နေပြီဖြစ်သည်။
ဤအကြောင်းကို ပြောပြလျှင် မည်သူမျှ ယုံကြည်မည်မဟုတ်ပေ။
အင်မော်တယ်နယ်ပယ်နှင့် နတ်ဆိုးနယ်မြေမှ အင်မော်တယ်ဘုရင်များပင်လျှင် ဤသည်ကို စိတ်ကူးယဉ်ပုံပြင်ဟုသာ ထင်ကြပေလိမ့်မည်။
အဘယ်ကြောင့်ဆိုသော် ဤကိစ္စသည် ယုံနိုင်စရာမရှိလောက်အောင် ဖြစ်နေသောကြောင့်တည်း။
လူသားနယ်ပယ်မှ အဆင့်တက်လာကာ တိုက်ခိုက်စွမ်းရည်မှာ အင်မော်တယ်ဘုရင်နှင့် တန်းတူဖြစ်နေသည်လော။
သို့ဆိုလျှင်... သေမတက် ကြိုးစားကျင့်ကြံနေကြရသော စစ်မှန်သော အင်မော်တယ်များနှင့်... အင်မော်တယ်အရှင်များကို ဘယ်နားသွားထားရမည်နည်း။
" အံ့ဩစရာမရှိပါဘူး... ဧကရာဇ်အဆင့် ပုဂ္ဂိုလ်တွေက... အင်မော်တယ်နယ်ပယ်မှာတောင် ဒဏ္ဍာရီတွေအဖြစ် မြင့်မားတဲ့နေရာမှာ ရှိနေကြတာပဲ.....
ငါက... ကောင်းကင်ဧကရာဇ်အဆင့်ကနေ အင်မော်တယ်နယ်ပယ်ကို တက်လှမ်းလိုက်တာဆိုတော့... အင်မော်တယ်ဘုရင်နဲ့ ယှဉ်နိုင်တာပေါ့... သာမန် ဧကရာဇ်အဆင့် ကျင့်ကြံသူတွေဆိုရင်တောင်... အင်မော်တယ်နယ်ပယ်ကို ရောက်ရင် အင်မော်တယ်အရှင်နဲ့ ယှဉ်နိုင်လောက်တယ် "
" အဲ့ဒီလို ပုဂ္ဂိုလ်တွေကို စစ်မှန်တဲ့ အင်မော်တယ်တွေက ကြောက်ရွံ့လေးစားကြတာ ပုံမှန်ပါပဲ "
ကုချန်သည် တိုးတိတ်စွာ ရေရွတ်လိုက်၏။
စင်စစ်တွင်... သူကိုယ်တိုင်ပင် အင်မော်တယ်နယ်ပယ်သို့ အဆင့်တက်လိုက်ခြင်းက... သူ၏ တိုက်ခိုက်စွမ်းရည်ကို ဤမျှအထိ တိုးတက်စေလိမ့်မည်ဟု... မမျှော်လင့်ခဲ့မိပေ။
မူလက သူ၏တိုက်ခိုက်စွမ်းရည်သည် သာမန် အင်မော်တယ်အရှင်များကိုသာ ချေမှုန်းနိုင်ခဲ့သည်။
ယခု ကောင်းကင်ဧကရာဇ်အဆင့်ကို ချိုးဖျက်ပြီးနောက်... သူ၏အဆင့်သည် အင်မော်တယ်ဘုရင်အဆင့်သို့ မရောက်သေးသော်လည်း... သူ၏ စစ်မှန်သော တိုက်ခိုက်စွမ်းရည်မှာမူ... အင်မော်တယ်ဘုရင်နှင့် ယှဉ်နိုင်နေပြီဖြစ်သည်။
အကယ်၍... သူသာ နောက်တစ်ကြိမ် အဆင့်ထပ်တက်ပြီး... အင်မော်တယ်ဘုရင်အဆင့်တွင် အခိုင်အမာ ခြေကုပ်ယူနိုင်ခဲ့လျှင်... သူ၏ စစ်မှန်သော တိုက်ခိုက်စွမ်းရည်သည် အင်မော်တယ်ဘုရင်အဆင့်ရှိ တည်ရှိမှုအားလုံးကို... ချေမှုန်းနိုင်မည် မဟုတ်ပါလော။
ကုချန်သည် မတွေးဘဲ မနေနိုင်တော့ပေ။
" ဝုန်း! "
အချိန်တစ်ခုအကြာတွင်... အဆုံးမဲ့ဓားသည် အလိုအလျောက် ပျံသန်းထွက်ပေါ်လာကာ... ကုချန်၏ ဘေးပတ်လည်တွင် လှည့်ပတ်နေ၏။ ဓားသွားအဖျားသည် တုန်ခါနေကာ... ကုချန် အဆင့်တက်သွားသည့်အတွက်... စိတ်လှုပ်ရှား ပျော်ရွှင်နေပုံရသည်။
မရပ်မနား ပျံသန်းနေသော အဆုံးမဲ့ဓားကို ကြည့်ရင်း ကုချန်သည် ကျေနပ်စွာ ရယ်မောလိုက်၏။
" မပူပါနဲ့ မင်းအဆင့်တက်ဖို့အတွက် ကောင်းကင်သတ္တုတွေကို ငါမကြာခင် ရှာပေးပါ့မယ် "
ယခု... ကုချန်၏ တိုက်ခိုက်စွမ်းရည်သည် အလွန်အမင်း တိုးတက်လာသဖြင့်... ယခင်က အလွန်အသုံးတည့်ခဲ့သော အဆုံးမဲ့ဓားသည်... ယခုအခါ အနည်းငယ် အားနည်းနေပြီဖြစ်သည်။
ချီလျန်မျိုးနွယ် ထံသွားရောက်ကာ... ကောင်းကင်သတ္တုများ ရယူ၍ အဆုံးမဲ့ဓားကို အဆင့်မြှင့်တင်ရန်မှာ... အရေးကြီးလာပြီဖြစ်သည်။
အဆုံးမဲ့ဓားကဲ့သို့... အဆင်ပြေသော အင်မော်တယ်လက်နက် ရှိမှသာ... ကုချန်သည် သူ၏ အပြင်းထန်ဆုံး တိုက်ခိုက်စွမ်းရည်ကို... အပြည့်အဝ ထုတ်သုံးနိုင်မည် ဖြစ်သည်။
သို့သော် ချီလျန်မျိုးနွယ်ထံ မသွားရောက်မီ သူလုပ်စရာ ကိစ္စတစ်ခု ကျန်သေး၏။
ဤအကြောင်းကို တွေးမိသောအခါ ကုချန်၏ အကြည့်များသည် ရွှမ်ယွမ်နတ်ဆိုးနယ်မြေ၏ အတွင်းပိုင်းသို့ ရောက်ရှိသွားလေသည်။
ထိုအကြည့်၏ ဉီးတည်ရာသည်... ရွှမ်ယိုနန်းတော် တည်ရှိရာ... နေရာပင် ဖြစ်သည်။